منصور الجداوي

السلام عليكم الله يعطيك العافيه ومشكور على هاذا الأهتمام صديقي والله لايحرمني منك حبيبي بالنسبه للي غنيته في المتحف السنه والله انا دايم فيني عاده اني ماحب اسمع نفسي ولكن اعتقد انه كان فيه تسجيل بس يخص ادارة المتحف وفيه واحد اسمه عزيز صور بالفيديو كل اغانيي لأني غنيت مرتين مره بالأورغ ومره بدونه واعتقد انه جريب راح ينسخ ويبيع خبرك حق الفضايح بس اوعدك اذا لقيت نسخه باخبرك وتسلم على التواصل وعاشت عاشت المه العربيه

السلام عليكم اخواني واخواتي كيف حالكم الحقيقه وباختصار انا باني فله على قدي وماخليت شي وماحطيت فيها ولأن الأوان فلتي انحصرت في درجات البني قلت ابي قطوه سياميه بيور ماتتعدى ال 3 شهور وكبرت براسي السالفه ودرت لين دار راسي مالقيت اللي ابيه فقلت يمكن احصل احد يدلني فماوصيكم اللي عنده او يعرف احد عنده سيده يصورها لأن ابيها نثيه ويحطلي ايميله او رقم تلفونه في رسائل خاصه وانا على طول اهجم عليه لاتخلون عاد والله يعطيكم العافيه .

وانت بخير يالبرازيلي وتسلم على التهنئه ماعليك انشالله باتعلم وباهني كل اللي موجودين عندي عبر الأيميل بس خل شوي اتثقف زياده

اشكرج اختي على هاذا الأهتمام وحياج الله بأي وقت واعتبري المكان مكانج وانا بعد اهنيج وقولج الشهر عليكم مبارك وعيدكم مبارك مره وحده جديدي انشالله مسلسل اسمه ملامح بشر وراح ينعرض على قناة البحرين الفضائيه وانشالله يعجبج دوري وانشالله بعد العيد راح ازيد من نشاطي واتشوفيني في التلفزيون اكثر من دعاية الكولا

صنقيمه يرحب بكم عبر اسلاك النت اخ انا ماباط جبدي الا مهند اخ بس ياريتني ابيض ولااذا على العيون العدسات ماتقول شي بس صبغتي والحرار ماينفع معاهم حل لا وجو البحرين قص الحديد شيسوي بالويوه

السلام عليكم احبابي ورحمة الله وبركاته في البدايه اسمحولي على هاذا التأخير بس والله انا جدا مقل بدخول المنتدى والسب تصويري بالعمل الجديد واللي تغير اسمه الى ملامح بشر فأعذروني والثاني اني بهاذا المسلسل حبيت ان اكون قريب من المعجبين اللي تعودو علي في جميع اعمالي لازم تكون فيه ملامح كوميديه فعلشان ما اخيب ظنهم اخترت دور صحيح انه موكبير بس اعتقد انه جديد علي وراح يضفي البسمه على وجوه المشاهدين ولو انه فيه وايد لغلاغه بس يالله اتمنى ان يعجبكم دوري هاذي المره واوعدكم انشالله اني بالمره القادمه اكون اكثر انفتاحا واشتغل اكثر من عملين بالسنه لأني قررت آكل منشطات علشان تشوفوني طول السنه بالشاشه هههههههههههههه ثقيل

قوه شخباركم حبايبي انشالله تكونون بخير كلكم معزومين على رحله في صلاله علشان تتبردون شوي ومره تمرون على الجبل الأخضر يمكن احد عنده سالفه لوشي ترى حاضرين نعين ونعاون

السلام عليكم كلكم احب اهنيكم بالعيد الوطني واتمنى اني آعقل السنه وما ارقص مثل كل سنه واحب ارحب بالصديق القديم الجديد مازن الماجد وقوله اني من باجر الصبح بافتر عند مدخل الفورميلا وانشالله اصيدلي الماني لأني شاك بالجمله اللي كاتبها اظنتي سبه واحنى ياغافلين لكم الله

للحين حر

السلام عليكم ورحمة الله وبركاته الى احبابي اعضاء منتدى بحرين تودي الكرام اما بعد اتشرف بدعوتكم لمشاركة الخوال شعورهم لهاذا اليوم والموسم هاذا اللي مادري شفيه ماصارت حاله هاذي الحر متى بيخلص الحقيقه ملينا من هالجو محد راضي يعطينا ويه وان قعدنا يم احد قام يعرق تقولون قاعد يم فرن شلون يعني نروح لسكيمو ليما يبرد جو هالديره والاخير جرب موعد التخيم وللحين مابرد الجو وانا بأسم الخوال اطالب النواب بتوفير مكيفات في جميع خيام الخوال وتكون قوتها 40 طن علشان الخوال لايحسون بالتمييز العنصري وانتظر تواصلكم

اليوم ( السبت ) الوقت ( الظهر ) النفسيه ( تعبانه حدها ) والسبب خوال والظهر وللحين مابرد الجو ليمتى يعني

السلام عليكم ورحمة الله وبركاته احبابي اعضاء منتداي الكرام في البدايه احب ان اهنيكم بالعيد واقول لكم كل عام وانتو بخير وانشالله ينعاد عليكم بالخير الحقيقه انا مادري شاقولكم ولو صفيت 100 سطر ماقدرت اوفيكم حقكم بس كل اللي اقدر اقوله الله يخليكم لي والله لايحرمني من حنانكم وعطفكم علي وبأذن الله اني اكون في الأعمال القادمه عند حسن ظنكم فيني وهاذا اهداء خاص مني للظاعن ( هلي لاتحرموني منه ) وتخيلو اشلون اغنيها ههههههههههههههههه

بسم الله الرحمن الرحيم وبه نستعين احبائي اعضاء منتدى بحرين تودي الأعزاء تحيه طيبه وبعد واخص منتداي المتواضع في اعداده والغني بأصحابه لكم مني كل الحب والتقدير اما بعد فأول شي احب اهنيكم بقدوم رمضان اعاده الله علينا وعليكم باليمن والمسرات وبعد اهني نفسي بكم وبقلوبكم النظيفه الله لايخليني منها الحقيقه تواصلكم معاي في كل الأوقات يخليني انبسط لأني كونت عايله من القلوب الطيبه واخاف اني ماكون عند حسن ظنكم فيني صدقوني كل نجاح وتقدم احققه يرجع فضله لله اولا ولكم ثانيا الفنان بالبحرين مايرتفع الابجمهوره واللي يفكر ان الفلوس ترفع الفنان فهو غلطان لأنها وسيله ماهي غايه فكل الشكر لك ياحماده سكر زياده واتشرفبك صديق جديد بمنتداي وبحياتي وبقلبي واما صديقي العزيز محرقي فأسمحلي انا اللي مقصر بحقك ومنك السموحه كما وادعوكم جميعا لمشاهدة عملي الجديد عيون من زجاج وتقييمي بعيدا عن المجاملات . واخيرا لكم مني كل الحب والوفى

احبابي اعضاء منتدى البحرين اليوم الكرام السلام عليكم ورحمة الله وبركاته في الحقيقه انا اليوم ولأول مره ادخل في هاذا القسم لأناقش معاكم همومي ياجماعه اذبحونا هالجرايد بالكلام الفاضي كذبوا علينا وقالو ان الصيف السنه بيكون قارص والن الفلكيين قالو الحراره في الشرق الأوسط بتنزل الى 5 تحت الصفر وان قالوا وقالو واستانسنا وقلنا غايته اجوف الا الحر زايد وطلع كلامهم كله خرطي انا منبطه جبدي حدي يعني واعليه احنى الخوال وين نولي في هالجوا صايرين جنه دببه كله رقاد او في المحلات البارده ماصارت هاذي يا ان النواب يصكفون المنامه ويحطون فيها ايسيات يا ان يرتبون حق الخوال رحلات خارج البحرين وياريت الى القطب الجنوبي خل يذوبون الجليد يمكن من حرارتهم يزحفون الثلج صوبنا شوي خبركم مال ديرتنا مابينسونا ولا هالعذاب اللي احنى فيه واللي عنده اقتراح ثاني حياه واعذروني بس انا طقت جبدي من هالمجمعات نبي مكان بارد وبلاش بس غير ثلاجه الأموات مالت السلمانيه

ههههههههههههههههههههههههههههههههههههههههههه حرام عليك ياحمد عاد هاذي سؤال من الصبح اشوفه الله يغربل بليسك ياخي اسأل سؤال منطقي ومعقول اسأل عن سر جمالي سر اشراقتي الدائمه موهالسؤال لاوعلى الريج بعد بس عاد شسوي المشكله ان حمد له مكانه خاصه علشان جذي مجبور ارد . انا يا احبابي اصلي موبحريني انا مولود بالسعوديه بمنطقة جده واصلي من عمان بمنطقه اسمها زنجبار لأن ابوي مولود باليمن في منطقة اربد وامي بعد مولوده في راس الخيمه واصلها عماني بس في منطقه اخس وهي سواحل وهاذي المنطقه بالذات كل سكانها افارقه بس فيهم مسلمين وفيهم كاثوليك وامي اكيد من المسلمين ولاجان شفتوني كل احد بالكنيسه هههههههههههه المهم قبل اهل عمان كانو ينباعون في دول الخليج واللي عنده واحد كبير بالسن بيقولكم ان البحرين والسعوديه كان اكثر الخدم فيها من عمان خصوصا عند الشيوخ وامي كانت وحده منهم بس عاشت بالسعوديه وتعرفت على ابوي بالقصر اللي كانت تخدم فيه المهم ان امي طلبوها جماعه من شيوخ البحرين علشان تربي عيالهم وجات من السعوديه للبحرين قبل 46 سنه بس في هالوقت كانت روحاتها للسعوديه وايد المهم انا انولدت هناك وعشت 8 سنوات بس امي حبت اني اكمل حياتي بالبحرين فلما جيت البحرين ودلت المدرسه وفي الصف الأول مادري صادتني حاله وقمت اضرب كل الأصبيان اللي معاي بالصف ليما اشتكو علي عند امي وقالولها ولدج مينون قاعد يضرب زمايله بالصف ولأني وحيد ماعندي اخوان ولاخوات ولا احد عبالي هاذيله العاب وطحت فيهم المهم امي من كثر الشكاوي قالت حق المدير آن ذاك عبدالله الخثلان مدير مدرسة الرفاع الغربي الله يذكره بالخير لأنه للحين عايش تقولون تمساح شيبه وصابغ شعره تفضلوا المهم قالتله امي سامحه طال عمره هاذا الا صنقيمه وهي قصدها انه عبد مايفهم بس بلغتها واللي هي الزنجباريه وبحريني وكلمه غريبه يودوها علي من الصف الثاني لين اللحين ويانا القفاص وكملها لما خذني عنده في سنة 97 في اول مسرحياتي نار ياحبيبي نار وكان يدور اسم فني لي وقالوله لقبي وانا رفضت لأني بابتلش طول عمري عاند وحطه بالجرايد وبالبوسترات لا واللي باط جبدي وفاقع مرارتي انه الناس على بالهم انه اسم عايلتي اشدعوه وكان القفاص يبي بعد في المسلسلات يكتبه بس رفضت بشده وقلت انا لي عايله ولازم استمي بها ولاجان رحت ملح وتدرون ان فيه ناس وايد مايعرفون ان اسمي منصور وينادوني في المكانات العامه صنقيمه يالله تفضلوا وهاذي قصتي مع اللقب ها ارتاح قلبك ياحمد ههههههههههههههه

والله ياجماعه انتو عزيزين علي وانا لابد اني اكون متواصل معاكم اصلا انا بنظري اي فنان يبتدي يتكبر على جمهوره اعتبر انه بدى يرتفع الى الهوايه فنان بلا جمهور كالشيخ بلا سياره كشخه ههههههههههههه

السلام عليكم شخباركم انشالله تكونون بخير الحقيقه انا دوري بالمسلسل اعتبره جديد علي لأن مزيج بين الدراما والكوميديا اسمي بالمسلسل مبارك وهو صديق موسى المقرب وحيد بالدنيا وعايش بالحرام وكان ابوه يشتغل عند ابو موسى سايق ولما مات ابو موسى وراح حلالهم الكل تخلى عنه الا مبارك وبدو يشتغلون بالفيز وهني تصير احداث كوميديه متواصله يتخللها بعض اللحظات اللي يصحى فيها ضمير مبارك ويبتدي ينصح موسى لكن بدون فايده ليما ينتهي اللي بينهم طبعا هالمره انا اغني وارقص يعني مبارك فيه مني شوي انشالله ينال الدور على رضاكم والله يستر جان مايغيرون اسمي وينادوني بروك

السلام عليكم ورحمة الله وبركاته كل عام وانتم بخير والفنانه الحبوبه هبه الدري بألف خير كما لايفوتني ان اعتذر منكم على هاذا التأخير بالرد حيث اني كنت مشغولا ببرنامج العيد من مسرحيه الى حفلات فشكرا لكم ولكل اعضاء منتدى فنانتنا الغاليه

السلام عليكم ورحمة الله وبركاته في البدايه احب ان اعتذر عن هاذا التأخير والسبب هو انشغالي عن المنتدى طيلة ايام العيد بعمل فني جديد واحب ان اجدد بهاذه اللحظه افتخاري بكم وبحبكم لي وبسؤالكم عني فكل عام وانتم والفنان احمد صلاح الدين بألف خير والى مزيدا من التقدم انشالله الله

السلام عليكم ورحمة الله وبركاته الى اعز واحب واقرب فنان الى قلبي صديقي الفنان نضال بدر الف الف شكر على هاذا التواصل سواء منك او من احد معجبينك فأنك فنان بكل ماتحمل الكلمه من معنى الله يعوده عليكم يالمن والبركات

السلام عليكم ورحمة الله وبركاته الى صديقي وحبيبي الفنان محمد الصايغ الف الف شكر على هاذي المشاعر الطيبه تجاهي كما واتمنى ان تجمعنا الأقدار في مسرحيه ثانيه علشان نينن المنتج مثل ذيج المره