بيل وسبيستيان

الله يسلمك ويباركم فيكم .. يابنات .. مشكورين او ماقصرتو .. او حي الله كل متابعاتي الجديدات .. انشاءلله تكون يومياتي خفيفه عليكم يارب او تستمتعون .. ردودكم جميعا تفرحني واااايد والله .. بسم الله وقفت اتلفت .. الفندق كان فيه مؤتمر وزحمــه .. احسن شي ارجع عند الدسك ليما إيي .. وقفت وكانت الدقايق تمر كأنها ساعات .. قلت لا خل اروح اشوف الطريج اللي دخلنا منه كامل .. اهم خذو جناطنا بس مارضو يدخلونا الغرفه .. مايصير قبل الـ12 الظهر الساعه كانت توها 9 .. المهم مشيت بالطريج ماكو احد جان ارجع .. لفيت على اللوبي .. محد قعدت أتلفت .. وايد ناس او في واحد قاعد بطاوله كبيره .. او مافي غيرها فاضيه ..المؤتمر كان بيبدي والناس نازلين حق الريوق عشان جذي زحمه .. المهم قعدت مع الانجليزي اللي قاعد وقعدت التفت ولا الاخ قاعد بطاوله ثانيه او فارش الجريده!! او قاعد يقلب فيها .. رحت له او ويهي حممممممممممر .. انا كنت خايفه يزفني فقلت بزفه انا قبل .. قلت له وووووووووينك؟؟؟ قالي كاني ناطرج!! شفيج؟ انتي اللي مو موجوده .. قلت له مشيت شوي او رجعت مالقيتك ..رد: انا ماشفتج دخلت بغسل ويهي تعبااااااان او قالولي مابيعطوني الغرفه .. انزين او انااااااااااا قاعده ادورك؟؟؟ عمري انتي ماينخاف عليج عارفه المكان او ترطنين بعد .. او ادري بترجعين لي .. بط جبدي اللي باللوبي .. يشوفني ألف لف ماقالي انت اهني .. انزين يالله حبيبتي شنسوي اللحين؟؟ نروح انتريق .. سحبنا ورقه فيها خرايط .. سويسرا والقطارات او جينيف .. او طلعنا وصفقني البرد .. ماكنت مثقله لاني لما طلعت من الكويت كان الجو حار .. المهم يوسف كان معاه كوت خفيف او انا اللي علي قطن .. فوقه سوتر إيدها قصير خفيفه .. وفانيلتي قطن خفيف اللي تحت بس سكت .. قلت اللحين شيردني او جنطنا مادري وين ودوهم او تعال افتح او دور .. المهم .. قلت بمشي او بدفى ماسكه ايده .. لامتها .. وقفنا عند الاشاره بنعبر .. جسمي ارتجف من البرد .. استوعب قالي نرجع قلت له لا بنتعطل وبيسكرون الريوق .. قالي عادي ناكل اي شي رديت : خاطري بريوقهم .. المهم فصخ كوته .. مارضيت لانه تحته فنيله ايدها قصيره .. قالي مو بردان لبسيه .. لبسته .. حبيبي مو دب .. بس عريض فالجتوف مالت الكوت شوي او توصل لي كوعي .. وقفنا نصور عند البحيره والصوره كانت انتيكه .. وحده جنها لافه كمبل عليها ويمها واحد مصيف .. المهم .. عبرنا البحيره لي الضفه الثانيه .. الجو كان خيالي .. او شفنا الساعه الشهيره .. موقعها أول ماتعبرين الجسر للضفه الثانيه .. الضفه اللي فيها نوفوتيل او السوق هالساعه تكون عاليسار كل سنه كنت اصور معاها دايما يغيرونها والسنه شكلها كان روعه .. المهم صورنا نفس الصوره الغبيه السالفة الذكر ... او واصلنا المسير .. لين وصلنا فندق الموفنبيك .. وقعدنا حق الريوق .. اللي احبه بريوقهم الموقع .. Out door والاكل امريكي اكثر من اوروبي .. الريوق الاوروبي كونتينانتال خفايف يعني .. اكل الموفنبيك كان فيه بان كيك او وافل او هالسوالف .. فقعدنا نتريق او يوسف الحمدلله وااااايد عجبه يمنا كانت وحده عيوووز تبيع ورد .. توليب بجميع الالوان .. شكلها كان روووووووعه ويفتح النفس فكان الريوق مع الجو شي خيالي .. المهم .. بعدين لاحظت انه خشم يوسف صار احمر من البرد .. فقلت له .. ثقيل كوتك .. مع اني كنت مستمتعه يدفى ثقله .. قالي لاتشيلينه جسمج دافي بتمرضين .. قلت له حرااانه .. مو قادره اكل .. قالي ندخل داخل؟ قلت له لا .. بشيله شوي انت لبسه .. طبعا اهوا ماصدق بعد عمري .. المهم تريقنا او فرشنا خرايطنا .. قالي خاطري أئجر سياره .. قلت له مانحتاج .. كل شي قريب والقطار بيودينا المناطق اللي حوالينا .. قالي سياقتهم شكلها حلوه .. نأجر عالاقل يومين عن خاطري .. قلت له على راحتك .. المهم الويتر مالنا كان مغربي .. وقعد يسولف مع يوسف او سأله عن تأجير السيارات .. قاله روح المطار اجر احسن الاسعار اهناك .. شكره يوسف او قمنا نخلص تمشينا .. ورى الفندق في سوق حلو .. كله ماركات .. او ساعات او كلشي .. بس يتمشى الواحد بهالواجهات كفايه .. بوتيكاتهم كبيـــــــــــره وتينن .. المهم قعدنا نتمشى او رجعنا طلعنا على العيوز اللي تبيع ورد .. كانت قاعده تخيط كنزه على قولتهم .. لونها اصفر .. الصفار الحلو .. او لما وصلنا عندها يوسف شرالي ورد التوليب اللي كان عاجبني ... او سألناها اذا نقدر نوقف نصور قالت اكيد .. او قعدت على كرسيها تركب أزرة بالجاكيت اللي كانت تخيطه .. أزرتها اللي ركبتها على ورود .. ملونه وردي او أزرق فاتح او اخضر .. تهبل ماشااءلله .. فسألتها حق من تخيطينها .. قالت في محل يشترونهم مني ويبيعونها .. فقلت لها ليش انتي ماتبعين؟ قالت لي الورد كفايه ..فسألتها اذا ابيها اخذها منج او من المحل فقالت لي دقايق اخلص منها او بعطيج اياها .. حاسبناها او مشينه .. لبستهاا على طول او شكلها كان يهبل .. غرزاتها اللي مسويتها غريبه .. المهم مشينا .. وبتدى يطلع علينا التعب .. فقلنا بنتمشى شوي بالفندق لين ماإيي الوقت .. وصلنا الفندق الساعه 12 او 20 دقيقه تقريبا .. انا ماكنت قادره افتح عيني الريوق كان ثقيل .. او يوسف هم كان تعبان مانام بالطياره .. المهم فقعدنا عالكراسي نسولف عن برنامجنا بالليل قررنا نروح المطار او نرجع نتعشى بمطعم ابوي المفضل مطعم لبناني بفندق ريجموند .. المهم .. طار الوقت فقمنا او صعدنا الحمدلله على طول .. غرفتنا كانت بالدور الثامن .. منظر البحيره مع النافوره كان روعه من الدريشه .. دخل يوسف يسبح .. طلعت له هدومه من الجنطه .. طاولته اللي يحتاج او قعدت ارتب ملابسه .. بسرعه فتحت جنطتي او طلعت المبخر .. او صخنت لفحمه او حطيتها او طلعت العود الزين او فرشت فوطته ببخرها ولا ذيج الصفااااااااره اللي تدوي .. فتح الباب .. او انا خفت شصاير؟ جان يقولي هذي اللي بتخليهم يطردونا؟ والصفاره على راسنا تصفر .. قلت له ليش؟ قالي دخنة البخور الغرفه صايره ضباب المهم لف فوطته او طلع دق عليهم قال لهم انه منا.. او ياو سكروه او قالولنه الفندق ممنوع فيه التدخين كلش .. عالعموم التدخين عندهم ممنوع بكل الاماكن المغلقه . انا صار فيني احباط لاني كنت مشتطه المهم بعد مادقروني او رد ريلي يكمل سبوحه .. طلعت اغراضي انا كنت مجيسه كل منطقه بصفقه بروحها .. طلعت الكوته .. او علقتهم او دخلت بالكبت اللي ابيه او حطيت الجنطه تحت او دقيت عليهم أسألهم عن الفواحه اذا بعد تطلع جرس .. قالولي لا الشمع مايطلع .. فقلت اشوى .. انا عندي هالروايح شي مهم او متعبله بالجزاز عشان ماينكسر اخر شي يقولون لي ممنوع مايصير .. المهم .. خلص يوسف او دخلت سبحت او تيددت او شلت كلشي من ويهي ارتحت .. نشفت شعري .. او لبست الروب الدافي اوتعطرت بعطر شهر العسل او طلعت .. .. دخلت باقي الاغراض او طلعت عطوراتي او مكياجي او اشيائي اللي حق الحمام رتبت كلشي .. او حطيت الكاميرا عالشاحن .. صليت او كلمت امي او خالتي او قعدت ارد على المسجات شوي .. ولا يوسف يقولي .. صج راااااااااااحه قلت له اي اليوم هلكنا .. قالي اي بس وناسه .. طلعت من الحمام هدومي مرتبه .. وكلشي مضبط او هالروايح الزينه قلت له اي روايح زينه دقروووني .. ضحك علي قالي حق لحظه حسيت جنج يدتي .. قلت له ليش .. قالي مادري .. ساعات احس جنج بنتي .. وساعات تحسسيني جنج يدتي .. منظر النافوره من الدريشه والستاره مفتوحه شوي صج كان روووعه .. سرحت اطالع لين غطت عيني .. قعدنا منبه الساعه بعد 5 ساعات .. كانت قومت السرير متعبه .. لكن قلنا جم ساعه او بنرجع ننام .. غلبني التعب .. قلت حق يوسف شيظمن انه اللحين نروح المطار او مايطلعون مسكرين؟ اهني نفس لندن كلشي يسكر من وقت .. قالي بسأل .. دق عالرسبشن .. او انا كنت في محاوله يائسه اني اكسب هالدقايق بالنوم .. سألهم او قالوله فرع المطار مايسكر .. فطلب لنا سياره بعد نص ساعه .. فقمت قبله غسلت ويهي او خطيت كحل او شوية بلاشر .. او كان عندي حمره حمره حق الليل او ورديه حق النهار فحطيت الحمره .. او طلعت السيديات اللي عطتني اياهم بدور .. واخترت واحد منهم ماعليه اسم قلت احنا وحضنا عشان تظل اغانيه تذكرنا في جينيف بس المهم جهز اهوا بسرعه او نزلنا ننتظر السياره تحت .. كان الفندق حياه بس طبعا غير عن حياة الصيف .. بالصيف يعج هاللوبي بالخليجيين .. واللحين يعج بناس من جميع انحاء العالم .. تشوف مجموعة يابانيين او مجموعه ثانيه سمر من احد دول افريقيا ومجموعه هنديه او بريطانيه .. او زحمه ماشاءلله .. وصلت السياره او ركبنا او اتجهنا لي المطار .. وصلنا او سألنا عن مكتب التأجير ودلونا .. وصلنا او كان في اجراءات وايد .. خصوصا للي يسوق لأول مره او تأمين او هالسوالف .. استأذنت يوسف لاني بالطريج شفت طاولات الانترنت او قلت له بروح او برجع لك .. قالي اوكي او انا اتمشى شفت محل يبيع خطوط للموبايل .. شريت خطين او رحت شبكت او طبعا لقيت صعوبه في دخول الانترنت لكن الحمدلله بعد عناء قدرت اكلمكم .. حسيت اني تأخرت شوي على يوسف فرجعت له او كان على وشك انه يخلص فوقفت اركب الشرايح لي وله .. او بعدها استلمنا سيارتنا او ركبنا .. حددنا النفيجيشر على فندق ريجموند فطلعت لنا الخريطه او كلشي واضح .. فقلت حق يوسف العشى تو الناس عليه .. خل نروح نتمشى شوي .. استرجع الذكريات .. شجعني .. انا كنت ادل كلشي من المحطه .. فأتجهنا المحطه على انغام السيدي او كان تفس الريمكس لاحلى اغاني عبدالمجيد اول اغنية اشتغلت كانت ولا تسوى حياتي بعد منك .. يحز بخاطري بالحيل انك .. قدرت تعيش وكنه ماحصل شي انا توي .. انا توي .. على طاريك فزيت .. قدرت تعيش وكنه ماحصل شي .. عطني وعد انك تمر تلقاني اصبر لك عمر .. ارجع ابيك قرر تجيني ولا حالا انا اجيك .. .. يسألوني الناس وينك واحبس الدمعه .. ليه مبعد عنك والاحباب مجتمعه مايجيك اللي يجيني لا عبر طيفك .. اختلف ماحس فيني القاي ناديتك اقترب مني تعال رد لي روحي .. شوف غرس الحب طال من سبب نوحي تاصل جذوره جذور الارض بجروحي من المحطه مرينا على مجمع Manor طبعا كان مسكر او بعدها رحنا للشارع اللي فيه المطاعم ماكدونالدز او برجر كنج .. او تمشينا لين وصلنا للـ Old town او وقفنا السياره اهناك او نزلنا نتمشى .. اول مره اييها بالليل كلشي مسكر لكن الجو كان عجيب .. او الزرع او كل شي رائع سبحان الله .. كنا نمشي ونصور صور حلوه وهبله او كلشي .. خلصنا هالجوله او رجعنا السياره ورحنا الفندق .. اللي خذ منا السياره نصحنا نروح عند البحيره لانه كان بعد نص ساعه كان في عرض ألعاب ناريه . انا كنت اظن هالشي بس ايام الكرنفال بالصيف .. فرحنا بسرعه او شفنا الزحمه .. عكس الصبح .. المهم وقفنا وبتدت الالعاب الناريه .. طبعا العرض كان روعه .. خلصناه او رحنا مسرعين للمطعم .. كان فل او كان المفروض نحجز بس قال لنا انتظروا فانتظرنا شوي .. ولما جهزت طاوله دخلنا .. طبعا هالمطعم من اروع المطاعم اللبنانيه فالعالم .. فلبنان ماضقت نفس هالاكل لا في منير ولا برج الحمام ولا اي مكان ثاني .. الجو كله كان رووووووووعه هدوء .. او اغاني فيروز .. والوجه الحسن على قولة يوسف .. استانسنا او ماكان ودنا نقوم .. الساعه 12 دفعنا او رجعنا فندقنا واحنا فالطريج كلمت اختي .. استرجع معاها الذكريات ... احترق قلبها قالت لي ييبيلي تيك اوي وانتي يايه قلت لها انشاءلله سكرته منها او كلمنا بدور شوي .. او بعدين دخلنا الغرفه صلينا.. قطينا ملابسنا عالكرسي من التعب او نمنا .. قعدت الصبح قبل يوسف .. شلت ملابسنا لمبذذه او دخلت اسبح .. لبست توب طويل ملون ألوانه فاتحه.. او فوق سوتر بيضه او جينز .. او نزلنا حق الريوق كليت شي خفيف او كعادتي ايام ماكنت بنيه اخذ من الريوق علبة كورن فلكس او اوديها حق البجع فالبحيره .. طلعنا نتمشى عالبحيره او اخذنا تذكرتين لرحله الباخره البحريه .. حق باجر الصبح .لانه باجر الاحد او كلشي مسكر عندهم المهم تمشينا أكلنا البجع او رجعنا اخذنا سيارتنا او اتجهنا للوزان لوزان تبعد بالسياره عن جينيف حوالي الساعه إلا ربع .. بالقطار اقل على مااذكر .. للي يروح بالصيف ويمل من زحمة العرب انصحه يروح يريح باله جم ساعه بلوزان .. مناظر روعه .. وجو حلو وهدوء غريب واحنا نتمشى اهناك لقينا ريال او مرته كويتيين .. ستانسو لما شافونا كثر مااستانسنا بشوفتهم .. لانه بهالفتره من السنه نادر اللي نشوف عرب .. المهم سولفنا وياهم شوي .. اهما شاريين شقه بلوزان او اييون بأي فتره ممكنه .. او قالو انه الناس فالصيف احيانا يسكنون اهني او بمونترو لانه يطلع عليهم ارخص .. والقطار تذاكره الاسبوعيه ارخيصه .. طبعا هالمعلومه انشاءلله تفيد اللي بيروحون اهناك .. المهم .. نرجع حق لوزان .. اتركم مع بعض الصور .. حق منطقة لوزان أجرنا جواري او قعدنا نتلاحق على طريق مخصص للقواري .. بعدين نزلنا او تمشينا او رجعنا عند البحيره ونشوف غروب الشمس .. المنظر .. ولا اسكت احسن لانه مافي كلام يعبر .. الصور اللي صورناها اهناك كانت نااااااطقه بمعني الكلمه .. وقفنا حتى اليهال يصورونا .. وهذا احسن شي سويناه بهالسفره .. بعد ماظلم الوقت ركبنا سيارتنا او رجعنا .. نتمشى على ساحل البحيره .. او رحنا نتعشى بمطعم انتركوت ..للستيك على الضفه الثانيه من البحيره قرب الموفنبيك .. او بعدها رجعنا او نمنا لانه كان ورانا يوم طويل الصبح .. كنا طول اليوم ناسيين تلفوناتنا سايلنت من الليله اللي سبقت هالليله .. بالغرفه .. او نمنا .. الله يعلم جم عدد المكالمات اللي يتنا ..!!!!

السلام عليكم ورحمة الله وبركاته عدنا لكم من جديد بعد ولاده متعبه وطفل بصحه موب جيده لكن الحمدلله عى كل حال حاولت ابحث عن الموضوع القديم بس موب لاقيتنه بسم الله نكمل .. دخلنا المطار او قعدنا بالكوفي شوب كلنا .. كان باقي عالطياره ساعتين فقلنا بنقعد نص ساعه برى بعدين بندخل طبعا اهلي استلموا يوسف بالتوصيات .. لاتزعلها .. بديرة غربه مالها احد .. او عشان يراضونه قالولي انتي بعد لاتزعلين ريلج .. او لاتهدون بعض .. لاتخليها تروح مكان بروحها .. لاتاكلون بأي مكان .. اوروبا خطره بالليل لاتسهرون برى ديرو بالكم على فلوسكم لاتشيلون مبالغ كبيره وانتو طالعين لاتركبون بالمترو .. لاتروحون اماكن مافيها عرب .. وصايا حق يهال عمرهم 12 ههههههههههههه .. طبعا انا سااااااااكته او بدور ماسكه الكاميرا وتصور .. المهم صار لازم ندخل , تأخرنا .. فدخلنا مستعيلين .. العيله نستنى شوي حرقة الفراق .. طبعا امي عينها مانشفت من الدموع .. انا ضنيت اني انا ثانيه وحده فبيكون الوضع طبيعي .. لكنها حبيبتي وايد بجت .. دخلنا والحمدلله صار عندنا وقت شوي فرحنا الصاله قعدنا ليما علنو عن الطياره .. وصعدنا الطائرة .. قعدنا ولف يطالعني قلت له شفيك؟ قالي تدرين انتي وايد جميله قلت له عيونك الحلوه .. قالي حبيبتي؟ قلت له نعم! قالي وايد بنستانس انشاءلله مع بعض قلت له انشاءلله طلع يوسف جنطه فيها اوراق الحجوزات .. حجزنا بعض الرحلات من الكويت لانه تطلع لنا وايد مميزات لانه احنا بشهر العسل .. فرتبولنا مكتب السياحه هالاشياء .. او في اشيا حجزناها عن طريق النت .. فحطينا الاوراق او بتدينا نكتب نوتات شبيكون برنامجنا .. لانه عندنا فكره عن بعض الدول اللي بنروحها .. المهم .. وصلنا مطار دبي .. الطريج مر بسرعه .. دخلنا اغراضنا او نزلنا .. خدمه وايد حلوه فدبي سيايير الليموزين .. يتأجرون من المطار للفندق وسعرهم وايد زين .. وعندهم معظم السيايير حلويين .. احنا وقت اللي وصلنا كانت السياره المتوفره بس الكرايسلر .. وصلنا الفندق .. جميرا بيتش .. نزلنا لجناط او طلعنا بسرعه .. كنت ابي محل لانجري بالامارات مول او ماكنت عارفه بالضبط موعد اللي يسكرون المحلات .. فرحنا او كان المجمع مسكر ..بس المطاعم مفتوحين تعشينا في مطعم بيــــــــــــلا ايطالي .. خلصنا او ردينا الفندق .. كان الوقت متأخر .. او نمنا قعدنا الصبح الساعه 8 او نزلنا اللوبي .. طبعا المنتجع روعه او كان غلطه انه سكنا فيه .. لانه الفندق بروحه يبيله يومين .. خذونا لفه .. ورونا الفلل او السويتات روووعه وحمامات السباحه او منظر برج العرب والبحر .. كلشي .. ماشاءلله روووووووعه ولا جنه بدوله خليجيه .. او هذي بعض الصور .. المهم .. ماخلصنا إلا الظهر .. فنطلقنا على طول المجمع .. خذيت اللي ابيه .. او رحنا المطار عيب دبي الزحمه .. يعني اذا كنت تبي توصل المكان بساعه بالنسبه لانه عندهم نفس الطريق ياخذ ساعتين .. وايد الزحمه غير طبيعيه .. بس والله استانسنا بهاليوم السريع .. وصلتنا الليموزين مره ثانيه لي المطار او ركضه كان كل شي .. لانه كنا متأخرين شوي بس الحمدلله لحقنا او دخلنا الطياره .. كانت الطياره تروح زيورخ او من اهناك بالسويسريه رحنا جينيف .. متعبه الرحله شوي لكن الطيران كان وايد مريح او معاملتهم زينه قعدنا نسولف بالطياره .. .. قلت له في شي احاتيه قالي شنو؟ - النوم عمري انا اذا ماانام عدل مزاجي ينعفس او مااستانس - قالي .. حبيبتي عادي نامي .. قلت له بس انت ماتنام ضحك قالي من صجج عادي انام مولهالدرجه بس حرام احنا يايين سفره جم اسبوع - عشان نلحق نشوف كلشي لازم نقعد مبجر او نطلع .. قلت له مو مشكله بس يعني مو لازم الساعه 6 نقعدا و 8 نطلع .. قالي حبيبتي هههههههه لاتخافين كلشي تبينه بيصير - بنوصل بيكون عندهم فجر ؟ - اي قلت له بنريح او بنطلع وبالليل انام عدل .. قالي اللي تبينه بس ريحي اللحين شوي - مااعرف انام وانا قاعده - حطي راسج على جتفي او نامي - ما اعرف - انتي جربي احلى نومه هذي - حطيت راسي او غمضت - سولفي لي - شاقول؟ - حزينه انج هديتي اهلج؟ - قلبي يعورني لازم اول مره اهدهم انا مو متعوده لكن مرتاحه ادري اني بستانس وياك - انت؟ - انا شنو؟ - حزين اني هديت امي او خواتي " وقعد يضحك " ليش تضحك علي ؟ قاعد اسولف وياك - حبيبتي اتغشمر وياج انا وايد سعيد او مرتاح او مستانس اني وياج انا الفراق عادي متعود عليه واللحين بصراحه ماحسيت نفس الاحساس لانج وياي - شهر بتمل مني - والله والله نواااارووه اني استانس وياج اكثر من اي احد ثاني ؟؟ انتي كلش مو ممله سوالفج حلوه نفسج او حتى واحنا ساكتين مااحس انه الوضع يعني سكوت او ملل بالعكس احس انه عادي كأني بقلبي اسولف وياج - يمه منك مادري من وين تييب هالحجي لمصفف - ههههههههههههههه اجاملج - صارت مطبات هوائيه قويه كل الناس سكتو كان حاط ايده على جتفي فحس بدقات قلبي شوي ..فقعد يقرى علي وغطت عيني .. قعدني عشان أكل بس ماكنت مشتهيه .. او ماكنت ابي صينية الاكل تضايقني .. أخذت صينيته او رتبت له الاكل او عطيته او قعدت اسولف معاه شوي .. خذتنا السوالف لين يه وقت الهبوط وصلنا مطار جينيف .. واحنا نازلين كان ظلام بعد ماخلصنا الجوازات او اخذنا جناطنا كان ينتظرنا برى واحد من الفندق عشان يوصلنا طلعنا وكان الشروق توه صاير او الجو مطر خيااااااااااااااااااااااااااااااااااااااااااااال انا وانا صغيره كنت على طول مع اهلي ايي جينيف بس يوسف اول مره واحنا بسيارة الفندق .. كنت اتذكر الاماكن او طار مني التعب كنت حاط ويهي عالجام نفس الياهل اطالع بفرحه او قلبي يعورني .. اهلي كانو دايما وياي .. سرحت ودي اوديه بهاللحظه كل الاماكن اللي احبها او رحت لها ماييت من 5 سنين او اكثر .. قطع افكاري صوت يوسف .. جنها لوحه طبيعتهم .. قلت له اي .. للحين اذكر كلمات بالفرنسي .. فستانست اول مافتح لي بالفندق الباب قالي بنجووغ مدام قلت له بونجووغ ميسيو قالي كومون سافا؟ قلت له سافا بيا ميغسي اتوا؟ قالي تخبيان .. يوسف قالي هااااا طلعتي منهم .. مايدري اني مااعرف غير هالجم كلمه .. قلت له اي قالي صج تعرفين فرنسي قلت له اي افا عليك .. .. كان الجو بااااااااااااارد بس حلو والمطر والفندق ذكريااااااااااات .. المهم .. وقف يسوي Check In وانا مشيت عنه او قعدت اتمشى بممرات اللوبي واشوف كلشي على حطته .. غير كشك السوفونيرز مغيرينه مسوينه مفتوح قبل كان له باب بس هذا الفرق الوحيد .. كنت امشي بدون شعور او ماستوعبت نفسي إلا وانا كلش مبتعده .. رجعت بسرعه ولا يوسف مو موجود؟! معقوله خذ المفتاح او صعد عني؟ سألت اللي باللوبي قالي راح يدورج او احنا صعدنا الجنط فوق! انا طقتني البوهه وين يدورني مايدل شي .. اكمل لكم الاسبوع الياي ..

الجزء الأخير يوم العرس ..الترتياب كلها كل شي احسن حتى من تخيلاتي .. انا قبل كان عندي حكمه فالحياه اتوقع الاسوء عشان لين ياني شي عادي اقتنع فيه لكن والله كلشي فاق توقعاتي .. اللهم الطرحه .. مادري شلون كانت .. ماعجبتني أدقرتني شوي لكن الحمدلله على كل شي .. ويات بالطرحه ولا شي ثاني الكل قالي إنها حلوه بس أنا حسيتها عفسه! .. أو غطت على شعري مع انه تسريحتي كانت روووووووعه .. لكن أحلى موقف لما دخل يوسف .. صارت دزته كلها محارمي .. او بعدين دخلو الرياييل فشافني ضحكني واهوا داخل انا كنت واقفه او اهو رافع راسه او يصغر عيونه .. شفتو لما شي بعيد او مو واضح عشان تشوفينه شوي انه تصغرين عيونج .. عشان يبين .. اهوا جذي كان يطالعني او انا ابتسمت او اضحك من داخل شوي شوي .. من شكله يوم يا عالمسرح ..واقف يطالعني ... وراه كلهم بيسلمون المهم أنا اشوفه أو أهوا يشوفني أو ساكت بعدين استوعب أو باس راسي .. أو قالي حبيبتي؟ بنبرة سؤال حقرته المهم وراه ابوي فانا على طول لميت ابوي .. او سلمت عليهم كلهم .. او دخلو الرياييل .. حبيبي ولا كلمه! .. وانا مستانسه عليه مسوي قفل او صج شكله اينن صاير المهم دخلو الريايل بعدين .. او طلعو .. لفيت عليه او قعد يقولي عمري اول ماشفتج ابي اتكلم مافي نسيت الحجي قلت له انت عيااااااااااااار قالي والله عمري والله مادري شياني .. ضحكت عليه او لفيت عنه قالي ياشاقول لاتحقريني جذي طالعيني لايقولون يحاجيها او ماتعطيه ويه طالعته قلت له يعني اجابلك او ماشوف عرسي قالي بذمتج قادره تشوفين شي انتي .. انا ما شوف شي انا اشوف يمي بس نووور ماحي اللي جدامي كله قلته له لاتسوي فيني جذي ترى استحي .. وماسكت حبيبي ماشاءلله عليه او هالشي لاحظته بالصور والفيديو .. كل الصور قاعد يكلمني .. لكن سألوني شيقول طول هالوقت وانا والله مااذكر .. لما صار لازم نروح ماكان ودي اطلع ابي اشوف عرسي او اقعد مع رفيجاتي .. ماشبعت فكل شوي يسألوني اقول لهم بعد شوي بعد شوي .. او اهوا يحن يالله يالله .. المهم .. وانا بالمسرح احاتي شعري شيفجه ؟ عيزت وانا اقول لها ماحب سبري لاتحطين لي وايد او اهيا تقولي لاااا بتشوفين بتفتحينه ولا كانه فيه سبري .. كانت وايد حلوه التسريحه لكن مبين كلها سبري .. المهم .. بعد ماانزفينا .. او كلشي كان تمااااام التمام .. وصلنا الدار صورنا او خلصنا .. قلت له اذا تبي تنام ترى انا بطول بالحمام عطاني نظره شيطانيه قالي هيه .. اي انا اقول بعد بنّام .. قالي تعويض على الأسبوع اللي ما شفتج فيه اسبوع ماراح تنامين قلت له يهون عليك؟ قالي عمري يالله لاتضيعين الوقت قلت له لاتحن يالحنان .. قالي انشاءلله يالله .. قلت له انزين اخذت عدتي كلها او دخلت تكرمون الحمام .. اول شي مسحت المكياج كااااامل .. او نضفت ويهي او رطبته .. غسلت أسناني .. وجابلت شعري قلت بفجج الماشات او بنسله مثل ماقالت تكسرت ايدي او نط لي عرج وانا اشيل او ماخلصت .. انا ماحب من اول يوم يجالبني يشيل ماشات من قمة راسي!!! مافي رومانسيه فقلت بعتمد على روحي يمكن بدون مبالغه ساعه إلا رابع .. واخر شي اشوف كل خصله بصووب!!!! شصاير ؟؟؟ .. نسلته .. كأنه لوووح يابس ماكو فايده .. قلت مالي إلا اغسله .. واقعد تحت الدش .. غسلت او سبحت او تيددت او خليت شعري ينشف شوي . حطيت لي كونسيلر من السهر كان تحت عيني اسود او حطيت كحل خفيف او مسكره .. او حمره .. فركت شعري بمسك القرشي وجسمي .. وهذي غلطه ماانصحكم فيها .. لانه طعمه مر .. بس طبعا ريحته .. خيال المهم .. سشورت شعري .. ورفعت نصه .. يمكن ساعه او نص بالحمام .. طلعت له ولاطالب عشى الاخ .. ومانطرني .. يعني ماكمل بس بدى .. المهم اول ماشافني قالي وااااااااااااااااااو .. افتشلت قالي يالساحره قلت له ليش؟ قالي كلشي عليج حلو؟ قلت له طرحتي حارتني قالي والله انتي مينونه تهبلين كأنج ملكه .. انا بس قعدت اقرى عليج خفت عليج ابتسمت له .. قالي تعالي يمي قلت له بصلي قبل .. قالي اوكي .. صليت او قعدت اكل معاه .. كان الشعور ماينوصف .. كنت حاسه اني مرتاحه وبنفس الوقت حاسه كاني اول مره اقعد معاه قالي اللي عليج يهبل .. قلت له مشكور يوسف نوعه دقيق .. يعجبني فيه اذا عاجبه الشي يشرح التفاصيل .. يقولي شوفي قصته لونه حلو يقدر الشي او يفرح الواحد صج عمري احس فوقج شي ابيض .. جنج ملاك وكلني معاه او راح يسبح بسرعه قمت صكيت الاكل غطيته او دزيت الطاوله عند الباب او فتحت المبخر لصغير اللي عالكهربا امي كانت حاطه لي عود .. بخرت بعدين ..طلع او صلى او ودى طاولة الاكل برى .. فتحت فواحه .. امي كانت مخليتها لي .. احبها شريتها من كشك بالفنار .. رووووووووووعه .. المهم حطيتها بعيد عنى .. وبس :$ طبعا مانمنا الا الساعه 8 الصبح تقريبا قبل لاانام حطيت لي تحت مخدتي علج .. هذي نصيحه قريتها بالمنتدى .. والله يابنات خوش نصيحه .. المهم .. نمت او فتحت عيني طليت بالساعه كانت 12 قلت زين عندي بعد وقت ورجعت نمت .. طبعا النومه كلها كانت مقطعه .. كل شوي اجيك على روحي + المكان متغير المهم غطيت بنومه عميقه .. مع اني كنت ناويه اقعد قبله بس اهوا صحاني من النوم او هالشي طبيعي عند يوسف .. ياربي اول انسان اشوفه مايقدس النوم المهم .. قعد يتكلم شووووي شوي بس انا نومي خفيف قالي عمري حقرته من التعب مو قادره اتكلم ابي انام قالي حبيبتي .. قلت له همممم "هذي مالت النايمين" قالي سوري عمري والله ادري انج تعبانه حدج كاسره خاطري بس ينتظرونه والمصوره بتيي وبنروح المطار .. ما تبين تقعدين مع أمج .. أنا اهني سيده فتحت عيني تذكرت او قلبي عورني عطيته ظهري او قعدت افتح العلج اهوا يقول شتسوي هذي.. المهم كليته او التفت عليه قلت له يالله قوم انت قبلي قالي جاهز انا طلعت عيني لما شفته قلت له زين .. شرايك عشان اخذ راحتي تنزل تحت تتريق على مااجهز انا قالي عمري .. سمالله عليج اي ريوق هالحزه قالي ماباطلع يالله قومي يالكسوله قلت له انزين قمت او غسلت جسمي كان خاطري اروح بيتنا او اسبح بحمامي بتدى الهوم سك يشتغل المهم خلصت شغلي كله فالحمام .. مع اني مو متعوده على قعدت الحمامات بس عبالي الرياييل مايحبون المره تتمكيج جدامهم "العكس صحيح" يوسف طلع يستااااااااااااانس مو عن انه يستانس على المكياج بس يحب يشوفني اتعدل .. مادري شالمتعه بالضبط بسأله هههههههه المهم نزلت سويت شعري بالصالون اللي تحت أو دقيت عليه أهوا لما طلعت من الدار كان يصلي .. نزلي .. أو رحنا بيتنا .. أمي كانت مسويه الغدا عشان لضيوف اللي عندنا أو خالتي أو البنات أو خالات يوسف كلهم يايين وبنات عمه Miss World أو وصيفاتها دخلت البيت كلهم كانو موجودين بالصاله .. بس فتحت الباب ولا اليبااااااااااااااب وأنا واقفه مكاني ههههههههه ..المهم دخلت اسلم .. او عيوني تدور امي مو لاقيتها سلمت على الكل وكلمن نغزه بصوب .. ضحكوني.. ولا امي داشه .. مادري من كانت واقفه لي مشيت عنها او رحت حق امي وبلشت عيااااااااااااااااااااااااااط او امي تعيط وانا اعيط وخواتي يعيطو او خالاتي يعيطو وصارت المناحه بدور ياتني تضحك .. او انا ابجي اقول لها شفيج يالمجرمه إلا تقولي كلهم حزيننين بتطلعين بس انا فرحانه بتيين عندنا قلت لها من قالج ودراسة اخوج اهني استوعبت او دشت معانا بالعياط هههههههههههههههه المهم ابوي كان برى مع الرياييل دقيت عليه قلت له ابي اشوفك او ياني او لميته .. حبيبي ابوي .. الامان او كلشي .. يوسف كان وياه او يضحك او ابوي يبوسني او اهوا يطالعنا ويضحك المهم تغدينا او تعرفت على خالة يوسف .. لولوه صغيره بيني او بينها 10 سنين بس ماشاءلله عليها تهبل .. اول مره اشوفها لانها عايشه بأبوظبي ... زوجها اماراتي يوسف كان وايد يسولف لي عنها او اول مره اشوفها لانه بفترة الملجه او الحنه كانت مسافره ويا ام ريلها تتعالج المهم دخلت داري بعد الغدا وانسدحت عالسرير .. ياتني امي او نسينا الناس او قعدنا نسولف .. رفيجتي كانت مأجره سترج ليموزين حق المطار مفاجأه فرحت انا او بيتنا بالليموزين فطومه يات معانا او بدور او خالتي مع يوسف .. المهم قبل لانروح المطار بتدينا العياط .. ثيابي او اغراضي مالوت السفر كانو كلهم ببيت يوسف فجدم اييبهم او كنا بنتلاقى بالمطار .. لهيت بالسياره بس وصلنا المطار بتدى لبجي او امي او رفيجتي او خواتي او خالتي او فالمطار بدور عطتني هديه .. سيديات حطيتهم بجنطتي .. او بس سلمنا عليهم او دخلنا .. خلصت القصه .... بس اقوم بالسلامه بكتب لكم يوميات شهر العسل بس لي طلب لكم لاتبخلون علي بالدعاء انه ارتفع بالسلامه مع السلامه

الجزء ثلاث وأربعين اليوم خالاتي كانو مسوين لي في بيت يدتي غدى .. متيامعين لانه اخر فرصه قبل مااسافر المهم انا قعدت الصبح عالعشر لانه 11 عندي موعد فيشل سبحت عالسريع او لبست تريننق او رحت الصالون .. سويت الفيشل او وطلعت عالساعه 12 او نص . مريت رفيجتي كانت تبي توريني بدلتها او الاشيا اللي بتلبسها معاها خلصت منها .. مريت الجمعيه خذيت لي كم شغله حق الليله اللي بنباتها بالفندق رجعت البيت .. بسرعه سويت شعري او كشخت بس طبعا ماحطيت ميك اب مو زين ورى الفيشل.. رحت بيت يدتي .. وكل وحده مسويه اكله في بيتها او يايبين لي كيكه .. تونس إلا خالتي النحيسه اللي قلت لكم من قبل عنها كانت مسويه هريس! وانا مااحب الهريس ههههههههههه المهم .. قعدنا نسولف وقعدنا نوزع المهام على بنات خالتي .. وصيتهم على ربعي او اهلهم .. واهلنا او ربعنا اللي بيون من برى .. .. او حريم ربع يوسف .. بنت خالتي خفيفه او كانت بتمكيج وياي .. فقلت لها تروح الصاله من الصبح تشوف شغل المسرح او هالسوالف .. او تمينا نتدرب عالمشيه بضحك .. واستانسنا .. رديت البيت الساعه 8 مرتني بدور او رحنا نتمشى يوسف دق عليها او ترجيتها تحطه سبيكر ابي اسمع صوته .. حبيبـــــــــــــي .. يقول لها شلونها حبيبتي؟ طلعت مني همممممم بصوت عالي لووول او سمعني .. المهم بعدين دز لي مسج قالي مووووووووو قاااااااااادر اصبر يالمجرمه قلت له يالله 4 دايز لفت المهم مرينا محل او خذيت بدله .. لي او بدله له حق المطار .. يشبهون بعض .. انا بنطرون او كوت خفيف بيج او تحته قميص طويل .. او عليه حركات ... اهوا نفس الون بالضبط وتحت قميص ابيض نفس شي بس سادي .. احنا انشاءلله اللحين بنروح اوروبا .. اول شي دبي ليله وحده او بعدين بنروح جينيف او من جينيف فرنسا او بعدين ايطاليا او اخر شي لندن كل مكان اسبوع انا كنت خايفه من شقلت لجناط بس اهوا قالي لاتحاتين تخصصي فقلت بنشوووف .. المهم .. بنروح رحلة ثلج بجينيف .. شريت لي بدله حق هالرحله .. تيي مع نظاره ماتوقعت احصلها بالكويت ورجعنا بيتنا سهرت عندنا شوي او من شوي راحت او عقب شوي بناااااام خالتي اول ماتحجبت وايد فرحت او يابت لي هديه امطات او ملافع .. من كثرهم للحين البس فيهم مالبست اللي شريتهم لسه! .. او بدور درت من اول ماتحجبت او دقت لي تبارك لي او هم يابت لي سكارفات ماركات اللي تنحط مثل الامطه واااااااااايد حلوين

الجزء الثاني وأربعين قعدت الصبح .. شربت لي بيالة شاي او قلت حق السايق يدخل الجيب عند الباب .. عشان نبتدي ننقل الاغراض .. اول شي .. حطيت شنطتين الملابس .. او كان عندي علبة كبيره ماخذتها من دايسو .. حطيت فيها الكريمات او العطور بعلبهم .. علبة نفسها حطيت فيها .. الاغراض مالت الله يعزكم الحمام .. من فرشاة الاسنان لي حمام الزيت او صابونة المغرببي او هالسوالف كلها حطيت شنطه السمسونايت اللي فيها الذهب او هالسوالف كنت بخليهم عند امي بس بعدين شفت انه يوسف ماخذ تجوري قلت اسهل لي .. كنت شاريه علاليق من ايكيا حق الجينزات او التنانير او حق قمصان النوم او هالسوالف فخذيتهم كلهم .. حطيت علب الجواتي الله يعزكم .. او بعدين كنت حاطه قمصان النوم الغاليين بجناط الفساتين اللي تنحط فيهم فساتين السهره .. امي بطريقتها كانت تبخرهم او مادري شترشهم فيه او تعطيني .. خذيت شوية صور ... خواتي او عيال اختي او صوري او امي ابوي .. هالبارت اكثر شي صيحني .. طبعا من الصبح او انا اشيل او دموع .. بس تنقي لصور هذا اكثر شي ذبحني او امي تبجي معاي او نضحك .. يالله الحمدلله على كل حال .. المهم .. بعد ماحملنا مع الخدام كلشي بالسياره رحنا .. او يونا خواتي عقب .. خالتي بالبدايه عيزنا معاها تقعد ويانا مارضت قالت خلكم على راحتكم .. أكدت عليها اني مابي يوسف يشوفني .. او بسطنا دخلت ملابسي الداخليه كلها اول شي .. او حطيت باليرار مال الملابس الداخليه كسرة حجر في ريحه يايبته لي خالتي من مكه .. فضيـــع امي دقت على خالتي .. قالت لها ياام يوسف تعالي احنا نبي نستانس وياج .. عادي نواره تبيج بعد المهم .. بعد حنه يات ... يابت لنا العصير والسندويشات .. رجعت فطومه من المدرسه او ياتنا او قعدو يساعدوني .. ابوي كان مطرش لي اكسسوارات حق الشقه قعدت ارتبهم .. او اختي استلمت الحمام .. العصر كنا موقفين نريح ونتغدى .. اول مره نتغدى بشقتي .. ونااسه كان وانا اروح لهم مطبخي اييب لهم اشياء .. طبعا خالتي كانت حاطه كلشي بالمطبخ من A-Z المهم فجأه دخلت علينا بدور!!! .. انا سمعت صراخ ..او طلعت ولا بدور اهني .. كانت قايله لنا انها يوم العرس بتيي الصبح .. او كانت لما تكلمني تقولي خايفه تتأخر الطياره او ايي متأخر .. او صج شغلت بالي كنت احاتي .. المهم .. طبعا واااااااااااايد استانست او قعدنا نكمل الترتيب .. اهيا مصورة العايله .. فقعدت تصور .. وخالتي تدور تبخر الشقه والكل يشتغل على قدم وساق .. امي رتبت لي اغراض الصباحيه .. لانه ماعندنا وقت بنتغدى او على طول بنروح المطار .. جناطي انا مسكرتهم .. او كلشي كان جاهز .. خلصنا شغل مع المغرب .. او حطينا فيديو الملجه بصالتي او قعدنا نشوفه .. او طلبنا عشى .. تعشينا او خلصنا فيديو الملجه او حطينا فيديو الحنه .. او سهرنا عليه .. بعد ماخلصنا رحنا البيت .. هلكاااااااااااااااااااانين .. بس سبحت عن الغبره .. او نمت

سامحوني على التاخير ولادتي قربت بكره بدخل المستشفى بيولدوني بحاول انزل لكم كل البارتات اليوم بس ادعولي تتسهل الولاده الجزء الواحد والأربعين قعدت اليوم الظهر .. عندي شغل واااااااايد .. اول شي لازم اصكك جناطي .. جنطة السفر او لجناط اللي بوديها شقتي وكنت متواعده اتغدى مع رفيجتي .. عرسي باقي عليه اسبوع او اتفقت مع يوسف من بعد الحنه مانشوف بعض لين ليلة العرس .. كان ودي شهر مانشوف بعض .. بس كسر خاطري كان وايد مشتط حق ليلة الحنه .. المهم اسبوع واااااايد الله يعيني :$ دقيت على رفيجتي .. قلت لها بنتغدى متأخر تعالي ساعديني ابي اخلص من هم لجناط قالت لي اوكي .. اخلص محاضرتي او ايي قالت لي نروح بالليل الجم .. قلت لها اي .. انا ضعفانه وايد بدون جم ولارجيم ولاشي .. من لمحاتاة جبدي مسدوده عن الاكل بس اهيا ذابحه روحها حق عرسي بدلتها ماخذتها سايز اصغر من سايزها عشان تضمن انها تضعف لها ههههههه .. المهم كان عندي الساعه 6 جلسة ليزر .. او عقبها باروح اشوف المسكه .. كنت معطه المحل فكره او قالت لي بتسويها توريني .. اخذت شور عالسريع حطيت لي ماسك بويهي..او فرشت جناطي بالارض .. كنت شاريه جناط صغار او علب احط فيهم اغراضي .. او اجياس اغلف فيهم العطورات او الكريمات او كل هذا يحتاج شغل طبعا ياني ابوي يطل على بالدار ضحك على شكلي .. مع الماسك او روب الحمام او لوية لجناط شغلته معاي شوي .. يقلف العطورات او طلعت لها لمعات او مادري شنو مال جسم بس شكلهم يشوق او يسألني شنو هذا لووووووول .. اقوله كريم يبه كريم شوي او يات رفيجتي راح ابوي .. كنت شايله هم الملابس .. ابخرهم من اليوم؟ بتطير الريحه؟ اذا اجلتهم بنضغط او بتعب .. لوية العرس بروحها كفايه!! .. المهم يات اختي قعدت ويانا .. قمت عنهم شوي بدلت ملابسي او غسلة ويهي و نبتدي بالترتيب .. انا شاريه جناط وايد .. اشكالهم حلوه مبطنين بنايلون واتر بروف يعني .. ومقسمتهم على احجامهم كلشي حق شي .. ببتدي معاكم اول شي للشعر خذت كريم Wet look اهو جل يعطي الشعر تموجات لامعة وناعمة كأنه توه مبلول ممكن استخدامه بعد الحمام بدون عناء ويعطي شكل فريش وفي ماركات مختلفه من لوريال وغيرها يفكني من عبالة الشسوار بالسفر .. علبة سبراي برائحة الفواكه .. السبري الذهبي احسن سبري بس ريحته قويه .. اللي على فواكه اخف .. او يعطي نتيج حلوه حق استعمال يومي مشط الشعر اول شي اللي تيي اسنانه كبار او متباعده هذا للحمام .. بعد ماحط الكوندشنر او اغسل شعري انسله بهالمشط ..او اقدر ألف شعري بالفوطه عقب او لما افتحه ماتطلعله الشوشه اللي خبري خبركم. المشط الثاني العادي .. ومشط الاستشوار .. ستشوار للسفر واحد خفيف او الثقيل للبيت او ستريتنر خذيت علبتين وحده كبيره حطيت فيها لفافات الشعر والاستيكات او المشابيص او كل الاكسسوارات .. او حطيت بالعلبه لصغيره اشياء خفيفه حق السفر .. احب التيجان والبندات بس ماكثرت لانه بالسفر دايما برى او علي احجابي فخليتهم بعلبة البيت اكثر شي كبسولات الشعر علبة حمام زين صغيره مع انه اختي قالت لي ماله داعي .. بس انا مادري شلون بيصير شعري مع الحجاب ففضلة احط لي وحده .. او طبعا اطقمي اللي شريتهم كلهم حطيتهم بسلال حق بيتي بعدين بتدينا نجيس كريمات البشره .. ميلك تونيك احب مال كلنك او التونيك من كلارينس مرطب للبشره صغير نفس الbody butter او لوشن عادي .. حجمهم صغير حق السفر اما اطقمي ماجيستهم قلت باجر اوديهم اصفهم كريم النهار من كلارينس بعد مقشر الوجه من كلينك او بدي اويل من بودي شوب على مسك بودرة المسك او غسول المنطقه الحساسه كريم لليدين صغير للجنطه او كريم لترطيب الريل كريم سن بلوك ديودرنت طبي من غير ريحه ماحب اللي مع ريحه المهم كيست اللي ابيهم للسفر واللي مابيهم حطيتهم بعلب عشان اوديهم شقتي طلعة ماكينة الحفاف من علبتها او حطيتها بجنطتها حق السفر مع اني شايله ليزر او قالولي يضمنون شهر مايطلع بس الاحتياط! مو وقته اجازف جنطه صغيره فيها مستلزمات الاضافر الاساسيه .. حق السفر او حطيت لي 3 الوان شفاف او ابيض او بيج حق لفرنج او احمر من ماك واااااايد حلو او مزيل اضافر .. حطيت لي جنطه فيها سياده او بشار صلاه او مصحف او ساعة اذان عطتني اياها رفيجتي .. بس ماعرف شلون اضبطها لما اسافر عندكم فكره؟ خذيت جنطه حطيت فيها ليفة حمام او ليفه طريه ونايلون حق الشعر اذا مابيه يتبلل حجر مال الرجل او علبه فيها الملح مال التنقع حطيت لي شامبو او بلسم جيستهم .. صابون بريحة الفانيلا .. معطر الفم او فرشاة اسنان او معجون او خيط الاسنان او علج كنت مسويه فوط وحده لي مطرز عليها اسمه او وحده له عليها اسمي .. حطيتهم حق بيتنا رفيجتي ياعت .. او انا بعد يعت او اهم شي خلصنا من تجييس كميه كبيره من الكريمات .. او كنت اكتب في ورقه كلشي احطه عشان مااضطر اطلع كل شي عشان أتأكد خلينا النثره على مكانها او قلت حق الخادمه لاتعدلين داري .. ابي ارجع بالليل اكمل .. الشغل رحنا فرايديز .. من زمان مارحت له او خااااااطري باللستيك مالهم ..المهم اكلنا او قعدنا نسولف .. لين صارت الساعه 4 او نص .. طلعنا او رحنا نشوف المسكه .. وايد عجبتني سوتها لي نفس الصوره .. او لقيت عندهم اللي ينحط فوق الكيك عجبني على سندريلا جان اخذه قلت بوديه الفندق يحطونه لنا فوق الكيك خلصنا او نزلتني العياده حق الليزر او راحت الجم .. رجعت خذتني .. كنت ناسيه تلفوني بالسياره .. ولا يوسف متصل كذا مره او مطرش مسج .. بمووت وحشتيني .. ارجوج بس اسمع صوتج معقوله بتحرميني شوفتج او صوتج!؟ كسر خاطري لانه مو قصدي ماارد عليه بس بنفس الوقت ياتني الفكره اني ماارد لين يوم العرس .. رديت عليه قلت له حبيبي .. مو قصدي احقرك .. انا مشغوله او بطمنك بالمسجات .. مافي تلفونات عشان نستانس مابقى شي رد علي .. ماني قادر اصبر دقيقه بس قولي ألو او صكريه قلت له يالعيار توني امس لي متى وياك!! .. يالله ماكو لاتحن قالي انزين يالمجرمه احبج انا بعد . المهم ردينا البيت حق لوية الاغراض .. يات امي او خواتي او رفيجتي معانا كل وحده تسوي شي .. قعدنا نصنف الملابس اغلب الوقت .. شودي معاي او شنو ماراح احتاج .. مادخلنا شي بس حطينا كل شي بصوب ملابس السفر .. او الملابس اللي مااحتاجها .. الجواتي عزكم الله .. ولجناط او اخر شي ملافعي المهم .. يابت اختي سندويشات او قعدنا نتعشى او نشتغل .. لين تأخر الوقت او كلهم راحو دزيت مسج حق يوسف تصبح على خير او نمت بوسط اللويه اللي بالدار

الجزء الأربعين اليوم ليلة الحنه طلعت امي ثوبي من الصبح او حطته على المبخر .. انا رحت الصالون .. سويت حمام مغربي ,والذي منه .. او بعدين سويت باديكير او مانيكير .. او رجعت البيت اللي بتسوي شعري بيتييني فبيت يدتي .. فقلت اخذ اغراضي او اروح من اللحين ناديت الخدامه اليديده .. تشيل جنطتي .. او اغراضي .. واهيا ماشيه سحبت الثوب اللي بلبسه حق الحفله .. كنت شاريته من البحرين ابيض او كله زري .. من قوت سحبتها طاح المبخر او الجمر كله يه على الثوب .. انا بس شفت المنظر .. حسيت راسي مره وحده عورني او بلعومي نشف ابي اتحجى! .. بعدين على طول قلت الحمدلله يات على جذي .. ناديت امي او احترق قلبها او قعدت تصرخ عالخادمه انا ساكته او افكر الحمدلله انها يات على جذي .. لو اسمالله علينا الله لايقول احد صايده شي بهاليوم .. جان بكره عرسي ولا بعرس بعد .. قعدت عالكرسي حسيت ماعندي حل .. شلبس! دراعه معقوله؟؟!؟ امي كان دمها ثاير .. حسيت انا ماعندي وقت افكر .. خذت امي التفكير كله عني .. قعدت ساااااااااااكته دقت علي رفيجتي اهيا كانت بتوصلني بيت يدتي .. قالت لي انا برى قلت لها نزلي شوي .. يات او شافت اللويه ..وكلنا نفكر .. قالت لي شوفي .. امي عندها دراعه خضره وااااايد راقيه ماخذتها من المغرب .. واااااااااايد حلو .. .. بروح بسرعه بييبه او بايي .. مافي وقت حق تفكير .. طبعا انا ساااااااااااااااااااااكته .. او امي بتدت تسوي تلفوناتها رفيجتي راحت .. او الكل صار عنده لويه خالتي قالت ودوه الخياط يلاقي له حل .. قلت لها صاير بنص القطعه بالظهر .. مايترقع يعني .. المهم .. خالتي دقت علي بتشوف اذا نحتاج شي ... قلت لها السالفه او ماتت المسكينه! .. المهم يدتي عندها ثوب نشل ملون .. بس مادري شلون شكله الثوب التقليدي العادي .. يمكن وحده تيي لابسه نفسي يعني عادي! .. المهم يات رفيجتي .. قالت حق امي شوفي خالتي انا ادري انه حلو بس لما تخيلته اللحين حق الحفله شكله روووعه او حزامه يحدد القياس فمافي مشكله .. طبعا انا كنت مسلمه امري لله .. قالت لي قومي الدار لبسي او وريهم المهم دخل معاها لبستها او صج شكلها واااااااايد حلوه او فخمه حيل .. طلعت او شافتني امي على طول ابتسمت او قالت الحمدلله وقعدت تبوس برفيجتي .. طبعا احنا بروحنا الوقت سرقنا ركبت وياها او رحنا بيت يدتي بالدرب كلمة خالتي ام يوسف اطمنها او قالت بتدز لي الذهب مع السايق .. وصلت بيت يدتي .. او كلهم في لويه قالولي شصار قلت لهم نحلت او شوفوني لي جهزت كامل احلى قالت لي خالتي ابيض؟ قلت لها لا اخضر .. قالت يالله مو مشكله المهم .. ياتني اللي تسوي الشعر .. سويت شعري سيده او ركبت وصله تطوله شووووووووي .. او ياتني اللي تمكيج .. خلصت .. لبست الذهب او طلعت لهم نصحوني اخلي خاتم بس .. مالبسه كله صاير هالستايل يناسب مع الثوب بس مو مناسب الدراعه اللي لابستها المهم .. لبست قلب او تاج او خاتم واحد او خليت الباجي .. صارت الساعه 8 او الناس بدو ايون .. يوسف كنت قايلت ايي عشان نصور بس ماكان طبعا بيدخل عالحريم المهم وصل او دخلوه من الباب اللي ورى .. شافني او وايد عجبه اللبس او كلشي او عوره قلبه لما قلت له عن ثوبي كان خاطره يشوفه علي بس قال هذا هم حلو .. او قعد يقرى علي او المصوره تنتظر .. المهم .. قعدنا نصور شوي او صار وقت اللي اروح .. قالي بتطولين بنتظرج؟ قلت لي اي روح بالليل اكلمك تيي تاخذني قالي اوكي المهم .. دخلت على النسوان .. او بتدى البرنامج الحفله كانت وااااااااايد مرتبه .. او مثل ماتخيلت .. كأنج داشه بيت قديـــــــــم .. المناظر لملونه على الطوفه .. والفرشه القديمه .. والدوائر الملونه اللي يزينون فيها قبل .. والاغاني كلها سامري او اغاني قديمه الاجواء كلها مادري شلون حلوه.. او الكل الحمدلله ستانس قعدت عندي الحنايه تحنيني والبنات يرقصون او يدتي او امي او خالتي ام يوسف او خالاتي .. خالاته او اهله كلهم كانو مستانسين .. بنات عمه موجودين بس محد منهم يه سلم علي ههههههههه المهم عادي .. استانست واااااايد انا حسيت انه كلشي خلص بغمضة عين .. صار الوقت متأخر .. او يدي نشفت تقريبا او صار لازم اقوم .. نصحتني اللي حطت لي مااغسلها بس انا فاتتني صلاة العشا فقلت احسن اغسلها لاني مابي بيدي حنة يوم عرسي جذي بتطير اسرع .. احب الحنه بس مايناسب ستايل البدله .. المهم .. بعد ماصورت مع اهلي او ربعي او استانست بالاجواء قمت غسلة اتصلت حق يوسف عشان ايي ياخذني .. صليت او قعدت انتظره .. وصل وطلعنا .. وصلني البيت او نزل قعدت اسولف له لي الصبح واطقطق بالنت.. راح او صليت الصبح او نمت .. والحمدلله تمم علي فرحتي او عوضني عن ثوبي اللي راح ..

الجزء التاسع والثلاثين طلعنا انا او امي الساعه 10 الصبح .. مرينا خالتي او رحنا بيت يدتي .. خالاتي ثنتين او اختي يونا اهناك .. او قعدنا نتريق .. يدتي كانت مسويه بلاليط .. او عصيده .. او امي مسويه خبيصه او خالتي يايبه معاها سندويشات او صارت سفرة ريوق مشكله .. المهم او قعدنا نسولف .. يدتي وااااااااااايد خاطرها بحفلة الحنه .. او قعدنا نسولف وياها شبنسوي فيها .. انا كان ودي اسوي نفس العرس القديم .. اب بيت يدتي .. صالتها نشيل منها الكراسي او نسوي قعده بالارض على كبر المكان .. صالتها مربعه او كبيره .. او نفس الدار مالت لول .. يكون المسرح .. اللي بقعد فيه .. القعده بالارض بتكون على دواشق .. او بينهم بدال الطاولات صناديق مبيته .. نازله او عليها جزاز او عالجزاز سله من خوص فيها ورد جوري وردي اللي ايي ريحته حلووه او بينه مشموم او يمهم نفس هالصحن فكرنا نسوي العشى كله اكلات قديمه بس بعدين خفنا لانه ماكو خيارات وايد يعني قبل عيش او لحم! او هريس او يريش .. قلنا بس بوفيه العشى بيكون الاكل فيه عادي لكن على طول وقت الحفله .. بنخلي نسوان يلفون بصواني فيها درابيل .. رهش , لقيمات متاي او حلوى سمبوسه حلوه حنايات على صوب للي يبي يتحنى .. الكل قال بتصير عفسه بس يدتي خاطرها لكن انا خاطري اتحنى .. قلت بحط لي شي نااااعم او سألت يوسف قال ماعنده مشكله مع ريحة الحنه ..الحمدلله بعد قررنا انه دلة القهوه والشاي كلهم ستايلهم قديم .. اللي ايي بيزهم نفس البغبغاء اذا حصلنا الذهبيين او اذا ماحصلنا يدتي عندهم مطارات جذي خالتي تعرف وحده .. تقعد او تسوي خبز لرقاق او تعطي الناس حار على نكهات .. قلنا بنييبها حق وقت العشى وقالت لي الذهب عندي لاتشترين المهم .. فكره من اهني او فكره من اهناك تصورت كلشي .. او انشاءلله يطلع على ماتخيلنا .. عالساعه 1 تقريبا خالتي قالت يالله تأخر الوقت .. او سلمنا او مشينا .. وصلنا امي البيت او رحت مع خالتي كنت بتغدى عندهم .. لانه العصر بنروح نخلص من الفيز والحجوزات .. المهم خلص دوامه متأخر اليوم عالساعه 6 او نص يا البيت او كان بيريح تعبان .. انا قعدت مع فطومه على الكمبيوتر .. نام يوسف ساعه او قعد او طلعنا .. خلصنا من الفيز او رجعنا بيتنا .. من زمان ماقعدت مع ابوي .. فقعدنا او تعشينا ..بالليل مشى يوسف او انا رحت نمت ..

شكراااااااااااا لدعواتكم الصادقه الجزء الثامن والثلاثين قرب وقت العرس .. او بتدت الركضه .. قعدت الصبح .. او حطيت لي ورقه او قلم .. او قعدت اكتب شقاصرني .. اجلت بروفة المكياج حق العرس مرتين او قلت لازم اروح ماعندي وقت .. فحطيت المكياج رقم واحد .. خالتي قالت لي كذا مره تبي تزور يدتي .. قلت باقعد معاهم او بالمره ناخذ افكار حق الحنه .. ابي جو الحنه يكون كله نفس عرس ايام لوّل فحطيت يدتي رقم 2 الذهب حق الحنه .. اشوف من وين دراريع ماعندي أبد .. قلت بسأل عن مشاغل او معارض ابي اشيا غريبه wwww.myweddingfavors.com هالموقع في اشياء وايد هدايا حق الاعراس واسعارهم ببلاش .. عجبني منهم هالعلبتين او هذي بس البدله مو مناسبه ياريت في ثوب او غتره وعقال هههههههههههههههه قلت بقعد مع خواتي و يوسف ونتشاور بعد بغد شقاصرني؟ .. ثياب حق السفر مارحت تشريت .. تذكرة لستتي اللي كتبتها بيمعة البنات او طلعتها .. او شفت شاللي باقي لي من اللي قالو البنات .. المهم او انا بنص اللويه دق علي يوسف قالي بطلع من الدوام باروح اشتري ملابس تعالي معاي خل ناخذ مع بعض .. قلت له نتغدى ونروح قال انا مستأذن اطلع مابي لوية العصر .. الصبح افرغ لنا نتمشى بكيفنا او نتغدى برى .. قلت له انزين يبيلي نص ساعه قالي اوكي .. قمت بسرعه سبحت او لبست تريننق مرتب او جوتي رياضه عشان يساعدني على اللويه او كان اهوا واصل طلعت له بسرعه .. من اول ماشافني قالي حسستيني بنروح الممشى دقرني .. قلت له دقيقه ببدل لتريننق كان دافي او الجو كان يقرص شوي .. او مرتب يعني مو حده سبورتي .. المهم اندقرت .. قالي تعالي عادي .. قلت له لحظه بس .. بسرعه لبست جينز او قميص اسود او جوتي فلات او طلعت له .. قالي يمه شكثر حساسه كنت اتغشمر وياج .. قلت له عااااااادي صح كلامك انا مستعيله مافكرت قالي انزين وين نروح اول شي .. قلت له شنو تبي تشتري قال ابي شورتات او تي شرتات او فوط قلت له الافنيوز عيل .. قالي اوكي بروحي مشتهي نودلز ناكل اهناك قلت له اوكي .. تمشينا وايد لقيت صيفي مع اني كنت احااااااااتي بس بتدو ينزلون الصيفي الحمدلله .. لانه شفنا بموقع weather.com الفتره اللي بنروح بيكون ربيع .. يعني مو برد .. ومن ندخل مكان .. وايد القى اشيا جمومها طويله او طويله او حلوووووووه .. تنلبس مع جينز و بنطرونات المهم .. مادري ليش يات فبالي فكره "انا ليش ماتحجب!! " بس سكت قلت خلني افكر قبل .. وانا اشتري ماقمت احس بنفسي .. كل ما ايي باخذ شي .. اشوفه طويل ولا لا .. جمومه اوكي .. او اذا شي ماله جموم او جمه قصير افكر شاسوي فيه عشان تطول جمومه او يناسب لو تحجبت .. وسبحان الله .. قمت اشوف الملابس شكثرهاااااااااااا جدام عيني .. تناسب المتحجبات .. وكل ماتيني الفكره احس باحساس غريب .. كنت ساااكته او سرحانه او اذا وراني شي له .. ابتسم او اهز راسي .. المهم بعدين قعدنا ناكل .. قالي شفيج حبيبتي .. مو على بعضج قلت له عادي .. يمكن يوعانه.. يابو الاكل او انا اطل بلجياس او اشوف شخذيت او شركب معاه .. قالي شفيج يوعانه ماتاكلين قلت له يوسف بقولك شي .. قال لي شنو؟ قلت له بتحجب طالعني قالي شنو؟؟ قلت له بتحجب؟ قالي من صجج؟ قلت له اي .. ليش؟ شفيك مستغرب .. قالي والله نواره والله اني اليوم الصبح قاعد افكر .. بس طبعا ماكنت بقولج بس وانا اصلي دعيت قلت له صج؟ قالي اي ..حبيبتي انا وايد مستانس .. بس انتي شطرى عليج؟ قلت له وانا افرفر بالمحلات .. اشوف وايد اشيا تناسب متحجبات او انا هالفكره فبالي من زمان .. اقول الله عطاني كل شي .. او انا وايد مقصره بحق ربي او هذا اقل شي .. قالي حبيبتي .. اهم شي تقتنعين فيه قلت له وايد مقتنعه او من مساعه من افكر بالموضوع احس اني ارتاح .. قالي بعد عمري انا وايد فرحااااان .. قالي يالله بسرعه نخلص اكل او نروح نشوف لج هدوم .. قلت له نفانيفي احبهم .. قالي لبسيهم لي .. حق بيتكم .. لليمعات .. اصلا انتي كلشي عليج حلو .. نفنوف او تنوره ام كسرات .. قمنا كملنا تسوق .. ضحكني .. كل مايشوف شي جمومه طويله يقولي شرايج .. موديلات تعل القلب انا ادري مو من ذوقه بس يبي يوريني انه اكو وااااااااااااااايد شغلات المهم .. او صج تشريت وااااااايد اشياء .. صارت طلعت السوق لي انا بداله .. او رجعنا البيت قريب المغرب .. كان الوقت مزاحم يدوووب اقط اغراضي او اخذ سيارتي او ارووح بسرعه الجامعه .. خلصت او رجعت البيت .. يوسف عنده ديوانيه اليوم .. او انا فتحت كبتي كلعاده اشوف شعندي او شبحتاج له لو تحجبت باذن الله .. دخلت علي اختي او قعدت اسولف وياها او فتحنا موضوع الحجاب .. او قامت تقلب وياي بالكبت او طلعنا اشيا واااااااااااايد بعدين قعدت اتدهن .. شريت لي كريمات يداد ..قلت بجربهم خلصت .. كلمت خالتي قلت لها باجر نروح حق يدتي .. قالت لي اوكي .. مريني الضحى قلت لها خلاص او قلت حق امي .. او رحت كلمت يوسف شوي او نمت

دموع الورد انا حامل ببنوته بإذن الله تطلع تشابهني بنتي الكبيره تشابه ابوها عاد ذي ابيها تشبه لي

قوووووووة يا حلوات .. سوري تأخرت عليكم وايد .. بس انا في لويه مايعلم بيها إلا ربنا .. لكن الحمدلله لويــة فرح عسى الله يجعل ايامكم كلها فرح .. مشكوووووووورين على كلامكم كلكم مع حفظ النكات .. بسم الله نبدي .. الجزء السابع والعشرين قعدت اليوم .. معزومين بيت عم يوسف .. مرت عمه دقت علي تعزمني من اسبوع .. ماعندي عذر مااروح .. مااحب قعدتهم ياربي .. بس لازم اجامل شاسوي .. من قعدت من النوم فيني اكتئاب .. قعدت مع امي .. قلت لها اني مو حابه اروح .. قعدت تقولي .. عشانه او عشان خالتج او من هالحجي .. قلت لها ادري لازم اروح .. لكن .. مادري الله يعيني والله كشخي او لبسي او روحي .. او قعدي يم ريلج او ماعليج من احد .. لو بدور اهني جان تشجعت اكثر .. لانه عادي اقولها قعدي يمي .. بس يوسف مابي احسسه انهم هالقد زاعجيني .. عادي اهوا اخر مره من طلعتج فهم الوضع او اكيد بروحه بيتصرف .. يالله قومي الساعه 12 ماعندج وقت .. شلبس؟ بايي وياج الدار وريني طلعت كذا بدله .. قالت لي لاتلبسين جينز .. لبسي نفنوف .. استقريت على واحد يشبه هالنفنوف .. انا اخذت هالموديل من النت او خيطت عليه .. دق علي يوسف قالي انا برى .. انا جففت شعري او سويته بالستريتنر .. بس ماكملت .. قلت له ادخل شوي او راحت امي تقعد معاه سويت شعري من تحت بالفير لفلفته .. او حطيت مكياج رصاصي فاتح فيه لمعه خفيفه او كحل او حمره فوشيه او تعطرت او طلعت ..قلت حق الخادم تييب لي فحم عشان اتبخر .. او رحت لهم .. قام لي يوسف قالي حبيبتي شحلاتج صايره .. قلت له عيونك الحلوه .. وكلشي كان تمام .. المهم تبخرت عالسريع او مشينا .. بالطريج كان معلي صوت المسجل فماصار بينا حوار .. وصلنا بيت عمه .. خالتي او فطومه كانو موجودين .. دخلنا .. او هالمره كلهم كانو قاعدين .. سلمت على عمه او زوجته او بعدين رجعت اسلم على خالتي .. او رحت سلمت على البنات او خوانهم ... طبعا سلاااااااااامهم بارد كأني الصبح متريقه وياهم! .. المهم سوت لي خالتي مكان بينها او بين فطومه يوسف سيده دخل بالجو معاهم .. مع انه سلامهم صار جدامه .. المهم خالتي كانت ماسكه يدي .. او قاعدين نسولف مع عمه او زوجته بنتهم اللي كبر فطومه نادتها بتوريها شي فوق .. او صرت انا او خالتي او عم يوسف او زوجته بصوب ويوسف والباقي كلهم بصوب .. قام ولد عمه او قعد صوبنا او الكل يسولف يوسف وااااااااااااايد مستغربه موقفه! .. نسى ولا شيصير فيه بالضبط حواليهم .. المهم انا ساكته او عادي بس الطامه الكبرى صارت وقت الغدا حطو الغدا او قالولنا حياكم اهما "لعيال" قالو تونا متريقين بنكمل سوالفنا او بناكل عقبكم .. يوسف قال خلاص انا وياهم قالت له خالتي تعال تغدى قالها بايي .. او مايه! !!! عيال عمه قعدو معانا عالطاوله .. انا من القهر من حركته ماقدرت اكل جبدي انسدت .. قعدت اطقطق بالصحن .. واهما يحنون علي اكلي اكلي .. المهم بعدين قمنا من الغدا طليت بتلفوني شفت مسج من بدور "أدري انج في بيت عمي, الله يعينج على ثقالة الدم .. لاجديد" رديت عليها " رجعـــــــــــــــي لاعت جبدي ابي اروح بيتنا" ردت علي " الله يعينج , حاسه فيج" يعني الكل حاس شفيه هذا وايد معجب بقعدتهم!! يقهر المهم غسلو او صارت لويه انا رحت قعدت .. بمكاني! تخيلو او الاخ كان يسولف ولا انتبه حتى اني موجوده قالت فطومه انا يوعانه ابي اتغدى قالو يالله قام او شافني قاعده قالي ها حبيبتي كنتي يوعانه؟ قلت له اي .. قالي ماقعدتي ويانا قلت له مع خالتي.. او ياته سحبته بنت عمه يالله يعني!!! نص ساعه مامرت! صج قليلة ادب يعني من نص ساعه توها متريقه! المهم قعدت افكر .. اهوا ليش حواليهم يصير واحد ثاني .. المهم شوي راح او رجع اهوا او خالتي .. قعد يمي قال مابي اتغدى بعدين بنروح السينما او باخذ لي وجبه قلت له ليش؟ قالي بقعد ويا حبيبتي .. قلت له لا حلو غدامهم تغدى او تعال قعد ويا حبيبتك قالي اكيد؟ قلت له شنو اكيد؟ اي روح خالتي كانت قاعده تشوفه او صارت فتره هدوء او قاعدين يطالعون بعض .. او راح قالت لي خالتي .. شالاخبار قلت لها تماااااااام .. قالت لي بتروحون السينما قلت لها اي .. قالت لي متى؟ قلت لها كنا مقررين عرض الساعه 6 قالت لي هذا ولبكم بس يخلص اكل روحو .. قلت لها عادي في وقت يتأجل .. قالت لي لا عشان تسهرون ويانا الليله .. المهم اكتملت قعدتنا احنا .. او قعدنا ناكل الحلو .. قام يوسف بسرعه من السفره او قعد ياكل ويانا خالتي قالت له يالله بسرعه ماعندكم وقت قال عمه ليش تو الناس قالت له حاجزين حق السينما او بيروحون قال عليكم بالعافيه اهم شي قعدنا وياكم المهم او قمنا طلعنا او اهواااااااا عاااادي .. لا كأنه مسوي شي ويسولف بسوالفهم .. انا كنت مقهوره منه بس شاقول له؟ قلت من قبل او رجع سوى نفس الشي .. سكت قالي شفيج اليوم .. ساااااااااااكته او قاعدين مستانسن نسولف او انتي ولا حتى قعدتي ويانا طالعته بنظره! واقول بقلبي انت من صجك يعني؟ قالي شفيج؟ انا بس انزلت من عيني دمعه! اول مره جدامه اهوا طلعت عينه او صفط على صوب او لف علي شفيـــــــــــج حبيبتي؟؟ قلت له وايد أذيتني .. او ياي تسألني شفيج اليوم ماقعدتي ويانا؟ لو تبيني جان ناديتني او مسكتني من ايدك او ماخليتني او انت تدري انا ماحب قعدتهم او ايي علشانك! حتى وقت الاكل ماييت قعدت يمي .. ولد عمك حس او قعد يسولف وياي او انت ولا حسيت!!! اخر شي ختمتها بالغدا لو مو يوعان تيي تقعد عشاني؟ لو بيت عمي جان ماهديتك او اهما لما تيي يحطونك على راسهم او انت يايني اللحين تقولي شفيج ماتقعدين ويانا؟ عمك والنعم فيه او يستاهل او مرت عمك ماسوت لي شي لكن بناته مايعرفون السنع! او انت مافيك احساس مادري شهالمواضيع المهمه اللي قاعدين تتناقشون فيها تنسيك كل اللي حواليك طبعا اتحجى او انا ابجي او اهوا قاعد يطالعني .. حاول يقاطعني قلت له اسكت لين اكمل كلامي قالي حبيبتي .. عادي مو بكل مكان لازم نقعد بحظن بعض قلت له من قااااااااااااااااااال لك بقعد بحضنك!!! انت عينك ماحطيته بعيني!! .. عيب انا يديده انا مو متعوده عليهم عشان تهدني جذي امك ماقصرت او حتى فطووووم حاسه او كل شوي ابتسمت لي لكن انت مافيك احساس مادري ليش؟ اذا هالقد انت تندمج وياهم او ترتاحل لهم او بينكم سوالف ماتوقف ليش ماتزوجت وحده منهم؟ قعد يضحك او لمني قالي بس سكتي وايد تكلمتي .. حبيبتي لو ابيهم اهما جداااااااااامي او جان خذيت وحده منهم احنا ربينا مع بعض .. قبل بينا او بينهم باب داخلين طالعين .. او درسنا ويا بعض .. او اهما مثل خواتي قلت له مكرمين خواتك هذيلا قليلات ادب قالي اللي تشوفينه بس لاتنزل دمعتج عشان سالفة هالقد تافهه .. او انا اسف حبيبتي .. عاد انتي لاتصيرين حساسه بزياده قلت له مب حساسه ولاشي .. تصرفك غل او تحسسي منه شي عادي او الكل ملاحظ الوضع غريب بس اهما محد معلمهم السنع! مايستحون قالي حبيبة قلبي خلاص لاتزعلين والله واذا ماتبينا نروح لهم مانروح والله قلت له تحجى بالمعقول مو معقوله مانروح حق عمك او انا من صجي ابي حل قالي انتو روحو او انا قولولهم مشغوول او عمي امر عليه قلت له يعني تبي يفضيلك الجو او تقعد وياهم بروحك حبيبتي؟؟؟؟ شاسوي قلت له تتصرف عدل لما نروح قالي من عيوني.. قلت له او اسلوبك تعدله قالي شلون؟ قلت له شنو تقولي تبينا بحظن بعض شهالكلام؟ قالي حبيبتي تعبير مجازي انا اسف قلت له انزين .. ابي اشرب شي ريجي ناشف قالي اي لازم ينشف من الزف اللي زفيتيني قلت له عيدها او شوف الزف الصجي قالي خلااااااااااااااص يبه حرمنا .. رحنا السينما ..او طلعنا او رحنا بيت خالتي .. لين الـ12 .. رجعني البيت .. قعدت عالنت او بعدين نمت ..

شكرا لتواصلكم المستمر والله يسهل لولادتي الجزء السادس والثلاثون ولازال العذاب مستمرا .. طول الليل ماقدرت انام عدل لانه الاخ موجود اولاً .. او ثانيا ادري انه ماراح يطول فالنوم او ثالثا مابي يقعد قبلي .. فكل شوي اطل عليه او ارجع انام .. فقلت شلي بهالعذاب خل اقوم احسن لي .. شلت اغراضي شوي شوي او رحت دار اختي .. سبحت او لبست او تعدلت او قعدت ازهب له ريوق .. سويت له بيضتنا المشهوره اللي تتقدم لازم بالطابي! .. . .. او عدلت الصينيه .. او وديتها له الدار اهوا كان الله يعزكم بالحمام .. طلع او قالي عبالي كسوله طلعتي نشيطه شبعتي نوم قبلي! قلت له صج؟ انت ماشبعت قالي لا تعبان بس قلت دام قمتي اقوم قلت اه على مخدتي .. يابنات صج البساطه البساطه يقول بفنادق العالم كلها ماذقت مثل هالريوق طبعا خطيبته او بيجاملني بس بيضنا مشهووور والكل يحبه .. نسميها بيضة الشاليه المهم .. واحنا بالبحرين سولفنا عن العرس .. او قررنا نسوي حفلة عرس صجيه خالتي بخاطرها لانه ولدها الوحيد .. او قال كلشي اهما يبون يسوونه .. انا ماكان ودي بالعرس كنت ابي حفله صغيره عشان مااضطر اعزم الكل ابي افرح مع اللي يحبوني او بيستانسون لي .. المهم .. قلت له خلاص اللي تبيه .. رفيجه الاماراتي بيي باجر فقلنا بنروح نشوف القاعات او وين نلقى حجز يناسب وقتنا .. او شنو اللي عندهم .. خلصنا ريوقنا او طلعنا قلنا حق امي ..او قعدنا نتشاور معاها بخصوص القاعات .. اهوا قالي المسرح تزيين القاعه على رفيجه .. بيسوي لنا شي غريب او يديد طلعنا رحنا بيتهم عشان يبدل وخذينا خالتي معانا او رحنا كذا مكان او في قاعه وايد عجبتني بس كانت محجوزه لين سنه جدام .. بعدين شفنا قاعه ثانيه او كانت مناسبه من ناحية الحجم او الموقع او التاريخ .. لانه مابقى شي على دراسته او مابيمدينا نروح شهر العسل اذا اخرنا شوي .. المهم القاعه يعني مش بطاله او احنا اتفقنا نغيرها خلصنا من القاعه او رجعنا البيت قعدنا مع بدور .. الليله بتسافر .. حطينا لستت العرس... اول شي بعد التفكير قررنا نسوي القاعه كلها بيضه .. زل ابيض او نغطي الطوفه كامله بشيفون ابيض .. وراه اضاءه او قلنا بنييب كل الحلويات اللي يدورون فيها على White Chocolate او مغطيبه بـWhite chocolate اهم شي كلشي يكون لونه ابيض .. او الورد ابيض .. او العصير ابيض .. دخلنا النت او لقينا جم وصفه .. عصير بيذان .. او عصير موز .. او نسيت الباقي .. قلنا بنخليهم يسوون لنا العصير بالفندق نفسه بنعطيهم الطرق .. قلنا وقت اللي بدخل بتتغير الاضاءه كامله .. بتكون طول الوقت بالحفل عاديه كشافات بس لما ادخل .. يصير الضوء كله نفس ضوء الشموع او سبوت لايت ... المهم .. تأخر الوقت او احنا بسوالف العرس .. صار لازم نقوم نوصل بدور المطار خالتي مسكينه وايد ضاق خلقها .. قالت روحو انا مابايي المطار .. سلمت عليها او طلعنا .. كانت مابتيي إلا حق العرس اسبوع واحد .. لانها تاخذ مكثف تبي تخلص مسكينه لاعت جبدها .. المهم طلعنا مرينا الرايه كان خاطرها ببرجر بوتيك قبل لاتروح اخذنالها Take away او وديناها المطار .. او سافرت بدور .. رجعني يوسف البيت .. سولفت حق امي او ابوي شوي .. عن العرس او دخلت كلمت يوسف او نمت

لط لط.....مشكوره اختي وحياج الله اسعدني تواجدج الدائم الجزء الخامس والثلاثون وصلنا مطار البحرين .. بعد مانزلنا استوعبت اني ماقلت حق يوسف عن السياره قالي فشله او مادري شنو قلت له عبالك انت بس عندك واسطه فدبي انا عندي واسطه فالبحرين قال شفتي نكمل بعض .. المهم .. قال ياريتج لزمتي عليها ..قلت له والله عيزت راسها يابس خلصنا من الجوازات او طلعنا على طول .. رحت الاستعلامات ولا هنديهم قاعد يقول حق الريال انه بيخلي المفتاح او بتيي وحده اسمها نوار بتاخذه قلت له انا نوار او اخذناه اودلنا على السياره .. ومشينا المهم .. رحنا اول شي مجمع السيف .. كنا شباعه او قلنا نتسوق لفلفنا بالمحلات بعدين قررنا نروح مجمع اللي بفندق الشيراتون .. دخلنا محل شريت لي بدلة سهره او يوسف خذ نظاره او طلعنا .. خلصنا بسرعه هالمجمع لانه اغلبيته محلات متشابهه المهم طلعنا او ردينا يم مجمع السيف مطعم ليلو او كوفي شوب اكثر من مطعم فضيــــــــــــــع المكان والديكورات .. اي وحده تروح البحرين لازم تمره انا طلبت ميني برقر مالهم وايد لذيذ طعمه غريب بس يوسف اكله كان مسكت دياي على طماط مجفف او روزيتا او مايصير مانحلي انا اخذت كيكة على جوكليت او يوسف اخذ كنافه بالموز بس صج فضيــــعه خلصنا غدانا او تمشينا بمجمع يم السيف اسمه العالي في محلات وايد اخذت لي جنطه او نعال او يوسف اخذ جوتي او تي شرتات او رحت جنيد شريت حق امي او خالتي عود او بنفس هالمجمع كان في كشك يبيعون نفس الاجار او هالسوالف .. امي دايما تشتري منهم .. خذيت لها او حق خالتي .. خذيت حق امي عباه او رحنا بعدين كوفي شوب اسمها Galler شكلها يوووووونس او الجوكليت مالهم معروف بفرنسا .. خذيت حق بدور او فطومه المغرب خلصنا من هالمجمع او رحنا السوق اللي عند بوابة البحرين حق محل يبيع اثواب نشل .. اسمه الزري .. شريت منه ثوب حق ليلة الحنه .. كنت ابي اخضر بس يوسف لزم على الابيض .. قالي طلعي بشي يديد او الابيض حلو او يناسب العروس او التطريز مادري الزري اللي فيه وااااااااااايد حلو شغله غريب .. خلصنا منه او رحنا منطقة العدليه ..عشان نلحق عالمطعم اسمه مونسون .. واااااااااايد حلو اكله جاينيز .. او عندهم ماكي وايد لذيذ . وايد عجب يوسف .. او قعدته حلووووووووه المهم خلصنا العشا كان باقي على الطياره 3 ساعات .. الحمدلله وقتنا كان في بركه رحنا المحرق او اخذنا الحلوه حااااااااااااره من شويطر اشوى لقينا مفتوح الساعه كانت جريب الـ11 بس يمكن لانه ويك اند او ابوي كان خاطره بمتاي .. او كلشي كان يم بعض .. خلصنا او تمشينا بالسوق او رحنا المطار لقيت محل عبايات فالمطار شغلهم وايد حلو .. خذيت منه لفات حق اختي تذكرت رفيجتي .. الاسبوع الياي اهيا انشاءلله يايه لكويت .. دقيت عليها اشكرها .. او ركبنا الطياره وانشغلت مع يوسف بالسوالف ولاحسيت بالطريج الحمدلله .. دقيقه إلا وصلنا .. بس ركبت السياره!!!! طلع علي التعب.! فجأه حسيت ريلي خدرانه من المشي .. او رااااااااااسي عورني قلت الحمدلله الله تمم علي السفره او خلاني استانس .. او دام يات عالنهايه اشوى .. حبيبي كان تعبان بعد .. قلت له انزل بيتنا كانت اول ليله يبات اب بيتنا يسهر لي الصبح بس ماقط عزمته عالمبيت هههههههههه دخلنا امي او ابوي يبون يسولفون انا كنت بس ابي اسبح قعد معاهم او طلع لهم اغراضهم او انا سبحت او انسدحت .. يوم شافني طولت صعد الغرفه .. بس كنت حدي دايخه شكرته لاني صج من قلب احتجتها هالسفره اولا او ثانيا وااااااااايد استانست او كان باله وايد طويل علي او انا من محل لي محل .. او بس نمنا

اخواتي سامحوني ان تاخرت عليكم لاني حامل وبالشهر التاسع دعواتكم لي بالتساهيل الجزء الرابع والثلاثون سفرة البحرين باجر انشاءلله واليوم زوارة بيت يدتي .. يوسف مايه وياي ولا مره دايما تصيده ضروف بنفس اليوم .. لكن اليوم كان بيي .. بعد ماكلمته الصبح سكرته او دقيت على رفيجتي البحرينيه قلت لها بايي بس ماعندي وقت اشوفج لمت علي نكنسل السياره او تبي تعطينا سيارتها .. من الصبح لدريول بيوقفها لكم فالمطار او المفتاح بالاستعلامات عيزت معاها مني مناك مو راضيه .. المهم قلت لها .. ابيج تحجزين لي بمطعم مونسون حق العشى .. او سألتها وين اروح الغدا مدحت لي ليلو .. انا رايحته من قبل بس فاتحين فرع يديد يم مجمع العالي .. المهم .. سولفنا شوي او صكرته .. قمت اجهز روحي حق بيت يدتي .. يوسف من فتره كان طالع ويا بدور او خذالي نفنوف أزرق فاتح انا ماحب هاللون فمالبسته ولا حتى قايسته .. مسكين حبيبي .. من شفت اللون صكيت الجيس او قطيتها بالكبت دخلت علي اختي او انا بحوسة لهدوم او سحبت الجيس تشوف اشفيها او ينة عالنفنوف وسيع او قصاته حلوه قلت لها مو حلو لونه .. قالت لي لبسيه بتشوفينه باللبس وايد حلو .. لبسته او صج .. نااااااااااااااااعم وايد حلو .. يابت لي تاج ضعيف نفس لونه .. قالت لي هدي شعرج او لبسي التاج بس .. او لبست معاه نهال فلات او حطيت مكياج ازرق فاتح او او لمعه بيضه تحت حواجبي او كحل او مسكره او حمره بيج او لبست فوقه كوت طويل انتظرت يوسف يمرني عشان اروح معاه .. دق لي او طلعت له او احنا بالطريج فتحت الكوت او شاف النفنوف وااااااااااااااااااااااايد استانس اني لابسته .. يقولي عيزت وانا ناطرج تلبسينه كان خاطري اشوفه عليج من طالعته بالمحل.. بعد عمري المهم دخلنا بيت يدتي .. والحمدلله بسرعه اندمج مع الجو .. اهوا ماشاءلله اجتماعي ماينخاف عليه بس كنت دايما فبالي يوم نزور بيت عمه او شقد تضايقت او صرت ماحب اروح بيتهم لهالسبب .. بس طبعا لازم اروووح .. عمه وايد محترم او يحب يوسف او يوسف او خالتي يستاهلون مني .. المهم ماطول عليكم مشو الرياييل العصر او احنا نقعد لي الليل .. الساعه 9 يا خذاني .. باقي يومين على سفرة بدور .. او باجر بنروح البحرين او عقب باجر بتنشغل .. فقلنا بنقعد وياها اليوم ... خالتي كانت بالبر .. قعدنا مع بدور او فطومه بالبيت شوي.. او بعدين قلنا بنروح نييب خالتي من البر .. او نتمشى بالمره شرينا عى حق البنات .. او رحنا .. وصلنا البر كانت الساعه 12 .. لزمو علينا ننزل رفيجات خالتي .. قعدنا وياهم لي الساعه 2 او فبالي قعدت باجر من الساعه 5 احنا بالمطار لانه 7 تطير الطياره .. او طبعا طول اليوم لويه فبنهلك .. او يوسف عادي عنده .. ماشاءلله عليه النوم عنده شي ثانوي .. المهم .. قلت حق خالتي اني احاتي السفره او قالت لي اسفه كلش نسيت وعليه .. او على طول قمنا .. نزلوني بيتنا او راحو طبعا انا على مابدلت او ييت بنام استوعبت انه خلاااااااص ماكو وقت .. انا ماحب اشرب كوفي .. بس سويت لي او قعدت اتغصب اشربها عشان تصحيني او مااتعب .. دقيت على يوسف ولا اهوا بعد قاعد .. قلت له مرني برد اشرب لي كوفي بالمطار .. او وانته ياي يبيلي رد بول .. ضحك علي .. قالي مع اللويه بتنسين النوم .. قلت له راسي بيعورني انا اعرف روحي .. حرام تخترب علي الروووحه المهم .. خذيت لي Handbag اللي تنسحب حق الرده عشان احط فيها اللي شريته .. او شلت اكبر جنطه عندي .. لبست جينز او قميص في ألوان اخضر اللي على تركواز او بيج .. او لبست فوقه كوت سكري طويل .. كان الجو بااااااااارد .. او سمعت بالبحرين هم برد .. المهم وصل يوسف .. ربطت شعري او طلعت له .. حطيت الجنطه قالي ليش جنطه قلت له السبب قالي والله تفكرين او على طول قالي عطيني جوازج .. اشووووووووى انه قالي عطيني جوازج اول ماركبت السياره لاني كنت ناسيته!! قلت له لحظه بييبه قالي طلعتي كلش ماتفكرين عيل المهم رحت ركض دار امي .. من لعيه داشه بجوتيي فيه كعب او ططراااخ طريخ على راسهم مساكين نايمين .. قعدت امي قالت لي ها ماشيين قلت لها اي ..يوسف برى نسيت الجواز قام ابوي بيعطيني فلوس .. قلت له يبه خلاص عندي ريل اولا ثانيا مهري عندي .. حبيبي ابوي .. دايما جذي .. يعطينا قبل لانطلبه .. مخليني ساعات اذا نحتاج نستحي نقوله اندز امي .. لانه مايقصر .. المهم .. سلمت عليهم او رحت بسرعه السياره قعدت اشرب بهالرد بول المر .. صج ماحبه! .. المهم .. رحنا قعدنا بستاربكس نتريق .. او شربت كافي لاتيه مادري شسمه او دخلنا او كنا متأخرين بسرعه بسرعه عالطياره الحمدلله ماكان في تأخير .. انا دايما اسافر بس عمري ماخفت من الطياره الا بهالسفره ..وايد كان اكو مطبات او مادري شلون اول سفره بروحي بعد .. اهوا ماصدق اني خايفه إلا لما لمس يدي شافها شقد حاااااااااااره وترجف قعد يعابلني او يقرى قران شوي او يرد يضحك علي بس ريحني ووصلنا بسلامه...

بحاول اشكركم على دفعات قلبي يعورني او انا كل يوم اقول لكم مشكووورين مو بالاسم بس والله اني اقرى ردودكم رد رد .. بكل اهتمام الجزء الثالث والثلاثون قعدنا الظهر .. كنت يوعااااااااااااااااااااااانه .. سبحت او قعدت بدور او قررنا نروح لورانزو نتغدى .. كان خاطري في السوب مالتهم اللي بالخبز .. او يوسف قال بيينا اهناك .. احنا وصلنا الساعه 1 او ربع اهوا يانا الساعه 2 .. كان بيده علبه حمره طويله .. او عطاني اياها .. قلت له شنو هذا! قالي فتحي او شوفي .. فتحته ولا داخله تذكره البحرين .. ايام ماكنت بالمستشفى كنا نسولف او قلت له وااااااايد خاطري اروح البحرين .. قصه تذكره تطير الصبح او ترجع بالليل .. نفس اليوم .. المهم انا استااااااااااانست بس خفت بيتنا مايرضون .. اكل عالسريع او رجع الدوام .. انا وبدور كنا بنتمشى بالصالحيه او بنرجع البيت .. دخلنا قعدنا بستار بكس .. انا كنت شبعاااااااانه بدور كانت تبي كوفي .. بهالوقت دقيت على امي قلت لها عن السفره قالت لي سألي ابوج .. دقيت على ابوي .. قالي مو مشكله .. استااااااااااااااااااااااااانست .. والله يعينا عالتعب .. المهم وصلت بدور البيت او رحت ألبس عشان اروح الجامعه .. رجعت من الجامعه .. او كلمت يوسف .. قالي انه حجز سياره من المطار او خططنا برنامجنا شراح يكون .. صج كنت فرحانه .. او انشاءلله نستانس .. نام من وقت كان تعبان او انا سهرت مع امي او ابوي .. وبعدين نمت ..