cofyana Posted مايو 23, 2007 Report Share Posted مايو 23, 2007 هاااااي هذي القصة قاعدة اكتب فيها من ثلاث سنين تقريباً.. يوم اكتب فيها سطر ويومين اطنشها ... ويوم اكتب صفحة واتركها شهر .. المهم لحد الحين ما كملتها .. واحتاج تشجيع عشان اكمل إلي بديته وللعلم إن القصة (حقيقية) حصلت على أرض البحرين.. ولكني غيّـرت أسمـاء الأشخاص ... مع إضافة ملح وسكر وتناتيش ما تغيّـر من مجريات القصة الحقيقة منعاً لحدوث الأحراج لـ أبطال قصتي.. وللعلم آنه (وحدة) من أبطال القصة .. بس ما بقول لكم منو قصتي عندها اسمين ... (يا ليت مالي قلب) و (الحل الصعب) متحيّـرهـ بين الاثنين..!! وياريت كل واحد يتابعني يرشح لي أي اسم اختار .. آنه راح ابدأ في القصة يا ترى بتشجعووني ؟ ----------------------------- سارة واهي تشهق من البجي (حضنت ارفيجتها مريم) : صدقيني غصب عني بتوحشيني ماااقدر , دمووعي تطيح بروحها آنه ماقلت لها . مريووم: هههههههههههههه اي امبلاااا ما قلتي لها (لمت سارة بقوتها وهمست بأذنها ): دلوعة . ابتسمت سارة إبتسامة خجل وقامت من حظن ارفيجتها وصار الدور والباجي على باجي الشلة .. واشتغلت صياح مرة ثانية. طلعت فاطمة من قاعة الإمتحان ولقت سارة ومريم ونورة وجم بنت من بنات الصف واقفين يم القاعة يسولفون , إلي تضحك والي تصيح وإلي تحظن ارفيجتها و إلي تآآكل ... فاطمة (تتنهد بقووه) ...: اوففف ماصدق اخلص من الإمتحان. طارت سارة لعند فطوم: هاا بشري اشسويتي. فطووم (مبتسمة واهي تمسح قطرات العرق إلي تجمعت على جبهتهااا) : إن شاء الله زين. سارة: إن شاااااااااااء الله يارب . يلا تعالي بحظنج (وبدأت تتجمع الدموع بعينها) واسلم عليج لأن البابا ينطرني برع. فطووم (بدهشة): بتروحين الحين ؟؟ مريووم (وصوتها وصل آخر الدنيا): لاااااااااااااا مااااافي تروحين مو كيفج. نورة: والحفلة ؟؟؟ سارة (واهي ترفع اكتافها بحيرة): والله ماقدر آقعد , البابا ينطرني برع ما أقدر اخليه ينطر أكثر , وانتو بعد مطوولين على ما تنطرون الكل يخلص امتحان ويطلع من القاعة وعلى ما تجهزون الحفلة . مريوم: حراااااااام عليج قعدي شلون انهون عليج سارة: شسوي بعد غلطتكم ماقلتوا لي عن سالفة الحفلة وخليتوني اقول لأبوي اييني بعد الإمتحان مباشرة .. بعد جهد جهيد قدرت سارة تتخلص من ارفيجاتها وحنتهم , سلمت عليهم والشووق ياها من الحين لهم حتى قبل ما تفارقهم . طلعت سارة من باب المدرسة الأسود الكبير, والتفت على صديقاتها إلي ياو من بعيد يجوفونها وأهي تطلع.. سارة واهي تطبع بووسة على باطن ايديها واتطيّـرها لرفيجاتها (صرخت بأعلى قووتها)... : بتووووووووحشوووووووووووووووووني كان اليوم هو آخر يوم بالإمتحانات في مدرسة سارة وارفيجاتها... وآخر يوم في هذي المرحلة الدراسية أصلاً بودعون المدرسة والطالبات والمدرسات للأبد , لأنها كانت آخر سنة لهم بالإعدادي (المتوسط). كان يوم حافل , سعيد عند البعض لأنهم انتهوا من مرحلة وافتكوا منها ومشتاقين للمرحلة اليديدة اليايه, وحزين عند البعض لأنهم بفارقون مدرستهم إلي ضمتهم ثلاث سنين ودرسوا فيها وقضوا فيها الأيام الحلوة والمرة, اشقد بتوحشهم المدرسة .. واشقد بتوحشهم المدرسات وعنادهم عليهم والمقالب الي يسوونها فيهم والشطانة الزايدة إلي يطلعونها على المعلمات والمشرفات ,واشقد بتوحشهم ارفيجاتهم ... (((أي صح تعالو بعرفكم على نفسي ! آنه سارة ... مريموووه ونورة وفطووم ارفيجاتي بالمدرسة أحبهم ويحبووني قد الدنيا ! وآنه بعد أحبهم .. بس تظل مريووم أهيه المقربه إلى قلبي و إلي تعرف وايد من أسراري ........ بس خلاص هذا إلي بقوله الحين .. وبعرفكم على نفسي أكثر وأكثر بس مو الحين لأن كل شي بوقته حلو )) طاااااااخ << --- هذا صوت الباب الي سكرته وآنه أدخل سيارة ابوي إلي كان ينطرني يم مدرستنا الحبيبة ... بعد ثلاث دقايق من الهدوء والسكوت بو خالد : بسم الله اشفيج امبرطمة وشايلة هموم الدنيا كلها فوق راسج. (قلت وبرطوومي شوي يوصل للأرض !) .....:: مافيني شي. - غريبة توقعت تدخلين بربشة وازعاجج المعتاد وتقولين بارك لي خلصت امتحانات وافتكيت من مرحلة بكبرها. (وبمثل الزعل وطريقة كلامي الجافة قلت لأبوي) .....: شلفايدة - شنوو شلفايدة ؟؟ اشصااير ؟ اشفيج ؟ - ارفيجاتي - شكلنا بنوصل البيت وانتي بعدج ما قلتي شي .. اشفيج حاجيني عدل قاعدة تتكلمين بالقطارة كلمة كلمة الله يهداج , اشفيهم ارفيجاتج؟؟ لفيت ويهي على يميني (يا زعم أطالع الشارع من الدريشة عشان أبوي ما يلاحظ ويهي المعتفس) .....:: بيوحشووني ! - ليش ما بصيرون معاج بالثانوية ؟؟ - مريم بتصير وياي .. بس نورة وفطوم لااا , لأن تخصصهم غير عن تخصصي آنه ومريااامي عشان جذي تختلف المدرسة. - ايه بابنتي مافيها شي, اكااه مريووم على قولتج بتصير وياج واحمدي ربج في احد معاج , وبعدين نسيتي إن نورة وفطوم بيتهم يم بيتنا ! - لااااااااااا ما نسيت , أدري اقدر ازورهم ويقدرون يزوروني بأي وقت, بس المدرسة غييييييييييير , بس خلاص تفرقنا ,, أهئ (طلعت شهقة غصباً عني!) أبوي (واهو يبركن السيارة يم باب البيت) ..... : تراج دلووعة يا بنتي وآنه مادري , اقوول يلا نزلي نزلي البيت وغسلي ويهج وعن الدلع الزايد. مديت برطوومي أكثر وأكثر ونزلت من السيارة وصفقت الباب لا شعورياً (عاادتي لما انقهر أو أعصب! أحط حرتي في الأبواب واشدخ فيهم!). والبابا يضحك علي من قلبه ... الله يا ساارووة اتاريج حساسة وعصبية وآنه مادري ... (ترى آنه معرووفة عند كل الناس عن دلعي عند ابوووي !! يعني آنه دلوعة أبووي .. وكل من يقول عني دلووعة )!! وقفت يم باب بيتنا أطالع ويهي بالمنظرة (باب بيتنا فيه مناظر صغيرة على شكل مربعات). (مررت إيدي على خدي وويهي عابس)....: امبيــــه ويهي صار يلوع الجبد من الصياح ! ((نسيت اقولكم , ترى آنه كلله يقولون عني مغرورة ! يمكن لأني أحب آلبس وآتعدل وآهتم بروحي واايد ... ولا عاد إذا طلعت لي حرارة بويهي آعفس الدنيااا وآقلبها فووق تحت ! .. بعدين انتو ما عليكم من إلي يقول عني مغرورة أكيد غيرانيين مني لأني حلوة صح ؟ )) طقيت جرس البيت لأن الباب كان مقفول ,,, اووووففف ياربي اشفيها الماما ما تفتح الباب!! ليكون للحين راقدة ؟؟ بس الحين الساعة عشر, مووب معقوولة ما قعدت ! ياااااااررررربي بنقع الحين بالشمس ! شسوووي ويهي مو ناقص بكبره معتفس , الحين باصير سوووووودة من الشمس (وظليت مبرطمة) حطيت إيدي على الجرس ولا شلتها من القهر (نذالة خخخ) , ((بقدي كنت منقهرة والحين زاد علي القهر من وقفتي بالشمس الحارة الي حرقتني وحرقت وويهي ..!! )) بعد شووي فتحت أمي الباب لي .. (قلت لها بطريقة هجوومية).... : يمممممممممه حرام عليح توقفيني جذي بالشمس وينج ماتفتحين الباب !! الحين زين جذي بشرتي تحترق من الحرارة بقدي ناسية احط لي كريم حماية عن الشمس ! - بسم الله اشفيج كليتيني, كنت اسبّـح اخوج لصغير ولا قدرت اخليه بروحه بالحمام اخاف يصير له شي , دخلت البيت وآنه للحين اعصابي محترقة.. كنت بروح غرفتي ابدل ملابسي واخفي آثار التعب إلي باينه على ويهي وآنه بطريجي مرّيت على الصالة جان اجوف (محمد) اخوي لصغير , وردت الروح لي مرة ثانية .. (( وإلي ما تعرفونه عني , إني امووت امووووت على أخوي لصغير حموودي )). (شلته وآنه آضحك من قلبي ورفعته فوق)...:: حموووووودي حبيبي فووووووووووووووق واهو يضحك معاي :: فوووووووووق ((يضحكني لما يقول فوق, لأنه يقولها بطريقة مضحكة ولا عاد حركة شفايفه إلا تظل "اموتره" هع هع )) المووهم طاار أخووي فوق بالهوووى وطار شعره الذهبي معاه , ورديت لقفته,, وإحنا نضحك مثل الميانين ! وكررت الحركة مرة ومرتين وأكثر , لين ما حسيت إن حموودي دار راسه ويوم جافتني أمي مصختها وآنه لاعبه بأخوي لعبة - حرااااااام عليج خلي اخوج لا اتطيحيينه - يممممه طالعيييييي هالقمر ماااااااقدر ماقدر امووووت عليه هالدب ( ورصعت شفايفي بخده وبسته بوسة كبييييييرة ) خلته يصيح محمد (واهو مبرطم) : ماحبس "ماحبج" - حبيبي إنتااا ,, بس آنه احبك (وآنه أرصع خدوده بأصابعي) وخليته يصيح مرة ثانية عصبت أمي علي , وخذته مني خايفة لا أذبحه بعد شوي من حبي له ! (( محمد أخوي عمره ثلاث سنوات وشوي تقريباً , الكل يحبه ويدلعه بالبيت وبرع البيت لأنه حلووو,,, بشرته بيضه وشعره اشقر غامج وخدوده حمراااا وعينه عسلي فاتح مايل للأخضر , وباقي ملامح ويهه اتينن حلوووة وغالب عليها البراءة)) .. ضحكت في نفسي على حموودي أخوي وأمي إلي حاملته وأهو يصيح ويقول كلام مو مفهووم بعصبيه (شكله متحلف فيني خخ ) إلي فهمته منه .. (لكن بقول حق البابا).. !!! ماقدرت أتحمل حلاته واهو معصب ويأشر بإيده لي ويهدد.. رحت بسته بوسة قووووية (بدفاشتي المعتادة) وركضت غرفتي قبل لا تزفني أمي ... تسندت على الباب غرفتي من داخل وآنه أتنفس بسرعة وإيدي على قلبي وأضحك بروحي ! منى: صج مينونة ! - بسم الله أنتي من متى هني ؟؟؟ - اشفيج اتضحكين بروحج ! - كيفي مالج خص (ورحت فتحت كبتي وبدلت ثيابي المدرسة عشان بروح أقعد على النت إلي يآخذ معضم وقتي ). وقبل مااطلع من الغرفة تذكرت شي ورديت .. لفيت ويهي اطالع (منى) الإنسانة إلي قالت عني مينونة من شوي ! - مناااتووووو مالت عليج ! وليش ما قمتي اتفتحين لي الباب يوم سمعتي الجرس ؟؟ ولا عاجبتج وقفتي بالشارع تحت الشمس؟؟؟ آآآدري آدري محترة من بشرتي الصافية الحلوة وتبين ويهي يحترق ! (متسببه !! ) كانت قاعدة على سريرها وبحظنها دفتر كانت تكتب فيه مادري شنو .. رفعت لي طرف عينها وأهيه تهز ويهها (استنكاراً!), طالعتني على صوب .. وردت نزلته وببرود قاتل قالت لي - أولاً مالت عليج أنتي ! وثانياً آنه ماسمعت الجرس .. ما تجوفين الهدفن في أذني ولا عميه ؟؟ وثالثاً بشرتي أحلا من بشرتج فـ ما يحتاي أغار .. !! وردت رفعت نظرها لي وطلّعت لي لسانها بطريقة خلت دمي يفوور ((بس خلاص ماتحمل !)) ومثل العادة حطيت حرتي في الباب شدخت فيه وطلعت!! ((أكيد بتسألون منو هذي "منى" منااااااااتوو هذي أختي أصغر مني بخمس سنين وآنه وياها مثل توم وجيري !! واهي مخلصة إمتحانات قبلي بأسبوع وعاد هالأسبوع طلع من جبدي من كثر ما تعايرني ! صج نحيسة ! مو ؟! )) - يمممممممممممممممممممممممه - يممممممممه ووووووووويييييييييينج (فتحت باب غرفة أمي وأبوي بدفااااشة) وبفس الصوت العالي إلي كنت أنادي فيه من شووي : يممممممممممه - (بهمس) اششششششششش سكتي سارووه ماصدقت أخوج يرقد - (خففت صوتي بس ما زال عالي على ما أعتقد !) : يمممه خلاص ياات العطلة , يعني عطووني الكيبوورد ابي آقعد على النت ! - (كانت تبي تصرفني عشان لا يقعد اخوي من صوتي العالي) : مادري عنه , روحي اتصلي في ابوج سأليه - زييييين ( وسكرت الباب بمثل الدفاشة إلي فتحته فيه وووورقعت به بقووة ولا كأن الماما من شوي قايلة لي إن أخوي راقد ولازم ما أسوي إزعاج !!) ((( لا تستغربون مني , ترى آنه جذي مينوونة )) رحت ركيض , لالالا مو ركيض إلا رحت طيراان لـ التلفون إلي بالصالة ودقيت على أبوي , كلها جم رنة ووصلني صوت أبوووي المبحوح :: آلوو - هلاااااا يبه حبيبي أنتاا - هلا فيج ,, شـ (( وقاطعته لأن ما عندي وقت ولا أبي اضيع ولا ثانية أكثر , وحشني النت !! )) ........:: يبـــــــــــــه , وووين الكيبورد ! خلاص ما عندك حجه ولا عذر الحين ,, الإمتحانات وخلصناها !! - (يحاول يستفزها) إمبلا عندي حجة ! من قال ما عندي - أوففف يبــه - أنتي أول قولي لي ما تستحين على ويهج اتهفين بويه أبوج ! - يبــه آنه بالبيت وأنت بالدوام ! شلون وصلتك الهفة ! - (ضحك ابوي على هبالتي, بس بعد شوي قال وكانت نبرته جديّـه شوي) : لاا مافي نت ولا غيره قبل ما أجوف النتيجة .. وإذا اعجبتني النتيجة حزها أفكر اعطيج .. ((كان يحاول يرفع ضغط سارة ويحرق اعصابها لأنه يدري عن أدماانها على النت)) - لالالالالالالالالالا حرااااااااام عليك يبه .. النتايج بعد اسبوع , وآنه شينطرني اسبوع كامل !!!! مو كفاية اتشيلون الكيبورد عني كأني يااهل !!! آنه عمري كله ما سعمت وحدة من ارفيجاتي اتقول إن اهلها يشيلون عنها النت لا بأيام إمتحانات ولا غيره !! - وآنه اشعلي من ارفيجاتج !! آنه تهمني مصلحة بنتي ! - تهمك مصلحتي آآدري . بس شنو بينقص منك إذا قعدت على النت الحين ؟؟؟؟؟ وآنه بالعطلة !! (( وبعد محاولات من سارة , وبعد ما نشف ريجها واهيه تقنع أبوها يعطيها الكيبورد إلي دائماً يخشة عنها أيام الأمتحانات لأنه يدري إن لو خلوه لها ما بتفتح كتاب ! وبعد كله يشيله في الأيام العادية إذا سوّت شي غلط "معاقبةً لها ! =( " لأنها على قولتهم " مدمنة" !!! )) ******************* جفتو سرعة البرق شلون ؟! مثل سرعة البرق ويمكن أكثر .. رحت محل وصف أبوي لي وين ما خش الكيبورد عني .. !!! ودخلت النت ... عادةً أدخل النت عشان أسولف بالمسنجر (امووت على السوالف مع ارفيجااتي بالمسنجر) احسه شي ممتع وحلو !!! وغير هذااا أشاارك بمنتديات وايد .. كل مرة اتنقل من منتدى لـ الثاني ! على حسب مزاجي ! وبعد اتصفح بريدي ,إلي ما ظلت قروب بالنت ولا شرّكت روحي فيه ! (( في بعض الأحيان أدخل أي شات إذا تمللت وطقت فيني الدنيا وما عندي شي اسوي , أدخل اسولف واينن الموجودين واطلع عنهم ! )) .. كلها ثواني .. وسمعت الصوووت إلي وووحشني ! (( تنننننننننننننننننن .. تم تسجيل دخوول " exams days ! =( " إنتبهت على "نك نيمي" وقلت بنفسي (وووعيي) وبحركة سريعة غيرته وكتبت " welcome holiday" طليت على (المتواجدين الآن) ... وجفت مريووم ونورة وفطييم online أضفتهم في محادثة وحدة ... (( بعد السلام والتحية.. وحشتيني ومشتاقة لج وغيره من دلع البناات !! )) - بوووووووووووو مداكم تحتفلون وتردون البيت ! (( طبعا ما أوصي حريص , طلبت منهم يقولون لي إشصار ما صار بالحفلة بالتفصيل الممل .. وأهم ما صدقو خبر , ما ظل شي وإلا قالووه ! )).. ...... ظليت على هذا الحال طوول يوومي (نت×نت) ... أقعد من صبااح الله خير اطقطق على الكيبورد لين الليل .. وياكثر الهوشات إلي تصير بيني وبين منى أختي وخالد أخوي ! لأني ما امل من قعدة النت وآخذ وقتي ووقتهم ! بس بعدين أبوي يوم جاف إن الهواش زاد , قام حط لنا جدول .. كل واحد له وقته .. بس طبعاً لازلت آنه أكثر وحدة آقعد .. لأني آقعد من صباح الله خير ! وكل ما بغيت آقعد أكثر كل ما قعدت من وقت أكثر!! (آدري إني مينونة ما يحتاي اتقولون لي !) ((اووه نسيت اقولكم منو خالد ! طبعاً هذا أخوي وأهو "بجر أمي الحبيبة" أكبر مني بسنة ! )) مر يووم ,, يومين ... اسبوع وآنه على هالحال .. ما تغيّـر أبداً .. ريووقي وغدااي وعشااي آكله على طاولة الكمبيوتر ! وطبعاً ما اسلم من لسان البابا والماما واتهاماتهم لي بإني (مدمنة نت) ! تتوقعون صج إني مدمنة نت ؟؟؟ إنزين شنو بصير لي من هـ الإدمان ؟! بظل طول العطلة جذي لا شغلة ولا مشغلة ! وهمي قعدة النت وبس ؟! ********************** Link to comment Share on other sites More sharing options...
بنت الأصول Posted مايو 23, 2007 Report Share Posted مايو 23, 2007 القصه وطريقتج في الكتاابه وايد حلووه وانا اول وحده راح اشجعج ورااح انتظر الجززء الثااني من القصه وبتوفييييييييييق Link to comment Share on other sites More sharing options...
memo0o0o Posted مايو 23, 2007 Report Share Posted مايو 23, 2007 مشكورةعلى القصة وايد حلوة في انتضار تكملة Link to comment Share on other sites More sharing options...
cofyana Posted مايو 23, 2007 Author Report Share Posted مايو 23, 2007 بنت الأصول & memo0o0o مشكوووورين على قراءة القصة ماعرف شلون اشكركم على التشجيع والجزء الثاني بحطه باجر تحيــــــــاتوو .. أحلاا كوفيانا Link to comment Share on other sites More sharing options...
دلوعة مغرورة Posted مايو 23, 2007 Report Share Posted مايو 23, 2007 يسلمو ع القصة الروعة وفي انتظار التكملة لا تطولين علينا Link to comment Share on other sites More sharing options...
shahed Posted مايو 23, 2007 Report Share Posted مايو 23, 2007 تسلمين على هالقصه الحلوه وربي يوفقج والصراحه اسلوبج واااايد حلو Link to comment Share on other sites More sharing options...
cofyana Posted مايو 23, 2007 Author Report Share Posted مايو 23, 2007 دلوعة مغرورة & shahed تشكراااااتي لكم على المتاابعة ما تتصورون اشقد مستانسة تحيــــــــاتوو .. أحلاا كوفيانا Link to comment Share on other sites More sharing options...
cofyana Posted مايو 23, 2007 Author Report Share Posted مايو 23, 2007 (edited) (( بعد أسبوع)) .... وبالتحديد يوم النتائج ! الساعة تسع ونص صباحاً ... كنت راقدة رقدة عمييييقة طويلة عريضة , بما إني كنت راقدة البارحة متأخر فـ كنت راقدة من قلب ومن الإعماق.. !! بتستغربون ! ليش راقدة اليوم لي هالوقت ؟! وآنه متعودة كل يوم اقعد من الصبح ! صراحة عن روحي مادري ليش رقدت لـحد هالوقت ! يمكن اتهرّب من نتيجتي ؟! ويمكن خايفة ؟!! ... أو ويمكن شي ثاني ؟! مادري !! ما عليـناا من السبب .. وخلنا في المهم ! تخيلو معاي .. جو الغرفة هااااااااادئ ولا صوت ولا حركة ... ظلاااااااااااااااااااااام (مع إن الوقت صبح بس الستاير لاعبة دور) والغرفة حدهااااااااا باردة . عجييييب (خبركم ايام الصيف احلا شي فيها المكيف!) .. وآنه راقدة بسلام .. سمعت صوت... صوت أكثر من نقول عنه صوت مزعج ! ((ياربي شنو صوت مزعج !)) شنو ذي ؟ زلزال ؟؟؟ وإلا بيتنا بطيح بعد شوي ؟! (آنه معروفة بالبيت ماحب اقعد على صوت مزعج كلش كلش , راسي خفيف وبسرعة آقعد على أي صوت, واذا قعدت على صوت آقعد بخرعة مهما كان خفيف !) بس خلنا الحين بالصوت إلي سمعته من شوي .. رفعت راسي من الخرعة وفركت عيني بيدي .. آبي آستوعب هذا صوت شنو ! بس زعجني قوة الضوء إلي ياي من الباب إلي انفتح قبل شوي فـ غمضت عيني وشديت عليها بقووة ! وتووي بس استوعبت , إن الصوت المزعج إلي سمعته من شوي .. وحسبته زلزال !! ماهو الا صوت أمي واهي تفتح باب غرفتي بدفااشة قد الدنيا (((الظاهر أمي انتقلت لها العدوى مني ! أو تبي ترد الصاع صاعيين يوم اقعّد اخوي من صوت شدخة الباب وبعدين يننها ولا رضى يكمل رقاد !!))) - ساااااااااااااااااااااااااااااااااااااارة (( باااااال!! بسم الله .. امي ليش تناديني بصوت عالي جذي ؟!! آنه متأكدة إن إحنا قاعدين في غرفة وحدة !! والله والله متأكدة إني قاعدة بغرفتي مووب في بيت الجيران! ومتأكدة إني بسمعها لو تكلمت بصوت هادئ !)) عاد ما كفى صوت الباب إلي حدّهـ مزعج ويات كملت عليه بالصوت العالي ! ((بس تظل أمي واحبها !)) - هممم ((اكتفيت بهالصوت إلي طلعته عشان تدري أمي إني إنسانة مو صمخة ! ولا ميته ! عشان تتكلم بصوت اخف شوي !)) - قوووووووووووومي رديت على أمي وآنه حدي مستغربة وناسية سالفة النتائج بالمرّة (بصوت فيه نوم الدنيا كلّـه) .... : وين ؟ - قووووومي طلعت النتائج وأنتي راقدة ! قوومي خل نشتري الجريدة وندوّر اسمج ونروح المدرسة عشان نآخذ الشهادة! ((ووي فديتها امي الحبيبة ! اتاري كل هالازعاج والحالة عشانها تحاتي نتيجتي ! )) أكتفيت بكلمة وحدة وبعدها طلعت الماما من غرفتي (بصوت فيه ملل الدنيا كله)...:: انزين! بعد هالكلمة على طول قمت وغسلت .. وطلعت مع أمي لـ البرّادة إلي بالفريج وإلي تصير يم بيتنا تقريباً ... بس للأسف ! طلعو بنات فريجنا أشطر مني وياو شرو الجرايد من صباح الله خير.. وخلصوهم عني ! اهئ .. أبي اجوف اسمي بالجريدة مالي شغل ! ((وإحنا نتمشى بطريجنا للبيت)) - جفتي شلون .. راقدة على راحتج لي هالوقت وخلصت الجريدة عنج .. ماتقولين شلون بتعرفين نتيجتج الحين ! وابوج لحد الحين بالشغل ومابرد إلا الظهر بعد دوام المدرسة يعني ما بتلحقون تروحون والا سكرت المدرسة .. - يممممه وآنه اشدراني ... (فجأة لمعت في بالي فكرة ) .... ايييي يممممممه تذكرت !! . النتائج يخلونها في موقع الوزارة ! وآقدر اعرف نتيجتي منه ! بسسسس - بس شنو ؟ - ما عرف الموقع !! - يحليلج ! وشنو استفدنا الحين ! ((فتحت امي باب بيتنا بالمفتاح ودخلنا .. )).. (مشيت عنها وآنه أقول لها) .. :: ما عليج أنتي آنه باتصل في ارفيجاتي .. وباسألهم ... بس انتي روحي حق ندى شكلها مو قادرة على حموودي الدب ((كنا مخليين محمد عند ندى اتيووده على مانروح البرادة وانيي)). ومثل ما قلت لأمي ... على طول رحت دقيت على ارفيجاتي ولحسن الحظ لقيت عنوان الموقع عند نورة ... وفتحت الموقع وجفت نتيجتي ... مع إني انصدمت من النتيجة .. ومع إن النتيجة ما كانت عاجبتني .. ومع إن النتيجة مو ذاك الزود ... بعد حمدت ربي وشكرته ورحت أبشّر الماما ... إلي قامت تتحرطم علي , لأن النتيجة ما عجبتها ! ,,, بس الحمد لله يوم دقيت على البابا وقلت له النتيجة أكيد أكيد بارك لي .. لأن البابا دايماً وأبداً يرفع من معنوياتنا ويشجعنا .. والأهم من هذا (وعدني بهدية نجاح) .. - أي بس يبه الحين لازم آخذ شهادتي الأصلية من المدرسة شلون وانت مابترد البيت الا متأخر ؟ - ولا يهمج سااروونة ... الحين باستأذن من الدوام ونروح المدرسة انييبها - وي اخاف اتعبك ؟ - لا اشدعوة ... بس ما قلتي شخبار نتيجة خالد ؟ - مادري عنه .. بس ماعتقد نتيجتهم اليوم ! يمكن بكرة أو إلي بعده - اهاا .. يلا على خير .. كلها ساعة إلا ربع اييج وانتي جاهزة عشان نروح انييب النتيجة من المدرسة - إن شاء الله يبة .. بس لا تنسى - شنو ؟ - أكيد عندك جريدة اليوم بالمكتب, آبي اتييب لي ملحق الجريدة إلي فيه أسمائنا بلييز - أن شاء الله سارونة .. يلا مع السلامة - بااااااااي ********************************* ومثل ما مر أول أسبوع من العطلة .... مر الأسبوع الثاني طبعاً (نت×نت) .. ولاشي غير النت !! حتى إني أفضل قعدة البيت (أو بالأحرى القعدة على النت) على إني أطلع من بيتنا في الويك إند مع أمي وأبوي وأخواني .. !! **************************** أم خالد وأبو خالد ... معاهم منى ومحمد (واهم طالعين من باب الصالة) أم خالد : قووومي يابنتي اطلعي معانا شوي عن القعدة بالبيت بروحج - يممممه ماااااابي اروح مالي خلق - في بنت بالدنيا ماتحب طلعة المجمعات , والله إنج غريبة !! - (وآنه مشغولة بالكتابة ع الكيبورد والسوالف بالمسنجر) : أي يمه آنه ماحب ! - محد مآخذ عقلج إلا هالنت , الله يستر من آخرتها معاج ! - (بعصبيتي المعتادة إلي مالها داعي) :يمممممه خلاص عاد .. مو كل مرة بتطلعون فيها تعيدون لي مثل هالموال !! .. قلت لكم ماحب الطلعات ماحب المجمعات ماحب ازور احد !!... الله خلقني جذي !!! أحب البيت ! أحب أقعد في بيتنا !!!! فيها شي الحين ؟؟؟؟؟؟؟ - على هواج ... آنه مالي شغل إذا انعميتي من هالكمبيوتر ..! **************************** (( وفي الأسبوع الثاني من العطلة ... )) كـالعادة من الصبح الكل راقد في بيتنا ... إلا آنه متعودة على قعدة الصبح ... قعدت من الساعة سبع ووشوي رحت غسلت ويهي واسناني .. ووقفت أصلي صلاة الصبح لأني ماقدرت أقعد الفير لأني راقدة متأخر.. ورحت آقعد على النت .. فتحت مسنجري ... (وعلى غير العادة) جفت مافي ولا أحد !! ... (( كل الروس لونهم حَـمَـر )) ..!! (( حشـى!! وين الناس ذلفوووووووا ؟؟ يعني كل هاي نووم؟؟!! أفففففف.. ملللللل يعني شااااااقعد آسووي الحين؟ )) فتحت بريدي أتصفح الرسائل إلي توصلني من القروب المشتركة فيه .. وآفتح بطاقات التهنئة إلي وصلتني من ارفيجاتي بالمدرسة وبنات العائلة بمناسبة العطلة الصيفية وبمناسبة نجاحي .. وبعد شوي طلع البابا من غرفته .. وجافني قاعدة بالصالة على جهاز الكمبيوتر .. - هاا ساروونة قعدتي - اي يبة قعدت - غريب امرج يا بنتي الناس بالعطلة ترقد لي الظهر وانتي قاعدة من الصبح (( في قلبي . اوفففف ياربي .. يعني لي متى بظلون امي وابوي يحنون علي جذي !!! صبرك يارب !!! )) - أي صبح يبـه ؟! الحين الساعة سبع ونص .. وآنه متعودة من أيام المدرسة اقعد من وقت , وبعدين هذيله إلي تتكلم عنهم ايسهرون لي الصبح من جذي ما يقعدون إلا العصر ! - أي عفيه على بنتي .. اشلج بالسهر (غمزت بعيني لـ البابا وقلت له بمرح) ...:: على قولتهم "نم بكير واصحى بكير وجوف الصحة كيف بتصير" ضحكت مع البابا وإحنـا بطريجنا لـ غرفة الطعام عشان نتريّـق مع بعض ... بعد ربع ساعة خلاني أبوي وراح شغله ... رديت للمسنجر , وهم ما لقيت ولا أحد موجود بالمسنجر أون لاين .. (( ووي قربت الساعة تصير 8 , وييين مريموو ونورووهـ وفطمووم السخيفات يخلوني بروحي متملله =( )) ... بعد ما خلصت تصفح بريدي وحطيت جم مشاركة بالمنتدى المسجلة فيه , خلاص ضاقت الدنيا فيني ... وفكرت آدخل شات آدردش فيه شووي عن الملل على ما يدخلون ارفيجاتي المسنجر .. وصج دخلت الشات بأسم (وردة البحرين) .. وضليت بالعام , آضحك مع هذي وآمازح هذااا ... وآهاوش هذااك ... وآسوولف مع الكل والجميع .. كانو ايووني على البرايفت يكلموني وايد بس آطنشهم وآفشلهم بالعام عشان يسكتون عني ... (آدري إني نحيسة خخخ ) لكن لفت نظري ... واحد صايع: السلام عليكم واحد صايع: صبــــــاحك ورد يـا وردة واحد صايع: اقووول سلمنااا .. ورد السلام واجب هاا واحد صايع: وووووينج وردة راقدة ؟؟! واحد صايع: وردة وصمخ جلاب ردييي علي :@ واحد صايع: وردة وإلي يسلمج ردي آبي آسالج سؤال اصغير ! يوم جاف مستحيل أرد عليه .. حاول يستفزني ...:: واحد صايع: اي اي اكيد عندج بالخاص ناس وايد تكلميهم وتغازليهم من جذي ما عندج وقت لي : P طبعاً سارة عصبت حــــــدّها (مايبي لها كلام) وماقدرت تسكت عنه ....::: طقت على اسمه وفتحت لها نافذة البرايفت (الخاص) عشان تكلمه : - نعم نعم .. عاد أنت ودك بس ماتطووول .. مالت على هالويه , ما تجوفني بالعام اسولف ولا عمي ماتجوف .. وبعدين عندي احد اسولف معاه وإلا ماعندي كيفي آآآآآنه كيفي حررة مزاااااجي وبسوي إلي بسويه انت اشدخلك هاااااا .. صج كل من يرى الناس بعين طبعه , يجوف روحه صايع ويحسبني مثله !! واحد صايع: بل!!! اشدعوووه بسم الله , شوي وبتآكليني انزين آنه آسف .. بس حاولت استفزّج عشان تكلميني صار لي ساعة اناديج ما تردين شاسوي لج ؟؟ سكت عنه , وآنه بعدي معصبة وأحس الدم يمشي بعروقي وقلت بنفسي (سخييييييييييييييف) ... مادري شلي خلاني مااكتبها له ! (((ورد كلمها !))) - وردة - نعم ؟؟ اشعندك اشتبي ؟؟؟ - انزين كلميني شوي شوي , اشفيج معصبة جذي - لا وتسوي روحك مو مسوي شي ابداً ..!! - ليش شنو مسوي ؟ مآكل حلال ابوج ؟ والا بايق مهر امج ؟ (((عصبت زيادة عليه ... ياربي صج صج صج سخييييف (الحين اقولها من قلبي !!!) عيل شلون يتجرأ اييب طاري امي وابووي !! ))) - بس جب لا تطري امي وابوي على لسانك لا تجوف شغلك الحين!! (((ضحك في نفسه على عصبية وردة بس حاول يهديها لا تطنشه الحين واهو ما صدق على الله كلمته ))) ....::: - انزين آنه آسف, والله ما كان قصدي شي ((ولأن من طبع سارة الحقران .. حقرته ولا عطيه ويه ولا كلمته..!!)) - اشدعوة عاد , ماصار زعل , أسف وتأسفت لج .. يلا عن الدلع - اشتبي انت الحين بالضبط .. لا تمللني ؟! - أفااااا صرت امللج بعد ؟ ((ياررررربي اشفيه هذااا , أكيد مو غاسل ويهه من الصبح !! صج مصدق عمره ؟! مادري منو يحسب روحه عشان ما يمللني ... اي اي اي تملل ونص بعد !!! .......... خذيت نفس عميق ومسكت أعصابي عشان مااتهور .... )) - انزين اشتبي ؟ - تسامحيني ؟ - انزين بفكر ! - هههههه وتبين جم دقيقة عشان تفكرين ؟ ((يووم جفته مستحيل يسكت عني , قلت له بملل))) ... : امممم خلاص سامحتك ..! - واخيراً ما صدقنا يحن القلب علينا !.. مشكوورة ما تقصرين ! وبمثل الملل رديت عليه وآنه مزاجي مقفلل : - U R welcome any time (((وبعد سكوت دقيقة تقريباً ... ))) - وردة - هااا, اشعندك ؟؟؟ - اشفيج ؟ - ولاشي ! - عيل ليش تكلميني من طرف خشمج ؟؟! - كيييييييفي مالك دخل! - بلللل.. باين عليج شيطانة وعنيدة ودلووعة وااايد ...!! - حـــــــــــدي <<< --- ومتعمدة اتطولها بعد - زين.. ماعلينا الحين من شطانتج ... إلا أقووول.. - ســــــــم!! - سم الله عدووج - مشكوور - العفو أختي.. وولوووو إحنا حاضرين! - زين بس بس لاتصدق رووحك وايد .. صج ما تنعطى ويه ! - اوووهوو ردينااا عالنحاسة ؟ - لاماردينا بس تكلم عدلللل ! - اشقصدج ؟ يعني الحين آنه آتكلم عووي؟؟! - لابس قووول احين شنو تبي مني بسرررعة ؟؟؟ - زين زين .. بقول بس ليش مستعيلة ؟ - اوهووو قووول وعن اللقافة :@ قال واهو مقهور مني (الا يجوفها يقول قاعد أطر منها ! ) - زين بقول يمه كليتيني بقشووري !! - قول آسمعك - إلا ماقلتي لي ؟؟ - شنوووووو ؟؟؟؟ - اسمج ؟؟ - أسمي؟؟؟ امبيييييه يقول يبي يعرف اسمي .. الحمد لله والشكر! - ليش؟ في شي غير طبيعي احين ؟؟! - لا بس.. أقول ألبس نظارتك قبل ماتدخل الشات مرة ثانية .. اوكي ؟ - وووي لييييش؟؟! آآآآنه نظري 6 على 6 ... ما آلبس نظارة !!!!!!! - عيل ليش اتقول تبي اتعرف اسمي ؟! - اشقاعدة اتخربطين أنتي ؟ اشدخل اسمج بعيني وبالنظارة ؟؟! - ياربي .. غبي غبي غبي - مشكورة يجي منج أكثر ! - العفوووو... ولوو إحنا حاضرين <<< -- على قولتك (H) - زين يلا قووولي اسمج وعن النحاسة - أسمي (وردة) يا حَوَل ... ليش ما تجوف؟ - ااهااااا.... عشان جذي تقولين لي نظري اضعيف - صبــــاح الخيـــر والإحســاس والطيبة ! - لا مافهمتي قصدي أنتي .. - وشنهو قصدك يافهيييييم ؟؟؟!! - قصدي أبي أعرف أسمج الصجي مب المستعار - اسمي الصجي والمستعار اهووه وردة - زين زين ... انمشيها لج !! - لا والله , اشقصدك ؟ آنه جذابة يعني ؟؟ - لاااا حاشاج ..انتي جذابة ؟؟ لا منتي جذابة .. صدقتج اسمج وردة .. عاشت الاسامي .. - عاشت أيامي ! - وهم أيـــــامي آنه بعد ! - أنت شمدخلك بالنص؟؟ - كييييييفي ((وبهاي الوقت في مسنجري تتتتننننن " تم تسجيل دخول البنات البنات أجمل الكائنات" )) .. <<< --- هاي مريووم ارفيجتي - زين يلا بااااااي - وين وين وين؟؟ - آنه بعد كييفيي!! - هااا يعني زعلتي؟؟ - لا ,,, ليش أزعل ؟؟!!! - لأنج بتروحين - لا مازعلت آنه بروح آكلم الماي فرند عالمسنجر ... وبعدين أنت منو عشان آزعل عشانك ؟؟! - بل .. ما عندها روح وتعال .. تعطي كاش بالويه - أييييه .. أحسن من المجاملة الفاشلة !! - كلامج عدل - أول مرة في حياتك تقول شي زين ! - ههههه .. اشدعوه خبل ؟؟ - تقدر تقول جذي ! ... يلا جااااااااووو - زين قعدي معاي شوي .. تراج والله على نحاستج تونست معاج وااااااايد .. - اشقلنااا من شوووووي؟؟ - اشقلنا ؟؟ - قلنــااا إن المجاملة فاشلة .. فيعني بسك مجاملات وشلخ علي .. اوووووكي ؟؟ - اووووكي .. لا تزعلين , بس صدقيني مب مجاملة .. صج اتونست معاج =) - اوكي .. اخليك احين - يلا عاد قعدي معاي شووي .. بس ربع ساعة - اشتبي تقووول ؟؟ - ودي أعرف عمرج استهبل عليه ....:: - عمري آنه ؟؟ - لا .. آنه ,, أي أكيييييد أنتي ليش في أحد معانا ؟؟!! - اممممم - يبي لها تفكير بعد !!! - قصيت عليه وقلت .....:: عمري 19 .. وبعد جم يوم بدخل الـ20 . العمر كله لي .. - وآنه توني داخل الـ 19 - يعني بعدك صغنون - لا , مب اصغير .. قدج آنه - لاه ,, مب قدي . آنه أكبر منك - زين .. أنتي من وين ؟ - مب شغلك ! - يلا عاااد - قلت لك مووب شغلك !!! - عن النحاسة وردوووه .. يلا قوووولي لا آآذبحج الحين ! :@ - موووب قايلة مووب قايلة مووب قايلة !!! وبعدين وردوووه بعدينك , آنه وردة مووب وردوووه - هاااااا وردة .. انزين اشفيج مستحية ؟ قوولي ماراح اتطنز عليج ! (بعصبيتي المعتادة) - منت كفووو تتطنز علي ! - زين قوولي عيل ! - مب قايلة .. ماتفهم ؟ - ماراح أخليج إلا إذا قلتي لي .. - هههه والله اتعرف تنكت بعد !!! أعرف شلون آنه أخليك , من قال بانتظرك تخليني ؟؟! - زين عن النحاسة وقووولي .. - قلت لك مب قايلة ! - آنه اسمي ماجد من المدينة .. - حي الله أهل المدينة .. - الله يحييج .. - ويحيني .. ويخليني ! - كللله تدخل روحها بالنص ... يلا قولي أنتي من وين ؟ - انزين بقول بس بشرط ! - حشى شروط بعد ؟ - ايييي .. وإذا مب عاجبك , كيفك. - لاااااا عاجبني من قال مب عاجبني ! يلا قووولي وآمري وتدللي .. - الشرط اهوووو ,, يجاريني بكلامي : - ايه - تخليني آمشي ! - بل .. مسكتني من يدي إلي تعورني ! - عشيوون عيل - لهدرجة آنه مضايقج يعني ؟!! - لا .. مب مضايقني .. - عيل ليش بتروحين ؟؟!! - كنت داخلة الشات عشان أمضي وقتي لأني متمللة ورفيجاتي بالماسنجر محّد .. بس الحين رفجيتي معاي اون لاين .. ومدام معاي رفيجتي ليش ايلس بالشات الحين بعد ؟؟ ! - اهااا - فهمت والا لا ؟؟ - أيه فهمت اشقالو لج عني ؟! .. ولو اقولج آنه بعد مب مال شات .. أصلاً آنه من يات العطلة بس حطيت لي نت وهذي ثالث مرة ادخل فيها شات بعمري بحياتي .. - أيه ألعب على غيري ! - أيه كيفج , محد ضربج على يدج تعالي صدقيني .. أهم شي إن الشي الي اقوله اهو الصج !! - بااااااي - لحظة - شنو ؟؟؟ - أبي ايميليج .. ممكن ؟؟؟!! - لا مب ممكن - ليش ؟ - كيفي بس جذي مافي سبب وجيه ! - زين يلا عاد عن الدلع لا تخليني اتمننج ! - آنه ما قلت لك اتمنّني !! انت طلبت وآنه قلت لا !! - زين عطيني ايميلج احين ... حتى نطلع من الشات ونسولف عالماسنجر .. - زين .. لأني اعرفك ماراح تسكت إلا لما اعطيك ايميلي - يلا - @hotmail.com وردة - زين , باي ,,, وقبلي اضافتي مب اتقصين علي ! - اوكي لا تخاف ! باي فجأة بمسنجري طلع لي وندوو مكتوب فيها ..... ((( هل تقبل بإضافة : أنتِ وردة أنتِ مشمش , أنتِ فعلاً حاجة تربش! ))) عرفت إنه ماجد وقعدت آفكر آضيفه أو لا .. وبعدين رسيت على قرار .. والقرار أهوَ إني آضيف هالفقير إلي صار لي من الصبح مطفشته , وخصوصاً إني وعدته وآنه ماحب آخلف بالوعد ( يا زعم ! ) وطقيت على كلمة (موافق) حتى أضيف ماجدووو وبهاي اللحظة في مسنجر ماجد ... ((( تنننننننن ... تم تسجيل دخل Welcome holiday))) Edited مايو 23, 2007 by cofyana Link to comment Share on other sites More sharing options...
عاشقة مانشستر يونايتد Posted مايو 24, 2007 Report Share Posted مايو 24, 2007 حلوة القصه يلا ننتظر التكملة ويعطيج العافية Link to comment Share on other sites More sharing options...
شهد Posted مايو 24, 2007 Report Share Posted مايو 24, 2007 القصه حلوووووووووووووووووة في انتظار التكمله على احررررررررررر من الجمر Link to comment Share on other sites More sharing options...
Recommended Posts