حلا الكويت Posted سبتمبر 5, 2007 Report Share Posted سبتمبر 5, 2007 الكاتبه :حلا الكويت قالوا أن الحب عذاب وأشواك وأنهار ودموع فأحست بالرهبة نفوسنا ، ووجلت قلوبنا .. لكننا لما دخلنا في عالمه الوردي وجدنا أن الحب هو نبض القلوب وهمس الأرواح وحياة النفوس وانه قصيدة جميلة مكتوبة على القمر و مرسوم على جميع أوراق الشجر و منقوش على ريش العصافير ، وحبات المطر إذا كان الحب هو بحر عظيم له قدرة السحر فهو الوحيد القادر على ان يحول المُر حلواً والشقاء فرح وسعاده فالحب الحقيقي ليس كما يسوغه لنا الاعلان ان ينضر الحبيبين لبعضهم ولكن الحب أن ينظر كلاهما في نفس الاتجاه ليكملو مسيرة الحياه بأهداف مشتركه يساندو بعضهم ..ولايقف كلاًمنهم على أحدى طرفي الطريق ليلتقي كلاً منهم عند المنتصف ..فليبدأ الحب معهم سوياًمن أول الطريق _________________ فاني اعتبر ان الحب هو مشاعر جميله و صراحة و تسامح وإتزان ، والزواج هو بداية الحب وشرط الحب هو رضا الله التقي بكم أحبائي في قصتي الثانيه ((اغلى ناسي)) بعد قصتي الاولي (( ما بعد الحب!!)).... حاولت أن اتفادى الأخطاء الي وقعت فيها في قصة ما بعد الحب بحكم انها تجربتي الاولى... اتمنى أن قصتي (( اغلى ناسي )) تنيل اعجابكم وتكون عند حسن ظنكم.... الصراحه القصه خذت مني وقت وايد تقريبا خذت مني 7 شهور وانا اكتبها... حبيت انزلها لكم بأجزاء عشان اشوف ردودكم... راح تلاحظون أن لغتي في قصة ((اغلى ناسي)) تشمل ثلاثة لهجات بحكم اختلاف جنسية الشخصيات .... احب مثل كل مره قبل لا ابدي قصتي ..اعطيكم تعريف مختصر عن شخصيات القصه الرئيسيه... لا تبخلون علي بردودكم .......... عايلة جاسم جاسم (بو طلال): عايش بالكويت بدوي بس متحظر عصبي ومتسلط وكلمته تمشي على الكل…يعز ولده طلال حيل بس اذا قال كلمه لازم تمشي على الكل نوال (ام طلال):اهي بنت عم جاسم عايشه بالسعوديه توفو امها وابوها بحادث سياره كانت 18 سنه ومشعل توه بالمهاد... عمها زوجها لولده جاسم قصب عنها عشان ما تم بروحها بالسعوديه وعاشت معه بالكويت واهي الي ربت مشعل يعتبرها الاخت والام وكل شي ...وحياتها ويا جاسم تعيسه بس استحملت عشان عيالها طلال: عمره 26شاب وسيم ..جسمه رياضي ..طوله زين جماله بدوي عينه مكحله وساع ورموش كثيفه وحواجب غليظه ..وخشمه حاد ..مملوح مره..شخصيته حنونه على اهله وعلاقته وايد قويه مع بنت عمه و خاله مشعل حبه الكبير لابوه يخليه ما يرفض له اي طلب…وفي طبع مو حلو دايما يحب يحرج الي معه ..وفيه غرور شويه وعند كرامته اهم من كل شي..كان يدرس بجامعة الكويت سنه وبعدها حول دراسته تخصص تجاره واعمال مع مشعل ببريطانيا امامه: عمرها 22 اخت طلال الوحيده شخصيتها مرحه وحلوه وما ترضى عن الغلط…دوم تفكر بكل شي قبل لا تسويه يعني تقدرون تقولون تحسب حساب لكل شي…صديقتها بنت عمها روح بروح مشعل: عمره27 اخو نوال ..جاسم مربيه بحسبة ولده طلال ..بنفس العمر تقريبا..شخصيته جاده وما يرضى بالغلط ودوم تلقونه عند الحاجه يعني تقدرون تقولون انه خدوم ويحب يقدم مساعدات لغيره..وايد يضحي لاجل غيره عايلة فيصل نهى (ام فيصل):زوجها توفى ايام الغزو شهيد وبعدها ما تزوجت ..ربت عيالها …حنونه بالمره حنانها يغمر العالم كله … انفال:اخت فيصل اكبر منه بسنه عمرها 25 …رفضت كل الي تقدمو لها بحجة انها تكمل دراستها ..وما تتخلى عن امها الي ضحت عشانهم..يا ترى بس هذا السبب؟! فيصل:عمره 24 تأخر بدراسته بسبب وفاة ابوه ...شاب غشمرجي ..يعني مقعده ما ينمل..شخصيته وايد حلوه اجتماعي علاقاته وايد مع الناس…تحمل المسؤوليه البيت من يوم اهو الصغير وساعد امه على هالشي..وهالشي خلاه طيب وحنون ورومانسي درجه اولى كان دايم يقول انه ماراح يتزوج الا عن حب فجر :اصغر وحده فيهم عمرها تقريبا 15 سنه ...كانت نهى حامل فيها ايام الغزو…وايد متأثره بفقدان ابوها وهالشي مخلي شخصيتها شوي مهزوزه وتتأثر بسرعه بأي كلمه… عايلة ناصر ناصر:اخو جاسم اصغر منه ..توفت مرته واهي تولد حلا..ما تزوج غيرها مخلص لها…ربى حلا على الصلاة والطاعه..يحترم اخوه العود بزود وهالشي يخليه ما يرفض له اي طلب ولا يقدر يناقشه بشي مو عاجبه حلا:عمرها 24...شخصيه هاديه جدا وبنفس الوقت مرحه…تحب الهدوء علاقتها وايد قويه بولد عمها طلال ودايما تعتبره كل شي بحياتها واسرارها كل عنده من يوم هم صغار ..بالرغم من قوة علاقتها مع امامه الا ان حلا وطلال يرتاحون لبعض ويفهمون بعض بنظرات من دون كلام ..لها عياده خاصه دكتوره تخصص جراحه باحدى مطاعم الكويت ...كانو مجتمعين احلى ثنائي بالقصه حلا وامامه يتريقون بره...الجو كان روعه حلا تستنشق الهوا:الللللللله ...ما اصدق اني طالعه امامه:ههههه انتي الي حاكره نفسج ما تطلعين 24 ساعه شغل حلا بتعب:شسوي بعد هذا شغلي امامه:محد قال لج تصيرين دكتوره ....كيف تستحملين الدم...(بأرف) وييييع حلا:هههههه اهي جت على الدم خليني ساكته ما ابغى اللوع جبدك امامه:أي احسن اسكتي ابغى افطر يرن موبايل امامه بهالوقت امامه:هلا طلال طلال:وينج اموم؟. امامه:انا مع حلا بالمطعم نتريق طلال:أي مطعم؟ امامه:كافيه بلان على البحر طلال:انزين يصير انا ومشعلو نجي لكم صارلنا سنه نفر بالشوارع مو عارفين وين نروح امامه:هههههههه حياكم ننطركم بعدنا ما طلبنا شي طلال:زين عيل مسافة طريج ويايينكم امامه:اوكي باي حلا:بيجون؟ امامه:أيه طلال ومشعل حلا:من زمان ما طلعنا يميع امامه تغمز لها:أيه من زمان اكيد القلب ولهان حلا:ميمي اسكتي امامه:هههههههههه شوي ويوصلون طلال ومشعل سلمو عليهم وقعدو بحيث يكون مشعل جنب طلال وجبالهم امامه وحلا... مشعل:شلونكم بناتو حلا وامامه:بخير طلال:دكتوره حلا منخشه صايرين ما نشوفج كلش حلا :هههههه لا والله مو منخشه بس ظروف الدنيا والشغل ما يخلص مشعل:أي بس كلش ما طلعنا يميع من زمان امامه:كا اللحين طالعين واحب اذكركم بتاريخ باجر لا تنسون طلال بغباء:شنو باجر؟؟ مشعل يكملها:طلول باجر عندنا عرس يوسف صاحبنا امامه بعصبيه:لا والله انت وياه حلا ماتت من الضحك:هههههههههههههههههه امامه تلف عليها:شلي يضحك آنسه حلا طلال الي تذكر:هههههههههههههههههه شلون نسيت مشعل:شسالفه؟ امامه يعني زعلانه:انزين يا مشعل ..(تقلد صوته) شسالفه طلال يساسره:اسكت بنروح فيها باجر عيد ميلادها شلون راح على بالنا مشعل يرقع الوضع:اموم أن شاء الله تقصدين عيد ميلادج؟ امامه تطنز:لا زين ذكرت مشعل:ههه ترا انا مذكر بس حبيت اطفرج امامه:أي على غيري يا مشعلوه مشعل بعصبيه:شنو مشعلوه اصغر عيالج..انا خالج عيب قولي خالي مشعل امامه:هههههههه يحليلك بيني وبينك 4 سنين مادري اقل تبيني اقولك خالي بالاحلام مشعل معصب:نعم يا حلوه مين قاص عليك وقايل لك 4 سنين بيني وبينك 5 سنين طلال:ههههههههههه بس خلاص لا تتهاوشون حلا:أي والله لوعتو جبدي من قعدتو وانتو كله مناجر مشعل يبتسم بخوف:انا مالي شغل حلا شفتيها اهي شلون تناجرني حلا تغمز له:أي شفتها ما عليه سامحها يا مشعل انت قلبك كبير امامه قرصتها:وتعرفين تمثلين يا حلوي حلا :آآآآي ما احب احد يقرصني مليون مره قلت لج طلال:اموم يالدفشه لا تقرصين البنت امامه:وليييييييه اللحين شيفكنا من لسان اخ طلال بيقعد يدافع عنج لي باجر حلا بحيا:احسن تستاهلين يقطع عليهم كلامهم الجرسون ...خذا الطلبات وتمو يسولفون.... مر الوقت سريع واستأذنو طلال ومشعل وتمو امامه وحلا ..طلبو لهم ايس سكريم وقعدويكملون سوالف... امامه تناظرهم:الله يخليهم لي احبهم هالاثنين حلا:آمين امامه:حلوي بكلمج بموضوع خاص حلا :خير امامه تمت تقولها الموضوع الي كلمتها فيه امها امس... حلا مو مستوعبه الي سمعته: اموم من صجج امامه:والله حلوي امي بتكلمج اليوم بالموضوع حلا بحزن:بس انا ما ابغى امامه:حلوي كل بنت ماردها بتتزوج ..وانتي الحين تشتغلين مو ناقصج شي غير الريل حلا:ما ابي اتزوج اموم ما ابغى امامه تدري ليش حلا رافضه:حلوي الي ما يبيج بيعه لا تتمسكين بطلال حلا نزلت دمعتها:اهو درى اموم.؟ امامه:أي وصدقيني فرح عشانج وقال الله يوفقها حلا:بس انا ما ابي امامه:حلا حبيبتي الي عرفته انه خوش ريال وما ينرد حلا تمسح دمعتها:اموم خلاص سكري الموضوع امامه تشد على يدها:حلا حبيبتي انسي طلال خلاص حلا تكتفي بهز راسها:ممكن نمشي اللحين امامه بحزن على حالها:مشينا مر اسبوع من عرفت حلا الموضوع ...ونوال فاتحتها فيه بنفس يوم الي قالت لها فيه امامه ...وحلا تمت تفكر بالموضوع خاصة يوم شافت أن ما في أي ردت فعل من طلال وبالاخير وافقت.... بعد اسبوع جو اهل حمد لحلا وخطبوها رسمي..واتفقو على المهر و السكن وكل شي..وحمد شاف حلا وانعجب فيها ... اتفقو على أن تكون الملجه بعد اسبوعين .وطول هالفتره كان بينهم مكالمات وحلا حست أن حمد ريال زين وان شاء الله بيسعدها...اما حمد تعلق وايد بحلا وخاصة انها أول حب له بحياته بشركة ابراهيم واولاده للعقارات جاسم بعصبيه:قلت لك هذا آخر كلام عندي ناصر بترجي:انا اخوك يا جاسم جاسم:اخوي على عيني وعلى راسي بس مو من حقك تبيع الاسهم من دون شوري هالشركه مهي لك بس ناصر يعلي صوته:ولا لك انت بروحك جاسم:ترفع صوتك يا ناصر على اخوك العود ناصر ينزل راسه:ما كان قصدي ارفع صوتي بس انفعلت شوي جاسم بغرور:شوف يا ناصر غير هالكلام ما عندي يا انك تدفع الي عليك او اني راح اتعامل معك بالقانون ناصر بصدمه:تسجني يا بو طلال!!! تسجن اخوك! جاسم يقعد على كرسي المكتب:او انك ترفض حمد ولد عبدالله ناصر مستغرب:و حمد شدخله بالموضوع!! جاسم بغرور:انا قلت لك ما ابغى الحلال يطلع بره ولو كان عندك ولد جان زوجته بنتي امامه ولا تاخذ غيره ناصر:بس البنت موافقه عليه والكل يمدح لي باخلاقه جاسم بعصبيه:يعني حمد احسن من طلال ولدي!! ناصر:لا يا بو طلال انا ما قلت جذي بس ما اتوقع طلال يبي حلا لان دوم يعتبره مثل اخته أمامه جاسم:مين قال هالكلام الولد شاريها بس اهو مستحي يطلبها منك ناصر حس انه اخوه يكذب عليه:يعني انت متاكد انه يبغيها؟؟ جاسم:أي يبغيها ..ولد عمها اولى فيها من الغريب وبهذا يكون حلالنا واحد يا بو حلا ومالا داعي تسدد شي ناصر بحزن:تخيرني يا جاسم اما السجن او ارفض حمد جاسم يتجه صوب الباب بيطلع:الحمدالله انك فهمتها لك يومين وترد لي خبر وانت حر...مع السلامه وطلع بره المكتب ولا عطى مجال لناصر يرد عليه... حس ان الدنيا دور فيه مو عارف شيسوي ...حمد ريال طيب والكل يمدح بأخلاقه وحلا ما رفضته ,...و اذا ما نفذ الي قاله جاسم راح يقدم الشيكات للشرطه وبيسجنونه وسمعته بتصير على كل لسان و اكيد حمد بيطلقها...لااا لاااااا حراااااام انا لازم اقنعها بطلال وافتك من هالسالفه ****************** رجع ناصر من الشركه واهو طول الطريق يفكر بكلام اخوه جاسم ..اول ما دخل البيت جلس على الكنبه بتعب...الا حلا توها نازله من الطابق الثاني حلا تبوس راس ابوها:اهلين يبه شلونك؟ ناصر بابتسامه:هلا بحلا حياتي تعالي حبيبتي اجلسي جنبي حلا تجلس جنبه :خير يبه ناصر بتردد:الخير بوجهج حبيبتي انا بغيت اكلمك بموضوع حلا تشوف الساعه :والله يبه عندي مواعيد بعد 10 دقايق ناصر :خلاص عيل أن رجعتي نتكلم بالموضوع حلا بخوف:خير يبه خوفتني صاير شي؟ ناصر يبتسم لها:ما في شي حبيبتي انتي روحي دوامك لا تتأخرين وان رجعتي يصير خير حلا تلبس شيلتها:على راحتك يبه ..مع السلامه ناصر:الله يحفظك راحت حلا لعيادتها واهو صعد غرفته يرتاح من بعد تعب اليوم ...حلا بنت خلوق وصاحبة صلاة ومتستره صحيح انها ما تلبس عباة بس لبسها محتشم ومتحجبه... اهم صحيح بدو بس متحضرين وخاصة عمها وايد فري بنته امامه مو متحجبه بس للحين متمسك بعض العادات القديمه.......... ابوها سماها حلا لجمالها اسم على مسمى.... كانت حلوه وناعمه و قصيرة القامه ..ملامحها ناعمه وكانت بشرتها تميل للبرونز حلا صديقة امامه روح بروح بينهم سنه ...من يوم هم صغار وهم دوم ويا بعض ..حلا وايد معجبه بطلال بجماله واخلاقه واهي تحبه وامامه عارفه هالشي...ويوم عرفت أن حمد متقدم لها وطلال ما كان له أي ردة فعل وافقت قصبن عنها ****************** كانت نوال قاعده بالصاله تكلم اخوها مشعل نوال (ام طلال):يا مشعل اقولك بيزوجه قصبن عنه مشعل:يا نوال انتي اهدي شوي عشان اقدر افهم السالفه نوال تصيح:اقولك بيزوجه بنت عمه قصبن عنه. مشعل:ولدك طلال يدري نوال:لا ما يدري ..وانا ماني قادره اكلمه بالموضوع خاصة اهو مكلمني عن وحده يحبها ويبقيني اخطبها له والحين تبقيني اقوله ابوك يقول ما في زواج إلا من بنت عمك مشعل:يمكن يوافق نوال بدت تصيح:ماراح يوافق يا مشعل انا اعرفه اهو يحب شذى ويبقيها وحلا كان دوم يعتبرها مثل اخته خاصة انها يتيمه وما عندها خوان مشعل:خلاص يا نوال لا تصيحين قطعتي قلبي نوال:ما اقدر يا مشعل جاسم ما يرحم احد بيهدم حياة طلال مثل ما ابوه هدم حياتي مشعل:خلاص يا نوال حرام تتكلمين عن الرجال كذا اهو توفى والله يرحمه ويغفر له نوال تبجي:ما ابغى ولدي يعيش نفس حياتي ما ابغاه ياخذ وحده ما يحبها مشعل:خلاص يا نوال انتي حاولي تقنعين جاسم بهالكلام نوال باستهزاء:تسوي نفسك ما تعرفه يا مشعل تبغيني انا اثر عليه بقراراته مشعل بضيق:انا ما بيدي شي يا نوال هذا ابوه واهو عارف مصلحته نوال تبجي:يعني ولدي يضيع من يدي عادي مشعل:انتي لا تكبرين السالفه خل جاسم يتفاهم مع طلال بالموضوع وما تدرين يمكن يوافق ولا تنسين ترا جاسم يعز طلال حيل عنده الدنيا كلها طلال نوال :وانا هالشي الي مضايقني زود عمري ما توقعته بيجبر ولده على الزواج مشعل:اهو يدري أن يحب وحده ثانيه نوال:لا ما قلت له مشعل:اجل لازم يعرف نوال:ماراح يفرق شي مشعل:لا يا نوال بيفرق صدقيني كلمي طلال وقولي له يقول لابوه عن الي يحبها واهو يتفاهم معه وصدقيني جاسم عمره ما رفض لطلال طلب حتى لو كان مو موافق عليه نوال ارتاحت شوي:تظن جذي يا مشعل مشعل:أي واذا تبغين رايي انا اقول ما يلقى مثل حلا جمال وادب واخلاق واهو اولى بها من الغريب نوال:انا ما انكر أن حلا بنت ولا كل البنات وابوها رباه احسن تربيه وانا اتمناها لطلال بس اهو يبغى شذى مشعل:انتي شفتي شذى قبل لا تتكلمين؟ نوال:لا ما شفتها بس الي اعرفه عنها أن من بنت عايله وابوها مركز بالدوله وكافي أن طلال يحبها طبعا مشعل بحكم علاقته القويه مع طلال وانهم يدرسون يميع ببريطانيا...كان يعرف شذى وشايفها اهي صج جميله حيل بس مغروره و وايد فري...بس اهو ما حب يبين لنوال أن يعرف شي عن الموضوع مشعل:اذا تبين رايي انا اقول طلال لحلا نوال باستغراب:انت تعرف شذى يا مشعل؟ مشعل يحاول يتهرب :وكيف بعرفها..تراك اخرتيني على شغلي روحي كلمي ولدك وطمنيني عليه نوال:انشالله الله يكتب الي فيه الخير...مع السلامه مشعل:باي دخلت امامه الصاله وتوها راده من الجامعه نوال:هلا امومه امامه تبوس راس امها وتلمها:يمه حبيبتي ولهت عليج نوال:ههههه آه منك انتي الحين توني شايفتك الصبح ومتريقه معك وليه هالكلام الي ماله معنى امامه تلمها:امووت انا على الي يتكلمون بدوي مادري سعودي مادري كويتي نوال:عيل كيف تبقين اتكلم؟!! السعودي اصلي ومن جلستي بالكويت وعيشتي معكم اتكلم مثلكم امامه:وانا ما قلت شي بس مادري ليش ما اعرف اتكلمها عدل مثلك نوال:ههه لانكم اختلطتو كثير مع حظر وصديقاتك كلهم حظر امامه تبوسها:وااااااااي يمه احبج والله احبج نوال تبعدها عالخفيف:بلا كلام فاضي ماله معنى امامه تسوي نفسها زعلت:افا يمه يعني ما وحشتج نوال:من قال؟ امامه:انتي نوال:هههههه لا انا ما قلت كذا اصلا انتي نور البيت امامه تلمها:وااااااااي يمه اموت عليج يرن موبايل امامه وما عندها رصيد ترد لان داقين عليها من تليفون عادي نوال:ليه ما تردين على جوالك؟ امامه:ههه يمه حبيبتي يسمونه موبايل نوال:والله انا اسميه جوال بكيفي امامه:ههههه هذي حلا داقه علي من تليفون عيادتها اكيد ما عندها رصيد...هالبنت دكتوره ومعاشها ما شاء الله زين وللحين ما حولت فواتير نوال:الحين ردي على البنت امامه: المشكله يا يمه أن انا بعد ما عندي رصيد نوال: كيف والعشرة دنانير الي خذتيهم مني امس امامه:أي يمه كله راح على مشعلوه نوال تقرصها على ايدها:انتي متى تعقلين وتفهمين عيب عليك تقولين حق خالك مشعلوه امامه دلك مكان العوار :آآآي يمه عورتيني وبعدين ما فيها شي نوال :إلا فيها امامه تروح صوب التليفون:يمه تراه يكبر عني بخمس سنين مو وايد نوال:حتى لو ..اسمه خالك امامه تتصل على حلا:هلا بالدكتوره حلا:اهلين ميمي انتي وينج ليش ما تردين؟ امامه:الحال واحد يا بنت العم كلنا مفقرين حلا:هههه حتى انتي ما عندج رصيد امامه تكح:احم احم بلا احراج حلا:هههههه امامه:ها شبغيتي ليش داقه حلا:بسم الله الرحمن الرحيم انتي شالاسلوب ...الله يعين ريلك عليك امامه:حدك عاد يا حلا لا تجيبي طاري زوجي على لسانك ..وبعدين يا حظه فيني حلا:هههههه اشهد انج مينونه امامه:على بنت عمي حلا:ههههه انزين اسمعي امامه:آمري يالغاليه تدللي حلا:أي يا حلاتج أن صرتي ذربه بالكلام امامه:هههههههه حلا:مشغوله اليوم بليل؟ امامه:اممممممم ما اذكر حلا:يلا عاد ميمي عشان ابيج تجين عندي بعد المغرب امامه:امممممم امبله اليوم طلول مواعدني يعشيني بره حلا صخت يوم سمعت اسم طلال اخر مره شافته يوم تريقو بره حلا:..... اماه:الو حلا وين رحتي؟ حلا:كاني امامه:كل هذا عشان جبنا طاري حبي... حلا تقاطعها:ميمي يوزي عني امامه:ههههه حلا بحزن:خلاص عيل يوم ثاني امامه:شنو يوم ثاني ..تعالي معنا حلا بصدمه:لا لا من صجج امامه:أي شفيها مو أول مره تطلعين معانا عادي حلا بحزن:ذاك أول ميمي الحين الوضع تغير امامه:وشلي تغير؟ حلا:انا الحين مخطوبه وما اقدر اطلع معه واشياء وايد تغيرت ..المهم مابي اطول عليج انخليها يوم ثاني امامه:لاااااا انا قلت تجين يعني تجين حلا:وليييييييه ميمي فهمي عاد ما اقدر والله امامه حست فيها:خلاص عيل انا اكنسل مع طلول حلا:لا حرام خلاص اشوفك يوم ثاني امامه:تراك نرفزتيني حلا قلت لج انشالله بعد صلاة المغرب انا عندج حلا:هههه على راحتج...اخليج الحين باي امامه:باي نوال طالعه من المطبخ نوال:عملت السلطه وزهبت الغدا وانتي للحين تهذرين؟ امامه:كنت اكلم حلا بنت عمي ناصر نوال بحزن على حال هالبنت:كيف حالها؟ امامه:بخير وايد كاسره خاطري يمه نوال :ليه؟ امامه:مهي عارفه شتسوي بالحياة اليديده الي اختارتها نوال:قصدك موافقتها على حمد امامه:أي يمه نوال:كل بنت ما ردها بتتزوج امامه تغمز لامها:أي عاد قلت اروح اعطيها جم نصيحه تفيدها نوال:ههههه الحين انتي بتعطينها نصايح امامه بغرور:اصلا انا الكل بالجامعه يطلب نصايحي نوال تضحك على كلام بنتها:ههههه لانهم مجانين امامه تغيرت ملامحها:يمه حرام عليج نوال:ههه فكيني من لغوتك روحي غيري ملابسك عشان نزهب الغدا ابوك وطلال على وصول امامه تبوسها:انشالله يا احلى ام بالدنيا ********************** طلال كان بالسياره راجع البيت ...كان كالعاده يكلم شذى على ما يوصل شذى:حبيبي متى بتكلم اهلي ونفتك من هالسالفه طلال:ما عليه حياتي انا فاتحت امي بالموضوع وانشالله اهي تكلم ابوي شذى:تظن ابوك ماراح يوافق؟ طلال بخوف:والله يا شذى انا الي مطمني أن ابوي ما يرد لي طلب شذى :بس انتو يا طلال عندكم أن ولد العم ياخذ بنت عمه طلال:هههه قصدج حلا لا عاد هذي آخر وحده افكر فيها كزوجه شذى:ليش يعني؟ طلال:لان من يوم حنا صغار وحنا دوم ويا بعض اعتبرها مثل اموم اختي واكثر بعد شذى بغيره:وليش اكثر؟ طلال بصراحته:لانها وايد قريبه مني تفهمني اكثر من أي احد اصلا قبل لا اعرفج كانت كل اسراري عندها...يعني تخيلي من دون لا اتكلم تعرف اذا مضايق ولا لأ شذى:وبعد ما عرفتني؟ طلال:آآآه تغير حالي وسرقتي قلبي وعقلي مني و صارت حياتي شذى وبس شذى استانست بس حست بغيره من حلا:واهي؟ طلال باستغراب:منو!! شذى:حلا طلال:شفيها؟ شذى:تدري انك تحبني وتبي تتزوجني طلال:لا ما قلت لها شذى بعصبيه:انت مو تقول اسرارك كلها عندها..ليش ما قلت لها؟ طلال بحيره:مادري حسيت أن الموضوع ما يخصها شذى:ليش يعني؟؟ تخاف انها تضايق مثلا؟. طلال:شذى حبيبتي ايش فيك؟؟ شذى بعصبيه:مادري عنك طلال قهرتني صراحه طلال:انا !!! ايش قلت؟ شذى:ليش يعني ما قلت لحلا خايف على مشاعرها طلال:شذى ايش هالكلام وبعدين حلا ما تفكر بهالشي صدقيني بس انا حسيت أن الوضع تغير ما بينا وما اقدر اقولها شي من اسراري خاصة أنها مخطوبه شذى بطير من الفرحه:صج اهي مخطوبه؟ طلال :أي وانشالله ملجتها قريب شذى براحه:آسفه حبيبي عصبت شوي طلال:ههههههه لا صراحه خفي شوي ترا غيرتك نار شذى:هههههههههه لا تلومني احبك طلال:وانا اموت فيك...يلا حبيبتي وصلت البيت اكلمك بعدين شذى:اوكي باي طلال:باي وصل طلال البيت سلم على امه وصعد داره يغير ملابسه...وصل جاسم وتغدو وبعدها جلسو بالصاله امامه:يبا ترا اليوم ابغى اروح بيت عمي بعد المغرب جاسم :ليه؟ امامه:حلا تبغيني وتدري يبه اهي عروس وتبغيني اساعدها بتحضيرها جاسم بعصبيه:يصير خير ليه المغرب امامه استغربت من ردت فعل ابوها وشافت طلال واهو هز راسه انها تسكت طلال يوقف:عن اذنكم انا بروح اريح شوي جاسم :طلال الحقني المكتب ابغى اكلمك بموضوع طلال بصدمه:خير يبه جاسم يمشي جدامه:الحقني نوال:الله يستر امامه مستغربه:شبلاك يمه ؟؟!! وصاير؟ نوال بخوف:بعدين يا امامه بعدين **************** بالمكتب جاسم:ها وشقلت يا طلال طلال منصدم:بس حلا مخطوبه!!!!!!!! جاسم :وانا للمره المليون اقولك بيفكون الخطبه طلال:وليه حمد ريال زين وانا اعرفه جاسم يعلا صوته:وانت ترضى أن بنت عمك تروح للغريب طلال:يبه حنا متحضرين وهالسالفه قديمه وانت تعرف رايي فيها جاسم:يعني ايش تبغى الحلال يتوزع والعايله تفترق طلال :ومين قال كذا!!! جاسم:انت طلال يهدي ابوها:يا يبه يا حبيبي انت عارف أن حلا دوم مثل اختي والعايله عمرها ما بتفترق انشالله جاسم:شالكلام كل ما قلت لأحد قال لي اهي زي اخته...وكيف بتكون مثل اختك انا قلت لناصر انك تبغاها وانه يرفض حمد وهالموضوع انتهينا منه طلال:بس انا مو موافق جاسم بعصبيه:مو بكيفك حلا بنت عمك وانت اولى فيها طلال:بس انا ما ابغى اتزوجها انا ابغى بنت ثانيه جاسم بصدمه:ايش قلت؟ طلال منزل راسه:انا كلمت امي تفاتحك بالموضوع .انا ابغى اتزوج الي احبها جاسم بعصبيه:كيف ؟؟ومين هذي؟؟ بنت مين؟؟ طلال بتردد:اهي مو من قبيلتنا..كانت زميلتي بالجامعه ببريطانيا جاسم مصدوم:تبغى تتزوج حضريه وبنت عمك موجوده طلال:يبه تكفى افهمني ...انا راحتي مع الي احبها جاسم:وحلا بنت عمك؟ طلال:حلا بنت الكل يتمناها بس انا مو من نصيبها الله يسعدها مع حمد جاسم:لاااااا يا طلال هالكلام ما يمشي عندي حلا ما بتتزوج غيرك طلال يرفع صوته:بس انا ما ابغاها جاسم يقرب من طلال :اسمع يا طلال انت عارف اني ما رفضت لك طلب من يوم كنت صغير وانا عطيت عمك كلمه حلا بتتزوجها قصبن عنك طلال:بس يبه انا احبها ..لا تحرمني من سعادتي جاسم:انا ما حرمتك من سعادتك ...سعادتك بتكون مع بنت عمك يا طلال طلال دمعت عيونه ويشد على ايد ابوه:تكفى يبه اترجاك لا تقصبني راح اظلم نفسي وبظلم حلا معاي جاسم :لا يا طلال لا تبكي انا ما ابغى اظلمك ...انا ابوك واحبك واعرف مصلحتك ..انت يمكن حبيت شكلها او اسلوبها بس ما بتسعدك كثر بنت عمك حلا طلال:ارجوك يبه لا تهدم حياتي جاسم:شوف يا طلال زواجك من حلا ما في أي مناقشه عليه بس اذا تبغى تتزوج الي تحبها عليها هذا الامر راجع لك طلال بصدمه:قصدك اني اتزوجها على حلا جاسم:هذا الشي راجع لك انا الي يهمني انك تتزوج حلا طلال مستغرب من تفكير ابوه:وتظن اني ما بكون ظلمت حلا؟!! جاسم:اهي بتكون حامده ربها انها مرتك والشرع حلل لك اربع بدل الوحده طلال:ليه يا يبه ليه.. حرام تحرم حلا من سعادتها ويا حمد ؟ جاسم:هالشي ما يهمني المهم انك بتتزوج حلا وبكرا بنروح نخطبها لك واذا ما نفذت الي قلت لك اياه انسى اني ابوك وان هالبيت بيتك طلع جاسم من المكتب وظل طلال بصدمه يفكر بكلام ابوها (( معقوله ابوي يفكر جذي!! شلون اتزوج حلا !! الي دوم اعتبرها مثل اموم!!!يمكن اهي تحب حمد ولقت سعادتها معه!! وكيف بتكون ردة فعلها اذا عرفت اكيد بتكرهني وبظن اني فرقتها عن حمد!!!! وكيف بعيش معها وقلبي لشذى وبس!!! وشذى شبتسوي اذا اعرفت اني بتزوج حلا!!! لااااااااااا مستحيل اظلم حلا معاي !!! يا ربي شسوي يا ربي عيني)) مسح دمعه حاره انزلت من عينه...وطلع بره البيت دون لا يكلم احد ****************** كان ناصر مشوش مو عارف شلون يفاتح بنته بالموضوع وشيقول حق اهل المعرس...قطعت عليه حلا افكاره حلا:الحلوين يفكرون بمنو؟؟ ناصر:في احد ماخذ عقلي غيرك يا بنتي حلا خايفه من شكل ابوها:يبه فيك شي؟؟؟ تبغى تقول لي شي؟؟؟ ناصر:يا بنتي انتي تعرفين معزتك بقلبي حلا تبتسم له:اكيد يبه انت تآمرني ناصر عينه بالارض:اليوم عمك خطبك مني حلا مصدومه:........................ ناصر يرفع عينه لها:وانا قلت له... حلا تقاطعه:بس عمي يدري اني مخطوبه لحمد ناصر:اهو قال لي أن طلال يبغيك بس حمد جيه بسرعه واهو ما عرف وايش يسوي حلا مو مصدقه ولا كلمه:لا يا يبه طلال ما يبغيني وعمره ما فكر فيني كزوجه ناصر عينه تغورق من الدموع:اهو كلمني وطلب يدك مني حلا:لااااااا يا يبه لا تكذب علي طلال ما خطبني منك ناصر:يا حلا يا بنتي سمعيني للآخر حلا تبجي:لا يا يبه ...انا ادري أن طلال ما يبغيني لأنه ما سوى شي يوم خطبتي والحين بعد ما مر اسبوعين جاي تقول لي أنه يبغيني ناصر عارف أن كلامها صحيح: صحيح كلامك يا حلا بس والله انه عمك فاتحني بالموضوع اليوم حلا:يعني مو طلال الي كلمك ناصر ينزل راسه: لا عمك حلا تتنهد:وانت ايش قلت له؟؟ ناصر بتردد:قلت له ...قلت له حلا بخوف:يبه عمي فرض عليك صحيح ناصر انهار كأنه طفل:يا بنتي انا مو عارف شسوي انتي بنتي الوحيده وسعادتك تهمني وعمك الله يهديه خيرني بينك وبين السجن حلا بصدمه:سجن!!! ناصر:أيه يا حلا عمك يهددني أن ما وافقتي على ولده طلال بيبلغ عني حلا: ليه وانت شمسوي.؟ ناصر ينزل راسه:بعت بعض اسهم الشركه لحسابي حلا بصدمه:انت يا يبه!!!! ناصر يبجي:كنت محتاج لفلوس حق عرسك حلا تبجي:انا ما طلبت منك شي فوق طاقتك ناصر:هذا الي صار حلا:وعمي يبغى يزوجني لطلال ليه؟ ناصر:عشان الحلال يصير واحد وعمك للحين على تفكير اهلنا القديم بنت العم لولد عمها حلا:بس انا ماراح اوافق لان ادري أن طلال ما يبغيني ناصر يبجي:أن رفضتي عمك بيسجني واهل حمد أن عرفوا بيطلقك ماني عارف شسوي حلا تبجي:صج انه ظالم حرام عليه يجبرني على الزواج ناصر:حاولت فيه يا بنتي وماني عارف شسوي حلا:انا بكلمه يبه ناصر:لا يا بنتي اهو محلفني أن محد يعرف بالسالفه حتى طلال ولده يخطبك له على انها خطبة عايله ومحد بيكون عارف بالسالفه ... وانتي ما يهون عليك يا بنتي أن الكل يتشمت فيني جلست حلا على اقرب كرسي خلاص مهي قادره تفكر بعد هالكلام تحس حواسها كلها انشلت (( معقوله عمي بهالنذاله ..شقدر اسوي يا ربي اذا فاتحت طلال بالموضوع بيتم طول عمره يعايرني بأبوي ...وكلام ابوي صحيح اكيد أن درى حمد بلي سواه ابوي بيطلقني.آآآآآه يا ربي ايش اسوي)) ناصر:آسف يا حلا يا بنتي بس عمك ظالم وانا الي تبغينه بسويه حتى لو كان اختيارك اني ادخل السجن حلا تقرب لابوها:لا يا يبه ما تهون علي انك تدخل السجن وانا السبب ....الي تبقيه بيصير ناصر:انا لو بايدي اخليك تختارين الي تبقينه بس انتي عارفه حلا تقاطعه:خلاص يا يبه خلاص ما في مجال للتفكير عمي ما عطانا أي اختيار ثاني ركضت لغرفتها تبجي وبعدها دزت مسج لامامه تعتذر فيه عن موعدهم اليوم ...لانها تدري اذا امامه شافتها بتعرف انها باجيه ومضايقه ******************* حلا بتتخلى عن حمد وتوافق على طلال؟؟؟!! شذى شنو بتكورن ردة فعلها؟؟!! طلال بيقدر ينسى شذى بهالسهوله ويتزوج حلا؟؟!! جاسم بيتم على كلامه بزواج طلال ولا بيغيره؟؟!! Link to comment Share on other sites More sharing options...
دلوعة مغرورة Posted سبتمبر 5, 2007 Report Share Posted سبتمبر 5, 2007 يسلمو وفي الانتظار Link to comment Share on other sites More sharing options...
الريــم Posted سبتمبر 5, 2007 Report Share Posted سبتمبر 5, 2007 تسلمين ننتظر الباقي Link to comment Share on other sites More sharing options...
حلا الكويت Posted سبتمبر 6, 2007 Author Report Share Posted سبتمبر 6, 2007 تسلمين حبيبتي الريم ...دلوعه مغروره على متابعتكم وان شاء الله يعجبكم هالبارت حلا الكويت بعد مرور اسبوع اعتذر ناصر لاهل حمد وقال لهم أن البنت غيرت رايها وما تبغى تتزوج اما طلال ما كان على حالته الطبيعه 3 ايام بره البيت يحاول يقتنع بفكرة أن حلا مرته حاولت نوال مع جاسم بس ما في أي فايده حلا خذت اجازه من شغلها من داخلها فرحانه انها بتكون حرمة طلال الولد الوحيد الي حبته بحياتها بس اهي تدري انه متزوجها قصبن عنه وهالشي محد كان يدري عنه الكل كان متوقع أن زواج طلال من حلا زواج عائلي إلا حلا و ناصر وجاسم يعرفون الحقيقه كامله اتفق جاسم مع ناصر على أن الملجه والخطبه بنفس الاسبوع والعرس بعدها باسبوعين شذى كانت قمه بالعصبيه والكره لحلا مو مصدقه أن طلال بيتزوج غيرها اهو صارحها بالموضوع بس ما قالها أن ابوه قاصبه لان يحس أن يقلل من رجولته فقال لها انه بيتزوجها على انها بنت عمه وان علاقتهم لازم تنتهي طلال كان يعيش صراع نفسي يدري انه مو مقتنع بالكلام الي قاله لشذى اهو ما يقدر يعيش من دونها وما يقدر يظلم حلا معه اهي هم لها معزه بقلبه كانت حلا قاعده بدار امومه يسولفون عن الملجه حلا:انزين مالا داعي عرس كافي الملجه امامه تشهق:من صجج انتي!!! تبين حلا العايله تتزوج زواج عادي حلا بقلبها اهو يعتبر زواج:هههه حلو هذي حلا العايله ....و بعدين شفيها مالا داعي للخساير امامه:جب حلا ولا كلمه...الحين انا بروح اييب لنا جاي وبرجع فكري أي بدله تبينها على ما ارد حلا من غير نفس:انزين كانت قاعده على السرير وشايله شيلتها وتلعب بشعرها الكستنائي وتشوف الكتلوقات وبالها مع طلال وشلون بتعيش معه سمعت حس احد دخل الغرفه لفت ويها !!!!! حلا بصدمه:طلال طلال نزل راسه لانها ما كانت لابسه شيلتها واهي على طول تداركت الموقف ولبست شيلتها طلال منحرج وعينه بالارض:آسف حلا ما كنت ادري انج عندنا حلا باحراج:حصل خير طلال يرفع راسه ويبتسم لها مهما صار تم حلا الي دوم لها معزه غير بقلبه: شلونج حلا؟ حلا قلبها يرقع:بخير الله يسلمك انت شلونك؟ طلال:تمام..عيل وين اموم عنج؟ حلا:ميمي نزلت تيب لنا جاي طلال:هههههههه انتي للحين تنادينها ميمي حلا بحيا:أيه إلا بدشت امامه امامه بصدمه:طلول شتسوي اهني؟؟؟؟ طلال:وشفيج جذي مخترعه جنج شايفه يني امامه:يلا اطلع بره ما يصير تشوف عروستك قبل الملجه حلا خالص ويها انصبغ احمر وخاصة لما عينها طاحت بعين طلال واهو حس فيها وحب يحرجها طلال:بنت عمي وكيفي انتي شكو امامه تسحبه لي بره: بلا كلام زايد واطلع حرجت البنت طلال يرفع راسه لحلا:اطلع حلا حلا من الاحراج تكلمت بصوت واطي :على راحتك امامه:استح على ويهك واطلع طلال:هههههههه انزين خلاص عورتيني يالدفشه امامه:محد رقيق غيرك سم الله عليك طلال:واااي لسانج شطوله صيري مثل بنت عمج هاديه ومأدبه امامه:انت ما تستحي على ويهك تغازلها جدامي بعد حلا خلاص ماتت من الحيا الله يقطع سوالفج يا اموم أي مغازل ما تدرين انه متزوجني قصبن عنه... طلال حس انها خلاص انحرجت فطلع من الغرفه بعد ما سحب عنقوص اموم وخلاها تصرخ امامه تقعد على السرير:حمااااار عورني حلا للحين منحرجه شوي:ههههههه امامه:تضحكين علي يا حماره ..اواريج أن ما شيشته عليك حلا:لا والله مو بكيفك...الا وين الجاي؟ امامه:الحين تجيبه الخادمه حلا:انتي قلتي انتي بتسوينه ؟! امامه:انا علي ابلغها انها تسوي الجاي واهي تسويه وتجيبه وكذا اكون انا الي مسويته حلا:ههههههههه ******************* مر يومين على الاحداث...جاسم طلب من طلال أن اليوم يروح مع حلا عشان يشترون الدبله والشبكه....اهو ما همه كلام ابوه وطلع من البيت وابوه تم ينادي عليه بس ماكو فايده.... امامه نزلت بسرعه:خير يبه شفيك تصارخ جاسم:اخوك خلاص بيذبحني امامه:هد يبه شوي انت قولي ايش تبغى وانا اكلمه جاسم بعصبيه:اليوم يمر حلا بنت عمه ويروح معها يشترون الدبله والشبكه امامه:أن شاء الله يبه انا اقوله بس انت هد اعصابك جاسم يطلع من البيت:حسبي الله عليه من ولد امامه تضايقت من دعوة ابوها وراحت اتصلت على طلال طلال بصوت حزين:الو امامه:طلال طلال:هلا اموم شفيك؟ امامه:طلال انت فينك الحين؟ طلال:طالع خير؟ امامه:اليوم لازم تروح مع حلا... طلال ابويه معصب حيل طلال معصب:كل شي بالقصب متى ما ابغى اروح اروح امامه:طلال حرام عليك تحرم حلا من احلى ايامها طلال بصراخ:وانا تعتبر اتعس ايام حياتي امامه:لا تقول كذا طلال حلا تحبك وبتسعدك طلال :بس اموم رحميني من هالكلام امامه:انا كل الي ابقيه منك تروح مع حلا اليوم ولا ابوي بيعفس علينا البيت طلال عارف عصبية ابوه:خلاص اتصلي عليها وقولي لها اني بمرها على المغرب وانتي بتجي معنا امامه:ليه؟ طلال:ما عليه اموم انا ابيك تجي معي ولا ما اروح امامه:من عيوني طلال:تسلم لي عيونك..ومره وحده تشوفي اذا شي بخاطرك تشتريه امامه بفرح:امووووووت عليك طلول يا حظ حلا فيك طلال:هههههههه ترا اصير مغرور امامه:يحق لك يا احلى اخو بالكون طلال:انزين يا اكبر ممثله انا بسكر اللحين لاني وصلت عند الشباب امامه:اوكي باي طلال:باي على المغرب حلا بغرفتها تزهب قبل لا يمرها طلال .....واقفه امام المرايا تلبس شيلتها..رن موبايلها أول ما شافت الرقم ابتسمت حلا:اهلين اموم:حلوووي احنا تحت ننتظرج حلا: الحين جايه نزلت تحت لقت ابوها قاعد وحاط يده على راسه يفكر تحس للحين شايل همها...قربت جنبه وباست راسه حلا:شلونك يا احلى ابو بالدنيا؟ ناصر يبتسم لها:بخير الحمد الله حلا بحزن:يبه خلاص لا تفكر ...الموضوع صار وانتهى ناصر دمعت عيونه:ما في ابو ياخذ بنته بيده للتعاسه مثلي حلا:يبه من قال لك كذا ...طلال ولد عمي وان شاء الله ما بيقصر بحقه ناصر :واهو يا بنتي اشوفه كثير مقصر بحقك حلا تبتسم: من قال كذا اصلا اهو كل يوم يكلمني واليوم أن شاء الله بنروح نشتري الدبله والشبكه ناصر يشوف عيونها:اكيد يا بنتي مرتاحه حلا نزلت راسها ما تعرف تكذب على ابوها بس تبي تريحه:أي يبه مرتاحه طلال ما في مثله ناصر:الله يوفقكم حلا توقف:يبه انا لازم امشي طلال وميمي ينطروني بره..تآمرني على شي ناصر :ديري بالك على حالك حلا:أن شاء الله مع السلامه ناصر:بحفظ الرحمن ركبت حلا وراه وامامه جنب طلال...القت السلام وردو عليها ....طول الطريق طلال ما كلم حلا إلا وقت ما سلمت عليهم رد السلام ....اهي تمت ساكته والدموع بعيونها على الحال الي اهي فيه باين أن طلال ما يبغيها اهي تعرفه اكثر من نفسه... امامه تحاول تلطف الجو بينهم بس اهم ابد كل واحد يسبح بعالم تفكيره وخياله مرت الايام بسرعه ...وجيه اليوم الي يحدد فيه مصير حلا بزاوجها من طلال.. طلال قاعد على البحر يفكر بلي يصير له كلها جم ساعه وحياته ترتبط بانسانه كان يحمل لها طول عمره مشاعره احترام بس عمره ما فكر تكون زوجه له....قطع عليه حبل افكاره صوت جواله طلال بصوت يقطع القلب:هلا مشعل مشعل :هلا بمعرسنا وينك امك تسأل عنك؟ طلال :ليش تسأل؟ مشعل حس من صوته انه باجي:طلول شفيك حبيبي ..امك تسأل عنك تقولي ليش تسأل؟ طلال خلاص ما قدر يمسك عمره اكثر:خلااااااص بموت يا مشعل انتحر اهون لي من اني اظلم حلا معي مشعل:افا يا طلال شالكلام انت ريال مؤمن وهالكلام ما يجوز...وحلا بنت عمك وانشالله بتسعدك طلال:ما اقدر مشعل ما اقدر انسى شذى احبها وما ابي اعذب حلا معي مشعل:اذكر ربك يا طلال وانشالله ماراح تظلمها طلال:كيف ما اظلمها وانا قلبي ملك لغيرها مشعل:خلاص يا طلال انسى شذى وحاول تحب حلا طلال:انا ما اكرهها...بس ما اقدر اعيش من دون شذى مشعل:يا طلال هالكلام ما ينفع الحين كلها ساعات وتصير حرمتك طلال يبجي من يذكر السالفه:................. مشعل بحزن:بس يا طلال قطعت قلبي طلال:ما اقدر يا مشعل والله ما اقدر مشعل عرف انه ما في فايده من الكلام:انت وينك فيه؟؟؟ طلال: بالبحر مشعل:الحين جايك بعد ما خلصو مراسيم الحفله الي كانت بسيطه بين الاهل ...تبادلو الدبل وشربو العصير وبعدها دخلو غرفه كانت امامه مزهبه لهم العشى حتى ياخذون راحتهم.... أول ما قعدت حلا على القنفه الي كانت لشخصين عينها ما رفعتها طول المده تشوف الارض وطلال وده يصرخ باعلى صوته ويطلع بره ما يبي يكون بهالموقف مع اعز وحده على قلبه بنت عمه وصديقة طفولته حلا ....مهو عارف شيسوي بس حلف على نفسه أن ما يقصر عليها ابد ويسعدها كثر ما يقدر طلال واهو واقف بعده ما قعد:مبروك حلا حلا بصوت واطي وعينها بالارض:الله يبارك فيك ودام الصمت فتره وحلا على حالها دموعها بطرف عيونها تحس أن طلال ما يبغيها وانه مجبور أن ياخذها طلال مهو عارف شيقول كل الي يعرفه أنه كان يتمنى شذى الي معاه مو احد ثاني خاصة حلا قطع عليهم الصمت ضربات احد عند الباب طلال بصوت حازم:من؟.؟ امامه تبطل الباب وطلع راسها:الاميره امامه بدش الي قاعد يوقف طلال يضحك على خبال اخته:تفضلي ميري ( اسم الشغاله) امامه بعصبيه:ميري بعينك بس بطوفها لك لانك معرس وماراح اطول عليكم (تحط الصينيه الي كانت بايدها على الطاوله وتطلع) طلال يقدم لحلا العصير:تفضلي حلا بصوت واطي:مشكور طلال يقعد يمها ويترك مسافه معقوله بينهم:العفو لحظة صمت بعدها حس طلال أنه لازم يكسر هالصمت حلا مالها ذنب هذي ليلة ملجتها حرام الي يسويه فيها ...يا رب عيني ما اقدر امثل على احد يا رب عيني طلال بابتسامه:حلا في شي بالارض حلا ترفع راسها له وتلاقت عينها بعينه وردت نزلت راسها بسرعه :لاا طلال:انزين ممكن ترفعين راسك وتشوفيني حلا ترفع راسها بس عينها بحضنها طلال الي يتجنب النظر لها:حلا انا اوعدج اني اسعدج كثر ما اقدر حلا خلاص بتبجي تدري أن كلامه مو من قلبه:مشكور يا طلال طلال حس بجفا بكلامها:حلا شفيج؟؟ حلا تتماسك وترسم ابتسامه تعكس على الي بداخلها:ابد ما فيني شي طلال شاف ابتسامتها حن لايامهم وكيف هالضحكه كانت دوم تخفف عليه احزانه كيف بيكون اهو سبب حزنها طلال يبادلها الابتسامه:تذكرين يا حلا كيف كنا قبل كم شهر حلا بحيا :ايه طلال:والله يا حلا انك اقرب وحده لي حتى اقرب من امي محد يفهمني غيرك حلا نزلت راسها وهالشي الي يعذبها لانها تدري أنه قلبه ما تملكه تحس أن في بنت ثانيه بحياته بس اهو ما صارحها وهالشي الي مستغربته ليه ما صارحها!!!!!!!!!!! طلال مل من سكوت حلا وحب يغير الموضوع:شمسويه بالعياده؟ حلا:الحمدالله طلال: تحبين نسكن بيت ابوي ولا بالشقه حلا:الي يريحك يا طلال طلال:انا اشوف أن نسكن مع اهلي حتى اذا انشغلت او حاجه لسمح الله ما تكونين لوحدج حلا تحس بألم تدري اهو ليه يبغي يسكن بيت اهله حتى يتحاشاها :الي تشوفه يا طلال وبعدها استأذن طلال وطلع..ومحد منهم مد ايده على الاكل ....وحلا رجعت البيت رمت نفسها على السرير تبكي على حالها اذا هذا حالها من أول ليله معه كيف بتكون حياتها معه اكيد جحيم مر اسبوع على الملجه وطلال لا اتصل على حلا ولا سأل عنها ولا زارها ...حلا من ناحيه ثانيه ما تمر دقيقه ما تبجي فيها وان سألها ابوها تقول له أن طلال سأل عنها وانها اهي تعبانه وتعتذر عن الطلعات اما طلال طول اليوم بره البيت ما يرجع إلا بليل بعد ما الكل ينام مهو عارف كيف بيتصرف مع حلا باقي على الزواج اسبوع وابوه حاجز له شهر عسل لاوربا يعني بيكون مع حلا لوحده كيف بيعاملها واهو ما في باله وقلبه غير شذى.... تعب وهو يجاهل مكالمتها ومسجاتها... دخل البيت كالعاده تعبان من كثر التفكير اتجه ناحية الدري الي يصعده إلا دور الثاني إلا صوت يوقفه ...:طلال طلال يلتفت ناحية الصوت : شتسوين ما نمتي للحين؟ امامه تفتح الليت:انتظر معرسنا يرجع بالسلامه طلال:وليه تكلميني بهالنبره امامه باستهزاء:اسأل نفسك اخ طلال مو عيب عليك لا تسأل عن خطيبتك من يوم ملجتك طلال بعصبيه:ليه اشتكت لج الحال امامه:حلا بنت اصيله ما تشتكي لأحد بس انا حسيت فيها من نبرة صوتها انها حزينه طلال:والله مو فاضي لها مشغول بالشركه امامه تقرب منه:طلال لا تكذب علي ...انت مجبور تاخذها؟؟ طلال بتوتر:ومين قال كذا؟ امامه:عيل ليش تعاملها كذا..حلا تحبك صدقني ما تستاهل الي تسوي فيها طلال رافع حاجبه:وانتي كيف عرفتي انها تحبني؟ امامه:بلاه عليك يعني تسوي نفسك ما تعرف انها تحبك وتعزك عيل ليه وافقت عليك بدل حمد طلال بحيره ولأول مره يفكر بهالموضوع:يمكن لأني احسن منه امامه:لا يا طلال انت تعرف أن حمد كان رجال ونعم به بس حلا تحبك وما كانت تعتقد انك ما تبغيها ويم خطبتها رفضت حمد ووافقت عليك على طول طلال تم ساكت يفكر بكلام اخته معقوله حلا تحبني معقوله انا الرجال الي تتمناه بحياتها ...بس انا دوم اعتبرها صديقه عزيزه مو اكثر كيف بفكر فيها كزوجه يا ربي ما اقدر انا احب شذى ما اقدر ما اقدر امامه تقطع عليه تفكيره:طلال انا اكلمك وين رحت؟!! طلال:كاني هني ما رحت مكان امامه تمسك ذراعه:طلال حبيبي انت تعرف شكثر كانت حلا متعلقه بك من يوم كنتو صغار تعتبرك الصديق والاخ وكل شي بحياتها دوم كانت تتكلم عنك وصدقني ما بتلقى بنت تعزك وتحبك بجد كثر حلا ...لا تهدم حياتك بايدك طلال طلال تم يناظر اخته ويفكر بكلامها وكيف أن منطقها صحيح وانها تفكر احسن منه رغم انها الاصغر طلال بصوت واطي:يعني تظنين انها ما انغصبت على زواجها مني امامه:لا يا طلال حلا ما تسوي شي إلا واهي مقتنعه فيه طلال :عيل ليه وافقت على حمد؟ امامه:اهي بالأول ارفضت بس لما شافت انك ما اعترضت على هالشي وبحكم فهمها لك عرفت انك ما تفكر فيها كزوجه فوافقت على حمد بعد معاناة من التفكير طلال بحزن:يعني اهي تدري اني ما ابقيها عشان كذا تقول لابوي اني اتصل واسأل عنها امامه:حلا يا طلال اصيله وما تبغى تفشلك جدام ابوي ولا انها تعمل مشاكل..وصدقني اهي تحبك ولا جان ما عملت كذا طلال :ومين قال اني ما ابغيها كزوجه؟ امامه بحزن:لا تكذب علي طلال انا ادري انك عمرك ما قلت لي اسرارك دوم تقول لحلا بس انا سمعتك وانت تقول لامي عن موضوع شذى طلال بصدمه:ايييييييييش؟؟ وليكون قلتي لحلا!!! امامه بخوف:لاا مينونه اقول لها...بس انا ادري انها حاسه بهالشي طلال :ادري يا امامه وهالشي الوحيد الي ما قدرت اصارحها فيه حتى قبل لا اخطبها امامه تحس بأخوها:انت ما فكرت يا طلال ليه ما صارحتها؟ طلال :مادري قلت يمكن انها تتضايق او شي؟ امامه:وليه فكرت انها ممكن تضايق؟ طلال:مادري امامه تبتسم له:لانك تحبها يا طلال وعارف أن هالشي يزعلها طلال:لااا اموم انا صج احبها واعزها بس ما اقدر اتخيل انها تكون مرتي انا احب شذى اهي الوحيده الي بقلبي...وارجوك هالشي ما ابغى حلا تعرفه امامه بحزن على حال اخوها:اكيد يا طلال...بس صدقني انت تحب حلا وحلا تحبك والايام بتثبت لك طلال:ما اظن...المهم أن حلا ما تعرف بهالموضوع وانا انشالله بحاول اسعدها قد ما اقدر بس ما اظن انها بتاخذ مكان شذى بقلبي يوم امامه:بنشوف يا طلال من فينا كلامه الي بيصير طلال يبتسم لها واهو صاعد:انا بروح انام...تصبحين على خير امامه:وانت من اهله دخل طلال غرفته غير ملابسه وانسدح على السرير يفكر بكلام اخته...وكيف بيكون وضعه مع حلا يحس انه ظلمها كثير ...مرت عليه ربع ساعه واهو يتقلب بالسرير يفكر بحلا ....شاف الساعه لقاها 12 بليل فكر انه يتصل فيها ويطيب بخاطرها يدري انها زعلانه منه اهو عمره ما زعلها كيف يرضى يزعلها اللحين..... قام من على السرير وراح غرفة اموم ولقاها جالسه على الكمبيوتر تقرا قصه... طلال:اموم امامه انقزت لما سمعت صوته لان ما شافته كان وراها:بسم الله انت من وين طلعت؟؟ طلال يضحك على شكلها:ههههههه من غرفتي امامه:شتبى.. ليه ما نمت مو تقول انك تعبان؟ طلال:بلا هذره زايده ابغى رقم حلا امامه بفرح:صدق بتكلمها طلال يقلد صوتها:ايه صدق بكلمها ...قومي عطيني رقمها بسرعه لا اهون امامه:لاااااا لا تهون سجل عندك ******* طلال:خلاص يلا ردي كملي قصتك امامه تمسكه قبل لا يطلع:تكفى طلال لا تزعلها دير بالك عليها هذي حلا الي دوم تغليها طلال يبتسم لها:لا تحاتين..يلا تصبحين على خير امامه بابتسامه:وانت من اهله رد طلال غرفته واهو فرحان وسكر باب الغرفه وانسدح على السرير أول شي تردد لان الوقت متأخر بس قال اجرب ماراح اخسر شي كانت قاعده بالصاله تشوف فيلم هندي وكانت اللقطه رومانسيه واهي تتمنى لو كانت اهي وطلال مكانهم ويحسسها انها عروس ... نزلت دمعت قهر والم من عينها ومسحتها على طول وكملت الفيلم...الا موبايلها يرن شافت الشاشه كان رقم غريب ترددت ترد بالاول وتمت تشوفه لما تسكر بروحه وقالت بقلبها احسن بعد ورجعت تشوف الفيلم كان طلال مع كل رنه يدعي ربه انها تشيله لما مل وسده وقال بقلبه اكيد الحين نايمه وانا ازعجتها او شافت رقمي وما تبي ترد علي....بس كيف اهي ما تعرف رقمي ...فكر انه يدز لها مسج يراضيها فيه حتى ترد عليه)) سمعت صوت مسج واستغربت من يدز لها هالساعه..شافت انه من رقم غريب وكأنه الرقم الي اتصل قبل شوي..نزلت شوي تقرا المسج ((سامحيني لو قسى قلبي او تعمدت الخطيه واعذريني لو اصير بنظرتك انسان ثاني وافهميني قبل دمعك يقلب الدنيا عليه علميها يا دقايق علميها يا ثواني قولي لها اني اعزها بالقلب ماهو باتصال او برسايل طلال)) حلا تحس انها مو بالدنيا تمت تقرا المسج اكثر من مره ...معقوله معقوله طلال حاس فيني معقوله انا عزيزه على طلال....يعني انا ظلمته يمكن كان مضايق من شي...الله لا يحرمني منك يا ولد عمي ويرن جوالها مره ثانيه بس هالمره ارفعته من أول رنه واهي تحس نفسها طايره حلا بصوت واطي:الو طلال :احلى الو حلا بحيا:اهلين طلال طلال:هلا بك زود ..اشلونج يا بنت عمي حلا:انا بخير انت شلونك؟ طلال:دام انتي بخير انا بخير حلا:دوم مو يوم لحظة صمت بعدها تكلم طلال طلال بحزن:آسف حلا حلا بحزن:لا تتأسف يا طلال طلال:ادري اني قسيت عليك واني مقصر من ناحيتك حلا تبجي واخيييرا حسيت فيني:......... طلال حس انها تبجي:حلا لا تبجين حلا:.................... طلال:سامحيني حلا اوعدج ما بزعلج بعد اليوم بس ما ابي اكون سبب دموعج ..تراج غاليه علي حلا:تسلم وانت بعد غالي طلال:صدقيني يا حلا انا كنت امر بظروف ولا انتي عارفه معزتك عندي حلا تبتسم:عارفه يا طلال ومقدره ولا يحتاج انك تشرح لي طلال ارتاح من كلامها:اكيد يا حلا هالكلام من قلبك حلا بفرح:من كل قلبي يا طلال..انسى الي صار وخل نبدي من جديد واذا انت مو مستعد لهالزواج اعتبرني حلا الي كانت دوم جنبك حلا بنت عمك طلال مهو عارف ايش يقول من بعد هالكلام يحس براحه اهو تم مده يفكر كيف يقولها اياه او كيف يطلبه منها واهي بكل سهوله عرفت تقول له الي يبقيه طلال :خلاص يا حلا وحتى اتأكد انك مب زعلانه مني انا عازمك على الغدا بكرا وايش رايك؟؟ حلا بطير من الفرحه:امممممم بس ابويا نايم كيف استأذنه؟ طلال:ههههههههههه يحليلك يا حلا انا خطيبك و ولد عمك شبيقول ابوك يعني؟ حلا بحيا: مادري طلال:ههه خلاص انا انشالله اطلع من الدوام واجي اخذك من بيتكم وابوك خليه علي انا باجر أن شفته بالشركه بقوله حلا :انشالله طلال:اوكي حلا ما اطول عليك شكلي صحيتك من نومك حلا ما ودها أن تسكره:لا بالعكس كنت اشوف فيلم هندي طلال:هههه للحين يا حلا ما تغيرتي حلا:ههه لا والله للحين الافلام الهنديه عندي بالمرتبه الاولى وقاعد اشوف الفيلم المفضل... الي وديتنا له انا وميمي بالسينما المحبتين طلال:أي واحد حلا بحيا:الي لقينا فيه خالك مشعل جالس مع صديقه ورانا طلال:ايوه تذكرته حق شاروك خان والله انه احلى فيلم شفته تذكرين يوم انتي واموم جلستو تبكون وانا مليت منكم ورحت جلست مع مشعل حلا:هههههههههه أي اذكر طلال:والله انك شوقتيني يا حلا بخاطري اشوفه حلا بصوت واطي:حياك شوفه معي طلال:ترا من جد اركب سيارتي وجي عندك حلا:ههههه اتغشمر معك طلال يحس بالمتعه واهو يكلمها من زمان ما تكلم معاها دوم يحس براحه معاها يحس انها قريبه منه حيل تم يتأمل صوت ضحكتها ويتخيلها جدامه وكيف يكون شكلها لين تضحك حلا حست بهدوءه:الو طلال طلال :خير حلا بخيبة امل:ليكون نمت طلال :هههه لا صاحي بس لازم اسكره الحين وراي دوام باجر وانتي بعد حلا بحزن:أي طلال لو وده ما يسكره منها بس يحس ما يبغى يتعلق فيها زود يحس بشعور جديد ناحيتها شي يجذبه صوبها دون ما يحس:تصبحين على خير حلا:وانت من اهله طلال:لا تنسين باجر حلا:انشالله انا اطلع من الدوام على 1الظهر طلال:اجل اشوفك بكرا ...مع السلامه حلا بكل حب:مع السلامه وكل واحد سكر جهازه وراح لسريره واهو مرتاح والبسمه على ويهه...حلا تمت تردد بصوت واطي احبه والله احبه....اما طلال فكان خايف من هالشعور الي بدا يسيطر عليه...(لا مو معقوله بديت احبها...اكيد هذا شعور عطف عليها مو اكثر...انا قلبي لشذى وبس....ما اقدر اخليها تاخذ قلبي) *************** ردت حلا من العياده واهي طايره من الفرح اليوم تطلع مع طلال اهي من زمان ما طلعت معاه وخاصة أن اللحين بروحهم اهي معاه وبس... صعدت غرفتها غيرت ملابسها ولبست من خاطر وحطت مكياج خفيف ....ونزلت تنتظره طلال استأذن عمه واهو فرح من الخاطر وقال له انه اهو اللحين خطيبها وله الحق يطلع معها بأي وقت يبغيه ... ركب طلال سيارته واهو طاير من الفرحه يحس بشوق لحلا يذكر شكلها ليلة الملجه وكيف كان شعرها الكستنائي مع بشرتها البرونزيه وملامحها الطفوليه الي دوم يرتاح لي شافها مع أن ما تأملها كثير ذاك اليوم.... وتغيرت ملامح وجهه يوم تذكر انه ما قال لها أي كلمه حلوه تجبر خاطرها وكيف كان اناني وما يفكر إلا بنفسه ووعد نفسه أن اليوم يعوضها ... فكر أن يقدم لها هديه لان ما قدم لها شي ....مر على محل مجوهرات واخذ لها سواره ناعمه تليق على ايدها الصغيره حس انها لايقه على نعومتها وانوثتها.....لف لها الصندوق بطريقه حلوه ودفع لصاحب المحل وطلع.... أول ما ركب سيارته رن جواله وظن انها حلا ممكن انها تأخر عليها بس انصدم أول ما شاف الرقم وتردد انه يرد بالأول بس قلبه ما طاوعه ورد عليه طلال بشوق:الو شذى :طلااال حبيبي شلونك؟ طلال نسى حلا بهاللحظه من سمع صوتها صوت البنت الي حبها 4 سنوات:هلا حبيبتي هلا بشذى حياتي شذى بفرح:انت جذاب طلال:ليش تقولين جذي شذى؟ شذى تبجي:لو انك تحبني جان ما تزوجت غيري ولا يمر اكثر من اسبوعين ما كلمتني ولا ترد على مسجاتي طلال بحزن:شسوي يا شذى حكم الزمن شذى:لا تقول جذي طلال والله ما اقدر اعيش من دونك ليش تسوي فيني جذي؟ طلال :وانا بعد احبج شذى انتي الوحيده الي بقلبي صدقيني شذى:عيل ليش تزوجت بنت عمك؟؟؟ طلال ما يعرف شيرد عليها:لانها بنت عمي يا شذى شذى:شنو يعني بنت عمك قصب تتزوجها...حرام عليك طلال انا لي هاليوم رفضت كل الي يتقدمون لي انت الوحيد الي في بالي والي ابيه طلال بحسره:لا يا شذى لازم تشوفين حياتج مع غيري شذى تبجي بصوت عالي:لااااااااااا ما اتزوج غيرك...انت لي يا طلال وحلا الخايسه لازم تطلقها وتبعدها من حياتنا طلال بمجرد انه سمع شذى تشتم حلا بأنها خايسه عصب وكملتها يوم قالت انك تطلقها ما فكر يوم أن تكون حلا مطلقه ومن منو منه... طلال بعصبيه:أن قلتي عن حلا كذا مره ثانيه ما تلومين إلا نفسك يا شذى شذى منقهره:تزفني عشانها يا طلال تهددني عشان هالخايسه طلال:جب ولا كلمه لا تقولين عنها خايسه شذى تبحي مو مصدقه الي تسمعه:طلال لا تصرخ علي عشانها طلال :اسمعي يا شذى انا الغلطان اني رديت عليك ...انتي لازم تنسيني وزواجي من حلا بيتم وانشالله بحبها لي بتنسيني اياك شذى:لاا حبيبي لا تقول جذي انا ادري انك تحبني انا وبس وصدقني اهي ما تحبك اهي تمثل عليك ..انا الوحيده الي احبك من كل قلبي طلال بحسره:خلاص شذى انسيني انا لحلا خلاص شذى:لاااااااا انت لي انا ماراح تكون لهالخايسه سامعني يا طلال انت لي انا وبس طلال:مع السلامه شذى شذى تصرخ:ما ردك لي وانا اعرف شلون اخذك منها واهدم حياتها وسده طلال بويها واهو متحسف انه رد عليها...اهو كان يحاول أن ينساها ويحاول ينسجم مع حلا بس ما قدر يتغلب على الوله والشوق الي بقلبه لها..... تم يفكر بكلامها وبدا يخاف على حلا منها لان عارف أن شذى قويه ومتملكه وتسوي أي شي عشان تحصل على الي تبيه..... وقف عند بيت حلا واتصل عليها وقال لها انها تنزل له ...ومسح على ويهه حتى ما يبين لها أنه كان مضايق...ولا انه يخرب عليهم أول طلعه لهم أول ما وصلت حلا السياره كانت بتقعد وراه بعدين استوعبت أن طلال الحين زوجها وابتسمت يوم تذكرت هالشي ...ركبت السياره وسلمت بصوت واطي وسكرت الباب طلال بابتسامه تعكس الي بداخله:وعليكم السلام حلا بخوف:عسى ما شر تأخرت؟ طلال:أي كان عندي شغل شوي..ليه؟ حلا :كنت احاتيك خفت عليك طلال يغمز لها:جان اتصلتي علي ...افرضي كنت مسوي حادث حلا بخوف:سم الله عليك فيني ولا فيك طلال نسى كل شي يوم شاف الخوف والحب بعين حلا:تخافين علي؟ حلا نزلت عينها :اكيد مو ولد عمي طلال تضايق من هالكلمه ما يدري ليش مع انه اهو الي طلب منها هالشي:بس ولد عمك؟ رفعت حلا عينه وتمت طالعه باستغراب وحست انه يترجاها بشي بس ما عرفت شنو ونزلت عينها حس طلال أن احرجها...لف ويهه وحرك السياره وطول الطريق كانت حلا ساكته تفكر بكلام طلال ايش يقصد انه بس ولد عمي ؟؟ شيبغى مني ؟؟؟ مو اهو الي اتفق معي على كذا!!! طلال من ناحيه ثانيه ندمان على الي قال لها ((انا الحين حسستها باني احبها حرام الي اسوي فيها كيف قلت لها كذا وانا الي طلبت منها أن علاقتنا تكون محدوده بصداقه وعيال عم مو اكثر..ليش احس ودي اسمع منها أي كلمه حلوه تلين قلبي ناحيتها ؟؟)) قطعت عليه حلا افكاره:أي مطعم بنروح؟ طلال التفت لها ولما شافها ابتسامتها بادلها الابتسامه:بنروح المطعم الهندي الي تحبينه حلا بفرح:صدق!! طلال يبتسم لها:ايي صدق وبعدها عندي لك مفاجأه حلا:ايش هيه؟ طلال:كيف تكون مفاجأه اذا قلت لك حلا بفضول:تكفى طلال ما فيني اصبر طلال :ههههه لا اصبري....يلا وصلنا المطعم نزلو المطعم وطول الوقت كانو يسولفون ويذكرون سوالفهم قبل...وكيف كانو يتفقون على مشعل وامامه... طلال:ههههههههههه بس حرام عليك حلا بشرق بلأكل وانتي السبب حلا ترجع لي ورا:هههههههههههه لا والله بس صج كان شكلك يضحك طلال يسوي نفسه زعل:بس عاد من مساع جالسه تضحكي علي حلا تغيرت ملامحها:من صجك زعلت طلال طلال :ايه جالسه تضحكي علي وانا ساكت حلا خافت أن صدق زعل:انا آسفه طلال ما كنت اقصد طلال متشقق من داخل شكلها يجنن واهي تحاول تتأسف:........ حلا خلاص تحس انها بتبكي:طلال انا آسفه ما كان قصدي طلال يقرب الكرسي منها:ليه تتأسفين؟ حلا دمعت عينها:انت أول مره تكلمني بهاللهجه طلال يمسح دمعتها بابهامه:حلا كنت امزح من صجك انتي!!! حلا تمت تناظر عيونه تحس فيها شي مو عارفه شنو..كل الي تعرفه انه مخبي عنها شي كبير طلال يحس انه شعوره ناحيتها يزيد خاصة لما يكون قريب منها طلال بحنيه:حلا انا آسف مو قصدي حلا تبتسم بتوتر من اسلوبه وقربه:لا عادي بس انا زودتها شوي طلال:هههههههه دومك دلوعه من يوم كنتي صغيره حلا تبتعد شوي:لاني ما اتوقع يجي يوم تزعل مني طلال بكل صدق:وعمري ماراح ازعل منك حلا تمت تناظره بكل حب ودها تقوله اني احبك وانك حلم حياتي بس تحس أن بقلبه بنت ثانيه وما تبغى تستعجل طلال بصوت هادي:حلا حلا تلقائيا:عيون حلا فرح طلال يوم سمعها اهي نزلت راسها ما عرفت كيف تجرأت وقالت له جذي حلا :آسفه ما كان قصدي طلال:وليه تتأسفين انا زوجك لا تستحين مني حلا خلاص تحس انها مهي عارفه كيف تتعامل معه مره يطلب منها تعتبره ولده عمها مو اكثر وساعات يبقيها تعتبره زوجها طلال حس أن تناقض كلامه يشوش تفكيرها..اهو نفسه مو عارف شفيه..مهو قادر يتحكم بمشاعره ناحيتها.... حب يغير الموضوع.... طلال:حلا اعطيني يدك حلا تمد له يدها باستغراب:....ليه....!!! طلال يطلع السواره وحلا من يوم شافته استانست حتى عينها غورقت من الفرحه طلال بعد ما لبسها:كنت متوقعها بتكون حلوه على يدك حلا :مشكور طلال:ما سويت شي يا حلا تستاهلين اكثر دوم لبسيها حلا:اكيد وبعدها كملو سوالف ... طلال مستانس ما وده يوصل حلا لبيت عمه تمو يحوطون بالشوارع ...وحلا مستانسه انها مع طلال واهي بعد ما ودها ترد البيت ..كل ما يلتفت طلال عنها تتأمله و تلعب بالسواره ...اقترح طلال انهم يروحون يتمشون على البحر خاصة أن الجو كان روعه وحلا ما ارفضت بعدها جلسو بكافيه على البحر ... مرت ساعه ولا اروع حلا تحس فيها انها ملكت الدنيا كلها بوجود طلال يمها...وطلال يحس بشعور يديد اتجاه حلا....بس كلام شذى له مخليه يخاف على حلا منها......بعدها ركبو السياره وحرك فيها طلال طلال:تدرين وين رايحين الحين حلا بتخمين:اممممممممم لاااااا طلال :بنروح نشوف فيلم هندي لشاروك خان حلا:صدق...وناااااسه طلال:ههههههه ادري انك تحبين الافلام الهنديه وهذي المفاجأه الي قلت لك عنها حلا :مشكور طلال الله لا يحرمني منك طلال:ولاا منك يا حلا الوقت كان يمر واهم ما يحسون فيه ...بعدها اخذها طلال لمجمع جديد فاتحينه بالكويت (الأفيننيوز) وتمو يتمشون فيه وطلال قال لها اذا عجبها شي تشتريه...بس اهي استحت انها تشتري وتمت بس تطالع الناس وتفكيرها كله مع حبيب قلبها طلال .... طلب منها طلال يدخلون محل ملابس وكان فيه قسم نساء وقسم رجال..... راحت حلا تشوف قسم النساء على ما يخلص طلال..... كانت تشوف الملابس بس تفكيرها مع طلال...ماسكه فستان قصير بايدها وتفكيرها بعالم ثاني حست بايد على جتفها لفت ويها إلا طلال يبتسم لها طلال:عجبج؟ حلا باحراج:لا عادي بس قاعد اشوفه طلال ياخذ الفستان منها:بس اعجبج شي ثاني؟ حلا:طلال ما ابغيه بس كنت اشوفه وبعدين اهو وايد مفتوح من صوب الظهر ما احب كذا طلال بجرأه:بس بيكون روعه عليك خاصة أن لونه احمر مناسب بشرتج حلا انصدمت منه وتمت تناظره وبعينه سؤال واحد له شتبقى يا طلال!!! هالمره طلال ما حس بتأنيب على كلامه بالعكس حس براحه وهو يتغزل فيها يحس انها ملكه لوحده ومحد له الحق فيها غيره طلال يقرب منها لان لاحظ تأثير كلامه عليها:انا بروح احاسب وانتي انتظريني هنا وراح طلال وحلا للحين تحت تأثير الصدمه من كلامه..... على الساعه عشر بليل وصل طلال عند باب بيت عمه بعد ما تعشو وقضو احلى وقت لهم.... طلال بضيق:ما كان ودي ارجعك البيت حلا بحيا:هههه ما قصرت يا طلال على طلعة اليوم طلال:انتي الي مشكوره على انك ما رفضتي العزيمه حلا:عمري ما ارفض لك شي انت غالي يا طلال طلال بابتسامه:وانتي اغلى يا حلا حلا حست انها لازم تنزل:يلا تصبح على خير طلال :ماراح ارد عليك حلا باستغراب:ليه طيب؟؟ طلال:لاني بكلمك أن وصلت البيت ..لازم تتعودين انج تكلميني كل يوم قبل لا تنامين حلا بفرح:ما طلبت شي يا ولد عمي طلال:يلا اجل روحي لابوك اجلسي معه وانا انشالله اتصل عليك حلا تنزل وتستند على الباب:انشالله ....سلم على بيت عمي مع السلامه طلال:يوصل انشالله مع السلامه راح طلال واهو تارك على وجه حلا احلى ابتسامه...واهو يحس نفسه انه يقدر ينسى شذى بوجود حلا خاصة انه ما فكر بها دوم مكان مع حلا ...وكيف استانس برفقتها الله لا يحرمني منك يا بنت عمي أول ما وصل البيت لقى اهله جالسين بالصاله ..جلس معهم ونوال استغربت يوم شافته من زمان ما شافت ولدها مستانس نوال:إلا وينك يا طلال صارلي كم يوم ما اشوفك طلال يغمز لامامه:كنت مع حلا يمه نوال باستغراب:ايش قلت؟؟ طلال وده يضحك على امه:اخذت حلا وتغدينا بره ما فيها شي صحيح يمه؟؟ نوال بفرح:بالعكس يمه هذا الصح عفيه عليك يا ولدي زين انك سويت كذا جاسم بفرح:كيف حالها بنت اخوي طلال للحين ماخذ موقف من ابوه:تسلم عليكم امامه بعصبيه:الله لا يسلمكم...انت كيف تروح معها فيلم هندي من دوني؟؟ طلال مستغرب:وانتي كيف عرفتي؟؟انا توني منزل حلا ما امداك تكلمينها؟!!! امامه:ههههههههه اخبارك توصل لي يا اخوي العزيز طلال:يلا عاد قولي لي كيف عرفتي؟ امامه:دزيت لها مسج اسأل عنها..قالت لي انها توها طالعه من فيلم هندي معك طلال:ههههه هذي انتي وانا اشوفها كانت مشغوله بموبايلها ..وترا من يوم ورايح بنروح السينما من غيرك خلاص ماله معنى وجودك امامه تتخصر له:شنو يعني.؟ طلال:بالأول ما كانت تحل علي ..فكنا ننضطر نخذك معنا بس الحين اهي حرمتي مالا داعي وجودك معنا امامه:سمعته يبه ...سمعت شقال؟! جاسم فرحان أن طلال بدأ يتأقلم مع حلا:هههه نوال:حرام عليك يا طلال هذي اختك طلال:كيفها خل تتزوج وتفكنا وتروح مع زوجها امامه طلع لسانها:حريمتك يا طلال قاعده على قلبك ماراح اتزوج بقعد بالبيت وبجابلك انت وحلا وبعدها صعدت غرفتها واهي مستانسه أن طلال رد مستانس واتصلت على حلا تسأل عنها وتشوف انطباعها عن أول طلعه مع طلال.... جلس طلال شويه مع امه وابوها وبعدها استأذن صعد غرفته غير ملابسه وانسدح على سريره واتصل على حلا استغرب أن عندها خط ثاني مين ممكن يكون داق عليها هالحزه حلا شافته يتصل وكانت تكلم امامه فسدت منها وردت عليه وتمو يسولفون لين داخو وسدوه من بعض.... ****************** قعدت امامه من النوم تشوف الساعه إلا متأخره على محاضرتها ...لبست بسرعه ونزلت تحت لقت امها جالسه تتريق سلمت عليها وركبت سيارتها بسرعه رايحه الجامعه... كانت تسوق بسرعه كبيره اهي بروحها دوم تتأخر اذا تأخرت اليوم اكيد بيفشلها الدكتور جدام الكل....خاصة أن كلاسها مختلط ما تبقى تنحط بهالموقف .....هذي المحاضره يوم واحد بالاسبوع كل سبت واهي كل مره تجي متأخره كانت تدعي ربها أن الدكتور يكون متأخر ...فجأه حست انها اصطدمت بشي ...ضغطت على البريك بأقوى ما عندها وبطلت عينها إلا اهي داعمه بسياره سبورت باب واحد ...قلبها تم يرقع خافت تكون ذبحت الشخص الي يسوقها نزلت بسرعه من سيارتها ((بيئم x5)) وبنفس الوقت نزل صاحب السياره ...اول ما شافته حمدت ربها أن ما فيه شي... امامه بخوف:آسفه اخوي ..ما..كنت..ادري..كنت..ابي..وبعدين .مادري..شلون...بس ..انا...كنت ..آسفه الصبي كسرت خاطره كان شكلها بتموت من الخوف ...اهو ما تعور بس سيارته راحت فيها... الصبي:لا عادي اختي حصل خير..بس الله يهديك كنتي مسرعه حيل امامه خلاص بتبجي:آسفه بس كنت متأخره على محاضرتي الصبي:ما عليه حتى انا متأخر بس مو يعني اني اسرع واسبب لنفسي حادث واتأخر زود امامه تنزل راسها:آسفه اخوي وانشالله الحين اتصل على اخوي يجي يتفاهم معك على السياره الصبي :لا ما عليه يا بنت الناس المهم أن محد فينا تعور امامه:لا ما يصير انا الي غلطانه ولازم اصلح لك السياره (تشوف سيارته) يا ربي طاع صار بسيارتك آسفه الصبي وبدا يحس بعوار بايده:حصل خير امامه:الحين ادق على اخوي الصبي:الي تشوفينه يا بنت الناس واتصلت امامه على طلال واهو على طول طلب منها تعطيه الصبي وتكلم معاه واتفق أن ينتظره واهو جاي بطريق ويحلون المشكله ودي من دون شرطه الصبي:خلاص اختي انتي لحقي على محاضرتك واخوج الحين ياي اتفاهم معاه امامه :لا اصلا باقي عليها ربع ساعه ما يسوى احضرها لان الدكتور بيهزئني الصبي: ههههه الي تشوفينه شوي يوصل طلال وعطى امامه سيارته وقال لها ترجع البيت لان بعد الي صارلها ما تظن تقدر تكمل دوام....الصبي تم يفكر بأمامه عجبته حس بشي اتجاهه وشلون كانت خايفه وشلون تصرفت معاه بأدب بس من لغتها حس انها بدويه....واستغرب انها فري ......تذكر ملامح ويها شلون كانت خايفه وكيف كان شعرها القصير الاسود الحرير على ويها ويوم ضحكت شلون بانت غمازتها بس استحى يوم رد طلال يكلمه...تفاهم معه طلال واخذ رقمه على اساس يتصل فيه أن خلصت سيارته..... ردت امامه البيت واخذت لها شور سريع وبعدها انسدحت على سريرها واتصلت بحلا تقولها عن الي صار... حلا:وعسى ما تعور؟؟ امامه:لا الحمدالله بس سيارته حلا:الحمدالله امامه بخجل:صدقين حلا لو كنتي شايفته شلون يكلمني بأدب لو غيره جان هزأ بي حلا:هههههه تلقينه ولد حموله امامه تذكر شكله:أي من شكله ولبسه وسيارته تحسينه كذا حلا:وانتي امداك تلاحظين كل هذا؟ امامه:هههههههههههه حلا:هههههه عاد اوصفي لي شكله كيف كان؟ امامه تغمض عينها وتحاول تذكره:امممم ما كان طويل وايد ولا قصير؟؟لاهو ضعيف ولا متين جسمه حلو...وكان حنطاوي... اسمر منك شوي حلا:ههههههههه امامه الي اندمجت بوصفه:كان ويهه طفولي الي عجبني فيه عيونه كانت عسليه وفيهم حور ملامحه طفوليه يعني تقولين عنه كيوت حلا:ههههههههههههههههه ها اموم ليكون حب من أول نظره امامه:هههههههههه يمعوده ويني وين الحب حلا:وليه الحب مو حرام؟ امامه:ادري بس انا لاهيه بدراستي ومو فاضيه لهالسوالف...آخر سنه واتخرج واصير المهندسه امامه حلا:هههههههه الله يوفقك امامه:يلا اخليك الحين برتاح شوي من بعد الي صار حلا:أي الله يعينك ..وحرمي تسوقين بسرعه امامه:خلاص اصلا ما بسرع مره ثانيه حلا:ههههههههههه يلا روحي نامي... باي امامه:باي تمت امامه تفكر بالصبي وبعدها تعوذت من الشيطان وغمضت عينها ونامت.... ******************** قعد طلال من النوم ومن عادته انه أول ما يقعد يشوف موبايله اذا ياله مسج او اتصال.... لقى مسج واصله فتحه وقراه ((صباحك معطر بالياسمين يا اغلى من عيوني الاثنين بعيد عني لكن ساكن بدمي وروحي وشرايني)) طلال من داخله فرح يوم قرا المسج من شذى بس مر طيف حلا جدامه وحس أن يخونها اذا بادل شذى بهالشعور..اهو ما ينكر انه يحبها بس لازم ينساها وتصير ماضي بالنسبه له... حط الموبايل على الطاوله ودخل الحمام يغسل ويغير ملابسه للدوام... واقف جدام المرايا يعدل غترته ..سمع صوت مسج ثاني...راح يشوفه ((احبك واحبك واحبك كلمه ما اتعب منها)) طلال اهني عصب ما يحب يتم بشي يحس انه يحرج حلا حتى لو اهو ما له أي يد بالموضوع بس سكوته لشذى بيخليها تتمادى اكثر.... شذى الي كانت نايمه عند رفيجتها حور ...حور رفيجة شذى روح بروح من يوم هم صغار رغم علاقتهم القويه بعض إلا أن شخصياتهم مختلفه تماما ...ودايما حور تنصح شذى بأن الي تسويه غلط بس شذى ما تاخذ براي احد.....وكانو يدرسون يميع ببريطانيا....اسرارهم دوم عند بعض بحكم أن شذى وحيدة امها وابوها السفير وحور وحيده بين 3 شباب اخوانها من ابوها..ابوها طلق امها يوم كانت صغيره واهي تركتها عند ابوها وتزوجت ..بعدها تزوج بو حور بنت خالته وجاب منها 3 صبيان واهي الي ربت حور وحور تعتبرها بمثابة امها... شذى تناظر الموبايل وتتأفف:......... حور منسدحه عالسرير:شذوه خلصيني سكري الليتات ابي انام شذى بعصبيه:اللحين انا احر ما عندي ابرد ما عندج حور تعدل نفسها وتقعد عالسرير:شذى انا قلت لج الي تسوينه غلط خلاص انسي طلال الريال تزوج وكفايه الي جانا من صوبهم شذى باستهزاء:ههههه هالشي اصلا مستحيل حور الي ملت من كثر ما كلمتها بهالموضوع:انزين ممكن لو سمحتي تقومين تسكرين الليت وتطلعين بره يقطع عليها صوت المسج ... شذى بفرحه :اكيد من طلال ((شذى لو سمحتي للمره المليون اقولج لا تتصلين ولا تدزين مسجات...خلاص انسيني والله يوفقج)) اثار الصدمه بينت على شذى وتمت تصيح بصوت عالي وتحس كرهه لحلا يزيد يوم عن يوم ..وتمت حور تهدي فيها ********** شذى بتكتفي بملاحقتها لطلال ؟؟!!! طلال بيتغلب على حبه لشذى وبيتم يجاهلها؟؟!! حلا بتكتشف ماضي طلال؟؟!! لقاء امامه مع الصبي الي دعمته بيتكرر؟؟!! Link to comment Share on other sites More sharing options...
الجسمي17 Posted سبتمبر 6, 2007 Report Share Posted سبتمبر 6, 2007 تسلمين اختي و يعطيج العافية Link to comment Share on other sites More sharing options...
**محرقيه** Posted سبتمبر 6, 2007 Report Share Posted سبتمبر 6, 2007 يسلموا يعطيج العافيه Link to comment Share on other sites More sharing options...
الريــم Posted سبتمبر 6, 2007 Report Share Posted سبتمبر 6, 2007 تسلمين ننتظر الباقي يعطيج العافيه Link to comment Share on other sites More sharing options...
danat aldonya Posted سبتمبر 6, 2007 Report Share Posted سبتمبر 6, 2007 يعطيج العافيه حبوبه وبانتظار البارت الياي Link to comment Share on other sites More sharing options...
حبيبي القمر Posted سبتمبر 6, 2007 Report Share Posted سبتمبر 6, 2007 مشكورة وردة ع القصة الرووعة يلا ننتظر التكمله لا تبطين علينه Link to comment Share on other sites More sharing options...
دلوعة مغرورة Posted سبتمبر 6, 2007 Report Share Posted سبتمبر 6, 2007 مشكوره ع البارت وفي الانتظار التكمله Link to comment Share on other sites More sharing options...
Recommended Posts