Jump to content
منتدى البحرين اليوم
Sign in to follow this  
Emeeez

هذه هي الحياة

Recommended Posts

 

الجزء الاول

بعض من الناس يقول ان الحياة صعبة, والبعض يقول انها جميلة والبعض الاخر يقول انها جميلة وصعبة. ولكن ماذا تقول شخصيات قصتنا؟؟؟ لنرى....

 

يوم الجمعه  في الطابق الثاني من البيت بممر الغرف:

خالد: بل بل اشهالويه واشهالكشه

ريم وهي عند باب غرفتها: هه تتطنز علي..قاعده من النوم يعني اشتبي يكون شكلي

خالد: عاد جذي..اقول روحي روحي مشطي شعرج وغسلي ويهج لحد يجوفج غيري ..ترى خرعتيني

ريم: ارجوك عاد

خالد: يالله روحي بسرعه خل نتريق..حدي يوعان

ريم: مشت عنه ريم وراحت تغسل

 

ريم في ثاني سنة جامعه تدرس محاسبه..بيضه  وماشاء الله عليها جميله..وشعرها ناعم  بس كيرلي..موب متحجبه ..عندها اخت واخو اللي هم خالد وعمره 26 سنه يشتغل في بنك و رهام اختها الصغيره عمرها 8 سنين..ابوها مدير في بنك دولي وامها ربة بيت...

على الفطور..كلهم ينطرون ريم تيي عشان يتريقون..متعودين دايما يتريقون مع بعض سواء في ايام الاسبوع او الويكند..

رهام وهي تحرك الشوكه على الصحن: اف..ماما انا يوعانه..وين ريم

ريم وهي داخلة غرفة الطعام: كاني كاني..حشى ماصارت خمس دقايق تأخرت عليكم

خالد: اي خمس دقايق..من متى قاعده انتي...اكيد بتأخرين لي ماتمشطين هالكشه

ريم: يمااا..جوفي شيقول عن شعري كشه..

ام خالد: ماعليج منه يمه..هو محتر من شعرج لان كيرلي اشحلاته

خالد: وع..اي حلو...وهو يمسح على شعره..اصلا هي تتمنى شعرها مثل شعري انا ورهام حرير ومسبسب

ريم: حبيبي شعري الكل يتمنى يسويه ومايصيده وانا الحمدلله طبيعي كيرلي...وبعدين لا تقعد تمسح على شعرك وتطيح لنا شعر في الاكل

بوخالد: بسكم عاد من المناجر..خلونا ناكل يوم واحد بهدوء..وهو يناديي الشغاله...سيتي ..ييبي الجاي

رهام مستانسه ابوهم زفاهم هه

ام خالد: اليوم بعد لاتأخرون...برزوا اغراضكم بسرعه مافينا شدة يدتكم تاكلنا..وخصوصا خالكم محمد بيوصل اليوم من لندن...

بوخالد: صج والله!! ياي بروحه بعد هالمره؟؟ واشكثر بيقعد هني؟؟

ام خالد: فديته اخوي خلاص بيستقر في البحرين ومعاه زوجته وعياله

بوخالد: اوه اوه اشصاير...شاللي خلاه يفكر يرجع

ام خالد: الشركه..بعد تدري شركة الوالد من بعد اخوي فيصل الله يرحمه مافي احد يديرها..فقرر يديرها هو

بوخالد: زين زين...الله يوفقه..بس شلون رضوا عياله اييون معاه..جوفتنا اياهم من قبل 10 سنين...

ام خالد: بعد الام والابو بيستقرون هني لازم يرجعون معاهم..فديتهم

خالد: بووو..انا ريان لو اجوفه الحين ماذكره..وحتى سارونه ...

ريم: انا بعد..

محمد كان يدرس في لندن وعقب ماخلص دراسه حصل شغل هناك وتزوج من وحده اماراتيه كانت تدرس معاه...وهناك استقروا ...وعنده ريان اللي هو من عمر خالد وساره اكبر من ريم بسنه...

 

في بيت اليده:

اليده: صوفي..صوفي..صوفي ويهد

صوفي: نعم ماما..شنو يبي

اليده وهي متخصره لها: سودة الويه..شنو بعد شنو يبي...روحي طلعي الطقم الابيض وجهزي الطاولة بسرعه...مابي احد يوصل والمكان موب جاهز..

صوفي وموب عاجبها: ان شاء الله ..

اليدة: تحجي عدل..وبسرعه يالله ..صج الخدم يطلعون روح الواحد

اليد: والله محد مطلع روحهم الا انتي...شوي شوي عليها

اليده: هذا انت...دوم تدافع عنهم...جم مره قلت لك لاتدخل روحك وانا ازفهم

اليد: الحين خلصتي من هالمسكينه وافتريتي علي انا..

اليده: اقول قوم روح المسيد احسن لك..الحين شوي وبأذن

اليد: لاحول الله...

في بيت بوخالد:

ريم وهي تحاجي بنت خالها فيصل في التلفون: ها حنون متى بتروحون بيت يدتي؟؟

حنان: والله مادري على فهد اخوي..خبرج للحين راقد..سهران لي الصبح مع ربعه

ريم: بعد اجازه...خل يطلع يستانس...مو انتي تقولين كل ملوع جبدكم في البيت

حنان: هههه ومن قال لج ان كان سهران بره....هني في الميلس مع ربعه يلعبون بلي ستيشن

ريم: ههه ياحليله ولد خالي..ريال..مايطاوعه قلبه يخليكم نسوان بروحكم

حنان: هي انتي شنو نسوان...مافي الا امي مره..وانا لحيني انسه جني البخت

حنان سنه ثالثه جامعه..من عمر ساره...وفهد عمره 30 سنه .دكتور جراحه

ام خالد وهي تنادي ريم: ريم...ريم ..يالله يمه اذن..قومي صلي عشان نتجهز ونروح بيت يدتج

ريم: ان شاءا لله يمه الحين...ريم وهي تكلم حنان..يالله حنونه اجوفج بيت يدتي...باي

حنان: اوكي حبي ..باي

ريم..قامت صلت الظهر..وتبرزت...طلعت لها جينز مع توب تركواز مزخرف بورود  بنيه وعليه حزام عريض... رتبت شعرها..حطت لها ميك اب خفيف وتعطرت ونزلت...

بوخالد: يه يه..اشهالكشخه..هذي بنتي ..الله ماعطني هالجمال وانا مادري

ريم: يبا..استحي

خالد: عدااال..وهو يقلد على كلامها..يباااااا استحييي

بوخالد: ماعليج منه بابا..الا وين رهومه؟؟

ريم: كاهي نزلت مع امي..

بوخالد: هلا والله..هلا حبيبتي...

ام خالد: يالله توكلنا على الله خل نمشي...

في بيت اليده ..الكل تجمع هناك...بيت ام خالد...وزجة المرحوم بوفهد وعياله...وبيت ام احمد اخت ام خالد اللي عندها بس احمد يشتغل مع خالد في نفس البنك..

ريم وهي تسلم على يدها: قوه يدي...شخبارك؟

اليد: هلا بنيتي الحمدالله..انتي شخبارج؟؟

ريم: الحمدلله بخير...

اليد: للحين ماتحجبتي...

ريم وهي منحرجه: لا يدي

اليد: الله يهديج يابنتي...جوفي حنان اشحلاتها بالحجاب ..حتى بالحجاب قمر

ريم وهي تتحلطم عند حنان: اوف كل مره نفس الاسطوانه..

حنان وهي تضحك عليها: تحجبي وفكي روحج من حنته..

ريم موب عاجبها الكلام: سكتي انتي بس سكتي..خل اروح المطبخ اساعدهم...

حنان: ماله داعي...الخدم كلهم في المطبخ...وامهاتنا هناك..يعني مايحتاج نتعب روحنا وتصير ريحتنا طباخ..

اليده عقب ماسمعت كلام حنان: يمه منج انتي...مادري على من طالعه كسوله جذي...صيري مثل ريم تعرف السنع...

حنان وهي تتحلطم عند ريم: ههه...اليد كان مفتر عليج والحين انا اليده

ثنتينهم: هههههه

الا خالد ياي من وراهم: تطنزون عليهم ها..تبوني اقول لهم الحين

حنان: بل بل خلود...صج اذنك تلاقط...لايبا مافينا شده يشتغلون علينا مره ثانيه

خالد ضحك عليهم وراح الصاله الثانيه قعد مع ابوه و فهد واحمد وبو احمد...

ريم وهي تدور تلفونها: اوهووو وين تلفوني؟؟

حنان: يمكن نسيتي في السياره

ريم: اوووف..لا تقولين مافيني شده اطلع مره ثانيه

حنان: قولي حق خالد اييبه لج

ريم: مادورتي الا خالد عاد..قامت وراحت عند ابوها...يبا يبا..عطني مفتاح السياره نسيت تلفوني

طلع بوخالد المفتاح وعطاها...

راحت السياره تدور تلفونها ماحصلته ..نزلت تدوره بين الكراسي جافته طايح تحت كرسي ابوها..وبالزور قدرت تطلعه بعد معاناه..وفي هالوقت كان في واحد طويل,,اسمر وخشمه سيف..يقول حق القمر قوم وانا اقعد مكان...من دريشه غرفته..يطالع من اللي قاعده تحوس في السياره وهو فيه الضحكه على شكلها...وبعدين صك الستاره..

عقب ماجافت التلفون ..عدلت روحها...وقفلت السياره بتدخل البيت..

داخل بيت اليده..على ماريم تدخل البيت...محمد خالهم نازل من فوق مع زوجته وعياله

بوريان: السلاام عليكم

الخالات: عليكم السلام..انتوااا هني...متى رديتوا؟؟

اليده وهي تضحك: اليوم الفجر

ام خالد: وليش ماقلتي لنا يما..

اليده: حبيت اسويها لكم مفاجأة

سلموا الخالات على اخوهم وزوجته

بوريان وهو يكلم عياله: سلموا على عماتكم...وهو يعرفهم عليهم

ام خالد نادت عيالها وعيال اخوانها..عشان يسلمون عليهم

خالد: ريان...تغيرت ..ماشاء الله من وين يايب هالطول

ريان وهو يضحك: الله يخلي طول الوالده

الكل: هههه

حنان تكلم ساره: الحمدلله عالسلامه حبيبتي ...نور البيت

ساره: بوجودكم حبيبتي..شخبارج؟؟

ام خالد تكلم حنان: حنان يما وين ريم

حنان: راحت تييب تلفونها من السياره

ريان وهو يضحك في خاطره...لا يكون هذي هي اللي كانت تعابل في السياره

خالد: حشى للحين تدور تلفونها

ريم: وهي داشه ويهها احمر من الشمس...تجوف زادوا الناس مستغربه..هذي له من وين دخلوا انا ماجفت احد دخل البيت

ام خالد: تعالي يما ريم سلمي على خالج وزوجته وعياله...من الفجر هم هني واحنا ماندري

ريم وهي تركض لخالها: هلا خالي...الحمدلله عالسلامه..

بوريان: الله يسلمج حبيبتي

ام ريان: ماشاءالله...هذي ريم..والله كبرت وحلوت

ريم وهي مستحيه: هلا خالتي...شخبارج؟ الحمدلله عالسلامه...وبعدين سلمت على ساره

بوريان: هذي ريان...اكيد ماتعرفينه...

ريان وهو ميت من الضحك من داخله عليها...وهو يذكر شكلها..

ريم: الحمدلله عالسلامه..شلونك ريان؟؟

ريان وهو ميت من الضحك: هلا ريم الله يسلمج

ريم وهي منقهره منه على طريقة ضحكته..اشفيه ذي قلت شي يضحك انا والا شكلي فيه شي غلط...صج قليل ادب

ريم وهي مفتره على حنان: صج ثقيل..الحين انا قلت شي يضحك...

حنان وهي ترص على ضرسها وتتبسم: سكتي لا يسمعج...

اليده: يالله يما السفره جاهزه حياكم عالغدا....

وهم يتغدون...

ام ريان: شلونكم بعد شخباركم؟؟؟والله وحشتونا..ماتتصورون اشكثر اشتقنا للبحرين واهلها

اليده: البحرين واهلها بعد مشتاقين لج...

ريان: مانزل عينه عن ساره...طول ماهو يتغدى ساكت ويتأمل في جمالها...ماتوقعت عندي بنت عمه حلوه جذي...

خالد: ريان تشتغل والاتدرس؟؟

ريان: لا توني مخلص ماجيستير هندسة طيران

خالد: ماشاءا لله..زين زين الله يوفقك

ريم وهي بس من قهرها عليه: عاد احد ياخذ ماجيستير قبل لا يشتغل..

ريان: وهو موب عاجبه اسلوبها: ليش مايصير..؟

ريم: لا موقصدي..بس تاخذ البكالوريوس وتشتغل بعدين تاخذ الماجيستير احسن..عشان يتماشى مع طبيعة شغلك..

ريان: والله مادرينا انسه ريم ...والا جان خذينا رايج قبل لاندرس

ريم انقهرت من اسلوبه معاها واسكتت..في قلبها..صج ثقيل

خالد وهو يطق اخته: ماتعرفين تسكتين..لازم تراوينهم طولة لسانج

حنان وهي تبي تلطف الجو: الا اقول ساره...شلون عن دراستج شنو بتسوين؟؟

ساره: باكمل درراستي هني...برزت كل اوراقي عشان على بداية السنة ابتدي

حنان: الله يوفقج

خلصوا الغدا والكل قعد في الصاله الكبيره يسولفون ويسالون عن احوال بعض...

اليده عقب نصف ساعه جذي: صوفي ..صوفي...صووووووفي...

اليد: بس صمختي اذنا...ناديها بالعدال

اليده هذي بصراخ وماتسمع بعد مو بالعدال..ولاتدخل لي اناديها

بوريان: هههه...انتوا للحين جذي

حنان: هههه ولي باجر خالي

اليده: انتي بعد جب...محد قال لج ابدي رايج

الكل يضحك عليهم

اليده وهي للحين تنادي صوفي لين مايات لها: وانتي ماتسمعين اناديج...روحي ييبي الجاي والسويت بسرعه...

ريان وهو يكلم فهد واحمد وخالد: شكلها مطلعه عينها يدتي ههه

احمد: اوف....ماجفت شي للحين....الله يعينكم اقول دام بتعيشون هني..

ريان: ههه...

 

نهاية الجزء الاول..

 

 

 

 

 

 

 

 

 

 

Share this post


Link to post
Share on other sites

Create an account or sign in to comment

You need to be a member in order to leave a comment

Create an account

Sign up for a new account in our community. It's easy!

Register a new account

Sign in

Already have an account? Sign in here.

Sign In Now
Sign in to follow this  

×