ديهيه Posted فبراير 15, 2005 Author Report Share Posted فبراير 15, 2005 وتفضلوووا هذا الجزء B) .... وان شاااء الله يعجبكم الجزء الرابع صارت الساعه 11 فليل .. يعني موعد فطووم ويا هزاع في الجات.. طبعا فطووم كانت شوي متخوفه انها تدخل الجات لأن احين اخوها فيصل موجود.. ماراح تقدر تاخذ بالرمسه شرات اول.. دخلت الجات وما لقت يومها هزاع.. استغربت.. دخلت على ايميلها لقت ايميل منه مكتوب فيه(حبيبتي.. انا اليوم يمكن اتأخر لين ما ادخل النت لأن ربيعي مسوي حادث بروح له المستشفى .. بس دخلت النت على السريع عشان اكتب لج هالرساله عشان ما تنتظرين على الفاضي.. مشتاق لج وايد.. اشوفج باجر.. ياي هزاع مجنون F) طبعا فاطمه يوم قرت هالرساله استانست وااايد من الكلام الي فيها.. حبيبتي ومشتاق.. ومجنون F .. حست انه هزاع فعلا يحبها.. ولو ما يحبها جان ما دخل النت رغم الظرف الي فيه عالسريع عشان يقول لها هالكلام.. سمعت صوت فيصل يزقرها سكرت الصفحه بسرعه ودخلت على موقع العاب .. ودخل عليها فيصل. فيصل: شو اتسوي الحلوه هني؟؟؟ فطووم: العب.. من الملل.. ما ياني رقاد قلت خل العب اشوي.. فيصل: افا ملانه وانا موجود.. ودري عنج النت شو تبين به.. تعالي يلسي عندي .. خبريني سوالفج.. وين اتسيرين وين اتيين.. فطوم: خلاص ثواني بس.. فيصل: اترياج في الغرفه.. بندت فطوم النت وركضت على غرفه فيصل.. : مرحباااا.. ممكن اتعرف..؟ فيصل: اممم.. لحظه اشوف حلوه ولا مب حلوه؟ فطوم: ترارا.. شو شفت؟ فيصل: لا حلوه.. زينه .. تعالي خل اتعرف عليج.. فطوم: لا لا .. عيب شو تتعرف علي.. انت اكيد عندك خبره في هالسوالف معلووووم.. فيصل: ويا هالويه.. جب وايد عطيتج ويه.. فطوم: ههههههه فيصل: خبريني شو اخباركم؟؟ شو اخبار مريومه مشتاق لها الصراحه؟ فطوم: والله مريوم هالمصريه من دخلت الطب وهي احسها متخبله.. فيصل: هههه ليش عاد؟ فطوم: مستويه دكتوره صدق.. اول ما تدخل البيت.. لا اتسوون جيه بيصيبكم هالمرض.. لا تلعبون بها مب زين.. حطو ها هناك.. اففف اتعور راسي فيصل: هههه يحليلها اتجرب عليكم.. فطوم: تتحرى عمرها داشه مركز ابحاث.. فيصل: ههههههه... لا تتحراكم فيران تجارب.. فطوم: هي والله.. شووو شو قلت.. فيران.. وانا مب منتبهه اقول هي والله.. محد فار غيرك.. فيصل: عدااااال مادري انتي شو.. فطوم: فيصل؟؟بسألك سؤال؟ فيصل: اسألي يا عمري.. فطوم: فيصل.. ليش هني يوم البنت اتحب الكل يعيبها.. لكن اذا الواحد حب محد يعيبه.. ليش يعني البنت ما عندها قلب يحب.. فيصل وهو مستغرب من سؤالها: ليش منو قالج حرام البنت اتحب.. خل اتحب بس لا اتحب غير ريلها.. لأنها جان حبت اي واحد ثاني ما تضمن هالإنسان بيتم وياها ولا يلعب عليها .. فحرام اتعذب عمرها.. وهالشي يأثر على سمعتها .. لأن البنت من طبعها الحبا.. واذا حبت واجهرت هالحب الناس تعتبره انها فصخت الحيا مثل ما قالوا.. شو الي خرج تسألين هالسؤال؟ فاطمه وبإرتباك: ها.. لا بس جيه.. مجرد سؤال؟؟ فيصل: اقول جني عطيتج ويه وايد.. وانتي وراج مدرسه.. يلا سيري ارقدي عيل فطوم: اوكي.. بون وي.. فيصل: اوووب فرنسيه الإخت.. بون وي.. وانتي من اهله وانا بتم عربي راحت فاطمه غرفتها عشان ترقد وكلام فيصل كان يدور في راسها .. كانت ترمس في سرها: معقوله يعني ممكن انه يلعب علي.. لالا ما ظني.. كيف بيلعب علي.. قالي اول مره يدخل الجات.. قالي كل شي عنه.. افففف.. راسي دار... برقد احسن لي رقدت فاطمه لأن عندها مدرسه ولاز م اتقوم من وقت.. على الساعه 6 الصبح قومتها امها عشان تزهب للمدرسه.. وكعادتها قامت واتزهبت وراحت المدرسه.. بس هالمره فيصل الي وصلها.. شافت نوال سياره فاطمه وشافت فيصل.. ركضت صوب فطوم عشان تسألها عنه.. نوال: هلا والله فطووم.. اشحالج؟ فطوم: اهلين.. والله بخير .. انتي اشحالج..؟ نوال: بخير.. الا اقولج منو ها الي وصلج ؟ فطوم: اخوي فيصل.. نوال: ماشاء الله عليه وايد حلو.ز فطوم: لازم طالع علي.. نوال: انت كل الناس طالعين عليج.. كم عمره؟.. فطوم: 24 سنه.. شو تبين تخطبينه انتي.؟ نوال: ههههه.. اسميج انتي محد يسألج شي.. انزين قالت لي خدوي انها علمتج على الجات شو سويتي فيه.. فطوم: دخلت اقولج ... ونااااسه.. تعرفت على واحد مال بوظبي اسمه هزاع.. عمره 19 بس حبوب سوالفه حلوه... نوال: انزين .. دوم اتسولفين وياه؟؟ فطوم: هييييه تقريبا بس البارحه ما لقيته طرشلي ايميل قالي ماروم ادخل لأن ربيعه مسوي حادث مادري شو.. نوال: لا بعد يقولج كل شي.. فطوم: هيه كل يوم يطرش لي ايميل يكتب فيه شو سوى في اليوم بالكامل.. وانا بعد نفس الشي.. اقولج ما يخش عني شي مووول.. نوال: كشخه جيه والله.. اففف هاييل شله ندوي ما ادانيهم .. شكلي اخر شي بتضارب وياهم. فطوم: حرام عليج .. شو بلاج عليهم.. ندى: هلا والله فطووووم اشحالج؟؟ فطوم: الحمد لله انتي اشحالج.. ؟ ندى: بخير.. (تمت تتطالع نوال بنص عين من فوق لتحت) اقول تعالي اتمشي ويانا احسن من هالأشكال.. نوال: اييييه.. ندوي شو قصدج بهالأشكال.. شو شايفه عمرج علينا؟ ندى: شو بلاج ترمسين جيه.. عفان الله اتركب الكملات تركيب.. نوال:ندوووي صخي احسن لج.. ندى: ههه.. بنات طاع منو يهددني.. شريفه مكه.. نوال صفعت ندى.. وطبعا ندى ما بتسكت لها ردت الصفعه.. وزادت الضرابه حاولت فاطمه اتفرق بينهم بس ما قدرت.. نادوا على الأخصائيه الي سحبتهم وياها للغرفه.. فطوم: حشى مدرسه اولاد مب بنات.. هند: هههه.. هاييل توم وجيري مال المدرسه ندوي ونوال.. معروفين بضرايبهم فطوم: انزين ليش هالعداوه من بينهم؟ هند: ما تعرفين؟ فطوم: لا ما عرف حشى علي.. هند: ويييييه علي تعالي خل اقولج.. سلمج الله (دق الجرس) اففف.. ما عليه بكمل عقب روحي.. هاي نوال كانت اتعرف واحد واتحبه.. وااايد .. بس عقب ندى الخايسه استولت عليه.. خلته يخون نوال.. من يومها هاييل ما يدانون ودوم ضرايب.. فطوم: وانا اخر من يعلم يحليلي.. هند: يلا روحي هذي نفرتيتي وصلت.. روحي قبل لا اتوقفج على ريل وحده.. فطوم: الله يغربل ابليسج.. ههه.. عن تسمعج بس.. راحت فطوم الصف كان عليها فيزيا.. طبعا كعادتها عواش.. دووووم تتأخر على الحصه وتتوقف.. لكن هالمره نزلوها الإداره .. يحليلها.. وفطوم قاعده حذال خدوي.. كانت تكتب لها رساله في الإستكرات الصفر.. فطوم: خدوي.. شو اقوله اليوم.. اسامحه ليش انه ما دخل الجات ولا شو؟ خدوي: لا خليه شوي.. اتغلي عليه.. سوي عمرج زعلانه ومادري كيف.. فطوم: بس حرام كاسر خاطري.. خدوي: لا لازم اتسوين جيه عشان اتشوفين غلاتج عنده.. ولا تدخلين ساعات.. خليه يمووت عشانج.. فطوم: بس اخاف يمل مني عقب .. خدوي: لا ما بيمل ما عليج.. فطوم: خشي خشي الورقه قامت نفرتيتي اتشك.. خدوي ما قدرت اتزخ عمرها يوم سمعت اسم نفرتيتي تمت تضحك.. قومتها المدرسه عشان اتجاوب على السؤال لكن طبعا هي مب مركزه فما عرفت الجواب.. والكل ضحك على شكلها وهي قافطه.. وانتهى الدوام الدراسي وردت فطوم البيت.. واول شي سوته دخلت على النت اتشوف .. لقت واصلتلها رساله وبطاقيت بريديتين.. من هزاع طبعا الرساله: هلا والله اشحالج فاطمه؟؟ والله مشتاق لج وايد.. انا في الكليه والصراحه كله افكر فيج.. ما اتغيبين عن بالي.. شو مسويه فيني اعترفي.. ساحرتني ولا شي... مشتاق لج وايد الصراحه... دخليج دشي اليوم الجات اترياج.. هزاع) فطوم: لا ما بطرش له... بجرب بسوي الي قالته لي خدوي.. سمعت امها تناديها عشان تنزل تتغدى وياهم..سكرت الصفحه.. نزلت ركض .. لقت الكل قاعد لكن في كرسي فاضي هو كرسي خالد استغربت.. العاده هو يتغدى وعقب يظهر.. شو الي مأخرنه.. فطوم: اقول الا وين خالد؟؟ فيصل: مادريبه من البارحه ما رد؟ فطوم: وافديته اخوي.. وينه ؟؟ ام خالد: هههههه.. طاع اونها خايفه على اخوها.. اتصلت فيه اطمنوا قالي بيتغدى بيت ربيعه معزوم اليوم عنده فطوم: اخوي العود ها شقايل ما بخاف عليه.. فيصل: والله انتي الوحيده الي مادري طالعه على منو جيه حنونه وطيبه ام خالد : يعني على منو .. اكيد على امها بو خالد: هي والله وا فديت امها انا . اصلا احلى شي يوم تيلس تاكل واتجابل ويها... شوف شوف.. يالله يعني شوفها يفتح النفس فيصل+فطوم: اوه اووووووه.. ام خالد: بو خالد عاااااد فيصل: زين جيه خليت البنت تستحي هههه... ام خالد:بنت اونه.. عيب عليك.. شو بنت ما بنت فطوم: ههههههههههه.. هزئووووه فيصل: انا براويج عقب... وخلصوا غداهم وساروه قعدوا كلهم في الصاله وتموا يسولفون.. فيصل: امي احين صدق خلد بياخذ خوله؟؟ ام خالد: دخيلك فصوول لا اتذكرني بهالسالفه روحي راسي عورني .. ما عرف شو اسوي بو خالد: شو شو اتسوين.. باركيلهم ولاخلاص.. ام خالد: بلاك انت مب طايع تفهم .. انا الود ودي اليوم ياخذها قبل باجر.. بس تدري انا من شو اخاف.. من ولدك ها.. الي ما منه امان.. فيصل: امي تفائلي بالخير.. ان شاء الله ما بيصير الا كل خير .. يمكن الله هداه.. فطوم: امي خوله بنت زينه تعرف كيف تتصرف ويا خالد.. ام خالد: انتي لا تتدخلين في هالأمور.. بعدج صغيره على هالسوالف خلج في دراستج.. فيصل: صدقها امي,, وبعدين فطوم ما عادت صغيره امي.. كبرت ماشاء الله .. حرمه بيت فطوم: ها جيه انتي دوم .. اتجعميني واتسكتيني.. مادري اذا ما شاركتكم في هالمواضيع في شو تبوني ارمس.. اذا رمست عن المدرسه سكتوني واذا عطيت رايي في موضوع بينكم اتسكتوني شو اسوي ارمس منو خبروني؟؟؟ ركضت فاطمه صوب غرفتها وهي اتصيح.. دومها اتحس بالنقص.. اتحس كأن امها ما تهتم لكلامها أو لرايها.. ام خالد: ها شغلج انتي بس.. صياح في صياح.. وين ساير فيصل؟؟ خلها خل تتأدب عشان ما تتدخل مره ثانبه في هالأمور؟ فيصل: امي اسمحي لي اقولج شي تراج بتصرفج ها راح اتضيعين فطووم.. فطوم مب صغيره.. فطوم ماشاء الله عليها عقلها كبير وتفهم.. لازم اتعاملينها على انها حرمه عشان اتحس بالمسؤوليه واتحس انها كبرت.. ترا زمن فطوم غير عن زمن مريوم يوم كانت صغيره ام خالد: احين انت ياي اتعلمني كيف اربي عيالي.. ترا انا نفس الشي ربيتك .. مال اشوفك ضعت.. الا قول انك ضعت يوم انك سافرت برع البلاد وجابلت هالبنات الي لعبن لعقلك؟ بو خالد: ام خالد.. خلاص خلصنا من هالموضوع ليش اتردين تفتحينه على الولد.. خليه ينسى على الأقل.. ما قال شي.. صدقه الي قال.. لازم اتغيرين معاملتج ويا فطوم انا ملاحظ هالشي بعد.. ام خالد: والله فطوم بنتي وانا اعرف كيف اربيها .. ما بتون انتوا اتعلموني.. مثل ما ربيت كل الي قبلها بربيها.. ما اشوف حد ضاع فيهم .. فيصل: انا ساير عند فطوم.. الله يهديج امي ام خالد: والله وطال لسانك يا فيصل.. بو خالد:. خلاص.. بس صدعتوا راسي.. الواحد ما يصدق يرتاح له شوي في هالبيت.. راح فيصل غرفه فطوم وقف عند الباب سممعها اتصيح تم يدق على الباب ما كانت اترد عليه.. تم يحاول لين ما فتحت فطوم الباب.. فيصل: فطومه.. حبيبتي.. لا تزعلين من امج.. تراها ما تقصد اتزعلج.. بس لازم تسكتين يوم تعرفين انها ما اداني هالشي فطوم: امي ليش جيه.. ليش كله اتحب اتصارخ علي...كله تعتبرني طويله لسان.. فيصل: لا اتقولين هالرمسه.. امي اتحبج ترا.. فطوم: شو اتحبني وهي ما تدري عني.. من يوم ما كنت صغيره ليومك هذا ولا مره كان عندنا مجلس امهات ولا حفله في المدرسه واشوفها اتيي.. مب شرات باقي رباعتي امهاتهم دووم ايوم المدرسه يسألون عن عيالهم.. ولا يخبروني سوالفهم ويا امهاتهم كيف يمزحون وياهم.. اما انا كله اتجعمني واتسكتني.. يوم اقولها خاطري ارمس وياج تعرف شو اتقولي.. فيصل وعيونه مليانه دموع: شو؟ فطوم: اتقول لي انتي مب صاحيه.. كيف تبين ترمسين وياي وانا حرمه غديت في الخمسين احين.. وانت بعدج ياهل في شو تبين ترمسين وياي.. روحي مب فايجه.. والله قالت لي هالكلام.. واتقولي انها اتحبني؟؟ وين الحب فيصل.. خذاها فيصل في حضنه وتم يهديها: فطووووم.. بعد لو شو ما صار تراها امج الي يابتج لا تزعلين من كلامها.. ترا بعدها اتحبج والله.. ما تعرفين هي اشكثر احين ندمانه ليش خلتج اتصيحين.. بس لأنها هي اكبر ما تقدر اتيي واتقولج سامحيني... فاطمه حاولت اتغير الموضوع عشان ما تكدر على اخوها: انزين.. خلنا من هالسالفه.. انت متى ناوي اتودين يالسينما.. ؟؟ فيصل: اممم.. شو رايج اليوم.. ؟ فاطمه: خلاص اوووووكي.. فيصل: يلا قومي غسلي ويهج وريحي لج ساعه ارقدي وانا على صلاة المغرب بقومج واجهزي بنسير السينما وعقبها بنتعشى وبنتمشى عند البحر وبنرد .. بعد شو تبين زياده..؟؟ فطوم: مابا زياده.. جيه وناسه.. في بيت العم خليفه غانم: اقول خوله انتي من صدقج احين موافقه؟؟ خوله: هي من صدقي ليش هالمواضيع فيها لعب يعني؟ غانم: لا بس مادري انا الصراحه قلبي مب مطمن.. تدرين كيف خالد بتتحملينه؟ خوله: ما عليك بيتغير عقب الزواج؟؟ وبعدين لا تنسى اني محيريني له من زمان.. يعني ما اقدر ارفض.. لأني ما اقدر اتخيل في يوم اني اخذ واحد غير ولد عمي غانم: والله انا اتمنى لج كل التوفيق.. عبدالله: السلام عليكم.. خوله: هلا والله اخوي.. اشحالك؟ عبدالله: بخير.. تعالي بغيتج في سالفه؟ خوله: خير ان شاء الله.. غانم: يعني انا ممنوع ايي.. عبدالله: انت اسمك خوله؟ غانم: لاهههههه.. بس بغير اسمي مو مشكله.. عبدالله: ههههههه.. يا دمك.. يلا تعالي المكتب اترياج. خوله وهي تغمز حق غانم: بخبرك عقب.. غانم: اركضي.. خوله: نعم عبدالله.. شو السالفه؟ عبدالله: يلسي ابا اكلمج... بسألج سؤال وجاوبيني بكل صراحه ولا اتخشين عني اي شي.. انا اخوج العود ومابا غير كل خير لج.. خوله: اسأل اخوي؟ عبدالله: انتي موافقه من خاطرج على خالد.. ولا حد ضاغط عليج.. اذا حد ضاقت عليج خبريني.. بحاول اني احل السالفه.. خوله: لا.. انا موافقه من نفسيمحد جابرني.. عبدالله: خوله .. مره ثانيه اسألج حد جابرج ولا مب شرط حد.. في شي جابرج تاخذينه.. ترا بعدج صغيره والي يتمنونج وايدين..؟ خوله: لا مقتنعه من نفسي محد جبرني.. وين بلقى احسن من ولد عي اخذه.. عبدالله: بس يا خوله ترا خالد ما ينفعج.. بيعذبج صدقيني.. خالد مب مال مسؤوليه؟ خوله: لا ما عليك بيتغير عقب الزواج.. كل الرياييل جيه قبل الزواج.. عقب الزواج كل شي يتغير.. ؟شو نسيت عمرك!! عبدالله: لا ما نسيت عمري.. بس انا ما كنت لدرجه خالد.. وانا ريال واعرف الرياييل والي من نوع خالد ما بيترك سوالف العزابيه مالته صدقيني.. خوله: لا ان شاء الله.. عمتي بعد ما بتخليه على راحته شو تتحرى.. عبدالله: ادري عمتي عمرها ما راح اتقصر.. حتى لو انج ما بتكونين وياها في البيت بس بعد ما بتقصر في حقج ابد.. خوله: عبدالله.. صاير شي؟؟ سامع شي ؟؟ خبرني؟؟ عبدالله: لا بس خايف عليج.. وبعدين الي اسمعه عن خالد وسوالفه ما تسرني ما اطمني.ز خوله: لا ان شاء الله بيتغير ما عليك.. عبدالله: انتي مب صغيره.. انتي وحده فاهمه وادرى بمصلحتج.. والله يوفقج يا اختي خوله: تسلم والله اخوي.. الله لا يحرمني منك.. اليده: يا عيال.. وينكم يا عيال.. خوله: ايه قوم يدو تزقرنا .. خل انشوف شو بلاها.. عبدالله: ههههههه انا حاس هاي لعبه من الاعيبها.. كل الي في البيت نزلو تحت عشان يشوفون بلاها اليده.. ليش تنادي علهم جيه.. كل واحد نازل ومتخوف.. الكل: شو صاير يدووووو؟؟؟؟ البقيه تأتي؟؟ يا ترى شو صااااار؟؟ شو بلاها اليده؟؟ وشو اخر تطورات فاطمه مع هزاع؟ B) Quote Link to comment Share on other sites More sharing options...
شذى الروح Posted فبراير 15, 2005 Report Share Posted فبراير 15, 2005 يسلمو على الاجزاء يعطيج ربي الف الف عافية ننتظر التكملة لا تطولين اوكي Quote Link to comment Share on other sites More sharing options...
ديهيه Posted فبراير 16, 2005 Author Report Share Posted فبراير 16, 2005 ان شاااء الله ما رااح اطول عليكم .. بس ليش محد رااضي يتجاوب .. بس قليل Quote Link to comment Share on other sites More sharing options...
ديهيه Posted فبراير 16, 2005 Author Report Share Posted فبراير 16, 2005 هاااااااااي .. شخباركم .. الجزء الخامس الكل تيمع تحت يشوف شو الي خلى اليده اتصارخ جيه.. الكل خايف ومرتبك.. اليده وهي تبتسم: شوفوووو حمدوا بدت تمشي.. الله يخليها لنا.. الكل كان مصدوم ووده يضحك لأن خوفهم طلع ماله محل.. خوله: يدووو زيغتينا قلنا صايبنج شي بسم الله عليج.. طلع هالصريخ عشان حمدوا مشت كم من خطوة.. اليده: لا والله ليش هالشي ما يستاهل اني ازقركم عشانه.. غانم: لا يستاهل.. منو قال ما يستاهل.. مرت عبدالله: ههههههه.. يحليلج امي والله.. حمدو من زمان على هالحال تمشي خطوتين واتطيح.. اليده: وانتي شو خانتج.. علميها انزين.. خليها اتجرب لو اتطيح 10 مرات عبدالله: خلاص يدو ولا تزعلين.. تعالي حمدوو تعالي.. مسك ايد بنته وتم يحاول يمشي وياها وهو ماسك ايدها.. الجو في البيت كان وااايد حلو .. والفرحه كانت عامره الكل.. في بيت فطوم دخلت فطوم النت بعد ماردت من السينما ويا فيصل.. ودخلت الجات لقت هزاع موجود.. عيون المهى: هلا والله هزاع.. اشحالك؟ عيناوي أصيل: لا تسألين عن حالي.. يالظالمه يومين ما كلمتج واتقولين لي حالي.. تعالي شوفي حالي انتي بس كيف يوم ما اسمع عنج ولا اعرف اخبارج.. اااخ يا قلبي عيون المهى: انزين شو اسوي الظروف شوي صعبه.. اكثر شي لأن اخوي فيصل رد من السفر احين.. يعني ما اروم ادخل على النت وايد عيناوي أصيل: وانا لين متى اتم متعذب يعني؟؟ حسي فيني ارجوج؟؟ بس يالله كل شي عشان عيون المهى يهوون.. عيون المهى: والله شو اسوي مب بيدي ترا هالشي.. غصبن عني.. عيناوي أصيل: ادري.. عشان جيه عاذرنج.. انزين ما خبرتج منزلين برنامج يديد احسن من الجات واسرع اروم اكلمج فيه .. عندج هالبرنامج؟ عيون المهى: تقصد ال ICQ؟. عيناوي أصيل: لا شو ها جديم.. في واحد ثاني يديد .. اسمه المسنجر.. مال الهوت ميل.. عيون المهى: هييييه. اليوم سمعت وحده من رباعتي ترمس عنه.. انزين شقايل ينزلونه خبرني.. عيناوي أصيل: شوفي دخلي هالوصله w w w .**** .com اوكي.. تم هزاع يعطيها الطريقه كيف اتنزل برنامج المسنجر.. ونزلته عندها.. وعلمها كيف تستخدمه عشان يقدر يكلمها بطريقه احسن.. عيناوي أًصيل: خلاص اوكي احين؟ عيون المهى: والله هالبرنامج صدق احسن.. وااايد اسهل. عيناوي أصيل: انزين بغيت اطلب منج طلب ممكن؟ عيون المهى: انت تامر امر حبيبي.. عيناوي أصيل: شو كتبتي ما شفت عدل.. اكتبي مره ثانيه ما اشوف.. عيون المهى: ههههه.. حبيبي عيناوي أصيل: الللللله اخيرا قلتيها.. يا فرحتي.. انتي صدق اتحبيني.. ؟ عيون المهى: لا والله وكل ها افكر فيك لأني ما احبك؟؟ انزين شو طلبك ما قلت لي. عيناوي اصيل: خاطري اشوف صورتج.. ممكن اتطرشينها لي؟ عيون المهى: بس انا ما عندي اسكانر.. يوم بيكون عندي بطرش.. عيناوي اصيل: والله مشتاق ودي اشوف القمر الي وياي.. عيون المهى: خلاص بسيطه اطلع برع وشوف السما انا هناك.. عيناوي اصيل: لاااااااااااااااااا.. انتي قمري انا وبس.. لا تطلعين في السما.. لأني اغار عليج عيون المهى: بس انا اخاف اذا شفت صورتي اتغير رايك عني.. عيناوي اصيل: فطووم... انا ماابا اشوف صورتج عشان شي.. بس لأني ابا يوم اتخيلج وياي اتخيلج انتي مثل ما انتي.. اما الشكل ما يهمني المهم عندي قلبج وحبج لي.. عيون المهى: والله فديتك.. انا بعد عيل ودي اشوف صورتك.. عيناوي اصيل: يوم انزل صورتي على الكمبيوتر انا حاضر.. دخل اخوها فيصل وهي بندت الصفحه مالت المسنجر على طول عشان ما يقرا الكلام.. فيصل : ايه انتي وراج مدرسه يلا نشي اشوف.. سيري ارقدي.. فطوم: خلاص احين بظهر وبسير ارقد.. فيصل: يلا تصبحين على خير.(وطلع من الغرفه.. وردت فطوم فتحت المسنجر عشان تعتذر لهزاع) فطوم: اسفه حبيبي.. اخوي دخل علي.. هزاع: اااااخ.. كيف بصبر.. ها اخوج عله بعد.. لازم يخرب.. ارجوووج فكري في طريقه اقدر اكون وياج فيها دوم.. لين ما ايي واخطبج ان شاء الله فطوم وهي مصدومه: شوووو.. تخطبني؟؟؟ هزاع: هي نعم.. شو تتحريني العب عليج انا؟؟ انا ما عندي سوالف لعب.. انا حبيتج وخلاص ناوي اخطبج.. بس انتي خلصي دراستج.. فطوم: انزين انا بظهر من النت باااااااااي.. هزاع: ديري بالج على روحج حبي.. باي.. وتصبحين على خير طلعت فطوم من النت وراحت غرفتها عشان ترقد... لكن النوم ما ياها من كثر ما كانت اتفكر في كلام هزاع.. معقوله هزاع بيخطبني.. تمت تتخيل كيف حيتها راح اتكون حلوه يوم بتعيش وياه.. اخيرا لقت من يحبها ويتمناها كشريكه حياة له.. حست ان امنيتها اتحققت مثل ما صار ويا باقي رباعتها.. وفعلا تمت اتفكر كيف ممكن تتواصل وياه.. فطوم: ارمسه في التليفون.. لالالا .. ماروم شو ارمسه في التليفون.. المسنجر احين اوكي .. بس خاطري اسمع صوته.. مادري مادري اففففف.. احسن شي باجر بسأل خدووي ام الحلووووول هاي عندها الحل اكيد.. نامت فطوم على هالأفكار .. وفي اليوم الثاني قامت نشيطه على غير عادتها وتتريا متى اتروح المدرسه .. الكل استغرب من نشاطها هذا.. معقوله فطووم اتحب المدرسه جيه فجأة.. بس ما اهتموا لأنهم يعرفون لها مزاجيه ما ينعرف لها.. اول ما وصلت المدرسه على طول راحت عند خدوي وخبرتها السالفه بالتفصيل الممل.. خديجه: امممممم.. يعني جيه السالفه... انزين كلميه في التليفون شو يعني.. بس لا اتكلمينه دوم.. جيه كل يومين مره .. فطوم: لا شو اكلمه في التليفون مينونه انتي.. لالا فكري في فكره غيرها.. خديجه: انتي صدق غبيه .. شو افكر في فكره ثانيه.. مثل شو يعني.. اتقولين تبين تتواصلين دوم وياه .. وانا ما اشوف غير هالطريقه.. فطوم: اوووووووه احين قلت بلقى عندج الحل.. اقولج خاطري اسمع صوته بس مب من التليفون خديجه: جيه ترومين.. عندج مايك انتي؟ فطوم: هيه عندي ليش..؟ خديجه: خلاص قوليله خل يدخل على موقع محادثه صوتيه واذا هو عنده مايك بترومون اترمسون بعض.. جيه بتقدرين تسمعين صوته فطوم: فدييييييييييييييتج.. خديجه: عفان الله .. توج بس تتفديني بس عشان ها.. يعني مب عشاني ربيعتج فطوم: ههههه لا عشان افكارج الجهنميه.. انا عرفت اني ما بلقى الحل عند غيرج خديجه: وعساج بس اتقدرين.. فطوم: لا والله انا دومي مقدرتنج تمت فطوم اتفكر وتتريا متى اترد البيت عشان اتكلم هزاع.. كانت حاسه بفرحه كبيره .. اخيرا بتقدر تسمع صوته.. اخيرا بتسمع صوت هزاع.. حبيبها.. وانتهى الدوام وردت البيت.. وقبل لا اتبدل ولا اتسوي اي شي دخلت على النت وعلىطول دست المسنجر ولقته موجود.. هزاع: هلا والله يالقلب.. اشحالج ؟؟ وحشتيني مووووووت فطوم: فديتك .. والله بخير يوم كلمتك.. حتى انت وحشتني مووت هزاع: اه.. شكثر بتحمل انا شكثر.. فطوم: هزاع.. ما ودك نسمع صوت بعض.. هزاع استانس اتحراها بتقوله انرمس بعض على التليفون: يارييييييت فطوم: اليوم ربيعتي عطتني موقع محادثه صوتيه بندش وبنكلم بعض بالمايك.. شو رايك؟ هزاع: شو الفايده.. انا ابا اكلمج 24 ساعه افهميني.. فطوم: شو اسوي ما لقيت غير هالحل.. هزاع: خلاص نرضى فيه.. بشوف لين متى بنتحمل.. عطيني الموقع وتعالي هناك.. كانت ام فطوم اتنادي عليها عشان تتغدى.. بس هي تعذرت على انها مب يوعانه وعندها شغل على النت.. ودخلت الموقع ودشو الغرفه الخاصه عشان يكلمون بعض.. طبعا فطوم كانت جدا مستحيه من الموقف.. هزاع: الوووو.. حبيبتي.. ارمسي فطوم: شو اقول؟ هزاع: حرام والله تحرميني من هالصوت الحلو.. فطوم: عن الجذب.. صوتي مو حلو هزاع: لا والله كل هالحلا واتقولين مو حلو.. انا احين بتعذب زياده فطوم: ليش بسم الله عليك.. هزاع: عقب ما سمعت صوتج شو يصبرني.. لو انتي كنتي اكبر احين مو جان ييت وخطبتج احين فطوم: شو اسوي مب بيدي.. هزاع: احبج فطوووووووووووووووووم استحت فاطمه من هالكلمه وما عرفت شو اترد عليه.. تمت ساكته هزاع: وينج .. ليش ساكته لا تحرميني من هالصوت.. فطوم: شو اقول.. هزاع: انتي اتحبيني؟ فطوم: اكيد. هزاع: لا اباج اتقولينها .. ابا اسمع هالكلمه منج فطوم: هزاااااااع هزاع: عيونه.. يلا قوليها فطوم: اقول انا بظهر احين اوكي.. بسير اسبح من اول ما ييت ما بدلت حتى ييت على طول يلست على النت عشان اكلمك هزاع: حراااام مشتاق لج فطوم: مره ثانيه.. هزاع: متى متى هالمره الثانيه خبريني؟ فطوم: فليل كالعاده هزاع: هذا جان ما مت فطوم: بسم الله عليك لا اتقول هالكلام هزاع: اذا انتي اتخافين علي صدق ما بتخليني اتعذب ها جيه.. فطوم: انزين انا شو بيدي.. هزاع: رديتي وقلتي شو بيدي.. انتي كل شي بيدج بس انتي ما تبين.. فطوم: حرام عليك والله هزاع: هي واله صدق.ز يوم اتفكرين في حل مثل الأوادم والناس تعالي كلميني باي وطلع من غرفه المحادثه وطلع من المسنجر ما عطاها فرصه تتكلم.. تمت فطوم مصدومه ومحتاره مب عارفه شو اتسوي وكيف اتحل السالفه.. اكلمه في التليفون.. لا صعب وايد.. اففف شو اسوي يا ربي وطلعت من النت وراحت بدلت وتغدت وراحت تقعد ويا اخوها فيصل .. لأن فليل راح ايونهم قوم خالها ويا عيالهم.. خالها راشد عنده بنتين .. العوده ريم عمرها 22 والصغيره عواش عمرها 19 يعني الثنتين اكبر من فطوم.. فطوم: اليوم خالي راشد وحرمته وبناته بيون فيصل: ادري امي خبرتني.. ابا اشرد من البيت فطوم: ليش؟ههههههه فيصل: امج عقدتني.. تباني اخذ ريم بنت خالي.. انا ماباها.. عشان جيه كرهتهم فطوم: ليش بلاها ريم فنانه.. تعيبني بالعكس اكثر من عواش الخقاقه فيصل: اقول انتي بعد لا تخليني اجلب عليج .. اسكتي فطوم: اووووه محرج .. لالا خلاص اخيك شو ريم.. وععععع ماشي بنت غيرها هاي اخس بنت في الدنيا.. لا وع وع انا وياك مب شي فيصل: ههههههه تتطنزين اونج فطوم: لا احاول.. فيصل حاول يضربها بس هي شردت من الغرفه.. وتم يضحك .. حس ان محد مونسنه غيرها طبعا دشت فطوم عشان تتلبس وتتعدل لأن خالها راشد بيوصل فياي لحظه.. وعقبها راحت اتساعد امها في ترتيب الميلس والمطبخ اشوي.. وبخرت البيت وسمعت صوت جرس الباب.. نادت على الخدامه بس ما ردت عليها.. قالت حق فيصل يروح يفتح الباب.. عاد فيصل هالشي الي ما يباه.. بس انجبر يروح بفتح الباب.. ويوم فتح الباب جابل ريم.. سلم من ورى خاطره وسلم على خاله ومرت خاله وعلى عواش عواش وهي اتساسر ريم: بلاه ولد عمتج ها خقاق مادري على شو ريم: صخي الله ياخذ ابليسج.. عن يسمعج عواش: بس قاهرني والله ام خالد: هلا والله بأخوي.. حياك.. اشحالك بو الريم؟اشحالج عواطف؟ راشد: بخير ربي يسلمج اشجالج انتي؟؟ الله اشحال القمووره فطوم؟ عواطف: هلاوالله.. ماشاء الله منوره ام خالد ام خالد: بوجودكم والله.. ريم: لا بس عموو اليوم انتي محلوه صدق.. فيصل وهو يساسر عمره: افف بدت شغل المصلحه فطوم: امي من يومها حلوه من غير شي عواش: اكييييييد .. هالشي مافي نقاش فيه تموا يسولفون ويضحكون الرياييل في صوب والبنات والحريم في صوب.. ريم: اقول فطوم خل انسير نيلس في الميلس الثاني وانخلي الشواب روحهم يسولفون.. فطوم: هي والله احسن.. عواش: اقول فيصل تعال ايلس ويانا خبرنا سوالفك مال بريطانيا.. فيصل جاسه قهر شوي ويبا يذبح عواش: لا خلكم على راحتكم بنات ما بخرب عليكم ام خالد استانست قالت هاي فرصه يقعد فيها فيصل ويا ريم: روح اقعد وياهم فيصل.. فيصل ما حب يقول شي جدام خاله ويرد امه وسار قعد وياهم.. عواش: هلا .. يلا خبرنا شو كنت اتسوي هناك؟؟ فيصل: شو كنت اسوي .. ساير للدراسه .. ادرس يعني .. مب ساير العب عواش: ادري .. انزين ليش رديت من هناك..؟ فيصل: ماشي اتضاربت ويا واحد اجنبي هناك كان يسب المسلمين انا انقهرت جان اضربه.. وشي اكيد الكل بيوقف ضدي. وبيوقفون وياه فطوم: احسن.. يوم انك رديت.. ياخي ملينا وانت بعيد عنا.. والله احين مستانسه اكثر لأنك هني ويانا .. محد مونسني غيرك في البيت عواش: انزين شو وين احسن هني ولا هناك؟ فيصل: انتي شو اتقارنين.. ماشي مجال للمقارنه ابدا.. اكيد البلاد هني احسن بمليوووون مره فطوم: ريم.. بلاج ساكته جنج مستمعه.. ريم: ياسه اسمعكم تراني.. شو تبوني اقول فطوم: لا انتي بعد خبرينا سوالفج.. ريم: انزين كم سنه باقي لك وبتخلص.. فيصل: كان مفروض اتخرج هالسنه بس خربوا علي يعني تأخرت سنه تقريبا راح اكمل في كليه دبي واحتمال اغير اروح فرنسا ريم: يالله بالتوفيق اخوي البقيه تأتي.. انتظروني.. Quote Link to comment Share on other sites More sharing options...
شذى الروح Posted فبراير 16, 2005 Report Share Posted فبراير 16, 2005 يسلمو اختي و يعطيج الف عافية ننتظر التكملة اوكي Quote Link to comment Share on other sites More sharing options...
ديهيه Posted فبراير 16, 2005 Author Report Share Posted فبراير 16, 2005 ان شاااء الله ماراح اطول عليكم .. Quote Link to comment Share on other sites More sharing options...
شذى الروح Posted فبراير 20, 2005 Report Share Posted فبراير 20, 2005 يلا اختي اني انتظر من زمان انشاء الله تكملين لنا القصة بسرعة تحياتي .. شذى الروحــ ... Quote Link to comment Share on other sites More sharing options...
MaRyOmY Posted فبراير 20, 2005 Report Share Posted فبراير 20, 2005 يلا اختي اني انتظر من زمان حلوةةةةة القصة وايد انشاء الله تكملين لنا القصة بسرعة Quote Link to comment Share on other sites More sharing options...
ديهيه Posted فبراير 21, 2005 Author Report Share Posted فبراير 21, 2005 هاااااااي .. شخباركم .. B) ان شااء الله بس ما طولت عليكم .. تفضلووا .. الجزء السادس وتموا يسولفون عواش وفطوم.. الا فيصل كان ساكت ولا ريم .. كانت ريم مب شاله عينها من فيصل.. وتفكر وتتامل فيه.. عواش: افففف انتوا الإثنين شو بلاكم جنكم اصنام عفان الله؟؟ فطوم: هي والله صدقها عواش.. شو بلاكم ها جيه .. ارمسوا انزين محد زاخنكم ريم: انا ارمس تراني وياكم.. فيصل الي ساكت.. شكله يقول انه حد غاصبنه يقعد ويانا وهو ما يبا فيصل في نفسه(هي والله): .. بس انتوا كلكم بنات ما عرف شو اسولف فيه عنه وياكم .؟ عواش: هههههه سولف لنا عن مغامراتك.. فيصل: اي مغامرات شايفتني سندباد جدامج.. ريم: هي والله صدقها سولف لنا قول لنا كيف كانت حياتك اهناك بروحك في الغربه فيصل: والله كانت ايام حلوه.. وساعات كنت احس انها ايام ملعونه موول مب شي.. فطوم: الا قول ايامي انا من غيرك ايام ملعونه عواش: انتي صخي.. نحن ما صدقنا اخوج يرمس تبين اتسكتينه بعد فيصل: ههههه .. هي انتي لا اتصرخين على فطوم هاي ما ارضى عليها فطوم: عاش اخوي عاش عاش عاش عواش: مالت.. فطوم: عليج.. فيصل رن تليفون استانس من هالشي واخيرا يقدر يشرد عنهم.. .. ومر اليوم والكل روح .. وتمت فطوم بروحها لأن فيصل ظهر ويا ربعه .. على طول دخلت على النت عشان اتسولف ويا هزاع عالمسنجر.. فطووم: هلا والله اشحال الحب؟ هزاع: اي حال .. اي حال اللي تتكلمين عنه.. ليش انا تم لي حال من عقبج.. فطوم: ليش بسم الله عليك شو صاير.. ؟؟ هزاع: فطوومتي.. افهميني.. انا ما اطيق العيشه من غيرج لازم تلقين لنا حل.. وبعدين يعني فطوم: هزاع انا شو بيدي.. وبعدين على فكره اذا يتني ايام ما دخلت فيها النت لا تزعل مني لأن اخوي فيصل في البيت.. هزاع: لا حوووووول.. ا نا دقيقه مادري كيف اتحملها من غيرج.. تبيني اتحمل ايام.. انتي شو من اوادم مافيج دم ما اتحسين فطوم: حرام عليك شو ما احس.. هزاع: فطوم.. اذا صدق اتحبيني وما تبين اتزعليني هاج رقمي واتصلي.. واذا ما اتصلتي صدقيني حتى على النت ما بتلقيني.. ******** وطلع هزاع من النت قبل لا ترد عليه فطوم بأي كلمه.. وما لقت عمرها غير ناقله الرقم عندها في الدفتر وطلعت هيه من النت.. وراحت غرفتها عشان ترقد.. بس ما ياها النوم تمت اتفكر شو اتسوي .. ما عرفت شو الحل.. حست ان راسها داير مب عارفه كيف تتصرف.. ما ودها تتصل لأنها اتخاف وودها تتصل لأنها اتحس عمرها ما تقدر على زعل هزاع.. نامت وهالأفكار تدور في راسها.. في بيت خال فطوم .. كانت عواش تتطالع تلفزيون وريم يالسه صوب الدريشه وتتأمل في السما وساكته.. عواش: جولييت.. بلاج تتريين روميو.. ما بيي؟؟ ريم: سخيفه منج تدرين.. عواش: ما قلتي شي يديد.. اقول تعالي تابعي هالفلم والله بيفوتج.. ريم: مب فايجه.. عواش: عيل بلاج من يوم ما يينا من بيت عموو وانتي على هالحاله ساااكته ما تتكلمين.. حد ضايج في بيت عمتي ولا حد قالج شي وغلط عليج.. خبريني؟؟؟ ريم: لا عواش: عيل شو بلاج؟ ريم: ماشي صخي عني.. عواش: والله ما اصخ غير يوم اعرف شو بلاج.. وها صكيت التلفزيون وتفرغت لج .. يلا اتريا .. قولي لي؟ ريم: لا اله الا الله.. ماشي افكر في فيصل.. عواش: في منوووو ما سعت ردي قولي..؟؟ ريم: فييييييييصل.. سمعتي عواش: افف .. سمعت عورتي اذوني.. وشو تبين به هالخقاق ليش اتفكرين فيه.. ريم: لا اتقولين خقاق حرام عليج والله.. بالعكس شخصيته تعيبني.. عواش: شو .. تعيبج.. ريموووووو .. لا يكون؟؟ ريم: والله مادري يا عايشه.. عواش: لا لا لا دخليج ما نبا نسيب جيه.. خل عنج فيصل ريم: طاع هاي انتوا سوته نسيب.. عواش: هيه وليش لا.. وين بيلقى احسن منج.. دارسه وتشتغل مدرسه .. وحلوه ريم: بس مادري ها احسه من النوع الغريب.. يعني ما ينعرف لطبعه بسهوله عواش: عشان جيه اقولج خقاق.. ريم: لا عاد مب لدرجه الخقه بس اتحسينه كبريائه عالي.. عواش: انزين انزين خل عنج احين.. بسير اكمل الفلم.. اتحسبت اتفكرين في شي يرزى.. بس طلع شي ما يسوى.. ريم: لا اتقولين عن ولد عمتج جييه عواش: اقول ها ولد عمتج انتي بس.. انا متبريه منه.. ريم: ويا هالويه... سيري تابعي افلامج احسن ومرت الأيام.. وريم دخلت على النت كعادتها .. لكن ما لقت هزاع.. صار لها فتره طويله ما تعرف اي خبر عنه.. اتطرش له ايميلات وما تلقاه.. ولا يرد عليها.. كانت اتحس بإحباط كبير.. كله كانت اتفكر فيه.. وما لقت عمرها غير شاله رقمه من الدفتر وتتصل عليه.. ويوم رد عليها زاغت وصكت بويهه.. وردت اتصلت مره ثانيه ورد عليها وتمت سااااااكته .. وهو يوم ما لقى حد يرد عليه.. صك التليفون.. فيصل:فطوم.. اتكلمين منو؟؟ ارتبكت فطوم ما عرفت شو اتقول.: ها.. شو .. ها .. هاااي ربيعتي خدووي.. فيصل: انزين بلاج جيه زغتي.. فطوم: انت الله يهداك تدخل جيه فجأة طيحت قلبي.. فيصل: انزين قولي لي مبرووووك.. فطوم: مبرووك.. ؟؟ بس على شو.. ؟ فيصل: وافقوا لي عالسفره لفرنسا عشان اكمل.. فطوم: الله والخبر عاد من حلاته.. فيصل: ليش يعني؟؟ فطوم: تباني استانس ليش انك بتروح عنا بعيد بعد.. فيصل: فطووووومه حبيبتي.. هاي اخر سنه وخلاص توبه بعد ما بسير.. فطوم: خلاص جيه اوكي.. ومني دخلت مريم البيت.. ركضت فطوم في حضنها لأنها صار لها فتره طويله ما ردت البيت. مريوم: هلا والله بفطامي.. اشحالج؟؟ فطوم: بخير يالقاطعه انتي وينج خبريني؟؟ مريوم: شو اسوي حبيبتي امتحانات والله.. خوزي خل اسلم على اخوي الغالي فيصل.. من يوم ما رد من السفر وما شفته.. فيصل: هلا والله.. مريوووووووم ضعفانه شو صاير فيج.. شو ما تاكلين انتي ؟؟ مريوم: والله متبهدله ويا هالدراسه الأرف.. ما عليه بعوض يوم بخلص.. توه كان خالد نازل من الدري .. شاف مريم وسلم عليها:. هلا والله بإختي.. زين ييتي.. كله نترياج عشان املج.. كل شي مرتبط في وجودج.. مريوم: تعال انت اول خبرني شو سالفه هالزواج المفاجئ الي نزل عليك.... خالد: لا حوووول.. انتي بعد؟؟ مريم: هي والله .. بس غريبه .. يلا ما عليه اخيرا هالقلب حن ما بغى.. خالد: حن على شو .. شو تخربطين انتي.؟؟ مريم: شو اخربط.. حن على خوله الي اتحبك اقصد يعني.. خالد: لا حن ولا شي.. ابا اعرس وين بلقى احسن من بنت عمي.. وبعدين محيرينها لي.. مريم خافت من رده وحست قلبها قبضها عشان خوله: خالد دخيلك حطها في عيونك .. ترا خوله بنت ماشي احسن عنها .. خالد: اقول يا جماعه انا طالع تامروني بش؟؟ على فكره مريم.. رمسي امي خل اترمس مرت عمي عشان اتحددون يوم حق الملجه دام انج رديتي .. وافضل يكون بأسرع وقت .. مريم: سلامتك اخوي .. بخبرها.. فطوم: والله هالأخو الي ما عرفنا له؟؟ فيصل: الله يعلم بس شو تحت راس هالأخو.. مريم: انا مب خايفه غير على خوله منه.. فيصل: انتوا لا اتخافون بس ادعوا ربي ما تستوي مشاكل.. رن التليفون وركضت فطوم صوب تليفون البيت .. يوم شافت الرقم شافت رقم هزاع ردت على طول.. فطوم: الو.. هزاع: السلام عليكم فطوم وهي مرتبكه لأن مريم وفيصل واقفين جدامها: وعليكم السلام.. هزاع: لو سمحتي منو متصل من شوي على تليفوني..؟؟ فطوم: اشحالج.. انا فطوم .. انا الي اتصلت.. هزاع : منو.. لا لا لا ما اصدق.. معقوله.. اخخخخخخخخ يا قلبي.. اخيرا حسيتي فيني .. اخيرا.. فطوم: شو اسوي والله انتي ادرى بالحال.. ؟ هزاع: شكله حد عندج.. اقول يوم انتي بروحج اتصلي احسن اوكي.. فطوم: اوكي..باي يتبع ... Quote Link to comment Share on other sites More sharing options...
ديهيه Posted فبراير 21, 2005 Author Report Share Posted فبراير 21, 2005 وهذي البقيه ... قصدي جزء ثاني الجزء السابع راحت مريم غرفه امها عشان اتسلم عليها.. دقت الباب ردت عليها امها ودخلت.. مريم: هلا والله .. اشحالج أمايا.. ؟؟ والله وحشتيني مووووت؟ ام خالد: هلا والله بمرايم.. وينج امي.. ما صارت دراسه هاي ما قمنا انشوفج بالأسابيع.. تولهنا عليج وعلى سوالفج.. البيت من غيرج مب شي والله.. مريم: شو اسوي غصبن عني امي.. يلا ما بقى شي .. كلها سنه وبخلص ان شاء الله.. ام خالد: الله يوفقج.. ويفرحني فيج ان شاء الله.ز مريم: امي.. شو عن موضوع خالد.. شو سويتوا.؟؟ ام خالد: ااه يا مريم.. لا اتذكريني كل ما اتذكر قلبي يقبضني وافكر بخوله المسكينه.. مريم: وانا بعد مثلج امي والله مب مرتاحه... ام خالد: مب عارفه شو تحت راسه.. مريم: امي انا متطمنه ان خالد بيحطها في عيونه..بس لو يودر لواتته هاي.. ام خالد: الله يسمع منج امايا.. مريم: شو عن ملجتهم.. انا عندي اجازه ليوم السبت عشان المولد النبوي.. وشو عن ملجتهم... ام خالد: انا مكلمتنهم انهم يتجهزون بمجرد ما تنزلين اجازه انتي راح اتصير الملجه.. يعني هم مستعدين.. ونحن ما يبالنا شي .. مريم: الشبكه خذيتوها.؟؟ ام خالد: هي امي.. طرشنا كم من طقم من المحل الي دوم ناخذ من عنده خلينا خوله اتنفي الي تباه منهم.. مريم: خلاص عيل رمسي عمي وقوليلهم يوم الجمعه زين؟.. ام خالد: على بركه الله.. وطلعت مريم من غرفه امها وسارت صوب غرفتها عشان اتبدل وترتاح لها شوي.. وطبعا استغلت فاطمه الفرصه واتصلت في هزاع.. فطوم: السلام عليكم هزاع: هلا والله بهالصوت.. وينج ؟؟ فطوم: موجوده.. هزاع: وين موجوده حرام عليج.. ومخلتني انا جيه متعذب من غيرج.. ما اتحسين فيني.. كنت فاقد الأمل انج تتصلين فيني اتصدقين.. فطوم: شو اسوي .. انا ما اقدر بس انت اجبرتني .. هزاع: فطوم.. دخيلج لا تحرميني من هالصوت بعد ما سمعته .. والله فطوم: هزاع ما اقدر دوم اتصل.. بتصل في الإسبوع مره او مرتين.. هزاع: حراااااام.. بس يالله ما عليه انا راضي.. مره ولا مرتين يهونون علي اشوي على الأقل.. فطوم: ان شاء الله.. أأأأقول انا بسكر امي يايه.؟؟ هزاع: خلاص اتريا اتصالج حبي؟؟ فطوم: يلا مع السلامه ام خالد: كنتي اتكلمين منو فطوم.. فطوم بارتباك: ها.. كنت اكلم خدوووي ربيعتي ام خالد: هيه يحليلها.. اذا اتصلتي فيها مره ثانيه.. قوليلها خل اتقول حق امها اتمر صوبنا من زمان ما اتشاوفنا ولا قعدنا ويا بعض.. فطوم: ان شاء الله.. (نشت من الصاله وصعدت الدري بسرعه بعد ما كانت مغيره الرقم وراحت غرفة مريم.. ودخلت عليها لقت مريم في الحمام تسبح جان تنسدح على سرير مريم.. تترياها لين ما تطلع.. وخذت المجله وتمت تقرا الي فيها.. وفتحت صفحه القضايا والمشكلات فيها.. وبدت تقرا في قصه وحده.. كانت تقول عن تجربتها المريره من جراء المحادثات الهاتفيه والمشاكل الي استوت لها .. خافت .. صكت المجله وفرتها بعيد.. وطلعت مريم من الحمام واستغربت من تصرفها.. ) مريم: بلاج معصبه على المجله.. شوي شوي امي.. فطوم: ماشي مواضيعهم مصخره.. المهم خبريني رمستي امي؟؟ مريم: هيه قالت بتكلم مرت عمي عشان يتجهزون حق يوم الخميس.. فطوم: لا والله .. ونحن بشو نجهز بالله.. ملجه اخونا العود؟؟ مريم: ماشي حفله عوده ترا.. نروم ناخذ لنا جاهز.. ولا نسير وافي نشوف الفساتين الي عندهم جان منزلين شي يديد.. فطوم: عيل يلا قومي اتزهبي خل انسير.. مريم: ههههه شو بلاج مب صاحيه.. بعده العصر ما اذن.. فطوم: لا حوووووول.. عاد انتي اتعرفيني حبي للطلعه.. مريم: ههه .. خلاص بقول حق فيصل يودينا فليل.. فطوم: لا والله.. انا بقوله .. انتي ما بيسمع كلامج.. بيسمع كلامي انا مريم: في هاي صدقتي يا دلوعه فصووول... فطوم: هههههه اتحيدين يوم كنتي صغيره وقلتي عنه فصول شو سوى فيج.. اسير اخبره.. مريم: خس الله ابليسج انتي ما تنسين شي.. فطوم: بعد ذاكرتي قويه.. لمثل هذه المواقف طبعا.. مريم: انزين خبريني شو مسويه في المدرسه شاده حيلج ولا لا.؟؟ ما بقى شي على الإمتحانات وايد جريبه... فطوم: الحمد لله .. اشقح.. اذاكر.. شوي مب وايد.. مريم: ترا خوفي من هالشوي يستوي ولا شي.. فطوم: ما عليج انا فطوم.. صاحبه المهمات الصعبه.. مريم: عاد الله والمهمه من صعوبتها انا حليلي طب وما اقول شي فطوم: انتي مصريه.. يعني حاله خاصه.. شاذه عن العائله مريم: شاذه اونه.. نسيتي فيصل وخالد.. هاييل بعد شاذين.. محد غيرج الي شاذ عنا فطوم: افففف.. خلاص خلاص.. ما قلنا شي.. كلتيني ترقبوا.. البقيه تأتي.. Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.