بدرةالبحرين

نهاية عجيبه .. مع اني تميت اصيح من وقت ما مات فهد لي نهاية المسلسل

انا اخالفكم الرأي .. النهايه كانت جدا روعه ولها معنى تدرون ليش ؟ كلنا شفنا فهد ربى جدام عيونا وشفنا تربيته على الصلاة وكتاب الله .. وشفنا اخلاقه و و وو والهدف من النهايه ان الانسان ممكن يروح في اي وقت .. بس مو كل انسان نهايته تكون مثل فهد .. الله رزقه حسن الخاتمه من عمله الصالح واخلاقه وبالنسبه ل بو فهد .. كفايه شفتو دموعه واهو اللي ماتهزه ريح .. معناته ان عمل الخير يلين الصخر ودموعه كففت ووفت في ايضاح المعنى مسلسل جدا رائع واحسن مسلسل ل 2007 .. هادف وواقعي وفكرته حلوه ويديده .. المسلسل حاول ان يوصل رساله هادفه .. واظن انها وصلت

باقي شوي .. اخر تناتيش

السلام عليكم مسامحة طولت عليكم .. بس صادني شئ وايد يقهر .. تخيلو اني كنت كاتبه الاجزاء و مسيفتهم عندي .. وكمبيوتري اخترب فأنجبرت اسوي فورمات وراح تعبي كله عطوني يومين وراجعه لكم ان شاء الله ووترى مانسيتكم والله

السلام عليكم شكرا على ردودكم وان شاء الله الجزء بيكون عندكم جريب

السلام عليكم مسامحة اني تأخرت في الرد عليكم بس توني شايفه الردود شكرا على كل من رد علي .. وفعلا هالقصه وايد لها مكانه خاصه في قلبي .. هذي اول قصه اكتبها وحطيت كل جهدي ومشاعري فيها وليحين ارد اقراها ساعات شكرا على تشجيعكم .. وشكرا على ردودكم وانه نزلت قصه يديده عنوانها ~ فراغ العاطفه ~ وان شاء الله تعجبكم اضغط هنا للقراءة

السلام عليكم شكرا على ردودكم وبالنسبه للأجزاء ماطلبتو راح اطولهم وراح انزل جزئين كل اسبوع على ان الاجزاء اتكون اطول جذي اوكي ؟

السلام عليكم شكرا اختي على ردج وفعلا البارتات قصيره ليش اني انزل كل يوم او يومين بارت اقدر اخليهم اطول بس جذي بتأخر عليكم القرار لكم خبروني اي طريقه اريح لكم ودمتم

الجزء السابع الساعه 9:30 الكل كان في قاعة الاكل يتريقون ماعدا محمد وناصر كانو واعيين قبل الكل ومتريقين وراحو ياخذون لهم جم فره في المجمع اللي تحت الفندق .. بو ناصر : يالله قومو روحو غرفكم بدلو و يمعو اغراضكم عشان بنطلع من كوالالامبور اليوم ام ناصر : اليوم وين بنروح ؟ بو ناصر : جنتنغ هاي لاند ام محمد : هذي اهي مدينة الالعاب ؟؟ بو ناصر : اي لجين واهي مبطله عيونها يوم سمعت كلمة الالعاب : بنروح العاب ؟ ام ناصر واهي تبوسها : اي فديتج .. بتلعبين لي ما تشبعين بو ناصر يوجه كلامه للبنات : لاتأخرون نص ساعه انتو تحت في اللوبي السياره بتوصل ساعه 10 ساره : ان شاء الله يبه .. نص ساعه واحنا جاهزين حوالي الساعه 10 الكل كان مخلص ماعدى جود كانت ليحين محتاره شنو تلبس .. قالو لها ان جنتنغ وايد بارده والدرجه توصل 15 في الليل .. مع ان جو ماليزيا بشكل عام استوائي حار خلال اغلب الفصول .. فقررت انها تلبس لبس عادي وتحط في شنطتها جاكيت اذا حست ببروده طلعت لها تنورة بيضه قصيره ووياها BODY تركواز يده قصيره فيه كتابات بالابيض ولبست مضاعد بيض كبار وحطت على شعرها سكارف ابيض منقط تركواز ربطته من تحت وخلت الباقي مفلول وطايح على جتفها .. الكل كان يناديها ويستعجلها واهي تيمع اغراضها حطت LIPGLOSS وردي بسيط ولبست نظارتها الشمسيه وطلعت على عجل كانت تمشي في الممر تحاول تعدل كعبها بيد وبيد الثانيه تجر الشنط اللي كانت ثقيله شوي وكانت منزله راسها تطالع كعبها .. وبدون ماتدري حست روحها دعمت في شخص وطاحت على الارض .. وتنثرت كل الاغراض محمد وقف مصدوم واهو يطالعها ! اي صح دعمت محمد جود ماكانت تدري شتسوي كانت مصدومه وكانت متعوره وايد في نفس الوقت واغراضها طايحين حواليها محمد حس بروحه ان واقف مو قاعد يسوي شئ جرب منها محمد بصوت خافت : تعورتي ؟ جود واهي هزت راسها : اي شوي محمد : زين عطيني يدج بساعدج توقفين جود واهي تطالعه بطرف عينها : مشكور بوقف ابروحي محمد تفشل وحس بغباءه .. شلون اقولها عطيني يدج !!! صج انه غبي بس شاسوي كنت ابي اساعدها جود حاولت انها توقف وقدرت بصعوبه .. بس محمد كان مشغول على الارض ايمع اغراضها ويدخلهم في الشنطه .. تمت جود تساعده جود : شكرا ماقصرت محمد : افا عليج بس .. عطيني الشنط بشيلها وايد ثقيله جود : مشكور محمد ابتسم لها وشال شنطتها ونزلو تحت لقو الكل ينطرهم مشو حوالي الساعه 10:15 الطريج تقريبا ساعه وربع .. والدرب وايد حلو كله جبال ومرتفعات وشلالات والجو وايد برد جنتنغ هايلاند تعتبر اعلى منطقه في ماليزيا .. واهي عباره عن مدينه ترفيهيه شامله .. العاب ومجمعات وفنادق وغيرها وصلو بدلو ثيابهم وسيده راحو صوب الالعاب ماعدا بوناصر وام ناصر وام محمد راحو المجمع جود كانت منبهره بالمكان تشوف الالعاب الضخمه والاشيا الغريبه اول مره تشوفهم اصلا اهي اول مره تسافر عمرها ماسافرت من قبل الكل كان يركب في الالعاب ماعدا جود كانت وايد خايفه ماتحب تركب الرولي كوستر .. ومعظم الالعاب كانت قويه فكانت تفتر ويا اختها الصغيره لجين يدورون الالعاب البسيطه ويركبونها .. مثل دوامة الخيول والقطارات وطبعا ساره طول الوقت كانت ويا محمد ومحمد مستانس فيها لانها على طول اتسولف مرت ساعاات وجود لاحظت انها ماشافت احد من عايلتها ابتدت اتخاف .. خصوصا ان المكان وايد عود واهي ماتتذكر اسم الفندق اللي قعدو فيه ولا عندها تلفون ناصر لاحظ غياب جود فأبتدى يحس بالقلق ناصر : مالاحظتو ان جود من مساعه محد ؟ ساره بصوت خافت بس سمعوها : ياعلها تضيع ومانلاقيها ان شاء الله فكه منها جنى بعصبيه : ساروو شنو هالحجي عيب عليج والله حرام هلون تكرهين البنيه ؟ اهي شسوت لج ؟ ساره بأستهزاء : جب جب انتي اخر وحده تتحجين .. خلاص يبه افتريتي علي فرتج بنت ابليس محمد : ساره ! خلاص عاد شلون تقولين هالكلام عن اختج ؟ عيب ساره : انته ماتعرف اشكثر اهي حقيره اهني ناصر وصل حده ولين ناصر يطنقر الكل يسكت ويخاف عيونه تصير حمر وملامحها تتغير ناصر بعصبيه زايده : ساروو والله العظيم اذا ماسديتي بوزج الحين والله بييج كف يفر راسج .. خلينا في هالبلوه قومو خلنا اندورها الكل ابتدى يدورها وجود تعبت واهي تدورهم فقررت انها تقعد على الكرسي وماتتحرك لي ما ايي احد ويلقاها لجين ابتدت تخاف وتتملل وابتدت تصيح وجود تسكتها وما مرت نص ساعه الا محمد وجنى يايين صوبها جود ماصدقت انها شافتهم وقامت حظنت جنى بخوف جنى : جود متنا من الخوف وينج انتي ؟ جود : انه كنت افتر العب ويا لجين بس مادري شلون ضعت محمد لاحظ لجين اللي تصيح .. شالها محمد واهو يكلم لجين : بس يا قمر لاتصيحين الحين بوديج اشتري لج حلاوا زين ؟ لجين واهي تمسح دمعتها : حلاوا ؟ محمد : اي بس انتي سكتي لجين بأهتمام : خلاص سكت بس اشتر لي حلاوا جود واهي تكلم لجين : عيب لجين محمد : خليها .. انه بوديها اشتري لها حلاوه مثلها جود لأول مره في حياتها تحس ان عندها ناس يحبونها ويخافون عليها ناصر واهو يركض صوبهم : الحمدالله انتي اهني ؟ جود بحزن : مسامحه خليتكم تخافون علي ناصر ضمها : انتي اختنا .. منا وفينا اذا ماندورج ندور من ؟ جود دمعت عينها اول مره تحس بعاطفة الاخوه .. اهي طول عمرها وحيده ماعندها خوات ولا اخوان ماعدى لجين واهي وايد صغيره جود : ماتقصرون والله ناصر : وبعدين وياج ؟ لي متى بتكلمينه برسميه ؟ خلاص جود انتي اختنا وابيج تعتبريني اخوج من يوم ماولدوج جود : الله شاهد اني احبكم واعزكم من قبل لاتعرفوني ناصر : زين يالله صارت الساعه 6 خلنا نرد الفندق نصلي ونرتاح شوي عشان بعدين ننزل نتعشى حوالي الساعه 9 كانو البنات ووياهم محمد وناصر يتمشون توهم كانو مخلصين عشا فقالو انهم بيروحون يقعدون في كوفي شوب قعدو في ستاربكس .. وتمو يسولفون وجود قامت عشان تطلب لها شئ تشربه لانها ماطلبت مساعه محمد من شافها قامت قام وراها حس بأن هذي اهي الفرصه المناسبه عشان يسوي اللي في باله خصوصا ان الكاونتر في الطابق التحتي واهمه قاعدين فوق محمد واهو يقوم : انه بعد بقوم اطلب لي كيك .. وبعد مايصير تروح بروحها اخاف احد يأذيها شفت وايد خليجيين اهني ناصر هز راسه جنه يوافقه في كلامه ساره بغت تموت من الغيره .. محمد شفيه وايد مهتم في جود ؟ طول الوقت يطالعها والحين يخاف عليها ؟ جود كانت واقفع تطلب وانصدمت لما شافت محمد يمها ابتسمت له محمد : طلبتي خلاص ؟ جود : اي توني طالبه محمد : انه ييت عشان اطلب كيك جود : بالعافيه جود انشغلت عشان تدفع حق الريال .. انتهز محمد الفرصه وبخفة يد حط ورقه داخل شنطتها جود لاحظت هالشئ وانصدمت وايد .. شنو معقوليكون الشئ اللي محمد حطه في شنطتها ؟؟ محمد ماكان متأكد ان جود لاحظت او لا بس رسم ابتسامه على ويها وتم ينطر الطلب ماله جود راحت الطاوله وعينها سارحه عقب شوي رد محمد .. وتمو يسولفون كلهم بس جود كانت ساكته ومحتاره ساره كانت تراقب جود ولاحظت تغيرها من عقب ماردت ويا محمد وحوالي الساعه 11:30 اخيرا ركبو غرفهم وجود ماصدقت عشان اتعرف شنو محمد حط لها في الشنطه وتفجأت يوم شافت ورقه صغيره .. وكان كاتب فيها لك حبيب يموت فيك حس به الله يهديك .. منشغل باله عليك وانته مافكرت فيه كأنك الماي لظماه وفرحته ولمسة شفاه .. وانته حلمه في الحياه وانته كل اللي يبيه الكلمات كان قليله بس كانت واضحه جود انصدمت حست قلبها يدق .. وقرت الورقه اكثر من مره ماكانت تقدر اتصدق .. اهي كانت تشك بشئ بس توقعت انه يكون اعجاب بسيط او نزوه .. بس محمد قاعد يعترف لها بأن يحبها ؟ معقوووله ؟ جود كانت متوتره ومن تتذكر ويه محمد تتوتر ازيد وقلبها يدق .. اهي مابتنكر انها مالت له بس ماتقدر تثق فيه خصوصا عقب الكلام اللي سمعته في الطياره خشت الورقه وحاولت انها ترقد بس ماياها نوم كل تفكيرها كان عند محمد محمد كان محتار وقاعد على اعصابه .. قام يحس ان تسرع ,, الحين شلون بيعرف شنو رايها ؟؟ يمكن البنيه ماتبيني ؟ ولا فكرت فيني محمد وايد كان يحاتي .. بس كان يواسي نفسه ويقول ان جود اكيد بترد له الجواب على الكلام اللي قاله لها ويبصر نفسه نطروني في الجزء الثامن

السلام عليكم شكرا على ردودكم الحلوه وموعدنا الليله ان شاء الله بس حبيت من القراء العزاء اللي متابعين القصه يقولون لي رايهم في القصه لحد الحين .. من ناحية الاسلوب واالاحداث والشخصيات ورايكم فيها واي تعليق او نقد سواء سلبي او ايجابي عشان يساعدني في كتابة الاجزاء اليايه شكرا لكم

الجزء السادس عصر الاربعاء العطله توها من يومين ابتدت .. الجو كان وايد حلو بارد شوي والسماء متروسه غيوم وزخات من المطر تهل بين فتره وفتره .. جود كانت قاعده في الحديقه تحب الجو في يناير , والشتا في بلدنا مو وايد بارد واحلى شئ المطر اللي كان يبلل شعرها ويتسلل على خدها , واهي مندمجه تكتب في مذكرتها اللي دايما اتكون وياها بس مو دايما تكتب فيها .. صار لها فتره ماكتبت في دفترها اللي عندها اياه من 4 سنين .. كان هديه من امها الله يرحمها .. " وحدي ابقى مع ظلمة ليلٍ حالك .. ينشر ردائه بلا رحمه على الدنيا .. وبالأخص على قلبي .. وحيده ؟ لا بل سجينه .. سجني الليل .. وانت الجلاد , ياليتك ترأف بقلبٍ لم يعرف إلا ان يحبك .. ياليتك تعذر قلبٍ ذاب وثمل في هواك .. ياليتك وياليتك .. وما أكثر الامنيات .. ستبقى الشمس وسأبقى القمر .. وهل يا ترى فيومٍ يلتقيان ؟ سكرت جود الدفتر , ودشت داخل عشان تتجهز وراهم سفر الساعه 7 .. وباقي لها جم شغله تحطهم في الشنطه الساعه 5:30 الكل كان في المطار محمد وامه كانو سابقينهم هناك .. بس مروة مابتروح وياهم لانها متعوده في عطلة الربيع تزور عمتها بالكويت خلصو الاجراءات وتمو ينطرون الرحله .. وطول الوقت محمد يطالع جود وفي بعض الاحيان تلتقي نظراتهم وساره لاحظت هالشئ بس ماكانت واثقه انها مثل ماتظن .. جود كانت مستحيه .. اهي بطبعها هادئه بس هالمره انصبغ هدوئها بالخجل البريء .. في الطياره تقريبا درجة رجال الاعمال كانت نصها عايلة بوناصر وام محمد .. ووياهم عايلة سعوديه الكل اخذ مكانه .. جنى وساره وجود قاعدين يم بعض .. محمد وناصر ووياهم ام ناصر .. ولجين تتوسط ام ناصر وبو ناصر .. لجين وايد تعلقت بأم ناصر جنها لقت فيها الأم اللي فقدتها .. وخصوصا ان ام ناصر كانت تعاملها بحب وحنان ماينوصف .. وبسرعه دشت قلبها وقامت تحس ان لجين بنتها صج .. فحين علاقتها ويا بوناصر كانت ليحين فاتره .. وبوناصر وايد يحب مرته وكان امله على هالسفره انها تكسر الحاجز وترد المياه لمجاريها الرحله كانت تقريبا 7 ساعات في اول 3 ساعات الكل كان مرتبش ونشيط اللي يشوف فلم واللي يمسع اغاني واللي يتصفح مجله .. بس بعدين الوضع تغير التعب لقى طريجه وتسلل بينهم .. جود كانت دايخه ماتحب الطياره اتييب لها لوعه وعوار راس .. فأستسلمت للرقاد ولأن محمد كان قاعد على الكرسي اللي يمها بس يفصلهم الممر فكان يقدر يشوفها .. والكل كان مشغول فأغتنم هالفرصه .. وسرح بملامح جود واهي راقده .. شكثر حلوه , واحلى واهي راقده جنها ياهل صغير , ملامحها هادئه وماتتحرك شكلها تحلم خوش حلم .. وشعرها اللي نازل على ويها متبعثر على جتفها بكل عفويه خلاها تصير بنظر محمد مثل الاميره النائمه اللي بالقصص .. واللي تنطر الأمير يوعيها , هل بيكون محمد اهو الامير ؟ هز محمد راسه جنه يحاول مايفكر بالموضوع .. بس شيسوي ؟ كل ماقال مابيفكر فيها . يلقى روحها تعمق اكثر واكثر محمد اللي عذي قلوب العذارى ! الحين صار متعذب ؟ الله يالدنيا .. قالها محمد بهدوء بس ناصر سمعه ناصر بأهتمام : اشفيك متحسر ؟ محمد بخبث : اخخ قلبي يا نصور .. صادوه غصب عني ناصر بضحكه : ههههههههه مالت عليك .. لحين ماتبت من سوالفك ؟ متى بتعقل وتخلي بنات الاوادم في حالهم ؟ محمد بضحكه : لا خلاص تبت .. هالمره شكلها الطيحه عدله ناصر : من هذي ؟ اعرفها ؟ محمد يحاول ان مايبين شئ : لا ماتعرفها ساره سمعت الحوار وكل اللي في بالها ان محمد يقصدها .. استانست وايد وحت لو مايقصدها كـ ساره .. اكيد يقصدها كـ فاطمه .. في كلا الحالتين اهيا ربحانه .. اذا يقصد فاطمه بتعترف له عقب ماتطيحه في شباكها بس التوقعات شئ والواقع شئ ثاني .. طبعا محمد كان يقصد جود وشاءت الصدفه ان جود كان واعيه لما دار هالحوار .. بس كانت مغمضه عيونها .. حست بضيق وحست وكدر , ماتعرف ليش حست هلون بس حست جنه محمد يخونها , يمكن اهي وايد تمادت واعطت الموضوع حقه .. يمكن محمد ماعمره اهتم لها .. او يمكن بين لها اهتمامه بس عشان يلعب .. مثل مايلعب ويا باقي البنات نفس مافهمت من كلام ناصر ورد محمد .. حست بغباء وانها تافهه .. وقررت انها ماتعطي محمد اي اهميه ومستحيل يعتبرها لعبه مثل باقي البنات .. هذي جود مو اي وحده .. وكرامتها فوق كل شئ انتهت الرحله على خير ووصلو العاصمه كولالامبور حوالي الساعه 11 الصبح بتوقيت ماليزيا .. سياير الفندق كانت تنطرهم وماصدقو انهم وصلو الفندق كل واحد راح على غرفته عشان يرتاح الساعه 6 المغرب .. الكل في صالة الفندق عقب ما ارتاحو قررو انهم يطلعون وياخذون جوله ناصر ومحمد كانو مسويين جدول حق الاماكن االي بيروحونها .. ام محمد وام ناصر وبوناصر ماراحو وياهم .. فتوزعو في التاكسي وراحو " ماينس وندر لاند " واهو عباره عن مجمع تجاري محاط بالماي وتتسوق بداخله عن طريق قوراب .. تقريبا مثل فكرة ايطاليا .. واحلى شئ فيه البحيره العوده المزينه بأحلى الليتات .. الجو كان وايد حلو وجود طول الوقت كانت تتفادى محمد ولاتطالعه حتى واذا التقت عينها بعينه كانت تعطيه نظرات غضب .. محمد كان محتار شفيها جود تطالعني هلون ؟؟ خلصو الجوله جنى : نصوور انه يوعانه حرام عليكم حرمتونا من الأكل ناصر بعصبيه : اهوو انتي ماتصبرين عن بطنج ؟ نطري الحين بنروح ناكل ساره : ترى صج نبي ناكل محمد واهو يضحك : اي يا نصوور صج من الظهر ماكلينا شئ ناصر واهو تملل منهم : زين زين .. امشو نروح ناكل مامنكم فايده جنى واهي تصارخ من الوناسه : جوفو جوفو Nandos عندهم Nandos ناصر واهو يقرص جنى : هي انتي شفيج متخرعه ؟ فشلتينه ! اول مره تشوفين مطعم ؟ جنى واهي متفشله : لاا بس ماتوقعت ان بنحصل مطعم نعرفه محمد : من قال اصلا اهمه يعتمدون على مكدونالدز وكنتاكي وهالخرابيط جنى بفرح : وانه كنت احاتي الاكل مشو كلهم قعدو في المطعم طلبو نص الmenu صج كانو يواعه .. الكل كان مشغول بالاكل .. ورجعو الفندق حوالي الساعه 11 عشان يرقدون باجر وراهم يوم طويل اليوم الثاني بو ناصر قعدهم كلهم ساعه 8 عشان يبدلون ويلحقون على الريوق في غرفة البنات جنى بثقل : والله ماقدر ابطل عيني .. حرام توها ساعه 8 جود واهي تطلع ثياب : احلى شئ قعدة الصبح في السفر ساره بأستهزاء : روحي زيين .. قعدة الصبح ؟ صج ماعندج ذوق جود ضحكت كانت تدري ان ساره تقصد كلامها بس ماكانت تبي تسوي مشاكل ساره انقهرت يوم شافت جود ضحكت .. اهي كانت تبي تضايقها بس جود طلعت ذكيه وقلبت الموضوع جود وواهي تحاول اتقرب من ساره : ساره لبسي ال t-shirt مالي يطيح على الجينز ساره واهي تطالعها من فوق لي تحت : NO THANx عندي ثياب تكفيني سنه .. اذا انتي بغيتي تعالي باعطيج جود بعد تغاضت عن ردها واكتفت بالابتسام .. صج ان الحقران يقطع المصران الكل نزل وكانو مبدلين وجاهزين جود لبست برموده جينز وقميص قطني خفيف لونه بيج وربطت وشاح على شعرها وخلت الباقي مفلول ولبست صندل خفيف وماحطت اي مكياج .. كانت بسيطه وحلوه وعمليه حق السفر جنى كانت شوي تعاني .. اهي متعوده على الدفه والشيله بس كانت تحاول تأقلم بسالفة الثياب وساره كانت لابسه توب وردي ويا تنورة جينز كانت قصيره ولبست وياه ستوك ابيض محمد كان غير اليوم عن كل الايام .. كان لابس لبس حده كاجوال .. ومحمد متعود ان يلبس ثوي وغتره ودايما متكشخ .. كان لابس بنطلون جينز وتي شيرت بني .. كان شكله وااايد حلو تريقو واول محطه كانت حديقة الفراشات .. الكل كان مستانس ومنبهر .. وخصوصا لجين كانت تلاحق الفراشات وبعضهم كان صج كبار .. وماعدا جود اللي كانت خايفه بطبعها ماتحب الاشيا اللي تطير فكانت طول الوقت ملتصقه بجنى وتمشي ورااها .. ومحمد يشوفها واهو مستانس عليها .. شكثر رقيقه هالبنيه .. حديقة الفراشات رغم جمالها كانت كابوس بالنسبه لجود وكانت تنطر يخلص المشوار .. واخيرا طلعو وراحو حديقة الطيور وكانت جود وايد مرتعبه من الفكره .. لان الطيور كانت مهدوده تسرح وتمرح على كيفها .. بس شوي شوي حاولت انها تتعود على الوضع .. قعدت جود تاخذ بيرك لانها وايد تعبت واهي قاعده شافت طاؤوس انبهرت فيه وبألوانه وتمت تطالعه بأعجاب .. طلعت دفترها وبتدت تكتب مغرور .. نعم مغرور ومختال كالطاؤوس .. تمشي بخيلاء وكبرياء .. وكأنك الذكر الوحيد على وجه الارض .. اتظن بوسامتك ستأسر قلبي ؟ فعلا وسامتك امر لانقاش فيه .. و جاذبيتك امر مفروغ منه .. لكن لا والف لا .. فأن كنت الطاؤوس فأنا الروضه .. وما انت سوى بطاؤوس في الروضه وقفت الكتابه لما حست ان في احد يمها .. وكان محمد خافت لما شافته وسكرت الدفتر بسرعه محمد ياته ضحكه من شكلها محمد واهم يكتم ضحكته : سوري ماكنت اقصد اخرعج جود واهي تكابر : لا عادي .. بس ماكنت ادري ان في احد يمي محمد بفضول : شتكتبين ؟ جود ودقات قلبها تتسارع : ولا شئ خرابيط محمد واهو يتفحص الدفتر بأهتمام : انزين من مساعه ينادونج وشفت مافي فايده الا اني ايي اناديج التفتت جود شافت الكل ينطرها .. حست بأحراج ولملمت اغراضها ومشت المحطه التاليه كانت sun way lagon واهي مدينة ملاهي مائية .. في العاب مائية ضخمه وبحر صناعي ومدينة ملاهي .. الكل كان مستانس ومرتبش * عند احد الالعاب جنى واقفه مطنقرة .. ليش انهم مايخلونها تلعب .. ممنوع احد يلعب ببنطلون طويل .. لازم يكون خاص بالسباحه والكل كان مندمج ومستانسين وماعدا جنى اللي تمت تطالعهم بحسره بس قدرت انها تتسبح في البحر وجود كانت تلاعب اختها ويرشون على بعض ماي وطول الوقت محمد يشوفها .. بس اهي مو مسوية له اعتبار وهالشئ حرق قلب محمد وساره طول الوقت لاصقه في محمد وتكلمه وتحاول تلفت انتباهه .. ومحد شك بساره ليش ان الكل يدري ان محمد دايما يعتبر بنات خالته مثل خواته وغياب ناصر ساعد هالشئ ناصر كان مشغول ويا ربعه اللي شافهم هناك خلصو من الالعاب وراحو تسوقو في المجمع وكلو وخلص هاليوم الطويل وردو الفندق عشان يرتاحون.. الكل راقد ماعدا شخص ماغمض له جفن .. الا وهو محمد كان يسترجع ذكريات هاليوم ويحاول ان يتذكر ويه جود واهي تضحك واهي خايفه واهي سرحانه واهي ساكته او تتكلم محمد خلاص بدى يغرق وتاكد ان هالمره صج .. هالمره صج قلبه يحب .. واول مره يحب .. فقرر ان يحاول ويغتنم هالفرصه ويتقرب من جود .. و عاهد نفسه ان باجر ماراح ايي الا واهو مبين لجود شئ من اللي يحسه بطريقه مباشره او غير مباشره .. راح يخلي هالشئ راجع للاوضاع نفس الشئ جود لقت صعوبه قبل ماترقد .. بس جود كانت محتاره , ليش محمد يبين لها ان مهتم فيها ويتم طول الوقت يطالعها .. وفي نفس الوقت اهو يحب وحده ثانيه ؟ ليش يبي يلعب بمشاعري ؟ واهي تفكر استسلمت للنوم بدون اي مقاومه تابعوني في الجزء السابع

السلام عليكم مسامحة على التأخير .. بس وايد انشغلت هاليومين .. الحين ان شاء الله بنزل لكم الجزء السادس وان شاء الله يعوض غيابي

الجزء الخامس مر هالاسبوع بسرعه .. خصوصا بالنسبه لـ جود .. لأنها كانت مشغوله وتحاول انها تتأقلم بحياتها اليديده .. وتحاول انها تعيش حياتها صج انه مستحيل حزنها على امها يروح خلال اسبوع او اسبوعين .. بس كانت تحاول انها تبين قويه وتعيش حياتها مثل ما بغت امها .. تكمل دراستها وتهتم في اختها الصغيره اللي محتاجه لها في هالوقت .. في نفس الوقت من داخل كانت في اضعف حالاتها بس تحاول انها ماتبين هالشئ عشان متضايق اللي حواليها جود واهي تدخل آخر صندوق للغرفه : افف مابغينه نخلص ! جنى : ههههههه شدراني فيج ! هالكثر اغراض ! جود بضحكه : لااا .. لايفوتج هذلين مو كل الاغراض .. الباقي في بيت امي الله يرحمها او مايبتهم لانه ماعندي مكان في الغرفه خلاص ! جنى : الله يعين ! امم باقولج ابوي قالج ان يمكن نسافر هالعطله ؟ جود : لا والله ماعندي خبر ؟ وين بنروح ؟ جنى : بنروح ماليزيا .. وبيت خالتي ام محمد بيون ويانه جود يوم سمعت ان بيت ام محمد بيون تضايقت .. لانها حست في يوم العزيمه .. ان ام محمد و مروه ماتقبلوها ! والسفر معناته الاحتكاك بساره واهي ماكنت تبي مشاكل وساره تنطر اي إشاره عشان تسوي مشكله جنى بأستغراب : جووود هيي جوود ! وين سرحتي ؟ جود محتاره : هاا ؟ لااا ماسرحت وياج جنى بطرف عينها : ايي واضح انج وياي .. المهم كنت اقولج ان بنسافر جود بملل : اي وايد زين جنى : ماشوفج مستانسه ؟ جود : لا مستانسه بالعكس .. زين تعالي نحط هالاغراض مكانهم وتمو جنى وجود يعدلون الغرفه .. وصار لهم يومين يرتبونها ويعدلون الديكور .. جود مارضت الخدم يرتبونها او المهندس يعيد تصميمها .. جود بطبعها نحب الاشياء البسيطه والرقيقه .. حبت انها تشتغل على غرفتها عشان تقدر ترتاح في الغرفه وتحس انها تعبر عنها .. وفي هاليومين وايد تقاربو جنى وجود .. حتى ان جنى سهرت امس ويا جود في غرفتها واخر شئ نامت عندها وهالشئ كان يحرق ساره اكثر واكثر في غرفة ساره ساره قاعده تفكر وتخطط للسفر .. من يوم ما ابوها قال لهم انهم بيروحون واهي حدها مستانسه .. العطله ماباقي عليها شئ كلها اسبوعين ! واكثر شئ حلو في السالفه ان محمد بيكون وياهم واهي تفكر طرى على بالها انها تتصل فيه وتشوف شلونه .. دقت على رقمه وتم يرن يرن ومحد شاله على الطرف الثاني .. محمد كان يشوف الرقم ويتافف مايبي يشيله ! وتم ينطره لي ما يسكت .. اهو مايعرف من وين حصلت هالبنيه رقمه او شتبي ؟ حاول يعرف من اهي وتم يسايرها بس بدون فايده .. وبينه وبين نفس قرر ان يخليها تولي محمد مثل ما قلنه عمره 22 مخلص الجامعه .. وايد حلو ووسيم .. بشرته حنطاويه شعره اسود وعيونه سود ووساع .. ووايد طويل واللي يميزه الغمازتين اللي في خدوده وخصوصا لين يضحك يبينون ووايد حلوين .. الكل كان يضرب المثل بجمال محمد .. ومعروف بين البنات من حلاته .. وعمره ما حاول ان يكلم بنيه .. كله البنات اهمه اللي يتصلون فيه .. اللي يشوفه يحس بأن فيه شئ غريب .. نظراته كانت حاده وتخترق الواحد و لين يطالع يطيح القلوب بدون اي مقدمات ومحمد كان عارف انه مب هين .. فكان شوي مغرور وشايف بحاله .. وشخصيته وايد قويه .. وكلمته وحده ماتنرد .. وله احترامه بين الناس والكل يحط له اعتبار .. فوق كل ذي انسان ذكي وطموح فماتنلام ساره يوم حبته ! حتى جنى لين تفكر انها بتعرس في يوم .. دايما تتخيل واحد مثل محمد لو ماكان محمد ! بس الخيال شئ والواقع شئ ثاني في بيت بو ناصر .. ناصر كان يحاول ان يتقرب من اخته جود ويكسر الحاجز اللي بينهم وماكان عرف شيسوي .. فقرر ان يعزمهم الليله كلهم على العشى .. طبعا بس البنات .. وركب الصاله ولقاهم كلهم قاعدين ناصر : السلام عليكم الكل : وعليكم السلام ناصر : اقول .. شاريكم الليله نطلع على العشى انه عازمكم كلكم ساره : هههههه شعندك مو من عوايدك ! ناصر : سكتي ترى بهون الحين جنى : لا لا كل شئ ولاتهون تعال بعطيك بوسة شكر ناصر : لا مشكورة خليها لج بس ابيكم ساعه 8 جاهزين مابيكم تتأخرون جود ساكته كالعاده ساره بحذر : زين نصوور ناصر واهو عاقد حياته : نصور في عينج .. اصغر عيالج انه ؟ ساره : اوبس سوري .. زين شيخ ناصر .. شرايك نقول حق محمد ومروه عشان انت ما تتملل بروحك ويا البنات ناصر اول شئ ما استحسن الفكره بس بعدين فكر اي صج على الأقل ما يعورون راسي بسوالف البنات ناصر واهو يدق رقم محمد : اوكي .. الحين بتصل باشوف محمد شيقول محمد : الوووووو .. السلام عليكم ناصر : وعليكم السلام ... محمد شلونك محمد : الحمدالله بخير وانت ؟ ناصر : الحمدالله .. بقول محمد الليله بنطلع مع خواتي على العشى ودك تيي ويانه ؟ محمد كان متردد بس فكر ان اهو ماعنده شئ الليله فبيروح وياهم محمد : اوكي صار .. وين بتروحون والساعه جم ؟ ناصر : انه حجزت في ليلو الساعه 8 بنكون هناك محمد : اوكيعيل .. مو مشكله يالله مع السلامه ناصر : باي ساره بأهتمام : هاا بيوون ؟ ناصر : اي بيون .. سمعو الحين الساعه 6 عندكم ساعتين روحو جهزو من الحين ناصر واهو يكلم جود : جود .. ليلو اوكي او تبين نروح مكان غير ؟ جود : عادي اي مكان انه ماعندي مشكله ناصر واهو يبتسم : اذا تبين مكان غير قولي .. الليله على شرفج جود واهي تبادله الابتسام : ماتقصر مشكور الساعه 7 الكل كان مشغول يبدل ساره كانت مرتبشه .. وسوت شعرها كيرلي ولبست بنطلون جينز ويا توب ذهبي وفوقه جاكيت بني ولبست وياه حزام بني وسلاسل ذهبيين .. وحطت ميك اب بنفس الالوان جنى الوحيده اللي تلبس شيله .. فكانت لابسه دفه وشيله اما جود .. سوت شعرها ستشوار مع انه شعرها ناعم ومايحتاج بس سوته عشان تصير فيه حركه ونفخته شوي من فوق وخلت الباقي مفلول على جتفها لبست فستان اسود تحت الركبه ولبست فوقه جاكيت قصير اسود لامع يده قصيره .. ولبست تراجي ذهبيين كرستال .. ماحطت ميك اب وايد احتراما حق امها .. اصلا اهي كانت متردده بسالفة الطلعه بس مابغت تكسر قلب اخوها خصوصا بعد ماقال لها بأن الطلعه على شرفج كانت طالعه حدها حلوه واللي يشوفها يتخبل عليها من حلاتها كانت مغطيه على كل البنات وصلو الساعه 8 المطعم ومحمد ووياه مروه كانو ينطرونهم .. واهمه يمشون الكل كان يطالع جود كانت جذابه وجميله .. ناصر لاحظ نظرات الناس لجود وتضايق بس فضل ان يسكت ومايسوي سالفه .. وان بحاول مع مرور الايام ان يكلم جود عشان تلبس شيله .. مثل ما اقنع جنى من قبل ناصر واهو يسلم على محمد : ان شاء الله ما تأخرنا عليكم ؟ محمد : لا عادي تونا واصلين الكل قعد محمد : شلونكم بنات ؟ الكل بصوت متفاوت : الحمدالله طاولتهم انت فوضويه بعض الشئ .. البنات يسلفون ماعدى جود كانت مستحيه شوي .. ومحمد وناصر بعد يسولفون ويضحكون طلبو اكل وتمو ينطرون محمد يوم شاف جود بغى يموت .. كان يطالعها وحده ميت من حلاتها ! ماكان يقدر يشيل عينه من عليها .. شكثر هالبنيه حلوه وناعمه عمري ماشفت بنيه بحلاتها ! جود رفعت راسها وحست بنظرات محمد .. حدها تفشلت واستحت ونزلت راسها .. بس قلبها كان يدق بقوه لين عينها تلتقي بعينه .. عيونه وايد حلوين وونظراته تذبح ! ولين يضحك شكثر يكون حلو جود بطبعها ماتلتفت على الصبيان ولا في عمرها حبت او كلمت احد .. وكان صعب ان يعجبها احد .. بس محمد محد يقدر ينكر ان حلو وصل الاكل .. والكل كان ياكل ويسولف جود مع مرور الوقت قدرت تتأقلم ويا البنات وتمت تسولف شوي .. خصوصا ان مروه طلعت هبله وعلى نياتها وكلمه توديها وكلمه تييبها وساره .. كانت في عالم ثاني .. طول الوقت تحاول انها تلفت نظر محمد بس ماكانت تقدر ليش ان محمد طول الوقت باله مع جود .. واشوه ان ساره مالاحظت نظرت محمد لـجود .. لانه محمد مو سهل وكان يطالع من تحت لي تحت صج ان ساره وايد حلوه .. بس محمد عمره مافكر فيها بهالطريقه .. دايما يعتبرها ياهل وان اهي مثل اخته الساعه 11 كانو مخلصين العشى وكل واحد راد البيت في السياره .. ناصر : ان شاء الله استانستي جود جود : اي بصراحه وايد استانست .. غيرت جو وكنت محتاجه هالشئ ناصر : هذي اهم شئ جنى : اي خصوصا ان بنبتدي امتحانات هالاسبوع ساره : اففف لاتذكريني وتمو يسولفون لي ما وصلو البيت كان باقي اسبوع ونص على موعد السفر .. وهالسفره كانت هديه من بوناصر حق ام ناصر عشان يراضيها .. وعشان الكل يغير جو عقب كل هالسوالف اللي صارت في سياره محمد محمد كان يحاول يسحب حجي من مروة محمد : جود كبرج ؟ مروة : اظن بتدش الـ 20 جريب محمد : اي يعني في الجامعه مروة بدون اهتمام : اي اهي ويا جنى في الجامعه .. انه استثقلتها ذاك اليوم بس طلعت حبوبه محمد واهي يبتسم : اي يبين عليها جود كانت تحس بشئ غريب في قلبها .. اول ماوصلت البيت بدلت ثيابها وقطت روحها على السرير .. ويا محمد على بالها .. تذكرت نظراته وشلون كان يطالعها .. ابتسمت وحضنت المخده بنعومه .. وفي نفس الوقت حاولت انها ماتفكر فيه .. لانها ماتبي تدخل روحها في سوالف مالها آخر ونفس الاحساس كان عند ساره .. كانت حدها مستانسه .. وحاولت انها تتصل في محمد .. ومحمد بعد ماشاله .. انقهرت وسكرت تلفونها ورقدت هالاسبوع الكل بيكون مشغول بالأمتحانات .. وبعدها على طول بيسافرون تابعوني في الجزء السادس عشان نعرف شبيصير في هالسفره

شكرا حبايبي .. والحين ببتدي اكتب الجزء اليديد وبنزله اول ما اخلص منه بحاول انزله الليله ان شاء الله تحياتي

الجزء الرابع الساعه 8 .. وصلو الضيوف عايله ام محمد تتكون من .. محمد 22 مخلص جامعه ويشتغل في بنك ام محمد " حصه " اتصير اخت ام ناصر طبعا مروة .. 19 تدرس في الجامعه بو محمد متوفي صار له 5 سنوات بسبب السرطان الكل مشغول يسلم و يتكلم عقب تقريبا دقيقتين استقرت الاوضاع .. قعدو كلهم بس كان في توتر واضح .. ام محمد بتموت بس عشان اتعرف شسالفة جود ولجين وكانت طول الوقت تخز جود من فوق لي تحت وبصراحه نظراتها ماكانت اتطمن وجود حست بهالشئ .. ام ناصر لاحظت فضول اختها بس فضلت تسكت الحين وماتبطل السالفه وساره عينها تروح يمين وشمال كأنها تدور الشئ الوحيد اللي خلاها تستانس في هاليومين انها بتشوف محمد ! بس محمد وينه ؟ ماتشوفه ! حست بأحباط و حزن صج كان خاطرها تشوفه ساره كانت حدها متعدله عشان تلفت نظر محمد لبست ساره جينز وتوب بنفسجي شوي طويل ولبست وياه بلت وسلاسل .. وفلت شعرها ونفخته شويه .. وحطت ميك اب .. ساره جمالها ملفت بشرتها صافيه وبيضه وعيونها كبار وعسليين وشعرها نفس لون عيونها ملامحها وايد حلوه وماتحتاج انها تتعدل عشان تلفت النظر بس بعد كانت تبي تملك الجو ومحمد مايلاحظ احد غيرها .. خصوصا ان عندها منافسه وايد قويه في البيت ! طبعا عرفتوها ! "جود" جمال جود عكس ساره جود تتميز بالجمال العربي والملامح العربيه .. شعرها اسود ناعم وطويل .. بشرتها بيضه .. وعيونها وايد مميزين .. سود وساع على ناعسه شوي .. وايد جميله اللي يشوفها مايقدر يشيل عينه وهالشئ كان واحد من اكبر اسباب غيرة ساره .. لانها دوم كانت اهي تلفت النظر فحين جنى .. نقدر انقول انها حلوه بس مو مثل ساره صح يتشابهون بس جنى ملامحها هادية وطفوليه .. واللي يشوفها يقول حلوه .. بس مقارنه ابـ ساره .. بتترجح كفة الميزان لصالح ساره البنات كلهم كانو قاعدين يم بعض ساره ومروه يتكلمون وجنى وجود يتكلمون ويا بعض .. ساره كانت تهمس ويا مروة وتطالع جود ويضحكون .. جود حست بأنهم قاعدين يتكلمون عنها .. عورها قلبها بس سوت روحها ماتلاحظ ساره واهي تكلم مروة : محمد وينه ؟ مب وياكم ؟ مروة بأهتمام : اهو كان ويانه .. اظن راح يسلم على ناصر ! ساره براحة : ايي صح اكيد راح الميلس ساره كانت تنطر على نار وقلبها يدق واهي تشوف الباب .. وفعلا عقب اقل من 10 دقايق محمد كان عند الباب ووياه ناصر محمد سلم على خالته وراح صوب البنات محمد : السلام عليكم البنات : وعليكم السلام ساره كانت حدها مستانسه وتطالعه واهي تحس ان قلبها بيطلع من مكانه ساره بجرأه : محمد حياك اقعد ويانه محمد واهو يضحك : روحي ماقعد ويا يهال ناصر واهو يضحك : وعع سارو كله يفشلونج ! انه لو مكانج خشيت ويهي ساره صج زعلت .. وتمت تفكر ان محمد دايما يعاملها جنها ياهل ! ليش جذي ! شاسوي عشان اخليه يحبني ؟ اففف ياربي شاسوي محمد لفتت نظره جود .. كان يطالعها بأهتمام وللحظه حس بروحه وشال عينه .. جنى لاحظته ففكرت ان يمكن لانه مايعرفها جنى : محمد هذي اختي جود .. اهي اتصير .. محمد قاطعها : اي ادري بسالفه .. محمد التفت على جود : هلا جود شلونج ان شاءالله مرتاحه ؟ جود بأبتسامه : الحمدالله الله يسلمك وتمت عيون محمد للحظات عليها .. ساره لاحظت هالشئ وبغت تمووت من القهر .. اهي ماتبي محمد يطالع احد حتى لو كانت اختها في القسم الثاني من الصاله .. ام محمد ماقدرت تستحمل وفتحت السالفه ويا ام ناصر وابتدت تقول رايها وتتفلسف ام محمد : والله انه لو مكانج جان سوين واحد من الاثنين ! يا اني اخلي بو ناصر يولي .. او اني اخرب حياة بناته واخليهم يندمون لي ما من نفسهم يقولون مانبي نقعد ام ناصر بغضب : حصه الله يهديج .. لاتقولين هالكلام جدام الياهل ام ناصر واهي تكلم لجين اللي قاعده على ريلها : قومي يمه روحي عند خواتج اهني بتتمللين من سوالفنا مشت لجين والتفتت ام ناصر على اختها ام ناصر : حصه مهما يكون البنات مالهم ذنب ! مو كفايه انهم خسرو امهم .. وفي الاخير اهمه يصيرون اخوان عيالي مهما يكون ام محمد بسخريه : هذي انتي .. دايما جذي ولاعمرج ببتغيرين ام ناصر واهي حاز في خاطرها : الله سبحانه وتعالى .. مايرضى بالظلم .. نامي مظلومه بس لاتنامين ظالمه ! ام محمد واهي تغير السالفه : مريتي على امي ام ناصر : اي والله امس .. والحمدالله كانت بخير .. واليوم اتصلت فيها نرجع للقسم الثاني ناصر ومحمد مشو وراحو الميلس وتمو البنات قاعدين .. وعلى الساعه 10 تعشو والكل مشى راح البيت ام محمد ومروة في الدرب تمو يعقرون على جود وانها مو من مستواهم .. وشكثر ام ناصر مسكينه انها انحطت في هالموقف .. ومحمد كان يسوق لكن باله كان في شئ ثاني .. كان يفكر بجود ! وشكثر اهي حلوه وناعمه .. محمد اللي طول عمره مالتفت على البنات حس ان قلبه مال لها .. مع ان ماقعد وياها الا دقايق .. بس حسها انسانه طيبه وحساسه وكان يراقبها واهي تلاعب اختها الصغيره وتدلعها .. حسها حنونه ورقيقه ابتسم ابتسامه خفيفه .. جنه يعجبه التفكير فيها .. بس في النفس الوقت حاول انه يطرد هاالافكار من راسه عشان مايطيح في شئ اهو مو قده .. لانه محمد بعده يحس ان تو الناس على الحب والوهقه .. بس الحب لين بيي .. مايعرف الصغير او الكبير في بيت بو ناصر .. القنبله شوي وبتنفجر جود وجنى ولجين كانو قاعدين ويا بو ناصر وساره تطالعهم واهي متضايقه بو ناصر لاحظها : ساره شفيج زعلانه ؟ ساره : مافيني شئ يبه ساره ياتها فكره راحت قعدت عند ابوها وقالت له بدلع : يبه لحين انه اكثر وحده تحبها ؟ بوناصر بتردد : اااااه .. اي اكيد احبج وايد واحبكم كلكم ساره عقدت حواجبها : يبه ! اشوف كلامك تغير .. اي ماتنلام .. لعبو بمخك بعض الناس بو ناصر بحزم : ليش قالو لج ياهل عندج ؟؟ عيب هالاسلوب مابيج تستخدمينه وياي سامعه ساره بطلت عيونها على الأخر .. معقوله ؟ معقوله ابوها يكلمها جذي ! اول مره ! اهي دوم تتغشمر وياه وين المشكله ! اي اكييد مايبي يجرح ست الحسن والجمال .. بس مو مشكله دواها عندي عقب 10 دقايق قام بو ناصر .. انتهزت ساره الفرصه وقربت من جود ساره واهي تكلم جود : سمعي جود .. هاللاسلوب والالعاب ماتمشي علي فهمتي ؟ اذا تفكرين انج بتيين بيتنا وبتخربين وبتقلبين ابوي علينا انتي غلطانه جود واهي تقاطعها : بس من قال انا ساره قاطعتها بغضب : مابي اعرف انتي شنو .. بس ابيج تحطين في بيالج ان انتي ولا شئ .. لو ابوي صج كان يحبكم جان اعترف فيكم مو خشكم عن العالم جنه منحرج يعترف فيكم ! والغلط مو منه من امج اللي تلصقت فيه عشان فلوسه كلام ساره ضرب جود في الصميم .. جنها لعبت بيدها في الجرح اللي بعده ما برى وتوه يديد .. ترست عينها الدموع .. كل اللي قدرت اتقوله الله يسامحج وبصوت متقطع حست بغصه في تمنعها من الكلام .. يودت يد اختها ومشت غرفتها قعدت على السرير وتمت تصيح من القلب .. اصلا خلاص عيونها تعودو على الدموع مو شئ يديد عليها .. يودت صورة امها اللي محطوطه يم السرير .. ضمتها وتمت تصيح بقوه .. وتمت اتكلم الصورة جود : يمه ليش خليتيني ؟ انه لحين احتاجج .. يمه هديتيني ابروحي .. محد يبينه .. انه ضايعه بدونج لجين كانت تشوفها واهي مستغربه جربت منها وبكل براءة قالت لها لجين : ليش اتسيحين ؟ ماما راحت عند الله والحين عندنا ماما يديده جود شافت اختها بحسره .. سحبتها بالقوه وضمتها .. لجين ماتعرف شسالفه مخها ليحين مايستوعب كل هالاشيا جنى تمت اتعاتب ساره في الصاله .. بس ساره ماسوت لها سالفه ومشت عنها ساره كانت بتموت من القهر .. اولا ليش ان محمد ماعطاها ويه نفس ماتوقعت .. وليش ان جود دايما تسرق الجو والكل يتكلم عنها جنها ملاك .. تابعوني في الجزء الخامس

السلام عليكم شكرا حبايبي على ردودكم وان شاء الله الحين ببتدي اكتب الجزء الرابع وبنزله لي عوده

شكرا على كل اللي ردو علي .. وان شاء الله تعجبكم باقي الاجزاء الجزء الرابع راح احاول انزله اليوم

الجزء الثالث الساعه تشير لـ 10 الصبح ..اليوم الجمعه واهو يوم اجازه الوضع كان مو طبيعي في بيت بوناصر .. وبسهوله الواحد يحس بالتوتر الموجود .. بصعوبه فتحت جنى عيونها .. ماقدرت ترقد امس .. اصلا شكله محد قدر يرقد .. الافكار كانت توديها وتييبها .. كانت تفكر شلون بتعامل جود ؟ وخصوصا ان جود تقريبا في نفس عمرها .. وهالبنيه الحلوه الصغيره لجين ! شلون راح تتصرف وياها ! جنى من داخلها وايد طيبه لكن تخاف انها اذا عاملت جود ولجين بطريقه طيبه الباقي يحسون انها تخونهم خصوصاً امها ! ماكانت تعرف كانت محتاره .. اهي اصلا ماتعرف شخصية جود لحين .. يمكن اتكون طيبه ؟ يمكن ماتكون طيبه ! فقررت جنى انها اتحفظ في معاملتها معاها .. تشوف الاوضاع اول .. اخوانها شلون بيعاملونهم ؟ وامها شنو رايها ؟ خصوصا انهم ماقعدو يتكلمون ويا بعض بعد اللي صار .. الكل انعفس وانزوى بروحه ناصر .. وما ادراكم ما ناصر ! ناصر اطيب قلب في البيت .. بس ينخش ورا قناع القوه والغلظه .. لكن في الصج انه انسان حنون وحساس ويحب اهله .. كسرو خاطره جود و لجين .. وبدى يفكر ان اهو الحين اخوهم وان ماعندهم في الدنيا احد غيرهم .. وكان يحس بعاطفه نقدر انقول خفيفه جدا تجاهم .. بس نفس الشئء كان محتار شلون يتعامل وياهم ! صعبه وايد .. ان بعد 20 سنه يقولون لك ترا عندك اخت ! مهما يكون بياخذ له وقت عشان ناصر يحس ان تعود عليهم .. ماراح يحس بأنهم مثل جنى وساره ساره ماقدرت تنام .. كانت تحس بألم وحسره .. ساره وايد غيوره وخصوصا تجاه ابوها .. لانه ابوها دوم يدلعها ويخليها فوق الكل .. حتى جنى ماكانت تنافسها في ابوها بس في نفسها كانت اتفكر ان جود شكلها مب هينه .. وشكلها مب ناويه على خير .. وان راح تقلب ابوها وبتسوي مشاكل في البيت .. بس كالعاده ساره حطت خطتها واستعدت للمواجهه وياويل اللي يقرب صوبها .. في الصاله .. بو ناصر وام ناصر قاعدين والسكوت مخيم على الوضع .. كل واحد في يده فنجان الشاي ويشرب بهدوء .. بو ناصر يقرا الجريده .. وام ناصر سرحانه بو ناصر تكلم عشان يكسر السكوت : الا ناصر وينه ؟ مابيقوم انروح الصلاة ؟ ام ناصر : اظنه قاعد سمعت صوته .. لحظه باروح اشوفه ناصر واهو ينزل من الدري : مايحتاي كاني ييت ... صباح الخير بوناصر/ام ناصر : صباح النور ام ناصر : يالله تعال تريق .. تبي شاي ؟ ناصر : لا باقول حق الخدامه تسوي لي كوفي .. الا ويت جنى وساره ؟ وعقب شوي نزلو ساره وجنى وخذو اماكنهم على طاولة الاكل .. وقبل لا يبتدون بو ناصر سئلهم بوناصر : وين جود و لجين ؟ جنى وساره طالعو بعض جنى : في غرفتهم يبه بو ناصر : قومي ساره ناديهم خلهم ينزلون ساره بملل : ان شاء الله راحت ساره لي غرفة جود والباب كان مبطل شوي .. شافتها قاعده بس ياتها فكره عجيبه .. ليش اناديها وتعكر الجو علينا مانادتها ونزلت تحت .. بو ناصر : وينهم ؟ ساره : اممم .. طقيت الباب ردت علي من ورا الباب انها تعبانه وماتبي تنزل بو ناصر ماقال شئ بس كمل ريوقه وقام ويا ناصر عشان يلحقون على صلاة الجمعه جود كانت قاعده في الغرفه ويا اختها .. مستحيه انها تنزل او تطلع من الغرفه .. تحس انها غريبه على البيت .. مع ان اختها كانت يوعانه وتبي تاكل بس جود كانت تلاعبها عشان تنسى في الصاله جنى : يمه انه باروح بيت بسمه ساره : انا باروح وياها باقعد ويا شيخه ام ناصر : زين روحو بس ردو قبل الساعه 2 عشان تلحقون على الغدا جنى / ساره : ان شاء الله البيت فضى .. مابقت الا ام ناصر ويا الخدم والبنتين .. تمت قاعده تقريبا 20 دقيقه تفكر شتسوي ! واخر شئ تشجعت وراحت صوب غرفة جود طقت الباب بهدوء جود حست بخوف يوم شافت ام ناصر واقفه عند الباب .. وفكرت [ان اكيد يايه تتهاوش وياها وتلومها بس ام ناصر ابتدت بالسلام : السلام عليكم جود بتردد : وعليكم السلام ام ناصر ارسمت ابتسامه بسيطه وقعدت على الكرسي : جود بغيت اكلمج ممكن ؟ جود بحرص : اي .. ام ناصر خذت نفس عميق قبل لا تتكلم ام ناصر : اول الشئ الله يرحم امج .. والبقيه في راسج جود : شكرا خالتي ماتقصرين ام ناصر : يمه جود .. صج اللي صار كان اكبر مني وماتوقعته .. وصج ان انه امس مشيت وعصبت .. بس انتي ماشاء الله بنيه عوده واظنج تقدرين موقفي جود : اي خالتي من حقج تحسين باللي حسيتيه وانه اتفهم اصلا احنا مو المفروض انكون اهني ام ناصر : لا يا جود لاتقولين هلون .. هذي اللي الله كاتبه .. وانتو مهما يكون من العائله وعمر الدم مايصير ماي .. انه وايد زعلانه على بو ناصر مو عشان شئ .. بس عشانه خش عني طول هالسنين وجذب علي .. بس انتي واختج مالكم ذنب باللي صار جود وعيونها تبرق من الدموع : خالتي ماتدرين شكثر كلامج يريحني ! ام ناصر واهي اتحط يدها على يد جود : انا ادري اني مابقدر اعوضكم عن امكم اللي راحت .. بس صدقيني يا جود اني بحاول .. وباعتبرج مثل جنى وساره مافي فرق بينكم جود من سمعت هالكلام انفجرت من الصياح ماقدرت تيود روحها .. بدت تصيح من قلب .. تصيح بحرقه .. الألم اللي فيها محد يقدر يتخيله .. وطيبة ام ناصر عورت قلبها ازيد .. اهي لين ماتت امها ماحصلت حضن تبجي عليه .. ماحصلت احد يطمنها وياخذ بيدها .. مهما يكون اوبها ريال ومابيفهمها ام ناصر يودت جود وضمتها بقوه ومسحت على راسها ونزلت من عينها دموع غصب عليها .. وجود كل ما اتحس بقوة ضمة ام ناصر .. تصيح ازيد جنها ماصدقت احد يضمها وتفرغ اللي فيها من حزن وضيجه لجين كانت تشوفهم واهي مستغربه ! اصلا لجين محتاره ماتعرف اهمه شيسوون في هالبيت او وين امها ؟ وليش اختها اتصيح ؟ بس الزمن ابروحها كفايه ان يشرح كل شئ عقب دقايق شالت جود راسها من حظن ام ناصر ومسحت دموعها جود : خالتي .. مشكورة والله ماتعرفين شكثر انه مرتاحه ام ناصر تقاطعها : بس خلاص جود مابيج تحاتين شئ .. حتى اختج لجين انه باتحمل مسؤليتها مابيج تتحملين مسؤلية شئ انتي توج صغيره جود : مشكورة خالتي .. بصراحه لجين محتاجه أم وانه مو عارفه شلون اتصرف وياها ام ناصر سرحت باللجين .. شافتها الياهل اللي تمنته عقب ساره وماقدرت اتييبه بسبب مشاكل صحيه .. شكثر حلوه هالبنيه ويهها بريئ عيونها كبار وكل شئ فيها جنه رسم .. اصلا اللي يشوفها غصبا عليها يحبها ام ناصر : اقول جود .. وين شنطكم ؟ ماشفت امس عندكم شنط ؟ جود : اي خالتي اغراضنا كلها في البيت ابوي مارضى انشيل شئ .. بس شلنا اشياء بسيطه ام ناصر : زين لاتحاتين ان شاء الله اليوم العصر باروح وياج تيبين اللي تبينه ونروح السوق نشتري لكم كل اللي تحتاجونه جود : مشكوره خالتي ام ناصر : زين وغرفة لجين لازم انعدلها عشان تناسب سنها .. اليوم باتصل في المصمم ايي ويصممها .. وانتي بعد شوفي اللي تبينه وقولي له جود : ان شاء الله خالتي .. ام ناصر : زين يمه .. قومي نزلي وياي اكلو لكم شئ .. هالياهل من امس ماكلت شئ ونزلو تحت وحطت لهم ام ناصر سندويشات وعصاير خفيفه تسد اليوع لي وقت الغدا .. عقب حوالي ساعه وصلو جنى وساره .. واكبر صدمه يوم شافو جود قاعده تحت في الصاله ويا امهم جنى وساره: السلام عليكم الكل : وعليكم السلام في نفس الوقت وصلو ناصر و بو ناصر .. وبوناصر ارتاح يوم شاف جود قاعده تحت الوضع كان غريب .. وعلى الغدا .. الوضع كان شوي اهون من الريوق على الأقل ام ناصر كانت تسولف ويا العيال بس مطنشه بو ناصر طبعا عقب الغدا كل واحد راح غرفته .. وجنى لحقت جود عشان بتكلمها شوي جنى واهي واقفه على الباب : ممكن ادش جود وقلبها يدق : تفضلي جنى بأبتسامه رقيقه : بغيت اقولج .. انج اهني في بيتج ووسط هلج وخوانج جود الدنيا ماتشيلها من الوناسه .. شتبي اكثر من جذي مو كفايه رضى ام ناصر عليها ! والحين جنى ! يا رب الحمدالله على هالشئ ! جود خانها التعبير ماقدرت تنطق بس اكتفت بأبتسامه جنى حست انها ضاعت لان جود ماتحجت فحبت تكمل الحديث جنى : ما قلتي لي وين تدرسين ؟ جود : في الجامعه سنه ثانيه جنى : صج ! بس غريبه ماشفتج من قبل ! جود : انه كنت اشوفج بس طبعا ماكنت اقدر اكلمج جنى : يعني انتي كنتي اتعرفيني ؟ جود بنظره بريئه : ايي وكنت اتمنى ايي يوم اكون قريبه منكم .. لاني دوم كنت ابروحي ويا امي في اللبيت ولجين وايد صغيره جنى حن قلبها وابتسمت : الحمدالله اكا الله جمعنا ويا بعض وان شاء الله مايغير علينا وشوي شوي تمو يسولفون .. وخذو على بعض وشافو ان في وايد اشيا مشتركه بينهم و جود حست براحه الحمدالله الاوضاع في يوم واحد بس تعدلت ! ساره في غرفتها .. تتكلم كالعاده في التلفون ويا "محمد " للتذكير .. محمد يصير ولد خالة ساره .. اهي تحبه وتكلمه على اساس انها وحده اسمها فاطمه واهو مايدري .. محمد عمره 22 محمد : خير فطومه .. شفيج اليوم مو على بعضج ! ساره : مافيني شئ .. بس شوي تعبانه محمد : ماتشوفين شر .. ساره : محمد .. انته عمرك حبيت محمد : بصراحه لا ساره بأرتياح : احسن لك محمد : وانتي ؟ ساره : بصراحه اي محمد : حاسبي يا فاطمه ترى الشباب مالهم امان وهذي نصيحة اخو لاخته الصغيره ساره بدلع : يعني انته بعد مالك امان ؟ محمد بحزم : اي حتى انه .. فاطمه انه اكلمج او الله شاهد انج نفس اختي .. صج ماعرفح عدل لكن احس انج مثل اختي وابي انصحج عشان تنتبهين ساره تغير الموضوع : ماعلينا .. اليوم وين بتروح ؟ محمد : ماعندي فكره والله وعقب تقريبا ساعه صكت ساره التلفون وطلعت من الغرفه وفي الطريج .. مرت على غرفة جود والمفاجأه كانت ان جنى قاعده ويا جود ويضحكون ويسولفون ساره عصبت ماقدرت تيود روحها وبغضب نادت جنى ساره : جنى تعالي ! جنى واهي تضحك : انتي تعالي .. قعدي سولفي ويانا ساره بأستخفاف : انه ؟ ايي اقعد وياكم ؟ جنى : اي شفيها ؟ ساره : لا سمحي لي انه ماقعد ويا اي احد وانتي اتعرفيني وخصوصا ناس رازين ويهم ! جنى : عيب ساره شنو هالحجي ! جود : لا جنى .. خليها على راحتها ساره بغضب : اي غصبا عليج على راحتي ! ببيتنا ويداحرونه ! خوش شئ ! جنى : ساروو هدي شوي البنيه ماقالت شئ ! ساره : لا والله ! صرتي بصفها اشوف ! تدرين خلها تنفعج ومشت ساره والشرر في عيونها جنى : ساره لاتحطين في قلبج .. ساره طيبه بس تلقينها لي الحين مو متقبله الوضع جود : لا شدعوه .. انا فاهمه هالشئ وانه ما الومها خبر جود ولجين انتشر بسرعه وسط العايله .. سواء عايلة ام ناصر او عايلة بو ناصر لان في الاخير ام ناصر تصير بنت عم بو ناصر وشكثر اتصالات من الصبح بس عشان يتأكدون من الخبر وآخر اتصال كان من ام محمد .. اخت ام ناصر .. وخبرتها بأنهم بيوون اليوم كلهم على العشاا ام ناصر ماقدرت تودي جود السوق مثل ماوعدتها لانها انشغلت بالعزيمه .. بس وصت جنى وساره يروحون وياها ويشترون كل اللي يبونه طبعا ساره ماراحت .. وعلى الساعه 7 كانو شاريين ومخلصين وينطرون بيت ام محمد يوصلون يا ترى .. شبيصير خلال هالعزيمه ؟ وساره شنو موقفها يوم بتشوف محمد ؟ وشنو بيصير ويا جود ؟ وشنو سالفة جنى والمعرس ؟ تابعوني في الجزء الرابع

الجزء الثاني الكل انعفس ! شصاير ؟ ليش ابوهم ويهها جذي متغير ؟ وشنو هالسالفه المهمه اللي يبي ايقولها ؟؟ جنى : يمه ابوي شبيقول لنا ؟ ام ناصر : خبري خبرج .. خلنه ننطر ونشوف شعنده الكل كان ينطر .. الوقت يمر ببطئ .. بس اللي صج كانت قاعده على اعصابها كانت ام ناصر .. وعقب الدقايق الصعبه .. اخيرا سمعو صوت سيارة بو ناصر داشه البيت .. دش بوناصر البيت والشئ الغريب ان مو ياي ابروحه .. يايب وياه بنتين وحده تقريبا بعمر جنى والثانيه صغيره ! اول مره يشوفونهم ! من هالبنات ؟ وشسالفتهم بو ناصر لاحظ الحيره والاستغراب على الويوه فحب ان يبتدي في الموضوع على طول بو ناصر : السلام عليكم الكل بشرود : وعليكم السلام بو ناصر : دشو دشو يبه البيت بيتكم ام ناصر وابتسامه صفرا على ويها : بو ناصر من هالبنات ؟ بو ناصر : هذي الموضوع اللي بقولكم عنه بو ناصر يوجه كلامه للبنتين : جود .. لجين .. قعدو بو ناصر يكمل : سمعوني .. انا مابي اعطيكم مقدمات كلام ماله معنى .. انتو كلكم اتعرفون انا شكثر احبكم وخصوصا انتي يا ام ناصر .. انه اللي بقوله ماراح يكون شئ سهل عليكم .. لانه راح يغير حياتكم .. بس لازم تتفهمون .. هالبنات جود و لجين بناتي ! انه تزوجت امهم من سنين بس طلقتها قبل سنه والله يرحمها توفت من يومين .. وانه اليوم وصلني الخبر الكل منصدم ومبهت بو ناصر يكمل : ومهما يكون هذلين بناتي .. وماقدر اخليهم يعيشون عند احد غيري وانا موجود .. انه صح خشيت عنكم الموضوع بس الحين انجبرت اني اقول .. هالبنات خواتكم وراح يعيشون ويانا في البيت .. في احد عنده شئ بيقوله ؟ الكل كان ساكت ام ناصر ماقالت ولا كلمه .. بس مشت راحت غرفتها .. بو ناصر تم يناديها بس ما التفتت عليه التفت بو ناصر على باقي عياله .. لقى النظرات تختلف .. بين الزعلان وبين الحمقان .. وبين المستغرب و لجين كانت حدها خايفه ومتمسكه بأختها بقوه .. بس جود ابروحها كانت خايفه اكثر و قلبها يتقطع لجين عمرها 4 بتدش ال5 و جود عمرها 19 بتدش ال20 بو ناصر يوجه كلامه لجنى وساره : يبه اخذو خواتكم .. وقولو حق الخدم يعدلون لهم غرفه جنى بحزن : ان شاء الله يبه .. جنى توجه كلامها لجود : تعالي وياي ! جود يودت لجين ومشت ورا جنى .. جنها سجينه تنطر الحكم .. في كل خطوه كانت تتقطع .. قدرت اتعرف مشاعرهم .. ماحبوها ولا حبوا اختها .. اكيد راح يكرهونهم .. الله يعينهم .. مو كفايه امهم هدتهم ! في نفس الوقت .. ساره كانت واصله حدها .. حدها مطنقره على ابوها وتحس بكره غير طبيعي لجود ولجين .. خربوا حياتهم تدخلو في حياتهم ! ليش ابوي سوا جذي مابقى في الصاله غير ناصر و بو ناصر ناصر : يبه .. ليش سويت هلون ؟ بو ناصر بحزم : وانته من عطاك الحق انك اتحاسبني ؟ انه ماسويت شئ حرام انه تزوجت وكان من حقي ناصر : مسامحه يبه بس .. حرام عليك امي وايد اتحبك ماقصرت وياك بو ناصر : انه بعد احبها و اللي صار قبل سنين تقريبا قبل 20 سنه .. وكانت الظروف اقوى مني وكنت لازم اسوي هالشئ .. ولاتحاتي انه الحين اروح اكلمها وان شاء الله اقدر اطيب خاطرها مشى بوناصر لغرفة النوم عشان يكلم ام ناصر .. لقاها قاعده على الكرسي وتصيح بحرقه بو ناصر بهدوء : بس يا ام ناصر .. سمعيني انا راح اشرح لج كل شئ ام ناصر التفتت عليه : ليش هلون ؟ انه شسويت ؟ انه والله حبيت وانته استغفلتني طول هالسنين بو ناصر يقاطعها : لا لاتقولين هلون .. انه عمري ماقصرت وياج .. وحبيتج وعزيتج .. واللي صار كان غصب عني ام ناصر بسخريه : شلون غصب عنك ؟؟ بو ناصر : قبل 20 سنه .. ماظن تتذكرين واحد من ربعي توفى وانه كنت عنده في المستشفى قبل لا يتوفى ام ناصر : بصراحه مادري اذا اتذكر او لا ! بوناصر: اهوا وصاني على زوجته قال لي ان مالها احد في الدنيا يتيمه ومقطوعه .. واذا مات راح تضيع .. وفعلا مات رفيجي .. ورفيجي كان وايد فقير ماكان عنده شئ .. لا بيت ولا شئ مانو ساكنين ببيت ايجار .. فأنا كبدايه بديت ادفع إيجار بيتها .. واعطيها مصروف بسيط يكفيها طول الشهر .. واسئل عليها واذا كانت تحتاج شئ كانت تتصل فيني .. بو ناصر سكت شوي وخذ نفس عميق بو ناصر يكمل : المهم مرت الايام .. والمره كانت وايد محترمه وشريفه .. انا كنت اروح لها عندباب البيت اوصل لها الاغراض واعطيها فلوس بس لانها ساكنه بروحها وارمله الناس بدت تتحجى .. وحجي الناس زاد .. اتذكر اتصلت فيني واهي تصيح .. طلبت مني استر عليها وانها ماراح تطالبني بشئ بس انها تكون اسميا زوجتي .. انه احترت فكرت وايد كنت احبج وكنت مرتاح وياج .. وماكنت ابي اخسرج .. وفي نفس الوقت كانت مسكينه وكرامتي ماتسمح لي اني اتخلى عن وحده وانه كنت السبب في ان الناس يتحجون عليها .. فتزوجتها ام ناصر تقاطعه : بس خلاص .. مابي اسمع شئ بو ناصر : معليه .. من حقج تزعلين .. وانه اتأسف لج وان شاء الله اقدر اعوض اللي سويته طلع بو ناصر من الغرفه وشاف ساره بو ناصر : ساره .. عدلتو لهم غرفه ؟ ساره بغضب : مادري .. جنى اهي اللي راحت وياهم جنى دلت جود الغرفه ومشت عنها .. وكانت جود قاعده في الغرفه واختها تصيح في حضنها .. شافهم بو ناصر تقطع قلبه عليهم قرب منهم خذ لجين وحطاها على ريله بو ناصر : جود يبه .. هالبيت الحين بيتكم .. ابيج تاخذين راحتج .. واي شئ تحتاجينه انه موجود جود بحزن : يبه .. اخواني ماحبوني .. وحسيت ان مرتك تكرهني بو ناصر بحنيه : لا يا يبه .. جنى وساره وناصر وايد طيبين .. يمكن في البدايه بيكون كل شئ صعب .. بس انه متأكد انهم بيحبونج وبيعتبرونج نفس اختهم .. وام ناصر لا تحاتينها قلبها كبير ونفس الشئ يمكن في البدايه تحسين انها جافه وياج وهالشئ طبيعي بس شوي شوي بتشوفين كل شئ بيتعدل جود : اتمنى هالشئ .. انه وايد احبهم ومن زمان خاطري اشوفهم بو ناصر ابتسم : ادري .. اصلا انتي حبوبه وبسرعه تنحبين اكيد بيحبونج .. بس قولي لي مرتاحه في الغرفه ؟ جود : اي يبه وايد .. لاتحاتيني غرفة جود كانت عباره عن غرفتين تفصل بينهم صاله صغيره .. كانت وايد مناسبه .. لانه لجين مو متعوده تكون بروحها فتقدر تبطل الباب في الليل عشان ماتخاف اختها الصغيره بس جود كانت وايد حزينه .. وقلبها يعورها .. امها توفت من يومين وخلتهم ابروحهم .. واختها الصغيره وايد مقطعه قلبها انحرمت من امها واهي توها 4 سنوات حرام ما شبعت منها مع هالتطورات البيت كان وايد منعفس .. ناصر مشى طلع بره ماقدر يستحمل الضغط اللي في البيت .. وجنى دشت غرفتها تمت تصيح ماتدري ليش .. على امها ؟ او على اللي سواه ابوها ! ماتدري بالظبط بس كانت تحس بيضجه وساره .. كانت منقهره وواصله حدها .. واكثر شئ منقهره على جود ولجين .. اتحس انهم بيخربون حياتهم ام ناصر .. مهما يكون اهي ام .. صج انها تحس بالخداع بس بعد البنات عورو قلبها وعقب تفكير طول الليل .. قررت انها تدوس على نفسها وماتفكر في روحها مهما يكون هذلين بنات انحرمو من امهم وايصيرون اخوان عيالها .. وخصوصا لجين كانت امعورا قلبها اكثر شئ .. واكثر من جذي اهي عاقل ولازم تسيطر على الوضع عشان تحمي بيتها وعيالها .. بس صج انها بتطنش بو ناصر في هالفتره عشان يحس بغلطته ويمكن انها ماتسامحه من قلبها كلش وبهذا القدر اكتفي اليوم .. ونلتقي باجر .. في الجزء الثالث .. وبنشوف شلون جود راح تتأقلم ؟ وشنو راح يصير ؟ وشنو سالفة ساره ؟ وجنى شنو راح تسوي ؟

السلام عليكم اعزائي القراء بعد غياب سنه تقريبا .. وبعد اكمال القصص السابقه يسعدني ان ارجع اليوم بقصه .. تمهلت كثيرا قبل ان ابدأ بها وقبل ان ابدأ في الكتابه احب ان اوضح بأن القصه غير مكتمله واني سأكتب الاجزاء واضعهم وفق ترتيب زمني .. وسأحاول قدر الامكان ان لا اتأخر عليكم احبائي واليوم اترككم مع الجزء الاول ودمتم سالمين احيانا .. نكون تائهين في حياتنا ..نكون هائمين على وجوهنا .. احيانا لانعرف معنى الامان .. لانشعر بالمكان او الزمان .. احينا نشعر بأن الزمن في سباق معنا .. والماضي ذهب وودعنا احيانا .. نتذكر ماضينا ونخاف من مستقبلنا .. ونرى الحاظر مظلم وضدنا .. والسواد يهيمن على ايامنا .. والغيوم تغطي احلامنا ولكن ! احياناً نشعر بطعم حلاوة الدنيا.. ونعيش اللحظه ونرسم البسمه على المحيا .. احيانا يكون العالم جميلاً.. ونوزع مشاعرنا على جميع حبيباً كان او صديقاً هذه هي الدنيا الجزء الأول كانت جنى قاعده في غرفتها متملله ماعندها شئ تسويه .. الحين ساعه 3 الصبح كانت تنطر الآذان عشان اتصلي وترقد في نفس البيت في غرفه ثانيه .. ساره كانت قاعده تتحجى همس في التلفون وفي بعض الاحيان تنطلق ضحكه قويه من غير قصد .. فتخاف وتروح تتأكد ان محد سمعها اما في الصاله الخارجيه فالجو كان شئ ثاني .. ناصر كان متيمع ويا ربعه ضحك وصراخ مجموعه يلعبون كوت .. ومجموعه بليارد .. ومجموعه بلاي ستيشن وفي غرفه النوم الرئيسيه كان بو ناصر يتقلب مو قادر يرقد من صوت الصراخ وباجر لازم يقوم من وقت .. ماقدر يستحمل وقرر ان ينزل ويكلم ناصر بو ناصر (يكلم روحه) : الله يهديك يا ناصر ماتفكر ورانا دوام ! واهو في الدرب يتحنده مر على غرفة ساره سمع اصوات ! لكن فكر ان يمكن ساره وجنى يتكلمون ويا بعض نزل الحديقه راح صوب الميلس طق الباب بهدوء ناصر واهو يطلع بره : هاا يبه ؟ خير شفيك قاعد ؟ بو ناصر : شفيني قاعد ؟ من الازعاج والفوضه اللي مسويهم .. يبه ماقلت لك لاتسهر اسهر بس راعنا شوي .. خفف الازعاج نبي نرقد ناصر واهو حده متفشل : ان شاء الله يبه مسامحه ومرت الليله على خير .. الحين راح اوضح الشخصيات واعرف عنهم والباقي بتعرفونه خلال القصه .. عايلة بو ناصر تتكون من ام ناصر : ربة بيت .. عمرها 40 شخصيتها وايد قويه .. وايد تهتم بنفسها وفي نفس الوقت مو مقصره على بيتها بو ناصر : وايد حنوون ويحب عياله ويبين لهم هالشئ وفي نفس الوقت .. انسان مشغول , عنده عقارات و مشاريع ومحلات وفوق كل ذي شركه للأستشارات القانونيه والتجاريه في نفس الوقت جنى : 20 سنه تدرس في الجامعه سنه ثالثه تخصصها محاسبه ..جميله وايد وهادئه ورقيقه و طيبه .. بس هالطيبه بتطيحها في وايد مشاكل ناصر : 23 مخلص الجامعه ويساعد ابوه في اشغاله .. شخصيته وايد غريبه وراح اتشوفون هالشئ خلال القصه ساره : 18 سنه اخر سنه مدرسه .. اهي عكس جنى وايد جريئه .. حلوه وهذي الشئ بعد مو في صالحها وراح اتعرفون ليش صباح يوم الخميس الكل نزل غرفة الاكل وكل واحد امبوز ويحس بصداع .. خذو اماكنهم على الطاوله و ابتدت ام ناصر اسطوانتها ام ناصر واهي تحرك القفشه : اييي انا قلت لكم لاتسهرون السهر مب زين ! محد يسمعني .. جنى شوفي تحت عينج شلوون من السهر رحمي نفسج شوي جنى واهي تقوم : ان شاء الله يمه بو ناصر : وين يبه ؟ قعدي تريقي عدل جنى : شبعت يبه .. لازم الحق على المحاظره خصوصا اني بامر على بسمه جنى للكل : مع السلامه الكل : مع السلامه مشت جنى و الباقي للحين يتريقون ام ناصر : بو ناصر باروح السوق اليوم .. عندي جم شغله باشتريها بو ناصر : روحي .. عندج بيزات ؟ ام ناصر : اي اي الحمدالله بو ناصر واهو يطلع فلوس من بوكه : اخذي ذيلين يمكن تحاتجين ماتدرين ام ناصر ترد يده : شدعوه ! عندي البطايق لاتخاف ساره واهي تضحك : لا تتعازمون اذا ماتبونهم عطوني ناصر : وانتي ماتشبعين .. كله عطوني عطوني ساره واهي مطنقره : اووه انت شعليك .. حلال ابوي وخيره بو ناصر واهو يضحك : هاج يودي .. كفايه ولا بعد ؟ ساره واهي تبوس راس ابوها : لا كفايه مشكور يبه ساره واهي تفتر على ناصر : انته موت حرره ناصر : روحي مالي بارض ترى بو ناصر واهو يوقف : يالله ساره قومي اوصلج المدرسه لازم اروح الشركه ناصر : يبه انه بايي عقب الساعه 10 بو ناصر : ليش شعندك ناصر : باروح اراجع الجامعه .. اكمل اوراق التخرج ومشى كل واحد على شغله ومدرسته جنى في السياره ويا رفيجتها بسمه جنى : اليوم الجو وايد حلو .. احب الشتا انه بسمه : اي بس برررد وتمو البنات يسولفون لي ما وصلو الجامعه جنى وبسمه ربع من زماان .. جنى وايد تعز بسمه وتعتبرها اقرب الناس لها ساره كانت قاعده في الصف تسولف ويا رفيجتها شيخه .. وشيخه تصير اخت بسمه شيخه : امس لي ساعه جم اتكلمين في التلفون ؟ ساره واهي تضحك : لي 5 شيخه واهي مبطله عيونها : يعني مارقدتي ساره : لاا شيخه بأهتمام : سارو الحين انتي صج اتحبين محمد ؟ ساره واهي تطالع فوق وتتنهد : ايي احبه وجان زين يدري شيخه : انزين اهو ماطاح من عينج يوم شفتيه واصل الكلام وياج ؟ ساره : لااا اهو وايد ثقيل .. ويزعم يعتبرني نفس اخته الصغيره وينصحني شيخه : انزين ماتخافين اذا درى انج ساره بنت خالته ؟ ساره : شلون بيدري ؟ هذي الرقم محد يعرفه .. ومحمد مايعرف صوتي في التلفون شيخه : بس انه احس بتصير سالفه حاسبي ساره واهي توقف : اوووه فال الله ولا فالج .. شيخوو احبه مجبورة اسوي هلون .. انه راضيه اني اكلمه جذي على اني ماكلمه كلش شيخه : اششش اكا معلمه دشت سكتي لاتطردنا نفس ذيج المره ! ساره بهمس : احسن ! اصلا ملل حصة العربي في السوق ام ناصر ويا اختها دانه يتسوقون ام ناصر : امي شلونها ؟ صارت احسن وعليه صار لي يومين ماشفتها ماصار عندي وقت امر عليها دانه : امي بخير بس امس شويه تعبت عطيناها الادويه هددت شوي .. لين وصلتيني نزلي سلمي عليها ام ناصر : اي اكيد انه فكرت جذي بعد في الشركه ناصر دش مكتبه .. ولحقته السكيرتيره عشان تعطيه جدول الاعمال .. واخر الاوراق السكرتيره ريما : استاذ ناصر .. وايد تأخرت كان المفروض ايكون عندنه اجتماع مع قسم المحاسبه الساعه 9:30 ناصر واهو يطالعها بحده : ريما ! اظن ان مو شغلج اذا تأخرت .. واظن ان قسم المحاسبه يقدر ينطر لي بعدين .. دوري اي وقت اليوم ونظمي الاجتماع ريما واهي تحس بغصه : ان شاء الله استاذ ناصر ناصر : تفضلي شوفي شغلج طلعت ريما وعيونها تبرق من الدموع .. ماتعرف يمكن اهي صج تدخلت بس ماكان قصدها .. ناصر وايد جاف وياها ! قعدت على مكتبها عشان ترد تحاول اتنظم الاجتماع وصلت ام ناصر اختها دانه البيت ونزلت اتسلم على امها ام ناصر واهي تبوس راس امها : ماتشوفين شر يمه .. ان شاء الله احسن اليده بصعوبه : الحمدالله .. شلون بناتي جنى و ساره ؟ وولدي ناصر ؟ ام ناصر : كلهم بخير لاتحاتين ان شاء الله بخليهم يمرون عليج اليده : ولهت عليهم وايد ام ناصر : اي يمه انه اقوللج تعالي قعدي عندي اريح لج انتي ماتيين ! على الاقل انا دايما في البيت والعيال حواليج .. وباييب لج ممرضه ! اليده : لا يا بنيتي .. اخوج او احتج المسكينه دانه وين يروحون ؟ ام ناصر : ما شاء الله البيت عود والخير وايد .. ودانه على راسي اتيي وياج .. واخوي حمد مارده بيعرس وبيقعد في هالبيت ماشالله ريال ! اليده : لا يا بنيتي ابيج تاخذين راحتج مابي اثقل عليج دانه : اي صح .. لاتحاتين امي في عيوني ام ناصر : على راحتكم بس لو ماشالكم المكان عيونا تشيلكم اليده : ادري يا بنيتي الساعه 2 في بيت بو ناصر الكل قاعد على الطاوله ينطرون بو ناصر عشان يتغدون .. وصل بو ناصر بس مامر على صاله الاكل شافته ام ناصر نادته : بو ناصر بو ناصر ! بس بو ناصر مر ولا جنه سمعها وركب فوق استغربو كلهم مو من عوايد ابوهم ايطنش احد ! ام ناصر واهي تكلم ناصر : ناصر صار شئ في الشركه اليوم ؟ ناصر بأستغراب : لااا ام ناصر واهي تقوم : عيل خلني اروح اشوف شفيه ! دشت ام ناصر الغرفه لقت بو ناصر منبطح على السرير حطت يدها على جتفه ام ناصر : بو ناصر ! خير فيك شئ ؟ بو ناصر بدون نفس : لا بس خليني تعبان بارقد ام ناصر بأستغراب : مريض ؟ بو ناصر واهو مطنقر : لااا قلت لج خليني ! ام ناصر قامت واهي حاز في نفسها .. اول مره ايكلمها بهالطريقه ! الحين اهي يايه تتطمن عليه ليش هلون يصدها ! زعلت ام ناصر ومشت الصاله جنى : يمه .. يمه ام ناصر جفلت : هاا ؟ خير ؟ جنى : شفيج يمه قحصتي ؟ ابوي شفيه ؟ ام ناصر : مافيه شئ حبيبتي بس تعبان شوي بيرقد بعدين بيتغدى .. انتو اكلو كملو الكل الاكل بس ام ناصر بالها مشغوول .. اتعرف ان ريلها في شئ شاغله .. عشرة 25 سنه شلون ماتعرف ! حوالي الساعه 5 بو ناصر نادى الكل ويمعهم في الصاله بو ناصر بجديه : سمعو اليوم لاحد يطلع من البيت ! ناصر : ليش يبه شصاير ؟ بو ناصر : اسمعني ولاتقاطعني .. انه الحين باطلع وبارد عقب ساعه جذي .. ابيكم كلكم متيمعين اهني في سالفه ابي اقولها لكم ومشى طلع من البيت .. الكل انعفس ! شصاير ؟ ليش ابوهم ويهها جذي متغير ؟ وشنو هالسالفه المهمه اللي يبي ايقولها ؟؟ نهاية الجزء الاول نطروني بعدين في الجزء الثاني انطر رايكم يالله

هايات انا اليوم كسرت هالقاعده دشينه اليوم الفود كورت وكالعاده مافي طاولات او في وعليها كتب سيده قلت حق ربعي .. يالله اختارو اي طاوله تعجبكم ! طالعوني جذيه قلت لهم اي شفيكم !؟ خلاص من تجوفون كتب شيلوها وقعدو وفعلا قعدنا وكلينا وسولفنا وضحكنا وصارت ساعتين او نص ولا ردو اصحاب الطاوله ؟! يعني مو ظلم بس الحمدالله عرفت الحين شلون اتصرف اذا ماحصلنا طاوله واتمنى من الكل هالشئ

مَاْجُورِيِنْ بِمِصَابْ سَيِدْ اَلْشُهَدَاءْ واَبِي عَبِدِالَلَهْ اَلْحُسَيْنَْ اَلْسَلَامْ عَلِيِكْ يَا اَبَا عَبِدِاَللَه اَلْسَلَامْ عَلِيِكْ يَا اَبَنْ أمِيِرْ اَلْمُومِنِيِن اَلْسَلَامْ عَلِيِكْ يَا اَبَنْ فَاطِمَةْ اَلْزَهْرَاْءْ اَلْسَلَامْ عَلِيِكْ يَا عَلِيِ اِيْنَ اَلْحُسَيْنْ اَلْسَلَامْ عَلِيِكْمْ يَا اَوْلَادْ اَلْحُسَيْنْ اَلْسَلَامْ عَلِيِكْمْ يَا خَوَاتْ اَلْحُسَيِنْ اَلْسَلَامْ عَلِيِكْمْ يَا اَصَحَابْ اَلْحُسَيِنْ وَ اَحِبَائِه ونَاصِرِيِهْ عَلِيْكُمْ مِنِي اَلْسَلَامْ اَجْمَعيِنْ اَبَدَا مَا بِقِيتْ وبٌقِي اَلْلْيْلْ وَ اَلْنَهَارْ يَا حُسِـ ــ ـ ـيْـ ــنْ فَلْنَصْرْخْ بِاِسِمِكْ يَا حَسَيِنْ يَا شَهِيِدْ كَربَلَاءْ يَا غَرِيِب كَرْبَلَاءْ

مطلوب ببغاء كاسيكو صغير جدا

بالعكس دكتور وايد زين تعامله ممتاز ومايحاسب وايد .. انا عطاني -A وزيدنا وايد .. لاتغيرينه خلج وياه

السلام عليكم ورحمة الله وبركاته قرائي الاعزاء والمخلصين .. شكرا على سعة صدركم وآسفه على التأخير .. انا يا الغاليين ماكان عندي نت لأن انتقلنا بيت يديد .. وبعدها سافرنا شهر ونص توني راده من جم يوم بصراحه ماتوقعتكم تنطروني لي الحين .. شكرا على تواصلكم وان شاء الله راح انزل لكم الاجزاء عما قريب