فقدت الفنانة البحرينية لطيفة المجرن «جناطها» في مطار الكويت مساء اول من امس اثناء عودتها الى بلدها البحرين بعد ان انتهت من تصوير مشاهدها في مسلسل «بقايا انين وندم»، حيث ان تلك الحقائب تحتوي على ملابسها الشخصية بالاضافة الى الهدايا التي اشترتها من اسواق الديرة للاهل والاقارب في البحرين.
«الأنباء» هاتفت الفنانة البحرينية لطيفة المجرن التي اكدت صحة الخبر وقالت: شكثر سافرت بس عمري ما تعرضت لمثل هالموقف اللي رفع ضغطي وخلاني احاجي نفسي لأنه بنفسي انا شايفة العامل الآسيوي حط «جناطي» على «السير» لوزنها بس ما طلعوا وما ادري شسالفتهم شنو «انشقت القاع وبلعتهم» ما ادري، وبعد طول انتظار كلمت المسؤول هناك وبلغته «جناطي» ماطلعوا قال سافري واحنا ان شاء الله راح ندورهم لج.
وبعدين شصار؟
سافرت بس قلتله قبل ما اروح عنه لا يكون هذا برنامج الكاميرا الخفية وتبون تعرفون ردة فعلي؟ جان يرد علي لا يبه لا كاميرا خفية ولا هم يحزنون.
طيب، جناطج فيها شغلات مهمة؟
اكيد، ملابسي الشخصية وهدايا شاريتهم حق الاهل والاقارب والاصدقاء من اسواق الكويت والحمد لله اني خلصت تصوير مسلسلي لأنه في «جنطة» خاصة بالاكسسوارات اللي احتاجها بالمسلسل، بس راحت بعد ما خلصت تصوير.
ما اتصلوا عليج المسؤولين بالمطار؟
لا والله، وانا بعد ما وصلت للبحرين رحت جيكت على «الجناط» الموجودين بس ما لقيت «جناطي» وانه ناطرتهم على احر من الجمر.
http://www.alanba.com.kw/AbsoluteNMNEW/templates/last2010.aspx?articleid=113603&zoneid=29&m=0