OMAR 10

اجابات امتحان ريـــ 216 ـــض (التفاضل) (1/2) = 0.5 << نص >> (1) أ. (5/8) × (5) أس (3/2) ب. (5/2) (2) متصلة حيث د(2) = 5 غـــــا د(س) = 5 (3) ك = (-7 / 16) (4) المشتقة الأولى = ( -3 / 2 ) (5) (دص / دع) = (12 / 5) (6) اثبات ما اعرف شلون اكتبه اهوه اول شي تشتق المعادلة الأولى لين توصل حق ( دص / دس ) = ..................................... بعدين تعوض عن ( دص / دس ) في الجزء الأيمن من المعادلة الثانية بعدين تختصر وطلع عامل مشترك لين توصل حق - ( الجزء الأيمن من المعادلة الأولى ) + 5 تعوض عن الجزء الأيمن من المعادلة الأولى بــ (5) يصير -5+5 اللي = 0 و . هـ . م (7) النقط هي ( 6 ، 0 ) + ( -4 ، -20/3 ) (8) ع = 3/4 م/ث هذي اجوبتي مع تمنياتي لكم بالتوفيق أخوكم: OMAR 10

قوة شباب شخباركم ههههه التفاضل أول ما يودت الامتحان قلت بل الامتحان حده صعب بعدين تركدت وقريت الامتحان بتأني سؤال سؤال وعلى سعة فكرت في الاجوبة وحليت الامتحان كامل ************************************************** <<< لازم تعرف تتصرف مع ورقة الامتحان >>> وأهم شي انك ما تحط في بالك من البداية ان الامتحان صعب لأنك حطيت لك حاجز -يمكن يكون وهمي- وعقب ما تقدر تتخطاه أظن ان هذي الطريقة الانسب للتعامل مع ورقة الامتحان ************************************************ امتحان طويل صج ويبيله وقت طويل تفكر فيه ويخربط شوي ما اقول الامتحان سهل الامتحان كان صج صعب بس مو واااااااايد يعني بتأني ينحل انه داش الامتحان بـ 50 جنه 50 والله ماتذكر وان شاء الله بحصل على ................. لا محد بيصدق الكل يقول صعب وانه اقول ............. انه متأكد من كل اجاباتي وتقريبا << اتحدى المصحح يطلع لي غلط >> ما شاء الله لا اله الا الله علي عين الحسود فيها عود ان شاء الله 100 في التفاضل وان شاء الكل يحصلون علامة عدلة واللي يبي الأجوبة آنه ماعندي مانع <<< متأكد منهم >>> إذا مو 100% 99% قل هو الله أحد ..................... قل أعوذ برب الفلق ................ قل أعوذ برب الناس ................. <<< خايف من الحسد >>> أخوكم OMAR 10 بالتوفيق للجميع

أخوي نبض المشاعر عن السؤال 30 (ضع دائرة) انه قلت لك ان الجواب جـ ابي اعرف ليش ما كتبته شكله راسك يابس موما تثق في جوابي ( لا ويقول ما كنت متفاهم وياه ) لأنك انت ماكنت راضي تفهمني بس يله الاختبار راح وفكر في اللي ياي تفاضل والله يوفق الجميع

السلام عليكم قوة شباب صراحة امتحان الحيا 314 سههههههههههههههههههههههل كله اختيارات (ضع دائرة) وأنت ماشي صدقتي أختي (البنــــــــــدري) حلاته آخر امتحان انه كنت خايف من المقرر بس أول ما حصلت أوراق المتحان قعدت اضحك وان شاء الله في بقية المواد بعد نحل عدل وعن الغش كان على بيزة بس المراقب كان ساعات يسوي روحه شديد مصخره وأخوي نبض المشاعر اليوم كان بعيد عني مب وايد بس كان وراي وانه ما عرف اتكلم مع واحد وراي وسط الامتحان صعبه شوي بس ما أظن انه في واحد في لجنتنه كتب غير عن الثاني إلا في سؤالين يمكن ما أظن أكثر ومسامحة أخوي نبض المشاعر اذا ما عطيتك ويه بس انه متأكد انك حليت زين وانه اللي قدرت عليه قلته لك وعلمتك في جم سؤال بس يله أنه ان شاء الله إذا مو علامة كاملة 34 من 35 وأخوي نبض المشاعر: ما ادري وين رحت عقب الامتحان وين شردت ؟ شكلك زعلان علي وااااايد ؟ مساااااااااااااااااااااااااااااااااااااااااااااااامحة والله (جدام كل الأعضاء استسمح منك) ان شاء في الختبارات الياية وشكرا أخوكم: OMAR 10

مسامحة أخوي نبض المشاعر ولا تخلي أشياء سخيفة تفرق بينه احنه ربع ومتفاهمين في كل شي أخوي المظلوم الله يشافيك وان شاء الله تييب درجة زينه في العرب وفي كل الامتحانات ولا تنسى تدرس زين حق الحيا اما عن اللي قدمو انس الله يعينكم وان شاء الله بتعوضون في الامتحانات الياية وعن اللي قدموا كيم 212 يقولون انه كان سهل مستوى عادي وان شاء الله تيبون فيه علامة زينة وتعوضون عن ريض 213 ودرسوا عدل حق حيا222 الامتحان اللي يانه العام كان واااايد سهل وان شاء الله ييكم مثله وعن اللي قدموا دين 101 صراحة دين 101 كل سنة ايي سهل واااايد وان شاء الله اييكم امتحان الانج 101 باجر سهل ومسامحة حق كل اللي في التجاري لأني ما أرد عليهم وايد لأني ما عرف واااايد عن التجاري تصدق أخوي نبض المشاعر حتى انه وايد اكتب طالعين على بعض (مال صف 5 علم 1) شكلك حصلت لك واحد يشتغل صحفي معاك مسامحة وايد طولت أخوكم: OMAR 10

قوة ناشئين قصدي شباب (كله من سخافة نبض المشاعر) طبعا اخوي نبض المشاعر ما قصر في الامتحان لعبنه خذ وهات (ون تو) غير العرضيات الطويلة صراحة كنت انه وايد العب باسات طويلة لأن أخوي نبض المشاعر كان وايد بعيد عني لكن اشوه ان باساتي كانت توصل (شدعوه نلعب في النادي مو نقدم امتحان) (صج النادي الشرقي يمنه) بس صج اللجنة انقلبت سوق سمج وانه اايد كلامك اخوي نبض المشاعر بس عاد انت تبي تطلع يازعم تعرف كل شي شدعوة انت ما سألتني بعد الحمد لله راح بو اربع ساعلت وارتحنه مع انه باقي واحد بس ان شاء الله يكون سهل وتسلم اخوي نبض المشاعر وإن شاء الله نكون في لجنة وحدة الامتحان الياي

اليوم قدمت عرب 202 الامتحان كان في حدود المعقول يعني في أسئلة صعبة وفي أسئلة سهلة لكن أنه حليته كله ورفعنه في اللجنة شعار (ربعٍ تعاونو ما ذلو) لأن صراحة كنه خايفين من العرب يقولون مقرر صعب وأستاذنا ما يعرف يشرح حده حق ابتدائي بس بصراحة أبدعنه في الامتحان وقدمنه كل درجات الابداع حتى مال الذاتي والمنازل اللي ويانه بينجحون عدل لو غلط أخوي نبض المشاعر ؟ أنه ونبض المشاعر كنه في نفس اللجنه وشكرا

تسلمين أختي على مرورج الطيب وشاكر لج ابداء رأيج وانا اايدج في ان الشباب في هذي المرحلة دائما ما يعظمون كل شي ويعتبرون مشاكله بدون حل اتمنى ان اهمه يوعون حق انفسهم وشكرا على مرورج

تسلمين أختي عالية الشان على الأجوبة بس يمكن أختلف معاج في السؤال السادس (النرد) أنا حليت السؤال 3 مرات كل مرة يطلع لي الجواب 0.33 يعني 1/3 (ثلث) لأن احتمل عدد فرددي = 3/6 واحتمال عدد أول من الثلاثة الفردي = 2/3 3/6 * 2/3 = 1/3 وعن السؤال التاسع: ما اقول إلا ليس كل ما يقرأه المرء يفهمه ................ يأتي الامتحان بما لا تحتوي الكتب وشكرا

[/size]توجيهي , علمي مدرسة الرفاع الشرقي الثانوية معدلي 93.2 في صف نبض المشاعر صدقت أخوي نبض المشاعر صفنه أحسن صف في العلمي لا وفي المدرسة بعد تخيلوا صف كلهم قلوبهم على بعض وكلمتهم وحدة يتعاونون على الحلوة والمرة غير الصداقة القوية اللي بينه <محد يقدر يفرق بينه> معذبين الاستاذية لا وتعال في الفسحة وفي الخمس دقايق <روعة> لا وأحنه بعد أشطر وأذكى صف وأنا ونبض المشاعر مسويين ثنائي في وايد اشيه ثنائي متفاهم حده أحسن صف طبيته في حياتي وصج والله الدراسة معركة عودة وان شاء الله بنعلن النصر للمرة الخامسة <الفصل الخامس> صدقتي صراحة وأنا أقول العلمي يخلي مخك يشتغل عدل وما يصير فيه قوطي أناناس حلي لا وبعد يخليك بو حديد من كثر ما تشيل الكتب رايح وراد من المدرسة خخخخ بس يله احنه آخر سنة ونفتك والله يوفقنه ونرفع المعدل أو ان نثبته ما ينزل

كل اللي قدموا ريـــ 213 ـــــــض الله يعينكم سمعت انه كان وايد صعب انه قدمت ريــــ 215 ـــــــض الاحتمال صراحة كان مستوى زفت(صعب وطويل) ومو قد الوقت لا والسؤال التاسع عجييييييييييييييييييييب (طل) ألفت فيه مقرر يديد يعني لازم يييبون سؤال حده صعب محد يحله وإلا ما يستانسون انه حليت جذي الحمد لله ZoZo 88 اليوم قدمت ريض 215 كان سهل بس السؤال التاسع و الرابع و لو سمحتون اذا احد متاكد من اجاباته و يقدر يكتب لنا الاجابات النهائية

قوه اختي ريف العين مسامحة احنه ما قصدنه انه اللي أعمارهم 14 مب شباب ولا ان اهمه ما يصلحون كلش حق البرلمان بس ان اللي فوق 18 اهمه يمتلكون الكفاءة ومثل ما يقولون حاكتهم الدنيا حك واللي أكبر منك بيوم أفهم منك بسنة واحنه ما قلنه اللي اعماره 14 و 15 ما نبيهم يدخلون البرلمان بالعكس احنه نتمنى لكم (بين 14 و 16 سنة) كل خير ونتمنى انكم تستفيدون من البرلمان وتحصلون على الخبرة ومثل ما قلت من قبل (إذا الواحد ما تعلم من الحين، بيتم طول عمره ما يعرف شي، والعلم في الصغر كالنقش على الحجر واحنه كل اللي قصدناه ان الدراسة النظرية شي والتطبيق العملي شي ثاني كلش يعني اللي من 14 إلى 18 للحين يحصلون صعوبة في التطبيق العملي للمهارات الحياتية، ولطرق حل المشاكل وطرق التفكير وصعبة الواحد يطبق كل اللي يعرفه (طبعا كلامي على وجه الأغلب مو الكل) يعني مو الكل ما يقدرون ويجدون صعوبة في التطبيق العملي لا في ناس صراحة اهمه أفضل من اللي اعمارهم 25 و 30 وانه شخصيا اعرف ناس ينوزنون بالذهب يفيدونك في اشيه وايد لكن تعال حق اعمارهم ما تتجاوز 22 أو 23 يعني في حدود 17 23 ومسامحة يا ريف العين واتمنى لج مشاركة فعالة في البرلمان اللي اهوه حق الشباب من 14 إلى 18 وسامحينه ولا تحطين في خاطرج ومشكووووووورة على مشاركتج

أختي بحرينية فن5 انه راح ابدي وجهه نظري يمكن تعجب رفيجتج ويمكن لا لأن الحب بلووووووه أول شي لازم تحط في بالهه أن اهيه قاعدة تفكر في مسألة الزواج (واهيه لابسة كبوس أحمر) يعني من ناحية عاطفية بس يعني اهيه قاعدة تدوس على كل شي وحاطه في نظرهه العواطف بس **انه راح اعطيج التفكير الشامل (والله أخاف أطول عليج، بس عذريني ودي أساعدج وأساعد رفيجتج) أول شي (ألبس الكبوس الأصفر) = التفكير المحايد يعني نصف كل المعلومات اللي عندنه * حالته المادية ضعيفة ** طالع من اعدادي *** أكبر منهه بـ 6 سنوات ثالي شي (ألبس الكبوس الأحمر) = التفكير العاطفي يعني العاطفة نحو الشخص * اتحبه وايد وما تقدر تستغني عنه ** ما تتصور ان تكلم غيره *** عمرها ما حبت غيره ثالث شي (ألبس الكبوس الأسود) = التفكير المتشائم * شغلته (إذا كان يشتغل آنه ما أدري) يمكن تكون ضعيفة ** يعني راتب ضعيف *** يعني صعوبة الحياة الزوجية (هالأيام اللي راتبه زوين ما يقدر يعيش، كله قروض شلون اللي راتبه ضعيف) رابع شي (ألبس الكبوس الأبيض) = التفكير المتفائل * ممكن اهيهه تدرس وتشتغل وتصرف على البيت ** ممكن تحاول مع اهلهه يمكن يوافقون خامس شي (ألبس الكبوس الأزرق) = التفكير المنطقي * صعوبة الأمر (المرأة تصرف على الرجل) ** صعوبة استمرار الزواج إذا كان الأهل غير راضيين *** امكانية حدوث الزواج بايجاد حل للوضع المادي **** يحاول يكمل ثانوي عشان يحصل له شغله حليوة آخر شي (ألبس الكبوس الأخضر) = التفكير الإبداعي * تكلم أهلهه يمكن يتعاطفون معاه ويقبلون ** تحاول تخترع سالفه (اهيه وياه) يقبلونهه الأهل بحيث تبرر وضعه مسامحة على الإطالة وهذي اللي طلع معاي وخلهه تحاول تطبق طرق التفكير هذي بحيث ان اهيه تدوس على كل الجوانب وتفكر في جانب واحد أدري شي وايد صعب لكنه واااااايد مفييييييييييييييد وإذا عندج اي استفسار ممكن نتواصل حتى على المسنجر

تسلم أخوي حمبوووف صراحة كلامك صح وأخيرا حصلت واحد يفهم موضوعي صح لأني حطيته في 3 منتديات وما قاعد أحصل الرد اللي ابيه لكنك صراحة (ما عرف شاقول اختفت الكلمات) هذي اهيه المشاكل اللي تمس الشباب بروحهم وكل المشاكل اللي انقالت تمس الشباب وكذلك المجتمع مثل ما قلت كنت أدور واحد يقول أبوي ما يفهمني !!! ما اعرف اتفاهم مع امي وابوي؟؟؟؟ شلون اخلي ابوي ما (يستحمق) علي؟؟؟ ليش الدراسة صعبة؟؟؟؟ لكنك أخوي حمبوووف ما قصرت كفيت ووفيت تسلم والله وأتمنى من كل واحد أنه يحط المشاكل حتى لو كانت مكررة أبي أحصل على نسبة حق كل مشكلة

تسلمين أختي ريف العين وعن مكالمة البنات للشباب أو الشباب للبنات هذي بعد مشكلة عوده لأنهه الخطوة الأولى للفساد ولـ...................(كلكم عارفين) والعياذ بالله لكن من يتعظ ومن يعتبر ؟؟؟؟؟؟؟؟؟؟؟؟؟ ومن يتعلم الدرس عدل ؟؟؟؟؟؟؟؟؟؟؟؟ الله يهديييييييييييييييييييهم

تسلم أخوي نبض المشاعر على طرحك لهذا الموضوع أنه صراحة من المؤييدين لفكرة برلمان الشباب بس عندي اعتراض على السن ( يعني بين 14 و 18 ) وما أطول وبحاول اتكلم بسرعة * ردا على (قلب حساس): تسلمين أختي على المشاركة لكن من وجهة نظري(وأرجو تسمحين لي وبدون زعل لأن لكل واحد وجهة نظر): يمكن يكون صعب على الفئة المشاركة في البرلمان (برلمان الشباب) أنهم يحلون كل مشاكل الشباب لأن الكبار ما قامو بحل المشاكل شلون بيقدرون اللي أصغر منهم، ولو حلو مشكلة أو مشكلتين يعتبر هذي انجاز (وكون الشباب للحين ما يعرفون شي)، أول شي البرلمان حق اللي بين 14 و 18 سنة يعني مو كل الشباب وانتي شذي ظلمتي الشباب فوق 18 سنة، وثاني شي أنه في ناس من هذي الفئة يقدرون يتكلمون ويتحركون حق مصالح الشباب وهذي اللي راح يبين في البرلمان، وثالث شي إذا اهمه صج ما يعرفون شي (وأنا اقول انه من هذي الفئة الأغلب يهال وما يعرفون شي) ليش ما نعطيهم فرصة يتعلمون ويحصلون خبرة، ومحد ولدته امه عالم أو دكتور، والواحد مع الوقت راح يتعلم أشيه وايد تنفعه لكن إذا كان قاعد في بيتهم وتعلم هذي الأشية من الحين أنه أقول عمره ما بيتعلم شي أخوي حمبوووف (روعة هذي البرلمان .. بحيث يعلم الشباب شلون يعبرون عن آرائهم على مستوى المملكة .. و شلون يتخذون قرارات و يتحملون مسؤولية ) وانه معاك في هذي النقطة مسااااااااامحة على الاطالة ( هذي انه ما ابي اطول ، الله يعين لو بغيت أطول) وتسلم أخوووووووووووووووووووووي نبض المشاعر

سلمين أختي (محرقاوية عسل) وفعلا ظاهرة الشذوذ الجنسي من أكبر المشاكل اللي قاعدة تنتشر ومثل ما قلتي الدولة مالها جهود ملحوظة في هالسالفة والمشكلة انهم يمارسون هذي الظاهرة تحت مسميات وعقائد ثانية وهذي (الأدهى والأمر) والله المستعان

برايكم شنو أبرز المشاكل التي تواجه الشباب ما بين 14 و 18 سنة (فترة المراهقة). أي مشكلة تيي على بالكم لا تبخلوا علي بأرائكم كل واحد بباله لو مشكلة وحدة اتمنى انه يكتبهه المشكلة مو لازم تكون فيك أي مشكلة تخطر على بالك وإذا تعرف بعض طرق حل المشكلة اذكر الطرق إذا عندك مشكلة لاتردد في طرحها وان شاء الله تحصل حلها