فـ قلبي ـي

اضغطي على اسمي بعدين في ع اليسار سند مي مسج كأنه انتظر خيوو ضروري شكرا

السلام عليكم ممكن خيوو تطرشين لي صور الفستان ضروري شكرا

يصير تطرشين فستان الخطوبه

شـــكرا خيوو .. ان شاء الله اقدر اواصل !!

السلام .. احد يقول لي متى يعيـدون حلقة اليووووم ضروري ابي اشوفها ماشفتهاا .. انتظر الرد شكرا

إنا إلى الله وإنا إليه راجعـون .. الله يرحمـه ويرحم أموات الجميـع ويصبر قلـوب اهله . .

انزين وين أدفع لج ؟؟

مرحباا .. مبارك عليكم الشهرر سـؤال .. ابي اعرف مسلسلات >> تلفزيون البحرين << وأوقاتهم ..!! لإني ماشفت ولا مسلسل حاطيين لوسمحتون وشكرا

حـلــوين اختي .. وين اروح إذا ابي اشتري ؟؟

هــلا اختي .. اني عندي فســاتين للإيجار إذا للحين تبين ردي علي وبطرشهم لج عالخاص اوك . . بالتوفيق

الله كريــم ,, ماعليه ان شاء الله تحصل أحد يساعدك روح صندوقكم الخيـري مال منطقتكم .. اكيــد بساعدونك إذا يعرفون حالتكم انزين وبعد كأنه يصير بعدين تقدم اعفاء في الجامعه . . والله يوفقك لا تيأس ان شاء الله تكمل دراسه

الســلام عليكم .. شخباركم مسامحه عـ التأخير بس اخيرا قدرت اكتب آخر بارت ملاحظــه : أتمــنى ما أشـوف قصتي في منـتدى ثاني أحرم نشرهــا .. (( الحقوق محفوظه )) ـــــــــــــــــــــــــــــــــــــ الجزء الواحد والعشرين (( الأخيـــر )) البقاء لله انتقل إلى رحمة الله تعالى محمد عبدالله الـ.... سيشيع جثمانه غدا صباحا فـ... منال وقفت تشوف .. بصمت تفكر في الإسم إلي قالوه حطت إيدها على قلبها .. دموع عيونها بدت تطيح (( محمد لا مســتحيل يموووت .. لا مو هذا محمد لاااااء )) كانت هدى صوب منال هدى بهدوء : بس منال الله يرحمه منال بصوتها العالي ودموعها إلى غرقت وجهها : هــدى هذاا محمد .. محمد مات ابي امووووت ما ابي اعيش بدوونه راح عني محمد راح كله من أحمد هوو السبب هو إلي خلاه يموووت هوووو هدى تحرك منال : منال منال .. منال فتحت عيونها .. هدى : بسم الله صلي على النبي منول ويش فيج تصرخين قومي أشربي ماي منال فتحت عيونها وقعدت .. هدى بهدوء وهي تعطي منال الماي : منال حلم مو صدق والله مو صدق انتين بس صلي على النبي واشربي ماي منال ودموعها بدأت تطيح صدق : هدى اني خايفه محمد زادت حالته هدى : لا بالعكس يمكن صار زين لأنه شافج منوول يلا قومي غسلي وراحت عنها .. منال قامت وإيدها على قلبها تحمد ربها كان حلم مو حقيقه .. أحمد اول مافتح عيونه تذكر منال قام مره وحده راح يشوفها محمد فتح عيونه بهدوء ويطالع في الغرفه .. تذكر وجه منال وإبتسامتها له وكلامها إلي قالته له ((انته ماعليك بس انته قوم بالسلامه اطلع من المستشفى وبقولك ويش بصير .. محمد إذا ما حاولت تكون احسن اني إلي بتشوفني في المستشفى )) محمد يبتسم بروحه .. ويحس انه صار زين من كلام منال ومافيه شي دخل الدكتور ووراه الممرضه .. الدكتور : صباح الخير محمد .. اي جذي نشوف الإبتسامه الحلوه من الصبح محمد يبتسم .. الدكتور : وعشان هالإبتسامه احنا راح نطلعك من هالغرفه لأنك ماعدت تحتاج تكون فيها محمد : يعني دكتور بس اروح بيتنا الدكتور : راح تروح ان شاء الله بس زياده جم يوم نشوف إذا صارت كليتك تعمل بشكل طبيعي راح نرخصك محمد : ان شاء الله .. يعني جم يوم مثلا الدكتور : شكلك تمللت منا .. كلها يومين او ثلاثه ونرخصك هدى واقفه عند الباب وصاكتنه : اقولك في الحمام .. تتسبح ماتفهم أحمد : انزين خليني ادخل الحجره هدى : لا مايصير اللحين بتطلع من الحمام أحمد : انزين ويش فيها لو كنت داخل خطيبتي وحلالي هدى : أحمد لا تأذيني ويلا .. (( صكت الباب في وجهه )) منال طلعت من الحمام : كنتين تكلمين من هدى : هذا أحمد يبيج منال بملل : اممم اهاا أحمد رجع يطق الباب .. أحمد : هدى قولي إلى منال انتظرها تحت عشان اتريق وياهاا سمعتين قولي ليها وبعدين ليي وياج حساب على صكت الباب في وجهي منال راحت فتحت الباب في وجه أحمد وهو يتكلم .. أحمد وقف يطالعها بعدها ابتسم منال : نعم خير أحمد بإبتسامه عريضه : الله وش هالشعر الطويل تصدقين توني اشوف طول شعرج منال انقهرت من كلامه وصكت الباب في وجهه .. أحمد رفع صوته : ويش فيكم اليوم تصكون الباب في وجهي بس ماعليه بعد انتظرج تحت .. منال وهي تمشط شعرها : هدى ابيج تساعديني هدى : اممم في ويه منال : ابي اطلق من أخوج هدى فتحت عيونها : هـــاا منال : يلا بلا هالحركات لا تسوين روحج منصدمه تدرين بي ما ابيه هدى : مسكين منال بس شوفيه يحبج منال : واني احب محمد ومحمد يحبني .. حتى لو كان اخوج يحبني هدى : جيفه يعني اساعدج منال : اسمعيني .. هدى نزلت ومنال ظلت فوق .. منال كانت تفكر في محمد تتمنى تكون حالته صارت أحسن .. منال تبي تلفونها تبي تتصل تتطمن على محمد أحمد يكلم هدى بهدوء : وين منال هدى : اووف لا تمللني مابجي وخلني اكل بقدي منقهره منها أحمد رافع حاجبه ورفع صوته : ويش سوت هدى : أحمد منال تقهر صراحه غلطان يوم أخذتها .. تصرفاتها كلش مو اوكي ما ادري كل شي تسويه .. يعني ما ادري جيفه اشرح أحمد : لا اشرحي أكثر هدى (( اوف ويش اقوله هذا بعد )) : يعني البارحه مثلا عفست ليي الحجره .. وأغراضي مرتبين ماخلتهم صراحه وحتى كلامها تدري منال مغروره ماتوقعتها جذي الله يساعدك عليها لو اني ما اتحمل هالحركات إلي تسويها أحمد ببرود : عادي إلي تسويه وأنا احبها واتحملها هههه وعلى قولتج العفسه في ألف خدامه خليهم يردون يعدلون .. ويلا سكتي واكلي ولاتقولين أي شي عنها لا اراويج اللحين هدى سكتت .. (( بل الله ياخذ عدوج يمنال فشلتيني وياه .. فشلني هذي اول تجربه وفشلت ..)) أم أحمد : هدى وين منال للحين نايمه هدى : منـ.. أحمد قاطعها : تتسبح مو نايمه أم أحمد وهي رايحه : والله ما ادري وش نوعها هلبنيه .. هدى : بل ويش فيها أمي أحمد : اشش سكتي لا تسمعج معصبه على حركة منال هدى : أي حركه أحمد : انها نامت وياج وخلتني بروحي هدى : عدال بروحك .. بل هي شافت او انته قلت ليها ياربيي أحمد اللحين ويش يسكتها أمي .. أحمد ومخلينه بروحه دلوع الماما أحمد : هـدى هدى : انزين بس خلني اقوم اروح اشوفها جان نروح بيت أبويي العود اليوم الجمعه منال نزلت .. أحمد : هـلا جان مانزلتين منال قعدت : وين تلفوني أحمد : عندي ويش تبين فيه منال : نعم .. تلفوني تقول ويش ابي فيه أحمد : تلفونج كسرته منال تطالعه .. أحمد طلعه من جيبه : هاا اخذيه وعلى فكره وسيم الأخ منال سحبت التلفون .. شغلته ووصلها مسج هدى : ويش منال إلا تبتسمين منال : الااااااااي صرت عمه الااااي هدى : صدق الاااااي كللوووش أماني ولدت ويش صبي او بنيه منال : بنــيه الااااااي اكيد تشبهني .. ابي اروح اشوفها أحمد يطالعهم : منال اثقلي شوي عاد منال ماردت عليه واتصلت إلى بيتهم .. طبعا مر يوم الجمعه مثل كل مره بس إلي فيه هالمره أحمد ومنال مخطوبين .. منال مايمديها تقعد ويه البنات إلا أحمد يناديها منال تتحمل دلع أحمد قدامهم وكلامه وحركاته ماتبي تسوي له أي حركه قدام الكل وخاصه انهم مابخلونها وبتطيح فيها منال (( ياربي صبرك ما اقدر اتحمل )) : اووف ويش اسوي في حياتي ساجدة : ههههه انتحري منال : هاهاها وادخل النار ساجدة : اي احسن من أحمد منال : ياربي لاعت جبدي اللحين برد يناديني .. مزهوق هذا يعني ساجدة : تصدقين عاد للحين عباله في حلم مو مصدق منال خطيبته أم محمد بعد الغده راحت تزور ولدها .. أزهار كانت قاعده مع بنتها خاطرها تروح تشوف أخوها بس مايصير العائله كلها راحت تزور أماني ويشوفون المولوده الجديده منال راحت ويه علاء ووياهم أم هيثم ومريم ومنى إلي بتقعد 6 أشهر في البحرين لأنها حامل وتحتاج رعايه .. أحمد عصب على حركة منال خلته وراحت ويه أخوها بس ما بين إلى احد أمه العوده راحت وياه وأمه وهدى وفاطمة وصلوا المستشفى أم هيثم والبنات نزلوا وبقت منال علاء : لحظه منال منال : هلا قول علاء : بس أنا قررت أخطب زينب منال : الاااااي صدق كلمت أمي علاء : لا الليله انا وانتين بنقول ليها منال : اي اوكي يلا ننزل أماني كانت في غرفه خاصه ووياها هيثم قاعد .. منال دخلت : الــــسلاااااام وين منوووول الصغيره أماني : هههه من قال بنسميها منال من زمان سميناها منال بحزن : افااا واني اقول اللحين على اسمي بنت اخويي هيثم : مو كفايه تشبهج بعد على إسمج منال قربت تشوفها : الااااااااي تجنن صغنونه تشبهني صدق أم هيثم : منال بس له سكتي سويتين إزعاج أماني : عمتي خليها مستانسه منال قعدت : يلا ابيها على رجولي .. تجنن الورديه ويش سميتونها هيثم : ملاك منال : ملاك عمووو اني منووول عمتج طالعيني فتحي أم هيثم : استخفت منال .. اقول شوفي اخوج وينه جان يدخل يشوفها منال اتصلت .. منال : علاء وينك ماجيت علاء : بس شوي وجاي مريت على واحد من الربع مريض مرقد منال : اهاا اوك تعال شوف ملاك تجنن لا تتأخر باي أم هيثم : وينه عند منهوو منال : يقول واحد من ربعه راح يشوفه .. منال شيرت (( هااا ليكون محمد لا وين محمد مايعرفه لكن .. اي يمكن محمد )) بعد ما رجعوا بيتهم منال حاولت تسحب من علاء كلام تعرف من صديقه علاء : هذا صديق قديم صار ويايي في أول وثاني إعدادي منال : ويش اسمه ويش اسمه علاء : محمد منال لا تتسألين واجد منال فاتحه عيونها : هاا محمد من وينه هذا علاء : من (( )) منال بس عاد اللحين بروح نقول إلى أمي السالفه منال تسوي روحها ناسيه : هاا أي سالفه بعد علاء : منااااال زينب ابي اخطبها مروا إسبوعين منال تروح المدرسه وعايشه حياتها بعيد عن أحمد .. ما تطلع وياه وبالغصب ترد على مكالماته تعتذر بإن ماعندها وقت تبي تدرس وخاصه ان الإمتحانات قربت أم هيثم هالمره ماعارضت ان علاء يخطب زينب بنت جيرانهم وفاتحت أبو هيثم في السالفه .. الليله الجمعه بروحون يخطبون زينب منال كانت مستانسه اتفقوا على يوم الأحد يروحون الفحص .. مريم قعدت مع منال بعد مارجعوا ومنى راحت ترتاح في الحجره منال : انزين مريم انتين ومازن متى ان شاء الله مريم بإبتسامه : في الإجازه الصيفيه منال : باااال مريم : هههه عادي المهم اني محجوزه له منال رافعه حاجبها : هاا جيفه بعد مريم : أبوه كلم أبويي وأبويي قال ليي وسألني عن رايي ووافقت اني بس ابو مازن طلب تكون في الصيف عشان أني وهو نكون ماعندنا شي منال : واني وين كنت مريم : هههه ما ادري المهم لا تقولين إلى احد اوكي منال : مالت بسوي إعلان في لوحه مازن بياخذ مريم .. صدق انج ماتستحين وهذا واني اختج الصغيره ماتقولين ليي مريم : ما ادري ماتدرين لأنه صارت السالفه ويه سالفة خطوبتج منال : نحاستج قولي مو خطوبتج اووف ما ادري جيفه افتك مريم : ها من ويش منال : ولا شي ولا شي صاح تلفون منال وكان المتصل رقم غريب .. منال ردت .. منال : ألو موسى : ألـــو منال : هلا من موسى : توقعي منال : أحمد بلا بياخه تتصل ليي من أرقام غريبه قول ويش تبي خلصني موسى : ههههههههه بل هذي انتين منال ولا تتغيرين منال عدلت روحها : هاا انته مو أحمد موسى : لا موسى افا نسيتين صوتي منال سكتت .. موسى : من أحمد منال : خطيبي العزيز اسمه أحمد له .. انزين ويش صاير إلا متصل احنا ماقلنا بس قاطعها : لاااء والله مو نفس إلي تفكرين فيه متصل ابي منج خدمه منال : ويش موسى : ابي اخطب وحده من اهلج .. ابيها نفسج نفس اسلوبج كلامج حركاتج بالضبط وإذا بعد نفس شكلج منال : امممم .. يعني انته ناوي تخطب موسى : اييي ان شاء الله منال : ماعليه ادور لك وحده من البنات منال شافت في إتصال عندها .. منال : انزين ببند اللحين جايني اتصال اوكي .. وبندته كان أحمد المتصل أحمد : جان مارديتين منال أنا عند الباب أطلعي بسرعه منال : هاا أحمد : منال ماعندج عذر انا عند الباب يلا لا تتأخرين بطلعج أحلى طلعه منال : اوف ياربي بلش هذا بعد .. منال قامت لبست ومريم تطالعها مريم : وين منال : أحمد عند الباب بنطلع بجين .. صدق مريم قومي ويانا مريم وهي قايم : لالا وين اجي باي اني رايحه أدرس ليي شوي من صوب ثاني موسى كان واقف بسيارته عند بيت محمد ينتظره يطلع له موسى : لاااا جان ما جيت محمد بملل : اقولك تعبان موسى : ويش حمود لا تصير دلوع له اللحين اسبوعين ماطلعت من البيت وانته الحمدلله صحتك زينه بس ما ادري ويش إلي فيك قالب حالك محمد سكت وما تكلم .. موسى : انزين وين تبينا نروح محمد : مكان مافي احد ما ابي اشوف اي احد ما ابي إزعاج موسى : اممم في مطعم رومانسي هدوء .. تعيش الجوو محمد : هاا موسووه وانته ويش دراك بهالأماكن موسى : هههه بعد محمد : انزين انته تدري ما يصير آكل أكل المطاعم موسى : في خبز .. في عيش أبيض في أكل مسلوق محمد : لا أنا شبعان موسى : انته خلنا نروح جو المطعم بخليك ترد تقول تبي تروحه محمد : انزين بس يلا ودنا نشوف منال كانت طول الطريق ساكته وماتكلمت وياه أحمد فيه كلام داخل بس مايقدر يتكلم يحس ان منال مو وياه .. وصلوا المطعم أحمد : يلا منال وصلنا منال : وينه مطعم أحمد : اي له مطعم رومانسي منال (( اووف رومانسي بعد )) : انزين اني مو جوعانه محمد يتكلم بهدوء : موسووه وين جايبنا موسى : اشش اسكت .. لو سمحت ابي طاوله لشخصين محمد يدفع موسى : مووسوووه كله رجال ونسوانهم احنا ويش يجيبنا موسى : لا يصير احنا بعد يلا مش هذيك الطاوله منال : اووف اني ما احب الناس أحمد : تبين احجز خاص منال : لالا خلنا ويه الناس أحلى أحمد : اوكي بكيفج منال (( اي اشوف الناس أهون مو اقابلك اووف ياربي )) أحمد كان حاجز طاوله خاصه تكون على صوب من المطعم مجهزه لهم أحمد سحب الكرسي إلى منال عشان تقعد .. محمد يطالع في المطعم : هذا ويش ظلام موسى : لا هذا جو رومانسي مو ظلام ماتعرف يا أخي بس تخطب بجيب خطيبتك هني محمد تذكر منال .. (( خاطري اشووفج منال وحشتيني .. ما ادري شخبارج مستانسه ولا ... )) موسى : هلووو أنا هني محمد : ها موسى : صح نسيت اقولك .. ترى انا قريب بخطب محمد : لا زين زين ومن ان شاء الله سعيدة الحظ موسى : تعرف منال إليـ ... محمد يطالع موسى وكأنه تذكر شي (( اييي صح اووووه منااال هي لبنيه صح آخ بس أنا النذل عطيته رقمها .. ما ادري انها منال آآخ )) : آآخ موسى : آآخ على ويش حمود لا تأذيني كلحين تسرح عني محمد قام : قوم نمشي موسى : وين نمشي اقعد محمد معصب : قلت لك قوووومي نمشي موسى : اشش صوتك اقعد محمد محمد معصب : سلام أنا ماشي موسى يطالعه .. وهو رايح يمشي محمد معصب على روحه وعلى إلي سواه (( أنا غبي غبي عطيته رقمها عمري ماشفت واحد يوزع رقم حبيبته .. غبي )) محمد كان بيطلع بس حس بشي في قلبه يقوله ارفع راسك .. محمد دار يطالع .. شاف منال من بعيد قاعده في طاوله ووياها من إلي وياها ... محمد ما كان حاس بروحه .. راح إلى الطاولة محمد : منــــــال انتين منال صح منال فتحت عيونها تطالع محمد أحمد دار يطالعه : اي هذي منال وانته من .. اي انته محمد محمد بغرور : اي محمد عندك شي أحمد : اي هذي خطيبتي مو من حقك تجي تكلمها محمد : من حقي ونص هذي منال روحي وأحبها وتحبني أحمد وقف : هـييي انته احترم نفسك .. خطيبتي وما اسمح لك موسى قام يشوف محمد قرب منهم موسى : محمد ويش صاير محمد : ولا شي .. وهو يطالع في أحمد موسى طالع أحمد إلي قاعده وياه وحده .. طالع ملامحها اي هذي منال موسى حافظ ملامحها ومانساها موسى : يلا مش محمد محمد واقف يطالع في أحمد .. وأحمد يطالعه أحمد : اقول يا اخ انته ممكن تفارق عنا محمد دفع أحمد على وراه : هييي مو انته إلي تقول ليي أنا هالكلام محمد رفع إيده .. بس موسى جوده إلي في المطعم كلهم داروا يشوفون .. واحد من إلي يشتغلون في المطعم جه ليهم وطلب منهم يطلعون بره المطعم .. محمد وموسى ساحبنه : ماعليه أراويك أنا بيني وبينك حساب وراح عنهم .. أحمد عصب على منال : قوووومي منال قامت وهي خايفه على محمد يرد يصيده شي بعد ما شافته وباين انه صار زين ويطلع كالعاده أحمد يمشي بســرعة جنون ومنال ساكته وخايفه .. وصلوا بيتهم أحمد : يلا قومي نزلي وسيده الحجره بس خمس دقايق وأنا جاي ابي اشوفج في الحجره قووومي نزلي منال نزلت .. محمد معصب وحط عصبيته في موسى موسى : محـــــمد هدني اقولك هدني محمد : انته بعد ما تستحي خايـــــن موسى حاط إيده على إيد محمد يحاول يشيلها : محمد أنا ويش سويت محمد يصرخ : تكلم حبيبتي وتقول ويش سويت موسى دفع محمد بقوووه : هـي لا تنسى من عطاني الرقم .. شيل إيدك محمد نزل راسه .. وصل أحمد الحجره وصك الباب بقووه وقفله .. وراح عطى منال كف قوي منال حطت إيدها على خدها كانت ساكته وحتى دموعها ماطاحت أحمد وهو رافع صوته : صــــدق ماتستحين تواعدينه .. يعني تكلمينه صدق انج خاينه منال رفعت صوتها : هيي احترم نفسك وبلا هالكلام اني ما اكلم احد وما واعدت أحد أحمد رفع إيده مره ثانيه وعطاها كف : لا تجذبين ولا ترفعين صوتج عليي فاهمه أحمد بإيده رفع راس منال بقووه وهو يصرخ في وجهها .. موسى : أنا ما ادري وانته ماتدري يعني تشك فيي لو ادري انها حبيبتك باكلمها افاا حموود أنا اخووك محمد بحزن : بس اللحين منال مو ليي ولا لك موسى : اللحين قول ويش بسوي فيها هالـ... محمد : والله لو يسوي فيها شي ما اخليه موجود في هالدنيا منال وهي تصيح : هيييي شكلك مجنون ذبحتني أحمد بصوته العالي : ايييي انتي إلي جننتيني وبعدج ماشفتين شي منال : هدنييي حرام عليك ذبحتني آآآه لحقووني أحمد قرب من منال أكثر .. منال تصرخ : أحــــــــمد لا تقـــرب لاااااء حراااام عليــك لا تقرررررب علاء كان توه راجع وطبعا شاف بيت زينب وابتسم علاء فرحان من قلب قريب زينب بتصير وياااه اخيرا تقدم وخطبها .. دخل البيت وكانت امه تنتظره بس رن تلفونه علاء دخل الحجره يتكلم منال تصيح بصوت مرتجف : عـ ..ـلاء بسررعـه لحقني علاء سمع صوت منال : منال هدي شوي وينج انتين ويش صاير منال : عـ...لاءء في بيت خــ..ـالـ..ـي بسرعه تعـ...ـال ليي أحمد كان قاعد على الكرسي وحاط رجوله على السرير يطالع منال وهي تكلم أخوها وهي تصيح عشان يجي ليها .. علاء بند من عند منال وبســرعة اللحظه ما درى بروحه وهو موصل عند باب بيت خاله نزل علاء يركض إلى منال إلي وقفت عند الباب تنتظره .. منال من شافت علاء حضنته بقوه وقعدت تصيح .. علاء معصب : ويش سوووه فيج منال تكلمي الحقير لحظـ.. منال سحبت علاء : لا لاتدخل خلنا نروح البيت .. ابي اروح البيت وصلوا البيت وعلاء جود منال إلي كانت تصيح ودخلها حجرتها وناده مريم ليها .. شاف في خدها باين أصابع أحمد وإيد منال مريم : بللل ويش هذا ويش مسوي فيها الحيوان علاء : مريم دخلي وياها الحمام .. أنا رايح له أراويه وراجع مـــروا اسبوعين بعد ما صار إلي صار علاء راح إلى أحمد وتهاوش وياه وطلع كل الضرب إلي ضربه منال وكسر إيد أحمد إلي خلت أبو أحمد وأم أحمد يعصبون على السالفة .. أبو أحمد : بس أبو هيثم الله مو كاتب أحمد ومنال يواصلون حياتهم ويه بعض أبو هيثم : ويش هالكلام أبو أحمد مو عدله ويش يقولون الناس أبو أحمد :.. أبو هيثم : أبو أحمد هذا مو كلام مايصير للبنيه وسمعتها منال تحس براحه نفسيه بعد ماسمعت الخبر إلي حاولوا أمها وأبوها مايوصلونه أحمد بطلقها .. منال كانت في فترة الإمتحانات النهائيه .. تراجع عدل وتروح تقدم كل ماتقدر عليه ما كان يشغلها شي بالعكس كانت فرحانه لأنها افتكت من هم أحمد ورجعت حريتها بس الشي إلي ماسوته انها خبرت محمد لأنه في الأصل ماتكلم محمد .. محمد طبعا كل يوم يعيشه على حب منال ويتذكرها يبي يعرف عنها شي بس ما يبي يسأل عشان لا يسبب ليها مشاكل في حياتها كان كل يوم بعد رجعته من شغله يمر بيت أخته يشوف منال الصغيره منال خلصت فترة الإمتحانات .. كانت تشوف في بيتهم إلي ما كانت تشوفه صاروا يهتمون بها أكثر ويحاولون ما يخلونها تضايق ومايبون يذكرونها بأي شي يخص أحمد حتى بيت ابوهم العود مايروحون عشان لا تشوفه مـــــرت ستة أشهر ستة أشهر صعبــه على منال ومحمد منال بس قررت ترد اميل محمد بعد ماحذفته .. أيام عانت فيها منال وعاشت الحب بصمت وعذاب كل ليلة تتذكر المواقف إلي صادتها وياه والكلام إلي دار بينهم وتذكر محمد وتصيح .. محمد كانت حياته روتين يومي .. يرجع من دوامه ويقعد في بيتهم ما كان يروح مكان او يطلع مع ربعه كان في كل لحظه يذكر منال .. منــال الروح إلي يحسها روحه يبي يعرف أخبارها بس ماعنده أي شي يسويه غير ينتظر الأيام تجمعهم ووقت إلي الله كاتب .. منال ضافت الإميل مره ثانيه .. محمد إلي ما حذف أميل منال شافه اون عنده انتظر هي إلي تكلمه .. سألت الله لا يفضحنا إذا خان الزمن مره وخانتنا ملامحنا : الســلام عليكم مـنــ انتي ــالي : وعليكم السلام سألت الله لا يفضحنا إذا خان الزمن مره وخانتنا ملامحنا : شخبار ؟ مـنــ انتي ــالي : الحمدلله .. من ؟ منال ماصدقت محمد نساها ونسى الإميل خافت يكون مو هو محمد ماتكلم مثل ما كان يكلم منال يخاف يكون احد غير منال ضافه من إميلها سألت الله لا يفضحنا إذا خان الزمن مره وخانتنا ملامحنا : انت مو محمد ؟؟ مـنــ انتي ــالي : اي وانتي من ؟ سألت الله لا يفضحنا إذا خان الزمن مره وخانتنا ملامحنا : محمد اني منـــــــــــــــــــــال ويش فيييييك نسيتني شكلك مـنــ انتي ــالي : حلفي انج منال سألت الله لا يفضحنا إذا خان الزمن مره وخانتنا ملامحنا : اووووه محمد والله والله والله منال مـنــ انتي ــالي : اممم انزين صدقت سألت الله لا يفضحنا إذا خان الزمن مره وخانتنا ملامحنا : محمد ماتبي تعرف اخباري مـنــ انتي ــالي : ؟؟؟؟؟ سألت الله لا يفضحنا إذا خان الزمن مره وخانتنا ملامحنا : تطلقت صار ليي جم شهر وتخرجت وصار عمري 18 بعد محمد بعد ما قرأ الكلام إلي كتبته منال ماصدق حس بشــعور فرح سعاده شعــور ماينوصف منال تطلقت يعني منال رجعت له يعني يقدر هو ياخذها مـنــ انتي ــالي : منال عطيني رقمج بســرعه سألت الله لا يفضحنا إذا خان الزمن مره وخانتنا ملامحنا : لا انته عطني رقمك مـنــ انتي ــالي : اوكي ******39 منــــــال اللحين تتصلين منال اخذت تلفونها وسجلت الرقم واتصلت .. محمد التلفون في إيده ينتظر الإتصال وطلع له في الشاشه منال المغروره يتصل بك .. محمد يطالع تذكر ان عنده رقم منــال كل هالفتره وناسي رد عليها .. الليـله خطوبـ عـلاء وزيـنب ــة زينب ووياها منال في الصالون ينتظرون علاء منال : زينب ذبحتيني لا تدلعين عاد زينب : سكتي منال قلبي خايفه استحي منال : خايفه ها ما كأنج البارحه وياه قاعده لنص الليل زينب نزلت راسها .. منال : هههههه عدال يالعرووس تستحين والله واخيرا اخذتين علاء يزنوب السنوات تمر سـريعه تذكرين حرف A إلي اذيتيني به وما ادري طلع علاء واني ياغافلين .. قطع كلامها رنة تلفونها .. منال ردت منال : هلا محمد محمد : عيــونه و روحــه منـــــــال متى أنا وانتين بعد متى منال : اششش لا تصرخ ينسمع صوتك بعدين بتصل اللحين اني في الصالون محمد : اوووه منال منال : انزين لا تنسى تجيب أمك وأختك اوكي محمد : اوكي و منول الصغيره بعد منال : عمري عليها اوكي يلا بااي علاء يتصل منال ردت على علاء .. ينتظرهم بره علاء مو مصــدق الليله بيرتبط بحلم حياته زينب إلي يحبها من سنــوات الكل ينتظر دخول زينب وعلاء .. منال كانت فرحانه من كل قلبها و سعادتها بتكمل الوقت إلي بتكون فيه مرتبطه ويه محمد زينب وعلاء دخلوا .. كانت ملكة جمال كل من شافها صلى على النبي ما شاء الله جميـله .. وعـلاء الأجمل كان في قمة الكشخه وجماله إلي ينحسد عليه وتنحسد زينب بــه .. ساجدة في صوب من الصاله قاعده على الكرسي ومغطيه ووجهها وتطالع علاء إلي حبته من يوم هي طفله نزلت دمعة حاره من عيونها .. للأسف علاء ما كان يبادلها الشعور كانت يعتبرها مثل منال .. كانت تشوف في نظرات علاء وإبتسامة زينب الحب والفـرح مريم كانت فرحانه إلى اخوها لأنه اخذ إلي يحبها وفرحها بيكمل بعد إسبوع هي الثانيه بتاخذ حبها وإلي بواصلون أحلامهم ثنينهم مع بعض منى كانت حامل وتعبانه من الحمل .. وبعد فرحانه إلى اخوها عـــلاء أم هيثم فرحانه بس كانت تتمنى تكون إلي ياخذها علاء بنت اختها مو وحده ثانيه بس زينب بعد حليووه وطيبه وتنحب منال كانت كل شوي تروح تشوف أزهار وأم محمد ومنال الصغيره أم محمد ماتدري ان هذي إلي يبي محمد يخطبها .. أم هيثم نادت منال تروح تشوف أبوها متصل يبي وحده من البنات تروح له بره .. منال لبست وطلعت تشوف وكان في سيايير وصبيان وتطالع من بينهم تبي ابوها .. شافت واحد صار لها أشهر ماشافته أحمد واقف قريب .. منال من شافته كانت تبي ترجع تدخل بس هو قرب وكلمها أحمد : منــال منال بملل : نعم خير أحمد : شخبارج منال : الحمدلله يوم فارقتك صرت بخير أحمد انقهر من كلامها : لا تنسين للحين ماقلت إلي صار منال عصبت ومشت عنه بتدخل بس أبوها ناداها أبو هيثم قرب : انته ويش عندك واقف وياها أحمد بغرور : والله هي إلي واقفه ويايي مو أنا أبو هيثم يطالع أحمد : انزين يـلا تباعد .. من صـــوب بعيــد وفي سيارته قاعد ويشوف الموقف .. محمد كان معصب حد حده كان يتمنى ينزل إلى أحمد ويراويه بس ما يبي يسوي مشاكل قدام الناس «`ו " لا تظن ان حبي لك راح يموت .. ولا تظن اصلا ان الحب مات " ×`» منال : محمد تباعد شوي فشلتنا محمد يطالعها : هاا بعيد أنا ويش فيج منال محمد : منال اخيرا أنا وياج منال استحت ونزلت راسها .. محمد رفعه : الله منال تستحي مني منال نزلته مره ثانيه وكانت بتطيح دمعتها .. محمد : لاااااء عمري قلنا مافي صياح مو أنا وياج اللحين منال : محمد بس لا تنسى كنت مخطوبه و أحـ.. محمد سكتها : اششش قلت لج انسي كل شي صار قبل منال صدقيني والله عمري مابتسمعيني أذكرج بشي أنا محمد منال بانسيج كل شي صادج في حياتج .. بس يلا عشاني ارفعي راسج وابتسمي ليي منال رفعت راسها وإبتسمت .. محمد : من يصدق انج منال إلي كنت اتهاوش وياها ههههه منال : لا وانته محمد المغرور إلي للحين قاهرني .. منال تقلده : (( لو سمحتون شكلكم مابتشترون انتون يصير أنا اشتري وبعدين تكملون انتون )) محمد : ههههههه والله عصبتوني تدلعون منال : لا بعد جيت زفيتني عند البحر خليتني اصيح محمد : ههههههه حلفي صحتين منال : هاهااهاها مايضحك كان فيني قهر عليك خاطري اعطيك كف محمد قرب خده : يــلا عطيني كف بشووف منال سكتت .. محمد : عمــري منووول تستحي مني قطع كلامهم طقة الباب دخلت أزهار وعندها بنتها : بسكم خلوني اصور منال وياكم محمد يسوي روحه معصب : وانتين هذي عادتج ماتطقين الباب سيده تدخلين في أي مكان منال تطالع محمد : محمد طقته أزهار حطت منال الصغيره في حضنه : الله يساعدك واني هذي حالتي من اطق الباب ماتسمعه قبل تكلم منال وما تسمع جيفه اللحين وياها رحنا فيها الجرس بقده مابتسمعه منال : ههههههه محمد : أزهار وين أمي أزهار : بره ويه الناس بعدين بجي أم محمد اول شي ماتقبلت ان ولدها ياخذ وحده كانت مخطوبه واطلقت بس أزهار حاولت فيها وقنعتها ووافقت بعد ما حست إنها برفضها بتخسر ولدها وخاصه انه يمرض بسرعه ــــــــــــــــــــــــــــــــــــــــــــــــــــــــ مـــرت سنتين قبل أشهر توفى ابوهم العود وامهم العوده صارت تعبانه واللحين تعيش في بيت بنتها أم هيثم علاء وزينب فوق في شقتهم للحين الولد المطيع وإلي مايخلي احد يحتاج شي وهو موجود وللحين منال الغاليه إلي مايرد لها طلب زينب مستانسه وياه في حياتهم مايقصر عليها ويحبها وهي بعد تحبه تزوجوا بعد سنه من خطوبتهم .. بس للحين ماعندهم اطفال مريم تنتظر تصير الدكتوره مريم .. ومازن وياها هو الثاني دكتور مازن مريم ومازن يحبــون بعض وبينهم إحترام وحب كبيــر واحلام كبيــره .. منى عايشه حياتها مع زوجها في لكويت وفي الإجازات تجي تزور أهلها البنات ماعادوا مثل قبل وخاصه ان ماصار في بيت كبير يجمعهم كل يوم جمعه كل وحده انشغلت بحياتها .. ساجدة : انخطبت صار لها جم شهر على جلال إلي حاول مره ثانيه يخطبها وهالمره ساجدة وافقت واللحين تحاول تحبه مثل ما هو يعاملها بالحب ساجدة للحين تذكر حبها إلى علاء .. وتتمنى تنساه مع الأيام فاطمة : انخطبت على واحد يصير لها >>> من ؟؟ أحمد .. فاطمة ما كانت تبي ترتبط به بس أمها وإصرارها بعد ماتقدم ليها أحمد فاطمة تحاول تحب أحمد وخاصه انه يعاملها بإحترام ومافيه أي شي يخليها ماتحبه أحمد تغير للأحسن بمساعده من فاطمة إلي كانت تتحمل كلامه عن منال اول الأيام بعدها مرت الأيام وصارت هي كل شي بالنسبه له هدى سافرت تدرس .. للحين ما ارتبطت بأي شخص هدى في غربتها تذكر جمعتها مع البنات والسوالف والضحك .. وماعندها في حياتها أي قصة حب ولاء قريب خطوبتها على ولد خالتها (( علي )) إلي هو اخو محمد ولاء نست حب محمد وفهمت ان إلي كانت تعيشه وهم الحب مو الحب لأنه الحب الحقيقي هو إلي بين ثنين .. ولاء عاشت قصة حب قصيره بعد ما اعترف لها علي بحبه لها طبعا مانست تقوله عن شعورها السابق إلى محمد موسى مازال صديق قريب من محمد .. تزوج وحده مايعرفها أمه خطبتها له عايش وياها حياته .. موسى تغير بفضل منال .. محمد ومنـال تزوجوا من اول ستت أشهر من خطوبتهم .. كل يوم يعيشونه بحب وذكريات جميله وحياة مافيها مشاكل ولا خلاف منال للحين ماتغيرت حركاتها .. رغم انها بعد جم شهر بتصير أم محمد خايف عليها يصيدها شي وحبهم كل يوم يكـبر ويزيــد .. كل شخص منــــــــا يحلم في الحب الخــالد الحب الحقيقي .. الصـادق حب يبقى رغم القسوة والألم والعذاب .. وحتى الفراق في مكان يجمعنا نحن العشاق وحتى لو ماتت أرواحنا يبقى حبـنا .. بالحب نتفس الهواء .. وبالحب نبتسم ونلعب ونتعلم .. ونــمــوت فلا حياة من دون حـــــب نعاني الحب بصمت جميــــل نظهره و نخفيه نتبادله بإبتساماتنا .. بنظراتنا .. بقلوبنا بأحلامنا .. تختلف أنواعه .. ولكنه يبقى تحت مسمى واحد وهو الحـــــــب شعور جميـل يبقى ولا يموت ربما يحاول البعض قتله ولكنه لا يموت الحب يتعبنا ولكننا نحتاجه في هذه الحياة هناك .. من هو محمد و من هي منال .. ــــــــــــ انتــهــت ــــــــــــــ ملاحظــه : أتمــنى ما أشـوف قصتي في منـتدى ثاني أحرم نشرهــا .. (( الحقوق محفوظه )) مع كل الحب والشكر والإحترام إلى كل الي تابعوني وشجعوني وعاشوا قصتي بأحداثها وشخصياتها أتمنى القصه عجبتكم بكل مافيها من شخصيات وأحداث و (( الكاتبه )) سامحوني إذا تأخرت عليكم في تنزيل الأجزاء .. ألف شكر لكل إلي كانوا يردون بعد كل جزء أنزله بدونهم ما كنت بكمل القصه أتمنى اشوف لكم قصص واقراها واشجعكم مثل ما شجعتووني كل المتابعين إلي مايردون مشكوورين عـ المتابعه يلا تعبت واني اكتب في اجزاء القصه وهذا الجزء تعبني أكثر لأنه طــــــويل أبي اشوف ردود طويــــله .. كل شي عندكم كتبوه أي تعليق أي شي عن الشخصيات كتبوووه يلا ساامحوني عـ التأخير وابي دعواتكم وبالـتوفيق للجميع في حياة كلها حب فـ قلبي ـي

شـكلـه أحمد مسوي مشكله واني عندي مشكله البارت الأخير مو قادره أكتبه عـ العمـــوم صـدق صدق فرحتوني بردودكم ووفيتون ماتقصرون مشكورين كل إلي يتابعون وإلي ردوا وإلي وياي من بداية القصه بردودهم الحلوه والتشجيع يــلا ان شاء الله بعد ماقرأت الردود اتشجع واقدر اكتب البارت انتــظروني

وصلت شخباركم .. طبعا ما ودي أنهي القصه بس الإمتحانات جايه ومافي وقت .. وحاولت اكمل الأجزاء عشان أخلص قبل حبيـت أشكر كل إلي ردوا .. وشكر خاص إلى (( حنين85 )) و (( اسوله حلوه )) مشكورين عـ الرد والأكيد الشكر للمتابعين دائما (( جوهرة العالم و ShAi5at eLbNaT )) ـــــــــــــــــــــــــــــــــ الجزء العشرين أحمد زفوه عماته وخالاته وأمه .. ودخلوه إلى منال عشان يشوفها منال مغطينها بالمشمر الأخضر (( مشمر العرايس وإلي مايناسب منال )) هدى كانت واقفه صوب منال .. منال خايفه ومرتبكه وتحس بالضيقه والدمعه إلي شوي وتنزل هدى تساسر منال : منـــال لا تصيحين المكيااج منال ببين انج تصيحين بعدين منال : اووف انزين بس أم أحمد : يــلا أحمد أفتح وجهها طبعا كانوا بس الأهل في الحجره إلي فيها منال وأحمد .. أحمد رفع المشمر من على وجه منال وقرب ببوس جبينها كانت منزله راسها .. قرب بس هي تباعدت أم ساجدة : يــلا أحمد بوس راسها لازم تبوسه أحمد قرب مره ثانيه وباس راسها وأرتفعت هلاهلهم .. وفرحهم في بيت أبو هيثم الكل فرحان .. عكس بيت أبو محمد إلي كان يعم فيه الحـــزن أم محمد ماوقفت دموعها على محمد إلي من العصر في المستشفى وباين ان هالمره مو بسيط مرضه أزهار إلي تعبت وخاصه انها في شهرها الأخير نقلوها إلى قسم النساء لأنها تعبانه .. علي وحسن .. وزوج أزهار حسن كانوا قاعدين ينتظرون الدكتور الكل طلع بره وبقت منال وأحمد في الحجره .. منال دارت وجهها عن أحمد الجهه الثانيه ماتبي تشوف وجهه أحمد إل كان فرحان ويحس بالسعاده كلها انه ملك أغلى وأكبر حلم في حياته أحمد : منـــــال منال بملل : نعم أحمد : طالعيني تدرين أنا ماشفت وجهج يامنزلتنه يا دايرتنه عني منال : أحسن ما ابيك تشوفه أحمد بحزن : منال والله انا احبج ليش تسوين جذي ليي تكسرين بخاطري منال (( آآآآه يعني بس انته إلي عندك خاطر واني ..)) منال دارت له وطالعته أحمد بإبتسامه : ماشاء الله أحلى من القمر منال نزلت راسها وتذكرت محمد ماتبي أحد غير محمد يشوفها ويشوف جمالها أحمد : يــلا قومي نروح منال رفعت راسها تطالع : نعم وين نروح أحمد : نطلع له منال : لا ما اقدر تعبانه ما ابي اروح مكان ولاء تكلم صديقتها في التلفون ولاء : والله اقولج الليله عقدها يقولون فطوم : اووف ولاء انتين متأكده ومحمد مو تقولين انتين يحبون بعض ولاء : ما ادري هذا إلي محيرني فطوم بفرح : بس استانسي ألوووي محمد بصير لج بس ماعنده أحد منال وبس راحت هههههه ولاء : هاهاهاا ماتضحكين وتتوقعين يعني اني للحين احبه لا بس ما ابيه ولا شي أم حسين دخلت على ولاء أم حسين : ولااااااء قوومي بسرعه بنروح بيت خالتج ولاء بخوف وقفت : لـــــويه ويش صايرر أم حسين : محمد تعـــبان حده وخالتج بروحها في البيت تصيح وأزهار تعبانه بعد ورقدووها قوومي حسين عند الباب ينتظرنا ولاء قامت ولبست عبايتها حتى ماصكتها والشال في إيدها .. وركضت وره امها منال إلي كانت تسلم على إلي جايين يباركون لها وهدى واقفه صوبها من جهه وساجده الجهه الثانيه منال وتغيرت ملامحها وحطت إيدها على قلبها : آآآخ قلبي ساجدة بخوف : منال ويش قلتين ويش منال تطالع ساجدة : قلبي ما ادري يألمني .. تعبني اليوم كلحين يجيني الألم ساجدة : صلي على النبي منال .. يمكن من التعب منال : لا مو من التعب اكيد محمد فيه شي اني متأكده ساجدة : اششش سكتي لا يسمعج أحمد أحمد كان قاعد على الجلسه الخضره ويشوف منال وجمالها وهي واقفه ويسلمون عليها محمد كان يتألم من كليته حده تعبان .. عطوه مسكن للألم شوي حسن أخوه وعلي قاعدين وياه زوج أزهار (( حسن )) راح إلى أزهار يشوفها كانت تعبانه بس تبي تشوف محمد حسن : أزهار ويش فيج اقولج زين أزهار : حسن ما اقدر لازم اشوفه اطمن عليه خايفه عليه حسن : نفس ماتخافين عليه انا بعد خايف عليج أزهار قعدي مكانج وسكتي أم حسين وصلت إلى أم محمد إلي كانت تصيح وهي تتكلم أم محمد : ماشفتين حالته يختي ماشفتينه ما اظن ولدي يبقى أم حسين : صلي على النبي بيبقى الله يحفظه ويخلي شبابه ولاء كانت بس تطالع خالتها بصمت ودموعها في عيونها خايفه من الكلام إلي تسمعه من خالتها .. محمد تعبان اكيد من سالفة خطوبة منال أخذت ولاء تلفونها كانت بتتصل إلى منال بس دورت الرقم ماحصلته .. الساعه 12 الكل راح وبقى أحمد ومنال إلي ساكته وماتكلمت ولا كلمه أحمد تعب وهو يحاول بس ماتتكلم يكلم روحه يسكت احسن منال قررت تتكلم : أحمد أحمد بفرح : عيوونه وروحه منال انقهرت من إلي قاله : يصير اللحين تمشي باجر لازم اقعد اني من وقت عشان الصالون وحدي تعبانه اللحين راسي يعورني وأحسه يدور ما اقدر ابي انام أحمد بخوف : تبين اوديج المستشفى منال (( اووهوو اللحين عاد بسوي روحه كلش )) : لا اقولك راسي ابي انام وباجر الصالون بعد مره ثانيه عوار راس أحمد : اي اوكي اللحين باروح .. ودخل إيده في جيبه وطلع علبه فيها خاتم ألماس أحمد بإبتسامه : منال هذا لج منال من غير أي إبتسامه : شكرا ... وصكته وخلته على صوب أحمد وقف : اوكي يلا بمشي روحي شوفي طريق ليي عشان اطلع منال (( اوف اخيرا )) : يلا .. وراحت الساعة سبع الصبح حسن راح بيت ابو محمد عشان عمته أم محمد يخبرها بولادة أزهار أم محمد إلي مانامت عدل بفرح ممزوج بالحزن : صـــدق الحمدلله ويش جابت حسن بفرح : بنـــيه أم محمد : الحمدلله زينين زينه أزهار حسن : اي زينه انا جاي لج يلا أم محمد : ومحمد ويش اخباره حسن : زين زين يلا عمتي باروح اشوف بتي أسبوٍع مرٍّ !! وٍلآوٍصل منك مرٍسـآل يْآقوٍّ قلبك كيْف تقطعنـيْ أسبـوٍع ؟! أسبوع منال كانت تعيش حياتها بين المدرسة وخاصه انها الأسابيع الأخيره في المدرسه وبينتهي الفصل الأول .. كانت عاديه حياتها تهتم إلى دراستها وطبعا ماتنسى محمد وكل يوم تذكره بس ماتبي تشوفه او تعرف شي عنه .. وتحس انها جرحته جرح وخايفه يكون صاده شي بس ماتبي تعرف أي شي وأحمد إلي كل شي يهمه منال يبيها 24 ساعه وياه بس منال العكس طبعا ماتبي تشوفه ولا تقعد وياه إذا جه ليها وتكون مجبووره من كلام إمها انها تروح وياه بيتهم تخليه بروحه وتروح تقعد ويه اخته هدى محمد للحين في المستشفى حالته مافيها تحسن .. أزهار في بيت أبوها بعد ما ولدت أزهار تتمنى تروح إلى محمد المستشفى بس ماتقدر يوم الخميس في بيت أبو هيثم الظهر الساعة 2 ونص وقت الغده الكل كان قاعد عـ الغده ومنال وياهم علاء يكلم منال : منال وش رايج الليله نطلع منال بفرح : الاااااااي كشخه اوكي انتظرك أم هيثم : وين تطلعين وخطيبج الليله الجمعه بتخلينه بروحه منال (( اووف ياربي ابتلشت بهالخطيب )) .. أبو هيثم : لا تطلع وياه اكيد وانته اطلع ويه مريم أو منى منى : لالا اني ما اقدر اطلع مريم اكي مريم : عليي اختبار اني باراجع ويش يطلعني علاء وهو قايم : يعني انا قلت باوديكم منال قامت وياه : شدرانا بهم .. وراحت صوبه : ماعليك اني الليله باجي وياك بنطلع اوكي علاء : اوووكيي انتظرج الساعه 4 ونص منال كانت قاعده عالمسن وتشوف اميل محمد إلي ماحذفته بس محمد مايدخل (( يعني يسويها محمد يحذفني لا ما اتوقعه )) صاح تلفونها وكان أحمد المتصل منال : ألو أحمد : هلا منووووول جهزي روحج الليله باطلعج طلعه كشخه منال بملل : اول شي قايله لك لا تقول ليي منوول وثاني شي ما اقدر اطلع وياك أحمد : ليش عاد منال : بطلع ويه علاء .. هو قال قبل لو انت قايل قبله جيت وياك أحمد : بس أنا خطيبج تخليني بروحي اطلع ويه منهي منال (( اووهوو مصدق روحه هذا )) : دور لك وحده وطلع وياها أحمد : هاا منال ويش تقولين ويش هالكلام عادي عندج أطلع ويه وحده منال (( اووهووو )) : انزين بعدين بعدين ينادوني باي .. وبندته أحمد فاهم حركات منال بس يتحملها ويتحمل تصرفاتها إلي تتعبه أم حسين وولاء وحسين العصر راحوا يزورون محمد ولاء شافت حالة محمد إلي ماتسر (( والله تعور القلب يولد خالتي ماتستاهل إلي صادك وإلي يصيدك ياريت فيني ولافيك )) أم هيثم راحت ويه أماني وهيثم المستشفى .. مريم وياها منى قاعدين في حجرتهم ومنال قاعده بروحها في الصالة سمعت صوت الجرس وراحت تشوف من كانت زينب صديقتها منال : دخلي حياج زين جيتين متملله حد حدي زينب : جان اتصلتين إلى خطيبج ورحتين وياه منال : اقول بلا كلام ماله معنى امشي بنقعد في الصاله ملل الحجره زينب : بس .. منال وهي ساحبتنها : علاء مو هني زينب : سيارته هني منال : اوووف هني بس نايم امشي عاد ذبحتيني وراحت قعدت وياها .. زينب ومنال قعدوا في الصالة سوالف وضحك منال تضحك وفيها حزن كبير بس هي تحاول .. علاء سمع صوت منال ووياها احد يسولفون ويضحكون قعد على الصوت وطلع يشوف من .. زينب شافت علاء وسكتت خافت يكون معصب لأنه صوتهم أزعجه علاء وهو يعدل شعر على وره : ههه كملوا سوالفكم زين قعدتوني .. الله اليوم بيتنا منور زينب استحت ونزلت راسها .. منال : انززين يلا ادخل حجرتك او احنا نقوم ندخل علاء : لاااااااء قعدوا اخذوا راحتكم بدخل .. توه كان بيدخل بس سمع صوت الجرس .. وراح منال : اوووف جان مو أحمد زينب : هههه هو قايل بجي يعني منال : لا بس ما تشوفينه إلا جاي علاء ينادي منال منال : نعــــــم علاء وهو جاي : منال روحي في وحده تبيج منال وهي قايمه : وحده منهي .. وراحت تشوفها منال ما توقعت تشوف أزهار إلي جايه .. منال تطالع في أزهار : أزهـــار محمد فيـــه شي أزهار إلي حست ان اخوها قربت حالته للموت وحاولت تسوي شي قبل لا تخسر أخوها وخاصه انه مو قاعد يقاوم المرض ويكون أقوى أزهار : منال يصير اكلمج شوي منال : اي اكيد حياج .. ودخلتها علاء طبعا استغل فرصة منال وهي رايحه إلى أزهار وقال كلام إلي زينب ودخل حجرته زينب ماقدرت تتحمل كلام علاء واستحت وقالت بتروح (( علاء بس بيبدأ اول خطوه وبيطلب من بيتهم يروحون يخطوبنها وهو اكيد بياخذها وما بياخذ غيرها )) منال ووياها أزهار : وين رايحه زنوب زينب : بروح البيت اوكي امي متصله ليي يلا مع السلامه وراحت منال دخلت أزهار حجرتها وقفلت الباب .. منال بخوف : أزهار ويش فيه محمد أزهار : محمد تعبان صار له اسبوع في المستشفى منال انتين تدرين محمد كليته تعبان من دكلمره واللحين هو بس وحده إلي زينه وبعد تعبت كليته يعني محمد تعبان .. وقعدت تصيح منال حطت إيدها على قلبها بخوف: أزهار ما ادري اني بشي من متى محمد مريض أزهار : من زمان يعني انتين ماتدرين منال منال بحزن : والله ما ادري بشي أزهار : اي يوم اكلمج واقولج مسافر هو كان مرقد مريض شكله ما كان يقولج منال : لا ماقال ليي .. أزهار : لو تشوفين حاله تعبان اني اليوم رحت زرته مع اني توني والده بس ما اقدر اشوف اخويي يموت وما اسوي شي جيت لج اطلبج طلب ماترديني منال تعالي ويايي إلى محمد منال ساكته .. أزهار : ما بننسى لج هالمعروف طول العمر بس يشوفج محمد يمكن يصير احسن منال بحيره : اللحين أزهار : اي زوجي بره ينتظرنا منال : يـــلا منال طلعت من بيتهم ومحد يدري .. أزهار : ماقلتين إلى احد من بيتكم منال : ماعليه خلنا اللحين نروح أحمد كان بروح يزور صديقه في المستشفى .. منال وصلت ووياها أزهار ونزلوا وهي نازله شافها أحمد إلي كان يدور بارك إلى سيارته أحمد متأكد انها منال بس من إلي وياها أحمد نزل من سيارته وراح يشوف أحمد من ورى منال : منـــال منال سمعت صوت أحمد : نعم أحمد راح قدامها : ويش جايه تسوين هني وليش ماخبرتيني منال (( اووف )) : جايه ازور صديقتي مريضه مرقدينها أحمد : ماقلتين ليي بتجين أزهار قربت إلى منال : يلا منال له .. من هذا منال : هذا أحمد : انا خطيبها انتين من منال : صديقتي أحمد روح بعدين بتصل لك .. وسحبت إيد ازهار وراحت وياها أحمد يطالع منال وهي تمشي (( هذي صديقتها .. !! )) وراح وراهم أزهار بصوت واطي : منال بس خلنا نرجع خطيبج لا يشوفج هني منال : امشي ماعليج منه وصلوا أزهار ومنال وإلي سبقهم حسن عشان يخبر الدكتور انه يبون يدخلون إلى محمد حسن : يلا روحوا بدلوا أزهار .. بس الدكتور يقول وحده منكم تدخل منال : اني إلي بدخل أزهار .. وراحت بدلت ودخلت الغرفه ظلام وفي أجهزه على محمد وشكله غيــر منال قلبها زادت دقاته وزاد حزنها هذا محمد حبها .. قربت صوبه وقعدت تطالع في ملامح وجهه تذكرت المواقف إلي صارت بينهم وعصبيته عليها ولهواش .. تذكرت كلامه عالمسنجر وحبه لها منال بالغلط من غير ما تحس حطت إيدها على إيد محمد محمد حس بأحد موجود في الغرفه وحس بإيد ناعمه على إيده وفتح عيونه يطالع .. محمد مانسى شكل منال بعد ما عرف انها نفس البنت هذي إلي اي هذي منال .. محمد شال الإكسجين من عليه وهو يتفس بتعب محمد : مـ ... نـ...ـال منال طاحت دمعتها على خدها : اي اني منال .. محمد ويش صادك ويش فيك ليش ماقلت ليي انك مريض ليش جذبت عليي محمد إبتسم ابتسامه باهته وبصوته التعبان : كنت خايف عليج منال : اووف انزين اللحين انت متى بتصير زين محمد بتعب : ما ادري منال : محمد احبك وصدقني اني ما باكون إلا لك بس انته صير زين محمد إلي زاد تعبه لأنه يتكلم : وأحـ ..مـ...ـد منال : انته ماعليك بس انته قوم بالسلامه اطلع من المستشفى وبقولك ويش بصير .. محمد إذا ما حاولت تكون احسن اني إلي بتشوفني في المستشفى محمد بخوف : لااااء منـ ..ـال كل شي ولا انتين أموت ولا يصيدج شي محمد زاد .. مايقدر يتنفس وغمض عيونه منال خافت بعد ما سكت محمد : محمد .. محمد راحت تركض تشوفهم منال بخوف فتحت الباب : بســــرعه محمد تعبان أذان المغرب يأذن .. وليلة الجمعه أم محمد رافعه إيدها تدعي من كل قلبها تشافي ولدها محمد ومنال دموعها على خدها ووياها أزهار واقفين بره وخايفين على محمد أم هيثم رجعت فرحانه تبشر البيت بولادة أماني .. الكل هناك بس منال ما يدرون عنها أم هيثم اتصلت إلى أحمد ورده مايدري عنها علاء قال لهم يمكن ويه زينب .. أحمد إلي كان معصب حده من تصرف منال وبعد ما راح سأل عن إسم المريض إلي منال قاعده عنده أحمد اتصل إلى هدى هدى : هلا أحمد أحمد وهو معصب : هدى ويش اسم إلي منال كانت تحبه هدى : ها ما ادري أحمد رفع صوته : هــــــــدى تدرين قولي اسمه هدى : ويش دراني يمكن لبنيه ماتبيني اقول اسمه أحمد وهو يصرخ : هدى قولي اسمه لا اللحين اجي لج واراويج بســــرعه الناس تطالع أحمد وهو يصرخ في التلفون بره عند البوابه هدى : اسمه محمد بس ما اعرف الباقي أحمد سكره في وجه هدى (( يعني هذا هو حبيب القلب )) الدكتور طلع من عند محمد أزهار بخوف : ها دكتور ويش فيه محمد محمد : بس تعب شوي لأنه تكلم واجد وهو تعبان .. بس اللحين الحمدلله أزهار : يصير نشوفه محمد : يفضل لا باجر ان شاء الله أحمد قرب ومنال شافته من بعيد وراحت له أحمد : يلا امشي منال : وين اروح أحمد : البيت والله ناويه تقعدين بعد منال : برجع وياها بوصلوني أحمد ويحاول يمسك أعصابه : منال لاتعصبيني وأمشي قدامي منال ماحبت يعصب أحمد ويسوي ازعاج قدام الكل منال : أزهار يلا بمشي اني اوكي .. وراحت أحمد كان يسوق وهو ساكت ومن عيونه باين انه معصب .. وكان يسوق بسرعه حتى منال خافت من أحمد منال (( ليكون عرف انه هذا محمد .. لا ما اتوقع بس شكله عرف )) أحمد راح بيتهم ووقف مره وحده : قومي نزلي منال رفعت راسها تطالعه أحمد : قلت قومي نزلي هني منال نزلت وبس اتأكدت من تصرفاته انه عرف السالفه أحمد عدل السياره وحطها في باركات السيايير ورجع .. منال كانت واقفه عند الباب تنتظره أحمد قرب : إلا واقفه دخلي منال طالعته .. قرب صوبها اكثر وسحب إيدها ودخل وياها كان في أصوات في بيتهم أهل أمه جايين كلهم أم أحمد شافت أحمدومنال من بعيد يمشون ونادتهم يجون يسلمون بس أحمد مارد عليها وصلوا منال وأحمد حجرته وفتح الباب ودخلها وصكه .. منال : هد ايدي ويش فيك أحمد وهو رافع صوته : أنا إلي ويش فيي او انتين منال : أني مافيي شي انته إلي معصب أحمد : تسوين روحج ماتدرين ليش معصب منال ساكته .. أحمد : ممكن تقولين ليي من هذا إلي رايحه زايرتنه اليوم منال ساكته ونزلت راسها .. أحمد قرب صوبها ورفع راسها بقوه : هاا ساكته قولي ليي من هذا منال باعدت إيد أحمد عنها : اوووف شيل ايدك وماباقولك من هذا أحمد رفع صوته : منال أنا للحين مامديت إيدي قولي ليي منال ببرود : عادي مدها .. ومايحتاج اقولك انته تدري من أحمد ماسك أعصابه ويحاول يتحمل منال : تدري انه محمد إلي كنت اكلمه وأحبه وللحين احبه أحمد كان بيعطيها كف بس نزل إيده مايقدر .. أحمد رفع صوته : صدق ماتستحين تروحين بعد تزورينه شكلج نسيتين انج خطيبتي منال : انزين بس اني ما احبك ولا باحبك انته بعد لاتنسى أحمد : منـــــال بس عاد مابتفهمين شكلج .. لكن اراويج على إلي سويتينه وإلي قلتينه وطلع عنها .. وراح حجرة هدى هدى : طق الباب مره ثانيه أحمد راح صوبها وجودها من شعرها : مره ثانيه لا تتبيخين عليي وإذا قلت لج قولي قولي فاهمه هدى : اوووووه هد شعري أحمد : روحي ليها اكي في الحجره وطلع عنها .. أحمد نزل تحت وكانوا كلهم بروحون غرفة الطعام للعشى خالته : ها أحمد وينك حتى ماتجي تسلم لا انته ولا حتى خطيبتك أحمد يبتسم : مشغولين شوي .. عن إذنج خاله بروح شوي أم أحمد : انزين وين منال خلها تجي تسلم وتتعشى ويانا أحمد : تعبانه شوي بتنام .. وطلع عنهم أحمد راح ركب سيارته سمع صوت تلفون يصيح .. قعد يدور الصوت كان تحت الكرسي أحمد شاله هذا تلفون منال .. المتصل علاء رد عليه علاء : ألـــــو منال أحمد : أنا أحمد مو منال علاء بملل : وين منال أحمد : تحت ومخليه تلفونها هني علاء : انزين مابجي هي قايله بتطلع ويايي الليله أحمد : لا بتطلع ويايي .. علاء : اوك مع السلامه أحمد بعد مابنده راح إلى المسجات .. وشاف مسجات سوالف بينها وبين ربعها مسجات عاديه .. راح الصور شاف صور منال وصورة شخص مكتوب اسم الصورة My love .. طالع الشكل عدل وقال اكيد هذا محمد انقهر وبند التلفون وحطه في جيبه هدى تطالع منال : منال ويش سويتين منال : هدى حرام محمد بموووووت هدى : بس أحمد منال : ويش أحمد هو السبب فرق بيني وبينه هدى : بس منال : بس خله يتحمل هو السبب ويتحمل إلي اسويه ومحمد مستحيل اخليه هدى : لاتنسين انج مخطوبه منال : وانتين بعد لا تنسين اني مجبوره على هالخطوبه وأخوج ما احبه وعمري ما باحبه هدى سكتت ونزلت راسها منال حست بهدى : هدى آسفه ماقصدت الكلام بس فاهمتني انتين هدى : اي بس منال لاتنسين أحمد اخويي بعد .. ومايعجبني إلي يصيده قطع كلامهم صوت تلفون هدى .. هدى : هذا أحمد متصل لحظه هدى : ألـــو .. نعم انزين باقول ليها .. قلت لك انزين اووف هدى باعدت التلفون عنها هدى : منال يقولج أحمد يلا نزلي ينتظرج تحت في السياره منال : وين ان شاء الله هدى : ما ادري اخذي كلميه منال : ألــو أحمد : منال يلا نزلي منال : بتوديني بيتنا أحمد : لا عمري بوديج مكان ثاني بيتكم الليله مافي يلا نزلي منال : سوري ما بروح مكان ثاني إذا بيتنا اللحين بنزل ومكان ثاني ما ابي اروح أحمد عصب : منال قلت لج قومي تعالي لا تخليني أعصب ازيد كفايه سواياج ولا تخليني اللحين اتصل إلى ابوج اقوله عن إلي سويتينه اليوم منال متأكده ان أحمد ما يسويها وهي مصره ماتبي تروح : سوري قلت لك ما بطلع باي .. وبندته أحمد نزل التلفون وشغل سيارته (( وش أسوي في هالبنيه تعبتني ماتوقعتها تكون جذي ..)) منال دورت تلفونها ماحصلته قالت اكيد طاح منها في السياره حست بتعب بعد المدرسه والمستشفى وصراخ أحمد قالت إلى هدى بتروح تنام وياها .. وراحت أحمد بعد ما دار في الشوارع جم ساعه وبعد ما هدأ شوي قرر يرجع إلى منال إلي خلاها بروحها .. يرجع ويقعد وياها ويتفاهمون ويحاول يتقرب منها اتصل إلى هدى بس ما ترد بعد ما خلتها منال تسويه صامت .. وناموا ثنتينهم كان يبي يشوف منال إذا تبي عشى يجيب لها وله بس محد يرد رجع البيت وكان بس صوت الخدم وهم ينظفون .. راح فوق حجرته وفتحها بس ما شاف منال .. راح حجرة هدى وطق الباب هدى قامت تشوف أحمد : وين منال هدى بهدوء وباين عليها نايمه : منال نايمه أحمد وهو رافع حاجبه : ليش ان شاء الله ما نامت في الحجره هدى بملل : والله صراحه اني ما ادري بكم واللحين مو وقته خلني انام وباجر إذا قعدت وشفتها سألها تصبح على خير .. وصكت الباب في وجهه أحمد انقهر حد حده من حركة منال .. وراح حجرته ــــــــــــــــــــــــــــــــــــــــــ يــلا البارت طويل وتعبت واني اكتب فيه ابي اشوف الردود انتــظروني ان شاء الله ما بتأخر

السلام ... دخلت اشوف القصه شفت ردودكم إلي بدونها ماتكون القصه حلوه هههه ولا تزعلين.. يعطيج العافيه.. ومتحمسه للنهايه.. دمتِ بخير ألف ألفـ شكر لج لأنج رديتين .. جان من البداية رديتين لا تستحين شكرا عـ المتابعه .. ابي اشوف ردودج مره ثانيه أشكرج مره ثانيه عـ الرد <<<< لا جان مارديتين بعد فديتج تسلمين عـ الرد مره ثانيه لا تتأخرين الله يسلمج مشكوره عالمتابعه والرد الدائم هههههه عجبتني ع كيفج >>> تبي جم جزء !! ماعندي وقت جان الأجزاء أكثر .. والقصه حلوه بمتابعتك وبمتابعة الأعضاء .. تسلم عـ الرد الله يعافيج ويقويج ويخليج مشكووره عـ الانتظار والمتابعه أول شي الحمدلله عـ السلامه .. >> اقول وينها ما اشوف ردودها مسافره ها مشكوره عـ الإهتمام والرد يطلـقون .. مايصير !! أحمد سخــيف ... أني اكثر منج بتوحشني القصه والأكثر (( محمد ومنال )) تســـلمين عـ الرد الدائم منج نــــــــــــــــــــورتــــــين .. والله وحشتني ردودج الحلووه .. بس زين النت اشتغل عندج هـلا بج مره ثانيه وتسلمين عـ الرد المميز والحلوو الله يسلمج عـفووره شكرا عـ الرد .. ـــــــــــــــــــــــــــــــــــــــــــ (( مافي بارت )) بس حبيـت اشكر إلي ردوا ألفـ شكر مايقصرون متابعين دوم وإلي مايردون (( لا تستحون ههه )) عادي .. البـارت ان شاء الله نهاية الإسبوع (( بارت طويل وفي أحداث وايد )) انتـــظروني