Bahraini_In_UK Posted نوفمبر 26, 2003 Report Share Posted نوفمبر 26, 2003 سلام..... حبيت اشاركم هالقصه الي وصلتني عن طريق الايميل و انشاالله تعجبكم ( قصة وفاة حبيبي ...النمرة الجريحة) أخط وأسطر لكم قصتي بعبراتي وعباراتي ...بأحاسيسي ومشاعري....إلا عشتها بروحي وبكياني..بآهاتي وعذابي... مـــات حبيبي ....مات حبيبي الغالي...مات إللي كان يحس فيني ...مات إللي كان يهتم فيني....مات إللي كان يحبني... راح الغالي... راح وخلاني... راح وخلاني عايشه في بحر ضياعي... والحمد لله واللهم لا اعتراض ...الحمد لله انه راح وهو راضي علي... ما أحلاه من إحساس وما أجمله من شعور لما يروح عنك إلا تحبه وهو راضي عليك... كنت دلوعته.... لكن اكثر في آخر أيامه كان بزيادة يهتم فيني... صح انه كان دايم ينازعني ويعصب علي ...لكن عمره ما مــد يــده علي... كان يرفعها لكن ما لمستني إلا ليحضني أو لما يبوسني... كان رجل عمري ما شفت مثله ولا بشوف مثله أبد ...صدقوني أبد ...كان غير،،، كان طيب,,, كان حنون,,, كان ملاك... صدقوني كان غير... الله يرحمه ويغمد روحة الجنة ...قولوا أمين... وكان هاليوم يوم الاثنين بتاريخ 23/7/2001 م ، كنت صاحية الصبح من نومي وكان عندي موعد مستشفى، وكنت متأخرة وانتو تعرفون إلا يكون متأخر كيف يكون حاله ؟؟؟..... فتخيلوا في هذا اليوم فقط إلا ما كلمته فيه ، كنت دايم لما أصحى من نومي أكلمه واصبح عليه ، ويدعي لي بالسلامة لما أظهر.. بس بها اليوم طلعت بدون ما أشوفه بدون ما أكلمه قلت يمكن نايم أو أيفطر في الصالة كالمعتاد... المهم أنى رحت المستشفى ولما وصلت أتصلت فيني أختي وهي تبكي.... وتقول: أن حبيبك نحاول نصحيه ما يصحى نكلمه ما يرد علينا؟؟!!!؟؟؟....وترجع تبكي.. قلت لها: أسكتي عادي إن شاء الله ما فيه إلا العافية؛ لانه هو مريض... وهالحاله تمر عليه دايم وبعدين يقوم ما فيه إلا كل خير....قالت: الأهل بيأخذونه للمستشفى قلت لها أوكى وخبريني بالا يصير ؟؟؟... وسكرت الخط....!!! تعرفون شو إلا صار لي ؟؟؟صابني ألم في بطني... ألم ما صابني من قبل... ورجفة غريبة هزت أوصالي... فقعدت ما قدرت أوقف رجلي ما شالتني... وزادتني بنت خالي عذاب لما قالت: أشعر بأن هالمرة غير؟؟!!؟؟ رديت عليها كالنمرة برد عنيف بلفظ شديد...ودخلت على الدكتور وأنا أرتجف سألني شو فيك؟؟ قلت له تعبانه... وهو ما يدري ما يدري بأن أهلي وناسي حبيبي الغالي بيروح عني من غير ما يودعني... ولما خرجت ، خرجت بسرعة راجعه عشان أطمئن على الغالي ...واتصلت بأختي قالت ما اعرف خذوه للمستشفى وأن شاء الله خير ... وأنا في طريقي بعد ربع ساعة ( لان المستشفى بعيد عن البيت تقريبا بثلث ساعة والزحمة كانت بزيادة غير عن أي وقت كأنها تريد تبعدني عن الغالي )...اتصلت أختي ....كنت خايفة أرد عليها ...أعطيت الموبايل بنت خالي، فردت عليها .... وشفت الصدمة على وجهها وسكرت ...وبدون ما تحط عينها بعيني قالت: أختك تقول انه مات...قالت أنه مات.!!؟؟؟.. _كنت أتمنى لو كنت أحلم فالحلم يمكن يكون بالعكس أو أن عمره يطوووول.._.. قلت لها: هاذي غبية... هم دايم يتوقعون جذه وبنت خالي معاي قالت صح أكيد أختك غلطانة.... بس كنت أشوف بعينها شيء ثاني... الصراحة ما أعرف كيف وصلت ... وكانت سيارات الأهل كلها موجودة... وقفت ...وما أعرف إذا السيارة كانت شغالة وألا لا وما أعرف إذا هي في موقف وألا لا....لاني ما كنت حاسة بنفسي والله ما كنت حاسة بجسمي ...ودخلت من الباب الخلفي عشان أتأكد... فشفت الخادمة تضحك ففرحت قلت الحمد لله السالفة مو صدق لان لو كانت صدق .. لو الخادمة ما راح تبتسم في وجهي...ولما دخلت...شفت أهلي كلهم يبكون ....بيكون ...فما بدر مني ألا أنى طحت في حضن أمي وأنا ابكي أصيح وابكي وابكي ...والكل يشاركني... مات حبيبي... مات الغالي.... مات أبوي ...مات أبوي الغالي...ربي يرحمه ...الله يرحمه .... *تريدون تعرفون كيف لقوه ميت؟؟؟ كان مصلي الفجر؛ لانه نسى يشيل عكازته من عند باب الحمام... ورجع ينام ...وكان ميت وهو على جنبه الأيمن وماسك بيده 30 درهم.؟؟!!!؟؟؟؟.. *تعرفون شو سالفة 30 درهم؟؟؟ في يوم السبت.. طلب أبوي مني أن أوصله لبيت أخته (عمتي) لكن أخواني الله يسامحهم رفضوا لأنهم ما يحبون أروح الفريج ( المنطقة ) إلا ساكنه فيها عمتي...؛لانه فريج يخوف بالنسبة لهم... فحاولت معاهم وقلت لهم أن أبوي واقف برع في الحوش ويبيني أوصله... رفضوا وقالوا لي انه راح يتعب ويرجع داخل؟؟؟!!! .....كرهيتهم... وقلت لأمي هذا الكلام ما يصير ؟؟!! قالت : شو العمل مع إخوانك والسيارة يهددون بياخذونها عنك لأنها مو لك!!...قلت لها: عادي بروح في تاكسي إذا هم خايفين على سياراتهم ...فقالت : تعوذي من الشيطان وأرجعي.. فما صار بيدي شيء ألا أنى رحت لأبوي واضطريت اكذب عليه وقلت له: أن أنا أتصلت ببيت عمتي ..وعمتي ما ردت علي أكيد هي مش موجودة بالبيت...فرجع وحسيت به..فيه ضيق وحزن...زعلت وااايد لزعل أبوي الغالي... في يوم الأحد.. العصر قلت لأبوي يالله نروح لعمتي بعد ما أتاكدت أنها بالبيت ...وقلت لامي ما راح أزعل أبوي عشان أرضيهم..والحمد لله أني تصرفت ...عشان أبوي يكون راضي علي .. ( مو كفاية أني لما كنت أشكى له كان يسمعني ما فيه أحد كان يحس فيني لما أزعل ولما أضيق إلا هو ....لكن ما كان يقول لاخواني شيء لانه كان يقول لي أن مو بيده حيلة وأنه كبر وصار عبء عليهم ...لكني كنت أرد وأقول أنت الأصل أنت إلا ربيت وكبرت وأجرك عند رب العالمين)... المهم أنى وصلت الوالد ، ورحت أقضي بعض المشاوير عشان يأخذون راحتهم..وبعد المغرب رجعنا البيت ... وكانت ليلة الاثنين ..ليلة وداع الغالي..... تدرون انه _سبحان الله _ كأنه كان حاس ، وكان يريد يودع إلا يحبهم.. فكأن الله أجل عمره يوم عشان يودعها... وكانت هاليلة الوحيدة والأخيرة إلا فيها سهر معانا لحد الساعة 1:30 ؛ لانه كان متعود ينام على الساعة عشر ...وتدرون كنا نضحك ونسولف...وكنت أتحرش فيه ...والله.. والله... أني اذكر وجه وهو يضحك ويبتسم لي ...فديت وجه وفديت رسمه وفديت صورته... (( وتدرون لما قالوا لي إن 30 درهم كانت بيد أبوي... قلت لهم أنها لي... وحلفت لهم أنها لي ...كنت حاسة أنها لي... ما أعرف كيف بس كانت لي؟؟ لكن أخواني وأخواتي قالوا: أن أبوي كان دايم يقعد عند الباب ويعطي الفقراء والهنود...فأكيد كان يريد يوزع فلوسه كالمعتاد... قلت لهم ...لا ... لكنهم ما صدقوني... و رحنا اليوم الثاني من وفاة الغالي لبيت عمتي أنا وأخواتي ... فقالت عمتي : وين ( النمرة) وينها .... وحضنتني حيل...حيل... وهي تبكي وتقول: فديتك وفديت أبوك... كان دايم يقول أن إخوانك مضايقينك ، وانك دايم تشكيله وأنه كثير زعلان من زعلك..( لكن صدقوني ما كان قصدي أزعله ابد والله)... وقالت عمتي: أنه أخذ منها 30 درهم قال هذه أريد أعطيها لبنتي النمرة ؛ لأنها هي الوحيدة إلا كانت تهتم فيني ... تخيلوا الصعقة إلا أصابت أخواتي ...لاني قلت لهم أني حاسة... حاسة لكن ما صدقوني.. وقالوا أنهم تبرعوا فيها ... وراح يعطوني غيرها.... قلت لهم ما أبيها... أنا كنت أبي شيء كان ماسكنه بيده شيء من ريحته....)) فديته وفديت ريحته ... ما قلت لكم ما أحلاه من إحساس وما أجمله من شعور لما يكون راضي عليكم إلا يحبكم...قبل ما يروح عنكم... فحاولوا يا أخواني وأخواتي إن ما تزعلون والديكم ... وحاولوا ترضونهم... مع أني كنت وايد مقصرة في حقه... لكن أحاول أرضي الوالدة لان مالي في الدنيا غيرها... والسموووحه على الاطاله ...لانه كان في صدري ثقل كبير وكنت أحاول أزيحه و ألقى من يحس فيني ويفهمني ... وعلى فكره... وبعد فترة من وفاة حبيبي الغالي ....كنت مضايقه وايد ... وتدرون أن ما عندي أحد أشكى له ... ولما نمت في الليل وضيقي معاي حلمت...تعرفون شو حلمت؟؟؟ حلمت أن أبوي الغالي كان حاضنني حيل وأنا كنت أبكي ...ومو مصدقة أني شفته وقلت له أني أحبك واااايد وتولهت عليك... فرد علي وهو يبتسم ويقول لي وأنا بعد أحبك.... آه آه .. شوفوا يعني أبوي بعده معاي ويحس فيني... الله يرحمه...قولوا آمين..... Quote Link to comment Share on other sites More sharing options...
مفرفش Posted نوفمبر 26, 2003 Report Share Posted نوفمبر 26, 2003 مشكور اخوي ويعطيك الف عافيه علي الموضوع الحلو تحياتي لك Quote Link to comment Share on other sites More sharing options...
حزن Posted نوفمبر 26, 2003 Report Share Posted نوفمبر 26, 2003 مشكور على القصه Quote Link to comment Share on other sites More sharing options...
تفاحة Posted نوفمبر 27, 2003 Report Share Posted نوفمبر 27, 2003 مشكور على القصة الحلوة Quote Link to comment Share on other sites More sharing options...
Bahraini_In_UK Posted نوفمبر 30, 2003 Author Report Share Posted نوفمبر 30, 2003 حاضرين لكم وانشاالله تشوفون الاحسن Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.