Jump to content
منتدى البحرين اليوم

قصة روعــــ ولد العم ـــــــة ...........


Recommended Posts

وينج حبيبتي تأخرتي علينا تردين وما تحطين الاجزاء الباقيه

الي عنده القصه يحطه

ا تعبنا واحنا ننتظر

حتى صرت انسى الاجزاء الي طافت

 

تقبلوا ارق تحياتي

اعماق المشاعر

Link to comment
Share on other sites

  • Replies 211
  • Created
  • Last Reply

Top Posters In This Topic

أولا حبيت أشكركم على هذا التواصل الدائم وتسلمون لي والله والحين تفضلوا تكمله الجزء السادس عشر مع الجزء السابع عشر

 

 

 

تكمله الجزء السادس عشر:

 

سمر: ااااااااه براحتك انزين انه بروح حق ابوي ..اتي ويايي؟

حمد: شنو كشته اروح وياج..اصلا مو كل حزة نروح لهم ويمكن انتي بعد ما يدخلونج..

سمر: ها ها ها انه .. سمر الذري ما يدخلوني .. يالله حمد قوم وياي

حمد واهو يطالع الاوراق: مااقدر سمور لو يايه من قبل جان رحت وياج مشغول يالغاليه

سمر: ااااااااااااه اخليك عيل .. ارعى الحلال

حمدك هههههههههههههههههههههههههههههه

سمر: لا يفوتك يا حمد والله كل واحد من السكرتيريه يطالعني باسخفاف بس اقول له اسمي يقول لي صبحج الله بالخير ياانسه سمر هههههههههههههه والله انه رزة ولا ادري

حمد: هههههههههههههههههه الذري وشتبين بعد

سمر: هههههههههههههه أي والله يالله بخاطرك

حمد: في امان الله

 

طلعت سمر من مكتب حمد بعد ما حفظت كل تفصيل فيه .. ويهه ثيابه شكله حركات يده .. كل شي .. تنهدت من قلب وكملت دربها بعد ما حقرت منّا وراحت صوب المصعد

توه المصعد بيقفل الا ويفتح مرة ثانيه سمر كانت تعدل شعرها بمرايا المصعد وشافت اللي واقف بره المصعد.. يعقوب ما غيره .. اهو ظل واقف مكانه يطالعها من المرايا وقلبه يرتعد من كثر شوقه لها .. صار له اكثر من شهر ما شافها .. حتى سمر اللي غطت مشاعرها بنظرات احتقار خفيفه .. قلبها دق لولد عمها من دون ما تدري السبب .. وحشها .. اشتاقت له ولسوالفه ..بس سرعان ما تجاهلت هذا الشعور والتفتت له

سمر: بتدخل ولا شنو؟

يعقوب: بلى

توه بيدق على زر الطابق السادس وشافه مضوي

يعقوب: وين رايحه

سمر: بشوف ابوي

سكت يعقوب ولا تكلم وشغل حاله بالاوراق اللي حاملهم .. سمر احتر مخها من كثر ما تفكر .. صج انه عديم احساس ما سأل عن اخباري شهر من اخر مرة شفته واهو ولا حاس .. وتذكرت ليله رده حمد والكلام اللي دار بيناتهم وحست بالندم بس قلبها ماطاع بسرعه رفعت راسها مثل ما نزلته ولا اعتبرت حق يعقوب .. اهو إللي ياب حق روحه الكلام مو انه..

تعتقدون يعقوب ليش كان ساكت .. يقرى الاوراق... لا والله .. يعقوب كان ساكت عشان يقدر يسمع افكار سمر ويتصنت على دقات قلبها واهو خايف لا تنسمع صوت دقاته اللي كسرت صدره وناويه عليه بالفضيحه .. ما صدق انه ممكن يقعد معاها بمكان واحد مثل المصعد وما يقدر يكلمها .. صخ يعقوب واهو يتنفس عطرها .. كله دلع شقاوة وشطانه بنات بس مو أي بنت هاذي سمر .. اللي يخاف عليها من النسمه لا تجرحها.. وحشتيني سمر.

 

وقف المصعد وطلع يعقوب قبل سمر وكل اللي قاله : اشوفج على خير .... ورااااااااااح توها سمر بترد عليه بس ما طلع منها الكلام وطلعت من المصعد لا يسكر عليها مرة ثانيه .. سمر حست باحباط لكن ما تدري شنو سببه .. يعني معقوله بتشتاق لولد عمه هالكثر .. والله حمد مااشتاقت له جذي .. هزت راسها تبعد عنها هالافكار ونفخت عمرها لمكتب الاستعلامات...

نفس الحركه ونفس الاستخفاف حصلته ونفس التقدير اللي لاقته من بعد الاستخفاف دخلت على مكتب ابوها اللي وصله خبر من حمد قبل لا تدخل عليه

بو حمدان: هلا هلا والله بحبيبه قلب ابوها .

سمر دلعها كبير عند ابوها لذا راحت تقعد عند كرسي ابوها: هلا يوبا شلونك حبيبي ان شالله بخير

بو حمدان حس من كلامها انها تبي شي وقال في خاطره .. والله لالعوزج يا بنت نجاتو حياله مثل امج

بوحمدان: تمام حبيبه قلبي تمام .. الا ما تقولين لي اشمييبج هني الشركه

سمر: ولييييييييه كل من رحت له سالني نفس السؤال راعيه حلال واتطمن على حلالي ما يحق لي

بو حمدان: الا ويحق لج واللي يقول خلاف اقطع لسانه

سمر: الله عليك يوبا محد مثلك

(...................) حل السكون بالمكان وابو حمدان شغل نفسه مرة ثانيه بالاوراق اللي جدامه وسمر تمت تتحقرص تبي تقول حق ابوها اللي براسها بس ما تدري شلون.

بو حمدان : شلون المدرسه

سمر: ابخير

بو حمدان . اممممممم تمام

(..........) صمت اخر كسره صوت سمر واهي تنادي ابوها

سمر: يوبا

بو حمدان: عيون ابوج

سمر: بتتاخر وايد بشغلك

بوحمدان: أي حبيبتي ..انه اتصلت في امج وقلت لها اني ما بيي البيت حزة الغدا

سمر بخيبه : اهاااااااااااااا

بوحمدان: ليش في شي صاير

سمر: صاير؟ شنو صاير ما صاير شي

بوحمدان: وانتي بتمين هني تطالعيني وانه اشتغل

سمر: يوبا الحلال الحلال

بوحمدان سكت عنها: على كيفج

سمر تمت تتحقرص في خاطرها.. انه طول الدرب وقاعده اتدرب عشان اقوله ويوم دخلت له ضاع مني الكلام اللحين شنو اقول له والله حاله الله ياخذ ابليسج يا سارو كله انتي اللي تحطيني بهالمواقف... بس سمر تشجعت وفتحت الموضوع جدام ابوها.. واهو ولا معبرها

سمر: يوبا طلبتك طلبه

بو حمدان من دون ما يرفع راسه: لبيه يا بنيتي

سمر: يوبا .... ابي اسوق سيارة

بو حمدان رفع عينه على طول : ليش؟

سمر: شنو يوبا ليش ؟؟ خلاص ناصر وكاهو خلص تدريب .. وعنده سيارة .. انه بعد ابي .. انه بنت وراي مشاوير واحس اني انغص عليك ويا السايق انه ابي اللي يريحك يوبا

بوحمدان: بس خلاص خلج وياي بالسايق انه مرتاج جذي

سمر وشوي تفقد اعصابها: يوبا يالله عاد انه ادر ي انك ساعات تتورط وياي بالسايق بس ماتقول احسك يوبا انت ماقلت انه مثل امك.

بو حمدان يضحك: لا ما قلت

سمر باستعجاب: يوبا قول والله انك ما قلت لي

بو حمدان: يالله عاد والله اخوانج صاجين يوم يقولون انتي ما تنعطين ويه .. مافي سواقه ولا سيارة زين؟

سمر: ليش يوبا زين والله ربعي البنات كلهن عندهن سيارات الا انه

بوحمدان: وانتي من متى عندج ارفيجات؟

سمر بتعجب: هااه؟؟ من زمان بس انتو ما تعرفونهن

بوحمدان: لا صج عزميهن البيت عشان تكون بيناتنا معرفه .

سمر حست خلاص انه ماكو امل : يوباااااااااااااا

بو حمدان بصوت ابوي ينهي الموضوع: سمر .. بس عاد اخوج ريال لا تحطين عقلج بعقول الرياييل لا باجر بتقولين لي تبين تسافرين بره تدرسين؟

سمر فكرت انها تجرب حظها بهاذا الموضوع بس اهي تعرف نتايجه مسبقا: وليش انت ما تفكر انك تخليني ادرس بره؟

بوحمدن: هااااه ؟؟ أنه يايب لي بنت ولا صبي . .أقول سمر .. نزلي للسايق لا اللحين احذفج من الدريشه ولا اسوي فيج السوايا وافتح الموضوع جدام امج واخليها تهذر عليج ليما يطلع مخ من مخج

سمر والحزن لابسها: انزين..انزين لا تعصب .. حشى لو طالبه من عندك القمر جان يبته لي .. لكن من يوم ورايح لا تقول لي سمر ييبي لي شي ولا سمر حبيبتي قعدي وياي خل تنفعك شيبتك نجوت.

بو حمدان: نجوت الشيبه تسواج وتسوى خوانج كلهم يالله بسرعه البيت.

سمر: انزين انزين ... يالله انه بمشي يا ضاري الذري

بوحمدان واهو منزل راسه يطالع اوراقه: صكي الباب من وراج مااحب التيارات الهوائيه

سمر تقول بصوت غير مسموع .. الله والتيارات عاد ..

بوحمدان: شنو قلتي

سمر فزت من مكانها : لالا ولا شي يالله مع السلامه

بو حمدان: في امان الله

 

بس طلعت سمر من المكتب ابو حمدان رفع راسه واهو يضحك .. يطالع صورتها على المكتب واهي عمرها 12 سنه يا بعد عمري هالبنيه والله بس وايد شيطانه .. انولدتي بين الصيبان وتربيتي مثلهم بعد ..

 

ردت سمر البيت وما بغت تتغدى .. امها فتحت وياها تحقيق بس يوم سمر قالت لها ان ابوها موصيها تزوره عشان يوريها الشركه حق تقرير المدرسة..

نجاه: حشى والله المدرسه ماصار لها يومين وبدوا يطلبون التقارير

سمر: يمه هاذي المدرسه شتبيني اسوي اقطع هدومي يعني

نجاه : بس عاد كافي .. ياحبج حق الافلام.. ما تبين غدى

سمر :لا ماابي كليت وايد بالفسحه

نجاه: وين ماكله ما تشوفين ويهج كل ما يه له اختفى

سمر: يمه بخاطرج

نجاه: الله وياج

 

واول ما راحت سمرغرفتها اتصلت في ابوها واتفقت وياه على الموضوع عشان لا تتوهق ويا امها مع انه لعوزها ليما وافق.

 

فتحت تلفونها وشافت ان فيه فويس مسج من عند سعد اللي كانت حافظه اسمه بالغريب - نظرا لظروف تعارفهم- وشافت انها اغنيه عبدالله الرويشد .. طمني بس وابتسمت من قلب وقالت ... هاذا وانه كل ليله اتكلم وياك .. سمر كانت عندها معزة خاصه حق سعد اللي عمرها ما ملت واهي تكلمه ولا ليله بالليالي حتى انه صار ينافس سارة بالغلا عندها بس سمر خلت سالفه سعد سر بينها وبين نفسها. واهي بدورها دزت له فويس مسج باغنيه عبدالله الرويشد .. مساله وقت وسكرت تلفونها ونامت من التعب.

 

 

 

الجزء السابع عشر

=============

 

اليوم اليمعه .. يوم التجمع العائلي لعوايل الذري كلها .. الا زاهيه وزوجها مبارك لانهم كانوا مسافرين لندن سمر اليوم كانت ناويه تصدمهم كلهم باللي راح تلبسه .. جلابيه من عند خالتها ام يعقوب اللي شرتها لها يوم سافرت الامارات قبل مده واهي للحين ما لبستها وقالت بخليها ليما تتيمع كل العوايل .. سارة اكيد تدري عن السالفه واهي بعد بتشارك سمر بحركتها

 

الكل كان حاظر . .الا يعقوب ( خانت حيلي) ما يصبر يقعد بمكان واحد مع سمر يطالعها واهي ولا تعبره .. على عكس حمدان اللي امبين انه مل من الانتظار وبيكلم ابوه مرة ثانيه عشان سالفه سارة بنت عمه اليوم .

 

يعقوب كان في بيتهم واهو يتقلب من القهر على فراشه واخر شي زفر زفرة ولا منها....... اوووووووووف انه ليش حاكر روحي .. اليوم اليمعه وام زيد الطباخه بتسوي شوربه لحم على ذوقي وانه هني ميت من اليوع عشان الخايبه سمر والله مااخليها تستانس بالغدى اليوم انغص عليها. قام وغسل ولبس الكندورة اللي امه اشترتها له بنفس السفرة وراح بيت عمه بو حمدان.

( صدفه مووو)

 

ما تتخيلون الترحيب والاعجاب اللي حصلوه سمر وسارة يوم نزلوا واهم لابسين اللي لابسينه ..كندورة سمر كانت فرا مع عناقيد من الخرز تتدلى وكانت مفتوحه عند الركبه لبست سمر معاها طقم ذهب خفيف وخلت شعرها هبوب بطوله .. ام يعقوب لمعت عيوناه على سمر وقعدت تفكر ليش ما تخطبها حق يعقوب .. حمدان مثل ما تتوقعون ساح على بنت عمه االلي كانت ولا اروع .. كندورة سارة كانت حمرا مخلوط باسود .. مثل العناقيد من الخرز والخيوط المتدليه وكانت لابسه طقم ذهب ابيض وشعرها اللي يوصل لاتافها كان مفلول .. بس سمر غلبتها ليش ان سارة اطول من سمر بوايد وطول سمر مقبول. والكندورة كانت عليها ولا اروع .. ام حمدان تطالع سارة بفخر واهي تفكر فيها .. زوجه ولدي ولا احلى الله يعينج ياام حمد ان عرفتي عن خطوبه حمدان وسارة.. حمدان مافارقتعيونه سمر الي لاول مرة من ردته من السفر حس انها كبرت وصارت بنت مثل باجي البنات .. بس سرا نمالتفت لسارة اللي كانت مثل الاثير بالسحر .. حسها وايد قريبه منه وانه يعرفها على الرغم انهم ما يتكلمون وايد مع بعض تعبا لطبيعه سارة الخجوله ولانها ما تبي تتدخل بحمد عشان سمر..

 

وصل يعقوب بيت عمه واهو ميت من اليوع ومن الارتباك ..واقف برع عند سيارته الكروزر واهو متردد.. بس بعدين صمم ... والله ان سمر تكلمت له الا يراويها الشغل العدل .. بيحذفها في مسبح بيت عمه ولا عليه من احد .. جب زين والله وانك بتحذفها ( كل الكلام مر في خاطر يعقوب) يعقوب سمى بالرحمن ودخل البيت اول ما دخل يعقوب راحوا له الشباب يحيوونه ويباركوا له على الخروج من العزله واهو يضحك من خاطر وسمر وسارة كانن مشغولات ويا خالاتهن بالسوالف ..

 

ناصر: هلا والله هلا بولد العم .. اسير البرج

يعقوب: هههههههه هلا فيك

مشعل: وينك يا يعقوب والله انك مصختها صار لنا مده ما شفناك ولا ييت ويانا الحداق ذيج المرة

راشد بحزن: بعد احد يذكر ذيج الطلعه .. مالت عليك مشعل.

يعقوب: اخلي الفراش واروح حق الزفرة .. مينون انت

حمد: تعال تعال عنهم ماعليك منهم ذيلا بايعينها ومخلصين

ناصر: كل تبن زين

حمد يطالع ناصر من فوق لانه اطول منه وناصر حس بالاستخفاف وعدل من موقفه

ناصر: just jurkin just jurkin

حمد: اسمها joking يالفالح

ناصر: وت ايفير سي ويت ايفير

يعقوب والباجين ذابوا من الضحك على نصور ولغته التحفه هاذا وناصر معزم يدرس باميركا بعد الثانويه.

راشد: اشفيك يعقوب لابس دشداشه اماراتيه الكويتي ما يعجبك

يعقوب: والله كيفي الاماراتي اخف من الكويتي وخبرك الدنيا ثلج بره

ناصر: ايو الله انه اليوم قلت بطلع بشورت بس خفت على سارة لا تنغرم فيني وبسيقاني الحلوة

يعقوب: هههههههههههههههه سيقان اشششششششش اسكت لا تعلم احد ترى نجوى فؤاد بترفع عليك دعوى

ناصر: خلها اصلا اهي من زمان متحذفه فيني هههههههههههههه

 

ودخل الكل الى المجلس اللي يقعد فيه الكل الحريم والرياييل بس باطراف .. أول ما دخل يعقوب لفتت انتباهه بنت عمه سمر واللي عليها .. ما صدق حاله اهي لابسه اماراتي واهو لابس اماراتي.. يا ويل حالي من الصدف ..الخسارة فيج ياسارو يالقلاده كل شي تقلد جان انه وسمر مثل الشي والكل علباله متفقين!! يعل عدوينج اليهد يا سويرة ..

سمر انتبهت ليعقوب وفجت عيونها بوسعهن .. يحليييييييييييييييييييييييييييييله والله وانه اينن بالكندورة... ي

سارة قرأت افكارها: يحليله اخوي اينن بالكندورة

سمر ما ردت لانها تايهه بوسامه ولد عمها

سارة: سمر .. هوووووووووو وينج

سمر: هاا هني

فكرت سمر شوي .. شهالصدف ولا ........

سمر: سارو .. لايكو ن قلتيله ان احنه متفقين على الكندورات واهو قام رز ويهه

سارة: لا والله حشى علي اصلا انه اليوم طلعت بعبايتي ولااحد شافني شنو لابسه وييتج على طول.

سمر واهي محتارة: الله والصدف

سارة واهي تبتسم بكل خبث على بنت عمها: أي والله

 

 

على الغدى الاهتمام كان كله عند يعقوب ويا عيال عمه نصور ماخلاه بحاله واهو كل ساعه يقول له ان بعد الغدى بيدندن له بالاغاني الاماراتيه ويساله عن ذوقه بس يعقوب المغني الاماراتي اللي يسمع له اهو حمد سالم العامري بس لان ناصر ما يعرفه خلاه يتحقرص لين ما يحزره.. وسمر كل دقيقه ترفع عيونها على ولد عمه تبوق نظرات عليه ويعقوب ينتبه لها وتنزل عيونها ... ليش لازم يكون تصرفه خايس وياي لكن اهو الخسران مب انه.. يعقوب حس ان بنت عمه غير اليوم وصار عنده امل انهم يتصالحون اليوم مع انه ما كان مقرر جذي اول ما دخل البيت بس قرر انه يفض النزاع بينه وبين سمر..

 

مشعل حتس بالتوتر بالجو من لبس سمر ويعقوب بس حاول انه يطفي بعض ال " الملاغه " بالجو مثل ما ينعرف مشعل عندنا بالقصه واهو يفتح موضوع عن جد كان له حدين .. خير وشر

مشعل: الا اقول يا يعقوب.. شحال اربيعتك الاماراتيه

يعقوب استغرب بس كانت فرصه وما يبي يضيعها على نفسه من بعد ما شاف سمر اللي انتبهت حق كلام اخوها.. غيره ولا..

يعقوب واهو يبتسم ابتسامه ساحرة: مو شغلك كمل غداك ومااظنه مو ضوع ينفتح على الغدى جدام الحريم

لكن يعقوب يعرف ناصر اللي ما راح يسكت والكل ساكت عنه وسوالفه

ناصر: اهاااااااااااااااااا انه اقول .. لابس دشداشه اماراتيه وكل كلمه والثانيه يتفدى الناس فيها ... اثاريه طالع لي بره الكويت بالمغازل

يعقوب: شو مغازل ما تعرف ترمس

ناصر والغيرة ماخذته: يا ويل حالي انه ترمس .. شنو ترمس بعد؟

(يعقوب يعرف يتكلم اماراتي لانه يسافر وايد هناك وعنده ربع بالامارات)

 

بو حمدان يقطع الفوضى اللي صايرة : لين رحت الامارات بتعرف

ناصر: عليك نور يوبا انت قلتها متى بنروح الامارات.؟

بو حمدان: انت اشفيك الكل قارصك .. توها المدارس فتحت اعنبو خل عطله الربيع اتيي..

ناصر: انزين يعقوب.. شسمها

يعقوب واهو يطالع سمر من طرف عينه: اسمها احلى اسم بالدنيا ( يفكر في اسمها )

راشد: يالله عاد يا يعقوب ما صارت حاله ذليتنا ذل ..

يعقوب يتسند على الكرسي ويبتسم بشاعريه: اسمها ظبيه

ناصر وراشد بنفس الوقت يودوا على قلوبهم: يا ويل حالي من ظبيه

سمر ردت على ورى .. يحب اماراتيه

بوحمدان: اوص يعقوب علامك صرت ياهل مثلهم

يعقوب: اسف عمي .. ماقدرت اني احبس شعوري .. لازم افضفض لاحد

بوحمدان: هههههههههههههههههههههه

يعقوب ما يعرف وحده اسمها ظبيه بس تذكر ان ظبيه اسم مشهور بالامارات ويافررحته لانه ذكر هاذي السالفه مشعل .. لان ملامح سمر تغيرت 180 درجه .

ناصر : ها مشعلو اثاريك ارفيج يعقوبو وتدري بسوالفه ولا تقول لنا اوريك يالدقس اوريك

مشعل والصدمه لابسته واهو ولا يدري ان سؤال استعباطي بيتحول لموضوع جد: انه والله العظيم ماادري بشي بس جذي سالت.

حمد اللي يدري ان يعقوب يستغل الموقف ويا عيال عمه ضحك لولد عمه على دهائه اللي لا يعلى عليه ويعقوب يغمز له.

 

سمر اللي الاكل صار _ من دون ما تدري ليش_ مثل الرماد في بطنها عافت الاكل باجي الوقت ونزلت راسها واهي تفكر بحبيبه يعقوب الاماراتيه الوهميه.

.. طول هالفترة مختفي عنه اثاريه حاب له وحده من بره الكويت .. خلها اكيد مثله ماعندها اسلوب وغرور على قله الفايده .. الطيور على اشكالها تقع يا يعقوب.. بس محد كان محترق غيرها اهي.

 

بعد الغدى طلعوا الشباب للملحق الصيفي اللي في بيت بو حمدان الفخم اللي اهو اكبر بيت في بيوت العائله. ويلسوا يدندون الاغاني الاماراتيه اللي ولا وحده ضيطها ناصر وقام يعصب على مشعل وراشد ويقول لهم انتو السبب..السبب واضح لان ناصر توله على الاماراتيه مع ان لا وجود لها _ مساكين المراهقين_.

 

سمر ما حبت انه تيلس وياهم بنفس المكان اللي فيه يعقوب لان سارة اختفت وحمد راح يسبح في داره ووليد عنده مخيم يعني ماعندها احد تسولف وياه واخوانها مشغولين ويا نصور .. مافي الا يعقوب اللي قاعد يطالعها بين الفترة والثانيه بنظرات لوم واهو يتذكر ليله رده حمد, قامت تتمشى بعزبه بيتهم البسيطه وعيون يعقوب عليها .. استاذن يعقوب من الشباب ويوم ما لقى جواب قام عنهم من دون ما يحس فيه احد وراح عند سيارته يتصل في سمر

 

دق مرة ومرتين وثلاث ولا احد رد عليه .. يمكن التلفون مو عندها .. الحين انه شاسوي يا ربي .. والله حاله لا تلفونها عندها ولااقدر اروح صوبها .. وقعد يقلب بتلفونه ليما مل وطلع من السيارة ومشى لعند مسبح العايله.. قعد على الكراسي اللي تحت المظله واهو مغمض عيونه .. سمر كانت تتمشى بالحديقه .. تفكر بحمد ووينه مختفي عنها .. بس حست ان افكارها مالها معنى ابدا ..يوم وصلت لهاذي الفكرة لامت نفسها .. ليش ماافكر بحمد .. مو انه احبه .. ظل السؤال عالق براسها ليما وصلت مشيها لعند المسبح .. شافت يعقوب منسدح على احد الكراسي المظلله واهو مغمض عيونه .. فرت روحها راده من المكان اللي ياته بس التفتت له مرة ثانيه شافته وكانه نايم وراحت يلست وراه بس بمسافه بعيده... تطالعه من وراه .. عقوب فتح عيونه وقعد يزفر قام على طوله وشاف سمر قاعده وراه .. سمر انحرجت من دون أي سبب مقتع عندها وقامت بتروح عنه.. بس يعقوب وقفها لانه حس ان هاذا الوقت الزين عشان يتصالح وياها ..

دق مرة ومرتين وثلاث ولا احد رد عليه .. يمكن التلفون مو عندها .. الحين انه شاسوي يا ربي .. والله حاله لا تلفونها عندها ولااقدر اروح صوبها .. وقعد يقلب بتلفونه ليما مل وطلع من السيارة ومشى لعند مسبح العايله.. قعد على الكراسي اللي تحت المظله واهو مغمض عيونه .. سمر كانت تتمشى بالحديقه .. تفكر بحمد ووينه مختفي عنها .. بس حست ان افكارها مالها معنى ابدا ..يوم وصلت لهاذي الفكرة لامت نفسها .. ليش ماافكر بحمد .. مو انه احبه .. ظل السؤال عالق براسها ليما وصلت مشيها لعند المسبح .. شافت يعقوب منسدح على احد الكراسي المظلله واهو مغمض عيونه .. فرت روحها راده من المكان اللي ياته بس التفتت له مرة ثانيه شافته وكانه نايم وراحت يلست وراه بس بمسافه بعيده... تطالعه من وراه .. عقوب فتح عيونه وقعد يزفر قام على طوله وشاف سمر قاعده وراه .. سمر انحرجت من دون أي سبب مقتع عندها وقامت بتروح عنه.. بس يعقوب وقفها لانه حس ان هاذا الوقت الزين عشان يتصالح وياها ..

 

 

يعقوب: سمر تكفين لاتروحين

سمر دق قلبها من نبرة صوت ولد عمها: تكفى يعقوب مافيني هواش ونجرة وياك خلني اروح احسن لي

يعقوب: وانتي سويتي شي يستحق اني اناجرج

سمر: اسال روحك

يعقوب: انه اسالج

سمر ما صدقت حالها .. شلون يستفزها جذي من دون أي سبب

سمر بصوت واطي: اووووووووف

يعقوب فهم لحركتها وحس انه اهو بعد وايد مصخها وياها وما يخليها على راحتها

يعقوب : انه اسف .. مو قصدي انرفزج

سمر ما ردت عليه..

صمت دار بيناتهم وسمر يالسه تلعب بالماي الللي بالمسبح

يعقوب: ذاك اليوم كنتي بالشركه .. كنتي تبين شي ؟؟

سمر: رحت اكلم ابوي عن موضوع بس ما طاع

يعقوب والاهتمام بصوته: شنو اهو الموضوع

سمر واهي تحاول تتناسى : لا ولا شي .. بس ما طاع

يعقوب: على راحتج .. بس عسى تكرهون شيئا واهو خير لكم

سمر طالعت يعقوب بعجب: يمكن

ورد الصمت بيناتهم.. سمر كانت تفكر بلايوم اللي زارت الشركه وشافت يعقبوب ويعقوب يفكر في موضوع يتكلم فيه وياها.. كان بيسالها ليش ما تيي بيتهم وايد .بس هو يعرف السبب لذا فكر بموضوع ثاني

قطعت سمر السكون............

سمر: يعقوب

يعقوب فز قلبه من سؤال بنت عمه .. يا محلات اسمي بلسانج لبيييييييييييييييييه

يعقوب: ن.. نعم

سمر واهي محتارة ومنحرجه ما تدري شلون تتكلم بس نظرات يعقوب التشجيعيه ساعدتها على الكلام: يعقوب .. انه اسفه على ذيج الليله وعلى الللي قلته لك ...

يعقوب تذكر الكلام وحز في نفسه بس ما ظهره على ويهه: لا ماعليه ...

سمر: لا صج مو ماعليه .. لو شنو صار .. انه مالي حق اقوللك مثل الكلام اللي قلته لك انت انسان عندك كرامه واكيد كرامتك انجرحت لو انه اللي قالوا لي ما خليتهم

يعقوب بابتسامه: جان كليتيهم

سمر : هههههههههه تقدر تقول ... سامحني يعقوب

بدون أي تاجيل: مسموحه يا بنت العم

ابتسمت سمر بطفوليه .. يعقوب استغرب

يعقوب: اشفيج تبتسمين كانج بدعايه؟

سمر: صار لنا 5 دقايق يالسين وما تهاوشنا

يعقوب يطالع ساعته: أي والله ... عجيب مو؟

سمر ضحكت على ملامح يعقوب الاستهباليه واهو ضحك وياها ..

سمر: يالله انه استاذن منك بروح اشوف الدعله سارو وينها .. على فكرة .. الكندورة وايد حلوة عليك

يعقوب بابتسامه: انتي احلى واحلى ..

سمر استحت وبغت تشرد: يالله عاد .. مايحتاي تقول .. ادري ... باي

يعقوب: الله وياج ( يعقوب كان يبي ينفرد بحاله لان الدنيا مو سايعته من اللي قاعد يصير ويا سمر )

 

بس اختفت سمر عن المسبح يعقوب قام يصارخ من دون صوت واهو يعض على ثوب.. واخيرا سمر التفت له وتصالحت وياه .. واهو اللي كان فاقد الامل ويخربط كلام ماله معنى .. يترك سمر.. اصلا سمر تشبعت داخل عروقه وداخل شرايينه ما يطلعه ولا الموت .. قعد يطالع روحه واهو لابس الكندورة ..الكدنورة حلوة عليك ههههههههههههه ادري من زمان وقعد اهو يغني اغنيه حمد سالم العامري :: لا مانسيتك .. لا مانسيتك .. لا ما نسيتك كيف لا يمكن انساك . انساك كيف انساك والله قويه .. اهواك واحبك ولي عمري فداك .. واسجي بك سجه هل السامريه .. ::

واهو يرزف وايول مثل الاماراتيين من الفرحه راح عند عيال عمه اللي للحين ما جادوا ولا اغنيه.....

سمر بعد كانت تتبسم ... واهي تمشي بمرح .. ماتدري شنو سبب سعادتها .. لو تدري انها بتتونس جذي جان من زمان تصالحت ويا يعقوب ... تتذكر كلامه .. والله وانك خفيف دم يا يعقوب..

 

 

 

 

 

 

انتظروا للأجزاء الجاية

بتكون فيها احداث وايد حلوة ssm9.gif

 

 

 

 

 

Link to comment
Share on other sites

مشكورة حبيبتي على القصة الحلوة

 

يعطيج ألف عافية

 

وإحنا بانتظار الجزء الثالث لاتتاخرين علينا

 

تحيــــــــــاتي

 

حلوة وحبوبة

Edited by حلوة وحبوبة
Link to comment
Share on other sites

الجزء العشرين

=========

 

اول يوم بالاسبوع بعد اسبوعين من اخر جمعه تصالحوا فيها سمر ويعقوب ومن يومها صاروا سمن على العسل .. أي انهم ما يتناجرون وايد ..بالعكس.. كل ما يشوفون بعض يسلمون ويسولفون .. سمر البارحه ظلت تسولف وياسعد عن اشياء وايد ليما صارت الساعه 3 الفير ووعت اليوم الصبح تعبانه ومتملله تقوم تروح المدرسه من الصبح .. امها توعيها بس من تختفي امها ترد ترقد سمر ..

 

بعد نص ساعه يلست سمر وابوها واخوها ناصر يتريقون وحمدان للحين ما نزل

بوحمدان: ياللله سمر حبيبتي عشان نوصلج المدرسه

سمر: لا يوبا روح انت ناصر بيوصلني

ناصر باستغراب: نعم نعم .. من متى صار هذا المخطط قبل لا اقعد ولا توه..

سمر: اوه ناصر .. انه اختك .. وكل البنات اخوانهم يوصلونهم

ناصر حس ان ابوه يطالعه ويطلب منه تفسير: هيه انتي ..انه مو بروحي اقعد بالسيارة انه اوصل ربعي بعد وياي.

سمر: شنو انت دريول عندهم

ناصر: والله سيارتي وكيفي ابوي يوم شراها لي ما وصاني اوصلج حزة اللي تبين والله شنو يوبا

بو حمدان: بس هاذا انتو نجرة وهواش طول الوقت ..

سمر: شنو يوبا ما يرضى يوصلني ويوصل ربعه ..و أي ربع تتكلم عنهم .. ماكو الا راشد اللي مسوي حادث وسيارته بالكراج

ناصر: خبرج عتيج السيارة من زمان تكنسلت .. معناته انه مضطر عائليا واخلاقيا اني اوصل ولد عمي واصحابه اللي طاحوا في جبده مو يوبا..

سمر: ناصر يالله عاد ...

ناصر: يوبا طالعها ..

بوحمدان بنظره كلها تانيب: تراكم مصختوها انتوا الاثنين ما تحشمون احد هني .. انه ابوكم شيبتي ما حشمتوها ..

ناصر: يوبا والله السموحه منك بس سمر تطق عليها زيرانها باخر الوقت ..

بوحمدان: يود السانك انت وانتي .. سمر بس عاد قال لج بيوصل صبيان يعني في هذي بعد بيجذب..

سمر: انه قلت لك بس انت ما طعت يا يوبا

بوحمدان يطالع سمر بعصبيه: تراج تيبيين المشاكل حق روحج.. سدي حلجج ارحم لج .. لا يسمع هالزهوي ويقول لامج..

ناصر يطالع ابوه وسمر واهو يبتسم بشر: هااا. عندكم اسرار

سمر ارتبكت اللحين امي بتسمع وبتسوي لي فظيحه: شنو اسرار ماعنده اسرار ها يوبا؟

ناصر: لا لا لا انه سمعت يله اللحين اللحين تقولون لي شبيناتكم لا انادي على امي واخليها تسويج فلس ما تسوين

بوحمدان: جب يانصور لا تهدد شيختك لا اسحب من عندك مفاتيح السيارة

ناصر واهو مبوز: اتخسي الا هاذي شيختي ..

بوحمدان: ناااااصر

ناصر: انزين انزين .. اسف .. انسه سمر

بوحمدان: وانتي بعد لا تيبين حق روحج المشاكل وانتي مو ناقصتها

سمر بحزن: انشالله يوبا

بوحمدان: نجاه هاتي الجريده باخذها وياي للمكتب

سمر تطالع ابوها .. لان تو الناس على المدرسه

بوحمدان يكمل واهو يطالع سمر: اليوم انه مشغول .. اكو مشكله...

سمر فهمت لكلام ابوها وبوزت وقامت بجنطتها: ماكو مشكله ..يالله انه زاهبه

ام حمدان: هاج فلوسج وهالمرة صرفيهم كتغيير بدال ما تيبسين روحج من اليوع..

سمر: والله ما يحتاي .. يعني مثل كل يوم ما بشتري.. غدى لاكافيتيريا يلوع الجبد استغفر الله..

ام حمدان: اخذي الفلوس والله يا سمر ان ما كليتي الا اصفعج اليوم فاهمه..

سمر: انزين انزين .. لو ناصر جان اللحين ولا قلتي له شي

ام حمدان: بسج عاد مطالع في اخوج قطع .. تحسدينه على شنو .. الدل والدلال لج شتبين اكثر ..

سمر واهو تطلع: الدل والدلال لي .. من متى يا حظي

ام حمدان: بو حمدان اليوم ابيك ترد الظهر للغدا حمدان يبي يكلمك بموضوع

بوحمدان: اوفيييييييه هالولد ماادر ي على شنو مستعيل البنت ما بتشرد

ام حمدان بحركه حق بو حمدان تنبهه حق وجود سمر عند الباب: مو وقته اللحين روح انت الشغل ولا عليك

سمر انتبهت لكلام امها: ها .. خايفه لااعرف اسرارج

ام حمدان: قص في هاللسان انتي ماتقولين لي طالعه ملسونه على منو؟

ناصر: يمه على الديده امج .. مثل اللسان .. بحريني فلفل..

ام حمدان: جب قص بلسانك انت الثاني ..

بوحمدان: بس بس يا حرمه والله طرطرة انه افجج بين العيال اتيي الام تكملها .. يالله ان رديت مبجر الليله يصير خير .. مع السلامه

ام حمدان: انتظرك .. في امان الله ربي يحفظك ويوفقك ان شالله

ناصر : اشعليك يالبطي الحب وكله لك عيل احنه مالت علينا للحين عزابيه

سمر: اصلا انت ماكو بنت بالكويت هاذا اذا مو بالدنيا تبيك

ناصر واهو يحظن امه يقهر سمر: اذا مثل امي .. حياها الله يا مرحبا .. ارصف شوارع الدنيا لها ..لكن اذا مثلج خلها تولي ..

سمر وناصر بنفس الوقت يطلعون لسانهم لبعض وراح بو حمدان ومعاه سمر وطلع ناصر من بعدهم ومشعل وراه.

 

 

سارة اليوم ما راحت الجامعه من وقت مثل عوايدها.. حست بتعب لانها ما رقدت زين دامها تسهر كل يوم للفير واهي تتكلم ويا خالد واخيرا اتفقوا على موعد يتقابلون فيه .. سارة حست روحها بتموت من الخوف لو يدري يعقوب باللي تخطط سارة له جان قصب راسها وعلقه بالبيت .. بس بعد قلبها اهو اللي مسيرها .. عمرها ما تصورت انها يمكن تحب احد كل هاذا الحب .. تنام بذكراه وتوعى بصوته وتحلم فيه وتتنفس هواه ... ااااااااااخ على الحب .. يخلي الصخر يذوب اشعبال الناس اللي اهم من لحم وعظم مثلي ومثل يعقوب.

يوم نزلت عشان تطلع شافت سلسله ذهب مقطوطه على الارض .. رفعتها وحطتها على الطاوله اللي بالصاله.

راحت الجامعه متاخرة وقبل لا تدخل المحاظرة دق تلفونها .. اكيد وحده من ارفيجاتها لكن لا طلعت سمر

سمر: الوووو

سارة: هلا سمر شصاير؟

سمر وحسها واطي: ما صاير شي بس ابيج اتين تاخذيني من المدرسه

سارة: وليش تساسرين روحج

سمر: ليش لان انه متصله فيج من تلفوني يالخبله

سارة: وليش ماخذته وياج امج تدري عنه

سمر: حلفي بس .. انتي من صجج امي بتخليني اخذ تلفوني للمدرسه

سارة: ليش تييبين المشاكل لروحج

سمر: تراج مللتيني .. انه اللحين اقوللج تعالي اخذيني .. بموت من الملل سارة ..

سارة: مااقدر سمر بروحي متاخرة على الكلاس والللحين الاستاذ بسجلني غياب

سمر: انزين خليه يسجلج اشفيها الا محاظرة وحده

سارة: لا والله شايفه روحج بس تتصفحين الكتب حفظتيها يوبا هاذي جامعه مو ثانويه

سمر: اللحين شنو

سارة: سوري .. ببخش .. مااقدر اخذج دوري احد غيري..

سمر: هين لكن يالسويرة ان ما وريتج انتي احد يعتمد عليج

سارة واهي واقفه عند باب الكلاس: جب زين اللحين صرت ما يعتمد علي .. يالله باي

سمر: باي

 

وقفت سمر بحيرة .. شتسوي اللحين .. تبي تطلع من المدرسه ملانه ما تقدر تواصل اكثر .. تفكر تتصل في حبيبها حمد بس تدري بمثالياته وبيلقي عليها محاظرة واهي تبي تشرد من الحصص .. حمدان بيزفها .. اتصل في راشد اجرب حظي وياه... يالخيبه راشد سيارته تكنسلت من الحادث ... من يا ربي من.؟؟ ولمعت في بالها الفكرة .. ماكو غيره .. يعقوب.. بس؟؟ يمكن ما يرضى .. لا يعقوب راعي هالسوالف .. بجرب حظي.

يا حظي .. تذكرت سمر انها ما عندها رقم يعقوب.. تسندت على طوفه الحمام بالمدرسه واهي شوي وتنتحر وقالت مافيها تتصل في مشعل اخوها .. هاذاك حبيب امه ان درى عنها متصله من المدرسه بيعلم امها ... يا ربي ...

ماكو الا الشركه .. اتصلت في الشركه وطلبت منهم رقم مكتب الاستاذ يعقوب الذري وعطوه اياه مع التحويل

طوووووووووط طوووووووووط طووووووووووووط

السكرتيرة: خدمات الذري المعماريه والهندسيه صباح الخير

سمر: صباح النور.. اختي ممكن اكلم الاستاذ يعقوب الذري

السكرتيرة : من فيي ااول له؟

سمر: بنت عمه سمر

السكرتيرة: لحظة؟ (انتو لفظوها باللبناني )

 

يعقوب في مكتبه ماكان له بارظ يشتغل كان قاعد ياكل واهو يبتسم لحاله .. عمره ما حس برضا ولا راحه مثل اللحين .. سمر تكلمه وعلاقتهم مثل العسل .. الله جانزين بس لو تحبني بعد .. خلاص انه مخي بيفتر 180 درجه ههههههههههههههههههه قطع افكاره التلفون....

 

السكرتيرة: الاستاذ يعقوب؟

يعقوب: لا خلت الدنيا من هالصوت يا ريما

السكرتيرة بخجل: كلك زوء يااستاز في عندك اتصال

يعقوب: من منو يا بعد ماما؟

السكرتيرة: بنت عمك الانسه سمر

يعقوب وقفت البسكوته اللي كان ياكل فيها بحلجه: بستقبل الخط ولا اقول لج نطري شوي

عدل روحه الخبل يعقوب.. إلى يقولون سمر يايه تشوفني..( يقول في خاطره): حولي المكالمه بسرعه

السكرتيرة: ان شالله

/

سمر: الو يعقوب

يعقوب والابتسامه شاقه حلجه بس صوته ثابت: هلا والله سمر

سمر: هلا فيك يعقوب .. اسمعني فيك اتيي تاخذني من المدرسه

يعقوب: ليش عسى ما شر

سمر: خطاك الشر بس ملانه وابي اطلع من المدرسه

يعقوب: خالتي نجاه تدري

سمر: لا ما تدري .. لو تدري جان اتصلت لك ..

يعقوب بحيره: سمر مااقدر اطلعج من دون ما تدري امج

سمر: تكفى يعقوب .. مالي غيرك ..

يعقوب: لا سمر .. زحمه شوي .. انزين شغلي روحج بالحصص والمواد ..

سمر: اوووووف يا يعقوب ملانه تعرف يعني شنو ملانه مالي بارظ استمر

يعقوب: انزين انتي من وين متصله

سمر: هاا.. من الادارة

يعقوب: وخلوج؟

سمر: أي خلوني شلون ما خلوني بنت الذري انه

يعقوب يلعوز سمر: وشلون خلوج .. يعني اسمنا له رزة بالمدارس

سمر: يعقوب..

يعقوب يضحك : هلا سمر..

سمر: بلا مياعه زين (تغير صوتها للتوسل وكانها تبجي) هئ هئ يالله يعقوب تكفى .. جم يعقوب انه عندي

يعقوب: والله مادري ليش ما انتي تقولين لي

سمر: الله عليك يا يعقوب لازم هالاساله اللي تنرفز الواحد تعال وخلاص

يعقوب بعصبيه: يالله عاد بيي هو كليتيني .. عشر دقايق وياينج

سمر بابتهاج: يا بعد قلبي والله ولد عمي بسرعه لا تبطي

يعقوب واهو مستانس حيل من الكلام: وانتي بعد يا بعد مصاريني يا بنت عمي .. يالله مسافه الدرب باي

سمر: في امان الله

 

سكرت سمر ويعقوب اتصل من حاله لابوه

بويعقوب: هلا يعقوب

يعقوب : هلا يوبا .. يوبا انه اترخص منك عندي شويه شغل بطلع اسويه

بوعقوب: وين بتروح

يعقوب .. حزتك يوبا: لا يوبا بس بروح الوكاله .. سيارتي فيها صوت .. وابي اجيكها ..

بويعقوب: بترد من بعدها؟؟

يعقوب: ماادري يمكن اروح البيت اتغدى مرة وحده

بويعقوب: لانك ماطلعت من زمان روح بس هاا.. القوائم الماليه ابيها بعد يومين ..

يعقوب واهو يتحقرص عشان يقوم: انزين يوبا بس ارد باجر اكملهم لك ...

بو يعقوب : زين على راحتك

يعقوب : يالله يوبا

بو يعقوب: في امان الله

 

 

وقام يعقوب بطوله يعدل غترته بالمنظرة اللي مجابلته بالباب واهو يطالع روحه :: والله وانك كشخه يا بو يوسف وطلع من مكتبه .. بروح اييب الحب .. يا بعد قلبي هالحب ..

يعقوب: بعد قلبي ريما

السكرتيرة اللي تعودت هالكلام من يعقوب: نعم استاز

يعقوب: أي تلفون يوصلني قولي لهم انه طلعت ومو راد الا باجر

السكرتيرة: على امرك استاز.

يعقوب توه بيطلع من عند السكرتيرة ورد لها: حلاة الريحه . اسكادا؟

السكرتيرة واهي تضحك: دونا كارين استاز

يعقوب: لك يؤبرني الاستاز

السكرتيرة: هههههههههههههههه

 

يعقوب الكل يعرف عنه انه مزوح وايد ويحب يضحك الناس والسكرتيرة ريما متعوده عليه وعلى كلامه اللي ما يقصد فيه شي ..

طلع يعقوب واهو شاق الحلج من الوناسه .. سمر متصله سمر .؟؟ الله يا الدنيا والله انج ساعات تصدميني بس يا محلى هالصدمات كثر الله من امثالها .. وركب سيارته الكروزر وطار بها..طبعا يعقوب جذب بعذره لابوه لان اهو رايح يطلع سمر من المدرسه يعني لو انتشر الخبر رقبه سمر راح تنقطع .. واهو في الدرب تذكر .. اهو ما يدري وين مدرستها ..وسمر داقه عليه من المدرسه .. شهالحظ .. ماكو الا ساروو

 

سارة كانت بالمحاظرة يوم يدق تلفونها .. هاذا رقم يعقوب .. سارة استاذنت من الدكتور اللي عطاها كلمتين تحرق الدم وطلعت..

سارة: نعم يعقوب

يعقوب للحين زعلان من سارة: سارو.. بقول لج مدرسه سمر وين تصير

سارة: وانه شدراني .. علبالك اسوق باصات مدارس ..اتصل فيها على تلفونها اهي ماخذته وياها ..

يعقوب: ايا السوسه سمور .. جذبت علي . يالله باي

سارة: باي

يعقوب حز بقلبه.. سمر ليش جذبت عليه .. يمكن ما تبي مشاكل .. يالله انه اوريها .. توه يعقوب بيتصل فيها بس تذكر ان هاذا الرقم اللي يكلمها منه على انه سعد ..انه مينون ادق عليها بتلفوني بتعرف رقمي بعدين .. ياحسرة عمري من وين لي تلفون .. يعقوب قعد يفتر بالشارع يدور تلفون عمومي ولقى واحد .. راح للتلفون ولقاه بلا سماعه .. سب التلفونات العموميه ودخل السيارة .. تذكر ان هاذا الشارع فيه مكتب المحاماة اللي صديقه سلطان يشتغل فيه .. أتصل له على السريع..مع انه بياكلني على الغيبه .. لكن في سبيل سمور الجذابه يهون ..

سلطان: حي الله القاطع وينك يا يعقوب

يعقوب: هني والله يا حبيب قلبي انت اللي ماتدري عني

سلطان: سود الله حظك تدري انك اكبر جذاب

يعقوب: أي والله ادري... طلبه يا سلطان

سلطان: امرني يالحبيب

يعقوب: ابي بطاقه تلفون

سلطان: من قابظك روح اشتر لك وحده؟

يعقوب: فاضي انه ايمع لي ارقام ابي رقمك شويه بتصل فيه حق بنت عمي

سلطان: ورقمك اشفيه

يعقوب: مافيه شي.. بس ..الحين انت بتعطيني ولا لاء

سلطان: بعطيك بعطيك.. اصلا انه عندي وحده قديمه بعطيك اياها حقك

يعقوب: لا ما يحتاي

سلطان: لا والله حلفت عليك تاخذها

يعقوب: الله يخليك لي يا ربي .. اسمعني انه اللحين واقف عند شركتكم هز طولك وتعال لي

سلطان: ليش ما تدخل انه شوي مشغول

يعقوب: لا يوبا .. بعدين تشوفني سميرة .. مافيني على لسانها

سلطان: ههههههههههههههههههههههههه الله يقطع بليسك يا يعقوب من كل قطر اغنيه

يعقوب : شاسوي يا اخوي والله لعبنا واخر شي انقلب اللعب علينا .. يالله انه انتظرك

سلطان: برب

يعقوب: بسرعه

.... لحظات ويوصل سلطان ليعقوب..

يعقوب: مشكور وما قصرت

سلطان: بالخدمه بس ما تقول لي انت كاشخ وين رايح؟

يعقوب: أي كاشخ الله يهداك انه طالع من الدوام

سلطان: يالله انه بخليك الحين .. بنشوفك في دوانيه زيد هالاسبوع ولا لاء

يعقوب: ماادر ي يمكن بدق عليك يالله باي

سلطان: في امان الله

 

ويكمل يعقوب دربه حق بنت عمه ويتصل فيها..

سمر استغربت من الرقم الغريب بس ردت ..

سمر: الو..

يعقوب: الو بعينج .. جذابه وحده .. قالت شنو قالت انه بنت الذري وخلوني

سمر: هههههههههههههههههههههههههههههههههههههه

يعقوب: تضحكين على سواد ويهج يالجذابه .. شرايج اتصل في امج اللحين ..

سمر: لا لا يعقوب تكفى .. انه ما بغيت المشاكل بس من جذي ما قلت لك

يعقوب: تراج قهرتيني ..

سمر: يالله يعقوب .. لا تقول لي جذي لا يعورني قلبي

يعقوب حس بكلامها : فيني ولا فيج يالجذابه .. اخر مرة تجذبين علي ..

سمر: ان شالله بس انت وينك والله زوغت مزاجي صار لي ربع ساعه وانه انتظرك ..

يعقوب: شوي شوي علي هاه. شقالو لك دريول مدارس اعرف وين مدرستج .. وصفي لي درب مدرستج

سمر توصف له الطريق ويوصل يعقوب حق المدرسه .

يعقوب عرق: انتي من هاذي المدرسه .؟؟

سمر: أي من هاذي المدرسه .. ليش .. يعقوب شوف لا تفشلني بسوالفك.. وتعرفك وحده من البنات..

يعقوب : بس بس عاد فال الله ولا فالج يالله طلعي برع باخذج

سمر: شنو اطلع بره وتاخذني هاذي مدرسه مو جامعه ادخل للادارة وقول لهم ان عندي موعد بالعياده

يعقوب: شكلج خبيرة بهاذي الاشياء

سمر: افا يعقوب تشك فيني والله انت راعي مذله

يعقوب: انزين انزين علامج انقرصتي

سمر: لا ولا شي يالله بسرعه يعقوب

يعقوب: ان شالله ..باي

سمر: باي

 

 

ودخل يعقوب المدرسه .. للحين بريك الطالبات وكل البنات إلى كانن بالساحه الرئيسيه يطالعن يعقوب ويصفرن له واللي تتفدى واللي تصارخ حتى ان يعقوب فرح على عمره موووووووت اول مرة يدخل مدرسه بس كان خايف لا تعرفه وحده من البنات اللي كان يكلمهن من هاذي المدرسه وسرع من خطوته مع انه كان متونس حيل.. ودخل الادارة .. واستلم بنت عمه اللي كانت تمثل بالمرض .. واول ما طلعوا من المدرسه قامت تغني واهي تمشي بمرح واللي يشوفها يقول عنها فرس بنت فرس ..

وفي الدرب لبيتهم سمركانت تلعب بتلفونها ويعقوب يطالعها بين فترة وفترة.. ياحلوها .. والله انها تملك الروح بهالحلاه وهالاخلاق الروعه .. وين مخي قبل اربع سنين .. هاه خليته حق البنات .. بدال ما اتعرف وتعود عليج يا حبيبه قلبي ...

يعقوب: شتسوين؟

سمر بمرح: ولا شي

يعقوب باهتمام : خف عليج العوار

سمر: هههههههههه أي عوار انه مافيني شي

يعقوب: انتي صج جذابه .. من متى وانتي تجذبين

سمر: ههههههههههههههههههه يالله عاد . كل كلمه والثانيه بتقول لي جذابه

يعقوب: عيل ليش طلعتين من المدرسه وانتي مافيج شي ..

سمر: تخيل والله ملل الابله داخله علينا وتقول ما بعطيكم دروس بس ابيكم ترسمون لي مخطط الخليه النباتيه وماادري شنو ويعني لو كان عندي ارفيجه جان عادي بس انه بروحي اقعد بالصف .. وانه كنت متملله ولان فيني رقاد بعد ...

يعقوب تذكر ليله امس وياها بالتلفون بس استهبل عليها: ليش ما رقدتي من وقت

سمر واهي تبتسم بينها وبين نفسها: أي

يعقوب والفرحه مو سايعته حس روحه يبي يدعم بالسيارة يالله يفضي الشعور اللي بقلبه

سمر: يعقوب الرقم اللي اتصلت فيني منه رقمك

يعقوب بارتباك .. ليش

سمر: لا ولا شي بحفظه عندي

يعقوب: ايه رقمي

سمر: اوكيه.. حلو تبادل

يعقوب: no chance baby (من صجها هاذي .. طرارة اليوم انه عشان هالرقم وعطني اياه)

سمر: بيني وبينك .. رقمي احلى .. وماادري شلون فكرت استغني عنه

سمر كانت تعني سعد بكلامها ويعقوب لانه فطين وايد .. فكر بهاذا الشي بعد اللي خلاه يستخف زود.

وطول الدرب ويعقوب يسوق ببطء يكسب كل دقيقه سوالف وضحك وغشمرة بينه وبين سمر ليما سمر ارقدت واهي بالدرب لبيتهم ويوم شافها يعقوب راقده طول الدرب عشان لا يوقظها ويخترب مزاجها وبالراديو مشغله اغنيه عيضه المنهالي ((خايف عليك )) اللي من سمعها سماها *اغنيه حبنا*

 

وصلوا البيت وسمر انتبهت للسيارة اللي وقفت .. وعت ليعقوب ولد عمها وانتبهت له واهو يالس يراقبها من تحت النظارة ..

سمر: شكرا يعقوب عساني ان شالله ارد هاذي الخدمه في ليله عرسك ان شالله ..

يعقوب تكدر وفر ويهه عنها: قومي زين

سمر: هههههههههههههه يالله عاد من ما يبي يعرس..

يعقوب من غير نفس: انه

سمر واهي تدلل واول مرة تتدلل على يعقوب: ليش؟

يعقوب بحيرة: شنو ليش ماابي اعرس وبس

سمر بكل هدوء : يعقوب.. انت صج تحب اماراتيه؟

يعقوب والارتباك ماخذه: ليش تسألين

سمر ندمت على سؤالها ولا تدري شنو ترد عليه: لا.. لا لا تهتم بس سؤال .. ماعليك مني يالله انه بروح اللحين .

يعقوب: شنو بتقولين حق امج ؟

سمر: امممممممم والله صج ... ماعليك انه بدخل اللحين واهي اكيد مو بالبيت رايحه حق دار العقرة والحش في الناس

يعقوب بعيون ضيجه: لايكون تقصدين بيتنا

سمر : ها... لا مو بيتكم من قال حشى والله علي ما قلت

يعقوب : يالله طلعي زين

سمر: شكرا يعقوب

يعقوب: حاظرين

سمر: في امان الله

يعقوب: في حفظه

 

ودخلت سمر البيت وويعقوب للحين واقف عند الممشى ... يا قلبي شهالحب اللي تحمله حقها .. لو اتكلم من اليوم لباجر بعد ما اوفي ولا اسدي حبي لها .. يعلني ما اخسرج يا سمر .. لان بكل صراحه انتي صرتي شي جبير بالنسبه لي .. وراح اموت لوخسرتج... اموت.

سمر كانت واقفه تطالع يعقوب اللي للحين ما تحرك واهي تفكر فيه .. لو كان يعقوب مكان حمد ... شنو راح يصير .. وعت لروعها ...يعععععععععع يعقوبو مكان حبيبي حمد ... no way baby بس بعد .. ظل يعقوب يحوس ويلوس في مخها ....ليما راحت غرفتها وارقدت بثياب المدرسه ...

 

بعد الغدا في بيت بوحمدان ,, وتحديدا في الصاله الرئيسيه حمدان كان يالس ويا ابوه يتكلمون بموضوع سارة بنت عمه

حمدان: يوبا انه انتظرت وصبرت ليما يستقر حمد ولد عمي بالديرة وبعدين اكلم عمي بو يعقوب

بوحمدان: ماعليه انه باجر بكلم عمك بالشركه

حمدان: ليش ما نروح له الليله

بوحمدان: الله عليك ياحمدان ماتقدر تصبر لباجر

حمدان استحى شوي : برايك يوبا بس لا تطول ..

بو حمدان: ان شالله لك نصيب بسارة بنت بو يعقوب

حمدان: ان شـــــــــــــــــــالله

 

كل هاذا يصير وفي نفس الوقت سارة تتكلم ويا خالد على التلفون

سارة: حبيبي وحشتني وكل يوم يزيد شوقي لموعدنا

خالد: وانه شنو اقول لج ماارقد الليل من كثر ماانا ابي اسابق الزمن من خوفي يقبضني المرور ويعطيني مخالفه سرعه ههههههههههههههههههههه

سارة: هههههههههههههه انزين حبيبي انت ما فكرت شلون بعرفك ولا انت شلون بتعرفني

خالد: أي والله ما مر على بالي موليه .... لحظه شرايج بهاذي الفكرة .. بحط باجه على صدري تقول وينج يا مريم

سارة حست روحها بتنقع من الضحك: ويييييييه هاذي الفشله ههههههههههههههههههههه

خالد:ههههههههههههههههههههههه

سارة: صدقني تسويها وما اعطيك ويه وارد بيتنا مباشرة

خالد: واهون عليج بفشيلتي

سارة: أي عادي ولا اعبرك بعد

خالد: افااااا

سارة: هههههههههههههه ايه لا تحاولها ... يالله حبيبي اللحين انه بسكر اليوم رحت الجامعه متاخرة.

خالد: ليش ؟

سارة: ما رقدت كفايه.. بعد السهر وياك

خالد: يييييييييه الليله مو ليلتي اول شي ما بتعطيني ويه اذا شفتيني بالباجه واللحين انه المسؤول عن التاخير.. خلاص انه زعلت

سارة: ههههههههههههههههههه فديت اللي يزعلون عيني عليهم

خالد: لا تحاولين ابيج تراضيني

سارة: بشنو

خالد: فكري فيها ولا مخج فالح بس حق التسوق

سارة: هههههههههههههه يالظالم اصلا انه صار لي مده ما رحت المول ويه ولهت على المولات والله

خالد: خسك من حظ بتكسرين ظهري تراج بمصاريفج

سارة: هههههههههههههههههههه

خالد: فديت الضحكه وراعيتها يالله حبيبي روحي رقدي عشان تصحين بسرعه

سارة واهي تتثاوب: لا بعد شوي

خالد: شنو بعد شوي بتاكلين التلفون وانتي تتثاوبين وتقولين لي بعد شوي طيعي كلامي يالله

سارة: ههههههههههههه ان شالله .. أي اوامر ثانيه

خالد: اممممممممم المعتاد .. فكري فيني وحلمي فيني واصحي وصبحي علي.. وبس

سارة : من عيوني الثنتين

خالد : حطي في بالج .. بعد شهر من اليوم .. لقائنا راح يكون بالمول

سارة: انتظره على احر من الجمر

خالد: اااااااااااه ياويل حالي عيل انه شاقول

سارة: لا تقول شي

خالد: ان شالله ههههههههههههههه يالله مع السلامه

سارة: في امان الله

 

وسدت الخط سارة واهي تفكر بموعدها بحبيب قلبها واهي ولا تدري ان ولد عمها بعد يومين ناوي يخطبها من ابوها .

 

 

ان شاء الله عجبكم هالجزء وهالاحداث ssm9.gif

 

وانتظروا الجزء الجاي في اقرب فرصة ممكنة ads12.gif

 

 

 

 

 

 

Link to comment
Share on other sites

الجزء الواحد والعشرين

=============

 

تمر الايام بسرعه.. وكل ما ايي لها الدنيا تحلو وتحلو .. سمر اللي بدت تاخذ منعطفات يديده بحياتها تفكر اللحين بشي اكبر من حمد .. بس بعد ظل قلبها يخفق له طول الوقت مع انها ما تفكر فيه مثل قبل ..شخصين بدوا يستحلون مكانه كبيرة من افكارها وحياتها .. يعقوب وسعد .. يعقوب اللي تغيرت معاملته جذريا تجاه سمر وصارت تعتمد عليه بدرجه كبيرة .. سعد اللي متحيرة منه .. شخص غريب مثله قدر يستحل مكانه كبيرة في حياته جذي .. لا وبعد متسامح لدرجه كبيرة وما يتطلب ..

يعقوب الدنيا مو سايعته .. الرضا واصل لخشمه يكلم بنت عمه تلفون بشخصيه سعد ويقدر يتواصل معاها بالصج .. اهو بشخصيه سعد مثل يعقوب بس الصوت اهو اللي يتير .. ويقدر يطلع على حقيقته مع سمر .. يقول لها الاشعار اللي يكتبها .. تتغشمر عليه واهو يضحك وياها .. يكلمها عن مشاعره تجاهه واهو يسرد السالفه عن صديقه وبنت عمه وسمر تفهم الشي وتعطيه الافكار والاقتراحات .. يعني محد يقدر يطلب اكثر من جذي ..بس بعد كان يعقوب طماع .. يطمع بحب سمر ...

سارة اللي عايشه بين الغيوم مع حبيبها الغامض خالد واهي ماتدري ان ولد عمها حمدان قالب الدنيا فوق تحت عشان يروحون ويخطبونها حقه واهي بكل بساطه ما تحس ولا بشي لولد عمها .. على الرغم حمد كان يعجبها وايد .. دوم لين تيمعت العوايل يتبادلون نظرات وكأنهم يعرفون بعضهم بس يردون على افكارهم حمد بحبيبته اللي محد يعرف عنها شي .. وسارة بخالد اللي ماخذ كل حواسها.

حمد كان يحس ان الدنيا مو ممكن تكون اكثر عدل وياه من الوقت الحالي .. حبيبته تبادله الحب والشوق كله .. مع انه لو ذكر طريقه تعارفهم يضحك لان محد يوثق بالنت هاذي الايام .. بس مريم نزلت له من السما .. الشي الباجي انهم يتقابلون وتكمل فرحته ..

 

في بيت بو يعقوب .. بو يعقوب كان قاعد ويا مرته بالصاله يتكلمون بسالفه سارة وحمدان

ام يعقوب: هاذي الساعه المباركه .. ولو ان نجاه محد يقدر على لسانها بس حمدان خوش ريال واالف بنت تتمناه

بو يعقوب: معاج حق .. وهاذا نسب عايله يعني البنت ما بتطلع برع العايله وانه ارتاح عليها جذي دامها بتكون في بيت اخوي بو حمدان

ام يعقوب: بس لازم نسالها رايها قبل أي شي

بو يعقوب: انه قلت حق بو حمدان انهم يمهلونا لبعد امتحانات المنتصف تكون البنت مخلصه من امتحاناتها وما عندها شي شاغل بالها ..

ام يعقوب: اللي محيرني اهو رد يعقوب .. تعرف الولد متعلق في اخته ولو انه هالايام مو عاجبني .. ما يتكلم وياه لذاك الزود ..

بو يعقوب: اولا اذا النصيب يا حق سارة يعقوب ما راح يوقف بدربه بالعكس راح يساندها مليون بالميه .. ولا شرايج ؟

ام يعقوب: الشور شورك يابو يعقوب

 

ودخل يعقوب من الباب

يعقوب: السلام عليكم

ام يعقوب وبو يعقوب: وعليكم السلام

ام يعقوب: لين طريت الحبيب زهب له الزبيب

يعقوب يطالع ابوه من طرف عيونه: شكرا شكرا يااحلى ام

بويعقوب: ها ام يعقوب .. بس يه ولدج خلاص .. كنسلتنا

يعقوب: يوبا الناس انه مو أي احد .. انه بويوسف ولا شنو يمه

امي عقوب: يا عيني على يوسفي الصغيرون ..

بو يعقوب: الله اييبه بالسلامه ..

ام يعقوب: ها يمه راد مبجر عسى خير

يعقوب واهو يحط راسه على كتف امه .. دلاعه : الخير بويهج يا احلى ام بالدنيا بس ملان والجو بره يبرد شوي شوي

ام يعقوب: اصلا انتوا ليش تطلعون قعدوا وياي اتونس .. ولا راشد ما يفارج ولد عمه وفي السنه اشوفه مرة وحده

يعقوب: لان ناصر عنده سيارة لو ابوي يطلع سيارة حق راشد بتشوفينه 24 ساعه جدامج

ام يعقوب: أي والله خانت حيلي ميتن يبي سيارة بس تدري ياولدي الشوارع مو امان .. وتوه طالع من حادث طلع روحي وياه الحمد لله ان ما صابه شي

يعقوب: الحمد لله

بويعقوب: اللحين صارت..الشوارع مالها امان .. وكل ليله ما ترقديني الا بوجع الراس ولدي مسكين ولدي ماادري شنو....

يعقوب يضحك وام يعقوب: شنو يا بو يعقوب هاذا ولدي وانه مااقدر اطالعه يطلب مني شي وانه مااقدر البيه له

يعقوب: بس عاد والله حشرتونا انتوا الاثنين

بويعقوب: هااااااااه

ام يعقوب: ولك عين تتكلم وانت اللي فتحت السالفه

يعقوب: ههههههههههههههههههههههههههههه يمه حبيبتي الله يخليج اسولف انه اسولف.

الكل ضحك واستاذن يعقوب عشان يروح يرقد.. راح الصاله الثانيه يدور سارة .. لكن لا بروح داري احسن لي .. التفت على الطاوله شاف السلسله الذهب اللي حطتها سارة .. اخذ السلسله وقعد يطالعها .. حاول انه يتذكر ان كانت سارة عندها سلسله جذي .. وحملها وياه.. وقبل لا يدخل داره وقف بالصاله .. وحشته سارو السباله .. من زمان ما سولف وياها .. ودخل على سارو اللي ارتبكت يوم دخل

سارة: انزين فروح انه بكلمج بعدين زين باي

وسكرت الخط

كانت هاذي اول مرة يعقوب يدخل غرفه سارة من بعد ذيج الليله اللي كان يبجي فيها

يعقوب: اشفيج مخترعه

سارى: لا ولا شي بس كنت اكلم فرح عن اساينمنت الجامعه.. خيرعسى ما شر

يعقوب متغيره ملامحه شوي: سلامتج ماكو شي بس .. حبيت اسولف وياج ..

سارة بدلال وعتاب: صار لك شهر ما تكلمني زين واللحين ياي بخاطرك تكلمني

يعقوب يتسم : يالله عاد ويا ويهج .. أنه كنت معصب و.. متظايج وطلعت كل حرتي فيج لكن انتي تدرين انتي حبيبتي اختي سارة. وانه مالي احد بالدنيا غيرج

سارة تضحك: صج والله

يعقوب: يالله عاد انتي صدقتي اللحين

سارة قامت تحظن اخوها: انه ادري فيك تحبني موت ولا تقدر على فرقاي لكن شاسوي فيك مخك يابس

يعقوب واهو يحاول يفجها عنه واهو يضحك: قومي لا بارك الله فيج شابصه فيني.

يعقوب: انه هالمرة سامحتج بس مرة ثانيه يا ويلج مني يا سارو

سارة: والله انه ...........

يعقوب: اوووووووووص ولا كلمه يالله .. نزلي تحت خلينا نتغدى

سارة: راد مبجر عشان تصالحني ...

يعقوب ابتسم واهو يتذكر: تتمنين .. اصلا انه راد مبجر لاني .. ولا شي

سارة: ها ها ها يبتسم البدر شصار

يعقوب واهو يقوم: والله يا سارة ان صار اللي بمخي يا ويل حالي .. بموت انه

سارة: سلامه عمرك توك شباب

يعقوب: يالله يالله قومي ننزل

سارة: انزين شصار ويا سمور .. للحين متزاعلين

يعقوب:فال الله ولا فالج يالشرصه

سارة: ههههههههههه عيل

يعقوب ايود على قلبه: .. اااااااااااااااه ... ولا شي يالله خلينا ننزل بموت من اليوع عروقي طلعت

توها سارة بتقوم ويا اخوها الا ويدق خالد ارتبكت سارة: انتظر شوي بكلم فروح ارفيجتي قبل انت روح وانه بلحقك

يعقوب: لاتبطين

سارة: ان شالله

طلع يعقوب وسارة راحت بالبلكون

سارة: يا قلبي

خالد: اشفيج سديتي الخط بويهي

سارة: اخوي دخل علي الغرفه فجأة وانه اخترعت وسديته ... عسى ما جرحت شعورك.

خالد: لا مو لهناك.

سارة: حبيبي تغديت ؟

خالد: لا انه للحين بالدوام

سارة: وين تشتغل؟

خالد: انا اشتغل ب.... هااا؟؟ وانتي شعليج ..

سارة: هههههههههه لا ولا شي بس بغيت اسوي لك اوردر(order)

خالد: تسلميــــــــــــــــــــــــن يا اغلى حبيبه ما يحتاج اللحين الوالده بتدق علي وبروح البيت لا تشغلين بالج.

سارة بحيا: على الرحب حبيبي سلم لي على خالتي.

خال: الله يسلمج .. يالله حبيبتي كاهي خالتج دقت

سارة: ياللله حبيبي عافيه ..

خالد: الله يعافيج .. باي حبيبي

سارة: باي حياتي

قامت سم

سكر سارة واهي تتنهد .. يا ويلها من هالحب .. بتموت واهي تحب خالد ..نزلت تحت تتغدى ويا اخوها يعقوب.. والجو رد مثل ما كان واحسن بعد ..

 

في بيت بو حمد ..

حمد توه رد من الدوام واهو يحس بالسعادة والحب إللي بالدنيا كلها في قلبه .. مثل ما ذكرت لكم من قبل حمد عنده حبيبه سريه للحين ما كلم احد عنها حتى امه .. بس اليوم فكر يقول لامه لانها وايد تحن عليه عن العرس من بعد ما رد اميركا.. بس اليوم بيقول لامه اللي يبيها خاطره وبشوف رده فعلها

 

ام حمد: هلا والله حمد . شخبار الدوام

حمد واهو يحب راس امه: هلا فيج يالغاليه والله تمام مثل كل يوم

ام حمد: يالله انه بروح انجب لك الغدى

حمد : لا يمه نطري شوي .. ابي اكلمج بموضوع

ام حمد: تغدى قبل وبعدين يصير خير والله من يوم رديت من اميركا وانت مستوي لي جلد على عظم

حمد واهو يأشر على بطنه ويضحك: أي جلد على عظم يا يمه .. ما تشوفين الكرشه

وليد واهو ينزل من الدري: أي كرشه انت من صجك والله انك عمي ما تشوف. اصلا الكل يتمنى شوي من عندك.

حمد: هههههههههه منو هاذيلا

وليد: ولد عمي اللي كاسر خاطري خانت حيلي ... ناصر ما غيره

ام حمد: عاد هاذا المراهق الكل يسكت عنه وايد نجاه مدلعته والله ان كان على زينه ما كو من اهو احلى عنه بسنه

وليد وحمد: ماكو

ام حمد واهي تضحك: الا انتو يا عيالي

وليد وحمد : اوووووووووووووووووووووووف عبالنا بعد هههههههههههههههه

وجذي دخلوا للمطبخ واهم يضحكون, وانضمت لهم رغد بعدين مع الوالد وبعد الغدى يلسوا بالصاله ووليد راح يرقد ورغد كانت يالسه تطالع تلفزيون بالصاله الثانيه .. حس حمد ان هاذا الوقت ماعليه وقت عشان يفاتح امه وابوه بموضوع العرس ؟

حمد: يوبا

بو حمد: هلا يوبا امر

حمد واهو شوي مستحي: يوبا .. بغيتك في موضوع !!

بو حمد : خير يا ولدي في شي بالشركه؟

حمد: لا يوبا الشغل بالشركه ماشي تمام بس .. هاذا الشي خاص .. خاص فيني

بو حمد حس للموضوع بس ما حب ينغص على ولده: هات اللي عندك.

حمد: خير يوبا خير ... يوبا انه قررت اتزوج

ام حمد: هاذي الساعه المباركه ياوليدي والله انك فرحتني من البنت؟ من وين؟ ومن أي عايله؟ لا يكون نعرفهم بس؟ ومن وين انت عرفتها؟و ..؟؟

حمد يضحك

بو حمد: يا ام حمد علامج انهديتي على الولد واهو ماقال الا كلمتين خليه يكمل قبل الله يهداج

ام حمد: وايد فرحت لولدي ما بغى يسمع كلامي ويكمل نص دينه

بو حمد: من كبره يعني اللحين اهو توه 23 سنه مو شيبه علي

ام حمد: والله والشيبه تبي تكبر روحك لاتكبرني وياك

حمد :ههههههههه الله يهدا ج يمه محد قال بس انتي تسرعتي وايد

ام حمد بزعل: اشوف كلامي مو عاجبك يا حمد

حمد : لا والله يمه عاجبني الا وتارس عيني بس خليني اكمل يااحلى ام بالدنيا

ام حمد: كمل زين

حمد: البنت انه اعرفها من طرف ناس .. بس للحين ما شفتها .. ابيكم تنتظرون علي جم من شهر وبعدين بكلمكم اذا تروحون تخطبونها لي. انه بس ابي اتاكد واسال عنهم واعرفهم زين.. مع أني واثق من انها من اهل زينيين بس لازم نسال..

بو حمد: اممممممممم كلامك عدل .. ومتى ما تبي احنه بنروح نخطبها.

ام حمد: مع اني بغيتك حق نوال بنت اختي ام سالم.

حمد: يمه نوال بنت ما يعلى عليها ولو اني للحين ما شفتها بس ان شالله تلقى لها اللي يريحها واللي يناسبها.. انه قررت خلاص

ام حمد: اللي يريحك يا ولدي.. بس ما قلت لي .. شنو اسمها ؟

حمد استحى وما بغى يقول لانه واثق مليون بالاميه ان اسمها اللي قالته له مو اسمها الصجي بس ما بغى يكدر امه: اسمها مريم.

بو حمد: عاشت الاسامي .. مبروك يا معرس

حمد: هههههه الله يبارك فيك يوبا

ام حمد: مبروك يا وليدي عسى يتحقق مرادك ان شالله وما يخيب املك قول ان شالله؟

حمد وابو حمد مرة وحده: واملج ان شــــــــــــــاء الله. ههههههههههههههههههههه

 

biggrin.gif

 

 

Link to comment
Share on other sites

هلا اختي عااااااااااااااااااااااااااااااااااااااااااد بسرعة نبي التكمللة عاااااااااااااااااااااااااااااااااااد بسرررررررررررررعة واذا ما عليج امر ممكن تنزلين الاجزاء كلها مرة وحدة

تحياتي::الماسة

cool.gifrest (2).gifrest (3).gifrest (4).gif

Link to comment
Share on other sites

Join the conversation

You can post now and register later. If you have an account, sign in now to post with your account.

Guest
الرد على هذا الموضوع...

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.

Loading...

×
×
  • Create New...