مــــــــا ينجبر قــــ ؟ـلب على قــ ؟ـــــلب

[محرقاويه عسل]

 

غزالووووو

 

 

حدها عجيييييييييبه القصـــــــه

 

بليز نزلي واااايد اجزااااء لانه قريتها كلها في يوم تقريبا

 

 

يالله بليييز ناطرينج لا تبطين علينا ابي اعرف احمد شبيسوي

 

 

تسلمين حبيبتي على القصه الحلوة

 

 

يعطيج الف عافيه

[غزال الريم]

سوري تأخرت

 

هذي الجزء الخامس

 

الفصل الاول + الفصل الثاني

 

تفضلوووووووا

 

"""الجزء الخامس عشر"""

- الفصل الاول-

 

ما ترتضي نفسي مذله و حقران بردها عمن سعالي بذلي..نفسي عزيزه ساميه فوق يا فلان أبعد من نجوم الثريا محلي

 

من شدة الصدمه باللي خبرتني به فاطمه..حاسه نفسي بجسد من دون روح..كانت صدمه..و ما كانت فرحه مثل ما كنت متخيلتنها طول حياتي..احمد يخطبني انا؟؟..ليش ان شالله على شوه ناوي!!..عمري ما أثرت اهتمام احمد..ولا شعر صوبي بأي شي..عبرتله عن حبي من يوم انا صغيره بس هو مطنشي..لا و الادهي انه رفضني يوم قالوله شوه رايك انحيرلك لطيفه؟؟!! شوه اللي خلاه ايغير رايه؟؟ شوه السبب؟؟ احمد انته ما تباني..ليش ردة الفعل هاذي؟؟ هل لاني انخطبت؟؟ ما حق اني انخطب و اعيش حياتي مع انسان ثاني!! بس يا احمد لا تتحرا انه كل شي بيمشي على هواك..اذا انته كان لك راي في انك اتغير مجرا حياتي فانا ما بكون صفر على اليسار و بشوفك اتدمر حياتي و انا ساكته..و اذا انته في يوم من الايام قدرت اتقول لا..فأنا اليوم اقدر اقول ألف لا..و الايام بينا و بتثبتلك...

فاطمه: لطيفه..شوه هاذا شوه فيج..من البارحه من قلتلج انه احمد خطبج و انتي مب طبيعيه!! شوه فيج؟؟ مب هاذا اللي كنتي تبينه؟؟ مب هاذا اللي تهاذيبه من استويتي؟؟؟

لطيفه: فاطمه ما نزلنا نتريق..

فاطمه: ليش كل ما رمسج فالموضوع اتغيرينه؟؟ لطيفه انتي ما تبين احمد؟؟!! ردي عليه قوليلي..

لطيفه: و شوه يهم اذا اباه ولا لا ؟؟!!

فاطمه: ايهم...كيف ما يهم؟؟!! يعني فيه احتمال انج ترفضينه!!!(فاطمه و هيه تهز راسها) لا تقوليلي بتقولين لا؟؟؟؟؟؟

لطيفه: ما عرف يا فطيم..اذا على الحب تراني احبه..بس انه يوقف في طريجي ليش؟؟ فطيم انتي اكثر وحده تعرف انه احمد ما يباني صح ولا لا ؟؟ و ما افتكر فيني الا يوم انخطبت..ليش.؟؟ وين هو من زمان؟!!

فاطمه: اول هيه...كان ما يباج بس الاول تحول..في ذمتج يعني منوه بيغصبه عليج؟؟!! ريال بلحيته داق السبع و عشرين..منوه بيجبره على العرس..!!!

لطيفه: الظرووف

فاطمه: اي ظروف انتي بعد؟؟!!! و الله يانه أحمد انه اللي ما يباه ماحد يروم يغصبه عليه

لطيفه: شوه يعني بيخطبني لانه يحبنيه ؟؟!! ولا عشان سواد عيوني ولا شعريه الحليان!!!!

فاطمه: لطيفه...بسألج سؤال واحد بس...و اعتبرينا خوات و انه هالشي مابيزعلني..بترفضينه صح؟؟!! لانه مستوانا شوي اقل عن مستواكم....

لطيفه: شووووووووووو...بتخبرج صاحيه انتي ولا لا ؟؟ شوه مستوانا اعلا ولا اقل..شوه ياب اللي ياب..نحن اهل و دم و مخوه..شوه ياب طاري الفلوس الحين؟؟؟

فاطمه: لطيفه..نحن صح ناس على قد حالنا و مب قد فشخرتكم..بس احمد ريال و نعم..بنا نفسه بنفسه متخرج و يشتغل من احسن الوظايف..ماسك منصب لو واحد في سنه ما يمسكه..

لطيفه و هي اتقاطع فاطمه: فطيم يان عدتيها هالرمسه مره ثانيه تراني لا اعرفج ولا تعرفيني..

فاطمه: ليش ليش ...قوليلي عطيني سبب واحد لرفضج؟

لطيفه: اسألي اخوج ليش..هو عنده الجواب..و صدقيني و ربي في سماه انه اللي بيبعدني عن احمد شي كبير سواه احمد فيني...

فاطمه: شووووو...شوه سوا..قوليلي مب انا مثل اختج؟؟ قوليلي هو بعد اخويه يمكن غلط و يبا حد ينبهه

لطيفه: ماروم فطيم ماروم...اخوج ساكن القلب و الروح..بس الحياه الزوجيه ما يكفيها الحب اذا ما شي تفاهم..و رفضي له احسله قبل لا يكون احسلي..لا تحاتين و تتواكلين اللي فيه الخير الله بيسويه

فاطمه: ياااااااااااااااالله....ياااااااااااااالله ...شوه هالحاااله!!!!

لطيفه: اييج الشور..انسي الموضوع اصلا الين الحين ماحد شاورني..و خلينا ننزل تحت..سمعت صوت البوس ضبابه اهنيه

فاطمه: امري لله...و اللي بينكم انتي و احمد بيي يوم و بعرفه...

تحت..

اليده ضبابه: ايه بنات...سيرن شوفن السيافي..احيده يلعب برا في هالقايله..سيرن لا تضربه الشمس و ايغيّب

لطيفه: يدتيه احيده يلعب اهناك فالحووش..وماشي شمس الجو غيم و نفاف

ضبابه: لا اله الا الله ....اخافه يسير عند فيرانج و هو فيه حزاز..الحقن عليه يا بناتي..

فاطمه: انسير لطووف برا...الجو مغيم..انسير نتمشا

لطيفه: انسير..

لطيفه: سيفوووووووووووووووووووووه...يالحمار...تعال تعال اما خبرت عليك خالك سلطان..تعال لا تعلب فالتراب

سيف: ماااااااااحبج....يالشريره...نوتيّه..ماخاف من خالي ثلطان

لطيفه: جب يالاثرم...نوتي ماحد غيرك..هاي المدارس الخاصه اتعلم طولت اللسان..

فاطمه: برايه خليه يلعب شوه حارنج انتي؟؟

لطيفه: ياختي فيراني بيعفصهن و بيجتلهن...عاد كللله و لا الحليان

فاطمه: في ذمتج الحليان بعده ما ماااات؟؟؟ فدوى عن سيف جانه الا بيجتلهن...

لطيفه: شوه شوه شوه؟؟؟ كله ولا الحليان...مربيتنه من اربع سنين و عياله مزر القفص..فاطمه قوليله مب ولد خوج اهو...قوليله...اخاف عليه

فاطمه: هههه ..ولد اختج تراه بعد..قولي حق عباس ايسويلنا جاهي كرك..ايه سيفوووووووووه...و الله انه ماسك الهامستر من حلجه...سيفووووه و الله يا خبر عليك عمي احمد و بخليه ايبيعك في سوق الصبيخه

سيف و بغياض: انتو كل يوم كل يوم اتقولون عمي احمااد بيبيعني بربتين ادري...( و بصريخ ) ماااااحبكم...

و بثواني انه سياره داخله البيت..

نشت لطيفه و هيه تتغشا: ايه يالبقره نشي نشي اشوف سياره غريبه

فاطمه: شوه بقره انتي بعد في مزرعه ابقار العين نحن؟؟...قري قري هاذا احمد..تعالي و الله هاي سيارته الاستيشن..

لطيفه:لا و حياتج مزرعة ابقار المرموم ...شدراج انه بيي؟؟

فاطمه: ماشي... مساعه مسولي تيلفون قالي بخطف عليج و بنشل السيافي امه تباه و بنرد..و بليز لا تتطنزين على موطا و مسقط راس ريحانه فوادي

لطيفه: لا و الله عدااااا ل عاااااد...ماشي سيره يلسي انتي و السيافي اليوم عندي..

فاطمه: لا لا ياختي ما فيني..بسير و السيافي امه تباه اليوم عليه تطعيم..

احمد و هو يتقرب من البنات..:السلاااااااام عليكم

البنات: و عليكم السلااام

احمد: و هو عينه على الباب و ابدا ما حط عينه في عيني: عيل وين يدتيه؟؟

لطيفه: داخل احيدها دخلت اتصلي..قرب..

احمد: جريب..

+++ دخلت سيده داخل..لا قدرت احط عيني في عينها..ولا قدرت اواجه هالموضوع اللي بينا..كل ما شوفها تتكهرب مشاعريه..ترتجف حواسيه..و احس بشرارات بيني و بينها..ما توقعت انه خطبتيه للطيفه ممكن اتسببلي كل هالفوضا!!!اول غير و الحين غير..من اليوم هالبنت اللي جدامي خطيبتيه و زوجت المستقبل و ام عيالي اذا الله كتب..مادري هل هو شعور بالخجل!!! لا لا شوه خجل الريال عمره ما يستحي من هالسوالف..بس ما عرف كل شي فيها تصرفاتها..ردات فعلها..اسلوبها فالكلام ويايه فالفتره الاخيره..كل شي كل شي يمشي بالمعكوس..مادري..اللي اعرفه انه لطيفه اتحبنيه و ما عندي شك فهالشي..من يوم هيه ياهل و انا متأكد من هالشي..ليش ردة فعلها على الخطوبه سلبيه جيه؟؟!! مابا الفرحه تختفي عن ويهها..مابا شخصيتها تنطفي جيه..شوه بلاها ؟؟ مب هاذا اللي تباه؟؟ مب هاذا اللي كل بنت اتمناه..اسمع احمد خلك من هالخربطيشن..انته الف بنت اتمناك و بس عليها لطيفه يوم بتضويك..و لو تزعل من اليوم الين باجر..طز فيها..حرمتيه حرمتيه..لا مفر!!

فاطمه: لين متا ان شالله بنتم اهنيه منزربات فالمطبخ؟؟!!! هاذا الا احمد مب الدجال!!

لطيفه: شوه تبيني اجابله و اسولف وياها و اقولك شحالك احمد علومك؟؟ شوه ما فيني دم انا؟؟!! ماروم ماروم احط عيني في عينه..فطيم فطيم ماباه...فديتج فديتج..قوليله خليه يتراجع..ما بغيه مب غصب

فاطمه: شووووو...شوفي عاد لطفين..اخويه لا مشوّه ولا اعور عشان ترفضينه..و انا ماشوف فيه هاذيج العيوب..و ايتم ولد عمتج..و انتي تحبينه..ليش عيل حاشرتنا من زمان عليه!!

لطيفه:مادري و الله مادري..فهميني ماباه..ماريد اصبح و امسي وياه..بيّن فهميني بّين..

فاطمه: لطوف بزاج هاذا مب عليه انا..ما تبينه قولي ماباه...و الف و حده غيرج اتريا انه احمد يأشر انه يباها

لطيفه: اوهوووووو...

عايشه:صبااااحووووو....ولا شوه صباحه هاذا..مسا القايله عليكن...

فاطمه: هههههههه..القايله الحين استوالها مسا!!!

عايشه:في بيتنا كل شي ممكن.. فطيم...احمد ايقولج يالله اذا بتسيرين

فاطمه: يالله بسير انا..لطيفه..عقلي و حطي مخج في راسج..و لعب اليهال هاذا ما يمشي عند الرياييل

عايشه: امممممم...فطيم..لا لا تطلعين بيلف احمد عند باب المطبخ اترييه

طلعنا انا و فاطمه عند باب المطبخ

لطيفه و هيه تمسك فاطمه من جتفها:فطيم...شوه اسوي

فاطمه: لا تفتحين هالسالفه ويايه مره ثانيه بليز..تبينه اخويه تراج ممنونه اذا بتضوينه..ما تبينه ارمسي قبل لا يرمسون الرياييل و ايقصون الحيّه...

لطيفه: ضو يا فطيم في فوادي تشتعل نيرااااان...جهنهم الحمرررا..ياويلي ويلاه

فاطمه: وين سار سيف؟؟

لطيفه:عالاقل خلو سيف اهنيه ايونسني فهالوحشه..و العصر بطرشه عندكم..

فاطمه: ما عليه يالله فمان الله

لطيفه: الله يحفظج

++ شفت احمد و هو ايريوس بالسياره على باب المطبخ و فطيم و هيه تركب من جدام عند اخوها..يا ربي شوه اللي قاعد ايصيرلي؟؟ حلم ولا علم..كاااابوس ولا ادري شوه نهايته..فلم رعب..ياربي سترك ..سترك ولا غيرك اطلبه..احمد اهاني و جرحنيه في كرامتيه..كيف بعيش وياه عيشة ريال و حرمته؟؟ كيف بييب عيال منه و هو طعني في عزة نفسي..كلماته ما بنساهن طول حياتي..احمد روح و خلني في حالي الله يخليك..في اللحظه اللي بدا يريوس فيها احمد..صار الشي اللي ما يا على بالي..طلع لنا سيف..مادري من وين..انربط لساني..بغيت ابغم على سيف عشان يخوز عن السياره..و بغيت احمد يسمعني عشان ينتبه بس مارمت..ريولي ذابن..و سمعت طنين في اذني و اشوف الدنيا اتدور جدامي..ركضت بأسرع شي تروم عليه قوتيه..و كل اللي رمت اقوله صرخه باسم سيف اللي انتبه ووقف في مكانه ولا تحرك..ما حسيت بعمري الا و انا ادق على سياره احمد من ورا بدق هستيري..الين ما وقف السياره..في هاي اللحظه يلست على ركبيه..و انا اشوف الدم تحت التاير!!!!!!

نزل احمد و فطيم يترابعون من السياره..فطيم ركضت صوب سيف اللي ما صابه شي لانه وقف في مكانه من سمع صرختيه..و احمد واقف فوق راسي و هو ايشوف الدم في ايدي

احمد: شووووووووو....شوووووه استوا؟؟؟؟ سيف وين؟؟ الله يلعنكن ارمسن!!!

فاطمه: هاذوه احمد ...هاذوه سيف بخير ما فيه شي

احمد: الله يغربلكن و يغربل شويراتكن..يوم قلتلكن خلنا انشله...النحساااااااااااات

فاطمه: بس احمد...صل على النبي..ماحد صابه باس...لا تصارخ ما تشوووف البنت شوه حالتها..بس لطفين بس لا تصيحين نشي نشي..نشي ما حد صابه شي..هاذووه سيف بخير..

احمد: و انتن يوم الصبي عندكن..شله ما تشوووفنه..ساهيات لاهيات عنه!!!! يعلكن ان شالله....( احمد و هو يكتم غيضه..و ايشد ايديه ).

فاطمه و بإنفعال: و انته يونك ما تعرفه سيف؟؟ من متا سيف في شورنا؟؟؟ من الصبح يلعب عند الفيران..ما توقعنا انه بيطلعنا اهنيه فالحوش من ورا!!!!

احمد و هو ايأشر على لطيفه: كله منج انتي...يعل ما يتم فار ان شالله..فاجتنهن يترابعن اكيد انه بيربع وراهن!!!

سيف و في اول ردة فعل عقب الصدمه: عممم..عمي احمااااد...لا تهّد على خالوووه لطووف..حرر..حررااام هي قالتلي اروح اروح داخل..بس انا ما ما طعت..عمي احمااااد( و سيف وهو ينقع من الصياح) انته دست على الفاااااار...دعمت السياره الفار حرااام الحين خالوه لطووف بتصيح..انها..انها هيه تحبه

الكل التفتت في هاللحظه لتاير السياره اللي كان خايس دم..دم الحليان الفار مال لطيفه..شكله سيف كان يركض ورا الهامستر اللي دخل فجأه تحت تاير السياره و انهرس..جسمه كان متناثر في كل مكان..و اعضائه طالعه من جسمه..و الدم مخيس كندوره لطيفه و ايديها..قامت لطيفه اتلملم اعضاء الفار و دموعها سكايب ما وقفن..و شهقاتها قويه تهز البدن..اول شي الصدمه..الخوف على سيف..الانهيار..قسوه احمد..و موت اعز شي عندها!!

لطيفه و تحاول انها توقف و تتساند على السياره: ماشي ممم...ماشي استوا

فاطمه: بس لطفين..بس فديتج..هاذا الا فار..و يت فالفار ولا انها تيي في راس سيف..ينييبلج بدل الواحد عشره..بس فديتج لا تصيحين سيري داخل ..سيري و انا بشل سيف وبهدّيه

لطيفه و الدموع مخيسه ويهها و هيه اتكلم احمد: شو...شوه من البشر انته!!! ما عندك احس...احساس.. ما شي دم...خخ..خاااف..ررر..خااف ربك..الميت ايحس و انته ما تحس..

++ركضت داخل و انا اشوف الدنيا ضباب في عيوني.. مادري كيف قلت هالكلمتين..هل انا غلطانه ولا لا ؟؟ ادري انه احمد ريال و انه الكلام اللي طلع منه طلع في لحظه غضب و خوف على سيف اللي كان بيطير من بين ايدينا في غمضت عين..سيف اللي هو راس مال امه و ابوه..آآآآآآآه كل اللي كنت كاتمتنه طلع في لحظه..تراكم سنين..من الذل ..اه يا حمد شوه تبا فيني!! كفايه بس..كل شي يفرحني في هالدنيا خذته عني في غمضت عين..حتا الحليان!!!اتركلي سنين عمريه الباقيات لي ولا تتدخل فيهن..انته في طريق و انا في طريق...

دخلت الحجره و قفلت على عمريه الباب..و عقيت عمري على الشبريه و انهرت في موجه من الصياح الهستيري..اصيح و اصيح و اصيح..تصدقون لو قلتلكم ليش؟؟ فأنا مادري شوه السبب..حاسه بيبل في قلبي و انهار..تصدع و تركني في شتات..كل الامور اختلطت في راسي..بس الصياح هو الشي الوحيد اللي كنت متأكده منه..وسيلتيه الوحيده عشان انسا ولا اتناسا بها همومي..آآآآه يا قلبي..مر الوقت ولا حسيت الا بالاذان ايأذن لصلاة العصر..معقوله كل الوقت اللي خطف ما حسيتبه!!! كيف بحسبه و انا افكار و افكار اتدور في راسي..شي واحد طلعت به كنتيجه..احمد ما بيني و بينك حياه..انته في درب و انا في درب..

دخلوا علي عيال سعيد اخويه يتراكضون فرحاااانين..

حمد: عمووووووه...لطووووف...يالله يالله حطي اغراضنا و ملابسنا بنروووووح

لطيفه: وين وين بتسيرون؟؟

جين: مستر سعيد قول يالله سوي لبس بسير دوباي عند مدام..

حمد: عموووووه بنشوووف ماماه ...بنروح انبات عند ماماه...احبها ماماه انتي تحبينها.؟؟

لطيفه: هيه حبيبي انا احبها ماماتكم...لانها هيه يابتكم عندنا..يالله تبون تتسبحون..

حمد: يالله...عموه لطيفه عندج تهن(دهن) عوود

لطيفه: هههههه عندي تهن عود...شوه تباه؟

حمد: حطيلي عشان ماماه اتقولي ريحتك حلوه حمودّي

لطيفه: فدددددديتك..

شليت حمد و دخلته الحمام عشان اسبحه..من يوم يومهم امهم ما كانت ترضا انه الخدامه تسبحهم..و دام ابوهم فرق امهم عنهم تولينا انا و عويش اختيه هالمهمه حمد عليه انا و خلودي عليها هيه..

لطيفه: جيـــــــــــــــــــــــــن...حطي ملابس جديد اول باباه يشتري و حطليهم اندر وير و فوووط لا تنسين

جين: اوكي

لطيفه: وشوفي جوتي احمر لا تحطينه حمد ما يحبه...روحي عند عايشه قولي حقها وين اول جوتي جديد ماماه عفرا يشتري؟؟

جين: اوكي

سبحت حمد و لبسته و حطيتله العطر مثل ما طلب مني..و توني وانا اسحيه ما حسيت الا حد ايدق دقتين و ايدش سيده..اعرفه هاذا سعيد ايدق و ايدش على طول..عاد انا شكلي الله لا يرويكم العيون حمر و متبهدله وشعريه كشه لو تحط فيها مشط ما بيظهر..

سعيد: مسا الخير..

لطيفه: مرحبا بو عسكور...شحالك؟

سعيد: بخير و نعمه..هاه اشوفكن مشتطات وياهم احيدها عويش اتلبس خالد..ليش ما تخلن خداماتهم ايسدنهم بدال الوحده حاطلهم ثنتين؟؟

لطيفه: عنبوه يا سعيد يوم نحن بنتعبل(بنهتم) بهم..هالشي من خاطرنا..و عيال اخويه كم بيفرحني اني اسدهم

سعيد: ما تقصرن بنات حمد...حطيتلهم ثيابهم؟؟

لطيفه: هيه.. بتوديهم عند حمده اليوم؟؟

سعيد: هيه ..هالويكند بخليهم عندها..ماروم اقطعهم عنها..بعد هاي امهم و ما يصبرون عنها..و جان حمده غلطت في حقيه..مب لازم العيال يكرهونها..

لطيفه: و نعم بك بو عسكور..منوه بيوديهم الين دبي؟

سعيد: انا بوديهم وايلد وادي..و الفليل بوديهم عند امهم هم وخداماتهم..

لطيفه: زين اتسوي فيهم..هاذيلا الا فريخات و ما يقهرون البعد وايد..

و بالصدفه و انا اتحرك جدام المنظره شفت كشتيه بركان هايج..بصراحه قفطت اطلع جدام سعيد جيه..على طول ركضت للسشوار..عشان اروضه شوي..دام سعيد التها ويا عياله..

سعيد: لطفين...دوم دوم تسشورين شعرج بس عليه بيحت ( بيطيح)

لطيفه: لا لا ما عليك ..ما يعوّل

سعيد: من عرفتج و انتي دوم تكوينه بس عليه..تعالي تعالي أباج...

لطيفه: ما عليه ببدل البجامه

سعيد: تعالي تعالي ..ما عليج يونج تستحين منيه..و بعدين شوه بجامه قطعتين حرمه انتي البسي قميص نوم

لطيفه: ههههههه...بدو ما تنلامون..تبونا بجلابياتنا..

سعيد: البدو تاج راسج جان ما تعرفين...( سعيد و هو ايأشر على المساحه اللي عداله من الكرسي) تعالي

لطيفه و هي تيلس عدال اخوها: هلا بو عسكور شوه فالخاطر من صوبنا؟؟

سعيد و هو ايحط ايده على جتفي اكيد السالفه فيها ان: يي يا لطوف كبرتي بسرعه

لطيفه: لا لا لا بعدني غزيل ام عشرين ربيع علة قولتهم انته اللي كبرت...

سعيد: ههههههه...لطيفه سمعيني زين..انتن الحين ماشالله حرمات..و عاقلات و تفهمن..عويش و مخطوبه و انتريا فري شوي اتحسن حالت ابوه و بنيوزها..و انتي مب صغيره..و نصيبج ياج و نبا انشاورج..

++ تعرفون بشوه حسيت..حسيت انه مسك قلبي و ربط عليه حبل المشنقه!!..بهالسرعه!! ليش ؟؟ و منوه ؟؟سعيد من بد كل الناس ايشاورني انا؟؟؟ و بشاورني في منوه!! في سالم ولا في احمد؟؟ لا ياربي بعدني مب مستعده اني ارد عليهم..لو كان ابويه بيكون اهون بروم اشرحله ظروفي بروم اطلع اي حجه و برفض احمد و بصرّف عمري بس سعيد..رغم انه سعيد اصغر عن ابويه و افكاره اقرب لافكاري بس كيف بتفاهم معاه ايتم الابو احن على بنته من خوانها!!!!!

لطيفه:أأأأأأأ....ما ما...و الله مادري

سعيد و هو يمسك ايدي اللي تترتجف بين صبوعه الكبار و يحاول ايهديني: عنبوه يا لطيفه انا قلت انخطبتي ما قلتلج بنوديج المقصب...شو بلاج تنتفضين جيه!! هههههههههه...ريلاكس ريلاكس..شوفي لطفين الاخبار بين البنات ما تم تنتشر في لحظه..و انا ادري انه فطيم البارحه باتت عندج يعني اكيد قالتلج..صح ولا لا ؟

لطيفه: بو عسكور..شوه تباها اتقولي؟؟

سعيد و هو ايطول باله فالكلام: يا بنت حمد..عرب رمسونا فيج يبغونج..و الله ما كتب لهم نصيب عندنا لانه ابويه شاور عيال عمتج فيج و ما رخصوج

لطيفه: بس انا مب محيره لاي واحد منهم..

سعيد: ندري مب محيره..بس هاي سنتنا من تنخطب البنت ايشاورن هلها عليها..و بصراحه ما درينا انه احمد في خاطره نيه عليج..و دام هو ولد عمتج منا و فينا اخيرلج و لمصلحتج..

لطيفه: هيه ...بس..

سعيد: شوه بس بعد؟؟!!! انتن الحين حريم كبار و فاهمات..و راعيات مواييب و بيوت و مصيرها البنت اتعرس و اتسير بيت ريلها جان اليوم و لا غيره...صح ولا لا ؟؟

لطيفه: صدقت بو عسكور..بس انا اشوف عمريه يعني بعدني...أأأأ...مادري ابا اكمل دراستيه..

سعيد: و منوه بيمنعج؟؟؟ احمد ماشالله ريال و نعم..ما ينطرا في ميلس الا و قالوا و نعم الريال..و انتي اكيد انج اتعرفينه احسلج لا تبتلين بريال غريب لا نعرف مواييبهم ولا سنتهم و اتبهدلين وياهم..و انتي هالكورس جان بغيتي كمليه..ولو اني انصحج انج ما تكملينه هبابج تتزهبين..و عقب العرس تفاهمي انتي وريلج..

++ماصدقت انه سعيد خلص جملته..حسيت جنه الاكسجين خلص من الغرفه: شوه ما كمّل هالكورس ما فهمت؟؟ ليش متا العرس!!!!؟؟؟؟؟؟؟

سعيد: ماشي شهر اربعه الياي يعني جدامج جيه تقريبا خمس شهور..امبونه فالصيف بس جدموه لانه احتمال اسير دوره فالصيف..و احمد يا لطيفه مب ياهل ريال بو سبع و عشرين..يعني مب صغير..هاه شوه الراي اقولهم موافقه؟؟!!!

++ شوه موافقه؟؟ تباني اوقع على شهادة وفاتي!! شوه اقول شوه اسوي؟؟ مادري كل الاشياء المألوفه جدامي استوت غريبه..حاولت اركز على السقف و اتنفس بكل صعوبه بس و الله مارمت..ايد سعيد اللي ماسكتني بحنان حسيتها جنها قيد من نار تحرقني..نظرة عينه اللي فيها ترقب و تشوق بأني أقول هيه موافقه..جنها تنتزع الروح مني!! شوفي يا لطيفه هاي فرصتج الوحيده ما تبين احمد قولي لا؟؟ قولي و اتفاهمي ويا اخوج و خلصي الموضوع قبل لا يكبر..بقول و اللي فيها فيها..شوه بيسوي يعني؟؟ بيجتولني؟؟!! خلهم اهون عليه ولا اني اعيش مع واحد أهانّي و طعني في كرامتيه..بينقموني؟؟ برايهم ياما بنات سونها قبلي و عقب رضوا عليهن..

سعيد: عنبوه يا لطيفه؟؟ شوه ياج؟؟ ويهج مبيض اتقولين ميته؟؟ ما يرزا عليج الا عرس!!!

لطيفه..و الله ما رمت ارد و الله ما قدرت انطق..شوه بلقا عليه!!! شوه الحجه؟؟!!

سعيد: لطيفه انا ما بترياج طول اليوم ..شياج صخيتي

لطيفه و بإندفاع: لاااااااااااااااااااا

سعيد: شوه لا ؟

لطيفه: ماباه!! مابا اعرس..سعيد انا بعدني ياهل و العمر جدامي شوه عايلني على العرس؟؟!!

سعيد: و الله شوه اقولج قلتله احمد الله يهديه خلها تكمل دراسه ما رمته..امرره ولا اعرس هالصيف ولا ماشي عرس..بحااول ارمسه مره ثانيه..

لطيفه: لا لا سعيد..فديتك انا مابا العرس بكبره لا احمد ولا غيره...فديت روحك لا توزوني عليه

سعيد و الغيض بدا يرتسم على ملامحه: ليش؟؟ شله ما تبينه العرس؟؟!! البنت مالها بد من العرس و بيت ريلها...ولا اليوم ولا باجر..شوه المانع؟؟ رمسيني انا اخوج ...شي منكره عليه؟؟

لطيفه و بكل وسائل الشفقه: سعيد..مابغي اعرس والله لا في بالي حد ولا غيره..بس مابا ربايعيه كلهن بيكملن دراسه و انا على شوه مستعيله..برايني اهنيه عندكم..و الله اني ما جنعت (شعبت) منكم..تراه شمسه و عرست و عويش سنه بالكثير و بتعرس..ووضحوه ياهل ليش اتوذون مني؟؟

سعيد: يااااابنت الحلال ما حد توذا منج!! امبونج مب عايشه على روسنا..طوّل عمر بويه ما قصر لا علينا ولا عليكن بشي..و انتن عايشات في نعمه ولا عليكن قصيره..بس هاي البنت مصيرها العرس..انتي على شوه معترضه تبينا انأجله شوي فالج طيب..بنتفاهم ويا الريال و بنرد عليج..هاذا اذا رمتله..

لطيفه و دموع بصمت تتهامل على خدها: سعيد...انا احمد ماباه..لا تغصبوني عليه..و الشرع قال لي الحق الحق اني اقول لا ؟؟

سعيد خلاص شكله فوّووووووول ...عصب و حواجبه تعقدن..شوه قلت انا؟؟ قلت حقي في هالحياه اني اختار شريك حياتي...ما غلطت!!

سعيد: شوووه ما تبينه...ولد عمتج..دارس و مخلص التقنيه..و يشتغل فالديوان..عايش في خير و نعمه..كل سنه سياره يديده..و نحن من استوينا ما قد شفنا عليه شي ولا نقدناه...

لطيفه و بشهقه: بس و الله و الله اني مالي رغبه فيه...ماباه مب غصب

سعيد وبأقصى درجات العصبيه..و هو يوقف عن الكرسي: لا غصب و نص!! لا يكون حاطه في بالج حد معين..و انا اللي مسولج كبرت بخت و قلتلهم لا ..لأازم انشاورها حليلها..ولا انتي لا حد عبرج ولا حد سوالج سالفه..ايكون في علمج..خوانج خليفه و سلطان وافقوا..و ابوج امررره ماسوالج شور..الا انا اللي حنيت عليج و قلت بشاور..مب منج من اللي عطاج ويه ويا ايشاورج..

لطيفه و هيه يالسه عند ركب سعيد : و الله و الله و ربي سماه اقسم لك اني لا قد حطيت عيني على حد ولا شي..

سعيد و هو يقعد: عوووذ بالله من الشيطان..انتي اللي خليتيني اعق هالرمسه..شوه بلاه احمد؟؟؟ ناقص ايد ولا ريل؟؟ قوليلي عطيني عذر واااحد ولج اللي تبينه؟؟؟ ارمسي انطقي..شوه بلاااه احمد ما تبينه؟؟ عيل لو خطبج العميمي بتوافقين؟؟؟

لطيفه و بإندفاع: هيه...هيه بوافق..

++ مادري ليش قلت جيه..و الله انه من الزيغه و الخوف قلت جيه..تحريت انه بموافقتيه على سالم ببعد الشك عن مخ سعيد في اني حاطه بالي في شخص متعرفه عليه..بس شكلي غلطت غلطه كبيره لانه نظره الشك في عين سعيد زادت..و الشرار مولع عيونه توليع و زم شفايفه بطريقه قلت اذا عشت الين باجر معجزه!!!..بس سعيد سوا العكس و بغا يكسبني..رد على الكرسي و تساند..و أشر بإيده على المساحه الفاضيه من الكرسي..

سعيد و هو يتصنع الهدوء: لطيفه..الرسول-ص- قال من ترضون دينه و خلقه فزوجوه..و انا ما شفت شي على احمد..لدرجه انج تفضلين الغريب عليه..ماقول سالم فيه عيب..هاذيلا ناس وعرب و نعم.. بس ولد عمتج هاذا و بيحطج في عيونه..ولا انه مفوت فرضه ولا انه يشرب خمّاري!!! و الريال يباج من خاطره..حتا يوم قلتله شله ما رمست من زمان قبل لاتنخطب عويش قالي انا اللي فبالي لطيفه مب عايشه..شوه تبين اكثر عن جيه؟؟!! استهدي بالله انا ما بضغط عليج صلي الاستخاره و ردي عليه بخبر..

لطيفه: سعيد انتو اتعرفون انه احمد مغازلجي..شقايل بتفرون اختكم عند واحد ما خلا بنت ما كلمها..!! اهون عليكم..عنبوه انا هاذا كيف بعيش وياه..

سعيد و بعد لحظه تفكير: شوفي لطيفه..انا مب يالس اتشفع لولد عمتج..بس ماشي ريال ما يغازل و ان وجد تراه نادر..صح ولا لا ؟؟ و الشباب مالهم بد من المغازل..بيرمسونهن و بيشوفونهن و بيلعبون عليهن شرات ما هن يلعبن عليهم بس لا تحرين انهم بهالعلاقات انهم بياخذونهن ولا بينهم مستقبل هاذا كله خريط و الريال من يعرس و يرتاح مع حرمته يطب هالسوالف..و انتي بنت خاله من لحمه و دمه ما بيربع و بيغازل عليج..

++ماشي ردة فعل من لطيفه...حسيت بعمري مخدره..و ادركت اني لو برمس من اليوم الين ماموت ماشي فايده..دام سعيد قالي بويه رد عليهم..تراه كل شي انتها قبل لا يبتدي و ابويه وايد صارم في امور العرس..كفايه انه رد عليهم و ماشاورنيه..لو مب سعيد و تكرمه في انه يعطيني لفت نظر بالموضوع جان انا مثل الاطرش فالزفه..فجأه..سمعت صوت في مخي يدور و يدور و يدور..صوت مألوف..لشخص طعني طعنه أليمه و كلماته اللي حافظتنهن " مااااابااها مب غصب هو!!! لو ما تم بنت فالدار انا لطوف ما باخذها"..حطيت ايديني على ويهي و سرحت في عالم هستيري من الصياح و اللوعه..

سعيد و هو يلتفت صوب لطيفه..و كله عجب من حالها..شوه ياها؟؟ عنبوه لو حد ميت عندها ما بتصيح جيه..قلبي عورني عليها..ضغطت عليها وايد لو خليت امايه اتفاتحها فالموضوع مب احسن..شليت ايدين لطيفه عن ويهها المحمر المغسول بدموعها..و حطيتها على صدريه و لويت عليها..ما تهون عليه اتم هاي لطيفه..و غلات لطوف في قلوبنا هل البيت كلهم مب شوي..

سعيد: عنبوه يا لطيفه شوه هالصياح!!!! ياهل انتي..امبونه فراقج علينا مب هيّن..نحن يوم غصبانج على احمد بغينا مصلحتج..يا بنت حمد الريال شارنج..و شارنج مب مره الف..انا ماقول هالكلام عشان اسكتج..اقوله لاني انا رمسته و تفاهمت وياه..يا لطيفه حسبيها زين..بترفضينه و بتقولين لا..شوه بيتسوي على ابوج..ابوج فيه القلب يا لطفين و لو شفتي فرحته يوم ما طاع ايرخصج احمد و الله انه نش و لوا عليه..و قاله الحين ارتاح قلبي يوم عرفت انك انته اللي بتاخذ لطيفه..تبين القطيعه بينا اتحّل؟!..و انتمشكل عسب عرس..مب كفايه فرقا عمي و ابويه..بسبه شويرات حريم ميّنن..هاذيه مريم بين الحياه و الموت و انا عيالي ضايعين لا ام اتحاضيهم ولا ابو متفرغ لهم..ولد عمتج و بيستر عليج..و منا و فينا..يا لطيفه لا تزيدين الشكر الا حلاوه...برايج بخليج انا الحين..

++و طلع سعيد..طلع عقب ما عذبني بكلام قوي..قاله و نظره عينه سيف تطعني في قلبي..اول مره سعيد يطري هالموضوع..قاله بعذاب..شوه بيستوي لو رفضت..هل معقوله بطيح القطيعه بينا و بين بيت عموه؟؟!!! لا لا مستحيل شوه هالتخلف خلاص هالايام البنت اتقول لا ..و الناس تتقبل الموضوع..ليش اكبره..بس يا لطيفه انتي اتعرفين شوه استوا يوم رفضوا عمي مبارك سعيد اخويه..خوان من بطن و ظهر لا يشوفون بعض الا يوم العيد سلام و خلاص..لا انعرف احوالهم ولا لهم علاقه بنا..هل هاذا اللي بجنيه من رفضي لاحمد..و بويه..هالريال الشيبه..اللي و اقولها بكل تواضع اسوا عيونه..شوه بتكون ردة فعله؟؟

لطيفه: سسس....سعيد

سعيد و هو يلتفت عند الباب: هلا؟؟

لطيفه: شورك و هدايه الله..

سعيد: لا لا...العرس يا لطيفه مب غصب..و جان ما تبينه انا بتصرف..

لطيفه: سعيد...انته قلتها..ولد عمتيه و بيحطني في عيونه..و ماريد اطيح القطيعه بينا بسبت عرس..

سعيد: اللي فيه الخير الله بيجدمه..

++ طلع سعيد و سكر الباب..سكر باب حياتي بالشمع الاحمر..انا قبلت احمد و قبلت اني اكون انسانه لا لها قدر ولا قيمه في هالحياه..طز في كل شي..شوه يعني؟؟!! صحة ابويه و فرحتة في هالدنيا كم تسوا؟؟ ملايين الدنيا كلها ما تعوضني فرح ابويه و سعادته..و ما في داعي ازيد الطين بله في هالعايله اللي تشتت عسب سبب تافه شخص و رفضوه للعرس اتقوم اطيح العداوه بين الاخوان..فضل عنها من سعاده اللي بتهدم علاقات بين بيتنا وبيت عموه اللي عشت فيه احلا سنين عمري و امرّها..خل المشاعر تولي..و الحب ايموت..ولا عزاء للعاشقين..و اللي بيني و بين احمد مات و انتها..و اللي بيكون بيني و بينه الله يعلم شوه مكنونه!!!!

~~~~~~~~~~~~~~~~~~~~~~

في بيت بخيته..

رديت من عند لطيفه و راسي بياكله الشك..و قلبي ياكله الحزن..الحين انا فطيم طمطم توأم روح لطيفه ولا ادري شوه اللي استوا بينها و بين اخويه..شوه هالعالم هاذا؟؟ لا حوووول..انا اعرف اخويه زين غلطه جايده ما يطيح فيها وما يغلطها بو شهاب..معقوله لطيفه سوت شي و خلت احمد ايعصب عليها و يتواقع وياها..انزين شوه هالوقعه اللي خلت لطيفه ما طيح بيتنا خمس سنين!!! لا لا يا ربي اموت و اعرف شوه مستوي؟؟!!! لا و اللي زاد الطين بله الموقف اللي استوا اليوم الظهر..حشا قلت اليوم احمد بيظهر شي منه بنندم عليه طول حياتنا..الحمدلله اللي سلم سيف..ولا ما بسامح نفسي اذا استواله شي..بس ردة فعل احمد كانت وايد مبالغ فيها..ايصارخ و ايهد على البنت..اصلا احمد من شاف لطيفه اليوم وهو متوتر و مشدود..مادري و الله مادري..اذا لطيفه ما بترمس..احمد اللي بيرمس لازم انفج هالمصيبه قبل لا ياخذون بعض ولازم يتصافون عنبوه عقب بيغدون ريال و حرمته شوه بيسوون!!!

في هاللحظه دق موبايلي..كانت مسج من احمد " يا متر..اعملي كوبايت شاي بالحليب من ايديك الحلوين و جيب سلة الباتشي اللي تحت فالمجلس..تمام؟؟"...ههههه يوم احمد رايق لو بتطلب عيونه بيعطيك اياهن..رديت عليه"حاضر يا سعادة البيه" فرصتيه اني استفرد بأحمد و استجوبه عن كل شي..لحظه انكشاف الحقيقه حانت على قولتهم...

شليت الجاهي و يبت سلة الباتشي بكبرها..مدمن حلاوه!!!..ما عليه لزوم التقردين..جدام حجره احمد تنفست الصعداء ادريبه ما بيطيع حد يتدخل في اموره..بس لازم هالمره لازم..شفته منسدح و ايطالع قناة رياضيه مباراه و سيفوه منسدح عداله ضيف شرف..هالولد متلق بعمه بصوره مب طبيعيه..اوهوووو و الحل يعني..دخلت و انا ساكته عاد كله ولا الرياييل و ايشوفون كوره الذبابه ما تحل على خشمهم هاذيج الساعه..يلست..و اتريت الشوط ايخلص بفارغ الصبر..و اخيرا

فاطمه: منوه تشجع انته الاحمر ولا الاسود

احمد: روما..

فاطمه: جني عاد عرفت منوه روما..بوشهاب لا تاكل حلاوه هالكثر مب زين

احمد: و الله لو مب الرياضه جان غديت كبر الدرام من هالحلاوه

فاطمه: عاد انته ادمان مب طبيعي لازم تتعالج ولا بييك السكر..

احمد: فال الله ولا فالج..عاد بصراحه الباتشي لا تقاوم..ياخوفيه يحطون فيها خمر..

فاطمه: عشااااان جيه كل ما ياكل منها سيفوه ايهلوس

احمد: هههههههه...هالصبي ايهلوس من دون سبب..فديته رقد..

فاطمه: خيبه بتحتشر شمسوووس ما تباه يرقد المغرب...هاذا من تأثير التطعيم

احمد: فطيم...شوه في خاطرج؟

فاطمه: سلامت راسك..بوشهاب ..ماشي في خاطريه حرام البنت تيلس عند اخوها؟؟!!

احمد: لا مب حرام..بس اشوووفج اتحرقصين..قولي قولي شي تبين من السوق ولا تبين فلوس؟

فاطمه: لا حشا..ما علينا قصيره دامك و انته و بوسيف عندنا..بس بغيتك في موضوع..

احمد: قولي

فاطمه: لطيفه؟

احمد و هو يعتدل في يلسته: شوه بلاها؟

فاطمه: ماشي..بس..حسيتبها مضايجه

احمد:تستاهل..يوم الولد عندكن ثاني مره حطنه في عيونكن ولا ردنه عند امه احسن

فاطمه: خلااااااص انزين...فهمنا..بس حسيتبها مضايجه من الخطوبه؟؟

احمد و بإستهزاء: أشوووووووو..شوه يعني؟؟

فاطمه: احمد انته شوه بينك و بينها هالبنت؟؟ قد غلطت عليها؟؟ قد قلتلها شي؟؟

احمد و بعصبيه: اتخسي الا هيه..جاني ما قد غلطت على اللي احسن عنها بغلط عليها

فاطمه: احمد انته شقايل ترمس عن حرمتك جيه؟؟!!

احمد: من فعايلها

فاطمه: حليلها و هي شو سوت؟؟!!!!!

احمد: فطيم هاتي اللي عندج؟؟ شوه تبين اتقولين انتي؟؟ انه لطيفه ما تباني؟؟ شوه يعني بتردنيه؟؟!!

فاطمه: انا مااااقلت جيه..شوه بلاك انته اليوم غادي جبريت..خلنا انتفاهم

احمد و بتنهيده: على شووووو

فاطمه: احمد هاي الحينه تعتبر حرمتك..و بتستوي ام عيالك..انا لاحظت عليها تردد يوم قلتلها عن الخطوبه..قلت يمكن يعني مثلا بسبة تتش بينكم..بصراحه لاني من زمان لاحظت عليكم انكم مب مثل اول

احمد: لا تزيدين و تخرفتين من عندج..ما بينا شي..

فاطمه: الا بينكم و نص...و قص ايديه من الكوع اذا ما كان شي بينكم..احمد انا ادري اني مالي خص باللي بينكم بس صدقني حياه ما تقوم على التفاهم ما تمشي..و انا احسكم مب متفاهمين

احمد و بتهديد: شوفي يا فطيم..جان ربيعتج دازتنج تباج تقنعيني اني افج الخطوبه قوليلها ذا بعدها..اوكي؟؟ غصب طيب باخذها...و نش احمد جدام التواليت يتسفر بعصبيه

فاطمه: و الله و الله في سماه انه ماشي صار ولا استوا من اللي قلتله..شفت انك انته اللي تخمن من عندك..ليش؟؟؟ شوه مستوي بينكم ايخليك اتشك بها بهالطريقه؟؟

احمد...مطنش..

فاطمه و هيه خانقتنها العبره..: احمد فديتك شوه فيك؟؟

احمد و بعصبيه خطيره..و ايأشر بصعبه على فطيم: شوفي فطيم...اذا ربيعتج حاطه حد في بالها و تبا تاخذه ..خليها اتعشم عشم بليس فالجنه..اوكي..تدرين ليش؟ لانه اصلا خاطبنها عشان اذلها اوكي؟؟ و هاذا اللي تهاذيبه بخليها اتمناه طول حياتها..

فاطمه و بشهقه: احمممممد!!!! خاف ربك..عن شوه اتكلم انته؟؟!!! لا تظلم البنت

احمد: ليش ان شالله؟؟ شوفي فاطمه انا اعرف انه لطيفه كانت تحبنيه يوم هيه ياهل..و هالشي ما خفا على حد..انزين..مب معناه يوم اخطبها اتردد و ما تخلي حد ما تطرشه عشان ايفج الخطوبه!!!!

فاطمه: منوه طرشت اذا تقصد انا تراني و الله انـــــــ...

احمد و هو يقطع الرمسه: وفري ويع الراس لبعدين..لطوف باخذها غياض لها وللي تباه اوكي؟؟ ( احمد و هو يتصنع صوت بنت) أحـــــبه أحبه أحبه...شوه اتحرني ما ستمعتكن مسودات الويه!!! ولا تباني اذكرها الشيخه لطيفه..والله و الله يا فاطمه رمسه توصلج و تعداج..اني هاي اللي اسمها لطيفه بتشوف السنع الزين يوم باخذها..و حركاتها هاي اللي فاضحتنها مب علينا نحن...نلقطها عالطاير..

فاطمه و دموعها تنزل: احمد حرام و الله حرام انته فهمت كل شي غلط خلني اشرحلك..خلنا انتفاهم

احمد: انا بسير ريال يترياني فالقهوه..وسواد الويه و حب ما حب و عشق هاذا ما يمشي اهنيه عندنا..و خليه هاذاك السبال اللي تباه يترياها ...و بنشوف اذا بتروم ترفضني ولا لا ؟؟ ...

فاطمه: انزين احمد..احمد..حرام لا تقول جيه انته فاهم كل شي غلط..و الله انه لطيفه لا حطت في بالها حد ولا شي

احمد: هاهاها..علينا هالحركات..على ماما يا بابا!!! ما شي بنت هالزمان ترفض معرس منيه و الدرب..الا جان حاطه حد غير فيبالها..و هالغير لو يا اهنيه عندنا فيها قص رقاب..و بذنيه هاي سامعنكن ولا تبيني اذكركن برمستكن..و لطوف من ردينا من العمره و هي مب طبيعيه و تلمحلي انها ما تباني..و كثر الكلام الحين لا يجدم ولا يأخر..فمان الله

+++ طلعت و انا احس بدقات قلبي بتوصل ذنيه...الله يلعنها من حاله..من زمان و انا ماسك عمريه عن هالرمسه و عن هالشكوك..امبونها اتدور في مخي و قلبي من زمان ولا افضيت لها بحد لاتستوي حقيقه..و اليوم رمست فطيم اكدتلي كل شي!! مادري بشوه احس؟؟ بقبضه في قلبي، و مخي امرره احسبه ما يجمع ركبت السياره ولا ادري بعمريه وين سرت..عنبوه يا احمد ما ترزا عليك هاي الا بنت..و ذلفتها ان شالله لو مره ما تباك لو تخمها بنعالك..مب انا اللي بذلنيه بنت و لو كانت بنت خالي!!! آآآه الغصه اللي ضاربتني و خانقه صدريه مادري من شوه؟؟ ليش متحسر..طز فيها وخطبه و بفجها عنها ان شالله ما عرست ..تاخذ اللي تحبه مسوده الويه ولا اني اخذ وحده بايعه شرفها اتريا ريال يتكرم و يخطبها!!! أأأأأف من القهر اللي احسبه...قهر يوّن في راسي و ايقول خلك عنك كل هالخرابيط، القهراللي في قلبك لانها بغت غيرك..قهر في روحك لانه بنت كانت تربع وراك يا اليوم اللي اتقولك فيه لا!! شي واحد الحين اعرفه..ما بخليها..باخذها و برويها جهنم الحمرا..و الله يا لطيفه يا أدبج و لو احط ريلي على رقبتج!!!!!

 

و طلع احمد..عقب ما خلف عاصفه من الشكوك..و الظنون السودا في انسانه بريئه ما عرف قلبها الا شخص واحد..طعنها فالظهر..و بيبني حياه سودا بينه و بين انسانه لانه يبا ايأدبها على ظن لا له اساس ولا صحه...

 

 

"""الجزء الخامس عشر"""

-الفصل الثاني-

الله خلقني و هامتي فوق الامزان و اخذ من الدنيا تجارب و اخلي و اصبر على مر الليالي و الاحزان و ارضا بما قدر من الله و حصلي و اللي اشوفه مرخص الود منان ما انثي و امسحه من سجلي

 

الحين عدن ثلاث شهور على الخطوبه..من اسوأ الشهور اللي مرن عليه في حياتي..كل اللي فالبيت يزقرني العروس..العروس وين؟؟ العروس تغدت؟؟ العروس سارت السوق..العروس فرحانه..حشا لاعت جبدي..ماظن اني اول عروس فهالبيت..عيل ليش محتشرين جيه!!! على قولت عايشه اختيه" منوه قدج خلوج عروس و انتي بعدج ما عرستي..هاذا كله من غلاتج" امحق غلاه..الحين لو انا غاليه عندهم بيعقوني هالعقه عند واحد لا يباني ولا اباه؟؟!! مادري مادري...اهم شي انه العرس اتأجل عن موعده الاصلي من شهر اربعه الين نص سبعه..و السبب مش عشان خاطر عيوني..عشان سلطان و ضبابه اللي عندهم ثانويه عامه..و بالتالي اتأجل العرس و بيكون عقب نتايج الثانويه بأسبوعين عشان سلطان و ضبابه ما ينشغلون بالترتيبات و انخرب عليهم..عاد كله ولا سلطان ما صدقناه يوصل الثانويه..

بدت الضغوطات عليه باني ابدا اتزهب..بس انا مابا..مالي نفس..كيف بسير و بشتري اغراض وانا بتخيل عمري بلبسهن عشان خاطر احمد؟؟ كيف بسير و بختار الوان و اشكال و قطع و اغراض على ذوق احمد و هواه..حاسه بعمري شاله حزن الدنيا كلها فالوقت اللي كل بنت اتسير تتزهب اتسير و هي فرحانه..مادري كيف بتصرف..انا اعرف انه قرار العرس كان قراري انا حتا لو اتخذته تحت ضغوطات..بس لازم ارضخ للامر الواقع..يا جماعه الخير انا يوم خذت القراركنت قده..و مستعده له..بس خايفه من مستقبل بيجمعني مع احمد..احمد اللي ماله اي رد فعل على الخطوبه..ما حسسني مثل ما حسس اخواني انه يباني..كل يوم احسبه انه متندم على هالقرار؟؟!!سمعت رنت الموبايل على اساس مسج..منوه يعني..تراني اعتزلت الناس من انخطبت..فطيم مارمسها الا بيني و بينها مسجات و اذا شفتها فالجامعه فأنا اشوفها نادرا..دوامي غير عن دوامها لاني سجلت يومين فالاسبوع..عشان ايكون عندي ثلاث ايام اجازه..الحل الوحيد عشان اسكتهم..لانهم كانوا محتشرين عليه يبوني اوقف هالكورس و انا ماطعت..ما بينفعني شي غير دراستيه لو باجر انا و احمد ما تفاهمنا و اطلقنا..برد و بشتغل و هاذيج الساعه محد بيروم ايقولي شي..شوه طلاق انتي بعد؟؟!! حد ايفكر بهالشي و هو يتزهب؟؟؟ شدراني من انخطبنا و احمد لا طاح بيتنا ولا سمعت عنه شي؟؟ شوه المعنا؟؟ يبا ايبينلهم انه مغصوب عليه..

شليت الموبايل و جيكت على المسج..اول شي الرقم غريب..كله تربلات..منوه هاذا؟؟ اكيد واحد غلطان..لانه هالرقم ما مر عليه من قبل..بشوف شوه مطرش؟ اكيد مطرش مسج حب حق حرمته ولا ربيعته..يالله شوه ورايه..خلونا انعيش اجواء الرومانسيه..يوم فجيت المسج " تزعل وانا الذي منك زعلان...يا بعد عمر و قلب مغليك نزلي تحت اترياج" ههههههه...يا عيني على الحب شكلهم هالاثنينه متزاعلين و ايراضون بعض..بس عقب شوي سمعت سيف ولد عمير يزقرني لانه الدريشه مفتوحه..اتحجبت ووايجت عليه..بس..انقبض قلبي..و اعتصر..و حسيت بعمريه ادور في دوامه قهر و حزن..لانه سيف ما كان بروحه سيف و احمد اللي شال قفص في ايده..و سيف ماسك هامستر في ايده.." خالووووه لطيفه تعالي...تعالي عمي احماااااااد اشترالج فاااااااار يديد...تعااااالي اشترااااالج ثلاااااثه مب واااحد"..معناها احمد اللي مطرش المسج..آآآه..شوه بسوي الحين..احمد شافني اني وايجت من الدريشه..كيف بتهرب منه الحين..و بعدين هل انا المقصوده بالمسج؟؟!!!! ماعليه لزوم التقردين ماظني هو ايحس بشي صوبي..بدلت البجامه و لبست جلابيه عاديه.. بس بصراحه رديت و غيرت رايي طلعت لي عربيه مفصصه مهما ايكون هاذا احمد..هاذا حبيبي قبل لا يكون خطيبي..و خلوني اسوي اخر المحاولات عشان ايحنّ عليه..عل و عسا..عشان بعدين اكون مقتنعه اني سويت المستحيل عشانه..و انه الرفض من جانب احمد مب مني او بسببي.. تحجبت و طلعت..و انا طالعه شفت سلطان..

سلطان: مرحبااااا بالعروووووس...علومج؟

لطيفه: حشا ما حد عرس قبلي؟؟

سلطان: عااااد انتي غير..ماشالله ماشالله..اتصدقين عاد احلويتي يوم متنتي..

لطيفه: سلطان فكني..

سلطان و هو ايمط خدود لطيفه: عاد الحين لو بيشوفج احمد بيتخبل..مب لول غاديه عنسلانه..عنبوه حتا غزوزج رد اللون فيهن..

لطيفه: شوه مستوي خطابه انته؟؟!!! هاذا كله من يلست البيت..

سلطان: سيري..معرس المستقبل تحت يايبلج فيران..بتخبرج علا شوه مستعيل يايبلج فيران..تراه بياخذج و بتيبله انتي فيران بشريه...

لطيفه و هي تشرد عن سلطان: يالطفس انته

سلطان و هو يضحك: و الله و العرس يعلم المستحا... عقبااااااااااااااااااااااااااااااااااااااااالي.... ..

بصراحه و انا طالعه مريت عند مدخل الباب بس رديت مره ثانيه لاني اريد اشوف عمري فالمنظره..بشوف هل صدق اني متنت و اتغيرت؟؟!!! بصراحه ما كان هالسبب الحقيقي.. السبب كان اني اريد اشوف عمريه يعني مرتبه ولا لا ..و بعدين بشوف اذا صدق هالشكل بيتخبل عليه احمد؟؟؟ انا ما اقول اني ملكت جمال..بس ما انكر اني حليوه..ووايد من ربيعاتي ايقوللي انتي كيف مخلينج الشباب اللي في عايلتكم؟؟!! و انا اللي ما همني غير واحد..و للاسف هالواحد ما مليت عينه!!!!

لطيفه: السلااااااااام عليكم..

احمد: و عليكم السلام و الرحمه شحالج لطيفه؟

لطيفه: بخير ربي يسلمك و من صوبك..

احمد: الحمدلله ما نشكي باس..

سيف و هو يلوي على لطيفه: خالوووووه شفتي الفااار اللي يابه عمي احمد حقج..حلو وااااايد

لطيفه: فديت بوهناد...تعال تعال بوايهك

سيف: انا مش هنددددددددددي!!!!! لا تقولين هناد..ولا تراه ماحبج

احمد: هههههههه..امرره جاهز انته دوم الا ما حبج و ما حبج

لطيفه: هههههه..جني عاد امتحنت انا جان حبيتنيه ولا لا ؟؟

رفع احمد نظرته بسرعه صوب لطيفه بنظره كلها تساؤلات..شوه السالفه انا كنت اقصد سيف..ما قصدت بكلامي احمد!!!! اصلا كيف بتجرأ و بقول حق خطيبي ما يهمني اذا اتحبني ولا ولا؟؟

احمد و هو يناول لطيفه الهامستر: هاه لطيفه...هاذا هامستر بدال اللي مات..و بدال الواحد يبنالج ثلاثه..

لطيفه: مشكور..ما قصرت بو شهاب..بس ماله لازم..كلفت على عمرك

احمد و هو ايمد ايده: انزين شله ما تشلينه.؟؟؟ ما باكلج انا؟؟ سمحيلي على التأخير..لاني بصراحه ما خليت مكان و انا ادورهن و هاذيلا الا بطلبيه من امريكا..

لطيفه: كلفت على عمرك..تراه هاذيلا ابويه كان يايبلي اياهن من باكستان..( بصراحه اتعمدت اقول هالكلمه)

احمد: اها...بس اعتقد انهن من نفس الفصيله

لطيفه: هيه...الله ما حلا لونه هاذا..ايجنن

احمد و بنظره خبيثه: شوه عيبنج؟

لطيفه: هيه..وايد..

احمد: ادري انج ما بتتهنين بهن لانج عروس..بس شوه انسوي لازم نرضي الخاطر الزعلان...

لطيفه و ويها غادي طماطه:أأأأ...قرب داخل..

احمد: لا و الله مستعيل..سيف بييلس عندج بيونسج..

لطيفه: انزين بسويلك جاهي حليب..(اسويله اغراءات اعرفه ما يقاوم جاهي الحليب)

احمد: اذا انتي بتسوينه ما عندي مانع..اهلج وين؟

لطيفه و احمد يمشي عدالها...شوه هاذا وايد ماخذ راحته الشيخ..قلنا مخطوبين..بس شوي و بيلصق..حشا

لطيفه:سعيد و خليفه ما نزلو هالويكند..سلطان فوق..و العيوز وشيبتها مسيرين على المزارع..

احمد: سمعت انه خليفه اشتغل؟

لطيفه: هيه..الحمدلله على قولت امايه في مدينه الترتنتيت

احمد: اشوه؟؟؟ ههههههههه

لطيفه: مدينه دبي للانترنت

احمد: و الله زين..اسميك ما تنرام يا خليفه..

لطيفه و بدلع: حراااام عليك...عاد شغلته بسيطه

احمد: المهم انه اشتغل و بيكد على عمره..ما خذله شقه فدبي؟

لطيفه: هيه نعم..

عاد دخلت المطبخ و عبالي احمد بييلس فالصاله..لا الحبيب دخل ويايه المطبخ يونه بيتونس و هو ايشوفنيه..يلس على الطاوله يبتله الجريده عشان يقراها ما فيني ييلس يراقبني و انا سايره و انا راده..اروحي متوتره علاخير..وايد عايشين الدور نحن..اذا انا متخدره لاني شفت احمد..هو ليش مخترش جيه..عنبوه جنه اول مره ايشوفنيه..مادري احسبه ما صدق انا انكون انا و هو رواحنا..احسبه يراقب كل شي فيني.مشيتيه يلستيه..و انا احط البريق على الضو..و هو يتصنع انه يقرا الجريده..بس انا صدته يوم لفيت عليه اسأله كم يبا شكر..بصراحه حسيتبه متوتر اكثر عني..الحمدلله انه في هاذيج اللحظه دخل سيف يبا ماي..ولا..لا انا باقدر اقاوم نظرته..ولا احمد بينزل عينه عني!!!!!!

دخل سيف و شرب الماي و طلع..قمت انا و حطيت الجاهي جدام احمد و يلست على كرسي على طرف بس بعيد عن احمد..دق تيلفون احمد..شاف احمد الرقم بس طنشه..عقب خمس دقايق دق موبايله مره ثانيه بس مسج..فتح احمد المسج و قراه و شكله اضايق..كان ودي اعرف منوه مطرشله مسج..بس بصراحه استحيت اسأله..

لطيفه و انا اجدم الصحن: هاه احمد اذا تبا تاكل رهش..

احمد: لا لا ما فيني عليه..هاتي صحن هالهمبا هاذاك؟

مادري من وين نازله الرحمه اليوم..احمد مووول متغير..و انا مادري جيه جني مسحوره ايقولي يمين يمين يسار يسار..قمت و يبتله همبا غسلته و قطعته و حطيته جدامه..حطيتله شوكه..و يلس ياكل..

لطيفه: تباني اقصلك غير...شكلك يووعان؟؟

احمد: تعرفين بارحت امس مواصل ما رقدت و اليوم طول اليوم راقد من نشيت ييت سيده اهنيه..عسل هالهمبا

لطيفه: هي همبا باكستان هاذا...بالعافيه

احمد: الله يعافيج..في هاللحظه دق مسج مره ثانيه عند احمد..و مره ثانيه جيك عليه و طنشه

لطيفه: هاي اكيد وحده من البنات محتشره يوم مارديت عليها؟؟

احمد: لا ...و نش احمد يتغسل..في هاللحظه رن تيلفون احمد اللي كان على الطاوله و بما انه محطوط على الهزاز وصل التيلفون الين عندي..عن غير قصد طاحت عيني على الشاشه و انا كنت بشل الصحن..مادري بشوه حسيت و انا اقرا الاسم..من الصدمه يلست مره ثانيه على الكرسي..ريولي يرتجفن..غمضت عيوني وفجتيهن عشان اتأكد..بس عيوني ما قدرت اتجذب اللي شافته..بكل بساطه "هند" هالاسم اللي كان يرقص على الشاشه و حسيتبه يرقص الم في قلبي..ليش يا احمد ليش؟؟؟ شفت احمد و هو ايي مسرع و ايشل التيلفون على باله ما شفت شي..بس هو شاف نظره الحسره في عيني و انا اراقبه و هو ايشل التيلفون و ايرد عليه بكلمات مختصره..شافني و انا اهز راسي صدمه فيه!! حرام عليك يا احمد انته ما توب!!! نشيت و انا ارتجف..شافني احمد اني بظهر..مسكني من ايدي..

احمد: لطيفه...صبري لا تسيرين خلينا انتفاهم..

لطيفه: على شوه؟؟

احمد: اووهووو لطيفه لا تكبرين الموضوع..دقيقه اوكي؟؟..و طلع احمد برا المطبخ فالحوش ما بطا خلص المكالمه بسرعه و انا اراقبه وهو يتكلم بعصبيه و مشدود و كل شوي ايشوف الساعه..اول ما بدا احمد يتحرك صوب المطبخ..عرفت اني لو يلست اسمعه..اني ما بصدقه..و بتكبر المشكله للاسوأ..طلعت بسرعه قبل لا يدش و سرت غرفتيه و انا في ذهول تام...

عقب خمس دقايق..دخلت عليه وضحا..

وضحا و هي اتحط ايدها على خصرها: انتي هنيه يا خانوم و خطيبج حاشر الدنيا تحت ايدورج..

لطيفه: وضحا ظهري دام النفس راضيه عليج...صكي الباب

وضحا: يالله بسرعه اشوفج نزلي جدامي..مضيعه المذهب انتي..

لطيفه: وضحا جان حفظتيلج كم كمله انتي.. سيري سمعيهن على حد غيري..و احمد قوليله لطيفه راسها يعورها ما تروم تنزل..

وضحا: مالت عليج

لطيفه: و قسم بالله يا وضحا..اني اذا وصلتج انه ما بيفججني شي منج...اظهررررررررررررري..

 

طلعت وضحا..وانا في حاله هذيان..شوفي يا لطيفه..انتي اتعرفين احمد زين..و اتعرفين انه المغازل يسري في دمه..يعني لا تكبرين الموضوع وهو ما يرزا..و بعدين انتو اللي بينكم الا خطوبه..يعني طوفيها له..لو انتو معرسين بينكم كلام ثاني..لا و الف لا..ما بعديها...يونه ياي البيت و بيراضيني..و من شوي انسولف..و عينه ما رام ايشلها عني!!!! يعني هاذا كله تمثيل..لو نظره الحب اللي شفتها في عينه نظره صادقه جان من زمان طبها هالسوالف..اه يا احمد..شوه اسوي..شوه اسوي..قولي..انسدحت على الشبريه و انا العبره خانقتني و الدموع ضباب تعمي عيني..و انا اتماسك و اقول و الله انه ما يستاهل انه دمعه من عيني تنزل عشانه..سرت و طلعت صوره احمد اللي كنت خاشتنها فالتواليت و قطعتها تقطيع..و رديت مره ثانيه على الشبريه و انا احضن المخده و احس بكل قهر الدنيا يتزاحم في قلبي..حطيت راسي بين يديني و غمضت عيوني بقو عشان امسح صورته من بالي..صورته و هو مرتبك و هو ايشل التيلفون بسرعه..نظره عينه و هو يمسكني من ايدي..اي تفاهم يا احمد؟؟؟ اي تفاهم هاذا اللي تبانا نوصله..و انا و انته عمرنا ما عرفنا ابجديات التفاهم..فجأه...

 

 

 

 

 

تزاحمت الاحداث في مخي مسببتلي صداع و الم..احداث ضبابيه..لايام حلوه..و ايام مره عشتها من خمس سنين في بيت عموه..خمس سنين فصلتني من لحظه انكشاف الحقيقه..شوي شوي وانا اتذكر الاحداث بدا الكره في نبضي ايزيد تجاه احمد..احسن كل ما تذكرت هاذاك العام اكره احمد اكثر و اكثر...من خمس سنين...فالصيف..كنت ابات في بيت عمتيه كعادتيه السنويه في اني اقضي اجازه نص السنه في سويحان عند يدتيه و الصيف في بيت عموه..كنت احب الصيف حب جنوني لاني اصبح و امسي على ويه احمد و سوالفه..و بما اني بنت ام 14 سنه توها تتفجر المراهقه فيها..كان حالي حاال اي بنت من سني و فالاعداديه اتدّور على واحد اتحبه..ممثل..مغني..لاعب كوره..الا انا ما كان في داعي اني ادور على فارس لاحلامي..لانه هالفارس كان واقعي..اول ما عرف قلبي الحب..عرفه باربعت حروف..لانه هالاحمد كان حب متحرك جدامي..حب يتنفس..شاب عمره عشرين سنه..جمال..و خقه..و طاري..لا و فوق كل هاذا لاحظ اهتمامي به..فازداد غروره..و زادت حدة معاملته لي..اتعرفون الغرور شوه ايسوي بالانسان..يرفعه فوق..وانا كنت عميا اركض وراه بلا احساس..بالمختصر حياتي من خمس سنين و نص..ايمر شريط احداثها جدامي....

(( لطيفه: حماااااااااااادي...عطني عاااااد..حشا ذليتنيه..

احمد: لا حشا ما ذليتج..الحلاوه مالتيه..مب غصب اعطيج..

لطيفه: اوكي اوكي...كلها اروووحك بس لا تحلم اسويلك جاهي حليب

احمد: فضل عنج من جاهي...مب لازم

لطيفه: يالخقااااااق

احمد: قلتلج سيري كوّي كندورتيه و بعطيج فانفير...

لطيفه: شوه قالولك خدامتك؟؟؟

احمد: هيه

لطيفه: سبال

احمد: محد سبال غيرج انتي ... بتسيرين تكوينها ولا لا ؟؟

لطيفه: هاتها هاتها بسير..و بهمس...انا اروم اردلك طلب.

احمد: هههههه..عيدي عيدي ما سمعت

لطيفه: احسن

احمد: سمعي همباه ادري اني غالي عندج بس عاد لا تسبّـلين بعمرج هالكثر...

لطيفه: يالسخيف..

احمد: ادري سخيف طالع عليج بنت الخال..يا ...يا ....يا ...

لطيفه و هي ميته من المستحا: يا شوه؟؟

احمد: يا...مادري...اممم..خطيبه المستقبل

لطيفه و هي قافطه: ها ها ها...ضحكتنيه و انا ما فيني ضحكه..مستعده اخذ عباس هندينا ولا اني اخذك انا لطيفه بنت حمد بن سلطان..

احمد: لطفين..شوي شوي على عمرج..لو ما تم بنت فالدار...لو مره ينقرضن..و الله يا تفل عليج ولا اني اخذج..

++ اتعرفون انتو شوه شعور اي بنت..مراهقه ايقولها شاب حليو انها خطيبه المستقبل..يرقص قلبها رقيص..فما بالكم لو كان هالشخص مالك قلبها و روحها!!!..كنت اتعمد اني افشله عشان ما احسسه اني بموت عليه..و هو فالمقابل كان ايقول هالكلام عشان يستهزأ لا اكثر ولا اقل..يعني كنت مطنزه او مسخره..

احمد: شوه ما خلصتي..انقفضي(اسرعي) ابا اسير انا..

لطيفه: اوووهووو..حمااااادي..لا تم فوق راسي اتوّن..تراني و الله يا حرقها..

احمد: اترومين انتي...و الله يا كويلج يمبج ( جسمج) كواي ان سويتيها

لطيفه: هاه اندوك يالله خلصت...

احمد: انزين يالخايسه لفي الصوب الثاني ولا تبيني ابدل جدامج..عادي عادي ببدل اذا ما عندج مانع..اخاف اتلوع جبدج صدري كله شعر..

لطيفه:ما برد عليك يالنذل..

احمد و هو ايحاول ايمط شعر لطوف: يالخاااااامه..ان قلتي نذل مره ثانيه بيز(بقص) شعرج يزّ..امبونه الا زنبيعة ديايه...

لطيفه و هي راكبه فوق طاوله الكوي: برايه زنبيعه انته ليش مقهور..

احمد: اكره شي عندي فالدنيا البنت اللي اتقص كاريه..احسبها مستريله مافيها انوووثه

لطيفه و هي تلعب بشعرها و تحركه يمين و شمال خاصه انه غليظ بصوره مب طبيعيه: برايه المهم انه عايبني..

احمد: فقدتج يالسباله..

لطيفه: يالله عطني فانفير؟؟

احمد و هو ياكل اخر حبه: ماشي خلص..سوري حاولي مره اخري

لطيفه و بحزن: اووووكي.. مب منك...

احمد و هو ايطلع نص الحبه من ثمه: انزين اندوج باقي شوي... (و بخبث) تبينها؟؟؟

لطيفه: يااااااع يالسقم...شوف روانك (لعابك) عليها

احمد: رواني شفا ...امبونج ما تنعطين ويه

لطيفه: حماااااااااااااادي

احمد: و الضريس؟؟

لطيفه: هاتلي بيتزا...لا تنسا مرجريتا...تعرفها ولا لا ؟؟

احمد: لا اعرف انطونيلا...يالغبيه بسير دبي انا ..مب ساير سوق العين

لطيفه: انزين شوه فيها...يعني ما يبيعون بيتزا في دبي؟؟؟

احمد: لا ايبيعونها فالعزبه

لطيفه: لا تنسا تراني بترياك...

احمد: يوم اتعقص الرخمه تعرفينها ولا لا ؟؟

لطيفه: لو ماكنت اعرفها...تراني بعرفها عشانك

احمد: ادري..لانج عبدتيه..لو اقولج كلي تراب بتاكلينه

لطيفه: فقدت هالشعر...سر قصه قبل لا يشوفه بويه و يهزبك..ولا اقولك اربطه سوه ذيل حصان احسن

احمد: جب جب ....و الله يا همباه لو مب ربيعي يترياني برا البيت..جاني نتفت شعرج شعره شعره

لطيفه: الله يحفظك...لا تنسا البيتزا...

++ذاك اليوم اتأخر احمد وايد..و انا و فطيم كنا سهرانات فالصاله نترياه..بصراحه كنت خايفه عليه من الحوادث..شباب طايشين..و كنت بموت من شوقي عليه..كل صيف نسهر فليل على افلام ايبهن احمد ولا علا افلام هنديه..انصلي الفير نرقد ولا نسير ويا عمتيه العزبه طبعا الشيخ احمد هو للي يودينا..وشوه كنا انسير فالكروزر و الله لا يرويكم المكااان فالكبينه مالت السواقه ضيق..فكان احمد اللي يسوق و عمتيه من الطرف الثاني و بما اني انا و فطيم ضعاف فكنا ننعفص بينهم..و اذكر في مره من المرات ركبت انا عدال احمد و فطيم من صوب عمتيه..اذكر كنت طول اليوم حاسه بالفرحه..لازم يالسه عدال حبيب القلب..الا يالسه الا قولو لاصقه..و انا مدوووخه من ريحة عطره..وسوالفه و طريقة كلامه..لدرجه اني كنت مب قادره اسولف من كثر الوناسه يالسه اسجل كل حركه كل كلمه..و خوفي الاكبر انهم يسمعون نبض قلبي اللي يطبل شرات الطبول كل ما شحفت (لمست)ايده ايدي بالغلط اذا كان ايحرك القير ولا السكان..

لدرجه انه يوم ردينا البيت ذاك اليوم..سارت فطيم تتسبح وسرت انا المطبخ اسويلي سندويج..دخل عليه احمد..

احمد: وين فطيم؟

لطيفه: تتسبح ..تباني اسويلك سندويجات؟

احمد: لا ...اممم...اقول لطفين؟؟

لطيفه: هلا حماااادي؟

احمد: المره اليايه يوم بنسير العزبه لا تسيرن

لطيفه: ليش؟؟؟

احمد: بس...

لطيفه: انزين شوه سوينا قولنا؟؟و الله انا ما نزعجكم..شوه مستوي؟

احمد: ماشي...لازم اتعرفين كل شي..سيره مره ثانيه ماشي..السياره ما تضمنا(تكفينا) كلنا الا قيس اتعبن امايه

لطيفه: انزين خلاص المره اليايه بنركب ورا فالدبه

احمد: لا يعني لا شوه ما تفهمينها الرمسه انتي؟

لطيفه: ادري عشان ركبت عدالك اليوم..

احمد: شوه؟؟؟!!!!!

لطيفه: انزين انا ما فيني اليرب..ما أعادي..بسم الله منك..حشا يالمذله بسير بيت ابويه ابركلي

احمد: و ابركلي بعد..

لطيفه و هي خانقتنها العبره: يالخايس .... يالحمار

احمد: اوهوووووو...يالبزيا...عنلااااتج لا تصيحين شوه بيقولون الحين شي مسوبها..اصصصص اقطعي

لطيفه: مالك خص فيني

احمد: شوفي لطوف يوم تسير امايه المزرعه فالنيسان بنشلكن..لكن العزبه و فالكروزر لا..خلاص

و طلع...عرفت انه اضايق لاني كنت لاصقه فيه..على هاذيج الايام ما كنت مستوعبه..لاني ياهل..اما هو فريال و ما ينلام في رده فعله..يعني بنت يالسه عداله و انا الحبيبه ماخذه راحتيه و شاله الكلفه بينا..اكيد انه اتضايق..بس بحكم تفكيري الطفولي في هاذيج الايام..ما ادركت شوه معنا انه بنت يالسه عدال ريال لاصقه فيه و هي طول اليوم اتهاذي بحبه علني جدامه..يالله يالقفطه...اكيد هو فهمها شي ثاني..!!!!!

بعد فتره..

احمد: ضبابه امايه وين؟؟

ضبابه: مادري

احمد: سيري زقريها؟؟

ضبابه: ما فيني اتشوفني اشوف الرسوم

احمد: عنلااااااتج مسوده الويه..دوم ما فيج..انتي ياهل و دوم تعيزين عن النفع..دواج انتي تندبغين الين ما تخيسين..

لطيفه: انا ا نا بسير اشوفها ...شوه تباها؟؟

احمد: سيري قوليلها يالله جان بتسير المزرعه..وينها هي من الصبح حاشرتني؟؟

لطيفه: ثوااااااااني...بس عشرط؟ انا انروح معاكم

احمد: لا اله الا الله...يالمذله...

لطيفه: دخيييييييييييييييييييلك حماااادي..انته قلت المزرعه بتودينا و الحين نحن العزبه من 3 اسابيع ما سرنالها...عنبوه حشا من بت عندكم ما طلعنا مكان غير العزبه

احمد: ووين تبين ترتغدين طويله العمر؟

لطيفه: البنات ايسيرن الحدايق ولا الاسكيت..ولا يتجمعن في بيوت صديقاتهن انتو كله البيت البيت

احمد: سمعي همباه خواتي لا تخربينهن..جان خوانج مفججين لج راسج..انا خواتي ما يطلعن

لطيفه: اووووووووووف

احمد: لا تتأففين لا ازلغلج شعر راسج...

لطيفه: و انته شوه قاهرنك في شعريه...ياخي عايبني انته شوه يخصك

احمد: جب حب صدق اليهال ما ينعطون ويه

لطيفه: انا مب ياااهل..انا ثاني اعدادي الحين بروح ثالث..يعني حرمه...البنات في سني لوّل قدهن عرسن ( لا يغركم السن..تراه الجسم جسم ياهل..و التفكير تفكير طفله)

احمد و بعد فتره صمت: و انتي مستلغثه على العرس؟؟!!

بخيته و هي داخله الصاله...و بأسلوبها البارد: وابوووويه يا احمد...شوه تبا البنت..تطريلها العرس...

احمد: فقدتها السباله..

بخيته: تبانا انخطبلك اياها؟؟

احمد: وااااااااع...مالقيتي الا هاي!!!!! انا يوم باخذ باخذ شيخه البنات مب هاي..شوفي ويهها انتي أأأع انا لو هاي حرمتيه ما بصكها..اخاف تلوع جبدي من الحب اللي في ويها..

لطيفه: عمتيه تسمعينه ولدج؟

بخيته: شوه اسويبكم يا بنتيه..من يوم يومكم و انتو هاي حالتكم..دواكم من يوزكم..و بتمون شرات الدياجه اتناقبون ليل نهار...يالله بويه شغل النسيان..لطيفه سيري هاتي دله القهوه من المطبخ..و انتي ضبابه سيري وعي اختج فطيم قوليلها جان بتسير ويانا...

طلعنا ذاك اليوم و انا افوور من القهر..شوه يعني شيخه البنات؟؟!! يعني انا خسفه ولا شوه؟؟ فقدته و الله انه ما يستاهل اللي احسبه صوبه...دوم ايشوف عمره علي انا..طول الدرب و احنا سايرين الهير المزرعه و انا ساكته..لارمست ولا نطقت بحرف..حتا يوم وقفنا عند الدكان..احمد يسألني اذا اريد اكل ولا عصير ما رديت عليه..و حسيتبه متلوم فيني..احسن احسن..دواه..اصلا فطيم من تركب السياره ما تنطق بكلمه..لانه اذا تكلمت وايد تهدم و تحس بلوعه..و ضبابه ياهل وين ما تسير بدفترها و الوانها..انا الوحيده اللي كنت اسوي جو حق احمد و اسولف وياه و اضحكه..حاول معايه منيه مناك ماشي فايده..عقب ما نزلنا و تحوطنا فالمزرعه..و لعبنا فالفلي..سارت عموه و احمد عند المصري مال المزرعه تهزبه كالمعتاد لانه خالف امر من اوامرها..فسرنا نحن البنات عند خزان الماي الكبير الاساسي اللي في نص المزرعه و ركبنا على سلم خشب فوق لانه وايد عالي و غطينا ريولنا فالماي...

فاطمه: ياي الماي باااااارد

لطيفه: اتصدقين نفسي اسبح فيه..

فاطمه: مينونه انتي..شوه تسبحين؟؟!!! هاذا عميق وااااااااااااااااااايد

ضبابه: انا ماريد احط ريوولي ياااع اخاف الطحالب تاكلني

فاطمه: يالبقره الطحالب ما ياكلن...

ضبابه: انا مششششششششششششششششششش بقره....تسمعني اقول انقووووح؟؟!!!

فاطمه: جب جب يالرزه وين تبين انتي عند الكبار وين ما نسير انا و لطوف تلحقينا..مالت عليج

لطيفه: سكتني عنها لا الحين اتسويلنا مناحه

ضبابه: احماااااااااااااااااااد....تعال شوووووفهن...يالسات ايسبني..

احمد: فاطمه...تعالي تعالي شوي

فاطمه: و الله ما قلتلها شي...

احمد: انزين انزلي اباج شوي....

نزلت فاطمه عند اخوها و شكله طرشها السياره اتروح تييب فطور عموه لانها كانت صايمه..اما ضبابه فنزلت....ركب احمد السلم الين ما وصل قمة الحوض..

احمد: شوه اتسوين؟

لطيفه: ارررقص

احمد: اصطلبي...مالت على هالويه مب منج من اللي ياي يراضيج

لطيفه: لا تتمنن عليه...و لو سمحت انزل لا تسويلنا ازعاج

احمد و هو يمشي على اطراف الحوض: و الله المزرعه مب مزرعتج..لو انتي ختيه جان من زمان لسانج قاصنه..

لطيفه: الحمدلله انك مب اخويه..و بعدين لا تمشي على اليدار بتطيح تراك فالحوض و بتغرق

احمد: ليش اهمج؟

ما شي رد

احمد و هو يدندن:ليش يالمحبوب دايم في صدودي لا جواب منك او رد التحيه..قوليلي هيه ولا لا و بنزل عنج..

لطيفه: هيه اتهمنيه..شوه يونك ما تعرف؟؟!!

احمد: هههههههه...و نزل

اول ما نزل سمعت فطيم من تحت محتشره..اول ما التفتت لتحت شفت احمد و هو ايشل سلم الخشب بعيد عن الحوض..كيف بنزل انا؟؟؟!!!!

لطيفه: حمااااااااااااااااادي...ليش اتشل السلم؟؟

احمد: عشان ما تنزلين اتمين اهناك فوق و نحن بنروح عنج

فاطمه من تحت: حمااادي حرام عليك...رد السلم...خلها تنزل..حرااام

احمد: شوه الجو فوق لطيفه...برد لاه؟؟

لطيفه: حمااااااااااادي...رد السلم...اخاف اطيح فالحوووووووووض

احمد: احسن عشان نفتك منج

ضبابه: حماااادي...حرام رجع السلم..و الله تراها بطيح...( و في لحظه اختفت لطيفه)

فاطمه: شففففففففففففففففففت!!!!!! طاحت طاحت فالحووووض...اكيد غرقت و ماتت...يالله يا رببببي...ماااتت لطوووووف...

احمد: عنلااااتها وين سارت؟؟؟!!!

ضبابه و هي بدت اتصيح: وااااااااااااااااااااء: لطووووووف مااااتتت فالماي العميق...امااااااياااااه الحقي

فاطمه: كله منك انته....ياويلنا من خالي حمد....بيجتلنا....لطوووووف تسمعينا!!!! وينج؟؟؟ وين سرتي

ركب احمد بسرعه السلم وراح ايشوف لطوف..اللي كانت متقبضه باطراف صبوعها فالحوض من داخل و ريولها كاسفتنهن بحيث ما يدخلن فالماي...يعني اللي يكون تحت يتهيأله انه طاحت!!!!!

اول ما شافها احمد: مسووووووووده الوووووويه!!!!! احمد و هو ايفج ايد لطوف عشان اطيح

لطيفه: فددددددديتك احمد....لا لا لا ...تراني بطيح

احمد: احسن احسن طيحي...

لطيفه: لا لا لا دخيلك

احمد: اول قولي عمي احمد

لطيفه: ما بقول..

احمد: خلاص عيل..شوه رايج تتسبحين في هاذا الماي البارد

لطيفه: لا لا .....احمد..و بصريخ..لااااااااااااااااااااااااا...عمي و عمي و عم عمومتيه بعد فديتك شلنيه

احمد: يالله نشي...

و طلعنا نتمشا فالمزرعه مع احمد..اللي ما نطق بكلمه..اول ما وصلنا عند باب المزرعه..

فاطمه: حماااااادي...الغااااالي...فديتك....دخيلللللللللللل للللللك..نبا انسوق السياره..

احمد: شوه ؟؟؟!!!! ما سمعت عيدي عيدي؟؟؟

فاطمه: بسم الله شوه فيها؟؟!!! لوّل يوم بويه الله يرحمه حي..كان عادي ايخلينا نسوق جدامه

اول ما قالت فاطمه هالجمله لاحظت التأثر على ويه احمد..اللي ما قال شي..و سار و شغل السياره..ذكر سيف الله يرحمه جدام عياله له تأثر غريب عليهم..

احمد: يالله تعالي...فطيم تعالي جان تبين اتسوقين

فاطمه: اللله ......فددددددديتك...

ساقت فالبدايه فطيم ...دوره و ردت طبعا احمد يالس عدالها عشان ايعلمها

بخيته: لا لا مب اهنيه..ما فيني على الحشره...سيروا لزوا هاذا الهيل ( وادي) ولا هاذيج الخريمه سيروا اهناك...ما فينا تدعمن شي من الشبوج ( السور) و انتمشكل نحن

احمد: ان شالله

و تحركنا صوب وحده من الخرايم الي عدال المزرعه عشان ناخذ راحتنا..ووصل دوري..طبعا انا رفضت اني اخلي احمد ايساعدني و سقت بروحي..

احمد: ما شاااااااااللله ..... عليّه انه ما فيج حليه يا همباة باكستان...شووفوو سيرها

و في هاللحظه فجأه وقفت السياره...حشا ما قوا عينه هالاحمد..و الله انها كانت تمشي..

لطيفه و هي اتطلع راسها من السياره: حماااااااااااااادي...تعال شوفها وقفت السياره...ما طيع تشتغل

و سار احمد عند لطيفه..و ركب من جدام فالكرسي اللي عدال كرسي السايق..

احمد: شوه بلاج؟

لطيفه: شدراني امبونها تمشي بعدين فجأه وقفت!!!!!

احمد: انزين انتي قوليلي كيف شغلتيها؟؟

لطيفه: ماشي..ريل على الباترول وريل على الكلتش..و القير غيرته من النيوترال حطيته واحد

احمد:ماشالله حافظه الدرس..شوفي شلي ريلج شوي شوي من على الكلتش و هوسّي (ضغطي) على الباترول شوي شوي...مب قووو..و القير خليه عليه انا..

لطيفه: انا جاهز انته جاهز؟؟؟

احمد: هههه..جاهز يالله واحد ثنين ثلاثه..

و بالفعل طبقت الدرس بحذافيره..و كنت طااااايره من الفرح..مش عشان عرفت اسوق بس عشان نظره الفخر اللي كانت في عين احمد..مشينا شوي شوي و لفينا..بس احمد بدا يضغط عليه اني اسرع..وانا يا جماعه الخير ما فيني جرأه اني اسرع..

احمد: اقولج اسرررررعي!!!

لطيفه: حماادي و الله ماروم اخاف اخاف من السرعه

احمد: شوه بيستوي عليج؟؟ تراني انا عندج..و بعدين المكان واسع...يالله ضغطي ضغطي على الباترول

لطيفه: انززين...

احمد: يالله عليج...لطووووف اسرعي يوم اقولج اسرعي...ما حيدج ديايه

لطيفه: احمد و الله ماروم اكثر عن جيه اخاااااااف....و الله اني اخااااف

احمد: اوكي عيل هاي اخر مره تركبين...يالله ردي عند قوم فطيم

لطيفه: حرام احمـــ

احمد: اص و لا كلمه...

لطيفه: انزين انزين خلااااص

و بالفعل قمت و زدت السرعه و كل ما شوف عداد السرعه ايزيد ايزيد معاه نبض قلبي..كنت ميته من الخوف خاصه اني قصيره..و نص الدرب ما شوفه..ايديني كانن يرتجفن..بس عشان خاطر احمد كل شي يهون..التفتت صوب احمد عشان اشوف ردة فعله..فاللحظه اللي كان احمد يولع صلب زقارا بالدس..و هذا سر بيني و بينه ماحد يعرفه من خواته ولا من اهله..لاني بالصدفه كشفته و هو ايدوخ في حوش بيتهم من ورا.. فجأه ضرب تاير السياره في حصاه عوده تقريبا..و من شده الصدمه..وقفت السياره..و نتيجه لسرعتنا كانت الضربه غير عاديه رغم انا لو ما كنا مسرعين كنا ما بنتأثربها..في لحظه..غمضت عين..حسيت بعمري ادور في دوامه..و اسمع صوتي و صريخي..و صوت احمد من بعيد..عقب عشر دقايق..بديت اصحا و تردلي الحاسيه شوي شوي..و بما اني كنت حاطه حزام الامان ما صابني شي..و ببطء بديت التفت صوب احمد..اول شي لاحظته جثه هامده طايحه على مقدمه السياره..تعرفون حسيت بالروح تطلع مني شوي شوي..الموت..و لوعه و صياح..خليط من المشاعر ما انحسد عليها..احمد كان ميت..معقوله انا جتلته!!!!!

فجيت حزام الامان..و بديت اسحب احمد لورا..و انا مب قادره ايديني ترتجف..و احمد ماشالله جثه..ثقيل..اول مارد احمد على الكرسي..صرخت صرخه..ويه احمد كان كله دم!!! مسكت احمد و قمت اهزه هز هستيري..ماريده يموت..ناظر عيوني..لا تغيب عني..رد عليه..بديت ازقره و ازقره بس ما شي استجابه..قربت ويهي من ويه احمد اتتبع مجرى الدم و اكتشفت انه من عينه؟؟!!! لا لا فوق عينه مباشره..على حاجبه الايسر مباشره..بما انه السياره نسيان..و على هاذيج الايام النياسين فيهن مثل المقبض جدام كرسي مساعد السايق.. شكله احمد من قوة الصدمه ضرب راسه فالمقبض..بالتحديد على حاجبه..و في لحظه بدت عيون احمد تنفتح شوي شوي..يعني ما ماااات!!!! اللهم لك الحمد و الشكر..لك الشكر الف..

لطيفه و صوت ضحك على صوت صياح: احمممممد...حماااااادي...

احمد: شوه ...اشوه استوا؟؟؟

لطيفه: و الله و الله مادري...لا لا تتحرك انته مضروب

اول ما قلت جيه على طول احمد حط ايده على حاجبه و ارتسمت الصدمه على ويهه و هو ايشوف الدم ينزف نزيف مب طبيعي..

احمد: خيبه لهدرجه الضربه قويه...شوفي شوفي عيني شي بلاها؟؟؟؟

لطيفه و انا حاسه بالدوخه من منظر العين..و الحاجب المفتوح..لدرجه انه عظم ويهه طالع شوي: ااااا...لا لا ماشي..بس وااايد دم...احمد شوه بنسوي...يااااويلنا.....بيجتلوني يا احمد..كله مني انا ...كله مني انا

احمد: بس لطيفه...بس..ما صار شي رب السياره ما تعوقت؟؟؟

لطيفه: مادري مادري..

نزل احمد و اهو يحاول ايوقف النزيف بسفرته..و ايجيك على السياره و هو يميل شوي يمين و شوي يسار

احمد: انزلي لطوف...اركبي ورا...بوطيج(بنزلج) عند لفت المزارع..عشان اميه ما تشوفينه..انزين ويوم يقولولج وين احمد..قوليلهن سارعند واحد من ربعه اهنيه عامري من هل الهير..انزين

لطيفه: لا لا لا..ماروم ماروم...حمااادي بمووت من الخوف كيف بتسوق انته؟؟؟ ووين بتسير؟؟

احمد و بعصبيه: لطففففففففففففففين!!! يوم اقولج شي سويه..بسير عياده الهير و بيخيطونها..و خلاص بينحل الموضوع

لطيفه: ياوووويلي بتجتنلي عمووووووه..كله منك انته كله منك

احمد: لطيفه مب متفيق لج انتي...يالله بسير اتلاحق عيني لا تروح..

نزلني احمد..و نفذت مطاليبه..و سار عياده الهير..و خاطوله حاجبه..و من ذاك اليوم و حاجب احمد الايسر منقسم نصين..و كل ماشوفه اتذكر هاذاك اليوم الاسود..اللي يوم رد احمد و عينه ملفوفه احتشرت عمتيه..و جلبت الدنيا فوق تحت..و فهمها احمد انه واحد من اللي يسوق الاستوت ( شاحنه) من المزراع دعمه بالغلط..رغم انه عمتيه ما صدقت...بس سلامت ولدها كانت اهم..و عدا الموضوع مب علي خير..بس المهم عدا..و انحفرت ذكرى ليوم اسود بيني و بين احمد في ذاكرتيه...

بعد مرور شهر على الاحداث اللي استوت..قربت العطله الصيفيه اتخلص..

لطيفه: ههههه...بموت من الضحك...الله ياخذ جيم كاري...

فاطمه: اهبل...هالانسان ما يعيبني... مره ثانيه بخلي احمد اييب فلم ثاني..

لطيفه: بالعكس وااايد حلوو

فاطمه: ياختي ذوقج انتي و احمد فالافلام ايلوع بالجبد..بطرش ابراهيم اييبلنا افلام هنديه ابرك..

لطيفه: شوه بنسوي في هالقايله و هالحر...ملل؟؟!!

فاطمه: اييج الشور...انسير حجره احمد..

لطيفه: ليش؟

فاطمه: انسير عنده كمبيوتر و نت...تعالي تعالي رويني ابا اشوف النت..

لطيفه: لا لا ما فيني على المشاكل مع احمد..من عقب حادث السياره انا اخوج اتجنبه..

فاطمه: اوهووووو...

لطيفه: فطيم حرام عليج ...اللوم مقطعني تقطيع..الله سلّم اني ما عورت الريال..

فاطمه: انزين انسير رويني المنتدى اللي انتي مشاركه فيه..

لطيفه: و اذا يا احمد و شافنا؟؟؟؟

فاطمه: لا لا ما عليج...احمد الحين فالصاله...

لطيفه : اي صاله؟

فاطمه: هاي مالت كمال الاجسام...يباله ساعه و نص الين مايي..انسير فديتج

لطيفه: على ضمانتج

فاطمه: هيه هيه على ضمانتيه..

طلعنا فوق غرفه احمد..او بالاحري احلا عالم وردي دشيته في حياتي..يا جماعه الخير و الله اني احبه و احبه و احبه و امووووت فيه..لون حجرته كان كحلي على عنابي و شوي بيج..مادري جيه اتقولون مغاره..لازم الشباب ايهيئون جو الرقااااد باي طريقه..سارت فطيم و شغلت الكمبيوتر اللي كان محطوط في زاويه هي تقريبا مثل البلكونه بس مسكره..و الحبيب عايش الدور..في هالزاويه حاط الكمبيوتر و عداله ثلاجه صغيره كلها بيبسي دايت و فيتامين سي..و كندر..و عدال طاوله الكمبيوتر سله باتشي صغيره تقريبا مخلصه..الاضاءه مب قويه..سبوت لايت بس..و على طول ايهف عليها المكيف..عالم ثاااااني..شغلت النت لفطيم..اللي كل شوي تسألني..اللي على حسب علمي ممنوعات انهن ايدش النت على هاذيج الايام...قعدت فطيم على النت و قمت انا استكشف غرفه ناظر عيوني..كل شي اخزنه في مخي..مسكت العطور اللي على التواليت و قمت اشمهن اما فطيم قامت اتنبش في سدات التواليت..فضول بس..تتريا الكمبيوتر الين ما يشتغل..

فاطمه و بشهقه: الحقي لطووووووووووووووف...هاذا باكيت زقااااارااااا.!!!!! شوه ايسوي اهنيه؟!!

لطيفه: و انتي شوه ايخصج اتنبشين..يالله انسير انسير عند الكمبيوتر

فاطمه: اما خبررررررررررررررت عليه عمير اخويه...

لطيفه و عشان اغير الموضوع: يالله ماااااااااااااكثر الاشرطه...حشا كلهن خالد عبدالرحمن و ميحد..

فاطمه: هههههههههه...تراهم ايقولوج..

لطيفه: شوه ايقولون؟

فاطمه: مستلزمات المراهق الاماراتي,...باكيت زقارا...سويج كروزر..و خالد عبد الرحمن..خاصه اغنيه خذني بقايا جروح...

سحبت فطيم عند الكمبيوتر عشان تنسا موضوع الزقارا..ما فيني..كله ولا احمد

فطيم: شووووه هاذا؟؟

لطيفه: هاذي رساله خاصه فالمنتدى واحد من الاعضاء مطرشنها لي..

فاطمه: في ذمتج...يالله عاااادي عندهم ما يستحون؟؟؟و بعدين انتي شوه اسمج؟

لطيفه: لا ما يستحون...انا اسمي عجيد لريوم

فاطمه: اشوووو؟؟

لطيفه: ما سمعتي بوخليفه الله يطول بعمره يوم ايقول: يا عجيد ريوم لبلادي يا سفر هاذا الوطن كله..

فاطمه: أها...و منوه مطرشلج الرساله و شوه يبا؟؟؟ فتحيها فتحيها؟؟

لطيفه: اوهووووو...هاذا و احد مسمي عمره فتى الوجن...مأذني ماذاه...

فاطمه: و شوه يبا منج؟

لطيفه: يونج ماتعرفين..يبا يرمسنيه فالتيلفون

فاطمه وبشهقه: الله يغربله الخاااااااااااااايس...و انتي شووه قلتيله

لطيفه: طرشتله رساله و هزبته...قصوري اخر عمريه مسوده ويهي..

فاطمه: اشكر فنج بنت حمد...لطفين...بليز بللللللللللللللللللللليز دخليني الجات..

لطيفه و بشهقه: اشووووووه...مينونه انتي؟؟!!! اذا انا في حياتي كلها ما دشيت الجات غير مره وحده و حلفت اني ما دشه مره ثانيه..انتي منوه معلمنج هالسوالف؟؟

فاطمه: اوووهوووو....حصوه بنت ييرانا...يالله عاد دخليج قبل لا ايي احمد...بسرعه بنسولف و بنطلع..

لطيفه: لا يعني لا ....انا ما تحمل المسؤليه..ما فيني اخربج..

فاطمه: و انتي يالخبله حاطليج كمبيوتر و نت و ما دشين جات؟؟ مالت عليج

لطيفه: حبوبه..يوم سعيد خويه عطاني الكمبيوتر ماله..و النت...وثق فيه..و قالي تبين اتدشين منتديات عادي..اما هاذا اللي اسمه جات محرم عليه تحريم...و انا ما خالف اوامر سعيد...

فاطمه: اما انج متخلفه...يالله تعالي تعالي حطيلي هالموقع......

لطيفه: كيفج..تبين اتدشين جات؟؟؟ متأكده؟؟

فاطمه: مممم..ممادري..مادري

لطيفه: اوهووو فطيم ما عرفتلج..تبين ولا اسكر الكمبيوتر؟؟

فاطمه: هيه ابا..انتي دشي و انا بيلس اطالعج

لطيفه: لا...اذا انتي تبين هيه..انا لا..

فاطمه: ما عليه ما عليه..دشي بسرعه قبل لا ايي احمد..

فهاللحظه سمعنا صوت جوتي رياضه..يتحرك فالغرفه..بشوه حسينا؟؟؟ انا حسيت بالشلل في ريولي..اما فطيم..فكان ويهها ابيض جنها ميته..

فاطمه: و هيه تهمس..أ-ح-م-د

كان احمد واقف ورانا و ايديه على خصره من الجانبين..لابس شورت اسود و قميص كت اسود و بيج..و ماسك الكاب في ايده

احمد: هيه احمممممممممممممممممممد.....شوه اتسون؟؟؟

لطيفه و انا اسكر الجهاز بكبره: مااا..مم..ما...ماشي

احمد: لاه؟؟ ماشي..هــــــــــــــــــــــــــــــــــيه..ماشي! !!! شوه يعني؟؟

فاطمه: ماااشي...مم..ملينا..قلت حق لطوف شرايج نلعب بالكمبيوتر سوليتر..انته متا ييت من الصاله الرياضيه؟

احمد: تلعبن؟؟؟ صااااااااح تلعبن..و اللعبه ما تحلا الا فالنت؟؟!!! انتي قلتي ولا لطووف قالتلج شرايج ندخل الجات؟؟!!!!!!!!!!!!!!!!!!!!!!

لطيفه و بشهقه و ويهها محمر: اشووووووووو؟؟؟و الله مااااكاااااان...

احمد: اووووووووووص...اقطعي انتي...فطيم..منوه قالج دشي الجات؟؟؟

فاطمه: ممم...مادشينا؟؟

احمد: شوفن الجذب ما بينفعكن..انا شفتكن..و سمعتكن..قووووووووووووولي؟؟؟!!!!

ما طاعت تتكلم فطيم...و انا ما تكلمت

بدا احمد ايعصب اكثر و اكثر: هااااااي( و ايأشر صوب لطووف)..هااااي الخراب كله من ورا راسج..تبين تخربين خوااااتي؟؟؟ و الله و الله يا لطيفه...بتشوفين شي ما شفتيه

طنشته و ما رديت عليه...

احمد: ارممممسج اانا...اعترفي اذا اعترفي هالمره بفوتها...قولي منوه قايلكن دخلن الجاااات؟؟؟ فطيم!!!!! قولي انها لطوف و انا بسنعها...

فاطمه: احممممممد..و الله و الله..

احمد و هو يمسك جتوف فاطمه بقو و عصبيه لدرجه خفت انه يعطيها كف..لطيفه: انا..انا قلتلها فطيم مالها خص

التفت احمد صوبي في هاللحظه..و عيونه شرار..و حواجبه متعقدات..و الدخان يظهر من خشمه..و بكل هدوء: انتي؟

ل

[بحرينيه^مزيونة]

ثاااانكس

 

ووننتظر التكمله

[نادين]

يلا ننتظر الباقي اوكي ...

 

 

تـحـيـاتـي...

نـــــاديــــن...

[بحرينيه^مزيونة]

وين التكمله

[غزال الريم]

 

نادين ، بحرينيه مزيونة

 

السموحه منكم لاني تأخرت

 

المنتدى اوردي بطيئ وكل ماابي اشبك ما يشبك

 

فأعذورني اذا ما نزلت لكم جزء

 

وان شاء الله ماراح اتأخر عليكم بأي جزء

 

 

 

"""الجزء الخامس عشر"""

-الفصل الثالث-

 

يا مرتضي بالهون دورلك اقران بتكون لك بدر و شمس وظلي تمشي حسب رايك على كيف ماكان و تبادله بزيف الغلا و التسلي ولا انا عندي قناعه و ايمان بمشي بعقلي و العواطف تولي

 

حاسه بهزات عنيفه اتهزني و تزلزل كياني..سيناريو الخمس سنين اللي فاتن سيناريو مّر و يطعن طعن السجاجين في حنايا فواديه..يمكن هاذي المره الاولي اللي حاولت فيها استرجع هالشريط في ذاكرتيه..طول المدة اللي فاتت و انا احاول اتجنب بيت عموه..اتجنب احمد..و اتجنب كل شي له صله بالماضي الاسود..لاول مره في حياتي احس براحه نفسيه..راحه لاني فرغت اللي كنت احسبه من ذل و قهر و حسره..بس المشكله انه مخي بدا يدخل في متاهات..كيف بعيش مع احمد؟؟ كيف بعيش مع انسان اهاني..و طعني فالظهر..لا و المشكله انه احمد كأنه اللي استوا ما يهمه..معقوله ما يتذكر اي شي؟؟!!

لطيفه: و اخيرا وصلنا البيت...

سلطان: هيه و الله..حشا يالبنات من تدخلن محل ما تظهرن منه...شوه تبن تباتن فيه انتن؟؟

لطيفه: و انته بسم الله توني داشه و انتي اتقولي يالله ما خلصتي؟؟ دامنه هاذا اخر كورس فالجامعه خلني اكشخ...

سلطان: شوه تكشخين...لطفين العرس ما بقى عنه الا شهر و نص...و انتي اتحاتين الجامعه؟؟!!! شوه هالخريط هاذا...

لطيفه: اووهووو من هالعرس..اللي يسمع باخذ هزاع بن زايد!!! تراه الا احمد..شوه يعني؟؟!!!

سلطان : أشووووووو!!!! وشوه بلاه احمد مب عايبنج؟؟!!!

لطيفه: انا ما قلت جيه!!

سلطان و هو ايوقف جدام الكافتيريا: اول شي خلينا نترس بطونا..شوه تبين؟

لطيفه: انا ماكل من هالسقم..

سلطان: بتاكلين و انتي حماره..ما صدقناج تنتفخين شوي..اييج الشور انا بطلبلج..شوف رفيق هات واحد همبرجر لحم..مايونيز..كاتشاب...و بيض..و هات اثنين شاورما دياي..و ثنين فلافل..

لطيفه: حشا طلبت حق قبيله انته!!!

سلطان: هبي...ردي الشهاده..

لطيفه: لا اله الا الله...هاذا جيل الهبرجر..عمرك 22 و اللي ايشوفك ايقول بو 33..كله من هالهرمونات

سلطان: لا حووووول...بطني هو ولا بطنج..

لطيفه: بالعافيه ان شالله...شفتها هالخامه اللي تلحقنا اليوم فالسوق..

سلطان: اي وحده؟

لطيفه: يونك ما شفتها...يعل عيونها الفقس ان شالله جانها ما شلتهن عنك..

سلطان: الحمدلله انج ما فضحتينا انتي اليوم...برايها و انتي شوه تبينها؟؟

لطيفه: شوه..شوه اباها!!!! اشوفها تربع ورانا من محل لين محل تبا اترقمك..سود الله ويهها الخايسه..محد سلم من شرهن..على اخر الزمان هن اللي يلحقن الرياييل...هاي علامات القيامه الحريم فصخن الحيا..

سلطان: انزلي انزلي خلينا نيلس فالحوش..

نزلنا و يلسنا في القعده الزجاجيه المفتوحه على الحووش..بغيت ادش داخل بس سلطان ما خلاني

سلطان: وين بها؟

لطيفه: بسير فوق بعق عباتي و بتسبح

سلطان: تعالي تعالي يلسي عندي ما عرف اكل ارووحي..تعالي ماحد غيرج بياكله هالهمبرجر..

لطيفه: سلطاان حرام عليك..ما فيني انتفخ

سلطان: خلي عنج...بتخبرج كم وزنج الحين؟

لطيفه: 58...غديت دبه كبر الدرام..بينصدم الريل..

سلطان: لا لا شوه دبه...بطه بطططططططه ما شالله عليج..طولج كم؟

لطيفه:160....ما فيني اذا كلت الهمبرجر بغرز(بغوص) من المتن..

سلطان: يعلني بلاج يالبقره...الشباب ايموتون عليهن هاذيلا المدربحات...

لطيفه: هيه شرات هاي اللي لحقتنا اليوم..

سلطان : لا حوووول ردينا...

لطيفه: هيه نعم بنرد...الخايسه ليتك خليتنيه اادبها...في ذمتك لو ما شافتني وياك شوه بتسوي؟

سلطان: بصراحه؟؟

لطيفه: هيه عيل تبا اتقص عليه..

سلطان: ولا هيه بترقمني ولا انا برقمها بصراحه ما تفوّت غندوووره.

لطيفه و هي تفر سلطان بالمخده: شووو..شوووو..شوووو...اسميك لا تستحي ولا تخّيل...ووين الحب الاسطوري..ووين هالخرابيط...صدق انه البنات مقصه..

سلطان: حووووووووه...شعندج اتناقعين..هاي سنة الحياه شوه قالولج الرسول انا؟؟!!!

لطيفه: عز الله الرسول عن سواياكم...ووين ضبابه و ضبابه..

سلطان: ضبابه فالقلب..

لطيفه: هيه امبين؟؟!!!

سلطان: عيل انا ما بعيش كاهن الين ما عرس..قلتلهم يوزوني ما رمت لهم حيله..لازم ببصبص شوي..و هاذا الزمن الريال اللي ما يعرس فيه و يحفظ عمره بيضيع!!!!

لطيفه: و الله انكم يالرياييل ما فيكم امان..

سلطان: عاد انا غير و الشباب غير..يعني انا اغير الموجه كل ست شهور مره..يعني بس بنتين فالسنه

لطيفه: و تفتخر بعد!!!! عيل غيرك شوه ايسون؟؟

سلطان: اوووووف يا غيري..كل يوم بنت..بس عليه رمت امسك عمريه هالكثر..شوفي لطفين المغازل نكهة الحياه..و البنات منهن الخراب اللي حاشمه عمرها ما بنتعرض لها..شفتي بعينج..و ايخسن هاذيلا ايساون ظفر من ظفور ضبابه..ضبابه غيييييييررررررررر!!!!!

سلطان: تعالي...بتخبرج؟

لطيفه: لبيه؟

سلطان: لبيتي في منى..شموس اليوم حاشره الدنيا عليج..اتقولج لازم اتسيرين اتسوين بروفه ما دري شوه مالت الفستان..

لطيفه: لا حووووووول...

سلطان: بتخبرج...متا بتزهبين انتي؟؟؟ عنبوه اممممره ما سرتي السوق ولا شتريتي شي!! احيدهن البنات ايطيحن في دبي و بوظبي و انتي امررره ما ظهرتي من البيت من انخطبتي!!!!

لطيفه: مب متفقيه..

سلطان: عيل متفيقه لهالجامعه تشترين هالطراطير...لطيفه شي بلاج انتي؟؟؟ امره اشوفج مالج بارض(نفس) لهالعرس؟؟

لطيفه و هيه اتنزل راسها: شدراني!!!

سلطان: شي قاصرنج؟؟!! تبين فلوس؟؟!!

لطيفه: ما علّيه قصيره..و مهريه الين الحين ما صرفت الا الربع منه..

سلطان: عيل اكيد انه امايه ما تفيقت لج؟؟؟ تبيني انوديج انا مستعد اني اوديج..امره لو تبين لبنان ولا ايطاليا..

لطيفه: لا لا امايه امررره ما قصرت...و بعدين تتطنز انته!!!

سلطان: لا حشا ما طنزت...و الله ارمسج صدق..تبين لبنان تتزهبين بوديج..اسبوع وبنرد..

لطيفه: و بفزع الين لبنان عسب زهاب!!!!

سلطان: و الله مب زد عنج بنات هالايام..ربيعي مودي اخته ايطاليا تتزهب ساروا اسبوع و ردوا..شوه الراي؟

لطيفه: لا لا ...ايطاليا و باريس بكبرها اهنيه عندنا في دبي...يوم بخلص امتحانات بسير اتزهب..

سلطان: و الله مادريبج..جيه احسبج متكاسله..

عقب فتره صمت: سلطان؟؟

سلطان: هلا..

لطيفه: الحين انته صدق اتحبها ضبابه كل هالحب؟؟

سلطان و بنقمه: ليش عندج شك؟؟

لطيفه: لا لا ....بس..مادري

سلطان: اووهووو..عشان سالفت البنت اللي اليوم فالسوق؟؟!! لطيفه ضبابه ما باها يوصلها شي..

لطيفه: مب انا يا سلطان اللي بتربع و بتواشي..

سلطان: شوفي انا ريال و ما يعيبني شي ولا اني خايف من شي..بس ضبابه وايد حساسه..ما ريد اجرحها...

لطيفه: ما تحس انك مغصوب عليها...ولا مستحيل انك امررره يعني..بتموت فيها..لو ما كانت محيره لك بتحبها كل هالحب؟

سلطان و بعد تفكير عميق: شوفي لطيفه..اتصدقين عااد دوم هالسؤال ايدور في بالي.. لو ارد عليج ما بتصدقين..لو ما كانت ضبابه محيره لي..جان ما خذتها..

لطيفه: اشووووو!!!

سلطان: ههههههه...انا ما قول انه ضبابه فيها شي ينعاب..ضبابه بنت ملكه باخلاقها قبل لا تكون ملكه بجمالها..حلوه..و متعلمه..و راعيه بيت..و اتسد انها بنت سيف بن عمير..ابوها الله يرحمه راس طايفه

لطيفه: يا سلاااااااااااااااااام...

سلطان: يعني من يوم انا صغير و انا اسمعهم ايقولون ضبابه محيره لسلطان..ضبابه بياخذها سلطان..سلطان ماله بد عن ضبابه..يعني هم ربوني على حبها و غصبوني عليه..قلتلج البنت حشيم و الف واحد يتمناها..و الين يومج و هيه تنخطب..بس لو كانت لي الفرصه يمكن احب وحده غيرها..ولا اخذ وحده غيرها..

لطيفه: لهدرجه!!!

سلطان: هيه ليش لا...هاي العادات و التقاليد معقده بالدنيا تعقيد..الا بنت عمك لازم تاخذها..و هاي بنت خالك ماحد لها غيرك...شووه هاذا التخربيط..ضبابه..اممم..يعني شوه اقولج..مادري اتعودت اني احبها..ولا قولي تربيت اني احبها..يعني احسلي اني احبها..لاني باخذها باخذها طيب ولا غصب..

لطيفه: صدقك والله..شوه هالتخلف..انا هاذا اللي مضايقني..يوم خطبني سالم..مادري..و عقب اعترض احمد..مادري احس بعمري اهلنا هم اللي يحركونا..يعني الحين لو تييك الفرصه انك اتقول لا ..بتقول؟؟!!

سلطان: اكررررررررررررررررم...لطيفه حطي في بالج شي واحد..ضبابه من لحميه و دمي..و بنت عمتيه..لو مشوهه و لا مشلوله و على كرسي باخذها..هاي بنت عمتيه..و اذا ما شلنها عيونيه يشلها راسيه من فوق..

لطيفه: يعني انته مب مجبور عليها؟؟!!

سلطان و بعدم اكتراث: لا حشا...قولي انربط مصيري بمصيرها..و هاي الدنيا..

لطيفه و بعد تردد: يعني احمد مب مغصوب عليه؟؟!!!!!!

سلطان: شووووووه...شوه مغصوب..عشان جيه انتي متعايزه؟؟!!! منوه حط هالافكار في بالج؟؟ صح انه هو ملزوم بج..بس ما حد جبره عليج..و احمد يا بويه شوره في راسه..لو بغا غيرج ما حد بيروم يجبره عليج..و الريال من خاطره يباج..خلي عنج هالتوسويس يا بويه انتي بنت حمد بن سلطان..مب من الرقعه..

لطيفه: مادري...برايك انا بسير فوق..

سلطان: طرشي كشميرا تيبليه بيبسي..

لطيفه : ان شالله..

++ ركبت الدري درجه درجه..في كل درجه اسأل نفسي هالسؤال..معقوله احمد مب مغصوب عليه؟؟!!..هيه احمد مغصوب عليج و الدليل انه الين الحين ايغازل و ايكلم الخامه هندوه..و ارد اسأل نفسي السؤال نفسه..و ارد علي نفسي لا مب مغصوب عليج..احمد ريال و كبير و شوره في راسه و ما بينجبر على العرس..لو كان مجبور جان انجبر من زمان..مب الحين و هو عمره سبع و عشرين..عنبوه الشعر الابيض بدا يظهر في راسه..مادري و الله العظيم مادري..الترتيبات بدت تاخذ مجراها بصوره مب طبيعيه..اسمع حجوزات..و فرق..و عيّاله..و مالت صالون و مالت الشعر..و الحنا..يالله يالعروس كم يبالها عباله.. وانا كنت مجرد شاهد اعيان..هم يختاورن و انا اقول موافقه..هاذا اللون حلو؟؟ هيه حلو..هاذا الموديل حلو؟ هيه حلو..هاذا الديزاين عايبنج؟ هيه عايبني..سيري يالدنيا و بسيروياج..ما عندي اعتراض على فكرة العرس..لانه على قولت سلطان اخويه باخذه باخذه ما شي مجال اني اتهرب من شي خلاص صار حكمه بايد اهليه..بس المشكله انه ما عندي رغبه في هالشي..و كل اللي اسويه عشان ارضي خواطرهم و الا انا مالي نفس فيه..اوكي مثل ما يبون هاي تمثيليه و بلعب فيها دور البطوله و انا بكمل للنهايه و بشوف اذا احمد بيقدر ايكملها ولا لا ؟؟!!

دخلت الغرفه اللي مب لاقيه مكان احط فيه ريولي..الاغراض و الاكياس في كل مكان..الفساتين محطوطه على الكراسي..الجواتي مصففه فالكراتين..المغربي معلق لانه يباله تصليح لازم ايوسعونه شوي..الشي الوحيد الايجابي اني متنت..اما شخصيتيه انمحت تماما..مالي اي راي..ما اعترض على اي شي..حاليا يالسين ايأثثون غرفه شمسه اختيه الجديمه لانه بنحط فيها الزهاب..و احتمال انبات فيها ليلة العرس..حتا ديكور الغرفه ما اهتميت به..كل شي على راحتهم..شي خططوله من البدايه ايكملونه للنهايه..

بدا الكل ايلاحظ الفتور و التكاسل اللي فيني..بس ما حد تكلم غير سعيد اخويه اللي دش عليه مره و قالي بالحرف الواحد: " لطيفه..اذا ما تبين العرس قوليلي..و انا بكنسل كل شي..و ما عليج من اهليه انا بتصرف وياهم..مب لازم انشوفج اتموتين جدامنا كل يوم عسب هالعرس..ما يسوا عليج هالعذاب"..اما انا ما عندي اي استجابه ولا اي رد فعل..عرست ولا ما عرست ما عاد يهمنيه..اللي يهمني شي واحد بس..اني اعدي المهمه على خير..و ارضي اهليه..و رضاي على كل شي ايصير مجرد شكليات بتعدي مع مرور الايام..و ما حد له قرار بأي شي غير احمد..هو اللي اختارني..هوا اللي بغا العرس و اني انا اكون شريكه حياته..و هو اللي يمشي كل شي بشوره..و اعتقد انه في ليله العرس كل شي بيتوضح.. و احمد بإيده القرار..على قولتهم ولد عمتج و بيحطج في عيونه..ليش الرفض؟؟ ليش العذاب؟؟ ليش القهرو الحسره؟؟ هاي الدنيا وايد قبلي اللي عرسن مب برضاهن بس عاشن و استقرن..ليش ما اكون انا وحده منهن..و زواج بحب هاذا كل تخربيط..صح ولا انا غلطانه؟!!

قمت ادور فالغرفه و احاول استوعب انه اللي جدامي كله على قولتهم زهابج..بديت المس الفساتين واحد واحد بايديني و اشوف الالوان واحد ذهبي و احد عنابي..و الثالث فيروزي..و السادس مادري شوه لونه..موديلاتهن بصراحه اتسكت علاخير..بصراحه ما اتذكر اني اخترت هالالوان او هالموديلات اللي اتذكره بس اني كنت يالسه انا وعايشه اختيه في محل و هي اترويني الموديلات اللي رسمهن المصمم و انا اقول اوكي اوكي..

اما المغربي فكان من اختصاص شمسه اختيه اللي سارت بوظبي و لفت شارع شارع خذت القطع و الموديلات على ذوقها..اما انا ما اتذكر الا اليوم اللي سرنا فيه دبي انفصل فستان العرس..الموديل كان على شخصيه شمسه اختيه لانها هيه اللي تكلمت مع المصمم اما انا خذولي فيهن القياسات بس..و اذكر ذاك اليوم طول الدرب و نحن رادين العين و شمسه اختيه زعلانه عليه ما طاعت اتكلمني بسبب ردة فعلي السلبيه على فستاني اللي المفروض كل بنت تختاره و هي متوتره و تختاره على ذوقها مب على ذوق غيرها..بس انا ما فرقت عندي واثقه من ذوق شمسه..يا ناس لا تلوموني و الله العظيم مب بكيفي حاولت بدال المره الف اني اركز..بس ما قدرت..ماقدرت...

قعدت على الشبريه المكان الوحيد الفاضي فالغرفه..و حطيت راسي بين ايديني..و هلت دمعه من عيني حارره على خدي يوم شفت الشنط محطوطه على طرف..هالشنط اللي بينحط فيها زهابي..هالشنط اللي بتنهي عمر وردي عشته بأحلا ذكرياته و امرّها في هالبيت..هالبيت اللي عرفت فيه الحب..الفرح..الدلع..الغياض..

هالشنط..بتدخلني في عالم كله متاهات..ما عرف بدايته من نهايته..فجأه دشت عليه شمسه اختيه..جنها اعصار هايج..بسم الله شوه فيها!!!!

شمسه: لطفففففففففففففففففففين...انتي اهنيه؟؟!!!! شله ما تردين من الصبح على التيلفون؟؟

لطيفه: بسم الله الناس اتقول السلام عليكم..مسا الخير..مسا اللوعه..مسا الارف..و بعدين ما سمعته..

شمسه و هي اتدور مكان بصعوبه على شان تيلس عليه: المهم...يالله قايسي الفساتين عشان انزلهن تحت ..يالله عشان يكونهن و يحطونهن على المانيكانات...

لطيفه: الشميسي...فديت روحج..مالي نفس..

شمسه: لطفين...حبوبه..قومي الله يخليج..يكفيني هاذا اللي في بطني من اصبح و هو ايرافس..

قمت مش عشان خاطرها..بس عشان افتك من هالمهمه..قايست الفستان الذهبي..فجيت شعريه عشان ارويه شمسه اذا يباله قص ولا لا ؟؟

شمسه: يخررررررررررررررررررب بيتج...لطووووف...ولا لبنانيه واقفه جدامي..ماشالله عليج..و الله و احلويتي يوم متنتي..اسميه بيتخبل بوشهاب عليج لو بيشوفج الحين...

لطيفه: لا لا دخيلج..خباله الحين ايكفيني...

شمسه: و ماشالله الشعر طول ...

لطيفه: ما يباله قص؟؟

شمسه: لا لا واصل نص ظهرج..و انتي ما شالله شوي طويله..زين زين برايه..اتعرفين الصبغه السودا مناسبتنج وايد..مبرزه بياضج..

لطيفه: المهم..ابدل خلاص؟؟!!

شمسه و هيه اتحط ايدها على بطنها: لطفين..باجر عليج دوام؟

لطيفه: لا ليش.؟؟

شمسه: باجر بوديج دبي...بنسير انسوي بروفه على الفستان..عشان خلاص انشطب..باقلج الاغراض الداخليه..و قمصان النوم..و يالله نسينا الميك اب!!!!

لطيفه: ما فيني اسير..مب لازم..تراهم خذوا القياسات..اكيد بيطلع اوكي..اما الاغراض الداخليه انا مب مستعيله بعده باقي شهر و نص..و قمصان النوم ما في داعي بشتري بيجامات حرير..

شمسه و هي تعتدل باليلسه: شووووووو!!!! يون بيجامات حرير...اقولج قمصااااااان..خليهن عليه انا بتصرف..

لطيفه: لا يعني لا ...لو الموت ما لبستهن هاذيلا ام سيور..المفصخات..ابغغغغغغي بيجامات و بس,,,و مب شفافات لو سمحتي..

شمسه:سيري اشتري ارووحج

لطيفه: لا لا دخليج..انتي انتي..خلصيني...ما ريد اسير اشتري..

شمسه و يهها محمر: لطيفه...النحاسه ما بتفيدج..لا تتحرين انه بهالحركات بيتكنسل شي..عرس و بتعرسين..ان طرتي ولا حليتي..فأحسلج خلصي عمرج دام عندج فرصه..خلاص من الاسبوع الياي بنبدا نهتم بج..خلاص انتي عروووس متا بتستوعبين هالشي!!!!

لطيفه و بإنفعال: مااااريد استوووووعب...مب لاااااازم...مب غصب..عرس و بعرس غصب..و ريل و ما باه..كل شي طلبتوه مني سويته..بعرس و باخذ واحد لا يباني ولا اباه..بعيش وياه ليلي نهاري..و ما قلت شي..شوه تبوني اسوي يعني اكثر عن جيه...مب بس عليه مستحمله هالوضع..مب بس عليه ما نطقت بكمله..بس خلااااااااااااااااااص...خلااااااص ما روم اتحمل اذبح عمريه يعني؟؟!!!!!

شمسه و هي مستغربه من ردة فعل لطيفه اللي اول مره تبينها جدامهم: و يوم انج ما تبينه جان قلتي لا ماباه..؟؟!!

لطيفه و هي اتحط راسها بين ايديها و اتصيح: قلت و الله اني قلت مابااااه...شمسه و الله اني ماباه..ما ريد اعرس..ماريد اخذ احمد...دخليج شوه اسوي...قوليلي..؟؟!! شمسه احس بناااار في يوفي لا اروم ارقد الليل ولا اروم اتنفس فالنهار؟؟!!!!

شمسه و بعد فتره صمت هدت فيها لطيفه: يعني انتي مغصوبه على احمد!!!!!! بس لطوف من يوم يومج و انتي تبينه؟؟

لطيفه: شمسه...ادري انه كل هل البيت يتحروني احب احمد شرات قبل..بس احمد ما يحبنيه..يبغضني..شقايل بعيش وياه؟؟!! شميس انا قلت لا و الله العظيم اني قلت لا ماباه..بس شووو..عطوني الاذن الصما..يعني بويه في ذمتج...بيرد ولد سيف بن عمير!!! ولد اخته!!!

شمسه و بعد تنهيده طويله: لطيفه...لطيفه..منوه قالج انه احمد ما يباج..الريال ليل نهار و هو ايحاتي هالعرس..كل ما يشوفنيه يتخبرني عنج..شي قاصرنها؟؟ الفلوس كفنها؟؟ تبا شي محدد فالعرس؟؟ حرام عليج..شال همج اكثر عن اي شي..كل ما يختار شي ايقولي هزرج بيعيب لطوف..لطوف اتحب هاللون..

لطيفه: اووهووووو...و انتي شدراج..انا ادريبه زين..بذنيه هاي اللي يعل ياكلها الدود ان جذبت انه قال ما يباني لاسباب انتي اتعرفينها اكثر عني صح ولا لا ؟؟؟

شمسه و بطولت بال: لطيفه...شوه تبيني اقولج..انا عرف انتي شوه تقصدين..بس هالموضوع انا ما بفتحه معاج..لانه خلاص انتها من 20 سنه..انسيه..و انتي اصلا شو دراج برد فعل احمد على هالموضوع؟؟!! سمعي الشور..خلي كل شي وراج..لطيفه..و الله و الله انه يحبج و ايعزج..و هاي مب كلمه اخت لاختها.. انتي اتعرفين انا شوه بالنسبه لج..انا اكثر من اخت انا ربيتج من يوم انتي ياهل..صح ولا لا ..ريحي اعصابج..و بوشهاب بيحطج في عيونه..باجر بخطف عليج انزين؟؟ بنسير و بتتزهبين و بنرد؟؟

لطيفه: لاااااا يعني لااااا...مابااااا...شمووووس فديت رووحج..مابااه..ابغضضضضه..و الله اني ابغضه..ماباه..مابا اعيش وياه..و زهاب مب متزهبه..و قياس مب رايحه اقايس..و ما بسوي شي..و اللي فيها فيها..

شمسه و بعصبيه: مب منج!!!!! مني انا اللي عطيتج ويهه..و قلت لا هاذي لطيفه مب اي اخت!!! اتعرفين اني ماروم امشي على ريولي من الحمل؟؟!!! من اسبوعين قالتلي الدكتوره اذا ما ريحتي عمرج اللي في بطنج بينزل..خمس سنين..خمس سنين..و انا اتمناه هاذا اللي في بطني..ما خليت مكان ما تعالجت عشان احمل مره ثانيه..و فوق هاذا اربع وياج من مكان لين مكان شرق و غرب..و لا حفلته اللي في بطني..عشان شوه؟؟؟ عشانج انتي..اللي لا تحشمين ولا تسوين قدر لحد..ما قول غير الله يسامحج..

و طلعت شمسه معصبه..ليتها معصبه و بس..شفت عيونها يلمعن بدموع..عمره اللي بيني و بين شمسه ما كان علاقه اخوه و بس..كان شي اكبر..شمسه هي اللي ربتني اول ما ييت هالبيت من بيت يدتيه..كانت ام و اخت..حسيت باللوم ايقطعني..قمت و عقيت الفستان و لبست بجامه عشان انسا كل شي..ليتني ارقد و اقوم و ايقولولي كل شي انتها..

تحت...

عايشه: هاه ام سيف..شوه بلاج اشوفج مكشونه(معصبه)...شي بلاج شي ايعورج؟؟؟

شمسه: لا ما بلاني شي..تعبانه شوي..

عايشه: لا تقوليلي بتربين!!! بعدج انتي فالثامن؟؟

شمسه: هيه..بس مادري حاسه بعمريه بربي قبل

عايشه: لا لا دخليج..خلينا انتهنا بعرس لطفين عقب ربي..

شمسه:اي عرس الله يخليج..هالنحسه طاعت تتزهب؟؟

عايشه: ياختي انا لاحظت عليها..امررره ما ترمس..ما تنطق..اتخيلي الفساتين قطعهن و موديلاتهن انا مختارتهن..و امايه العربي هيه مختارتنه..ما اختارت ولا قطعه و لا لون..ولا شي شوه بلاها هالبنت؟؟

شمسه: يا ختي هامتني هم...يونها اتقول ما تباه احمد..ما تبا اتعرس..

عايشه: شووووو...شوه اتقولين انتي..ما شي العرس باقي عنه شهر..عيل ليش وافقت من البدايه؟؟

شمسه: ضغطوا عليها بويه و خوانيه..المهم انا ما عليه منها وافقت ولا لا ..انا اعرف احمد اكثر عنها..و اعرف انه يباها من خاطره..بيداري عليها و بيحطها في عيونه..بس هيه هامتني..ما طاعت اتخلص شي..

عايشه: ما سرتو انتو يوم السبت بوظبي..؟؟

شمسه:سرنا يالله يالله يبنا المغربي..و خطفنا على المارينا مول خذتلها كم لبسه و قالت ردوني البيت..قلتلها خليني اوديج بوظبي مول ما طاااعت..قلت يمكن تعبانه و بردها مره ثانيه..بس الحين اتقولي انهااا مره خلاص ما بتشتري شي!!!! و هي بعدها ما خلصت؟؟؟

عايشه: شوفي اذا على التاييرات..و القمصان..و الميك اب خليهن عليه انا..

شمسه: و الفستان مال العرس؟؟ و الشنط..و الجواتي..و قمصان النوم و الملابس الداخليه؟؟؟...يا اختي أحمد راعي كشخه و عدول..ما يباله زهاب عادي!!!!

عايشه: فاااالج طيب بنت حمد...لطيفه انا بييبها بالسياسه..عهد عليه اني باجر ما خلي سنتر في دبي ما وديها اياه..برجمان ووافي و ميركاتو..بناخذلها منهن شنط و جواتي..و الميك اب بوديها السلام و باريس قاليري ولا اريج يمدحونه بعد..اما التاييرات خليهن يوم ثاني بوديها المهيري سنتر..و قمصان النوم و ملابسها الداخليه سدينهن انتي لانج ادرى بهالامور..و ازيدج انا اليوم كلمت مدام ايميلي عشان الباقه مالتها...و تزيين الكوشه و هي بتخلص كل شي..شي في خاطرج بعد ام سيف؟؟

شمسه: لا يزاج الله خير..و الله اني لو ما حبها هالبنت جان ما حفلتها..بس و الله انها غاليه عندي..

عايشه: شميس..لطيفه غاليه في قلوبنا كلنا..و فرقاها مب هين..بس احمد ريال و نعم..ما ينرفض

شمسه: الله يعدي كل شي على خير....مادري عندي احساس قوي انه هالعرس ما بيكتمل ولا شي جايد بيستوي

عايشه: لا تخافين..انا بخلص كل شي..تعالي اشوف سياره..منوه ياي الحين؟؟

شمسه: يااااااللله...نسيت!!!

عايشه: شووو؟

شمسه: هاذا احمد..

عايشه: و شوه يايبنه المعرس اهنيه؟؟!!! دقيله دقيله خليه ينزل برا فالميلس..لا ايدش اهنيه

شمسه: في شورج هو!! ياي ايشاور العروس..

عايشه: شووووو..مينون..ماشي العروس ما بيشوفها الا ليلت العرس..وين يبا؟؟

شمسه: ما قدرت عليه الصراحه..من البارحه ايقولي يبا ايشاورها عشان لون البطايق..و مادري شوه بعد.

عايشه:شووووو!!!! لا لا العروس ما بيشوفها..اتخبل الريال..من متا المعرس ايشوف العروس قبل العرس!!

شمسه: اقولج ما رمتله من البارحه قلتله خلني انا بشاورها ما طاع..يابوي هاذيلا جيل اليوم ما عندهم هالخرابيط..الحين كيف بنقنعها تنزل؟؟!!

عايشه: ضروووري يعني؟؟!! ما شي مجال

شمسه: لا ما شي مجال..

عايشه: خلا ص بقولها فطيم تترياج تحت..

++ ما قدرت ارقد..عمري ما حبيت ازعل حد ولا ايحط في خاطره عليه..بس شوه اسوي هاذا الواقع..هاي الحقيقه المره..و شمسه اكثر وحده عارفه بلاوضاع و المفروض انها اكثر وحده تتفهمني..ما شي سمعت الباب ينفتح..و احلا صوت فالدنيا يزقرني..ادريبه هاذا ابويه يزقرني و ايدش على طول من دون لا ايدق الباب..رنه صوته و النغمه اللي يزقر بها اسمي فيها حنان الدنيا كله..

حمد: السلام عليكم.

لطيفه: و عليكم السلام ..مرحبا مرحبا الساااااااع ببوسعيد..ماشالله الكونجرس بكبره اهنيه..شمسيت بويه؟

حمد: بخير و نعمه..شحالج الغناه؟

لطيفه: يالله يالله يالتقردين استويت الغناه الحين؟؟!!! يوم شفتوني مودعه...(هالجرأه ما تيني الا جدام بويه)

حمد و هو ايحط ايده على جتف لطيفه:امبونج غناه لفواد انتي..الا مالج بد من البزا(الدلع)..لعلوم؟

لطيفه: طيبه..

حمد: ماشالله يالدنيا...الحجره متروووسه من القشار..خلصتي زهابج كله بنتيه؟؟

لطيفه: يعني...اللي يباله عباله(شغل) خلصته...باقي الا هاذا الكسكاس(الاشياء البسيطه)..

حمد: هيه يا بنتيه..عيل انا مادري احسبج امره مالج بارض..يوم ارمسج ما تردين علينا..و اشوفج دوم مويمه(حزينه)؟ شي بلاج بنتيه شي قاصرنج؟؟

لطيفه صمت ماله حدود..شوه اقوله؟؟ شوه ارد عليه.؟؟ اجذب عليه و اقوله فرحانه؟؟!!

حمد و هو ايحط كيس قماشي صغير في حضن لطيفه: بنتيه..فديت روحج هب اتحطين في خاطرج..بس هاذيلا بيزات..حول خمسين..اباج اتسيرين و اتزهبين من اللي في خاطرج..نحن يا بنتيه القصور منا ما درينا انه شي قاصرنج..ولا جان وفيناه..امررره لا تخلين شي في خاطرج..و اللي اشترن منه ربيعاتج خذيلج منه و اللي احسن عنه..ابا زهابج زهاب لا صار ولا استوا..و ان قصرن ولا ما كفنج ترانا موجودين..و حاضرين بالمطلوب..

لطيفه: بوو...بويه...شوه هاذا؟؟!!! انا مهريه الين الحين ما خلصته و هاذوه و الله انه فالتجوري ما خلص تباني ارويك اياه؟؟؟!!! انا انعطيت مهر ولا وحده من خواتي ولا من ربايعيه خذن مثله..و انا اروحي متلومه في عمتيه بخيته ليش انهم كلفوا على عمارهم...انته منوه قالك هالشي..؟؟؟؟ اتخبر امايه جان عليه قصيره؟!

حمد: يا بنتيه هاذيلا من نصيبج..كيفج من صرفتيهن ولا يودتيهن..شدرانيه يا بنتيه الحين شمسه اختج مرمستنيه اتقولي انج شرا الزعلانه ولا حاطه في خاطرج..قالتلي ارمسج و اشوف شوه بلاج يا لطيفه انتي بنتيه ( و ايأشر على قلبه) و منزلج و قدرج عالي عندنا يا بنتيه..قلت يمكن انج ما كفنج الفلوس تتزهبين عشان جيه لا انشوفج اتسيرين السوق ولا تظهرين...

لطيفه: فرقاكم يابويه مب هينه..و انفجرت في حضن ابويه و انا احط ايديني ورا راسه لدرجه ان سفرته طاحت

حمد: بس يا بنتيه بس...عنبوه يا لطيفه يونج انتي حرمه و راعيت البيت و اتصيحين!!! بس يا بنتيه انتي ما بتسيرين بيت ناس غرب..الا بيت عمتج هاذووه مب من بعده..و انا يا بنتيه مستــــــــــــــــــــــــانس(و هو ايطول الكلمه عشان ايعبر عن فرحته) انه احمد اللي بياخذج..امررره هالريال لا عليه كلام و لا عليه رمسه..فرقاج مب هين علينا يا بنتيه..بس يوم انج بتسيرين عند بو شهاب امرررره بتسيرين و انا مطمئن عليج و لو بتغمض عيني بعرف انج عند ريال بيحشمج و بيقدرج...

 

 

 

 

 

و طلع ابويه عقب ما قالي هالكلام اللي يقطع القلب لهدرجه بويه فرحااااان اني بعرس و باخذ احمد..آآآه شوه اسوي..هاذا نصيبي..مالي بد منه..أحمد و احمد و احمد..خلاص شوه يعني..باخذه و اللي فيها فيها..اذا على قولتهم احمد ريال و نعم..و اخلاق..فأكيد انه بيحشمني..و لازم افتح صفحه يديده معاه..امسح احزاني و هموميه..و اترك الماضي..و اشوف المستقبل..مستقبليه مع احمد..ريلي..شريكي..و المفروض نور عيوني!!

 

بدلت ملابسيه اتجحلت..اتعطرت..و سويت رفيريش..خلاص انا قررت اني انسا الماضي و اركز على اللي ياي..انا الحين عروس..المفروض اني اكون فرحانه..و مشغوله..و ما عندي وقت اني افكر في اشياء تافهه ممكن انها اتدمر مستقبليه..بسير اشوف شمسه و براضيها..و بنزل تحت لانه ابويه قالي انه فاطمه بنت عمتيه اهنيه..و فطيم مالها ذنب انها اخت احمد عاقبتها و قاطعتها من عقب موقف احمد الاخير ويايه..هيه شوه ذنبها؟؟ ذنبها انها تشبهه واااايد فالشكل..و كل ما اشوفها...ضحكتها..نظره عينها..كل شي كل شي ايذكرني به..ذنبها انها من ريحة الغالي!!

لطيفه و هي تيلس عدال شمسه: ام سيف؟؟؟ انزين عاد عطوونا ويه انهون عليكم؟؟!!!

شمسه: لطيفه...مالي نفس خليني في حاليه..

لطيفه: انزين عاااااااد...خلاص خلاص( بستها على راسها) يالله عااااد...فكها يا جميل يا ام حمد..

شمسه و هي تعتدل فاليلسه: شوووو!!! بعدني حمد!!! مب مكفني السيافي!!! لا لا الله ياخليج..بسني اولاد ابغي بنوووته...يارررررب ياااارب ابغي بنووته..فديت وجهك الكريم

لطيفه: هههههههه..اعرفج من انقولج هالسالفه انطحنتي...لا لا انشالله ووووولد و بنسميه حمد على بويه

شمسه: لا يعني لا ...

لطيفه: ام سيف...باجر بسير ويا عويش دبي..و بخلص اللي ناقصني..و الفستان بقايسه..و برد عليج بخبر ولا تعبين عمرج ارتاحي..لاني اباج اتمشيني على الكوشه..بس الله يخلللللللللللللللللللللللليج قمصان النوم انتي اشتريهن...الله يخليج..

شمسه: قصوري اسحب كرشتيه على الكووووشه..و بعدين اكيد انتي بتخلصين كل شي؟؟

لطيفه و هي تغمز بعيونها لشمسه: افااااااا...و من متا ام عمر تجذب...

شمسه: هههههههههههههههه....ام عمر مره وحده..اسميج صدق زلمه..لا لا احمد ايقول انه اذا بجره ولد بيسميه عمير على ماي هزبند..

لطيفه: هاهاهاي...منوه ايقول يا بويه الشور شوريه انا...

شمسه: ييي هاااا جان تنرام ضبابه...اسميج ما خليتي شي عن قوات يدتيه...من شابه جدته فما ظلم..سيري سيري..بتلقين أح...ااااا...بتلقين ...أحلا فطيم اترياج فالصاله الزجاجيه...سيري

لطيفه: ما عليه...شميس لو ما عليج امر..يوم بتشوفين كشميرا..قوليلها تيبلنا عصير..

شمسه: اوكي...

++ يالله شمسه و راضيناها..و كل شي ان شالله بيمشي على الله ما يكتب..مادري احس بعمريه الحين احسن بوايد..و انفتحت نفسي من اول ويديد..و بالفعل شوي شوي بديت احس اني عروس..و اعيش شعور العروس..خاصه انه البيت متروس اغراض..كل شي يديد..و اغراض بنتحط فالقاعه..و زينه و مادري شوه..بصراااحه اتوووولهت على فططططططططيم و سوالفها..فحبيت اسوي فيها مقلب..اعرفها ديايه من ابسط شي اتخاف..لاحظت ظل مشوش لانه الزجاج المعشق ما يبين الشكل بوضوح بس شكلها عاطيتني ظهرها..فقلت بخوفها..شوه سويت؟؟ شوه اتوقعون؟؟..

فجيت الباب بسرعه و نقزت(قفزت) مترين داخل..و انا اصاااارخ و اقول " سربرااااااااااااااااااااااااااااااااايز.....العروو وووووووس وصلت...صلو على النبي"..

اول ما نزلت سطح الارض بعد الاقلاع الغير طبيعي..طاحت عيني على عمود اناره لابس كندوره بيضا..شوه هاذا؟؟ رفعت عيني شوي شوي..شفت منوه؟؟ شفته هو ما غيره الديج..اوووه سوري بعلي العزيز..شوه ايسوي اهنيه؟؟!!! اول شي سمعته..

احمد و بطنازه:الف الصلاه و السلام عليك يا حبيب الله محممممممممممماد...شوه هاذا ما شالله البَوَر فوول...اسميها صدق سربرايز..

اول ما استوعبت شوه قال...حسيت بعمري انحرق بالبطئ..يعني من بد كل الناس احمد ايشوفني بهالطريقه..لا و انا العروس العتيده..يالله ياللللللللللللللللللللللللللله...يا جماعه الخير ابا اختفي..انقرض..شوه بيقول؟؟ اكيد على باله اني اعرف انه هو اللي موجود فالصاله شوه بيقول ينّت البنت؟؟!!! احسن عشان يتعايز عن العرس...

احمد: شياج صخيتي؟؟

لطيفه و انا اترجا احمد: و الله ...و الله..و ربي في سماااااااااه...انهم قالولي فطيم اللي اترياج؟؟!!!

احمد: هههههه...انزين شوه فيها..تراني ريلج..عطيتيني فكره عشان اعرف كيف اتعامل معاج..شكلنا بنسوي مصارعه حره ليلة العرس...

لطيفه..في ذمتكم يعني شوه ارد عليه..شوه اقوله!!!اكتفيت برد ويهي عليه اللي غادي احمممممممممر

احمد و بعد تنهيده...يلس على الكرسي..: يلسي لطيفه..

سمعا و طاعه..يلست في كرسي فالطرف الثاني من القعده...

احمد: اول شي شحالج؟

لطيفه هزيت راسي...

احمد: لطيفه تعالي شوي اباج؟

لطيفه: أأأأ..شو؟؟!!!

احمد و بنرفزه: بااااااااااااكلج انا!!!!! تعالي شوي ابغي اخذ رايج...

رحت و قعدت على كرسي عدال الكرسي اللي يالس عليه احمد..بس علاطرف...شوي و بصك الدعنه(الارض)..

احمد و هو ايطلع اغراض من الكيس اللي عداله و بدا يرتبها على الطاوله اللي جدامه..

احمد: شوفي لطيفه هاذي ديزاينات لبطايق العرس..ما بغيت اسويهن من دون لا اشاورج..لانه احتمال تبين توزعين على ربايعج منهن..فقلت احسن اشاورج..شوه رايج؟؟

شوه اشوف؟؟!!! اشوف الوان قوس قزح..احوليت..و الله العظيم ايديني يرتجفن..مسكت اول بطاقه و اقرب وحده..جلبتها..لفت نظريه جمله:" و اللذي سيقام يوم الخميس الموافق....." بصراحه..عبرتيه خنقتني..يعني الموضوع جد!!! و اللي جدامي هو ريلي..الشخص اللي بياخني من بيت اهليه..و بيشاركني في كل شي..و اهم شي قلبي..اللي داس عليه و بكل برود..رفعت عيني صوب احمد..اللي كان يتريا ردت فعل مني..بصراحه..اول ما شفت عيونه..كل الحواجز اللي بنيتهن ضده انهارن..بس اتذكرت اخر موقف بينا..فكرهته كره..حبيت اطلع من الغرفه باسرع وقت قبل لا انفجر و اقول شي اندم عليه..

لطيفه: كيفك احمد...اختار اللي تباه انا موافقه..

احمد: شوه يعني كيفي..؟؟!!!! لطيفه اتخيلي انا ياي الحين من دبي سيده اهنيه..من الصبح و انا الف و الف ما خليت مطبعه..علاقل اختاري لون ..ديزاين..حددي لو مجموعه و انا بختار منهن!!!!

لطيفه و هيه تلتفت الصوب الثاني: ولا وحده حلوووووه!!!! ايلوعن بالجبد..

احمد و هو يمتص الغضب بفارغ الصبر: يعني ولا وحده حلوه!!!! كلهن شينات!!! اوووكي..مب مشكله..باجر بسير الشارجه في مطابع يمدحونهن اهناك..و بييب موديلات غير..

لطيفه: لا اتعب عمرك..الا عرس هو..بطاقه بتنقرا في لحظه و بتنعق فالزباله..

احمد: بس انا عرسي غير!!!..هدوء خمس دقايق..و يا لطيفه انا بعد عروسي غير!! مب نفس كل البنات صح ولا انا غلطان..

لطيفه: لا الشيخ غلطان..انا مب بنت عاديه..البنت العاديه..لو اتشوف...

كنت ابا اقول البنت العاديه..لو اتشوف...ريلها يغلط جدامها..بتسوي بلاوي ما بتكست عليه!!!

احمد: اتشوف شوه؟؟!! قولي ارمسي اشوفج صخيتي..؟؟

لطيفه وانا اقوم قبل لا انهار جدامه: بو شهاب ما ابغي اقفيبك..بس اسمحليه..راعيت الصالون بتسويلي الحين و انا من الصبح اتريا اتصالها...

احمد: اوكي...باجر بييب شي يديد..

لطيفه: الين باجر خير..و طلعت بسرعه..

احمد: لطيفه؟؟!!!

لطيفه: لبيه..

احمد: تعالي ويايه شوي السياره..شي بطاقه طاحت..يمكن تعيبج..

توني بقول لا..بس نظره التعب في ويه احمد..و شكل جسمه اول ما وقف..صدمني مب هو احمد الاولي..ضعف وويه مسود..و شكله صدق تعبان..ما قدرت ارفضله هالشي..!!

لطيفه: ان شالله..

طلع احمد صوب سيارته و انا امشي وراه..استهدي بالله يا لطيفه..اعقلي و ريحي اعصابج..فتح احمد باب السياره و دخل داخل وانا الهبله اتقربت من باب السياره وايد ماخذه راحتيه!!! بصراحه كنت اريد هاللحظه اتعدي باسرع وقت..

احمد: لطيفه اتشوفين شي طايح اهناك؟

لطيفه: وين؟

احمد: الصوب الثاني؟؟

لفيت الصوب الثاني..و فتحت الباب..شغل احمد الليت الداخلي..شوه بلاه ما يشوف!!؟؟ المغرب هاذا..بس لاحظت انه عيونه حمر..وبدا ويهه يتنفخ..و شكله مثل الانسان الدايخ اللي بيطيح بس ما حبيت اسأله شوه فيه..ما حبيت يعرف اني مهتمه فيه..دخلت داخل السياره طلعت بطاقتين كانن طايحات تحت جسمي فالسياره بس ريولي برا..

احمد: شوه رايج؟؟ هاذيلا الثنتين يداد..انا كنت مختارنهن و اليوم جهزن..؟؟

لطيفه: امممم..مادري

احمد: اذا ما عيبنج مش مشكله بندبرها..

لطيفه: لا لا هاذي البيج حلوه..بس الخطوط مش حلو لونهن..لو ايكون ذهبي احسن..

احمد:هههههه..اتصدقين عاد..هاي انا مختارنها..يعني ذوقي نفس ذوقج..بس هاي وايد غاليه...

لطيفه و باستغراب: مستخسرنها فيني؟؟!!!!

احمد: لا حشا...بس هاي بتاخذ وقت الين ما يطبوعنها مادري اذا بتجهز قبل العرس بفتره ولا لا ؟؟

لطيفه: و انا ما عيبني غيرها..( و الله العظيم ما حبيت اكلف عليه..بس المسأله مسأله غياض بس)

احمد و بنظره خبث: لطيفه العرس ما بقا عنه الا شهر..متا بتخلص؟

لطيفه: كيفك..

احمد و هو يتساند على الكرسي و ايحط ايده على عيونه: و الله؟؟!!! كيفي؟؟!! تدرين لو بكيفي شوه بسوي؟

لطيفه: شو؟

احمد: اركبج السياره و انسير نملج..لا عرس و لا غيره..و احجز على اول طياره و انسير...

لطيفه..الموقف محرج..و حسيت بعمريه اتآكل من الفشيله..بس ما قدرت اعديها..لهدرجه ما عندي اي قدر عنده!!!

لطيفه: ليش؟؟ مستخسر فيه اكون عروس شرات بنات العالم و الناس..انته على شوه متواكل؟؟!!

و طلعت بسرعه و لفيت من جدام السياره اول ما مريت عداله..زقرني احمد بأسمي بس بونه ألم..و الله انه هالريال مب طبيعي شي فيه..قلبي عورني عليه..لفيت عليه بس براسي..

لطيفه: نسيت شي من الاهانات ما قلتهن بو شهاب؟!!

احمد: متواكل على العرس..اذا انتي فيج صبر انا ما فيني صبر الين الليله اللي بيزفونج فيها ليه..

 

ما عرف شوه نوع الجمله اللي قالها احمد..قنبله..حقيقه..وهم..خيال.أو اني انااهاذي..ولا كالمعتاد طنازه و مسخره..بس اللي فهمته اني ركضت لحجرتيه بسرعه الصاروخ..و خليت احمد برا بالحاله اللي هو فيها..وايجت من الدريشه..شفت سياره احمد البي ام تخفتي ورا الدروازه..يا ناس ضايعه ولا اعرف شوه الدرب..ضايعه ولا اعرف شوه المصير..احبك يا احمد..رغم كل شي!!!

بس لكل فعل رد فعل وكل اللي ايصيرلي نتيجه كلمات قالهن احمد في يوم من الايام..وانا اليوم يا احمد اذا جذبتك مش لاني ماريدك..اجذبك و اجذب اي رد فعل ايجابي منك صوبي لاني متأكده مليون بالميه انك ما تباني..ليتني اعرف شوه اللي جبرك عليه!! ليتني اعرف شوه قصدك من الزواج بي؟؟ ليتني ادخل حنايا يوفك..و اعرف لشوه اتخطط يا احمد..كل هالشكوك فيك لانه من خمس سنين..جملتين قلتهن في حقي..كانن طعنتين في كرامتيه..اذا انته ناسي يا احمد انا مستعده اذكرك..قبل لا نندم انا و انته...

(( لطيفه: تعالي هاذي نظاره احمد..

فاطمه: هيه نساها اهنيه البارحه..يالله شوه هاذا خلصت الاجازه بسرعه..و بتبدا المدارس الله ياخذهن..لازم ندرس يعني..

لطيفه: هههههههههه...يالله شوه انسوي..انا يمكن اسير باجر البيت..

فاطمه: شوووو؟؟!!! بعدهن المدااارس اسبووووع!!! عشوه مستعيله انتي؟؟!!!

لطيفه: و اللي سواه فيني اخوج البارجه هيّن؟؟!!!

فاطمه: امممم...لطيفه يمزح احمد...

لطيفه: يمزح!!!!! زلغلي شعر راسي و ما خلا فيني شعره و اتقولين يمزح؟؟!! عيل هاذا لو كان جد شوه بيسوي بيحلقني عالصفر!!!!

فاطمه: الحين شوه؟؟!! بعدج زعلانه؟؟!!!

لطيفه: هيه زعلاااانه..ولو ايحب ريوليه ما برضا عليه!!!

فاطمه: مادري...لطيفه..و الله و الله انه احمد انسان طيب و خلوق...و الله ما كد في حياته مد ايده علينا..بس انتي الله يهديج تقهرينه!!

لطيفه: الحين انا اللي قهرته!!! ولا هو اللي يدور سبب ...

فاطمه: و الله مادري...و انتي هاي دووم حالتكم حريقه و ديزل..من ايشب الاول شب الثاني..انا بسير اتسبح

لطيفه: و انا بسير اسويلي عصير..

++ عدّت اربع و عشرين ساعه بس عالموقف اللي صار بيني و بين احمد..حبيت اتجاهل كل شي..بما فيهم احمد..ما بيني و بينه كلام..الين ما يعتذرلي...هو الغلطان و هو اللي بدا..كنت ماشيه و انزل على الدري سايره تحت المطبخ عشان اسوي عصير..بس سمعت صوت احمد فالصاله اللي تحت فقلت برجع الغرفه يوم يطلع أحمد من البيت بسير المطبخ..بس لاحظت انه احمد يتكلم مع عمتيه بخيته..و اخته فاخره..و اسم لطيفه فالسالفه..معقوله عرفوا باللي صار البارحه؟؟!!! لا لا يا ربي..ماريدهم يفهمون الموقف غلط..ما حبيت اتجسس بس دام الموضوع ايخصنيه..حبيت اعرف شوه السالفه..يلست على الدري بحيث اني اقدر اسمع شوه ايقولون من دون لا يشوفوني...

بخيته: انزين يا بويه انته شوه بلاك على البنت؟؟!!!

احمد: امــــــــــــــــــــــايه...كم بعيدها الرمسه...حرااااااام عليكن...طفرتبي!!!! لطـــــــــــــــــيفه ماباها لا تحاولن..

فاخره: انزين عطنا سبب...بنت خالك هاذي شوه بلاك انته عليها؟؟!!!

احمد: ما بلاني شي..و البنت ما بيني و بينها شي..بس لو ما تم بنت فالدار لو مره ينقرضن انا لطيفه ما باخذها...

بخيته: لا اله الا الله...يالله بالستر عنك يا بويه..ليش عاد هالرمسه هاذي؟؟

فاخره: احمد...لطيفه ما تفرط..و من اسبوعين يوا عند خالي عرب خطاطيب..حرام بتفرط البنت بين ايديك..

احمد: شوفن..البنت لا تحيرنها..ولا تخطبنها من دون شوريه..وقولي حق خالي حمد..اني مالي رغبه فيها..ولا يرد نصيب البنت عنها..انا ما باخذها..

فاخره: انزين احمد انته لا تستعيل بالقرار...نحن ما نقولك امررره يالله بنخطب و بتعرس فالصيف..انته بعدك تدرس و هي تدرس..خير الين ما تخلص لطيفه الثانويه يبالها اربع سنين..

اكتفا احمد بهز راسه بالنفي..

بخيته: انزين تبانا نخطبلك عويش؟؟ ولو اني مابالك غير لطيفه..

فاخره: امايه شوه عويش؟؟!! نحن انقوله لطيفه و انتي اتقولين عويش؟؟!!! صح انه اذا على الحلاه عايشه احلا عن لطيفه...بس شخصيه لطيفه وين و عايشه وين؟؟!!!

احمد: خلن عنكن...قلتلكن بنات خالي مالي رغبه فيهن..قصوري بعدني ماخذ عويش..

بخيته: و شوه بلاهن بنات خويه ماتباهن؟؟!!!

احمد: عويش... مطر ولد خالي مبارك حاط العين عليها...يصبح و يمسي يهاذيبها...

 

بخيته: لا حوووووول...قلتلك يا بووويه مالك بد من لطيفه..تعوذ من بليس و انا برمس خالك بنحيرها بس..

احمد: طااااااااااااااااااااااالعوا....شوه اقول انا من الصبح...فاخره ارمسي..

فاخره: شوه تباني اقول؟؟ و الله يانه لطيفه لو بتدور فهالدار كلها شراتها ما تحصل..بوشهاب و الله انه البنت ما تفرط..اتسدك تراحيبها و مواييبها..البنت حشيم..و بصراحه ما تخلا...

احمد: اوهوووووووو...بنت الباكستانيه ما بااخذها...لو بعدها بنت عفرا مب مشكله..شوه تبن باجر يوم بييب عيال بيقولون ولد سيف بن عمير عياله شعورهم صفر و عيونهم خضر!!!!!

بخيته و بشهقه غضب: شوووووه؟؟!!! احمد لا تعيدها هالرمسه مره ثانيه جان تباني ما اغضب عليك لين يوم الدين!!!

احمد: حراااااااااااااااااااااااام عليكن حراااام...اميه هاذي الحقيقه رضيتن ولا لا ..ولا تبن تبلنّي انا بها؟؟!!

بخيته: شوه يعني خالك يايبنها بالحرام؟؟!!!

احمد: استغفر الله العظيم!!!!! عوذ بالله من بليس..انا ما قلت جيه انا قلت بنت الباكستانيه ماباها..بس

بختيه: وشوه بلاها الباكستانيه عبدة ابوك؟؟؟!!! حرمه بنت راس قبيله في باكستان..ابوها يامر و ينهي شيخ مب اي باكستانيه!!!!! و ماخذنها بالحلال..والله لو شفت صورتها انته يا تعذر من زين و حسن فيها!!!!

احمد: اميه فيدت روحج..لاتجبرني على شي قلبي مايباه!! و البنت ماباها من خاطريه..و عقولتج البنت بنت حمد بن سلطان..يعني انا ما بقطع نصيبها اكيد انه الله كاتبلها حد غيري..

فاخره: احمد...الحين انته تحاسب عن سالفه استوت من اربعتش سنه!!! ريال سار القنص و عيّب بالحرمه..خذها على سنه الله ورسوله..نحن ما بنيلس انحاسبه..و هاي بنت خالك وين بتحصل احسن عنها!!

بخيته: و البنت متربيه اهنيه فالامارات مب في باكستان..من توفت امها و هيه ام سنتين يابها خالك عند يدك و يدتك ضبابه ربتها..الين ما رضت عفرا و شلها خالك البيت عندهم..يا بويه عيّن من الله خير و توكل على الله..

احمد و بعصبيه: اميه,,,,ان عدتنها هالرمسه مره ثانيه..تراه و الله ما طيحه هالبيت مره ثانيه..ولا بتشوفنيه دامنكن حيات...حشا اطفرووون بالواحد الين ما يعاف حياته...

++ و طلع احمد..عقب ما كشف سر حياتي الصغير اللي ما كنت اعرف عنه شي..طلع عقب ما حط النقاط على الحروف..الحين عرفت ليش درست الروضه في سويحان عند يدتيه مب اهنيه فالعين!! و الحين عرفت ليش التوتر كل ما سألتهم عن شهادة الاحصاء اذا طلبوها فالمدرسه!! و الحين عرفت كيف انه فارق السن بيني و بين سلطان اخويه ثمان شهور بس!! و اخيرا عرفت ليش انا ما اشبه معظم الويوه اللي فالعايله!! حزني اليوم عظيم..و جرحي اليوم كبير..ماظني يبرا لو ايصير ما يصير!!....)))

 

هاذا هو اصعب امر اكتشفته في حياتي من خمس سنين..امر حاولت اتناساه..مش لاني مب راضيه به..ولكن انسا الفوضا اللي كنت عايشتنها..يعني اميه توفت من يوم انا صغيره..و امايه عفرا ام بالاسم بس..و هاذا السبب اللي خلا أحمد من خمس سنين يرفضني..كلماته لا تزال ترن في دهاليز روحي من خمس سنين..!! و هاذا السبب اللي من بعدها رفضت اشوف احمد او اني اسير بيت عمتيه بخيته طول المده اللي فاتت!!

 

 

 

 

[بحرينيه^مزيونة]

مشكووووووووره حبيبتي

 

ووننتظر التكمله

 

بلييز لا تتاخرريين

[غزال الريم]

 

تفضلوااااااااااا

 

 

"""الجزء السادس عشر"""

 

بكـــــــــــــــــــــــــل هدوء و بكل محبه...اسمع الكلمه الاخيره...ما أبيك...ما أبــــــــــــــــــــــــــــيك

 

الايام اللي فاتت عدت في لمح البصر..هالكورس خلاص خلص على خير..سلطان اخويه عايش في كابوس اسمه امتحانات الثانويه العامه..و خلاص العرس ما بقا عنه غير اسابيع معدوده..البيت عايش حالة طوارئ مب طبيعيه..الاستعدادات ما خلت لي مجال اني اشك انه هالعرس ما بيستوي..

لطيفه: مسا الخير سلطان..

سلطان: مرحبا السااااع بالعروس...متا سارت عنج ام كشه..

لطيفه: منوه هاي ام كشه بعد؟

سلطان: مالت الصالون؟؟

لطيفه: من ساعتين...شوه سويت انته؟؟

سلطان: ماااااااااااادري...بقطع شعريه انا...اكرررررره شي اسمه عربي..بسألج كيف بنجح في هالماده..حشا هاذا مب كتاب هاذا دستور الدوله..

لطيفه: هههههههههه..الله بيوفقك ان اشالله...المهم انته اشرب هالنسكافيه..و بتصحصح..خلصت انته؟؟

سلطان: من متا هالاشكال اتخلص...انا في حياتي كلها ما دشيت امتحان و انا مخلص المنهج..

لطيفه: ما عليه انزين شي وقت طويل الين الامتحان..الحين الساعه وحده فليل..و انته ما شالله خلصت الرقاد اللي فالعالم كله...

سلطان: ما شي حل الا اني اواصل...

لطيفه: ما عليه انا بخليك الحين عشان اتذاكر..شد حيلك ما بقا شي و بتفتك من كابوس الثانويه..الساعه اربع بيي اشوفك اذا رقدت ولا لا ؟؟ ما تبا شي..

سلطان: لطيفه سيري امتحني بدالي..

لطيفه: جان زين

سلطان: انزين خلاااص شوه رايج انا بركب سماعه و انتي غششيني..

لطيفه: شوووووو!!!! سلطان اشوفك قمت اتهلوس...يالله ذاااكر...تصبح على خير...

سلطان: اي خير...الله كريم..تتوقعين ضبابه خلصت؟؟

لطيفه: و انته شوه لك خص في ضبابه؟؟ ركز في دراستك..

سلطان: اييج الشور بسويلها تيلفون..

لطيفه: كيفك...بس لا تقرقر وايد وراك امتحاااااان

سلطان: ان اشالله عموه...بس لو سمحتي اطلعي خليلي الجو رومنسي...

طلعت عن سلطان و انا احيده ايطرش مسجات لضبابه..اللي عندها تيلفون فطيم فهالفتره عشان اتخلص امورها مع المدرسات..و غيره..الله ينجحه و يفتك ان شالله ولو انه شكله ماله خص فالدراسه ابد..

سلطان و هو ايطرش مسج لضبابه:"خبروه اني على وصله حييت و ان تفارقنا ترا موتي دنا.."

ضبابه و هي منسدحه على الشبريه و حاطه الكتاب جدامها: اووووه هاذا سلطان مطرش مسج...شوه ايسوي واعي الين الحين؟؟ بطرشله مسج :" مساء الخير و الاحساس و الطيبه..مساء ما يليق الا باحبابي"

سلطان:" فديت روح اللي ذبحني وداده..أفديه انا بعمري و حالي و الأقراب..حبه سكن قلبي و عمه و ساده..و أصبح وسط القلب و تحلل و ذاب..كل ما نبض قلبي أحبه زياده..حتى عرفت ان عشرته طب الاحباب"

ضبابه: يالله يعلني افدا بو مييد..."الروح روحي و انته الروح و الشوق..ما أحد غيرك دش قلبي و طبه..باخذ من عيونك غلا كل مخلوق..و اسكن انا بين الهدب و التحف به..مدام قلبي مبتلي فيك محروق..وش عاد لو نار الغلا تشتعل به".

سلطان:" أحبـــــــــــــــــــــــــــــــــــــــــــــــ ـــــــــج....عفوا جزء من النص مفقود.. قصدي احبج يا اماراتي"

ضبابه: " لا و الله...حتا انا....أحبـــــــــــــــــــــــــــــــك.. بس بابا زايد"

سلطان: " يالسباله..بوخليفه غالي و نحبه كلنا...قولي احبك سلطان"

ضبابه:" ما بقول..."

سلطان:"بتقولينها و انتي حماره"

ضبابه:" خلصت دراسه انته؟"

سلطان: " طالعوا السباله اقولها قوليلي احبك و هيه اتقولي دراسه...لا ما خلصت ارتحتي؟؟"

ضبابه:"كيفك...انا خلصت و يالسه اراجع"

سلطان:" شعليج غاديه منهن هاذيلا الزلمات اللي ياكلن الكتب اللي يسمع بتييب فالتسعين"

ضبابه": و الله ياييب..و انا بنت سيف"

سلطان:"كاكاكا...بتبطين..اقول درستي الكتاب كله؟"

ضبابه:"يالسه اراجع من المذكره"

سلطان:"هيه شعليج...جان قلتيلي..بسير اشتري انا بعد"

ضبابه:"خلاص راحت عليك..المكتبات مسكرات الحين..و بعدين يالله فمان الله بيخلص رصيدي"

سلطان:"وووووووه....ووووه....قوم بو رنه انتي؟"

ضبابه:" تتطنز؟...مب منك..:*_*

سلطان:"يالله انزين الحين بدقلج؟"

ضبابه:"شووووو...تحلم..مينون انته...خلنا على المسجات احسن؟"

سلطان:"صابني ما صاب لعقيلي في هوا ميا و غدا تالي...يالله الحين بسويلج؟"

ضبابه:"مينون انته...احمد واعي فالصاله تباه يجتلني؟؟"

سلطان:"لا حوووول وبعدين يعني؟؟ لي متا هالحال؟"

ضبابه:"الله يصبرك ان شالله.."

سلطان: تتطنزين السباااااااااااااااااله"

ضبابه:"انا سباله؟؟!!! اوكي..."

سلطان:" يالله يانتي عاد...امره ما تقهرين المزح...؟"

ضبابه:"خل السباله تنفعك...باي"

سلطان:" ايه ضبوب...بس عاد عن الزعل؟"

ما شي رد

سلطان:" اذا ما رديتي و الله تراني ياييج الين البيت؟؟"

ما شي رد..

سلطان: " طال ليلي من تعليلي من تجافي خلي الغالي"

ما شي رد

سلطان: " اوكي هالاشكال ما تنفع معاهم الا القوه..."

عشر دقايق و انه سلطان موقف سيارته تحت فالبيت...هالريال عنيد اذا حط شي في باله لازم ايسويه..

ضبابه: يالللللله بيفضحني جدام احمد الحين ياااااوووووووووويلي...لازم انزل بسرعه..

بس احمد طلع برا البيت ايشوف منوه ياي فهالساعه...

سلطان: السلام عليكم....

احمد: و عليكم السلااااااااااااااام...شحالك بو مييد؟

سلطان: ايسرك الحال و من صوبك.؟

احمد: تمام و الله...خير ان شالله اشوفك ياي البيت هالوقت شي مستوي؟؟ حد صابه شي؟؟

سلطان و بإرتباك: لا لا كلهم بخير و سهاله محد يشكي باس...بس...بس...امبوني ابغي..ابغي..المذكره..هيه المذكره من عند ضبابه..لاني ما خلصت..

احمد: هيه..قرب انزين داخل بسير اييبها لك؟

سلطان: لا لا جريب..بس مستعيل ابغي ارد عشان الحق اذاكر..

احمد: ما عليه بسير اييبها و بيي...

ضبابه و هي اتطلع راسها من الدريشه: سلطاااان غربلات عدوووك...شوه يابك انته الحين؟

سلطان: مسوده الويه ياي ارااااضيج...سيري سيري داخل لا يشوفج احمد..اعطيه المذكره..

ضبابه و بصوت منخفض: فديت اللي يبا يراضيني..

سلطان: اقطعي....سيري داخل فيها قص رقااااااااااااااااااب هاي...دوااااج عندي ...

دش احمد فجأه: هاه ضبابه اشوفج واعيه؟

ضبابه:أأأأأ,.....أأأأ...تراه عندي امتحان وما خلصته...

احمد و هو ايحط ايده على خصره: و اللي عليه امتحان و ما خلص ايوايج من الدريشه؟؟!!!!

ضبابه: لا لا بس حر....قلت بفج الدريشه..لو...لو..لو شغلت المكيف برقد..

احمد: انزين ما عليه...سلطان اهنيه..يبا مذكره مادري شوه ؟؟

ضبابه: هيه حليله موصني عليها بس نسيت اطرشها له...

احمد: و شدراه انج واعيه؟؟!!!

ضبابه: مادري...ششش...شدراني هاي..هاي امتحانات ثااانويه عاااااامه...يعني يا حياه يا موت..منوه يرقد؟

احمد: شي عندج ماي؟

ضبابه: هيه فالثلاجه داخل انا بطلع المذكره..

اول ما اختفى احمد..قامت ضبابه بسرعه و كتب بيت شعر على المذكره من داخل: حـــــــد مثلي بات مشجنه حلم طيف مر خطافي و اغتنم من وجدي الونه يوم كل بالكرا غافي...اهداء لاحلا عاشق فالعالم..بومييد

احمد: ايه ضبوب...ولا ارقدي ولا ذاكري..و الموبايل للحايه بس..مب للعب..

ضبابه: انزين ليش ما طلعولي موبايل؟

احمد: اشوووووووه؟؟!!!! و شوه لزوم الموبايل الا ثانويه عامه انتي؟؟!!! يالله يالله ما شي لعب ذاكري.

ضبابه: ان شالله...

سلطان بالمسج:" شوه طاح الحطب؟؟؟"

ضبابه:"مب بس الحطب الا السمر(نوع من انواع الشجر) كله طاح"

سلطان:" يالله عيل تصبحين على خير"

ضبابه:"و انته من اهل الخير و الحب و السعاده"

~~~~~~~

بعد مرور فتره و تحديدا يوم الجمعه....اسبوعين قبل العرس..

سلطان: السلاااااااااااااااام عليكم..

البنات: و عليكم السلاااام..

اليده ضبابه: مرحبا مرحبا ببومييد...

سلطان: لمرحب باجي...شحالج يدتيه؟؟

اليده: بخير ما نشكي باس..

سلطان: متا ييتي يدتيه؟

اليده: مساعه...من قالولي انه نتايج المدرسه بتظهر باجر ما رمت ايلس في سويحان..شوه بيلسني اهناك رويحتيه..

سلطان: لا اله الا الله...متا بيعدي باجر على خير...اسميني حفزان(متوتر) على الاخير...

عايشه: ليش متوتر؟؟؟ دامنك واثق من عمرك لا تخاف توكل على الله...انته عطنا رقم جلوسك و بنطرش sms احسن تطلع اسرع...

سلطان: و نعم بالله....لا اله الا الله لو بعدها حرب...الا شهادة ثانويه عامه...و اذا على sms يمكن الف رساله طرشت بس ما شي رد الين الحين

عفرا: لا تيلس اتقول جيه سلطان....انا اروووحي احس بعمريه بمووووت...لا اله الا الله..درسن البنات و ظهرن من الثانويه ولا حاتيناهن...

ضبابه: و بومييد بيي من معاليهن بعد؟؟!!! اصبرن انتي و بيبيض الويه..

سلطان: وين يايدتيه؟؟!!! الله يعديها على خير بس..

ضبابه: انزين كم بتييب انته طماطه وحده؟؟!!! مب مشكله بتخطف..

سلطان: ههههههه...يدتيه لا طماطه ولا تسويق...ماشي ولاّ تنجح ولا مره ما تنجح

ضبابه: حسبي الله عليهم..انزين رمسهم انته يعطونك درجات..

لطيفه: يدتيه هاذيلا امتحانات مب الشونه ايوزعون فلوس

ضبابه: اوووه انتن ما تعرفن..

سلطان: برايكن انا بروح...

عفرا: وين بتسير بويه؟؟؟

سلطان: انا بسير ابات فالعزبه ماروم اتحمل الين باجر...

عفرا: بتسير وبتخلي الضو في فواديه!!! لا لا ايلس ايلس اهنيه

سلطان: اميه...الحين المغرب و النتايج بااااااااااااااااااااجر الصبح...بسير عند الربع بشوفهم شوه حالتهم؟

عايشه: الله يوفقكم..ما استوت ثانويه عامه..حشا الحرب العالميه..

ضبابه: هزركم سالمين ولد غبيشه شوه سوا؟؟؟

سلطان: يدتيه سالمين نجح...ياب 61....

لطيفه: في ذمتك؟؟!!!! و شدراكم؟؟؟

سلطان: ولد عمته ايعرف ناس فالكنترول..يابوله النتيجه...

اليده ضبابه و باستهزااااء: ووووووووووووووووووايه....جان سالمين ولد غبيشه الثور نجح!!! عيل انته بتنجح

سلطان: يدتيه جان سالمين ثور انا عيل(عجل)....امررررررره ما حليت زين...شكلي بجابلهم المدرسين السنه اليايه بعدني...

عفرا و هيه اتفر سلطان بكرتون الكلينكس: بعدك قول جيه؟؟!!!! تباني اموووووت

سلطان: هههههههه.....افا بنت راشد ما يطيع زينج...ان شالله ان شالله بعون الله ناااااجح...و بتسمعوني اغني..جايين منين من السانويه راحين فين للكليه...الناجح يرفع ايده...

عفرا: سر سر عند ربعك يوم هاي رمستك...خلنا نهيّد شوي...

سلطان: ما عرفتلكن...قلتلكن الحقيقه ما عيبتكن...قلتلكن بنجح ما عيبكن...الله يعيني عليكن

~~~~~~~~

لطيفه: هاه ضبابه بشري؟؟؟؟

ضبابه: بموووووووووووووووووت لطفين بموووت...شوه هاذا السايت مال التربيه و التعليم داااون..شوه اسوي؟؟!!!!

لطيفه: عنبوه انتي ما حد من خوانج ايعرف حد من الكنترول اييبلنا النتايج؟؟؟ و ما طرشتي SMS ؟؟

ضبابه: شدراني...رمس عمير واحد من المدرسين اللي يعرفهم و عطاهم رقم جلوسي و رقم جلوس سلطان بس ما حد رد علينا؟؟؟ و المسجات الف مره طرشنا بس ما شي رد الين الحين...

لطيفه: لا حوووووووول....سلطان فالكوفي يالس هو و ربعه على النت...و عويش بعد على النت بس ما شي فايده...اسمع صرّه( اصوات) عدالج؟

ضبابه: لا تتخبرين العايله الكريمه كلها اهنيه...حتا السيافي يالس ايآزرني...

لطيفه: حراااااام عليكم الساعه 2 فليل ليش واعي؟؟؟

ضبابه: اقووووولج محد رااااااقد كلهم يتريون النتيجه....

لطيفه: و فطيم وين؟

ضبابه: فطيم البدله يالسه على الراديو اتقول اذا تم السايت داون الين باجر يمكن يعلنون النتايج على الراديو

لطيفه: الله كريم ان شالله...انتي بتنجحين مضمونه لكن سلطان الله يستر منه...

ضبابه: مادري...اخاف و الله بثنينتنا ضعنا...

لطيفه: فال الله ولا فالج لا تقولين جيه

ضبابه: عيل ليش مريم بنت ييرانا عطوهم النتيجه؟؟؟

لطيفه: شدراج؟

ضبابه: و الله عطوها النتيجه...ما شالله طلعت التاسعه على الدوله...ياربي بموووت انا بمووووت

لطيفه: حوووه الاوائل ايقولولهم قبل بكم يوووم...ما شالله عليها هالبنت التاااااااسعه على الدوله!!!! ما فيها حيله.....برايج ضبابه انا بخليج بسير اصلي ركعتين و بدعي حق هالولد الله ينجحه..و انتي اذا ياج خبر دقيلي انا ما بغلقه تيلفوني...

ضبابه: ايصير خير ولا تنسيني من دعاؤج...فمان الله

لطيفه: الله يحفظج...

++ لا اله الا الله كلنا دشينا ثانويه و طلعنا منها...بس هالسنه غير..كلنا متوترين على الاخير..ضبابه ميه بالميه بتنجح...بس سلطان..مصيبه..و المشكله انه ايقول انه ما بيعيدها مره ثانيه اذا ما نجح..و ابويه حالف عليه انه ما يّوزه ضبابه اذا ما تخرج من الثانويه و دخل الكليه..سرت الحجره فوق صليت ركعتين ويلست ادعي و ادعي في حياتي كلها ما دعيت لعمري لهدرجه..ابا الفرحه فرحتين فرحت العرس و فرحت النجاح..على طاري العرس..فستان العرس معلق على المانيكان..و كل ما دش الغرفه و كل ما اطلع اتذكر اللي بيصير عقب ايام معدوده..معقوله انا بعرس؟؟ معقوله انا بفارج هالبيت؟؟ هالحجره اللي بدت تفضا شوي شوي..هالحجره اللي في كل ركن و كل زاويه..ذكرى حلوه و مره..بترك كل شي و بسير عند احمد..عالم مجهول..الحل الوحيد اني اتناسا هالكابوس..بالتفكير في نتيجه سلطان..نزلت تحت سويتلي عصير..شكلهم كلهم رقدوا و يئسوا من النتيجه...بدق حق سلطان يمكن ياه خبر..ولا موقع التربيه فتح؟؟!!!

لطيفه: مرحبا سلطان؟

سلطان: مرحبتين لحظه...بطلع من الخيمه ما سمعج..

لطيفه: بشرّ...ما شي خبر عن النتايج؟

سلطان: ماشي ....الكوفي بنّد يينا اهنيه في خيمه واحد من الربع ولو اتشوفينا اتقولين ذباب متكاوشين ( متجمعين) على اللابتوب...معظم الشباب ما عندهم خبر و الكنترول ما يردون على الاتصالات..و الموقع ما فتح...و الملحق ما بينزل الين باجر العصر

لطيفه: الله كريم ان شالله...عندي احساس قوي انك بتنجح..

سلطان: وين؟؟!!! اذا ولد عبيد ال....، اللي اشطر واحد فينا و كل سنه نسبته فالثمانين ياب دور ثاني فالعربي؟؟!!!!

لطيفه: في ذمتك؟؟!!! هاذا عيسي اللي كل سنه ايكرمونه؟؟!!!

سلطان: و الله في ذمتيه...عيل انا شوه بسوي..

لطيفه: خل املك فالله..و اذا ياك خبر قولي...

++ لا حووول...صوت سلطان و اخباره ابد ما تبشر بخير..الله يستر بس من نتيجة باجر..و يسهل عليهم..شغلت التلفزين عشان اتسلا شوي و اضيع الوقت..بس ما حسيت بالدنيا و رقدت فالصاله على الكرسي ما قدر اسير داخل ما فيني صبر الين ما عرف النتيجه الله يعين سلطان شوه شعوره؟؟!!..عالساعه خمس و نص الصبح ما حسيت الا بإيد اتهزني بقو!!!!

سلطان و بهمس: لطيفه لطيفه..قومي قومي سيري رقدي داخل...

لطيفه: لا لا ...بتريا النتيجه مالت سلطان اليوم...اليوم بتطلع

سلطان: لاحوووول...لطيفه اقولللللللج سيري رقدي داااخل..ما شي نتايج...غير نتايج العثره

لطيفه اول ما قال سلطان جيه فزيت على طول...

لطيفه: بشر بشر....شوه سويت...طلعتو النتايج

سلطان: سواد ويه...قومي سيري دخلي داخل...

لطيفه: سلطان حرام عليك...قولي شوه..؟؟؟ عرفتو شي.؟؟؟؟

سلطان: و الله و الله و ربي في سماااااه...اني لا بعيدها هالثانويه ولاشي...الله يلعنهم..و الله المدرسه ما بطيحها...و تلتعن الدراسه...طزززززز فيها..و الله ما عيدها...ولا بمتحن دور ثاني

لطيفه: شووووووووو....دور ثاني حلف؟؟؟؟ في ذمتك؟

سلطان: شوي شوي ما ريد امايه تعرف...برايها راقده..الصبح بتدري...

لطيفه: في شوه دور ثاني؟؟

سلطان: علم النفس...

لطيفه: لا اله الا الله...ما عليه هّينه..ماده وحده بتمتحن دور ثاني و بتعديها...

سلطان: و الله ما امتحن...تلتعن من دراسه..شوه بيستوي يعني اذا ما درست...الله ياخذهم ان شالله

لطيفه: و انته اشدراك؟؟!!! يمكن حد غلط فالنتايج...

سلطان: لا لا...بعيني هاي شفته اسمي...سرنا مقر الجريده..و كلمنا واحد انعرفه اهناك..روانا الاسامي اللي بتنزل فالملحق باجر...شفت اسميه و رقم جلووووسيه....آآآآآآه يا لطيفه...بموووت بموووت من الغصه

لطيفه: لا تقول جيه الله بيعوضك...

سلطان: مابا تعويض...يالله شوه شعوريه و ربعي كل واحد ايهني الثاني...بغيت امووت(و هو يمسك راسه بين ايديه)...يالله يوم هم ايسون تيلفونات ايبشرون اهلهم...حسيت بعمريه ضاااايع... دور ثاني؟؟!! من بد كل الناس انا دور ثاني...برايج انا بسير فوق...ولا ريد حد ايدق عليه ولا ايوعيني..خلوني في حالي..

لطيفه: برايك...و الله بيعوضك ان شالله..

++ طلع سلطان حجرته بيرقد و انا احس بقلبي يتقطع عليه و هو ايقولي ان ربعه نجحو وهو لا..دور ثاني؟؟!! حرام اتمنيته ينجح..حاسه بغصه..شكله و هو يشكيلي..شكله و هو منكسر..تعبان و ويهه مسوّد..و الله و الله انه كسر خاطريه..ما حسيت بعمري الا اخش راسي فالكرسي و احط المخده على ويههي و انفجرت اصيح..ماروم و الله انها غصصصصصه..فديته اخويه من بد كل الناس ما يفرح يوم فرحوا ربعه!!!...عالساعه ثمان الصبح...سمعت ازعاج فالصاله..و حشره..و اصوات و الله انهم فايقين ليتني سرت الغرفه عشان اتجنبهم شوه بقولهم الحين؟؟؟؟ اقولهم الحقيقه؟؟!!

ضبابه: قومي لطيفه قومي بنتيه..النتايج بيظهرن الحين؟؟؟ قومي...

لطيفه: صباح الخير يدتيه...

ضبابه: مرحبا بنتيه...قومي شوفي النتايج؟؟

لطيفه: امايه وين؟

ضبابه: امج سارت تمشي فالحوووش بتمووت من الحفووووز...يا بنتيه قومي شوفي النتايج وضحه سارت ويا الدريول تشتري جرايد اتقول الاسامي بينزلن فيها...

عايشه: لا لا يدتيه ما شي ما ينزلن الاسامي الا فالملحق..و الملحق ما ينزل الا الساعه خمس العصر..

ضبابه: و انتي شوه يالسه اتسوين من الصبح على هالتلفزيون ...تربيعبه شرقينا غربينا...

عايشه: يدتيه هاذا مب تلفزيون...هاذا كمبيتور يطلع النتايج

ضبابه: عيل شله ما تظهرينهن سودا الويه...

لطيفه: فتح الموقع؟؟

عايشه: فتح بس الله يغربللللللللللللللللهم الاتصالات قطعوا النت..مالقوا يقطعونها الا اليوم..اتشوفين النحاسه

++قلت في خاطريه احسن عشان ما يعرفون النتيجه..شكهلم وايد متفائلين و مستاااانسين..ما روم اخرب عليهم فرحتهم...

حمد و هو ايدش الصاله: بشروووونيه عن سلطان شوه سوا؟؟؟ ما طلعن النتايج؟

عايشه: لا بويه الين الحين ما شي خبر؟؟؟

حمد: لا اله الا الله...جانا البارحه ما بتنا على طول الليل انفكر بهن...وينه سلطان؟ سيروا وعوه خلوه ايروح المدرسه اييب النتايج

لطيفه: لا لا لا لا .بويه سلطان البارحه مواصل ما فيه ايسير المدرسه برايه بنفتح الموقع الحين و بنشوف النتايج..

و الله العظيم الصاله اتقولون قاعه مؤتمرات...كل واحد يفتي في هالموضوع..اللي ايقول النتايج طلعت..و اللي ايقول لا..و اللي مشغل الراديو يالس يتسمع..يدتيه الله يهديها مشغله الراديو و مطوله عليه..يعني نحن ناقصين توتر!!!و عايشه كل شوي اتجرب وسيله و انا متسانده عالكرسي ببؤس اقولهم و اريحهم؟؟!! ماقدر و الله ماقدر...الين الحين و انا حاسه بغصه..الله يعينك يا سلطان..و اصوات التيلفونات شاله الدنيا...

حمد: حد يرد على التيلفون...وين ايصيح هاذا التيلفون...شلوه ازعجنا؟؟؟

عايشه: ماشي بويه تيلفون البيت انا شابكه عليه...بيكون واحد من الموبايلات...

++ من رنت الموبايل عرفت انه موبايل سلطان..يمكن نساه الصبح اهنيه يوم كان ايكلمني..قمت بسرعه اركض ادوره عشان اشله قبل لا ايرد عليه بويه و يوصله الخبر..و الله ما خليت مكان و انا ادور هالتيلفون الين ما لقيته بسرعه تحت الكرسي..بس الحمدلله وقف..فكه..بس رد يتصل مره ثانيه..شوه هاذا شوه هالغلاسه...خلاص بس ماردينا عليك ليش تتصل مره ثانيه...

حمد: لطيفه بنتيه ردي على التيلفون يمكن حد يايب النتيجه..

رفعت عيني على الشاشه لقيت مكتوب " سيـــــــــــد ساداتي" لا لا ما فيني ارد عليه...يمكن واحد من ربعه و ما فيني احرج نفسي وياه..ولا اريد ابويه ايرد عليه عشان ما يعرف النتيجه ادري مصيرهم ايعرفون بس مب الحين و هم متحمسين خلهم يوم بيملون بنخبرهم...بس التيلفون ابد ما وقف يالله منوه يعني؟؟؟ جيكت على الرقم اكتشفت انه رقم فاطمه؟؟!!!!! و انا الغبيه كيف ما فهمت انه يقصد بسيد ساداتي--> ضبابه؟؟!!! هاذي شوه عندها الحين!!!! اذا عرفت النتايج مستحيل تتصل اهنيه لانها بتعرف انه سلطان ما نجح..شليت الموبايل و طلعت فالصاله اللي براا..

لطيفه: الو...مرحبا ضبابه...

ضبابه: نجحناااااااااااااااااااااااااااااااااااااا.....لطو ووووف...و الله..و الله ما صدق نجحنا..افتكينا خلاص ما شي ثانويه عااامه...خلاص ...خلاص...و انفجرت ضبابه اتصيح...

لطيفه و بكل فتور: و الله.؟؟!!!! مبروووك...

ضبابه: وي...ووووينكم انتو ما تردون من الصبح عل...على التتت..التيلفونات( و شهقات ضبابه ما وقفت)سسس...سس...سلطان وين بباركله؟؟؟

لطيفه: انتي ما دريتي...ضبابه لا تخبرينهم الحين..سلطان ياب دور ثاني...بشري انتي كم يبتي؟؟

ضبابه: شوو؟؟!!!! دور ثاني؟؟؟ و عقب فترة صمت...شوووووو دور ثاني؟؟!!! منوه؟؟؟ سلطان نجح..

لطيفه: لا و الله هو اليوم قالي انه دور ثاني علم نفس

ضبابه: خلي عنج..اتسوين فيه مقلب ادريبج...توني شايفه النتايج فالنت...انا 92,3 و سلطان 72،3 شفتي شفتي القلوب عند بعضها النسب تتشابه

لطيفه و بغيض: ضبابه!!!!! تتطنزين انتي؟؟!!! اقولج هو قاييلي الصبح!!!

ضبابه: و انا اقولج انه فالنت مكتوب تبيني اقرالج...سمعي سمعي...سلطان حمد سلطان سعيد ال....مدرسه خليفه بن زايد الثانويه بنين..منطقه العين التعليميه... رقم الجلوس 2127.. ناجح..النسبه..72،3..تبني اعطيج الدرجات بالتفصيل بعد؟

لطيفه و بصرررريخ:في ذمـــــــــــــــــــــــــــــــــــــــــــتج؟

ضبابه: و راس اهليه و طوايفيه...انه نجح...

ما عرف شوه سويت في هاللحظه...حسيت بعمري اطير اططططير...دخلت عليهم وقفت على الباب بصمت..و اطالع في ويوهم واحد واحد....

عفرا: لا تقولين لا تقولين........امررره من بغيمج(صراخج) عرفناها النتيجه...انا الله و انا ليه راجعون..

اليده ضبابه: اسمعو هاي انتو خلو البنت ترمس...لطوووووف...فالراس ولا فالركـــــــــب؟؟...النتيجه فالراس ولا فالركب؟؟؟؟!!!!

لطيفه و بصياح على دموع على ضحك: يدتيه فالراااااااااااااااااااااااااااااس..فالراس رفع روووسنا...بووويه اثنين و سبعين!!!! نجح نجججججججججججججججح سلطان....و ركضت صوب ابويه الوي عليه و اصيح و ابويه ايقول طول الوقت اللهم لك الحمد اللهم لك الحمد...و امايه و عويش كل وحده ماسكه الثانيه و اتصيح..و يدتيه شفناها تركض صوب الباب من الفرح...وين بتسير العيوز شكلها خرفت!!!! بس لاحظت انه سعيد اخويه واقف على الباب وانه يدتيه راكضه صوبه....

سعيد: مبرووووك نجاح بومييد عليكم...

حمد: الله يبارج فيك يا بويه و عقبال حمد و خالد...منوه بشرك انته؟

سعيد و هو ايحرك ايديه بعدم اكتراث: ادري من يومين انه نجح...كلمت الكنترول..و عطوني النتيجه...و الله يا سلطان ظهر شي منك

عفرا و هيه اتصيح: يااااابويه ليش ما تقولنا يوم عندك خبر من يومين؟؟؟ خليتنا لا نعرف كوعنا من بوعنا

سعيد و بكل برود: اتحرا عندكم خبر...عنبوه انا اشتريت هدية النجاح...وينه سلطان؟؟

اليده ضبابه: شوه خذلته؟؟؟

سعيد: سياره رنج...وينه هوووو؟؟؟

عفرا: خيبه نسينا الولد راااقد ولا حد بشره فدددددددددديت رووووحه....يعلني افدا بوميد لا خليت منه...

عايشه: انا انا انا بسير ابشره..

وضحه: و الله انابسبقج باخذ البشاره...

و ركضن عايشه و وضحه فوق اللي تبشر سلطان بالنتيجه قبل...في حجره سلطان...

عايشه: سسسلطان...قوم قوم يالله قوووووم...قوووم نجحت نجحت...قوووم...

سلطان وايصارخ: سيرن براااااااااااااااااااااا

وضحه: سمعوا انتوووو...خلاص ما شي ثانويه عااامه قوووم يالله..و نقزت وضحا على الشبريه تسحب اللحاف عن سلطان...

سلطان: الله يللللللللللللللللللللللللللللللللللللللعنكن.....اط لعن اطلعن...اطلعن قبل لا تشوفن شي ما شفتنه...

عايشه: سلطان حرام عليك...قوم طلعنا نتيجتك...يبت 72 قوووم قوووم حد ينجح فالثانويه وايتم رااااقد؟؟!!!

وضحه: يالغبي قوم كل الناس تحت فرحااانه..

قام سلطان و مسك كرتون الكلينكس وفرّه على وضحه: براااااا..تقصن عليه انتن؟؟!!!!

عايشه: و الله و ربي في سماه..جانك مب مصدق وايج من الدريشه و بتشوف سياره رنج عسسليه رهههههيبه هديت نجاحك من عند سعيد...

فز سلطان بلا حاسيه صوب الدريشه و اول ما اتأكد من صدق الكلام...

سلطان: منوه قالكن اني نجحت؟

عايشه: ضبابه...شافت اسمك فالنت...

سلطان: قولي والله

عايشه: و الله و الله الف مب مره

سلطان و بصوت عالي: يعلللللللللللللللللللللني افدااها ان شالله..

و طلع سلطان يركض بالوزار و الفانيله تحت و عايشه و وضحا وراه...و شوه استوا تحت؟؟!!! عرس عرس..من شده الفرح..ابويه اول مره تنزل دمعته..وهو ايضم سلطان لصدره...و سعيد ضم سلطان لصدره بعد و باركله...سعيد و هو ايدق على جتف سلطان بايده...

سعيد: مبروووووك بو مييد....رفعت الراس و الله

يدتيه ضبابه و هي ماسكه خصر سلطان و اتصيح و تتلكم في نفس الوقت: يووم قلتلكم بينجح..هاذا بومييد..يعلني افداه و افدا ثره....يوم تحقّ من عينها...بومييد ما يطيع زينه

سلطان و هو ايبوس راس يدتيه: الله يبارك فيكم...و الله العظيم اني مممممممميت من الفرررح..

حمد: الله يسعدك يا بويه....الله يوفجك...رفعت راسنا يعل رايتك دووم بيضا..

سلطان: كله من فضلكم يا بويه...

سعيد: تستاهل تستاااااهل...صبرت و نلت...و هاااااااااااااااااااااذا مفتاح السياره انا وعدتك بالهديه..ويوم ياني الخبر سيده ظهرت الوكاله و سحبتها لك...

سلطان: ما تقصر بو حمد

سعيد: الله يعطيك خيرها و يكفيك شرها..يعلك تبطي حي يا بومييد على هاليوم...

سلطان: امين يا رب...

و طلع سلطان من شدة الفرح برا ايشوف السياره..و طلع و هو ما يتحكم بالكلام اللي يقوله لدرجه انه ما انتبه انه مب لابس الا وزار و فانيله بس..طلع و نحن مشي وراه.,,وين ما ندري بس اللي انعرفه انه درب الفرحه هو اللي يجمعنا...ركب سلطان السياره و زقر علينا...ركّبنا يدتيه ضبابه من جدام..و ركبنا انا و عويش و ووضحا من ورا...اما امايه فخلينها سنترال اترد على التيلفونات و التهاني اللي ما وقفت ساعه..نعرف انه سلطان مب اول واحد ينجح..ولا انه نسبته عاليه..بس كفايه انه قرر انه يدرس مره ثانيه من بعد ما كان معزم انه يتركها..كفايه انه نجح من اول محاوله و هو الله يهديه معروف انه رسيب...دايما طعم نجاح الولد في مجتمعنا ايي بصعوبه وله طعم ثااااااااني!!!!!

عايشه: سلطان وين بنسير؟؟؟

سلطان: و الله مادري وين تبون اتسيرون انتوا؟

ضبابه: ودووونا صوب بيت عمتك بخيته...انسير انسير بنبارك لضبابه...

سلطان: هيه و الله .....ضبابه كم يابت؟

لطيفه: يابت مادري شي و تسعين...اثنين و تسعين يمكن..

سلطان: لا و الله؟؟؟ ماشالله عليها...قالتلي حليلها باييب فالتسعين ما صدقتها...دحيحه البنت

ضبابه: صل على النبي لا تنضل البنت...

سلطان: الله صلي على محمد...بس اريد احسدها..عشان ما تدش الجامعه بس عاد يوزوونا يدتيه رمسي اهليه...شوه بعد نجاح و نجحنا...

ضبابه: امررره فالك طيب بومييد خلاص الريال من ايكمل 16 ايوزوونه لوّل

عايشه: يدتيه شوه 16 سلطان 22 سنه الحين

ضبابه: اسمعو انتو...اسميج الا ما تعرفين...الا عام لوّل طايح سلطان...

سلطان و هو ايبوس ايد يدتيه اللي حاطتنها على مقدمه السياره عشان تتساند: يعلج تبطين حيه يا ام حمد...

ضبابه: الله ايخليكم لاهلكم..و اشوف عيالكم..و عيال بو شهاب و لطيفه

لطيفه: حووووووه وضيح شوه بلاج شي ايعورج ( وضحا كانت حاطه راسها على كرسي السياره يعني طايحه على جدام و ما تتحرك)

وضحا: لا لا ما شي بس احب ريحة السياره اليديده...

سلطان: و العثره جان ما سكرت البنت...

الكل: هههههههههههه

لطيفه: افتكيت سلطان من الاكس فايف...ما تقول الا راكب فوق مصري (حمار) يربعبك...

عايشه: ليش سلطان لفيت على شيشه الجيمي؟؟؟

سلطان: و الله اني ماعرف راسي من كرياسي...راسي دار...

لطيفه: عاش بومييد اخترشت؟؟!!!! دوّر دوّر انسير بيت عموه بنببارك لهم...

مشانا شوي سلطان فالسياره اليديده الين حديقه الطويه و بعدين لفينا صوب بيت عموه..الفرحه اليوم عمت قلوبنا كلنا..ما عرف اذا نحن مب قادرين نمسك عمارنا من الفرح شوه شعور سلطان؟؟!! هم و انزاح..

اول ما نزلنا من السياره...

سلطان: خيبه الا وزار و فانيله يالفضايح...

ضبابه: واابووووووويه....اشعليك الا بيت عمتك هاذا...و بيت حرمتك ان شالله...

سلطان: آآآآآآآآآآآآآآآآآآآآآآآآآآآآآآآمين...

لطيفه: عاجل غير اجل

سلطان: آآآآآآآآآآآآآمين

الكل: ههههههههههه

سلطان: الحقن اشوف سياره الامارت الاعلام اهنيه...شوه ايسووون؟؟!! لا يكون بيصورونها الهاانم ضبابه؟

عايشه: شوه صوووره؟؟!!!! الا اثنين و تسعين هيه؟؟!!!

سلطان: انسير انسير داخل...

دخلنا داخل فوووج..اما بيت عموه فكان فوضا..عمتيه يالسه على التيلفون و كل شوي اتبارك و اتسكر..و ضبابه يالسه اتكلم فالموبايل..و شمسه و عمير يالسين على طرف شمسه منسدحه...و عمير ايرد على الاتصالات حتا عمير ايباركوله!!! اما احمد..فكان شالّ سيف على جتفه و كل شوي ايلاعبه..و حمديه جارتهم يالسه في طرف الصاله..بعد السلامات و التهاني..

سلطان: مبرووووووك ضبابه...شوه هالنسبه الحلوه لو ادريبج بتيبين فالتسعين بوقف هالسنه الين السنه اليايه عشان ما ييلسون ايقارنون!!!!

ضبابه: هههههه...الله يبارك فيك...و مبروك عليك انته...

عمير: خل عنك ياللوتي...الين السنه اليايه بتصبر عن العرس؟؟!!! انته امبونك تدرس و اتصيح دوم يوزوني اختكم يوزوني اياها...

سلطان: هههههههه...يا بوي بنتكم دحيحه انا ماروم عليها...بسير اخذلي وحده غبيه..هاي خلوها عندكم بتقولي عقب اريد ادرس ماجستير و دكتوراه وما دري شو!!!!

احمد: افااااا يا بومييد...امررره لو تبا الحين بنملج...

سلطان: في ذمتك؟؟؟

احمد: هههههههه...خلاص الاسبوع الياي المليج عندنا...زهب اوراقك..و بنخلص في يوم واحد..

سلطان: شوه الراي العروس؟؟

ضبابه و ويهها طماطه: الشور شور خوانيه..

عمير: مشتهيات مستحيات...

شمسه و هي تضرب عمير ريلها على جتفه: ااااااايه...حرام عليك...احرجت البنت...

سلطان: هاي هاي هاي..انتي...انتي خليج في صوب...ويا هالكرشه..بتخبرج انتي حامل بتوم؟؟

عمير و هو ايرش ماي على سلطان: صل عالنبي...اااااايه خل حرمتيه مالك خص فيها...

سلطان: الا شميس تراها لا تنسا اختيه..متا ما بغيت بشلها..

عمير: و منوه بيشاورك انته...يابوي الحرمه في جيبي الحين...

سلطان: لا لا يا بوي هاي شمسه ما تبيعنا برخيص..صح ام سيف ولا؟؟؟

شمسه: الصراحه؟؟؟ ولا....ابا ريلي...

سلطان: افااااااااااااااااا,,,,,,قالوها من تعرس البنت اتأشر على بيت ريلها و اتقول هاذا بيتي و هاذاك بيت ابويه...

شمسه: حرااام عليك جاني البارحه بغيت اربي من الخوف و الهم عليك!!!؟؟؟

سلطان: هههههههه...جان ربيتي و فكيتينا...هههههه....تعالوا اشوف سيارة الامارات للاعلام اهنيه شوه تسوي؟

ضبابه: يايين ايصورون مريم بنت يييرانا تراها طلعت التاسعه على الدوله

سلطان: لا و الله؟؟!!!!! ما شاللله التاسعه!!!! هاي اكيد كانت تتعشا و تتغدا على الكتب...ماشااااااالله..عليها..عليّه انها ما فيها حيله....ما توقعت انه حد من هالحاره بيطلع من الاوائل..

ضبابه: شفتوا عاااااد البنات....ما حد قدناااااااا...

++ بما انه القعده اغلبها شباب..وانا عروس سحبتني عايشه على طرف عشان يونه المفروض المعرس ما يشوفج..وانه بالاساس مفروض ما ايي اهنيه..بس انا ما همنيه..شوه يعني شافني احمد؟؟!! بيغير رايه يعني؟؟!! امبونه هالعرس مب عرس طبيعي..و ما همنيه اذا شافني المعرس قبل العرس ولا لا..يصطفل..و انا بالاساس كلمتين على بعض ما تكلمت معاه..عادي..ليش انضخم الموضوع..هاذاك لو كان المعرس بيموت فيني و بياخذني من خاطره هاذيج الساعه لهم كل الحق انهم يمنعوني من اني اشوفه عشان ايزيد الوله و الترقب منه صوبي...بس عمره هالشي ما كان ولا بيكون!!!!

قمنا انا و عايشه ووضحا و فاطمه و ضبابه و قعدنا على طرف بعيد شوي عشان انسولف و عشان تاخذ ضبابه راحتها فالرد على المكالمات..اما سلطان و احمد فطلعوا وشلوا سيف وياهم..يتحوطون بالسياره..اما عصافير الحب عمير و شمسه مسوين لنا فلم مكسيكي بس مب محذف..يعني كل شوي نلتفت صوبهم نستحي و انلف الصوب الثاني ما شالله وايد ماخذين راحتهم!!! شكلهم من كثر الحب ناسين الدنيا و ما فيها...الله يهنيهم..اما انا فاستلمتني فاطمه...سين جيم تحقيق عن العرس..شوه سويت؟؟شوه خلصت؟؟ وين حجزت.؟؟ الاغراض زاهبه...لدرجه انه الشباب رجعوا و قعدوا فالصاله ونحن ما حسينا..اما عايشه و ضبابه سارن المطبخ عشان ايسون عصير و سندويجات للشبيبه لانه الوقت بعده الضحا..و هم هلكانين يوع..

سلطان: لطوووووووف...

لطيفه: لبيه بومييد

سلطان: لبيتي في منى...تسمعنيه ريلج المتخلف شوه ايقول؟؟

ريلج!!! يالله ما صعبها هالكلمه...كنت لا اراديا بقول منوه ريلي؟؟!! بس الله ستر و مسكت نفسي..قبل لا اعق قنبله...يا جماعه الخير و الله العظيم ما احس بصوبه بأي شي..عالاقل اول كنت احس بصوبه بكره و بغض,,,اما الحين ولا شي ولا شي..حاله حال الكرسي اللي يالس عليه...

لطيفه و بإبتسامه مصطنعه: شوه ايقول؟؟

سلطان: ايقول بيوديج شهر العسل عند قوم سعادة البيه؟؟!!!!

فاطمه: شوووووووو!!!!! احمد الله يهديك ترانا اقنعناك بالنمسا شوه ياك غيرت رايك؟؟؟

شمسه: طالعوا انتو!!!!!! حرقتوا المفاجأه على العروووووس....اووووووه منكم!!!

احمد: و الله اخوج وكالة انباء من انقوله شي احتشر!!!!

سلطان: ياخي اختيه العروس...و دامنك بتدفع دم ألبك على قولتهم فالعرس ودها مكان محترم مودنها مصر..وعععع كلها دخان و سياير!!!!

احمد: وانا ما بوديها وين الزحمه...بنسير شرم الشيخ اسبوع و عقب الغردئه على قولتهم و الاسكندريه و بنرد...

سلطان: طالعو انتو هاذا!!!! يوّن الاسكندريه و شرم الشيخ!!!! يتحرا عمره عبدالحليم!!! اختيه ما تسير الا سويسرا.!!!

احمد: و انته شوه يخصك صدق ناس رزه...شوه رايج انتي لطيفه...

لطيفه وويهي محروق...اووووف منهم..شوخ هالجرأه هاذي ايشاورني وين بسير مع ريلي شهر عسل!!!! صح انا و احمد ماخذين على بعض..و متربين مع بعض بس مب لهدرجه اوكي سلطان اوكي على هالحركات ادري يبا يحرجني بس!!!!

لطيفه: أأأ....مادري انا مالي راي...

سلطان: سمعو انتو !!! صدق عنز من الحين بتخلينه يتحكم بج!!!

اليده ضبابه: يييي هاااا يا سلطان...وش تبا بالريال وحرمته...بترتكز في نصهم انته..خلهم لو يبون ايسيرون الهور برايهم انته شوه ايخصك..و الحرمه تتبع ريلها وين ما يسير...

سلطان: اوف اوف اوف...البوس اتكلم و عااااد شوه بتدافع عن غناة الفواد احمد...يا بوي انا انسحب لا ايحكمون عليه مؤبد..

الكل: ههههههههههههههههههههه...

عايشه: تعال سلطان شوه سالفة الجريده؟؟؟ لطوف اتقول نزلوا اساميكم في الدور الثاني؟؟؟

سلطان: لا لا لا ...نزلن بالغلط..و باجر بينزلون لنا اعتذار فالجريده..بس خمسه شباب..الله يلعنهم مالقوا الا انا ايحطوني فيهم...

احمد: ما تنلام..النحاسه راكبتنك من ساسك لراسك..

سلطان: لا حشا انا مب نحس...مادري منوه النحس فينا...هههههههه

بــــــــــــــــــــــــــــــااااااك

 

بعد اسبوع من الاحداث السابقه....

بدا العد التنازلي للعرس..كل بعد يوم ايزيد شعوري بالخوف و الارتباك..هل انا بالفعل بقدر اعرس؟؟ باخذ احمد على سنة الله و رسوله؟؟!! بكون حرمته في كل الاحوال فالافراح و الاتراح..ام عياله..شريكة حياتي..نصه الثاني؟؟!!! لا لا مب معقول هاذا مجرد كابوس و بقوم منه في اي لحظه..مادري احس بضيقه في صدري..و كل ما يطرولي اسم احمد يخطر على بالي اصيح و اصارخ باعلا صوت اني ماباه..بدت دفاعاتي و خططيه تنهار تدريجيا..من الاسبوع اللي فات خلاص خلصنا كل الترتيبات اللي تخص العنايه بي انا..و بدينا انجيك على الزهاب و ترتيبه..البطايق..القاعه..الكوشه..الاضاءه و الي ما هنالك...

كشميرا: لتتتتتتتتتتتتتتتتتتتتتتتيفا....اروووووووسا....هابي بتي اروووس يالله سولتان يريد انتي تحت

لطيفه: وين ؟

كشميرا: في مناك تحاااااات...

لطيفه: خلاص ما عليه طلعي...انا بلف شعريه و بينزل تحت..

كنت مسويه حمام زيت لشعريه و ما عندي فرصه اني اغسله لاني اعرف سلطان اذا قال شي لازم يتنفذ فالحال، بس اللي لاحظته انه كشميرا ما طلعت بالعكس قعدت فالغرفه و بدت تمشي صوبي..شوه بلاها؟؟

لطيفه: كشميرا شوه فيه؟؟؟ يريد شي انتي؟

كشميرا:أجججججججججججججججججيه...لتيفا انا هبّي انتي فااااااااااااااااااااااجد...( و ضمتني فجأه و هي اتصيح و اتصيح بصراحه ما عرفت شوه اسوي) انتي بنت تمام...انتي روووح بعدين بيت ما في حلو..انتي كل يوم زنجال..كلش سوي ترتيب..ايجي عيد انتي سوي ترتيب سوي اكل..ازا ماماه مافي داكل بيت انتي سيم سيم ماماه...

لطيفه و الله العظيم خنقتني العبره ما عرفت شوه اقول: خلاص خلاص كشميرا...انتي قول ان شالله انا يجي فرحان..قولي يا رب

كشميرا: يااااارب...انتي روح بيت ماماه بكيته...شيل انا سيم سيم انتي...انا مايريد نوم منيه ازا انتي ما في موجود...انا اسبوع ما يقدر نوم ما يقدر اكل كللللش فكر فكر كيف انتي بيروح...

لطيفه: هههههههه...لازم بنت سوي عروس صح ولا لا ؟؟

كشميرا: مألوم....بس انا يجي مني امارات انتي صغير فاااجد...اول انتي صغير انتي فاااجد مشكله بس انتي تمام...انتي يجي عرووووس حلووووو( و هي تمسح على شعريه) انتي تمام ارباب احمد تمام...

لطيفه و انا مب قادره اقول اي كلمه زياده و بنفجر: خلاص خلاص..روحي روحي قولي حق سلطان انا بغسل شعر بعدين يجي..

اول ما طلعت نزلت دمعتيه..الم..و حزن على فراق هالبيت..عمري ما تصورت صعوبه هاللحظه..ما اعتقد انه البنت حتا لو كانت فرحانه بالعرس اتكون فرحانه بفراق ابسط الناس و اقربهم في حياتها..الله يعدي هالاسبوع على خير...

نزلت تحت لقيت سلطان...تحت و محتشر و قابض عباس الهندي من حلجه..لا اله الا الله شوه مستوي بعد؟؟

لطيفه: هاه..هاه سلطان عيّن خير شياك على عباااااس...

سلطان: الهههههههههههرم من متا اقووووله السياره غسلها غسلها...السبال دووم ايغايض..

عباس و هو اينازع: انا كل ثنين يوم انا سوي غسل بس انا ما يقدر سوي غسل زياده

سلطان: جب يالهررررررم...تعلي حسّك عليه بعد...يا مال الشوزن بين عيونك...

لطيفه: الله يهديك يا سلطان خلاص فجه فجه ما تعرف انته عباس و نحاسته..

سلطان: هيه اترووووم اتغسل سيارة خليفه كل يوم؟؟!!!!

عباس: كليفا ولد مال انا...انا يجي امارات كليفا جيكو..انا هبي كليفا انتي زيااااده جنجال..

سلطان و هو رافع ايده بين عيون عباس يبا يعطيه بكس: حبتك القراااااده...

لطيفه: و رفجه و رفجه انك اتفجه خلااااص بس..خله...بس سللللطان...شوه تباني انته...

سلطان: عووووذ بالله من بليس...انته بليس في معلوم بليس ولا لا ؟؟؟

عباس:مألووووم بليز...بليز انجلش..يعني تمام...

لطيفه: ههههههههههههههههه....روح روح...شوف ماماه عفرا شوه ايريد...

سلطان: الله يغربله السبال مادري ليش بويه متعلق بهالاشكال قلناله خلنا نيبب واحد غيره ما طاع

لطيفه: يا سلطان هاذا عندنا من قبل لا ايطيح خليفه خويه..خلّه في حاله من يوم انته ياهل و انته اتلاسن وياه...

سلطان: فقدته..

لطيفه: يالله انزين شوه تباني؟

سلطان: تعالي ويايه شوي...

سرنا الين سياره سلطان و فتح لي الدبه عشان ايرويني شي..

سلطان: شوه رايج؟

لطيفه: ياااااااااااااااااااااااااااااااي....لمنوه هاذا البوكس؟

سلطان: للشيخه ضبابه بمناسبه النجاح...

كان بوكس بنفسجي تقريبا متر في متر..كله شرايط زهريه فيه هدايا بعضها مغلف و الثاني مرتب بشكل رهيب..

لطيفه: غربلات عدوووووووك....محلااااااااااااااااااتهن...شوه هاذا شنط و قمصان احلا عن زهابي..

سلطان: ههههههههه...تعرفين ما عرفت شوه اخذلها قلت اكيد لانها بنت كل الهدايا بيكونن ذهب وجيه قلت باخذلها شي غريب تعرفين عشان الجامعه و جيه؟؟؟ الا بتخبرج في شوه سجلت هيه؟

لطيفه: مادري قدمت اوراقها في جامعه بوظبي بس من درت انك بتسجل فالتقنيه يمكن تسحب اوراقها و تسجل هيه بعد فالتقنيه...

سلطان: لاه..اوكي اوكي قوليلي شوه راااايج؟ صراحه صراحه؟

لطيفه: صراااااااحه..توب توب توب...و شدراك انته بالماركات...حسبي الله على بليسك كلهن مااااركات..

سلطان: سرت عند عويش و خليتها تكتبلي اسماء الماركات و رحت برجمان اليوم...و خذتلها..

لطيفه: و شمعنا عووووويش؟؟؟ ليش ما تقولي انا..

سلطان: عاااد انتي الله يهديج...الا قوم زارا...و مانجو..كان كان..يا بوي شوفي ذووق عويش انتي كريستيان ديور..و فندي..و بوجاتي

لطيفه و هي تضرب سلطان على جتفه: اتطنز اتنطنز انته!!! عنبوه زهاب هاذا مب هديه نجاح..طالعوا انتو شنطه كرستيان ديور هاتها هاتها هاي انا باخذها حقي ما تباها ضبابه..

سلطان: روحي لاه...دافع فيها دم ألبي...ست الاف..حشا لو بعدها بكره ولا قعود!!!!

لطيفه: هههههههههه....في ذمتك بكم كلفك هالبوكس و اللي فيه؟؟؟

سلطان: بيني وبينج؟؟؟ 12 الف و اربعميه و ثلاثين كااااااااااااااش دااااااااااون...رصيدي الحين مفضي..عالحديده!!!!

لطيفه: لا حوووووووووووووووووووول...و من الحب ماقتل

سلطان: شوه نسوي بعد...تعالي تعالي وين بتسيرين؟

لطيفه: شوه بعد؟؟!!! لا تقولي خذتلها جواتي !!!

سلطان: هههههه...لا لا تعالي...حتا العروس خذنالها هديه...

لطيفه: لا لا لا تكلف على عمرك..

سلطان: خلاص الحين عاد كلفت شوه اسوي...شوفي عاد انتي عروس يعني اكيد ما خليتي شي ما شتريتيه..فقلت شوه باخذلج...خذتلج عطوووور عربيه اعرفج اتمووتين على دهن العوود و المعتق..(وطلع سلطان بوكس هالمره اصغر بس كله عطوور عربيه رهيبه) شوفي عشان كل ما تعطرين حق ريلج اتقوليله هاذيلا من عندي...ذليه ذل!!!!

لطيفه: هههههههههه ( بصراحه شوه اليوم الكل متفق عليه عشان ايصيحني!!!! ما قدرت اذا حطيت عيني في عينه يمكن اسوي مناحه..كل اللي قدرت عليه...ضميته عالسريع..و حبيته على طرف رقبته و ركضت داخل)...

عدا هاليوم بشكل روتيني المشكله اني ما شوف حد ما اقدر ألمح حد عشان اسولف وياه...امايه و عمتيه بختيه ماخذات زام فالسوق كل يوم من يصبحن الين يمسن ما نشوفهن..شمسه اختيه خلاص عطيناها تايم اوت لانها خلاص شكلها موّصله و ما تطلع من الغرفه..خليفه اخويه و سعيد فالدوامات اللي في بوظبي و اللي في دبي..اما سلطان اخويه و ابويه...فهم اربع و عشرين ساعه سايرين رادين القاعه ايجيكون على ترتيبات العرس.. عويش مشغوله عالاخير لانه الحرمات سايرات رادت لبيتنا..ما عندي حد ايونسني غير ووضحا..اللي كانت تساعدني في ترتيب الشنط قبل اللحظات الاخيره..

اما يوم الاحد..فكان اصعب ايام حياتي كلها..في هاليوم اتجمعوا كل خواني سعيد و خليفه سلطان..عايشه و ووضحا و امايه عفرا وحتا ابويه في غرفتيه...قعدوا ايسولفون و يتكلمون معايه في كل المواضيع الا موضوع العرس..هاذا اليوم حسيت بالفعل اني مفارقه...خلاص..بروووح...برووح ولابرجع مره ثانيه لهالبيت مره ثانيه..و اذا رجعت له برد له ضيفه مب بنت..بنتهم..اللي حضنوني في يوم من الايام يوم كنت يتيمه...مب يتيمه ام...يتيمه حنان و عايله..حياتي كلها ما حسيت انهم اخواني من الابو بس..و حياتي كلها ما حسيت انه امايه عفرا امايه بالاسم بس..و حياتي كلها ما بنسا قربهم مني..حبهم لي..ضمتهم لي في حضنهم يوم ما كان عندي حضن الجأله غير ابويه..!!!

 

++أذن المغرب و بدت حالت الهستيريا و الطوارئ اتعم البيت...باجر الملجه..باجر بكون رسميا حرم احمد بن سيف بن عمير ال....، باجر رسميا بنزف للشخص اللي ما عرف شوه يعنيلي..هل اني اكرهه؟؟!! ابغضه؟؟!! او انه هالشي الصغير اللي يفز في شرايين قلبي كل ما شفته شعله من اللي ايسمونه الحب؟؟!!! معقوله اني لا زلت احبه عقب كل اللي سواه فيني!!! مستحيل..بس انا متأكده من ربي اللي خلقني و ما نساني..من ربي اللي عطاني هالعايله اللي لو بلف الكون كله ما بلقا مثل سعيد اخويه اللي كان دوم سند لي...شمسه اختيه اللي حضنتني جنها اميه..و اهتمت فيني..مثل خليفه اخويه..اللي ما كان يهون عليه ايشوف دمعه من دموعي..سلطان اخويه اللي عمري ما حسيت انه خويه..لكن توأميه..اللي عاش ويايه الحلوه و المره..عايشه اختيه..اللي كانت بعيده الجسم...و قريبه بالروح..بعايشه اللي كانت اتحسسني اني شي وايد كبير في حياتها...ولا وضحا اختيه اللي تشاركنا حتا الشبريه معاها..وضحا اللي كانت فالليل كل يوم قبل لا نرقد..اتقولي...لطيفه..صح انتي وايد تتحكمين فيني و ما تخيلني اسوي شي...بس انتي اكثر وحده احبها من خواتي!!!! الله يعيني على فرقاهم....

دعيت الله عقب صلاة المغرب انه ايصبرني على فراقهم..ايصبرني على مصيري المجهول..و انه يفتح ابواب رحمته لي..و ايرغبني في هالاحمد..لانه خلاص وصلت لنقطة اللاعوده!!!! تعتقدون اني اقدر اتراجع عن القرار الحين؟؟!!!!

دشت عليه يدتيه ضبابه في هاللحظه و هي شاله معاها كيس صغير...

اليده ضبابه: مررررررحبا....شمسيتي العروووووس؟

لطيفه...ركضت صوبها و مسكت لها كرسي عشان تيلس و بستها على راسها: بنعمه...ليش يدتيه ركبتي لين فوق جان قلتيلي و انا بنزلج الين تحت...

اليده ضبابه و هي تقرص لطيفه في اذنها: واااااابووووويه....عنبوه يا لطيفه...انتي عروس..يابنتيه انا ربيتج..من يوووووم انتي ام سنتين...ربيناج انا و يدج الله يرحمه..عرفتج و عرفت طباعج من يوم انتي ياهل...يا بنتيه انتي مب بنت ولديه انتي بنتي انا...و الله و الله يشهد انه غلاج انتي ما حد يساويه من بنات حمد ولا مبارك ولا بخيته...وواجب عليه اني اشوفج و اشوف جان تبين شي؟؟؟

لطيفه: الله يطول بعمرج...يعلنننني هب بلااااااااااااااااااج يا ام حمد...و الحمدلله طوّل عمار بويه و خوانيه ماقصروا عليه بشي...

ضبابه: ادري يا بنتيه انهم ما بيقصرون بشي...بس تراه باجر بيملجون..و قلت سبحان الله اشوفهم ساهين عنج...

لطيفه: ادري يا يدتيه...

ضبابه: ما شوفج مستانسه....و انا شفتج اتصيحين يا بنتيه...و يوم رمست سعيد خوج قالي انج متهّوبه(خايفه) من العرس...لكن انا اقول انج امرررره مب طبيعيه...يا بنتيه شي بلاج..شي في خاطرج؟؟!! ارمسي و تراه و الله اللي بتقولين انه ما يعدي باب هالحجره...

لطيفه: و الله يا يدتيه انه مابلاني شي...

قامت ضبابه و يلست عدالي على الكرسي و ضمتني خمس دقايق..اطول خمس دقايق في حياتي..ما كنت اسمع فيهن شي خير نصخها(صوت تنفسها) اللي كان عالي شوي بحكم انها انسانه كبيره..و صوت عقارب الساعه اللي كانت تفصلني عن اليوم اللي بنكتب رسميا زوجه احمد...بصراحه انا اعرف شوه تعنيلي يدتيه و هي اكثر وحده ممكن انها تكتم سري...مسكت ايدينها و بستهن وحده و را الثانيه و انا دموعي سكايب..انهار من حسره..و حزن..و ضياع..كنت بالفعل ضاااااااااااااااايعه....و ما عرف متا بشوف النور...

ضبابه: هـــــــــــــــــــــــــــــــــــــــــيه....و الله اني انكرت انه شي فيج يا بنتيه...يا بنتيه كل بنت في هاليوم تبا امها عندها..و انتي الله ما كتب لامج اتكون اليوم عندج بس انا انا..و هي اتأشر على قلبها...انا امج..و يدتج..و طوايفج كلهم...يا بنتيه لا تصيحين...بس يا بنتيه..تراني ما قهر..

لطيفه: يددد...يدتيه...يدتيه...مااااباااااا.....مااابااااا عرّس....مابا فديت رووووحج...شليني سويحان...ماريد اعيش اهنيه....شليني اهناك..و خليني اعيش وياج...مابا...الله يخليج..يدتيه..لا تخليني اعرس مابا..

سكتت اليده ضبابه عشر دقايق..خلتني احتار بشوه اتفكر..كانت موخيه راسها..بس فالاخير استسلمت و اتكلمت: ليش يا بنتيه...هاذا ولد عمتج من لحمج و دمج..و عقب ما تاخذينه بيساوي ناظر عيونج..ولا بتساويبه حد في هالدنيا...يا بنتيه احمد رياااااااااااااااااااااااااااااااااال...و الله في سماه و يشهد اني اتمنيت انج اتكونين انتي من نصيبه...لاني ماباه ياخذ اي وحده...ماحد يستاهله غيرج يا لطيفه...

++اهنيه عرفت انه كل للي فهالكون ما بيفهمون انا حقران احمد لي ايعذبني و الكل مقتنع انه راضي انه امايه بكستانيه ويوم اقولهم السبب ايقولون لا مستحيل لو احمد حاط في باله انج امج باكستانيه فهو بالاساس بيعترض..!!!!...و نظره الخوف اللي في عين يدتيه ازمتني اكثر فاستسلمت و دورت اي سبب ثاني عشان ازيل الشك من بالها...

لطيفه: يدتيه يدتيه احمد مغازلجي و راعي بنات...شقايل باخذ واحد ما خلا بنت ما رمسها!!!! ماباه يدتيه..

ضبابه: ههههههههههههههه...مستحرصه ( تغارين) عليه ثرج انتي؟؟!!!!ههههههههه....يا بنتيه برايه خليه يعيّب و يغازل...لكن من ياخذج خلاف انتي بتسدينه عنهن كلهن..يابنتيه انتي مب رخيصه..انتي بنت ما شالله فيج من كل شي من الزين و الخلق و المذهب..بيخليج و بيسير يربع صوبهن هاذيلا مسودات الويه.؟؟!! و انتي شوه دراج انه يغازل؟؟!!!

لطيفه: يدتيه...شله ما عرس الين الحين...ريال عمره سبع و عشرين سنه!!!!!

ضبابه: ههههههههههههههههههههه...يا بنتيه ايقولولج من تعووووزب دوووم خذ خيار القووووووم...و انتي من خيار القوم..خلي عنج هالرمسات اللي مالها معني..و فتحت يدتيه الكيس اللي عندها..و طلعت غرشه عطر صغيره...يا بنتيه اندوج هاذي مخمريه..اروووووحي مسويتنها...اليوم فزعت الين دبي وسرت عند فولاذ و اشتريت لج هالدهن العوووود...يالله يا ريحته..يوم ايعديج يا بنتيه الصبح كل يوم حطي شويه تحت ذنج...بتغدي ريحتج اتهدن(تفوح)...و هاذيلا الكواشي (حلق) ماليلي انا يوم انا عروس يابهن يدج الله يرحمه ليه....و ما عطيتهن حد...ميودتنهن لج انتي...يوم اليمعه لبسي هاذاك الثوب الميزع..ولا عقولتهم مغربي..و حطيهن...تراهن هاذيلا مب رخاص..هاذيلا ذهب البحرين...

لطيفه و انا فيني الضحكه على الصياح: ان شالله...

ضبابه:برايج يا بنتيه انا بخليج..بس بغيت اوصيج..لا تحطين و تلويصين من هالصبغ على ويهج..اووووووصيج وصيه...هب تحطين شراتهن هاذيلا العرّس اللي تقولين حد لاطمنهن على عيونهن..غاديات سود ما تعرفين يفونها(جفونها) من عيونها...

لطيفه: هههههههههههههه...انا شالله يا يدتيه...

++ طلعت يدتيه..طلعت و خلتني في حاله احسن من قبل..ريحتني..هدتني..و خلتني اقتنع و ارضا بالامر الواقع...بعد شوي يتني مالت الصالون...و اشتغلت فيني بعض الترتيبات للعرس..و ما خلصت الين قبل نص الليل...اول ما طلعت و خلصت اتسبحت و رقدت كنت حاسه اني اذا يلست بنهار من التفكير فكان النوم هو الخيار الوحيد..قمت عالساعه عشر الصبح..صباح الملجه..يوم الاثنين..قمت عالحشره و الاصوات و الازعاج و الهرنات...سحبت الكرسي و يلست عدال الدريشه..اليوم الملجه بس و بنغدي ييرانا..و احتمال يتجمعن اليوم البنات عندي من العصر الين صلاه العشا..عزمت فاطمه ربيعاتنا و ربعنا اللي فالجامعه..بنات ييرانا و اصدقاء الطفوله..عشان يغيرون جو عليه اليوم...اشوف امايه عفرا تركض يمين شمال..و ابويه قابض الموبايل و محتشر...و يدتيه فارشه فالحوش و ميلسه خالد و حمد عيال سعيد اخويه عندها..و يالسه تامر و تنهي..و سلطان اخويه يالس ايأمر على الهنود..اما خليفه اخويه فكان ايجيك على الميالس..

دخلت عليه عايشه اختيه...

عايشه: صباح الخير صبااح النور..يا احلا عروس..و احلا اخت...

لطيفه: ههههههههه...صباح الخير...

عايشه: شوه المعنويات...اليوم انتي رسميا حرم احمد ال....

لطيفه: ماشي الحال...

عايشه : يالله زهبي عمرج..المليج بيي عقب نص ساعه...و البيت متروس من الحريم..انزلي من صاله خليفه و سلطان سيده على الصاله الزجاجيه لانه الميالس مب فاضيه..

لطيفه: تيكي...

عايشه: يالله بخليج لاني خليت الحرمات رواحهن..انا ابا اعرف شوه يايبنهن..مب عرس الا ملجه..و انا اتدبست بهن..

لطيفه: ما عليه...

طلعت عايشه..قمت سشورت شعريه..بدلت لبسي..و لبست بعد تردد طويل مغربيه بسيطه وايد..لبست شيله سودا..اتجحلت..وانا ايدي ترتجف..اتعطرت و يلست..خلاص عرفت انه خلاص..كل شي بدا يدخل في دوامه سريعه..و ماشي مجال انه يتوقف..بعد نص ساعه دخلت وضحا اختيه...

وضحا: الف الصلاة ة السلااااااااااام عليك يا حبيب الله محماااااااااااااااااااااد..كلككككللووولوووولووووش. ..يا معيريس عين الله...اووووه نسيت الاغنيه و انا من البارحه يالسه اتحفظها...

لطيفه: ههههههههه...ايسدنيه اني صبحت على صوتج...

وضحا: يالله بويه ايقولج نزلي تحت يبووونج....لطفين

لطيفه: هلا الوضيحي

وضحا: يوم تعرسين...تعالي باتي عندنا اهنيه...لاني لاني...ماروم ارقد على هالشبريه العوده برووحي..اتعودت عليج..

لطيفه: اممممم..أأأأ...ان شالله..

وضحا: لطفين...انا..تراني والله اني احبج...لا تزعلين يوم كنت اعصبج...مادري

لطيفه..ضميت وضحا و بستها على كل خد: الوضيحي...انا ازعل عليج انتي؟؟!!! مستحيل..حتا انا احبج

وضحا: يالله عيل..انسير تحت

لطيفه: يالله

++ طلعت من الغرفه...و اشوف عمري امشي في نفق اسود..اترقب الضوء في نهايته بفارغ الصبر..كنت احس بنفسي مادري؟؟!!! هل انا بالاساس كنت احس؟؟!! كنت ماسكه ايد وضحا و هي اللي مسكتني وودتني الين الصاله..ولا انا مستحيل اوصل..شكلي حتا بيتنا نسيته!!! هل هو الخوف؟؟!!! ولا الاثاره..ولا الغصه؟؟!!

دشيت الصاله..لفت عيوني في اطرافها..اول ماشفت سعيد اخويه يالس على طرف..بدن ريولي يرتجفن..و احس انه جمسي تلفه البروده..جني محمومه..دايخه..و خفت اطيح..فقمت و يلست على اقرب كرسي..ياني سعيد اخويه..

سعيد: شحالج العروس؟

لطيفه: هاه؟؟!! مادري بخير بخير..

سعيد: ههههههه...لطيفه...من خاطرج موافقه على هالشي؟؟!!!

لطيفه: مادري..

سعيد: شوه ماتدرين..؟؟!!! اذا تبين انا بزقر المليج..اذا ما تبين من الحين قوليلنا و ما في داعي للفضايح

لطيفه: ازقر المليج..

سعيد: من خاطرج...

لطيفه: سعيد ارجووك...ازقر المليج..

طلع سعيد مدة زمنيه ما عرفت احددها فقدت الاحساس بالمكان...بالزمن..باللي حواليه..فجأه شفت سعيد اخويه ايدش..و معاه دفتر عريض..و القلم في ايده الثانيه..يا و قعد عدالي تماما..بعد فتره..دش ابويه..و اللي ما تقرب مني ولا كلمني..ولا اي شي..كأنه صنم..بس عيونه كانن مركزات عليه انا..عيونه يطلع منها كلااام وايد..كلام ايعذب..فرح..فخر..على حزن بسيط لفراقي..كان واااقف بعيد..و حاط طرف السفره في ثمه..

سعيد: لطيفه المليج برا..واقف ورا الباب..اتقربي من الباب..بيسألج..و بعدين ردّي وقعي..اوكي؟

لطيفه: ان شالله...

++ قمت اتقربت من الباب الزجاجي لمحت طيف ريال شيبه مطوع..لحيته طويله..شكله اليف..و حبوب..زال الخوف عني شوي..انا اقدر اشوف بحكم انه الزجاج عاكس في حين هو ما يقدر يلمح الا طيفي..

لطيفه: السلام عليكم..

الميلج: و عليكم السلام و رحمة الله و بركاته...احم..كح...يا بنتي ما اسمك الكامل؟

لطيفه: أأأأأ....أنا؟؟؟

طاحت عيني على عيني ابويه في هاللحظه اللي عطول نزل راسه كأنه مذنب..ألتفت صوب سعيد..اللي ضحك و قالي : هيه انتي عيل منوه؟؟

لطيفه: انا انا ...اسمي لطيفه حمد سلطان سعيد ال.....

المليج: بارك الله فيكي يا بنتي...يا بنتي..انا اليوم بكتب عقد شرعي يزوجكي من السيد احمد سيف عمير ال...تقبلين بهاذا لشخص زوج لكي؟؟

لطيفه...حسيت بضغط يلفني من كل الجوانب..شعر جسمي وقف..روحي شارفت على الطلوع..ما حبيت اثير الشك فالمليج..فقلت على طول: نعم...اقبل..

المليج: الله يوفقكم يا بنتي..وقعي فالمكان المطلوب..و الله يتتم على خير..

++ رجعت..رجعت بعد ما نطقت بهالكلمه...اشرلي سعيد وين لازم اوقع..طاحت عيني على العقد و بالتحديد على اسم احمد..و قعت و انا اتمنى في هاذيج اللحظه اني اصااارخ بأعلا صوتي..رفعت عيني صوب سعيد..الي مسكني و باسني على يبهتيه..و باركلي..رفعت عيني صوب بويه..اللي مازال حاط طرف السفره في ثمه و نزلت دمعه من عينه..قمت من الكرسي بتحرك..فطلع ابويه بسرعه من الغرفه..اتفهم مشاعره..فراقه لبنته اكيد مب هيّن..وانا متأكده من منزلتيه في قلب ابويه..و اعرف غلاتي زين!!!!ّ طلعت رحت الصاله الداخليه عشان اطلع سيده فوق غرفتيه..لمحت ويوه مألوفه.شمسه..عايشه..وضحا..امايه..و مادري منوه سلمّن عليه و باركلي...وانا ما عرف شوه رديت عليهن..ركضت الغرفه سكرت على عمري الباب..رحت الحمام و شغلت الماي فالشَََوَر على اخر درجه و يلست على ارضيه الحمام و صحت صياح من الخاطر..!!!

مرت فتره بعد الظهر و ما حسيتبها لاني رقدت..سمعت دق على الباب..قمت و فتحته..لقيت عايشه اختيه شاله صينيه..عليها اكل منوع..دخلت و سكرت الباب...

عايشه: هلا لطفين شوه حالج الحين؟؟

لطيفه: شوه حالها العروس بعد..اكيد فرحانه..

عايشه: الله يعلم..

لطيفه: ليش اتقولين هالكلام..

عايشه: ماشي ماشي..يالله لطوف عاد ما خليت لج شي ما يبته..عصيد..هريس..جباب..لقيمات..بلاليط..و كيك و عصير..

لطيفه: مالي نفس..

عايشه: لطيفه فديت روحج عشان خاطريه..بعدين البنات كلهن اهنيه..شوه ما بتنزلين؟

لطيفه: لاه..؟؟ منوه يا؟؟

عايشه: لا تتخبرين...ما تم حد من معارفنا ما يا...حتا ربايعج اللي فالجامعه..يمنوه و سلامه..و شلة شما مبارك..و كلهن...و احيد ضبابه و فاطمه يستقبلن يزاهن الله خير قايمات بالواجب..

لطيفه: يالله ما عليه...الحين بنزل..

عايشه: لا تنسين تلبسين البنجابي..

لطيفه: لازم يعني؟..

عايشه: بصراحه مب لازم اذا ما تبين...بس تراه كلنا لبسنا..

++ ما شالله عليهن الشله..كانن متفقات انهن عايشه و فاطمه و ضبابه ووضحا..يلبسن بنجابي ( لبس الهنود و الباكستانيين)..من قطعين قميص شوي طويل يوصل للركب وتحته بنطلون من نفس الخامه..كلهن بيلبسن نفس اللون احمرمطرز بشغل ذهبي..اما العروس انا..فنفس اللبس تقريبا بس فيه زياده شغل و لونه ذهبي..فجيت شعريه..بس رفعت شوي منه فوق الاذن مع القصه ( الغره) و نزلت خصلتين بس..حطيت اي شادو بني..عاد العيون خضر..طالعه صدق باكستانيه..حطيت جلوس وردي..اتعطرت...و لبست شغاب(حلق) طويل..لبست شيله خفيفه..و صندل بس كعب..و قبل لا انزل تحت..سمعت حد ايصارخ باسمي من الدريشه..منوه؟؟؟

وايجت من الدريشه شفت سلطان اخوويه و معاه كمن عامل...

سلطان: لطوووووووووف...excuse me SeniorEtta put your scarf on ur face plz

لطيفه: هههههه...تيكيتا...

سلطان: لطفين...الحين في واحد هندي فوق راسج تقريبا بيركب الليتات..كيف تبين شكلهن مربعات ولا دوائر...

لطيفه: شوه الفرق يعني...

سلطان: تراه حطينا على الحوش كامل..و عالبيت عالقرميد..بس بغينا حجرة العروس ايكون عليها واااايد..و مميزه...فهمتي؟

لطيفه: هيه...

سلطان: كيف تبين الحين؟

لطيفه: مابا على حجرتيه

سلطان: ليش؟؟؟؟

لطيفه: عشان شنطة الذهب و زهابي اهنيه فالحجره و ان دروا ان هاي حجرتيه بيسرقونها...

سلطان: هههههههههههههههههههههه

لطيفه: ههههههه....عكيفك واثقه من ذوقك سينيور..

سلطان: خلاص يالله انزلي اباج اتشوفين شكل البيت..

البيت بصراحه كان شي ايخبل..فيه باقات ورود موزعات على المداخل..سمعت انه عويش متعبله بالورود بس ما توقعت لهدرجه..توقعت فالقاعه بس..سلال الحلاوه موزعه في كل مكان اول ما شفت الباتشي..حسيت بغصه..احمد ايموت فالباتشي..اول ما نزلت لمحت خليفه اخويه محبوس..و يبا يطلع..

لطيفه: مرحبا خليفه

خليفه: مرحبااااااااااااا العروووس...اوش اوش اوش..شوه هالحلاه..

لطيفه: عيونك الحلوه...

خليفه:تعالي البيت ممزور حريم و انا محبوس ابا اطلع..

لطيفه: هههههه..انزين ليش ما طلعت من صالتكم؟

خليفه: اووووه...هناك الحريم ينزلن...سويلي درب؟

لطيفه: ان شالله..

خليفه: لطيفه لطيفه...تعالي شوي..

خليفه و هو يدخل ايده في مخباه و ايطلع باكيت صغير: شوفي عاااااد...احم احم..تراه المعاش على قد الحال و محسوبج خلفلف ( ضحكت و خليفه يلفظ هالاسم بهالطريقه لاني يوم كنت صغيره اذا عصبت على خليفه ازقره جذيه)...ما لحق ايجمع شي..و كنت الحين بطلع اسير اغلفلج الهديه...بس دامج مب لابسه شي في حلجج..اعتقد انه الحين وقتها...و طلع سلسله صغيره فيها حرفين L , A

لطيفه: الله...ايجنن..ليش كلفت على عمرك..

خليفه: تراه صح صغير بس تراه و الله اني ماخذنه من الفردان يعني مش بو عبود..

لطيفه: ههههههه...لو بتيبليه تيل وبتقولي لبسيهن و الله يلبسهن..

خليفه: يالله انا بخليج بسير اشوف كيف ركبوا لليتات..و يمكن انسير انا و سلطان فالبيك اب انوزع العشا..

لطيفه: ليش ما غدوا الرياييل اليوم..

خليفه: هيه بس الكونتسيه عفرا...حد من الحريم ما بيي اليوم على قولتهن العزيمه عزيمة بنات فبطرشلهن العشا لين بيوتهن

لطيفه: يالله الله يعينكم

خيلفه: يالله و مبروك...و باسني على خدي..

لطيفه:اوووه لحيتك تقرص....هههه... الله يبارك فيك...

++ بصراحه شلكهم اخواني صدق متأثرين بهالعرس و فرحانين بعد..يالله اذا على فرحهم فأنا اكيد فرحانه..و الله يعدي كل شي على خير..دخلت الميلس..اول ما دشيت بصراحه دوخت من عدد الحريم اللي موجودات..و سمعت صوت حمديه و هي اتزغرط..و اول شي طاحت عليه عيني..يمنى ربيعتيه..و هي اتوزعلي بووووسه بطريقه كوميديه فالهوا بصراحه صدق صدق من الخاااطر ضحكت...

لفيت على الحريم..بس بعدين مسكتني يدتيه ضبابه اللي كانت يالسه على كرسي شوي مميز و قالتلي وقفي و البنات و الحريم هن بيسلمن عليج..اتوقعتها عزيمة بنات بس..بس الحريم ماشالله مازرات الميلس..عدا الوقت بسرعه..و راحن الحريم الكبار يتعشن في غرفه ثانيه..اما البنات فكان مسوين بوفيه..هاي حركات عايشه اختيه..اتموت في شي اسمهه اتيكيت..بعد العشا الحريم سارن و اتجمعن البنات فالميلس و شغلن حسين الجسمي و بدا الرقص...بصراحه انا ما حب الغنا و طلبت فالعرس انهم ما يحطون اي غنيه الا اذا كان كلاسيك و يحطون لي زفت راشد الماجد اللي من دون موسيقا..بس عشان فرحت البنات فما كان عندي اي خيار ثاني..وصلتني مسج من سلطان يطلب مني اني اطلع..و طلعت برا الميلس فشفت سلطان

لطيفه: هلا سلطان...

سلطان: لو سمحتن قصرن على المسجل صوووته شال الدنيا شوه فاتحين ديسكو نحن..الساعه 11 و نص الحين

لطيفه: هههههه...ان شالله..

سلطان: لولووو...تعالي تعالي شوي..اقولج ضبوب اهنيه؟

لطيفه: هيه داخل..

سلطان: حلوه؟

لطيفه: علينا!!!! قول تبا اتشوفها..

سلطان: بصراحه هيه...

في هاللحظه بالصدفه كانت ضبابه طالعه اتدورني...ضبابه كانت لابسه نفسنا بنجابي ولافه شعرها كله ورا..و فارقه قذلتها من النص و منزله مثل السلسله الصغيره من الفرق..ماشي اي ميكب عدا جحال من داخل و جلوس خفيف..بس بصراحه....جميله...

سلطان و هو مبحلق عيونه: سبحاااااااااااااااااااااااااااان اللي خلق و كمل...من يقول الزين ما يكمل حلاه كل شي في حبيب قد كمل...

اتحجبت ضبابه زين: مرحبا بومييد...لطفين تعالي بالله عليج يمنوه حاشره الدنيا عليج..

سلطان: طالعوا الخامه...ايه ضبوب تعالي ارمسج انا..

ضبابه و هي حاااطه عينها في عين سلطان: هلا بالطيب الغالي عزيز و شوفته منوه..تراه ما جا على بالي..اشوف عيونك الحلووووه...شوه تبا بعد؟؟

سلطان: حسبي الله على بليسج..جانج دللتي بقلبي تدليلي..مدعي اني مغرم حالي..

جارحني في مجاتيلي..جرح لا يبرى ولا يشالي..اقول لطفين برايج اذا بتسيرين...

ضبابه: يالله انا بعد بسير..

سلطان: اي اي انتي قرّي اباج في كلمة راس...

ضبابه: اذا لطيفه بتسير انا بسير و اذا لطيفه بتقعد انا بقعد

سلطان: اي انتي..شوه هالعدول؟؟؟!!! تبين تنخطبين حضرتج؟؟!!!!

ضبابه و بدلع: و شوه فيها اذا انخطبت؟؟!!

سلطان و هو ايمط ايد ضبابه بطرف العصا اللي ماسكنها: ايييييه...لا تعصبيبي..عنلااااتج زااااد

ضبابه: لطفين انتي شااهده يالس ايسبنيه و انا سااااكته..

سلطان: لو سمحتي لا تدخلين حد بين الحرمه و ريلها

لطيفه: هههههههه....انا بروح

++ بصراحه..ما قدرت اخرب الجو الرومانسي..عتاب العشاق..وانا اعرف انهم يبون يقولون اشياء بس يتضاربون جدامي انا..اول ما تحركت حطت ضبابه ايدها في ايدي..

ضبابه: الحقني جان فيك خير...

و دشينا الميلس..حاول سلطان يقبض شيلة ضبابه بس ما لحق..و نتيجة اندفاعه..دخل بالغلط فالميلس..شهقت ضبابه..من جرأة سلطان..اللي مثل ما اعرف صح شخصيه قويه بس جدام تجمعات البنات يتحول الي كااااااائن خجووووول...احمر ويه سلطان..الكلمه الوحيده اللي قالها: السموووحه منكن يا حرمات..امبوني ادور سيلانيتنا السودا و دشيت بالغلط...و طلع سلطان بسرعه...

ضبابه: الحين انا سيلانيه!!!!!!!....و الله و الله اني ما عديها له على خير!!!! بتشوووووف سليطين بتشوووف...

لطيفه: تستاهلين حد يغايض سلطان الله يهديج...

يمنى و هيه توخي على لطيفه: في ذمتش انه هالررررررحيم اخوش؟؟؟

لطيفه: هيه هاذا اخويه....

يمنى: يالله....يعلها تتهنابه اللي بتضويه...لطيفه يالنذله...اسميها مخوتش مخوت بوش..انا ربيعتج من سبع سنين...و مخليتني عاااانس و انتي عندج هالرحــــــــــــــــــــــــــيم....ياويلي ويلاه على ذيش الشيفه...

فاطمه: اسمعوا انتو يون عاااانس!!!! غربلات عدوج انتي واااااااااااااحد و عشرين شوه عايلنج عالعرس..

ضبابه و بنقمه: و بعدين لو سمـــــــــــــــــــــــــــــحتن هالريال خاطب فاحترمن حالكن ولا تبصبصن...

يمنى: و من ذي اللي خاطبنها هالويه الصبوحي...

لطيفه و هي اتأشر على ضبابه: محسوبتج الاخت ضبابه...

يمني: لا اله الا الله,.....كان هاذا الرحيم بياخذ هاذي اللي تغرّم...شوه عيالهم؟؟؟ ملووك جمال...

فاطمه: هههههههه...تشاهدي يمنوه لا تعطينهم بعين...

يمني: لا لا العوامر ما يعطون بعين...

سلامه: ما عليج منها...عينها اتطيح الطير من السما...

يمنى: ياويلي ويلاه عالعرس...لطفين...في ذمتش بتعرسين وبتخلينا!؟؟!! انهون عليش؟؟!!!

لطيفه: عاد هاذا النصيب...وانتي يوم مسلم بيحب الارض اللي تمشين عليها شله ما توافقين عليه؟؟!!

يمنى:خيبن ويش.... انقولها تيس اتقول حلبوه...ذا مسلم انا ما اجهله!!!!

فاطمه: سمعوا انتو يون ما جهله!!!

يمنى: وش بيتيني سوي؟؟!!!

فاطمه: اتوكلي على الله و لا تردينه...يا بوي خذي اللي يحبج ولا تاخذين اللي تحبينه...

يمنى: ماجهله اقولش!!! ني بغي واحد ايفز له قلبي..

لطيفه: الله يرزززقكن ان شالله بالازواج الصالحين قولن امين..

الكل: آآآآآآآآآآآآآآآآآآآآآآآآآآآمين....

++ عدا هاليوم و انقضى..باجر الثلاثا..بعدها الاربعا..و بعدين خلاص الخميس..ايام العزوبيه بدت تنسحب عالسريع...يالله لو اعرف شوه مخبي القدر..شوه اللي بيصير..و شوه نية احمد من صوبي؟؟!! صباح الثلاثا يالله يالله قمت على الساعه 12 الظهر ولو ما دقت عليه شمسه اختيه..جان من نشيت ابد..قمت و صليت و قريت شوي قرأن عل و عسى نبض قلبي يهدى شوي..و تستريح روحي..

شمسه: السلاااااااااام عليكم...شحالها عروسنا؟

لطيفه:و عليكم السلام...طيبة طاب حالج؟؟ علومج ام حمد...

شمسه: لو سمحتي انا ام سيف...و البيبي يا شما يا مها...

لطيفه:لو سمحتي لا تكسرين القاعده...نبا ولد..

شمسه: و الله انا و ريلي نبا بنت!!! المهم..( شمسه و هي تنسدح على الشبريه) ما يت راعيت الصالون..؟

لطيفه: لا..انا بروحي مستغربه..

شمسه: خليها انا بسويلها..

و خلال مكالمة شمسه...دخلوا علينا سيف ولد شمسه و حمد و خالد عيال سعيد...محتشرين علاخير..

سيف: مااااااااااااامااااااااااااااااااااه....البلي ستيشن ما تشتغل....

شمسه: روح خل عمتك ضبوب اتشغلها...

حمد: هاي ضبابه ...و عموه عايشه...قافلين الباب...يوم اندق عليهن ما يفجن...

سيف: هيه هيه....عندهن حرمه اتحط لهن لباااااان على ايدهن...و ايعووووورهن..و يقولن أي أي..يستاهلن

خالد: هيه هاي اسمها ام الحنـــــــــــــــــــــــا...

شمسه: غربلات عدوووووكم..يون ام الحنا...

لطيفه: فديت دربوووح...ياختي ما ينلامن ما يدخلنهم داخل...ايه لا تسيرون اتقولون حق حد..شمسه قوليلهم لا يسيرون يفضحونهن عند الشبيبه...تراهم متجمعين تحت...

شمسه: ايه عيب انتو مالكم خص فالبنات....سيروا يالله العبوا بلي استيشن...

حمد: اوهووووووووووو.....عموووه شمسه انقولج البلي استشن خربااانه ما تشتغل..

في هاللحظه رن تيلفون شمسه...

شمسه: اووووو....هاذا المعرس...خيبه موصني على شي و نسيته..

++ المعرس!!!...الحين هاذا ريلي..الله يعيني..ان شالله كل شي بيعدي على خير..ما حبيت اسمع شوه يالس ايقول لشمسه...

لطيفه: سيفوووووه...تعال شوي؟

سيف: شوه تبين انتي بعد؟؟!!

حمد: ايييييييييييه عيب عليك هاي العروووووسه؟؟

سيف: انزين انزين شوه تبين العروووسه؟؟

لطيفه: وين البلي ستيشن مالتكم؟

سيف: اوووووف...شوه اقول انا من الصبح؟؟!!! تراها تحت فالصاله...ترا و الله ابيعج في سوق الصبيخه انا و عمي احمد..

لطيفه:سوق الصبيخه يون؟!!! روح روح هاتها بنشغلها اهنيه...

سيف: اوووهووو...هاذي شاريتنها هندوووووه اللي تكلم عمي احماااد فالتيلفون حقي ماباكم اتخربووونها..

++ هند!!!! هاي الانسانه الين الحين عايشه..حشا اكيد احمد يعبدها عباده..انا خلاص ما عندي امل فيه هالانسان يصطلح...حسيت بقلبي ينعصر..لين متا يعني؟؟!! و اذا انته متعلق بها..شوه تباني انا؟؟!! خلني في حالي و فكني..الله يخليك مب كفايه جتلت حبي لك بكل اعصاب بارده؟؟!!!

شمسه: المعرس ايسلم عليج...

ما شي رد..

شمسه: شياج انجلب حالج مره وحده؟؟!!!

لطيفه: ماشي...ماااااااااااااااااااااااااشي....الله ياخذني انزين؟؟!!! متا بفتك من هالكابوووووس..

شمسه: بسم الله...لطفين...خلاص هالموضوع نحن انتهينا منه!!!! و اعتقد انج مقتنعه و محد جبربج!!!!

ما انتبهنا انه سيف شل تيلفون شمسه و قعد يلعبه...

لطيفه: اكرررررررررررررررررررررررررررررهه....مادانيه هالاحمد...ابغضه اتعرفين شوه يعني ابغضه!!! يعلني اموووت ولا اني انزف لهالانسان...هاذا انسان بليد ما عنده احساااااااس...

شمسه: استهدي الله لطفين..و هالرمسه ما تفيد..خلاص انتي الحين عروس..و ما ترومين اتردين في قرارج..ورا باجر بيزفونج لاحمد..و طبي كل شي وراج..و حطي في بالج شي واحد بس..احمد ريلج..

لطيفه: يعل ما من احمد فالدنيا...اكرررررررررررهه..ماباااااااااااااااااه.. .هالزفت اكرهه اكرهه..يبا ايعذبني بس!!! ليته لو يعرف كم اكرهههههههه!!!! و انفجرت اصيح...

منوه انا في هالدنيا؟؟!! وشوه امثل لهالاحمد؟؟!!! ليش يا احمد تربط مصيرك بمصير انسانه..حبتك ولا قد رضت بغيرك خليل في قلبها...ليش يا احمد تربط مصيرك بانسانه..تنوي اتذلها و تلعب عليها؟؟!!! لهدرجه حاقرني!!!!

شمسه و هي اتمط التيلفون من ايد سيف بسرعه: الله يغربل بليسسسسسسسسسسسسسسك...لطوف الحقي الحقي...لطفين يالله يالله سترك..احمد كان على الخط...سيفووووووه...ليش؟؟؟!!!! حسبي الله على بليسك...الحقي لطوف دق ارسال على اخر مكالمه مستلمه..شوه بنسوي الحين اكيد احمد سمع كل شي؟؟!!!

لطيفه: احسن احسن خليه ايعرف اني اكره كره العما...ممم..ماا..مابااااه...ماابااااه...ايسير حق هندووه الخامه خليها هيه تنفعه...و جانه ما سمع دقيله و انا بقوله بلس...بلساني...

شمسه و هي تمسك راسها بين ايدينها: كيف ما سمعج؟؟!!! وانا اول ما حطيت السماعه في اذنيه سمعت صوته..و هو يتكلم و ايصك؟؟!!!! يا ربي سترك...شوه هالمصيبه...الله يهديكم من يهال شياااااطين؟؟!!!

 

++ طز سمع ولا ما سمع..اهم شي ايعرف شعوري تجاهه...خلاص ينتهي كل شي بينا دامنا على البر..ولا انه ايدمرني بالبطئ...خلاص يا احمد ماباك و النفس طابت منك..ابعد و خليني...

[laylo0o]

حبوبة ثانكس

بس انه قريت القصة في منتدى ثاني ايام المنتدى مغلق

 

 

وكملتها وصج القصة اكثر من روعة

 

 

بس النهاية مب سعيدة لانسان واحد بس وهو...............

 

 

 

مابي اخرب اقروا وجوف

 

 

ونعم الاختيار غزال الريم

 

 

 

 

على العموم ثانكس

[بحرينيه^مزيونة]

مشكوووره حبيبتي

 

ووننتظر التكمله

 

بليييز لا تتاخريين