miss ocean Posted أغسطس 9, 2005 Report Share Posted أغسطس 9, 2005 (edited) http://www.bahrain2day.com/uploader/pic3/fdjklgh542545.jpg موضوع اليوم special ومشوق حق كل بنت تمر بفترة الملجة أو اللي إنشاء الله راح تمر بالأيام الياية بإذن الله ... هاذي الفترة إهيه أحلى أيام الزواج يكون فيها التعارف والتجارب اليديدة اللي ما مرت عليج من قبل ... وفي هالفترة إنتي وشطارتج بالتفنن والحركات اللي تبهرين فيها زوجج كثر ما تقدرين ... الكثير يعتقد ان البنت ما تقدر او نادر انها تسوي شي أيام الملجه إنها يعني تبين شي او تقول أو تسوي ( طبعا ما كنت اقصد الحركات الجنسية أو الجرئة فيها ) ...انا اقصد بالحياة العادية.. والسبب يرجع الى انها خجولة .. فهذا دور الزوج في هذه الفترة !! ... وانا اعتقد هالشي غلط . طبعا البنات أنواع : - في من هي فعلا تبحث عن الستر والحياة السعيده يعني تعطي من قلبها .... - أما البنت اللي معتبره الزواج مجرد تغيير ينتزع منها الملل أو منفذ للهروب من سلطة الأب والأم ... ما اعتقد تحرص إنها تقدم بالعكس هذي النوعية تبي تأخذ وتمتص من الزوج كثر ما تقدر .. ------------ ففي هذه المرحلة لازم يكون لج تخطيط مسبق ... ( طبعا ما راح أتكلم عن الحفلة نفسها لان في ناس تسويها في ناس لاء ، والترتيبات تعتمد على ميزانية أهل البنت اللي المفروض أهمه يسوون حفلة الملجة) تبين هالفترة تمر حلوه عليج وما فيها نواقص ، فكري دايما شلون تخيلتي هالأيام ، حتى لو إعتقدتي إنها مو موجودة حاليا وبس بالقصص أو الأفلام ... أنا بذكر بعض الأمور اللي إنشاء الله تساعدج في هذي الفتره من فناتق وحركات وتغييرات :- 1- طبعا بداية أنا افضل برأيي الشخصي ، إن الملجه تكون بيوم والحفلة بيوم يعني بينهم وبين بعض يومين أو 3 ايام أو أقل المهم ما يزيد اكثر من أسبوع ( طبعا في بنات وايد يقولون لاء مو وناسه حلاته يشوفني أول مره وأنا كاشخه وجذي ) أنا أقولكم ليش ؟؟ حلو بيوم الملجة إيي يتعشى عندج ( علشان تاخذون على بعض وما ترتبكين حق الحفلة ) تكونين مزهبه طاولة وشموع ومن هالحركات وما أوصيج لا تنسين (البيبسي بو ليمونه شغل فنادق ) .. وحطي ورد ومن هالحركات وبخري المكان .. ومتكشخه طبعا مو كشخة وخبه شي ناعم وبسيط .. وفاله الشعر .. ومتعطرة .. ( ويوم الحفله رفعي شعرج تسريحه كتغيير ) تدرين ليش حلو تملجين قبل الحفلة !! صدقيني ما راح يمديج بعد الحفلة تروحين مطعم وتأخذين راحتج معاه .. اولا : حاطه مكياج وايد ، ثانيا : شعرج متروس سبريه ومن هالحجي ، ثالثا : على ما تخلص الحفلة تكون الساعة متأخرة . 2- بيوم الحفلة لما تطلعون طبعا لازم تصورون وخليه الصور عفوية كثر ما تقدرين ، و خليهم يزهبون لكم اكل من البوفيه ، وتعشي إنتي معاه ، بعدها قوليله تروحون عند ابوه(عمج ) علشان تسلمين عليه ، ومنها تتمشون بالسيارة على ما توصلون . 3- طبعا بعدها يا انتي تروحي بيتهم يا اهوه ايي يتغدا أو يتعشى ويزوركم وهكذا ، وأكيد راح يشوف غرفتج وتقعدون فيها ، ويا حلو هالفترة اللي تكون في بيتكم وبدارج . نصيحة : إذا أثاث دارج قضى عليه الزمن ويفشل وكل قطعه لون ومن هالحجي ( لا تقولين يلا بتزوج وبطلع !! على ما تشترون اثاث الشقة وتزهبين ، أكيد راح إيي أو ينام كذا مرة عندج ) فحاولي إن يكون مكان حلو ومرتب والفراش كبير وأباجورة ويا حبذا لو كان تكرمون ( الحمام ) يكون داخل الغرفة مو بره ويكون فيه طقم كامل حق الصابون والفرشه وجذي.. وفاجأيه بأنج شاريتله نفس فرشتج يحطها عندج بلون ثاني ، وبعض البجامات ، وملابس جذي على ذوقج ، وعطور .. 4- وطبعا كثري من فناتق بالشكل مره رافعه الشعر مره مطيحتة ، تفنني كثر ما تقدرين خلي يشوفج كل يوم شكل (بحيث كل ما يشوفج يقول يا بختي ) وحتى باللبس مره ¾ ومره دراعه ومره بجامه راقيه ومن هالسوالف … وإهتمي في بشرتج يعني مره حاطه مكياج خفيف ومره ثقلي ومره مو حاطه يعني خليه يعرفج بجميع أشكالج ... وطبعا ما أوصيج قبل الملجه لازم تكونين منقعه عند الصالونات . 5- اهتمي فيه كثر ما تقدرين سويله حلو سوي اكله معينه ، ويا حلو وقت الملجة في (رمضان) لها طعم حلوو ، والاحلى لما يمر بعدها العيد عليكم ، سويله شاي أو قهوه مثل ما يحب ، لازم تسوين هالشي بنفسج وتييبينه ، او تكونين مزهبته لما يقولج كاني ياي .. طبعا: معروف إن الأم دايما إتييب حق الأبو الشاي بعد نوم الظهر والبسكوت والحب ، وزوجج أكيد يبي نفس الشي .. 6- وفي فترة الملجة لما يزورج في بيتكم خلي يتقرب منج اكثر شلون أنا اقولج ... يعني زهبي البومات الصور مالت قبل وخليه يشوفج و إنتي صغيره وليما كبرتي .. ( بس بليز صور شغل هلاقة أيام أول والكشه والأشياء اللي ما تتطلع هاذي مو ضمن صور ) .. بالإضافه الي شريط الروضة أو شريط سفرة او رحلة عايلية ، وقعدوا شوفوه مع بعض .. وحاولي تورينه هواياتج ، وأشياء تحبين تقرينها ، او تحتفظين فيها ... وهم العكس صحيح ... لما تروحين عندهم قوليله يسويلج نفس الشي .... علشان انتي بعد تعرفينه وتتقربين اكثر.. وإذا أيام الملجة صادف عندج حفلة او عرس خليه اهوه يوديج و إيي ياخذج ..( وطلبي منه يكشخ يعني يغتر ) وطلبي منه إنكم تروحون مصور قبل الحفلة لأن إنتي كاشخة وجذي .. ( هالفكرة راح تترك انطباع حلو حقكم الاثنين ) 7- وفي فترة الملجة لازم تطلعون تتعشون تتمشون من هالسوالف .... حاولي مو كل مره مطاعم ومجمعات وسينما ... عادي روحوا البحر ( خصوصا لما تنقين موقع صج رومانسي والجو يكون يساعد والقمره نازله ) أو تشترون أفلام وعشا وتقعدون بالبيت تطالعونهم .. وناسه والله.. أو يعني حسسيه إنج ودج تروحين أي مكان معاه ... وإنج ما تتعنفقين .... حتى الممشى روحي . 8- أكيد في هذه الفترة لازم تزهبون حق الشقة أو المكان اللي راح تعيشون فيه ... خلج سلسة حيل ومرنه .. يعني لا تكسرين فيه إذا خذا رايج من أثاث أو لون أوفكرة .... يعني مو تردين عليه : وييييييييييييع ... لا كلش كلش مو شي ... من صجك !!! لاء هذا رد مو ذرب كلش، بالعكس ردي عليه : والله اهو زين بس مثلا مو جنه سعره ما يناسبه ... إشرايك نفتر بعد وإذا ما لقينه شي حلو وبسعر حلو نردله .. حاولي تكونون متفقين بالأختيار ... وحاولي إنج ما تثقلين عليه يعني على قد الميزانية ... ( مو شرط كل ما كان الاثاث غالي وفخم يعني حلو ... في اشياء حلوه ومناسبه بالسعر والبساطة حلوه ) 9- وبعدين لما تملجين .. طبعا أكيد ريلج بكون مسئول عنج بمصروف وجذي .. ولما تكونين طالبة أو مو موظفة .. لازم يعطيج مصروف .. بس إنج تقولين له .. يلا وين مصروفي !! والا روح ادفع مكالماتي !! يلا ودني السوق ابي اغراض !! عندي عرس ابي بدله !! بسم الله : هذا بالملجة وجذي عيل بعدين شلون !! اوكي اهوه له حق عليج ..صح .. بس يعني لما تروحون السوق .. وتبين شي واعجبج تبين تقايسينه ويتي بتحاسبين ..... ( اهني اكيد اهوه راح يدفع يعني معناته شرالج وصرف عليج ) وهذي طريقة اذا تبين تعرفين إذا اهوه بخيل وحزره : روحي السوق معاه ... وإذا ما دفع وطلع من عنده .. الله يعينج .. طبعا : ما أقصد كل مره مطلعته ويشرليج لاء ..عيل شنو فايده المهر ..!! لكن أغلب الرياييل ... ما يحب يخلي مرته تدفع لازم يدفع من باب السنع .. 10- وبالنهاية أقولج ... سوي حفلة ملجة أحلى وايد .. وسافري شعر عسل .. وخلي عنج العرس والمصاريف ... ومليون شخص يحش فيج ( واااي طاعي نفنوفها ... ويع تسريحتها ... ماخذه عن حب !! وي شنو هالعشا !! ) .. .. وحتى الزعل يصير ( اللي ما عطيتونه بطاقة زياده .. واللي ما توجب تزعل ليش ما عزمتيني !!) لما تردين من سفرة على ذوقج وذوقه ... ذيك الساعه سوي حفلة صغيره كأستقبال .. والحين هابين بأستقبال اتدشين مع ريلج بنفس الوقت .. تقعدون اشوي بعدين تطلعين معاه اهوه يروح وإنتي تردين تدخلين تسلمين على الناس وتستانسين معاهم وترقصين بعد .. أحلى من العرس قاعدة وتحاتين وحالتج حاله .. ومرتزه في مكان .. والناس كلها تطالعج .. ومباركين عرسا الاثنين ليلة ربيع وعين وقمره .. والله يتمم على الجميع والفال حق الباجي ... صدقوني الله خاشلكم شي زين .. وكل خيره فيها تأخيره .. وبالتوفيج للكل .. ومع السلامه .. http://www.bahrain2day.com/uploader/pic3/khblfkjbh.jpg Edited أغسطس 9, 2005 by miss ocean Quote Link to comment Share on other sites More sharing options...
PoLice Woman Posted أغسطس 9, 2005 Report Share Posted أغسطس 9, 2005 يعطيج العافيه الصراحه على هالنصائح وانشالله الي جريب ينخطبون يستفيدون منها Quote Link to comment Share on other sites More sharing options...
بلبول Posted أغسطس 9, 2005 Report Share Posted أغسطس 9, 2005 نصايح حلوة ... بس وين اللي يطبق عاد !!! Quote Link to comment Share on other sites More sharing options...
غريبه Posted أغسطس 10, 2005 Report Share Posted أغسطس 10, 2005 وااااااااااااااااااااااااااااااااااااي شوقتيني حق العرس ههههههههههههههههههههههههههههههههههههههههههههههبروحي انه مايبيلي من يوزني عليه متى اعرس ياربي موضوع حده روعه،،،تسلمين اختي Quote Link to comment Share on other sites More sharing options...
معشووقة المحرق Posted أغسطس 11, 2005 Report Share Posted أغسطس 11, 2005 مشكوره ابوي انا خطبتي جريب واستفدت وايد وايد وموضوعج حلو وايد بس تدرين تفكيري كوبي من تفكيرج انا ماكنت ابي اسوي عرس ابي اسافر على طول واللي ماكنت اعرفه عرفته Quote Link to comment Share on other sites More sharing options...
وديعة Posted أغسطس 11, 2005 Report Share Posted أغسطس 11, 2005 يسلمواا خيتو على الموضوع Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.