i! ][ بســــمة حــــزن ][ !i

[fatemate]

بأنتظار التكملة

[الحلاوة]

ثنكس وااااااااااااااااااااااااااااااااااااااااااااااااااايد الجزء واااااااااااااااو ننتضر جزء احلة

[عاشقه خالد]

حلو بعد هذي الجزء ونتظر التكمله

[دلوووعة أبوووي_77]

مشكورة خيوووووووووو وننتظر التكملة

[بريق]

بصراحه الجزء واااااااااااااااااااااايد روووووووووووووووووووووووعه

 

الله يبارك فيج مقدما ههههههههههههه

 

لا اتطولين علينه

[cofyana]

 

 

 

سووري يا بنات ع التأخير

 

اعذرووني ماباقي على ملجتي الا يومين .. ولا الاقي فرصة ادخل النت

 

اليوم حطيت لكم جزئين

 

يمكن ماقدر ادخل بكرة او الي بعدهـ ..

 

 

 

 

 

Part 20

 

 

-------------------

 

كانت تناظرها وهي مبتسمه...سحبت كرسي وجلست وهي مهي مصدقه ان امل اليوم تشتغل في المطبخ والسعاده تطل من عيونها العاده اذا دخلت المطبخ تكون مكشره ومتضايقه...انتبهت على امل هي تلتفت عليها

امل وهي تتنهد:"يمه ...اشفيك قعدتي..."

بدريه وهي تحاول تمسك ضحكتها:"ليش امولتي محتاجه مساعده"

امل:"ها...لا بس اشرفي علي.."

بدريه وهي تضحك:"حاولت اساعدك بس انتي مارضيتي..."

امل:"طلال محلفني مااحد يساعدني...يبي يذوق طباخي.."

بدريه حتى تقهرها:"شكل ولد عمك داخل على طمع..."

امل بضيق:"أي طمع يمه بس من حقه يشوف مرته اذاهي سنعه.."

بدريه:"اموله حبيبتي وشرايك تنصبين نفسك محاميه لطلال..."

امل وهي تنفتح الفرن تشوف الصينيه:"والله اذا بتلعبين دور الحماه من اللحين اكيد بوكل نفسي محاميه له"

بدريه:"صدق بنات هاليومين لا حيا ولا حشيمه...ابسألك اللحين طلال هو اللي عزم نفسه على الغدا"

امل بتردد:"انا عزمته .....حراااام يمه يوميا ياكل من المطعم"

قامت بدريه تشوف امل وطباخها:"خليني اشوف بس وش طبختي اخاف الرجال يتسممم"

امل بالفخر:"اعجبك يمه...انا تربيتك"

بدريه:"اشلون بسمه تداوم في الجامعه..."

امل وهي تضحك:"تدوام يوم وتغيب يوم...تغيرت مع الحمل180درجه..."

بدريه:"الله يساعدها.."

امل:"تصدقين ياشبه نايمه... يامعصبه...صايره فضعيه"

بدريه:"ايه بعضهم تتغير نفسيته مع الحمل...."

دخلت رهف المطبخ وراحت تناظر وش طبخوا:"الله شكل الغدا اليوم يستاهل ان الواحد يجوع نفسه"

بدريه بسخريه:"اكيد طلال عندنا اليوم ولازم مانقصر معه..."

قربت رهف من امل وعلى وجهها ابتسامه:"وانا اقول الست امل داخله من بدري المطبخ ليه....بس ترى لو تطلعين بشكلك وريحتك ذي...اضمن لك انه مارح يجي بيتنا

مره ثانيه..."

رمت امل اللي في يدها وراحت تركض:"ذكرتيني اللحين بيجي وانا بهالشكل"

بدريه:"وين رايحه....تعالي كملي شغلك..."

اللتفتت امل على امها وبتوسل:"ماما الله يخليك كملي..."

بدريه بسخريه:"بس هو محلفك..."

امل:"ماعليك منه...."

وراحت تركض...ابوها مسافر ولو جا طلال وهي ما جهزت يمكن يزعل لو تتاخر عليه لازم تستعد...دخلت غرفتها وجهزت اللبس اللي بتلبسه ودخلت الحمام تتسبح...

بعدربع ساعه وقفت قدام المرايه تستشور شعرها...ماخلصت الا ورهف داخله عليها تبلغها بوصول طلال...

 

 

^^^

 

تناظر بنتها وهي راميه نفسها على السرير وتصيح...تحب هالبنت ومن حبها لها مستحيل ترفض لها أي طلب...قربت منها وقعدت على السرير وسحبتها حتى صارت بحظنها...

ام محمد:"عبووووره حبيبتي خلاص لا تصيحين"

عبير وهي تشهق من الصياح:"ماشفتي ولدك وش سوى..."

ام محمد بحنان:"من حبه لك يخاف عليك..."

عبير بعصبيه:"يخاف علي يقوم يمد يده"

ام محمد:"انتي الله يهديك اللي تنرفزتيه..."

قامت من حظن امها بعصبيه وصارت تمشي في الغرفه بعصبيه:"اكيد بتدافعين عنه...

لانك تحبينه اكثر"

ام محمد:"ما فيه ام ياعبير تفضل احد من عيالها على الثاني"

عبير بعصبيه:"انتي تفضلينه علي بس ماعليه خلي ابوي يجي..."

ام محمد:"لا عبير الا ابوك لا تدخلينه..."

عبير:"اصلا هو الوحيد اللي بياخذ لي حقي..."

قربت ام محمد من بنتها:"عشاني خاطري لا تدخلين ابوك وانا اكلم محمد...ابوك ممكن يطرده من البيت..."

عبير :"وهذا اللي ابيه..."

ام محمد بحنان:"عبوووره حبيبتي قلت لك عشان خاطري..."

عبير:"بس عشانك بس خلي ولدك ما يتدخل في حياتي.."

ام محمد وهي تتنهد:"خلاص خلي محمد علي..."

طلعت ام محمد من عند بنتها بعد ماتاكدت ان عبير مارح تقول لابوها...المشاكل في بيتهم تزيد يوم عن يوم وكله من طلعات عبير... ومحمد لما يشوفها مايتحمل...

فخاطرها لو ماصار اللي صار كان اللحين عبير متزوجه خالد واكيد كان تغيرت معه

زاد حقدها على بسمه خصوصا من درت بحملها...

تتمنى زواجها من خالد يفشل...لانه هو الوحيد اللي بيوقف هالمشاكل اللي في بيتها... عبير رااافضه العرسان اللي يتقدمون لها...التمع في ذهنها افكار كثيره لو تتحقق اكيد هالزواج بيفشل..بس لازم تكون حذره...

 

^^^

 

 

في غرفته قدام المرايه بعد ماخلص لبسه اليوم عنده غير بيروح يشوف بنت عمه...

مايدري متى اخر مره شافها...طبعا غير المره الاخيره اللي شافها بالصدفه في بيتهم

بس اكيد اليوم بيكون غير...بعد ماخلص نزل وانصدم من اللي شافه...

كانت امه وجدته لابسات عبياتهم ويحترونه في الصاله...

سوى نفسه مهو شايفهم وحاول يمر بسرعه..

ام عبد الرحمن:"فهد وين رايح؟؟

وقف لما سمع صوت جدته واللتفت عليه:"رايح بيت عمي"

ام فيصل:"طيب انتظرنا بنروح معك"

فهد وهو يحاول يتمالك اعصابه:"وش يوديكم بيت عمي"

ام عبد الرحمن:"وشوله بعد بنروح معك"

فهد:"وليش تروحون معي"

ام عبد الرحمن وهي قايمه:"قومي يامزنه مشينا ولدك اليوم مهو بصاحي"

فهد:"لا من جد...انا رايح اشوف ريم انتوا وش يوديكم"

ام عبد الرحمن:"ريم تستحي لازم احد يدخل معها..."

فهد:"استريحوا انتوا خالد بيكون موجود"

ام عبد الرحمن بعصبيه:"فهيد والله ان مامشيت لاراويك شغل الله"

فهد وهو يقرب من جدته ويحب راسها:"تكفين ياام عبد الرحمن...لا تدخلين"

ام عبد الرحمن:"وليش ماادخل"

فهد:"ريم اكيد بستحي لما تدخلين"

ضحكت بصوت عالي:" لا ماعليك مابتستحي مني ... من متى يافهد انتظر هاليوم كم فهد عندنا..."

فهد وهو يتنهد عرف ان الحكي مع جدته ضايع:"ياللا مشينا الله يكون بعوني "

 

^^^

 

وفي بيت ابو خالد كانت ام خالد في غرفة ريم تحاول تقنعها تطلع لفهد...

وهي رافضه...

ريم بعصبيه:"هو يعرفني وانا اعرفه ماله داعي اطلع..."

ام خالد:"ياريم من حقه يطلب يشوفك"

ريم:"ماني بطالعه"

ام خالد وهي تمزح:"لازم تطلعين يمكن ماتعجبينه ...اللحين يشوفك احسن"

ريم:"عاد من زينه هو"

ام خالد:"ريم امزح معك...والا فيه احد يشوف ريم وما يتخبل عليها"

قعدت ريم على السرير:"يمه الله يخليك مالي خاطر اطلع"

وقبل ماترد امها انفتح الباب بقوه لما شافت خالد نزلت راسها من عقب اللي صار وعلاقتهم مقطوعه ماكان لها وجه حتى تحط عينها بعينه تحس بالخجل من اللي صار...

ولو انها حاقده في نفسها عليه ليش يرفض وليد...صح هي غلطت في علاقتها معه بس لو وافق كان توج حبها لوليد وصار كل شي صح...

خالد ببرود:"فهد واهله وصلوا ...ربع ساعه واشوفك تحت"

ام خالد:"ماهي راضيه تطلع"

خالد وهو بناظر ريم ويحاول تكون نبرة صوته عاديه قدام امه:"مو على كيفها..."

طلع من غير مايسمع رد...

اللتفت ام خالد على بنتها:"ريم الله يهديك..."

ريم وهي تقاطع امها:"خلاص يمه انزلي تحت شوي وبلحقك..."

قربت امها منها وحظنتها مهي مصدقه ان اصغر بناتها بتتزوج وتروح عنهم...

اما ريم في حضن امها ماقدرت تتحكم في دموعها ...حست وهي في حضنها بالحنان والامان ...كانت الايام الماضيه قاسيه عليها ومااحد داري عن معاناتها...معاناة أي بنت تحس بتأنيب الضمير وخجلانه من نفسها ومن اخوها...بس للاسف بعد ماخسرت احترامه لها للابد...

.

.

.

.

نزل خالد تحت عند فهد كان طول هالايام متضايق من كل اللي صار لريم ...كان عايش صراع داخلي لو فهد خطب غير ريم وعرف خالد انها تكلم كان على طول قال لولد عمه بس هي اخته ومستحيل يفضحها ...كانت مصلحة فهد تهمه...وريم تهمه...

كان بين نارين ومن كثر مايفكر في هالموضوع ماقدر حتى يفرح بخبر حمل زوجته...

فهد وهو يصارخ:"خااالد"

خالد:"بسم الله ياخو وشوله تصارخ"

فهد:"ساعه اكلمك...وانت ماترد"

خالد:"خير وش عندك"

فهد بتردد:"ماكن ريم تأخرت"

خالد:" ياخو اثقل اشوي لا تصير خفيف "

فهد وهو يقلده:" ياخو اثقل اشوي لا تصير خفيف....خليت الثقل لك تتذكر يوم بغيت تستخف علينا"

خالد:"عاد في هذي كذاب اصلا انا ماشفتها الا يوم الملكه..."

فهد:"اقصد يوم رحت تشوف بنت خالتك..."

تذكر خالد حاله يوم راح لعبير كان متلهف لشوفتها اكثر من تلهف فهد اللحين...

حس فهد بغبائه لانه ذكره بعبير:"اقول خالد لما تدخل ريم...تكفى العجيز لاتدري"

خالد وهو يضحك:" واذا دخلت وش بيصير يعني..."

فهد بضيق:"اقول قم استعجل اختك...ترك رفعت ضغطي..."

مارد خالد وقام وهو ناوي يدخل جدته بعد ماتدخل ريم...

طلع ونادى امه كانت ريم معها ...مشت معه من غير ماتكلم..ودخلت وراه كانت مستحيه ومنزله راسها...سلمت بصوت وقعدت في الطرف من غير ماتناظر فهد...

فهد وهو منقهر من قعدة خالد:"شلونك ياريم..."

ريم:"بخير الله يسلمك..."

ناظر فهد خالد وهو حاقد عليه من قلب:"خالد الله يحيك عطشان ياخوك جب لي مويه"

خالد وهو مبتسم:"غالي والطلب رخيص"

وقبل مايفرح فهد انصدم وهو شايفه رافع التلفون ويطلب له...حس مافيه امل يطلع عنهم التفت على ريم...هو عارف ان ريم حلوه بس حاسها احلى بكثير من اول..

وتوه بيكلمها الا وشاف جدته داخله والضحكه شاقه الوجه...راحت قعدت بجنب ريم..

سمع خالد وهو يضحك عرف انه مدبر مع جدته كل شي...

وبعد ماسولفت شوي وكان اكثر من يتكلم خالد وجدته...

ام عبد الرحمن :"فهد وراك ساكت ماتسولف..."

فهد فخاطره وانتي خالد تخلون احد يسولف:"بصراااحه من شفتك فرحت وضاع كل الكلام "

ضحكت ام عبد الرحمن:"ايه صادق ياولد عبد الرحمن..."

خالدوهو يكلم جدته:"ماتحسينه اليوم عاقل بزياده..."

ام عبد الرحمن:"ما عليك شوي ويرد فهد المهبول.."

برغم اللي كانت حاسته ريم الا انها ابتسمت على كلام جدتها ولاحظ فهد ابتسامتهاوانقهر هاللي ماصدقت ينسب وتبتسم...

فهد:"الله يسامحك يمامتي انا مهبول..."

ام عبد الرحمن وهي تضحك:"ايه امزح معك وانا امك..."

فهد فخاطره مهو وقت مزح همس لخالد:"خالد واللي يرحم والديك اطلعوا بس خمس دقايق..."

خالد:"مااقدر ياخوي...بعدين ترى حتى حرام الخلوه ..."

فهد وهو منقهر:"باكلها انا ...يااخي خل الباب مفتوح ولا تروح بعيد بس خلني اقول كلمتين على بعض ...ماني قادر منك انت وهو العجوز الله يهديها..."

ام عبد الرحمن:"وش عندكم تتهامسون..."

قام خالد :"ابد سلامتك بس بغيتك بكلمة راس..."

ام عبد الرحمن:"ايه ماعليه خله عقب..."

قرب خالد منها ومسك يدها:"ياللا مشينا ياجده ودي اسولف معك شوي.."

وناظر ريم بنظره فهمت وش قصده وقامت بسرعه وطلعت قبلهم...ابتسم خالد وهو معطي فهد ظهره وبعد ماوصل للباب ناظر فهد وضحك لما شاف تعابير وجهه...

 

 

في غرفتها وهي دافنها راسها في المخده...وتصيح من قلبها...حست ان كل شي انقلب ضدها...اللحين سعود صار يتهرب من طاري الزواج واذا سألته يلف ويدور ولا تاخذ منه كلمه...ما حست بنوف لما دخلت عليها...كانت نوف مستغربه من حال اختها...

اللي حابسه عمرها في غرفتها... مسحت بحنان على شعرها...

رفعت مشاعل راسها وشافت نوف تناظرها بحنان..

راحت نوف وجلست على الكرسي مقابل اختها:"مشاعل اشفيك حالك مهو عاجبني..."

مسحت مشاعل دموعها وعدلت جلستها:"ما فيني شي..."

نوف:"انا اختك ويمكن مااحد يحس فيك كثري..."

ابتسمت مشاعل بسخريه وهي تتذكر امها وابوها اللاهين بحياتهم:"صاقه مااحد يسأل عني غيرك..."

نوف :"اكيد بسأل عن اختي اللي هي كل شي بحياتي"

مشاعل بااستغراب:"يعني تحبيني رغم قسوتي معك..."

نوف وهي تضحك:"اكيد احبك صح فيه تصرفات لك مااحبها بس ما يقلل هالشي من حبي لك.."

سرحت مشاعل في امها وابوها...لو كانوا اكثر حرص عليها يمكن ماضاعت...

بس ناظرت نوف باعجاب وفخاطرها هذي نوف عاشت نفس حياتي بس عرفت تحافظ على نفسها وتختار الطريق الصح...يعني انا المسؤوله عن كل اللي صار...

نوف:"مشااااعل...اكلمك..."

مشاعل بشرود:"ها...ماانتبهت"

قامت نوف وقعدت بجنب مشاعل وحطت يدها على كتفها:"مشاعل....ترى النفس اذا ضاقت تحب تفضفض شوي"

مشاعل بسخريه:"ليش تدورين ضيقة الصدر.."

نوف:"ودي اخفف عنك شوي..."

مشاعل وهي خانقتها العبره:"مااحد يقدر يخفف عني...خليني بحالي الله يخليك"

حست نوف ان الموضوع كبير:"جربيني ومارح تندمين....لان مهما صار...مستحيل يطلع من هالغرفه"

حست مشاعل ان نفسها صحيح ضاقت ومارح تلقى احسن من نوف تحكي لها كل اللي صار....

 

^^^

 

في الليل على الساعه ثمان كانت ام محمد وعبير في بيت ابو خالد...

نزلت بسمه واللي مبين عليها الشحوب والتعب وبعد السلام راحت قعدت بجنب ام عبد الرحمن واللي مارحت مع ام فيصل...كانت عبير مقابلتهم وتحاول تخفي نظرات الغيره والحسد وتبدلها بنظرات الغرور والتكبر...

ام محمد:"مبرك يابسمه سمعنا اخبار حلوه..."

بسمه:"الله يبارك بعمرك..."

ام محمد:"بس اشفيك صايره ذبلانه كذا بعض الحريم يزينون لما يحملون..."

ام خالد:"الله يهديها ماتاكل شي ولا تهتم بعمرها..."

ام محمد:"لازم تغصبين عمرك اللحين انتي مسؤله عن غيرك...اكيد اللحين مارح تقدرين تكملين دراستك..."

بسمه:"بحاول اكمل والله يكون بالعون..."

ام عبدالرحمن:"تقدر تكمل وش يمنع..."

ام محمد:"بتصير عن قريب مسؤوله عن طفل..."

ام خالد:"وانا وين رحت انا في ذيك الساعه لما اهتم في ولد خالد..."

كلامها قهر عبير وامها وفرح بسمه...خالتها من درت بحملها تغيرت معها وصارت تهتم فيها صح مو لسواد عيونها بس بدايه طيبه وتطمح للاحسن...

انتبهت من سرحانها على دخول ريم بعد ماعطتها نظره كلها احتقار...كانت محملتها مسؤلية كل اللي صار...والفضول ذابحها نفسها تعرف من وصل لبسمه خبر علاقتها بوليد...بس كبريائها وتأكدها ان بسمه مارح تقولها هو اللي كان يمنعها من السؤال...

ام محمد:"هلا بالعروس..."

ريم:"بدري ياخالتي من اللحين عروس..."

ام عبد الرحمن وهي تبتسم:"منتي مطوله فهد مستعجل حيل..."

تضايقت ريم من جا طاري فهد:"وشوله الاستعجال...لاحقين على(وبهمس)الهم.."

ضحكت عبير لانها الوحيده اللي سمعت كلامها الاخير:"ياويل قلبي من عقبك بصير العانس الوحيده في العايله"

ام خالد بجديه:"بسم الله عليك من هالطاري انتي الف من يتمناك بس اشري..."

ام محمد:"الله يهديها بس ترد في هالخطاب وناس ماينردون..."

عبير:"مافيه احد منهم عاجبني.."

ام عبد الرحمن:"ترى ياعبير البنيه كل ماكبرت قلوا خطابها..."

عبير بغرور:"الا انا ....مستحيل اتزوج الا اللي في بالي.."

ام عبد الرحمن:"يمكن اللي في بالك مهو على خبرك..."

عبير:"مشكوووره بس لا تخافين علي(وهي تناظر بسمه)خافي على غيري"

ابتسمت بسمه بسخريه عبير وام عبد الرحمن يتكلمون بالالغاز وكل الموجدين عارفين انهم يقصدون خالد...

رن تلفون عبير كانت وحده من صديقاتها وحست انها فرصتها تقهر بسمه واام عبد الرحمن ردت بدلع وهي قايمه عنهم:"هلا وغلا...توقعت اسمع هالصوت بس مهو اللحين..."

ومثل ماتوقعت راح فكر بسمه لخالد...اكيد هو المتصل...

اصلا هو هاليومين مهملها ويكلمها بكل برود والسبب تفكيره في ريم وفهد ولانه مايقول فسرت حالته انه من درى بحملها... مافرح بالعكس ...دليل انه لازل يحب عبير...كانت تذبحها هالافكار... ان خالد يفكر في عبير هالشي يحطم نفسيتها اللي ومن حملت صايره حساسه من كل شي...

 

 

^^^

 

كانت في الصاله وهي مصدومه من كل اللي سمعته من اختها ....لاول مره تتج روتمد يدها على اختها وما تركت كلمة سب ماقالتها لها....اكتفت مشاعل بدموع الندم اللي غرقتها وماردت عليها...بعد ماهدت حست ان من واجبها انها توقف مع اختها لان اللي صار اما يوقفها عند حده اويخليها تكمل طريق الضياع والفجور...

ناظرت الساعه كانت الساعه 11في الليل دخلت امها قبل شوي منهكه من سهرتها المعتاده مع صديقاتها اللي مثلها محملين مسؤلية البيت لشغالات وهم امهات بالاسم دخلت غرفتها بعد ماسألت نوف بعجل عن حالها هي واختها...

راحت نوف لاختها واللي كانت على حالها...قربت منها وحظنتها...وماصدقت مشاعل

وراحت في نوبة بكاء...

ومن خلال دموعها:"كنت اظن اني بس اتسلى ومستحيل اخسر شي....بس صدق ان الله يمهال ولا يهمل..."

ورفعت عيونها لاختها:"تتوقعين الله يغفر لي..."

نوف :"انتي توبي والله غفورا رحيم...الله يامشاعل يفرح بتوبة عبده...يمهل العاصي ويستر عليه الى حين ...بس للاسف العاصي يتمادى في ذنبه الا من رحم ربي "

ناظرتها مشاعل والندم مبين عليها:" ياما عصيت ربي وجريت بنات كثير معي..."

نوف وهي تتنهد:"مشاعل انتي خسرتي اغلى شي ممكن تخسره البنت بس لو تبتي لربك بتكسبين نفسك...واذا على اللي جريتيهم...مثل مادعيتيهم لشر ادعيهم للخير..."

مشاعل وهي تصيح:"ماادري متى اخر مره صليت..."

هزت نوف راسها:"وش اللي ماسكك اللحين قومي صلي وادعي ربك يسامحك ويستر عليك..."

كانت مشاعل بتقوم لما مسكت نوف يدها وناظرت بجديه لها:"تدرين وش شروط التوبه النصوح..."

مشاعل:"لا..."

مسكت نوف اصابعها وجلست تعددها عليها:" انا اقولك... من شروطها الاقلاع عن الذنب ...الندم على مافات.....وخلي نيتك خالصه لوجه ربك وان شاء الله ربك يقبل توبتك.."

هزت مشاعل راسها وقامت...مسحت نوف دمعه نزلت من عينها كانت حابستها قدام اختها... كانت فرحانه بتوبة اختها بس للاسف توبه متاخره...كانت تلوم نفسها لانها لو وقفتها عند حدها حتى لو قالت لابوها اللي اكيد ماكان رحمها...يمكن كان اهون من اللي صار وممكن يصير لاختها...

 

^^^^^^

 

في الاستراحه والشباب من حولهم وصوت الموسيقى يصم الاذان ودخان السجاير والشيشه يتطاير من بينهم....والخافي اعظم...شاف سعود وليد سرحان وقاعد بالحاله...

رح من عند الشباب اللي كان قاعد معهم بتجاه توأم الروح في الفساد والشر....

سعود بعد ماقعد بجنبه:"اشفيك يالحبيب قاعد سرحان وفي عالم ثاني..."

وليد بضيق:"واللي يرحم والديك انت بالذات لا تكلمني..."

سعود:"وليد انا قلت لك دوري انتهى..."

وليد:"قلت لك ساير مشاعل حتى ماتنقطع علاقتي بريم..."

سعود وهو يقاطعه:"اشلون اسايرها مااكلمها الا وعلى طول تجيب طاري الزواج ياخو مللتني..."

وليد وهو يتنهد:"ودي اعرف اخبار ريم اكيد اللحين بتم خطوبتها على ولد عمها..."

سعود بخبث:"الساعه المباركه....مو هذا اللي تدوره"

وليد وهو يبتسم:"وانت صادق...صح تمنيت شي ثاني بس ماعليه وليد مايوقف في وجهه شي..."

سعود:"تعلمني عن وليد..."

وليد وهو يعدل جلسته:"اللحين بتقطع علاقتك بمشاعل..."

سعود:"ماودي بس انا من تجيب الوحده طاري الزواج اكرهها..."

وليد:"كان دبرت عمرك قبل بشي تهددها به..."

سعود :"لا كافي اللي صار لها...وبعدين ممكن تجي من غير تهديد.."

وليد وهو يضحك:"خطييير صاير...."

سعود وهو يناظر لشخص اللي مقابلهم:"من عاشر القوم...."

وليد:"وش تناظر"

سعود وهو يبتسم بسخريه:"ناظر اللي يقول بيتوب..."

ناظر وليد شاف عمر في عالم ثاني:"ايه في الليل مسطول وفي النهار بيتوب...بس تصدق احس انه قرب يتوب فعلا..."

ضحك سعود:"يتوب في الطل...قم بس عند الشباب..."

 

^^^^^

 

اليوم قررت تنام في بيت جدها...ويالله اقتنعت امها وماجات الامتأخره وحمدت ربها لانها ما ودها تقابل عبير وامها...كانت مع ريم في غرفتها لان بسمه راحت تنام..

ريم وهي تبرد اظافرها:"غريييبه اليوم مارحتي لبسمه"

امل:"راحت تنام"

ريم بااحتقار:"نومة اهل الكهف ان شاء الله"

رمت امل المجله اللي كانت تتصفحها:"نفسي اعرف انتي ليش تكرهينها "

ريم وهي تتنهد:"اكرهها كذا بدون سبب..."

حست ريم ان امل بتعصب عليها وحبت تغير السالف:"اشلون اقنعتي امك تجينا تالي الليل"

امل وهي تتنهد:"تعبت وانا اقنعها بس ماقصر طلال كان فيه وساعدني في اقناعها"

ريم وهي مبتسمه:"لا يكون هو اللي جابك..."

امل:"هههه كان تموتني امي ....خالي خالد اللي جابني"

ريم:"غريبه مادخل..."

امل :"ماادري بس يقول مشغول..."

تنهدت ريم كانت مشتاقه لخالد على انهم في بيت واحد بس للاسف ماكلمها من عقب اللي صار...

امل وهي تهز كتفها:"ها...وين سرحتي"

ريم بعد ماانتبهت:"مارحت بعيد..."

امل بخبث:"اكيد رحتي لبعض الناس..."

ريم عرفت من تقصد:" لا بعض الناس ولا كل الناس..."

امل:"ريموووووه...ترى ماجيت الاحتى اخذ الاخبار من مصادرها..."

ريم:"يوووو أي اخبار..."

امل:"فهد ...ومن غيره "

ريم:"عادي دخلت ...وطلعت مثل خلق الله"

امل:"ماشفتيه؟"

ريم:"اكيد شفته وبعدين ترى فهد ولد عمي واعرفه"

امل:"انتي غريبه موافقتك جات في وقت كنت اقول مستحيل ريم توافق"

تذكرت ريم انها قالت لها من قبل عن رفضها الزواج من فهد....كانت مستغربه من بسمه اللي عارفه كل شي وماقالت لامل...بس فخاطرها اكيد عشان امل بنت خالتي ولا صديقاتها الثانيات اكيد عندهم خبر...

ريم:"ماادري كنت متردده بس بعد تفكير حسيت فهد احسن من الغريب"

امل بنظرات حالمه:"اسأليني عن ولد العم لا خلى ولا عدم...ياحلوهم حلواه"

ريم وهي ميته ضحك:"منهم ذولي اللي ياحلوهم حلواه"

امل:"عيااال العم وعلى راسهم طلال..."

ريم:"تحبينه؟؟"

قامت امل في الغرفه وتدور وتشرح لريم:"احبه ...قليله كلمة احبه عليه انا اموت فيه

وماتوقعت بحب هالكثر"

ماردت ريم عليها وتذكرت حبها لوليد صح كانت تحبه بس شعورها ناحية وليد كان يخالطه الشعور بالذنب والخوف ...بينما حب امل حب مبني على اساس قوي...

 

^^^^

 

"شفتي يمه اشلون صايره مهمه في بيت خالتي"

ام محمد وهي تتنهد:"شفت بس مابتطول..."

عبير بعصبيه:"اشلون مابتطول....هذا هي حامل واكيد خالد زاد تمسكه فيها"

ام محمد حست انها فرصتها:"طيب ياعبير ليش ماتقبلين ولد جارنا عبد المحسن...

ولد ماينرد "

عبير:"مستحييييل اتزوج غير خالد"

ام محمد بضيق:"عبير تظنين ان خالد لو تزوجك بيصبر على طلعاتك الكثيره"

قعدت بجنب امها:"اغير كل شي واتحمل أي شي بس بسمه ماتتهنى في خالد"

ام محمد:"يعني هذا اللي هامك...ان بسمه ماتتهنى في خالد:"

عبير:"لا....لاني احب خالد"

تنهدت ام محمد حتى هي كانت تتمنى زواج خالد من عبير تم... لانها كان عارفه خالد وقوة شخصيته...كان عدل حال بنتها واللي مهو عاجبها بس للاسف ماتقدر توقفها عند حدها لان عبير عنيده جدا ولوقوف ابو محمد مع بنته الدائم...كانت بتقدر في زوجها بس عبير عارفه اشلون تستغل حب امها لها...

انتبهت على عبير:"ان شاء الله مايتم حملها..."

ام محمد باابتسامة خبث:"وحتى لو تم حملها...صدقيني هالحمل مارح يمنع الطلاق اللي بيكون قريب..."

ناظرت عبير امها بااعجاب ...عمر ام محمد مااستسلمت ومادامها حطت بسمه في بالها

فااكيد كل شي بيكون في صالحها....ماحاولت تسألها لان اهم شي عندها طلاق بسمه ومايهمها الطريقه كيف...

 

^^^^^

 

 

وفي مكان قريب منهم كانت بسمه توها صاحيه من النوم ...يمكن مانامت ولا نص ساعه بس كل ماتذكر شكل عبير وهي تكلم وتتخيلها تكلم خالد تحس بنار في صدرها...

خصوصا مع سرحان خالد هاليومين....انتبهت على خالد وهو داخل الغرفه

حاولت تتمالك اعصابها وماتدخل معه في أي نقاش ...اثنينهم نفسيتهم زفت...

سلم وماردت السلام وعطته ظهرها وهي نايمه على السرير...

مااهتم ...وراح الصاله يشغل التلفزيون....ماحست الابدموعها مغرقه مخدتها ..

حتى ماكلف على نفسه يسأل عنها...او يشوف ليش متضايقه...

ومن كثر ماهي منفصله عن عالمها ورايحه لعالمها عالم الاحزان...ماحست في خالد لما دخل الغرفه ...انتبهت على يده على كتفها مسحت دموعها ونزلت يده عن كتفها بكل عنف...من غير ماتلتفت عليه...

خالد بضيق:"ممكن اعرف ليش زعلانه"

ماردت عليه وهي تحاول توقف دموعها اللي غصب عنها تجري على خدودها...

لفها بقوه تجاهه...حطت يدها على وجهها حتى مايشوف دموعها...

خالد وهو يتنهد:"بسمه ليش تصيحين..."

حس انها مابترد الا اذا استفزها:"اشوف هذا دموع من جد ولا دموع التماسيح على مايقولون..."

انقهرت بسمه منه وحاولت تفك يده وتقوم بس ماقدرت...

خالد:"ليش ماتردين..."

بسمه:"ايه دموع التماسيح....خلاص ارتحت..."

خالد:"لا ماارتحت ...بسمه انتي زعلانه مني..."

لما ارخى يده قامت بسرعه وراحت للحمام وهي في الطريق كانت تدور كلمه قاسيه تقولها له لما وصلت الحمام اللتفتت عليه:"تدري ياخالد ان اللي صار لاختك انت سببه...الله انتقم منك..."

انصدمت لما شافت نظرت خالد لها :" وش جاب طاري اختي في الموضوع..."

قفلت الباب بسرعه وتسندت على الباب لما شافت نظراته حست بقسوة اللي قالته بس احسن خله يتوب من هالعبير....بعد فتره سمعت الباب دليل ان خالد طلع...

طلعت بسرعه تحاول تمنع طلعته هالوقت وهو معصب بهالطريقه....

بس مالحقت عليه...

رجعت غرفتها ورمت نفسها على الكنبه وهي خايفه لايصير له شي...لامت نفسها على كلامها القاسي....دقت على جواله بس كان مقفله...مر الوقت عليها بطئ ...ماتدري وش تسوي مرت ثلاث ساعات وهو ماجا سمعت صوت الاذان ...

طلعت حست انها لازم تقول لاحد يشاركها خوفها على خالد ...راحت غرفة ريم وسمعت صوت امل وريم يسولفون...انصدموا لما شافوا بسمه داخله عليهم شبه منهاره...

راحت امل تركض تسندها:"بسمه اشفيك..."

بسمه :"خالد طلع وهو زعلان وللحين ماجا..."

كانت ام خالد وراهم جايه تصيحي البنات للصلاه وسمعت بسمه:"متى طلع..."

اللتفتت بسمه على خالتها:"ماادري بس يمكن من ثلاث ساعات..."

ام خالد بعصبيه:"وش اللي زعله "

نزلت بسمه راسها وماردت...

ام خالد:"والله يابسمه ان صار لولدي شي ان ماارحمك..."

سكتت لما سمعت صوت تلفون الصاله يرن...كان ابو خالد هو اقرب واحد لتلفون لانه طالع للمسجد وماكان يدري عن كل اللي صار...

راحوا يركضون جميع ...رفع ابو خالد التلفون في نفس اللحظه اللي دخلوا عليه كانت هيئتهم تدل على ان مصيبه بتواجههم... تماسك ورد بصوت حاول يكون طبيعي...

ابو خالد:"نعم..."

سكت بس بان على ملامحه الصدمه حست بسمه انها بتطيح مسكت في امل وكان اخر سمعته من المكالمه قبل مايغمى عليها ...

ابوخالد:"خلاص يافهد انا جايك اللحين....

 

 

 

يتبع ...

 

 

Part 21

 

 

 

 

 

 

 

 

 

Part 21

 

--------------

 

كانت ام خالد تناظر بسمه بطرف عينها كانت تبي تتطمن عليها بدون ماتحسسها...رغم انها حاقده عليها الا انها نست كل شي اول ماطاحت عليهم...واول ماصحت سألت عن خالد...طمنوها عليه على انهم للحين مايدرون وش صاير...

لان ابو خالد اول ماتطمن على بسمه كان طالع بسرعه بس ام خالد طلبت من امل تركض تجيب جواله حتى يكلمونه اذا طلع....

وهو طالع قالهم ان خالد طيب ومافيه شي.... بعد ماطلع كان الصمت هو سيد المكان يتخلله صوت نحيب خافت من الجميع....

ام خالد تبكي خالد ولدها الوحيد واللي مااحد بغلاته في الدنيا...ريم تفكر في اخوها اللي ماكلمها من عقب اللي صار معقوله صار فيه شي...بسمه واللي كانت منهاره ودموعها تجري على خدودها ....دموع ندم وخوف لو صار في خالد شي مستحيل تسامح نفسها...

امل الوحيده المتماسكه فيهم لما شافت الجميع منهار حست من واجبها تكون قويه...كانت بجنب بسمه وماسكه يدها وتحاول تهديهم...

امل وهي تحاول تخفي الخوف اللي داخلها:"اذكروا الله ان شاء الله ماصار شي"

تنهدت ام خالد:"لا اله الا الله..."

ريم :"على ان ابوي طمنا على خالد بس ماادري احس اني خايفه..."

ام خالد بصوت كله حسره:"تهقين في اخوك شي..."

ندمت ريم لما سمعت امها:"لا ان شاء الله بس احس اني خايفه..."

ناظرتها امل بنظره كلها عتاب ...هزت راسها طلعت امل اعقل منها تحاول تهدي امها وهي تزيد مخاوفها على خالد...

ام خالد بصوت باكي:"ياويل حالي عليك ياولدي..."

انقبض قلب بسمه لما سمعت ام خالد ونزلت راسها وكتمت صرخه كانت بتطلع من اعماق قلبها واكتفت بدموعه اللي تحس بحرارتها على وجهها...

امل وهي متجه لتلفون:"اكلم جدي احسن من هالحاله..."

الكل انصت وركز نظره على امل وهي تدق الارقام....

امل:"هلا جدي..."

ابو خالد بصوت متعب" عسى ماخلاف ياامل ليش متصله.."

امل عرفت انه يقصد بسمه:"لا الحمد لله ماصار شي بس حبينا نتطمن على خالي خالد"

ابو خالد:"خالك طيب ...واللحين اخليه يكلم...."

امل:"خلاص ننتظره..."

وبعد ماسكرت قبل مااحد يسألها على طول تكلمت...

امل:"يقول عشان تتطمنون بيخلي خالي يكلم..."

تنهدت ام خالد حست ان خالد طيب تعرف زوجها لو خالد فيه شي مارد على الجوال وما وعدهم باتصاله....

 

^^^

 

في نفس الوقت كان ابو خالد واخوانه وفيصل وناصر عيونهم معلقه على الباب المقفل والخوف والقلق باين عليهم...ينتظرون متى يطلع الدكتور يطمنهم...

انتبهوا على خالد وفهد واللي كانوا يخلصون اجراءت المستشفى...

فهد:"ها...للحين ماطلع الدكتور..."

ابو ناصر:"للحين ماطلع..."

ابو خالد وهو يكلم فهد:"انت يافهد اللي دريت عنها..."

فهد:"ايه كنت توني راجع....مريت عليها كالعاده لقيتها طايحه..."

ابو فيصل:"هي الله يهديها اهملت الادويه...والظاهر السكر ارتفع عندها..."

ابو ناصر:"دايم يرتفع السكر عندها بس هالمره الله يستر..."

فيصل:"يقول الدكتور ان ارتفاع السكر خطير وممكن يسبب احيانا غيبوبه..."

ابو فيصل وهو يناظر ولده:"فال الله ولا فالك..."

حس فيصل بالاحراج دايم متهور في كلامه ...حتى فهد اللي لسانه فالت منه في المواقف الصعبه يعرف يمسك لسانه...

راح ابو خالد ومسك خالد وابتعدوا شوي عن الجميع:"خالد اتصل على البيت تراهم خايفين عليك من طلعت مااتصلت..."

خالد بعدم اهتمام:"اذا تطمنت على جدتي رحت لهم..."

ابو خالد:"ياولدي امك خايفه عليك...ومرتك طاحت علينا قبل مانطلع..."

عى انه كان معصب منها وحاقد عليها الا انه من سمع كلام ابوه ماهانت عليه...

خالد:"اشلون طاحت عليكم..."

ابو خالد:"انت الله يهديك تأخرت ومن سمعوا التلفون توقعوا صار فيك شي..."

خالد:"كان قلت لهم..."

ابو خالد وهو يمد يده بالجوال :"قلت لهم بس يبون يسمعون صوتك خذ الجوال واتصل عليهم.."

اخذ الجوال من ابوه ...كان بيكلمهم يطمنهم عليه والاهم يتطمن على بسمه ...كفايه جدته للحين مايعرفون كيف بيكون وضعها....

سمع صوت امل وهي ترد...

امل:"الو..."

خالد:"هلا امل.."

امل بفرح:"هلا والله بخالي..."

سمع عندها صوت امه واللي اخذت التلفون من امل...

ام خالد وهي تصيح:"خاااالد...اشلونك ياولدي.."

خالد وهو يتنهد:"انا بخير مادامني سمعت صوتك..."

ام خالد بعتب:"وشوله ياخالد تروعنا عليك..."

خالد:"غصب عني والله بس فهد كلمني بعد ماكنت راجع البيت لان جدتي تعبت شوي...ومع الربكه نسيت التلفون في السياره..."

ام خالد:"وشلون جدتك اللحين..."

خالد:"ان شاء الله طيبه...اشلون بسمه يقول ابوي تعبت عليكم..."

ام خالد:"ماعليها طيبه قامت مثل الحصان وهذا هي بجنبي تبي تكلمك..."

خالد:"مااقدر اكلمها اللحين ...ياللا مع السلامه.."

ام خالد:"مع السلامه الله يحفظك ياولدي..."

سكر خالد ورجع لما شاف الدكتور طلع والكل ملتم حوله...

ابو فيصل:"ها يادكتور بشر اشلون الوالده..."

الدكتور:"الحمد لله اللحين طيبه ومع الادويه انتظم عندها نسبة السكر في الدم...بس لازم تكونون احرص عليها في اخذ الادويه في وقتها وفي تطبيق الحميه تدرون هي كبيره في السن وارتفاع السكري+

خطير عليها..."

ابو ناصر:"ان شاء الله بنسوي اللي نقدر عليه...نقدر نشوفها يادكتور.."

الدكتور:"ايه تقدرون بس هي ممكن تلاقونها نايمه ..."

بعد مارح الدكتور دخلوا على امهم اللي انتقلت لغرفة ثانيه كانت نايمه...اتفقوا ان ابو فيصل وابو خالد يقعدون معها اللين يجيب فيصل امه عشان تكمل اليوم معها...

والبقيه رجعوا البيت حتى يرتاحون خصوصا خالد وفهد اللي ماناموا للحين...

طلع خالد وفهد في نفس السياره ...تذكر فهد انه اول مارجع من السهره هو خالد دق عليه بعد ربع ساعه من وصوله البيت وطلب يطلع معه قعدوا يلفون بسياره اللين قبل الفجر كان باين على خالد انه متضايق بس مارضي يقول لفهد وش مضيق خلقه...

بعد ماركبوا السياره فهد:"مابتقول وش كان فيك البارح..."

ناظره خالد بتعب:"مافيني شي..."

فهد:"خالد مادامك مابتتكلم وشوله تتصل علي..."

خالد وهو يبتسم بمراره:"ماادري يمكن ابي اضيق خلقك معي..."

فهد وهو يتنهد :"اقول انا بنام اذا وصلنا البيت صحني..."

ناظره خالد وهو يرجع المرتبه على ورى ويغمض عيونه كان باين التعب عليه ...اكيد سهران طول الليل...

^^^

 

بعد ماتطمنت ام خالد على ولدها حست ان الروح ردت فيها صحيح خالتها تهمها بس ضناها عندها غير...وكانوا دايم متعودين على تعب ام عبد الرحمن بسبب السكر ...

اختلفت نظرتها لك شي من عقب نظرة تشاؤم صارت متفائله بان خالتها بتكون طيبه...

قريب منها كانت بسمه تحاول تخفي دموعها لانها الوحيده اللي تصيح الآن... صحيح الكل حزين على الجده... لكن كانت ام عبد الرحمن عندها غير كفايه انهاالشخص الوحيد اللي وقف معها من هالعايله...

انقهرت من من خالد لانه رفض يكلمها واحرجها قدامهم بس في خاطرها ماتلومه لان اللي سوته مهوب سهل...

على الساعه تسع انتبهوا على الباب ينفتح ويدخل منه خالد...كان مبين فيه التعب والسواد ظاهر تحت عيونه من قل النوم...فرحت بسمه بدخلته وكان خاطرها ترمي نفسها في حضنه وتعتذر منه بس شالت هالفكره من راسها لما شافت نظراته البارده اللي صوبها تجاهها...

راحت امل وريم وسلموا عليه اما امه قربت منه وضمته لصدرها في نظرها مهما كبر في حظنها يرجع خالد صغير..

بعد ماقعدوا تاكدوا ان بين خالد وبسمه شي كايد لان ولا واحد حاول يكلم الثاني...

ام خالد:"اشلونها جدتك..."

خالد وهو يتنهد:"بخير الحمد لله..."

ام خالد:"ابوك بيقعد معها..."

خالد وهو قايم:" بيقعد اللين يجيب فيصل امه...ياللا يمه بروح انام "

ام خالد بحنان:"رح ارتاح ياولدي الله يحفظك..."

مشى عنهم بتعب كسر خاطر امه وناظرت بسمه كانها تطلب منها تلحقه فهمت بسمه

نظراتها بس كانت متردده تروح ولا تخليه ينام اول وتاجل الصدام اللي اكيد رح يصير بعدين....لما شافت ان امل وريم رايحات ينامون قامت هي الثانيه تخاف تقعد مع ام خالد بالحالها وتفتح معها تحقيق...

اول مادخلت شافت خالد توه مبدل ورايح جهة السرير بينام...تنهدت وقعدت على كرسي مقابل للسرير...حاولت تكلمه بس ماقدرت حست ان تاجل الكلام اللين يهدى يكون احسن....

 

^^^

 

في المستشفى بعد العصر كان الكل مجتمع عند ام عبد الرحمن ارتاحوا لما شافوا ام عبد الرحمن بخير...

ابو ناصر:"انتي يمه انتبهي من اللي تاكلينه لازم تطبقين الحميه..."

ام عبد الرحمن صدع راسها من كثر ماكرروا كلام الدكتور عليها...

هزت راسها بعدم اقتناع:"ايه ماعليك كل شي من رب العالمين ماله دخل الاكل"

ابو خالد:"لا يمه لازم تنتبهين للاكل..."

فهد :"ايه انتبهي ترى ورانا عرس..."

ام عبد الرحمن وهي تضحك:"هذا اللي هامك"

فهد:"اكيد تدرين لو متي لااااقدر الله كان مافيه عرس..."

ام عبد الرحمن:"تدري عند فيك مافيه عرس دور لك عروس غير ريم..."

فهد وهو يضحك:"الله المستعان اللحين هذا كلامك بدل ماتشكريني "

ام عبد الرحمن:"وعلى ايش اشكرك..."

فهد:"لاني بامر الله انقذت حياتك ولا كان قعدتي مغمى عليك وكان لقيناك الصبح ميته وصلينا عليك صلاة العصراليوم..."

ابو فيصل بعصبيه:"فهد وش هالكلام..."

قرب فهد لابوه وهو يهمس له:"يابوي لا تفشلني ام خالد داخل اللحين تسمعك تصارخ علي..."

ابو فيصل بصوت منخفض:"والله ان ماسكت لمحطك بهالعقال...."

فهد:"افا وانا ولد ابوي...تدري اطلع بكرامتي احسن..."

ام عبد الرحمن:"اقعد وان امك مايوسع صدري الا انت ولا هم سوالفهم تجيب الهم..."

راح فهد وحب راسها وقعد بجنبها:"ياحبي لك مااحد يعرف قدري غيرك..."

وقرب منها وهمس لها بكلام وكانت مبتسمه وهي تسمعه....بعدين عدل جلسته...

ام عبد الرحمن وهي تكلم ابو خالد:"الاسبوع الجاي نبي ملكة فهد ياابو خالد..."

الكل ناظر فهد واللي كان يناظرهم بكل برآه...

ابو خالد:"ماعندي مانع بس ماكأن الاسبوع الجاي قريب..."

ام عبد الرحمن:"قلنا ملكه مهو زواج....خل الولد لما يجي بيتكم يجي يزور مرته ويتعرفون على بعض اكثر مو يقولون هالايام الملكه بدري احسن حتى يعرفون طبايع بعض..."

فهد:"صح لسانك ياام عبد الرحمن والله تفهمين في الرومانسيه... وانا من جهتي ماعندي مانع..."

ابو فيصل:"يصير خير يمه اذا طلعتي من المستشفى نحدد كل شي..."

انبسط فهد من اللي يسمعه كان داري ان ماله الاجدته ابوه لما طلب منه يكلم عمه قاله بدري...بس جدته مااحد يرفض طلبها...

انتبه على خالد وهو داخل عليهم ومعه حرمتين دخلوا عند الحريم عرف ان ريم وحده منهم كان يناظرهم ومايدري وين ريم...

طقه خالد على كتفه:"خير عسى ماشر ...بتاكلهم بعيونك..."

استحى فهد من خالد لانه انتبه عليه..

فهدحب يغير الموضوع:"هلا والله بنسيب..."

خالد:":"للحين ترانا على البر وماصار شي..."

ام عبد الرحمن وهي قايمه بتدخل داخل:"قريب ان شاء الله بيصير نسيب.."

ابتسم خالد لانه يعرف فهد اذا حط شي في راسه لازم ينفذه وهالايام مافي راسه غير موال الملكه ومتى بتصير...

 

^^^

 

سكرت التلفون بعد ماحست براحه نسبيا تحب عبير وكانت تحاول تنقذها من حياة الضياع...كلمتها بس للاسف عبير مااقتنعت بكلامها وطلبت تنساها اذا كل ماشافتها

قعدت تنصحها في الاخير قررت تسوي اللي لو اختها سوته كان ممكن انقذتها كلمت ام محمد وحكت لها كل البلاوي اللي كانوا يسونها وحكت لها عن طلعاتهم وروحاتهم كانت معها جدا صريحه ...يمكن تقدر توقفها عند حدها....

ماحست بنوف لما قعدت بجنبها...

نوف:"كلمتي امها..."

مشاعل وهي تتنهد:"ايه كلمتها..."

نوف:"سويتي يامشاعل اللي ترددت منه لو قلت لامي وابوي يمكن ماصار اللي صار..."

مشاعل بنبره حزينه:"اللي صار مكتوب...ماتدرين يمكن لولا هالصفعه كان استمريت في حياة المعاصي..."

نوف :"صحيح وعسى ان تكرهوا شئ وهو خير لكم...الله عوضك بتوبه الله يثبتك عليها.."

مشاعل وهي تفكر:"اللهم آمين...اللحين بقى علي ريم...لازم احذرها من الصور اللي عند وليد..."

نوف:"مسكينه الله يستر عليها..."

مشاعل:"ماادري وين كان عقلي لما عطيتهم صورها...."

نوف وهي تهز راسها:"الله يسامحك غلطتي في حقك وحق غيرك..."

مشاعل وهي تتنهد:"عاد انتي قولي لبسمه شغلات عبير كلها ووصيها تنتبه لحياتها مع زوجها لانه من فسخ خطبته من عبير ماعمره كلمها"

حطت يدها على راسها وراحت تفكر في حياتها السابقه كانت تحس انها مستحيل تغلط

وانها مستحيل تفرط في شرفها مادرت ان البنت ضعيفه عند الكلام المعسول....

 

 

بعد مارجع من سهرته لقى بسمه على غير العاده سهرانه من حملت وهو يلقاها نايمه ...دخل داخل وبعد مابدل طلع الصاله عندها كان يبي يفهم وش قصدها بكلامها اكيد ماقالت هالكلام اللي وهي سامعه شي كان خاطره يفهمها دايم متقلبه معه احيانا يحسها سعيده واحيانا لاء...

فرح لما سمعها تناديه ...اكفته عناء انه هو اللي يفتح الموضوع...

بسمه بتردد:"خالد..."

حب يبين لها انه لازال زعلان:"خير..."

بسمه:"خالد حبيت اعتذر منك على الكلام اللي قلته..."

خالد بلا مبالاه:"اعتذارك مرفوض..."

بسمه وهي تحول تلطف الجو اللي مافيه امل يتلطف:"مارح اسكت الا اذا قلت سامحتني...اخاف اذا نمت وانت غضبان علي تدري بعد حرام المرآه ينام زوجها وهو عليها غضبان ..."

ناظرها خالد بنظرات بارده:"وانتي ماشاء الله عليك تعرفين الحرام والحلال..."

بسمه في خاطرها كفايه انت تعرف للحلال والحرام ياابو العريف:"ايه اكيد اعرف للحلال والحرام..."

خالد:"والكلام اللي قلتيه واتهاماتك اللي جايبتها من عقلك المريض..."

بسمه وهي تتنهد:"خالد ادري اني غلطت بس تقدر تنكر كلامي..."

خالد وهو في قمة عصبيته:"أي كلام..."

بسمه بتردد:"انك تكلم عبير...."

خافت بسمه من نظراته لها وتعابير وجهه اللي تغيرت من شكل واحد متعب لواحد في قمة غضبه ارعبها شكله وهو متجه لها و جرها بقسوه من يدها ووقفها قدامه...

خالد والشرر يتطاير من عيونه:"انا اكلم عبير...."

بسمه :"آي يدي كسرتها..."

خالد بعصبيه:"مويدك بس اللي يبي لها كسر كلك على بعضك ودي اكسرك..."

بسمه وهي تحاول تفك يدها من قبضته:"طيب فكني وانا اقولك..."

فك خالد يدها وقعد على الطرف السرير مقابلها وهو يحاول يتمالك اعصابه حتى يفهم اشلون تفكر....

خالد بضيق:"قولي اللي عندك نفسي اعرف من وين تجيبن هالافكار..."

كانت ماتدري من وين تبدى بس في داخلها كانت مصممه تصارحه يمكن لما يعرف انها تدري عن علاقتهم يوقف عند حده...

بسمه بتردد:"اولا قبل كل شي انا اسفه على الكلام اللي قلته ثانيا ترى اكتشفت انك تكلم عبير..."

خالد وهو يعدل جلسته وبسخريه:"ماشاء الله واشلون اكتشفتي..."

حست بسمه بنبرت السخريه في صوته:"من مسجاتها على جوالك..."

خالد وهو يحاول يتمالك اعصابه:"أي مسجات اللي شفتيها وانا ماشفتها"

كان يناظرها وهي تشرح له يوم نسى جواله في بيت عمها وعن كل اللي صار وهو يسمع لها وهو في داخله مكذبها لانه ماشاف ولا مسج من اللي تحكي عنها صح تذكر انه نسى الجوال بس غير كذا مايذكر...

بعد مانتهت كلامها انتظرت منه تعليق....بس ماكان منه الا رجع راسه على ورى

وقالها بضيق:"تدرين ادخل انام احسن لي..."

بسمه بعصبيه:"ايه اكيد بتنام لان ماعندك شي تدافع به عن نفسك..."

خالد:"لا ...لان كل اللي تقولينه ماصار"

بسمه:"يعني تكذبني..."

خالد:"لاء اكذب نفسي عشان اصدقك....بسمه ترى عبير من يوم انفسخت الخطبه ماعمري كلمتها تبين تصدقين كان بها ماتبين مشكلتك"

بسمه:"برد عليك نفس ردك اصدقك واكذب نفسي انا اللي شفت مسجاتها وحتى عطيتك...."

سكتت لما تذكرت يوم رجعت من بيت عمها كان يوم نحس ومستحيل تنسى ادق تفاصيله تذكرت ان ريم اخت الجوال قبل ماياخذه خالد ...ليش ماتكون مؤامره متفقين عليها هي وعبير....غريبه راحت من بالها وهي عارفه قوة علاقتهم....

انتبهت على خالد:"قاعد اسمعك ليش ماتكملين..."

بسمه وهي تناظر للبعيد:"تصدق ياخالد انت سبب شكي فيك..."

خالد باستغراب:"انا؟؟"

بسمه:"خالد وش انا في حياتك..."

خالد وهو يتنهد :"على انك راعية مشاكل ولسانك طويل وشكاكه بس انتي زوجتي واحبك و..."

قاطعته بسمه:"تحبني؟"

خالد:"ليش غريبه اني احبك..."

بسمه باستغراب:"عمري ماسمعتها منك..."

خالد:"مهو لازم اقولها بس اكيد افعالي تدل..."

ابتسمت بسخريه:"صادق افعالك تدل...سهرك الى نص الليل....برودك ومعاملتك الجافه معي عقب اللي صار مع اختك كاني انا الملومه وحتى من قبل....روحاتي وجياتي اللي تكون مع امك او مع امل...وش الشي اللي يدل على انك تحبني..."

حس خالد فعلا بتقصيره ناحيتها صح هو يحبها وكل يوم يكتشف ان حبها يزيد في قلبه بس عمره مااظهر لها حبه او صرح به مايدري ليش...

خالد:"لهادرجه انا معك ما انطاق ..."

بسمه:"ماانكر طيبتك معي وتحملك لعصبيتي احيانا بس عمرك ماحسستني بحبك ولا باهميتي في حياتك وسهلت على غيرك مهماتهم في تدمير حياتنا..."

قام وسحبها وقعدها بجنبه:"يمكن اكون مقصر بس والله احبك وعبير انتهت من حياتي

لا تصيرين موسوسه"

بسمه وهي تناظره:"صدق والله ياخالد..."

خالد وهو يقلدها:"صدق والله ياخالد...ايه صدق وتاكدي لو ماحبيتك مافيه شي يجبرني اعيش معك صح مرت علينا ايام صعبه وصح ان زواجنا واجه مشكلات كثيره بس زواج واجه صعوبات كثيره وللحين ناجح تاكدي ان الحب ركيزه من ركايزه"

ضحكت بسمه....

خالد:"قلت شي يضحك..."

بسمه :"حلوه ركيزه...وين سامعها..."

خالد وهو يفكر:"ماادري شكله في برنامج الاتجاه المعاكس.."

ضحك لما شاف بسمه ميته ضحك...

تنهدت عقب ضحكها:"انا مواحبك ياخالد انا اموت فيك انت كل شي في حياتي واسفه اذا جرحتك في يوم من الايام..."

خالد حتى يقهرها:"ايه دايم تجرحيني ماادري عشاني ضعيف تقومين تحرميني ابسط حقوقي..."

ضحكت:"اذا انت ضعيف وش اصير انا..."

خالد:"انتي امنا الغوله..."

بسمه:"طيب يابونا الغول اسمعني...وتاكد ياخالد اني صادقه في اللي بقوله ترى والله عبير ارسلت لجوالك بس يمكن ماانتبهت لها لا تظن اني اتبلى عليها..."

كانت تقدر تقوله عن شكها في ريم لكن علاقة خالد وريم متأزمه تقوم تكمل الناقص...

خالد كان يفكر في كلامها عن عبير في داخله مهو مقتنع بس ماحب يناقش بسمه اهم شي انه وضح لها حقيقة ان عبير انتهت من حياته....

 

^^^

 

في شقتهم وكل واحد ممدد على كنبه ويناظرون التلفزيون قطع عليهم انسجامهم وليد لما اخذ الريموت وسكر التلفزيون...

التفت عليه سعود بعصبيه:"يااخو اشفيك..."

وليد وهو يبتسم:"باركوا لي..."

سعود بعدم اهتمام:"مبرووووك بس شغل التلفزيون"

وليد:"وانت ياعمر مابتبارك..."

عمر:"على ايش نبارك..."

وليد:"الاسبوع هذا خطبتي..."

عدل سعود جلسته:"خيانه خطبتك هالاسبوع واحنا اخر من يدري..."

وليد:"ماحبيت اقولكم اللين يردون علينا بالموافقه..."

عمر:"غريبه اشوفك فرحان..."

وليد:"اكيد فرحان نسب يشرف وبعدين زهقت من العزوبيه..."

سعود وهو يضحك:"شكلك انت اللي بتوب قبل بعض الناس..."

وليد وهو يبتسم بخبث:"حتى لو تزوجت مااستغني عن الوناسه وسعة الصدر..."

عمر:"الا قل ضيقة الصدر..."

سعود:"وريم وش قررت في صورها..."

وليد:"للحين ماقررت بس ياانشرها بطريقه حلوه مثل ماانت خابر ولا ارسلها ليلة الزواج هديه للعريس"

حس عمر انه قبل ما يتركهم لازم يسوي خير في هالريم اللي كانت ضحيه من الاول...

عرف انه مارح يقنهم الا اذا كلمهم بنفس العقليه اللي يفكرون فيها وبنفس المنطق اللي يقتنعون فيه...

عمر:"وان عندي لك حل ثالث..."

ضحك وليد وسعود بصوت واحد لان عمر على انه من نفس الطينه الا انه كان معارض اللي كانوا يخططون له

وليد:"تفضل طال عمرك..."

عمر بجديه:"انت لو نشرت صورها بطريقه اللي انت خابر...تأكد ان خالد وفهد مايهمهم لو راحوا فيك اعدام..."

اللتفتوا في بعض....

وليد:"مايخسى الا هم..."

سعود:"تصدق كلامه صحيح والله مايرحمونك لو فضحت ريم..."

وليد من داخله كان خاف من مجرد صدامه معهم لو حصل بس ماحب يبين لهم...

وليد:"اوكيه ارسل له الصور ليلة عرسه..."

عمر يحاول يكون مقنع:"انا شوري خل الصور عقب فتره من الزواج خله يتعلق فيها وعقب تجيه الصدمه..."

ارتاح لما شاف تعابير وجوههم كانوا شبه مقتنعين,,,

ضحك سعود بصوت عالي:"سلم لي على التوبه اللي تبيها نعلبوك ابليس يتبرى منك"

كان عمر بتاخيره لوليد يتمنى يحصل الصور خلال هالمده الطويله ويتلفها قبل ماتوصل لفهد...وبكذا يخرب على وليد مخططه...

 

^^^^

 

"انا اقول ياعبير وش كثر هالطلعات مع مشاعل..."

عبير وهي تصيح:"كل اللي قالته كذب...."

ام محمد:"اسمعي ياعبير كلاما يوصلك ويتعداك طلعات لوحدك مافيه تلفونات مافيه..."

عبير وهي تناظر امها اللي عمرها ماانفعلت مثل اليوم:"يمه تكذبيني وتصدقينها..."

ام محمد بعصبيه:"اثبتي لي انها كذابه "

عبير وهي تحاول تقرب من امها:"اكيد كذابه..."

دزتها ام محمد بيده وهالشي صدم عبير صح امها عصبيه بس تضعف قدام دموعها ودلعها حقدت على مشاعل لانها خربت علاقتها بامها...

ام محمد:"اذا كذابه بطلي كثر الطلعات وانا اصدق ان بنتي ماتهما هالطلعات والخرجات..."

عبير وهي تمسح دموعها:"اكيد ماتهمني ولا عادني طالعه الا بك...."

ام محمد وهي تتنهد:"بكره بنروح لخالتك مسوين عزيمه لخالتها "

ارتاحت عبير تطلع تروح توسع صدرها مع ريم شوي...

انتبهوا على ابو محمد لما فتح الباب عليهم كان مبتسم اول ماشاف وجه عبير

اختفت ابتسامته..

ابو محمد بحنان:"اشفيك عبوره كنتي تصيحين..."

بس سمعت عبير ابوها بدت بدلع والصياح اللي انقطع قبل شوي..راح ابوها حظنها..

ابو محمد وهو يكلم مرته:"اشفيها احد زعلها..."

ام محمد وهي طالعه:"اسألها اذا قدرت تقولك..."

راحت عنهم كانت صدمتها في بنتها كبيره توقعت ان عبير مستحيل تغلط لكن للاسف مافيه مستحيل...حقدت على ابو محمد لو مافسخ الخطبه كان عبير اللحين في بيت خالد ومرتاحه من خوفها على بنتها...

 

^^^^

 

بعد العشا في بيت عم بسمه كان ابو عبد العزيز ومرته في الصاله ينتظرون بناتهم متى يخلصون حتى يروحون بيت ابو خالد...

ابو عبد العزيز:"روحي استعجلي بناتك..."

ام عبد العزيز:"اللحين يخلصون وشوله مستعجل..."

ابو عبد العزيز وهو يتنهد:"ترى ان ماخلصوا بعد عشر دقايق والله لشغل سيارتي واترككم..."

ام عبد العزيز :"بيخلصون قبل العشر بس هد نفسك شوي..."

دخل عبد العزيز:"ياللا مشينا..."

ام عبد العزيز:"تعال اعدل لبسك ...اشفيك انت وابوك مستعجلين..."

عبد العزيز وهو يبتسم:"اشتقت لبسمه..."

ابو عبد العزيز:"ياشين والله ماطريت..."

عبد العزيز:"يقول مازن بيت بسمه كبيييير"

ام عبد العزيز:"عشتوا والله وصار عند بسمه بيت..."

ابو عبد العزيز:"ايه صار عندها بيت وصار عندها رجال يسندها..."

تنهدت ام عبد العزيز كانت تفكر في بسمه بحسد اللحين كل شي متوفر لها ومن اول كانت تحت تصرفها...

ابو عبد العزيزوهو يفكر:"متى اخر مره زارتنا..."

ام عبد العزيز:"مااذكر...دريت انها حامل..."

ابو غبد العزيز:"ايه قلتي لي....تخيلي لو تجيب ولد ويموت خالد بنحصل خير..."

سكت لما اشرت له امرته يسكت لان عبد العزيز يناظرهم وهو مستغرب من كلامهم...

ابو عبد العزيز:"رح ناد خواتك..."

طلع من عنهم يركض كان مستعجل على الروحه...

التفتت ام عبد العزيز عليه:"وش هالكلام اللي قاعد تقوله...مهبول انت ماتفهم؟؟"

مااستغرب من سبها له لانه متعود على طولت لسانها... احيانا اذا كانت معصبه تسمعه كلام اشد...

ابو عبد العزيز:"ماقلت شي..."

ام عبد العزيز بصوت منخفض حتى مايسمعها ولدها لو دخل فجاءه"افرض ولدك قال هالكلام لمازن ومازن وصل الكلام..."

عبد العزيز:"صدقتي والله ...تدرين بوصي على عبد العزيو لا يقول..."

ام عبد العزيز:"لا توصي عليه ولا شي بالعكس بهالطريقه تثبت هالكلام في راسه"

سكتت لما شافت بناتها دخلوا عليهم ....

 

^^^

 

كانت بسمه في غرفتها تستعد تنزل تحت قبل مايوصل احد...كانت اليوم سعادتها لا توصف بعد مكالمة نوف لها اكتشفت ان خالد ماكان يكلم عبير وكلها تخطيطات عبير اللحين تقدر تنتصر على عبير بسهوله بعد ماتاكدت من ان خالد ماله علاقه فيها طلع ظنها في محله بس للاسف طلعت غبيه ومااكتشفت كل شي الا متاخره....حست بالندم على ظلمها له كانت تلومه على اهماله لها وهي من اسباب هالاهمال ماحاولت تكون قريبه منه او تفهم زعله على اخته... في داخلها اعترفت باانانيتها...

شكرت نوف من الاعماق لانها ريحتها من عذاب الغيره ونار الشك...

نزلت تحت كانت تحس ان ثقتها بنفسها تضاعفت بسبب نوف وبسبب كلام خالد واللي مستحيل تكذبه من اليوم ورايح...

نزلت تحت كان الكل مجتمع حتى اهل عمها وصلوا راحت سلمت على الكل وقعدت بجنب امل...

همست لها امل:"تصالحتوا..."

ابتسمت :"ما كان بينا شي حتى نتصالح..."

امل:"عيني في عينك..."

ناظرتها بسمه:"هذا عيني في عينك...وش تشوفين..."

امل وهي تركز:"اشوف وحده تحب زوجها بس كانت غبيه وتدور المشاكل..."

بسمه بااستغراب:"وش قصدك..."

امل:"ماتدرين ان نوف فيها خير وما تخبي عني شي وقالت لي سوالف عبيروووه وريم ...."

بسمه برقه:"لا تلوميني ياامل خالد مهما كان خالك خفت يطيح من عينك لما اقولك شكي فيه هو وعبير..."

امل:"ياعيني على الحب..."

تنهدت بسمه وناظرت حولها كانت عبير وريم مع بعض وام خالد مع ام فيصل وام ناصر...بنات عمها وساره وبدريه مع بعض والجده راحت ترتاح شوي...

ومرة عمها مع ام محمد ووحده مع عرفتها بس ماتدري ليش ماارتاحت لنظراتها لها حست انها من نوعية ام محمد ...

بسمه:"اقول امل...من هالحرمه اللي قاعده مع ام محمد.."

امل:"هذي الله يسلمك ام سعيد زوجها يشتغل في مكتب رجلك..."

بسمه وهي تتنهد:"ماادري ليش ماارتحت لها..."

امل:"هذا وانتي ماسمعتي كلامها...كنت انا وهند بجنبهم ...بس قاعده تتغزل في عبير وفي جمالها وكيف ان خالي خسر هالجوهره المكنونه ...مالت عليهم ثنتينهم..."

ابتسمت بسمه على كلامه بس من حطت نظرها في نظر هالادميه حست بخوف...

نست كل شي لما شافت ام عبد الرحمن رجعت الكل سكت يسمع لسولفها اللي ما تنمل

كان باين الضيق على ام محمد ...لان العجوز اكلت عليهم الجو

همست لاختها اللي توها قعدت بجنبها:"اما خالتك ذي مااقوها حتى عقلها شغال للحين ماخرفت..."

ام خالد باستنكار:"حرااام عليك والله انها حبيبه..."

ام محمد:"اللي بعمرها في القبر من زمان وهي كل ماطاحت قامت اكثر صلابه"

ام خالد:"اذكري الله على العجوز..."

ماردت عليها وناظرت بسمه كان باين عليها السعاده وتضحك من قلبها على سوالف ام عبد الرحمن....اكثر ثنتين تكرههم ام عبد الرحمن وبسمه..

.

.

.

.

بعد العشا طلب عم بسمه يسلم عليها .....اتصل عليها خالد عشان تطلع تسلم على عمها بعد مادخله خالد المجلس اللي داخل البيت...

اول مادخلت رحب فيها عمها بطريقه تخلي الواحد يصدق انه يحبها عرف يمثل دوره قعدت بجنب عمها وكان خالد في الجهه الثانيه كان عمها ملتفت عليها ويسالها عن حالها مثل حال أي عم حريص على بنت اخوه انتبهت بسمه على خالد اللي كان مبتسم لها وغمز لها بعينه انتبه عبد العزيز له لانه كان جالس بين بسمه وعمها...

ضحك عبد العزيز من قلبه...

انتبه عليه ابوه:"وش يضحك انت اللحين..."

عبد العزيز وهو ياشر على خالد:"هذاااا"

خالد وهو يضحك على براءة عبد العزيز:"ليش فيني شي يضحك..."

بسمه لما شافت عبد العزيز بيتكلم حطت يدها على فمه :"عبد العزيز ليه ماتروح تلعب مع مازن..."

عبد العزيز:"لا ابي اشوف غرفتك..."

بسمه وهي تهمس له:"خلك عاقل وانا اوديك بعد شوي..."

طبع قبله على خد بسمه وهز راسه علامة الموافقه...ابتسمت له وضمته لصدرها تحبه من قلبها هالولد...كان خالد وعمها يسولفون ...وهي تناظر عمها كيف يسولف معهم طالع بشوش وحنون ظهر بشكل عمرها ماشافته في بيتهم...

ابو عبد العزيز وهو قايم:"ياللا انا بروح اسولف شوي مع ابو خالد بس حبيت اسلم عليك قبل..."

بسمه :"الله يسلمك ياعمي "

ابو عبد العزيز بحنان مصطنع:"لا تقطعينا يابوك..."

بسمه:"اكيد بجيكم قريب..."

طلع ابو عبد العزيز وخالد وراه التفت على بسمه واللي حركت شفايفها بدون صوت:"سخيف"

ضحك وراح وراى عمها انتبهت على عبد العزيز يجرها من يدها حتى تطلعه معها فوق...

مرت من عند الحريم مع عبد العزيز كانت عبير تناظرها بقهر...

عبير تكلم ريم:"اشفيها مرة اخوك صايره البقره الضاحكه بس توزع ابتسامات..."

ريم بهمس:"اسكتي خليني اسمع..."

عبير:"وش تسمعين..."

ماردت عليها ريم حتى انتهت جدتها من كلامها مع بدريه:"تصدقين شكل ملكتي الاسبوع الجاي وانا اخر من يدري..."

عبير:"قاعده تتجسسين على جدتك...."

ريم:"مايحتاج اتجسس صوتها واصل اخر الدنيا...غريبه امي ماقالت لي..."

عبير:"يمكن جدتك تخطط على كيفها..."

ريم:"ايه ممكن انها تخطط بس تاكدي ان تخطيطاتها بتمشي ...مااقول الا مالت على فهد مستعجل على الهم..."

قربت منها عبير وهمست لها:"اخاف تصيرين تموتين فيه.."

ريم وهي تتنهد:"ممكن كل شي جايز في هالزمن"

تنهدت عبير اللحين ريم بتتزوج وامل وملكت وبسمه متهنيه مع خالد...

الى متى بتنتظر خالد....وهو اصلا ماسأل فيها....

 

 

يتبع ...

 

part 22

 

 

 

[fatemate]

بأنتظار التكملة

[عاشقه خالد]

مشكوره على الجزء الروووعه ونتظر التكمله

[بريق]

مشكوووووووره على الجزئين الرووووووووووووووووووووعه

بصراحه

 

يسلموووووووووووو

[دلوووعة أبوووي_77]

مشكووووورة اختي

الجزء وااااايد روووعة

ننتظر التكملة