زوجــــــــــــــــي الصــــــــغـــــــــيـــــــــــر ..!

[MeeMoo]

 

 

ثنكس ع البارت

[نادين]

ثنكس على البارت ننتظر الباقي

 

 

 

 

 

 

 

تــحــيــاتـــي...

نـــــــاديــــــن...

[الوردة الحلوة]

الجزء [3]

 

 

 

 

الجزء الرابع

راحت أمل تنام ونمت انا بعد ...

الصبح.. نشيت من النوم منزعجة .. راسي يعورني.. لاني نمت الساعة 2ونص وقمت الفجر لين رجعت انام مرة ثانية .. كنت خلاص منتهية ..

عالساعة 7.. كلهم ناشيين .. البيت مرتبك.. شالين الدنيا على راسهم شلول ..

حاولت أرجع انام .. بس ماكو فايدة لان نادية يت تقومني ..

نادية : قومي .. بتروحين معاهم ..

هند : مع منو؟

نادية : مع امي وابوي .. مو على اساس بروحون بييت ..عمتش وعمش..

هند: روحتي ما منها فايدة .. انا ابغي انام ..

نادية : يالمسكينة .. ما تدري ان انت الفايدة كلها ..قومي احسن لش .. قبل لا ايي ابوي ويدوسش فبطنش..

طلعت نادية من صوب وقمت انا اجهز نفسي من صوب..

عالساعة 9 الا ربع.. طلعنا من البيت.. كنا انا وابوي وامي واخوي جاسم .. جاسم أكبر أخواني اللي راح معانا هالمرة.. كان هو من حزب امي وابوي ..وتقريبا انا بعد معاهم ..

وصلنا.. يايين بيت الناس من الصبح.. ابوي شكله كان يتحرقص من البارحة بالليل .. وما صدق ان طلع عليهم الصبح ..

بعد ما دقينا الجرس .. دخلتنا خدامتهم ..

يات امه ..

أم حمد : هلا بنسايبنا هلا ..

يات اتسلم علينا وهي مستانسة .. ما تدري ان يايينها بمصيبة من الصبح ..

أبو جاسم (بنبرة حادة): وين أبو .. نسيبنا ؟

أم حمد : أهو داخل.. أناديه لكم..

قعدنا فالميلس ..

راحت أم حمد تنادي ريلها ..

تمينا نحن يالسين ساكتين ما نطقنا ولا كلمة ..

دقايق ودخلو عمومتي ..

أبو حمد : حيا الله نسايبنا ..

أبو جاسم(يستهزء) : الله يحييك ..

أم حمد (رايحة شكلها بتييب لنا فوالة ) : اييكم الحين ..

أبو جاسم : لحظة .. اييلسي .. احنا ما يايين نتفول عندكم .. احنا يايين نحل مشكلة ..

أبو حمد : خير انشا الله .. عسى ما شر ..

أبو جاسم : والله الشر يانا بعد زواج بنتنا ..

ام حمد : عسى ما يكونو مختلفين ..

أبو جاسم : صدقت .. هم مختلفين من يومهم والا وين بنتي ووين ولدكم ..

أبو حمد (ما عجبته طريقة الكلام): وش قصدك يا ابو جاسم .. وش فيه ولدنا؟

أبو جاسم : والله هذا اللي يايين نعرفه ..

أم حمد : ولدي بسم الله عليه ما فيه شي ..

أم جاسم : عيل شو تسمي خفة عقله ..

أم حمد : أي خفة عقل ؟.. ولدي صاحي ..

جاسم : اللي عرفناه عكس هذا.. وطبعا من البداية كان لازم تخبرونا ..

أبو حمد : والله احنا قلنا لكم فالبداية.. احنا طالبين بنتكم .. وسالوا عن ولدنا ..وانكم ما سالتوا عنه هذي مب مشكلتنا ..

أبو جاسم : مو كل الناس تعرف ..

جاسم : لو صار هذا منا وخبينا عليكم شي فبنتنا ..كنتُ ترضون؟

أم حمد : طبعا لا .. بس انتُ قبلتوه ..

أم جاسم : والحين نحن رافضينه ..

أم حمد : وش تبون يعني ؟

أم جاسم : يطلقها ..

أبو حمد : هذا الحل اللي تشوفونه؟

أبو جاسم : بنتنا مو بايعينها ..

هند (بعد ما سمعت الحوار..بعدين سكتوا كلهم ): عمتي .. ممكن أعرف هو شو فيه بالضبط؟

كلهم صدولي .. يطالعوني بنظرات غريبة .. نزلت عيني .. وقلت يريتني ما رمست ..

أم حمد: ولدي لما كان فسن ال 11 صارله حادث.. واصابته يت براسه.. ومن ذيك الفترة وبعد العلاج .. عرفنا انه ينمو جسمياً بس عقله لا ..وهذا كل اللي صار..

أبو جاسم : هذا كله مايهمنا .. وينه هو.. انا بكلمه اذا انتو ما قادرين.. وبخليه يطلقها غصب عنه..

أبو حمد : أم حمد ..اتصليله .. خليه ايي ونخلص السالفة الحين ..

اتصلت له عمتي .. وبعد نص ساعة .. دخل البيت ..وبالتحديد الميلس.. لما شافني ..

موسى (مستانس من الخاطر) : هنوده .. انت هني؟!!!

أبو حمد : تعال نبيك بسالفة ..

موسى : وش السالفة ؟.. بترجع هند بيتنا؟

أم حمد : تعال حبيبي .. انشاء الله بزوجك احسن بنت ..

موسى : ما ابي .. عيل هند وين بتروح ؟

أبو حمد : هذي هي السالفة .. يا اولدي نبغيك تنساها .. عمومتك يبونك تطلقها ..

موسى : ليش؟

أبو جاسم : طلقها انت وخلصنا .. ليش ما ليش ..

موسى : أنزين أحنا قاعدين نسوي بيت حقنا نحن الاثنين ..

أم حمد : بشوفلك وحدة تستاهلك .. بس طلق وبتشوف الثانية عندك..

موسى : هند .. شو تقول ؟

الكل صد لي .. وانا ساكته ..

أبو جاسم : قولي .. قوليله انش ما تبينه .. بعد مو مصدق ..

ما عرفت شو اقول وبعد تمييت ساكته ..

أم جاسم : أهي أصلا ماتباك .. يعني لازم تقول ؟..

موسى : ليش .. بسبة السيارة خلاص .. ببيعها ما بخليها .. بس عاد ما نتطلق..

أبو جاسم : مو عشان السيارة وانت الصادق ..عشان قلة عقلك ..

موسى : شو يعني قلة عقلي .. مالي فاهم شي ..

(التفت لامه) : أميه شو السالفة شو يقصدون ؟

أم حمد (غلغلة عيونها ) : حبيبي ..

أبو جاسم : صدق انك ما تفهم .. يعني انت خبلة كذا تفهم احسن ..

جاسم: تراك أخرتنا ...يا الله خلصنا ..

موسى (حازة فخاطرة): اميه .. اطلقها يعني مثل حمود مع حرمته؟

أم حمد : هي مثل ما سوى حمد..

موسى : أنزين بطلقها.. بس ما بصير البيت لي وليها؟

أم حمد : لا .. البيت بيتك..

موسى : يعني عقب ما بشوفها ؟

أم حمد : لا ..

موسى : ولا بكلمها؟

أم حمد (عورها فوادها عليه) : لا ..

تم واقف يفكر ويفكر ..

موسى: يعني بعدين بتيبي لي حرمة ثانية؟

أم حمد (بدت تنزل دموعها بتصيح) : هي ..

مع اني كنت اتريا هاللحظة بس ما اخبي ان قلبي كان شوي وبيوقف ..وانا اترياه ينطقها ..

موسى : لااااا.. ما بطلقها ..انتو تقصون علي ..

جاسم (قام من مكانه معصب): صدق انك تحرق الاعصاب .. انت بتخلصنا والا لا؟

موسى : لا تصرخ علي .. أنا ما بطلقها ..على كيفي..

أم حمد : موسى حبيبي .. انت ما تحبني؟

موسى : بلى .. احبش واايد..

أم حمد : انزين .. عيل اسمع كلامي .. وطلقها .. احنا ما اتفقنا ان اللي يحب انسان يسمع كلامه؟

موسى : بلى .. انا حبش .. بس بعد احب هند .. يعني شو اسوي ؟

أبو حمد : يا ابوي .. البنت ما تباك ..

موسى : هي ما قالت .. لان نحن اتفقنا نبني بيت.. وبنسافر كل مكان .. كيف الحين ما تباني؟

ابو جاسم : ينيت انت .. عبالك بخليها تروح معاك ؟

موسى (بدا يتحسس من السالفة) : انا .. بطلع .. راسي يعورني ..

ادريبه.. كل ما يتهرب من شي يقول انه ما يحب يثرثر ..وانه تعبان ..وما كانت عندي الجرأة أحط عيني بعينه..

أم جاسم : انت شو مخلنك تعاند ؟.. وش حصلت من هالزواجة أبغي اعرف ؟..

موسى (يتذكر اشياء) : هند ..

بدت دموعه مبينه وهو منزل راسه ..

موسى (بصوت غصة) : هند ما تحبني .. وانا احبها .. يعني شو اسوي ؟.. أنا بعطيها كل شي .. بسوييلها كل شي .. هي تحسبني مينون.. وياهل ..

وراح يمش دموعه ..

أبو جاسم : عيل وش تطلع انشاء الله ؟

موسى: ما اعرف .. انا شو يخصني يوم استويت كذا؟

أم جاسم: ما يخصك .. بس احنا بعد ما مجبوريين ان نتحملك .. انا بصراحة اخاف على بنتي مثل ما انتو تخافو على ولدكم..

ام حمد : ولدنا مايسوي شي.. ما ادري وش قايلين لكم الناس عنه بس اهو ما يضر حد..

موسى :اذا قالت هند انا ما ابيه .. انا بسويي اللي تبغوه ..

أم جاسم : قولي له .. خبريه .. خلينا نخلص من السالفة ..

أبو جاسم : أنا ما ابغي اسمع شي.. قومي .. قومي أم جاسم خلونا نروح ..

أم جاسم : وورقة الطلاق .. وصلوها لنا ..

أبو جاسم : وبنتنا بتروح ويانا ..

قمنا كلنا وروحنا ..

اول ما وصلنا البيت ..

أبو جاسم : سمعيني أنت .. لا تفكري بعد أنش بترجعين لهالخبلة... سمعت؟..

هند : انشا الله ابوي..

أبو جاسم : يا الله انجلعي ..

رحت الحجرة .. شوفيه معصب علي ما ادري.. مع اني ما سوييت شي..

قعدت فغرفة امل وهنادي واتصلت لموزة ..كانت هي متصلة لي اربع مرات على مبايلي .. وما رديت عليها ..

هند : السلام عليكم ..

موزة : وعليكم السلام .. تو الناس..

هند : موزة ..يايبة لش الاخبار اول باول ..

موزة : ها شو صار قولي ..

هند : أمي وابوي صمموا على موسى الا يطلق .. بس هو ما رضى .. عاندهم كلهم ..

موزة : والحين؟

هند : انا بيت اهلي واهو ما ادري وينه .. بيت اهله ..فالشقة ..

موزة : هو ليش رافض؟

هند : قالهم ان يحبني وكذا ..

موزة : يا عيني عليهم اللي يحبوا .. بعد تقولي ما اباه ؟..

هند : شو اسوي السالفة طلعت من ايدي ..

موزة : طلعت من ايدش؟.. الا انت غبية .. قلت لش تحمليه وعيشي حياتش معاه ..

هند : والله ما ادري .. انا محتارة ..

موزة : بعدين يالطمة .. انت اذا تطلقت منو بياخذش .. انت تعرفي مجتمعنا .. ما يحتاي اقول شي بعد انت عارفة وانا عارفة ..فلا تصيري غبية .

هند : انزين مو لازم يكون العيب مني .. هم يعرفون ان منه هو..

موزة: منو يعرف.. بعدين يوم اخوانش وابوش سألوا عنه وش قالولهم ؟.. مو على اساس مدحوه؟.. والحين الغلط كله بينعق عليش .. بقولوا لو ما هي مب زينة كان ما طلقها ..والا موسى كلنا نعرف ان ريال ماشي منه ..

هند : موزة لا تخوفيني ..

موزة : تمي بعدين فكبد ابوش .. تراهم ما بدومون لش..

هند : يا ربي .. شو اسوي ؟

موزة : قومي رجعي لبيتش احسن لش..والحين شوفي انا وسالم بنسافر ..

هند : وين ؟

موزة : بروح قطر وعقبها السعودية وبعدين نرجع ..وبنفكر باماكن ثانية عقب..

هند : والله ؟.. تعرفي كان خاطري اروح ..

موزة: انت ضيعتي على عمرش .. والا هو ما قال ان بيوديش وين ما تبي؟

هند : انزين الحين شو اسوي .. ابوي ما بخليني ارجع له .. مستحيل ..

موزة : شوفي .. نصيحتي حاولي تقنعينهم .. وحنا انشاء الله سفرتنا ورا بكرة .. اذا تبون تسيرون خبرونا ..

هند : بحاول ..

موزة : ياالله مع السلامة ..

سكرت التلفون دون ما اقولها حتى مع السلامة .. شو اسوي مستحيل ابوي يخليني ارجع له .. مواز شجعتني على اني ما اخليه..

دخلت امل فجاة الغرفة ..

أمل : ها .. منو ترمسين ... اذا كنت ترمسين موسى ترا ابوي يذبحش..

هند (اجابة سريعة وهاديه وهي تفكر) : ما كنت ارمسه ..

أمل: انزين ياية اخبرش بروح بيت عمتي عليا ..

هند : ما بروح ..

أمل : انت مصدقة عمرش .. انت الحين ما لش شور ..

حتى امل هذي الياهل هذي ردودها علي .. معناه لازم فكر بروحي واحل مشكلتي بروحي ..

رحت لبوي.. يوم شفته قاعد يقرا الجريدة ويسولف مع امي ويضحكون ..قلت هذي فرصة على اني اتكلم معاه ..

بعدني ما دخلت .. لا حظوا وقفتي عالباب من برع..

أم جاسم : هند ادخلي..

دخلت وانا خيفانة كيف بفتح الموضوع ..

أم جاسم (تترياها تتكلم) : وش فيش تكلمي ..

هند (مرتبكة) : ياية اكلمكم عني انا وموسى ..

أبو جاسم (لما سمع اسمه..نزل الجريدة ) : علامه ؟

هند : ما ابغي اتطلق..

أبو جاسم (عصب فجاة ) : نعم ؟.. اشقلت ..عبالش السالفة لعبة ؟

أم جاسم : انت فكري عدل ان حياتش بتكون احسن .

أبو جاسم : فكرت والا ما فكرت .. اياني واياش اتعيدي هالكلام مرة ثانية سمعت؟

طلعت من غرفتهم معصبة رحت غرفتي وقعدت افكر .. جانب مني يقول كملِ طريقش اللي بديتيه وتطلقي منه دام ان امش وابوش مصممين ..

وجانب يقولي .. رجعيله .. والا بتمي طول حياتش يرافقش لقب المطلقة وما بتتزوجي الا واحد مثلش والا متزوج ..

قطع مروان تفكيري ..

مروان : عاجبتنش القعدة هني عيل اشوف ..

هند : مروان انا ما ناقصة ..

مروان: سمعيني يا هند .. وطيعي شوري .. رجعي لريلش وبيتش ..

هند : حتى لو بغيت ابوي ما راضي ..

مروان : كلميه .. جربي..

هند : يعني ما جربت؟..

مروان : المهم .. بما انش دخلتي نفسش فهالمشكله بروحش ..طلعي منها بروحش..

هند : لا تنسى ان محمد هو اللي رامس مب انا .. صح ان لو هو ما قال كنت انا بقول بس هذا ما معناه اني انا اللي سببت المشكلة ..

مروان (وهو طالع) : محمد هذا غبي ..

وطلع مروان ..

قمت ورحت معاهم ..هذا كله كان الظهر ..

فبيت عمتي ..

أم محمد : ما شاء الله هند هني بعد ..

منال : عيل وين موسى ؟

هند: ما ادري يمكن فالشقة ..

مريم : كان خليتوه ايي معاكم ..

منال : القعدة معاه حلوة ..

قامت امي وخذت خالتي على ينب .. راحوا يلسوا بروحهم ..

شكلها امي كانت تبي تخبرها بالسالفة ..

واحنا تمينا يالسين .. كنت متضايقة .. ما اسولف معاهم .. طريقة اجابة ابوي علي مساعة تدل على انه من سابع المستحيلات ان يوافق ..

بعد ما تغدينا عندهم .. حسيت بصداع ..

هند (تكلم نادية) : أبغي اروح البيت ..

نادية : ليش؟..تونا ايين ..

هند : راسي يعورني .. ابغي انام ..

جميلة : نامي عندنا ..

هند : لا ما عليه .. ابغي ارتاح فمكان فاضي ..

نادية :شوفيلش حد يوديش..

هند : بقول لمروان ..خبري امي ..

اتصلت له وقلت له يترياني برع ..

لما طلعت صادفت محمد مع حسن اخوي برع عند الباب ..

طفت وما سويتله سالفة ..

حسن : هند ..وين رايحة؟

هند : البيت ..

ركبت السيارة وروحنا ..

فالسيارة ..

مروان : فكرت؟

هند : افكر بشو ؟... راسي بينفجر..

مروان : الله يعينش ..

هند : تعبت من السالفة كلها ..

مروان : الله بيفرجها .. انت ارتاحي الحين ..

وصلنا البيت ونزلت ..

رحت بنام فغرفة امولة ..

رميت نفسي على السرير .. محلى النوم وقت التعب ..

مرت نص ساعة والا رن تلفوني ..

انزعجت .. مسكته وعيني مغمضة وسكّته .. ما ادري على شو هوست ..المهم ان سكت ..

خمس دقايق وحسين اني ابي اعرف منو المتصل .. لما شفته كان مسج مو اتصال ..

فتحت المسج ..

كان من موسى ..

" هنودة انا الحين بروح الشارجة ..مع السلامة"

قلت فخاطري ليش يعني يخبرني .. هو عارف اني ما اقدر اروح معاه ..

حاولت ارجع انام وما قدرت .. كنت محتاجة وقت اطول عشان ارجع انام .. بس قمت فجاة مرة ثانية.. قعدت .. اسويها ؟!!.. ياتني فكرة جهنمية ..

اطالع الساعة .. مرت ساعة الا ربع على المسج ..

بدا قلبي يرتجف ..لاني افكر بشي جنوني ..

ويبيله مجازفة ..

شديت حيلي واتخذت قراري ..

رجعت اطرش له مسج ..

"مر علي بروح معاك .." ..

فكرت الحين اللي سويته بدخلني فمشكلة ثانية .. بس ما يخالف .. اللي بطلع معاه زوجي ..

قمت جهزت شنطتي .. بسرعة قبل لا يرجعون اهلي من برع ..

خلصت .. بس موسى مارد علي اذا بيي والا لا ..

وانا افكر رن تلفوني ..

رديت عليه كان موسى عالخط .

موسى : هند صدق بتين معاي؟

هند : صدق .. بس يفضل لو تي بسرعة ..

موسى : وابوش وين ؟.. أنا أخاف منه..اذا شافني بيقطع ريولي ..

هند : محد هني .. كلهم بيت عمتي ..

موسى : خلاص أنا فطريقي لبيتكم..

هند: قبل لا توقف عند بيتنا.. أتأكد أول إن سيارة اخوي جاسم مو عند الباب .. وإذا شفتها خبرني ..

سكرت عنه وتميت اراقب الاجواء برع .. خفت ايون فجأة ..

هي كلها دقايق ووصل موسى .. ركضت وشلييت أغراضي ..هي كلها شنطة وحدة..

وأنا البس مبايلي فالشنطة كان يرن ..عشان ما يأخرني طنشته .. عند باب الحوي .. قلت بتأكد أول..عشان ما أشوفهم يايين فجأة وأنا طالعة ..

وايقت.. و إلا اسمع حد يناديني من داخل البيت ..

(بصوت عالي) : هند؟؟!!

 

 

[دايخه في دنيه بايخه]

يسلمووو و في انتظار البارت الياي

 

[MeeMoo]

يسلمووووو

[الوردة الحلوة]

الجزء [4]
جزء الخامس
تيبست لما سمعت الصوت .. بغيت أطيح عالارض .. ريلي ما كانت تشيلني ..
لما صديت ... كان مروان .. ما اذكر ان كان هني ..
مروان (يطالع الشنطة فايدها) : وين رايحة؟!!!
رجعت على ورا ماسكة قلبي .. من الخوف ..
هند (تتنفس بصعوبة : (بطلع مع ..موسى ..
مروان : دون علم أمي وأبوي ..؟
هند : مروان .. أنت أكثر انسان متفهم .. فحاول تفهمني..
مروان : حد يدري؟
هند : لا..
مروان : انزين روحي قبل لا ايون ..
هند (وهي تحب أخوها على خده ) : مشكور .. مشكور..
بسرعة تلاحقت عمري وطلعت .. ركبت السيارة..
هند : روح .. قبل لا ايون..
موسى (ببرود) : ليش مستعيلة؟
هند : قلت لك ..قبل لا ايون .. اذا شافني ابوي بمرمط فيني الارض..
تحرك اخيرا ..
موسى : انت متأكدة أن تبي تروحي معاي؟
هند : اذا ما تبغيني نزلني من الحين ..
موسى: لا .. ما اقصد ..
مشينا للفجيرة .. وقف عند شيشة البترول ..
موسى (يكلم العامل): صب ب40..
كنت قاعدة اتعبث بالراديو.. قعد يمطط كمي ..
هند : شو فيك ؟
موسى (ياشر براسه) : هذيلة مو اهلش..
لما صديت لهم كانوا واقفين بالسيارة جدامنا .. على طول نزلت راسي لتحت قد ما اقدر..
هند (خفيف) : موسى .. شافوني؟
موسى : ما ادري .. يمكن ..
هند : انزين لا ترمس..
موسى (يبتسم) : وش فيش خايفة؟
هند : أقولك اسكت .. بيشوفوك ترمس بروحك بيقولون انك خبلة .. وانت ناقص؟!
موسى : أنزين انا مو قاعد ارمس بروحي ..انت وياي ..
هند : اشششش..
موسى : بنزل .. بروح اشتري شي..
هند : لا .. اذا شافوك اخاف ينتبهولي .
يوم فتح الباب .. اسمع حد يقول ..
موسى .. موسى ..
هند (خايفة ): موسى .. منو؟
موسى : هذا اخوش حسن .
هند : انزل قبل لا اييك ..
موسى: انزين هو ياي ..
هند :انزل ..
ما لحق ينزل الا ووقف حسن عند جامة موسى .. غشيت ويهي وسويت نفسي ادور على شي تحت ..
حسن: شخبارك ؟
موسى : الحمد لله ..وانت ؟
حسن(يطالع هند) : الحمد لله!!!
موسى : هذي سيارة ابوك ؟
حسن(وهو مصمم يعرف منو اللي قاعدة ) : لا .. سيارة جاسم ..
موسى : زين ..
خلص صب البترول .. ودق على السيارة يعني روح ..
موسى : انزين عيل بروح ..
حسن : منو هذي؟
موسى : هذي؟.. هند ..
حسن (يبتسم): روح.. روح قبل لا يشوفني ابوي وياك ويسويلي سالفة ..
موسى : يعني هو ما شافك ؟
حسن : أبوي نظره ضعيف .. عشان كذا هو ما منتبه انا مع منو واقف ..وجسوم داخل يشّرى ..
موسى : انزين ما عليه .. انا بروح ..
حسن : انا ادري انت تزوجت وحدة ثانية صح؟
موسى (يضحك) : لا تخبر حد..
وحرك السيارة .. لما رحنا بعيد على الشارع العام .. قعدت ..
هند : انت تبغي توهقني؟!!
موسى : لا .. بس هو سالني قلت له الصدق.. بس لا تخافي اخوش غبي عباله اتمصخر..
هند (تدزه على كتفه): لا تعيب على اخوي..
موسى (يضحك): ما اعيب عليه.. ترا هو ربيعي .. عادي احنا نقول أي شي لبعض ..
هند : وش تقولو عاد؟
موسى : هو يقولي انا خبلة .. وانا اقوله غبي .. عادي..
هند : تراكم كلكم نفس العقول..
اهم شي ما يكون ابوي والا جاسم شافوني ..وانشا الله يكون حسن مثل ما يقول عنه موسى .. افضل يكون غبي على ان يخبر علي..
رحنا فطريقنا .. ما فكرت باغراضي .. اني ما شالة غير كم لبس فالشنطة ..
هند : موسى .. تعرف موزة وش قالت لي؟
موسى : لا ما اعرف .. وش عرفني وش قالت لش..
هند : انزين .. قالت ان هي وسالم ورا بكرة انشا الله بيروحون قطر والسعودية ..
موسى : شو اسوي يعني ؟
هند : افهمها .. ودي لو نكون رباعه..
موسى : وش يعني رباعه؟
هند : يعني نروح وياهم .
موسى : قلتي ورا بكرة؟
هند : هي .. ما في شي يشغلك..
موسى(يفكر): بشوف.. بخبرش بعدين ..
سكت عنه.. وسكتنا وايد .. قعدت أفكر بموقف اهلي يوم دروا اني طلعت ..
عور فوادي ابوي ..
هند: موسى رجعني البيت..
موسى (مستغرب) : وش؟.. ارجعش البيت ؟
هند :غامضني ابوي .. ما حركة اللي سويتها فيهم ..
موسى: توش فكرتِ؟.. صارت لنا الشارجة اقرب من كلبا ..
هند : ما ادري شو صار فالبيت .. انت ما تعرف ابوي اذا عصب يهيج عالبيت كله ..
موسى : اعرفه .. اذكر يوم طردني من بيتكم.. خفت منه ..
هند (بصوت خفيف) :ابغي اعرف انت من شو ما تخاف..
موسى : شو قلتِ؟
هند : ولا شي..
موسى : انت ماخبرتي حد فيهم؟
هند : لا .. مروان بس يعرف بس ما اعتقد ان بقول لهم الا اذا ضغط عليه ابوي..
موسى : اتصلي لهم ..
هند : ما عندي الجرأة أني أتصل ..
يوم وصلنا الشارجة ..
رن مبايلي.. شفت المتصل كان من البيت والله اعلم منو فيهم متصل..
رديت عليهم ..
تميت ساكته ..
هنادي وأمل يضاربون على التلفون ومنو فيهم بيتكلم ..
هند: ألو..
هنادي: هنود أنت وين؟
هند : أنا فالشارجة ..
هنادي: فالشارجة مرة وحدة؟!!.. انت وش سويتِ؟
هند : شو صار؟
هنادي : أبوي يدور عليش ..ويتحلف فيش..اذا شافش بتنتهي من الدنيا .
هند : وامي وجسوم؟
هنادي : جاسم راح يشوفش فشقتكم وراح بيت اهل موسى .. عبالهم أول شي أن صار فيش شي .. بس يوم شافوا الشنطة اختفت عرفوا انش طالعة مع احد .. يعني مع موسى ..
هند: وابوي الحين لما عرف ..ما قال شو بيسوي؟
هنادي: أول شي قاله جاسم بلغ الشرطة على اساس ان شالنش غصب عنش.. وبعدين فكروا ان ما ينفع..
هند : عيل شو يبوا يسووا؟
هنادي : ما أدري..
شدت أمل التلفون ..
أمل: ما عليه هند .. رحتو الشارجة من دوني .
هنادي (بصوت ينسمع عالخفيف) : يعني هذا اللي استوعبتيه من السالفة كلها .. هاللي يهمش؟
أمل: أنت وموسى وعدتوني ..
هند: أمولة حبيبتي .. أنا روحي طالعة شردة .. بعد تبيني أوديش معاي؟
امل : وش يعني .. شو بصير..
هند: ولا شي بس انسي انش ترجعي البيت .. تكفي وحدة من العايلة منبوذه .. بعدين ..أنا على الاقل عندي ريل.. بس انت مع منو بتعيشي؟
رجعت هنادي خذت السماعة ..
هنادي: المهم أنصحش ما تردين .. على الاقل لين يهدا الوضع..
هند : ما عليه..
هنادي: مع السلامة .. وسلمي على موسى..
سكرت عنها التلفون ..
موسى : وش صار؟
هند : ماشي .. بس مثل ما تعرف ابوي معصب..
موسى: هذا فندق بننزل فيه ..
هند: يكون احسن لاني ابي انام..
موسى: انا بروح السينما ..
هند: على طاري السينما..أمل تعاتبك لانك وعدتها ان تيبها معاك وخلفت وعدك..
موسى: أوووه ..نسييييت.. بس ما عليه بروح انا هالمرة ..مرة ثانية اييبها.
هند : متى هذا ؟.. أنت وايد تحلم ..
موسى :انت ليش مشاءمة؟ .. انشاء الله بكون قريب.
هند : والفيلم بيترياكم أنتو لين تو..
موسى: ما عليه اذا ما هذا الفيلم ترا في غيره .. والا بنشوفه فسينما ثانية .
هند (وهي على السرير) :كيفكم ...
عدت الليلة على خير ..وموسى كنسل السيرة عشان ما تزعل أمل..

اليوم الثاني ..
قمت الصبح على صوت من مبايل موسى ..
كان هو غاط بالنوم .. وما مسوي له سالفة ..
قمت وشليته .. كان مسج ..
ما فتحته ..رديته مكانه ..
دقايق ووصل المسج الثاني ..
قمت على طول ..
هند (تهز كتفه): موسى .. قوم.. ياينك مسج.
موسى (قام بالعافية) : شو ؟
هند: مبايلك .. يايتنك مسجات .
موسى (رجع ينام ) : خليه يولي..
المسج الثالث ..
هالمرة قام بروحه ..
فتح المسجات .. قراها بشكل سريع .. رما المبايل ورجع ينام ..
هند :منو؟
كنت اسأله بس هو رجع ينام ..
أنا من أقوم من النوم ما قدر ارجع انا .. عشان كذا قمت ..
رحت لبست ملابسي .. قعدت اشوف الشنطة اللي ما فيها الا كم لبس ..
هند : موسى قوم .. روح ييب لنا شي نتريقه..
ما سوالي سالفة ..
هند : موسى .. ابغي اروح السوق بعد .. ما عندي ملابس ..
يوم ما قام رحت فتحت التلفزيون .. قعدت اقلب القنوات .. طبعا ما شي الا كم قناة تنعد عالاصابع ..
تميت يالسة جدام التلفزيون ساعة .. بعدين قام من النوم متكاسل .
موسى: وش الريوق؟
هند: منو قالك ان في ريوق؟
موسى: خلاص الحين اروح اشتري ..
يوم قام موسى.. رن مبايلي ..
رديت عليه كانت موزة ..
موزة: وش الاخبار اللي سمعتها؟
هند: وعليكم السلام ورحمة الله وبركاته..
موزة : نسيت .السلام عليكم .. وش صار؟
هند :وعليكم السلام ..ما صار شي..
موزة : شو ما صار شي؟.. خبر شردتش من بيت ابوش انتشر فكلبا كلها ..
هند : على جريدة اليوم؟..انا ابغي اعرف هذيلة الناس ما عندهم شغلة ورمسة الحين غيري انا؟
موزة :انزين انت وين؟
هند : فالشارجة..
موزة : وانا بعد فالشارجة مع سلوم .. نجهز حق السفر..
هند : انا قلت لموسى عن السفر فقالي بفكر..
موزة : حاولي تقنعيه .. بعرفه على سالم ..
هند : ما يهمش..
موزة (مستعيلة ): انزين سكري .. عقب اكلمش..
بعد ما سكرت .. رجع موسى من برع..
موسى : يا الله .. نتريق..
نزل الاكياس والمبايل وراح يغسل ايده ..
هند : موسى .. ما فكرت؟..
موسى: بشو؟
هند(وهي تاخذ مبايلة): بالرحلة ..
موسى : أي رحلة ؟
هند (وهي تقرا المسجات ..وبهدوء) : ق..طر..
تلعثمت ووقفت فجأة.. لما شفت المرسل ..قريت المسجات مرة ثانية .." صباح الخير..".. "وينك وحشتنا ..".. ومسجات غبية ..كانت موجودة من قبل ..
رحت اتأكد من مبايلي اذا كان نفس الرقم اللي اعرفه والا لا ..وانصدمت يوم تأكدت ..وطارت شرارة من راسي..
موسى (وهو ياي .. وشافها فاتحتنه) : أي رحلة ؟
طالعته بنظرات .. وتميت ساكته ..


الجزء السادس – والاخير
خذ المبايل وشافني فاتحة عالمسجات ..
موسى : شو فيش؟
هند : منو منولة ؟
موسى (يضحك) : هذي منال بنت عمتش..
هند : من متى هي تطرش لك هالمسجات؟
موسى : ما أعرف ..من زمان..
هند : وانت ترد عليها؟
موسى : مرة وحدة بس .. قلت لها انت منو..قالت لي منال..
هند (وهي قايمة من مكانها) : وانت مستانس؟!!
موسى :انا مالي خص .. هي اللي تطرش لي..
رحت قعدت على السرير..
موسى : تعالي ..والريوق؟
هند : ما ابغي..
موسى : انت ليش كله تزعلين؟.. انا ما احب كذا.. برايش ما برمس وياش ..
هند (حست ان كلامه صحيح) : أنا حسابي ما وياك .. ويا هذي منالوه..
موسى(وهو يلف براسه): انا قلت ما برمس وياش..
هند(قمت وقعدت صوبه): عطني باكل وياك ..
وبعد الفطور..
هند: موسى .. انا ابغي اروح السوق .. لان ما عندي ملابس تكفي..
موسى : اليوم بروح ..
هند: بروح كلبا؟!!..ليش؟
موسى : انت ما قلت انش تبي تروحي السفر مع موزة ؟
هند: يعني انت موافق؟
موسى: هي .. بس بروح بطيارة؟
هند : لا.. يبون يروحون بسيارة..
موسى: أحسن .. لأني ..
هند: أدري تخاف من الطيارة..
موسى (يضحك) : صح ..
هند : انزين عشان كذا لازم نجهز للرحلة .. وبما ان نحن هني فالشارجة بنخلص شغلنا..
موسى : ما عليه .. قومي نروح الحين .
هند : توك ما بترمس وياي ..
موسى: حمدي ربش اني بسرعة ارضى ..
هند(تضحك): الحمد لله...
موسى: قومي بعد شو.. والا بغير رايي..تراني انا بعد عندي مزاج..
ما فهمت شو يقصد بالمزاج.. مع اني ما تكلمت معاه عن المزاج أو شي ..اول مرة اسمعه يقولها ..
طبعا ما صدقت يوم قالي قومي.. جهزت قبل لا يغير رايه وطلعنا ..
فالسوق صادفنا موزة وسالم.. وخبرناهم ان بروح معاهم ..واستانس موسى وايد يوم عرف سالم ..
الشي الثاني اللي صار هناك.. اني اكتشفت ان موسى عنده ذوق فتركيب الالوان اللي تخص الاشياء النسائية.. فخذيت رايه فكل لبس وشنطة ونعال او جوتي اشتريته ..
وذيك الليلة روحنا كلبا ..
موسى (وهم واصلين): أول شي تجهزين اغراضنا بعدين تنامين ..
هند : وانت؟
موسى : انا بعد بساعدش ..
هند: عيل ليش تتكلم بالمفرد..
موسى : أي مفرد ؟..
هند : انسى السالفة ..
وصلنا البيت (الشقة) .. ورحنا نجهز وغيره .. بعدين نمت على طول لاني ناشة من الصبح وما نمت ..
عالصبح اتصلت لي موزة ..عشان نستعد للسيرة..
ونششت موسى .. لان اتفقنا ان الساعة وحدة بنطلع من هني..
كنا جاهزين .. الساعة عشر ونص قررت اروح بيت اهلي .. مايصير اروح وابوي مب راضي علي..
هند : موسى ودني بيت ابوي..
موسى : ليش .. ما بسيري؟
هند : ما هذا قصدي .. بس احنا بنسافر .. وابوي ماراضي علي ..
موسى : انزين شو يعني ؟
هند : يعني نفترض لا قدر الله صار علينا شي فالطريق ..وش بسوي بعدين اذا مت وابوي غاضب علي..
موسى (مستغرب) : عيل اول بروح بيت اهلي..
هند : انا قلت قبل..
موسى : انا اللي اسوق السيارة ..
هند : انزين يا الله..
رحنا بيت اهله ..
موسى : أبوي انت راضي؟
ابو حمد : راضي على شو؟
موسى : راضي .. يعني راضي..
أبو حمد : يا اولدي انا ما عارف انت لشو تبغي توصل ..
موسى : هند قوليله اللي قلتيه مساعة ..
هند (تضحك) : عمي .. موسى يقصد اذا كنت راضي عليه ..
أبو حمد(يبتسم) : هييييي.. كذا يعني .. راضي عليك انشاء الله دنيا وآخرة..
موسى(مستانس) : وانت بعد اميه؟
أم حمد : من يومي حبيبي وانا راضيه عليك..
وسلم موسى على خوانه كلهم ..بعدين طلعنا ..
فالسيارة..
هند: أنا خايفة ان ابوي من النوع اللي ما يرضى ..
موسى (وهو يضحك على الكلمة –نوع -) : انت ما تعرفين ابوش من أي.. نوع؟
هند: ما ادري .. اذكر مرة زعل من جاسم.. وما طول الا ورد طبيعي معاه .. وهذي اخر مرة كان زعله من مروان لان تدخل فسالفتي.. والحين ابوي عادي معاه..
موسى: خلاص عيل معناه بيرضى..
هند : الله يسمع منك .. بس لحظة.. قبل لا نروح بيت ابوي .. ودني بيت عمتي عليا..
موسى : ليش ..أول ما بنسير لابوش؟
هند : لا ودني لبيت عمتي اول .. عندي حساب اصفيه..
ورحنا ..
فتحت لي الباب الشغالة ..
الخادمة (يوم عرفتها) : كله ما في موجود ..
هند : كلهم؟
الخامة : ايوه .. بس منال ..
هند : هذا المطلوب ..
دخلت على طول .. رحت غرفتها يوم ما شفتها فالصالة ..
منال (لما شافتها ) : هند ؟؟.. هلا تفضلي ..
هند: أنا ما ياية أتفضل .. ياية اقولش كلمتين ورايحة ..
منال: كلمتين شو؟
هند: سمعي ..سوالف المسجات اللي تطرشيها لموسى .. كلها أعرفها..
منال: أي مسجات؟
هند (تقربت منها أكثر وهي معصبة ): لا تسوي نفسش ما فاهمة ..
منال: هو بعد يطرش لي ..
هند: لا تكذبين .. أنا أعرف موسى عدل ..
منال: انزين مني والا منه .. اللي اعرفه انكم بتطلقون ..
هند: لا والله .. خاب ضنش يا حلوة .. ريلي وما بخليه..

[MeeMoo]

 

 

يسلمووووووو

 

وناطرينج

[عاشقـــ البحر ــــة]

تسلمين

وننتظر التكمله

[عاشقة مانشستر يونايتد]

ثنكس قلبو عالقصه

 

في انتظار التكمله

[نادين]

يسلموووووووووووو

نبي الباقي

 

 

 

تــحــيــاتــي...

نــــــاديـــــــن...