شوكولاته فرنسية Posted يناير 24, 2007 Author Report Share Posted يناير 24, 2007 تكملة الجزء الثالث صباح الجمعه الساعة 9.30 الكل ناش ويالسين يتريقون ويسولفون عن سالفة سلطان أبو سلطان: بغيت أخبركم عمكم راشد يوم الأحد بيون عندنا سلطان: غريبه العاده مايون إلا في المناسبات أبتسم بفرح بوسلطان: ترى بمناسبه بيون.... الكل سكت ويتريون يعرفون شو عندهم..... أم سلطان: ها بوسلطان شومناسبته بعد هذه..... بو سلطان: بيون يخطبون عفراء.... الكل هدوء وكل واحد يطالع الثاني وعفراء فاجه عيونها مستغربه.... أم سلطان : منو من عيالها.....؟ بوسلطان: خليفة كبر ولدج سلطان توه راد من الخارج خلص دكتوراه وتوظف في الجيش من شهرين بس راجع البلاد وخبر أبوه بالأسم يبا عفراء عفراء ويها منجلب فوق تحت وتذكرت خليفة يوم كانوا صغار يلعبون وكان دوم يلعب وياها انه ريلها ومحد بياخذها غيره....وتذكرت شكثر هو يخاف عليها من يوم صغار بس هي تحرت هذه لعبة وانتهت بمجرد كل واحد شاف مستقبله ورجع وهو حاط في باله عفراء وبس .. سلطان مستغرب: ليش عفراء مب هند يعني؟ بوسلطان: والله على رمسة أبوه يقول هو يباعفراء لأنه يباها من يوم صغار عفراء: أنزين أبويه هالرمسه من زمان يعني كان عمرنا تقريبا 10 سنوات بوسلطان ما يحب حد يكسر كلمته: عفراء ولد عمج ألزم فيج وبيصونج وبيحافظ عليج وأنا عطيت عمج كلمة ومبا فضايح جدام أخوي وعياله أم سلطان: شو فيه خليفة ماشاء الله عليه ما قد مرة سمعنا عنه شي عفراء كانت متضايجة بس ما تعرف من شو ولا تبي تحكم على خليفة قبل لا تشوفه وتسمع منه ياترى خليفة تغير وغيرته الدارسة والغربة ولا شرات ما هو .....؟ سهيل وهند مادخلوا بس هند حست انه عفراء متضايجة فدخلت عشان تريح اختها شوي هند: الله يعين خطوبتين في أسبوع واحد كشخه محد تجاوب وي رمسة هند بو سلطان ظهر حجرته وتمت أم سلطان والشباب يرمسون عادي كأنه هالشي من حق ولد عمهم بس عفراء كانت حاسه بنغزه في قلبها وخايفة من خليفة هند خذت عفراء وساروا حجرتها...... هند: شو بلاج عفاري ليش متضايجة المفروض تستانسين الكل يعرف منو خليفة والكل يمدحه من زمان وانتي أكثر وحده احتكيتي فيه؟ عفراء: اوكيه ما قلنا شي....بس قلبي ناغزني ما أعرف ليش... أدري أنه ولد عمي ستري وغطاي بس هل هو فعلا خليفة اللي عرفته هند تبتسم : شدراج يمكن السنين غيرته وبتشوفينه غير وأحلى من قبل عفراء: هزرج جي......؟ هند مابا أحساسي وخوفي وتوقعاتي تسبق اللي بشوفه بعيني هند: مافهمت شو قصدج؟ عفراء: تعرفين الشباب إذا سافروا يدرسون برى شجايل يردون لا مذهب لا سنة لا قبايل ينسون كل شي لا غيرة وماخذين كل شي عادي وفري وتحضر بس من زوايتهم الصعبه ويردون ناس مايعرفونهم لا اهلم ولا ناسهم... هند: شودراج يمكن خليفة تمسك بشخصيته وماخلا شي يدخل ويمحي عاداتنا وتقاليدنا هب شوي عفروه صعب ترى الإنسان يتخلى عن جلده وبلاده عكس يمكن يشتاق للبلاد عفراء: يارب هند الله يسمع منج والله يستر وما يخيب ظني فيه .... مر اليوم ببطئ وبال عفراء مشغول في خليفة ولد عمها إلا شاله عنه ذكريات حلوه مع خليفةلما كانوا صغار بوظبي... وتخاف انه سفره يشوه الصورة اللي هي راسمتها له طول هالسنين بس بنفس الوقت فرحانه انه خليفة حاط في باله الإنسانه اللي عرفها من يوم صغير.......... يلست روحها في غرفتها مستانسه أنه ميثا وسلطان الله بيجمعهم وخليفة وهي بنفس الأسبوع سبحان الله .... يلست وشغلت F.M أغنية ميحد ( لاتذكرني بحبك ياغناتي ...ولا تذكرني بماضيك الجميل..في صدى ذكراك بقزر حياتي ...مستحيل أحب غيرك مستحيل..أنت عمري وأنت أغلى ذكرياتي...أنت في قلبي ولا غيرك خليل...أنتي عيني اللي بها شفت البهاتي وأنتي لي في مقلة عيوني نزيه...) ( الجزء الثامن) يوم السبت الكل نشيط وفرحان وخاصة سلطان لأنه خلاص صار متوثق من موضوعه وي ميثا سهيل يسولف وي هند لأنها بداوم الجامعه.... سهيل: هند عاد هالله هالله في عمرج الغالية ترى بنشد موزة عنج خخخخخخخ هند: مايخصك في البنت شلها من راسك عفانا الله سهيل: والله ماأشلها أبا أشذ عن القاعدة وآخذ وحده من برى العائلة ذبحتونا نبا نحسن الإنتاج شوي ههههههههههه سهيل وهند يضحكون سلطان: اووه أخوي سهيل يفكر ياخذ وحده من برى العايله زين زين سهيل: أكيييييد لاعة جبدونا هذه بنت عمك ويطيحون يمدحونها والمفروض انها ما تظهر برى ومدري شو آخر شي تطيح في جبدك يا عمي خلنا بعيد هند: حتى أنا صراحة وي سهيل في كلامه الله قال وجعلناكم شعوباً وقبائل ..هب حصرياً وعلى البنت ولا الريال ياخذون من نفسه العائلة ولا بتحل عليهم لعنة الآباء الأبديه ههههههههههه يضحكون كلهم تنزل عفراء مسهمه وتفكر في موضوع خليفة ولد عمها عفراء: السلام عليكم الجميع: عليج السلام هند: عفراء أنا عن نفسي صراحة باخذ من برى العايلة مبا من شباب عائلتنا الفاشلين ههههههه سهيل: شو قصدج فهد فاشل هند: أقولك يوم تطري حد أطرح واحد صح مب هذا الغبي سلطان: هند عيب فديتج مهما كان ولد عمج هندتكمل كلامها: أقولك سهيل ... لا تخليه ينسى نفسه ويفكر فيني ها سهيل من صدق عصب لأنه فهد قريب وايد منه: أقولج تحمدي ربج لو فكر فيج اصلا بعدين ما خليتي شي في الريال صاحي وهو من الأساس ماقال ولا رمس لأنه يحب وحده ثانية وبياخذها أرتحتي هند تضحك: وي يحليله يعرف يحب الله يهنيه... سهيل: أقول...مب حلوة منج يالجامعية يالمثقفة ياأم مشاعر حساسه تستحقرين أي شخص أو تتمصخرين عليه وخاصة في مشاعره مهما كان إنسان حاله حالج اسمحولي انا بظهر قبل لا أغلط ..... هند: ربي يحفظك يا المتنبي سلطان : هند شو فيج سهيل ماقال شي عشان ترمسينه بهالأسلوب هند: أنا أرمس عن فهد ما رمست عنه عفراء: ظنتي تعرفين علاقة سهيل بولد عمي فهد بعدين أقولج أياً كان الفارق اللي مبينج وبين أي إنسان المفروض ما تتطالعينه من فوق لأنه له مشاعر وأنتي لج مشاعر فحرام الرمسه اللي قلتيها عن فهد والله مايستاهل سلطان: اتصلي في سهيل قبل لا يوصل الدوام وأعتذرليه يالله عفاري قوم بوصلج عفراء: أحلف أنته بس ...ياااااسلااااااام كله هذا عشان عيوني سلطان: دخيلج لوعتي بجبدي قومي انزين يالله بتأخر على الدوام ظهروا عفراء وسلطان ويلست هند تفكر في الرمسه اللي قالتها وأن هذا رايها في ولد عمها اللي سهيل نفسه مرات يتمصخر عليه وهي من خلال هالشي رسمت صورة عنه..بس هل فعلا هالشي يعطيها الحق أنها تستخف بشخصية أي إنسان وتعتبره انه مايعرف بأصول المشاعر والحب؟ أتصلت هند بسهيل ...... سهيل: خيررررررررر...نعم فيه شي نسيتي تقولينه عسب اخبره راي بنت عمه فيه هند : أفا عليك ما يطيع زينك .... سهيل حبيبي والله آسفه بس هذه وجهة نظري؟؟؟ سهيل: طاع هذه مصدقه عمرها أقولج يوم تحسين نفسج غلطانه وتبين صدق تعتذرين دقي اوكيه ..صح نسيت أقولج من تواضع لله رفعه بااااااي هند استغربت ردة فعل سهيل القوية..... سوت طاف وسارت الجامعه في الطريق وي سلطان وعفراء.... وصلوا المدرسة... وقبل لا تنزل عطاها الورقه عفراء: اووويه شو ها براشيم خخخخخخخخخخ سلطان: ها ها بايخه ...عطيها ميثا ولا تفتحينها اوكيه يعني عن اللقافه عفراء: لا اسمحلي انتو بعدكم مخطوبين ما ملجتوا عسب تسوي هالحركات سلطان: بتعطينها ولا أنزل روحي اعطيها عفراء: خيييييييييييبه مقوووووواك سلطان : خيبه تخيب العدو اسمعي الكلام يالله أخرتيني يعلج العافية عفراء تضحك : إن شاء الله دير بالك سلطان : وانتي بعد وسلمي روح سلطان دخلت عفراء المدرسة..... شافت ميثا سلمت عليها ....ويلسوا في الإدارة عفراء: شحالج ميثوه مبروك حبيبتي ويارب اخوي سلطان يحدد العرس عطول ميثا: الله يبارك فيج والفال لج عفراء: تغير ويها.... آمين ميثا: عفراء شو بلاج تغير ويهج عاد أنتي يبين فيج بسرعة من تستهمين؟ عفراء: مابتصدقين لو قلت لج؟ ميثا: لا ورفجة أصدق قولي عفراء: أنا بنخطب يوم الأحد ميثا تفتح عيونها: لا هب صحيح تمزحين صح؟ عفراء تبستم: لا والله ياميثا صدق ولد عمي خليفة ميثا تحضن عفراء: مبرووووك الله روعه عفاري أنا وأنتي صدق ولا في الأحلام..وليش أنتي متضايجة؟ عفراء: خايفة يكون متغير مب خليفة ولد عمي اللي عرفته يوم كنا صغار ميثا تضحك: عفاري والله أنتي تفكيرج مال أول خلاص الحينه كم سنة مرت.... الريال كبر وصار له شخصية غير ويمكن تغير للأحسن يعني لا تصيحين قبل لا طيحين عفراء تضحك: صدقج والله...اوه صح نسيت أقولج ميثا: خير عفراء: الخير بويهج فديتج...فيه شي من عند سلطان لج مدري تبينه ولا أرده ميثا فرحانه: قولي والله وين بسرعة يبي؟ عفراء: أول شي يسلم عليج وقالي أعطيج هالورقة عاد شو فيها مدري يحليله أخوي من شافج ما يدري وين الله حاطنه ههههههههه ميثا تاخذ الورقه: حرام عليح عفروه سلطان غير عفراء: هيه صح غير.... أنا بعد أقول جي هههههههه تدخل الوكيله : أبله عفراء فيه واحد يبا يشوفج في مكتبج عفراء: إن شاء الله يايه مشكورة ميثا: منو هذه بعد من صباح الله خير شكله ما عنده شغل؟ عفراء تنقع من الضحك: اسكتي أنتي اقري وخبريني شو كاتب الشاعر يضحكون وتظهر عفراء من مكتب ميثا وتسيرمكتبها.... عفراء: السلام عليكم .... الريال الغريب: عليج السلام أنتي عفراء سعيد الإخصائية الإجتماعية هني صح عفراء مستغربه: هيه نعم أخوي أقدر أخدمك في شي؟ الريال يتأمل ملامح عفراء لدرجة انها لاحظة وزاد ارتباكها *-*: أخوي مرة وحده ليش عاد هالتكلفة ؟ عفراء بدت تعصب: للمرة الثانية وما بعيد رمستي بشو أقدر أخدمك الريال الغريب: أفا فيه وحده ترمس ولي أمرها هالشكل عفراء بعصبية: نعم الظاهر نسيت نفسك تفضل أطلع برى الريال: عفراء في ذمتج ما عرفتيني منو أنا....؟؟ أيلسي لا تفضحينا يلست عفراء وحاولت تمسك أعصابها: لا ما عرفتك ولو فيه شي أقدر اسويه لك تفضل أما تنسى نفسك وأنت ترمسني فأقولك اسمحلي وما عندي وقت أضيعه في الرمسه الفاضية الريال معجب بأسلوب عفراء القوي: مستويه قوية من يوم يومج وأنتي جي اسميني انضربت منج يوم كنا صغار.... عفراء أنقبض قلبها: صغااار؟ أنت منو؟ الريال وبكل ثقة: خليفة ولد عمج يا عفراء عفراء ويها يعورها من كثر القفطة ومب عارفه شو ترد خليفة: بصراحة ماخيبتي ظني فيج شحالج عفراء: خليفة الله يهداك هذا وقته ياي الدوام بس عسب تقولي هالرمسه خليفة: باجر بكون خطيبج مافيها شي عفراء: خليفة الله يخليك هب هني لو سمحت خليفة وهو يمزح: شو بتضريبني بعد شرات قبل عفراء تحاول تخفي إبتسامتها: لا محشوم خليفة: هب بشورج المهم نتشاوف باجر والسموحة منج بس شوقي وقلبي ما خلوني بحالي والحينه ارتحت شوي عفراء: الحين ضارب خط من بوظبي للعين بس عسب تقولي ولي أمرج ومدري شو؟ صدق متفيج؟ خليفة يحاول يكتم الضحكة: وماشاء الله استوى لسانج أطول شو مستويه لبوة ؟ عفراء: خليفة عطيتك وايد من وقتي ترى أحسن تروح قبل لحد يرمس عليه من المعلمات مب ناقصة خليفة: ماعاش اللي يرمس على حرمة خليفة... بعدين عفكرة مب وقتج بس اللي بتعطيني إياه عمرج كله لا تنسنين هالشي عفراء: أستوالك راس والله وصرت تآمر خليفة هو معصب: شكلي غلط يوم ييت لكن هالعناد وطولة اللسان يبالج ترويض وعلى أيدي إنشا الله يابنت سعيد عفراء: والله مشكلة سرت برى وعلموك ترمس خليفة : أشوفج باجر ولج حساب ثاااني عفراء : خوفتني دخيلك صدق مابرقد اليوم خليفة: عفراء أنا من الصبح أرمسج بأحترم ولا الغرب أولياء أمور الطالبات تعاملينهم غير عني؟ عفراء بغياض: تبا الصراحة هيه لأنهم مايتجروأن ينسون نفسهم يون المدرسة بس عسب يدقون سوالف ومتفيجين؟ خليفة نش معصب : أسلم عليج سلمي على عمي عفراء: يوصل يا ولد راشد خليفة ظهر وعيونه كلها شراروكان في نفسه ناوي يسوي شي لكن بتعرفه عفراء عقب يوم بي خليفة يخطبها بالباجر دخلت ميثا بسرعة ولقت عفراء مستشيطة للآخر ...... ميثا: شو بلاكم منو ها المزيون صراحة ماشاء الله عليه عفراء: دخليج شو فايدة الأشكال دام النفس خايسه والخشم فوق ميثا: منو انزين؟ عفراء: تخيلي خليفة ياي من بوظبي للعين وفي دوامي بس عشان يقولي انه ماقدر يصبر لين باجر ...صدق ناس فايجة ميثا ناقعه من الضحك: صراحة هالريال قوووووووي أثره في حد أقوى عن سلطان عفراء: إنشالله ميثوه منقولة الرمسه شوفي سلطان شو بيسوي فيج إذا عرف انج تتغزلين في واحد غيره ولا تمدحينه بعد ميثا: والله هب غريب خطيب ربيعتي ولا نسيتي موعدج باجرههههههه عفراء تضحك: أقولج شو كاتب سلطان في ذمتج والله ما دسين شي عني؟ ميثا: كاتب قصيدة وحاط آخر شي رقمه عفراء: وووويييييه صدق أخوي مايستحي يرقمج يتريا إنزين لين ما تملجون عقب رمسوا بعض ميثا بثقة: أقولج سلمي على سلطان وقوليله مشكور على القصيدة الحلوة لكن لا يحلم أنه يرمسني قبل لا تم الخطوبه ونملج وأحسن شي لا ياكل قرصه ني عفراء تضحك: يحليله... لا صدق ميثوه القوية ترد وترفض طلب أخويه سلطان.... لا صدق أحسن عسب يكون شكلكم صح على الأقل جدامنا كلنا ميثا: اللي يسمع الحينه أنا بوافق أرمسه ويييه عفراء: المهم يالله ورانا شغل وايد ميثا: هيه والله صدق الله يعين شجايل بنخلص اليوم ***************** الساعة 10 الصبح بنفس اليوم في بريك عند هند في الجامعه يالسه هي وموزة في الكافتريا هند: أتخبرج موزوه شو استوالكم يوم ظهروتوا من بيتنا موزة مستغربه: ليش تنشدين؟ هند: بس جاوبي أنتي؟ موزة طبعاً خبرت هند بكل شي وإعجابها بالريال رغم انه دفش كان في تعامله وي الدريول هند تضحك : تعرفين منو هالريال؟ موزة: وأنا شودراني فيه؟ هند: أخوي سهيل موزة فتحت عيونها: في ذمتج هذا سهيل ؟ هند: هيه هب عايبنج ؟ موزة مستحية: لا ماقلت ربي يخليه لكم هند: محتشر ما خلا شي ما وصفج فيه موزة: والله ما عنده سالفة هند: صدقج والله ولا منو بيحتشرعليج يالخسفه ههههههه موزة: وييييه الحمد الله والشكر هند: تعالي ذكرتيني سهيل زعلان عليه اليوم خل ادقله أشوفه موزة: شو منه زعلان هند: ماشي سألني عن فهد وقلت فيه رأي بس وزعل موزة: أعرفهن آرائج أنتي أكيد نتفتي الريال هند: اسكتي بس خليني ادقله دقت هند للسهيل ومارد عليها ...ردت دقت مرة ثانية وبعد ما رد عليها هند: غريبه سهيل بالعادة لو شو كان مشغول يرد عليه صدق سوالي طاف بالقو سهيل في هاللحظة كان يشوف أتصال هند بس كعقاب لها مارد عليها عسب تتعلم تحترم الناس ولا تفر رمسه مالها داعي هند: اووويه موزوه مارد عليه أول مرة والله؟؟؟؟؟ موزة: تستاهلين أكيد شي عود في نظر سهيل ولا بيرد عليج هند : أقولج عندج مسج حلو أطرشه له بس يكوون في الصميم موزة : صبري شوي أشوف؟ هند: يكون مسج فيه عتب لأني متأكده أنه مايبا يرد علي موزة : شو رايج فيه ها.. ( واضح إني على الرف مركون...وواضح إني من قلبهم إمسحوني...آه يادنيا لو بمعزتهم يدرون...مافكروا في ساعتن ينتسوني..) هند مستانسه: عجيب صراحة طرشيه بسرعة طرشت موزة المسج لهند وطرشته للسهيل وتريوا النتيجة خمس دقايق وسهيل مطرش مسج.... ( ماعاد تفرق معاي لو تجي صدمتي فيك.."صدمات عمري" --(زودتني مناعة) – متساوية عندي وإذا قلت ما أخفيك.... كل شي أحبه (أتوقع ضياعه) هند فتحت عيونها وموزة تضحك عليها: صراحة تستاهلين شكله مستغيض عليج وايد هند: يالله ياسهيل أهون عليك طرش هالمسج؟ موزة : صبري أسمعي كلامي وطرشي هالمسج فضييع ( أجرح...مدام الجرح فيني يسليك..أجرح عساك تكون السبب في وفااااااتي) هند: لا أخاف حرام والله بيتروع عليه؟ موزة: طرشي أنتي بتشوفين طرشت هند المسج ....قرى سهيل المسج وعصب على طول دق هند شافت رقم سهيل خافت : اوووويه موزوه كله منج موزة: ردي انزين وشوفي... هند: مرحبا سهيل سهيل : شو هالمسج؟ هند: شو فيه؟ سهيل: والله يا هند لو طرشتي مسجات شرات هذه مرة ثانية بترفس في بطنج هند: وأهون عليك ؟ سهيل: هيه عشان تتأدبين هند: والله مايخصني موزوه قالت اطرش لك هالمسج سهيل راحت العصبية عنه وأبتسم: موزوه أيووووه قوليلها تحتفظ مسجاتها النكد لنفسها طبعاً موزة تسمع وترد: الله يخليك من زين مسجاتك الحينه هند تضحك: بس انتو الأثنين المهم سهيل خلاص والله آسفه سهيل يضحك: عشان موزة بسامحج بس ولا أنتي يبالج ضرب هند تبتسم: مب مشكلة.... لنا الله ياخي سهيل: فديت روحج كليتي ولا بعدج؟ هند: لا يالسين تونا بناكل سهيل: خلاص بخليج كلي ولحقوا على المحاضرات اوكيك هند: اوكيه **************** الظهر الكل في البيت طبعا عفراء وصلتها ميثا لأنه سلطان تأخر عليها ... الكل بعد الغداء مشغول في حجرته... دخلت هند على عفراء وقعدوا يسولفون عن خليفة وشو بتلبس وبما أن هند أخت عفراء الوحيدة طبعا حكت لها سالفة زيارة خليفة الجرئية والمفاجأة في المدرسة هند: ياووووويلي مقوووواه صح أتخبرج عفروه شجايل شكله ؟ عفراء مستحية: صراحة ....صراحة؟؟؟ هند: يالله عاد عن الدلع وجاوبي بأمانه عفروه .... عفراء: متغير 180 درجة مب خليفة الخسف الصغير اللي عرفته هند تضحك: والله ما عندج سالفة الريال سافر برى وكبر الحين اللي يسمع من زينج مسويه عقصين ومسمره وسلاسيل نازله شو تتنقدين بعد هو أرحم ويا شعره اللي كان واقف والله صوركم أدله عليكم أنكم بالقو كنتم خسفين عفراء: هب منج انزين من اللي عطاج ويه ويخبرج اصلا قومي فارجي هند: لا والله سوالف يعني حرام أكشف الملفات السرية لا صدق قولي كيف شكله الحينه؟ عفراء: للأمانه شكله وسييييييييم ويطير العقل شو عريض شو كشخه شو عطر يشق الخشم غير غير صدق هند: والله صدق خلاص عيل مبروك عفراء: مبروك في عينج عقب رمسته يحلم ياخذني هند: عفروه نصيحة مني لا تسوين حق عمرج مشاكل اصلا رايج مب مهم عفراء: الله في سماه ياهند لو أبوي يذبحني ما باخذه إلا يعتذرمني على الرمسه اللي قالها هند: أنتي استفزيته تراج.....هب بشوره لو مكانه كان لعنتج مب اللي فريت رمسه عفراء معصبة: هند فيه أشياء أنتي ماتفهمينها هو كان يرمس أني على أساس الجارية مالته أو أنه ملكية أو صك بأسمه ... ورجع عسب ياخذني شو يتحراني أترياه هند: عفروه لا تاخذين الموضوع بحساسية لأنج في النهاية أنتي اللي بتتعبين عفراء: الله يخليج أنا من الحين تعبانه هند: المهم حاولي تكسبين خليفة لأنه في النهاية بيكون ريلج وأبو عيالج عفراء: والله هب لازم عليه هو اللي محتاي هب أنا هند: عفاري صراحة أنتي شايفة عمرج عليه ليش جي.... هو مهما كان ولد عمج ويحبج عفراء: الله يخليج شكله مايعرف شو معنى الحب هذيل بس يتأمرون كأنه السلطان هند: سمعي عفروه يمكن أنا صغيرة لكن من رمستج عن خليفة وزيارته لج في المدرسه أنه متحمس للموضوع وشارنج عفراء: والله زيارته هذه عطتني فكرة كافية عنه... الله الغني عنه وعن الزواج هذا هند : المهم شو بتكخشين باجر تعرفين أنه لازم يشوفج عفراء: شورايج عاد أني بظهر لهم مبهدله وبلبس شي أقل عن العادي عاد تعرفين الشباب وشرات خليفة مسافر برى أول مايشوفني لابسه جي بيغير رايه هند: تسوينها عفروه أنتي وأخوي سلطان عنادكم غير شكل يخوف... عفراء: سيري ارتاحي أبا أرقد لأني صدق اليوم مواجهتي وي خليفة حسستني كأني راكضه ستين كيلوا هند تضحك وتكمل: بس لا تاخذين الموضوع من هالناحية لأني متأكده فيه شوية إعجاب من صوبج للخليفة .... عفراء: اجلبي ويهج ماعندي سالفة أعجب في واحد مايعرف يرمس وشايف عمره تظهر هند وسلطان توه كان ياي يدق الباب على عفراء سلطان: بسم الله الرحمن الرحيم...شو تبادلتوا الغرف أنتي وعفروه هند: لا كنا يالسين نسولف عن باجر سلطان: أعوذ بالله منكن بنات... مسكين خليفة أكيد قطعتوا الريال هند تضحك: لا بس نحط توقعات جي تعرف سوالف بنات سلطان: عفراء داخل هند: هيه ... سارت هند ودق الباب سلطان مع انه الباب مفتوح سلطان: هود هود... عفراء تضحك: قرب سلطان: سلاااااام عليهم عفراء: عليك السلام سلطان: شوفي أنا تعبان بأختصار شو مافيه شي حقي من عند ميثاني عفراء: لا ماشي وتسلم عليك وتقولك لا تحط ببالك ترمسها قبل الملجه سلطان: خيبه مقواها وأنا فرحان قلت بفتح تليفوني عقب الدوام بحصل مس كول ولا مسج؟ عفراء: سلطان أثقل شوي عاااد عفانا الله شو فيك سلطان: إن شاء الله بنشوف منو اللي بيتراقل باجر ... سلااام ههههههه عفراء: خذ الباب في أيدك *************************** يلست عفراء تفكر طول اليوم في الليل وبالصالة الكل يجهز للزيارة العم راشد وخطوبة عفراء والعروس كأنه ما يخصها في شي ...... أم سلطان: عفراااااء ...عفروووووه عفراء : عونج أميه أم سلطان: شو... أشوفج ما تساعدينا في شي ولا جنه اللي بيون باجر قوم عمج يخطبونج عفراء بعدم أهتمام: أنزين شو يعني أم سلطان: عفروووووه شو تحت راسج؟ عفراء: ماشي شو مثلا بسوي مهمه أنتحارية وبفجر نفسي يوم بيون سهيل نقع من الضحك لأنه كان يالسه يساعد أمه أم سلطان: ياخفة دمج سيري ميلس الحريم وشيكي عليه شو فيه شو ناقص ودخنيه عفراء: الناس باجر بيون أدخنه من الليل ليش؟ أم سلطان: تراني ما أحب حد يراددني في الرمسه ...عسب الريحة تمسك في الميلس وتسوي خنه حلوه تراج شيبتي راسي عفراء: مالي خاطر لا اشيك ولا غيره تعبون نفسكم وفي الأخير برفض شحجه سهيل معصب: شووووه تبين تفضحينا ليش ترفضينه وأنتي بعدج حتى ما شفتيه أو سمعتي عنه شي؟ عفراء: عايفته مباه لايعه جبدي منه سهيل: عفراء أنتي الكبيرة ...وللحين ماسك أعصابي وتعوذي من الشيطان وحشمي الناس اللي بيون باجر وإذا شفتيه وما عيبج محد بيغصبج عليه بس تعطينا سبب مقنع مب منا والدرب أم سلطان: أنتي شوفيج اليوم متخبله ... الشور هب وياج أبوج موافق وأنا وأخوانج عفراء: بتخبركم أنتو بتعيشون وياه ولا أنا؟ الشور شوري وإذا أنا هب موافقة مافيه زواج ولو أنتو موافقين ... شو رايكم في الرمسه سهيل: أنتي دواج وي أبوي وسلطان أم سلطان: والله ما توقعت العاقل تسوي جي ... لكن أبوج اللي بيرمسج هب أنا ظهرت عفراء حجرتها وهي متضايجة وسألت نفسها هي ليش رمست جي دخلت هند هند: عفروه شو السالفة أمي صوتها واصل لين فوق عندي ؟ عفراء: عطيتهم كاش في الويه أني هب موافقة على خليفة هند: والله أنتي دورين حق عمرج الرمسه هذه أمي جي الله يعين أبوي وسلطان لأنه الكل معجب بخليفة ويتمنونه عفراء بعصبية: هيه يتمنونه إلا أنا ما أتمناه ولا يشرفني أصلا آخذ شخص في نظره مب تارسه عينه هند : والله كيفج عورتي راسي *************** سهيل ينادي هند تساعده في ترتيب ميلس الريايل: هند بقولج شي بس لا تخبرين حد هند: خير شو فيه سهيل: الشباب الأربعاء بيسيرون دبي وانا بسير وياهم عرس واحد من ربعنا هناك بس.... أنا بقول لأبوي أنه عندي زام شورايج هند: اويه مالي خص تعرف أبوي لو عرف أنك جذبت عليه بيقطعك سهيل متضيج: المشكلة يبوني أتم وياهم 3 أيام هند: بعععععععععععد لا رحت فيها انته أحسنلك قول لأبوي عشان ما يحس انه نحن نخبي عليه شي بعدين الموضوع عادي وماظنتي بيرفض إذا قلت له عرس واحد من ربعك ويباكم وياه من الأربعاء؟ سهيل: شورج أخبره؟ هند : هيه؟ ************************************ تجمعوا الكل على العشاء واستوت السالفة كبيرة ما بين عفراء وأبوها وسلطان وكانوا يدورون في حلقة مفرغة مب عارفين سبب رفض عفراء القاطع للخليفة رغم انها ما احتكت فيه وماشافته لكن عفراء خافت تقول لهم عن زيارة خليفة والأسلوب اللي رمسها فيه سلطان بطريقته رمس أخته وأقنعها أنه تم بس خطوبه وإذا شافوا عليه شي محد بيجبرها عليه وافقت على راي سلطان وأبوها بس شرط عليها انها تعامل خليفة بأسلوب طيب ولا تحسسه أنه أقل منها في شي... وافقت وظهرت حجرتها وظهر سلطان يرتاح ويلست ام سلطان وأبو سلطان يتفقون على رمسه وحده اللي بتكون وي الريايل ومع الحريم .... أول ما خلصوا سهيل أستأذن أبوه عسب سالفة عرس ربيعه ...طبعا وافق أبو سلطان ورحب بهالشي لكن لو كان فيه ملجه لواحد من خوانه مايسير...سهيل وافق عدت الليله على خير........... **************************** اليوم الموعود الأحد بعد مارجع الكل من دوامه يلسوا مشغولين في الترتيب والطبخ المقبلات وهالسوالف لأنه عمهم راشد بيتعشون وياهم .... عفراء كانت وايد مرتبكة من المواجهه اللي بتصير بينها وبين خليفة.... هند كانت وي أختها طول اليوم وسلطان وسهيل مع أبوهم عقب المغرب وصلوا أهل خليفة وأستقبلوهم بالتراحب والسوالف والضحك وأبو سلطان فرحان بأخوه رغم انهم مايشوفون بعض إلا في المناسبات لكن هالزيارة والمناسبة هذه بالذات تعنيله الشي الكبير.... بدت السوالف مع خليفة وسلطان وسهيل واكتشفوا انه خليفة من النوع اللي دمه خفيف بس بنفس الوقت جاد ورزين في ميلس الحريم أم سلطان ترحب بأم خليفة وأخته نزلت عفراء وكانت كاشخه بأمر من أخوها سلطان لأنها ما تحب تكسر رمسته....سلمت عليهم ويلست تسولف وياهم بعد العشاء فتح الموضوع بو خليفة وي بو سلطان.... بو خليفة: بو سلطان أنت عارف زيارتنا هذه شو حجه وعفراء بنتنا ومنا وفينا وما بنحصل شراتها في الدنيا كلها... بوسلطان: ماعليك زود ياخوي راشد واصله من دون ما تطلبونها بو خليفة: بس بغيت أنا أسمعها من عفراء بأذني لأني مبا ألوم نفسي أني خيرت خليفة عنها ورايها يهمني خليفة عصب من الرمسه بس كتم غيضة وسكت...... بوسلطان ما توقع هالطلب من أخوه: والله من حقك يا بو خليفة ....سلطان سير قول لأختك أن عمها راشد يبا يسلم عليها ويسمع رايها سلطان: إن شاء الله يوبه سار سلطان وقال لأخته الرمسه وكانت جاهزة ..... وفرحانه لأنه عمها عقليته متفتحه شوي وبتكون صريحة وياه خليفة في هالوقت كان يرمس عمه عسب يكسبه: عمي سعيد أنا من زمان أبا عفراء والشاهد الله اني ما شلتها من راسي حتى وأنا مسافر برى البلاد ...ومابقصر عليها شي وبحطها على راسي وتراني اخترتها من زود بنات العائلة كلهن لأني اعرف قيمتها والحمد الله ما قاصرني شي الخير وايد واللي تباه عفراء مني أنا حاضر بس تراني مستعيل لأني بملج عطول... بو سلطان: لا تقول جذي يا ولدي خليفة أعرفك بتحافظ عليها ولو تبا اليوم تملج تراني ما عندي مانع....... سهيل تضايج من أسلوب خليفة المتكابر والمغرور وكان يفكر وي نفسه يقول هذا توه زين سوالف وضحك وطيب أنجلب جذي مرة وحده ليش.... وكان متضايج بعد من كلام أبوه مبين وايد أنه عفراء تحت امرهم وهالشي مايرضاه على اخته..... المهم دخل سلطان وقال لعمه يدخل وأصر خليفة بعد انه يبا يسمعها من عفراء دخلوا الجميع وعفراء كانت روحها خايفة...... اول ما طاحت عينها بعين خليفة رفعت راسها فوق كأنه تحدي في الرفض وخليفة كان متوثق من عمره انه عفراء ما تقدر تقول... لأ بوجود الكل وخاصة جدام أبوه وأبوها وخوانها... بس عفراء في خاطرها أول مرة تشوف كشخه جذي واستغربت انه خليفة مستوي حليوووو لدرجة ماكانت تتصورها .... أما خليفة كان ميت في عيون عفراء وجمالها وخاصة اليوم كانت غير عن المدرسه ... وماقدر يقاوم ابتسامة فرح لما شافها وسعادة غمرت قلبه اللي كان مجروح من أسلوب عفراء في المدرسه وياه....أبو خليفة حب عفراء على راسها ونشد عن أخبرها.... بو خليفة: عفراء أنتي غالية عليه حالج حال خليفة وما أفضل حد عن الثاني ... بس خاطري أسمع الكلمة منج وأباج تقولين اللي بخاطرج عفراء: كلامك على العين والراس عمي..... خليفة كان صدره نار وهو خاطره يرمسها وييلس معاها ويستسمح منها على اللي صارفي المدرسه بس أبوه داش عرض ومستفرد بحبيبته روحه.... بوخليفه: موافقة على ولد عمج خليفة ...لأنه مستعيل ويبا يملج هالأسبوع عفراء طالعت خليفة بخوف لأنه حست انه خليفة باله شي ويبا يسويه لكن مستحيل هالشي على جثتها......... عفراء بذكاء عشان تكسب عمها: هيه عمي بس بشرط والسموحة أنت طلبت أقول كل اللي بخاطري بو سلطان وسلطان كانوا خايفين من رمسة عفراء بو خليفة : آمري يا بنتي حقج شو بغيتي خليفة معصب وفهم شو اللي تباه عفراء وكانت عيونه تبا تحرق عفراء من العصبية عفراء: عمي أنا ما اعرف خليفة زين وخليفة نفس الشي وكلام الكل على عيني وراسي لكن خليفة سافر برى البلاد خمس سنوات ويمكن غيرته وغيرت تفكيره ياريت سالفة الملجه هذه تتأجل لين ما كل واحد يعرف الثاني وعقب أنا اللي بتصل فيك وبقولك عمي انا موافقة على خليفة........ بس عسب قلبي يطمن وماعندي شرط غيره يكون بينا خطوبه وبس بوخليفة يبتسم ومعجب بأسلوب عفراء الذكي: حقج واللي تبينه بيصير.... آمري شي في خاطرج بعد..... عفراء: مايامر عليك عدو ولا ظالم عمي وعساني ماخلا منك .... بوخليفة حب عفراء على راسها وردوا الميلس بس خليفة أستأذن من عمه عسب ييلس شوي وي عفراء (خطيبته) وافقوا وخلوهم روحهم ... سهيل وسلطان كانوا مستانسين من أسلوب عفراء المحترم في الرمسه وي عمها العود لكن بو سلطان تضايج لأنه عفراء المفروض توافق على طول... وخليفة حس كأنه فأر تجارب في مختبر عفراء وهالشي جرحه وايد وماتوقعه تحرى انه بيحصل اللهفة والشوق شراته وي عفراء لكن أنصدم من شرط عفراء اللي خلاه يغير رايه فوراً في عفراء... يلس خليفة بهدوء...عفراء كانت فرحانه لأنه حست أنها انتصرت على خليفة ولا نولته اللي باله خليفة: شحالج عفراء؟ عفراء: والله شرات اليوم ماشي انا بخير والحمد الله خليفة : شي أكيد عفراء حست انه خليفة معصب.... بس سوت طاف خليفة: عفراء تعرفين شي؟ عفراء: لا ما اعرف شو؟ خليفة سوى طاف على اسلوب عفراء وكمل رمسته: أنتي كنتي بالنسبة لي حلم بلادي والهدف اللي كنت أحلم فيه طول السنين اللي تغربت فيها عن ربعي وناسي وأرضي... كنتي الشي الوحيد اللي أدافع عنه وكنت مستعد أضحي بحياتي كلها ودراستي فيه عشان بس أشوف نظرة من عيونج اللي مافارقتني دقيقة....ما أنكر تعرضت لمواقف بس حبي لبنت عمي اللي أتمناها كان يخليني ما أشوف غيرها........... بس الحين وعقب رمستج هذه ورفضج المبدأي ولو كان أبوي يشوف غير جذي .... شوهت صورة عفراء في نظري عفراء في هاللحظة بغت الأرض تنشق وتبلعها( معقولة أنا بالنسبة لخليفة كل هذا وأنا ظلمته) يكمل خليفة رمسته بحزن: ما أنكر مشاعري لكن اليوم بالنسبة لي مشاعري اللي يلست اتريا هاللحظة عشان أقولها لج وعيني بعينج ....أسمحيلي أقولج ماتت ودفنتها عفراء تحاول تغطي على اللي سوته: خليفة ظنتي من حقي أعرفك قبل لا تكون ريلي؟ خليفة يبتسم ومارفع عينه من الأرض لأنه حس بالدنيا غير مالها أي طعم .... خليفة: حقج بس مب بهالأسلوب ياعفراء أنتي اليوم ذبحتي كل شي حلو يخصج في قلبي عفراء ميته من الندم ومن دون ماتحس: خليفة؟؟؟ أنا خايفة وايد ومدري ليش خليفة هني حس بعفراء شوي ......: ممكن أعرف شو منه...؟ عفراء والدموع في عينها لأنها ماتحملت فكرة أنها ظلمت شخص عزيز عليها وحكمت عليها وأجرجته خليفة يرد كلامه: ردي عليه ؟؟ رفعت عيونها وهي نفسها عقب كلام خليفة اللي كان مثل السوط .... وبعد ماعرفت مشاعر خليفة تجاهها بس تجاهلتها وداست عليها من دون رحمه وحتى في آخر لحظة خليفة يحاول يفهم عفراء عن سبب خوفها منه....؟ عفراء: مدري أحسك ......... خليفة: بس عفراء دخيلج والله أحس نفسي تعبان خيبتي ظني فيج خذي راحتج وإذا حبيتي أنا بخبر عمي أني غيرت راي لأني بكمل دراستي مبا أسويلج مشاكل كان أسلوب خليفة الراقي يحرج عفراء أكثر وأكثر..... دخل سلطان وزجر خليفة عشان خلاص بيسيرون....وقف خليفة وقفت عفراء وتموا يطالعون بعض نظرات خليفة كلها حزن وأسى...ونظرات عفراء له تغيرت وصارت ندم انها تسرعت بالحكم على خليفة قبل لا تعرفه.... خليفة: تآمريني بشي .... عفراء تحاول تتقرب من خليفة: هيه خليفة مستغرب: آمري عفراء بكل رقه وحنان: دير بالك على نفسك خليفة يبتسم : إن شاء الله ...بس شكلي كسرت خاطرج ..عالعموم وأنتي بعد ديري بالج سلطان: بسكم خليفة وعفراء يبتسمون وظهروا الجماعة وسارو وقلب خليفة حسه ميت ليش يا عفراء تحملت سنوات وأنتي بعيدة عني وأتريا اليوم الي بيجمعنا فيه ربي عسب اسولفج باللي شفته واللي عانيته في غيابج..... يتبع ,,, Quote Link to comment Share on other sites More sharing options...
عواااشي Posted يناير 24, 2007 Report Share Posted يناير 24, 2007 تسلمين اختي على القصه و ننتظر التكمله على احر من الجمر Quote Link to comment Share on other sites More sharing options...
ho0oko0omo0o Posted يناير 25, 2007 Report Share Posted يناير 25, 2007 يسلمووو شوكوو ع القصة Quote Link to comment Share on other sites More sharing options...
فهودي العسل Posted يناير 25, 2007 Report Share Posted يناير 25, 2007 مشكورة شوكو علـ الموضوع الكيوت والقصة الكيوت Quote Link to comment Share on other sites More sharing options...
عواااشي Posted يناير 25, 2007 Report Share Posted يناير 25, 2007 بليييييييييييييييييييييييييز اختي لا تتأخرين علينه Quote Link to comment Share on other sites More sharing options...
ريم المحرق Posted يناير 25, 2007 Report Share Posted يناير 25, 2007 لا تتاخرين ، بانتظار التكملة بليييييييييييييييييز Quote Link to comment Share on other sites More sharing options...
شوكولاته فرنسية Posted يناير 25, 2007 Author Report Share Posted يناير 25, 2007 ثانكس على الردود ويبت لكم جزء طويل هالمرة ========================== بعد مرور يوم وفي مدرسة عفراء دق تليفون المكتب.... عفراء: مرحبا خليفة: صباح الخير.... عفراء عطول عرفت صوت خليفة اللي مافارفها ثواني......... عفراء بفرح: صباح الورد خليفة شحالك؟ خليفة: بخير دامج بخير عفراء: آمر خليفة بغيت شي خليفة: مايامر عليج عدو ولا ظالم...بس طلب بسيط وأتمنى ماترديني طبعا طلبي بناء على رغبتج وماينفع ونحن مخطوبين نيلس مع بعض أو نشوف بعض ولا أنا غلطان عفراء: هيه صح خليفة: عفراء أنا أستأذنت من عمي أني أرمسج بالتليفون لين على قولتج تعرفيني أكثر وصدقيني مابكون إنسان ثقيل بس عشان اوصل للنقطة اللي حيرتني وخوفج مني عفراء: وأبوي شو قال؟ خليفة: قال عيال عم ومايشوف فيها شي عقب شرطج عفراء: خلاص اوكيه..... طبعا عفراء عطت خليفة رقم موبيالها وهي بعد خزنت رقمه عل وعسى يتقربون من بعض خليفة لما لاحظ تغير عفراء هالشي عطاه أمل أنه يقدر يغير تفكير عفراء فيه ويقربها منه خليفة: خلاص أول ما أخلص دوام بسويلج ديري بالج عفراء: إنشالله خليفة وأنت بعد.... ركضت عفراء على مكتب ميثا...... تخبرها بالسالفة.... ميثا: يالله شمعنا سلطان ما تبيني أتصل فيه هو بعد خاطبني؟ عفراء بثقة: فديتج أول شي خطوبتي أنا وخليفة تمت يعني موافقتي مبدأيه وثانيا ولد عمي وانتي أبوج للحين ما رد على سلطان يعني بعدكم وصلة القرابة مابينكم من بعيد ميثا: ماشاء الله تصفين الكلام تعرفين ترمسين يالله على العموم أبوي بيرد على سلطان اليوم عفراء بفرح: قولي والله بيموت سلطان هههههههههه ميثا: بسم الله عليه بيموت فيني قصدج.... عفراء: خلاص المهم بخليج بسير مكتبي قبل لا تمر الوكيله وتحصل محد في المكتب وتتحرانا يالسين ندق سوالف.... ردت ... عفراء مكتبها وسمعت صوت مسج.... وصل تقرى المسج... (قلبي أصيل وماضي الحب ماأنساه...والصاحب الغالي تشيله عيوني <اشتاق له> وأشفق لصوته وطرياه وأقول هو: دنياي وشموع كوني (رفيق الدرب) ماتناسيت ذكراه لو العرب في رفقته يعذلوني.....) عفراء احمر ويها ويلست تتفدى خليفة عرفت شكثر هو يحبها ويتمنى رضاها ... ويلست تفكر شو بيرمسون هي وخليفة الظهر خلص الدوام....المهم ردت البيت ويلست تتريا تليفون خليفة اللي بعده ما دق.... وفي هالوقت نادت أم سلطان الكل عسب الغداء تجمعوا ويلسوا يسولفون ونست عفراء سالفة الموبيال عقب ما سمعت الخبر الحلو من سلطان أن أبو ميثا دقله وافقوا واتفقوا على الملجة الأسبوع الياي يوم الخميس... سهيل فرح لأنه يقدريسير عرس ربيعه تذكرت عفراء الموبيال وركض على غرفتها طالعت موبيالها وحصلت 4 مسيد كول ورسالة من خليفة تقول..( وينج عفراء) عطول طرشت مسج: ( السموحة خليفة كنت تحت أتغدى ماسمعت الموبيال) وطرشت المسج....يمكن ما كملت دقيقة إلا خليفة داق عفراء: مرحبا خليفة: السلام عليكم عفراء: عليك السلام خليفة معصب: وينج عن التليفون؟ عفراء: كنت اتغدى والله ويلس سلطان يسولف لأنه بيملج الأسبوع الياي خليفة: بالبركة يتساهل سلطان عفراء: الله يبارك في حياتك خليفة: شحالج أنتي؟ عفراء: تماااام الحمد الله شحالك ؟ خليفة: بخيرررر يسرج الحال... عفراء: دوم هب يوم خليفة: وياج يالغالية عفراء: ساكته ماترمس خليفة يكسر السكوت: عفراء إذا تضايقج سالفة التليفون هذه بالها بس أعتقد الطريقة الوحيدة عسب نعرف بعض عفراء: لا أبداً بالعكس خليفة فرح: أبا افهم العكس هذه ممكن ولا بتتغلين عفراء مستحية وايد: يعني أقصد انه بالعكس زين عشان نتعرف على بعض لا أكثر ولا أقل خليفة: مسرعج تكسرين بالخاطر الواحد عفراء تضحك: حرام عليك خليفة بغزل: فديت هالضحكة إن شاء الله دوم عفراء:وياك خليفة : يالله المهم مابطول عليج لأني ياي تعبان وأبا ارقد عفراء: شو بلاك؟ خليفة متشقق بس مايبين لعفراء: ماشي إرهاق مب متعود على العسكرية عفراء: ربي يعطيك العافية خليفة: يعافيج يارب عفراء: تغديت؟؟ خليفة: لا فديتج بعدني عفراء تحس نفسها بتموت يوم خليفة يتفداها عفراء تحاول تجمع نفسها: ليش؟ خليفة: والله مالي خاطر ماشي وقت عن العصر عفراء: خلاص برايك حط راسك وأرتاح خليفة: وأنتي؟ عفراء: أنا بعد برقد خليفة: تآمريني بشي عفراء: سلامت راسك وقلبك خليفة: .................... عفراء: الووووو خليفة: مبا أبند بس مجبور وأبا ارتاح عفراء تضحك: يالله ارقد ماشي وقت سلم على الأهل خليفة: يوصل إن شاء الله برمسج عقب يالله فمان الله عفراء: فمان الكريم........ (الفصل التاسع) تمر الأيام وعلاقة خليفة بعفراء سطحية وعفراء ترمس خليفة من باب تبا تعرف منو هالشخص اللي بيشاركها حياتها... في الطرف الثاني خليفة حب عفراء يكبر في قلبه يوم عن يوم بس عفراء حاطه ببالها أنها مستحيل تكن لخليفة أية مشاعر قبل لا تتأكد أو بالأصح عقب العرس يعني لما يكون ريلها وهالشي كان يضايق خليفة لأنه لما يحاول يفتح معها موضوع المشاعر تتجاهل السالفة أو تغير الرمسه ... أما سلطان فرحان وأتصل بعمه عسب يقوله يملجون والحفلة بالخميس وافق أبو ميثا وأبو سلطان بعد ورحبوا بالفكرة وتمت التجهيزات للحفلة طبعا ساروا المحكمة وملجوا وردوا البيت طبعا سلطان ماقدر يصبر للين تم الحفلة ... وباقي أسبوع وخاطره يرمس ميثا...رجعوا سلطان وأبوه وسهيل وأم سلطان وهند يتريون....باركوله وسلموا عليه وأم سلطان تصيح من الفرحة وعفراء توها حادره البيت وباركت لسلطان .... عفراء: مبروك سلطون تستاهل فديتك سلطان فرحان: الله يبارك فيج الفال لج ولخليفة حمرت عفراء: إن شاء الله سهيل: وأنا ؟ هند: يارب أفرح فيكم كلكم أبو سلطان يضحك: آمين يارب سهيل يترخص مواعد ربعه يسيرون العصر عرس ربيعهم إللي في دبي وسلم على أهله وهو طالع من البيت سلطان يوصيه يكون موجود الجمعه عسب بيساعده في شغل الملجه اللي بتكون يوم الخميس الأسبوع الياي.... عفراء وهند يسولفون عن تفصيل فساتينهم عند المصمم وأتصلوا بميثا عسب ينسقون كلهم وي بعض وحجزوا بالصالون الساعة 7 المغرب علشان يسووون بروفوا لميثا ... هند: عفروه بسير أحط راسي تعبانه قبل لا نسير الصالون.... عفراء: حتى أنا يابوج هلاك اليوم بالدوام هند: أقول عفروه شو خليفة وياج..؟ عفراء: اوكيه زين هند مستغربه من أسلوب عفراء: شو اوكيه زين...والله لو خليفة خطيبي ما أروم اصبر عنه دقيقة تبين الصراحة أنتي ما عندج سالفة حرام عفاري بيموت عسب يسمع رمسه حلوة منج عفراء : أقولج أنتي ما تعرفين الشباب بعدين عندي قاعدة خذي واحد يحبج أكثر من أنج تحبينه أو حتى مب مهم تحبينه هند معصبة: والله حرام اللي تسوينه في نفسج وفي الريال ...بسير أخمد أحسن... عفراء تحدر غرفتها وهي تفكر في رمسة هند..... (معقولة أنا جاسيه على خيلفة هالشكل بس أنا أعزه وأحب أسلوبه وأهتمامه فيني مبا أتعلق فيه عقب تتغير مشاعره تجاهي وللحين ما تأكدت من أسلوب حياته وطريقته اوووف شو هالحاله مبا أظلم نفسي ولا أظلمه معايه بس يعيبني في كل شي) قطع حبل تفكيرها الباب... سلطان: عفراء راقده؟ عفراء: لا سلطان حياك ادخل سلطان: السلام ...شحالهم عفراء تبتسم: بخير طاع الويه منور ومشتقق يالله استويت معرس سلطان: عفروه شو كثره تعزين أخوج سلطان؟ عفراء: فديت روحك سلطان أنت تعرف معزتك عندي شو كبرها مايحتاي أقولك؟ سلطان: طلبتج قولي تم؟ عفراء تضحك : تم طولي بعمرك؟ سلطان: دقي لميثوه الحينه قولي لها شو استوى في المحكمه دخليج؟ عفراء: اوكيه....... دق عفراء لميثا.... وحطت سبيكر ميثا: مرحبا والله عفراء: مراحب ملايين هلا بج ميثا: شحالج وشحال الأهل عفراء: بخيرربي يسلمج..أقولج شو سويتي في المحكمة شجايل قلتي للقاضي هيه موافقه على أخوي سلطان القصاب.... ميثا: هههههههههههه ايه ماأسمحلج ريلي اوكيه عفراء: يا ويلي حالي شعليج دافع عنه ميثا: هيه يعلني أفداه ... بس كنت متروعه يوم شفت سلطان خاز كل شي سلطان يضحك ويتفدى ميثا عفراء: آه منج أنتي ...أقولج صبري شوي اوكيه ميثامستغربه: اوكيه يمسك سلطان السماعة: مرحبا ميثا ميثا ماعرفت شو تسوي تلقط ويها تبند تذبح عفراء عالمقلب هذا؟ ميثاترد وهي ويها منشق بموس: هلا سلطان سلطان ميت من الضحك: لا تزعلين من عفراء أنا قلتلها دقلج ميثا: وليش أنته ما عندك الجرأة دق روحك..... سلطان مستانس على ميثا يوم تحرج: لا عندي الجرأة بس أعرف لو دقيت ما تردين على الأرقام الغريبة ميثا: عيل شو رايك أن رقمك وياي بس ما برد عليك إلآ عقب الحفلة وخلي المقلب ينفعك سلطان انقلب جد وخاف صدق ميثا تسويها: افا عليج أهون؟ ميثا: أقولك بعدك ماتعرف ميثا يوم تقول رمسه... عفراء تسمعهم وميته من الضحك على المناقر سلطان: عيل سويها وشوفي إذا ماوصلت بيتكم وأترفس بطنج ميثا بقوة عين: أقوووووول عورة راسي أنت قد الرمسه اللي تقولها؟ سلطان معصب: حشا حشا هب حرمه متنمرة لا تخليني أجلب عليج الحينه ميثا تضحك : المهم أشوفك في الحفلة ودق وشوف شو بيستوي باااااااي وتبند ميثا في ويه سلطان ...سلطان مبطل عيونه ويطالع عفراء اللي ميته من الضحك عليه عفراء: ما عليه سلطان هذه ميثا اللي متخبل عليها شو تتحرى روحك اللي عصبي ويعرف يرد خذ تستاهل مبروك هههههههههه سلطان: والله بتشوف شو بسويبها... ما عليه عفراء: سلطان خلاص عاد البنيه قفط ويها صدق حرام خلها لين ما تهدأ سلطان معصب: لا مابطوفها هذه جي تسويبي عيل يوم أعرس عليها وتكون معايه شو بتسوي ؟ عفراء: طاف والله ميثا حنونه وايد وحبوبه سلطان: ولاطاف صوبها الحنان هذه ... أقولج هي تعرف رقمي صح؟ عفراء: هيه أنا عطيتها قبل موعد المحكمه بيوم سلطان بخبث يبتسم: اوكيه ميثوه عفراء: سلطان شو ناوي عليه؟ سلطان: تتحديني إذا أنا أروم أصبر ما أرمس ميثا عفراء: حرام يعني من صدقك ما بترمسها لين يوم الحفلة...؟ لا ماظنتي سلطان هي من أمس تقولي متأكدة أنك بدق ... سلطان: هونت مبا ارمسها يوم تعرف تحترم ريلها هذيج الساعة برمسها.... لأنه انتو الحريم تركبون فوق راس الواحد من يعطيكم ويه لكن ما عليه أنا بعلمها ....وطولة اللسان هذه بتخوزها مع سلطان عفراء: ايوووه عاش أخويه والله تخوف سلطان هههههههه سلطان : يالله بسير ارتاح الحينه ثورة دمي لكن والله ماأطوفها بالساهل **************** ظهر سلطان ..غيرت عفراء ملابسها بترقد....حطت راسها بترقد وسمعت مسج ظهرت التليفون وشافت 8 مس كول وثلاث مسجات من خليفة... خافت طالعت المسجات كله خليفة ينشدها ليش ما ترد عليه ونست انها حاطه الموبيال سايلنت في المدرسة لأنه عندهم زوار...عطول دقت لخليفة بس ما رد عليها ردت ودقت مرة ثانيه بس بعد مارد عليها..... طرشت مسج....( آسفه خليفة كنت مشغولة شوي) يلس بالها مشغول على خليفة....عقب ربع ساعة دق..... عفراء ردت بسرعة: هلا خليفة خليفةمعصب: أنا أبا أفهم شو خانت التليفون وياج ليش اساساً فاتحة تليفون؟ عفراء: انزين اسمع عقب ارمس؟ خليفة: لا تعلميني متى أرمس وأسمع بالله عليج ثمان مكالمات ماشيكتي على موبيالج؟؟؟ شوشغله هذا اللي ماسمح لج تشوفين تليفونج؟ عفراء معصبه: زوار عندنا بالمدرسة وحطيت تليفوني سايلنت شو صار يعني كفرت؟ خليفة: غلطانه وتردين عليه؟ عفراء: لا ترفع صوتك روحي تعبانه أنا يالسه اخبرك شو صار وياي وإذا بتحتشر بند وفكنا اوف خليفة: ....................................... عفراء : بخليك اوكيه؟؟؟ خليفة: تعرفين اصلا أنتي خسارة الواحد يكلمج لأنج ماعلموج في المدرسة كيف تكلمين اللي أكبر منج وخاصة خطيبج عفراء: وييييه اللي يخليك داش عليه بالعرض والطول وتعلي صوتك وأنا ساكته ؟؟؟؟ خليفة بصوت عالي خوف عفراء فيه: غصبن عليج هب بشورج أسألج وأنشد ليش ما تردين عليه سمعتي............ والأسلوب هذا هب على خليفة الله في سماه ياعفروه إذا ما عدلتي أسلوبج وياي لا أخلي حياتج جهنم الحمراء ...وظنتي أنتي عارفه زين أنا شو أقدر أسوي اوكيه؟ عفراء خافت من كلام خليفة وماردت عليه وكانت الدموع في عيونها وفهمت مغزى كلام خليفة انه يقدر ياخذها غصب عنها ويخليها تشوف الويل ومابيكون لها أي راي.... خليفة وهو بعده معصب: ظنتي الرمسه وصلت ... عفراء حست نفسها مخنوقه والعبرة في صوتها: بخليك اوكيه خليفة: لا تقولين بتخليني أرمسي عدل عفراء ردت تصارخ على خليفة: شو تباني يعني أقولك شبيك لبيك آمر يا حضرة صاحب السمو؟ خليفة: جب قلت لج لا تصارخين ........... عفراء تنفجر وتصيح لأنها ما تعودت هالأسلوب من خليفة وتفاجأت وبدت تتأكد شكوكها من ناحية أسلوبه اللي بدى لها اليوم........... خليفة تلوم لأنه صارخ عليها بس في نفسه تستاهل لأنه هو ريال والمفروض تحترمه...وبنفس الوقت ما هان عليه وحس بخوفها منه... وهذه حبيبته وقلبه وكان خايف عليها ومع هذا تصارخ عليه.......... خليفة: عفراء عفراء وهي تصيح: خليفة الله يخليك أبا أبند صدق أحس نفسي تعبانه من كل صوب واللي اليوم شفته منك أكد لي شكوكي .... خليفة: أنتي تخليني أعاملج جي...... من يوم خطبتج وتعامليني كأني أنا محتاي منج شي وتحسسيني أني ولا شي عفراء:............... خليفة: آسف ماقصدت بس كنت خايفة عليج وايد عبالي استوالج شي لا تلوميني الله الشاهد من حبي لج أخاف عليج من الهوى اللي يلمسج عفراء بأسلوب جاد وحاد: ياريت كان استوالي شي عشان ارتاح قبل لا تحاول تحطم حياتي وانا معاك.... أرجوك مافيه داعي للكلام هذا أبا احط راسي تعبانه لو سمحت؟ خليفة يهز راسه وكأنه يقول ما فيه فايدة: براااايج عفراء: بااااي *************************** بندت ويلست تصيح مب مصدقه انه خليفة الهادي واللي أسلوبه راقي في التعامل معاها يظهر لها وحش بهالطريقة ....مستحيل أعيش وياه ما أقدر .... خليفة ندم بس في نفس الوقت مأيد نفسه لأنه أسلوب عفراء وياه جاف وحتى الأحترام اللي ماطلب منه أكثر عنه ماتقدرتسويه............ الساعة6.30 دقت هند على عفراء ولقتها راقده بس عيونها غير عفراء تنش وترفع شعرها اللي كان طايح على ويها ..... هند بخوف: عفراء شو بلاج أنتي كنتي تصيحين؟ عفراء تهز راسه تنفي: جم الساعة الحينه هند: 6.30 عفراء: اويه بنتأخر عاد لين ما نوصل الصالون اوف يات ميثا؟ هند مستغربه: لأ ليش تي ؟ عفراء: شو ليش تي بتمر علينا وبنسير شو هالسؤال الغبي؟ هند: سلطان توه نشدني عن موعد الصالون وقال هو بيودينا عفراء تنقع من الضحك: اويه صدق حطها في راسه ياويل حالي عليك يا بو مايد هند: عيل والله تخبريني شو السالفة؟ عفراء قالت لهند كل شي صار وي سلطان وميثا وتمو يضحكون بسرعة نشت عفراء وتسبحت ونزلوا تحت ولقوا سلطان كاشخ ويترياهم .......... عفراء: سلطان وين ماشاء الله سلطان: بوديكم الصالون؟ هند : كل ها عسب بس تشوف ميثوه؟ سلطان: عفراء دقيلها قوليلها خمس دقايق وبنمر عليها؟ عفراء وهي خايفة: سلطان ميثا في الطريج قالت هي بتشلنا وبنسير سلطان معصب: ما عندي حريم يطلعون روحهم ومن اليوم تنسى انها عندها سيارة من الأساس عفراء وهند يضحكون ويتروين وصول ميثا..... سبع إلا خمس وصلت ميثا البيت ودقت لعفراء عفراء: ميثا تعالي سلمي على أمي ميثا: انشاء الله دخلت ميثا وانصدمت يوم شافت سلطان جدامها ؟ سلطان بتحدي: وين ما شاء الله ميثا: السلام عليكم سلطان حاط عينه في عين ميثا: وعليج السلام ميثا تبتسم: شحالك؟ سلطان يحاول انه مايبتسم لها ويقاوم سحر عيونها الحلوة وجمالها بخير يسرج الحال انتي شحالج ميثا: بخير دامك بخير سلطان : دخلي تدخل ميثا وتسلم على أم سلطان اللي تحب ميثا موت وسلطان يالس يطالع أمه تحضن ميثا بالحيل وهي مستحية جدام سلطان..... سلطان: شوي شوي عليها ميثا تتطالع سلطان: مايخصك سلطان محرج: والله ابتلشنا صدق أم سلطان: يعلني أفداج يالله سلطان بيوديكم عسب لا تتأخرون ميثا مستحية من عمتها وحرجت من أسلوب سلطان: لا عموه بنسير روحنا انا يايبه سيارتي سلطان : أنا بوديكم ومابعيد رمستي مرتين وأساساً ما عندي حريم يسوقون... ميثا خافت من سلطان : إن شاء الله بس هالمرة وعقب ما بظهر سلطان نظراته نارعلى ميثا: ميثا قلت لأاااااااااااا عفراء: ميثوه طوفيها على خير الله يخليج هند تتضحك ومستانسه على سلطان وميثا يتناقرون ميثا تروعت يوم شافت عيون سلطان: خلاص اوكيه يالله لأنه تأخرنا وايد سلطان وهو مستانس: تفضلي أم سلطان: سلطان هالله هالله على حرمتك وخواتك ميثا منحرجه لأنه سلطان ما شل عينه من عليها ظهروا وعفراء وهند متفقين يخسسون في ميثا وبسرعة ركبوا ورى وخلوا سلطان يفتح الباب اللي جدام سلطان: ميثا اركبي حذالي ميثا من دون ما تواجع سلطان تسمع الكلام وركبت وبند الباب ميثا صدق معصبه وسار سلطان بند سيارة ميثا وصفطها في المظلية وهو راجع ........ ميثا ترمس عفراء وهند يضحكون عليها........ ركب سلطان وهو حاس بالفرحة أنه ميثا حرمته ومب مصدق انها يالسه حذاله..... وهم في الطريج........ سلطان: شو بلاكم صخيتوا مرة وحده ........... ميثا ماترد لأنها منحرجه صدق عفراء: ماشي خلينا الرمسه لكم هند تضحك : ميثا منورة الغالية ميثا: بوجودكم سلطان: ميثا ميثا: عونك سلطان: زعلتي لأني ماخليتج تظهرين بالسيارة؟ هندتضحك: ياويلي بدا العتب ... تضحك عفراء ميثا تبتسم وهي مستحية وايد ومب عارفه شو تسوي...........حس سلطان أنه ميثا منحرجه وايد ومرتبكة ومتوتره..........وحاول يغير الموضوع سلطان: ميثا لا تتعدلين جي وأنتي ظاهرة عقب حد يشوفج ويضربج عين وتغشي لأني مبا حد يطالع حرمتي .... ميثاخلاص حست نفسها بتموت من رمسة سلطان ولا عارفه شو تقول ميثا تبا تحرج سلطان عسب يسكت: إن شاء الله حبيبي........ سلطان صد صوب ميثا بس ميثا كانت تتطالع برى السيارة........ سلطان: شو قلتي؟ ميثا: ماشي قلت إن شاء الله سلطان ابتسم ومابغا يحرجها.......وصلوا الصالون وخبروا سلطان يكون جاهز أول مايخلصون يمر ياخذهم....... سهيل في اللحظة كان مستانس وي ربعه ويالسين يدورن في دبي ويحاومون فيها .... ******************** خليفة كان ظاهر يتمشى روحه ويفكر في عفراء اللي سمح لنفسه ينزل دموعها اللي يعتبرها أغلى شي عنده ...ويلس مايلوم نفسه لأنها كانت تستحق الرمسه بعد ماصارخت عليه وقرر انه يدقلها عفراء ظهرت موبيالها وشافت خليفة داق وهند وميثا يطالعونها ؟ عفراء اصلا ما كانت ناويه ترد بس انحرجت جدام ميثا وردت...... عفراء بلا نفس: مرحبااا خليفة: السلام عليكم.... عفراء: عليكم السلام.... خليفة: شحالج عفراء؟ عفراء: بعدنا عايشين في العز قبل لا نسير الجهنم اللي وعدتني فيها خليفة: عفراء وبعدين وياج الحين شو ياب رمسة الظهر ؟ عفراء: عبالك انا نسيت شو تفر رمسه وتباني ما أفكر فيها ولا أفكر بحياتي اللي بتكون وياك خليفة يحاول يطيب خاطرها: بتكون حياتج كلها سعادة وفرح بأذن الله عفراء لاحظة أنه هند وميثا مستغربين ولا بعارفين شو السالفة...... خليفة: شو هالحشرة وياج....... وين؟ عفراء: انا واختي هند وحرمة أخوي سلطان بالصالون نسوي بروفه لحفلة الخميس الياي خليفة: ايووووه عيل اسمحيلي عطلتج عفراء بغتها من الله: خلاص عيل ببند الحينه اوكيه دورنا ميثا وهند معصبين من أسلوب عفراء خليفة وخاطره مكسور: عفراء عفراء: نعم خليفة: ماشي ديري بالج والسموحة على اللي صار اليوم الظهر بس لا تلوميني انتي السبب عفراء: أقولك بخليك اوكيه خليفة وهو صدق حس بغصة تخنقه وتخنق قلبه: ربي يحفظج عفراء بدون أي مبالاه تبند من دون ما ترد على خليفة..... ميثا: أنتي بتخبرج ولا كأنج دارسه ولا كأنه أهلج عمي سعيد ولا أخوج سلطان شو هالقلب اللي عليج ليش ترمسين الريال جي........ هند بأستهزاء: احسن عسب انتي يا ميثا ما تعرفين الشباب لازم ماتعطينهم ويه ميثامستغربه: عفراء صدق جي تفكيرج؟ عفراء محرجه: اصلا انتو الثنتين ما تعرفون شو صار وشو سوى خليفة اوكيه لا تحكمون من طرف واحد.... ميثا وهند يلسوا يسمعون سالفة عفراء وي خليفة اللي صارت ..... هند : وأنتي صارختي عليه صدق ولا هو يبالغ؟ عفراء: هو استفزني صراحة ميثا: سمعي عفراء الريايل اذبيحهم ولا تصارخين عليهم أو تقللين من أحترامهم وأنتي جي تسوين وياه من الأول مب بس هالموقف... لأنج ماتبينه مع انج متأكده انه يحبج ويموت في هواج؟ هند: والله صادقه ميثوه قولي ماتبين الريال مافيه داعي تعورين أعصابج ولا تغلطين عليه... عفراء تجاهلت رمست البنات ودخلوا وسوى البروفوا وظهرت ميثا تخبل لأنها مكياجها مال عرايس وحلفوا عليها هند وعفراء ما تشله عسب سلطان يشوفها....خلصوا واتصلوا في سلطان....نزلوا وكانن كلهن متغشيات حتى ميثا اللي كانت ما تتغشى.... ركبوا ويلسوا فترة ساكتين سلطان: عاد ابا أفهم شو سويتوا كل هالوقت؟ عفراء : دخيلك سلطان شوف ميثا مسويه ميكب يخبل والله خفت عليها كلهم تخبلوا عليها في الصالون.... ميثا منحرجه: عفاري... بنات وايد احلى عني بس عاد لا تتمدحين وايد هند: والله صدق ماشاء الله كلهم يلسوا يطالعونج خفت عليج.... سلطان فيه شوق يبا يطالع ميثا: شلي أشوف يالله ..... ميثا: لا مايستوي تتطالعني قبل الملجه سلطان: حووووه نحن مالجين تراها إلا حفلة بعدين يمكن ما يعيبني المكياج بخليج تغيرينه هند وعفراءيضحكون ويحاول سلطان يشل الغشاه من على ميثا بس ميثا مسكت ايده عاد سلطان استغل الفرصة ويود ايدها ويلس يسوق بأيد وحده وعفراء وهند مستانسين على الحشرة المستويه..............وصلوا البيت وسلطان ماخلا ميثا تنزل .... سلطان: عفاري هند انزلوا بوصل ميثا البيت......... عفراء: لا آسفين البنت تشل سيارتها وتروح بسك عاد.... سلطان محرج: عفراء مابخليها تسوق وهي متعدله وخلصونا ذبحوتني ترى ميثا تحاول تسحب اصابعها من أيد سلطان بس مسكته كانت قوية .... ينزلون عفراء وهند وهم يضحكون ويسلمون على ميثا ويسيرون صوب البيت وتمو ميثا وسلطان في السيارة وميثا ميته من المستحا والخوف.... ميثا: سلطان أبوي بيحرج لو شافك موصلني خلني اسير احسن؟ سلطان يرفع أيد ميثا ويبوسها ويبتسم لها: أول شي أنتي حرمتي ومحد له كلمه عليج غيري...ثانياً أشوف ويهج عقب يصير خير..... ميثا مستحية وايد من سلطان: لا سلطان الله يخليك عشان خاطري هب اليوم تأخرت الساعة 9.30 سلطان : ميثا المفروض أحاسبج حساب عسير على الرمسه الي فريتيها الظهروحالف أني مابدق لين ما تخلص الحفلة لكن بما أنج اليوم مستويه مطيعه خلاص عفيت عنج.... ميثا تضحك: تستاهل عسب مرة ثانية دق مثل العالم مب تخلي عفروه دق؟ سلطان يود أيد ميثا بالقو: شو رايج اكسرها وأعلقها في رقبتج..... ميثاخافت: سلطان أيدي تعورني صدق شو عبالك ماسك واحد من ربعك؟ سلطان يضحك ويبوس أيدها ويحطها على صدره: يالله بسرعة عسب أوصلج أبا اشوف ويهج ميثا: لأ سلطان وإذا بتوصلني تحرك بسرعة بتأخر؟ سلطان : اوف شكلج انتي ماتسمعين الكلام يعني لازم عنف تضطرين تخليني أسوي شي مبا أسويه......... رفع سلطان غشوة ميثا بسرعة ويلس يطالعها ومسك راسها وحبها ..... سلطان: ربي يحفظج لي ولا يحرمني هالجمال اللي ما أتحمله.... ميثاتضحك: ولا منك حبيبي ....يالله سلطان والله أمي بتحشرني سلطان: من عيوني فديتج... ميثا: سلطان ممكن طلب؟ سلطان: آمري غناتي شو بغيتي؟ ميثا تدلع على سلطان لأنها كاشخه بالقو: سلطان الله يخليك كلم عفراء سلطان: شو دخل عفراء الحينه أصفعج...؟ ميثا: اصبر زين ..رمسها لأنه اسلوبها وي خليفة ابداً مب حلو وأحس الريال بيطفش منها ومن سواياها...فدخيلك كلمها سلطان وهو يرفع خصلة من خدها : بعد شو تبين.... ميثا: اباك توصلني البيت بسرعة سلطان يضحك ويظهرون ويوصل ميثا بيتهم وهو فرحاااان وووووووايد لأنه ميثا بالنسبة له خلاص صارة أميرة حياته وقلبه وكل شي ...... رجع البيت ويلس يسولف وي عفراء وهند ويسألونه سوالهم طاف ويلس يسولف وي شيبته ويتفقون على الأشياء اللي بتصير في الملجه الضيوف والترتيبات ظهرت عفراء وهند وساروا غرفهم.. دق خليفة بس عفراء ما ردت عليه ويلست تفكر مع نفسها ...(ياريت خليفة يعاملني شرات ما يعامل سلطان ميثا خاطري أحب شرات ميثا وسلطان وأحس بالأمان مع الريال اللي يحبني مب الخوف) سمعت صوت مسج.... خليفة مطرش... (تقول الناس عينك وش بلاها...على خدك تنثر كل ماها صحيح الناس مايدرون عني ولا حسوا دموعي وش وراها...ولا يدرون حالي وش بلاها...ولا عاشوا دقيقة في عذابي لأن "< حــبـــيـــبي >" غايب عن نظرها) دمعت عيون عفراء وحارت في مشاعرخليفة ويلست تفكر (إذا يحبني ليش يعاملني جي وليش انا بعد اعامله جي شو هالحاجز اللي احسه فيني ويخلينا انا وخليفة بعاد عن بعض .... ياربي شو أسوي) قررت طرش مسج حلو يمكن الجو مابينهم يهدى وخاصة بعد سالفة الهوشه الكبيرة اللي صارت الظهر مابينهم ويمكن هالمسج يكون اعتذراها لخليفة لأنها ما أعتذرت له... طرشت عفراء مسجها .. خليفة كان سرحان ويفكر في قلبه اللي خذته عفراء ويالسه تعذبه شرات ما تبا من دون مايحاسبها وكأنه يقول حلال عليها قطع تفكيره صوت المسج.... وهو يبطل المسج يقول في نفسه (معقولة عفراء مطرشه) تفاجئ بالمسج اللي قلب عنده كل الموزايين..... (توك قبل لحظة على البال مريت,,, توي أسولف عن غلاك لعيوني،،، أقسم لك إني عنك لا ما تخليت... يهون عمري وأنت لا ماتهون؛؛؛ مثلك عزيز لا حشا ما تناسيت....ولو كان وقتي والمشاغل حدوني) خليفة مب مصدق و من دون مايحس دق على طول لعفراء ...طالعت عفراء ويلست تسأل نفسها أرد ولا ما أرد لأنها ضايجة وتعبانه وتبا تحط راسها وترقد من وقت.... قررت ترد على الأقل تحط راسها وهي مرتاحة انها عاملت خليفة بشكل حلو خاصة عقب رمست هند وميثا واللي وقفوا في صف خليفة........ عفراء: مرحبا خليفة وهو يحس نفسه بيطير من الفرحة : هلا عفاري ابتسمت عفراء لأنها حست نفسها قريبه من خليفة: هلابك زود شحالك خليفة: بخير وسهالة ربي يسلمج أنتي شحالج عفراء تتكلم بعفوية: تعبااااااانه من المشاوير وي سلطان خليفة يضحك: يستاهل بو مايد عقبال مشاوريج عفراء مستحية وساكته: ............. خليفة: عفروه وياي؟ عفراء: هيه خليفة: قولي آمين انزين عفراء تضحك: آمين خليفة: أخليج ترتاحين شوي؟ عفراء لأول مرة تحس انها ما تبا تبند بعد ماسمعت صوت خليفة اللي كله خوف عليها وحنان عفراء: لأ خليفة وهو مستانس: مـتأكده ولا تجامليني؟ عفراء: لا خليفة متأكده بس ممكن طلب صغنون ؟ خليفة يبتسم وهو حاس انه عفراء يالسه تتدلع عليه: إذا صغنون مب مشكلة آمري؟ عفراء: أبا بس أغير ملابسي أول ما أخلص بسويلك؟ممكن؟ خليفة أول مرة يحس انه عفراء تكلمه بأهتمام وانها تبا ترمسه: وعد؟ عفراء: وعد خليفة : لا تتأخرين عليه تراني مشتاق؟ عفراء: إن شاء الله باي سارت عفراء وبدلت وتعطرت ولأنه عفراء تموت في الشموع ولعت كل الشموع في غرفتها ودخلت فراشها...وحطت الشرش في الموبيال عسب كان بيموت هههههههه دقت لخليفة بس مارد عليها عصبت تحرت انه مايبا يرد؟ شوي ودق خليفة عطول وراها عفراء: ليش ما ترد يوم أدق؟ خليفة يضحك: مبا أخسرج..؟ عفراء: تعرف لو سويتها مرة ثانية مابرد عليك خليفة: خلاص ولا تزعلين بس أحب انا اللي ادقلج أحسج صدق حرمتي عفراء حست الجو هادي ودافئ ويلسوا يسولفون عن سفر خليفة برى واللي شافه وكانت عفراء تضحك على السوالف وهي كانت تخبره عن مشاكل الطالبات ويوم شافت الساعة شهقت ماتوقعت الرمسه تاخذهم كل هالوقت..... عفراء: اوووويه خليفة؟؟؟ خليفة تروع عباله صار شي لعفراء: شو بلاج حبيبي شي يعورج؟ عفراء قفط ويها يوم قال جي: لا بس تأخرالوقت الساعة 1.30 خليفة: الحين قوليلي شو أسوي فيج عبالي ياج شي وي ويهج تبين ترقدين؟ ميثا يالسه تضحك: لا مبا أرقد نسيت عبالي باجر السبت اثره باجرالخميس اجازة خليفة: لا والله توه الناس ... شو رايج تكسرين القاعدة وتمين وياي للصبح عفراء: لا ما أقدر ابا أرقد لأني صدق مرهقه اليوم من المشاوير وبعد انت ماقصرت خليتني اصيح لين ما حسيت روحي بتطلع..... خليفة: فديت روحج آسف والله لا تلوميبي اكثر؟ عفراء بدلع: خلاص سامحتك خليفة: انتي هيه شو سامحتك لا تنسين انتي بعد صارختي عليه؟ عفراء: خليفة عشان خاطري مبا ارمس في الموضوع ممكن؟ خليفة: إن شاء الله أبله عفراء عفراء: خليفة؟ خليفة: عيون وقلب خليفة؟ عفراء وهي فرحانه تحس بأحساس غريب في قلبها تجاهه: أنت........ خليفة يبتسم وكأنه عارف شو بتنشدعنه: أنا شو؟ عفراء: خليفة أنت صدق تحبني ؟ خليفةحط ايد على قلبه: يعلني الموت لو ما كنت احبج وشاريج عفراء: والله خليفة تقول هالرمسه مرة ثانية بزعل صدق وبرفضك خليفة نقع من الضحك: حلوة هذه برفضك عفراء: انا قلت لك؟ خليفة: عفراء والله أحبج موت يشهد عليه ربي أني ما نسيتج دقيقة ولا تفارقين روحي ولا عقلي عفراء مستحية وايد: بس انزين ويهي يعورني خليفة يضحك: بعد ويهج يعورج إلا اعرفه ويهج لوح كله تهازبين وما يعبيج شي عفراء: ها ها ماسخ خليفة: منو ماسخ عفراء تسحب كلامها: اسولف خليفة: احم عبالي بعد عفراءفيها رقاد بس تكمل رمستها وي خليفة لين ماأستوت الساعة3 عفراء وصوتها كله رقاد بس ماتبا تفارق خليفة: خليفة توعدني ماتسوي فيني شي يضايقني؟ خليفة: تعرفين قبل لا أجاوب على سؤالج صوتج عذااااب وأنتي تبين ترقدين ... عفراء تبتسم:............. خليفة: الله الشاهد اني مابقصر فيج وبحطج في عيوني ...سمعتي في حياتج حد يضايق ولايأذي روحه وعمره..... عفراء: أحس اني صدق أرمس خليفة ولد عمي اللي أعرفه من زمان ياريت تم جي خليفة: وأنا عمري ماتغيرت أنتي اللي تسوين حواجز مابيني وبينج عفراء: خليفة لا تبند يوم أرقد بند عشاني؟ خليفة يضحك: لا فديتج أرقدي لو لي خاطر أرقدي اباج ترتاحين عفراءتتدلع: ماببند خليفة : والله ذكرتيني بشلة حلوة وايد عفراء: يالله سمعنا شاعر وأنا ما أدري خليفة صوته يخبل يشل: تكلمني ونومك غالبنك***وأنا مبا السهر يتعب عيونك دخيلك..سد خطك راجينك ***رجيتك باللي غلاك بونك غضيضن بالهوى وصغير سنك ***من النسمة تتمايل غصونك أداريلك ومن قلبي أحنك***وأخاف عليك من خافي شجونك تقول القلب كيف انهيها عنك***يعاندني ولا يرتاح دونك قتيل الحب وأشواقي دعنك***وأموت أن صار مغلق تليفونك تكلمني ونولمك غالبنك***وأنا مبا السهر يتعب عيونك... (حمد سالم العامري) عفراء: صح لسانك وصوتك الحلو خليفة: صح بدنج... شو رايج حبيتيني ولا بعدج ههههههههه عفراء تضحك: فديت روحك خليفة: قوليها مرة ثانية عفراء : مبا..شو أهداء الشلة لأني مبا أرقد يعني؟ خليفة: اممممممممم تقريباً عفراء: خلاص حبيبي بخليك الحينه لأني صدق مدوخه خليفة: حبيبي تلحفي عدل وأول ما تنشين سويلي اوكيه عفراء: خلاص...تصبح على خير خليفة: وأنتي من أهله يتبع ,, Quote Link to comment Share on other sites More sharing options...
الحب الضياع Posted يناير 25, 2007 Report Share Posted يناير 25, 2007 و ننتظر التكمله على احر من الجمر Quote Link to comment Share on other sites More sharing options...
شوكولاته فرنسية Posted يناير 26, 2007 Author Report Share Posted يناير 26, 2007 مر يوم الخميس على كلن من خليفة وعفراء كأنهم عايشين في دنيا غير وخليفة كل وقت وثاني يدق يطمن عليها وهي نفس الشي هند وميثا وايد مع بعض ويالسين يسولفون عن الملجه وطريقة تقديم الشبكة ويبون يسون حركات ومفاجات للمعازيم اللي بيحضرون ورتبوا كل شي وساروا عند المصمم وخبرهم يوم الأثنين يون عسب فستان الملجه مال ميثا وافقوا يوم الجمعه الكل متجمع إلاعفراء اللي كانت راقده لأنها سهرانه وي خليفة يرمسون بعض... تحت وفي الصالة يدق تليفون سلطان على الصبح استغرب سلطان رقم دبي سلطان : منو ها بعد؟ هند: رد انزين يمكن سهيل فديته اليوم قال بيرد سلطان خاف لأنه سهيل لو يبي يتصل بيدق من تليفونه بو سلطان: رد سلطان الله يستر سلطان: الو السلام عليكم سلطان: عليك السلام والرحمه أنت سلطان سعيد أخو سهيل سعيد سلطان : هيه نعم أنا أخوه هند تروعت ونشت حذال سلطان أم سلطان: يالله سترك سلطان: آمر أخوي أخوك سهيل وربعه سوى حادث هم ثلاث سياير وكلهم منجلبين ولا نعرف أخوك بس واحد متعور شوي قال هذا موبيال سهيل لكن البقية كلهم حالتهم خطيرة واربع منهم توفوا فورا سلطان مب عارف شو يقول جدام أبوه: ممكن أعرف أي مستشفى تعالوا مستشفى راشد شوفوا منو ولدكم؟ سلطان وكله حزن: إن شاء الله هند تصيح: شو فيه سهيل سلطان مب عارف شو يقول والخوف ذابحه: ابوي قوم بنسير أم سلطان تيود سلطان وهي تصيح: دخيلك ما تظهر قبل لا تقولي شو بلاه أخوك سلطان والدموع في عينه: سهيل وربعه كلهم ثلاث سيارات انجلبوا وماأعرف حي ولا ميت يقولون اربع منهم متوفين والبقية حالتهم خطيرة واحد منهم خبر الشرطة انه هاتليفون سهيل وقالوا نسير مستشفى راشد هند تنهار وتيلس تصيح وتصارخ لأنها تموت في سهيل وأم سلطان تلوي على سلطان وتصيح وأبو سلطان سمح لنفسه دموعه تنزل وما أستحمل.... سلطان: أبويه دخيلك بسرعة نسير أم سلطان تبون تذبحوني تخلوني اتريا عسب اسمع موت ولدي شلوني وياكم تمسك أم سلطان رقبة بو سلطان وتحلف عليه بعشرتهم انه يشلها وياهم وافق هند بغت تتخبل نزلت عفراء على صراخ الكل... هند رمت نفسها في حضن عفراء ويلست تصيح ... عفراء: هند شو فيج شو بلاكم شو صاير؟ سلطان خبر عفراء السالفة أنفجرت عفراء ويلست تصيح سلطان أتصل بميثا وخبرها بالسالفة وخلها تي تيلس عند خواته لين ما يردون من دبي ......... ساروا سلطان وأهله عسب يشوفون سهيل وهم يدعون طول الطريج انه سهيل وإن كانت خطيرة بس يكون حي في هاللحظة عفراء تحاول تهدي هند اللي كانت منهارة بشكل نهائي سهيل اخوها وصديقها والوحيد اللي يهتم فيها ويحس فيها عفراء تحاول تتماسك لكن سهيل بعد كان أخوها الصغير اللي يما كان يغلس عليها ويلجأ لها ويشاورها في أموره ويلست تحضن هند وتحاول تسكتها لأنها كانت عارفه أنه هند وسهيل وايد وي بعض.... هند: سهيل ليش سهيل...فديت أخوي ياريتني مكانه ياربي بموت ما أتحمل أخوي حبيبي عفراء تصيح: هند قولي لا إله إلا الله وحطي أمل عند ربج انه سهيل يكون حي هند ودموعها تغسل ويها: فديته فديت روحه قالي بيرجع وعدني انه بيرجع عفراء تصيح : خلاص هند ارحميني شوي دقت ميثا الباب ودخلت عفراء وهند شافوا ميثا حضنتهم وانهاروا أثنينتهم ويلسوا عند ميثا وهي تحاول تخفف عليهم مصيبتهم ..... عفراء من دون ما تحس ركضت غرفتها ومسكت الموبيال ودقت لخليفة..... خليفة: هلا بالحلوين عفراء كانت منهارة تصيح ولا قادرة ترمس خليفة بس حست انها محتاجه لأغلى الناس عندها يوقف وياها خليفة خاف وايد: عفراء شو بلاج ليش تصيحين عفراء: سهيل أخوي ...سهيل سوى حادث ومايعرفونه حي ولا ميت في مستشفى راشد وأمي وأبوي وسلطان راحوا أنا خايفة خليفة ما أتحمل حد من خواني يستويله شي وأنا حيه ماأقدر خليفة: عفراء حبيبي قولي لا إله إلا الله ...هند محتايه لج أنتي تعرفين شكثر تحب سهيل وأمج وأخوج .....فديتج عشاني حاولي تتماسكين وأنا الحينه بسير دبي بكون قبلهم هناك اوكيه؟ عفراء تصيح بقو: خليفة مبا شي يستوي لأخوي ....هذا الغالي سهيل ... هو اللي مخلي بيتنا فيه حياة وضحك هو وردة بيتنا مبا أفكر بلحظة أنه مابيدخل علينا ولا بيسولف ويانا.... خليفة: عفراء غناتي إن شاء الله مابيستوي شي وبيكون حي يدخل عليكم ويفرح فيكم وتفرحون فيه خلاص انزلي عند أختج وحاولي تهدينها بخليج الحينه عسب ألحق عليهم وبطمنج عليه خلي تليفونج عندج... عفراء: إن شاء الله عفراء تنزل وتحصل ميثا حاضنه هند ويلست تحاول تخفف عليها وأنه سهيل بيرجع أخوها الحبوب بيرجع وبيمسح دموعنا وبترد الضحكة اللي عودنا دوم عليها.... ***************** فعلا وصل خليفة قبل أبو سلطان وأهله وفي المستشفى شاف خليفة الشرطة والجثث وتجرأ وسأل الجهات المختصة المحقق: منو حضرتك خليفة: وياك الرائد خليفة راشد من بوظبي ولد عمي من ضمن اللي مسوين حادث المحقق : شو أسمه؟ خليفة:سهيل سعيد المحقق : هذا داخل العناية المركزة حالته خطيرة وايد في هاللحظة دخل بوسلطان وسلطان وأم سلطان شافهم خليفة وسارصوبهم وسلم عليهم وخبرهم انه عفراء خبرته وطمنهم أنه سهيل بعده حي بس حالته صعبة وفي العنايه المركزة.....بوسلطان من سمع الخبر أنه ولد حي تم يصيح ويلس على الأرض لأنه ريلوه ماشالته وأم سلطان لوت على خليفة وتمت تصيح الشباب خذوا شوابهم ودوهم صوب الأستراحة لين ما يخلص التحقيق وتسمح لهم إدارة المستشفى أنهم يشوفون سهيل سلطان سار هو وخليفة صوب الدكاترة اللي في (ICU) ونشدوا عن حالة سهيل والدكتورخبرهم انه نزف وايد ولو عدت 24 ساعة من دون نقل دم يمكن مابيعيش سلطان مب عارف شو يسوي لأنه عارف فصيلة دمه مب مطابقة وي فصيلة دم سهيل لكن الصدفة انه خليفة طلعت الفصيلة نفس الشي وفورا تم نقل الدم .... في هاللحظة كان بيت أبو سلطان كله حزن من خوف سماع خبر موت سهيل....سهيل اللي عمره مابخل لا بوقته ولا حرصه واهتمامه عن أهله وخاصة هند اللي طلعت فوق صوب غرفة سهيل ودخلت ويلست تحضن كندروته وتصيح ....وميثا وعفراء من سمعوها ركضوا صوبها ويلست تتطالعهم وهم يصيحون...... هند: كندروته بعدها ...ريحة عطره موجودة فديتك ياسهيل حبيبي والله كنت أغلس عليه الأيام الأخير...ياربي مبا أشوف هاليوم يارب.... يلست على تسريحة سهيل تصيح وطالع مشط سهيل وتشوف شوية شعرمن راس سهيل على المشط هني انهارت عفراء من شمت ريحة عطر سهيل ويلست تصيح طلعتهم ميثا وحاولت تهدي الوضع .... هند حاضنه كندروة اخوها ما هدتها......... وتدعي انه الله يخلي لها اخوها............ دق تليفون عفراء وكان خليفة المتصل عفراء: هلا خليفة بشر؟ خليفة : سهيل حي الحمد الله بس حالته خطيرة وفي العناية المركزة ومحتاج نقل دم لأنه نزف وايد.... عفراء: سهيل حي أحلف؟ خليفة : والله بس أدعوله الحين بيسحبون مني دم وبيكون ما بينا اتصال لازم 24 ساعة هذه تعدي على خير أدعوله بالشفاء عفراء خبرت ميثا وهند بس تمت هند على حالتها وخوفها على أخوها وتوضت ويلست تقرئ قرآن وتدعيله.......... (الجزء العاشر) (الجزء العاشر) في المستشفى عقب أربع ساعات من تبرع خليفة بالدم كانوا كلهم يالسين وي بعض أم سلطان تدعي وأبو سلطان يكلم سلطان وخليفة عن سالفة الحادث وكانوا الشباب أثرهم يتسابقون وانفجر تاير ورد على السيارة اللي ورى والسيارة انجلبت ويات على الثالثه لما صار هالحادث المأساوي.... خليفة وسلطان ساروا صوب العناية عسب يشوفون حالة سهيل المستقرة واللي مافيها إي تجاوب وخاصة بعد نقل الدم... سلطان: ها دكتور بشر.... الدكتور: تمام بس فيه شوي كسر صعب داخل رجله سلطان: وشو الحل....؟ الدكتور: لازم يدخل العملية عشان نصلحها قبل لا تجبرغلط وبدأ الدكتور يتكلم مع الممرضة عبالة أنه الشباب مايفهمون انجليزي الدكتور: we will take son of my friend first to (O.T) and then we will take this patient الممرضة: but sorry doctor it will not affect this patients leg ? الدكتور: don’t worry my friend will give us anice gift for this thing but don’t tell anybody خليفة وهو معصب: excuseme are you adoctor? والدكتور خاف يوم سمع خليفة: sorry?! خليفة غسل شراع الدكتور: you will know who is important tomorrow هني عرف الدكتور انه خليفة بيشتكي عليه واستغرب لأنه عباله مابيعرفون رمستهم وقعد يترجاه وعد خليفة انه بيسوي عمليه سهيل ممتازة لريله وبيدخله أول شي بس خليفة تغاضي عن الموضوع مؤقتاً عسب الوضع ما يسمح للمشاكل وفوراً وقع بو سلطان على العملية وخليفة وسلطان متابعين للي صاير أول بأول بس الدكتور قال لخليفة انه العملية بطول ثلاث ساعات لأنه ريل سهيل مافيها أمل تتصلح مول ولازم بسرعة يزرعون له مادة من البلاتين عشان تكون مكان العظم... في هالأثناء سلطان كان تعبان وايد من كل شي أخوه اللي حالته الله العالم فيها .. وأمه وأبوه اللي يشوفهم مرهقين والحزن في عيونهم ولسانهم ماوقف من ذكر الله سبحانه...كان يحس بالعجز رغم صلابته لكن الموقف اكثر من أنه يقدر يتحمله... حس أنه مخنوق والحمد الله انه خليفة كان وياه واللي سواه خليفة محد يسويه إلا اللي فعلا عاد هالعائلة في مثابة أهله ... الواحد منا في مثل هالحزات يحتاي أعز إنسان عليه يكون حذاله ...حس الدنيا كلها على راسه والحمل كبير ظهر برى ... وسار صوب السيارة... وخذ تليفونه ودق لميثا ميثا : مرحبا سلطان: ميثا ميثا بخوف سمعت صوت سلطان منتهي: حبيبي شحالك سلطان ارتاح يوم سمع صوت حرمته: حالي لا تتخبرين ياميثا تعبان والله مب سالفة تعب جسمي... لا والله أعصابي احسها تعبانه أخوي في العمليات واخافه مايتحمل توه خليفة مسكين متبرع ميثا: ماعليه حبيبي تحمل عشان عمي وعمتي سلطان: ميثا ميثا: عيونها سلطان: فديت عيونها...تعرفين انه الحفلة بتتأجل فأعذريني ميثا : سلطان تعرف لو قلت هالرمسه مرة ثانية بزعل سلطان: الحمد الله أني ملجت قبل ولا كنت صدق بنهار وانتي بعيدة عني ميثا: سلطان اكره اشوفك ضعيف جي سلطان: هب بشوري يا ميثا تشوفين الجثث اللي في المستشفى وأهلهم شجايل يصيحون عليهم والله لو ما حدر علينا خليفة وخبرنا انه سهيل حي كنت خلاص اتريا المحقق يقولنا اخوك ميت بس ربج ستر ميثا: مبين على خليفة طيب وايد سلطان: والله عمامي الباقين ولا شفنا ظفر واحد منهم لكن خليفة أصيل وعمي راشد تعبان مسكين ولا كان وي ولده معانا ميثا: فيهم الخير سلطان: المهم غناتي حبيت اسمع صوتج بسير اشوفهم ميثا: سلطان حبيبي دير بالك على نفسك وشوف عمي وعمتي لا تخليهم حاول تصبرهم لين مايظهر سهيل بالسلامة سلطان: إن شاء الله حبيبي...شو حال البنات؟ ميثا: عفراء متصبره لكن هند وايد تعبانه ما هدت كندورت سهيل والحينه يالسه تدعيله سلطان: فديتها والله ماعليه ميثا عبلت عليج ميثا: بتسكت ولا بزعل سلطان: زاهبه انتي للزعل ميثا: يالله حبيبي سير صوبهم شوفهم وطمني عليك وعليهم سلطان: إن شاء الله فديتج دير بالكم ميثا: إن شاء الله ****************************** يرجع سلطان مالقى خليفة أستغرب ...... سلطان: يوبه وين خليفة عنكم؟ بوسلطان : يابوك ظهرا لدكتور مستعيل من غرفة العمليات ومدريبهم شو قالوا لخليفة ...يوم نشدت خليفة قالي يبون دم مرة ثانية سلطان معصب: شو ها مينون يتبرع مرة ثانية بيطيحوا علينا اثنينه بدل واحد بوسلطان: لا بعيد الشرعنهم يقوموا بالسلامة... أم سلطان حطت أيدها على صدرها ويالسه تدعي... حضنها سلطان ويلست تصيح أم سلطان: ربي يحفظكم من كل شر يالله ياربي ردلي ولديه راس مالي أثنين عيوني الثنتين ولو وحده تداعت شكته الثانية يالله رحمتك ياربي سلطان : دخيلج أميه وغلاتي عندج ارحمي عمرج شوي سهيل بيقوم بعافية أم سلطان تصيح: نظر عيني مافيه دم ليش ماخذوا دمي يبا دمي كله بعطيه بس أشوفه فتح عينه يعلني افدااه سلطان: اميه دمج مايتسوي تتبرعين فيه مب مطابق ولا أنا كنت اول واحد أتبرعله . سار سلطان صوب غرفة خليفة اللي تبرع فيها وحصل خليفة شكله تعبان وأصفر سلطان: خليفة شو فيك جنك هب متعلم شجايل تتبرع بالدم مرة ثانية شو تخلبت ما تعرف انك بتتعب خليفة: ماعليك جسم اخوك يتحمل سلطان: والله اني ياخليفة مستحي منك ومب عارف شو أقولك خليفة: لا تقول ولا شي الممرضة خذت الدم وسارت ربك يسهل الأمور إن شاء الله سلطان: الله يسمع منك خلك مرتاح بسير أيبلك شي تشربه خليفة فعلا تعب وحس الدنيا دور عسب جي ماقدريقوم ويحاول يكابر جدام سلطان وما طاع يخبره انه وقع ورقة انه هو مسؤل عن نفسه لو تبرع مرة ثانية ... بعد فترة رجع سلطان واشترى شوية عصائر لخليفة عسب يرجع دمه خليفة أصر على سلطان يروح صوب عمه وعمته ويشوف شو صار بالعلمية سار سلطان ويلس وياهم يتريون في هالوقت وصلوا أهل ميثا ويلسوا وي أهل بو سلطان ظهر سهيل من العملية اللي تمت بنجاح والحمد الله بس تم سهيل فاقد لوعيه ... والدكتور طمنهم على حالته.... بس 24 ساعة بعدها ما خلصت رجع سهيل في العناية المركزة.... وخليفة بعد راقد لأنه حس نفسه مافيه حيل عسب يوقف على ريوله .... سلطان طمن خليفة على حال سهيل وبنجاح العملية خليفة طلب من سلطان ياخذ أهله وأهل ميثا يرتاحون ويحجز لهم في مكان قريب من المستشفى وطبعا وبعد إصرار من سلطان خذ الجماعة وتموا أم ميثا وأبو مياث وي أهل بو سلطان على الساعة 12 رجعوا أهل ميثا العين يلس سلطان يصر على اهله يرتاحون شوي وخلاهم يرقدون لأنه مابقى شي عن صلاة الفجر .... وهم من الظهر وي سهيل على وقفة وحده لا أكل ولا شي ساروا وارتاحوا وأذن الفجر وصلوا جميع أتصلت هند بسلطان اللي بعد كان شكله مرهق من التعب .... هند بصوت تعبان: سلطان شو صار ليش ما دقيت سلطان: هند حبيبتي ليش سهرانه للحين هند: ليش سهرانه؟؟؟ أتريا حد يطمني على أخوي ليش تأخرتوا وايد سلطان: والله الغالية توني بس واصل وحجزت لأمي وأبوي عسب يرتاحون والعملية نجحت وسهيل بخير بس يبا وقت عسب يرتاح هند ودموعها مافارقت عينها: سلطان متى بتي تاخذني عشان اشوفه الله يخليك بموت من أمس وانتو هناك حرام سلطان عشان خاطر أختك سلطان عيونه دمعة يوم سمع هند بهالحالة: هند والله بس أرجع المستشفى أشوف سهيل وأطمن عليه وعلى خليفة...وخبري عفراء خليكم جاهزين بي بشلكم بعد آمري شوتبين؟ هند: سلطان أحلف بتي تاخذنا انت ماتقص عليه عسب اسكت صح؟ سلطان وقلبي يعوره على اخته: لا حشا والله انا بعد أحاتيكم من صوب فقلت بي آخذكم هني تيلسون عند امي وتطمنون على سهيل هند وهي تصيح: تعال يالله بسرعة أترياك سلطان: خبري عفراء وخبري ميثا ترجع البيت هند: سلطان ميثا ما خلتني دقيقة صدق بنت أياويد سلطان: لازم حرمة سلطان سعيد هند : هيه والله خلاص بخبرهم سلطان : يالله برايج فمان الله هند: فمان الكريم ************************** هند خبرت عفراء برمسه سلطان وطمنتهم على حالة سهيل ...وخبرت ميثا ترجع البيت بس ميثا مارضت واتصلت بسلطان ميثامعصبه: سلطان انا بي وياكم شو تخليني هني على أعصابي؟؟ سلطان: ميثا اسمعي الكلام مب وقته العناد الحينه...بعدين أباج تاخذين إجازة لعفراء لأني اباها تيلس وي أمي لأني عارف أمي ما بترضى ترد العين وسهيل هني ميثا: وأنا؟ سلطان: ميثا اباج ترتاحين وانا بين الوقت والثاني بسويلج والله يخليج ترى يكفيني اللي فيني مافيني اتناقش وياج في شي ميثا حز في نفسها لأنها بغت توقف وي عفراء وسلطان شرات هالموقف ميثا: اللي تشوفه سلطان سلطان: ميثا لا تزعلين عمري أنتي ماقصرتي ويوم بيون أهلج مرة ثانية دبي تعالي وياهم ميثا بزعل: مب مشكلةخير إ نشاء الله سلطان: يالله ديري بالج ميثا: إن شاء الله وأنت بعد ************************** رجع سلطان الساعة 8 على خليفة وقاله لازم يروح يرتاح في المكان اللي حجز فيه ...وسار خليفة لأنه فعلا محتاي يرقد... وحط أمي وأبوه وي سهيل اللي فيه مؤشرات على تحسن حالته.... رغم انه في غيبوبه بس الحمد الله أنه مافيه أي نزيف داخلي بعد الأشعه المقطعية اللي سوها له...... سلطان الوحيد ما أرتاح وكان يحس بأرهاق وهو ماسك خط دبي العين وكان يسرع لين ما وصل البيت لقى هند وعفراء يتريونه ... سلطان حدر وسلم على خواته : شو جاهزين عفراء : سلطان ويهك متغير وايد إذا تعبان أرتاح سلطان: لا مب مشكلة يالله عسب ما نتأخر على أمي وأبوي هندمسكت ايد سلطان: سلطان الله يخليك عندي طلب قبل لانسير سلطان: آمري حبيبي عيوني لج؟ هند: اباك تظهر فوق حجرتك وتاخذ لك حمام وتيلس تاكل شي ولا والله ما اظهر وياك أنت الوحيد اللي ما أرتحت فينا.... سلطان: تبون الصراحة من ناحية السبوح يبالي اتسبح عفراء: يالله عيل أنا بسويلك شاي وريوق لين ما تخلص متسبح ومتلبس... سلطان مسكين كأنه ما صدق سار على طول حجرته وتسبح وغير ملابسه نزل وحصل خواته يتريونه ويلس وتريق ويلس يخبرهم عن خليفة وشهامته وكيف انه عرض صحته عشان خاطر سهيل هند تحاول تغير الجو: هيه هذا هب لسهيل لعيون بعض الناس عفراء: هب وقتها الرمسه يالله سلطان سلطان: أدري الوقت مب مناسب عفراء لكن والله ولا شفت غير اهل ميثا يزاهم الله خير اللي وصلوا وخليفة ما هدنا دقيقة وحده عفراء: والله انه ريال يعتمد عليه خليفة: عفراء ما بتحصلين شراته صدقيني خليفة ريال والنعم فيه وما عليه كلام هند: اووووف متفيجين انتو يالله بسرعة أبا اطمن على اخويه عفراء وسلطان يبتسمون ويظهرون وصلوا على الساعة 12 الظهر وطمنوا عليه هند يلست تصيح تبا تدخل عند سهيل بس الدكتور يقول مايستوي الكل يحدر لازم شخص واحد كل مرة أم سلطان أكثر وحده تمت عند ولدها وهي تحضن ايده وتسمي عليه وتصيح سلطان حدر وظهر امه عشان ما تتعب عليهم... بس تفاجئ يوم شاف سهيل كان ويهه غير كله جروح وندوب من الخياطة ما توقع بيشوف اخوه هالشكل وظهر أمه ودخلت عفراء ويلست حذاله شافت ويه سهيل عفراء ودموعها تنزل بهدوء: سهيل حبيبي ...ماتشوف شر الغالي .. ويلست تمسح على شعره وتشوف ريله اللي مجبربطريقة تخوف عقب العملية يلست تمسح عليها بحنان وهي تتفدى اخوها..... سهيل كان بعده في غيبوبته وإن شاء الله 24 ساعة تمر على خير باقي ساعة على الموعد اللي يتريونه عسب حالة سهيل تستقر ويطمنون عليه....ظهرت عفراء وهي تصيح هند كانت مترددة يوم شافت امها واختها يصيحون ..... هند بخوف: سلطان تعاال ويايه أخاف روحي ما أقدر اشوفه روحي سلطان من دون تردد أستأذن من الدكتور وسمح لهم دخل سلطان وخته ومشوا بهدوء لين ما وصلوا صوت الأجهزة وشكل سهيل الصعب على قلب هند ماقدرت تتحمل سلطان كان لاوي على اخته هند حطت أيدها على ثمها يوم شافت ويه سهيل سارت لين وصلت فوق راسه...... هند وهي تصيح ودموعها غاسله ويها: سهيل أنا هند أختك سلطان كان ميود نفسه بالغصب عشان مايزود عليها هند تهمس في أذن سهيل : أباك أول ماتنش تسويلي قصيدة حلوة سلطان ينزل راسه ويحز في نفسه كلام أخته هند وظهر عنها وخلها روحها هند: فديت روحك سهيل ...وباسته على يبهته وخده وكانت تمسح الدم اللي ينزل من شفايفه وهي تصيح .... هندترمس أخوها بهدوء وكأنه يسمعها: أباك ترد العين مرة ثانية لا تسير مكان بعيد أنا ادري أنت ما تحب حد يحدر حجرتك وأنت محد... بس أنا حدرت لأني كنت متوله عليك وايد شليت كندروتك ويلست على تسريحتك تريتك تحدر عليه وتهزبني بس أنت كنت هني روحك تتويع ومحد وياك..... وحطت راسها على أيد سهيل وحضنتها وتمت تصيح بقو ......فجأة حست أيد سهيل تتحرك ماصدقت بعد هالوقت كله يمكن سهيل يتحرك شوي ظهرت عطول وقالت لأهلها سلطان زقر الدكتور ودخلوا فريق طبي يتأكدون من صحة كلام هند وفعلا سهيل كان يشوي يحرك جفونه مع انه هب قادر يبطل عيونه وأطرافه تتحرك ظهر الدكتور وعلامات الرضى في ويهه وبشر بو سلطان الدكتور: الحمد الله عدت مرحلة الخطر بس الحين كل اللي لازمه الراحة التامه بوسلطان ودموعه تنزل ويرفع أيده: الف شكر وحمد لك يارب الحمد الله رب العالمين لطفت بولدي الحمد الله أم سلطان تصيح وتلوي على سلطان: الحمد الله ربي استجابلي دعايه اللي من أمس أدعيه لك الحمد والشكر يارب..... عفراء تحضن أبوها اللي كان يصيح ويحمدون الله بسلامة سهيل هند فرحانه رجع الدكتور يكمل رمسته ويوصيهم الدكتور: بس هو محتاج إذا رد وعيه لرفع معنوياته يعني لو سمحتوا الدموع هذه والخوف ماأتمنى يشوفها عليكم بس عشان تتحسن نفسيته سلطان: ليش أعصابه فيها شي...؟؟ الدكتور: لا بس تعرف شخص شايف الموت ويعتقد نفسه في عداد الموتى لا قدر الله محتاج أول مايصحى انه يحس انه كل اللي حواليه موجودين ونفسيتهم أحسن لا تحسسوه أنه هو مثلاً تعبان وايد أو متعور وايد بوسلطان: لا يهمك دكتور ومشكور ويزاك الله خير الدكتور يسأل سلطان: إلا وين ولد عمك كان تعبان البارح؟ عفراء خافت وصدت صوب سلطان تتريا الإجابه على سؤال الدكتور سلطان: لا الحمد الله هو بخير اليوم الصبح خليته يروح ينام لأنه شكله البارح تعب تبرع مرتين بالدم عفراء: عنبو مستشفى شو كبره مافيه نفس الفصيله سلطان: ياعفراء فصيلة دم سهيل نادرة وماطابقت وي حد منا غير خليفة وفي العلميات أخوج تعب وخليفة ماقصر هو بخير انا روحي وصلته وراقد وقال بي العصر عفراء كانت خايفة وايد على خليفة ومب عارفه شو تسوي عسب تتطمن عليه سلطان حس بخوف عفراء الدكتور : لا طمنوا ماشاء الله صحته كويسه دمه ممتاز بس شوية سوائل وبيرجع مثل ما كان هو سحب الدم مرتين صعبه لكن جسمه يتحمل ماتخفوش بوسلطان: مشكور يا دكتور وماقصرت ...بس متى نقدر نطمن على ولدنا؟ الدكتور : إن شاء الله بعد ساعة عايزين نطمن على ردة الفعل واتمنى أنها تتكرر عشان هيكون دليل على تحسن حالته واستجابته للعلاج بوسلطان: الله يسمع منك دكتور أم سلطان: بو سلطان قول للدكتور أبا احدر عنده هند: لا أنا اللي دخلت اصلا سهيل حس فيني انا يوبه الله يخليك بوسلطان كان حازم وياهم: أقولكم خلو الريال يرتاح شوي ساعة وعقب حدروا شو ماسمعتوا كلام الدكتور..... هند وأم سلطان سمعوا الكلام وتريوا هالساعة في هالوقت سلطان خذ عفراء وظهروا في الإستراحة وعفراء معصبه من خليفة وليش سلطان ما منع اللي صار سلطان: عفراء والله انا ما كنت موجود يوم تبرع مرة ثانية يوم سرت لقيته حتى مب قادر ينش عفراء: حرام عليك سلطان الحين الريال شو بيقول عنا سلطان يبتسم ويغمز لعفراء: يالله كل ها خوف عليه يعني افهم من رمستج انه علاقتج وي خليفة طيبه؟ عفراء: مهما كان خليفة ولد عمي وبيكون ريلي إن شاء الله ليش ما أخاف عليه سلطان: الله يطمنج والله كنت خايف تختلفون وي بعض وخليفة ريال ما يتعوض عفراء: من يومين بس بديت أحس شكثر خليفة قريب مني وخاصة عقب اللي سواه وي سهيل كبر وايد في عيني وتباني ما أخاف عليه يا سلطان سلطان: انزين شو رايج دقيله هالمكالمه بتريحه وايد مع انه قال بي العصربس أشوفه ما بين عفراء: مبا اضايجه اباه يرتاح سلطان: لو تحبينه صدق دقيله وخلي هني يي عندج وأعزميه على شي ياكله الريال ما كل شي من البارح والدكتور قال لازم يشرب سوائل وايد عسب يعوض عفراء مستحية من سلطان: خلاص الحينه بدقله سلطان: بخليج تاخذين راحتج بسير صوب هند تلاقيها مصدعه ابويه تحن فوق راسه تبا تحدر عند سهيل عفراء: خلاص انا بلحقك الحينه *********** دقت عفراء لخليفة ...خليفة في هالوقت كان توه ناش وحاس راسه بينفجر شاف رقم عفراء ورد عليها ........... عفراء: خليفة؟ خليفةفرحان وايد عفراء داقه: آآآه ياقلب خليفة وينج أنتي ؟ عفراء خانقتها العبرة تبا تصيح: ليش سويت جي خليفة يبتسم: شو سويت عفراء بعصبية: لا تستهبل خليفة يبطل عيونه: أستهبل مقبولةبس صوتج حياتي.... مافينا اتواجع وياج أوكيه؟ عفراء: آسفه بس انت ما تسمع الكلام خليفة: يعني تبين أشوف ولد عمي يموت جدامي ولا أسوي شي...؟؟ عفراء: ماقلنا شي بس مب جي تذبح عمرك....... خليفة حس الدنياغير : تخافين عليه؟ عفراء: أنت شو رايك...؟ خليفة: عفاري سألتج ردي عليه؟ عفراء: أكثر عن نفسي خليفة: فديت روحج والله عفراء: خليفة انا هني في دبي ترى خليفة عدل يلسته وفتح عيونه معصب: وليش ما قلتي انج يايه عفراء: اخوي سلطان يا الصبح وشلنا ومن 3 ساعات بس واصلين خليفة: بندي الله الحين ياي عفراء: خليفة؟ خليفة معصب: شو تبين؟ عفراء: شوبلاك عصبت؟ خليفة: ماشي بس نسيت اني حي الله خطيبج المفروض دقين تخبريني انج هني مب تخلوني راقد عفراء: كنت أباك ترتاح ما يكفي اللي سويته مع سهيل خليفة هدى شوي: لا تسوينها مرة ثانية عفراء: إن شاء الله من عيوني يالله اترياك انزين خليفة: عشر دقايق وبكون عندج عفراء: خليفة دخيلك شوي شوي المستشفى جريب مابيطير خليفة: ادري بس قلبي هب بشوري يالله باي عفراء: ربي يحفظك. رجعت عفراء عند أهلها ويلست وياهم وصل خليفة عقب ربع ساعة وسلم عليهم وعلى عفراء ...وبدى التعب واضح على ويه خليفة ويلس حذال بو سلطان ينشدهم عن حالت سهيل وطمن عليه لف الدكتور مرة ثانية وأستأذن بو سلطان يحدر على ولده سهيل ودخل وياه أم سلطان ويلسوا وهند تتحرقص تتريا دورها وخليفة عفراء يطالعون بعض ....بس عفراء كان يبين شكلها متضايج من اللي شافته على ويه خليفة..... وخليفة فهم نظرات العتب اللي في عيون عفراء سلطان أستغل الفرصة وعزم خليفة على الغداء لأنه ما كل شي من البارح وخذ عفراء وياه وقال لهند تخبر أبوه انهم ساروا يبيون غداء للكل ساروا وطلبوا أكل سلطان شل الأكل وخلاهم براحتهم ....خليفة يطالع عفراء كأنه يشوفها لأول مرة عفراء مستحية وما تقدر تحط عينها بعين خليفة..... عفراء وهي يالسه تفتح السندويش لخليفة: شفت ويهك شجايل مصفر؟ خليفة: .................. عفراء: خليفة ؟ خليفة: اوف ماتعرفين تسكتين شوي هدوء عفراء تبستم مستحية: يود كل شكلك بتعبني انته... انتو الريايل جنكم أطفال صغار لازم كل شي بطلب خليفة يضحك: هيه عن نفسي طفل بس حجم كبير برتبة رائد تضحك عفراء: متفيج والله خليفة: أحلى ضحكة شفتها وسمعتها في حياتي عفراء: بتاكل ولا أكلك بأيدي بعد خليفة ماصدق: يالله يودي السندويش أكليني عفراء فقط ويها: شو تخبلت الناس تتطالعنا يالله كل بسرعة واشرب عصير وغرشة ماي خليفة: خيبببببه وين تبين شو قالوج عني محرقة عفراء: يالله بسرعة خليفة خلص عسب مايعصبون علينا خليفة: محد يعصب عليج وانا موجود بعدين مايقدروا يقولون شي عاطينهم دمي خخخخخخخخخ عفراء تضحك: هههههههه صدق انك بايخ بنرده هالدم جان بيستوي فيه معاير خليفة يرمس بحنان: لا مايحتاي عفراء بترده لي عقب ما آخذها صح عفراء تحاول تتجاهل نظرات خليفة عفراء نشت وهي تقول خليفة : يالله قوم بنسير خليفة: يلسي لا أصفعج الحينه بعدني ماخلصت عفراء: شو ها عبالك جندية عندك خليفة نقع من الضحك: فديت روحج خلصت يالله زري جدامي عفراء وخليفة يظهرون ويسيرون لقوا بو سلطان وأم سلطان فرحانين لأنه سهيل يتحرك عادي بس ريله اللي شوي متعبته وهند وسلطان داخل يتريون اليوم اللي بينش فيه سهيل ومرت الساعات وكل مرة حد يدخل خليفة طبعاً أستأذن ورد بوظبي وخبرهم انها بيترخص من الدوام........ وبيرجع لهم وصى عفراء طمنه عليها كل فترة والثانية وهي نفس الشي ..... وصولوا أهل بوسلطان وجماعتهم يتحمدون بالسلامة لسهيل مع انه سلطان معصب منهم بس أستقبلهم عدل... الساعة 9 السماء الحمد الله استقرت حالة سهيل اكثر عن قبل بس بعده ما نش ورجوا الشقة اللي حجزها سلطان لهم وأول ماوصل طلب أكل للجميع أم سلطان كانت تاكل شوي مالها خاطر تاكل لين ما تشوف ولدها قام بالسلامة هند فرحانه أنه اخوه بعده حي وبدى يتجاوب ولقت في تليفونها 12 مس كول ومسجات شيكت لقت ربيعاتها لأنها ماسارت الجامعه واتصلت لموزة وخبرتها اللي صار وطمنتها أنه سهيل بخير ظهر سلطان يارته شاف 2 مس كول ميثا ومطرشه مسج ... ( أنا الحبيب اللي على دربك إرتاد... ولا يردني عنك إلا وفاتي ,, عمر الحبيب في العز ماراح ينعاد... وشي حيلتي لا غبت عني عيني وذاتي!,, لا تقول تايه وأنا لك عضد وسناد,, وشلون أتجاهل ورد ظهر في حياتي) سلطان متلوم في ميثا لأنه رمسها بأسلوب مب حلو مع انها كانت خايفة عليه وتبا بس تكون قريبه منه في محنته عقب دق لميثا بس ماردت عليه لأنها تعبت كله مغلق تليفونه كل هالوقت ولا فكر يطمنها عليه ولا عن حالة سهيل ويوم دقت مرتين بعد ما رد عليها فحز في خاطرها لأنها حست سلطان بعيد عنها.... بس هوكان مستهم على حالة اخوه .... طرش لها مسج (أقول بكره ينتهي الهم وألقاك..يطلع علي الصبح وأقول باجر...ضايع بدونك بين همي وذكراك..أنا أعترف بالضعف ما أقدر أكابر....الصمت بيت........ و.......دمعتي ألف شباك....... و.....الهم باب........ وشوفك ألف زاير...) ميثا قرت المسج قلبها عورها وحست شكثر سلطان الوحيد اللي للحين ما أرتاح يلست تتريا شوي ودق سلطان... وردت عليه سلطان: سلام عليكم ميثا: عليك السلام سلطان: شحالج ميثا ميثا: بخير يعلك الخير أنت شحالك شو سهيل الحينه؟ سلطان: الحمد الله عدت مرحلة الخطر وهو بخير ويتحرك ميثا: الله يشافيه إن شاء الله ويرده لكم بالسلامة...... سلطان: آمين ميثا:........ سلطان: ميثاني أدري زعلانه بس والله العظيم تعبان وأهلي محتاين لي ميثاتقاطعه: ومنو قالك أني زعلانه عادي سلطان فاهم أسلوب ميثا وقلبها الطيب: ميثا اعذريني والله أنه عيني ما غمضت للحين وأحس راسي بينفجر ميثا: سلامتك سير حط راسك وأرتاح سلطان معصب: ليش ترمسين برسميه جي ... أنا روحي تعبان وأسمع منج هالأسلوب الجاف ميثا بهدوء: مب غلط اني طلبت منك ترتاح سلطان: ولو مب بهاالطريقة؟ ميثا تصيح لأنها معصبة بس ماتبا تضيج عليه زيادة سلطان : الحينه ليش تصيحين ناقص انا عوار راس ميثا: الله يسامحك سلطان مابرد عليك سير أرتاح وآسفه إذا صار كلامي مايناسبك ويعورراسك سلطان وهو خلاص ضايجه عليه الدنيا: أحسن بيلس أترياج سيري تعلمي شجايل ترمسين ريلج عدل وهو في هالظروف ميثا مستغربه سلطان فجأة انقلب جي: سلطان بند أحسن سلطان بدون مبالاة: باي ميثا يلست تصيح من الخاطر وعطول اتصلت في عفراءوخبرتها بأسلوب سلطان وكلامه الجارح لها طمنتها عفراء وخبرتها أنه سلطان وايد مضغوط معاهم ومع سهيل ويلست تفهمها انه سلطان شو ماقال بس قلبه ابيض ويحبها ومايقدر يصبر عنها ....رغم ها ميثا تمت حاطه في خاطرها وفي نفس الوقت عفراء تحب ميثا ولا هانت عليها وطيبت خاطرها ...بس ميثا قالت لعفراء انها مابدق لسلطان يكفي اللي سمعته...وأتفقت وياها عسب تتصل فيها وتطمن على سهيل وسلطان من عند عفراء رد سلطان الشقة ورمى نفسه كأنه جتيل من التعب ورقد لين ما الصبح الساعة 7 أتصلوا فيه المستشفى وخبروه انه أخوه قعد ويباهم بسرعة عطول نش وخبر أبوه وأمه وساروا بسرعة على المستشفى حدرت أم سلطان ويلست تلوي عليه عقب ماحدروا الكل .... حدرت هند وطلبت منهم انها تدخل روحها..... أول ما دخلت كانت تمسك نفسها عسب نصيحة الدكتور... سهيل يصد صوب أخته أول ماشافها دمعه عينه سهيل بصوت ضعيف: تعالي حذالي هندتلوي عليه وتبوسه على راسه: أجر وعافية إن شاء الله ماتشوف شر سهيل: الله يسلمج ويعافيج شحالج هندتصيح: دام أنته بخير انا بخير سهيل: أنا ما أصدق أني حي ماأصدق هند يلس سهيل حاضن أخته هند ويصيح من الخاطر وحس بويهه وآثار العملية سهيل ماسك أيد أخته ويطالع في ويها: هند ويهي وايد متشوه شكلي يخوف وايد؟ هند تمسح بأيده بكل رقة وحنان على ويه أخوها: لا فديتك بعدك غرشوب البيت مافيه منافس سهيل يحاول يبتسم بس مايقدر يحس بألم هند: شو صار سهيل كيف استوى الحادث؟ سهيل : هذيل المخبل انا قلت لهم لا تتسابقون قلبي قبضني والله يا هند أول مابنشر التاير ... هند تتطالع الحزن والخوف اللي بعيون سهيل وتمسح على شعره وهو يخبرها السالفة.... سهيل: والله يا هند ونحن ننجلب شفت ربعي يموتون جدامي انا ما حسيت بعمري لأني الوحيد اللي كنت رابط الحزام سيهل يصيح من خاطره وهند تمسح دموعه هند: بس فديتك لا ترمس وايد سهيل: دخيلج انا أبا ارمس ...يلست أطالعهم يوم وقفت السيارة واحد تم ينادي ولده يبا يشوف ولده ومات جدامي أنا هذيج الساعة بغيت اشوف أبوي وأمي واستسمح منهم بس حسيت بألم في راسي وصدري وماذكر شو صار هند تصيح وتحضن اخوها بحنان: خطاك السو حبيبي الله يرحمهم ويصبر أهلهم عليهم...سهيل بقولك شي بس لا تزعل مني سهيل : شو خير؟ هند تبا تنسي سهيل: أنا حدرت غرفتك من دون أذنك سهيل يسايرها: وليش شو هفتي من داخل هند ودموعها في عينها: شليت كندوتك ويلست الوي عليها وأصيح لأني ما توقعت عقب اللي سمعناه اني بشوفك مرة ثانية سهيل هني ماقدر وحضن أخته حيل ويلس يصيح حدر سلطان وشل هند وقال لسيهل يرتاح لأنه الدكتور وصاه جي...دخلت الممرضة وعطت سهيل دواه وراح في سابع نومه ....شل سلطان أهله ورجعوا الشقة اللي حاجزنها وكان مرتاح لأنه أهله كلهم فرحانين بسهيل وتحسنه اللي الكل ملاحظة وطلب غداء تغدو وقال لهم يرتاحون...وسارت عفراء بغرفة روحها.....واتصلت بخليفة خليفة: الوووو عفراء: السلام عليكم خليفة: عليكم السلام والرحمه هلا والله بغلا القلب عفراء: شحالك حبيبي خليفة : بخير ربي يسلمج عفراء: دوم وينك اليوم؟ خليفة: موجود الغالية.... فيه شي عفراء: اخوي سهيل نش وسلمنا عليه ويلس وي هند أقولك شو طلع كل شي لهند سوالف الحادث والي صار خليفة: شو تغارين يعني ههههههه عفراء: لا ما أغار شرات ما علاقتي بسلطان قوية أتفهم حب سهيل وراحته لهند خليفة: وعلاقتي وياج وين موقعها من الإعراب عفراء بغلاسه: على أي صعيد العاطفي السطحي؟ خليفة: من كل النواحي عفراء: لا ناجح لا تخاف خليفة : غصبن عنج ناجح عفراء تضحك: لا تخليني أغير رائي خليفة: شو على كيفج يالسين نعلب...الزبدة يوم بيطيب سهيل بخبر عمي نملج شو رايج....؟ عفراء متسحية: مدري براحتك خليفة: اونه حركات البنات ....مدري براحتك....راحتي في قربج عفراء: خلاص على خير إن شاء الله خليفة: يالله المهم ...عقب المغرب بكون عندكم إن شاء الله عفراء: أنت حلتلك سالفة الخطوط رايح ياي؟ خليفة: مايخصج عفراء: اوف أنت ليش ماتسمع الكلام خليفة: لا تتأففين لا أي اترفس في بطنج... مابعيد رمستي سلمي على الأهل يالله فمان الله عفراء تضحك: ربي يحفظك دير بالك وشوي شوي بالدرب خليفة: إن شاء الله عفراء: مع السلامة خليفة: ربي يسلمج سلطان في هالأثناء يحاول يتصل في ميثا بس ميثا ما ترد حس انه هو وايد مصخها في اسلوبه وي ميثا ومن حقها انها تزعل...ميثا كانت تشوف المكالمات وحاز في نفسها الأسلوب اللي رمسها سلطان فيه طرشت له مسج ( أنا بخير وأتمنى بعد أنت تكون بخير ومرتاح الحينه مبا أضايجك لأنه رمستي ماتعيبك ..فيالسه أتعلم الحينه شجايل أعامل ريلي ويوم اتعلم برمسك) سلطان تضايق وايد يوم شاف المسج حسسه هالمسج أنه فعلا ميثا مجروحه من رمسته سار صوب عفراء ودخل يرمسها ويخبرها باللي صار؟ عفراء: سلطان نحن كلنا نقدر الشي اللي سويته والظرف اللي كلنا مرينا فيه بس ميثا صارحه ما عليها زود وقفت وقفة يمكن أي بنيه ماتسويها مكانه أنت لو شفتها شكثر تهتم فينا لين ما انت قلت لها تسير آخر شي تي أنت تفر رمسها مالها داعي سلطان: المفروض هي تقدر أني مضغوط ومب بشوري الرمسه اللي طلعت عفراء: انزين بس مب جي سلطان بنيه توها مالجه وحفلة ملجتها تأجلت ومع ذلك ما ترددت لحظة وحده انها توقف وياك وي خواتك وأهلك وهذا جزاها سلطان: عفراء أنا كنت متضايج وتعبان ماقدرت اضبط اعصابي وهي اسلوبها ما عيبني وهي ترمسني عفراء بعتب: لدرجة تقول لها سيري تعلمي شجايل تعاملي ريلج في مثل هالظروف.؟ مب عذر سلطان ولا نقعتها وتفيجت الحين بس دقلها؟ سلطان: انزين شو اسوي الحينه مب راضية ترد على مكالمتي؟ عفراء: تبا الصراحة سلطان لوخليفة مسوي معاي هالموقف ونحن في جي ظروف وبعد وقفتي وياه بسويله طاف لين مايحس أني بالنسبة له نعمه من الله سلطان: يالله دخيلج طاع منو يرمس الحينه عفراء تبتسم: هيه بعد شو تتحرون ماخذين أي حد ولا من هذيل المراهقات اللي لسانها اطول من الثانية..... سلطان: لا تلوعين عليه الزبدة شو اسوي الحينه عشان الشيخة ميثا ترضى عليه؟ عفراء: والله أنت الغلطان والريال شوف شو تحب حرمتك حسسها انك ندمان مثلا دقلها وايد طرش مسجات اعتذار.... سلطان: اييييه أنتي وياها أقولج بعدج ماعرفتي سلطان سعيد أنا ما أحب أذل نفسي وايد اوكيه تبا ترد ... ترد..... مابتصل فيها اكثر عن جي دقيت 3 مرات ظنتي هي تعرف شو اللي لها وشو اللي عليها عفراء معصبه: سلطان البنيه ما غلطت أنت اللي غلطت عليها عقب اللي سوته سلطان: واجب أي بنت توقف مع ريلها في أزماته عفراء: وهذا الرد منك على اللي سوته...سمع سلطان ميثا هب مثلي تراها اقوى مني في كل شي لا تتحراها بطوف الموضوع بالساهل لأنه الرمسه لو وصلت لأبوها عادي يطلقونها منك بس هي ماطلع الرمسه هذه برى سلطان: عيل لا طوفها لا هي ولا اكبر عنها يطلقني منها إلا يوم أنا أبا وغلطان أني اصلا عطيتها وعطيتج ويه..... ظهر سلطان معصب وعفراء مستغربه من أسلوب سلطان اللي صدق متغير وصاير عصبي لدرجة ماتنطاق ..... هند يات على صريخ سلطان ... ورمست عفراء وخبرتها شو السالفة اتصلت عفراء بميثا وخبرتها انه فعلا سلطان متغير ميثا خافت انه يكون فيه شرخ في علاقتها وي سلطان بس بعد عزة نفسها وكبريائها ما سمح لها انها ترد على سلطان عقب الكلام اللي قاله لها..... ومع ذلك تحملت وكانت تتصل في شخص شخص من أهل بيتهم عمها وعمتها وهند وعفراء بس سلطان الوحيد اللي تجاهلته وها شي طبيعي بعد الموقف اللي صارمابينهم وأسلوب ميثا والمديح اللي يسمعه من أبوه وأمه يعور قلبه ويسأل نفسه ليش تعاملهم كلهم زين وتتجاهلني أنا لهدرجة شلت في قلبها.........؟؟؟ مرت الأيام وسهيل تحسنت حالته وايد وانتقل للقسم وريله كانت الشي الوحيد اللي مضايجنه... في هالفترة رجعت عفراء وهند العين عسب مايستوي يطولون الفترة هذه كله وي سهيل والحمد الله هو بخير وعافية وكانوا ينزلون كل ويكند عسب يطمنون عليه ..... هند تعودت الفترة اللي طافت تمر على عفراءالدوام وي الدريول ويسيرون البيت رباعه وعلاقتهم بميثا كانت قوية لأنه ميثا ما خلتهم محتايين شي ابداً وقفت وياهم كأنها ختهم الكبيرة ويمكن اقرب من أخت....وهالشي اللي كان يسمعه سلطان عن أخبار ميثا من بعيد لبعيد رغم محاولاته في مصالحة ميثا بس ميثا كانت تتعذب لأنها تعامل سلطان جي بس بغب تعلمه انه شو ماكان الإنسان عنده ظروفه المفروض مايفر رمسه جي وخاصة بعد اللي سوته وياه.. كان سلطان كل يوم يحاول يتصل بميثا ويطرش مسجات عاديه مافيه أي شي يديد وبعيدة وايد عن الأعتذاراللي كانت ميثا تباه...بغت بس تعطيه درس انه مايكرر هالشي في المستقبل يوم تكون وياه....... الفترة هذه بعد علاقة عفراء بخليفة كانت تقوى يوم عن يوم ........ وفي يوم رجع سهيل البيت من دون مايقول لخواته عسب يسونها مفاجأة .... هند وعفراء وميثا حدروا حصلوا سهيل يالس في الصالة يترياهم وركضوا خواته يسلمون عليه ودموع الفرح في عيونهم سلطان كان موجود ويلس يطالع ميثا وفائها وحبها لسلطان وأهله كان يبين في تصرفاتها سلطان نظرات الإعجاب والحب والشوق كلها في عيونه....... وكان الكل متجمع سلمت ميثا على الجميع حتى سلطان وتحمدت بالسلامة لسهيل ويلسوا جميع......... سهيل: شوي شوي... لا دزون عفانا الله شو اول مرة تشوفوني؟ عفراء: نورالعين سهيل يالله محلاتك وانت في البيت هند: ليش ماخبرتنا انك بتي سهيل: عسب أصيدج وأنتي تحدرين غرفتي خخخخخخخخ هند: لا الحمد الله ماحدرت بس أتأكد نظيفة كل يوم وأدخنها وأظهر مدري ياني احساس انك بتسوي غارة علينا هههههههههه سهيل: والله طلعتي هب هينه يالله قومي ساعديني بصعد غرفتي مشتاق لها هند تسند أيد أخوها ويظهرون فوق والضحك والسوالف من غرفة سهيل واصله تحت ....عفراء أستأذنت من ميثا بتظهر تبدل ملابسها عشان يجهزون الغداء ميثا بعد كانت مستعيله بترد البيت عمتها حضنتها وسلطان يتحرقص وميثا كأنها تغايض سلطان بأسلوب الدلع والدلال اللي يعاملها فيها عمتها وعمها بس أصرت انها تسير وعيونها على سلطان ..... ميثا: لا ما عليه عموه صدق صارلي يومين إرهاق لأنه الشخص في المدرسه علينا فالسموحة منج وتستاهلون سلامة سهيل بو سلطان: ما تهونين عليه يا ميثا والشي اللي سويتيه يدل على انج بنت أصل واياويد ميثا منزله راسها ومستحية : تسلم عمي بس ارخصوني سلطان: أوصلج ميثا: لا الدريول بيوصلني سلطان : لا ما عليه أنا بوصلج ميثا ما حبت تكسر كلام سلطان جدام أهله أستأذنت منهم وترخصت وظهروا سلطان كان فرحان انه ميثا ترمسه عادي وبكل تقدير وأحترام وبكل ذكاء قدرت تخليه يحس بغلطته من دون أي كلام أو تطاول من ميثا ...فتح الباب يلست ميثا بأتزان ركب سلطان السيارة وكان قاصد انه يمشي على الخفيف عسب يلحق يرمس وي ميثا........ سلطان: ميثا ماتخيلت في يوم تصبرين عني كل هالمدة حتى لو كنت أنا غلطان ميثا بكل هدوء: صبرت لأني أعزك ولك تقديرك وأحترامك ...صبرت لأنه عزة نفسي وكرامتي ماسمحت لي أني أرد عليك لأني لو رديت باجر بتقول رمسه اكبر عني جي .. اهتمامي فيك حطيته في أهلك لأنك فعلا جرحتني ياسلطان وهالشي ما توقعته منك ..... سلطان: بس انا كنت مضغوط وايد ومرهق من كل شي وكلامج نرفزني فطلع كل شي فيج المفروض تتحمليني شوي؟ ميثا والدموع في عينها: أتحمل أنك تهيني وأسكت؟ سلطان وقف السيارة في مكان هادي ومسك أيد ميثا .... سلطان: آسف أدري يمكن أعتذاري متأخر ...بس اللي أعرفه بعد انه قلبج حنون على سلطان والله العالم فيني وفي حالتي بدونج...... ميثا ودموعها تنزل: وأنت على بالك انا كنت بخير ومستانسه وانت بعيد عني وما أكلمك لا أنا كنت أتعذب في اليوم ألف مرة سلطان يمسح دموع ميثا ويبوس أيدها ويعتذرلها لين مارضت......وصلها البيت رجع سلطان ومرت الأيام وسهيل حالته بخير وهند واقفه وي أخوها في كل شي عشان محد يحسسه بالعجز ... بس المشكلة في ريل سهيل اللي يوم عن يوم بدى مايحس فيها احياناً وهالشي خوفه وايد أم سلطان تحاتي ولدها وخوانه واقفين وياه ويساندوه في الصغيره والكبيره..........عفراء وخليفة متحمسين لسالفة الملجه واللي رفضها أبو سلطان بسبب حالة سهيل وقال لازم سهيل يوقف على ريوله حتى حفلة سلطان مؤجله لوقت محد يعرفه ياترى شو بيصير وي سهيل وشو الأحداث اللي بتطرأ على حياة سهيل وهند.........؟ يتبع ,, انتظروو الجزء الاخير Quote Link to comment Share on other sites More sharing options...
ريم المحرق Posted يناير 27, 2007 Report Share Posted يناير 27, 2007 مشكورة على البارتات وبانتظار الجزء الاخييييييييييييييييير Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.