●εïз●εïз● خــــل العذول موطي الراس منكوس●εïз●εïз●

[الشمعة المضيئة]

 

 

ليششششششششششششششششش كل هاي مستوي

 

 

بيه صدمني البارت يالغلا

 

شكراً عمري ماترييت البارت يكون جذا

[راسرمانية نحيسة]

اوووه غلووي ويش ها البارت

الله يسامح ليلى لعبت بعقله

تسلمين نزلتي البارت

فديتج الغلا

وحشتج صج

[اسيرة احساسي]

ليش ليلى تسوي جذي حرام عليها

 

بليييييز كملي ابي اعرف شنو بيصير

 

[danat aldonya]

يسلمووو على البارت المحزن

الله يخليج يالغلا نزلي البارت الياي باسرع وقت

ولو يكون اليوم يكون وايد احسن

[._.الغلا._.]

(( الشمعة المضيئة )) مشكورة حبيبتي ع التواصل,, بعد هاذي القصة و احداثها,,

 

و ان شاء الله البارت الياي بكون احسن,,

 

(( راسرمانية نحيسة )) شكرا حبيبتي ع الرد,,

 

اي والله وحشتني طلتج ,, تابعي البارتات الياية ان شاء الله تعجبج,,

 

(( اسيرة احساسي )) مشكورة حبيبتي ع المرور نورتي الصفحة,,

 

ان شاء الله ما راح اطول عليكم,,

 

(( danat aldonya )) يسلمج ربي ع الرد الغاوي,,

 

و ان شاء الله راح اكملها,, و اليوم بعد بارتين على شان خاطركم,,

 

خلك معي دايم وأنا أكون مبسوط ..... لا تغيب عني يوم ويضيق صدري...قلبي وهب لك صادق الحب مصفوط ..... والأعلى غيرك من الناس بدري ..مدري وش اللي بالهوى شاطني شوط ..... والا ترى قلبي من الحب حذري ..

 

 

. صرخت و تميت متجمده ابمكاني ارتجف .. و اشاهق يوم حسيت البروده غزت جسمي .بها الجو الحار ..

فجيت اعيوني يوم سمعت ضحكت ليلى : هههههههههههههه قومي تحلمين شوه .."جفت كوب ماي بيدها"

يلست ابسرعه اتلفت يمين و يسار : وين حمودي ..

 

عقدت حياتها : حمودي !! يمه منج شوق اتروعين ..حمودي عنده امه و ابوه..

تعلقت بـ ليلى : حرام عليج حرام الي اتسوينه و الله حرام..

 

بطلت ليلى عيونها مستغربه: انا شو سويت .

طالعت اجواء غرفتي و رجعت يلست ابمكاني حطيت ايدي ع راسي ..حسيت اني بتخبل ..بس بداخلي كنت احمد ربي الحمدلله الحمدلله انه حلم ...

ليلى: عبالج حمودي راقد عندج ..

رفعت راسي اطالعها : الظاهر كنت احلم ..

ليلى اطالعني بنظرات لوم: شكلي كنت شريره بالحلم ..

 

ابتسمت لها : واااااااااااااااايد ...

ليلى: شكلج.لحقتي اتسويني شريره ..

 

حطيت راسي ع المخده .. و قلتها : حلمت ان سعيد ياب حمودي يرقده عندي و سمعت ضرابه بين حصه و سعيد.. و جفت انتي و س........"بس سكت ما بغيت اقولها الكابوس الي جفته "

ليلى: انا شو فيني ..

 

نشيت رايحه الحمام اتغسل: ماشي الحمدلله طلع كل شي حـلم ..

ليلى: زين عيل رشيتج ماي بارد علشان اقطع عليج حلم الناري ..

ابتسمت لها : شكرا .."وصكرت باب الحمام"

 

لصقت بالباب احس برجفه ..بس عقب بديت اطمن روحي الا هو حلم يا شوق و سعيد مستحيل يسوي جذا ..يالله تبعد عنا الشر ..عقب ما طلعت من الحمام ...جفت الحجره فاضيه ...مدري ليش للحين احس بشعور اني بعدني قاعده ..احلم ...بدلت ملابسي .. و طلعت من الحجره ...سرت صوب حجرة حصه اتطمن عليها ..

دقيت الباب ...

سمعت حسها : منوه ..؟؟

 

قلتها : انا شوق ..ابا اتطمن عليج..

شويه سمعت صوب المفتاح بالباب .. طولت الوقفه عقدت حياتي ..خمنت ها اكيد حمودي الطمطمه ما يعرف يفتح الباب ..شويه جان ينفتح..من جفته تفديته و لويت عليها ..

حمودي متضايج مني يدزني: قووووووووووووووومي

شوقاني +حصه: ههههههههههههههه

بسته بوسه قويه ...جفت حصه منسدحه ع الشبريه طالعتها: شخبارج ..؟؟

حصه : مصدعه ..اخوج وولده عذبوني..

قلتها بسرعه: سعيد شو سوا فيج..

 

طالعتني مستغربه : ماشي ليش !!

 

بلعت ريجي اتلومت من ردت فعلي ابتسمت و انا محرجه: لا ماشي ع بالي ..\

حصه اتحاول تيلس : لا ماشي بس بس بهاي الحمله وايد اصدع ...

 

قلتها: زين كنتي بـ حمودي جذا اتصدعين ..

 

قالت : هي ..بس هالمره اكثر ..امممممممممم بتروحين ..معاهم ..؟؟

قلتها: وين محد قال لي ..

 

ابتسمت: يبون يروحون امارات مول ..بس انا و سعيد ما بنروح..

ابتسمت و قلتها ابسرعه: احسسسسسسسسسسن ..

طالعتني حصه: شوق الفتره الاخيره قمت الاحظ عليج حركات غريبه ..

 

ابتسمت و انا اتذكر حلمي : ههههههههههههه اسولف ...و حمودي بييي

حمودي : برووووووووووح عمي سيف بياخذني ...

 

طالعت حصه فأكددت لي : هي سيف بياخذكم ..

سالتها: و ليش انتوا ما بتروحون ..

حصه: ما اقدر الخط يتعبني ..

 

قلتها : الله يعينج ...بسير اجوف باباتيه ..

حصه: الله يحفظج..

 

سالت حمودي: بتييي معاي ...

حمودي : بلبس ثيابي ..

حصه: مب الحينه بتروحون ..خل ترجع عموه شيخاني من المدرسه

 

عرفت انا بنتغدا هني و بنظهر عقب الغدا مب مشكله ودرت حصه و حمودي ...و نزلت الدري جفت عمي عادي و باباتيه يالسين فـ الصاله ...

سلمت عليهم طبعا عمي عادل بس رد السلام ..يلست حذال باباتيه باسني ع راسي ..

 

عمي عادل: غريبه ناشه متأخره ..

 

ابتسمت له: هي اجوف البيت فاضي ... وين سارت ليلى !!

 

عمي عادل: طلعـوا مع فهد بسياره سيف ..يمشي خواته ..

سكت عيل ليلى ما قالت يمكن يبون يمشون مشوار ابروحهم ...يلست العب بشعر باباتيه بسته ع خده ..

فأجاني عمي عادل يوم قال : شو رايج شوق باخذ ابوج معاي الكويت ..يغير جـو ..

 

شهقت و لويت باباتيه: طبعا لا ..

 

عمي عادل: هههههههههههههههه ليش لاء احسن من اليلسه هني ..و ما يطلع برع راس الخيمه الا للمستشفيات..

 

بعدني حاضنه ابوي : حتى و لو ..مستحيل ما اتحمل باباتيه يكون بعيد عني ..

عمي عادل و جنه عايبتنه السالفه: ههههههههه زين باجر بتعرسين .. بتودرينه ..

 

قلته بانفعال: ما بودره حتى لو اضطريت اخذه معاي بيت ريلي ..

 

حسيت انه يستفزني يوم قال: بس رمسه ..عقب ما اتعرسين بتنسين ..

عقدت حياتي معصبه: عمي لا اتقول جذا ..انا مستحيل اودر باباتيه ..

 

عمي عادل: بس سعيد و سيف راضيين ...ورا باجر بنرد الكويت و بيكون معاي ..

\صرخت عليه من غير قصد: مب ع كيفــــــــــــــــكم ..

 

باباتيه ما كان يسمع شو الي يدور بيني و بين عمي بس حس اني منفعله ..تم يطالع عمي و يطالعني من غير ما يعرف شو السالفه ..ابتسمت له اطمنه ان ابد ما في شي ...بسته ع راسه .. ووقفت ...ناويه اتصل بـ ندى ..احسن من لعبه الاعصاب الي قاعد يلعبها علي باباتيه ...

 

عمي عادل: وين .؟؟

 

قلته : بروح اتصل بربيعتـي اتطمن عليها ..

عمي عادل : زين ما بتطير ..لاحقه عليها يلسي خلينا انسولف وياج..

قلته: انت تبا تحرق اعصابي انا اعرف اسلوبك..

 

عمي عادل: هههههههههههههههههههه

 

كملت كلامي: و بعدين ربيعتي بالعمره ...

عمي عادل: اهااا زين و الله روحي تطمني عليها و سلمي عليها وايد..

 

طالعته بنظره عرفت انه قاعد يتطنز علي رد علي بضحكه كرهتها ..ما ادري ليش صرت ما اطيق عمي حتى لو يحاول يضحك معاي اعتبره في قمة السخافه ...ربعت حجرتي من دشيتها تذكرت راشد فديته ... متى اتمر الايام ابسرعه ..اتنهدت ..فجيت السده جفت الخاتم الي هداني اياه ..

 

.تذكرت يوم قال لي "عقبال خاتم خطوبتنا" حسيت عيوني بتدمع بس اكيد من الفرحه و الشوق لها اليوم...رديت الخاتم بالسده ابكل هدوء و رقه... و رحت صوب موبايلي..اتصل ع موبايل ندى بس الخط ما يوصل ..حاولت كذا مره اخـرتها ..

 

رحت عند لسته المكالمات المستلمه .. و جفت الرقم الي اتصلت منه ندى ...ضغطت ع الاتصال ..رن رنتين و ابتسمت يوم حسيت ان حد رد علي ..بس حسيت برجفه يوم سمعت صاحب الصوت بلعت ريجي ..

: الووووو

 

رصيت ايدي ع الموبايل لاني حسيت باي لحظه بيطيحين مني : السلام عليكم..

 

صوته الرجولي هز كل شي فيني : عليكم السلام ..!!

بلعت ريجي: ................................"صوته نساني كل شي حتى ليش انا متصله.."

بطلت عيوني يوم سمعت صوته مره ثانيه: الو ..

 

قلته بارتباك.: انا انا ابـا اباـ نـ.......

ساعدني و جنه حس بال فيني : تبين ندى !

 

مدري ليش حسدته حسيت انه ريال واثق من نفسه .. ما يهمه شي في الدنيا ولا يهزه شي ولا يأثر فيه شي ابد..عكسي بالمره ...لو قلت هو ريال و انا حرمه..بس انا ما اعرفه علشان يسوي فيني كل هاه ...

 

قلته ابسرعه: هيه .."وجني اتذكر الاسم" نـدى ..

 

سمعت حسه يقول لي : ثواني ...

 

بلعت ريجي يلست اصفع ويهي من الربكه ..انا ليش اتصلت من هالرقم اصلا ..شو الي سويته بعمري ..مدري عقب كل ها حسيت بعمري سخيفه..هو بالسعوديه و انا بالامارات ..ليش خايفه منه بيظهر لي من التلفون مثلا ..بس كل ها ما فاد لاني نقزت ابمكاني يوم سمعت حسه: ندى بتسوي لج عقب شويه ..

 

قلته ابسرعه و كأني ابا اهرب منه و من المشاعر الي هزتني: مع السلامه..

 

ما اترييته شو يقول صكرت الخط ابسرعه ..فريت موبايل و كأنه كهربني وربعت برع حجرتي اكره اكره كل شي فيني يحسسنـي اني ضعيفه ..يلست ع الكرسي و كأني ابا ارتاح .

 

.فكرت اروح بيت خالوه حليمه ...بس اروح حق منوه ..موزي أكيد راقده و بدور بالمدرسه ..ما ابا اروح تحت عند عمي ينكد علي ...اخرتها ..قررت اروح المطبخ اساعد امايه فـ الطباخ ..نزلت ابسرعه صوب المطبخ لمحت عمي يرمس بالتلفون و كأنه يكلم فهد ...المهم طلعت برع ابسرعه ...علشان ما يزخني و يقعد يستخف دمه لي ...اممممممممممممم لو امايه و او حد من اخواني سمعوني جذا ارمس عمي..جان ذبحونـي ..

 

دشيت المطبخ جفت امايه قاعده اتعابل في السمج ..

طالعتني: نشيتي ..

 

قلتها : من زمان ..

فجيت الثلاجه تذكرت اني ما كلت شي ...بعد ما في شي يشجع اني اكل ...صكرت الثلاجه بعصبيه لان يمكن تهيأ لي صوت خال ندى ..

امايه: كسرتي باب الثلاجه ..

قلتها: سوري ..تبيني اساعدج في شي ..

 

امايه: عاد بخلص ..

 

قلتها: بسوي تبولـه ..

قالت لي : سوي .. زين بعد ..

 

عقب ساعه ظهرت من المطبخ رحت حجرتي تسبحت ..و انا طالعه جفت ليلى منسدحه ع شبريتي تقرا مجله .,..قلتها: رجعتوا من برع ..

 

ردت علي من غير اهتمااام : هي سرنا صوب عين خت ...

قلتها: شوو رايج فيها..

 

قالت : جنان ..

طالعتها من الجامه و انا كنت انشف شعري : بلاج متضايجه..

 

قالت بكسل: سعيد ما بيي معانا امارات مول ..

قلتها: و انتي ليش زعلانه ..

 

سكتت من غير ما اترد ..فكرت اني اواجهها : يعيبج ..

ليلى : ...................................."ماشي رد"

 

يلست امشط شعري : كيفج لا اتردين بس حطي فـ بالج سعيد يحب حصه..

فرت المجله بعصبيه : ادري

 

وطلعت من الحجره ..ابتسمت يعني حلمي ما بتحقق ...سعيد اكبر من جذا بوايد ... عقب ما ردت شيخاني من المدرسه اتيمعنا كلنا في سياره سيفاني الهمر ...يلس فهد جدام سيفاني ...اما انا و شيخاني و ليلى و هدى قعدنا ورااا ...كانت السيره بالنسبه لي ممله ...

 

لان الكل يضحك و يسولف و انا ماخذ راحتي يوم اكون مع سيفاني ابروحي من غير ماماتيه او باباتيه او سعيد يعني بشكل عام من دون حماية ..ابتسمت يوم اتذكرت مكالمتي حق بدور ..قبل ما نطلع من البيت ..اترجتني اني اراقب حركات سيفاني ... خبله بدور ..اصلا عمره ما بيفكر بـ ليلى ...حتى لو فكـر احس ليلى بالها مع سعيد ...هذي ترا حقيقه مب فـ احلامي ...

 

كنت اسمع تعليقات شيخاني و ليلى و هدى..بس انا ما كان لي بارض ...حطيت ايدي خدي اطالع الرمال الي كانت ع جانب الطريج... خذت نفس طوييل ...

 

يا الله خال ندى ليش يثير فيني هالاحاسيس كلها ...شو بيني و بينه ....الحمدلله ان راشد ما يعرف عن هالشيء جان سواني مجزره ؟؟؟رفعت ايدي اطالع اصابعي متى بلبسيني الخاتم متى ...

 

نهايه هالاسبوع بتيي ندى من العمره ...بيكونون قوم عمي محد ردوا الكويت ...

شيخاني : شوقاني انتي يايه بالغصب ..

 

قلتها من غير نفس: لا ...

ليلى: عيل ليش ساكته..

 

قلتها : ماشي افكر ..

فهد: خلوها العروس ع راحتها ..

 

خذت نفس طويل ..سمعت شيخاني: يلا عقبالنا علشان نفتك بس من المدرسه ..

بس صخت شيخاني وحطت ايدها ع حلجهاا..يوم طالعها سيفاني من الجامه بعصبيه ...عاقد حياته ...

فهد: ههههههههههههههه

ليلى : ما عليج شيخه ما بنرجع الكويت الا حلمج متحقق ..

 

فهمت شيخاني شو تقصد ليلى حتى انا بعد فهمت ...بس ما كان شي وقت علشان انسولف ..لان سيفاني موجود ..و ما بسمح مثل هالمواضيع .. و غير ان خلاص سيفاني بركن سيارته في مواقف امارات مول ..نزلنا كلنا

قلت حق سيفاني: بنروح انصلي

سيفاني : زين انا و فهد بنروح انصلي ..تندلون وين المصلى الدور الثالث ...

 

شيخاني: هي

سيفاني: لا اتروحون منا ولا مناك خـلصوا و تعالوا هالمكان ..

ليلى : بنشرى يمكن شيء يعيبنا ..

 

سيفاني طفران ها محد يطلع معاه مكان: اوكى بس لا اتخرون يلا فهد..

طلعنا نحن البنات ..رايحين المصلى ...عقب ما خلصنا ..صلاة يلسنا انحـاوط في المحلات ...

هدى: ايه خليكم خريب مني اخاف اضيع اشكبره هالمركز ..

 

شيخاني: هههههههههه لا اتخافين ...

ليلى : كل اجانب ما اجوف مواطنين؟

كنت اسمع كلامهم ...بس طار عقلي و انا اجوف بدلات الاطفال ..خطر ع بالي حمودي ..دشيت المحل

قلتهم: تعالوا هني جوفوا هالبدلات رهيبه ..حصه بتتخبل عليها ..

 

ليلى : ما احب ادش محلات الاطفال بتريا برع ..

 

طنشتها و يلست الف و الف ..عيبتني كذا بدله شليتها ... وحده بخليها حق يوم ملجتي .. و الثانيه يوم ملجت سيفاني ..امبين عليها راقيه ...سرت احاسب .. و انا ظاهره لفتني محل خاص ببدلات الشباب ...رحت صوبه.. و انا فـ بالي اشتري شي حق راشد...بس لو شريت شو بيقولون ..؟؟ اكيد بسالوني حق منوه ..؟؟

ما اهتميت يلست الف و احاوط بس ما عيبني شي ..فكرت اخذ رايي شيخاني ..التفت يمين شمال محد صوبي وين راحوو ..

 

اتصلت بـ شيخاني ردت علي سالتها: وين انتوا ..؟؟

 

شيخاني: تعالي نحن برع ..

صكرت عنها و طلعت برع المحل بس ما جفت حد ..بلعت ريجي ..رجعت اتصل بها ..

قلتها: وين بالضبط تراني ما اجوفكم ..؟؟

 

شيخاني: انتي وين ..

قلتها : انا عندي محل الي مجابل الاطفال انتوا وين..

 

ردت علي ابرود : نحن بالمحل الجريب منه ..دشي علينا..

 

الظاهر ان شيخاني كانت لاهيه بشيء تبا تشتريه..ربعت المحل الجريب ما لقيت حد.. دشيت المحلات الجريبه مني مالقيتهم ...رجعت اتصل بها كانت تحاول ادلني بس يطلع المكان غلطت .. كلمتني ليلى ..بعد نفس الشيء ...فكرت اتصل بسيفاني ... اخرتها يوم جفت مرت ساعه و نص انا ادورهم ..قررت اتصل بسيفاني ..بس البطاريه فضت عندي .. و اتصكر بويه شيخاني ...بلعت ريجي ..دارت فيني الدنياا ... وينهم ..؟؟ وين راحـوا ..

 

حاولت افتح الموبايل علشان اقولهم اييون عند المصلي لاني وصلت هناك ..بس الموبايل يرجع يصكر لان البطاريه فاضيه..شسوي ..؟؟ ..هني كل اجانب ..اخاف اتعامل معاهم ... وين اروح ..؟؟

 

طالعت الساعه مرت ساعتين ...انا بعدني وحيده ...يلست امشي و امشي ...بس مالقيت حد ..اخرتها وصلت برع عند موقف السيارات ...يلست ادور ..يمكن الاقي سياره سيفاني ... بس الظاهر مب هني امبركن سيارته ...يتني الصيحه ...

 

كنت برجع داخل بس جفت شاب ..رايح صوب سيارته ..شكله صايع ..شعره تحت جتوفه و سماعه موبايله باذونه .. و غير الكاب شكله ما يطمن بس رحت صوبه ...

قلته بصوت يرتجف و انا احبس دموعي : لو سمحت اخوي..

 

طالع الشاب وراه مستغرب : انا !!

هزيت راسي يأسه ...التفت صوبي و قال: امري الشيخه ..

 

قلته : عندك جراجه ابا اجرج موبايلي ..مضيعه الاهل و مب عارفه وين اسير ..

قال و كانه استعطف حالتي: ما عندي جراجه ..بس تعال اركبي معاي السياره ..

 

رديت لورا خايفه الظاهر ها مامنه فايده ..فكرت ارجع داخل ارمس السكيورتي أي حد يساعدني ..

ابتسم الشاب : لا اتخافين ... انا عندي هني جراجه بس وايرها قصير ما يوصل برع ..يعني دخلي السياره علشان اترومين ترمسين ...

 

همست: لا

 

قال لي: عيل سمحيلي ما اروم اساعدج ...انا مشغول ..

 

تميت واقفه ابمكاني ...يوم جفته شغل سيارته يلست اصيح ...من جافني اصيح نزل ابسرعه و ياه صوبي

قال جنه طفر : شو تبين اسوي لج انتي مب راضيه ..

 

قلته و انا اتقطع من الصياح: الحينه بيأذن المغرب ..و انا مضيعتنهم من العصر ... كيف ارجع البيت..

الشاب: زين بوصلج البيت ...شو قلتي ؟؟

 

قلتها: انا من راس الخيمه ..

 

عقدت حياته: راس الخيمه .. و يايه ابروحج دبي ..

قلته و انا اتقطع : لا اختي و بنات عمي بس راحوا عني مدري وينهم ...اخوي بجتلني الحينه "وكملت صياحي"

 

كنت احس بعمري تايهه و ان شكلي بتم جذا ضايعه ...

قال: زين لا اتصيحين ...اندوج موبايلي اتصلي فيهم ...

 

خذت موبايله من غير ما اتردد و انا احاول اوقف الرجفه الي احس فيها ...اتصلت ابـ شيخاني ما اترد ...اتصلت كذا مره ما اترد..

 

يلست اصيح : محد يرد علي ..

 

الشاب : انا الحينه بروح اصلي المغرب اسمحيلي ما اروم اتاخر ..

 

زخ موبايله و دش المركز..خفت يوم تميت ابروحي لحقته من غير ما يحس ...ربعت صوب مصلى الرياييل و يلست بزاويه يمكن اجوف سيفاني او فهد...بس ما جفت حد منهم ..يلست ع الكرسي و انا اشاهق من الصياح ...جفت الشاب يظهر من المصلى ..رحت صوبه..

 

من جافني وقف : انتي بعدج ...هني ..

 

ترجيته: ساعدني ..ما اعرف شسوي ..

شكله حرج: انتي كيف يودرونج كل ها الساعات من غير ما يسالون عنج...

 

مد موبايله مره ثانيه:- اندوج اتصلي

 

اتصلت ابشيخاني بس بعدها ما ردت ...طالعت الشاب بيأس

قال طفران: كتبي لها مسج يمكن مستغربه من الرقم ..

 

كتبت لها مسج حوالي خمس دقايق لي ما اهدي عمري ...شويه و اتصلت شيخاني ..

طالعت الشاشه: هذي اختي ..

 

الشاب عطيني اياه ويير عني الموبايل شهقت سمعته يقول: انتي كيف اتودرين اختج ها..

كنت اسمع حس شيخاني : منوه انت ؟؟؟وين شوق ؟؟

 

الشاب: جب ولا كلمه ..اونج خايفه ع اختج...

 

شيخاني: منوووه انته ايييييييييييييييه لا اتسسسسسسسب

 

الشاب: جان الحينه حد خطفها ولا شلها جي ما تتنبهون لها ...هاه ..

 

كنت اطالع ها الشاب باستغراب .. بس بداخلي فيني ضحكه ما يدري اني اكبر عن شيخاني باربع سنوات ..

شيخاني : ايه احترم نفسك وين اختي هاه ..

 

سالها الشاب: انتي أي صوب علشان اييب اختج لج..يا عديمة المسؤليه..

دلته شيخاني المكان ...سمعته يقول: قري بمكانج لي ما توصل اختج..بنات اخر زمن ...

 

وصكر التلفون ابوييها قال يامرني: يلا امشي ... و هذي اخر مره اتييون ابروحكم هني...اتحسبون الدنيا امان ..

 

بلعت ريجي لحقته و انا صاخه ..شكله اخرته عن موعد ..لووووووووووووووووول ..علشان جذا حرج ..المهم تستاهل بالي سواه في شيخاني .ههههههههه عقب خمس دقايق وصلنا

قلته: خلاص خلاص هذيلا جفتهم..

 

وقف الشاب: يلا روحي اتحملي ع روحج مره ثانيه ..

قلته: مشكور ما اتقصر سامحني ..

 

الشاب طالعني بنظرات وراح عني ...ربعت صوبهن ..

ليلى: منوه ها شوق..

 

يلست اصيح: شو ها المقلب الي سويتوه فيني..

شيخاني محرجه: منو ها السبال الي قاعد يسبني .

قلتها و انا امش دموعي : تستاهلين ليش تودروني ..

 

شيخاني: محد قالج ادشين محلات جنج بقره جايفه حريجه اول مره اتجوفين محلات ..

 

قلتها : كان بامكانج تتريني برع ..."طالعت اجياسهم" اظن حتى ما فكرتوا ادوروني

هدى :عقب ما شبعوا حواطه تذكروج..

 

قلتها بثقه: انا ادري لاني يوم اسالها عن مكانكم كان بالها في شي ثاني ..

 

ليلى : المهم شو بتقولون حق سيف ..

شيخاني: قصينا عليه ...علشان ما يكتشف انج ضعتي ...جان بذبحنا .. و خاصه لو عرف سالفه هالشاب الهرم الي قاعد يسبني ..

 

قلتها بغيض: دوااج تستاهلين ...يا عديمة المسؤليه هههههههههههههه

شيخاني: انا حماره اني دليته مكانا جان خالينج تضعين كان احسن ...

 

ليلى: ضيعتي علينا الثلج ..شو بنروح صوب الثلج..

شليت اجياسي : لا ما بنروح دواكم ...يلا سيفاني يتريانا ..أظن

 

سرنا صوب ما كان سيفاني وفهد يتريونا ...و شيخاني و هدى و ليلى يتحرطمون لانهم ما راحو صوب الثلج ...اما انا عيبتني شهامة هالشاب و الي سواه في شيخاني ..

سيفاني: ليش تاخرتوا "طالعني" ليش موبايلج كل مغلق"

 

بلعت ريجي: البطاريه امفضيه ..

 

فهد: يلا انروح ..

سيف : خلنا نطلب لنا عشى ...

 

هدى: زين بعد انا ميته من اليوع ..

 

تجدم سيفاني و فهد و لحقناهم ...يلسنا ع طاوله .

سيفاني :شو اتبون ..؟؟

فهد قعد: سيفاني انا تعبت ...بتم مع البنات روح ابروحك ..

 

سيفاني : اطلبلكم ع ذوقي ..

 

شيخاني تضحك: ههههههههههههه و ع حسابك بعد..

ضحكنا بس سيفاني ملامح ويه تمت جديه ..سكتنا ..يوم ما ضحك

 

وقفت ليلى ابسرعه: بيي معاك احب اطلب ع ذوقي ...

 

سيفاني جنه طفر: زين شو اتبون ..؟؟

قلت ابقلبي ..هييييي ها بدور بعيد عنج يا ليلى جان بتاكلج ...

 

قلته ابسرعه: أي شي المهم انسد يوع بطنا "وتذكرت يوم ضعت من شويه"

تحرك سيفاني و لحقته ليلى ..

هدى: فهود ما سرنا عند الثلج..

فهد: ليش ع بالنا كل وقتكم كان هناك..

 

هدى: ابا اسير الحينه ..

 

طالعت شيخاني خفت لا هدى اتخبره اني ضعت عقب يخبر سيفاني و تستوي المجزره ..بس الحمدلله

فهد : مره ثانيه ..خلاص يومين رادين الكويت ..

 

شهقت شيخاني: ما وحى لكم اتيوون ..

 

فهد: شنسوي خلصنا شغلنا الي يايين علشانه..

سالته: ما جفت أي شغل كله انحاوط ..؟؟

 

بس حسيت ابراحه ...يوم قالوا برجعون الكويت..راحه من صوب حياة سعيد و حصه.. وراحه علشان بتم خطبتي و سوالف القصاص .. و اكون انخطبت رسمي قبل ما توصل ندى نهايه هالاسبوع ...

فهد يطالع شيخاني : يينا علشان غرض و الحينه بنرجع ..

حطت شيخاني ايدها ع خدها و سالته ابرود: شو غرضكم..

 

ابتسم لها: اييييييييييدج ..

 

نقزت شيخاني ابمكانها و جنه حد صفعها اما انا و هدى : ههههههههههههههههههههههههههه

 

شيخاني: لا تقعد اتنكت ع حسابي ..

 

فهد يضحك: ههه و الله ما انكت ..ما يحتاي اتريا ردج ادريبج موافقه ..و انتي بتحصلين واحد شراتي..

قالته: قلبي كان حاس ..يوم انكم ما بطولون باليلسه و غير ان امك و باجي اخوانك ما يوو عرفت ان السالفه فيها إإإإإإإإإإإإإإإإن ..

 

شيخاني: محد شاورني ..

استغربت من جرات شيخاني ع الاقل سوي عمرج مستحيه جان انتي ما فيج حيااا

 

هدى: ما يحتاي حد يشاورج..

شهقت : بس انا ما ابا اعيش فـ الكويت..

 

فهد: بنعيش فـ دبي ...هني ..شو قلتي ..

طالعته شيخاني بنظرات متشككه ..بس سيفاني و ليلى ردوو .. و يلسنا ..اتغيرت السالفه من وصل سيفاني ...قعدنا انسولف ..و نضحك.. و خلصنا عشى و ردينا البيت هلكانيييييييييييييين ...

 

رقدت ليلى ع طول اما انا ..فتلفونات بدور ما خلت جفتي يغمض ...عطتها كل شي صار بالتفصيل ...ما انه ما صار شي ..الا انها تبا اتعرف شو صار ...الله يعينك ..يا سيفاني ع بدور .ايام بارده و ممله مرت عليناا ...و بنفس يوم سفر قوم عمي للكويت ....نشيت من الرقاد بكسل ..بس عقب حسيت بنشاط ..بعد ما اتسبحت و خلصت..كالعاده قوم عمي ظاهرين يتمشون الصبح ما يضيعون وقت بس هالمره ماخذين ابوي معاهم ......

 

..ورحت صوب حجرة حصه..دقيت الباب محد كان موجود في الحجره ..

طلعت من جناح حصه و سعيد.....سمعت حس حمودي يصارخ في الصاله التحتيه ..نزلت الدري ..جفت حمودي قاعد يلعب ..ابروحه ..

 

سالته : حبيبي حمودي وين ماما ...

 

حمودي يلعب بالكره: عند ثيخه بحجرتها ..

قلته: شيخه ما راحت المدرسه..

 

صرخ و جني ازعجه: لااااااااااااااااع

 

قلته : اعصابك...

 

صعدت فوق الدري مره ثانيه و رحت صوب حجرة شيخاني سمعت صوت شيخه اتصيح ..وحصه ترمس ما فهمت شو السالفه ...فجيت الباب ...توقعت شيخه اتصارخ علي و اتقولي ظهري من حجرتي بس تمت ساكته و دموعها منسابه ع خدها ..

 

حصه: زين خلاص ..انا بخبر سعيد ..

بلعت ريجي: شو السالفه ..؟؟

 

حصه : تعالي شوق .. و الله اناا مالي ذنب سعيد مطرشني ارمس اختج ع اساس خطبتها من ولد عمها فهد..

 

شيخه ترجع اتصيح: انا ما اباااااااااه من قالكم بعرس انا بكمل الكليه ..

ما عرفت شو اقول ...يعني صدق البارحه يوم فهد كان يرمس ..و يحليلها شيخاني ع بالها يسولف ..

حصه: زين حبيبتي ...بس هم يبون موافقتج عقب ما اتخلصين دراستج ..بيصير كل شي ..

 

شيخاني: و ان شاء الله وين بسكني برع الامارات ما اباااااااااااااااا

 

و اتغطي ويها باللحاف بعد ما انسدحت ع الشبريه ...جفت حصه واقفه :خلاص زين لا اتصيح انا بخبر سعيد..

طلعت برع و لحقتني حصه سالتها: زين شيخه ما تباه حق شو اتصيح..

 

حصه: سيفاني ضاغط عليها ..

 

حرجت: سيفاني مب من حقه ..

 

حصه: مدري شو اقول و الله ...بس هي حجتها انها ما تبا اتعيش بعيد عنكم ..ترا فهد ناوي يستقر بالامارات ..

قلتها: قال البارحه بس ما صدقناه ..

حصه"..........................."ماشي رد"

سالتها: بتخبرين سعيد..

 

هزت راسها بمعنى هيه..

قلتها: اخاف سيفاني ..يجتلهاا ..

 

حصه: مدري شو بيصير بس حطي في بالج شي واحد اذا كان من نصيبها ما بتاخذ غير نصيبها

كلام حصه يتم في بالي صدق الواحد ما ياخذ الا نصيبه ...

 

عقب الغدا فكرنا انروح بيت خالوه حليمه صوب بدور و موزي .. و ناخذ ويا ليلى و هدى..و بالمره انهرب شيخاني عن سيفاني ...بس للاسف ما حطينا في بالنا ..ان سيفاني من بيي من دوامه بعفد صوب حجرة شيخاني...يلست في حجرة حصه ..خايفه.ع شيخاني .. و حصه كانت اطمني ...دشت علينا امايه

 

امايه: شوق ما تستحين امودره بنات عمج ابروحهم

 

قلتها: خايفه ع شيخاني..

حصه: شوق لا اتبالغين..

 

قلتها بخوف: شو ما ابالغ سعيد محد ..جان سوا شي بشيخاني منوه بساعدنا..

 

امايه: بسم الله شو السالفه..

حصه: ماشي سيف يقنع شيخاني اتوافق ع ولد عمها ..

 

فاجاتني امايه: هههههههههههههههههههههههه

 

طالعت حصه و حصه طالعتني مستغربات من ردت فعل امايه ..طلعت من جيبها بيزات ..

امايه: هذا مهر اختج شيخه ..؟؟

 

حصه: مهر شيخه .!!!!!!!!! كيف ؟

 

امايه: شيخه من جافت سيف قالته انها موافقه بس اشترطت اتخلص دراستها قبل ..

قلتها بلهفه: كيف كيف رضت ..و هي الصبح كانت اتصيح ما تبااه ..

 

امايه: يلا نشن روحوا يلسوا مع بنات عمج بروحون اليوم..الظاهر ان سيف اقنعهااا ...

 

حصه: عجيب هالسيف ..

قلتهم: الا من خوفها وافقت عليه..

امايه: عن الخربطه الزايده اقنعها و البنيه اقتنعت ..

 

كنت اتمنى اعرف شو صار بين سيف و شيخه كيف بهاي السهوله اقنعها ...بس كنت عارفه اني بلاقي الجواب ..اذا مب الحينه عقب ...بعد الغدا..يلست اساعد ليلى اترتب اغراضها في الشنطه ...و انا بالي مشغول بـ شيخاني الي ما يت تتغدا حتى ...انفجت الباب فجاه هذي حركات شيخاني الدفشه اول مره ما اصرخ ع حركتها بالعكس ابتسمت يوم جفتها قلتها: ..شيخـاني "جني مب مصدقه"

 

شيخاني: يلا يلا ابسرعه ..

 

ليلى : شوه ..؟؟

 

شيخاني: سيفاني قال بودينا البحر ...قبل ما اتروحون المطار

صكرت ليلى شنطتها ابسرعه : زين و الله يلا ..

 

طالعت شيخاني مستغربه الحينه هاي من صجها مستانسه ولا اتمثل !! و الله شيخاني و بدور محد ينعرف لهم

صكرت شيخاني الباب بقوه ليلى: اختج دفشه..

ابتسمت: عني انا متعوده الدور ع اخوج فهد يتعود ...

 

ليلى: هههههههههه دام اصر انه يباها خل يتحملها ...يلا عن يروح عنا سيفاني يسويها ..

قلتها و انا ادور عبايتي : يسويها ...

 

ركبنا سياره سيفاني صرنا نركب سيارته وايد بوجود قوم عمي ...طالعنا بسيارتين ..امايه و عمي و باباتيه عند الدريول و نحن البنات مع فهد في سياره سيفاني .. و حصه و حمودي الي كنت اتمنى انه ايي معانا لانه يحب البحر ..بس كان بيت خالوه حليمه ...

 

نزلت نترابع صوب البحر ...جنا اول مره انجوفه ..وقفت جريبه منه و الموج يضرب اريولي مدري مرات احسه يلاعبني و مرات امعصب مني ..ابتسمت ..حطيت ايدي فوق يبهتي اطالع الشمس و خيوطها المتناثره ع صفحة البحر .لحظات حميمه كنت احس بها بس ناقصني انسان واحد ...راشد..فتشت عن موبايلي ..تذكرت اني نسيته بحجرتي ...كنت بطرش مسج له اذكره اوصف شعوري لي بها اللحظات ...لانه يعرف اشكثر احي البحر و اعشقه ...

صلبت نفسي يوم يتني ضربه ع ظهري : بشو اتفكرين..

ابتسمت حق ليلى : بكل شي حـلو ..

 

ليلى: حـلو البحر .."خذت نفس طويل" ما طولنا وياكم...دوم نقعد معاكم بالاسابيع ..بس هاالاسبوع مدري ليش يحسسني اني بتفتقدج..

 

ابتسمت لها لانها غمضتني ..: انا بعد بشتاق لج ليلى ...

همست ليلى: طالعي اختج شيخه ..

التفت لورا ::جفت شيخاني يالسه ع صخره ابروحها ...بس كانت اتراقب سيفاني و فهد الي كانوا نازلين صوب البحر ...

ليلى: احس شيخه مب مستانسه..

سكت ما عرفت شو ارد عليها ...

زقرتنا هدى: تعالوا شربوا الشاي ..

رحنا صوب اامايه و عمي و باباتيه مكان فارشين الحصير ..قعدنا عليه ...

 

عمي: عيل بتفتكين اليوم منا شوقاني ..

قلته: الله يسامحك..

 

نشيت من مكاني و قعدت حذال باباتيه لويت ع ذراعه: احس من زمان ما جفتك..

امايه: لهيتي مع عيال عمج وين بعد بتذكرين ابوج..

ليلى: زين اليوم بنروح عنكم ..

امايه: حياكم الله فـ كل وقت ...

 

سكتنا يوم يت شيخاني و قعدت حذالناا ..

عمي: هلا بخطيبه ولدي..؟؟

ابتسمت شيخاني و صبت لها شاي ...

صرخت هدى: جوفوا فهد و سيف ..

 

طالعنا صوب البحر ..جفناهم يسبحون ورايحين بعيييييييييد شهقت خفت عليهم ..بس امايه و عمي و ابوي كان عندهم شي عادي ..

 

شويه و ظهروا من البحر ..وقعدوا معانا ...اتفاجانا يوم جفنا سياره اتبركن جريب منا ..

شيخاني: سعيييييييييد يااااه ..

 

نزل حمودي من السياره يربع صوبنااا ..وقفت استقبله و لويت عليه و شليته يلست ادور و ادور لي ما طحنا ع الرمل و يلسنا نضحك ابصوت عالي ....

بس كانت المفاجأه يوم نزلت بدور و موزي من سياره سعيد ...طالعت سيفاني الي من جاف بدور ..عض ع شفايفه ووقف ع طول ..

 

ابتسمت لي بدور و كانها اتقولي جوفي اخوج ..شرد يوم جافني ...

 

سلمت ع موزي لاني حسيت من زمان ما جفتها .. عقبها انصدمنا انها فتحت ملف فـ المرور و تدرب اتسوق سياره ..كانت اللمه حـلوه ..سيفاني كان بعيد عنا ..ابروحه ع البحر ..

 

بدور تساسرني: تعال انروح صوبه الله يخليج..

 

قلتها: جب علشان تكفخينه و عقب يكفخني انا ..

بدور: دخيلج ولهانه عليه ...و الله ما بقوله شي ..بس تعالي وياي ..

 

غمضتني بدور ..فاضطريت اروح معاها ...سعيد شل حمودي ووداه صوب البحر يسبحه . وحصه تمت قاعده مع امايه و عمي و باباتيه..وموزي اندمجت ابسرعه مع ليلى ..

 

.وفهد انتهز هالفرصه و تم يتمشى مع شيخاني و هدى..بس كانت ملامح شيخاني انها مرتاحه.. و كذا مره سمعتها تضحك ابصوت عالي و اتعلق و اتصارخ يعني ردت الروح فيهااا ...

 

اما انا الله بلاني بدور ..زختني بدور من ذراعي و قمنا نتمشى صوب البحر ..بس جريب سيفاني ...الي كان سرحان يطالع ..الطير الي كانت تطير فوقه ...

 

بدور اتعلي صوتها : اقول شوق وحشتيني من زمااااااااااان ما جفتج..

 

كنت اطالع بدور اترجاها انها ما اتسوي مشكله لانها متعمده اتعلي صوتها و سيفاني يسمعنا ..

 

كملت كلامها: لا يكون جفتي عيال عمج و نسيتنا ترا من لقى احبابه نسى اصحابه ..

 

طالعت سيفاني جفته ما اتحرك منه شي ..واقف بشموخه ما هزه كلام بدور الا يوم قالت

 

بدور:لالالالالالالالا معقـوله .. معقـوله ..خفتي مني من يوم سطرتج بكف ..

 

طالعت بدور بنظرات غضب و هي عضت ع شفايفها لانها حست انها بالغت ...زخيت ايد بدور ...بالقوه و جني قاعده اعاتبها ..يوم جفت سيفاني ياي صوبنا ... و بعيونه الشرر ..

 

 

الحلقه الثانيه عشر

 

 

محبوبتي قـلبــي جريح .. وانتي سبب كـل الجروح ...في غيبتك موقــي نضيح .. اذكرك واتحسر وانوح ..ع الخـــد دمعاتي تسيح .. والدمع في عيني فضوح

 

تجدم منا سيفاني و كان حاط ايده ابوسط خصره ..من يجوفك يا سيفاني يخاف منك ..ابسبب ملامحك القاسيه كيف و انت لابس نظاره شمسيه ...

 

ييرتنا بدور و كأنها اطمني : لا اتخافين شو بضربنا جدامهم كلهم مستحيل ...

وصلنا سيفاني و انا كنت ارتجف ...رفعت بدور اطالعه ابكل شموخ اونها مستغربه : اوووه انت هني ما جفناااااااااك ..

 

سيفاني ابرود: لا و الله "وطالعني" ما جفناك بعد..

 

قلته : انا انا ما يخ يخصني ..هذي ..بد بدور ..

بدور : شو فيج شوق .؟..و بعدين ليش ما قلتي ان اخوج هني جان ما ييت ..

فجيت اعيوني اطالعها باستغراب ادفع نص عمري بس تعطينا شويه من قوه شخصيه جدام سيفاني ..

 

فاجاني سيفاني يوم ابتسم: شوق انتي شولج بها الياهل روحي قعدي مع الي كبرج..

 

بدور حرجت: انا مب ياهل ...تباني اثبت لك مره ثانيه..

حطيت ايدي ع حلجي: بدور لا اتسوين لنا مشاكل خلينا انروح...

 

سيفاني : جربي جان اتبين اخلي لحمج اكل للسمج ..

بلعت ريجي و انا علامة استفهام قد البحر في راسي ..ما احيد سيفاني ياخذ و يعطي فـ الرمسه احيده ع طول يمد ايده ما يتفاهم ...بس مع بدور كلش غييير ...

بدور: انته الحينه شو تبا منا ..ليش ياي صوبنا في شيء ..؟؟؟

 

عيونه كانت مغطتنها النظرات ما كنت اعرف شو يفكر ...بس حمدت ربي يوم عطانا ظهره ناوي يروح..فجت ايدي بدور و لحقته و جابلته : وين وين بتروح ..

 

تميت واقفه ابمكاني ..جني مشلوله ..هذي بدور خبله ..

سيفاني يصك ع اسنانه: وخري عن دربي يا.....................

 

بدور تقاطعه: يا الياهل يا الصغيره يا المراهقه .. يا كل شي ..بس لا تعطيني مقفاك و اتروح وحشتني موووووووووووت

كنت بشرد و بركض صوب امايه بس ها الموقف وايد شدني ..

بدور: اتحب اتعذبني حرام عليك ..

سيفاني يأمرني : شوق .

 

نقزت ابمكاني و قلت بصوت خايف: شوه

طالعني: تعالي شلي هاي من دربي ..تعالي ..

 

تجدمت ابسرعه صوب بدور اييرها من ذراعها: يلا انروح ..

بدور محرجه: انت مب ع كيفك تلعب ابمشاعري ...

 

سيفاني يعدل نظارته و كانه يتطنز : مشاعرج !!

حمدت ربي الف مره يوم جفت ليلى و موزي يايات صوبنا ...بس بدور نظرات العصبيه ما شلتها من عيونها ..

ليلى: شو اتسون ..؟؟

 

موزي: شحالك سيفاني؟؟

يبتسم لموزي و كانه يغايض بدور: يسرج الحال ..اعلومج انتي ..

موزي: الحمدلله ربي يعافيك..

قلتهم : يلا انروح صوب شيخاني

 

بدور : مب قبل .........

بس قاطعنا سيفاني: ليلى بغيتك شويه بكلمة راس ..

ليلى مستغربه انا !!

يا ناس يا عالم حد يكفخني براسي ..شو الي قاعد يصير ..سيييييييفاني الي محد يقدر يقوله احم ..قاعد يلعب لعبة بدور اونه يغايض بدور ..يتني الضحكه ..بس ما بغيت احرج بدور الي احمر ويها ..

موزي: يلا عاد خلصوا اسراركم و تعالوا صوبنا ..

تجدم سيفاني الي ابتسم لـ بدور ابتسامة انتصار و لحقته ليلى ...

 

تميت واقفه اطالع بدور لانها غمضتني ..بس هي واقفه ابمكنها اتراقب سيفاني و ليلى الي ابتعدوا عنا ...

موزي: يلا انروح ..؟؟

 

شلت بدور الحصى و كانت بتفره ع راس سيفاني من غيضها بس انا لحقت عليها و زخيت ايدها ..

موزي: بدووووووووووور تخبلتي ..

 

بدور شويه و بتصيح: ما ادانييييييييييييييييه .."علت صوتها " اكرهك سيفـااااااااااااااني ..

 

حطيت ايدي ع حلجها ع رغم صوت الموج الي ان الكل التفت صوبنا ..بس الظاهر محد انتبه شو قالت بدور الا انا و موزي و سيفاني و ليلى يعني الي كانوا جريبين منها ..

 

موزه : بدور !!!!!!!!!! تخبلتـي ..

 

بدور دموعها تنزل من عيونها : حقير اكرهه..

غمضتني بدور ..و سيفاني صدق طلع راعي حركات ييريتها من ايدها ..ووديتها مكان بعيد شويه ..

موزي: و انا وين اروح شو سالفتكن ؟؟

 

قلتها من دون ما التفت صوبها : موزي اسمحلينا ثواني بس ..

 

موزي: خلاص اتريااكم صوب قوم خالوه ..

قلتها ابسرعه: زين زين ..

 

بدور و هي اتصيح: اخوج حيه من تحت تبن ..

قلتها: زين لا اتعصبين ..انتي ادرى ان سيفاني مب راعي هالسوالف و الحركات ..

 

صدت بدور وراها و قالت بحسره: جوفي ..

صديت جفت ان ليلى رايحه صوب موزي و سيفاني دش البحر عند سعيد و حمودي ..

قلتها اطمنها: جفتي اصلا ما لحق يقولها شي انتي كان المفروض تمسكين اعصابج تدرين انه يبا يقهرج..

يلسنا ع الرمل تمت ساكته ذكرتها: انتي قلتي بتخلصين امتحاناتج و عقب بتفكرين بها السوالف صح..

 

بدور و جنها ترمس شرات الياهل : خلاص ما بزوج اخوج خله يشبع بـ ليلى ..

 

يتني الضحكه بس يودت روحي ما ابا احرجها خذت نفس و قلتها: انا بطلب منج شي و ادري انه صعب عليج اتسوينه بس لازم ..علشان تكسبين سيفاني ..

 

طالعتني و عيونها مليان آآمال ابتسمت لها: سيفاني موته و حد يطنشه ...يبا كل شي يروح حسب رغبته ..الشور الاول و الاخير له ..

 

بدور اتصك ع اسنانها: بس يوم كان يكلم الحقيره كان شخص ثاني ..

رفعت حياتي مستغربه : منو هاي الحقيره..

 

بدور: ساره منوه غيرها..

قلتها: يعني انتي ...هههههههههههههه

 

نافخت بغيض: متفيجه اتنكتين..

قلتها: سوري سوري ..بس تبين شوري ..

قالت و هي اطالع صوب سيفاني : بسمعج..

 

قالت لها و كنت اتمنى تقتنع بكلامي : طنشي سيفاني بس بس 4 اسابيع

 

شهقت: وايد..؟؟

قلتها: ادري 4اسابيع تقريبا شهر ,...هاي فتره امتحاناتكم ...صدقيني و ابصم لج بالعشر بربع وراج..

كانت تحس بيأس: بسمع شورج بس اظن انه بيهتم..

قلتها: حاولي اشغلي نفسج بالمذاكره حتى لو يبتي نسبه عاليه بنقهر لان ماصار من ضمن اهتماماتج...شو قلتي ..

 

فاجاتني ابتسامتها: زين ..بسوي روحي زعلانه من الموقف الي سواه ..

 

قلتها: عليج نور ..يلا انروح نستانس معاهم ..

وقفت ابسرعه : يلا ..

 

رحنـا صوبهم...حسيت بالراحه لاني قدرت اقنع بدور و من صوب الثاني برتاح من مشاكلها مع سيفاني ..لمحت شيخاني تضرب فهد بجتفه و اتروح بعيد عنه ..جفت ابويهه ابتسامه كان خاطري اعرف شو علق عليها ...

 

طالعت حصه الي زقرت سعيد: سعيد اندوك الكوره ..

 

صرخ حمودي يصيح: كورتي كورتي ...

سعيد يضحك: ههههههههههههه يا الزطي بنلعب فيها ..شويه بس

 

هدى: يلا نلعب طايره ..

فهد : نحن ثلاث شباب بنغلبكم ..

 

ما صدقنا جفنا الكوره ..انجسمنا ..بس حصه يلست ..ما تقدر طبعا تلعب ..

فهد: سيف يلا تعال بنلعب طايره ..

 

عمي: يلا ابسرعه ما بقى شي ع اذان المغرب ...الطياره تتريانا ,...

 

سوينا خط و انجسمنا ..راقبت سيفاني الي ظهر من بعيد و ياه صوبنا يركض ..جفته يدور بنظراته ع بدور ..كنت بحلف انه يدور بدور ...اكيد يبا يجوف ردت فعلها عقب الموقف السخيف الي سواه ...طالعت بدور جفتها اطالعني و كأنها تقرا افكاري ..

 

موزي: يلا يا فريق البنات ..توزعوا اليوم بنهزم الشباب ..

 

حمودي: انا وين العب ..

 

سعيد: تعال صوبنا بابا ..

 

شيخاني: جان ما بتفعص اليوم ..

 

الكل: هههههههههههههههههه

 

يوم وقف سيفاني جريب سعيد وفهد قالت بدور بصوت عالي : عيل انا ما بلعب ..

رفعت حياتي خيبه بدور قلتي البسيه بس مب جذا ... وراحت امطنشه احتجاجاتنا و قعدت جريب حصه ..جفت ملامح سيفاني جامده و كأنه ما اهتم ..يلسنا نلعب فـ البدايه كنا نتمصخر و نضحك..عادي ..لكن عقب ..حسيت قمنا نلعب جد ..و نتضارب و انصارخ ع اخرتها ...وقف عمي و ابوي و امايه و كأنهم يبون يقولونا يلا بيأذن المغرب ...

 

صرخت هدى: غلبننننننننناااااااااااكم فزنا ..

 

فهد: انا عطيكم الفوز علشان الجوهره الي عندكن..

كنت بضحك ع شكل ويه شيخاني الي بسرعه ربعت صوب امايه ...

 

سعيد يطالع فهد بنظرات : يعني اتخون فريقك.. دمك حلال يااا أخي ..

 

فهد: ههههههههههههههه

 

سيفاني ما علق شل بعمره و قال: الي ياييين معاي ابسرعه ع السياره ...

 

شلينا دله الشاي و الحصير .. و انجسمنا كل واحد بسيارته ...كنا مستانسيين ..عني انا كنت طايره من الوناسه .... ودعنا المكان الي بتكون كل واحد ذكرى حلوه بالنسبه له الا اظني بدور ..

 

وصلنا البيت .. و كل واحد راح حمامه تغسلنا ..لبست ثيابي .. وطلعت من حجرتي و قبلها شكيت ع موبايلي ..جفت اتصال من ندى ..حضنت الموبايل .

عرفت انها بتيي هاليومين بس مدري متى بالضبط..نزلت تحت ..جفت الكل متيمع ....و امايه كانت اتحط العشى ...رحت المطبخ ساعدتها ...

 

كنا دوم نتعشى نحن الحريم ارواحنا و الريايل ارواحهم بس هالمره ..كلنا جماعه .. و الصفره عوده ..

عقب العشى ..يلسنا نشرب شاي ..طالعت السااعه عقب ساعه قوم عمي بيروحون المطار ...مدري ليش هالمره احس غير و اني بفتقدهم ,...

 

يمكن ييتهم هالمره كانت مختلفه و من وراها مقصد..تذكرت اني حلمت ان ليلى بالحلم اتقول سعيد انا ييتك من الكويت علشانك..بس عرفت تفسير الحلم..فهد الي ياه من الكويت علشان شيخاني ...التفت للكلام الي قاعد يدور يوم انطرى اسم ندى ..

 

امايه: و شخبارها و اخبار اهلهاا

 

حصه: الحمدلله ابخير ..الصبح انا رمستهااا ..

قلتها: سوت لي تلفون ..بس انا ما رديت عليها..

 

حصه: يمكن تبا اتخبرج انها وصلت راس الخيمه...\

شهقت: ندىىىىى هنـي متى وصلت مدري و الله ...

 

امايه: كيف بعد ما تدرين اربيعتج .. و باجر الرياييل بيون البيت ..

طالعت سعيد اخوي : عمي ليش ما اتم حق باجر ..عشان الريايييل ...و اتكون حاضر القصاص ...مره وحده ..

طالعت حصه : خلاص يعني باجر ..

 

كنت بسالهم شو باجر ..معقوله سيف خطب ندى و باجر قصاصهم محد قالي ..؟؟ زين يتريون الاسبوع الياي يوم بيي راشد و نتقاصص مره وحده ...حق شو مستعيل سيفاني الله يعينج بدور ....و اونج تبين اتسوين روحج زعلانه الظاهر ماشي فايده ...تمنيت من كل خاطري ان حصه ما اتقول حق بدور ان سيفاني خطب ندى علشان ما اتسوي مشاكل اتسويها بدور ...

 

...نشت حصه وراحت فوق يوم دشوا فهد و سيفاني ..

فهد: يلا ..حطينا الشنط في السياره ..

امايه: ما تعشيت فهد؟؟

 

فهد: تسلمين عموه تعشينا انا سيفاني برع ...

سلمنا ع قوم عمي ..لويت بـ ليلى ..و قلتها: صج هالمره بفتقدج ..

 

ابتسمت لي: حتى انا ...

 

سلمنا ع بعض ..اقترحت علي ليلى اني اروح معاها فوق علشان اتسلم بـ حصه ..بس قلتها : خلي هدى اتروح معاج انا ما اروم اصعد الدري لاعب كره ما اقدر..

 

ليلى : ابرايج ما بنثجل عليج..

كنت ابا اراقب فهد و شيخاني ...رحت و يلست عدال باباتيه ع الكنبه..اراقب شيخاني و فهد ..جفت نظرات فهد ع شيخاني الي كانت اتسلم ع عمي ...

 

عمي: تعال يا صبي سلم ع خطيبتك ...حشرتنا ابا بنت عمي اندوك ها "يزخ ايد شيخاني " مدي ايدج لا تستحين ..

نزلت شيخاني راسها متلومه انفجرت من الضحك ابد ما يناسبج هالدور ههههههههههههههههههههههههههههههههههههه

 

صخيت يوم جفت امايه و سيفاني يطالعوني بنظرات عصبيه ..اندسيت ورا باباتيه و كأني اطلب حمايته الي حضني من غير ما يعرف شو السالفه ...

 

وقفنا بررع ..انودع عيال عمنا ...و انتهت ايام الطلعات وياهم ...و الوناسه ...رجعت حجرتي .. و انا افتقد وجود ليلى و اغراضها بس عادي باجر بترد حياتي الطبيعيه تذكرت سالفه قصاص سيفاني ربعت برع ..صوب حجرة حصه دقيت الباب سمعت صوتها الواطي : الباب مفتوح..

 

دشيت جفتها اترقد حمودي يلست ع الكنبه اجلب قنوات التلفزيون الين ما يرقد حمودي ..عقب عشر دقايق يت قعدت حذالي ..سالتها: سيفاني خطب ندى ..؟؟

 

فاجأتني ابتسامتها و قالت بس حسيت انها تتمصخر علي : هيه و باجر قصاص سيف و قصاصج مكان واحد ..

تجدمت منها مبتسمه: كيف ترا "كنت بقول اسم راشد بس تلومت " ترا هو مش موجود ..

حصه: منو ..؟؟

 

قلتها اعاتبها : حــــــــــــــصه لا تستهبلين..

حصه: ههههههههههه هي فهمت ..

حطت ايدها يبهتي : محمومه انتي اليوم ... اجوفج ارتبكتي باجر الرياييل بيون مب اليوم ..

 

طالعتها: منوه ..؟؟

 

حصه: شو منوووووووووه ...اهل خطيبج ..انتي نسيتي شوه..ترا اليوم وصلوا ..وباجر القصاص .."وضربتني ع ركبتي مستانسه" مستعيل الحبيب ..

 

بلعت ريجي : كيف جذا سيفاني بتقاصص في بيتنا مب المفروض بيت العروس .

 

حصه: هههههههههههههههه ..شوق بلاج ...

رن موبايل حصه سارت صوبه و هي اتكمل : سيفاني بالاول خليه يخطب .."عقدت حياتها ":رقم منوه هاه ..؟؟

 

سالتها: حصه شو السالفه سيفاني مب خاطب ندى

حصه: شوق بلاج مستخفه..باجر قصاصج انتي و ذياب ..ندى محيـره حق راشد اخوي ...؟؟؟شو علاقة سيفاني بالموضوع ..تبين راشد يجتله ياخذ خطيبته ."طالعت موبايلها" صح رقم سعيد اليديد .."ردت " الوووووووووووووو

 

كنت اطالع حصه و انا مب فاهمه شي حاولت استوعب اخر كلامها ....تبين راشد يجتله ياخذ خطيبته ..عيل انا منوه الي خطبني !! مدري كيف وصلت حجرتي ...؟؟

 

عيل راشد مستعيل ع الرد من سعيد..؟؟ شو السالفه ...يعني انا وافقت ع ذياب مب ع راشد ..؟؟من طرا لي اسم ذياب حسيت برجفه ...بكل جسمي و اني ميته من البرد ..تلحفت ادفي نفسي و احاول اوقف الرجفه ...

 

لالالا هم فهموني غلط انا ما ابا ذياب ..انا ابا راشد..؟؟ عيل ليش حصه قالت وندى ..؟؟ و ليش سيفاني قال علشان ما ينكسر خاطر ندى..؟؟ و ليشششششششششش راشد قال مفاجاه و اتريا الرد..

 

اساله في بالي منوه الي يقدر يرد عليها منووه ..يلست اصيييييييح .انا لازم ارمس راشد..لازم ينقذني ..اكيد فـ سوء تفاهم ...يعني راشد خطبني من سعيد و سعيد رده ووافق ع ذياب مب ع كيفه يقررون مصيري مالهم حق ...مديت يدي ع الموبايل ..و انا ارتجف ..

 

.اتصلت برقم راشد بس يعطيني مغلق ...تغطيت باللحاف و يلست اصيح...ما حسيت بحصه ..الا يوم ييرت عني اللحاف ..

 

حصه: شوق بلاج ...بسم الله شو فيج تتنافضين ..

بلعت ريجي: بردانه .."ويلست اصيييييييح"

 

حصه ارتبكت يوم جافت حالتي : زين بيييب لج ادول ..

 

شويه جفت امايه و حصه و سعيد و شيخاني فـ حجرتي و حولي سريري ...شربتي امايه الادول ..

سعيد: يمكن خايف من باجر ..

شيخاني: عيل شو بتسوين يوم تملجين ...؟؟

 

قلتهم و انا اصيح: انا ما ابا اعرس ..انا ما ابااه ..

امايه شهقت: هذي الي بتفضحنا و بتسود ويوهنا ..جدام النااس..

 

يلست اصرخ و اصيح بصوت عالي : ما ابااااااااااه ما ابااااااااااااااااااااه ..

 

ما حسيت الا راسي يطيح ع حضن سعيد ..الي قعد يخفف علي .. ما كنت اسمع الا ايات قرانييه خلتني اغمض اعيوني .. و ارقد انا مرتاحه ..شويه ..وكلي امل اني اكون حلمانه ..

 

نشيت اليوم الثاني ..ما صدقت يوم جفت الساعه 12 الظهر معقوله كل ها رقااد غريبه ان امايه ما يت اتوعيني ..نشيت ..من ع الشبريه ..رجعت يلست ابسرعه يوم تذكرت البارحه شو صار ...

 

انا لازم اقولهم اني ارفضه ...لازم اكلم سعيد..رحت الحمام .اتغسلت ..بوقت ما طلعت جفت امايه داشه حجرتي

امايه: يمه نشيتي ..شخبارج الحينه..

 

قلتها : انا ابخير ..احسن ..

قلتها: وين سعيد..

 

ردت علي: راح يشتري اغراض حق العشى ..ترا اليوم بييون رياييل ...

قلتها ابروود: انا ما ابا اتزوج..

 

امايه: ليش يمه غيرتي رايج فجاه ..

رجعت و انسدحت عالشبريه و انا كارهه حياتي : بس ما اريده ..

 

قالت لي بحنان: يمه تبين اتفشلين اخونج جدام الرياييل ..

قلتها بعصبيه: انتي يهمج فشيلة عيالج جدام الرياييل ولا يهمج سعادة بنتج..

 

جفت امايه ما ردت عليه..نشت من مكانها وطلعت من حجرتي ..حضنت المخده و يلست اصيح..يا رب اتفرج علي مصيبتي ...يلست اتجلب ع فراشي محتاره ...افكر و اخطط شسوي ...حتى مكان عمل راشد ما اعرف وين بالضبط علشان اتصل به ...

 

دشت عليه حصه: شوقاني تعالي تغدي ..

قلتها من غير ما اطالعها : ما ابااا ..بس ابا اكلم سعيد

 

حصه: ترا عموه وايد زعلانه عليج و قاعده اتصيح..

سكت ماعطيتها رد ...تميت حاضنه المخده ..رن موبايلي جفت ندى المتصله ..طنشتها ...طلعت حصه من حجرتي بهدوء ...غفلت ..بس فجيت عيني يوم سمعت باب حجرتي ينفتح يلست ابمكاني ابسرعه ..ع بالي سعيد بس يبست ابمكاني يوم جفت سيفاني ..

 

واقف جريب من شبريتي محرج: انتي شو سالفتج ..؟؟

سكت ما عرفت شو ارد عليه .............................................

 

علا صوته: شو تبين الحينه ..؟؟

قلته و انا ارتجف : انا مب موافقه ..

 

صرخ عليه: من اسبوع امرمسينج بالسالفه .. و حزه ما بيون الرياييل قلتي ماا تبين ...شو السالفه لعبان عندج..

 

قلته : انا ع بالي ...."سكت شو اقوله ع بالي راشد المعرس شو ابا يضحكون علي "

 

سيفاني: ع بالج شوه ...انا بروحي رمستج و قلتي موافقه صح ولا لاء ..

يلست اصيح خايفه منه بس قلته: ما اباه ..

سيفاني : مب ع كيفج ..منكر البنات مب علينا ..

 

صرخت عليه ناسيه خوفي : ع بالك بتقدر تقنعني شرات ما قنعت اختي شيخاني ..

تم واقف ابمكانه : شيخاني ابروحها اقتنعت و قالت تبا ولد عمها ..

 

قلته ابسرعه: كانت رافضه ..

 

سيفاني و كأنه ماسك اعصابه : صحيح كانت رافضه بس عقب فكرت ..فيها ..وافقت ..انا ابد ما ضغطت عليها و عندج اياها روحي اساليها جان ضغطت عليها او اقنعتها ..

 

حطت ايدي ع عيوني و رجعت اصيح : المهم انا ما ابا ها الشيبه..

قال ابسرعه: شيبه !! من قالج شيبه ..

ترجيته: لا تزوجوني واحد ما ابااه ..."يلست اصيح"

رديت لورا و لصقت باليدار يوم جفته ياي صوبي يلس جريب مني خفت لا اتييني صفعه منه ..بس سالني بهدوء: ليش ما تبين ذياب ..

 

ما عرفت شو ارد ...

سالني مره ثانيه: الريال فيه عيب ..

هزيت راسي بمعنى لا ..

سيفاني: زين حتى انا اقولج انه ريال ما ينعاب .. و انا وهو شرات الاخوان اعرفه زين ما زين ..ها شي وشي غيره ..انا متاكد انج برتاحين معاه ..

 

تميت ساكته ..................................."ماشي رد"

 

سالني: شو قلتي ..

قلت بخوف : ما ابا ااه ؟..

غمضت اعيونه يوم جفته رفع ايده علي بس جنه تراجع باخر لحظه ووقف و قال: ما عليه محد يقدر يجبرج...بس خلي هاليوم ايمر ع خير ..اييون الريايييل ..وبعطيج اسبوع تراجعين قرارج ...و عقبها بنخبر الريال انج غيرتي راايج..

 

شو قلتي ..؟؟

 

هزيت راسي بمعنى موافقه عقب اسبوع بيكون راشد موجود .....المهم اتخبرونه اني ما ابااه ...اتنفست مرتاحه ..يوم طلع من حجرتي و جنه ياثوم كان كاتم ع انفاسي ...بها اليوم ابد ما طلعت من حجرتي ولا حد دش علي ...حتى محد قال لي شو اتفقوا ..او قال كلمة مبروك ..يدرون اني ما ابا اسمعهاا

 

وصلني مسج من بنات خالوه يباركون لي .. يوم ما رديت ع اتصالهن حتى وصلني مسج من ندى اتقولني"ان خالها مسوي لها مفاجاه و هي طايره من الوناسه و مهرا ما بتلاقي ام احسن مني " قصوري بعد اربي عيال ..غلقت موبايلي ..علشان ما توصلني مسجات غيرها .

 

.نشيت بوقت متأخر من الليل ...اليوع هاد حيلي ..

 

طلعت من حجرتي رايحه المطبخ ادور لي لقمه ..آكلها ..يلست اكل و اكل لين ما حسيت اني بنطر ..من الاكل ..رجعت الفله ...فجيت التلفزيون ..مع ان من طبعي ما احب اقعد مجابلتنه وايد عكس شيخاني ...يلست اطالع برنامج ثقافي عن الحيوانات المتوحشه ..كنت مندمجه ..رفعت راسي صوب الدري اسمع الصوت الياي من هناك..جفت شيخاني نازله من الدري و كتابها ابيدها ..

 

شيخاني: صح النوم ..يعني طلعتي من السجن ..

 

مارديت عليها طنشتها ...

 

يلست مجابلتني : اوني اذاكر ما باجي غير اسبوعين و عقب بتبداا امتحاناتنا ..

قلتها من غير نفس : زين شدي حيلج ..

 

شيخاني: بيني و بينج ..ما كنت ناويه ابدا بالمراجعه ...بس جفت بدور مشتطه ..يالسه اتراجع ..جنها تبا تطلع الاولى ع الدوله..

 

كنت اعرف ان بدور ذابحه عمرها بس علشان ما اتفكر بـ سيفاني ها اتفاقي معاهاا ..كل شي كارهتنه مالي نفس ارمس ولا لي نفس ع شي من هالدنيا..انسدحت ع الكنبه ...

 

شيخاني: شوق شو بلاج شكلج بتموتين..

قلتها: احسن خليني افتك ..."تذكرت" انتي وين جفتي بدور ..

 

شيخاني: بعد ما ظهروا الرياييل من بيتنا رحت مع حصه بيت خالتيه ...

تذكرت ان اليوم كانوا الرياييل متعشين فـ بيتنا ..

 

شيخاني: ما ودج اتعرفين شو صار ..

اشرت بيدي مب مهتمه ...

 

سالتني: ليش غيرتي رايج ..

قلتها :ما كنت اعرف المعرس ذياب ع بالي واحد غيره ..

 

شيخاني: منوه ...؟؟

 

طالعتها ابرود: ما يخصج..

شيخاني: ترا ندى ييت و معاها باقة ورد عوده بس حصه قالت لها انج تعبانه و قافله ع روحج الباب حسيتها فشله ..

 

حضنت ايدي احس ببروده و كأنه كل شي صار جدي: احسسسسن

 

شيخاني: انا خذيت الباقه لي ...

وقفت متضايجه من سوالف شيخاني : بروح حجرتي ...

 

شيخاتي: البيات الشتوي ..

طالعتها و انا راكبه الدري لحقتني : ترا مهرج مية الف ..

 

حطيت صبعي ع اذوني اصرخ عليها : سكتي ..

و هي تتعمد اتغايضني: و بتملجون عقب امتحااناتي ..

 

غمضت اعيوني و انا اركض الدري ما ابا اسمع شيخاني وقتها تستخف دمها ..و كنت اصرخ : بس صخي ما ابا اسمع شي ..

 

شيخاني تضحك علي : هههههههههههههههه و العرس عقب اسبوع من الملجه ..

من سمعت هالجمله كفخت شيخاني ..علشان اتصخ عني ..حطت شيخاني ايدها ع خدها مب متوقعه الكف الي ياها مني ..عقب ما استوعبت فرتني بكتبها الي ياه ع ويهي ..

 

حسيت بحرقه بويهي و جنه انخدش ..فعفدت عليها اطلع غيضي و ناري من ها الي يصير اليوم كله ..كنت اضربها بكساات و اصفعها ع ويها من غير ما احس بعمري...حسيت للحظه ان شيخاني عادي تموت تحت ايدي مع انها كانت تدافع عن نفـسها و اتصيح بنفس الوقت بصوت عالي ...

 

ع صراخ شيخاني ..ظهرت امايه من حجرتها .. و سعيد و حصه يوو يربعون صوبنا ...بس سيفاني كان اجرب واحد فيهم ..لانه ياي من برع .. وسمع صراخنا فعفد فوق الدري ابسرعه ...

 

دارت فيني الدنيا يوم وصلتني صفعه من سيفاني خلتني الصق باليدار .. و نفس الشي شيخاني عطاها كف سدحها بعيد عني ..

 

يلست اصيح ابصوت عالي متألمه من صفعة سيفاني بس كنت احس بداخلي مجروحه اكثر .. ووحيده و ضعيفه من غير راشد...ع طول سعيد زخ يد سيفاني علشان ما يتمادى .. اما حصه يت صوبي تلوي عليه ..

و امايه راحت صوب شيخاني و قالت: شوي شوي ع خواتك ..

 

سعيد شكله حرج من سيفاني : يعني لازم اتمد ايدك ماشي طريقه ثانيه اتفجج من بينهم..

 

شيخاني اتصيح و تصرخ بصوت عالي : هي الي بدت الي صفعتني بالاول ..

سيفاني بعده معصب فطالع شيخاني: جـب

 

بالنسبه لي ع الرغم من ان حيلي منهد الا اني قدرت اوقف و اسحب روحي لـ حجرتي ...لحقتني حصه ..ساعدتني انسدح ع الشبريه كنت احس جسمي متكسر و عادي يغمى علي ..من التعب ..

 

حصه ادوور ع الكلينكس: ويهج فيه دم ..

 

قلتها و انا اصيح : شيخاني كفختني بالكتاب بويهي شوهتني ..

حصه تمسح الدم عني : لا لا مب امبين عليج عادي ..باجر بخوز اثرها ..

 

تغطيت باللحاف ..و انا انتفض من البروده سالتني حصه: بردانه ..

 

هزيت راسي بمعنى هيه تمت حصه تتاملني .. و كملت كلامها: ما ابا ازيدج حياتي بس حافظي ع نفسج ترا الدنيا ما تسوى .."ووقفت" و حالتج ابد ما تسر لا صاحب ولا عدو "

 

علقت كلماتها في بالي و ظهرت من حجرتي يلست اصيح .. لين ما رقدت ...مرت علي اياام عصيبه ..كنت اجوفها من اتعس ايام حياتي ...كنت حزينه ..ابد ما اندمجت معااهم حتى ابوي ما قمت اطلع ادوره شرات قبل .. و كأني اتريا اني اموت باي لحظه ...

 

حتى من بعد ضرابتي انا و شيخاني و كأن الكل يلومني انا السبب بالي صار مع شيخاني ..حسيت الكل كان ماخذ ع خاطره مني ... و انا بدوري طنشتهم وما عبرت حد فيهم ...حتى اما يه يوم كانت تزقرني اتغدا او اتعشى كنت احرج عليها و اقولها ما اشتهي شي ..

 

فعلا هالايام الي مضت ..جفت الموت فيها...كنت احس عايشه بس من دون روح ...الين ما لمحت موبايلي الي كان يغني و كأنه يبشرني ان الروح ردت لج يوم ظهر اسم "روحي تحبك " ع شاشه الموبايل... زخيت الموبايلي و كاني خايفه يضيع مني ..رديت ابسرعه بصوت يرتجف: الو ..

 

اول مره احس ان الروح عزيزه و غاليه يوم سمعت حس راشد يقولي : مرحبا الساع..

 

بجيت ع طول اعاتبه: انت وينك ...."ويلست اصيح و اصيح من الشوق و من العذاب الي مريت فيه"

راشد بصوت حنون: شوق لا اتصيحين ...

 

شوق ..........................................."ميته من الصياح"

 

راشد: بس فديتج و الله قطعتي قلبي ...بس غناتي لا اتصيحين..

قلته و انا اصيح: تعال خذني من هنا ...

 

راشد: ........................"ساكت"

 

قلته: انا وايد تعبانه جفت اهلي شو سوو فيني ..

راشد: شوق الظاهر كان المفروض ما اتصل فيج و انتي بها الحاله جذا ما اروم اتفاهم معاج..

حاولت اهدي نفسي عقب ما سمعت اخر كلامه ..يلست امسح دمعي ..بظهر ايدي ...

 

كمل كلامه: حياتي ...روحي غسلي ويهج يوم بتهدين برمسج زين ..

 

هزيت راسي موافقه و كأنه يجوفني : انزين ..

صكرت عنه .. و ربعت صوب الحمام ..غسلت ويهي ...و يلست ع نار اتريا اتصاله ...ما اتحملت انتظر اكثر كنت بتصل به ..بس رجع و اتصل بي ...رديت له و كانت اعصابي هاديه ..

 

سالني: شحالج ..

قلته بهمس: بخير ..

 

قال: انا عرفت شو الي صار ..

سالته: انته ما خطبتني ..انا وافقت ع بالي انت .."كنت بصيح و انا اتذكر السالفه"

 

راشد بصوت حسره: امبلى خطبتج ...بس الظاهر ما يبوني علشان ما اتصير مشاكل من بينا و بين قوم عمي .."يقصد ندى"

سالته بعذاب: و انا الحينه شسوي ...انا قلتلهم اني ما اريده ..شسوي راشد..شسوي الحقني الحقني مد لي ها اليديين ...

 

راشد سكت كأنه يفكر بشيء .......................!!

 

كملت كلامي اوضح له الامور : سيفاني قال بخبرهم اني ما اريده ..يعني هاليومين ..و بجذا بنهى السالفه ..بس اناا ما ابا غيرك ..

 

راشد بهدوء: شوق اسمعيني ..

خوفتني رنة صوته وايد ..بلعت ريجي بصعوبه و كأني مستعده اواجه أي صدمه ...

قلته: شوه "و انا ميته من قراره"

 

راشد: اتحبينـي وايد ..

 

شوق: اموت و حيا بك."قلته و انا طفرانه".انت بعدك تسالني هالسؤال ..انت ما اتخيل أي عذاب عشته بالايام الي طافت.قاطعت اهلي و ناسي ..

 

راشد: ليش كل هاه ..انتي تدرين دام انا اباج و انتي تبيني محد بفرقنا..

 

قلته باصرار: بس سعيد ما قال انك خطبتني مب من حقه ..

راشد: انا ييتتيج من الباب و هم ما بغـوا .. و اذا انتي بالفعل تحبيني بتثبتين لي هالشيء ..

رصيت اذني ع الموبايل :: مستعده ..بس ما اخسرك ..

 

قال :سبق قلتلج انا ما عندي حاليا فلوس علشان انعرس و الحينه تقدمت لج علشان اثبت لج اني اباج ..

صار ولا ماصار ..

 

قلته: هيه ..

قال: كم مهرج ..؟؟؟

 

رديت ابسرعه: راشد !!

راشد بهدوء: انتي ردي علي بس كم حددوا مهرج ..؟؟

قلته و انا اتذكر كلام شيخاني : مية الف ..

 

راشد: لو طلبت منج اتوافقين مبدئيا عليه ل ما يوصلج مهرج كامل ..و قبل ما تملجين به انكون ملجنا خلاص ..

حسيت روحي بحلم ..ما استوعبت الكلام الي قاعد يقوله راشد او اني قاعده احلم ...! سكت ما رديت عليه يمكن يقول قاعد اتغشمر او اسولف ...بس سكت بدوره يتريا ردي له ...

 

راشد نفذ صبره: شو قلتي ..

همست: تبانا اخدعهم كلهم ..و اخذ فلوس مب من حقي علشان انا و انته انعرس ..

 

راشد: انتي ما قلتي مستعده اتسوين أي شيء علشان ما تخسريني ..؟؟

صرخت عليه: مب لها الدرجه ..

صرخ علي راشد: لا اتصرخيييييييييييييييين .. و انا ما جبرتج ع شيء ...الحينه بس اثبتي لي ان حبج كله اخرطي ...

 

شويه و بصيح من كلام راشد: انا و الله احبك ..

راشد: جذابه !!!!!!! عيل انا ضحيت ..و تضاربت مع اهلي و قوم عمي علشانج علشان اخطبج .. بس اخوانج ما عبروني ...ها اكبر دليل ع حبي لج ..و الحينه انتي مستكثره من الي طلبته منج ..

 

قلته و العبره خانقتني : بس بس انا اخاف ..

 

راشد يقاطعني: اذا تبين ترتبطين فيني لازم انجازف غير جذا ما بنقدر ..

ترجيته: مب هاي الطريقه ..

 

راشد و كانه طفر مني : ماشي طريقه غيرها ..بتتوفر عندنا بيزات مهرج..بنسافر فيها و بنعرس هناك ..و عقب ما نرجع بنرد البيزات حق اصحابها

 

قلته بتردد: انا كافي قاعده اخون ثقه اهلي فيني و ارمسك من وراهم بعد تباني اشرد و اسافر معاك تبغاهم يذبحوني ..؟؟

 

 

قلته بتردد: انا كافي قاعده اخون ثقه اهلي فيني و ارمسك من وراهم بعد تباني اشرد و اسافر معاك تبغاهم يذبحوني ..؟؟

 

راشد محرج: اسمعي تبين ترتبطين فيني هذا هو الحل ما تبغين ...يلا في امان الله ..كل واحد يروح بنصيبه ..

وصكر التلفون و تصكر ابواب الدنيا بويهي ..

 

يالله حبايبي,, ابي اجوف ردودكم الحلوة,,

على شان اكمل لكم القصة,,

[الشمعة المضيئة]

 

مـاشـي تعليـق

 

بس بأختصار قلبي تقطع من هالبارت

 

 

شكراً عمري الغلا عالبارتين

 

 

ننتظر حبيبتي

 

 

[danat aldonya]

شكرا يالغلا عى البارت الحلو

صايرة البارتات كلها حزينه

ووننتظرج في البارت الياي

 

[اسيرة احساسي]

يسلموووووووووووووو

 

 

بسررررعه لوسمحتي نزلي لنه

 

 

ننتظررررررررر

 

 

[._.الغلا._.]

(( الشمعة المضيئة )) شكرا الغالية ع التواصل الدائم والله ردودج تفرحني,,

 

(( danat aldonya )) تسلم يدج ع الرد الحلو,, مشكورة الغالية و ان شاء الله اللي بعدهم احسن,,

 

(( اسيرة احساسي )) الله يسلمج ع الرد حبيبتي,, الحين انزلهم افا عليج,,

 

مرّت أيامٍ عصيبة .. مــــا يــــــــذوق النوم ساعه ..انقضى..عمــــــــــــره وحيدٍ .. مـا قدر بالحب ينعم

لين شــــــاف الحــب مره ..بعد حرمان وقطاعه ..ما تحمـــل حب قـلبه .. انــــــدفع ..لـلـــحب سلّم ..

 

((13))

 

 

اتصلت له ابسرعه لاني حسيت اني فقدته للابد خـلاص ...بس صكر التلفون ابويهي ..زخيت المخده ابكل غيض و يلست اصيح و اضرب المخده و كأني اطلع حرتي فيها ...ابد راشد ما منه فايده ..كيف اصلا يتوقع مني اسوي هالشي ..شو بيكون موقف اهلي مني ...كيف احط راس اخواني بالتراب ...

 

كيف بعدين بجابل ندى و الي سويته بخالها ...نشيت من مكـاني ورحت صوب الدريشه فجيت الستاره ...خذت نفس طويل ..ماشي فايده ..حتى لو رفضت ذياب ..او وافقت انا خسرت راشد و للابد ..زخيت الستاره و يلست عالارض اصيح...معقوله كل شي حـلو بيني و بين راشد انهد ابلحظه ...

 

احلى عالم رسمته و عشته مع راشد بحـلوه و مره ..خلاص راح و اختفى ..بسهوله...هذا كله ابسبب منوه ..لالا انا مالي ذنب ..حتى راشد ماله ذنب الذنب الوحيد ذنب سعيد الي رده يوم خطبني ولا راشد ما قصر ياه و دق الباب ...خذت نفس طويل يا ربي شسوي ساعدني ...

 

كيف اكمل حياتي من دون ..راشد كيف ...انسدحت عالارض و يلست اصيـح ...منهاره ..كنت انتظر متى ايرد راشد علشان يخلصني من الهم الي انا فيه ...حاربت اهلي و قاطعت اخواني ..سجنت نفسي بحجرتي لي ما ايي راشد يصلح كل شي ..بس للاسف ...راشد ما يقدر يسوي شيء ...

 

شسوي الحينه شسوي !! ..حسيت ان حزني مب ع سالفه خطبتي من ذياب حزني لاني خسرت راشد خـلاص ..خسرت حبي الوحيد ..سمعت دقت ع الباب ...

 

غطيت ويهي بايدي ما ابا حد يزعجني ...سمعت دقت الباب مره ثانيه..صرخت: خلوووووووووووني ابروحي

 

بس الباب انفج يلست اصيح ابصوت عالي منهاره .. و كاني ابا اخبرهم اني انا خلاص انتهيت ..ما كنت اعرف منو الي كان يدق الباب ..بس سمعت صوت سعيد :شوق شوق ..

 

رفعني و ضمني لصدره ..حضنته بقوه و كأنـي محتاجه حد يكون معاي ..

رفع راسي خلني اطالعه : شو فيج ..ليش اتسوين ابروحج جذا ..

تميت اصيح ..و رصيت ايدي ع كندورته ...

 

حاول يوقفني بس ما رمت و كنت اصيح بشكل هستيري ...

 

عصب علي : شووووووووق اصطلبي ..

قعد يعطيني طراقات ع باله مب حاسه فيه بس انا كنت مستوعبه كل شي حولي الا اني مب قادره ..اتحرك ..و كاني مشلوله ...غمضت اعيوني ورجعت فتحتها ..جفت حصه و امايه اتصيح ...

 

امايه: حسبي الله و نعم الوكيل خلاص ما بنزوجج بس لا اتسوين ابروحج جذا ..

 

خلاص انتوا قضيتوا علي رفضتوا راشد ..الحينه شو حياتي مالها معنى ..ولا طعم من عقب ضوى عيني ..محد كان يصبرني و يونسني غيره ..

 

كنت اسمع صوت سعيد و اصوات و اصوات بس حسيت اني غبت و تهت بدوامه ما اجوف غير ظلمه سوده ..فجيت عيني ..كنت احس بالتعب فضيع ..

اول ما طاحت عيني ع ابرة المغدي الي كانت بيدي ..رجعت و غمضت اعيوني انا فالمستشفى ...ليش شو استوا ما اذكر غير سعيد يوم حضني ...رجعت فتحت عيني يوم سمعت اصوات في الحجره ..

 

جفت سعيد واقف يطالع الدنيا برع من الدريشه همست: سعيد..

التفت صوبي و ابتسم لي : صح النوووووووووم ..

 

زخ ايدي و كمل : اول مره اعرف انج دلوعه ...

 

قلته بضعف: انا اسفـه ..

رد علي : ع شوه ..

 

صديت الصوب الثاني ما عرفت شو ارد ...هز ايدي : شوقاني ..

طالعته و دموعي انسابت ع خدي : مدري ليش انجلبت حياتي جذا ..

 

سعيد يلعب بشعري و يرمس بحنان : لا ما انجلبت ..جان ما تبين ذياب ..بنخبره و كملي حياتي عادي ..

سكت ما عرفت شو ارد عليه ..

سعيد: امايه و كلهم فـ البيت يحاتونج ...بطلي حركات الدلع و ردي شرات قبل كلي .. و شربي ولا تحرمين نفسج و الي تبينه انا حاضر ..

 

كنت بقوله انا ابا راشد بس راشد ...ليش سويت جي ..ليش رفضته ليش ...؟؟؟

طالعته يوم قال: حتى ابوي تعب حبتين يوم جافج شرات الميته انشيلج ..

شهقت: وين باباتيه ..انا احس من زمان ما جفته ..؟؟

سعيد: كلهم كانوا هني بس ردوا البيت .. يمكن باجر بييون ..

 

قلته ابسرعه: ليش باجر انا بروح البيت ما فيني شي و الله ..

 

حاولت اقعد علشان اثبت له بس سعيد ما خلاني و اصر ع كلامه: باجر شوقاني بظهرج لا تستعيلين ..

قلته مستسلمه: ما احب المستشفى ..

 

ابتسم وقرصني ع خدي: محد قالج ما تاكلين ..عقاب لج..

 

ابتسم لي و رديت الابتسامه تم معاي حوالي ساعه يسولف عن اشياء اتصير له بدوامه علشان انسى ..الي فيني .. و بالفعل قدر ينسيني و قعد يضحك و اضحك ع كلامه ...عقب فتره ..يت الممرضة و فجت عني ابرة المغدي .. و حطوا لي عشى ..فـ البدايه حسيت جبدي لايعه...بس عقب كلت بشهيه ...

 

اتصلت حصه حق سعيد علشان تطمن علي .. و كلمتها و كلمة امايه ...و حمودي بس شيخاني قالوا لي كانت فـ حجرتها ..اتراجع دروسها ... وقف سعيد ع الساعه 10 يبا يروح البيت ..سلم علي و وصاني انتبه لروحي ..

قلته: باجر من الصبح تعال ظهرني من هني بترياك..

 

ابتسم لي و قال : من عيوني ..تبين حايه..

رديت الابتسامه: سلامتك ..."قلته" لا اترد خبر حق ذياب اصبر شويه ..

فاجاتني ابتسامته: ان شاء الله ..

 

عقب ما ظهر سعيد يلست ابروحي اتامل السقف ..شو الي سويته ابروحي انا ..كل ها علشان ما اخسر راشد ..ما بغيت اتعب نفسي و افكر زياده ..غمضت اعيوني اريح ..و رقدت و اول مره ارقد و انا مرتاحه من اسبوعين ..

 

ع الساعه 10 فجيت اعيوني جفت امايه و حصه و باباتيه ..صرخت: باباتيه..

 

نقزت امايه متروعه من صوتي : بسم الله ع بالي صار فيج شي ..

 

و يت صوبي لوت علي و باست راسي ضحكت: ههههههههههههه تولهت عليكم ..

حصه اتسلم علي: الحمدلله ع السلامه ..

 

امايه: بنات اخر زمن ...

 

مديت ذراعي حق ابوي الي ياه و لوى عليه يلست ابوسه: فديتك و الله اني افتقدتك ..حبيبي انته ..

يلست يبوسني ع راسي و وملامح ويهه مرتاحه قلته: سامحني .."دمعت عيوني "

 

امايه: مسامحنج بس لا اتعيدنها ..خبلت فينا تراج ..

قلتهم: ههههههههههه وين شيخاني ؟؟

 

حصه: عندها مراجعه ..شخبارج الحينه شو اتحسين..

قلتهم: ابخير .. بس متى بظهر سعيد قال بيي ياخذني الصبح..

امايه: صبري لين الظهر ..بيظهر من دوامه و بمر عليج ..

 

قلتهم بخيبه: بعد بتريا ..

حصه: ما عليه تحملي ..ساعات ..

 

عقب ساعه ظهروا من عندي ...نزلت من الشبريه حسيت بالوحده ..يلست اطالع برع .انفج الباب ع بالي الممرضه بس فاجأتني ندى و بدور ..و موزي ..

 

مدري ليش يوم جفت ندى طرت من الوناسه يمكن لان زمان مب جايفتنها ..ربعت صوبها \لوت علي و جنها تبادلني نفس المشاعر : اشتقت لج شوقاني حمدلله ع سلامتج..

 

ابتسمت لها: الله يسلمج..

بدور اتفجج من بينا : خوووز ودروا عنكم الفلم الهندي ..

 

الكل: هههههههههههههههههههههه

 

موزري: اجر و عافية ..بلاج ..شي صابج ..مب خطبه هاي ..

ابتسمت لها لاني ما عرفت شو ارد عليها ..رديت ابمكاني و انسدحت ع الشبريه ..طالعت الباقه الي كانت شايلتنها بدور ..قلتها: حـلوه ..

بدور: عيونج الاحلى بس هاي مب مني من احم احم تاشر لندى" خالها بس انا قلت اشيلها خقه جدام الرايح و الراد..

 

ندى: ههههههههههههه انتي حركات..

 

فهمت من كلام بدور ان ذياب يايبنهم ..موزي: وايد ضعفتي اخ لااه مب حلو عليج الضعف مره انقرضتي ..

ندى: ليش شوقاني من شوه ..

 

شو اقولها هزيت جتفي مب محصله رد ع سؤالها ..

بدور: متى بظهرونج ..؟؟

قلتها: الظهر بيي سعيد ياخذني ..

 

بدور: يعني مب سوااافي

 

موزي: بس عاد استحي و خيلي ..

ابتسمتت لها الله يعينج بدور كيف جي صابره و متحملله ..انا ما تحملت الي صار بيني و بين راشد ع طول وصلت المستشفى صج احسدج ع قوتج ..و ثقتج بنفسج..

 

وقفت موزي: يلا راشد يتريانا ..

 

طار قلبي : راشد يايبنكم ..؟؟

بدور: هي زين منه ..

موزي: لازم بييبج ..لو قلنا ندى ما بتيي جان مابفكر يوصلنا مكان..

بلعت ريجي اطالع ندى الي احمرت ..و قالت: موزي لا اتبالغين ..

 

راشد يااه حتى ما فكر يسال عني او يسلم علي ..؟؟ يالله كيف قلبك قاسي ...شو يعني خلاص ما يباني ..؟؟يبا ندى..سلمت علي ندى و موزي و تغشت ندى ...قبل ما تظهر من حجرتي ..

موزي: يلا بدور ..راشد حرق موبايلي ..

 

لها الدرجه مستعيل بعد ..الله يسامحك كيف طاوعك قلبي ..حتى ما تسال عني ..

بدور: زين طلعوا برمس شوق شويه ..برع بررع

 

موزي: لا اتاخرين..

عقب ما طلعوا سالتها: راشد وينه برع ..؟؟

بدور يلست جريب مني ..مب مهتمه بسؤالي: مدري عنه ..المهم اقولج شخباره بو عيون

طالعتها باستغراب : بو عيوون ..؟؟

 

بدور: اخوج الدب لااه ..يا ربي وحشني كيف قدرت اصبر هالفتره كلها ...بعد باجي امتحاناتنا عقب برد الصق فيه ..بس شكله عادي عنده بغى الفكاك..

 

كانت بدور ترمس و انا سرحانه بعالم غير ..راشد ليش ماا يااه سلم علي ..ع الاقل اتصل ...طالعت موبايلي ع الكمدينو ..

 

بدور تهزني: حو ارمسج..

قلتها: مدري بدور انا حتى سيفاني من فتره ما جفته..

 

انفج باب حجرتي ..نقزت بدور يوم جافت سيفاني داش الي نزل راسه

و قال: السلام عليكم ..

 

قلته: عليكم السلام ..

طالعت بدور ..الي ابتسمت لي حتى انها ما ردت سلام سيفاني حشى قلنا طنشي بس مب لها الدرجه ..

بدور: يلا شوق اجر و عافيه ما اتجوفين شر.ان شاء الله بغيرج ولا فيج..

ابتسمت يوم جفت شبه ابتسامه انرسمت ع شفايف سيفاني ...طلعت بدور برع حجرتي حتى من غير ما تسمع رد مني ...احسدج ع قوة قلبج ...

 

سيفاني: شخبارها هاي الخبله ..

استهبلت عليه: منوه ..

 

اشر: بنت خالتج الي توها ظهرت

ضحكت: هههههههههههههه ابخير ..

 

سيفاني قعد عالكرسي: اتصدقين يا شوق احس هم و انزااح عني من اسبوعين يوم هاي الياهل ما قمت اجوفها..

 

استغربت ان سيفاني يرمسني بها الاسلوب ولالالا بعد يحكي عن مشاعره ..يحليها بدور مدري شو بتسوي لو سمعت كلام سيفاني ..رن موبايلي ..

طالعت سيفاني فقال : ردي يمكن امايه..

 

رديت / الوو

فجيت عيني يوم سمعت بدور: شو قالج ..؟؟ يحبني اشتاق لي قولي ابسرعه..ما توله علي ؟؟

 

ضحكت: هههههههههههههه لحقنا ما وحى نسولف..؟؟

بدور: خبريني دخيلج شو قاعد يسوي الحينه فديته احبه..

 

طالعت سيفاني الي قاعد يطالعني ..بلعت ريجي ما عرفت شو ارد ع بدور صدق ما جذب ها السيف يوم قال خبله ..

.قلتها: زين اخوي عندي ..؟الحين..؟؟عقب برمسج..

بدور:اووووووووف زين خلاص حبيه لي ..

 

شوق: هههههههههه مع السلامه..

سيفاني يطالع متشكك : منوه عندج..؟؟

قلته: اربيعتي تطمن علي ..

 

خذ نفس طويل: زين بظهرين ..

يلست ع طول: بتاخذني البيت يلالا انروح..

 

سيف/: ههههههههه لبسي عبايتج لي ما اوقع خروجج من المستشفى ..

 

طلع من حجرتي و بدلت ثيابي و لبست عبايتي و شيلتي ..بس بداخلي حزن كبير ابسبب تجاهل راشد لي ..ما توقعت قلبه حصى ..او حتى انه ما بسوي حساب حق علاقتنا الي كانت اكثر عن سنة ...

 

وصلت البيت عقب الغدا ..الي كان فـ الصاله ..سلمت عليهم..حسيت ان حياتي ردت لـ طبيعتها ..لصق فيني حمودي قعدته فوقي ..

 

حصه: توه ما نور البيت..

ابتسمت لها: بوجودج يا الغاليه ..

 

شيخاني: يلا باجر انا بعد بتدلع و بطيح غشيانه يمكن احسن حد يدلعنا ..

امايه: فديتج عاد انتي عنقود البيت ..

 

سعيد: شوق تغديتي ..

هزيت راسي بمعنى هيه ..سالتهم: وين ابوي ..؟؟

امايه: ابوج بحجرته راقد تدرين به لازم بها الحزه يرقد..

جفت سيفاني قاعد جريب منا بس شكله فـ عالم ثاني ...الظاهر يفكر ابدور يوم لبسته ..عل و عسى يفيد به ..

 

فاجأنا يوم سال شيخاني: متى بتخلص امتحاناتكم..

 

شيخاني: بالاول خلينا انخلص ..؟؟

 

سيفاني طفران: متىىىىىىىىىىى

شيخاني اتروعت : بنبدأ بعد اسبوع و اسبوعين بنخلص ..

امايه: شدي حيلج بدور بنت خالتج ما شاء الله عليها ما قمنا انجوفها ..

 

حصه: الله يوفجهم ..

 

استغربت ليش سيفاني يسال عن امتحانات بدور ...؟؟ يمكن يفكر يخطبها عقب ما ااتخلص ..؟؟ بس مره قال لي يبا يخطب ندى !! و هو يعرف ان ندى امحيره لــ .......... فديتك و الله يا راشد تولهت عليك يا عذابـي ..

سعيد : شوق..؟؟

 

رفعت راسي اطالعه سالني : بلاج متضايجه !!

ابتسمت: مب متضايجه بس كنت افكر شويه ..

 

سيفاني : انا اليوم بخبر الريال انج غيرتي رايج شو قلتي ..؟؟

سعيد: صبر ..خلها اتفكر شويه ..

 

تميت ساكته مالي قرار ..بس صدقه سعيد ..بعطني نفسي فرصه افكر بس مب قرار خطبتي بـ خال ندى ..لا بفكر باقتراح راشد ...و اتجوف هل اقدر انفذه اول لاء ..

 

حصه: الظاهر شوق مب عايبنها رايك سعيد..

 

قلت ابسرعه: لا انا موافقه ..عقب اسبوع بردلكم الخبر الاكيد ...

كنت اشك اني بوافق ع اقتراح راشد لان تربيتي و اهلي ما علموني هالشيء ابد حتى و لو كان راشد ولد خالتي ,...طالعت سعيد و سيفاني حرام ..أًٌٌسٌٌود ويوهم جدام الناس و العربااان ... و ندى و حصه مستحيل افقد ثقتهم فيني ..حتى ماماتيه و باباتيه ...

 

خذت نفس طويل ..بس بجوف خلال هالاسبوع احتمال راشد يغير رايه ..بس اتمنى انه ما يطنش السالفه و يلبسني و يقتنع إنا نحن مب لـ بعض ..

 

وقفت رايحه حجرتي ..صعدت الدري سمعت امايه اتقول : مدري شو صابها بنتي ..

ابتسمت يوم سمعت رد شيخاني: يمكن حسدوها ع ذياب كل وحده تتمنااه مال و مركز و سفر و جاه و كل شي بعد شو تبا هاي الغبيه..

 

سيفاني : نحن وافقنا لانه ريال و النعم في و الاشياء الماديه عقب ...

ما سمعت الكلام الي يدور عقب لاني خلاص وصلت حجرتي .. وطيت راسي ع المخده ..شلت موبايلي اجوف يمكن وصلتني مكالمه او رساله من راشد بس للاسف ما في شي .

 

.مع انه يعرف اني كنت فـ المستشفى و هو الشخص الوحيد يعرف ليش انا تعبت ووصلت المستشفى ...تنهدت هذا هو طبع راشد جاسي شرات الصخر ..حتى يوم كنا نتزاعل اذا انا ما رضيته خلاص بتم حاقرني ..غفلت شويه ..فتحت عيني ع رنة الموبايل..كانت المتصله ندى

 

رديت عليها ابكسل : السلام عليكم

ندى : عليكم السلام ..اجر و عافيه حياتي

 

قلتها: الله يعافيج ...

 

ندى: شو اخبارج الحينه احسن شويه..

قلتها: الحمدلله ابخير ..

ندى: امممممممممم خالي يسلم عليج و كان يبا يتطمن عليج..

طنشت كلامها و قلتها: شخبارها مهره..

 

ندى: ابخير ..بس بعدها شيطانه ...ابا ازورج اذا مب اليوم باجر بكون عندج ولا بظهرين..

قلتها: لا حياج الله و جان طلعت بخبرج ...

 

ندى: خلاص ما يخالف ...اكلي زين ما زين وراج عرس يا عروستنا..

 

قلتها بضيج: ندى مالي بارض ع هالسوالف ..

ندى: هههههههههههههه الا متلومه ..جان زين عرسي و عرسج بيوم واحد..

 

يلست انافخ شو يعني تبا تزوج راشد ..راشد مالي انا و بس ..

 

قلتها : الله كريم ..

 

ندى: خلاص حبيبتي بخليج في امان الله..

قلتها: مع السلامه ..و تحملي بعمرج..

 

فريت الموبايل عني بعيد ندى بعدها حاطه في بالها انها بتزوج راشد..غمضت اعيوني بس انا ما اقدر اسوي الي يطلبه مني راشد ما اقدر ..حسيت بصدااااااااع شديد..نشيت رحت الحمام تغسلت و صليت العصر ...عقب ما خلصت صلاة ..جفت حصه داشه علي الحجره ..

حصه: شوق بظهرين معاي ..

 

قلتها: مالي نفس ..

ردت علي : بنروح المنار شويه غيري جـو ..

 

يلست امشط شعري: ما اقدر حصه سمحيلي جوفي يوم ثاني ولا خذي وياج شيخاني ..

حصه: لا كنت ابا اخذج علشان انغير جـو انا بعد احس بعمري مخنوقه..

 

طالعتها :شو فيج..

ابتسمت : لا اتخافين مافيني شي بس مضايجه من ها الحمله احسها ثجيله ابا اطلع من البيت شويه ..

 

قلتها: خلاص علشان خاطرج بسير معاج ..

حصه مبتسمه: مشكوره ..بس بنروح نشرب تركش كوفي و بناكل كيك ...لا اتخافين ع حسابي ..

 

ضحكت عليها: هههههههههههههه ما قلت شي زين ..

حصه :بروح ابدل ملابسي ...انتي بعد اجهزي ..

 

عقب نص ساعه كنا في سياره سعيد كان ودي حمودي ايي معانا بس حصه طرشته بيت امها ...ما تبا يخبل فيها في المركز بعد اتعرفون حمودي و سوالفه ما يحتاي اخبركم ...نزلنا سعيد و روح دخلنا المنار ..يلسنا صوب العايله قبلها طلبنا لنا كوفي و كيك ..

 

شوق: الناس لو يعرفون جان قالوا هاي توها ظاهره من المستشفى ..

 

حصه: هههههههههههههه الله اكبر عليهم ..

شوق : جربت امتحانات الثانويه العامه ..

 

حصه تاكل كيكه: هممممم ..لذيذه ..

طالعتها : حصه متى بتربين ..؟؟

 

حصه مطنشتني: بعدني توه الناس ..بس قولي الله يسهل علي الولاده..

 

قلتها ابسرعه: آآآآآمين يا رب العالمين و اتييبن بنوته زين العسل

حصه: اباها تشبهج.

شوق: و جان استحي ..

 

حصه: ههههههههههههه بس لانج تشبهين سعيد..

 

قلتها: وانا اقول بعد ...

 

عقب ما خلصنا سرنا برع صوب البحر نتمشى كان الجـو بديع ووايد حـلو ..زخت حصه ايدي ..و تجربت مني ..

 

حصه: شوق ..

طالعتها من غير ما ارد عليها ...

حصه: انتي من شوه متضايجه من الخطوبه ولا من الي خاطبنج..؟؟

 

سكت ما عرفت شو اقولها ..

حصه: ترا الكل ملاحظ عليج انج متغيره مب شوق الي البيت بوجوده له طعم غير ..

قلتها: انتي اتبالغين ..

 

حصه: و الله العظيم اتكلم جد ...مستويه عصبيه مدري شو صار بج ..

قلتها : اتفقنا افكـر و عقب اسبوع بردلكم خبر يعني محد بجبرني ع شيء لا سعيد ولا سيف صح..؟؟

 

حصه: صح..بس خفي ع روحج شويه دخيلج لا اتسوين ابروحج جذا ..

قلتها بصوت مبحوح: احاول ..ما يهمج ..

 

حصه اترص ع ايدي : شو رايج بالطلعه..

 

قلتها بصدق: و الله فنان ...بس اتصدقين لو مع حمودي بتكون لها طعم خاص..

 

حصه: اكيد ملح الطلعه حمودي

شوق: هههههههههههههههههههههههه

 

حصه: يلا بجوف سعيد جان بيينا ...ع فكره موزي امسويه حفله باجر ..

 

طالعتها : ليش ..؟؟

 

حصه: لانها خذت اللسين..

قلتها: اخيييييييييييييييرا ما بغت ها السقوطه ..

 

حصه: هههههههههههههه هي و الله ..المهم بتيين اباج تطلعين من ها الجو ..

 

فكرت لو باجر رحت يمكن اجوف راشد ...مدري اتشاور في خاطري اروح اولا ..ونحن داشين المنار دعمت بنيه رفعت راسي ..

 

حصه: ندىىىىىىى !!

 

ندى: شوق !! ههههههههه توني مرمستنج اتقولين ما بظهرين ..

ابتسمت لها: حرمة اخوي اصرت الا اطلعني معاها ..

 

حصه: منوه يابنج ..؟؟

 

ندى: فديت روحه منو غير خالي

حسيت بربكه طالعت حصه الي جفت بعيونها نظرات ما فهمت لها ..

 

ندى: يلا كنت بسوي لج مفاجأه ..

شوق: انا !!

 

ندى : هي بس ما بقول شي بصخ ...يلا بروح ..

حصه: انتي ليش ابروحج ..

 

ندى "اشرت مكان واقف خالها" لا اتريا خالي يطلب لي عصير ..

مدري ردت فعل طبيعيه خلتني اطالع مكان ما كانت اتأشر طاحت عيني بعينه .". يا عيون الكون غضي بالنظر

إتركينا إثنين عين تحكي لعين..إتركينا الشوق ما خلى حذر..بلا خوف بنلتقي و بلا حيرة بنلتقي

بألتقي في عيونها و عيونها أحلى وطن و كل الأمان...و يا فرحتي الحظ الليلة كريم"

 

حسيت بقشعريره رجعت لورا ورا حصه و كأني ابا احمي نفسي من المشاعر الي دوم اتهيج فيني من اجوف هالانسان ..

 

ما اتخيله في يوم برتبط فيه مستحيييييييييييييييييل ..

 

ندى: انوصلكم ..

قلتها ابسرعه : لا طبعا سعيد بيينا ..

 

حصه: سعيد بيينا عقب ساعه بتترين ..

 

قلتها : ان شاء الله الدهر كله ..

ندى: خيبه ؟.؟ ليش كل ها شوق ..يالله اشكثر خالي يسوي لج رعب ..

قلتها و كان كلامها مب عايبني بس كانت الحقيقه: لا بس فضيحه ..

 

حصه: شوق خلينا انروح معاهم دام حصلنا حد يوصلنا..

شوق : انروح بتاكسي

 

ندى: و الله ازعل عليج..

سكت شويه قلتها: خلاص عاد كل شي ولا زعل ندووي ..

 

حصه: يا ويل حالي ..

ندى: ههههههههههههه يلا ..بسير ارمس خالي شكله متضايج لابستنه من متى يترياني ..

سارت ندى صوب خالها راقبتها ..يلست اتامله اول مره اجوف ملامحه واضح لي .

 

.". مانته حلو انته فظيع ... طيرت عقلي من حلاك يا حي هالوجه المليح ... ويا حي هالطبع الصريح انظر بعينك واستريح ... لو شفت في عيونك هلاك مادري أسميك الدلع ... والا أسميك الولع

 

والا القمر لي من طلع ... أحسن أسميك الملاك "

 

كانت ندى اترمسه رفع راسه صوبنا ... وتجدمنا ..يتنا ندى :يلا خالي بييب السياره ...

 

بلعت ريجي : حصه مره ثانيه ما بظهر معاج ..شكلكن متفقات ..علي

حصه و ندى: هههههههههههههه

 

حصه: و الله العظيم تفاجـأت بوجود ندى ..

ندى: حتى انا ما ادري انج هني ..خالي يقول هذي مب توها ظاهره من المستشفى ..

 

طالعت حصه: ما قلتج ...؟؟

حصه: هههههههههه ندى قوليله صل ع النبي يابتنها حرمة اخوها اتغير جـو ..

 

ندى: زين يلا انروح ..

و نحن نمشى سالتها: حق شوه يايه انتي ..

ندى: خالي كـان وده يشتري شي ..يابني معاه اونه يعيبه ذوقي ..

 

حصه: يالله بالستر ..

 

طلعنا من المنار كانت عرفت سيارته هذي هي نفسها الي مره كفخني اباب سيارته ...زخيت ايد حصه و بدورها رصت ع ايدي و جنها اتعرف بشو قاعده احسن ...يلست ندى جدام و انا بالسيت الي ورا ه و حصه ورا ندى ..يلست اطالع برع ...كانت ريحة عطره اداعب خشمي ..وايد حلـوه ...تمنيت اوصل البيت ابسرعه و كأني اهرب من شي ...

..

 

سالتنا ندى: حصه بتروحين بيت عمج ولا بيت عمي ...

 

حصه: لا بسير بيت عمي ترا شوق معاي ..

بلعت ريجي يوم انطر اسمي رفعت راسي بالمنظره جفت عيونه بعيونه نزلت راسي ابسرعه . سلَّم اعيوني من اعيونك .... الثمن يا صاحبي غالي..ليش فكر يخطبني ..؟؟ شو يبا مني ...؟؟؟ ممكن ندى اقترحت له عني ..؟؟؟

ع هالافكار وصلنا البيت ..نزلت ابسرعه من السياره و ربعت داخل البيت ...لحقتني حصه ..

حصه: شووق شوق ..

 

وقفت اطالعها ..

سالتني: شو فيج..

 

بلعت ريجي: انا مستحيل ارتبط بها الانسان ..

عقدت حصه حياتها مستغربه: ليش سوا شي غلط !!؟؟

 

سكت ما عرفت شو ارد عليها ...هالانسان وايد يثير فيني مشاعر اتخوفني ...كملت طريجي داخل الصاله ...و عقبها رحت حجرتي ...حسبت حصه بتلحقني بس اجوفها ما دشت و هالشيء ريحنـي ...عقب ما تغسلت و صليت المغرب ,..فتحت الكمبيوتر اكمل القصه الي اقراهااا ...دمعت عيوني ..

 

راشد ما كان يحبني اقرا قصص يغار ...منوه الحينه بيغار عليه.. منوه بحسسني اني انسانه احب ..اتنهدت ,...نشيت من مكاني كارهه كل شيء يذكرنـي بـ راشد...الظاهر راشد ما بغير رايه ابد .. و انا غبيه عطيت نفسي و عطيته فرصه مدة اسبوع انقرر بس الظاهر مب مهتم ..

 

انسدحت ع الشبريه باجر ما بسير بيت خالوه ..يمكن تزعل موزي ..بس ما احب شي يذكرني براشـد ..غمضت اعيوني انجلبت الصوب الثاني اكيد ندى بتكون موجوده ..غطيت اعيوني و يلست اصيح بصمت ..متالمه ..

صدق من قال علاقات التلفون ابد ما تستمر ..لا هي استمرت معاي ولا مع بدور و سيفاني ...غفلت ..وعيت يوم حسيت بثجل فوق شبريتي ..جفت باباتيه ..مدري حسيت اني صار لي زمان ما جفته ..يلست و لويت عليه..

 

قلته: وحشتـني موت ..احس من زمان ما جفتك ..

حضن ويهي بيده و ابتسم لي تأملته حسيت بـ عيونه كلام وايد... اول مره اجوف هالنظرات بعيون باباتيه ..

سالته: باباتيه انا ابخير و الله "وابتسمت له ابين له اني مرتاحه .."

 

رد لي الابتسامه رفعت راسي صوب باب حجرتي يوم انفج دشت امايه سالتني: شحالج الحينه..

 

قلتها مبتسمه: ابخير .."وبست راس باباتيه" و يوم جفت باباتيه صار حالي احسن بوايد ..

حسيت ان باباتيه فهم لي فيلس يربت ع جتفي مستانس مني ..

 

امايه: زين يمه روحي اتلبسي .

سالتها ابسرعه: ليش ..؟؟

 

امايه: اخت خطيبج بتينا تبا تطمن عليج..

شهقت : منوووووووه خاله العوده..

 

امايه: ههههههههههههههه لا مب خالتج خالة ندى ..

طنشت ضحكت امايه و قلتها: انا مب مستعده قوليها باجر اتيي مع ندى ...

امايه: عيب شو اقول باجر تعالي مع ندى..استحي و خيلي الحرمه يايه اتزورنا ..

 

مديت براطمي متضايجه: ما ابا ما بظهر لها ..

 

امايه: يعني فيها الخير يايه تطمن عليج..

قلتها: ندى ما قالت لي ..

امايه: و شدراها ندى ..يلا يمه اذا مب عشان خاطري علشان خاطر ابوج..

طاحت اعيوني بعيون باباتيه ...لويت عليه و رجعت اصيح: يا ليتني طلعت شرات لا اسمع ولا ارمس كنت مرتاحه من الدنيا و همها ..

 

عصبت عليه امايه: شوق شهالرمسه اخر مره اسمع منج هالكلام و الله جان مره ثانيه تنطقين بها الجلام يا ويلج مني ..

 

يلس ابوي يمسح راسي ..ظهرت امايه من حجرتي و صكرت الباب ابعصبيه .. رفعت راسي اطالع باباتيه و اقوله : انا وايد متعذبه محد حاس فيني ..

 

يلس يمسح دموع عيوني ...دشت علينا حصه: شوق بلاج اتصيحـيين ...

 

وقفت ووقف ابوي معاي ..قلتها: ماشي ..

رحت الحمام اغسل ويهي ..يوم ظهرت جفت باباتيه ظهر من حجرتي و حصه قاعده ع الشبريه ...

سالتني : علشان ام فتون بتيي اتصيحين..

 

فريت الفوده بعصبيه : من كل شي ...محد حاس فيني "كنت بقولها اولهم اخوج بس سكت "

حصه: هدي شوقاني ما فيها شيء ..يعني انتي ظاهره من المستشفة و يايه تطمن عليج شو فيهااا ..

 

يلست امشط شعري و قلتها بغيض: ابدن ما فيها شي ..

 

حصه اتنهدت: الله يعينج ...ندى ما تدري لانها ما قالت ..

قلتها : امبينه السالفه ..

 

حصه و هي ظاهره: زين لبسي و نزلي سلمي ع الاقل بس سلمي عقب ردي حجرتج ...

ما علقت ع كلامها ..بس يبوني اسمع كلامهم ...الكل قاعد يحدد مصيري شو اسوي و اشو اقول ...فجيت باب الكبت بعصبيه و انا انافخ ...سمعت دقه ع بابا حجرتي

 

قلت بعصبيه: لحظه ..

 

لبست بدله و سرت صوب الباب افجه شهقت يوم جفت باقه عوده تميت واقفه اتريا ابا اعرف منو شايل هالباقه ...

 

ندى: ادخل ..

ابتسمت: ندووووووووي شو هااا

 

وسعت ودشت ندى حطت الباقه ع الطاوله الجريب و كانت تنافخ: هلكت ..قاص علي خالي و الله ..

من سمعتها اتقول خالي اختفت ابتسامتي ..رحت صوبهاا و قرصتها من ذرااعها

و قلتها اوني اتغشمر بس كنت اقصد كلامي: جذابه قلتي باجر بتيين و الحينه يابه معاج خالتج العوده..

 

ندى : آآآآآآآآآآي قرصتج اتعور فجي عني ..

 

ابتعدت عنها و رحت لصقت بالتسريحه اطالعها جفتها تفرك ذراعها مكان قرصتي و اطالعني بغيض

قالت: مستويه شريره و عنيفه.."يلست ع شبريتي "

 

قلتها: و انتي جذابه ..

 

ندى: و الله كنت محطيه فـ بالي ازورج باجر ...بس عرفت ان خالوه العوده تبا اتييج فقررت اني ايي معاها .. و باجر بنروح بيت عمي علشان موزه تبا تاكلنا كيكة نجاحها في التراااي ..

 

خذت نفس طاحت عيني ع الباقه: مشكوره شكلها حـلو ..

 

ابتسمت ندى: ذوق خالي و اصلا هي من خالي ..."واشرت " شي بطاقه طبعا بخط ايده..

قلتها :ما احب الرسميات..

ندى: ههههههههههههه الا قولي متلومه ..

 

جافتني ساكه ما ارد عليها طالعتني : بلاج ..؟؟ متغيره وايد انتي مليتي من قعدت البيت..

رحت و يلست جريبه منها : مدري ندوي كارهه حياتي و الله ..

ندى: عيشي حياتج ترا اليوم الي يمر عليج ..خلاص ما بيرجع و لا اتضيعين عمرج ع الفاضي ..و بعدين باجر بتعرسين و بتتغير حياتج..

 

كنت برد عليها بس سمعت دقه ع الباب ...شويه و دشت سيتي ..عقدت حياتي يوم جفتها شايله جيس و بكس ..متوسط حجمه ..

ندى اشرت ع الجيس: ترا هاي صوغتي مني لج ..و ها البكس من اممممممممممم

طالعتها بنظرات و كأني فهمت من منوه فقالت اتوطي صوتها: خالي ذياب ..

 

قلتها من دون نفس: شكرا ..

ندى : يلا تعالي انسلم ع خالوه ..

 

قلتها: ما بنطول اليلسه معاها زين..

 

ندى: فالج طيب من عيوني ادريبج تستحين ..

 

نزلنا تحت ..وقفت يوم جافتني ..مديت ايدي لها بس هي يرتني و لوت علي ..مدرى الي يجوفها يقول هذي ام ذياب مب اخته فارق السن من بينهم وايد وايد كبير ...يلستني جريب منها ..و جني حرمة ولدها مب اخوها ..

 

سمعتها اتقول: هلا هلا بعروستنا الغاويه..

 

رفعت راسي اطالع امايه الي ابتسمت و شكلها مرتاحه لاني عيبت خالة ندى ..

سالتني: شحالج؟؟

قلتها بصوت واطي: ابخير الحمدلله شحالج انتي ..

 

خالة ندى: ابخير الله يسلمج..ليش يمه جذا انتي ضعيفونه اكلي .. لا تستوين شرات هالبناات ريجيم و ريجيم و اخرتها يطيحون بالمستشفى..

 

امايه: تراها من جذا البارحه بايته بالمستشفى..

 

يلست اطالع ندى بنظرات كانت تضحك علي ..لانها تدري اني متلومه من خالتها ..لازم لاني ما كنت اتوقع زيارتها ...

 

شويه و دشت علينا حصه ..و حطوا العشى..ما توقعت انهم بتعشون ..ع بالي بس بيون يسلمون و يرحون ...حسيت ان خالة ندى كانت وايد اتبالغ في تدلعي.. حتى تعليقاتها ما عيبتني ...حسستني اني مخطوبه لاخوها ...

 

عقب العشى ..يلسنا نشرب الشاي ...بس هالمره قدرت ابتعد عنها و اقعد حذال ندى ..ز

ندى تساسرني: الظاهر دشيتي خاطر خالوه العوده وايد ادلعج..

رديت لها بنفس نبرة الصوت: لاحظتي .. وايد احرجتني ..

 

ندى: افرحي و استانسي ..ترا صعب تراضين خالتي العزيزه ..زين انها راضيه عنج..

قلتها: لا و الله ..

 

ندى: ههههههههههه

قلتها: عيل فتون طالعها عليها..

 

ضربتني بجتوفي: اششششششششششششش

يتني الضحكه بس اختفت يوم قالت ندى: خالي يتصل بي اكيد برع .."طالعتني اتغيض فيني" اقوله شوق اتسلم عليك..

قلتها ابسرعه: يا ويلج و الله يا ويلج...

 

ندى: هههههههههههههههههه خالوه يلا خالي ذياب برع ..

ربعت صوب الدري بعد ما سلمت عليهم..لاني ياني احساس اني اطلع معاهم علشان اجوفه او ع الاقل اجوف عيونه الي دوم اتناظرني في جامه سيارته ..

 

.خفت وايد من هاي الافكار علشان جذا طرت ابسرعه فوق حجرتي ...يلست اطالع البكس و الباقه ..شويه كلهم دشوا حجرتي يبون يجوف الاغراض الي يايبتنها ندى لي و خالها بس انا رفضت ع بالهم اني متلومه بس انا حلفت اني ما افتح هدية ذياب لان ما بينا أي صله ...

 

فتحت جيس ندى..جفت قطعه و بدله و شنطه ...و خاتم ذهب ...طلبت من حصه تاخذ الباقه معاها بحجرتها ..في البدايه رفضت بس عقب قلتها ترا بفرها بالزباله ..فاضطرت تاخذها ...قفلت علي باب حجرتي خايفه لا ايي سيفاني او سعيد يقنعوني بـ ذياب و خاصة عقب ما يت خاله ندى العوده ...اكيد امايه قعدت اتخبرهم كيف استانست مني ...

 

بها الليله ابد ما جفت الرقاد بعيوني افكار وايد كانت تشغلني .. و تلعب بخيالي منها راشد و منها ذياب و منها زياره خالة ندى و اشياء كثيره ..مرتبطه بـ مستقبلي و حياتي .....اخرتها صليت الفير و رقدت ...

 

ييت حصه اتقومني العصر ..حصه: نششششششششي يلا انروح بيت بيت امايه موزي تترياني ..

يلست اتجلب ع الفراش: ما ابا اروح تعبانه ..

 

دشت شيخاني: يلا ابا ارجع سرعه اذاكر

رفعت راسي قلتها: منوه سمح لج ادشين حجرتي ..

 

شيخاني: من زينها يلا نشي جان بتروحين..

قلتهم بعصبيه: ما بسير مب راقده البارحه تعبااااااااااااااااااااانه ..

ششيخاني: لا اتخليني اخذ ها البكس ..

 

كانت تقصد البكس الي يابه لي ذياب قلتها ابرود: خذيه ..

حصه: مب وقته يلا بتروحين ولا لاء ..

 

قلتهم بعناد : لالالالالالالالالالالالالالالالالاع ..

 

عقبها ظهروا من حجرتي ما ابا شي يذكرني براشد..ابد ما ابا شي ...و اذا رحت هناك اكيد بتعذب ..عقب ما صليت المغرب رن موبايلي و كانت المتصله ندى رديت عليها: هلا ..

 

عاتبتني: ليش ما ييتي ..

قلتها: مالي خاطر و الله ..

 

ندى: افاا تمنيت اتكونين معاي

قلتها : شو الحفله..

 

ندى: حلوه و خفيفه بس الكيكه لذيذه ..

 

قلتها: يمكن حصه اتفكر فيني و اتيب لي قطعه ..

ندى: ههههههههههه كانت بتيب بس شيخاني ما طاعت قالت محد قالها ما اتيي ..اسكتي شوق ما قلتلج شو صار ..

 

عقدت حياتي: شوه ..؟؟

ندى: راشد جافني شوقاني بتخبل ..

 

حسيت ان الدم اتيمع بعروقي : راشد جافج..

ندى: هي اول مره اجوفه جذا عن قرب

قلتها ابسرعه: كيف كيف ..؟؟ انتي وين الحينه !

ردت ندى و كانت طايره من الوناسه : في بيتنا هوه وصلنـي بعد...بس خالي احتشر عليه ...ابد ما شال عينه من الجامه ..

 

كانت دموعي تنزل من عيوني دموع قهر و غيض و غيره على راشد ..

 

ندى: تدرين ! اول شي جافني في بيت عمي كنت اسلم ع عمي و هو دش و زقره عمي و خلاه يسلم فيني انا ما وحاني اتغشى ..فجافني ..عقبها اصر انه يوصلني ..اتعرفين حركات الشباب انتي ..

 

صكرت التلفون بويه ندى ..ندمت اني ما سرت بيت خالوه حليمه علشان امنع ندى انها اتجوف راشد حتى و لو بالصدفه راشد مالي انا ..هوه يحبني و انا احبه ..ندى اتبالغ بوصفها ...حسيت اني مخنوقه يوم تذكرت قالت لي ما شال عينه من الجامه ..و كأنها تتكلم عني و عن ذياب ..ذياب !!

 

لالالالا ..ابسرعه فتحت لسته الموبايل ادور ع "روحي تحبك" بس ابد ماشي رد يلست اصيح..مستحيل تتخلى عني بها السهوله ..اتصلت كذا مره ..ما رد علي ..اخرتها طرشت له مسج" رد علي ضروري حتى لو كانت هذي أخر مره اترمسني"

 

مجرد ما تم التسليم رن موبايلي ..ما خليته يكمل رنه ع طويل رديت ...سكت .....................

راشد..................................."ماشي رد"

 

تمينا ساكتين الين ما سمعت حسه : خير ..

قلته و انا اصيح: معقوله ما ولهت علي ..؟؟

راشد........................"ماشي رد"

 

قلته: انت قلبك صخر ..

راشد: انتي متصله علشان اتعاتبيني ..؟؟

 

شوق ..........................."اصيح بصمت"

راشد بحنيه: لا اتصيحين ..

قلته: انا احبك ..

 

راشد: ادري ..

قلته: تدري اني اشكثر تعبانه ابسببك..

راشد: ادري حتى انا تعبان ابسببج بس انتي الي ما بغيتيني ..

 

غمضت اعيوني قلته : خلاص راشد انا موافقه ..

كأنه مب مصدق: موافقه ع شوه ..؟؟

 

قلته بصوت يرتجف: بوافق ع ذياب و مجرد ما استلم مهري بسافر معاك علشان نتزوج

 

كــــــــمل البارت,, ابي اجوف ردودكم,,

[راسرمانية نحيسة]

بل بللا دي استخفت على راشد

شوو تسوي شدددي

ثانكس عل البارت حبووو

اللمهم ما يوحشج غالي حبيتي