JeNeYa Posted يوليو 6, 2005 Report Share Posted يوليو 6, 2005 حبيت انقل لكم قصة حقيقية قصيرة حدثت في إمارتي الحبيبة ( رأس الخيمة ) والحين بخليكم مع القصة...........والله القصة تعور القلب في منطقة من مناطق راس الخيمه كانت شي عايلة معروفه ونقدر انقول من الراهيين(الاغنياء) يعني مستواهم المعيشي مرتفع. كانت عندها بنتين الكبيره ريم 19 سنه والصغيره هنوف 10 سنين وولد كبير مانع متزوج عمره 24 سنه. كانت الأم خقه تحب الموضه والمظاهر وولدها مانع من نفس الطينه(الطبع) وزوجته نوف بعد وماعندهم عيال مع ان صار لهم سنتين متزوجين. أما ريم كانت وايد طيبه وكل أهلها يحبوونها . في ربيع 2003 ريم بغت تتشرا حق الكورس اليديد، كانت تدرس في التقنيه ادارة مكاتب السنه الثانيه لها. نزلت الصاله وكان أبوها محمد وأمها مريم يالسين. ريم: السلام عليكم مريم،محمد: وعليكم السلام. محمد: هلا هلا فحبيبتي بنتي الريم ..ها حبيبتي آمري محتايه(محتاجه) شي؟ ريم ابتسمت، هيه من النوع الهادي والخجول، اطالعت ابوها بعينها العسليات وويها الطفولي: مايامر عليك عدو، أبا أتشرا(اشتري) حق الكورس اليديد ..ابا بيزاات(فلوس). مريم: هيه صح لازم تشرين، ليش ماتترين(تنتظرين) باجر نحن ترانا سايرين دبي وهناك أغراضهم أحلا وماركات. ريم: لا عادي انا بتشرا من اهنا واذا عيبني شي في دبي بشتريه بعد. محمد:معليه حبيبتي..كم تبغين؟ ريم: مممم مادري اللي تعطيني..ألفين درهم بتكفي. مريم: شوو ألفين شو اييبون هيول(هذول) هالأيام كل شي غالي..ياريم لازم ماتاخذين الا الشي الغالي والماركات..شو تبغين يقولون بنت محمد شو لابسه رخيص ومادري شو.بو مانع عطها خمسة آلاف. محمد: لحظه خل أشوف البوك ..ألف ألفين..مم و هااااي خمسه و600 بعد. ريم: مشكوور أبويه..بخبر موسى يوديني. محمد: ديري على بالج حبيبتي. ريم: انشالله...سارت تتلبس وكانت ريم جميلة وماتحب تكشخ بس عالخفيف..والكل لما يشووفها يعرف انها راقيه من اسلوبها في اللبس والتصرفات. عند الباب...ريم: داليا where is Mosa?tell him I want to go to shop . دالياk Madam. موسى ياه لريم: ماما هذا سيارة في تاير خربان..سوي انتزار(انتظار) ساعه . ريم:شووو ساعه وايد..ماتروم اتخلص في نص ساعه عالأقل؟ موسى:انشالله ماما يسوي شغل جلدي(بسرعة) انشالله خلاص. ريم: اوكى بسرعه مافيني يستوي المغرب بعدين مشكله عند شارع كويتي كله في شباب مب زين(صياعه) يلا خلص. ريم تتمشى جدام حديقتهم وعند الحوض يلست وطيحت الوقايه(الشيله) ويالسه اتغني وينهم أحباب قلبي..واطالعت ساعتها الجفنشي كانت 4:30 وفجأه سمعت صوت واحد: السلام عليكم . ريم رفعت راسها بسرعه وشافت ولد خالها حمدان: وعليكم السلام وغطت شعرها بسرعه. ريم ما اداني حمدان لانه وايد فرييه وعنده ربيعات ولانه خقاق وكل سيارة تنزل عنده. حمدان:شحالج وشحال عمتيه؟ ريم:بخير..عمتك داخل...ووقفت ومشت عنه كم خطوه بعيد. حمدان بصوت خفيف بس ينسمع: عفانا الله لهدرجه أنا أزيغ(اخوف) كل ما يشوفوني يشردون. ريم اطالعته بطرف عينها وسارت تطالع موسى شو صار به. ريم: شوها موسى بعدك ما خلصت.؟ موسى:لا ماما هذا لازم يودي كراج ما يستوي. ريم: بس هذي رمستكم(كلامكم) كله مافي يستوي ما يستوي...كانت ريم محرجه لانها كل ماتشوف ولد خالها حمدان تغيض. ريم: أوكى خلاص انا مب سايره اليوم..وسارت دشت(دخلت) الصاله وأمها وحمدان داخل. مريم: ريم بلاج أميه(يمه) ماسرتي بعدج؟ ريم: موسى يقول شي تاير مادري بلاه ..مب سايره اليوم خلاص. حمدان راز بويهه: أفااا..أفاا عليج ريما أنا موجود بوديج اذا بغيتي(تريدي). ريم منصدمه من الرمسه وتقول في خاطرها: صدق ما يستحي اونه بيوديني ..ماحصل غيري بيسير مع هالأشكال.. وهيه لايعه جبدها : يلا اسموحولي بسير حجرتيه..وصعدت بسرعه فوق. مريم: فديتك حمدان عمووه ريم الظاهر تستحي منك. حمدان: هيه الظاهر جيه..أنا أوشوف كل ما تشوفني تشرد.. ريم في حجرتها: أفف شو ها كل ما أخطط أسوي شي ينقلب ظيج(ضيق)..وهذا حمدانو كملها بعد..ماعرف أمايه شو عايبنها فيه....خل أدش النت وأشيت ويا الربع في المسنجر أحسنلي. شغلت النت ودشت المسنجر وشافت ربيعتها عنود أون لاين. عنود(دلووعة راك):هلاا والله بريموو..وينج يالقاطعه؟ ريم(دنيا من الوله):انتي اللي وين يالخيله؟ شحالج وشحال الغاليين ؟ ..أونهم زعلانين ويالسهدلوعة راك: لووول والله الحمدلله . اراضيهم ريم: خخخخخخخ والله انكم ماعندكم سالفة أونكم تحبون . دلوعة راك: هييه يا ريمو بعدج ماتعرفين الحب..انشالله اتحبين واتحسين فيني..وشو أحس. دنيا من الوله: لا لا لا مابا بعيد الشر..آآآآي يلا نشي(قومي) يالس(قاعد) يأذن المغرب..صلي بدل هالخرابيط. دلوعة راك: خخخ انشالله..يلا سي يو. الساعه 9 فليل في الصاله ريم وهنوف يطالعون تلفزيون..مريم نازله وعلى آخر كشختها مريم: أميه ريم..أنا سايره خطبة بنت اربيعتي ام عبدالله..ديري بالج من هنوف ولا تخلينها تسهر..وإذا رقدت(نامت)طلي عليها مب تيلسين(تقعدين) عالكمبيوتر وتنسين عمرج. ريم: انشالله أميه بس لا تتأخرين ترا بخبر أبويه عليج. مريم: ههه لا والله..يلا يلا شوفي التلفزيون احسن...وطلعت هنوف: ريييم حطي ديزني..مب كله التلزيون حقج انتي. ريم: بععععد ياهال ويتشرطون..انشالله عمتيه..يودي الريموت أنا سايره للكمبيوتر الصديق الوفي هههه ريم شغلت الكمبيوتر..دشت المسنجر..وشويه بتصيح لما شافت محد أون لاين عندها. ريم: شوهالحاله شو هالربع..مامنهم فايده..خل أطرش مسج حق عنودو الخبله خل اتدش.. ريم طرشت مسج..تتريا (تنتظر)عنود اتدش..وتطالع المسنجر كل شوي..ومحد دش...بعد عشر دقايق وصلها مسج: ماروم(اقدر) أدش النت أنا مب في البيت. ريم: أفف شو هالبنت كله برع البيت ماتقر..خل أشوفلي أي شغله ..ممم بفتح لي ايميل يديد. وفتحت ريم ايميل باسم دمعة حزن. ريم: خل اخبر عنودو اتسويلي ادد على الايميل اليديد...وطرشت ريم مسج تخبر عنود بهذا الايميل. وبعد ربع ساعه يت عنود أون لاين. دمعة حزن: عنودوو اخيرا دشيتي والله ملل ماعندي حد أون لاين. دلوعة راك:هلا ريم..شو ملانه؟ مبروك عالايميل اليديد. دمعة حزن: هههه الله يبارك فيج عقبالج لوول. دلوعة راك: هههههه أكيد الحينه اللسته مالتج فاظيه..تبغين ايميلات؟ دمعة حزن: هيه والله..عطيني..بس ابا حد دوم يدش وسوالف. دلوعة راك: أوكى هذا ايميل واحد حبوووب وسوالف ودووم عالمسنجر حزين@hotmail.com دمعة حزن: عنودو ويا ويهج تعرفين اني ما أظيف أولاد. دلوعة راك:لا والله هذا غير حبووب وطيب وماعنده خرابيط. دمعة حزن: لا والله..الشباب كلهم نفس الشي يبون البنت ترمسهم بالتليفوون. دلوعة راك: ههههههههههههه لووووول. دمعة حزن: والله وبعد مستانسه انتي. دلوعة راك:أوكى برايج(على راحتج) انتي الخسراانه والله هو سوالف وطيب وأنا أظمنه لج..أنا أعرف الشباب وهذا مؤدب ومايخصه في الخرابيط. دمعة حزن: ممم مادري بشوف. دلوعة راك: أوكى يلا أنا بخليج دمعة حزن: لا والله وين سايره توج داشه.؟؟ دلوعة راك: بااااي ريم: طااع هذي والله انها ما تستحي داشه تعطيني ايميل واحد وظهرت حتى بعدني ماقلت لها باي. بعد ساعه..ريم: شو هالملل...خل أسير أشوف هنوف عن أمي تهزبني(تهاوشني). هنوف راقده(نايمه) في الصاله..ريم: هنووف..هنووفوو يلا نشي(قومي) سيري حجرتج..لحوول راقده هذي..خل أشيلها هاي ضعيفه سلق عادي...وودتها حجرتها وردت ريم حجرتها. ريم: شو هالملل...ممم...خل أظيف هذا الانسان واسولف وياه عقب اسويله بلوك ودليت هههه. ريم: أوبس هايوه أون لاين. حزين: مرحبا ..هلا والله دمعة حزن: هلا..اشحالك؟ حزين: بخير وسهاله..اشحالج انتي؟...انتي منو؟ دمعة حزن: بخير..أنا ربيعة عنود..هيه عطتني ايميلك. حزين: منو عنود....هيييه دلوعة راك عرفتها..شحالها؟ وينها هيه محد عندي اون لاين؟ دمعة حزن: هيه بخير..محد دشت وطلعت قبل شويه. حزين: أيواا..شو بعد أخبارج؟ دمعة حزن: بخير..ترا أقولك أنا ظفتك بس ابغي أسولف مب عسب شي..فلا تحاول ترقم ولا تقردن(تغازل) أعرف سوالفكم أنا. حزين: هههههههههههههههه..والله انج سوالف..لا تخافين مب مرقمنج. دمعة حزن: ممم..شو بعد؟ حزين: ماشي والله..انتي تدرسين؟ دمعة حزن: هيه في التقنيه ثاني سنه ادرس ادارة مكاتب.. حزين: زين والله..انا بعد أدرس في جامعة العين..انشالله خريج هالسنه الكورس الياي..ادرس هندسه كهربائية...ترا أنا من راس الخيمه. دمعة حزن: هييه أنا بعد..فديت راك(رأس الخيمة) ,اهلها.. تموا يسولفوون لين الساعه 12.....سمعت صوت أمها برع دمعة حزن: أقوول أنا بطلع لأن أمي وصلت وماباها اتشوفني يالسه عالكمبيوتر لين هالحزه. حزين: أوكى يلا تصبحين على خير. دمعة حزن أوف لاين. في بيت عنود عنود توها يايه..كانت في الحفله هيه بعد.. عنود دشت حجرتها: فهووود..انته شو اتسوي..زخيييتك(كشفتك) مع منو على المسنجر؟ بسك تقردين(مغازل) مب كافي البنات اللي ترمسهم صدق. فهد:شو تبين ..انتي شلج(شدخلك) اشيت مع منو ولا أرمس منو..منو الحينه الأكبر..تتحرين عمرج أميه ولا أبويه ها يالعيوز؟ عنود: أوهوو بس انزين انته ما تنعطى ويه..يلا نش(قوم) عن الكمبيوتر دوري. فهد: انشالله أمييه. عنود: فهووود ماشفت موبايلي كنت ناستنه عالشبريه(السرير) الظاهر. فهد: هيه هاايوه عندي. عنود: حد اتصل بي ولا طرش مسج؟ فهد: هيه وحده اتصلت وسولفت وياها وظحكنا وسولفنا حتى اتصلت بها وخلصت رصيدج. عنود: لا والله وانته منو سمحلك اترد على اربيعاتي وترمسهم(تكلمهم)؟ فهد: ههههههه من زين ربيعاتج لا تخافين اسولف وياج بس وحده طرشت مسج. عنود: اشووف منو هاي...هييه هاي ريموو اربيعتي. فهد: ريم..؟ منو هاي البنت. عنود : هاي بنت العريف محمد جان عرفه اللي ساكن في (...) ويايه في التقنيه هيه. فهد: هيه هيه عرفته..انزين خبريها اتظيفني عالمسنجر عندها. عنود:ههههههه تحلم انته لانها ماتظيف شباب...ويلا يلا برع برقد(بنام) الحينه..محتل حجرتيه من الصبح. فهد: من زينة حجرتج اللي يقول سويسرا محتلنها اونه..يلاا ارقدي يالعيوز رقدت عليج طووفه ههههه عنود: متى بسير الجامعه نفتك من حشرته. ريم عل شبريتها(سريرها) بترقد: والله صدق حزين مؤدب وأنا اتحرا(على بالي) كل الشباب شارات(مثل) بعض..أوبس نسيت أسأله عن اسمه..خلاص باجر بسأله. فهد على شبريته بيرقد ويفكر بريم هو بعد: والله هالبنت عجيبه أول مرة أسولف ويا وحده شاراتها..حتى حسيت براحه لما سولفت وياها..في كل شي صادقه ولا تعرف تجذب اللي في قلبها على لسانها..حليلها والله لو هيه وحده من اللي أرمسهم لو كشخه بس ماشي حظ..كل البنات اللي أرمسهم مصلحجيين..يلا يمكن أروم أييب راسها. الصبح يوم الخميس ريم نزلت تتريق(تتفطر) ريم:صباح الخير ماما مريم: صباح النور والسرور..هلا في حبيبتي ريما. ريم: شو هالريوق(هالفطور) مالي نفس..أبا كورن فليكس ماتعرفون إني أحبه ولازم آكله كل يوم. مريم:ريموو بسج عاده كله كورن فليكس شو باجر بتعرسين بتريقين ريلج كورن فليكس؟!! ريم: ههههه هيه ليش لا..لازم يشاركني في كلشي ويتعود على طبعي..ولا لازم أغير ذوقي على حسب العريس؟ مريم: عاد حمدان ولد خالج مايحب هاللي انتي تاكلينه..يحب شي راقي مثلا ساندويشات جبن ومرتديلا. ريم: لا والله وأنا شولي تخبريني؟ مريم: ليش هو مب خطيبج من انتوا صغار ونحن نقول هالرمسه(الكلام). ريم: لحول لازم اتضيقين خلقي من الصبح خلاص مابا أتريق بسير حجرتي. ريم: هالبيت كله يضيقون علواحد..خل أدش النت أحسنلي. دشت وحصلت عنود دلوعة راك: هلا هلا بالريم. دمعة حزن: هلا والله اشحاالج؟ دلوعة راك: والله تمام اشحالج انتي؟ من صباح الله خير داشه.. دمعة حزن: لا والله وانتي عيل شو اتسوين يالخبله عالمسنجر هالحزه؟ دلوعة راك: هههههه والله ريمو انا من البارحه واعيه مب راقده طول الليل يالسه عالنت ويالقلب دمعة حزن: ههههههه مشكله اللي يحبون الله لا يبلينا. دلوعة راك: رييم أنا بظهر (بطلع)أخويه يبا النت يلا باي عن يظربني هههه باي. دمعة حزن: أوهوو أوكى بااي. ريم: لازم هذا أخوها يبا النت الحينه لما أبا أسولف وياهاا. بعد شويه حزين أون لاين دمعة حزن: هلا والله حزين..اشحالك؟ حزين: أهليين دمعة..صباح الخير اشحالج؟ دمعة حزن: والله ماشي الحال..متظايجه اشوي حزين: أفا ليش منو مزعل الغاليين؟ دمعة حزن: منو غاليين؟ هااا؟؟ لا تغلط خلنا حلوين ولا بتشوف ويهي الثاني حزبن: هههههههههههه أوكى أوكى خلاص شو السالفه منو مظيج بج؟ دمعة حزن: والله شو أقولك..بس لاتخبر حد حزين: أخبر منو يعني أنا أعرفج ولاأعرف حد يعرفج هههههه دمعة حزن: ههههههههه هيه والله صدق...تعال انته شو اسمك؟ حزين: مممم..بعدين بخبرج(بقولج) مب الحينه دمعة حزن: ليش؟؟ حزين: بس..شو رايج انتم جذا مانخبر بعض بأسامينا الحقيقيه. دمعة حزن: مم أوكى برايك. حزين: المهم شو السالفه خبريني بلاج؟ دمعة حزن:.....خبرته عن حمدان وكيف ان أنها تبغيها حقه وهيه ماتدانيه..لانه كذا وكذا.. حزين: أهاا دمعة حزن: والله أحس بظيج وحتى ماتريقت أول ما يابت أميه هالسيره. حزين: أفاا....ممم تبغين الظيج يخوز(يروح)؟ دمعة حزن: مابيخوز الا لما أميه تشل من راسها هالفكره واتغير رايها. حزين: أوكى انتي جربي ..وصدق بيخوز (يروح)الظيج وبتستانسين..اتصلي على هالرقم####### دمعة حزن: اييه انته شو اتقوول حزين: والله دمعه مابتخسرين شي بس جربي..بس أحب أساعدج والله لا تفهمين غلط. دمعة حزن: والله انك ماتستحي..تتحراني يالسه العب ولا أمزح وياك..يلا باي فهد: شاااات..والله انها عنيده Quote Link to comment Share on other sites More sharing options...
افا ياقلب تخدعني Posted يوليو 6, 2005 Report Share Posted يوليو 6, 2005 ثااااااااااااااانكس ويلا بسرعة ننتظر الباقي Quote Link to comment Share on other sites More sharing options...
حلوة وحبوبة Posted يوليو 7, 2005 Report Share Posted يوليو 7, 2005 ثاااااااااااااااااانكس القصة وااااااااااااايد حلوة يعطيكم العافية تحيـــــــــــاتي حلوة وحبوبة Quote Link to comment Share on other sites More sharing options...
بحرينيه^مزيونة Posted يوليو 7, 2005 Report Share Posted يوليو 7, 2005 مشكووووووووووره اختي على القصه الحلووه ووننتظر التكمله بليزز لا تتاخرين Quote Link to comment Share on other sites More sharing options...
JeNeYa Posted يوليو 7, 2005 Author Report Share Posted يوليو 7, 2005 الساعه 11 الظهر ريم: أحس بيووع..أبا آكل ..بسير أشوف لي شي آكله. مريم في الصاله ريم: أمييي..يوعانه أنا. مريم: والله يوم كان الأكل جدامج نشيتي(قمتي) وماكلتي الحينه اتصيحين يوعانه. ريم: أمييه أبا آكل والله بطني يعورني من اليوع. مريم: ماشي يلا..بعد نص ساعه بنتحرك بنسير دبي وبنتغدى في البوم اتحملي اشويه. ريم: لا والله الحين لازم أسير اتلبس عالسريع..ليش ماخبرتوني قبل. مريم: والله انتي كله في حجرتج مانشوفج يلا سيري بسرعه اتلبسي لأن حمدان بيوصل بعد شويه. ريم: شوووه حمداان؟؟ ليش؟؟ مريم: ترا هو بيودينا دبي. ريم: نعم...ووين أبويه عيل؟ مريم: عنده شغل اتصلوا به الدوام وسار وحتى ماتريق ولا شي..وانا قلت مابنخرب البروجرام وخبرت حمدان يودينا. ريم: أوكى خلاص حق شو انسير دام ابويه محد؟؟ مريم:لالالا أنا استسمحت من اربيعتيه كانت عازمتني عالغدا عسب قلت لها سايره دبي..يلا عن الرمسه الزايده وسيري اتلبسي. ريم مبوزه: انشالله. صعدت ريم واتحس انها بتنفجر من الغيض واتلبست بسرعه وماتزينت وايد..مالها خلق الدنيا ونزلت الصاله. حمدان: هاا ريما خلصتي اخيرا ياسندريلا. ريم تطالعه مالها نفس ووقفت عدال أمها. مريم: يلا حمدان توكلنا. في بيت عنود عنود وفهد يشوفون تلفزيون وأبو فهد وأم فهد. عنود: أقولكم مب جنه ملل..من الصبح نحن نطالع في هالتلفزيون. محد معبرنها.. سارت يلست عند فهد:فهد قوم طلعني شويه والله بنفجر من الملل. فهد: خوزي (قومي)عني لاا. عنود: أوهوو قوم عاد..يلاا من متى مب ظاهره من البيت. فهد: وين بتسيرين في راس الخيمه كلها شارعين..إذا تبين اوديج البحر بوديج. عنود: لا والله فهوود يلاا أي مكان نتمشى في السياره عالأقل. بو فهد: حشرتوونا انتوا بلاكم؟ شوهالحشره؟ عنود: أبويه ملانه ابا اظهر وفهود مب طايع يظهرني. بوفهد: وين بتسيرين في هذا الظهر؟ عنود: ليش مانسير دبي من سنه مب سايرين هناك. بوفهد: أنا مب ساير وياكم اليوم أنا مشتهي سمج هامور عالغدا وأمج مزهبتنه للغدا. عنود: مالي خص أبا أسير ....وبوزت أم فهد: فهوود جييه ماتظهر(اتطلع) عنود ماعندكم شغله ولا مشغله وطول الاجازه حليلها عنود ماسارت مكان قوم بارك الله فيك طلعها شوي. فهد: لحوول بلشتنا هذي عنودو. بوفهد: يلا عن الحشره فكنا طلعها يلا قم. فهد: انشالله..وهو يطالع عنود وعيونه كلها حقد شكله يتحلف لهاا. عنود مستانسه وبطير من الفرحه. في سيارة حمدان ريم يالسه ورا حمدان وطول الدرب وهو يرمس عن نفسه وعن شو بيسوي في المستقبل وعن مكانته وعزم هذا واتوسط حق هذاك وناس مدحوه..وريم شويه تبا تزغطه(تخنقه) وودها تفتح باب السياره وتنزل.. وهو كل شويه يلف المنظره اللي فوق راسه صوبها قصده يخليها تشوفه وهي مب معبرتنه..وحط أغاني أجنبيه وأم ريم مستانسه تتحرا حمدان يفهم شو تقول الاغنيه..وريم ميوده عمرها طول الدرب وتسولف ويا هنوف وتبي الوقت يمر بسرعه. ووصلوا المطعم..وحجزوا طاوله ويلست ريم ويلس حمدان على الكرسي اللي مجابل ريم..وسألهم شو يبون وهو يطالع ريم. ريم تطالع البحر ومب معبره مريم: أنا بطلب لهاا..وخذت اللسته(المنيو) وطلبت ويلسوا يتريوون(ينتظرون) الطلبيه. بعد اشويه..عنود دشت المطعم وريم شافتها..ريم وقفت وقالت :أمي بسير شويه وبرد. ريم: عنوودوو انتي شسوين اهنا؟ عنود: ريموو انتي اهنا بعد؟ ريم: زين يوم ييتي والله مظايجه..بس غريبه يايه دبي شو يايبنج ومع منو يايه؟ عنوود: هههه هيه والله هذا فهد أخويه يايبني. ريم: أها وينه عيل؟ عنود: الحينه بيي..شو رايج نيلس(نقعد) بروحنا ونتغدا. ريم: أوكى لحظه بخبر أمايه..وسارت عند طاولتهم ريم: أميه أربيعتيه عنود شفتها في المطعم ..عادي أسير أتغدا وياها. حمدان: وليش هيه ماتيي تتغدا ويانا ؟ ريم: والله اربيعتيه تستحي تتغدا مع واحد غريب..ها أميه عادي؟ مريم: هيه أميه عادي ..وخبريها الغدا على حسابنا. ريم: ثاانكس مام. عنود: ريموو منو هذا الولد الغاوي اللي وياكم أخوج؟ ريم: لالا بعيد الشر هذا حمدان اللي أخبرج عنه أونه زوج المستقبل. عنود: ليش خطبج؟ ريم: لاااا بس أميه محطيه عليه الآمال والأحلام أونه محد ياخذج غيره. فهد دش المطعم..ويالس يتجرب من ريم وعنود عنود: فهد تعال هذي اربيعتي ريم. فهد يطالعها وعيونه عليها من بعيد لين ماوصل: السلام عليكم ريم: وعليكم السلام. فهد مب مصدق ان هذي ريم: اشحالج؟ ريم: الحمدلله بخير. عنود: فهد ترا أنا وريم بنيلس نتغدا رواحنا سير شوفلك مكان ايلس فيه. فهد فاتح عيونه ويحس ان محد في المطعم غير ريم..ويقول في نفسه: هذي ريم..ماشالله عليها قمر ماتوقعتها جذا. فهد: انزين مع منو يايه ريم؟خبرتي هلج انج بتيلسين ويا اختي؟ ريم: هيه هذيج أمي وولد خالي يالسين هناك..خبرتهم قالوا عادي. فهد يطالع الطاوله وشاف حمدان وقال في نفسه: هذا أكيد حمدان اللي خبرتني عنه ولد خالها اللي ماتدانيه. فهد: أوكى خلاص يلا عن اذنكم..وروح(راح) وبعد الغدا كل واحد ركب سيارته وروحوا. في السياره ريم كانت تفكر في حزين..وحست انها تبغي ترمس(تكلم) حد..وطول الدرب وهيه تفكر فيه وفي طلبه انه تتصل به. لما وصلوا البيت ريم صعدت حجرتها وأول شي سوته دشت المسنجر وحصلت بطايق واايد أسف إعتذار من حزين ويطلب منها ان تسامحه على اللي سواه وانه عطاها الرقم قبل لا يستأذن وبعد شويه دش حزين المسنجر وحست ريم ان قلبه قام يدق بسرعه..وفتحت البوكس مال ايميل حزين وتمت تطالعه تتريااه(تنتظره) يكتب شي..هو تم ساكت وهيه بعد ريم قامت وكتبت: وعليكم السلام حزين: هلا اشحالج دمعه..دمعه ترا أنا آسف على اللي سويته..ليكون بعدج زعلانه دمعة حزن: ممم..ابصراحه انا كنت زعلانه بس الحينه لا. حزين: الحمدلله..اشحالج وشخبارج. دمعة حزن: والله تمام ..توني راده من دبي وشفت عنود هناك بعد. حزين: أهاا زين والله شحالها هيه.؟ دمعة حزن: والله زينه..وايد استانست وياها..زين اني شفتها لاني كنت وايد متظايجه. حزين: ليش؟؟ دمعة حزن: لأن ولد خالي هو اللي مودنا واتخيل حالتي وأنا روحي مادانيه حزين: أهاا..انزين دمعه ليش انتي كارهتنه؟ يمكن هو مايستاهل كل هذا..يمكن هو انسان أوكى..انتي ماعاشرتيه ولاعرفتيه زين بعدج. دمعة حزن: لااا أنا أعرفه وكافي اللي شفته منه الين الحينه..إذا هذا كله ومن بعيد بس أعرفه كيف لما أشوف المستخبي أكيد بيظهر أخس عن جذا بعد. حزين: مادري شو أقولج..بس لازم اتشوفين راي اللي حواليج بعد مب تحكمين عليه من نظرتج له بس. دمعة حزن: أميه تحبه وايد وأبويه عادي عنده يشوف مستقبله بيستوي تراه طيار وأخويه دوم وياه علاقة اوكى يعني معاه. حزين: شفتي كيف يعني انتي بس تشوفينه من زاويه وحده..ولابد انج تشوفينه من كل النواحي ومب تحطمين عليه بس من أسلوبه وكل واحد عقب الزواج يتغير يادمعه ويحس بالمسؤوليه أكثر. دمعة حزن: لحوول انته بعد في صفه..مشكور عالنصايح أنا بطلع باااي. حزين: وين سايره؟ دمعة حزن : أنا قلت الحينه انته بتخفف عني طلعت تزيدني هم. حزين:دمعة أنا أحاول أساعدج ويمكن باجر هالانسان يتقدم لج شو بتسويين عقب..يمكن يكون في صالحج انج توافقين عليه..فكري يادمعه عدل. دمعه حزن: أوكى انشالله يالله فمان الله حزين سي يو. في بيت عنود فهد بند الكمبيوتر وطلع من الحجره وهو متظايج وعنود كانت يالسه في الصاله. عنود: فهوود وين ساير؟ فهد: بطلع شويه. عنود: أوكى أبا شوارما وانته راد ييبلي. فهد: سيري لااا.....وظهر وهو مبوز عنود: هذا شو بلاه معصب. فهد في سيارته يسوق ومايعرف وين يسير..ومحطي اغنية راشد الماجد يابعد هالدنيا ليه http://songs.6arab.com/rashid..ya-b...denyah-laih.ram ويالس يفكر في كل شي صار .وكيف تعرف على ريم..وشافها وهيه ماتعرف انه هو حزين اللي ترمسه(تكلمه) في المسنجر أخو ربيعتها..وكيف انها عيبته..باخلاقها وأدبهاا كان في خاطره يساعدها ويكلمها..ويود موبايلها يبا يتصل في رقم ريم اللي حفظه من موبايل عنود..وكل شوي يكتب الرقم ويمسحه يكتبه ويمسحه..وعقب وصل عند البحر..وهد(خل) الموبايل ويلس يطالع البحر.. فهد: أنا شو بلاني ليش أفكر بها وايد؟ وأنا الا عارفنها من كم يوم..بس ماعرف شو اللي يجذبني لهاا..ماشالله أخلاق وجمال.. فجأه الموبايل يدق...وشاف رقم غريب..حس إنا ريم..ويقول في خاطره : جان زين هيه..وكان متفائل انها ريم....رد : ألوو بنت: مرحبااا فهد: مرحبتين...منو معايه؟ بنت: انته فهد؟ فهد: هيه نعم منو انتي؟ بنت: أنا أماني شو نسيت صوتي؟ فهد: أماني؟؟ أي أماني؟؟.....هييييييه عرفتج...نعم بغيتي شي؟ بنت: بسم الله بغيت أسلم عليك بس. فهد: أوكى يلله أنا مشغول الحينه بنت: في شو مشغول؟ فهد: بس مشغوول بعد شو عندج مانع؟ بنت: انزين اتصل بي لما تفضى على رقمي هذا فهد: انزين لما يبيض الديج بتصل بج ..يلا يلا باي صكر عنهاا وقام يطالع الموبايل وايطالع البحر مره ثانيه..ويقول: أنا شو يالس أسوي؟ شو صار بي ..حق شو كل هذا..أول مر أرمس وحده بهالأسلوب..,انا اللي ماصدق بنت تتصل بي..معقول كل هذا بسبب ريم؟ رد البيت فهد عنود: فهود..فهوود فهد: هاااا عنود: شوبلاك ماتسمع؟ وين الشوارما؟ فهد: أي شورما انتي بعد..خوزي(قومي) عني فهد دش النت وحصل ريم أون لاين..الساعه 10 مسااءا حزين: السلاام دمعة حزن: وعليكم السلام حزين:...... دمعة حزن: حزين بلاك ساكت؟ حزين: لا ماشي دمعة حزن: حزين..أنا آسفه لاني كنت أرمسك فهذاك الاسلوب والله غصب عني..انته شوذنبك أطلع غيضي عليك..انته كنت تبا تساعدي وتخفف عني. حزين: لااا دمعووه عادي والله انتي شارات اختي وما أزعل منج..وأنا مستانس لأني شفتج الحين دمعة حزن: أنا بعد حزين: هذي اهداء لج http://songs.6arab.com/3abdelmajeed..men-za33alak.ram دمعة: ثانكس حزين: دمعة أنا أول واحد ترمسينه عالمسنجر صح؟ دمعة حزن: هيه حزين: شو رايج فيني؟؟ندمانه لأنج ظفتيني؟ دمعه حزن: لااا..هذا أصلا كان قراري..ومب نادمه بلعكس علأقل حصلت حد ينصحني ويسمع مشاكلي. حزين: ماتخافيين اني ألعب وياج؟؟أو إني أقردنج (اغازلج)؟ دمعة حزن: ليش انته يالس(قاعد) تلعب ويايه ولا تبا شي مني؟ حزين: ابصرااحه..انتي الوحيده اللي أحس اني أعاملها باحترام ولا أفكر اني أذيج لانج ياريم تستاهلين كل خير. ريم: حزييييين.....شعرفك باسمي؟؟ حزين: هاا..لا ماعرفه. دمعة حزن: انته توك كتبت اسمي.. حزين: هييه والله..لول...مم مادري تخمين. دمعة حزن: حزيين..انته تعرفني؟ حزين:.... دمعة حزن: منو انته؟؟ قولي بلييز أبا أعرف كيف عرفت اسمي..أنا أعرفك؟ حزين: ....ريم..بقولج شي بس لا تزعلين بليز..كم مره إلحين أنا مزعلنج. دمعة حزن: والله مابزعل بس قولي. حزين: أنا..أخو عنود...فهد. دمعة حزن: نعم...!! وكيف هيه عطتني إيميلك وماقالت إنه مال أخويه قالت إيميل واحد. حزين: لااا ..أنا كنت داش بايميل عنود..هيه كانت ناسيه موبايلها وأنا شفت المسج وايميلج وسوييت لج اد..و أنا عطيتج إيميلي.. دمعة حزن: كيف دشيت على إيميل عنود؟؟ إنته تعرف الباس وورد مالها؟ حزين: لااا هاي عنود غبيه مسويه الباس وورد رقمها خخخخخ دمعة حزن: ههههههه أها حزين: ليكون زعلتي؟ دمعة حزن: لالا عادي حصل خير. حزين: تعرفين ريم..اليوم لما شفتج انصدمت..مشالله عليج جمال وأخلاق. دمعة حزن: ههه..ثانكس..ممم عنود تعرف انك ظايفني؟ حزين:لاا..هيه روحها قالت تحلم ترمسك هيه ماتظيف شباب. دمعة حزن: هييه ماتعرف إني إختربت إلحينه لوول حزين: لااا لاتقولين هالرمسه إنتي ماعليج كلام أدب وأخلاق دمعة حزن: ويوم بعد يوم صاروا قريبين من بعض أكثر وأكثر..ويتمون بالساعات عالمسنجر لين الفير(الفجر)..وفهد حس بعمره يتغير وصار مايفوت(يطوف) صلاته وودر(ترك) الخرابيط والبنات. أول يوم دوام في التقنيه ((السبت)) بيت ريم ريم: أمييه ماشفتي الجوتي اللي شريته من دبي؟ مريم: ريم إنتي دوم ماتعرفين وين تحطين أغراضج ريم: أنا خبرت داليو تشل الأغراض ومادري وين حطتهم. مريم: لحظه بسير أسألها. ريم تاكل ريوقها كورن فليكس طبعا. مريم: إندوج(اخذي).... بعد قولي لبسوني ياه والله..أخبرج ترا الدريول ماياا اليوم شكله تعبان ريم لا والله عيل منو بيوديني التقنيه إلحينه؟ مريم: خلاص مب لازم إتسيرين أول يوم مابيحاسبوونكم ريم: لا والله عسب يقولون الأساتذه من أولها مهمله مالي خص بسير ..بتصل حق عنود بسير وياها.... ريم: ألو عنود عنود: رييموو هلااا..شو المعنويات..أنا مالي خلق أسير أداوم أفف ريم: عنودوو يلا عاد خليج نشيطه تونا أول يوم..أقوولج ترا أنا بسير وياج اليوم الدريول محد. عنود:أوكى بعد عشر دقايق أنا عند بيتكم. صووت هرن سياره برع مريم شكلهم وصلوا ريم: يلا بااي مام ريم فتحت باب السياره ودشت وسلمت جان تسمع واحد يرد السلام ويا عنود..إطالعت منو..وشافت إنه فهد بيوصلهم التقنيه..إحمر ويها وعنود تستهبل: يلا بابا ودي تقنيه جلدي فهد صاخ ومستحي بعد عنود: فهوود حط لنا اغنيه ترفع معنوياتنا فهد:لحظه..شغل المسجل http://music.6arab.com/nabeel..ma-arwa3ak.ram عنود: ياسلام هذا كلي حقي أنا ههه عنود: إسمحيلنا ريمو السياره والدريول مب عقد المقام..متعوده تراج عاليكزس والمرسيدس ونحن حلينا هوندا ههه ريم: لا كل هذا مايسواكم عنود: قولي والله إنتي بس..خلاص تبادلين عطينا سياره ودريول وخذي هذي السياره مع دريولها ههههههه ريم: هههه فهد صاخ وإطالعت فهد بنظره سريعه بس فهد حس فيها..ونزلوا وتم يطالعها لين مادشت ومشىوصلوا التقنيه ونزلت ريم. Quote Link to comment Share on other sites More sharing options...
بحرينيه^مزيونة Posted يوليو 7, 2005 Report Share Posted يوليو 7, 2005 مشكووره اختي.. ننتظر التكمله Quote Link to comment Share on other sites More sharing options...
باباي Posted يوليو 7, 2005 Report Share Posted يوليو 7, 2005 مشكوره ننتظر الباقي Quote Link to comment Share on other sites More sharing options...
محرقية فخورة Posted يوليو 9, 2005 Report Share Posted يوليو 9, 2005 ثااااااانكس على القصه وااايد حلوووووووووه لووووووووووووووول Quote Link to comment Share on other sites More sharing options...
JeNeYa Posted يوليو 9, 2005 Author Report Share Posted يوليو 9, 2005 أول ما ردت ريم من التقنيه ويالدريول سيدا سارت ودشت المسنجر كانت مخبره فهد إنها بدش في الساعه الفلانيه أول ما ترد البيت..وهو كان يترياها حزين: هلا والله بالحلوين دمعة حزن: هههه أهلين حزين: اليوم شفت القمر في عز الصبح لوول دمعة حزن: أي قمر الويه مصفع حزين: هههههههه الله يخليج يعني أنا اللي كان ويهي مب مصفع..زين بس إنكم وصلتوا التقنيه مادشيت في شبه ولا شي خخخخخ دمعة حزن: هههه بس لو كان دريولنا يشبهك لو بتصبح على ويه يفتح النفس لول حزين: ريم دمعة حزن: هلا فهد حزين: ترا أنا اليوم ساير السكن في العين..فما بتحصليني أون لاين لين يوم الثلاثا دمعة حزن: أفاا..حرام حزين: يلا إتحملي كم يوم وبرد ولا شوو ليكون تحبيني وما تتحملين فراقيه. دمعة حزن: ههه شو فلم مصري حزين: لا لا هندي ميري آي لاف يو ريم سكتت..حست بشي ينغز قلبها لا قرت كلمة(آي لاف يو) حزين: ألوووو وينج حووو دمعة حزن: هااا وياا..خلاص إتروح وإترد بالسلامه حزين: ريم إهداء قبل لا أظهر ((يوم الأحد)) العين فهد طايح عالشبريه(السرير)ويفكر في ريم..وسوالفهم..والظحك..وكل شي صار عالمسنجر..ويتقلب يمين ويسار..كان أول يوم إيمر بدون ما يشيت وياها ويسولف..استوت الساعه 12:30 ومايااه ارقاد حاول يرقد وغمض عيونه..وكان خلاص بيغط..ووصله مسج..قال في خاطره: منو هذا المتفيج(الفاضي) اللي مطرش في هالوقت. شاف المسج وهو ينود..كان مسج فاظي نزل وشاف الرقم..فتح عيونه ومنصدم كان رقم ريم رد عليها بمسج فاظي..وردت عليه: بعدك واعي فهد:ماياني رقاد..إنتي ماتخلين الواحد يرقد خخخ ريم:أوبس سوري عالإزعاج تصبح على خير فهد: لا لا وين إنتي ليش مب راقده وراج دوام الصبح ريم: أنا بعد ماياني رقاد فهد: من وين لج رقمي؟ وليش طرشتي مسج؟ ريم: أول مره كتبته حقي وهو عندي...بصراحهi miss u أحس إتعودت أسولف وياك فهد:مممم..ليكون إتحبيني خخخخ ريم عصبت لأنه دوم يظحك كل ماحاولت تتقرب منه ريم: شو اللي يظحك إلحينه؟ فهد أبا أسألك..إنته تحب؟ فهد: ممم سؤال صعب..شي اختيارات؟ ريم: فهد أنا أرمس جد..انته تحب وحده؟ رد هيه ولا لا فهد: ممم أقدر أقولج..هيه ريم: منو هالبنت فهد: تبين الصدق..هيه وحده ماتعرفينها. انصدمت ريم..ووقفت ماطرشت شي. مرت ربع ساعه..نص ساعه..حس فهد ظميره يأنبه..وطرش لها مسج فهد: ريم..أنا.....أحبج ريم لما قرت المسج حست إنها جريب واتصيح..لأنها حست توها بطعم الحب..وشوهو فهد:ريم شو بلاج..ردي علي..أنا آسف اذا قلت هالكلمه بس إنتي سألتي وأنا جاوبت ريم: فهد..أنا أحبك بعد..بس أحس حبي لك ماله معنى فهد: ليش ياريم؟ أنا فيني شي يمنعج إتحبيني؟ ريم: الظروف تخليني أقول هالرمسه..مع إني والله يافهد أحبك وأحس إنك الوحيد اللي يفهمني واللي بيسعدني فهد: ريم ممكن اتصل بج؟ ريم: مادري..لا لا فهد..يلا تصبح على خير باي فهد يالس على شبريته(سريره) منصدم من إلي صار..وقام يطالع كل المسجات من البدايه لين النهايه ويرد مره ثانيه يطالعهم ويرد بعد لين مارقد والموبايل في إيده. (( الاثنين)) في التقنيه ريم تعبانه شكلها مب راقده (نايمه)عدل..شافتها عنود.. عنود: ريمو خييبه منو مصفعنج؟ بلاه ويهج؟ ريم: لا مب راقده عدل بس عنود: ليش تعبانه مريضه؟ ريم: لا عنود: عيل شو..هاا ليكون إتحبين هههههه ريم:...... عنود: شوو بلاااج؟ ريم وعينها تدمع: عنود مافيا شي عنود: أوكى برايج لما تبغين ترمسين قولي لي ريم إطالعت عيون عنود:عنود أنا خايفه ومهمومه عنود: شو بلاج حبيبتي شو السالفه؟ ريم: أخاف أخسر إنسان غالي عليه..ومهمومه لأني خايفه إني أنجبر على إنسان ماأبغيه. عنود: إنسان غالي؟؟ لا تخافين أنا بتم وياج مابتخسريني هههه ريم: هههه عنود مب إنتي والله ظحكتيني وأنا أبا أصيح... عنود: منو تحبين هاا إعترفي ..خلاص زعلانه منج ماتخبريني شي ريم فكرت إن المفروض ماتخبر عنود عنها وفهد..خافت على علاقتها مع اربيعتها.. ريم: ممم تعرفين أنا سويت حق واحد أدد من فتره وحبينا بعض عنود: إنتي متأكده إنه مايلعب عليج؟؟ ريم: لا متأكده إنه يحبني عنود: ريمو إنتي ماتعرفين الشباب عطيني إيميله وأنا باخذ عنه المعلومات وبشوف إذا هو صادق وياج ولا بس يلعب. ريم: هاا...ممممم أوكى يصير خير. الظهر ردت ريم البيت ريم راده البيت تعبانه لأنها كانت سهرانه ريم: السلام عليكم مريم: وعليكم السلام..ريم ترا اخوج مانع ومرته بيون عالغدا عندنا..غيري ملابس وانزلي ريم: أميي أنا أبا أرقد تعبانه ومب مشتهيه غدا مريم: يلا عاد ريم عيب عليج أخوج من زمان مب ياي عندنا..إنزلي وسلمي عليهم ريم: انشالله ريم دشت حجرتها ريم: هنوووفو إنتي شسوين في حجرتيه؟ هنوف: ألعب ماتشوفين؟ ريم: هيه تستغلين الفرصه لنا أكون محد وتلعبين في الكمبيوتر..قومي ماما هذا مب لعبه إذا اخترب بخبر عليج أبويه. هنوف: أوهوو..إنزين لحظه إشويه ريم: شو لحظه ويا ويهج يلا نشي.(قومي).اظهري(اطلعي) من الحجره أبا أغير ملابسي هنوف: شوها انتي كل شي في هالبيت حقج..التلفزيون والكمبيوتر؟ ريم: هنوفو يلا بسرعه إظهري ماشي وقت..مانع بيي وأمي بتهزبني(تهاوشني) هنوف: إنزين..عطيني موبايلج بلعب في الألعاب. ريم: يودي فكينا يلا اطلعي هنوف مستانسه....نزلت هنوف الصاله وشافت مانع ونوف توهم داشين مانع: هنوف حبيبتي اشحالج؟ ..باسها وسلمت على نوف نوف:هنوف ماشالله إشترولج موبايل؟ هنوف: لااا هذا موبايل ريموو نوف: أيواا نوف وهنوف ومانع يلسوا في الصاله..فتح مانع التلفزيون ويالس يطالع ويبدل في القنوات..نوف تسولف ويا هنوف: شخبار الدراسه ؟انتي شاطره ولا كسلانه وماتذاكرين؟ هنوف: لا أنا شااطره ودرجاتي كلها كامله نوف: إنزين حبيبتي وين ريم إتأخرت سيري إزقريها(ناديها) هنوف: انزين...سارت هنوف فوق وخلت الموبايل في الصاله على الطاوله نوف شلت الموبايل وكان عايبنها الكفر(الغلاف) عنابي على أحمر نوف: مااانع شوف لون الكفر وايد حلو أبا شاراته(مثله) مانع اطالع نظره ولف صوب التلفزيون نوف دشت الرسائل ويلست تطالع المسجات..حصلت مسجات وايد من نفس الرقم خلال بس ساعه..ومن الفضول شافت الرقم..ودقت عليه..بس محد رد عليها ريم نازله من الدري..هدت نوف الموبايل وحطته عالطاوله ريم هلا بحرمة أخويه نوف: هلا والله ريم شحالج شخبار الدراسه؟ ريم: والله تعب دوامي الصبح وأنا دوم أسير مسطله ههه نوف: الله يعينكم..ليش ماتسوين شاراتي..خلصت الثانويه وعرست. ريم: ههه لا لا أنا أبا الشهاده..وتوه الناس عالزواج ومسؤوليه وريل مانع: ريمو وينها أمج سيري اطالعي شو سالفتهم يوعانين نحن يلا سيري. ريم: انشالله..ظهرت ريم بعد شويه وصل مسج على موبايل ريم وطبعا نوف شلت الموبايل وشافت المسج وكان: حياتي أنا في المحاظره..مس يو. كان الرقم باسم شوق..حذفت نوف المسج وسارت سجل المكالمات وحذفت الاتصال..وردت الموبايل مريم دشت الصاله وسلمت عليهم وساروا كلهم يتغدون عقب الغدا ريم استأذنت منهم وسارت حجرتها تبا ترقد وطبعا خلت الموبايل في الصاله ومانتبهت عليه في العين فهد في المحاظره: شو هالدكتور ما يظهرنا لازم يخلص الوقت أففف..أبا اتصل في ريم ماعرف بلاها نتصله ..هيييه أخيرا بينجلع..مابغاا طلع فهد من الكلاس واتصل على رقم ريم تليفون ريم يدق..نوف تطالع الاسم..شوق يتصل بك سألت نوف مريم: عادي أرد مريم: هيه يعني منو بيتصل بها غير إربيعاتهاا؟ نوف ردت :ألووو فهد بدون مايركز إذا صوت ريم ولا لأنه ولامره رمسها:ألوو ريم نوف سكتت ..وصكرت فويه فهد..وغلقت الموبايل مريم: منوو نوف: مادري محد يرمس فهد: بسم الله منو رد عليا..أويه ليكون حد من أهلها..شو سويت أنا..صدق إني غبي كان المفروض ماتصل بها والله إني غبي ريم في حجرتها ريم تفكر شو إتسوي في عنود اللي تبغي ترمس اللي تحبه فكرت وقررت تفتح إيميل باسم ولد على أساس إن هو اللي يحبها اتصلت في عنود وخبرتها إتي أون لاين لأنه موجود..وقالت إنها بتظهر بتسير ترقد وبتخليهم. عنود دشت ورمست ريم على أساس إن هي الولد اللي يحب ريم وان اسمه أحمد وبينت لعنود إن هو انسان أوكى ويحب ريم ويبا يتزوجها ..وعنود عيبها أحمد واستانست عنود اتصلت في ريم: رييمو والله صدق كلامج مشالله هو وايد فنان من وين محصلتنه ههههه ريم: هيه ترا طلعت عليج ما أنقي الا الاسبشل ريم رقدت ..ونشت(قامت)المغرب الساعه 7 أول مانشت(قامت) دورت موبايلها تحت الموخده ماشي..عالأرض ماشي ..نست إنها عطته لهنوف وماتدري إن هو كان في الصاله اتذكرت إنها عطته حق هنوف..وصلت المغرب وسارت حق هنوف:هنوف وين موبايلي؟ هنوف: مادري ريم: شو ماتدرين كان عندج شو فقدتي الذاكره وين حطيتيه؟ هنوف: هييه كان عندي في الصاله لما يامانع ونوف ريم: شوو في الصاله من الظهر..سارت تحت اتدوره ماحصلته شافت أمها نازله: أمي شفتي موبايلي؟ مريم: موبايلج؟..هيه صح عندي في الحجره كان إهنا من الظهر قلت بحطه في حجرتيه..شي وحده اتصلت بج بس مارمست..نوف ردت عليها. ريم: انزين بسبر أخذه سارت بسرعه وشلت موبايلها وفتحته وماحصلت مسجات.سارت سجل المكالمات تبغي تشوف منو اتصل بها شافت اسم شوق انصدمت وقلبها دق بسرعه من الخوف..:حسبي الله على بليسه حق شو متصل بي لا ونوف راده عليه....أخاف رمس..لحوول شو اسوي إلحينه..أميه ماقالت لي شي..يعني ماصار شي ..خلاص بسوي طاف.. استوا (صار)الليل وفي نفس الوقت اللي ريم طرشت لفهد أول مسج فهد يالس يطالع موبايله ويتريا ريم إطرش شي متوله عليها ريم كانت متردده إطرش ولا لا آخر شي طرشت: إنته بحياتي كل شي وأنا بحياتك من أكون؟ فهد رد عليها: إنته الحب وكل شجوني ..ياحبيبي ريم: وحشتني سواليفك وحشة شوفتك أكثر واهنا هو مارام (ما قدر) ايود عمره واتصل بها رنه..وهيه ردت برنه..وهو اتصل رنتين..وهيه بعد واتصل بها وما صكر ..ريم اترددت إترد ولا لا آخر شي ردت..تمت سااكته فهد: السلام عليكم ريم: وعليكم السلام فهد: اشحالج؟ ريم: الحمدلله اشحالك؟ فهد: بخير وسهاله ريم: شوهالازعاج ماتخلي حد يرقد؟ هههههه فهد: ههههااي ريم: خلاص أنا بخليك الحينه فهد فهد: ليش ريم؟ بلاج؟ إتصالي ظايج؟ ريم: لا ..بس ماعرف شو أقول فهد: لا تقولين شي حتى لو إتمين ساكته مب مشكله ريم: ههه والله فهد: هيه ريم:...... فهد: الو ريم:..... فهد: الوووو..ريم وينج؟ ريم: هااا..تراك انته قلت عادي أتم ساكته فهد: ههههههه لالا تخسرين رصيدي علفاظي تموا يسولفوون ..وكل واحد قال شعووره..وعرف كل واحد منهم إن الثاني يحبه ومايروم يتخلا عن الثاني خبرها ان شي وحده ردت عليه وطمنته إن ماصار شي خبرته ريم ان يوم ميلادها يصادف 25\7 وتبغي هديه بس على سوالف مب غنها صدق تبغي شي منه ((الثلاثا)) في التقنيه..عنود: هلا هلا بريمو العاشقه ريم: هههه منو العاشقه ألحينه فينا عنود: هيييه ريمو إستاذ ويلي سأل عنج لأنج أمس رديتي البيت وماحظرتي الكلاس ريم: هيه صح..بسير له الحينه..أقول يودي شنطتي خليها عندج لين مارد.. وسارت عنود: خل أشوف عندها عطر شي..أووه يايبه موبايلها خل أطرشلي مسجات عنود إتشوف المسجات..جان إتحصل مسجات حب وشافت رقم أخوها انصدمت وحست بظيج.وقلبها عورها شافت ريم راده وردت الموبايل في الشنطه ريم كانت مستانسه في هاليوم ومرحه واتسولف..عكس عنود اللي ظلت طول الوقت مظايجه وساكته كانت تفكر وتقول كيف ريم اتحب أحمد وأحصل إن اخويه بعد وياها ويمكن يحبها وهيه توهمه إنها تحبه بعد. العين فهد سار الظهر العين مول إيدور هديه حق ريم..على قد حاله شاف وهو مار بمحل العاب ..لعبه على شكل بنت..وحس من عيون اللعبه إنه يطالع ريم..لأن اللعبه عيونها عسليه وويها طفولي شارات ريم..وعلى طول اشتراها ..وسار محل الذهب واشترا لها سلسله تلبسها في ايدها..وغلفها وقرر يخبر عنود تعطيها فيوم ميلادها. بيت عنود العصر الساعه 5 عنود متصله فريم عنود: ريم ممكن اتخبرين أحمد يدش المسنجر أبا أسأله شي مهم ريم: أوكى دشت ريم باسم أحمد دلوعة راك: السلام عليكم أحمد: وعليكم السلام دلوعة راك: أحمد بغيت أسألك إنته قلت حق ريم إنك تحبها؟ أحمد: هيه دلوعة راك: وهيه تحبك أحمد: هيه تحبني وايد دلوعة راك: انته تفكر تزوجها؟ وهيه شو رايها اذا طلبت منها الزواج؟ أحمد: أنا فاتحتها في الموضوع وهيه ماعندها مانع إني أتزوجها. فهد يطالع السكرين وفاتح عينه منصدم ويحس ألم في صدره وجسمه بدا يرجف ....عينه دمعت..نزل راسه الأرض..وبسرعه ظهر من حجرة عنود. لما صار الليل وفي نفس الوقت إلي صار وقت لقاهم..ريم طرشت مسج حق فهد:راقد؟ كنت أعد الساعات متى بترد راك(راس الخيمة)..ها بتوصلنا باجر؟ فهد مارد عليها ريم: أكيد نقع الخيانه بتصل به بحشره اتصلت ريم محد يرد..مرتين ثلاث فهد: ألو ريم: شو هاا انته راقد وأنا أترياك فهد: هلا ريم ريم: شو كنت اتسوي؟ شكلك مب راقد فهد: لا مب راقد ريم : عيل ليش ماترد علي؟ فهد: ريم تدرين..أنا أشوف إنج تاخذين ولد خالج وايد أحسن لج من غيره..وهذا آخر كلام ريم: انته شواتقول أيييه..منو ظاربنك على راسك؟ فهد: أنا أرمس جد ياريم وهذا آخر قرار والله يوفقج في حياتج وديري بالج من نفسج وانسي كلشي صار من بينا..مع السلامه ريم: الو ..الووو Quote Link to comment Share on other sites More sharing options...
بحرينيه^مزيونة Posted يوليو 10, 2005 Report Share Posted يوليو 10, 2005 مشكووره اختي ووننتظر بقية القصه Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.