بوعلي00

فهد مندي

برنامج خواطر لأحمد الشقيري.

يا هلا فيج أختي.. ممكن تقولين لنا ومن وجهة نظرج الأسباب اللي تخليج ما تأيدين هالنوع من الزواج؟؟ يعني تذكرين لنا أخطاء هذي الطريقة من وجهة نظرج.

هلا فيج أختي منامية.. وإختيار موفق للموضوع. مادري شصااااير على الزوااااج.. في البييت الوالدة مو مقصرة فيني.. وفي المنتدى بعد عن الزواااج !! لا أتغشمر.. موضوع حلو ومهم الصراحة. فكيف تحدد فترة زمنية قليلة نسبيا بالفترة التي سيعيشانها معا توافقهما معا ؟؟ أنا بصراحة عندي قناعة وأمشي عليها.. سبق وان قلت ان تييني حالات (إعجاب) ببعض البنات.. سواء من ناحية الشكل أو الأخلاق أو التعامل.. وهالإعجاب يكون بيني وبين نفسي يعني مايطلع برع. بس (الحمدلله) عمري ماكلمت بنية وقلت لها أنا أحبج وابيج وخل نتعرف!! ومن المؤيدين و (بشدة) للزواج التقليدي.. انزين هل معنى هالكلام اني باتزوج البنية عمياني؟؟!!! طبعاً لا.. إذا الله كتب لي وحصلت بنت ونويت أتزوجها.. أول الشي باخلي امي تكلمهم.. إذا وافقوا باروح لهم البيت ومن حقي (الشرعي) ان ايلس معاها وأسألها وأقول لها كل اللي في خاطري. ماهي العوامل التي تحدد قبول الطرفان لبعضهما ؟؟ الشكل - الأخلاق - أسلوب الكلام - الشخصية بشكل عام - أهل الفتاة - البيئة اللي رابية فيها (يمكن هذلين أهم الأشياء من وجهة نظري). ماهي الاسئلة التي يتم طرحها في المقابلة ؟؟ ليش تبين تتزوجين؟ شنو الأشياء اللي تنتظرينها مني كزوج في المستقبل؟ عندج امور مهمة حابة تقولينها قبل الزواج؟ (شروط أو شي من هالقبيل). كونك شاب مقبل على الزواج ماهي الامور التي تجعلك ترفض هذه الفتاه ؟؟ أخلاقها .. البيئة اللي رابية فيها .. دينها.. لاقدر الله سمعت عنها كلام مو عدل.. وتقدر تعرف نوعية الفتاة وأهلها من طلباتهم .. يعني.. قالوا لك احنا نشتري ريال أو اللي ايي منك حياه الله.. أو عادي مثل المعروف .. فاعرف انهم يعرفون الأصول.. وقس على ذلك. مشكورة منامية.

يا هلا فيج أختي كلي دلع وباين ماشالله عليج مثقفة وواعية وذات (منطق) في الكلام. أختي أنا ما أقصد الجوانب المادية.. يعني ان البحرينية مصاريفها وايد.. لااا.. أنا أقصد أختي .. خل نشوف أي بنية (بشكل عام) شلون تمارس حياتها؟؟ شتسوي؟؟ البنات بصراحة في منهم واااايد اغشمة .. بدليل قضايا الطلاق اللي نشوفها وتزيد بشكل رهييب!! (وطبعاً هذي مايعني ان الريال ماله يد في الطلاق بس احنا نتكلم عن المرأة الحين).. يعني شاقوول لج.. امممممممم.. اهتمام المرة الأولي واللي كنا نشوفه قبل بحياتها وفي بيتها وبريلها وبمستقبل عايلتها ككتلة وحدة راااح أو قل واااااااايد!! ونتيجة لهالشي.. ونتيجة للمستوى الإقتصادي في البلدان العربية اللي يتم الزواج منها.. صار الريال يشوف البنت هناك شلون متمسكه في زوجها وحياتها بيدها وبريلها.. وأقصد في سذاجة البنت أو غشامتها.. إنها ماعطه الزواج ذيج الأهمية وان أنا لازم أضحي ولازم أربي عيالي ولازم أهتم في زوجي ولازم عيالي يكونون أحسن عيال ووووووو.. بدليل شوفي اختي المنطق اللي يتكلمون منه بنات هالأيام.. (وييييييي ليكون أنا خدااااامه)!! (أنا والله ماعلي منه ولاشي)!! (ما تبيني طلقني)!! وعلى فكره.. لو بنتكلم عن صبيان هالأيام .. اخذوا كلامي ذي كله وضربوه في 100!! أنا ما أمدحهم.. بس الموضوع يسلط الضوء أكثر على سلبيات البنت. وبالرغم من كل الملاحظات اللي قلتها.. وبالرغم من الملاحظات اللي أعرفها واللي ما أعرفها عن البنية البحرينية.. ما راح أتزوج إلا البحرينية.. ولا راح أختار أم لعيالي إلا البحرينية.. ولا راح ألقى راحتي إلا عند البحرينية!! (مو تناقض.. بس مو كامل الا الله). ومشكوورة أختي.

هلا أخوي المجرم.. صرحة موضوع قوي ووايد مهم. انا قابل كلام البعض ان مجتمعاتنا العربية والاسلامية (بشكل عام) تعاني من (كبت) في مشاعرها نتيحة الدين والعادات والتقاليد. بس خل نلقي نظره على المجتمعات المتحررة أو المنفتحة.. شنشوف؟! المجتمعات الغربية كل شي عندهم عادي،، والاختلاط عادي،، والسكر عادي،، وحتى الزنا بعد عادي!! سواءً عندك صديقةتقدر تمارس معاها هالشي وعاديمافيها شي،، أو ان تروح لبائعات الهوى المصرح فيهم. كل هالأشياااااء عندهم.. بس قضايا الإغتصاب زايدة عندهم،، زنا المحارم زايد عندهم،، علاقات الشواذ زايدة عندهم!!! طيب المفروض همه أقل منا بوااااااايد!!! اللي يبي يزني يقدر يتعرف على وحدة في فريجهم أو في الجامعة أو المدرسة أو في الشغل أو في أي مكااان،، أو يروح الأماكن المخصصة حق هالشي وينقي اللي يبيه!!!! في أحلى من هالكلام؟؟؟؟!!!!! ليش عيل يروح حق وحدة (غصباً) عنها ويغتصبها؟؟ ليش يسوي له علاقات شذوذ؟؟ ليش يمارس الزنا مع أهله؟؟ ليش تمادوا في الزنا وصاروا يمارسونه حتى مع الحيوانات؟؟ ليش حتى الأطفال القاصرين ما اسلموا من هالفعلة؟؟؟!!! (المفروض) كل هالقضايا تكون منتشرة في مجتمعاتنا (المتخلفة) مو في مجتمعاتهم (المتقدمة). ولكنها حكمة الله.. واحنا الله سبحانه وتعالى اللي دلانا على هالطريج.. وهمه الشيطان اللي دلاهم على طريجهم!! وآسف على الإطالة

يا هلا فيكم. بس حاب أقول نقطة للي يقولون (إحنا ما نحاول نجذب أحد)!! خواتي.. أنتوا تبون تخلون أحد يجوفكم والا ماتبون تخلون الصبيان في الحالتين بيشوفونكم و(بتجذبون) الأنظار لكم. فالتبرير مامنه فايده.. لأن الناس ماتعرف شنو قصدج. صح والا لا؟!

طرطنقيه.. أول شي آسف جداً على تأخيري بسبب Cairo envelops!!! صراحة كلامج كان ألغاز وما فهمنا شي!! بس أكيد أحترم خصوصياتج.. وحلو لما الواحد (يحاول) و (يعارك) في انه يتخلص من مشاكله. زبدة الكلام.. سووي كل شي.. ولا تيأسين.. والله يوفقج يا أختي يالغالية.

مشكورين كلكم على ردكم وتفاعلكم. يعني الإعتراض في هنا البحرين على أسلوب النقاش وليس النقاش نفسه؟! بس حاب أعلق على نقطتين: عاشقة الإخوة27: هو موعاد روحه مهم.. بس بطبيعة الحال اذا العضو يشوف كلام يستثيره شلون ماير ويبرد خاطره؟؟!! (هذي هو يقول هلون مو أنا!!!) ملك الجوارح: مشكور أخوي على كلامك الواقعي،، بس أنا في رايي المشكلة مو في هالأعضاء ال3 أو ال4.. هذيلا الأعضاء عارفين نواياهم وعارفين أسلوبهم في الكلام.. بس المشكلة في الردود (المبطنة) اللي نشوفها من بقية الأعضاء.. واللي يخلط السم بالعسل.. واللي يتقلب على ظهره وبطنه !! أو تلقى ساعات الواحد يسكت بس ياخذ أسلوب التشجيع لطرف على الآخر. شرايكم يا شباب؟؟؟!!!

هل فعلا هناك حظ ردي؟؟؟ صراحة أنا ما أؤمن بهالشي.. بس أعترف اني اشوفه في الدنيا. ماتعريفكم للحظ الردي؟؟؟؟؟؟؟ أشوفه بإختصار هو تكالب الظروف ووقوفها ضد الإنسان. مالفرق بين الفشل والحظ الردي؟؟؟ الفشل نتيجة متوقعة لشي أنا سويته.. والحظ الردي نتيجة غير متوقعة لشي أنا ماسويته. هل تؤمن بأن ماصابك هومن الله لذا نحمده ونشكره عليه؟؟؟ إي الحمدلله وبدون أدنى شك. ومشكوور أخوي على موضوعك الخفيف.

يا هلا فيج أختي قلب الدنيا.. والله يوفقج ان شاء الله في امتحاناتج. وان شاء الله اكون قدمت لج شي ساعدج. ومشكووورة على رااايج في الشعر.

يا هلا فيج طرطنقية بأختصار؟؟ جم نسبه عصبيتكم؟؟ أنا بصراحة مو عصبي.. هادئ الأعصاب.. بس هذي مايمنع العصبية الطبيعية اللي تصيد الواحد لما واحد يغلط عليه أو تصير مشاده،، والا في غالب الأحيان والحمدلله لي القدرة ان أمسك اعصابي. خل نقووول امممممم 20% ؟؟ وشلون تحبون يتعاملون معاكم لين معصبين؟؟؟ كنت أتمنى السؤال شلون أنا باعامل الناس لما اكون معصب!! لأن الناس بيكونون دار ماداري.. وما راح يكونون ثابتين.. مرة باعصب جدام هلي مرة جدام ربعي مرة جدام الناس في مكان عام.. فما أقدر اجبر الشخص اقول له (أنا معصب عاملني جذي!!!) وبطبيعة الحال .. أنا اذا عصبت أحاول قدر الإمكان أطلع أو أروح أي مكان بروحي.. وأحاول أسوي شي أطلع العصبية اللي فيني.. ايلس في مطعم.. أشوف الناس في مجمع.. أفتر في السيارة.. أشرب كوفي. لأن (بالعقل) .. أنا معصب.. الناس اللي وياي شكارهم؟؟!!!!!!!! أنا مزاجي معفوس ما اختلفنا.. أعفس مزاجهم ليييييييش؟؟!! ومن أنا حتى أعفس مزاااااااجهم؟؟!! أبرهه..!! وانتو شلون تتصرفون مع شخص عصبي صراحة أخس شخصية عندي هي الشخصية العصبية.. لأن الواحد يحس نفسه (ياهل) أو لعبة أو خادم شاريه هالريال.. وقت اللي يعصب لازم أسكت واخليه يبهدلني على راحته.. ووقت اللي يرضى يبني أضحك جدامه!!! قدر الإمكان أتجنبه.. وللأسف خسرت أعز ربعي بسبب هالشي. ونقطة اضافية اذا ماعليج أمر.. في بعض الناس عباله اذا عصب يعني أنا قوووووي والا أناااريااااال.. والا شي amazing لما الواحد يسأله شنو صفاتك؟ يقول أنا اذا عصبت أنسى أمي وأبي أسوي كل شي!!!! وغالب الوقت يكون هو موجذي!!!!!! بس رِكز في مخه ان العصبية شي حلوووو ومصدر فخر ،، مع ان الحقيقة تقول ان العصبية مرض لازم الواحد يتعالج منه. مشكوووورة على الموضوع الحلو.

ياهلا فيج أختي. أول شي أنا ضد الزواج من الأجنبيات.. لسبب بسيط وهو اذا أنا ماخذت بنات ديرتي من بياخذهم؟؟ ومن بياخذ خواتي؟! بس اختي شوفي.. انا كنت من المعارضين بشدة لهالزواج.. بس أواخر الأيام ولمايلست مع ناس متزوجين بحرينيات وأجنبيات.. صراحة بديت أتقبل الموضوع أكثر من الأول (لي الحين معارض بس أخف). الأجنبية الأجنبية اللي مو عربية ما أيد الزواج منهم.. بس العربية شوي المسألة فيها نظر.. قبل كل شي .. الريال شنو يبي من الزواج؟؟ وشنو يبي من المرة؟ يبيها حلوة، خلوقة، قايمة في واجب زوجها وبيتها وتخاف الله بسس. أينما توفرت هذه الشروط سواء في البحرينية أو العربية ، فإنها تمثل دافع وعرض جداً مغري للزواج. عن نفسي أنا (بوعلي00) لو ابي اتزوج من وحدة مو بحرينية.. أول سبب بيدفعني لهالشي وأقولها وبكل صراحة.. (صغر عقل البنت).. لحد يفهم كلامي غلط.. البحرينية هي أمي وهي أختي وهي عمتي وهي خالتي وهي بإذن الله زوجتي في المستقبل.. بس وجهة نظري ومن حقي أبينها.. إهتمامات البنت الخليجية بشكل عام وااايد ساذجة.. تبي تطلع وتسافر وتتسوق وتبي بيت وخدامة!! أنا ما يالس أتكلم من ناحية مادية.. بس البنية ماشوف فيها ذاك الاهتمام في مثلاً علاقاتها الإجتماعية شلون تتعامل مع الناس ، أو اهتمامات ثانية في ان عندها هواية تسويها (مهما كانت هالهواية) مثل الرسم والخياطة والا الطبخ.. أغلب البنات لا شغله ولا شي .. بيت.. انترنت.. مسنجر.. بلاك بيري.. وشي ثاني.. المرة العربية بشكل عاموالسورية والمغربية بشكل خاص.. عندهم أهمية واحترام لأزواجهم بطريقة غير طبيعية.. مو اللي أشوفه في التلفزيون.. ولا من النوع اللي ذكرتيه اختي انهم من مترددين الأماكن المو عدلة.. في ناس من أهلي ماخذين هالجنسيتين.. وبصراحة الواحد يشوف فيهم الإهتمام في حياتهم الزوجية أكثر من البنت البحرينية. أكرر مرة ثانية.. أنا أعارض الزواج من الأجنبية.. بس بعد هالله هالله في روحكم يا البنيات!!! ومسامحة على الرد اللي مو مرتب

هلا أختي الناعمة.. ماحصل لي شرف معرفتج،، بس باسأل اذا ماعليج أمر.. 1- في مقولة نسمعها من الناس اللي هي.. الصبي الجريء يعني مايستحي.. والبنية الجريئة بعني بعد ماتستحي!! هل صحيح هذا الكلام؟! 2- جرأة البنت تسمح للصبي ان يتجرأ عليها أكثر.. وين تشوفين نفسج في هالكلام؟ مشكورة طال عمرج. بوعلي00

مشكووووور أخوي موقين على الموضوع الحلو والرائع صراحة.. يبتها في الصميم.. وخصوصاً.. في النت / العالم كله في جهازك / والعالم كله في غرفتك / والعالم كله بين يديك / لكنك لاتملك منه شيئا ! في النت ...لاتترك سندريللا فردة حذائها لــ الأمير سهوا / فهي تتركها متعمدة / بكل خبث وكيد وتخطيط! في النت / لم تمت ( سنو وايت ) مسمومة بالتفاحة / ماتت مسمومة بقصيدة ووعد كاذب وشاعر يتبعه الغاوون ! في النت / الكل رومانسي والكل متحضر والكل مثقف / والكل أبيض والكل نقي / حتى بنات الليل وكلاب الشوارع! في النت الكل فارس والكل شجاع / والكل يطالب بالديمقراطية / والكل يلعن ( أبو الحكومات ) متخفيا تحت رداء الاسم المستعار! في النت الكل ولد ( نعمة ) والكل ولد ( عز ) والكل ولد ناس / والكل ولد شيوخ / والكل يعيش في القصور والكل ينام على الحرير.! في النت / الكل لديه شفافية / والكل مصاب بتشابه الأفكار / /والكل يتغني بــ بتوارد الخواطر/ والكل متأثر بكاتبه المفضل حد التلاعب بنصوصه / و سرقتة ! في النت / الكل ضحية العادات والكل ظلمته الظروف والكل تزوج ابنة عمه رغما عنه/ والكل زوجته لاتقدر مواهبه المدفونة! في النت / كل الاحلام وردية / وكل الوعود وردية / وكل الحكايات وردية /وكل الليالي وردية / ووحده الواقع أسود ! في النت / يفشل أصحاب الوجوه الواحدة / والقلوب الواحدة/ في المحافظة على الكثير / وينجح أصحاب الأقنعة المتعددة والقلوب المتعددة في الكثير !

مشكورة فنانتا وأستاذتنا الغالية هدية. وانا حافظ لج حلقات كامله عن ظهر قلب لبعض حلقاتج في فايز التوش.. واللي مسجلين عندي في الفيديو ولا امل من شوفتهم.. الله يعطيج الصحة والعافية.

كل الشكر للي ردوا على الموضوع .. (طرطنقيه، عاشقة الاخوة، المحروم) رايكم ان القسم يكون متاح للقراءة فقط لمعرفة أخبار البحرين،، لأن : 1- القسم لا يحقق اهدافه في (طرح الأخبار) بل ياخذ منحنى آخر وهو النقاش والغير هادف أصلاً. 2- أهمية المواضيع لا تتناسب مع متوسط غالبية أعمار الأعضاء اللي يدخلون القسم واللي يفتقدون الى الثقافة وكفاءة المعلومات اللي يتناقشون فيها. 3- افتقار الأعضاء الى أسلوب الحوار الراقي في الاقناع من حيث نوعية الكلمات المستخدمة وأسلوب الكلام والتعامل. سبق وأن أثيرت هالنقطة من قبل.. وكان رد الأعضاء هو ان مانقدر نشوف خبر مصورينه بصورة خاطئة وما نرد عليه.. والمجموعة الثانية قالوا احنا بعد من حقنا ندافع عن روحنا ومايصير نسكت!! مادري شنو تعليقكم؟!

6ar6an8yh

السلام عليكم ورحمة الله وبركاته.. قبل كل شي.. حاب اقدم تحية حارة وراقية تليق بالمشرفة والبرنسيسة شيفا.. واعذريني لأني انا القاطع وخفت ريلي وايد عن المنتدى الأدبي.. بس بعد أنتي خفت ريلج عن المنتدى بشكل عام وافتقدناج في النقاش بشكل خاص . ندخل في الموضوع.. الله يسلمكم كنت منزل موضوع في قسم النقاش بعنوان (يا راعي الهم.. تبيع همك؟!) عبارة عن مناقشات في هموم الأعضاء.. فحبيت أقدم هدية لكلمن شارك في الموضوع واللي عبارة عن ابيات متواضعة انا كتبتها.. وأبيت الا أن اقدمها لكم أيضاً كهدية قابلة للنقد والتعديل وكل شي. "يا راعي الهم" شسبب همك؟! ... وليش متكدر ودايم تعَيّ؟! وليش كلما انفتح باب يمك ... تسكره ولا تبدل الظلمه بالضَيّ؟! وليش كلما تأملت قلت "هذا حدك" ... مع ان المسألة -والله- مافيها شي؟! وليش كلما انجرح حبيب قلت له "عنّك" ... انت ناقص جرح لو تتمسخر عليَ؟! وليش كلما شفت الحزن "ضميته" و "ضمك" ... تقرب له.. يقرب لك.. والا زوجتك هي!! أكمّل عتاب والا قلتها "القلب ملَّك" ... أفا.. تقولها لي وأنا اللي وأنا اللي؟! تدري لو كلك عيوب والمآسي بقربك ... وأدري خربانة معاك وبتخربها عليّ!! وأدري إن الحياة "كرهك" والموت "حبك" ... والغم بياخذ مني الف شيٍ -زين- وشي!! "يا راعي الهم" - والله- لاشتري همك ... إخذ السعادة وثوب حزنك لايق عليّ! "يا راعي الهم" تبيعني "كلَك"؟! ... لاتحاتي،، الفايدة لك والخسارة ليَّ!! وسلااااااامتكم. وهذا لنك الموضوع للي يبي ياخذ طلة عليه: http://bahrain2day.com/forums/index.php?showtopic=552382 ومشكورين على المتابعة.

الله يرحمه ويصبر أهله إن شاء الله.

من بعد اذنك اخوي المحروم،، ومن بعد اذنج اختي فديت الكويت وأهلها.. عندي استفسارين اذا ماعليج امر: 1- شنو اللي خلاج تحسين ان ماعندج ثقة بنفسج في بعض الأحيان؟ 2- شنو هي الصورة اللي راسمتها في بالج للواثق من نفسه؟ ومسامحة على التدخل.. ومسامحة اخوي المحروم على التدخل بعد..

الله يعافييييييج ويخليج. ماعندج حل جربتيه ونفع وياج وتبين تشاركينا فيه؟!

السلام عليكم ورحمة الله وبركاته.. قسم هنا البحرين.. كثرت فيه الأقاويل.. وكثر فيه الكلام.. ماكنت صراحة ادخل هالقسم الابعد ماسمعت اسمه من قبل بعض الأعضاء في انه تصير فيه (مشادات) واااايد.. البعض يشوف هالمشادات ايجابية..فيطالب ببقاء القسم.. والبعض يشوف ان هالشادات سلبية فيطالب بحذف القسم.. والبعض يطالب بجعل المواضيع مقروءة فقط وغير قابلة للرد من قبل الأعضاء.. أنت شرايك؟؟ تتمنى استمرار القسم.. والا حذفه؟! والا عندك خطة ثانية؟! مع ذكر الأسباب.

أخوي المحروم.. موضوعك صراحة مايقوله الا شخص محتك في العالم الخارجي ومع الناس.. ويا انه تعرض لمثل هذي المشاعر أو يشوف غيره يعانون من هالشي. للأسف كثييير من الشباب هالأيام فاقد الثقة في نفسه وضعيف الشخصية.. وتلقاه مايعرف يقول كلمتين على بعض لما يتقدم حق وظيفة أو لما يسولف في مكان عام ويا ناس يدد أو لما يرح يخطب .. الى غيرها من هالمواقف. والأهم من الكلام.. تلقاه مايعرف يتصرف.. مايعرف شيسوي؟! يعني بعض شبابنا وللأسف مايعرفون يتعاملون مع المشاكل اللي تواجهم بحكمة.. ولا حتى مشاكلهم همه الشخصية أصلاً!! ونتيجة لهالسبب تلقى الصبي يصير زوج ومايعرف شلون يتعامل مع زوجته.. فتكون النهاية الطبيعية هي الطلاق!! وهالشي راجع الى ان الشاب يكون عازل نفسه عن العالم الخارجي .. يا انه يكون عايش في محيطه فقط ويكبر على هالأساس.. يعني بيتهم وربعه في المدرسة وبيت عمه وبس!! أو ان يكون عازل نفسه خير شر عن الناس في بلي ستيشن أو انترنت او اي شي ثاني. والبنت نفس الشي.. رفيجاتها والا بروحها والاويا الانترنت. إضافة الى هالشي.. في تقصير من الأهل ومن الشاب نفسه في ان مايروح ميالس مع ابوه أو السوق اي مكان يشوف شلون الرياييل يتعاملون مع بعض.. والبنت ماتيلس تشوف امها شلون تعامل ضيوفها ولا تعرف شلون تتصرف في المواجب مثلاَ. فتحصل الواحد ينحط في مواقف بااااااااايخة جداً.. انه اييب سالفة في مكان غير مناسب ا.. او دايماً ساكت.. فيعطي انطباع عن نفسه انه انسان ابله وساذج ولايعرف كوعه من بوعه.. مع العلم انه قد يكون غير هالصفات.. بس هو اللي اختار هالواجهه. شالحل؟! الحل من وجهة نظري لاتعزل نفسك.. اختلط بالناس.. شوفهم شلون يتعاملون مع اللي يغلط عليهم متى يعتذرون متى مايقبلون الاعتذار.. واهم شي اعرف انت تقابل من.. يعني مايصير تيلس مع (خمه) وتقول اتعلم!! هذلن بروحهم يبون احد يعلمهم!! شوف الناس اللي في المسيد.. أهل الفريج.. حاول تروح المناسبات الاجتماعية من عرس وخلف وزيارة مريض وصلة رحم.. واااااااايد امور تقدر تسويها. مسامحة اخوي المحروم على الاطلة.. واجدد شكري لموضوعك الحلو.. وشوقتنا لابداعاتك الياية.. يوعلي00

موضوع حلو ومهم.. ونعاني منه اخووي المحرروم واايد. حبيت بس اسجل تواجدي ولي عودة للتعليق المتواضع. والله يعطيك العافيه..