ياعاذلين القلب ليه الملامه
لاشفتو الدمعه على خد رجال
قبل الحكى واللوم قولو علامه
الحكم لايصدر قبل فهم الاشكال
الدمع للرجال ماهو رخامه
الا ليا منه ذرف عند الاهوال
الا احتما اللازم وثور عسامه
هناك يفرق ياعرب منسب الخال
اما ليادمعه ذرف من هيامه
الوقت ذا كفو عن القيل والقال
كل دخيله يحتفظ فى كلامه
ويذهن على ماقيل من شينة الفال
ليته يجى من غيبته بالسلامه
وينزاح عن عين الشقا مابرا الحال
معها بدايات الغرام وختامه
ولغيرها ماحن قلبي ولامال
ولعيونها جاوبت ورق الحمامه
وغنيت معها القاف في كل موال
مامثلها بالوصف ظبي العدامه
عمهوجة بالحسن والزين تختال
وجهه كما بدر الدجا في تمامه
وعوده كما بان مع الريح ميال
شوفه منى عيني وشوفى مرامه
مير الظروف تخون في بعض الاحوال
الحزن عقبه ناصبٍ لى خيامه
وانا بها ضيف على فال وعقال
لو غاب زوله باقي باحترامه
ولجله تصد العين عن كل الازوال
وان كان قلبي ماحفظله غرامه
والله لحذف عمامتى والبس الشال
وانشالله تنال اعجابكم مع حبي وتقديري لكم يوسف بوجيري