abdulkareem

شنو رايك بـ البنت المدخنه ؟ وشنو تعتقد أسباب تدخينها ؟؟ أولا أنا ضد التدخين بشكل عام سواء كان شاب أو فتاة و رأيي الخاص و نظرتي للفتاة المدخنة أنها الصراحة ومعا أحترامي ( مقرفة ) وشكلها يكون يكون غلط.. وهالشى أنشوفة في العديد من ( الكوفي شوب ) لآني كشاب بحريني أحب الفتاة الخجولة و المحترمة, بس لما أشوف فتاة تدخن راح الصراحة أحسها واحد من الشباب . الأسباب طبعاً ( مشابهة تقريبا لإسباب تدخين الشاب ) 1- حب التجريب في سن المراهقة 2- الفراغ 3- وأكيد أهمال مبالغ من قبل الأهل, لأن البنية المفروض تكون تحت عيون أهلها أغلب الوقت, والصبي يمكن عنده الحرية في الخروج والأبتعاد عن الأهل أكثر من البنت. 4- أكيد بالنهاية رفاق السوء وبنات ثانية تأثر عليها أو أهية تأثر عليهم . سؤالي ( ما رأيك بقنوات الدجل والشعوذة الموجودة حالياً و متابعة الشعوب العربية المسلمة لها ؟)

مرحبا لو كان عندي الخيار.. كنت بختار زمن مافية التفريق المذهبي والتفريق العنصري... كنت بختار زمن فية الجيران أهل و قلوبهم على بعض... كنت بختار زمن مافية التلفونات النقالة وهالسوالف لآنة خلت الناس بعيدة عن بعض صارت الناس تكتفي بالتواصل بالتلفونات النقالة معا أنها في الأساس أنوجدت عشان أتقرب بينة...ولكن اللي حاصل العكس كنت بختار زمن تنعدم فيه الجريمة و الأعتداءات بجميع أنواعها.. كنت بختار زمن ( فرجان الألول ) بس بدون سالفة ( أم حمار ) : ))))) و فجاءة صحيت من النوم و وعيت أني موجود في هالزمن ولازم أتأقلم معاه .. شكرا

مرحبا من فينا لما يروح ويبي يطلع رقم .. مايقول إن شاء الله أحصل رقم حلو من فينا لما يروح يطلع رقم سيارة .. مايقول إن شاء الله رقم متناسق من فينا أذا حصل رقم حلو و بسعر معقول جدا ما يروح يشترية لحد أهني أنا أشوف الأمور عادية و ماشية تمام .. وكل شى طبيعي لكن ... أروح أدفع مئات و أوصل الألوف عشان رقم متانسق أو عشان أشتري رقم سيارة يشبة رقم تلفوني وأسويها حركة و أعتقد بكون شخص مميز بهالحركة لا بالعكس بكون شخص فاضي وماعندي سالفة وهالفلوس أسوي فيها شغلة أو أعطيها فقير محتاج ياكل وايد أحسن.. بس مادري لو كانت عندي فلوس وايد شنو كان بصير.. يمكن تتغير الأحوال )))) وشكرا

مرحبا كثيراً ما نسمع بأن الأم و الأب يجب أن يعاملوا أبنائهم كالأصدقاء.. وكثيرا ما نسمع بأنهم يجب أن يتشاركوا الأراء والأسرار.. وهذا يساعد على توطيد العلاقة بينهم و يسهل عملية لجوء الأبناء لأبائهم في حال وقوعهم في مشاكل دون الخوف و أيضا يسهم في تقليل الخجل بالنسبة لطرح الأسئلة المحرجة وخاصة الأبناء في سن المراهقة و الأهم بأنه يخلق جو عائلي حميم .. من الرائع أن تتشارك الأم معا إبنتها في إختيار ملابسها.. ومن الرائع أن يتشارك الأب معا أبنه في إختيار أفلام الديفيدي أو ألعاب البليستيشن.. من الرائع أن نرى أفراد العائلة يتشاركون الأراء و ليس هناك مانع في إختلاف وجهات النظر.. ولكن .. هناك بعض الأباء والأمهات يبالغون ( نعم يبالغون ) في إلغاء الخطوط الحمراء والتي يجب على الأبناء عدم تخطيها في المعاملة.. وسبب ذلك الإعتقاد الخطاء لدى الأباء و الأمهات لمفهوم الصداقة حيث يعتقدون بإن إلغاء هذه الخطوط الحمراء وجعلها بيضاء قد تزيدهم قرباً من أبنائهم.. ولكن ( كل شى يزيد عن حده ينقلب ضده ) و بالتالي تتحول إلى عدم الإحترام وقد تخرج أحيانا عن السيطرة و تتسبب هذه العلاقة التي لا حدود لها في مواقف محرجة للأباء في أوساط العائلة أو في الأماكن العامة وغيرها .. أشجع كل أب و أم في توطيد العلاقة معا أبنائهم.. و إعطائهم إحساس الصداقة ولكن يجب أن تكون هناك حدود.. يجب أن تكون الصرامة موجودة في بعض الأحيان وفي بعض المواقف.. يجب أن يكون هناك أحترام للآراء معا معرفة الأبناء حدود حرياتهم..[/]شكراً لطرح الموضوع .. وأتمنى أن يكون رأيي قدد حقق الفائدة ..

بسم الله الرحمن الرحيم مرحبا.. (سمعت ان فيه مقابلة قبل كل شي , شلون هي بشكل عام؟؟ وتعتمد على شنو؟؟) فعلا تخصص الأعلام فيه مقابلة و طبعا الأغلب يتخوفون من هالنقطة بس حبيت أوضح أنها مقابلة بسيطة فيها الأشياء التالية: 1- إسئلة عامة مثل من هو رئيس الأمم المتحدة , من هو وزير الصحة مثلا , من هو حاكم قطر او المملكة العربية السعوديةمثلا, و أعتقد في مجال يسئلون عن مجلس النواب هالمرة مثلا لانة على أيامنة ما كان فيه مجلس نواب وهالسوالف .. المهم أسئلة عامة و توقعي أى شى و أحب أقولج يمكن أهم من الأجابة طريقة الأجابة واللباقة.. طبعا قلت وايد مثلا بس عشان تتأكد أنها مجرد أمثلة.. 2- راح يعطونج جريدة عربية و جريدة أجنبية تقرين فقرات معينة و لا تحاتين بتكون بسيطة بإذن الله.. 3- راح يقولون لنج عطينة رايج في موضوع معين .. توقعي أى موضوع ( التخصص يعتمد على اي لغة اكثر؟؟(عربي ولا English) مثل ما قالت الأخت اللي قبلي التخصص يعتمد على اللغتين العربية والأنجليزية ولكن الأعتماد على اللغة العربية أكثر من الأنجليزية و مقررات الأنجليزي كالتالي. 1- لغة أنجليزية للأعلام 1 2- لغة أنجليزية للأعلام 2 3- وثلاث مقررات لغة أنجليزية عامة وباقي المقررات باللغة العربية هذا إذا ماراح يكون في تغيير في الخطة المتبعة حالياً.. تقدرين تزورين موقع الجامعة WWW.UOB.BH.COM وتتعرفين على المواد كلهم .. في قسم كلية الآداب (اذا دخلته شنو اقدر اشتغل بعدين؟) اولا: طبعا أختي قبل ما أقولج الأشياء اللي تقدرين تشتغلينها .. أتمنى دخولج لدراسة الأعلام تكون رغبة منج مو مجرد إختيار تخصص لانة ما يكون فيه الرياضيات او إنجليزي أو غيره .. لانة اللي ما يحب التخصص ما يقدر يكمل فيه.. او الأغلب جذي وأنا شخصيا أعرف صبيان وبنات ما كملوا والسبب أنهم دخلو إعتقدا منهم أن التخصص سهل و مايبيلة شى على قولتهم.. ثانيا: في عدد من التخصصات في الأعلام وحسب التخصص راح تشتغلين بإذن الله.. 1-صحافة .. ممكن تشتغلين في صحيفة معينة وممكن تشتغلين في شركة أو وزارة تكتبين لهم مقالات أو أخبار مثلا.. 2-مالتيميديا.. تخصص يختص بالتصميم على الكمبيوتر و صناعة أفلام الثريدي 3-الراديو و التلفزيون .. يختص في الأشياء المتعلقة في الراديو والتلفزيون وتتعلمين فيه شلون تصيرين مذيعة أو مقدمة 4-برامج وشلون تسوين أفلام وثائقية و أفلام درامية و تتعلمين المونتاج والمكساج وغيرها من هالأمور وطبعا هذي تخصصي من جذي طولت فيه : ) 4- وعلاقات عامة.. العلاقات العامة تتعلمين فيه شلون تصيرين موظفة علاقات عامة و تدرسين إستراتيجات الأعلان والعلاقات العامة و هيكل الشركة وين يكون موقع العلاقات العامة ودورها في الشركة وأهمية هالقسم وغيرة.. وطبعا كل طالب في تخصص من هالتخصصات يدرس مادة أو مادتين من التخصصات الثانية .. يعني أنا تخصصي راديو وتلفزيون بس أخد مادتين من الصحافة ومادة من العلاقات عامة ومادة من الملتميديا... وعلى حسب التخصصات تشتغلين .. .(وهل له مستقبل ولا لا؟) إذا كنتي تقصدين هل بتحصلين شغل فأقولج .. التوفيق من عند الله و الأشغال أرزاق واللي الله كاتبة بصير .. بس مثل ما قلت لج سابقا إذا كنتي تحبين التخصص بإذن الله تتميزين و الحلو في الأعلام إنها من التخصصات اللي تبني للطالب شخصية مميزة و إيضا على فكرة في وايد طلاب في الأعلام يشتغلون ويدرسون في نفس الوقت لانة التخصص عملي وتدريبي ويسمح لج بالعمل وطبعا أكيد فيه حفظ ودراسة.. أتمنى الإفادة من ردي تحققت وأتمنى أنشوفج إعلامية متميزة بإذن الله .. والتوفيق من عند الله وشكراً

مرحبا أشكرك أخوي على الموضوع المميز ما أعتقد أنه زيارة الطبيب النفسي فيها أى شى غلط أو عيب مثل ما يطراء على الأنسان خلل عضوي في جسمة ويراجع طبيب عشان يحل هالخلل أيضا يطراء على الأنسان خلل نفسي ويحتاج طبيب نفسي عشان يساعده في حل المشكلة شفتوا شلون الموضوع بسيط جدا وبعد حاب اقول شى الطبيب النفسي ممكن يعلمنة شلون نعامل معا مواقف معينة أحنا ما نحسن التصرف فيها و ومشاكل تصادفنة ماتكون عندنه خبره فيها وأكبر دليل التجواب الكبير معا برنامج الدكتورة ( فوزية دريع ) على تلفزيون الرأى من كل دول الخليج والوطن العربي وأيضا أنشوف الأستشارات في أغلب المجلات اللي فيها ردود من أخصائيين نفسيين على مشاكل الجمهور بس يمكن هالنظرة الغلط للدكتور النفسي بسبب الحالات الموجودة في مستشفيات الطب النفسي واللي تتصف بالجنون بس انا ألاحظ أنه هالنظره بدت تتغير معا الأيام وشكرا

شكرا على الموضوع 1- أحترم الناس لبعد درجة وأقدر اى شخص وماحب أجرح أحد وفي نفس الوقت يا ويلة اللي يحاول يجرحني لاني من النوع اللي اقط كلام ثقيل اخلي الواحد يتحسف أنه دش معاى في مشادة في الكلام وحاول انه يجرحني 2- ما أزعل بسرعة و مو من النوع الزعول وصعب أحد يزعلني لكن المشكلة أذا زعلت عاد تعال راضني سنه لين أرضة 3- أحب اتمتع في حياتي بالطريقة الصح وما أحب أتعدى على حريات أحد أو أحس أني مضايق أحد و أحب أستمتع بكل وقتي وأحب اسوي برامج معا الربع 4- وايد أحب التغيير في كل شى في حياتي وما أحب أتم على نفس الشى سواء كان في الستايل أو طريقة ترتيب الغرفة أو أى شى ثاني 5- مادري ليش كل ما أتعرف على أحد في الجامعة أو برع الجامعة يقولي نفس الكلام بالظبط ( قبل ما أتعرف عليك كان عبالي انك مغرور وشايف في روحك بس طلعت غير وايد ) .

علمتي أشياء وايد وعلمت غيري أشياء وايد بس انا راح أتكلم عن تجربتي الشخصية في الحياة وماراح أتكلم بشكل عام ولا راح أتكلم في المثاليات أولا: تعلمت أنه مرات في ناس نفقدهم وينتقلون لرحمة الله وبعدها نتحسف أن ما قضينة معاهم وقت كافي ونقول من بعدها ياريت ماقصرنة معاهم وصرت أحاول أواصل الكل كثر ما أقدر و أحط في بالي أنه ممكن أفقد شخص عزيز في لحظة ثانيا: تعلمت أنه كل إنسان يقدر ينسى ومافي شى أسمة ما أقدر أعيش و من الغلط أقول أني ما أقدر أكمل حياتي بدون شخص معين لآنة هالكلام بحد ذاتة يصعب النسيان يعني الحياة ماشية ماشية بس كلها مسألة وقت ويتعود الشخص ثالثا: تعلمت أكون صريح و مرات توصل صراحتي للوقاحة لآنه في ناس ما يمشون إلا بجذي أسلوب و أفكر اللف مره قبل ما أرد على شخص معين في موضوع معين هذا مو معناتة أني وقح أو مو طيب بالعكس بس في مواقف تطلب تعطي الناس حقهم كاش ( على قولتي ) رابعا : تعلمت اعتمد على روحي و ما أعتمد على غيري في أمور حياتي حتى لو كانت هالأمور بسيطة لآنة الناس اللي تطق على صدرها وايد و أغلبهم حجي في حجي هذي بعض الأشياء اللي تعلمتها في حياتي وياكثر ما نتعلم من هالحياة

في البداية حبيت اشكرك على طرح هالموضوع المهم وبعدين اولا انا راح اتكلم عن نفسي وتجربتي معا المنتديات واشوف انه المواضيع اللي نطرحها شى جيد تعلمنة شلون نعبر عن الرأى اللي انشوفة صح وفي نفس الوقت نسمع حق غيرنة ونحترم رأيهم. مرات ممكن نثبت على رأينة ومرات ممكن نسمع غيرنة و وهالشى يخلينة نغير رأينة في موضوع معين الشباب والبنات في هالعمر عندهم طاقات تخليهم يعبرون عن رأيهم في جميع المواضيع بما يناسبهم وتخليهم متفتحين يتعلمون من تجارب غيرهم ومن قصص وعبر وممكن كل يوم نتعلم شى وممكن تخلينه نتفادى أغلاط غيرنة اللي يطرحونها في المنتدى وغيرها من الفوائد وعندي تنشغل بالمنتديات احسن من ما تقضى وقتك في شى تحس روحك ما سويت فيه شى ولا استفدت منه او تقضى وقتك في الغلط وشكرا

صاحبة الطموح والقلب الكبيــــــــــــــــــــــــر

مرحبا أخواني و خواتي >>> حبيت أطرح موضوع في بالي وياريت تشاركوني برايكم >>> رايكم يهمني تخيل روحك قاعد في مطعم وقاعد تاكل واللي يمك في الطاولة الثانية قاعد يدخن و مو مفتكر في أحد وانت تتضايق أصلا من الريحة و شلون وانت تاكل ( أقصد الناس اللي تدخن في الأماكن العامة وماتفتكر في غيرها وما تحط حساب ) تخيل روحك رايح السينما ولسوء حظك قعدت يمكن شلة يسولفون طول الفلم معا بعض او كل ساعه يرن تلفون واحد منهم واللي يزيد الطين بلة أنك تقعد يم ناس طول الفلم تعلق تعليقات سخيفة وعبالهم ينكتون وأهمة ثقال دم ( أقصد الناس اللي تزعج الناس وماتفتكر في أحد ) تخيل روحك أدور موقف ( بارك ) في في مكان مثل الجامعة - المجمع - الدوائر الحكومية - وتحصل ناس ماخذه موقفين و موقفة بشكل غلط ومايفتكرون في غيرهم من الناس اللي فعلا راح يكونون في حاجة حق هالأماكن. أعرف انكم تتسألون ليش كل هالمواقف ؟؟ بس اللي أبي أوصلة لكم ( شرايكم في الناس اللي ما تبالي في غيرها من الناس وتصرفاتها أنانية ويفكرون في راحتهم وبس على حساب الغير ) رايكم يهمني ؟؟

من وجهة نظري اللي يستاهلون اللقب كموهبة غناء بغض النظر عن المواهب الثانية وبغض النظر عن الشخصيات من الخليج ..... أيــــــــوب لبنان .... تينا - كارلو العراق .... شذى المغرب العربي .... مروة - أمل والباقي أقولهم كموهبة ((سورررري)) ماتنفعون وما أنكر أنهم ممكن يغنون بس مايقدرون يغنون كل شى وماعندهم صوت قوى وأكبر دليل لما تيهم مسجات ممكن تغنون أغنية معينة يتهربون ويضحكون ويغيرون السالفة... وفي ناس ممكن تكون عندهم موهبة حلوة مثل ( محمد قماح ) وأغنيتة وايد حلوة لكن صوتة مو وايد قوي و ( عزوز ) صوتة حلو لكن مو قوى وهالأثنين ممكن يغنون لكن في ناس أحسن منهم من ناحية طريقة الغناء و قوة الصوت وانا فعلا فعلا أتمنى واحد من الثلاثة ( أيوب - مروة - تينا ) ومثل ماقلت بغض النظر عن الشخصيات لانه في ناس ذكرتهم و أنا ما أحبهم مثل ( شذى - كارلو ) مع أحترامي لهم ولكل محبيهم وأهوه مجرد رأى .

مرحبا المشكلة كلش بسيطة ويمكن اذا فكرتي بطريقة سليمة راح تحصلين الحل بس تحتاج حق جرئة وانا اقول جرئة لانة صار بينكم حاجز بسبب الزعل والفترة الطويلة اللي فاتت وتخسين انج تستحين او تخجلين من طلب السماح ومافي احد غلطان في السالفة وهالشى يصير بشكل يومي في كل بيت وبين كل الأخوان والغلط الأكبر في السالفة انكم خليتوا الوقت يخلي بينكم حاجز وكان المفروض تتعاملون معا بعض عقب يومين او اسبوع على الأقل بشكل طبيعي عشان الزعل مايسوي هالحاجز اللي فعلا صعب ينكسر انا اقول جوفي متى عيد ميلادة وقدمي له هدية وكتبي في البطاقة شى يكون FUNNY مثلا ( مصختها ترى لين متى بتم زعلان ) او اى شى ثاني مو لازم الأعتذار يكون انا اسفة وانا وانا وانا الأعتذار يكون عفوي ومايحسسج انج تنزلين نفسج ثاني حل ممكن اذا مسوية حلويات او اى شى والبنات دايما يسون هالسوالف في البيت بين فترة والثانية عزمية وقوليلة اكل ولاتسوي روحك زعلان.. وبطيح الحطب ثالث شى ممكن اتسوين له ظبوب....... اتغشمر مو من صجي مو تصدقين وتسوينها بس هذا اللي اقدر اقولة واعطي رأي فيه ومسامحة اذا طولت واذا في احد يشوف غلط بكلامي يقدر يقولي وشكرا...

أولا : بالعافية عليكم الكافي ثانيا: أهنيك أو أهنيج على الروح الرياضية اللي عندكم في البيت ويحليلها الوالدة ثالثا: عقبال ما توزع كافي نجاحكم رابعا: أعتقد أنها وزعت كافي لانها مستانسة أنه شروق بترجع وتنور الديرة وخامسا: سلامي للوالدة

أشكر لج المرور أختي ( عاشقة فطومه عبدالرحيم) واقولج العفو