شمس الضحى Posted ابريل 18, 2005 Report Share Posted ابريل 18, 2005 (edited) * مسرحية "وجه لوجه" تأليف : عزيز نسين - إخراج : إبراهيم بحر قدمت في شهر أبريل 2000م بصالة البحرين الثقافية - الدنيا دوارة تأليف وإخراج : إبراهيم بحر، جزيئيات اجتماعية في قالب كوميدي وقدمت بتاريخ 22 / 5 / 1994م. مسرحية (الدانة) ملحوظة: هذه المسرحية أخرجها الفنان البحريني إبراهيم بحر سنة 1985 لصالح مسرح الجزيرة ـ مملكة البحرين. الديكور: خشبة المسرح عبارة عن سفينة. في مقدمة خشبة المسرح يوجد الصاري. بما يوحي أن الجمهور يجلس في جانب من السفينة وأنه جزء من الحدث المشهد الأول: المسرح مقسم إلى نصفين. الجانب الأول به البحارة، والجانب الثاني به النوخذا. مجموعة من الغواصين والسيوب في الجانب الأيمن من خشبة المسرح (يسار الجمهور) يفلقون المحار. الجانب الأيسر من خشبة المسرح (يمين الجمهور) يسوده الظلام. بوعلي، جمعة بوصالح، راشد، خلفان، عيلان يفلقون المحار. أحد البحارة ويدعى بوبشيت يجر الحبل لحمد الله الذي يصعد من البحر وهو حامل الديين (سلة المحار) ويفرغ ما به وسط حلبة الغواصين. راشد: قواك الله يا حمد. عيلان: عسى فيها خيرات, عسى فيها خيرات. بوعلي: الله يسمع منك. راشد: الديين اللي يترسه ولد سالم ما يخلى من الخير. بوصالح: هذا الشبل من ذاك الأسد. بوعلي: وسبعة أنعام. خفنا عليك يا وليدي. بطيت تحت. حمد: (وهو يتنفس بصعوبة) الله طلعني من عوالة. لخمة بيضة مثل التراب لا بده شوكتها ها لكبر. بس الله سلم. بوعلي: إي. بعدك ما شفت شي يا حمد. البحر ماله أمان يا وليدي. خلفان: لو مب هاللخمه جان احنه بخير. راشد: الله يلعنها من لخمه. ما تيوز عن سوالفها. مديم تلقاها لا بده. يعني مب كافيها اللي في البحر حتى تتولانا؟ بوعلي: البحر كله أخطار وماله أمان. أتكلمون جنكم مب عيال غواويص، جنكم ما سمعتوا عن سالفة بوعيسى. خلفان: اللي ضربته اللخمة في البحر؟ راشد: الله يرحمه. بوعلي: الله يرحمه. يقول لك حلم انه نازل يغوص ويوم وصل عند حصاة عودة ضربته لخمه وتم طول الليل سهران ماياه إرقاد. والصبح آمره النوخذه، لكن بوعيسى عيا... رفض عقب ذاك الحلم اللي شافه وطلب من النوخذه يعفيه من الغوص ذاك اليوم، بس النوخذه غصبه، وسبحان الله وحكمته... اللي شافه في الحلم شافه تحت الماي، شاف ذيج اللخمه العودة جان يتبريد (أثناء الحوار يبدأ حمد في انتحاء جانب من المسرح) بوبشيت: لا إله الا الله. بوعلي: ظهروه مثل الخلقه، الله يرحمه. خلفان: المسكين. نفس ما صار مع ولد بومايد، بس هذاك ما شافوا له أثر... الوالد سولف لي وايد عنهم. تحملوا وايد. بوعلي: أي، سوالف البحر وايده. خلفان: واللي نجا من خطر ما ينجا من غيره. (الجميع يلتفتون عفويا إلى الجانب الذي به النوخذه والذي يسوده الظلام) تخفت الإضاءة المركزة على الحلقة وتركز على حمد بحيث يبدو وسط بقعة ضوء. صوت أم حمد: لا تشيل هم يا وليدي. المقدر كاين، وهذا قدرنا. الله يرحمه أبوك عاش كل عمره يخدم بوعيلان لكن الدين تم مثل ما هو. والحين؟ حمد: با دش البحر يمه. أنا لازم أدش البحر. أم حمد: لا يا وليدي. البحر بياخذك مثل ماخذ أبوك. حمد: مالي طريج غيره. أم حمد: نرهن البيت. انبيع حلنا وحلالنا, بس ارحمني ولا تدش البحر. حمد: يمه. أي حل وأي حلال. احنه عندنا شيء؟ والبيت لو رهناه ما راح اييب شي. احلوج وايد تنتظره بشراهة. لكن محد بيدفع، لا يا يمه. لازم أدش، آنه ريال. تبين يعيبون علي؟ على ولد سالم؟ تبينهم يقولون خاف من البحر؟ أم حمد: الله يلعن الدين والبحر والنوخذه. حمد: يمه. بسي. كفاية اللي آنه فيه. يمه. خلاص. بادش البحر. أم حمد: لا يا حمد. لا... حمد: با دش يمه مالي طريج غيره. أم حمد: لا يا وليدي. ارحمني. البحر خذ مني أبوك وبياخذك من بعده (وهي خارجه من الكادر) لا يا حمد لا, حمد... صوت عايشة: لا تشيل هم يا حمد، باجر الدين يخلص ونعيش آنه وأنت في بيتنا ونترسه عيال. صوت حمد: آنه... صوت عايشة: آنه أحبك يا حمد. صدقني إني اليوم أشعر إني أحبك أكثر. بس أبوي. حمد: لا تذكريني، بسي ما سمعته منه. (والد عايشه يدخل كادر الإضاءة المركزة على حمد) والد عايشة: (متهكما) أنت ولد الغيص سلوم ياي تخطب بنتي آنه الطواش اللي ألعب باللولو لعب؟ حمد: بس آنه... والد عايشه: أنت شنهو؟ حمد: آنه با ستر عليها وباخليها تعيش في سعادة و... والد عايشة: (يضحك ساخراً) أنت اتخلي بنتي تعيش في سعادة؟ قبل كل شي روح دور لك لقمة أتسد بها بطون إخوانك. من وين بتعيشها في سعادة؟ من الورث اللي تركه لكم أبوك, والا طاحيت على كنز واحنه ما ندري؟ حمد: بس السعادة مب في الأكل والفلوس والا... والد عايشة: لا، السعادة في اصلوم العنقيش اللي بتخلي بنتي اتدور عليها. صباحية عرسها علشان ما تموت يوع. حمد: عمي... والد عايشة: (بحزم) اعرف نفسك زين وشوف من أتكلم. حمد: بس يا عمي... والد عايشة: ويبس (يخرج من الكادر ويختفي). المجدمي: (وهو داخل الكادر مع حمد) يا وليدي لا تعطلني ترى وراي أشغال كثيرة. بتدش بدل أبوك والا لا؟ حمد..................... المجدمي: النوخذه كلامه واضح، يا اتدش البحر مكان أبوك، يا تسدون الدين اللي على أبوكم كله الحين. حمد: بس... لازم... المجدمي: لا بس ولا لازم. طيعني وأنا عمك والا بتخسرون البيت. النوخذه ما بيسكت عن حقه، بامر عليك العصر عقب الصلاة يكون تعطيني الجواب (يختفي) (حمد يطرق برأسه، يبدو حزيناً). النوخذا: (يدخل الكادر مع حمد) دام انكم مب قادرين اتسددون الدين اللي عليكم شوله متردد. ادخل البحر وأنا عمك والا بعدين ما يفيد الندم. أنت ريال والا تبي يقولون إن سالم ما ترك ذكر؟ آنه اللي علي سويته. حمد: نوخذه. آنه أبي أدش. بس تدري... النوخذه: أمك. أمك مب راضيه مب جذي؟ المره مديم تخاف على ضناها بس انت ريال... والله لولا معزة أبوك عندي جان ما رضيت الا بالدين يندفع لي الحين كامل. حمد: نوخذه... النوخذه: (بلهجة آمرة) باجر من الصبح أبي أشوفك على ظهر المحمل (يختفي) (تدخل عايشه الكادر مع حمد) عايشة: حمد. حمد: عايشه. عايشة: يعني خلاص، شهور ما با شوفك؟ حمد: شاسوي يا عايشه، شده وتزول. عايشة: بس... حمد: عندج حل ثاني؟ مالي غير البحر والصبر. عايشة: لكن... حمد: عايشة إذا ما دشيت من وين أقدر أحصل على مهرج. وأنتي تدرين بالشرط اللي اشرطه أبوج علي. عايشة: أدري. الدانة. حمد: عيل لازم أدش البحر. صوت أحد البحارة: يله يا حمد ترى شايلين. صوت النوخذا: ليّن على الحبل. يله يا جماعة سووا لكم همه. وينه حمد؟ حمد: مع السلامة يا عايشة. عايشة: الله وياك، لا تتأخر علي، بانتظرك، مع السلامة. حمد: مع السلامة (تختفي عايشة). (يقترب خلفان من حمد، تعود الإضاءة إلى الجانب الأيمن من المسرح) خلفان: يالس بروحك. حمد: (متفاجئا)ً ها؟ خلفان: خايف من اللخمة؟ حمد: (ينظر إليه) خلفان: لا تخاف وانا أخوك. حمد: (مستفزاً) لا يا خلفان، مب خايف من اللخمه. خلفان: هونها وتهون وآنا أخوك، همنا واحد، كلنا مديونين للنوخذه وعيالنا مصيرهم مربوط بذيل لخمه، مثل ما يقول بوعلي الله كريم. تعال، تعال بس انساعف الجماعة. حمد: ما عليه، خلني شوي بروحي. خلفان: لا إذا تميت مع اللي على السيف ما بتقدر تغوص تعال، تعال. (يتجهان نحو الحلقة ويباشران معهم فلق المحار). Edited ابريل 18, 2005 by شمس الضحى Quote Link to comment Share on other sites More sharing options...
~ السراب ~ Posted يونيو 4, 2005 Report Share Posted يونيو 4, 2005 مشكور اخوي والله يعطيك العافية Quote Link to comment Share on other sites More sharing options...
شمس الضحى Posted يونيو 4, 2005 Author Report Share Posted يونيو 4, 2005 أي أخوي أنا بنت Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.