][][ ..أنــا و أنـتـه ،، تـ ع ــاهـدنـ ـا نـ ح ـب ،، ولا بـ ع ـد نـ ـقسـ ـ ـى .. ][][

[انين القلوب]

قصتج في قمه الروعه

 

وتسلمين ياحبيبيتى ويعطيج العافيه

 

وننتظر الاحداث

[العسووووولة]

القصة حلوة وايد

واحنا في انتظار التكملة

بما انه اليوم وبكر ى ويكند المفروض تنزلين بارتين

ثانكس قيثار ة.....

[عاشقة مانشستر يونايتد]

يسلموو عالقصه الحلوة وبانتظار البارت اليديد

[القيثارة الحزينة]

مرحباااااااا كلكم فديتككممممم

 

الريم ودانة الدنيا فديتكم هههههه

تابعو وبتجوفون اذا كانت توقعاتكم صح ولا لا ..

ع فكرة ترى القصة فيها اكشن وايد ومتاهات بعدين خخخ يعني للحين ماصار شي

كل هذا هدوووء ماقبل العاصفه هع

 

اهلين خيتو انين القلوب اشكر لج متابعتج

 

عسوولة وعاشقة مانشستر يونايتد

هلا والله فيكم .. حياكم الله بقصتي ..

 

والجزء الياي مادري مته

يمكن الاثنين ..

لان بصراحه قاعده ادرس هالايام .. عندي امتحان يوم الثلاثاء !!

 

ان شاء الله اقدر انزل قبل

 

والسموحة منكم

 

 

[العسووووولة]

بالتوفيق اختي

[BlAcK HeArT]

( شكرا ع البارت )

 

ما عرف اتوقع

 

وننتظر الباقي

[القيثارة الحزينة]

مرحبااا فيكم ..

 

ياربي قهررررررر قهررررررررررررررر عصبت حدي

 

قاعده اكتب في القصة ..

كتبت تقريبا اربع صفحات و بعدين سكرت صفحة الوورد بالغلط بدون ما اسيف اللي كتبته !!!!!!!

 

هئ هئ بصيييييييييح ..

قاعده اعيده اللحين

 

انتظروني يمكن باجر العصر انزله او المغرب

لان انه ادرس من الصبح لي العصر ..

 

والسموحة منكم حبايبي .. اعذروني ..

 

 

[الريــم]

 

وي حرااام

مو مشكله

بننتظر

بس نبي بارتات طويله << قاعده اتشرط

يعطيج العافيه

[انين القلوب]

يعطيج العافيه

 

والله يوفقج

 

 

[القيثارة الحزينة]

مرحبااااا ..

 

باركوو لي كملت دراسة خخخخ مع ان الامتحان ورا باجر >> شسوي شاااطرة خخخخ

 

اممممم وكتبت لكم امس اللي شوي واللحين شوي .. ان شاء الله يكون البارت كااافي وووافي ..

 

واسمحوووولي ع القصووور

اخليكم مع

 

 

الــ ج ــــزء الـ ع ــــاشر

 

( بيت بو عبد الله )

بالعصر بعد ما تغدو .. كانو بيت بوفيصل يلمون اغراضهم عشان يمشون .. وسارة متللللهفة على شوفة خطيبها فهد ..

و اهي مكملة اغراضها من زمان وقاعده مع فيصل اللي كان يرتب شنطته ..

سارة : افففففففف فصوووول . لمتى يعني .. تأخرنا ..

فيصل : انا ودي اعرف انتي ليه كذا متلهفة ع الرجعه ..

سارة : بس كذا .. نبي نرجع البيت ..

فيصل وهو يرتب اغراضه : انا اشك ان فهد في السالفة ..

سارة بصوت واطي : شدراك ..

فيصل : بعد ما يبالها كلام .. ها رجع فهد من الامارات؟

سارة بوناسة : ايييييه اليوم كلمني ..

فيصل : طيب اعصابك .. وش فيك شاقة الحلج ..

سارة تطالعه بنظرة : كيفي ( توقف ) يلا خلص .. ترى امي و ابوي تحت ينتظرونك ..

طلعت سارة وضحك عليها فيصل ..

عقب شوي صارو كلهم بالصالة تحت ملتمين .. وبيت بوفيصل بيمشون .. وقامو يسلمون عليهم ..

ام فيصل : يلا مع السلامة يوخيتي .. ومتباركين مرة ثانية .. عقبال ما تفرحو بشيرين ..

سارة تدز شيرين وتغمز لها .. وعقب تضحك شيرين وتضربها ..

ام عبد الله : ان شاء الله .. والا فيصل اللي متى بنفرح فيه ان شاء الله ؟

فيصل : احم .. خالتي تكفي لا تفتحي الموضوع ما اتحمل اللحين وراي درب من هنا للسعودية .. ترى طول الدرب و اهم يقرقو على راسي ..

بوفيصل : هههههههههههه ايه عبالك حنا ساكتين عن الموضوع .. نوريك بعدين ..

فيصل : الله يهداك بس ياخالتي ..

ضحكو كلهم وسلموا عليهم ومشوا ..

وسارة مسكت شيرين وساسرتها : ما وصيك ها .. و أي شي يصير على طول تدقي علي .. فاهمة ؟

شيرين : ان شااااء الله ..

 

 

 

( بيت بورائد )

طبعا تعرفون الحال في بيت بورائد .. الاجواء كئيبة وحزينه ..

كانت الريم قاعده بصالة البيت ومتملله حدها .. طلعت امها من المطبخ وقعدت بالصالة وهي ساكتة .. دخل ابورائد وهو جاي من الدوام .. قال بصوت هادئ : السلام عليكم ..

الريم و امها : وعليكم السلام ..

توه بيمشي بيروح فوق .. نادته الريم : يبه ..

التفت لها من دون ما يتكلم : يبه تعال شوي ..

راح بورائد وقعد معاهم .. وهو ساكت ينتظرها تتكلم .. و امها منزلة راسها للارض وساكته ..

الريم بقلة صبر : حرام عليكم .. ليش تسوون جذي ..

رفع بورائد راسه و ام رائد نفس الشي .. يطالعون ريم باستفهام بدون ما يتكلمون ..

الريم بتصيح : ليش تسوون جذيه؟ ليش البيت صار كئيب وحزين .. صحيح فقدنا رائد.. لكن هذي سنة الحياة و المفروض يكون إيمانا بربنا قوي ونتقبل أمر ربنا.. صحيح ان هذا ولدكم وصعب عليكم الموقف .. بس حرام .. انقتلت كل روح بهالبيت من عقب رائد .. شوفو .. شوفو الحياة بهالبيت شلون كانت وشلون صارت .. شوفو الكل شلون صار بهالبيت .. رائد غالي وعزيز علينا كلنا.. وله مكانة كبيرة بقلوبنا وصعب علينا نتعود على فراقه .. بس حرام نخسر اللي بهالبيت واحد ورا الثاني .. ترى عبير ووائل عايشين ومو عايشين .. و انتي يا يمه .. مثلهم .. و انت يبه قولي .. متى اخر مرة قعدت معانا كلنا و التمينا مثل قبل من راح رائد للحين ؟ .. احس اللي بالبيت كلهم متشتتين .. كل واحد بمكان .. انتو .. انتي يا يمة و انت يا يبة .. انتو المفروض اللي تحاولون ترجعون جو البيت وتحاولون مع عبير ووائل وتطلعونهم من اللي اهما فيه .. اذا جافوكم بهالحالة فأكيد اهم راح يزيدون .. يبه متى اخر مرة جفتهم؟ .. روحو جوفو حالتهم شلون صايرة .. ووائل اللي طالع لنا بجنون يديد .. ما يبي يروح الجامعه خلاص .. بيخسر مستقبله بسبة هالحالة والجو اللي عايشينه .. راح تفقدونهم واحد ورا الثاني .. ( صاحت ) .. مو كافي علينا اللي فقدناه ..

وقامت من مكانها تركض وراحت لغرفتها ... وهي تبجي ..

اما ام رائد نزلت راسها للارض وسالت دمعتها على خدها .. وبورائد اللي كانت متماسك .. نزلت دموعه .. لكن سرعان ما مسحها .. لانه عرف ان ريم معاها حق بكل اللي قالته .. و انهم مقصرين مع العيال ..

راح يم ام رائد .. ومسح دمعتها بيده وقال لها : لا تبجين ياام رائد .. لا تبجين .. ولدج راح للجنة ان شاء الله .. وكلام ريم عدل .. احنا لازم نشوف اللي بالبيت شلون حالتهم .. لازم نراعي لعيالنا اللي عندنا قبل لا نخسرهم بعد ..

ام رائد تصيح : هذا ولدي يا بورائد .. ولدي العود .. صعب علي اتحمل ..

بورائد :عارف يا ام رائد عارف .. حتى انه مو قادر انساه بس بعد هذي الدنيا تاخذ وتعطي .. يلا شدي الهمه و ابيج تسمعين كلام الريم اللي قالته ..

ام رائد : ان شاء الله ..

ابتسم لها ومسح دموعها وقال : يالله .. انا رايح عند وائل ..

قام بورائد من مكانه .. وراح فوق لعند غرفة وائل .. دق الباب بس ما سمع رد.. دق مرة ثانية ونفس الشي .. خاف بورائد ليكون صاده شي .. فتح الباب .. لقى وائل طايح عالارض .. انقبض قلبه ووقف مكانه وفي داخله نطق بكلمات ما قدر انه ينطق بها لسانه : لا لا مستحيل اكون فقدت وائل بعد ..

وهو واقف مكانه ما تقدم خطوة وحده تجاه ولده.. خايف ..

يات وراه ام رائد .. توها تتكلم : بو رائـ....... ( التفتت لوائل اللي طايح عالارض )

ام رائد تصرخ وهي رايحة تركض له : وااااائل يمه وائل شفيييك ..

نزلت له تحت وحضنته وهو مو حاس فيها .. وهي تصحيه وتضرب على ويهه وتصارخ : وااائل حبيبي وائل .. رد علي يمه يا وائل .. ( تلتفت لبورائد اللي واقف مكانه ) .. وائل شفيه يابورائد .. شفيييييييه وائل ..

بورائد بصوت واطي : مـ مـادري ..

وعلى صوت صراخ ام رائد يات الريم وعبير يركضون .. عبير : يمة .. شفيــ ( ماكملت كلامها وانتبهت لوائل وراحت تركض يم امها ) .. يمه وائل شفيه .. واااائل ..

الريم تبجي : يبه بسرعه وديه المستشفى نشوف شفيه ..

راح بورائد والخوف ذابحه .. نزل تحت للسيارة .. وراحت الريم يابت عباة امها .. وحملوا رائد .. وحطوه بالسيارة ..

الريم : يممممه بيي معاكم ..

بورائد : قعدي ويا عبير و احنا نطمنكم .. يلا ..

طلعوا بالسيارة وردت الريم لداخل وقعدت يم عبير وثنتينهم يبجون بصوت واطي .. خايفيييين .. خايفين تتكرر المأساة ..

 

وطول الطريق ام رائد تصيح وبورائد يحس انه مو قادر يوصل للمستشفى .. او بالاحرى ما يبي .. ما يبي يسمع خبر مو زين عن ولده ..

وصلوا المستشفى ونقلوه لداخل .. ودخل الكتور يشوف شفيه .. وهم ينتظرون بره .. و ام رائد تدعي له وتبجي ..

بعد مدة بسيطة .. طلع الدكتور .. وسأله بورائد : ها دكتور خير .. وشفيه وائل ..

الكتور : لالا الحمد لله .. عدت على خير .. الولد صاحي مافيه شي بس شوية ارهاق وتعب .. ولأنه ماياكل .. فدمه نازل وايد .. و احنا حطيناله دم ومغذي و ان شاء الله اهو بخير ..

ام رائد : نقدر نشووفه اللحين ؟

الدكتور : طبعا .. بس لازم تتحملون فيه وتخلونه ياكل زين .. وحالته النفسية وايد تعبانة يباله يرتاح عندنا يومين ..

بورائد : مشكور دكتور ..

الكتور : العفو ..

دخل بورائد مع ام رائد بلهفة على ولدهم .. كان وائل عالسرير والمغذي بيده ونايم .. راحت ام رائد تركض صوبه .. ومسكت يده تبوسها : ولدي حبيبي .. فديتك يا وائل .. عسى فيني ولا فيك ..

اما بورائد فوقف يطالع وائل ويحمد ربه ان الشي اللي صار كان بسيط .. وعرف ان هذا نتيجة غلطهم .. اهو و ام رائد..

بورائد : جفتي؟ جفتي ان كلام الريم عدل؟

نزلت راسها ام رائد بحزن وهزته .. عقب التفتت على وائل اللي بدى يحرك يده .. ام رائد : يممه وائل ..

وائل فتح عينه بصعوبة لما سمع صوت امه .. انتبه انه في المستشفى .. استغرب .. اهو تذكر ان اخر شي كان اهو في غرفته بيشرب ماي .. وطاح .. وما يدري شصار عقبها ..

وائل بصوت تعباااان : يمه .. شفيني ؟

ام رائد تبجي : حبيبي مافيك شي .. انت بخير لا تحاتي ..

وائل يحس بحرقان في حلجه : ماي ..

ام رائد : تبي ماي حبيبي ؟ .. ان شاء الله .. بورائد ييب له ماي ..

بورائد : ان شاء الله .. الحمد لله ع سلامتك يا وائل ...

طلع بورائد ياب ماي ورجع .. و اخذته ام رائد وشربته لوائل ..

بورائد : خل ادق على ريم وعبير اطمنهم .. اكيد يحاتون ..

ام رائد : أي والله وفديتهم دق عليهم ..

اتصل بورائد في الريم .. وعلى طول ردت عليه بلهفة وخوف : ها يبة بشر ..

بورائد : الحمد لله وائل بخير مافيه شي وكاهو صاحي .. بس شوية تعب ولانه ماياكل فنزل دمه .. لكن اهو بخير اللحين..

الريم: الحمد لله .. انزين يبه تعال اخذنا نجوفه ..

بورائد: لا ما يحتاي .. انه و امج عقب شوي بنرجع البيت.. وبكرة الصبح ان شاء الله نروح كلنا نتطمن عليه ...

الريم بيأس: ان شاء الله يبه .. سلملنا عليه وقوله ما يشوف شر ...

بورائد: يوصل .. يلا فمان الله ..

الريم: مع السلامة ..

 

( في فندق فورسيزنز في العاصمة لندن )

الجو بااااارد .. والثلج قرب وقته .. دخلو الجناح اللي حاجزينه لهم .. و اهم متعمدين يحجزون جناح مو غرفة وحده .. عشان يقعدون مع بعض بالصالة وينامون بغرف منفصلة.. ديكور الجناح كان حلووو وهادئ ورومانسي .. ما يصلح لهم .. المهم دخلو والعنود صج اعجبت بالمكان ..

عبد الله : اوكيه انه باخذ شاور وبننزل نتغدى بمطعم .. تأخرنا عالغدى .. اللحييييييييين عندهم ( يطالع ساعته ويتذكر شي ) .. اللحين اهني الساعه ثلاث .. وبالبحرين الساعه خمس .. ههههههههه .. عدلي ساعتج ..

العنود عدلت ساعتها وخذت اغراضها ودشت الغرفة .. فصخت شيلتها وعبايتها وانسدحت عالسرير .. تفكر : ياربي ماني قادرة انسى رائد .. يارب تساعدني .. احسه في كل لحظة معاي ويحس فيني .. ياااارب ماقدر اكو انسانة خاينة .. عبد الله ما يستاهل الخيانة .. ما يستاهل .. ودي اعطيك قلبي يا عبد الله لانك انسان تستحق وتستاهل لكن ماقدر .. قلبي عند غيرك .. ملكه وخذاه معاه وماراح يرجع مثل ما اهو ما راح يرجع للدنيا ( سالت دمعتها ) ..

مسحت دمعتها وقامت فتحت شنطتها وخذت منها ملابس و اغراضها ودخلت الحمام اخذت كويك شاور وطلعت .. نشفت شعرها بالفوطة الا تسمع دق عالباب .. فتحت الباب ولقت عبد الله لابس وجاهز.. وتفوح منه ريحة عطر حست العنود ان راسها يدور من هالريحة وتحس بالريحة تدوخ .. رائحته جذابة وحلووووة ..

عبد الله بابتسامة خبيثة لانه فهم : ماخلصتي؟

العنود نزلت راسها وابتعدت عنه شوي : لا .. خمس دقايق وبكون جاهزة ..

وراحت لعند المنظرة تمشط شعرها ..

عبد الله يطل براسه من الباب : يصير اقعد معاج على ما تخلصي ؟

العنود مرتبكة : حياك ..

دخل عبد الله وقعد عالسرير وهي واقفة تمشط شعرها عالسريع .. وعبد الله قاعد يراقبها .. شعرها ماشاء الله طويييل واصل لفوق الركبة بجذيه خمس سنتيمترات ..

اهي تمشط شعرها و اهي مرتبكة من نظرات عبد الله ومن ريحة عطره اللي تحسه تسبح فيه قبل ما ايي .. اول مرة تشم هالعطر ..

كملت ولفت شعرها .. وكانت لابسة تيشيرت وجينز و اخذت شيلتها ولبستها .. وعبد الله يطالعها مستغرب : بتطلعي جذي ؟؟؟

العنود عبالها يقصد انها بتلبس هالثياب تحت العباية : أي .. في شي؟

عبد الله : وعبايتج؟ ( يعقد حواجبه ) ترى جينزج ضيق شوي والتيشيرت مو مال طلعه ..

العنود مستغربة : ومن قالك بطلع جذيه ..

مشت للكبت و اخذت جاكيت طويل لتحت ركبتها .. وكان متييين الجاكيت ومال شتا .. يعني يناسب الجو اهنيه .. و اخذت شنطتها وتأكدت ان كل الاغراض اللي تحتاجها موجوده ..

وتوها بتمشي مسكها عبد الله ولفها لعنده وصارت عينها بعينه و اهي ارتبكت ونزلت راسها ..

عبد الله يطالع عيونها : عيونج احلى بالكحل .. يطلع عليج روعه ..

العنود ماكانت حاطة كحل .. فابتسمت له و اخذت الكحل من شنطتها وراحت جدام المنظرة وحطت .. ولفت عليه وهي مبتسمة ..

عبد الله : اللحين كشخة .. حلوووووو وايد .. يلا مشينا؟

العنود : يلا ..

 

(بيت فارس و امه )

كان فارس بغرفته بالليل بعد ما تعشى قاعد يقرا كتاب.. الكتب اللي متعود يقراها قبل ما ينام اهي الكتب اللي بيحضر من خلالها للدكتوراة والمراجع اللي يبحث فيها .. ما يفضى للقراءة الا هالحزة .. طول اليوم مشغول ..

حس روحه تملل شوي وسكر الكتاب وقعد يفكر في شيرين وفي الحياة اللي بيقدم عليها .. يتخيل شلون بعدين بتكون حياته مع زوجة المستقبل والعيال اللي بيصيرون عندهم وشلون بيكون ابو وزوج ..

حس بالفرحة وحس ان هالشي مثل المغامرة اللي بيخوضها ومتشوق لها .. ابتسم وهو يطالع نفسه بالمنظرة .. عقب طلع من الغرفة .. ونزل تحت لغرفة امه .. دق الباب وفتحه ودخل راسه شوي ولقى امه منسدحة على سريرها ..

فارس بصوت واطي : يمه .. نمتي؟

ام فارس عدلت قعدتها وقالت : لا يمه تعال ياوليدي بعدني صاحية ..

ابتسم فارس ودخل وراح قعد عند امه وحب راسه وقال لها وهو منزل راسه : يمه .. انه ..

ام فارس : وش فيك ياولدي ..

فارس يرفع راسه ويقول بابتسامة بريئة : يمه جريب بتفرحين في ولدج ..

ام فارس بفرحة : صج يوليدي؟ و اخير بتفرحني ؟ الله يبشرك بالخير ياولدي ويوفق لك ان شاء الله ويسعدك ..

فارس : تسلمين لي يايمة ..

ام فارس : ها ومتى اروح اخطب لك ؟

فارس : يمه انه في بالي وحده ابيج تخطبينها لي..

ام فارس : قول ياوليدي و من عيوني الثنتين .. من بنته؟

فارس : يمه مادري اذا تعرفينهم ولا لا .. اهي بنت التاجر الكبير يمه ماظن ماتعرفينهم .. اسمه عبد العزيز الراشد ..

ام فارس بابتسامه عريضة : والنعم يا وليدي ..

فارس : تعرفينهم؟

ام فارس : وشلون ماعرفهم ياوليدي .. ابوك ويدك الله يرحمهم كانو شراكة مع ابوعبد العزيز في تجارتهم .. بس بعدين من توفى بوعبد العزيز توفى من بعده يدك الله يرحمه و ابوك استقل بتجارته بروحه وعبد العزيز بروحه .. تقاسمو الحلال وكل واحد راح بطريجه .. بس كنا نعرفهم ونزورهم وايد .. ومن توفوا تفرقت العايلات وماعدنا نشوفهم .. والله انهم ناس طيبين وأجاويد الله يحفظهم .. وبيشرفنا اننا نناسبهم ..

فارس يحب راس امه : فديتج يمه .. يعني توكلنا على الله ؟

ام فارس الدمعه في عينها : على بركة الله .. انت بس شوفلنا يوم نروح لهم ونكلمهم ..

فارس : ان شاء الله يمه بس راح اكلمهم عقب اسبوع .. لان هالاسبوع عندي شغل وايد مابفضى ..

فارس قال هالكلام لان قصده ينتظر رد شيرين .. وعنده احساس كبير ان شيرين مواااافقة .. حس بالحب يلمع بعيونها وحس بنظراتها وحس بكل دقة يدقها قلبها تجاهه لما تشوفه .. حس بارتباكها جدامه وكل شي فيها يأكد له حبها له ..

ام فارس : ماعلي يولدي ننتظر .. بس اهم شي اني راح افرح فيك و اشوف عيالك .. فديتك من متى و انه انتظر هالوقت .. عسى الله يوفقك ان شاء الله ويبارك لك ..

فارس متجمد مكانه ويطالع امه يحس انه بيقدم على شي كبير في حياته .. اول مرة يحس روحه جبان .. وخايف .. يحس ان حياته بتتبدل وااايد عن قبل .. و ان بيصير تغيير كبير في مجرى حياته بهالزواج .. ولازم يكون قد المسؤولية .. مع انه واثق من نفسه انه قادر يتحمل .. الا انه يفكر وايد في الموضوع ..

تنهد بعمق وقام حب راس امه : تصبحين على خير يمه ..

ام فارس : و انت من اهله ياوليدي ..

طلع فارس وراح لغرفته ومخه مليان افكار ومو قاددر يركز بشنو يفكر .. ام ام فارس فالارض مو سايعتها من الفرحة .. و اخييييييرا حلمها انها تزوج ولدها بيتحقق .. !!

 

(بيت بوفيصل )

وصلوا كلهم من العصر وقعدت سارة توصف لآلاء شلون العرس وشلون ان العنود كانت تهبل وحلوة و انهم لايقين على بعض .. و ان العرس كان كشخخخخه وايد ... وآلاء منزعجة من اللي تسمعه فتركت اختها ومشت عنها .. وظلت آلاء للمغرب وهي كلما تتذكر وصف اختها للي صار هناك تعصب .. وتحس روحها تبي تنتقم من عبد الله بأي طريقة .. وتراويه انه ما أثر عليها زواجه .. ولا يهمها .. وقعدت تفكر وتفكر .. و اول ما جا على بالها اهو هادي .. دق قلبها لما تذكرت هادي .. ولمعت ببالها فكرة شيطانية .. اخذت التلفون ودقت على رهف .. بس دقت عليها على تلفون البيت .. لانها متعمدة تبي هادي يرد عليها .. لانها عارفة ان هالحزة رهف مو ببيتهم .. هي خبرتها انها بتطلع ..

يرن التلفون ومحد يرد .. البيت كان خالي اصلا .. محد فيه .. و اخر شي يأست .. توها بتسكر الا حست حد رفع التلفون .. رجعت السماعه وسمعت صوته ... هادي!!!! .. كان توه داخل البيت وسمع التلفون يرن ورد عليه ..

هادي بسرعه : الو ..

آلاء دق قلبها : ....... ألو ..

هادي ماعرف صوتها : نعم ؟ ..

آلاء مو عارفة شلون ياتها هالوقاحه : هادي؟

هادي توه عرف صوت آلاء وطااااار من الفرحة مب عارف شيقول وشيسوي : آ.. آلاء؟

آلاء بصوت واطي : ايه ..

هادي مو مستوعبة : هلا هلا آلاء شلونك؟ ..

آلاء خايفة : بخير ..

هادي استغرب وش فيها للحين ما تكلمت ولا قالت تبي رهف ..

هادي : تبي رهف صحيح؟ سوري رهف مش موجودة .. دقي على جوالها ..

آلاء بوقاحه : عارفه انها مش موجودة عشان كذا دقيت ..

هادي مستغرب : مافهمت ..

آلاء : انا ابيك انت .. مابي رهف ..

هادي اختبص .. مخه افتر .. احد ايي يفهمه وشقاعده تقول هالبنت : مـ ... ماني فاهم..

آلاء توهقت وش تقول له .. اخر شي جى ببالها شي وقال : هادي .. انا ايش اعني لك ؟

هادي بعده مو مستوعب : حياتي كلها ..

آلاء : انا متأكده انك ما تكذب باللي قلته ..

هادي : والله صدقيني ما اكذب .. شوفي آلاء .. انا ما خليت بنت ماكلمتها ولا شي ما سويته .. لكن من شفتك انتي .. خلاص تخليت عن كل البنات وعن كل شي .. و ابيك انتي بس .. والله شاهد على كلامي ..

آلاء : اها يعني تحبني ..

هادي :و امووووووت فيك ..

آلاء : طيب واللي يقولك اني احس ممكن اني ابادلك نفس الشعور ..

هادي بيستخف : ياليييييييت .. وصدقيني عشان ابين لك حسن نيتي مستعد اخطبك .. لاني بجد افكر بالزواج ..ولما شفتك انتي عزمت على هالشي وكنت ناوي اخبر اهلي يخطبوك ..

آلاء خافت : ها؟ لالالالالا ..

هادي مستغرب : ليه؟

آلاء : انا يعني ما بعد تعرفت عليك اكثر وعرفتك اكثر وحبيتك .. هو مجرد اعجاب .. ولازم اتعرف عليك عن قرب اكثر .. وش رايك انت؟

هادي مو عاجبه الوضع : والله صدقيني ننخطب وبعدين تتعرفين علي زي ما تحبين احسن لنا ..

آلاء : والله مو عارفة ايش اقولك .. بس خلني افكر بعدين ارد عليك ..

هادي فرحاااان : بذمتك؟ طيب فكري كويس ها؟ تذكري اني احبك مووووت حرام تكسري بخاطري ..

آلاء فيها الضحكة : طيب بحاول ..

هادي : الله يخليك يا آلاء .. تراني من جد حبيتك .. اول مرة احب مابي اتحطم ..

آلاء : طيب خلاص قلتلك بفكر وبرد عليك ..

هادي : تسلمي لي والله يا بعد عمري .. طيب انا بدقلك رنة على جوالك وسيفي رقمي عندك .. طيب؟

آلاء : ومن وين لك رقمي؟

هادي : هههه خذتو من جوال رهف من غير ما تدري .. والله ما كنت ناوي ادق .. بس كذا ..

آلاء : اها ... طيب في شي بعد ابيه منك ..

هادي : ايش؟

آلاء : مابي رهف تعرف باللي يصير .. ماشي؟

هادي : ليه؟ هي صديقتك و اختي ..

آلاء : هادي تكفى عشاني ماودي رهف تعرف .. اوكيه؟

هادي : ان شاء الله على راحتك .. تآمرين انتي بس

آلاء : مشكور .. طيب بخليك اللحين ..

هادي : تحملي بحالك وفكري زين ها؟

آلاء : ان شاء الله .. مع السلامة ..

هادي : الله يحفظك ..

سكر هادي التلفون ويحس ان الدنيا مو شايلته من الفرحة .. و اخيييييييرا يكلم آلاء وبيخطبها وبتصير زوجته؟؟؟ رجع راسه لورا وغمض وهو مبتسم ويقول بداخله : احبك يا آلاء .. أحبك .. غيرتي فيني اشيا كثير .. وحركتي فيني مشاعر غريبة .. احبك ..

فجأة رفع راسه وفتح عينه وقال : مدام ان آلاء تقول ما بعد حبتي .. اجل ليه داقة علي؟ شي غريب .. انا اصلا ما توقعتها من آلاء تسويها .. مش باين عليها كذا ..

قعد هادي يفكر بالسالفة عقب قال يلا .. اهم شي انفتح لي الطريج وتسهل الشي .. و اهم شي اني احبها .. ابتسم لنفسه وحمل جواله وراح لأسم (الغــلا كله ) وسوالها رنه ..

اما آلاء من بعد ما سكرت التلفون قعدت تبجي بقوة على اللي سوته .. حست بنفسها ترخص حالها وايد .. اهي عمرها ما كلمت حد غريب بالتلفون .. لا وبهالوقاحه بعد .. وثاني شي تبجي على هادي .. تحس نفسها قاعده تلعب بمشاعره لانها عارفه انه يحبها من جد وهو متغير عشانها ... تخيلته اهو نفسها اهي لما كان يلعب عليها عبد الله .. وزادت بالبجي .. وتصرخ : هادي ماله ذنب .. انا حمااااااااااارة ..

اما تحت فكانت سارة تنتظر فهد .. كان واحشها مرررررررررررررة .. سارة تمووووت في خطيبها فهد .. فهد اهو كان ولد عمها وكانو يحبون بعض من كانو صغار .. والكل شاهد على قصة حبهم البريئة هذي .. كانت خالية من أي مكالمات و أي لقاءات مجرد نظراتهم لبعض .. لما يجوفو بعض في مكان ..

ورغم ان طاف على خطوبتهم خمس شهور الا ان سارة مازالت تستحي من فهد ومو ماخذة عليه وايد .. وفهد اللي كان جريء عكسها مرررة .. وكانت تستحي من حركاته الجريئة .. وفهد يمووووت فيها وطاير عقله فيها ..

المهم .. كانت بذيك الحزة سارة متلبسة ومتكشخة وحاطة ميك اب خفيف وناعم .. وتنتظر خطيبها فهد على احر من الجمر .. كانت قاعده بالصالة تحت مع امها .. دخل فيصل الصالة وقعد صوب سارة .. دايما يناحسها ويحرجها ..

فيصل : اوب اوب .. كل هذا حق فهيدان ..

سارة مستحية : اسمه فهد لو سمحت ..

فيصل : بعد ما يرضو عليه .. من قدك يا فهود ..

سارة : ليه ؟ مش زوجي؟

فيصل يمزح : تراك صدعتينا فيه .. زوجي وزوجي .. مالت عليكم اثنينكم ههههههههه

سارة : فييييييييييييييييصل ..

فيصل : خخخخخخ .. ساروه والله العظيم ما تطيحو على بعض .. فهود عينه قوية و انتي زبدة سايحة ههههههههه

سارة مستحية : حرام عليك ..

فيصل : ههههههه يمه .. ما شفتيهم ذاك اليوم هههههه .. كان فهد ههههههههه .........

تقاطعه امه : فصيل ووجع بسك اسكت عن اختك .. ما تستحي انت كلش؟ ابد مافي خجل ..

فيصل : ههههههههههه أي بطني عورني .. يمه .. هههههه

رن تلفون سارة رنة .. يعني وصل فهد .. انتفضت مكانها .. الله يعينها على فهد وحركاته .. اللحين مشتاق لها موووت .. قامت وطلعت من الصالة وفتحت له باب المجلس ودخلته .. وهي حدها ميتة من المستحى .

اول ما دخل فهد وشاف سارة .. تخبل عليها .. على طول حظنها : فديييييتك حبيبتي سارووونة وحشتيني مررررررة..

سارة مستحية بحظنه وتحاول تتخلص منه لكن وين تروح وفهد وراها : انت بعد وحشتني ..

بعدها فهد عنه وباسها : وشلونك وشمسوية ؟

سارة : الحمد لله تمام .. انت وش اخبارك وش مسوي ..

فهد : انا بدونك ما اسوى شي .. بدونك اكيد مو تمام ههههه ..

سارة : هههه .. تفضل ..

قعد فهد وهو لاصق فيها ولامها بذراعه ..

وسااارة مستحيييية مررررة

دخل عليهم فيصل اللي ما يخلي سوالفه ..

فيصل : احم احم ..

فهد مرفع حجاته ويطالع فيصل : اقولك عاد من اللحين .. اكرمنا بسكوتك ..

انفجر فيصل من الضحك وقال : خلاص هالمرة ما بقول شي .. لان الوضع لا تعليق .. هههههه نو كومنت ..

فهد راح يم فيصل ومسكه من رقبته وساسره : يالزفت اسكت لا افضحك اللحين ها .. ترى والله افضحك .. حلفت ..

فيصل اعتدل : ها لالا اسف يالشيخ حقك علي ..

فهد يطالعه بغرور : أي كذا ابيك ..

سكت فيصل غصبا عنه وطلع برة ..

عاد فهد من كثر ماكان مشتاق لسارة ما خلاها بحالها .. زايد عليها الجرعه حبتين هالمرة ههههه مرة يلمها ومرة يبوسها ومرة يتغزل في شكلها .. وهي بتموووت ...

سارة : فهددد بسك عاد خلك راكز شوي .. اعقل ..

فهد مبوز : يعني اللي يدلع زوجته ويحبها هالكثر مش عاقل ..

سارة : يا فهد يا حبيبي .. انت عاد زودتها .. منت قاعد عاقل ابد من دخلت للحين ..

فهد : انتي لو بس تطاوعيني وتوافقين ان نتزوج ..

سارة : على ايش مستعجل ..

فهد زعلان : انتي شكلك ما تحبيني .. كان ما اخرتي الزواج هالكثر ..

سارة منصدمة : حرام عليك يا فهد .. ماصار لنا خمس شهور من انخطبنا ..

فهد : اصلا ليه هالخطوبة من اساس .. انا كنت ناوي اسوي عرس مرة وحده .. بس انتي وطلباتك ..

سارة : طيب ننتظر خمس شهور ثانية بعدين نعرس وش قلت ؟

فهد فاتح عيونه : انتي من جدك تتكلمين؟ بعد انتظر خمس شهور ؟ ليه ؟ مجنون؟

سارة : فهوووودي حبيبي يلا عاد ..

فهد قام وقف : سارة .. انا من جدي اتكلم .. انا مدري ننتظر ايش بعد؟ ماله داعي هالوقت يمر كذا ..

سارة حزينة : ليه يا فهد ؟ خلينا كذا مخطوبين احلا ..

فهد يحس روحه يبي يقتلها : ايش اللي احلا ؟ وش فيك تفكري كذا ؟ انا فاهم ايش قصدك .. لكن انا اقولك اللي يحب .. يحب قبل الزواج وبعده .. وصدقيني ياسارة راح تكون حياتنا زي كذا و احسن .. اوعدك .. اصلا انا متى ممكن اني اتخلى عنك وعن حبك ياسارة .. تكفي عشاني ..

سارة متوهقة : فهدددد .. والله عارفة هالكلام وعارفة انك غير .. بس ..............

يقاطعها فهد : لا بس ولا شي .. خلاص خلاص .. خلك جالسة هنا ببيت اهلك وماراح نتزوج الا بعد عشر سنوات عشان تفرحي انتي .. و الا اقولك بلاه الزواج .. كذا انسب لك وبترتاحي ..

طلع فهد من المجلس وهو معصب ونزل وحمد ربه ان محد جافه وهو طالع وعلى طول راح سيارته وشخطها ومشى .. اما سارة فكانت منصدمة من حركة فهد .. اول مرة يعصب معاها .. راحت تركض تدوره بس مالقته .. ومالقت سيارته بره .. حست حالها بتصيح وراحت على طول غرفتها تبجي .. اول مرة يتزاعلون ..

سارة تبجي : كله مني انا غبيه ..

اخذت موبايلها ودقت عليه لكنه ما يرد .. وثاني مرة سكره .. قامت تبجي ودخلت عليها امها وتخرعت لما لقت سارة تبجي ..

ام فيصل : سارة يمه وش فيك ؟ ليه تبكي؟ وين فهد؟

سارة تصيح وتحظن امها : يممممه ..

ام فيصل : تكفي سكتي وقولي لي وش صاير .. فهد صاير له شي ؟

سارة مسحت دموعها وهدأت شوي وقالت : فهد زعل علي وطلع ..

ام فيصل : زعلان؟ ليه؟ وش صاير؟

سارة : فهد زعلان ليه اني مش موافقة اننا نتزوج اللحين ..

ام فيصل : فهميني السالفة كويس..

سارة : فهد دومه يحن علي يبينا نتزوج قريب و انا اقوله لا بعدنا .. لكن اليوم زعل وعصب وطلع عني .. و اتصل فيه سكر جواله ..

ام فيصل : طيب يمه وليه ما تبين تتزوجون اللحين ؟

سارة : يمممه لا تصيري معاه .. وتوقفي ضدي ..

ام فيصل : انا ما قلت كذا .. بس ودي افهم ليه انتي معارضة ..

سارة مستحية : يممممه .. ودي استانس معاه و انا مخطوبة .. بعدين زواج وعيال ومسؤولية واحس ان فهد بيبتعد عني وما بيصير يحبني مثل اللحين .. وحياتنا بتتغير .. انتي عارفة الخطوبة غير الزواج ..

ام فيصل تضحك : اللحين هذا اللي تفكري فيه ..

سارة متفشلة : يمممممه .. جد اتكلم ..

ام فيصل : شوفي حبيبتي .. اذا حافظتي على زوجك وبيتك وعرفتي كيف تخليه جنبك على طول ويحبك زي اللحين ماراح يستوي اللي ببالك .. وبعدين من قالك في الزواج يقل الحب .. بالعكس .. راح يزيد بس تعرفي بتلتهين في البيت بالعيال والمسؤولية .. لكن لاتخلي هالشي يأثر على علاقتك معاه ويبعدكم .. هذي مسألة انتي وشطارتك .. وبعدين فهد ما اظني بيصير كذا ..

سارة : تعتقدين؟

ام فيصل : الا متأكدة ..

سارة هزت راسها يعني كأنها اهي بعد موافقة ..

ام فيصل : ها حبيبتي وش قلتي اللحين ..

سارة : يمه بيني وبينك انا بعد زيه .. ودي نتزوج .. بس على اللي قلتلك عنه ..

ام فيصل : هههههههههههه خلاص حبيبتي كلميه وقولي له انك موافقة .. طيب؟

سارة : يمة مسكر جواله وزعلان ..

ام فيصل : انتظريه يهدا وبكرا كلميه .. يمكن نام اللحين ..

سارة : ياربي تصبرني لبكرا ..

ام فيصل : ههههههههه طيب خلك عاقلة وسوي اللي قلتلك عليه .. مش ترجعي تتناقشي معاه بالموضوع .. بس قوليله انك موافقة و انك فكرتي كويس ..

سارة تبوس امها : ان شااااء الله .. مشكورة يمه ..

ام فيصل : يلا حبيبتي تصبحي على خير

سارة : و انتي من اهله ..

طلعت ام فيصل وسارة ارتمت على سريرها فرحانه .. و اخيرا بتتزوج .. وراح تعرف شلون تخلي حبهم مثل اول و احسن ..

 

++++++++++++++++++++++++++++++++

 

انتظر ردودكم الحلوة وآراءكم ..

 

والسموووحة ع التقصر ..

 

عاد البارت الياي مادري مته .. يمكن اسبوع الياي

Edited مايو 13, 2007 by القيثارة الحزينة