wafooy Posted نوفمبر 29, 2007 Report Share Posted نوفمبر 29, 2007 Link to comment Share on other sites More sharing options...
marioma Posted نوفمبر 29, 2007 Report Share Posted نوفمبر 29, 2007 Link to comment Share on other sites More sharing options...
ريم المها Posted ديسمبر 1, 2007 Report Share Posted ديسمبر 1, 2007 Link to comment Share on other sites More sharing options...
marioma Posted ديسمبر 1, 2007 Report Share Posted ديسمبر 1, 2007 !!.. والـح ــل ليمتىىى ..!! Link to comment Share on other sites More sharing options...
جود القمر Posted ديسمبر 1, 2007 Report Share Posted ديسمبر 1, 2007 نبي بااارات Link to comment Share on other sites More sharing options...
حلا الكويت Posted ديسمبر 1, 2007 Author Report Share Posted ديسمبر 1, 2007 سامحووووووووووووووني يالغلا ادري اني تأخرت عليكم وايد ...بس كان عندي ظروف آسفه على التأخير انا هالفتره عندي امتحانات صعب علي اكتب يوميا فاعذروني على التأخير.. حبيت انزل لكم هالبارت وان شاء الله يعجبكم ..ولا تحرموني من ردودكم وتوقعاتكم انتظرها بكل شوق الجزء 21 بيت جاسم على الريوق جاسم:وين طلال؟ امامه :طلع جاسم رافع حاجب:في واحد يطلع من اول صبحيه له مع عروسته امامه تتقرطم بصوت واطي :عروسه بالغصب جاسم:شقلتي؟ امامه ملت من اسلوبه وقفت:ما قلت شي..الحمدالله الا بنزلة شذى ..لابسه ومتعطره ومتمكيجه كأنها صج عروس مستانسه ....صج صدمها طلال يوم قالها (ان عمره ما راح يكون لها ومن اول ليله لهم تركها ..بس ما فقدت الامل وحلفت انها ما تتخلى عنه مهما صار...لانها تدري شكثر يحبها وكلها جم يوم وتنسيه الي صار) امامه اول مره تشوفها امس ما حضرت العرس ما تنكر جمالها و جاذبيتها الواضحه بس تكرهها كفايه خذت مكان حلا (( امووووت واعرف ليش جبرت طلال عليها يا يبه ليش؟!!!)) شذى بابتسامه لامامه:صباح الخير امامه تعطيها نظرة احتقار:اففف صعدت امامه لغرفتها ...وشذى ما تدري ليش تعاملها جذي مع انها متأكده ان عمها ما قال لاحد عن موضوعها غير نوال..وغير الكلام الي زادته من عندها عشان تضمن مصلحتها ويا جاسم ضد طلال وتكسر خاطره جاسم يرقع موقف بنته:حياج يا بنتي تفضلي شذى تبوس راسه وتقعد يمه:صباح الخير عمي جاسم يبتسم لها:صباح النور اجلسي شذى تسلم على نوال:كيف حالج خالتي نوال بنفسيه:الحمدالله جاسم عطاها نظره لان كلمها بهالموضوع وهددها اذا ما عاملت شذى عدل مثل حلا... نوال حبت تحرجها:الا وين راح طلال من بدري؟ شذى ناظرت عمها ونزلت راسها:عنده شغل مهم جاسم بعصبيه:انا اعرف شغلي معه شذى تدافع عنه:لا عمي خله على راحته نوال تقوم بنفسيه:اكيد بيسوي الي يريحه جاسم تنرفز منها:وين رايحه؟ نوال:غرفتي جاسم:ما اكلتي شي نوال:الحمدالله شبعت راحت نوال لغرفتها ...وشذى حست انها مذمومه من الكل محد يبغيها .... رفعت عينها لعمها لقته يبتسم لها بحنيه... جاسم:كلها فتره وتعدي ان شاء الله شذى عيونه تدمع:تسلم لي عمي غرفة امامه امامه تتكلم بالموبايل:وااي فيصل بموت منها بتذبحني فيصل:سم الله عليج من الموت امامه بقهر:ما اقدر اشوفها فيصل والله ما اقدر فيصل:ما عليه يا قلبي انتي صيري اقوى هوني على طلال امامه:وانا منو يهون علي ... فيصل:افا يا قلبي وانا وين رحت امامه:اصلا من غيرك مادري شكنت بسوي فيصل استانس:يه يه من قدي على هالكلام بمرج اللحين ونطلع نغير جو شرايج؟ امامه:حدي مختنقه من البيت مو قادره استوعب انها ويانا فيصل بتفكير:اممم في طريقه تفتكين منها امامه عدلت قعدتها:صج !! شلون فيصل؟؟؟ فيصل:انج يا روح فيصل تتنازلين و تفكيني من سالفة العرس وتيين بيتج على طول جذي ترتاحين منها امامه :لا والله على بالي عندك سالفه فيصل:ههههه ليش كلامي ما اعجبج امامه:اكيد ما عجبني فيصل يمثل:افا افا اللحين صارت شذى اهم مني وشوفتها اهي الي تملى العين امامه :مين قال كذا؟. فيصل يدلع:انتي...خلاص امامه الي تبينه سويه امامه:فصولي حبيبي شفيك انت عارف ليش انا اجلت فيصل:خلااااااص خلااااااص لا تحاولين تبررين امامه تشد على اسنانها :فيييصل فيصل:عيونه امامه :لا تقولي جذي فيصل بكل صدق:حبيبتي مو قادر اصبر زود والله مو قادر رحميني امامه بتفهم:اوعدك يا فيصل اخر تأجيله هالاسبوعين لان ابوي حلف انه يجيب حلا يعني يجيبها والله يستر مو ناوي خير فيصل:يعني شبيسوي ؟ امامه بخوف:حلا شي اكيد ماراح ترضى ترجع لطلال بعد ما تعرف انه متزوج عليها واهو بيجبرها فيصل :الله يهديه ابوج هذي يتيمه امامه باستهزاء:هههههههه خلني ساكته يا فيصل ما ابي اقلل من مكانة ابوي فيصل مقدر كلامها:خلاص يا قلبي انت روحي تجهزي واللحين ياي لج امامه:اوكي حياتي..لا تتأخر فيصل:مسافة طريج لبست امامه عالسريع تحس انها زهقانه تبي تطلع مع فيصل تغير جو.... نزلت الصاله ما لقت غير شذى قاعده قبال التلفيزون ..والخادمه تشيل الريوق (( شكله ابوي راح الشركه ...هين يا شذووي انا اعلمج شلون تاخذين اخوي من حلا)) راحت للصاله ومدت يدها للريموت الي قبال شذى وغيرت القناة وقعدت على القنفه الي جنبها وتمت تشوف من غير لا تعبرها شذى استغربت من حركتها ..((يعني ما تحترمني قاعد اشوف ..حتى ما تستأذن ...طوفي يا شذى لازم اكسبها صوبي )) امامه مندمجه مع لقطة المسرحيه وتمت تضحك..بادلتها شذى الضحك :هههههه يحليله عبدالعزيز المسلم احب مسراحياته امامه التفت على الصوت وعطتها نظره وردت عينها على التلفيزون:... شذى تحاول تمسك اعصابها:انتي تحبين مسراحياته؟ امامه تحط ريل على ريل: بشكل كبير بقدر ما اكره ناس قبالي اللحين شذى تشد على اسنانها:شقصدج؟! امامه باستهزاء:اتوقع ما في غيرج بالصاله شذى توقف بعصبيه:احترمي نفسج امامه تعطيها نظره من فوق لي تحت:بعد الحب غصب يا ناس شذى:ما طلبت منج تحبيني بس احترميني امامه :هههه هم ما تستاهلين الاحترام شذى:احترمي نفسج امامه:محترمه غصب عنج ..الناس الي يرمون نفسهم على غيرهم هذول هم الي مو محترمين شذى بغرورها المعتاد:اخوج اهو الي طلب يتزوجني وتم يصر على هالشي امامه:هههههه على غيري يا حلوه شذى خافت تكون عارفه شي:شقصدج يعني؟؟ امامه ما تدري شلون قالت جذي المهم تقهرها: انتي ابخس بلي سويتيه واخوي لو مو مجبور جان ما فكر يتزوج وحده مثلج على حلا شذى بغرور:تقارنيني انا بحلا امامه تقاطعها:طبعا ما اقارن لان ما في وجه مقارنه بينكم اصلا حلا وين وانتي وين شذى انفجرت وقامت تصارخ:انا سكت عنج وايد امامه تقوم من مكانها وتعدل نفسها :لا تكفين لا تسكتين واريني شبتسوين يعني شذى بمكر:لا تخليني احطج في بالي لانج بتندمين امامه:ههههههههههه يحليلها تهدد بعد رن جوالها وكان فيصل امامه:هلا حبي فيصل:انا عند باب بيتكم يا قلبي امامه تمثل ان جبدها لايعه:اشوه انك جيت حبيبي في ناس لايعه جبدي منهم فيصل فهمها:هههههههههههههه ترفعين ضغطها امامه تكمل:ايي والله يا عمري اول مره اشوف ناس جذي يذلون نفسهم ويدرون ان القلب ملك لغيرهم فيصل مات من الضحك:هههههههههههه حرام عليج خفي عليها شوي شذى تحس ودها تذبحها :احترمي نفسج..وحسني الفاظج امامه تتجاهلها:هلا قلبي...لا هذا صوت الخادمه فيصل:حسبي الله على بليسج يا اموم امامه ماسكه ضحكتها لان شكل شذى فورت :اوكي حبيبي اللحين جايه سكرت منه وقفت قبال المنظره تتعدل ...وصرخت تنادي على الخادمه امامه:آناا آنااا آنا:يس امامه تعطي شذى نظره:نظفي الصاله عدل عشان بابا فيصل بيجي يتغدى عندنا ما ابي اشوف شي وسخ موجود آنا:اوكي ماما امامه وعينها على شذى وتكلم الخادمه:واذا شفتي شي وسخ حجمه كبير ارميه بره آنا ما فهمت بس كالعاده:اوكي ماما طلعت بعد ما حست انها بردت حرتها بشذى ...وشذى من كثر الصدمه مو عارفه شتقول واقفه منصدمه... ((اذبحها هذي !!! من وين طلعت لي يا ربي ما خلصت من حلا تجي لي هذي ...الله يعيني عليها شكلها مو هينه رفعت لي ضغطي ...عساج ما تتهنين ويا فيصل يا اموم )) بريطانيا حلا تتقلب بالسرير مو قادره تنام ايامها صارت كلها دموع وبجي وعذاب ..مو مصدقه انها تحمل في احشائها طفل من طلال (( يعني ماراح اقدر انساك يا طلال طول عمري...هالولد بيربطني فيك ..ليش سويت جذي يا طلال ليش بعت حبي لك برخيص...انا ما استاهل ليش!!!!!!))) نزلت دموعها كالشلال وتمسح بيدها على بطنها وتتخيل لو كانت هاللحظه بوجود طلال يمها لو يدري انها حامل كيف بيكون طاير من الفرحه ..غمضت عينها ورجعت راسها لي وره ..تتذكر موقفها وياه قبل لا تكتشف علاقته بشذى باسبوع ((كانت قاعده على قنفه بالصاله وطلال منسدح على القنفه وحاط راسه على ريلها ويتابعون فيلم هندي...كان الجو مره حلو بينهم ..مرت لقطه بالفيلم ولادة طفل وابوه شايله فرحان ويمه الام ..لف طلال وجهه لحلا وابتسم لها طلال:انتظر هاللحظه حلا حلا نزلت راسها بحيا:ان شاء الله تبلغ طلال يشد على يدها:بيكون احلى ولد بالعالم دام انتي امه حلا ترجع خصلة من شعرها وره اذنها:ليش مو بنت؟ طلال بابتسامه اكبر:ويكون احلى واحلى ابيها تشبهج بكل شي حلا خدودها حمرت: تبلغ يا طلال فيهم ان شاء الله طلال :بكل شي ابيها تشبهج حتى بحياج حلا:ههههه طلال يحط يده على بطنها:متى يكبر هذا متى حلا:هههههههه ايي انت شعليك انا الي شكلي يصير مو حلو طلال:انتي حلوه بكل الاحول يا حلا انتي كلج حلا اصلا حلا:خلااص طلال بس تابع الفيلم لا يطوفك وايد حلو طلال يلف عليها:ما ابغى الفيلم دام الحلا كله يمي والحلوه الي عاشتهم وياه وبنفس الوقت دموعها تنزل بحراره على ويها ... ((ليش حرمتنا من هاللحظه !!! اجذب على عمري اذا قلت بنساك يا طلال او اني ما ابيك ..انسى اسمي وما انساك يا طلال..شلون بعيش من دونك شلون بربي الولد من غيرك.)) سمعت صوت مشعل يناديها من الصاله توه راجع من بره ..ردت عليه انها اللحين جايه ..دخلت الحمام خذت لها دوش سريع غيرت ملابسها ولبست شيلتها وطلعت له واهي تبتسم لقته منزل راسه ويحوس بالجيس الي على الارض ...ابتسمت وتمت تناظره (( يا قلبي عليك يا مشعل حاسه فيك ..تحس انه ولدك الي انحرمت منه...من يوم ييت عندك وانت تراعيني وانا ولا فكرت افاتحك بموضوعك ويا حور )) حس مشعل بوجود شخص غيره بالصاله..رفع عينه شاف حلا تبتسم له مشعل يبادلها بابتسامه احلى:مرتبط حلا ما استوعبت شقال:شنو؟! مشعل يضحك لان شكلها كانت مو معه كلش:ههههههه اقولج مرتبط حلا:مرتبط بشنو.؟!! مشعل :هههههههههههههه اذا كنتي معجبه اختي سامحيني لاني مرتبط حلا استوعبت وحمرت من الحيا:هههههه مشعل حب يلطف الجو:تعالي شوفي سنو شريت حق نصوري حلا تجلس على القنفه الي جنبه:هههههه منو نصوري مشعل :حبيبي الي في بطنج حلا:ههه واذا بنت؟ مشعل:احلى واحلى حلا:ههههه شتسميها؟ مشعل بحيره:انتي الي تسمين يا حلا ..وانا ادري انج تبغين ناصر اذا ولد حلا تمهد للموضوع:اكيد..بس اذا بنت ابغيك انت تسميها مشعل يتذكر حور: اممم انتي خاطرج بشنو؟ حلا تبتسم له: الاسم الي تختاره مشعل يبتسم لها وبضيق: لو كانت بنتي كنت بسميها امم.. حلا ضاق خلقها يوم شافت الضيق بعيونه:الله يبلغك يا مشعل مشعل نزلت دمعه من عينه غصب عنه بس مسحها بسرعه لكن حلا لاحظتها:الله كريم حلا بجديه:مشعل ابغى اكلمك بموضوع مشعل يقاطعها :بالاول قومي غيري لبسج وقولي لي كل الي تبغينه بالمطعم حلا: يكون احسن بيت نهى قاعدين كلهم بالصاله وفيصل راح يتغدى عند امامه نهى:ما تستاهل حلا انفال بضيق:أي والله يا يمه ما تستاهل ..ما في مثلها فجر:ما تدرون لا تحكمون بسرعه يمكن في شي صاير خله عمي جاسم يسوي جذي انفال ترفع حاجب :يمكن ليش لأ نهى:الله يصبر هالمسكينه حلا انفال:اقول يمه نهى:خير يمه انفال:يمه اليوم مديري بالشغل فاتحني بموضوع نهى:خير ان شاء الله انفال: يبي رايي اني اروح دورة شغل بره الكويت نهى:هالشي ضروري يعني انفال:يعني يمه اهو يفيدني كمستوى في شغلي ويزيد من علاواتي نهى:استشيري اخوج انفال:قلت له يمه قالي الي يريحج نهى:استخيري يمه الله يوفقج انفال تبوس راسها:آمين بيت جاسم الكل موجود على الغدا ما عدا طلال الي مسكر جهازه ما يبي يكلم أي احد ... من ليلة عرسه طلع ما رد البيت مو قادر يشوف شذى جدامه ولا قادر يواجه امامه يدري انها ماراح ترضى على زواجه لو تم يقنعها ليه باجر... وشذى ما حبت تنزل عشان ما تفشلها امامه جدام فيصل فاعتذرت على انها تعبانه.... بعد الغدا استأذن جاسم عشان يصعد يرتاح ونوال تمت ويا امامه وفيصل وبعدها استأذنت منهم تريح بغرفتها... فيصل يطفرها:الا مرت اخوج المزيونه وينها امامه تلتفت وشراره تطلع من عينها:مين المزيونه؟ فيصل ماسك ضحكته:امم على ما اظن اسمها شذى امامه بقهر:وليه تبغى تشوفها؟ فيصل مستخف على شكلها:نتعرف عليها فيها شي؟!!! امامه تعض على شفايفها:اصعد لها اذا تبغيها فيصل :ههههه لا شدعوه بس كنت ابي ابارك لها امامه ارتفع ضغطها: عقبالك ان شاء الله فيصل يقوم ويروح يقعد يمها:الله يسمع منج من بؤج لباب السما امامه تبتعد:الله يرزقك بوحده مثلها فيصل يقرب منها ويقربها له بيده:الي ابيها تسواها مليون مره امامه تحاول تفك نفسها : ايي الله يهنيك فيها فيصل يلعب بشعرها:ما سالتيني منو؟ امامه تحاول تقوم بس شد عليها اكثر:ما ابغى اعرف فيصل يساسرها باذونها:تدرين تصيرين احلى اذا عصبتي امامه تنرفزت من بروده:فيصل وخر مالي خلقك...روح دور لك على غيري فيصل :آآآآآآه يا ناس شهدو ما تبيني امامه لفت الجهه الثانيه:..... فيصل :الحلوين زعلو؟؟ امامه تهز بريلها من غير لا تتكلم:..... فيصل :ههههههههههههههههههههههه ذكرتيني بموقف ههههههههههههههههه امامه عصبت اهي اللحين معصبه والاخ يضحك:... فيصل يكمل:تذكرين ايام الجامعه كل ما يصير لج موقف معاي وتتنرفزين تقعدين تهزين بريلج نفس اللحين ههههههه امامه تلف عليه:يا كرها من ايام خلتني اعرفك فيصل عرف انها عصبت جد:ههههههههههههههههه امامه :اتوقع ماله داعي للضحك فيصل :افا حبيبتي عصبتي اتغشمر معاج امامه:لا والله فيصل بحب:اصلا محد يسواج يا حياتي..شبي بشذى دام القمر يمي امامه تفك عمرها وتوقف:لا تحاول فيصل:ههههههه امومه حبيبتي شرايج نطلع امامه:فيصل لا تحاول فيصل يوقف قبالها ويبتسم لها:تدرين شكثر احبج امامه ساكته تناظره بعيونها:.. فيصل تم يناظرها ثواني وبعدها تكلم:كثر الحب الي اشوفه بعيونج لي امامه ابتسمت :يعني شويه فيصل :هههههههه افا امامه بدلع : لان الحب لبعيوني ولا شي من حبك بقلبي فيصل يمسك يدها ويسحبها معه:انا ما استحمل جذي امشي وياي امامه توقفه واهي ميته ضحك على شكله:هههههه وين ساحبني جذي فيصل:وين بعد لبيتنا ما اقدر اصبر زود امامه تسحب يدها:ههههههههههههه صاحي انت فيصل:انتي خليتي فيني عقل امامه راحت صوب الدري :انت شكلك ينيت انطرني اغير لبسي واجي معك لانفال فيصل بمكر:ايي لي غرفه في بيتنا ترا امامه:هههههههههه هالشي تنساه فيصل بقهر:اعلمج يا اموم صعدت فوق ...وشذى لكانت نازله تظن انهم راحو اصطدمت بامامه لكانت تركض شذى :شوي شوي بقيتي طيحيني امامه للحين على ضحكها:ههههههه حسافه لو طايحه ومتكسره شذى انقهرت من كلامها:ممكن اعرف ليش تعامليني جذي.؟ امامه تحط صبعها على راسها:كيفي جذي مو داشه مزاجي شذى تبتسم لها:امامه انا طول عمري انحرمت من الخوات يا ليت تكونين لي نفس اختي امامه :هههههه اختج ..سوري ما اتشرف خلتها ودخلت غرفتها تلبس فيصل ينتظرها تحت ....شذى دمعت عينها من القهر ..دخلت غرفتها واهي معصبه حدها من اسلوب امامه معها ما تدري شلون بتصبر اكثر.... ((كل شي يهون علشانك يا طلال ..بستحمل كل شي بس علشانك)) بريطانيا بالمطعم حلا :هههههههههه مشعل من زمان ما شافها تضحك:ليش تضحكين ترا من صجي اتكلم حلا:هههه من صجك مشعل سويت جذي مشعل:ايي والله حتى كانت معاي وحده كويتيه طالبه تدرس نفس تخصصي ..دخلتها معي بالسالفه وسامحنا الدكتور اثنينا حلا حست من الحزن الي بعيونه فجأه ان هالبنت حور فحبت تدخل بالموضوع:امممم زميلتك يعني؟ مشعل رفع عينه لها:منو ؟ حلا:البنت مشعل بضيق: ايي طالبه حالها حال أي وحده معي حلا بابتسامه:بس الي سوته معناته تعزك حيل لو كان الدكتور كاشفكم جان اثنينكم انطردتو من الجامعه مشعل يبلع ريجه:يمكن ليه اكثر من سنه معي حلا بضيق على حاله:عمرك ما حبيت مشعل؟!! مشعل انصدم من سؤالها المفاجئ:!!!!! حلا توضح سؤالها اكثر:مو معقوله يا مشعل اكثر من 4 سنين بره الكويت ما حبيت ...كلنا نمر بتجربة حب بحياتنا يا ننجح فيها او نخسر مشعل بابتسامه مزيفه:دومي خسران يا حلا..حتى تجربتي مع اهلي خسران فيها حلا دمعت عينها من كلامه:هالشي مكتوب عليك يا مشعل مشعل:ونعم بالله حلا تكمل: انا حبيت طلال وما انكر اني عشت معه احلى ايام حياتي بس بالاخير شوف ايش سوى فيني .(بجرح كبيير نطقتها) خاني بكل سهوله من غير أي سبب مشعل يهون عليها:ما يستاهلج يا حلا هالموضوع لازم تنسينه وتصيرين اقوى عشان ولدج حلا تمسح دمعتها وترد لموضوعها:وانت يا مشعل؟ مشعل:انا شفيني ؟!!! حلا:اكيد حبيت مشعل يحس وده يفضفض لاحد:وللأسف خسرت حلا ارتاحت انه صارحها:ممكن اعرف ليه؟! مشعل تم يناظرها مده واهو ساكت موعارف شيقول نزل عينه للصحن وسرح بحور:... اصدمته حلا يوم تكلمت :حوور مشعل رفع عينه لها منصدم:!!! حلا :مشعل ما ابغيك تزعل بس انا اعرف كل الي صار وهالشي عرفته بالصدفه مشعل مو فاهم ( شتقصد انها اعرفت !! معقوله طلال قالها عن كل شي مستحيل !!):..... حلا تقاطعه وكأنها قرت تفكير:طلال ما قال لي شي ...حور جيت لي يوم عرسي مشعل :شنو !!! حلا:سلمت لي ظرف فتحته وكان مكتوب كلام كثير ما فهمته بس الي اذكره كانت تحذرني من طلال وتتمنى لنا حياة تعيسه لان طلال هدم حياتها مشعل نفخ من قلبه:آآآآآه ليش يا حور ليش!! حلا تهون عليه:يا مشعل حور ما غلطت ..اهي كانت فاهمه ان طلال اهو الي هدم علاقتكم مشعل:وانتي كيف عرفتي انه مو طلال؟ حلا تذكر ذاك اليوم:يومها شكيت بطلال وتميت ابجي بس يوم خبرت طلال اضطر يقول لي كل شي وانا ما خبرت احد يا مشعل مشعل دمعت عينه : حرمت نفسي منها يا حلا .ضيعتها من يدي حلا:في امل يا مشعل تقدر تصارحها وتعلمها كل شي واهي بتقدر مشعل بقهر يضحك ودموعه تنزل:بعد شنو يا حلا !! بعد ما صارت لغيري وعندها ولد منه حلا بصدمه:شلووون!! مشعل:هذا الصج حور تزوجت غيري والحمدالله ربي رزقها بعيال الي انا كنت بحرمها منهم حلا:في امل يا مشعل في مشعل:مالي أي علاج يا حلا صعب صعب 20% ما ابي اهدم حياتها انا ادري انها تحب اليهال شلون تبين احرمها من امومتها حلا تعرف شكثر مشعل يحب اليهال:وانت يا مشعل؟! مشعل بدمعه لسعة خده من حرارتها:انا احمد ربي اني عشت 4 سنين احلى سنين عمري يا حلا مع انسانه عوضتني كل شي كنت اعتبرها كل حياتي ..ما ابغى اكون اناني وابني سعادتي على سعادتها حلا كبر بعينها:انا ما الومك يا مشعل... بس انت جذبت عليها يمكن اهي لها راي ثاني ..يمكن كانت تطلب وجودك يأي حاله من الاحوال ولا بعدك عنها مشعل يضحك بألم:ههه مو هذا يا حلا الي كانت بتسويه ...حبها لي بيخليها توافق علي حتى لو كنت مشلول ..بس انا ابيها تعيش حياتها ما ابي تتعذب معاي حلا:وتظن سعيده مع غيرك!! مشعل ينفخ:آآآآه مع السنين تنساني حلا تترجاه:مشعل حاول اخير مره..يمكن تكون مو متزوجه بس تبي تجرحك مشعل:كنت اقول لنفسي هالكلام بالبدايه ..حاولت اصارحها اكثر من مره بس ردتني وهالشي دليل انها رضت بحياتها حلا:يا مشعل لا تحكم بسرعه انت ماراح تخسر شي اذا تأكدت مشعل يبي ينهي الموضوع:ارجوج حلا سكري الموضوع مالي مزاج اللحين حلا تفهمت حالته:براحتك يا مشعل بس لازم نتفاهم فيه مره ثانيه ناظرها مشعل بألم يشكي لها حاله وبعدها ثبت نظره على شي بعيد وسرح في حور وكلام حلا شقة احمد غنيمه تكلم احمد :قلت ادق استأذن منك احمد:احنا شقلنا غنيمه بملل :ما اتوقع فيها شي اذا طلعت اغير جو احمد يتعوذ من الشيطان :انزين منو بيروح وياج؟ غنيمه:انا وامامه وانفال احمد مستغرب:منو انفال بعد؟ غنيمه:اخت فيصل زوج امامه احمد :خلاص اوكي لا تتأخرين غنيمه بنفسيه :ادري احمد:وليش تكلميني بهالنفسيه غنيمه :ما فيني شي ممكن اروح اللبس اللحين احمد يدري ان اهو السبب : روحي يا قلبي غنيمه ملت من مزاجه:باي احمد :باي ردت اتصلت على امامه...الي كانت عند انفال امامه:هلا والله غنيمه:احمد وافق امامه:خلاص نمرج ولا تجين بسيارتج غنيمه:لا خليها بسيارتي عشان ارجع امبجر امامه:اوكي براحتج لا تتاخرين غنيمه:اللبس واييلج امامه:عيل نسبقج انا ونفول السوق غنيمه:اوكي ..خل اروح اللبس لا اتاخر عليكم امامه:ايي بسرعه بباي غنيمه:باي بيت جاسم غرفة طلال وشذى رجع طلال متأخر دخل غرفته تعبان ما يبي يكلم أي احد ..غير لبسه وانسدح على السرير ... شذى دخلت الغرفه توها راجعه من بره ماصدقت يوم شافته موجود راحت لعنده شذى:طلال طلال معطيها ظهره وبنفسيه:نعم شذى تقرب منه:بتنام؟ طلال:ايي عندج مانع؟ شذى:ليش تعاملني جذي حبيبي انا شذى؟ طلال يلف عليها بكل قهر:ايي شذى الي هدمت حياتي شذى الي خربت بيتي شذى تروح له: طلال انا ما جبرتك انت الي طلبتني طلال:منج منج يا شذى لو مو ملاحقتني جان ما صار الي صار شذى:لا تحملني الغلط بروحي انت بعد وافقت على كل الي صار طلال بندم :لاني مينون مينون شذى تحاول معه:طلال حبيبي انا ادري انك زعلان عشان اختفاء حلا بس أن شاء الله بترد وقلت لك من البدايه انا راضيه اكون مرتك الثانيه ما اقدر اعيش من غيرك طلال :هدمتي بيتي يا شذى مادري شلون طاوعتج شذى :حياتي انا.. طلال يقاطعها: مابي اسمع منج أي كلمه ابغى انام سكري الليتات ولا ماراح يحصل خير بريطانيا ثاني يوم وصلو خالد وحور بريطانيا ...حور بالبدايه كانت عندها ردة فعل بعد زواجها اول مره منه ... وخالد تفهم هالشي وقدره ومخلاها على راحتها... اما اللحين حور بدت تقتنع ان مشعل انتهى نهائيا من حياتها ..وغير الحب الي تشوفه بعين خالد لها وللحين متمسك فيها...قررت تسعده كثر ما تقدر وصلو شقة حور ... خالد يحط الجناط على الارض:حمد الله على السلامه حور بابتسامه:الله يسلمك خالد يبادلها الابتسامه:شقتج حلوه حور :ايي انا ومش (( سكتت واهي منصدمه كيف كانت بتنطق باسمه جدام خالد )) خالد استغرب سكوتها المفاجئ:انتي ومنو؟ حور تلقائيا:انا ومشاعل رفيجتي اثثناها خالد :ايي ذوقكم حلو حور:تسلم... تبي نتمشى خالد ابتسم لها:منو يرفض ان يتمشى معاج شقة مشعل قاعد ويا حلا بالبلكونه واستغربت حلا من سكوته المفاجئ حلا:مشعل شفيك؟ مشعل يبلع ريجه وعينه جدام:ردت يا حلا حلا مو فاهمه شي:مين ؟ مشعل بكل عذاب نطق اسمها:حور حلا ترفع عينها للمكان الي يشوفه:هذي شقتها مشعل:ايي توه فتح الليت معناته انها رجعت حلا :مشعل انت لازم تكلمها وتتفاهمون مشعل بحزن:خلاص يا حلا احنا تناقشنا وشفتي ان ما في أي فايده حلا باصرار:لا في يا مشعل فيه بس انت الي رافض مشعل:ما اقدر اواجهها اقولها انا الي هدمت حياتنا بيدي حلا:اذا تحبك بتقدر يا مشعل مشعل:انسي حلا حور صارت لغيري حلا توها بتنطق بس تنصدم من الي شافته جدامها:... مشعل باستهزاء:هههه شفتي بعينج حلا دمعت عينها (يا قلبي عليك يا مشعل ): مشعل انا.. مشعل يقاطعها ويوقف:انسي يا حلا الموضوع ولا تذكريني فيها والله يسعدها بحياتها طبعا كانت حور نازله مع خالد ...وخالد ضامها لعنده ومغطيها بجاكيته لان الجو بارد حور بحيا:خالد خالد:ههه الجو بارد وانتي عاندتيني وما لبستي الجاكيت استحملي اللحين حور ما مانعت وتمت عنده:وين تبي نروح؟ خالد:انتي عارفه المنطقه اكثر مني حور :بوديك حديقه قريبه من اهني وايد حلوه خالد:اوكي حبيبتي حور ارتاحت من داخلها ان خالد للحين ما تغير وهالشي خلاها تصر اكثر على انها تنسى مشعل.... الكويت بعد مرور اسبوع بيت جاسم شذى ملت من اسلوب طلال ومعاملته لها ...يقعد الصبح يطلع من غير لا يكلمها ...وما يرجع الا بليل ينام على طول... ((مو هذا الي كنتي تبينه يا شذى.. صرتي زوجة طلال بس فقدتي حبيبج طلال ..آآآه يا ربي ساعدني مليييت من هالعيشه)) نزلت تحت الصاله واهي تحس انها ملانه تبي تسولف ويا أي احد لقت امامه قاعده تسولف بالتليفون ...راحت قعدت بالقنفه الي قبالها.. امامه الي كانت تكلم انفال ..شافت شذى قعدت قبالها عطتها نظره وردت تكمل سوالفها.... امامه:هههههه من صجها فجور انفال:ايي والله الهبله تقول اخذيني وياج امامه:نفول لا تسافرين انفال:ههههه خلصت من فجر دورج انتي اللحين ..كلها شهر وراده لكم ان شاء الله امامه:يعني مو لاازم انفال:محتاجه لهالسفره اموم نفسيتي وايد تعبانه امامه:الي ريحج بس عاد كل يوم بدق عليج بطفرج انفال:ههههه حلو على قلبي ..هذا اذا ذكرتيني امامه:هههههه حرام عليج انفال:ايي بتشوفين ان كلامي اهو الصح فصول اخوي خلاج تنسين الكل امامه:فديته حقه انفال:هههه الحمدالله والشكر انتو الاثنين من اكلمكم كل واحد يتفدى الثاني امامه:ههههه يا قلبي عليه وينه ولهت عليه انفال:من صجج انتي مو توج مكلمته قبل لا تكلميني امامه بشوق:ايي عدت ربع ساعه تقريبا...نفول عطيني اياه اكلمه انفال انقهرت:والله انج قليلة ادب اللحين انا باجر بسافر خليج معاي لاحقه على فصول امامه:ههههه تغارين منه فيصل الي دخل غرفة انفال وسمع جملتها الاخيره ..سحب منها التليفون... فيصل بحب:تسألبن عني يا قلبي امامه اخترعت:بسم الله انت من وين طلعت!!! فيصل:افا بدل لا تقولين لي هلا حياتي امامه بشوق:توني اسأل نفول عنك فيصل:ايي قلبي سمع قلبج يناديني وييت لج امامه:ههههههههههههه فيصل :الله لا يحرمني من هالضحكه انفال تسحب السماعه منه انفال:لوعتو جبدي انتو كله مغازل امامه:اففففف انتي من وين طلعتي عطيني فصولي انفال تشهق:انا انا تقولين لي افففف عشان فصول فيصل يسحب السماعه فيصل:فديت الي يقول اففف لغيري امامه وعينها على شذى الي فورت:فديت قلبك ..فصولي خل نطلع ملانه من البيت فيصل:حبيبتي ملانه وانا موجود اللحين امرج ونسافر على اقرب طياره امامه:هههههه ما صدق على الله...قصدي طلعني طلعه في حدود دولة الكويت فيصل:ههههه ألا تريدين خارجها امامه:لا لا اريد فقط الكويت لا غير فيصل:ههههههههههههههه دقايق وامرج امامه :ناطرتك حياتي ..لان لايعه جبدي من الي جدامي انفال كانت ساحبه السماعه من فيصل انفال:منو الي لايعه جبدج منها؟ امامه:افففف لا ذكريني ماني قادره افتح عيني شذى فورت حدها من العصبيه ..وقامت من مكانها ...وامامه استانست انها نرفزتها امامه:ههههههههههههههههه انفال:شفيج انتي بس تضحكين؟ امامه:طافج نقول نرفزت شذووه انفال:ههه يالشريره امامه بمكر:انا اعلمها ان ما كرهتها بالبيت خليتها بنفسها تطلب الطلاق من اخوي شذى صعدت غرفتها ..وخذت موبايلها واتصلت على طلال طلال رد واهو زهقان منها ... طلال:نعم !! شذى تبجي:طلال وينك طلال بكل برود:شتبين شذى: اموم اختك زهقتني مللتني حياتي طلال:وشتبين اسويلج يعني شذى تصيح:طلال انا مليت انت مو معبرني وامامه من تشوفني تقعد تطفرني طلال بقلبه تستاهلين اكثر:والمطلوب!!! شذى:طلال حبيبي انسى الي صار وخلنا نبدي من يديد طلال باستهزاء:ماراح اسامحج الا اذا رجعت حلا شذى بقهر:وانا شعلي شدراني اهي وينها طلال :انا مشغول اكلمج بعدين سكره منها واهو زهقان ...بعد حلا عنه وايد اثر فيه ..بس لحظات يحن لشذى قلبه ما يطاوعه يعاملها بهالشكل (( وينج يا حلا كافي عذاب ..وربي ندمان ندمان بس ابي اسمع صوتج )) شقة احمد قاعدين بالصاله وللحين احمد ما تغير يوم مزاجه زين يوم يغلب عليها... احمد:اقول غنيمه تلتفت عليه:... احمد:انا بروح الشاليه من باجر الصبح ويا ربعي ثلاث ايام غنيمه تلف على التلفيزون:خير ان شاء الله احمد: فأنتي روحي بيت امج عشان ارتاح غنيمه:اوكي احمد:بس هذا الي عارفته اوكي ..ان شاء الله ..خير .. غنيمه ترفع حاجب:شتبيني اقولك احمد:سولفي نفس الناس ولا ما تعرفين تسولفين غنيمه وقفت :بروح انام تبي شي احمد يوقف بعصبيه:ان رجعت من الشاليه لي كلام ثاني معاج غنيمه تروح غرفتها من غير ولا كلمه..واحمد تنرفز منها و طلع من الشقه بيت فيصل الكل نايم ..ما عدا فيصل قاعد يكلم امه بموضوع في الصاله فيصل:يمه انتي لا تضغطين عليها اكثر نهى بضيق:يا ولدي اختك كبرت ..وبعدين محد راح يتقدم لها فيصل:يمه الي تعرضت له انفال بالغزو مو شويه شي اكيد بيصير لها ردة فعل مع الكل نهى :حسبي الله عليه لو ما كانت طالعه من غرفتها ما صار الي صار فيصل بحزن:مكتوب يا يمه عليها ...مو بس اهي بنات وايد اغتصبوهم نهى دمعت عينها تذكر الي صار جدام عينها:انا قلت لها لا تطلعين من الغرفه ...بس سمعت صوت صراخك وصراخي يوم ذبحو ابوك وطلعت... وما اكتفى بذبح ابوك كمل على بنتي فيصل يهديها:خلاص يا يمه كافي انسي الي صار نهى انهارت بجي:انسى شلون انسى الي سووه فينا بالغزو مو شويه...ابوك ذبحوه جدام عيني واختك اغتصبها جدامي وما كان بيدي شي اسويه شلون تبيني انسى فيصل دمعت عينه:الله يعينج يا يمه ما الومج ما الومج قاعد تحوس بالاوراق ومندمجه فيهم ..دخل عليها احدى المراجعين المراجع:لو سمحتي اختي ترفع عينها انفال له:نعم الصدمه على ويها ما تتخيل الي تشوفه جدامها.... انفال تغمض عينها وترد تفتحهم تبي تتأكد:.... المراجع يحس انها مو طبيعيه:اختي في شي انفال ودمعه بعينها حاولت تمسك نفسها: تفضل المراجع:دام فضلج...حبيت تسوين لي هالمراجعه انفال تاخذ منه الاوراق:ان شاء الله بس تفضل ارتاح كلها ربع ساعه وتكون جاهزه ان شاء الله المراجع يقعد على الكرسي:يعطيج العافيه خذت الاوراق بسرعه وطلعت من المكتب تتنفس بسرعه ...معقوله معقوله يكون الشبه جذي واضح . معقوله نساني يا ربي اهو فواز اهو ...معقوله نساني رفعت الاوراق الي بيدها ولقت نفس الاسم تمت تصيح مو مستوعبه شلون فواز جدامها ولا عبرها ...حن قلبها له ودموعها بدت تنزل وحده تلو الاخرى ..مشتاقه لشوفته مشتاقه لحنانه مشتاقه لحبه ...ليش جذي تجاهلها ((آآآآآآآآآآآآآآآه يا فواز كل ما اقول اني نسيتك القى الزمن يذكرني فيك ..وينك يا قلبي رحت وخليتني ....ليش سويت فيني جذي يا فواز ليش!!! واللحين يوم اشوفك جدامي تتجاهلني كأنك ما تعرفني معقوله يا فواز )) مسحت دموعها بكل الم وحسره...وراحت تكمل اجراءات المعامله... انفال :خلصت معاملتك (واهي تمد له الاوراق) المراجع:مشكوره اختي استغربت انفال انه ما مد يده للاوراق انقهرت منه زود معقوله ما يبي يلتفت يطالعني:اخوي الاوراق المراجع يلتفت لها ويمد يده :سامحيني اختي ..مشكوره ما قصرتي انفال تصرخ من داخلها((لااااااااااااااااا يا ربي عمي عمي ما يشوف ؟...يا ربي الي جدامي فواز حبيبي اعرفه شلون ما اعرفه بس شلون وليش معقوله ما يشوفني عشان جذي ما عرفني)) المراجع:متى موعدي الياي.؟ انفال للحين بصدمتها دموعها تنزل بحسره والم على حال حبيبها:............ المراجع حس في شي مو طبيعي:اختي معاي؟ انفال من غير وعي نطقت اسمه الي دوم تناديه فيه الاسم الي ايام اشتقات تناديه..قالت بصوت مو واضح متقطع:ف..وا.زي المراجع :شنو؟ انفال تروح له وتوقف قباله تتامله اكثر حركت يدها قبال ويهه وتاكدت من انه عمي شهقت بعذاب:آآآآآه يا حبيبي انت حي المراجع:اختي شالكلام انفال متاكده اهو اهو حبيبه ما في شك بهالشي ردت نادته باسمه بصوت اوضح:فواازي المراجع قعد على الكرسي بصدمه ودموعه بدت تنزل من غير لا يتحكم فيها:انفااااااال راحت قعدت تحت عند ريله ودموع الفرح ماليه ويها:انت حي فواز حي فواز ما بين الالم والفرح:آآآآآآآه حي وميت بنفس الوقت انفال تبجي:وينك يا فواز..ليش تخليت عني؟ فواز :ما تخليت عنج برغبتي انفال :كنت انتظرك بكل شوق ..كان ما بقى شي على زواجنا ليش يا فواز سويت جذي ليش بعتني .. فواز يبجي: تهقين انا ابيعج يا انفال انفال بحزن :هذا الي صار فواز :كافي يا انفال لا تلوميني انفال تبجي بهستيريه:كافي كافي لا مو كافي يا فواز انت بعتني تخليت عني تدري شنو سويت فيني انت ذبحتني يا فواز فواز:بس حرام عليج انفال كافي العذاب الي شفته من دونج انفال:وانا وانا نسيتني ما فكرت فيني ما فكرت شراح يصير فيني من دونك فواز :انا ما تخليت عنج انفال تضحك باستهزاء:شتسمي الي سويته فيني فواز:انفال انا كنت بين الحياة والموت انفال توها تستوعب اكيد دامه عمي اكيد صارله شي:....... فواز حس بسكوتها وكمل:صارلي حادث وانا مسافر دبي قبل العرس بروح اشتريلج الخاتم الي كان خاطرج فيه انفال دموعها تنزل بهدوء:........... فواز:دشيت بغيبوبه ومحد يدري عني ...بعد شهر صحيت منها بس اكتشفو ان عندي نزيف حاد بالدماغ ورديت دشيت شهر ثاني بغيبوبه ..ويوم صحيت منها اكتشفو اني (بحسره يقولها ) اني عمي عمي يا انفال انفال تشهق من كل قلبها:لاااااااااااا فواز:شلون تبين ارجع لج وانا بهالحاله شلون تبين اهدم حياتج بزواجج مني ..ما اقدر اسمع بصوتج من غير لا اشوفج انفال:من قال بتهدم حياتي ...انت هدمتها في بعدك عني فواز يكمل بألم:عااااانيت وايد يا انفال وايد حاولت بكل مستشفيات المتخصصه مافي أي علاج ..فقدت الامل اني ارجع لج كرهت اني ارد الديره واشوف الحزن بعيونج ...مرت كل هالسنين و تأقلمت بحياتي اليديده وكونت نفسي بدبي ..ويوم قررت اني اواجهج بعد ما عرفت ان في امل ضعيف بالعلاج ...وصل لي خبر خطوبتج انفال منصدمه :خطويتي!!! فواز دموعه تنزل بحراره:حسيت ان حياتي انتهت مالها أي معنى ليش اعالج وارد عيوني اذا انتي مو جبالي..تميت على ما انا فيه وعندي اتم بهالحال ولا اني اشوفج يوم لغيري انفال تقاطعه:مستحيييل اتزوج غيرك مستحيل فواز فواز بصدمه:ما تزوجتي!! انفال تقرب منه:ولا راح اتزوج ..فواز انا عانيت وايد بعدك عني...وايد تقدمو لي بس كنت ارفض كان عندي امل انك بترجع لي يوم .. فواز:انفال انا عمي..ما اشوف ما اشوف انفال ما تقدر توصف فرحتها بشوفته:ابيك بكل احوالك فواز:لا يا انفال لا انفال:فواز لا تعاند كفايه ماراح منا..وانت قلت في امل ضعيف ان شاء الله تتعالج فواز:واذا ما في امل؟! انفال بكل حب:وجودك يمي يكفيني فواز:شلون تعيشين مع واحد عمي !! انفال:اعطيك عيوني فواز:لااا يا انفال وايد وايد ما استاهل انفال بكل حب:فواز لو كنت انا العميه بتتخلى عني فواز بكل ثقه:اموت ولا اتخلى عنج انفال:شلون تبيني اتخلى عنك بعد ما لقيتك ماراح اضيعك مني فواز من بين بجيه:ههههه ياهل اضيع منج انفال تمسح دموعها وتشاركه الضحك: هههههه ولهت على ضحكتك احس الروح ردت فيني فواز يمد يده واهي فهمت له ومدت يدها له :احبج انفال انفال تغمض عيونها تحس انها بحلم:....... فواز خاف من سكوتها:انفال وينج انفال تشد على يده:وياك حبيبي وياك بس مو مصدقه انك جدامي فواز يبتسم بألم:سامحيني حبيبتي انفال ردت للدموع:ما تدري يا فواز شكثر تعذبت من بعدك فواز:وانا اكثر يا انفال كنت محتاجج بكل لحظه بس كل ما افكر اني عمي وكيف بتكون حياتج صعبه معاي وكيف انج راح تكونين سعيده مع غيري يهون علي يا قلبي انفال تبجي:شلون فكرت جذي شلون فكرت ان سعادتي مع غيرك فواز يمد يده ويمسح دموعها:بس حبيبتي كافي بجي انفال :ما اقدر يا فواز قصب علي ..كلام الناس ما رحمني الي يقول ان اكيد شاف عليها شي وتركها والي يقول ان العيب منها والي يقول اني عنست والي يقول اكيد فيها شي دامها ترفض الي يتقدمون لها..وانت الوحيد الي عارف الي فيني (بجيها يزيد) ومحد غيرك قدر الي صارلي فواز يشد على يدها:الي صارل لج حبيبتي مو بيدج حسبي الله عليه انتي مالج أي ذنب انفال تتأمله واهو يتكلم تحس ولهانه لكلامه الي دوم يشجعها بعد الي تعرضت له :... فواز:نفوله لا تهتمين بكلام الناس ..فواز رجع وبيعوضج كل الي راح انفال تشاهق من البجي:...آآآآآآآآه شكثر عانيت من دونك فواز:يا قلبي يا انفال كل هذا بسببي انفال:يهون كله يهون دامك رجعت لي فواز يمسك يدها:انزين قومي نطلع من اهني مو حلوه احد يمر يشوف دموعج انفال بفرحه:دموعي تفداك يوم قامو ..فجأه اختفى فواز تمت تشوف يدها ((وين ايده وينها!!))...دموعها تنزل تنزل من غير أي احساس ..ويوم رفعت عينها لقت واحد قريب بيقرب منها ونظراته تخرع لها ... قامت تصارخ بصوت عالي تنادي عليه ينقذها ((فوااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااز ...فواااااااااااااااااااااااز )) قعدت من النوم مخترعه واهي تصارخ باسمه ((فوااااااااااااااااااااااااااااااااااااااااااااااااز)) دخلو عليها امها وفيصل سمعوها واهي تصارخ....حالتها كانت تعور القلب تعرق وتتنهد بشكل سريع ..مهي قادره تتنفس.. نهى تسمي عليها:سم الله عليج شفيج حبيبتي انفال تبجي:فواز يمه فواز حي حي بس عمي عمي ما يشوف..واحد كان مقرب مني ياي صوبي يمه يخرع يمه وخرووه عني لا يقرب وخرووووووه فيصل يروح لعندهم:نفوله حبيبتي تعوذي من بليس..انا يمج انفال وللحين تأثير الحلم عليها:وخره فواز وخره عني لا يقرب مني فيصل يشد على جتفها ويهزها يبيها تصحى:انا فيصل انفال كاني وياج حبيبتي ..تعوذي من الشيطان انفال تمت تصيج :ابي فوااز .. نهى:يا بنتي تعوذي من الشيطان انفال واهي تشاهق من البجي :اع..وذ ..بالله م..ن الشي..طان فيصل يضمها لعنده ويمسح على شعرها وقلبه يعوره على حال اخته:بس حبيبتي خلاص ...لا اله الا الله .. تم يسمي ويذكر عليها لما نامت بحضنه...وبعدها ردها لسريرها ولحفها وباسها على راسها واشر لامه الي كانت تشوف حال بنتها وتبجي من غير أي صوت انهم يطلعون بره.... نهى :شلون بتسافر اختك بروحها اذا الكوابيس للحين تحلم فيهم فيصل بضيق: يمه ان سافرت ترتاح اكثر شبيدي اسويه نهى راحت غرفتها واهي متضايقه على حال بنتها للحين مهي قادره تنسى فواز ... بريطانيا شقة حور كان خالد منسدح على السرير يتأمل حور الي نايمه يمه بكل براءه (( واخير صرتي لي ..)) كان يحبها من صغرها ..ما كان يعجبه حركات خالته حصه ومعاملتها لها ...بس كانت حور دوم بعيده عنه وتكره أي احد من اهل حصه.. فتحت عينها لقت ويه خالد قريب منها يتأملها ...سحبت للحاف وغطت ويها فيه بحيا... خالد يسحب للحاف بابتسامه:صباح الخير على احلى عروس حور ترد تتغطى بللحاف:صباح النور خالد:هههه حور شيلي للحاف حور من تحت:مابي خالد:هههههه انزين قومي يالله راحت علينا نومه ساعه 4 العصر حور شالت للحاف منصدمه:نمنا كل هذا خالد يغمز لها:ايي حور قامت من مكانها مرتبكه وبقت تتكرفس على ويها:... خالد ماسك ضحكته:شوي شوي حبيبتي لا تطيحين حور انحرجت ودخلت الحمام:كله منك خالد:هههههههههههههه شقة مشعل بعد ما تغدو قعدو بالصاله ...حلا تتابع برنامج ومشعل لاهي بدراسته... رن جواله ابتسم يوم شاف المتصل مشعل:هلا بالنسيب القاطع فيصل:هلا فيك ..شلونك شخبارك؟ مشعل:بخير الله يسلمك انت شلونك؟ وشلون الاهل؟ فيصل :كلهم بخير ..ليكون بس داق وقت غلط مشعل:ههههه لا ابد عندنا اظن 5 المغرب انت شمقعدك هالحزه؟ فيصل بضيق:والله حبيت بس اوصيك على شغله مشعل:امرني يالنسيب فيصل:ما يآمر عليك عدو بس اختي انفال ان شاء الله العصر طيارتها لبريطانيا عندها دورة شغل مشعل:بنفس منطقتي؟ فيصل:ايي وهالشي ريحني لانك معاها واقدر اتطمن عليها مشعل:لا تحاتي يا فيصل بعيوني فيصل:تسلم لي عيونك... مشعل:انت عطها رقم موبايلي واول ما توصل تكلمني ولا تحاتيها فيصل براحه:على خير ان شاء الله مشعل:سلم على الاهل كلهم فيصل:يوصل اخليك اللحين مع السلامه مشعل:مع السلامه التفت على حلا لقاها تناظره مو فاهمه شي من الي سمعته مشعل بابتسامه:هذا فيصل زوج اموم حلا بوله كبير:يا قلبي عليها ولهت عليها مشعل يمد لها التليفون: كلميها حلا :لا لا لو شنو مشعل:والله يا حلا تلقينها تحاتيج ...تدرين امس كلمت نوال تقول انها مأجله عرسها عشانج حلا انصدمت:لاا مشعل :هذا الي صار مو راضيه تسوي عرس من غيرج حلا:اقنعها يا مشعل اقنعها مشعل:حاولت معاها رافضه نهائيا..كلميها يا حلا حلا تغير الموضوع:وشيبي فيصل؟ مشعل:انفال عندها دورة شغل حلا :وانا !! مشعل :انتي شفيج؟ (استوعب ) شلون راحت من بالي!!! حلا :مشعل ما ابغى احد يعرف مشعل بحيره:مضطر يا حلا اكون معاها فيصل موصيني عليها حلا:خلاص عيل اذا جيت انا اكلمها وافهمها انفال اعرفها راح تقدر الموضوع مشعل بابتسامه:الله يهديج وتبلغين الكل انج عندي صدت عنه حلا ورجعت عينها على التلفيزون واهو رجع يكمل دراسته... بيت ام شذى ثاني يوم نزلت ام شذى للصاله بعد ما صلت الظهر عشان تزهب الغذا لابو شذى استغربت من الخادمه رايحه تفتح الباب لاحد.. ام شذى منصدمه: ام حمد ام حمد بابتسامه:السلام عليكم ام شذى تصافحها بيدها:وعليكم السلام ام حمد والابتسامه ما زالت موجوده:شلونج؟ ام شذى تأشر لها تتفضل:بخير انتي شلونج؟ ام حمد تقعد:بخير الله يسلمج..ما ابي اطول عليج بس حبيت بنفسي اعزمج ام شذى مستغربه:على شنو.؟!! ام حمد بفرح:عرس ولدي حمد ام شذى عيونها دمعت:مبروك يا وخيتي ام حمد:الله يبارك فيج ام شذى تحضنها:يستاهل حمد يستاهل ام حمد تشد عليها بوله:تسلمين يالغاليه ام شذى تلزم عليها: اليوم غداج عندي ام حمد:لا ما عليه مره ثانيه ان شاء الله ام شذى :افا تردين عزيمتي ام حمد تقنعها:العرس بعد اسبوع ولبي اوزع البطايق ..باجر ان شاء الله اعزم نفسي انا وحمد ومرته عندج وشتبغين بعد ام شذى بفرحه ما تنوصف:الله لا يحرمني منج..سامحيني على كل شي ام حمد:مسموحه.. واحنا خوات والظفر ما يطلع من اللحم ام شذى:اصيله يا ام حمد ام حمد:طلبتج لا ترديني يا وخيتي ام شذى:آمري ام حمد:اعزمي طلال وشذى نبي المياه ترجع لمجاريها احنا اهل ام شذى بضيق :والله شقولج.. ام حمد بخوف:خير ان شاء الله ...شذى فيها شي!!! ام شذى :شذى من بعد لسوته وانا ما اكلمها ام حمد:لا حول ولا قوة الا بالله ليش هذي بنتج الوحيده صج انها غلطت بس ربج غفور يسامح وبالج انتي امها ام شذى تبجي:ولهانه عليها ما تدرين شكثر فاقدتها ..بس لسوته فينا مو شويه ام حمد:انا معاج بهالكلام بس الحمدالله اهي تزوجت واسترت على عمرها مالها غيركم بهالدنيا وانتو ما عندكم غيرها ام شذى تشوف اختها لكبرت بعينها بهالكلام:طول عمري اتمنى اصير مثلج وللاسف ما قدرت ام حمد:انتي احسن مني يا ام شذى باخلاقج وطيبتج ام شذى:يعني تشوفين اني اسامحها ام حمد :ههه اصلا من قال انج زعلانه عليها قلب الام ...عندج حمد ولدي غلط وزعلت عليه ويوم الله هداه الحمدالله ردت المياه لمجاريها لانه ولدي الوحيد مالي غيره ام شذى:وانتي الصاجه احنا بس كلام ولا قلوبنا بتحترق عليهم اذا ابتعدو عن عينا ام حمد تبتسم لها:دقي على بنتج وانسي الي صار خليها تعيش حياتها الزوجيه وانتي راضيه عليها ام شذى :ان شاء الله ام حمد توقف:عيل استأذن انا اللحين وباجر ان شاء الله على العشى عندكم ام شذى:حياكم الله بالمطار فيصل:ديري بالج على عمرج انفال :ان شاء الله يا فيصل مو اول مره اسافر فجر:نفول لا تنسين كاكاو لندن انفال:ههههههه هذا الي تحاتينه فجر:شسوي احبه نهى:يا بنتي كل يوم طمنيني عليج انفال:ان شاء الله يمه فيصل:ولا تنسين انا وصيت مشعل اهو الي بيستقبلج بالمطار..اي شي تبينه كلميه لا تستحين اعتبريه انا انفال:ان شاء الله..يلا لا اتأخر على الطياره نهى تضمها:الله يحفظج انفال تودعهم:مع السلامه بيت جاسم وصل طلال متأخر كالعاده توه بيدخل غرفته ناداه ابوه جاسم:طلال طلال التفت عليه:نعم جاسم:تعال تحت ابغى اكلمك نزل له طلال واهو يطلب الصبر من ربه لان عارف الموضوع الي بيكلمه ابوه فيه طلال :خير يبه جاسم بعصبيه:ليش تعامل شذى بهالشكل؟ طلال باستهزاء:شلون عاملتها؟ جاسم:كلمني عدل طلال يتعوذ من الشيطان: انت بغيتني اتزوجها وتزوجتها اظن كافي تدخل بحياتي جاسم يروح يوقف قباله فيس تو فيس:انا ما تدخلت الا يوم شفتك مو قد المسؤوليه طلال انقهر:يعني مو رجال جاسم:الرجال ما يسوي الي سويته طلال بندم: قلت لك يا يبه كنت ناوي اتزوجها جاسم:واللحين تزوجتها بس اشوف معاملتك لها ما تدل على انك كنت تبغيها طلال:متضايق شوي يعني حرام اكون متضايق جاسم:وتحط حرتك بالمسكينه شذى طلال مستغرب من دفاع ابوه الدايم لها:انت ليش كله تدافع عنها؟ جاسم:لانك ظلمتها وتستاهل كل ليصير لك طلال انقهر:انا ولدك يا يبه جاسم:هالكلام ماله معنى ..معاملتك لشذى مو معاملة زوج لمرته حتى ما سفرتها شهر عسل طلال:ما تستاهل جاسم عصب:شوف يا طلال انا استحملتك وايد ..بعد يومين حاجز لكم لامريكا شهر كامل ويعتبر شهر عسل لكم طلال انصدم:انا ما طلبت منك !!! جاسم بتحكم واضح:مو الا تطلب هذي هدية زواجكم طلال:بس عندي شغل كثير بالشركه ما ابغى اسافر جاسم:الشركه مو متعطله عليك ..وهالموضوع انتهى (يمد له التذاكر) وهذول التذاكر روح فرح مرتك فيهم طلال بقهر:حرام عليك يا يبه هذي حياتي ما يصير تجبرني جاسم عصب: ترضى لاختك امامه تتزوج من غير شهر عسل طلال:امامه غير جاسم:لا مو غير ..ما ابغى الناس تتكلم ..روح لمرتك وخبرها طلع طلال واهو يحس ان الموت ارحم له... (( استاهل استاهل انا الي جبته لنفسي.؟..آآآه يا حلا وينج وينج ولهت عليج يا حياتي محد غيرج يحس فيني )) صعد لغرفته واهو يدعي ربه تكون شذى نايمه ماله خلق أي مناقشات... انصدم يوم شافها منسدحه على القنفه وشكلها يعور القلب ...اول مره يشوفها جذي من غير ترتيب مو حاطه مكياج ولابسه بنطلون وبلوزه وسيعه شكلها صاير مبهذل.. وشعرها مفلول بطريقه مو مرتبه ...ومعالم التعب باينه على ويها حن لها وحس ان كثير تجاهلها .. قرب منها بابتسامه خفيفه:شذى شذى تلتفت عليه بتعب:هلا طلال :ما نمتي؟! شذى تقوم تعدل قعدتها:لا ما نمت طلال يقعد يمها:ليه؟ شذى :يهمك؟ طلال :اكيد يهمني شذى ما صدقت كلامه وقفت :اللحين بنام طلال يوقفها من يدها:شفيج؟.؟ شذى عينها دمعت من تذكرت معاملته لها من تزوجو:ما فيني شي طلال تجاهل دموعها:تعالي بكلمج شذى تسحب يدها ودموعها زادت:طلال مالي خلق اسمع أي كلام جارح نفس كل مره طلال سكت يناظرها ((معقوله لي هالدرجه كنت اجرحها..ونسيت ان لي دور بلي صار)):.... شذى ملت من سكوته ودخلت الحمام وتمت تصيح بصوت عالي على حالها.. طلال كان يسمعها وقلبه يعوره مو عارف شيسوي هل اهي تستاهل او الي سواه فيها كثير!!! ((آآآه يا قلبي كيف اكون انا دموعج يا شذى...يا ربي القلب حب اثنين شلون املك الاثنين صعب صعب)) مرت 5 دقايق بعدها طلعت شذى من الحمام رايحه للسرير بتنام ... وقفها طلال من وراها:شذى شذى من غير لا تلف عليه:نعم طلال من كل قلبه:آسف حبيبتي ادري وايد زودتها شذى مو مصدقه لسمعته:.... طلال يلفها له:ادري غلطت وايد بحقج سامحيني حياتي شذى دموعها تنزل مو مصدقه طلال رد يكلمها بهالاسلوب:.. طلال:ليش البجي؟ شذى تشاهق:لان.ك من زما..ن ما قلت لي .جذي طلال كسرت خاطره ضمها لعنده:لا تلوميني حبيبتي لصار مو شويه شذى تتمسك فيه ما تبي تصحى من الي هي فيه:طلال انا احبك كل الي سويته لاني احبك طلال يبجي معاها:وربي اني احبج بس الي صار خلاني افقد اعصابي يا شذى ما اجذب عليج اذا قلتلج ان انتي وحلا بقلبي وهالشي صعب صعب شذى :انا ما قلت لك انساها ولاا طلبت منك تكرها بس ابي اكون يمك طلال يبتسم لها:وكاني يمج اللحين شذى ترفع عينها له:ما تدري شكثر تعذبت الايام لطافت برفضك لي وكلامك الجارح لي كل ما تشوفني طلال يمسح على شعرها:آسف حبيبتي بعوضج ان شاء الله على كل شي شذى بابتسامة حب:وجودك يمي يكفيني طلال طلال يطلع من جاكيته التذاكر:تفضلي شذى مستغربه:شنو هذا؟ طلال يبتسم لها:تذاكر سفر شذى:حق منو؟!! طلال :هههه حق منو بعد ..لي انا وياج يا قلبي شذى مو مصدقه: قصدك انا وياك انسافر طلال:شهر عسل متأخر شذى تلمه:احبك طلااااال طلال:وانا بعد حياتي قعدت الصبح وتحس انها اسعد وحده بهالكون ...خلاص ردت مع طلال مثل اول واحسن ...الليله الي طافت عوضها كل شي..كافي انه يمها هالشي يكفيها.... دخل طلال الغرفه ولقاها تشوف نفسها بالمنظره وتبتسم ... طلال:صباح الخير شذى:صباح الحب طلال يروح لها:ممكن اعرف شهالجمال من الصبح شذى تحوط رقبته بيدها:تريقت حبيبي؟ طلال يغمز لها :قلت نتريق بره شذى تطبع بوسه على خده:واااااااي احبك ..من زمان ما طلعت معاك طلال مرتاح يشوف الفرح بعينها:يالله يا قلبي لبسي اجهزي شذى :من عيوني يرن جوالها ..استغربت يوم شافت الرقم رفعت عينها لطلال بخوف:هذي امي طلال عارف الي صار بينهم:ردي حبيبتي شذى ترد واهي ترجف:الو ام شذى بفرح:هلا حبيبتي شذى من سمعت جذي تمت تصيح:يمه يمه ام شذى:حبيبة امج شلونج يمه شخبارج؟ شذى :انا بخير...ولهت عليج يمه ام شذى:وانا اكثر يا يمه ..شلون طلال معج شذى ترفع عينها له واهو جيه جلس يمها على السرير:بخير يمه ام شذى:مرتاحه شذى بابتسامه كبيره:الحمدالله ام شذى:اليوم انتي وطلال معزومين عندنا شذى بتطير من الفرحه:صج يمه ام شذى:ايي يا يمه انتي وطلال وخالتج وحمد شذى بتردد:حمد!!! طلال التفت بهالوقت ....وضاق خلقه لان تذكر حلا شذى:بس يمه... ام شذى فهمتها: حمد بيتزوج اسبوع الياي ان شاء الله شذى بفرح:صج يمه ام شذى:ايي وخالتج عازمتني انا وياج شذى:اصيله خالتي بعد كل الي صار ما نستنا ام شذى:واليوم بتيي ويا حمد وخطيبته تتعرف علينا شذى :خلاص يمه انا اقول لطلال وارد لج خبر ام شذى:ننطركم ان شاء الله شذى:ان شاء الله اخليج يمه اللحين ..مع السلامه التفتت على طلال...ولاحظت ملامح الحزن عليه ما لامته عرفت انه تذكر الي صار شذى تحط يدها على يده:طلال طلال يرفع عينه لها :عيونه شذى تبتسم:حبيبي امي عازمتنا على العشا اليوم..وخالتي وحمد بيكونون موجودين طلال :شذى انا ... شذى تقاطعه:ومرته طلال يرفع عينه لها مستغرب:تزوج !! شذى بفرحه:ايي طلال من كل قلبه:يستاهل حمد كل خير شذى استانست من رده:يعني راضي نروح طلال:ليش لأ شذى :وااااااي يلوموني ليش اصير مينونه بحبك طلال:اقول شذوي قومي لبسي لا اهون ونتم اهني شذى تقوم بسرعه للحمام:ههههههههه لا الا انك تهون بيت نهى قاعدين يتريقون بالصاله نهى:البيت مو حلو من غير نفول فجر بغيره:بسم الله يمه امس مسافره ..مداج تفقدينها نهى:تعودت كل يوم تتريق وياي فجر:افا يمه انا ما اكفي نهى:الا تكفين حبيبتي... متى محاضرتج؟ فجر تشوف ساعتها :محاضرتي 10 يعني باقي ساعه الا ربع ..خير يمه؟ نهى:وصليني بطريجج بيت نوال عازمتني على جاي ضحى فجر:اشوفج ما كليتي شي...جاهزه يمه؟ نهى:ايي خالصه بس البس شيلتي وعباتي مكتب فيصل رافع ريله على المكتب و يتكلم بالتليفون... فيصل:آآآآآخ على ايام الجامعه.. امامه للحين منسدحه بسريرها:ههه في احد يتمنى ايام الدراسه فيصل:لاني كنت اشوفج فيها ..الحين بالشغل محروم منج امامه:ههههه وربك مقعدني من النوم عشان تقول لي هالكلام فيصل:ما اعرف يا قلبي لازم كل يوم اصبح فيج ... امامه بدلع:حرام عليك كل يوم تقعدني من نومي فيصل:الحين النوم اهم مني امامه:يا قلبي احلامي هالايام حلوه وانت كله تخرب علي فيصل بغيره:تحلمين بمنو؟!! امامه تطفره:ما اقدر اقولك فيصل بقهر:لا والله امامه:ايي والله فيصل يطفرها:الا تعالي شلون مرت اخوج الحلوه امامه فهمته بس طوفت:باجر بيسافرون فيصل استغرب:وين؟َ!! امامه بقهر:شهر العسل عساها ما تستانس طول عمرها فيصل:ههههههه من حقها امامه:لا مو من حقها فيصل:يعني ترضين ما اسفرج شهر عسل امامه تشهق:هاااا تقارني انا بشذووه الخايسه فيصل:ههههههههههه اصلا ما في مقارنه انتي وين واهي وين امامه :فصوول بنام فيصل:افا طرده امامه:حبيبي وراي طلعه ويا فجور وغنوم ابي انام فيصل:هههه خلصنا من انفال دور فجور اللحين امامه:طلبتني ما حبيت اردها فيصل :وين بتروحون؟ امامه:السوق بعد وين فيصل:اوكي حياتي روحي كملي نومتج اللحين امامه:اشوفك العصر في بيتكم... بباي فيصل:باي بيت بو شذى وصلو طلال وشذى قبل ... وام شذى رحبت فيهم وتمو يسولفون ...وصل بو شذى وطلال سلم عليه ويحس باحراج من الي سواه بس معاملة بو شذى خلته يرتاح جزئيا ويشاركهم بالسوالف.... بو شذى :يعني باجر ماشين ان شاء الله شذى بفرح:ايي يبه بو شذى:الله يسهل عليكم طلال:اجمعين وصلو حمد وامه ومرته (مها)...سلام حمد لشذى كان شوي جاف واهي كانت منحرجه منه ....بعدها قعدو الحريم بالصاله و الرياييل راحو الجهه الثانيه عشان ياخذون الحريم راحتهم ....خاصة ام حمد متنقبه اما مها كانت متحجبه وتلبس عباة.... جهة الحريم شذى:مبروك يا مها مها:الله يبارك فيج شذى:تشتغلين؟ مها:ايي مدرسة رياضيات شذى:مو تعب عليج؟ مها:اهو تعب بس من صغري وانا احب التدريس شذى باتسامه:الله يوفقج ان شاء الله ام حمد بصوت واطي:الحمدالله شذى شكلها مرتاحه ام شذى بفرح:الحمدالله وباجر بيسافرون شهر العسل ان شاء الله ام حمد:يستاهلون كل خير جهة الرياييل حمد حاول يكسر الهدوء الي بينه وبين طلال:شلون الشغل يا طلال؟ طلال ابتسم له:والله تعب حمد:الله يعينكم... طلال:يعين الكل ...انت شلونك؟ حمد:بخير الحمدالله رجعت اشتغل مع الوالد وفتحت لي محل صغير ببدي فيه تجاره طلال:الله يوفقك ان شاء الله بالسوق بعد ما قامو من المطعم غنيمه:خلاص اموم انتي وفجور امشو وانا ارجع البلوزه وبرد البيت امامه:اوكي حبيبتي غنيمه تسلم على فجر:لا تقاطعين فجوره فجر:ان شاء الله بعد ما رجعت البلوزه ...كانت تمشي وتحس بكآبه ..تشوف الناس حواليها وبالها مع احمد ((ليش وصلت علاقتنا لي هالدرجه !!! ليش يا احمد تغيرت جذي!!!) لمحت احد من بعيد تعرفه قربت واهي مستغربه لان اهو قال انه بالشاليه ويا ربعه غنيمه بصدمه :احمد !! احمد يوقف وبصدمه اكبر:غنيمه!!!!! غنيمه مستغربه:انت مو بالشاليه؟!! احمد توهق:انا ..انا غنيمه تشوف الولد الي يمه:منو هذا؟ احمد يبلع ريجه :هذا ...هذا غنيمه مو فاهمه شي :منو هذا احمد ؟ فهد يتعلق بدشداشة احمد:منو هذي بابا؟ غنيمه بصدمه :ولدك!!! احمد يهديها:غنيمه حبيبتي هدي شوي غنيمه عيونها دمعت :عندك ولد يا احمد؟ احمد يمسك يدها والناس عيونها عليهم :غنيمه الكل قاعد يشوفنا هدي شوي غنيمه تبتعد عنه بقوه:ما ابي اشوفك بعد اليوم احمد يناديها :غنيمه ..غنيمه بس غنيمه ما عطته فرصه وتمت تركض بالسوق بدون أي وعي ...والناس عينها عليهم والكل يفسر مثل ما يبي بالسياره فهد مو فاهم شي :بابا ليش تبجي؟ احمد يمسح دموعه :مو قاعد ابجي حبيبي فهد:منو هذي بابا؟ احمد:هذي ..هذي فهد :منو بابا؟ احمد :هذي ماما حبيبي فهد بفرحه:ماما ييت من السفر نزلت دمعه من عيونه يوم تذكر شيخه :أي حبيبي هذي ماما فهد بحزن:ليش ما عطتني بوسه احمد: بتعطيك حبيبي باجر نروح لها فهد يصفق بيده بفرح:ونااااسه بيصير عندي ماما احمد رجع فهد الشقه وراح لشقته لقى غنيمه بالغرفه منهاره من البجي تلم اغراضها.... قرب منها بكل هدوء من دون لا تحس وحط يده على جتفها :حبيبتي سمعيني غنيمه انتفضت منه بكل عصبيه:ولك عين تقول لي حبيبتي بعد احمد:ارجوج هدي شوي عشان اقدر اشرح لج غنيمه :ما ابيك تشرح لي شي ما ابي منك ولا شي..كل الي ابيه أنك تطلقني وبس احمد مصدوم:اطلقج مستحيل غنيمه بكل عصبيه:لا تقول مستحيل ..انت لازم تستحي على ويهك مو كفايه الي سويته طلقني ما ابي اشوفك احمد يقرب منها :حبيبتي اهدي شوي خل نتفاهم غنيمه تبجي:وانا اقول ليش ما تبي عيال ..لان عندك ولد احمد يمسكها من جتفها:انتي فاهمه غلط سمعيني غنيمه بصراخ تبتعد:لا تقرب مني وخر عني ما بينا تفاهم طلقني طلقني احمد يصارخ :غنيمه اهدي شوي خل افهمج غنيمه تسحب الجنطه وتطلع من الغرفه:ما بينا تفاهم وورقة طلاقي ابيها توصل لي باجر واذا اليوم يكون احسن احمد يحاول يوقفها:صبري غنيمه وين رايحه غنيمه بين دموعها: طلقني يا احمد هذا اخر كلام بينا سكرت الباب بويهه وراحت لسيارتها رمت اغراضها وره وساقت بأسرع ما عندها لي بيت اهلها ...... بريطانيا بالمطار مشعل يستقبلها بابتسامه:حمد الله على السلامه نورت بريطانيا انفال بحيا:الله يسلمك مشعل:قبل لا اوديج لشقتج باخذج لشقتي انفال استغربت:ليش؟ مشعل:في مفاجأه تنتظرج هناك انفال :شنو؟ مشعل يبتسم لها:اذا قلت ماراح تصير مفاجأه انفال:ههه اوكي انشوف شلون راح تكون ردت فعل انفال؟!! جاسم بيجبر حلا على رجوعها لطلال؟!! طلال وشذى بيعيشون شهر عسلهم من غير أي مشاكل؟!! غنيمه واحمد شنو نهاية علاقتهم ؟.!! شنو قصة فهد ؟!! حور ومشعل انتهى حبهم للابد؟!! Link to comment Share on other sites More sharing options...
دلوعة ماما Posted ديسمبر 1, 2007 Report Share Posted ديسمبر 1, 2007 ننتظر بفارغ الصبر واتمني انج ما اطولينه يسلمو Link to comment Share on other sites More sharing options...
دلوعة ماما Posted ديسمبر 1, 2007 Report Share Posted ديسمبر 1, 2007 ننتظر بفارغ الصبر واتمني انج ما اطولينه يسلمو Link to comment Share on other sites More sharing options...
ريم المها Posted ديسمبر 1, 2007 Report Share Posted ديسمبر 1, 2007 يسلموو حــلآلآلآ الله يعطيج العافيه ننتظر البارت اليديد Link to comment Share on other sites More sharing options...
wafooy Posted ديسمبر 1, 2007 Report Share Posted ديسمبر 1, 2007 يسلمووو وبانتظار البارت الياي على احر من الجمر Link to comment Share on other sites More sharing options...
Recommended Posts