h_lo0ove Posted يوليو 28, 2008 Report Share Posted يوليو 28, 2008 تروحين وترجعين بالسلامة في انتظار البارت Link to comment Share on other sites More sharing options...
ولائية Posted يوليو 28, 2008 Report Share Posted يوليو 28, 2008 تروحين وترجعين بالسلامة في انتظار البارت نبي باااااااارت طويل Link to comment Share on other sites More sharing options...
بحرانية كول Posted يوليو 28, 2008 Report Share Posted يوليو 28, 2008 تروحين وتردين بالسلامه خيوه Link to comment Share on other sites More sharing options...
Miss Girl Posted يوليو 29, 2008 Report Share Posted يوليو 29, 2008 يلا تأخرتين اليوم الثلاثاااااء Link to comment Share on other sites More sharing options...
هيوفي Posted يوليو 29, 2008 Report Share Posted يوليو 29, 2008 hi 8aythraaaaaaaaa anti 6ol 3mrc abd3 fe al899 o ma nasenya wallah 8a9tc ana o anth ta3ahdna n7b w la ba3ad na8sa o kant aktar mn abd3 o al7en haty ba3ad 8a9a wala aro3 taslmeen 7abobaaaaaaa Link to comment Share on other sites More sharing options...
حبي جوجو Posted يوليو 29, 2008 Report Share Posted يوليو 29, 2008 يلااااااااااااااااااااا ذبحتينا عااد Link to comment Share on other sites More sharing options...
متيم عراد Posted يوليو 30, 2008 Report Share Posted يوليو 30, 2008 دشيت قلت باجوف بارت شطووووووووووووووووله ماجفت شي Link to comment Share on other sites More sharing options...
القيثارة الحزينة Posted يوليو 30, 2008 Author Report Share Posted يوليو 30, 2008 (edited) مرحبــــا بـجـد اعذرونــي هالمـــرة .. ادري وعدتكم ببارت طويل .. بس الله يشهد علي طول هالكم يوم اللي كنتون تتوقعون اكتب فيها بارت .. كنت ما اقدر احك شعر راسي .. يا طالعة للسوق يا في ناس يجوني بالبيت .. غير الاشغال اللي على راسي حتى اغراضي ما رتبتها الا امس الليل الساعه 12 مع اني عقب شوي بسافر.. عشانكم بس قعدت من الصبح وكتبت لكم كم صفحة .. و امي رايحة رادة تهذر فوق راسي تبيني اكمل اغراضي لان تأخرت .. غير الموقف اللي لا احسد عليه اللي صادني امس للحين متضايقة منه .. ادري هذرت عليكم وايد بس لان في ناس ما يعذرووووني .. قلت اعطيهم تقرير مفصل شسويت وش ما سويت جان يعذروني .. المهم ما بطول عليكم .. هذا اللي كتبته لكم ما بسميهه بارت ولا بحط له رقم .. ( بعـد يـومـيـن ) كـانـت الجـوري كالعـادة بدوامـهـا وشغلـهـا المعتـاد .. خرعتهـا أمـانـي وهـي داخلـه : بووووووو .. الجـوري متـخرعـه: يمه منج ما تخلين سوالفج مع ويهـج .. أمـاني: هههههههههه بعد انتي بسرعه تتخرعين شسوي لج .. الجـوري: هيهيهي خفيفة حدج .. قعدت أمانـي مقابلتها وقالت : انتي وبعدين معاج يلا قومي .. الجـوري: وين اقوم.. أمـاني: اف منج .. اللحين وقت البريـك بعد وين تقومين .. الجـوري: لا انه اتفقت مع المديـر اخذ البريـك بعدين .. لان اللحين في شغل ضروري لازم اخلصه له .. أمـاني: يا الله منج .. ع طول ذابحة نفسج بهالشغل .. تنفسي شوي .. الجـوري: حبيبتي انتي مكتبج هناك بره وعلى كيفج اللي تسوينه .. موب انه .. جدام عيون المدير 24 ساعه .. وين اتنفس بالله عليج .. أمـاني: ايه والله الله يعينج .. الجـوري: انزين اللحين ممكن تتركينـي اكمل شغلي؟ أمـاني تاخذ راحتها اكثر بالقعده ع الكرسي: لا حبي انه بانطرج .. الجـوري : امون وش تنطريني بعد .. انه بكمل عقب ساعتين يمكن .. وبعدين اذا طلع المدير وجافج معاي وهو يعرف ان عندي شغل ضروري .. بيزفنا احنا الثنتين .. أمـاني وقفت : يمه منج .. زين بروح .. بس بعد الدوام مرينـي وصليـنـي معـاج سيارتي خراب ( خنفست بويه الجـوري ) باي .. ضحكت عليها الجـوري وتوها بتطلع اماني دخل شخص خلاها توقف مكانها وتبقق عيونها فيه .. لكن هو تجاهل وجودها و اتجه ناحية الجـوري.. ولازالت أماني واقفة .. رفعت راسها الجـوري وانصدمت لما جافته واقف يبتسم في ويهها واليوم شكله غيـر كان لابس قميص وبنطلون ونكتاي .. ووجهه كان منور اليـوم وباين عليه نشيط .. الجـوري اعطته ابتسامة متوترة وقالت: الوالـد موجود اذا حاب تدش عنده .. فيصـل تجاهل كلامها وهو يتأملها بإبتسامة ساحرة: شخبـارج الجـوري .. الجـوري : الحمد لله .. فيصـل حاب يسولف: ها شلونه الشغل عندكم؟ تراني بداوم معاكم من اليوم .. ها وش تنصحيني فيه؟ الشغل عندكم مريح ولا ادور لي مكان ثاني ههههههه .. الجـوري برسمية: انت تداوم وتحكم بنفسك .. فيصـل حس فيها مو حابة تسولف معاه فقال: اوكيـه بالاذن .. انا داخل عند الوالد .. الجـوري: تفضل .. طالعها لثواني بنظرات مجهولة المعنى بالنسبة للجوري .. و اتجه بخطواته الواسعة لمكتب ابوه .. دق الباب بعدين فتحه ودخل والإبتسامة الحلوة لازالت مرسومة على ويهه .. بو عبـد الله : هلا والله تو ما نورت الشركة .. فيصل يبوس راس ابوه : منورة بنور راعيها .. بو عبـد الله : ها اجوف زايرنا اليوم .. فيصل يعدل نكتايه ويقول : ها يبه شرايك بكشختي .. تصلح للشغل؟ بو عبد الله : هههههههه يعني حضرتك يايني الساعه وحده الظهر تبي تبدي دوام .. يبه اذا ما تدري احنا نداوم سبع ونص الصبح .. فيصل : لا يبه انا بس جاي ازوركم و اتفرج ومن بكرا ان شاء الله بداوم .. بس اليوم ابي اجوف مكاني و اجوف الشركة وهيك يعني .. تقدر تسميه يوم تعارف ههههه بو عبد الله : والله وطلعت نشيط .. جوف .. اليوم انا مشغول والجـوري مشغولة يعني ولا واحد مننا يقدر يراويك الشركة ويشرح لك كل شي .. ان شاء الله تعال بكرة من الصبح وراح نراويك كل شي .. فيصل مبتسم وهو يفكر في داخله انا محد جابني ثالث يوم من سفري الا انتي يالجـوري .. قعد يسولف مع ابوه شوي .. بره عند الجـوري و أمـاني .. أمـاني على طـول راحت للجوري وهي في حالة يرثى لها من اللي جافته: جوجوووو بسرعه خبريني وش ذا المزيون اللي كان هني .. منو هذا .. شكلج تعرفينه؟ الجـوري تطالعها باستهزاء : شفيج انتي .. أمـاني وهي تتذكر شكله: ياربي وسامة مو طبيعية .. كشخة .. رزة .. شخصية .. واي واي .. بسرعة قوليلي منو ذا .. الجـوري : ههههههههههههه والله مالج حل .. أمـاني وهي تتذكر : ايييييييه قال بيداوم عندنا .. حلفييييييييييي .. يعني كل يوم بنقابل ذا الوجه الصبوحي؟ الجـوري ماتت من الضحك عليها .. أمـاني عصبت: يلا يلا بسرعه عطيني السيرة الذاتية تبعه .. الجـوري: ههههه الله يغربل بليسج .. هذا ولد المدير ...... ما مداها تكمل الا شهقت أماني : ياااااااااااااااااااكبرها .. ولد المدير بعد مرة وحده؟ ( تصفق خدها ) ويلي ويلييييي .. الجـوري: ههههههههه انتي علامج ميتة عليه جذي .. أمـاني : والله ان ماعندج احساس .. انزين ولد المدير تونا جايفينه .. احنا خبرنا بالاستاذ عبدالله ولده وذاك خالد الصايع اللي داوم كم يوم .. هذا من وين طلع .. وليش توه طالع اصلا. الجـوري: ههههههه خفي على حالج شوي .. الله يسلمج من يومين .............. قاطعتها أماني: ياحمارة .. وشهو من يومين؟ ليكون جايفته من يومين ولا خبرتيني .. الجـوري : شفيج خليني اكمل .. من يومين هذا هالفيصل جى لعندنا اهني .. انا ماعرفته بعدين دخل ع المدير و انا وراه ابغي اوقفه .. موب راضي اخبر المدير من يكون اهو .. و انا ما اعرفه .. فدخلت وراه .. لقيت المدير ياخذه بالاحضان وحالتهم حاله .. اخر شي عرفت انه ولده و انه رايح يدرس بأمريكا من خمس سنين وتوه راد .. وشكله بيداوم عندنا .. أمـاني تقعد ع الكرسي: الله يعني هذا بنقابله يوميا .. والله بتنفتح نفسيتنا للدوام .. الجـوري: الله يشافيج .. قومي قومي خل اكمل شغلي أخرتيني .. أماني وهي طالعة : زين زييييييين .. داخل عند فيصل و أبوه .. فيصل وهو يسكر موبايله ويوقف : يلا يبه بروح لـ لموووه .. شارطة علي اليوم اروح اخذها من الجامعه .. صحيح يبه .. اي جامعه اهي .. بو عبد الله: هههههه جامعة البحرين .. يلا روح لا تتأخر عليها .. فيصل: ههه ان شاء الله .. يلا اجوفك ع الغدا ..في امان الله بوعبد الله: الله وياك .. طلع فيـصل من مكتب ابـوه .. قلبـه دق وهو يفتح الباب .. وقف مكانه شوي وقال : اف منك كأنك مراهق .. ياخي اثقل شوي .. طلع وهو مبتسم .. طاف عليها ورفعت راسها له وقال بإبتسامة: يلا نجوفكم بكرا .. الجـوري ردت له الابتسامة: على خير ان شاء الله .. طلع من مكتبها متوجه لسيارته الجديدة اللي شراها له ابوه هدية بنفس اليوم اللي وصل فيه. وصل السيارة وهو حاط يده ع قلبه ويقول بداخله: بس بسك تدق هالكثر .. افففف عاد موب لهالدرجة .. ركب السيارة ورن تلفونه مرة ثانية رد عليها : هلا لموه .. لمـى: يلاااااااا فصول متى بتيي .. نقعتني .. فيصـل متضايق : يايج اللحين مسافة الطريق بس .. لمـى: اووكيه باي .. سكر فيصل التلفـون ورماه ع الكرسي جنبه وشغل السيارة ومشى وهو يفكر : اوووف مابي مابي .. ليش مو راضية تروح من مخي ليل ونهار اااااه .. صج اعجبتني .. بس مو .. مـ ــو.. ضرب ع الستيرنغ بقهر حتى الكلمة مو راضي يفكر فيها .. ع هالافكار وصل الجامعة .. دخل وهو مب عارف وين يلاقيها .. الجامعة كبيرة .. دق عليها ووصفت له المكان وراح لها .. لقاها مع سارا واقفين .. دق هرن وأشر بيده لهم .. سارا تمسك يد لمـى: وه وه ماقدر وصل الوسيم .. لمـى: هههههه عن الهبال ويلا امشي احترقنا بالشمس .. دخلـو السيارة وسلمو .. فيصل: عليكم السلام هلا .. ( يخبي ضحكته ) شفيج ويهج احمر حالتج حاله .. لمـى تطالعه ع جنب : بعد منقعنا بالشمس .. وينك فيه انت . فيصل وهو يمشي بالسيارة : كنت عند ابوي بالشركة ( يلتفت على سارا ورا ) شلونج سارا... سارا بوناسة : والله الحمد لله .. شلونك انت ويا جو البحرين العجوبي .. فيصل: هههههههه مافي احس منه .. سارا : والله ماعندك سالفة .. فيصل: حرام عليج .. ياي البحرين اتدفى بالشمس .. صار لي خمس سنين ما ذقت الدفى ههههههههههه .. سارا: اهني موب بس بتدفيك الا بتحرقك .. فيصل: لو تقتلني بعد قابل .. اهم شي ما اطلع من البحرين مرة ثانية .. لمـى: سمعنا تفكر بالماجستير ..والدكتوراة .. فيصل: ههههه يقولون ... بس توبة ماروح هناك .. قعدو يسولفون طول الطريق وفيصل نسى او بالاحرى تناسى الموضوع اللي مضايقه .. بعد شوي سكت وردت الضيقة وباين على ويهه .. لمـى بصوت واطي وهي تلاحظ ملامحه المزعوجة: فيصل فيك شي؟ تنهد فيصل وهز راسه يعني لا .. لمـى: فيصل لا تجذب باين على ويهك متضايق .. فيصل بصوت ظن ان سارا ما تسمعه: ذبحتني .. ليل ونهار مو راضية تفارق تفكيري .. لمـى فاتحة عيونها : منهي ذي .. فيصل حس المكان موب مناسب للكلام : بعدين اقولج .. سكتت لمـى وهي تفكر .. ليكون كان يحب هناك ؟ !! معقولة .. سارا ورا تتحرقص و اهي تسمع هالكلام .. شكله يحب ششششششششت .. وصلو بيت سارا وقالت : يلا ثنكيو فيصل ع التوصيلة .. مع السلامة.. فيصل+لمـى: الله وياج .. ** رجعـت مـروى من المدرسة .. اليوم اخر يوم لهم يداومون .. لان راح تبدى الامتحانات بعد اسبوعين .. مروى معطية نفسها اجازة هاليومين عن الدراسة.. عشان راح تدرس بهالاسبوعين زين .. رجعت البيت ماشافت حد تحت .. ركبت فوق دخلت الحجرة ولقت غادة قاعده وبيدها كتاب الجامعة وشكلها تدرس .. مروى وهي تنزل شنطتها : هااااي .. غادة وعيونها بالكتاب: اهلا راحت مروى تبدل ملابسها .. ورجعت تصلي الظهر .. خلصت من الصلاة التفتت على غادة لقتها ع اللاب توب .. قامت مروى ع طول لجهة لاب توبها: غادووه .. مافتحت اللاب توب للحين .. تعالي خل نجوف .. غادة وهي تكتب بالكمبيوتر: دقيقة ( عقب شوي راحت جهتها وخذته منها ) خل اجوف .. خذت غادة اللاب توب وفتحته وقامت تحوس فيه .. خبرة بالكمبيوترات .. ونزلت لها جم برنامج مهمين حق الكمبيوتر وعطتها وياه : تفضلي اللحين جاهز .. مروى تاخذه وهي مستانسة: ثانكيووووووووو غادوو تسلم ايدج .. غادة ترجع لكمبيوترها: الله يسلمج يلا اشبكي اون ووو بدخلج انفايت معانا .. مروى بحماس : اوكيه .. دخلت مروى المسن .. وسوت انفايت مع غادة وربعها وكانو الموجودين هالمرة اربعه .. إيـــاد > سحر > نـواف > أمـل غادة: مرحبااااااا آيم باك .. وش كنتون تحشون فيه؟ نواف: كنّا نعقر عليج ونقول مطنشتنا مادري شعندها .. غادة: ههه لا بس كنت مع مروى بنت عمي اللي كلمتكم عنها واللحين بسوي انفايت .. دقيقة بس .. بس دشت مروى ما مداها تتكلم على طول قام إياد يرحب : هلا والله هلا بالزين كله .. منورتنا الغالية .. هلا بج معانا .. نواف: خخخ بدينا .. هلا هلا مروى .. مروى : اهلا فيكم .. كيف الحال .. سحـر: احنا بخير شلونج انتي .. مـروى: والله تمام .. إياد: انتي بالمدرسة صح؟ مروى: ايه اخر سنة .. إياد: زين زين .. بالتوفييييق .. مروى: تسلم .. غادة: وينها املووه .. صاخه.. نواف: مادري قالت برب .. ولا رجعت .. سحـر: ياااا هالأمل ذي .. متى بتعقل مادري .. إياد: انا ذي نزاروه شكلي بعطيه درس يأدبه .. مأذي البنت أذية .. نواف: لحد منكم يتدخل .. خلوهم على كيفهم .. غادة: اياد معاه حق .. بصراحة نزار مصخها مع البنت .. سحـر: بس مع هذا .. خلوهم بحالهم ماعلينا منهم .. نسيتو اخر مرة نزار شقال .. خلاص.. مروى: ههه كأنّي ضايعه بينكم .. نواف: هههه وي نسيناج خخخخخ خل نقول لها السالفة .. إياد على طول نط: الله يسلمج هذي أمل ونزار يحبون بعض .. بس نزاروه مصخها كل يوم يسوي لها سالفة ويزعلها وبعدين يقلبها عليها ويسوي نفسه هو الزعلان .. وهي مسكينة وايد حساسة وتلاقينها كله متضايقة .. مروى: مسكينة الله يعينها .. قعدت تسولف معاهم لفترة طويلة .. وحست طول الوقت .. ان اياد هو اللي دايما يتكلم معاها ويحاول يلفت انتباهها وايد .. ما غفلت عن هالشي لانها قوية ملاحظة .. اخر شي استأذنت عشان بتقوم تنام .. تعبانة من ردت من المدرسة للحين هي ع النت .. إياد: سلامتج من التعب .. مروى رافعة حاجب: الله يسلمك .. إياد: طبعا ايميلاتنا واضحة عندج .. بتضيفينا طبعا .. مروى: اوكيه اللحين .. ضافت مروى الموجودين بالمحادثة كلهم .. مروى: اللحين تمام .. يلا استأذن إياد: متى بتردين؟ نواف: مسوي تحقيق للبنت حشى خخخخخخخ مروى : هههه لا عادي .. يمكن في الليل .. بس الأيام الجاية ماراح ادخل ع طول لان عندي دراسة .. إياد: الله يوفقج .. مروى: يسلمو .. يلا باي باي.. طلعت مروى من المسن وسكرت اللاب توب .. والتفتت على غادة لازالت قاعده ع اللاب توب ومشغولة تتكلم مع احد .. حستها طول القعدة بالمحادثة ماكانت معاهم على طول .. شتسوي؟ طنشت مروى وتغطت ونامت .. ** طلع من الحمام ماخذ شاور وكان لابس الجينز بس وشعره مبلول ومخربط .. جافها واقفة جدام المنظرة وتحط اللمسات الاخيرة على الميك اب .. وقف وهو مبتسم يطالعها من فستانها الزهري الحرير اللي منسدل ع الارض بنعومة .. لشعرها المموج المنسدل على كتافها وظهرها .. ونزلت عيونه على بطنها البارز شوي بما انها بالشهر الرابع .. اتسعت ابتسامته اكثر وراح وراها وهي تلبس السلسلة وتحاول تسكرها من ورا .. اخذها من يدها وسكرها لها .. وحظنها من ورا .. ويده تلامس بطنها ويتحسس طفله اللي ينتظره بفارغ الصبر .. بـدور هذي الحركة تضايقها مسكت يده وبعدتها عن بطنها والتفتت عليها وعلى وجهها الابتسامة ما تبي تزعله .. قالت بدلع ونعومة: حبيبي شرايك فيني .. تركـي يحاول يتغاضى عن الحركة اللي سوتها .. ابتسم لها وحط يده ع خدها وقال : تجننين .. بـدور وهي تلعب بخصلة من شعرها وتقول: بس؟ تركي يحتظنها وهو يضحك: هههههههه اخاف اقول اكثر تجوفين حالج علي .. بدور : ههههه عن الهبال ويلا بسرعه تأخرت ع العرس .. تركـي اخذ قميصه من على السرير ولبسه : ولا يهمج اللحين نمشي .. وقفت تسكر له ازرة القميص وبين الفترة والثانية ترفع عيونه تطالعه .. اخر شي قال تركي: اوهو بدووور لا تطالعيني جذي .. ترى اكنسل عليج العرس اللحين .. بدور: هههههه ما تقدر .. تركـي يقرب منها ويقول بخبث: ما اقدر ها .. بدور تغمض عيونها :خلاص خلاص والله ما اطالعك .. خل اكمل .. كملت وراحت اخذت المشط ومشطت له شعره .. تركـي قاعد وهي تمشط شعره وهو يضحك :من قدي مدلعيني بعد .. بدور: هههههه ياحظك .. يلا كملت قوم .. تركـي يطالع شكله النهائي ويقول : تمام .. ( اخذ العطر وتعطر والتفت عليها ) يلا حبي.. بـدور لبست الجاكيت فوق الفستان اللي مفصلته مع الفستان عشان تلبسه اذا طلعت للعرس .. ولفت شيلتها اللي بنفس اللون .. وخذ الشنطة وقالت : يلا حبيبي .. طالعها لمدة عقب باسها وقال: انتي حلوة .. بـدور ضحكت بحيا وقالت: شكرا ههه يلا نمشي .. مسك يدها وطلعو من جناحهم .. شافتها ام تركي : شهالزين شهالحلا .. تركـي يحظن بدور : يمه شوي شوي على مرتي لحد يحسدها .. تراني ابغيها .. ام تركي: يمه من عيارتك .. اللحين انه بحسدها؟ بـدور: هههه ماعليج منه عمتي.. تسلمين والله عيونج الحلوة .. تركـي: يلا لا تقعدون تتغزلون في بعض انا اغار يلا مشينا جدامي .. بدور: ههه اوكيه يلا مع السلامة عمتي .. ام تركي: الله يحفظكم .. طلعو مع بعض لعرس رفيجة بدور .. و ام تركي واقفة مبتسمة تطالعهم وتدعي لهم بالتوفيق والله يهنيهم لانها ملاحظة عليهم الفترة الاخيرة شوية توتر واضح في علاقتهم .. مرت على غرفة ريان .. لقت الباب شوي مفتوح .. طلت براسها لقته نص منسدح ع السرير وبحظنه اللاب توب .. وحاط السماعات وشكله داش جو ويا الاغاني .. دخلت الغرفة وهي مبتسمة .. رفع راسه انتبه له وقام يغني مع الاغنية بصوت عالي ويأشر على أمه : هــلي لا تحرمـوني منـه .. هلـي لا تبعدوني عنـه .. مثل ماهــو قطعة منـي .. انا ترانـي قطعة منــه .. قعدت جنبه ام تركي وطقت على يده وهي تضحك : يلا عاد .. ريان يكمل وهو يضحك ويطالع امه: هـلـي الله يسامحـكم اذا ماكان عاجبـكـم .. هلـي تكفون طالبكم .. انا احس في شوفه الجنــــة .. ام تركي : ريانو بسك .. نزل ريان السماعات وقال : هلا وغلا بالوالدة .. اوه انتي هني؟ ام تركي : ياشينك اذا تخيففت .. ريان علامات الصدمة على ويهه: افا .. ام تركي: ههههههه خل عنك السوالف وقول لي .. وشلونها الجـوري .. ريـان بعتدل في قعدته ويبتسم لأمه ويحرك حواجبه: منيحآآآآآآآآآآآ دام ولدج معاها .. ام تركـي: وشلونها اختها؟ للحين ما ردت؟ ريان: للحين لا .. ام تركـي: الله يعينها هالبنت .. ريـان مبتسم: يلا الله كريم .. مردها بترجع .. ** رجعت على ورا وهي ترتجف من نظراته اللي تجوفها ... لصقت بالجدار وهي تطالع حواليها مافي مجال تهرب .. واقف بويهها وباب الصالة بعيد عنها شلون تدخل وتقفل عليها الباب؟ طلال بكل خبث: الـيـوم بالذات ماراح اضيعج من ايدي ..( يأشر على نفسه ) انا .. ( يأشر عليها ) و انتي .. ( يغمز ) لحالنا .. الجـوري بصوت يرتجف: طلال اذا ما طلعت بره بسوي فيك شي ما يعجبك ها .. طلال وهو يضحك ويترنح يمين ويسار : وريني يا حلو .. الجـوري تحس خلاص مو قادرة تشيلها رجولها .. هي متأكده انه سكران او شارب شي .. لان وقفته مو طبيعية وحتى طريقته بالكلام .. يعني بيسوي اي شي وهو مو حاس بعمره .. تقرب منها اكثر وصار على بعد خطوات بس .. الجـوري وهي تلصق في الجدار اكثر ودقات قلبها تزيد كل دقيقة .. نزلت دموعها: طلال تكفى الله يخليك بسوي لك اللي تبي .. بس ابعد عنييييييييي .. طلال بعيون شبه مفتحة: هه ابعد عنج؟ اخر شي افكر فيه بهاللحظة .. ( قرب منها اكثر ) .. تعالي ياحلوة .. الجـوري صرخت : ابعدددددددددددددد .. طلال يأشر بيده : هدي هدي وش فيج يالغالية .. انا جاي عشانج انتي .. عارف ان احنا لحالنا.. وانتي ماراح ترديني .. يعني ولد عمج اعتقد اولى صح؟ ( يغمز ) .. يقولون الاقربون أولى بالمعروف ههههههههههههههه .. صح يا قمر ولالا؟ هو صج ذاك مزيون وايد ويمكن بتحبينه اكثر مني بس صدقيني ولد عمج يعجبج هههههههه .. ( بدى يخربط عليها وكلامه مقطع وغير مفهوم .. وقام يقول كلام قذر ) .. الجـوري صرخت عليه: جاااااااب اسكت يالخسيس .. طلال يحط يده بعصبيه ع الجدار اللي وراها ويصير وجهه بوجهها وهو يصرخ: انا خسيس؟ عيل تحملي اللي بييج .. انتظروني لبعد ما ارجع يالله مع السلامة .. و اسمحو ليي .. وسامحوني ع اي تقصير نلتقي على خير Edited يوليو 30, 2008 by القيثارة الحزينة Link to comment Share on other sites More sharing options...
ام عبادي Posted يوليو 30, 2008 Report Share Posted يوليو 30, 2008 لااا جان واصلتي اشوي .. قطعتينه في موقف .. يلا ماعليه بنكون في انتظارج تروحين وترجعين بالسلامة ان شاء الله بتوحشينه Link to comment Share on other sites More sharing options...
ولائية Posted يوليو 30, 2008 Report Share Posted يوليو 30, 2008 يسلمووووووو حبوبة على البارت تروحين وترجعين بالسلامة ننتظرج Link to comment Share on other sites More sharing options...
Recommended Posts