برشلوني حتى النخاع Posted نوفمبر 16, 2008 Author Report Share Posted نوفمبر 16, 2008 ترا المقابلات مستمرة .. يمكن تقولون خلص شهر رمضان .. بس للحين احتفظ بمقابلات .. ومخليها للأخير .. انتظروهااااا هالمرة .. ملسونة القسم .. MS.Bishoo اخليكم ويا المقابلة cv بسيط من فضلج اسمك : يا بشرى يا بشاير أختاروا لكم واحد ترتيبك في العايلة: الثانية ،، البنت الوحيدة محافظة .. منطقة : .مدينة حمد عمرك : 16 تاريخ ميلادك: . 28-12-1990 هواياتك: آغربل أمي و آعاند ابووي ،، مادري ليش آحس بمتعه مكان عملك : لين اللحين في المدرسة ،، هالسنة التخرج انشاء الله دراستك : باروح توجيهي عندج ليسن : للأسف لاء قارئ قرآن ترتاحين لصوته ؟ ماكو واحد محدد أكله دايم تحبين تجوفينها جدامج ؟ الورق عنب ، والبيزا الصغار تساعدين البيت .. وتطبخين .. ولا ؟ بس لين تروح الخدامة اهني امي اتطلع الحرة انا بصراحة آخاف آولع جبريت افضل البرامج التلفزيونية الرمضانية ( تحبين تتابعين مسلسلات .. مسابقات .. برامج دينينة.. ؟؟) باب الحارة فقط لا غير توج متخرجة من الثانوي.. متخوفة من الحياة الجامعية ؟؟ والله لين اللحين ما تخرجت وبرز لي موضوع حق تخرجي اييي وايد متخوفة من الجامعة أحسها عالم ثاني وماعرف شنو بادرس بس توو الناس على هالحجي صحيح اخترتي بيشو لأنه اسم دلع لأسمج؟؟ لاء ،، انا ربعي كلهم ينادوني بشوور ،، بس هالأسم عجبني وحطيته تموتين على تامر حسني .. وما ترضين عليه بالغلط !! ما اقوله صحيح ؟؟ هههههههه أشدراك أكيد من التواقيع؟؟ حددددي احبه وااايد ومارضى عليه لدرجة اني اليوم الظهر وانا نايمة حلمت فيه بيشوو في المنتدى !! كم من الوقت تقضين على المنتدى ؟ أممم من اربع الى خمس ساعات كيف تتصرفين مع الأهل و ضجرهم من استمرار جلوسك على المنتدى؟ اخواني حاطين علي حطة من يشير الكمبيوتر او النت يصير بطيئ سيييدة يقولون من بحرين تودي بيشوو .. من مبدع الأسبوع .. الى الجندي المجهوول .. ما تلاحظين بأن جانب العطاء عندج خف؟ أهوة خف لأنة المواضيع ماعادت مثل قبل وين ايام مواضيعك اللي تحير الواحد وايام مواضيع MR-XXX ،، أما مواضيع هالأيام أحسها تافهة (( مسامحة )) وأجوبتها محدودة يعني ما يقدر الواحد انه يتعمق او يتناقش فيها وايد هل ترين تطور في قسم النقاش عن السابق ؟ كيف ذلك؟ أييي واايد ماشاء الله عليها جمالي ما قصرت تؤيدين خروج بنات المنتدى والطلعات اللي تصير؟ اي ليش لاء معني ماروح معاهم بس أحس طلعاتهم حلوة اقسام لا تنسيها بالمرة .. اقسام تشتغل صح .. اقسام ودج تنحذف ؟؟ قولي لنا عنهم؟؟ قسم النقاش اهوة القسم الوحيد اللي مقتنعة فيه ،، ماجوف فيه اي نقص او غلط علشان جذي احسه قسم كامل قسم ودي انه ينحذف: الألعاب والطرائف والنكت شنو اللي خلاج تتعلقين بالمنتدى ؟؟ مادري اممم .. شخصيتج جافة بعض الشيء في بعض الأحيان .. يا ترا شنو السبب ؟ ساعات في أعضاء عبالهم روحهم فلته ومحد قدهم ،، يمشون ويحتقرون في الناس من خلال الردود ،، وانا من طبيعتي ماحب آسب ولا آلعن بس آحسس الشخص انه ولا شي وو ولا يسوى شي وبالتالي يقولون عني مغرورة شخص تتمنين رؤية تعلقيه ورأيه في موضوعج ؟؟ انا مو كثيرة المواضيع بس أحب آجوف رأي : برشلوني حتى النخاع ، MR-XXX ، عاشقة الأخوة 27 ، جمالي معذبهم ، أحلى حب ، داااناااات ، سايكو هل تزعلين اذا حذف موضوع من مواضيعج .. او نقل .. ؟؟ أيي ،، اذا نقلوه آعصب لأن ما يذكرون إلى أي قسم أنقل فآقعد آدور عليه واايد واذا انحذف بعد آتضايق بس الحمد لله ولا مرة صادني هالموقف امنياتج للقسم؟؟ أنه يتطور أكثر وأكثر ويكون من الأقسما النشيطة في المنتدى مثل الديوانية برايج شنو اللي ينقص القسم ؟؟ المواضيع المثيرة ، والأعضاء . واذا قلنا لج بنخليج مراقبة راح تختارين أي قسم ؟؟ مادري والله مافكرت بس آبي قسم هادئ. شنو ضافت لج المجلة ؟ والله تعرفت على البنات اللي كانوا معاي بالمجموعة اوو عرفت معلومات ماكنت آعرفها من قبل بالمختصر المفيد ضافت لي وايد أشياء وهل استفديتي من موضوع النقاش المخصص لكم في المجلة ؟ أييي شنو الأوسمة والأنجازات اللي حصلتيها ؟ بس مبدع الأسبووع أحسن قروب تشتغلين معاه ؟؟ الأعضاء اللي كانوا معاي في المجموعة (( داااناااات ، شيوخ محرق ، وطبعاً المشرف علينا برشلوني حتى النخاع )) ماشاء الله عليهم أعضاء في قمة التعاون ناس تحبين تشكرينهم ؟ كل اللي يحترموني ناس تشرفتي بمعرفتهم ؟ كل الأعضاء ماعدا عضوين بيشوو بس مع الناس !! شكلج؟ يينة حق الفضايح ،، اممم طويلة ، ضعيفة ، وزني 51 هاي كان في أول ثانوي بس ماعليكم كلة في الطول ترى ،، شعري قصير بس مو وايد لاني ماحب الشعر الطويل ،، وبس أوصفي لنا شخصيتج خارج المنتدى؟ شيطانة ، حركية ، كلة آضحك ، مغرورة ، آتنرفز بسرعة ، آحب آتغشمر ، عنيدة ، مافتكر في كلام أحد ، آسوي اللي في راسي بس آخذ شوور الناس لكن الرأي الاول والاخير لي طبعاً سيارتك المفضلة ؟ ماحب هالسوالف اهم شي سيارة زينة وخلاص بس تعجبني الـ avalon صح جذي يكتبونها لا؟؟ قدوتج في الحياة؟ محد أنا قدوة نفسي عطرك المفضل ؟؟ مافي عطر معين ،، آحب العطورات الرجالية بس ماحط منها (( ترى مو بوية)) لونك المفضل؟؟ الأخضر الفستقي أفضل وقت في اليوم ؟؟ وقت الطلعة أحلى وقت خصوصاً مكان فيه خسارة فلوووس يعني السوق ذبحتي هالسوالف بس ماقول الا الله يعين اللي بياخذني طمعانين في أسرارج .. تعلمينا !! سر تكشفينه لأول مرة أمام الأعضاء ؟؟ قبل يوم كنت آصوم ايام اللي كنت ياهل كنت اول ما آرجع من المدرسة آشرب ماي وآسوي روحي نسيت آخاف من الينانوة وااااااايد خوووف مو طبيعي والأبر مرة عرفت انج تحبين الوالدة وااااايد .. شنو تحبين تقولين لنا عن طيبتها ؟ أمي شخصية طيبة وايد عمرها ما قصرت عنا في شي ،، ما تتكلم عن الناس ،، تتجاهل صغائر الأمور (( يعني سوالف النسوان والعقرة )) ،، ماعندها شي اسمه انا امج استحي اوو لتقلين أدبج ،، عادي انتغشمر وياها أنحط عليها ما تزعل فديتها الله يخليها لي أهم سؤال .. نبي شي منج حصري حق هاللقاء ومحد جافه من الاعضاء في المنتدى .. صورتج .. صوتك .. توقيع بيدج .. شعر من أشعارج وخواطرج .. أحبك وتموت أنت فيني... وتحبني وأموت أنا فيك... يا حزني و فرحي وبهجة سنيني... أنسى نفسي وأحلم بيوم فيه ألاقيك... فداي أنت ولك يرخص كل ثميني... حسدوني على حبٍ فيه أنا صرت غاليك... يامن طبع باليوف وكان لي أحلى وليفي... لو بعتني بيوم أجيك أنا وأقول شاريك... كم يغار العذال وأنا بك وصيفي... ويظنون أني برخص الأثمان باعيك... غيضهم وخلني بقلبك الغيوري... مايعرفون أنك لقربي توسلت وأنا جيت لك راجيك... ماهمني لو غارت الدنيا من قلبك الحنوني... وياليتك تعلمني كيف أشكرك وأجازيك... يامن سكن بالقلب وحرم النوم لجفوني... حلفت بالله أني أموت بأسمك وطاريك... وقلهم أنك تحبني وأنا بحبك وصلت لحد الجنوني... ولا تشوف كلام الناس وتخليه شيٍ يعنيك... أخذها نصيحة من اللي تناديها حبيبي... ويارب تحفظك وترعاك عين راعيك... هذا كلام العيون واللي مكتوب على جبيني... ولو تركتك الدنيا والله أني ما أجافيك... الله يهداك لازم اتحرج الواحد ( ختامها مسك) شنو تقولين حق قسم النقاش ؟ نبي مواضيعك ترجع مثل قبل شنو تقولين حق جمالي معذبهم مراقبة القسم ؟ فديتها والله آحس أذيتها من كثر ما آطرش لها تقارير ،، اقولها الله يعطيج العافية على جهودج وو منتظرين منج ابداعات أكثر في تطوير القسم شنو تقولين حق منتدى البحرين اليوم واعضاء هذا المنتدى؟ أممم خلوو عنكم المواضيع البايخة الي أكثرها في قسم التصوير الشخصي والردود الهجومية انتظروا مني مفاجآت .. رااااااااااااائعة تبون تسمعون صوت بوسمرة ؟؟ تبون تعرفون الحريف على حقيقته ؟؟ تبون وتبون ؟؟ خلكم وياي بس والى اللقاء Quote Link to comment Share on other sites More sharing options...
برشلوني حتى النخاع Posted نوفمبر 16, 2008 Author Report Share Posted نوفمبر 16, 2008 (edited) يا هلا ويا مسهلا ويا مرحبا فيكم اجمعييييين اليوووم رحبوا معاي بالمبدع والرائع والأخ اللي الكل يحبة bo_samraa يا هلا فيك bo_samraa ابي منك اول شي هالأمور التالية ... اسمك، عمرك، تاريخ ميلادك، وين ساكن ، المحافظة ، الحالة الأجتماعية ، الحالة الدراسية ، عندك ليسن؟ اسمي احمـد مـال الله .. 21 سنـة .. 12-3-1987 .. مدينة عيسى .. الوسطى .. أعزب .. أدرس موارد بشرية معهد البحرين للتدريب .. اي نـعـم عندي ليسن وخبرة 3 سنوات قارئ قرآن خاص وتحب تسمع له ؟؟ قـارئ قرآن مفضل لديك خالد عبدالقادر مشاري العفاسي احمـد العجـمي بوسمرة ماهي الاكـلة المفضلة لديك؟ .. احب كل شــي خفيف .. واحب الدجـاج مـتى صمـت اول مـرة ..؟؟ الحمدالله كانت لي محاولات من الصف الاول هههههه كـنت اصـوم نص اليــوم والحمدالله بالصف الثاني صمت اكثـر من نصـف شهر رمضان حادث ماتنســـاه؟؟ للاســف كان حادث لصديقي ما انســاه واحمــد ربي انـــه قام بالسلامـــــة والله يرحمــهم اللي معاه مالفرق بيــن المراقب والمشــرف؟؟ يــا الله عليكـ .. صراحــه مافي هناك اي فرق مجـــرد منــاصب تشكيليـة لا اكثر ولا اقل ولكنــه مردوده المعــنوي لي كان كبيــــر والشكر للادارة لمتابعتنا في مهامنا الادارية قســـم اتســويه حذف؟؟ قســم اســويه اكــس صراحـــه هناك اقســام بالفعل بحاجـه الى الحذف قســـم هنا البحــرين .. القســم اللي منه تتكــون مشاكل بحرين تودي اقســام الفنانين المهجورة قســـم جمعية الشبيبة البحرينية .. الحين صار له شهر ما تغيرت مواضيعه تقريبا هــذا اكثر الاقســام اللي ارغب بحذفهم. لو عدنا شــوي للوراء وقلنالك اختار لك قسم اتراقب عليه؟؟ والله شـاقولك اخــوي اكيــد الاختيــار الاول بكــون الديوانية .. لانه العطاء فيـــه غير محــدود وهناك اقســام بعد.. مثال قسـم الصـور حلو ..قسم المواهب وكبار الشخصيات, بيــني وبيــنكـ احب اكون متمرس لاكثر من قســـم واوزع جهودي على نطاقي اللي اعتدت عليه سمعنا عن مفاجأة .. بترجع مراقب ؟؟ لا ما راح اكــون مراقب .. ولكــن خلوني اســويها لكم مفاجــأة بوسمره .. الطلعات بين الاعضاء .. كلمنا شوي عنها؟؟ بالنســبة عن الطلعات الحمدالله دائمـا ماتكــون طلعاتنا متحابة ومتجانسة حيث يلتقي الاعضاء لاول مرة ولا يحمل احد الحقد على الآخـر واذا وجـــدت مـع انه الحمدالله ماصادفتني لانه مادخل روحي في هالامـور ولكــن اذا حصــل اكيد راح نحـاول نصلح ما بيـــنهم شلون تجوف المنتدى وتطوره والاعضاء اللي يسعون الى النيل من المنتدى؟ الحمــدالله .. لي في هالسـؤال رؤيتيـــــــن الرؤية الاولى: المنتدى الحمدالله المنتدى يحــاول للرجــوع لمستواه الســابق ويشهد على كلامي الـرانك العالمي للمنتدى في تقدم مستمر وكانت الجهود الموجوده من قبل المشرفين مثمره الرؤية الثانية : الاعضاء واذا كنت تقصــد من ناحيــة المشاكل والاعضــاء فللاســف لا تــزال هناك فئــة جعلت مــن انفســهم والمنتـدى مسـتوى لا يشــرفهم نامـــل ونطلب من الله .. ان يهديهم بوسمره - صرت مراقب من كان له الفضل في عليك؟؟ فضـل الله سبحانه وتعالي ومـن ثــم مــن طبعي انــا بطبيـعتي احب الاعمــال الادارية ولكــن ما انســى من كان له التشجيع في عطائي اكثر بالاشـراف politskof .. ابن الرفاع .. احمـد البنعلي شلون تتصــرف مع البنات والايميل ؟؟ تصــرفــاتي مــعاهم عادي ودائمــا ماتجــمعني معاهــم الاشغــال مثل المسابقات والفعاليات والترتيبات بوسمره تعاملت مع ناس كثر من المنتدى .. الجيد والرائع والسي والخبيث .. كلمني عنهم؟؟ للاســف هناك الكثيــر من الشائعات اللي قالت اني على نفس اطباع بعض الاعضاء سـبق ونبهت وقلت انـــا بعيد كل البعد عن الاعضــاء مثل ماوضحــت في توقيــعي .. انا انســان لي طبعي ولي صفاتي ومــاتأثــرت ولله الحمــد باحــد .. وعمره الانســان ما تتأثر صفاته بين يوم وليله او صـــورة وصــورتين او ملتقى او ملتقيات الحمدالله ماتغرني الصفة السيئة .. بالعكس تغرني الصفة الحميده واهي اللي اكتسبها وانا واثق من نفسي ولله الحمد .. بوسمـره 2008 نفســه بوسمــره 2005 و 2006 و2007 .. ماتغير والحمــدالله انــه في هناك من يعرفني عدل وماقصــرو خبروني بالشائعات فيــكم الخير والبركــــة واشكــركـ اخـــوي على السـؤال اللي جعلني اوضح بعض الامــور للاعضاء ترشــح نفسك لمدير موقع منتديات البحرين اليوم ..؟؟ اي نعم ارشــح نفسي .. مثل ماوضحــت في سـؤال ســابق اني بطبعي احــب الاعمال الاداريـــة يقولون بوسمرة ما يبين الا في مواضيع انه مسافر .. انه راجع ..؟؟ شسالفة ؟؟ عندي توضيــح بسيــط لمن يقول هذا الامـــــر انـا دائمـا ما تكــون نشــاطاتي واعمــالي تكــون خفيــه .. بيــني وبيــــن الادارة يعني اكثـــر شغلي يكون في القســم الاداري .. والادارييـــن يلاحظون هالشي ماحب يكون شغلي واضح .. مع ان بالاونة الاخيرة كانت هناك كثير من المواضيع والترتيبــات اللي كان لي وجود فيها اتـــرك الحــكم للاعضــاء لهذا الســؤال توقيع العضوة والمراقبة السابقة الأخت ريفا المحرق .. يحمل في طياته الكثير والكثير .. ماذا تقول عن هذا التوقيع ؟ في البـداية احب اشكـر اخــتي ريفـا المحرق على الجهود الطيبة منها في المنتدى وجهودها بالارتقاء بالاعضـاء لج جــزيل الشكــر وبالفعل عجــبني التـوقيــع والكلام الواقعي اللي فيه ولكــن احب اقول للاخت دائمــا ماتكـون هناك تحـديات في الحيــــاة ^^ اوافقـج كــلامج 60% فالانســان عندمــا يجـعـل لديـه اهــداف يحـققها واوجـــه هـــذا التوقيــع الى عــدد مــن الاعضــاء لانه فعلا الحياة المنتداوية ماهي الا فقاعه هشـة ولكــن يمكــن صـنــع الكثيــــر مــن خــلال المنتديات .. فاختلف مع اختي ريـفــا عندما تكون الاهداف واضحـة فهاهـي عده نجــاحــات نحـققها ولله الحمــد مــن خــلال المنتدى .. فالتميز لا ننظر اليه من قبل الاعضـاء ولكــن التميز ننـظر اليه مــن خلال اعمالنــا الواقعيــــة .. وصراحــه انـا اتعامل بالمنتدى كانـه حقل تجـارب لحياتي الواقعيه صراحـــة لا انكـــر فعلمني الكثيـــر من اسـلوب الحـوار ..وكيفية التـعـامل مـع الناس باختلافهم .. فاعتقـد انه هــنــاك تمـيز وليس هشـا ولكـن على الاعضــاء الوصـول اليه ووضـع اهداف ذات ابعاد واقعيــــــة كلها اهــداف كــانت بعيدة الامل .. وجـائت الايام لتجعلها واقعيه من خلال المنتدى دورة منتديات البحرين اليـوم لكرة القدم . صيــف منتديات البحرين اليوووم فرحة الوطن في فرحة العيد وغيره الكثيـــر من الامور اللي تعلمناها من المنتدى وطبقتها في الواقع قســم يشتغل صح في رايك ؟؟ انــت عــارف جــوابي اكيــــد .. قســم النقاش واعطيه البيرفكـت صراحــه فعلا تواجــد مجموعه مميزة مــن الاعضـــاء وبقيادة مميزة من المشرفة جما معذبهـم لـي وقســم هبــه الدري .. بقيادة اشواكـ ناعمــة اللي قدمت نشــاط مميز في صــيف بحرين تودي 2008 وما انســـى جهود بقية الاقســام اللي فعلا شهدت التميز بيـــنهم في الفترة الصيــفية كلمـة اتوجهها للديوانية ؟؟ لنـــرتقي دائمــا بالمكـــان الذي نقضــي فيه اجمـل اوقاتنـــا مـــن هذا القســم تعلمنا وتعارفنـــا وتشــاركنا الفرح والحــزن للنســى الاحــداث الســابقة ولنفتح صفحــات جـــديده يســودها الود والمحبة واســـأل الله رب العرش العظيم ان يهدي الجميـــع يارب كلمــة توجهها الى قســم النقــاش ؟؟ كلمــة شكــر وثناء على الجهود المميزة اللي قدمها لنا قســم النقاش ونامــــل من الله عز وجل .. ومــن ثم منكم الاستمرار في هذا العطاء الدائم والمميز منكم فهنيــئا لكـــم رواد قســـم النـقــاش بهذا القســـم الرائع والمميز الذي انتمى بجهود المشرفين وجهودكم الرائعه في الختام تعطيني سر من اسرارك وتعطيني شي حصري منك ؟ اممم ســــر .. ما يحتـــاي برشلونـــي انت بروحــك تعــــرف اسراري كلهــــا والحصري اممم احبكم كلكم لكن برشلوني .. ما خلا بوسمره .. وبالحيلة وبالتعاون الغير شرعي مع nos999 حصل على شي حصري .. عقب ما باقه من تلفونه الله يستر منك يا بوسمره هههههههه سمعوا صوووووت بوسمره واهو يغني انته مو قد الكلااااام !!! هاذي رابط الملف http://www.ph02.net/uploader//up1/ph02_PmvPgj2rc.mp3 تحملوا تقولون برشلوني سمعنا وانتظروا بعد باقي مقابلاااات .. يمكنك في هذه المقابلة ادراج اسئلة للمقابلة الأخيرة اللي راح تكون بعد مقابلة الحريف مقابلتي الأخيرة راح تكون مع برشلوني حتى النخاع Edited نوفمبر 16, 2008 by برشلوني حتى النخاع Quote Link to comment Share on other sites More sharing options...
برشلوني حتى النخاع Posted نوفمبر 16, 2008 Author Report Share Posted نوفمبر 16, 2008 الحريف 888 ... في كل شي حريف ما ان أطرح أسمه حتى ألقى هذه الأجابة .. الحريف في كل شي حريف بالفعل من يتقرب من هذا الشخص يعرف معدنه ولأني تقربت منه .. حبيت اقربكم منه من خلال هاذي المقابلة .. خلكم مع الضيف الرائع الحريف 888 الحريف888 ... نبي نعرفك بدون نكك اسمك الكامل :سلمان محمد السبيعي ترتيبك في العايلة:اخر العنقود محافظة .. منطقة : المحرق عمرك : 28 تاريخ ميلادك: 26/8/1980 هواياتك: ركوب الخيل و البولنغ و السباحة مكان عملك : تجارة حرة دراستك: جامعية الحريف متى اول مرة صمت صيام كامل حتى أذان المغرب .. مو مقطع هههه ؟؟ في المرحلة الابتدائية تحديدا ثالث ابتدائي و للحين اتذكر الم الراس الي حصل لي قارئ قرآن ترتاح لصوته ؟ الشيخ السديس و والشريم أكله دايم تحب تجوفها جدامك ؟ الشوربة افضل البرامج التلفزيونية الرمضانية ( تحب تتابع مسلسلات .. مسابقات .. برامج دينينة.. ؟؟ في برنامج ديني للشيخ نبيل العوضي على قناة الوطن احب اتابعه مسلسلات الفنانه فاطمة عبدالرحيم تساعد البيت في الأكلات .. واعداد مائدة الفطور؟؟ اساعدهم بس مو معناتها بشغل المطبخ لكن عندي طقوس دايما اسويها بالشهر الفضيل احب اتشرى من الاسواق في هل الشهر الفضيل الحين نبيك الحريف 888 !! كم من الوقت تقضي على المنتدى ؟ لكن بالايام العادية كثير الجلوس على النت و المنتدى تحديدا الأهل والغضب من الجلوس على المنتدى .. شلون تتصرف معاهم ؟ لا الحمد الله ما صادفتني المشكلة لكن لو صادفتني راح اتصرف معاهم بكل حكمة الحريف نبي نعرف بداياتك وشلون صرت مراقب؟ فكرة المراقب في البداية ما كانت في بالي في احد من الخوات بالمنتدى اهي طلبت مني اكون مراقب ع المنتدي كانت تقول احس انه المنتدى لو تكون عليه مراقب راح يتميز بيني و بينك حبيت اكون مراقب بعد لاني احب اكون مسئول عن كل شي يخص الفنانه فاطمة عبدالرحيم هل يمكن للعمر ان يقف حاجز اما الابداع المنتداوي ؟ في البداية كنت اتوقع انه الفكر راح يختلف بالنسبه للعمر و الفكر بيني و بين الاعضاء و شلون اقدر اوصل فكري لهم لكن اكتشفت ان بالعكس بان العمر ليس حاجز ما بين النقل والابداع .. أين نجد الحريف ؟.؟ احيان نحتاج للنقل بعض الاحيان انعجب بكلمة او مقولة او مصطلح نحتاج ان نقتبسه بعض الاحيان لماذا قسم فاطمة عبدالرحيم بالذات؟؟ لان هل القسم بكل اختصار يحتويني و القي نفسي فيه لماذا يطول الحريف في المواضيع والردود؟ انا احب الكتابة ولأني أسعى لتوضيح فكرة ولأني أتمنى مد جسور التواصل بيني وبين القارئ لماذا لا نراك في الديوانية ؟؟ الدوانية هي منبع الاعضاء سؤال من احدى العضوات :ماسبب تعلق الأعضاء بكتابااتك هل بإعتقادك ان الكلام الذي يخرج من القلب هو سبب أعجابهم بها ؟ هذا السوال ما اقدر انا اجاوبك فيه المفروض ان الشخص الي يحب مواضيعي هو الي يجيبك عليها يمكن يكون الكلام الي يخرج من القلب من غير تصنع و فلسفة يكون قريب من القلب المنتدى والبعض يتسمر له ويتفرغ له وينسى واجباته تجاه اهله .. بصراحة المنتدى .. ادمان ؟ ترفية ؟ او ماذا ؟ بعض الاحياة يكون ادمان و بعض الاحيان ترفيه الي يقعد طول الليل والنهار ادمان نفسي و اما اذا النت موجود او مو موجود وآحد يعني ما يهتم عادي عنده اكيد عنده ترفية شنو تقول للمدمنين عليه ؟ النت وسيلة و يجب علي اي شخص ادراك هذا تنزل موضوع في النقاش .. ثم تختفي طويلاً .. وترجع الى النقاش .. ما السبب؟ راح اكون معك صريح انا تقدر تعتبرني اسير منتدى الفننه فاطمة عبدالرحيم و ما اقدر ابتعد عنه كثير صحيح اني احب النقاش لكن ما احب اناقش كثير دايما احب اكون مستمع للراي و الراي الاخر احب اطرح موضوع اذا كان ذو اهمية و له مردود من الاعضاء جم عضوية عندك غير الحريف888؟؟ ولا عضوية قد وصلنا انك مررت بفترة أكتآب ولله الحمد قد شفيت بإذن الله منها هل اكتسبت شيئ من هذه الفتره ام لا .. وماذا كان دور فاطمة عبدالرحيم في الموضوع ؟ اكيد كل انسان يمر بتجربه في حياته يستفيد منها ايا كانت المشكلة تقدر تعتبر دور الفنانه فاطمة عبدالرحيم عودة للامل و راح اطرح موضوع بقسم الفنانه فاطمة عبدالرحيم لما تقراه راح تلاقي الجواب عليه هل المنتدى يسبب لك ارهاق .. تعب ؟؟ بعض الاحيان بصراحة .. شي ما يعجبك في المنتدى ؟؟ تبي الصراحة كلمة الحق من قبل بعض الاعضاء ما تتقبلها المعجبات والعضوات والأخوات .. كيف تتصرف معهم في المنتدى ؟ في البداية كل الي بالمنتدى خواتي و لله الحمد احب اتصرف مع كل انسان بكل احترام و ادب لكن بعض الاحيان تصادف ناس تتدخل حتي بامورك الخاصة و تزعل منك علي ابسط الامور اذا كنت مشغول و ما تسال فيكون عليك واجب انك تسال المشكلة انه بريدي الخاص بشكل يومي افضي منه رسايل فتحس بصعوبة لما تلاقي انك ملزم تراضي كل الاطراف بس في النهاية افرح لما اشوف كل هل الحب اتجاهي من ناحية الاعضاء هل لأن المنتدى بعيد عن الواقع ..أستطيع أكشف اسراري وابوح بها .. بداعي محد يعرفني ؟؟ بالعكس انا انسان صريح بحياتي بشكل عام بالمنتدى او بحياتي الشخصية اقدر ابوح بكل شي لاني ما اتوقع اني سويت شي اخجل منه مستعد تصير مراقب لقسم ثاني لو عطوك الفرصة ؟ لا ما اعتقد يكفيني شرف و فخر اني مراقب علي قسم الفنانه فاطمة عبدالرحيم اقسام لا تنساها بالمرة .. اقسام تشتغل صح .. اقسام ودك تنحذف ؟؟ قولنا عنهم؟؟ بكل تاكيد قسم الفنانة فاطمة عبدالرحيم و الاقسام الي تشتغل صح في المرتبة الاولى الدوانية و قسم النقاش هذا الكلام مو مجاملة فيك بكونك مراقب على القسم لكن انا اجهل كثير اقسام بالمنتدى يمكن يكون فيه اقسام انشط منها لكن هاي راي بحسب ما شفته القسم الذي اود ان ينحذف قسم السياحة و السفر هل تنحرج من المفاجآت .. تهنئة بمناسبة مولود .. عيد ميلاد .. وهالأمور ؟؟ الحقيقه اي انا انسان انحرج وايد من الكلام الحلو الي يتوجه لي بالمناسبات شلون نعرفك برع ؟؟ أوصف لنا شكلك ؟ انسان عادي مثلي مثل الناس سيارتك المفضلة ؟ فراري فريقك المفضل محلياً .. عربياً .. وعالمياً ؟؟ المحلي نادي المحرق و عربيا الاتحاد السعودي و الاهلي المصري و الوحده الاماراتي عالميا انا مثلك برشلوني و احب مانشيستر و اليوفي عطرك المفضل ؟؟ الشيخ ممكن ندخل في خصوصياتك سر تكشفه لأول مرة أمام الأعضاء ما جاوبنا ضيفنا على هالسؤال أهم سؤال .. نبي شي منك حصري حق هاللقاء ومحد جافه من الاعضاء في المنتدى .. صورتك .. صوتك .. توقيع بيدك .. شعر منك .. هاذي سيارة الحريف .. ينفع تسلم يا الحريف 888 وبيض الله ويهك شنو تقول حق قسم النقاش ؟ الله يعطيكم الف عافيه على مجهودكم و تميزكم في ارجاء المنتدى عساكم ع القوة دوم في بالك عضو معين تبي تقوله شي ؟ اقول حق كل من زعل مني كان بقصد او من غير قصد انه يسامحني و هل الدنيا ما تسوى شنو تقول حق جمالي معذبهم مراقبة القسم ؟ في البداية هل البنت انا احترمها كثير انسان تجبرك على احترامها رغما عنك بكل صراحه انسانه خلوقة و انا انسان افرح كثير لما اشوفها تتواجد بموضوعي شنو تقول حق منتدى البحرين اليوم واعضاء هذا المنتدى؟ عسى الله يخليكم حق هل المنتدى و لا يغير عليكم انا انسان تقدرون تعتبروني رحال بعالم النت عمري ما صادفت او لقيت منتدى راقي مثل هل المنتدى باعضائه و القائمين عليه اشكر الحريف 888 على قبول المقابلة وبالفعل كانت مقابلة مميزة المقابلة الختامية لبرنامج رمضانيات برشلوني حتى النخاع واللي ما زال مستمر راح تكون في الحلقة القادمة أي اسئلة تحبون توجهونا حق برشلوني حتى النخاع تقدرون تكتبونها في هالموضوع مع ردودكم .. ويعطيكم العافية تـــــم بحمد الله Quote Link to comment Share on other sites More sharing options...
برشلوني حتى النخاع Posted نوفمبر 16, 2008 Author Report Share Posted نوفمبر 16, 2008 آخر مقابلاتي راح تكون مع برشلوني حتى النخاع اسئلة .. طرحوها عليه بعض الأعضاء واسألة طرحتها ع نفسي .. خلونا نجوف المقابلة برشلوني ... ما هي بطاقتك الشخصية ؟ اسمك : عبدالله الجودر ترتيبك في العايلة: ثاني الابناء محافظة .. منطقة : المحرق - البسيتين تاريخ ميلادك . 23/12/1987 مكان عملك : جهاز المساحة والتسجيل العقاري دراستك : حالياً .. ادرس بكالريوس هندسة مدنية ومساحة عندك ليسن : اي الحالة الأجتماعية : أعزب هواياتك : أكتب شعر ع الخفيف .. ألعب كورة قدم .. امم .. أقلد بعض الشخصيات .. يمكن أحب أنظف في البيت شوي عبدالله متى اول مرة صمت صيام كامل حتى أذان المغرب .. مو مقطع هههه ؟؟ امم ثاني اعدادي على ما اعتقد قارئ قرآن ترتاح لصوته ؟ امم .. علي الحذيفي .. علي عبدالله جابر .. محمد أيوب تساعد البيت .. وتطبخ .. ولا لا ؟ والله انه في الغربة أخربط واحاول أطبخ .. في البيت ما أطبخ بس اوقف يم الوالدة أغربلها واذوق الأكل لكن أروح البرادة والخضار .. آييب لها أغراض افضل البرامج التلفزيونية الرمضانية ( تحب تتابع مسلسلات .. مسابقات .. برامج دينينة.. ؟؟) والله برامج الحين في بريطانيا مافي تلفزيون .. لكن بشكل عام احب اجوف المسلسلات ع سوالف داوود حسين وحسن البلام .. وأي شي من الدكتور محمد العوضي حلو برشلوني حتى النخاع .. ليش هالأسم بالذات ؟؟ أخوي ما قصر .. اهو اللي اطلق علي هالأسم .. انه كنت اتابع مباراة لبرشلونة الأسباني .. والمعلق يومها كان في كل فترة يقول لاحظ هذا المدرب برشلوني حتى النخاع .. هذا المشجع برشلوني حتى النخاع .. هذه السيدة برشلونية حتى النخاع .. طبعاً اخوي كان راقد .. بطل باب الحجرة وقالي قصر ع صوت التلفزيون يا برشلوني حتى النخاع اللي في توقيعك لابس نظارة .. أشخاص وايد سألوني عنه .. من هذي ؟؟ ههههههههه هاذي انه .. انه عبدالله الجودر .. والتوقيع اهداء من الغالية جمالي معذبهم ومن تصميم اليد الذهبية حمراء الوجنتين برشلوني سمعنا انك مغرور وشايف في روحك وايد هل هذا الكلام صحيح وشنو ردك عليه هههههههههههه والله جوف مداح نفسه يبي له رفسه يقولون .. ما ابي اقول لك لا متواضع وما ادري شنو .. اللي تعاملو وياي يعرفوني والله .. متحفظ اي .. مغرور لا .. هاذي الفرق شنو تقصد بمتحفظ ؟؟ ابتعد عن الأحتكاك المباشر بالجميع .. بصراحة جربت الحب؟ امم سؤال صاروخي ههههههههههه .. ابي اتهرب من السؤال هااا لكن باقول شتان ما بين حب شريف وما بين حب وهمي .. ونصيحة الى كل من يحب او يجرب يحب او أحب .. اسأل نفسك انت قد الحب ولا لا تحاول تسوي شي يفاجئ الكل ؟ اممم .. والله ارتب وانه وبوسمره حق الموضوع .. ونتمنى يتحقق ( منتداك) كم من الوقت تقضي على المنتدى ؟ والله مقطع .. لكن يعني خلنا نقول 3 لي 4 ساعات ردودك صريحة جداً .. فلماذا لا تستخدم المجاملة ؟؟ مب صريحة .. تبي الصراحة مرات ابي اقول شي .. لكن اضطر استخدم الدبلوماسية .. ما اقدر اقول كل شي في قلبي بالضبط .. احاول ابسط الفكرة وبس .. وابتعد عن التجريح لأن في المنتدى البعض يتحسس كثيراً من الصراحة وتقول له الصج وامام الكل من 2004 .. حتى 2008 .. بالرغم من انها 4 سنوات الا مشاركاتك وسمعتك لا توحي بأنك عضو قديم .. ما سبب انقطاعك ثم عودتك .. تقدر تخبرنا ؟ والله يا برشلوني .. انه شاركت في 2004 .. وكان نكي عبدالله الجودر .. لظروف معينة بدلته .. وصار برشلوني حتى النخاع .. امم يمكن واصلت مشاركة وامر كل يوم يومين على المنتدى وصراحة في التوجيهي وجامعة البحرين .. بالمرة وقفت وما قمت اشارك .. سنتين من دون مشاركات .. ما كنت اجوف البيئة اللي تخليك تشارك .. ورجعت وانه في الأردن ومازلت مستمر .. وتسأل عن مشاركاتي .. حقيقة مو كل موضوع ارد عليه .. مرات اتكيسل ومرات ما يعجبني الموضوع لماذا الأطالة في الرد؟؟ اممم .. ابي صاحب الموضوع لي قرى ردي ما يكون له مأخذ ياخذه علي .. لأني احتمال ما ارجع ع الموضوع او انساه .. فأحاول اكتب كل اللي في راسي مرة وحده ومثل ما قلت بدبلوماسية عشان ما يكون تجريح في ردي .. وبجذي اضمن شوي ان صاحب الموضوع ما بياخذ علي مأخذ كنت عضو .. اصبحت مراقبة .. ثم عدت عضوة .. يا ترى ما هي الأسباب في كل مرحلة ؟؟ وبارجع مراقب ان شاء الله امم كنت عضو .. مثل اي عضو يبتدي المنتدى .. ويحاول ويكتب ويشارك صرت مراقب حقيقة بطلب من جمالي معذبهم .. وبعد ما جفت روحي عندي شوية قدرة .. على متابعة القسم .. وانسحبت لأني مثل ما تعرفون جفت روحي ما اعطي نفس قبل .. ورجعت عضو وحالياً يمكن تقولون نكك ما زال موجود .. باقول اي .. بس ع الأقل بدون مسؤولية مسك القسم وانه في فترة كوني فيها مو قد كلمة الرقابة وليش اخترت الرقابة على قسم النقاش؟؟ قسم النقاش عجيب حقيقة .. من قبل كنت اتابعه واجوفه .. مرات كان يكون فيه الحماس فوووق .. ومرات يصير الحماس مختفي .. بكل صراحة .. ريفا اهي اللي اعطتني الدفة .. وما انسى اول موضوع نزلته في القسم .. دايركت وصلتني رسالة من ريفا تقول لي فيها واصل يا برشلوني وبعدين في فترتها زاد نشاطي من حيث المواضيع .. حتى استلام جمالي للرقابة .. وكنت بحق بحق بحق .. مرتاااااااااح لهذه الأنسانة .. لأنها كانت معطتني القرين لايت .. وغير ذي كانت تشور علي وتسألني واتعاون وياها .. وهالشي خلاني اصير مراقب برشلوني .. كونك مراقب سابق جعلك تحتك مع مجموعة من الأعضاء .. برأيك برشلوني .. ما حدود العلاقة بين العضو والعضوة .. ايجابيات هذه العلاقة وسلبياتها؟ حلو ان يكون لك فرية في المكان اللي انت موجود فيه .. وحلو يسألون عنك وتسأل عن من معاك .. وحلو تكسب خوات لك .. تعاملهم بكل طيبة وتحسهم بأن مو كل شخص من الانترنت قد يكون وحش .. مجرم .. ذئب بشري... بس الاكيد والأكيد.. تبقى سالفة لا تطيح الكلفة والميانة .. بينك وبين كل البنات .. وانتي يا اختي لا تطيحين الميانة مع كل صبي .. مو عن شي والله .. لكن هالشي اهوو اللي يخرب العلاقة بعدين وتنقلب العلاقة من اخوة وتاخذ مجريات ثانية هل اختفى برشلوني عن قسم النقاش ؟؟ أين هو عن هذا القسم؟؟ اي تقدر تقول.. لكن مو اختفاء كثر ما اهو ابتعاد .. وفي رجعة انه مبتعد عن الردود .. لكن لو تساليني عن اي موضوع بتجوفني اجاوبك .. اعرف شلي نزل من جديد واتابع كل شي يومياً .. لكن كقرارات وفعاليات ومسابقات وردود .. مبتعد قليلاً واتمنى العودة بعد الأنتهاء من بعض الامور شخص تتمنى رؤية تعلقيه ورأيه في موضوعك ؟؟ جمالي معذبهم و بومحمد وسايكو وريفا وحالياً جدس البأس .. وما انسى خواتي بيشو ودانات وجانا أحلى حب .. والجيل النقاشي الجديد والراجع .. بنت الحدادة والناعمة وشيوخ وذبانة كشخة وجنقلي وريكو والمجرم وشارب بيبسي والقائمة تطول .. وسامحوني اكيد اسامي غابت عن بالي .. لكن اسعد فيكم والله هل تزعل اذا حذف موضوع من مواضيعك .. او نقل .. ؟؟ بالعكس .. المراقب او المراقبة اللي نقل موضوعي او نقله .. اهو اجدر مني واخبر .. ندمان لأنك تركت الرقابة ؟ بصراحة يحز في نفسي اجوف القسم من دون الايقونات السابقة .. لكن هالقرار اتخذته بروحي .. وانه اعلنها مرة ثانية .. متى ما خلصت اموري راح اقدم طلب مرة ثانية للعودة الى القسم .. عبدالله كل مواضيعك وافكارك من عندك؟؟ اي كل مواضيعي السابقة من عندي وانه أكتبها بأسلوبي بالنسبة للأفكار كنا نعقد عليها اجتماعات بالمسن انه وجمالي وريفا .. وندرسها عدل مواضيع من صنعك وتعتز فيها ؟؟ صبري عاوز يتجوز بس في المناسبات وبعدين احنا اهل الخبرة والشهادة لمن الغلبة ؟ وموضوع الثقافة الجنسية امنياتك للقسم؟؟ كل التوفيق والله .. للمراقبة اللي من ذهب حقيقة واللي اهي جمالي معذبهم .. وبكل صراحة تدرون ان شهادتي فيها مجروحة .. بس لازم اقول ان اهي وريفا اساس الثورة النقاشية .. ع يدهم كل شي تطور واعتدل .. وجمالي مثل ما اسلفت .. عطتني الخيط والمخيط .. وكانت متعاونة وياي عدل مدل .. مشكوووووورة يا جمالي كل التوفيق .. للغالي جدس البأس .. تراه نشيييط وعنده افكااااار بتعيش القسم في عزه .. وما شاء الله عليه مثقف وما يخاف اي مواجهة .. قوي ويعرف الصح من الغلط .. يمكن شوي جاااد وما يجامل .. لكن تبقى هاذي طريقته ونحترمها .. قدها يا جدس كل التوفيق لكل عضو ولكل عضوة يمرون على القسم ويردون ويتحفونا بمواضيعهم برايك شنو اللي ينقص القسم ؟؟ امم .. نرجع مجلس النواب مرة ثانية .. كان وايد خادمنا ومعيشنا الاخوة الحقيقية واذا قلنا لك بنخليك مراقب مرة ثانية راح تختار أي قسم ؟؟ امم اكيد النقاش أحلى لقب اطلق عليك في المنتدى؟ برشو .. النحلة .. هههههههه بس ناس تبي تقول لهم ترا تتعبون واقدر شغلكم ؟ عادل محسن ، جمالي معذبهم ، ماي لوف ، سي مون واللي عاد وصج .. يكرف بريله ويده .. احمدي الوردة (بوسمرة) ناس تحب تشكرهم ؟ كل عضو وكل عضوة كتبوا كلمة او رد او مروا على الموضوع اللي نزلنه جمالي في الديوانية كل اعضاء قسم النقاش اللي وقفوا وياي وحقيقة خلوني اكتب واطلع افكار ومواضيع جديدة الى ريفا وبومحمد وسايكو ( ثلاثي مرعب حقيقة) شكر خاص الى نعومات القسم .. البنات اللي ساعدوني حقيقة في المجلة النقاشية الأولى الى جدس البأس على صراحته وشراحة صدره الى علي السماهيجي شكر وباقة ورد حمرااااااااء .. جميلك ع الراس والعين يا بوحسين .. ما قصرت وما تقصر دوووم يا الغالي .. علي انت نقي في عصر مليء بالشوائب والشكر الخاص والاخص اليها نعم اليها .. جمالي معذبهم اللي ما قصرت وياي ما قصرت .. يكفي انها للحين وياي مو مقصرة وقاعده تذكرني بالقسم تؤيد طلعة شباب المنتدى للخارج؟؟ والله اي أيد هالشي .. يكفي انها عرفتني على ناس صراحة اتشرف بمعرفتهم وما جفت منهم الا الطيب واحب اقول الله يعطيك العافية يا عادل محسن .. طحنون وانت عاد ما يحتاي اقول الله يعطيك العافية .. الا الف عافية يا الغالي .. أحمد مال الله .. ( بوسمرة ) .. هالشخص اللي ما يقصر وما قصر وجميله ع الراس والعين من فووووق كنت مساعد لرئيس دورة منتديات البحرين اليوم لكرة القدم الأولى ( احمد مال الله).. هل اضافت لك دورة منتديات البحرين اليوم شي جديد ؟؟ وايد .. يكفي اني حفرت اسمي في اول دورة تحمل 6 افرقة وعلى مدار اسبوع ونص كل يوم كان تعب .. يا ما ناس زفونا هههههههه يا ما ناس استحمقوا يا ما ناس استانسوا الحقيقة كان عمل ممتع وتعرفت من هالدورة على ناس وايد وايد والفضل يعود لله ثم الى عادل محسن وطحنون ومازن الماجد وبوسمرة ماذا اضافت لك المجلة النقاشية ؟ اضافت لي الكثير والكثير وجعلتني احتك بأخوان وأخوات كثر .. وبالفعل أهلتني كي اكون مراقب (اسئلة من بعض الأعضاء والعضوات ) قط مرة تهاوشت في المنتدى ؟ لالالالا .. ولا مرة ..وانه بعيد عن هالهواش بيشو تسأل ليش سميتها ملسونة القسم ؟ لأنها ما تسكت عن الحق وكانت وما تزال نشيطة في القسم يقولون صوتك حلو ؟؟ صوتي مب حلوو .. صوتي عادي .. بس اعرف اقلد وايد اصوات .. ( شخصيتك خارج المنتدى) شكلك؟ طويل .. ضخم .. مصوفر .. الشعر فلافل أوصفي لنا شخصيتك خارج المنتدى؟ اوووه كله صراخ .. وكله طنازة وضحك .. سيارتك المفضلة ؟ مرسيدس .. الدولفين قدوتج في الحياة؟ اخوي في الحياة وبوسمرة في المنتدى عطرك المفضل ؟؟ ديور هوم لونك المفضل؟؟ الأحمر أفضل وقت في اليوم ؟؟ الساعة 2 لي الساعة 6 الصبح ( أسرارك ) سر تكشفه لأول مرة أمام الأعضاء ؟؟ انه صاحب عضوية طماطمة خايسة .. قرار اتخذته في بحرين تو دي وندمان عليه؟؟ تنازلت عن الرقابة .. لكن هالشي لمصلحتي أهم سؤال .. نبي شي منك حصري حق هاللقاء ومحد جافه من الاعضاء في المنتدى .. صورتك .. صوتك .. توقيع بيدك .. شعر منك .. هاذي مجرد أبيات بسيطة .. وبس جذي للحين ما كملتها وانا واللي ورب البيت قايل ... قلبي عن الحب وسواليفه حديد لا ني مجرب صوبه ولاني بمايل .. بس مدري وشقلب قلبي صديد بعد ما كان صلب صار سايل ... ما خبرتك يا العبد تحجي الجديد اضحك على حالي يا جمايل ... لي قلت عن القلب انه عنيد اتاري المحبوب يهوى الرسايل ... ابعث رسالة واقرى منه مزيد ..... وما كملت حتى النهاية ( ختامها مسك) شنو تقول حق جمالي معذبهم مراقبة القسم ؟ انتي شهادتي فيج مجروحة يا جمالي .. يشهد الله انج بالمرة مو مقصرة بالمرة .. الله يوفقج دووووم يا جمالي معذبهم والقسم في يدج يعيش احلى حالاته شنو تقول حق جدس البأس ؟ قد المنصب وانت اهل لهذا المكان .. والقسم ع يدك بيسير نحو الافضل شنو تقول حق منتدى البحرين اليوم واعضاء هذا المنتدى؟ الله يعيطكم العافية وما انسى وقفتكم وياي بالفعل انتو عطيتونا الدافع للمواصلة والله يعطيكم الف عافية كل الشكر الى مراقبي القسم ع تعاونهم معانا انتهت جميع المقابلات .. وحتى نلقاكم في فعاليات أخرى تقبلوا تحياتي برشلوني حتى النخاع Quote Link to comment Share on other sites More sharing options...
جمـــا "معذبهم" لـــي Posted نوفمبر 16, 2008 Report Share Posted نوفمبر 16, 2008 يعطيك مليووون ألف عافيه مثل هالمقابلات لاازم ماتندثر في مهب الريح ولازم تكون مثبته لأنك ابددعت بطرحها وصياغتها والشغل عليها ومااحب اضيع لك أي عمل قد ابددعته مقابلتك الأخيره من اروع وماايكون وكلامك فيني شهاده اعتز فيها يابرشلوني وانت تعرف راايي فيك زين انت قلببك من ذذذهب وماعرفت انساان بمثل صفااتك عزيز وغالي ياخوي تســلم يدك تم التثبيـــت تحيــــاتي ... Quote Link to comment Share on other sites More sharing options...
a7la 7o0ob Posted نوفمبر 16, 2008 Report Share Posted نوفمبر 16, 2008 (edited) اللاااااااااااااااي فن ثانكس ثااااااااانكس وحلااااااااااااااا على اخر مقااااااااااااااااابله حدها عجيبه تسلم برشلووونيوووووووووو Edited نوفمبر 17, 2008 by a7la 7o0ob Quote Link to comment Share on other sites More sharing options...
anti-boys Posted نوفمبر 17, 2008 Report Share Posted نوفمبر 17, 2008 رمضآآن كريم .. مبآآرك عليكم الشهر *يقولون صوتك حلوو .. وكنت تغني في جامعة البحرين احياناً .. من متى عادل وانت تغني ؟؟ وما فكرت تطور موهبتك الغنائية ؟؟ من الصف الاول وفيها اول مرة وقفت امام جمهور، والتطوير يكون ذاتي على الاذن الموسيقية انت تغني .. انا كنت في جامعة البحرين ،دُفعتك .. ماآعزمتووني ، خسآآآرة طآآفني بس مرة فيه واحد فـ العيد الوطني في ملعب الصآبون علق بالمآيك .. كأن يشبهك انتي وحسانو .. وجهان لعملة الصراحة شياب لـ ياب اعرف حسانوو ، واعرف عآشقة ماشوف فيهم تشابهـ .. اذا ع الصرآحة الخشنة اقصد بدون دبلومآسية .. اشوف زادو الناآس الي هيك تاريخ ميلادك 24-7 سنهـ جم سر تكشفه لأول مرة أمام الأعضاء عندي اخ في المنتدى (مشرف منتدى) منوو ؟؟ وين السر .. احين لازم نعرف منو .. يسلمووو برشلووني ع المقآبلآت الحلووة جدآآ .... تعبت روحك والشكر واآصل لكل الضيوف .. جمالي معذبهم ، برشلوني ، علي سماهيجي ، يابعدهم ، ريفااا ، عادل محسن ، مستر تربل اكس ، بو سمرة زنجبيلوو ، دآنات ، الحريف ، مس بيشو ، احلى حب الله يعطيكم العآآفيهـ والله يعودنآآ ويآكم رمضآن السنة اليآية Quote Link to comment Share on other sites More sharing options...
جدس البأس Posted نوفمبر 17, 2008 Report Share Posted نوفمبر 17, 2008 (edited) للأمانة يا أخوي برشلوني حتى النخاع .. أتعبت من بعدك ..! بنتعب إذا بنحاول نجاري نشاطك وإخلاصك للقسم أخي العزيز .. لكن أحمد الله أني دخلت القسم في ضل وجود الأخت العزيزة جمالي معذبهم .. فهي والله شعلة من النشاط .. و وجودها مكسب عظيم لي بارك الله فيك أخي العزيز .. ونحن مازلنا ننتظر عودتك لنا .. فأرجو إلا يطيل غيابك عنا . Edited نوفمبر 17, 2008 by جدس البأس Quote Link to comment Share on other sites More sharing options...
MS.Bishoo Posted نوفمبر 21, 2008 Report Share Posted نوفمبر 21, 2008 خوش مقابلة هههههههههههههههههه عيل انا ماسكت عن الحق خلاص هاي اللقب اليديد لي ملسونة المنتدى =) Quote Link to comment Share on other sites More sharing options...
خلاص ببعد Posted نوفمبر 21, 2008 Report Share Posted نوفمبر 21, 2008 وااااااااااااااااااااااااااااااااااااااااااااااااااااااااااااو ولا اروووع مقابلاتك يسلمووو يالغالي ... Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.