ديهيه Posted ابريل 4, 2005 Author Report Share Posted ابريل 4, 2005 هاااااااااااااي ... وهذا باقي الجزء .. B) تفضلووا,.... في مدينة ابوظبي... منزل حميد الفلاسي..(يوم الخميس) الكل مرتبش في البيت حتى البشاكير....من الصبح و هم ينظفون و يرتبون و يطبخون حق الضيوف اللي بيونهم في الليل....اليوم بيلبسون ميرة الشبكة من بعد انتظار سنتين لين ما يرد علي اللي هو ولد عمها و خطيبها من امريكا...كان المفروض انه يرد اول الصيف و الملجة الحين....بس اتأخر عشان شهادته......طبعا ميرة نشت من الصبح اول وحدة....و خبصت ويهها كريمات و تنظيف بشرة و خيار على عيونها......و يوم خلصت سارت تحشر عويش عشان تقوم.....تبا تكلم حد تبا حد يآزها.... عويش"اففففف.....حرام عليج بعدها الساعة 11....شو ايلس اسوي لين في الليل" ميرة"قومي آزريني...مب كل يوم بعرس" عويش"اهء اهء اهء......حرااام علييييج...و الله اني مصدعة....شوي و بقوم" ميرة و هي تشد اللحاف"مااااشي...الحين تقومين....قومي بسويلج ماسكات و تنظيف بشرة...." عويش"مابا ما احتاج" ميرة"يلاا عااد عن المصاخة ...قوميييييييي" عوييش"افففف...طااار الرقاد....خلاااص فكيني خليني اغسل ويهي بهدوء" ميرة"يلا بتريااج في حجرتيه..." عويش"اوكي يلاا مع السلامة" ميرة و هي مستانسة"سييي يووووو" ظهرت ميرة من الحجرة من صوب و عويش ردت انسدحت عالشبرية من صوب ثاني...صدق كانت مصدعة وفيها رقاد...طول هالاسبوع تحشرها طول الليل و ترد توعيها من الصبح.... بعد نص ساعة تقريبا ردت ميرة حجرة عويش.. ميرة"صدق انج ماااصخة....يلا قوميي" عويش اول ما سمعت صوتها نقزت من الزيغة... عويش"خلاص خلاص قمت....امري لله.....الله يسامحج..." قامت عويش و بالفعل تمت ميرة تسويلها تنظيف بشرة و ماسك ورى الثاني لين ما استوى ويهها احمر من النظافة.... عويش "الله يخسج بيظهرلي حبوب....مساماتي جنهن حفر" ميرة"لا لا عادي....بس حطي عليه ثلج عشان ما يتمددن" عويش"انا بس ابا اعرف من وين تعرفين هل الخرابيط..." ميرة"يوم بتعرسيييين بتعرفيين" سكتت عويش و هي تحس جنه ميرة دقتها على الوتر الحساس....و ميرة بعد حست انه عويش اتأثرت...عشان جيه غيرت الموضوع على طول... ميرة"آآآه..اقول شو رايج نجرب اللبس..." عويش"لاا حراام بيتجسف الفستان....قومي اغسلي شعرج عشان اتيي مالت الكوافير تسشورلج ياه..." ميرة"و انتي ما بتسشورين شعرج" عويش"لااا..احس ما يحتاج....ما بفله...بس برفعه جيه كفاية....بروحه راقد بعد ازيد اسشوره" ميرة"على قولج...." . . مر الوقت لين ما يت الكوافيرة و سوت شعر ميرة و اتلبسن و على الساعة سبع كانوا قاعدين في الصالة جاهزات و يتريون بيت عمها و الحريم ايون....و دخل عليهم محمد عشان يسولف وياهم لين ما ايون الرياييل و يوصلون اهله من دبي... محمد بخبث"من قدها اليوم..." ميرة"هييه فديتني من قدي اليوم....عروس شو بعد" محمد"ههههه...انتي ما تستحيين" ميرة"لاا لييش استحي....شو العييب عشان استحي منه" محمد"هههههه....الله يعين علي عليج" ميرة"ليييش....هو يطووول" محمد"بعــــــــد...." هني تدخل ام ميرة"انتي شو ميلسنج هني....سيري حجرتج ...تبين الحريم يدخلن و يشوفنج يالسة هني" ميرة"ليش مب هم يايين حقي ولا حق منو" ام ميرة"قومي..قومي يام لساان..قبل لا الحين افرج بالمدخن هاا" ميرة"انزييييييييين...سرنا" طلعت ميرة لفوق و خلت عويش ويا امها و محمد...و بعد شوي قامت ام ميرة عشان تجيك على الاكل و خلت عويش بروحها ويا محمد......و ما كملت دقيقة الا و قامت عويش بس قبل لا تسير وقفها محمد.. محمد"عويش...تمي شوي بسولف وياج" عويش"بسير اطالع ميرة يمكن تباني" محمد"لو تباج بتزقرج...يلسي بكلمج" تمت عويش واقفة و هي كارهة عمرها و تحس بقلبها يدق بسرعة فظيعة..شو يبا منها...اكيد بيفتح هذاك الموضوع مرة ثانية...و يلست على ابعد كرسي منه.. عويش"........." محمد"شحالج الحين...ان شاء الله احسن" عويش و هي منزلة راسها و تتمنى الارض تنشق و تبلعها"هيه الحمدلله" محمد"عويش...لين الحين حاطة في خاطرج عليه" عويش و قلبها يدق بسرعة ما عرفت تجاوب"........" محمد"عالعموم الماضي..." و يقطع عليهم دخلة ام ميرة ام ميرة"يلا محمد قوم بسرعة يوا العرب ....بسرعة سير عند خالك اوقف وياه.....و اتصل في ابوك و اخوانك بلاهم اتأخروا جيه" محمد"ان شاء الله خالتي..." و سار محمد و خلا عويش شبه متيبسة في مكانها تبا تعرف شو كان بيقول....مستغربة من الاسلوب الهادي اللي يكلمها فيه....لا و بعد يسألها اذا زعلانة منه...المفروض هي اللي تعتذر مب هوو..." ام ميرة و هي تطالع عويش متسمرة فوق الكرسي"قومي انتي بعد بلاج جيه...سيري قولي حق اختج قوم عمج و حرمته يوا....خل تنزل هني وياج في الصالة و يوم بزقرج خليها تدخل تسلم عليهم...." عويش"ان شاء الله اماية" و سارت عويش فوق صوب حجرة ميرة و هي نص دايخة......بتموت من الفضول تبا تعرف شو كانت التكملة...الماضي شوو...... ميرة بحماااس"وصلووااااا.....يا ويلييييي.....آآآآه ويهي يعورني......اكيييد ما بيدخلوووونه....صح؟؟" عويش في عالم ثاني"..........." ميرة"ايييه انتي....وين سافرتي" عويش"........" ميرة"عويييييش.....عاشوووو" عويش"هاااه...شو فيج تزاعقين اسمعج" ميرة"لاااااا!!..مبين.....منو ياا من بيت عمي....ين بناته ولا بس حرمة عمي......وصلوا الحريم ولا بعدهم" عويش"مادري و الله علمي علمج...بس اماية تقول نتريا في الصالة و يوم تزقرنا ادخلي سلمي" ميرة"انزييييييييين.....يا ويليييييييي....بموووووت....احس قلبي مب في مكانه....اطاعي كيف ايديه تتنافض" عويش"من متى ان شاءالله نزل عليج الحيا و الخجل" ميرة"حرااام عليج.....و الله اني زاايغة...احس ويهي بيستوي معجون طمام اول ما ادش الميلس" عويش"الله يهنيج ان شاء الله....تعرفين احس احسن لو سوا الملجة و افتكيتوا...ما يسوى عليكم خطوبة وعقب ملجة و عقب عرس" ميرة"مادري مادري يا عوييش.....اللي اعرفه ان الموضوع اخيرا بيستوي صدق...." عويش"هههههه.....ان شاء الله يكون اوكي عاد مب " متأمرك" ميرة"فال الله ولا فالج" عويش"يلا انزين بسرعة خل ننزل تحت عن اتيي اماية و ما تلقانا تحتشر" ميرة"يلا اوكي..." و نزلن تحت الصالة و بعد ما انترس الميلس بالحريم....يت ام ميرة تزقرهن و دخلت ميرة على الحريم و لبستها حرمة عمها العقد و الساعة .....و على الساعة 11:30 كان الكل مروحين....و كانت ميره صدق طايرة من الفرحة....خلاص استوت عروس.....اتفقوا الرياييل ان الملجة والعرس نفس اليوم و يكونون في اجازة نص السنة عشان تلحق العروس تتزهب و تخلص اغراضها..... اما عن محمد فخاله حميد كان ملزم يتمون هو و اهله اليوم عندهم و يروحون ثاني يوم اللي هو الجمعة...و بالفعل تموا لين ثاني يوم و اتغدوا ويا بعض.....اما بالنسبة لمحمد فكان كل شوي يسرح في عويش جنه اول مرة يشوفها....كان لين الحين مستغرب انها تحبه.....مب متصور.....مب قادر يصدق....و فجأة تصد عويش صوبه و يحترم عمره و ينزل راسه.....و عويش كانت مستغربة من تصرفات محمد....تبا تفهم شو يبا بالضبط...و ليش كل هالنظرات و كل هالغموض....شو كان يبا يقوللها البارحة.....بس للأسف ما قدرت تعرف لانه عالمغرب روح ويا اهله دبي....و خلاها في حيرة و شك و خوف مالهم آخر....بتعيشهم الين ما يزورهم مرة ثانية...و الله العالم تى بيكون هاليوم.....الاسبوع الياي....او الشهر الياي...او السنة الياية... . . في مدينة ابوظبي... اليوم اول يوم دوامات للمدارس و الجامعات..... مريم كانت سايرة الجامعة و هي صدق متنرفزة لانها كانت شبه متأكدة انها بتشوف مهرة في الجامعة لانهن اختارن كلاساتهن ويا بعض.....و من كم يوم و هي تدق حق مهرة كل يوم على موبايلها و بعده مغلق......و يوم سارت الدوام تمت على اعصابها...تتريا الكلاس يبدا....عشان تشوف مهرة...تبا تشوف شو رد فعلها....تحس انها لو شافتها على طول بتصيح من كثر ما هي متولهة عليها....و بالفعل بدا الكلاس....لكن مهرة ما يت....و تمت مريم تتريا...قالت اكيد بتتأخر لانه اول يوم دوام....مرت 5 دقايق...عشر...ساعة..خلص الكلاس و ما يت مهرة....و ردت تدقلها على موبايلها و تلقاه بعده مغلق....و اتصلت البيت و محد يرد....و اتريت للكلاس الثاني....و الثالث...و الرابع....لكن ما يت مهرة و لا بينت.....خلص الدوام و هي تسأل كل ربيعاتها اذا شافوها او لا....بس لا حس و لا خبر....و روحت و هي تحس بكآبة و حزن عمرها ما حستبها من قبل....اول مرة تداوم من غير مهرة....العادة كل سنة التجهيزات عندهن على قدم و ساق....يكونن محتشرات على اول يوم في الدوام.....بس اليوم....حتى مكانها ما تعرف وينه...ردت البيت و هي تحس بانها مخنوقة....صدق الحين استوعبت كيف غلطت على ربيعتها.....و اكتشفت شو معنى ان الانسان يقدر من اللي حواليه يوم يغيبون عنه...... مر اليوم و الثاني و الثالث و ما بينت مهرة......و آخر شي قررت انها تسير بيتهم يمكن حد هناك يعرف شو استوى بها....او يعرفون رقمها في العين......بس الباب كان مقفول و محد ف البيت......و ردت بخيبتها تتصل يمكن ترد عليها او حتى يرن....بس مافي فايدة....و يوم الاربعاء من اول اسبوع دوام اتلاقت ويا فاطمة ربيعتهم... فاطمة"مرحبا مريوم شحالج" مريم"الحمدلله فطوم...انتي علومج" فاطمة"و الله تمام.....اقول شو استوى على مهرة الحين..ان شاء الله احسن" مريم"شوو...ليش انتي منو قالج انها مريضة..هي مسافرة" فاطمة"هييه ادري انها مسافرة للعلاج...خلاص عرفت لا تسوين عمرج ما تعرفين" مريم"انتي شو تخربطين" فاطمة"طاااع....عن الحركااات....توني كنت في الستيودنت سيرفس و لقيت ولد خالها مادري ولد عمها ياي عشان يسحب اوراقها" مريم"شووو" فاطمة"هيييه و الله...و ياب العذر انها تتعالج في لندن" مريم"تعالي وياي راويني وينه هذا ولد عمها" و سحبتها من ايدها... فاطمة"بلاج مريوم...اصلا يمكن الحين روح خلاص" بس مريوم ما سوتلها سالفة و تمت ساحبتنها لين ما وصلن الستيودنت سيرفس.....و هناك.. فاطمة"هاذو هناك اللي بيروح الحين اللي بكندورة...." و هني هدت مريوم ايد فاطمة و سارت بسرعة ورى راعي الكندورة و تغشت... مريم"لو سمحت....اخوي لو سمحت" و لف راعي الكندورة ويهه عشان يطالع منو اللي يزقره... مريم"اخوي انت ياي عشان تسحب اوراق مهرة" سيف"هيه نعم..." مريم"ليش هي شو فيها" سيف"مريضة..." مريم"مريضة شو فيها يعني" سيف"عفوا اختي يوم بتيي هي اسأليها" و لف ويهه عنها بيروح... مريم"لو سمحت اخوي..." و رد وقف سيف مرة ثانية.. مريم"اخوي انا ربيعتها وايد من ايام ابتدائي...بس من يوم سافرت ما دقتلي...و انا ابغي اكلمها...لو عندك رقمها يعني ممكن تعطيني ياه" سيف"انا بخبرها انج سألتي عليها...و بخليها تدقلج" و لف ويهه مرة ثانية و سار عنها مريم"بس اخوي لو..." سيف و هو مفول"و بعدين وياج اختي....اذا تبا تكلمج او تقولج شو فيها جان دقتلج....شو هاللقافة" و سار عنها سيف و خلاها واقفة في نص الممر و هي تحس بان ويهها مب متكسر....متدمر و ممسوح في الارض من الفشلة.....صدق افحمها....و لا قدرت تاخذ منه لا حق ولا باطل.....و اللي زاد على جيه انها تمت زايغة على مهروو....شو هالمرض اللي بيخليها تسحب اوراقها .....و اللي ماله علاج غير في لندن......و تمت تعدد الاسباب..يمكن استوابها حادث...يمكن و يمكن.....بس تمت في حيرتها و حزنها على ربيعتها.....روحت البيت و هي صدق منهارة....تبا تعرف تبا تكلمها خلاص مب قادرة تتحمل.....و تتمنى انه اللي يقربلها يقولها انها سألت عنها.... . . . اما عن سعيد.....فكان شبه المينون.....خلاص مب قادر يستحمل.....افكاره ودته بعييد....معقولة ما تتصل له...معقولة لين الحين ما ردوا من السفر......معقولة ما تطري على باله كل هالفترة....موبايلها مغلق لين الحين......مب عارف شو يسوي....اليأس خلاه ايي صوب بيتها كم مرة و يطالع البيبان مقفولة و الظلام و يرد بخيبته....كان صدق بيستخف يبا يكلمها....هذا الاسبوع الثالث و بيخلص و هي ما اتصلت له و لا طمنته عليها.....شو معقولة يكون صار لها....شوو.... في الجهة الثانية...اتحدد موعد عملية مهرة في 28- 9.....يوم الخميس....نفس يوم خطبة مريم... __________________ تااااااااااااااااااااااااابع الجزء ... Quote Link to comment Share on other sites More sharing options...
غزال الريم Posted ابريل 4, 2005 Report Share Posted ابريل 4, 2005 عاااااااااااااااااد نزلي النهااااااااااية ابي اعررررررررررررررف النهاية دام عليج امتحان يعني ما بتدخلييييييين الله يوفقج ان شاء الله واللي يسلمج حطي الجزء الاخير يعطيج العافية حبوبة Quote Link to comment Share on other sites More sharing options...
ديهيه Posted ابريل 5, 2005 Author Report Share Posted ابريل 5, 2005 ان شااااااء الله من عيووني .. بس ليش مستعيله .. صبري Quote Link to comment Share on other sites More sharing options...
Sea Melody Posted ابريل 5, 2005 Report Share Posted ابريل 5, 2005 لا حول و لا قوة الا بالله العلي العظيم يلاااااااااااااااااااااااااااااااااااااااااااااااا اختي تراني بموت من القهر اذا ما عرفت شو بصير و الله حرام عليج مسويه جي فينا يلاااااااااااااااااااااااااااااااااااااااااااااا عاد اوكي ما في مشكله بصبر شوي لان عندج امتحانات و الله يوفقج ان شاء الله Quote Link to comment Share on other sites More sharing options...
ديهيه Posted ابريل 5, 2005 Author Report Share Posted ابريل 5, 2005 هاااااااااي .. شخبااركم .. ان شااء الله تمام ..!! B) ان شااء الله ما تأخرت عليكم .. بس يالله .. اتفضلووا . اليوم (21-9...قبل عملية مهرة باسبوع) الخميس كانت مهرة يالسة في حجرتها في المستشفى بعد ما روح خالها عنها....ذكرياتها تدور في راسها مثل شريط سينما....تتذكر ايامها ويا مريم....ايامها ويا ابوها.....تتذكر كل شي....سعيد...امها...آمنة و فاخرة و علي و سيف وكل الاشخاص اللي كانوا في حياتها او دخلوا في الفترة الاخيرة......كانت تحس بتعب شديد....كل يوم يزيد احساسها بان النهاية قريبة.....خاصة بعد النزيف اللي ياها البارحة في الليل.....كانت عيونها متسمرة على الجدار و هي تتذكر اخوها خليفة......و عورها قلبها يوم اتخيلت انها ممكن تموت...شو بيسوي...هي تعرف و متأكدة انها الوحيدة اللي في حياته...خاصة بعد ما عاشرته و عرفت طبعه المتوحد....و فجأة قطع عليها صوت التلفون مال الحجرة... مهرة"الوو" نورة"الووو.." مهرة و هي منصدمة"اماية!!" نورة و هي تصيح"مهرة حبيبتي....شو فيج يا بنتي...شو يعورج....ليش ما قلتيلي يا بنتي.....ليش ما قلتيلي...." مهرة"اماية شو فييييج...ليش تصييحين" نورة"ليش ما قلتولي انتي و خالج.....لا تخااافين حبيبتي.....ان شاء الله العملية بتنجح...انا اليوم بحجز و بييج" مهرة"لااا لاا اماية شو اييبج....انا ما فيه شي" نورة و هي تصيح" لا تجذبين...خلاص انا عرفت كل شي....ليش ما قلتيلي..انا امج و تخشين علي انه..انه فيج ورم" مهرة"....اماية انا..ما كنت اباج تحاتين" نورة"اذا انا ما بحاتيج منو يا بنتي بيحاتيج...انا ما صدقت لقيتج يا بنتي...." مهرة و هي تحاول تتماسك عشان ما تزيغ امها"اماية مافيه الا العافية ان شاء الله...الدكتور قال ان العملية بتنجح" نورة"ان شاء الله ....ان شاء الله....وين خالج...عطيني خالد بسرعة..." مهرة"خالي محد..في الفندق" نورة"انزين...وين آمنة" مهرة"خالوو سارت الفندق وياه تييبلي ثياب" نورة"انزين خلاص...قوليلهم اني باجر او ورا باجر بكون عندكم" مهرة"امااية شو اييبج....تعب عليج" نورة"انا لازم اكون وياج....تحسين بألم حبيبتي...شي يعورج" مهرة"لا لا اماية...مافيه شي"..مهرة كانت تقص على امها...لان الألم و العوار كان يزيد و يزيد كل ساعة...و مالها غير المسكنات و انها تنتظر لين يوم العملية... مهرة"اماية..." نورة"آمري حبيبتي" مهرة"خليفة اخوي ما اتصلبكم..؟" نورة"لا حبيبتي ما اتصل...اكيد اتصل على تلفونج" مهرة"هيييه صح....انزين اماية انتي الدكتور قال عادي انج تسافرين" نورة"هييه اليوم نشدته و قالي عادي...بييب الممرضة ويايه" مهرة"انزين اماية...انا بكلم فاخرة بخليها تزهبلي اغراض اباهن و ييبهن وياج اوكي" نورة"ما عليه حبيبتي انتي كلميها و انا باخذهن عنها..." مهرة".......اماية..." نورة"آمري..." مهرة"اماية ادعيلي..." نورة"الله يشفيج يا بنتي و يعطيج العمر كله...و اشوفج يوم عرسج و اشوف عيالج يا رب" مهرة"....." نورة"لا تخافين يا بنتي...توكلي على الله" مهرة"الله يعين..." نورة"خلاص مهاري...يوم يوصل خالج خليه يدقلي..انا الحين بكلم سيف عشان يحجزلي" مهرة"ان شاء الله...لا تنسين اماية اغراضي" نورة"ان شاء الله حبيبتي....يلا فديتج مع السلامة" مهرة"مع السلامة" . . سكرت مهرة عن امها و هي تحس شوي براحة نفسية...صح ان حرمة خالها كانت وياها طول الوقت...بس بعد كانت تحس بغربة و انها متولهة على امها....و بعد على خليفة...اكيد الحين هو في لندن...بس ما يدري انها هني بعد...و ما يدري انها مريضة....كان في خاطرها تتصل فيه و تكلمه...بس بعد ماتباه يحاتي......كانت شاله هم الدنيا على راسها...ما تبا تخبرهم عشان ما يتضايقون.....و هني تسمع حد عند الباب....و يدخلون خالها و آمنة.. خالد"ها مهرة...شحالج اليوم...احسن..؟؟" مهرة"هيه الحمدلله احسن" آمنة"ما يا الدكتور اليوم...ماقال شي على النزيف" مهرة"بلا....يا من ساعة...قال هذا شي عادي و مادري شوو..." آمنة"ان شاء الله خيير..." مهرة"خالي....ترى اماية تدري اني مريضة" خالد مشتط"شوو...منو خبرها" مهرة"مادري...بس هي قالت انها تبا تيي هني" خالد"شو ييبها هني...هذي استخفت...." مهرة"تقول خبرت الدكتور قالها ما عليه....و تقول دقلها تبا تكلمك" خالد و هو معصب و عاقد حياته ظهر التلفون و يدق على نورة اخته... . . آمنة"خليها تيي يا خالد....حليلها تحاتي ضناها" خالد"....." . . خالد"الووو...نورة" نورة"هلا خالد...اشحالك.." خالد"شو هالكلام اللي سمعته....اونج بتيين هني" نورة"هييه بيي...بيي عند بنتي" خالد و هو معصب صدق"انتي ينييتي....كيف اتيين وانتي بهالحالة....منو هالدكتور الغبي اللي رخصج" نورة"خااالد....انا بيي يعني بيي...حتى لو ما رخصني الدكتور...و بعدين هذي بنتي...لازم اكون وياها" خالد"اوووه...خلاص كيفج...انا ما يخصني فييج...انتي طول عمرج اصلا راسج يابس" نورة"المهم الحين...مب وقته هالكلام....ترى انا طرشت سيف يحجزلي و لقالي تذكرة اليوم في الليل من دبي...و باجر الصبح تقريبا بكون هناك" خالد"و منو ان شاء الله بيي وياج" نورة"بيي ويا الممرضة و سيف بيوصلنا المطار...و انت تعاللنا المطار في لندن..ترى مطار هيثرو" خالد"استغفر الله العظيم بس....خلاص قولي حق سيف يسافر وياج يوصلج...." نورة"بس ليـــ" يقاطعها خالد"ماشي بس...انتي ينييتي تسافرين بروحج...خلاص خل سيف يسير وياج...و يرد بالطيارة اللي عقبها" نورة"المهم اني اييكم.." خالد"خلاص برايج عيل..انا الحين بتصل بسيف عشان يحجز حق عمره و يقولي عن المواعيد" نورة"ماعليه....قول حق مهرة تخبر فاخرة عن الاغراض اللي تباهن عشان احطهن في الشنطة" خالد"ماعليه...يلا فمان الله..." نورة"فمان الرحمن" . . خالد(يكلم مهرة)"تقولج امج كلمي فاخرة على الاغراض اللي تبينهن...يودي التلفون كلميها" و بالفعل دقت مهرة حق فاخرة و خلتها تحطلها اغراض تباهن و تطرشلها بعد بطاقة تلفونها مالت بوظبي...و قالتلها وين حاطتنها...و عقبها كلم خالد سيف عشان يروح ويا خالته...و بالفعل تم كل شي بسرعة...و كانت يية نورة مثل الأمل ...الشي اللي ممكن تتمسك به و تترياه لين باجر بدال الملل اللي عاشت فيه و هي تحس بالدقيقة تمر ساعة..... في نفس الوقت في بوظبي...اليوم كان الخميس...اليوم ملجة لطيفة على نهيان......اليوم اللي قبله سووا ملجة الرياييل في البيت بس لطيفة ما طاعت يدخل عليها.........صدق كانت مستحية و مفتشلة....طول الوقت و هي تتنافض من الزيغة....اما نهيان فلوع بجبد بخيت و سعيد على كثر ما حشرهم... في بيت حمد بن سالم.. لطيفة كانت في حجرتها و خواتها عندها (حصة و نورة و أمون) و بعد كانت عندها الماكيير و الكوافيرة..عندها تسويلها المكياج.. حصة تطنز"الله الله عالعروس...و الله و كبرتي يا لطوف" نورة"لا و اليوم بيدخل عليها و بيكلمها" نقزت لطيفة"يهبي الا هوو...ما يدخل عليه ولا يشوفني ولا شوفه....بعد هاللي قاصر" حصة و نورة"ههههههههههههه" حصة"يالخبلة اصلا لازم يشوفج...من حقه...ليش عيل مسوين كل ها..يراوونج للناس؟؟" نورة"لطووف...لو يود ايدج مب تكفخينه و تربعيين" حصة"ههههههه...الله يخس ابليسج يا نوروو" لطيفة"و الله انكن ماصخات...انا اسمع البنات يوم بيعرسن يقولن خواتنا يساعدنا و يتمن ويانا سند...امحق خوات انتن" آمنة"لطووف...تدرين البارحة شفت المعرس" لطيفة مب قادرة ترمس لان الماكيير احتشرت عليها بس تأشرلها بايدها تكمل.. آمنة"كان ويا سعود اخويه و وياهم واحد ثاني واقفين عند الباب.." حصة"و انتي يا السوسة شو مودنج صوب الميالس و الرياييل...جان زين زخوج عشان تحرمين مرة ثانية" آمنة"لا و الله حرام كنت سايرة اييب البلاي ستيشن بس لقيتهم عند الباب و رديت" نورة"و بعدين انتي شو دراج انه المعرس" آمنة"هاه؟!!...آآآه...لا لاني جي سمعته بالصدفة يقوله نهيان..بس" حصة"بالصدفة يالحمارة...تلقين وقفتي تتسمعين شو قالوا " لطيفة"بسكن عاد عليها....بعدين انتوا شو ميلسنكن هني...ليش ما يتكم الحرمة لين الحين.." حصة"دقيتلها قالت نص ساعة بتيي و بتسويلنا...." نورة"اماية قالت لازم الساعة 7 و نص نكون في الفندق....عشان نوديج الحجرة تتصورين قبل لا تنزلين" و يرن تلفون حصة.. حصة"هاذي هي وصلت..قومي نورو ....أمون..تعالي خليها تسشورلج شعرج ويا هالكشة..." نورة"يلا يالعرووس بااااي" . . و سارن نورة و حصة يتعدلن و تمت لطيفة في الحجرة ويا الماكيير و الكوافيرة... من الصوب الثاني كانت مريم و عليا و سلامة بعد سايرات الصالون يتعدلن....محد طاع اييهم البيت و استسلموا للأمر الواقع و ساروا الصالون.....مريم ما كانت متشجعة وايد للملجة...من الاسبوع اللي طاف و افكارها تييبها و توديها...كل يوم تحلم بكوابيس....كل يوم لازم تصيح قبل لا ترقد على مهرة....ليش ما دقتلها...ليش ما قالتلها انها مريضة...يا ترى شوفيها....كانت متأكدة انه شي جايد اللي بيمنعها انها تتصل...كانت تعرف مهرة عدل....ما تقول انها تعبانة عشان ما تخليها تحاتي...بس هالمرة غير...و كان اللي يزيد من كآبتها كل ما تتذكر انها نهت كل شي بينها و بين مهرة....هي اللي قالتها خلاص مابا اكون ربيعتج....كل ما تتذكر كلماتها تنقهر زيادة و تحس بندم و بقهر... حاولت انها تلقى رقم مهرة بكل الطرق اللي يت على بالها بس ما لقت أي شي...حتى انها في بعض اللحظات كانت تفكر تسأل سعيد يمكن يعرف شي عن مهرة...بس في كل مرة تيود التلفون تتراجع.....و ترد مرة ثانية تتذكر آخر لحظاتها ويا مهرة و تتندم عليها... . . على الساعة ثمان الليل كانت لطيفة ويا خواتها في الفندق يتصورون...تموا تقريبا لين الساعة ثمان و نص و عقبها نزلوا تحت القاعة و تمت لطيفة في الحجرة تتصور بروحها..كانت صدق جميلة....الا كانت روعة....لطيفة كانت ملامحها بريئة..على شقار شوي...غير عن حصة و نورة...كانت هي و آمنة يتشابهن...و بالرغم من المكياج و التسريحة كان ينبان انه ويهها وايد طفولي و جذاب...لطيفة كانت وايد زايغة....حتى انها كانت ميودة دموعها عن يخربن المكياج...على الساعة 9 ياها سعيد و حصة و نزلوها للقاعة و دخلت القاعة جنها ملكة....فستانها كان تركواز يناسب السمار الخفييف في بشرتها...و يناسب شقار شعرها....و المكياج كان صدق مغيرنها و مخلنها مثل اللبنانيات اللي في التلفزيون....الكل صدق استخفوا عليها حتى امها يوم دخلت تمت تقرى المعوذات في صدرها عن يضربونها بعين على كثر ما كانت تجنن.....مشت لطيفة بين المعازيم مثل الأميرات....كانت تحس بقلبها يدق و يدق بسرعة بس كانت تحاول تيود عمرها و توصل للكرسي اللي في الكوشة....و بعد عشر دقايق من الزفة يلست على الكرسي و ارتاحت نفسيا شوي...و طلعوا ربيعاتها يسلمن عليها و اتصورت ويا بعضهن و عقب طلعت مريم تسلم عليها... مريم و هي تقرص لطيفة في ركبتها" يقولون المصاروة..اقرصك في ركبتك الحقك في جمعتك" لطيفة"هههههه...صدقتي...الاسبوع الياي قالتلي اماية خطبتج" مريم"ههههه...شفتي كيف...على طول..يلا مبروووك حبيبتي..و عقبال العرس ان شاء الله" لطيفة"مشكوورة عقبالج ان شاء الله" مريم"يلا باجر بتصل ابا التفاصيل...شو قالج شو سوا" لطيفة"ههه..الله يغربل ابليسج...ما تيوزين عن الطنازة...حرام عليج و الله اني احاتي اذا بيدخل او لا" مريم"اكيد بيدخل شو عيل..خليه حليله يصبر عمره بنظرة" لطيفة"انزين انزين بسج يام لساان...و الله احس اني بمووت من الزيغة.....هييه اقول..وين مهرة ماشوفها...ليش ما يت وياج" مريم جنه حد صفعها على ويهها"مهرة!!...مهرة في لندن...تتعالج" لطيفة"لييش خير شو فيها..؟" و هني تقطع عليهم سوالفهم اليازية مرت صالح"ليش زايغة...خلاص الحين لازم تتأقلمين ويا الوضع.."و هني تشل مريم بعمرها و تسير عنهم لانها ما تداني تكون هي ويا اليازي في مكان واحد...اما اليازية فلاحظت ان مريم روحت بس عشان هي يت و انقهرت....بس سكتت....مب لانها بتنسالها ياها....لا بس لانها بتردلها ياها...بس مب الحين.. . . عقب ساعة تقريبا من دخلت لطيفة قالوا حق الحريم يتغشن لان المعرس بيدخل....و لطيفة هني صدق قامت تتنافض من الخاطر...كانت نورة عدالها و هي ميودة ايدها قو و تقولها لا تخلونه يدخل...زين انها ما صاحت من الحياا...و بالفعل دخل نهيان و هو عينه عليها من اول ما دخل الصالة....صدق كانوا يناسبون بعض...و اول ما يا عدالها حبها على راسها و هني لطيفة صدق حست جنه شعر راسها كله وقف...و بدا يلبسها الشبكة و هو متلخبط مب عارف كيف يسكر العقد او الكواشي و تمت امه تساعده...و عقب يلس شوي بس ما تجرأ ايود ايدها و لطيفة حليلها كانت بتموت من كثر ما هي مستحية...و في خاطرها ضحكة عووودة على عمرها...و بعد شوي شل نهيان بعمره و ظهر...بروحه هو كان متلعوز و متلخبط....في خاطره كان يقول محلاها...هو صحيح هذاك اليوم لمحها بس ما كان يدري انها جيه جميلة...صدق كان مستانس..و يدعي في قلبه انه الله يوفقهم... . . مرت الليلة على خير و روح كل واحد لبيته....كل واحد بافكاره و هواجيسه...ناس مستانسة من ليلة من احلى الليالي و يحلم باجر ايي بسرعة من زود الفرح....و ناس اللي ما يمر عليها غير بحسرة و بثقل السحاب...و يتمنى باجر ما ايي و يكشف المجهول اللي يخاف منه... . . في الليل الساعة 3 الفجر كانت لطيفة يالسة ويا خواتها يالسات في الصالة سهرانات...طبعا ما يرومن ايودن الرمسة لين ثاني يوم...و سوولهن سندويجات لانهن ما تعشن في الفندق.... نورة"شفتي مريوم شو لابسة...صدق يجنن فستانها" حصة"انا ما عيبني وايد..احس مب مناسبنها" لطيفة"لا و الله يجنن...حتى علاية فستانها حلو..." نورة"بس صدق لطووف كنتي تجنييين....صدق صدق يعني الحمدلله الفستان كان حلو و الميك اب و التسريحة وايد اوكي" حصة"الله يغربلها هاذي اللي حطتلنا....احسبه اخترب بسرعة...و شو دحبت شعري سبراي" لطيفة"لا و الله حرام احس وايد حلو مكياجكم..." نورة"انا عيبني" حصة"انتي كل شي يعيبج" و كملوا سوالفهم لين ما دخل عليهم سعيد اللي كان توه راد من برى.. سعيد"هااا...اشوفكم واعيات لين الحيين...شو السالفة....ما خلصت الحفلة...اكيد تحشون في فلانة شو لبست و علانة شو سوت" حصة+نورة+لطيفة"هههههههههههههه" حصة"اكيد لازم اليوم نسوي ملخص الاحداث" سعيد"لطوف...ترى نهيان باجر بيي عندنا..." لطيفة"خل ايي و انا شعلي منه" سعيد"شو شعليج منه..تستهبلين انتي...بيي يبا يشوفج" لطيفة"بس انا مابا اشوفه...شو غصب.." نورة"يالخوافة...ما بياكلج...الا بييلس شوي بيسولف" لطيفة"مابا مابا ماباااا..." سعيد"مب عكيفج" حصة"ههههههه...يحلييييلج و الله...تضحكين" سعيد"ايه انتي...مب تفشلينا" لطيفة"شو اييه...اسمي لطيفة....حرم نهيان...المفروض اليوم ملجتيه تدلعوني و تسولي كل اللي اباه" سعيد"بس بس قومي ارقدي عن ايي باجر و عيونج منفخة شرات الفنيال.." لطيفة"وي بسم الله عليه....فال الله و لا فالك يالماصخ....ها و انا ابا اقولك شي يهمك...و انت ما تستاهل..." سعيد"شو يعني بيهمني من صوبج" لطيفة بابتسامة خبث"عن قوم سيف بن عيلان" سعيد يوم سمع الاسم صدق اتيبس في مكانه... سعيد"شو بلاهم..." لطيفة"مب الحين مب الحين....في الجو غيم" حصة "آه يالماصخة...لا و بعد جدامنا تقول جييه....قومي قومي نورو خل نسير حجرنا...صدق ما تستاهل الواحد يعبرها" نورة"هههههههه...يلا سرنا...اصلا انا بروحي فيه رقااااد...ليتني رديت بيتنا" لطيفة"و ها وين ان شاء الله..بيت الييران" نورة"لاا حبيبتي...بيتي هو المكان اللي فيه ريلي و عيالي" حصة"قومي قومي انتي بس....بدينا في قصص الحب" و تموا كلهم يضحكون الا سعيد اللي كان بيموت يبا يعرف شو تعرف لطيفة بس ما يبا يبينلها انه مهتم... و ركبن حصة و نورة حجرهن فوق و تموا سعيد و لطيفة... سعيد بارتباك"شو بلاهم قوم بن عيلان" لطيفة بخبث"تقصد مهرة؟؟" سعيد"لطووف..بتقولين ولا" لطيفة"خلاص خلاص بقول..ترى اليوم مريوم بنت عمتي كانت موجودة" سعيد"انزين و بعدين" لطيفة"انا قبل قلتلها وين مهرة...جان تقولي مسافرة...لاني كنت ابا اعزمها" سعيد"و بعدين" لطيفة"بس اليوم يوم يت تسلم علي قلتلها وين مهرة...جان تقولي مسافرة تتعالج" سعيد منصدم"شووو...تتعالج من شووو...مسافرة ويين" لطيفة و هي زايغة"مادري...ماقالتلي...روحت عني" سعيد و هي معصب"باجر تتصلين فيها خليها تخبرج كل شي...وين مسافرة و شو بلاها و كل شي...و اذا قدرتي ييبي رقمها " لطيفة"خلاص خلاص....اصلا هي قالت بتتصل فيه باجر..." و روح عنها سعيد و هو صدق مشوط و مشتط على الآخر....صدق كان معصب....اما في داخله كان ميت خوف عليها...كان يبا يطير لها الحين...شو فيها...من شو تتعالج...شو اللي يخليها اصلا تتعالج في بلد ثاني الا اذا كان المرض اللي فيها جايد.....خلاص كان شوي و بيستخف من كثر التفكير......كان يمشي في الحجرة بسرعة و بدون وعي...مب عارف شو يسوي....خلاص..بيستين من الزيغة عليها....بس للأسف ما يقدر يسوي أي شي غير انه يصبر لين باجر... . ثاني يوم الجمعة الساعة 12الظهر... كانوا بخيت و نهيان يالسين في ميلس بيت بخيت.. بخيت"يا ريال..و الله و عرست....خلااااص ماشي لعب و سوالف بنات الحين" نهيان"يا ريااال انا من متى عندي هالخرابيط...الله يعيين بس" بخيت"صدق صدق الله يعينك...الحين بتزيد الطلبات ...يوم بنتصلك بتقولنا ويا الاهل" نهيان"بس بس...طاع عمرك اول....ما نشوفك غير في الويك اند..يا بخيت قم بنسير السينما....لا لا ويا الحرمة" بخيت"ههههه....تدري عاد حامل و لازم نراعيها...." و هني يأذن الجمعة.. نهيان"قم قم خل نسير المسيد.." بخيت"سرينا...الا سعيد وينه...احواله هالايام مب عايبتني..احس به ضايق" نهيان"مادري شو بلاه هذا....طول الوقت في عالم ثاني..." بخيت" يمكن شي عندهم في البيت " نهيان"الله يعلم ياخي.....اسمع انا بسير بسيارتي لاني بروح البيت عقب" بخيت"خلاص اوكي...يلا" . . و ساروا الاثنين المسيد عشان يصلون الجمعة... . . . في منزل حمد بن سالم بعد ما خلصت الصلاة ردوا سعيد و ابوه البيت...طبعا سعيد ما رقد من البارحة لانه تم طول الليل يفكر...و اول ما رد البيت على طول سار عند لطيفة بينشدها اذا كلمت مريم او لا.. سعيد"كلمتي مريوم ولا بعدج" لطيفة"لاا شو بعدني...الناس الحين يصلون استحي اتصل..و بعدين هي قالت بتتصلي" سعيد بعصبية"يعني متى..." لطيفة"مادري....اذا لين المغرب ما اتصلت انا بتصل فيها" و شل سعيد عمره و روح عنها و هو صدق ضايق....لطيفة كانت مستغربة واايد من حركاته....عمرها ما شافت سعيد جيه...و تقول في خاطرها ها من الحب و سواياه...و هني اتذكرت ان نهيان بيي عندهم اليوم و ردت اختبصت مرة ثانية...و سارت حجرتها تطالع شو بتلبس.... . . على الساعة 7 عقب صلاة المغرب اتصل نهيان في سعيد يقوله انه ياي بيتهم....و قام سعيد و سار خبر لطيفة اللي اعتفست و ردتلها حالة القلق...و المشكلة ان خواتها روحن عنها و ما تروم تستشير حد شو تسوي او شو تقول... و بعد ربع ساعة تقريبا وصل نهيان و دخله ميلس الحريم.. و تموا شوي يسولفون و بعدها قام سعيد عشان يزقر اخته و امه عشان يزهبون الفوالة و يخلي لطيفة اتيي تسلم على ريلها...و بالفعل دخلوا الفوالة و بعد شوي وقفت لطيفة ورى الباب و دقته عشان سعيد يظهر لها... . . من ورى الباب.. سعيد"بلاج واقفة هني تعالي داخل.." لطيفة و هي ميتة من الزيغة"مابا و الله مابا..خل يروح مابا" سعيد"تستهبلين انتي..يلا بسرعة ادخلي جدامي" لطيفة"سعيييد.." و هني سعيد بطل عيونه عكبرهن عشان تنطم و تمشي جدامه....و بالفعل دخلت....كانت لابسة كندورة و لافة الشيلة على راسها...بس كانت حاطة جحال و جلوس..." لطيفة و هني منزلة راسها و مستحية"السـ..السلام عليكم" و هني نقز نهيان من مكانه نهيان"و عليكم السلام و الرحمة" سعيد"يلا انا بي رايت باك" و هني لطيفة جنه حد صفعها على ويهها لفت تطالعه بعيون جنها تترجاه يتم...بس طبعا ما سوالها سالفة و ظهر.. و تموا الاثنين واقفين...و بعد شوي نطقت لطيفة.. لطيفة"اتفضل.." و يلس نهيان...و يلست هي على نفس القنفة بس في الصوب الثاني... و قامت اونها بتحطله قهوة و فوالة بس تم الفنيال يختض بديها من كثر ما كانت تتنافض.. نهيان"مابا..مابا قهوة...لا تعبين عمرج"و ردت حطت الفنيال...و طول الوقت طبعا ما رفعت راسها عشان تشوفه..... نهيان"شحالج..ان شاء الله بخير" لطيفة بصوت واطي يالله يالله ينسمع"الحمدلله" نهيان"شو الملجة البارحة كل شي كان تمام" لطيفة"هييه" نهيان"انتي دوم جيه هادية؟؟" و هني قفطت لطيفة واحمر ويهها.. و بعد شوي ردت و هي مستحيــــــــة"لاا..مرات" و هني رن تلفون نهيان..و يوم ظهر التلفون عشان يطالع منو استغلت لطوف الفرصة و طالعته..صدق كانت اول مرة تشوفه عدل...و فجأة لف ويهه و يت عينه بعينها و هني صدق حست بويهها يعورها و نزلت راسها مرة ثانية... نهيان"ليش نزلتي راسج..." و مد ايده و رفع راسها و تم يطالعها و هي خلاااص ميتة زين ما تمت تصيح....بس قطع عليهم صوت الباب.. سعيد"يلا يالمعرس...خلص وقت الزيارة..." لطيفة"مع السلامة..و بسرعة ظهرت من الميلس و سارت تربع لحجرتها...و اول ما دخلت الحجرة عقت عمرها على الشبرية و تمت مستحية من عمرها...و الابتسامة شاقة الحلق...صدق كانت مستاااانسة..... اما في الميلس.. نهيان"شو هايا ريال.."ما قلنا شي..ما مدانا" سعيد"مب لازم تقولون شي...باجر يوم بتاخذها بتمل من كثر سوالفها..." نهيان"و الله انك حركات" سعيد"قم نزين خل نظهر..نيسر أي مكان.." نهيان"تعال انت...شو بلاك هالايام متغير...شكلك جيه ظايق" سعيد"يا ريال خلني في حالي...مافيني شي....قم قم خل نمر على بخيت نسير أي مكان..." نهيان"ما عليه...يلا" سعيد"اترياني عند السيارة...الحين بييك" . . و سار نهيان صوب السيارة اما سعيد فسار صوب حجرة لطيفة... سعيد"لطوف...دقيتي" لطيفة"لاااااا...بعدني...توه المغرب أذن و يا نهيان" سعيد"نزين يلا دقيلها..." لطيفة"اوكي...لحظة.."و بالفعل دقتلها على موبايلها...بس ما ردت.. لطيفة"ماترد" سعيد"دقيلها مرة ثانية" و في هالمرة ردت مريم... مريم"يا هلااا بالعروس..." لطيفة"اهليين...شحالج مريوم..شخبارج" مريم"الحمدلله...انتي علوومج...هاا شوو ياج المعرس..." لطيفة"هييه..اليوم" مريم"انزيين...و شو قالج و شو قلتيله" لطيفة"هه...مب الحين...شسمه عقب بخبرج...اسمعي...بس بغيت اسألج عن مهرة....و الله غمضتيني يوم قلتيلي تتعالج...ليش شو بلاها هي" مريم"و الله ماعرف يا لطوف...ترى من يوم سافرت ما شلّت تلفونها وياها...و ما اتصلت.." لطيفة"انزين وين يعالجونها...انتي اصلا كيف عرفتي دام انه ما عندج رقمها" مريم"لا ترى اهلها يوا سحبوا اوراقها و قالوا انها في لندن تتعالج...بس كم رقمها ولا شو عوقها ماعرف....مادري..و الله اني زايغة..اخاف يكون شي جايد" لطيفة"حلييلها و الله...انزين اقولج بخليج الحين اسمع اماية تزقرني....خلاص انتي لو يت ولا اتصلت فيج سلمي عليها و طمنيني" مريم"ان شاء الله...يوصل..." لطيفة"يلا حبيبتي...مع السلامة" مريم"مع السلامة" . . سعيد"ها شو قالت" لطيفة"تقول ما تعرف عنها شي...لانها فارة تلفونها في البلاد...بس تقول انها في لندن" سعيد"وين في لندن...و شو مرضها" مريم"اقولك ما تعرف شي...تقول ما دقتلها...بس اللي تعرفه انه اهلها سحبوا اوراقها من الجامعة حق هالكورس و انها في لندن تتعالج...من شو ما ادري" . . سعيد"خلاص اوكي...ثانكس" و روح عنها سعيد عند نهيان اللي كان يترياه في السيارة... نهيان"نقعتنا" سعيد"سوري..." نهيان"بلاه ويهك جيه جنه حد مصفعنك" سعيد"مابلاني شي يا نهيان..ما بلاني شي...يلا يلا حرّك" تحركوا بالسيارة لين صوب المقهى لانه نهيان اتفق ويا بخيت يتلاقون هناك...بس طول الدرب سعيد ما نطق بكلمة....كان طول الوقت ساكت و مهموووم....و اول ما وقفوا السيارة في الباركنج... سعيد"نهيان...انا بسافر لندن" نهيان"لندن؟!...شو يوديك لندن" سعيد"تحيد بنت عيلان...." نهيان"هييييييه...بلاهااا...تباك تسيرلها هناك" سعيد"لااا...ما تعرف..اصلا انا ما اكلمها...بس سمعت انها مريضة و تتعالج هناك" نهيان"مادري و الله شو اقولك..." سعيد"تعال وياي..." نهيان"شوو؟؟!!...شو يوديني انا..انت ساير ورى قلبك انا شلي ارز" سعيد"يا ريال تعال وياي منها تمشية" نهيان"مادري و الله...بطالع..." سعيد"شو بتطالع بعد...انت من متى ما خذت اجازة....الحين خذ اجازة و بنسير" نهيان"بشوف الاوضاع في البيت كيف و برد عليك....نزين و بخيت" سعيد"بنقوله....بس ما اعتقد بيي..تعرف حرمته حامل" نهيان"هيييه...خلاص يصير خير" . . و دخلوا الاثنين المقهى و خبروا بخيت بس مثل ما توقع سعيد ما طاع.....و بعد ساعة تقريبا روح عنهم سعيد عشان يرتب السالفة...يستأذن من ابوه و يخبر امه... . . في لندن..بالتحديد في مطار هيثرو...وصلت الحين طيارة نورة و سيف...خالد كان يترياهم في المطار مثل ما اتفقوا البارحة... خالد"الحمدلله على السلامة" سيف"الله يسلمك" خالد"ها نورة ان شاء الله ما تعبتي" نورة"لا الحمدلله ما تعبت....طول الدرب راقدة" سيف اول ما قالت جيه تم يطالعها بنظرة...لانها طول الوقت ما غمضت عينها...كان يشوفها و منتبه عليها انها تفكر و تفكر بس في هدووء...و انتبه عليها يوم تجمعت الدموع في عيونها و حاولت انها تخفيهن...كان يحس بشعورها...او بالاصح كان يعرف انها وايد متأثرة...بس لين الحين ما عبرت عن اللي في داخلها.... خالد"الحمدلله...سيف..متى طيارتك.." سيف"باجر الصبح" خالد"باجر؟؟..ليش ماشي اليوم؟؟" سيف"لا شي..بس فل.." خالد"و شو بتسوي بالدوام" سيف"اصلا جي و لا جي انا باجر ما كنت بسير..." نورة"الا يوم ما بتفرق...خل الولد يرتاح" خالد"ماعليه ماعليه...يلا انزين خل نسير ناخذ الشنط و نسير الفندق" نورة"ما بنسير المستشفى؟؟" خالد"استهدي بالله...شوي شوي...الحين ردي الفندق..بدلي ثيابج و صلي و ارقدي شوي..و باجر الصبح نسير المستشفى" نورة"ماشي...قلبي ياكلني على بنتي ابا اشوفها اليوم.." خالد"فالج طيب يا ام مهرة...بس اول نرد الفندق..." نورة"ان شاء الله خير" و ساروا الثلاثة بعد ما شلوا شنط نورة و الممرضة اللي كانت وياهم و شنطة صغيرة مالت سيف للفندق...و بعد ما تغسلوا و بدلوا ثيابهم و صلوا..و ارتاحلوهم شوي من الدرب ساروا المستشفى صوب مهرة و آمنة اللي كانت وياها.. تااااااااااااااااااابع ... Quote Link to comment Share on other sites More sharing options...
ديهيه Posted ابريل 5, 2005 Author Report Share Posted ابريل 5, 2005 وباااااااااااااقي بعد واايد على نهاية الجزء .. انتظروني.. ماراح أتأخر عليكم .. Quote Link to comment Share on other sites More sharing options...
أسير الغربة Posted ابريل 5, 2005 Report Share Posted ابريل 5, 2005 شكراااااااااا ننتظر التكمله B) Quote Link to comment Share on other sites More sharing options...
غزال الريم Posted ابريل 5, 2005 Report Share Posted ابريل 5, 2005 شدعووه ما بتخلص القصة يعطييييييييييج العافية ديهيه ننطررررررررر التكملة بليييييييييييييييز لا اتأخرين Quote Link to comment Share on other sites More sharing options...
Sea Melody Posted ابريل 6, 2005 Report Share Posted ابريل 6, 2005 مشكورة اختي على القصه و ان شاء الله لا تتاخرين علينا وااااااااااااايد تراني ميته ابا اشوف شو بصير Quote Link to comment Share on other sites More sharing options...
شيخة بنات البحرين Posted ابريل 6, 2005 Report Share Posted ابريل 6, 2005 تسلمين اختي ويالله حطي الباقي عاد ابي اعرف النهاية Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.