مجموعة إنسان Posted سبتمبر 4, 2003 Report Share Posted سبتمبر 4, 2003 شباب حبيت أخبركم أن من مدة تقريباً أسبوعين قد تلاحظون عدم فتح الصفحات على شبكة الإنترنت بالنسبة للأخوة والأخوات المقيمين في البحرين. أما الخدمات الأخرى مثل خدمة المسنجر والياهو مسنجر والبالتوك والأوتلوك أكسبلورر فالحمد لله لحد الآن ماكو مشكلة تذكر عدا بعض انقطاعات المسنجر في أوقات متفرقة والسبب يرجع الى سيرفرات المسنجر نفسها. طبعاً أخوكم أتصل ببتلكو على مدار الفترة اللي راحت بعد هذي المعاناة ورحبوا فيه بتلكو لأن يعرفونه (( بو لسان مثل الموس )) ولكن حلفوا له على ستين مصحف ما عندهم مشكلة في التصفح وأنت أول واحد يا حظي اللي تتصل عن هالشي. قلنا أمرنا لله .. اليوم أتصلت للمرة 1007 بعد ما غثيتهم ..أخيرا قال الموظف فعلا عندنا مشكلة والمهندسين يشتغلون عليها.. طبعا كلكم تعرفون أرقام DNS Server مال طويلة العمر بتلكو .. فعطوني الأرقام اليديده السرية ... طبعا هذي الأرقام مخشوشين تحت المسند حق العازة ??? الأرقام القديمة 193.188.97.197 الأولي 193.188.97.212 الثانوي الأرقام الجديدة: 193.188.97.193 أولي 193.188.97.194 ثانوي بس السالفة مو هذي .. السالفة أكبر ... الحين سمعوا,.,, أولا بتلكو تاخذ علينا مبلغ 30 أو 40 أو 50 دينار شهرياً على خدمة السبيدزفت.. أوكيه؟؟ كلام ما عليه غبار ثانيا بتلكو عقب الساعة 12 في الليل يصكون برادات الـ HELPDESK يعني إذا صارت حق أي واحد منا مشكلة في الخدمة يرن للساعة 7 الصبح ولا أحد يعطيه ويه.. يعني مالكم إلا خدمة 121 .. ثالثا.. نتصل بهم 121 يقولون إحنا بنبلغ عن الخلل الصبح حق (( جماعة الإنترنت )) سمعو المصطلح .. يسمونهم (( جماعة الإنترنت )) ... والله مسخرة.. أي جماعة أي بطيخ ؟؟ ويوم ثاني أييك بيكب مال بتلكو ويطق عليك الباب ويقول لك (( ياخوك أنته مبلغ عندك خلل في الواير مال السبيدزفت ؟؟)) ??? الله يغربل ابليسك .. أنا مبلغ إن الإنترنت فيها خلل .. يايني تبي تصلح الواير؟؟ .. ما أدري أزنطك بالواير :-X ------------------------------------------------------------------------------ طيب لو قسمنا مبلغ السبيد نت على الشهر بيكون لكل يوم التالي: بو 30 دينار = 1 دينار بو 40 دينار = 1.333دينار بو 50 دينار = 1.666دينار وهذي لقاء خدمة من الساعة 7 صباحا إلى 12 ليلا... بدل ما تكون 24 ساعة لأن أحنا ندفع حق الشهر كامل ..سواء صار خلل في الإنترنت أو ما صار .. طيب لو صار خلل في بعد الساعة 12 ليلاً و (( جماعة الإنترنت )) في بتلكو راقدين ثلث مدة اليوم ؟؟ كم خسرنا وكم كسبت بتلكو ؟؟؟ يخسر بو 30 دينار مبلغ = 10 دنانير شهريا يخسر بو 40 دينار مبلغ = 13.333 دنانير شهريا يخسر بو 50 دينار مبلغ = 16.666 دنانير شهريا لوكان لدينا 1000 مستخدم من كل هالثلاث خدمات كم تكسب بتلكو ؟؟ 10 × 12 = 120 دينار سنويا × 1000 = 120000 سنويا ( تصلح حق فله متواضعة لأحد مديري بتلكو ) 1.333 × 12 = 159.996دينار سنويا × 1000 = 159996 سنويا ( تصلح حق فله متواضعة + سيارة كشخة وملحق وزاوية مبيوقة من الإسكان لأحد مديري بتلكو ) 16.666 × 12 = 199.992 دينار يوميا × 1000 = 199992 سنويا ( تصلح حق عمارة متواضعة لأحد مديري بتلكو ) هذي أحصائية بسيطة فقط عشان تعرفون إن بتلكو ما ينامون عبث هذي لو لو لو قلنا إن عندنا بس 3 آلاف مستخدم للسبيدزفت ------------------------------------------------------------------------------ وأنا أكلم سعادة الموظف مال (( جماعة الإنترنت )) .. قال لي إذا عندك مشكلة في الخدمة بعطيك رقم 900 تتصل لهم وهم بيعطونك الحل وقيمة الدقيقة 150 فلس .. الظاهر بتلكو قررت تييب جورج قرداحي في برنامج (( من يخلي بتلكو تربح الألف مليون )).. لا والموظف يقول لي أنا عندي تعليمات من الشركة ما أتكلم معاك أكثر من دقايق معدودة .. مع أن احنا في توقيع الإتفاقية مع الشيخة بتلكو .. كان التوقيع على أساس توفر الخدمة وخدمة الدعم الفني .. ----------------------------------------------------------------------------------- على كل حال - ما أعور راسكم - يعني أحنا قاعدين نصارخ ونقول رفعوا من مستوى المعيشة للإنسان البحريني .. وغافلين عن السرقة اللي بتلكو قاعدة تبوقنا عيني عينك ... لاحظوا إن المواطن لا زال ومن بداية العهد الجديد بقيادة حبيبنا بوسلمان .. ما يقدر يطلع على كيفية تحصيل رسوم وأجور مكالماته من بتلكو ... والحين بيخسر مو بس ثلث الخدمة .. الحين بيضطر أنه يدفع حق خط الـ 900 .. لأن بتلكو ناوين يشترون مخدات وفرش و أسرّه من ذهب على حسابك أنت يالمواطن وتصورو للحين ما خفضوا لك ولا فلس .. وأستغلوا همومك يا مواطن في تدقيق فاتورتك وأمرك لله يالمواطن .. وين الكلام اللي سمعناه من ذهب بكسرالإحتكار ونزول شركات جديدة .. ياللا يا مواطن صدق كثر ما تصدق .. ??? على فكرة الموضوع مو منقول ولا شي ... هذي هموم مواطن بحريني .. حاله حالكم .. لكن حبيت أتشوفون وين البوق.. ويا غافلين لكم الله أول مرة أتمنى أن يتثبت لي موضوع .. ياريت تثبتونه لفترة مو لأنه موضوعي .. بس لأن المواطن هو أكبر همومنا حسب ما فهمت من سياسة منتدانا الغالي قواكم الله منتدانا الحبيب وسامحوني بنقل نسخة من الموضوع لمنتديات ثانيه أملا في أن تعم الفائدة Quote Link to comment Share on other sites More sharing options...
بريق الماس Posted سبتمبر 4, 2003 Report Share Posted سبتمبر 4, 2003 مجموعة انسان و الله انا باقوني بوق ما يعلم فيه الا الله. لكن الله يمهل ولا يهمل. Quote Link to comment Share on other sites More sharing options...
El-Reem Posted سبتمبر 5, 2003 Report Share Posted سبتمبر 5, 2003 رغم أني في الفترة الأولى من أستخدامي للنت أصبحت حافظة اسماء ((جماعة النت )) عن ظهر قلب, أيام المهد الأولي لظهور النت في البحرين. لكنى بصراحة هذه الأيام صعقت بخبر الاتصال على 900 . ??? فعلا الله ايعنين المتصلين للأستفسار . :- وان شاء الله عوضك على الشركات الجديدة لخدمة النت , والتى لا أعرف متى ستكون متوفرة . حتى نقول وداعاً بتكلو . ;D يعطيك العافية مجموعة أنسان موضوعك غاية في الاهمية والله المستعان. Quote Link to comment Share on other sites More sharing options...
نــوف Posted سبتمبر 5, 2003 Report Share Posted سبتمبر 5, 2003 هالمشكله وهالهم اللي تكلمت عنه يا سكايو في كل بيت موجود ومستحيل محد يعاني من بتلكو!!!كل شي يحطون بالهم عليه كل آنه والله العظيم مايهدونها يلحقونها ملاحق!!!! ماقول الا الله يكون بالعون :- الكل يتشكه من راتبه انه مايكفي وهذي الشي معروف والكل يدري عنه لكن ياحسرة وين يروح لغير بتلكو!!!! ولا وعلى كل ذي يتفلسف حضرة الاخ الكريم اللي من جماعه النت علينا ويستحمق ليكون على حسابهم احنه يالسين نستخدم النت او التلفون؟؟؟ هذيله مال بتلكو ماتنفع معاهم الا العين الحمرة > مافي فايده الطيب معاهم انه شخصيا مجربه بغض النظر عن سالفه الانترنت حتى التلفونات والموبايلات ماخذ لك شهر دفعت البيل الا ياتك شكوة بيرفعون عليك قضيه لا والتوقيع من مكتب المحامي ??? يعني يا ناس عذرو معقوله موظفين بتلكو ما يمرون باللي يمر فيه المواطنين عشان يحسون؟؟؟ والا حتى اهمه يبوقون خطوط بلوشي لهم مب حاله الصراحه معاهم مايصير جذي الشركه اليديده هذي وينهي اللي تكلمو عنها ??? الكل ينطرها وحاط اكبر الامال عليها لكن الله العالم هالشركه شلون بتكون مثلهم والا :-X :-X :-X تحياااااااتي الموضوع حرق اعصابي الصراحه :-X Quote Link to comment Share on other sites More sharing options...
DragoN GurL Posted سبتمبر 5, 2003 Report Share Posted سبتمبر 5, 2003 الله يهداك مجموعة انسان توك تدري ان بتلكو حرامية؟؟؟؟ احنا عايشين سنين واحنا ندفع لها من ورانا وجدامنا... متى ما شفتهم يسووون خدمة يديدة فري تشوفهم ياخذون من وراك الف دينار وانت ماتدري.... اصلا بتلكو اغنى شركة اتصالات في الخليج تعرف ذي الشي.. فليش ما يسوون الاتصالات الداخلية ببلاش؟ اغلب دول الخليج مكالماتهم الداخلية ببلاش بس الخارجية تحسب.. وهذا على فكرة ما بيضر بتلكو الا بينفعها.. المشكلة هي الشركة الوحيدة وما باليد حيلة... احين احنا نترقب الشركة اليديدة فودافون عل وعسى تطلع اهون... الله كريم وحسبي الله ونعم الوكيل... Quote Link to comment Share on other sites More sharing options...
F@rFo0o0ora Posted سبتمبر 5, 2003 Report Share Posted سبتمبر 5, 2003 تو الناااااس توك تدري ان بتلكو اكبر حرامية حتى السمسم مبيوقين بس شنقول مالنا الا نقول الله كريم Quote Link to comment Share on other sites More sharing options...
EmInEm Posted سبتمبر 5, 2003 Report Share Posted سبتمبر 5, 2003 لصراحه انه يمكن مرتين في الاسبوع ايصكون الانترنت عنه مدت يومين تتصل فيهم ليش قاطعينه اقولون ها مب من عندنه او عقب ساعه انرد نتصل فيهم ايقولون تره العطل من عندنه احنه ندفع لهم ابلاش ولا لا اخلونه يومين ايعني مايردونه الا نص اليل يعني ايروح عليك او انه كل اسبوع شايله التلفون او متصله فيهم اش هل حاله او نحرق في اعصابنه او لا ايقولن ساعات بنرد الانترنت المغرب تبي اتبطل الانترنت ماينفتح الصراحه انه لاعت جبدي من بتلكو اففففففففففففففف احس اعصابي توصل حدهه اطلع حرتي في الي يمي اذا ماردوه والله حاله او لاوعت جبد Quote Link to comment Share on other sites More sharing options...
عشرة دينار Posted سبتمبر 6, 2003 Report Share Posted سبتمبر 6, 2003 حسبي الله ونعم الوكيل فيهم هذلين ناس ماعندهم ضمير ولا ذمة لكن الله لهم ..... Quote Link to comment Share on other sites More sharing options...
مجموعة إنسان Posted سبتمبر 7, 2003 Author Report Share Posted سبتمبر 7, 2003 أضافة لردود الأخوة المشاركين في الموضوع: بتلكو في الفترة الأخيرة هددت برفع أجور الخدمات للهواتف الثابتة الى 300 في المئة ... يعني المكالمة الدولية للخليج العربي بتكون أرخص من المكالمة المحلية.. راحو يتبجبجون عند هيئة تنظيم الإتصالات يدعون أن الخط الواحد الأرضي يكلفهم 500 دينار سنوياً ... تصوروا يالسين إحنه على شيكة خطوط من البلاتين والذهب ??? هيئة تنظيم الإتصال رفضت أن يرفعون خدماتهم.. بيتلكو خايفة من فيدافون فما بتقدر ترفع خدمات الهاتف النقال لإن فيدافون منافس في النقال .. عشان جذيه راحا يتبجبحون ويمسحون خشومهم عند الهيئة .. أي كذب اللي تكذبه بتلكو ؟؟؟ بتلكو ما تخاف من الخسارة إنما خوفها من خسارة أرباحها المتنامية .. وشوفو حجم البزنس اللي عند بتلكو في الكويت ومصر والسعودية والأردن وإيران عشان تعرفون إن بتلكو شركة تفكر في مستقبل حفنة من المساهمين فقط ..وإنما الخدمة اللي تقدمها الباهضة والمبنية على الإحتكار اللي نتمنى كسره من زمان .. هذي الخدمة هي اللي تمكن بتلكو الإقطاعية من إمتصاص دم المواطنين المساكين واللعب بأرزاقهم.. .. أما الراهيين فلا يهمهم .. لو قسمنا ربح 70 مليون دينار (( حوالي 200 مليون دولار )) سنويا على الحفنة من المساهمين كل واحد كم بيكون في رصيده سنويا؟؟ وبكل دم بارد يرفعون عليكم المساهمين قضية حال عدم دفع 30 دينار.. غير اللي بيدفع المواطن من أتعاب المحاكم والقضاء وبينحط في القائمة السوداء ... وين البرلمان عن كسر الإحتكار ....؟؟؟ اللي نسمع عنه من 3 سنوات ؟؟؟ عيل بعد كم سنه بتكون بتلكو متربعة على العرش ؟؟ إذا بعد أربع سنوات من كسر الإحتكار تبدأ شركة فيدافون .. ؟؟ عيل أي أحتكار اللي تم كسره هذا اللي نسمع عنه ؟؟؟ Quote Link to comment Share on other sites More sharing options...
DragoN GurL Posted سبتمبر 7, 2003 Report Share Posted سبتمبر 7, 2003 الله يستر :- Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.