ابو ضاحي

اتمنى تستضيف صوت المشاعر عادل محمود واكون لك شاكر وممنون

كانت ذيك الايام اعتقالات عشوائيه مو بس اخواني الي ياخذونهم اخواني وياهم 10 او 15 شخص يعني يمشون وياخذون وبس .. واخوي اليوم راح يقولون له تبي من قال ابي اسأل عن فلان قالهم ماعندنا واحد بهالاسم قام اخوي يعني شوي عصب على الشرطي وصار بينهم كلام وجوده ..

انتقلت الى المرحلة الجديده والاصعب في حياتي المرحلة الثانويه .. وكنت صناعي ابتديت حياتي كأني من اول جديد مدرسه جديده ناس جدد مدرسين جدد مرحله عمريه جديده في حياتي .. ابتديتها وحاولت اكمل بدون مشاكل وبدون عوار راس .. بس للأسف ماقدرت في نهايه الفصل صارت علي مادتين وماقدمتهم الاخ العزيز سمع اني سقطت وكالعاده الهوز موجود في الحجره .. تعود جسمي على الضرب حتى صياح ماصحت مايدري انه هو السبب في الي انا فيه الحين يفكر ان الضرب حل .. المهم عدت المادتين ونجحت فيهم .. وصلت الى ثاني ثانوي .. في البداية كنت من الشطار وكل المدرسين يمدحزنهم .. بس مثل مايقول المثل تأتي الرياح بما لاتشتهي السفن .. صارت الاحداث السياسيه في التسعينات وجودوا اخوي العود هنيه انا بصراحه اندمجت دموع الحزن بالفرح الفرح لان راح افتك من قساوته .. والحزن لانه كان هو العائل الوحيد في العايلة بالاضافه الى اخوي رقم ( 3 ) بس الاخير ماكان راتبه يكفينا كهرباه ومصرف عايله ومادري شنو .. وكانوا اخوي الي اكبر مني مباشره ( 4 ) تخرج من المدرسه ويدور الشغل وبقينا انا واخوي الصغير ندرس لمهم عقب ماسجنوا اخوي الكبير .. حاول اخوي الي اكبر مني انه يدور شغل .. وعقب ماحصل شغل مكمل له شهر الى يطقه الباب نص الليل ببون اخوي رقم ( 4) الي اكبر مني مباشره كانوا محاطين البيت يعني خلاص مافي مفر دخلوا له سيده حجرته شلون عرفوا حجرته الله يخلي إلCID المهم دخلوا حجرته مانسمع الى صوت ضرب واخوي يصارح وكانوا ماخذينه بقسوة يعني يجرونه جر .. ماقدرت أتحمل الموقف صحت ويا امي .. وظلينا في البيت انا واخوي رقم ( 3) واخوي الي اصغر مني .. انا واخوي الي اصغر مني كنا ندرس واخوي رقم ( 3 ) كان يشتغل على قده وسماكان راتبه يكفينا .. واضري اني اطلع من المدرسه بعد مار جعت درجاتي مثل اول وأحسن بسبب الظروف الصعبة الي عشناها .. اضريت اني اشتغل ب 90 دينار في المطار تبع مقاول في شيلا الشنط وحط الشنط داخل الطيارة .. بس شنسوي لقمه العيش لازم نكافح عليها .. اخواني 3 بالسجن وانا واخوي الي اصغر مني واخو رقم ( 3 ) بالبيت تزوجت أخت من خواتي وظلت وحده بدون زواج بس .. اشتغلت لمده تقريبا 6 شهور .. وبعد الستة شهور .. كنا نايمين انا اخوي الصغير وامي بالحجرة .. الى اثنين واقفين على رأسنا الي هم الشرطة .. بس الحين الحيرة يأخذون من ؟؟ ان خذوني مافي احد يصرف على البيت والحمل بصير كله على اخوي رقم ( 3 ) وان اخذوا اخوي الصغير حرااام بعده صغير شياخذون فيه ؟ وان اخذوا اخوي الكبير بتصير محد يصرف على البيت .. طلعوا بياخذون اخوي الصغير .. لبش شسالفه وش سوى ماندري بس الحمد لله ان اخذوا بكل رفق وياهم لاضرلوه ولاشي .. سألو امي وين جواز اخوي وعتوهم اياه .. في اليوم الثاني راح اخوي رقم ( 3 ) يسأل عن اخوي الصغير.. راح من الصبح وصلت الظهر مارد لينا وصلت العصر مارد ألينا ووصل الليل بعد مارد.. قلب إلام يحس قالت اكيد جودوه .. هنيه انا خلاص انهرت ماقدرت أتحمل بروحي ب 90 دينار بصرف على البيت آآآآآآآآآه .. طلع صدق اخوي جودوه ويا اخوي الصغير.. قالت امي لاستروح اذا جود خلاص من لينا بعد تخيلوا ان 5 اخوان بالسجن وانا راتبي 90 دينار شلون بصرف على بيت .. شلت الحمل وانا صغير والحمل عم له شوي يثقل .. حاولت أدور شغلا براتب أكثر.. حصلت في فندق والأول مره في حياتي ادخل فندق واشتغل بس شنسوي حكم الزمن علينا وكان الراتب 120 دينار على الأقل أهون شوي بس تعرفون الي يشتغلون في الفنادق شنو نظره الناس تكون لهم .. بس انا مفاعلي من نظره الناس أهم شي أعيش أهلي اشتغلت في فندق أنظف غرف كنت أنظف الغرفة وهذا يمد علي دينار وهذا دينارين وهذا 5 يعني مشيت أموري بهالسالفه .. بس تعرفون فنادق هالايام اذا تدهش الغرفة تشيل خمر وتشيل بملاوي بس شوي أعطوني حل ماكان فيه شغل ذيك الايام .. وبيتنا محد لهم .. اضريت أواصل في الشغل وكانوا الي ويا الصبيان يشربون بس الحمد لله عمري ماش هالمنكر في بوذي .. جودت روحي قدر الإمكان مع ان صعب الواحد في هالاماكن يقدر يجود روحه .. بس غصبا علي انا جاي اشتغل مو جاي حق شرب وخرابيط .. كنت اروح واجي الشغل لفت لان النقل العام ماكان يوصل شارع المعارض .. فهذا يوديني وهذا يجيبني وهذا يقطني في هالمكان وهذا يشيلني من هالمكان .. كان اتذكر دوامي يبتدي الساعه 7 اضطر ان اطلع من البيت الساعه 5 لان ماعندي سياره .. واطلع من الشغل الساعه 4 واوصل البيت يمكن الساعه 6 وساعات 7 .. هذي كانت حياتي لمده سنه كاااااااااااملة .. انتظروا التغيير الجذري في حياتي في Part 4

انتقلت بعدها الى المرحله الاعدادية وطبعا هذي مرحلة جديدة في حياتي يعني ابتدت مرحله المراهقه والي هي اصعب مرهله في مراحل الانسان .. كنا نزور اخوي الي بالسجن كان محكوم 14 سنه وكان يعطينا حوافز اذا نجحتون بسوي لكم جذي ( يراوينا شغل يدويي من صنع أيده ) واحنا نحاول قدر الإمكان ان نجيب درجات زينه والحمد لله في صف اول اعدادي طلعت الثاني على الصف .. وكان معنا في الصف واحد مثل الي كان ويا في صف السادس الي يوزع بيزات بس هذا يوزع ( Game Boy ) وكان في امتحان الانجليزي تبادلنا الأوراق وشافتا المدرس .. واخذ أوراقنا وشققها بس شلون نجحنا الله اعلم .. هذي المرحلة في حياتي كانت صعبه لان صادقت واحد وإياي كان يدخن.. وتعلمت منه التدخين .. وسمع اخوي الكبير اني ادخن حصلت عقاب عمري ماراح انساه طول عمري ربطني بحبال وطاح فيني ضرب بالهوز حتى امي قامت تصيح .. مع هذا القسوه بعد واصلت دراستي ووصلت الى ثاني اعدادي .. وكنت في هالمرحله شوي قل نشاطي ودراستي .. بسبب حاله نفسيه جتني كنت في النادي العب جا اخوي الكبير وعطاني كف قدام الاولي والتالي وبهذا الكف صراحه مانسيته الى اخوي ولا راح انساة بسبب اني قبلها بيوم تأخرت الى الساعه 12 بالليل عن البيت .. وكاتن عندنا الموعد المحدد الي نرجع فيه الساعه 11 نكون بالبيت .. تقريبا مر اسبوع .. تأخرت الى الساعه 11:30 وجيت البيت الباب مقفل .. وين اروح في هالوقت خواتي كلهم نايمين ماكان في موبايل ذيك الايام ضربت الدريشه ضربت الباب محد يطلع امي طلعت لي من الدريشه قالت لي اخوك قفل الباب وخلى المفتاح عنده .. اذكر كانت شتاء في ذاك الوقت وكان مطر يطيح اضريت اني انام في المسجد الي كان عند بيتنا .. واكيد هالشي واجد اثر على دراستي وطلعت الثالث على الصف .. بسبب تصرفات اخوي وياي .. وصلت الى الثالث اعدادي مازلت اعاني من الاثار النفسيه الي سببها لي اخوي .. كنت الحمد لله ماعندي مشاكل بالمدرسه وطول دراستي ماحصل على ولا انذار .. كنت من الشطار الي يحبون الدراسه ولا له شغل بالمشاكل .. في هالمرحله كنت مداوم على صلاه الجماعه في منطقتنا وكان الشيخ بدون مايكرفون يعني الي ورا مايسمع الشيخ .. قخلوني مبلغ الى الشيخ .. المبلغ : ( الشخص الي يقول ورا الشيخ بصوت عالي عشان الي ورا يسمعون ) وظليت كل صلاه جماعه لازم اكون موجود هناك .. الحمد لله تعديت قليل الحالة النفسيه الي كنت اعاني منها .. مع ذلك نجحت بالغصب في ثالث اعدادي وتقريبا مادتين جبت فيهم 50 من 100 وهذا الي ماعمره صار في حياتي .. كنا في اجازة الصيف ماكنا نسافر انا واخواني وخواتي بالبيت خواتي تزوجوا منهم 3 وظلوا 2 بالبيت ويا في هالصيف صادتني مشكله الي اعتبرها نقطه سوداء في حياتي كنت في مرحله المراهقة وصراحه ماتعديت هالمرحله بنجاح لانها مرحله لاختبار الانسان من قبل الله سبحانه وتعالى .. بس للأسف ماتعديتها وعصيت ربي .. القصه ان كان في بيت عمتي خدامة دايما تتردد على بيتنا وتطالعني واااجد وكان عمري 15 سنه يعني كنت في عز مرحله المراهقه .. مره امي طرشتني بيت عمتي اودي لهم حليب عمتي وزوج عمتي شياب وكانت هي بس في البيت عطيتها طقيت الباب قالت لي الخدامه ادخل.. عمي وعمتي كانوا نايمين .. دخلت البيت وكانت موجوده في حجرتها .. قالت لي ادخل يعني تقصد حجرتها عطيتها الصحن وتوي بطلع قالت لي اصبر برجع لك الصحن قعدت داخل الحجره رجعت بدون الصحن ودخلت حجرتها وانا وياها وقفلت الباب .. وقامت تتحسس في جسمي وكان في سله خضره في حجرتها وسكين .. تخيلوا شخص عمره 15 سنه وأول مره في حياته بنت بتتحسس في جسمه المهم ماحب اكمل لكم لان هذي القصه تألمني صار الي صار وواقعتها .. وطلعت من حجرتها الى بنت عمتي موجوده بالحوش وجايفتني طالع من حجره الخدامه الي تقولي جعفر شتسوي داخل .. انا هنيه خفت اول مره يصيدني هالموقف الخدامه داخل الحجره سمعت الكلام الي دار بيننا واخذت السجين وحطتها صوبها وقامت تصيح .. ادعت اني هددتها بالسكين اذا ماعطتني الي ابغي .. انا صحت حاول اشتكيت مافي فايده .. وانسجنت بهالسبب لمده اسبوع تقريبا بعدين الخدامه جت واعترفت بكل شي وطلعت انا من السجن .. عقب ماخلصت من سالفه اخوي وحالته النفسيه رجعت الى حاله نفسيه ثانية .. انتظرو الصدمه القويه في حياتي في Part 3

السلام عليكم بعد تفكير طويل وعميق واستشاره بعض الأعضاء الخبرة بالمنتدى قررت إني اكتب قصه حياتي كااامله في بعض الاعضاء راح تتغير فكرتهم عني بس البعض الثاني راح يشجعني وهذا الي خلاني اكتب . على العموم نبتدي بأول بارت عايلتنا مكونه من 12 شخص 6 بنات و6 صبيان مع امي وابوي ابوي كان عنده محل في سوق المنامه وعندي اخواني الاثنين كبار مسجونين واحد محكوم 5 سنوات وواحد محكوم 14 سنه وزوج اختي وياهم 5 سنوات ( اعتقد قضايا سياسية ).. بأختصار الاخوان 1- ( مسجون ) 2- ( مسجون ) 3- يدرس 4- يدرس 5- انا 6- ( يدرس ) الخوات 1- ( متزوجه ) 2-عزباء 3- عزباء 4-عزباء 6-عزباء 7-عزباء ( هذا يوم كنت في صف اول ابتدائي ) كنا عايشين في بيتنا القديم يوم كان عمري 7 سنوات في صف اول ابتدائي كنت شاطر وكانوا يعطونا ( مع حمد قلم ) كل واحد له سبوره وطبشور يكتب كلمه حمد وانا كنت اول شخص كتبتها صح .. طلعت من صف الاول وانا الثاني على الصف انتقلت الى صف الثاني ابتدائي كان عمري 8 سنوات كانوا ثنتين من خواتي مسوين مشروع بوتيك وابوي كان عنده محل في سوق المنامه يبيع فيه .. تقريبا في شهر 7 / 1988 دخل الوالد المستشفى .. كنت ما ادري شنو السالفه اجوف البيت بس بروحون المستشفى الى ابوي وانا وياهم .. المهم بعد شهرين تقريبا .. وقفت سياره على باب البوتيك الي كانوا يشتغلون فيه خواتي .. نزل واحد من الاهل الي يقول الى خواتي ابوكم توفى .. كالعاده ماكنت افهم شنو صاير جفت خواتي يصيحون وسكرنا المحل ورحنا البيت .. اجوف الاهل يصيحون وانا وولد اختي واخوي الي اصغر مني نضحك نجوفهم شلون يصفعون في روحهم ونضحك .. جودتني امي وحظنتني قالت ابوك مات وقعدت تمسح على شعري .. هنيه حسيت باليتم وقعدت اصيح .. اتذكر انه توفى المغرب والصبح بدفنونه .. رحنا المقبره ولازم الاخ العود يعطي الشيخ وكاله عشان يصلي على ابوي واخوي كان مسجون وجابوه عشان يصلي على ابوي .. قالوا بيودون اخوي البيت عقب الدفان عشان يجوفونه اهله .. ودوا اخوي البيت وانمزج الحزن بالفرح .. الحزن بفراق الوالد والفرح بشوفه اخوي بس 10 دقايق وردوا رجعوة السجن .. الحمد لله واصلت دراستي وصلت الى الصف الثالث ابتدائي وللحين من المتفوقين وهدوا اخوي العود من السجن وظل اخو ثاني الي محكوم 14 سنه في السجن وابتدى الامل عندنا يتعويض الوالد وبرجوع اخوي من السجن كان العائل الوحيد هو بالعائله بس كان متزوج وعنده ولد بنت واحنا 4 اربعه اخوان و5 خوات وامي .. شلون بيصرف علينا وهو توه طالع من السجن ؟ يعني للحن ماثبت له شغله وطبعا اكيد اذا طالع من قضية سياسيه من وين له الشغل الي يقبلة ؟ اسئله واجد كانت في بالي تراودني .. المهم اشتغل اخي في البحر بالاضافه الى البوتيك الي كان عند خواتي وطبعا الشغلتين مو ضمان المدخول مالهم فكنا عايشين تقريبا حياة صعبة صعبة صعبة .. مع ذلك واصلنا دراستنا ووصلنا الى الصف الرابع وبعدنا نواصل التفوق وبالصدفه كل اخواني وولد اختي طلعنا الثاني على صفوفنا .. وقرر اخوي الكبير يودينا جوله على المناطق الاثريه والحدائق في البحرين بهالمناسبة .. كانت اول مره نطلع فيها من بعد وفاه ابوي الله يرحمه . ابتدت الحياه تصعب وواصلنا الى صف الخامس .. عندي اخو في صف الثاني اعدادي اضطر ان يطلع من المدرسه ويشتغل ويساعد البيت .. لان كان اخوي العود الحمل واجد كبير عليه وواصلنا دراستنا انا واخواني الدراسه بتفوق .. ووصلت الى صف السادس ابتدائي وكنت هناك محصل واحد صفقه عنده فلوس .. كان وياي في صف يقولي علمني وبعطيك 20 دينار وكل ماده اعلمها اياه عليها 20 دينار .. يعني كنت اشتغل اعمال حره هههههههههه . على العموم ما احاول اني اكتب لكم واجد في هالبارت .. ونلتفي في البارت الثاني . انتظرو PART2 (( قسوة الاخ الاكبر على اخوانه الصغار ))

ملامح بشر ملك الاحساس عادل محمود