ملعوصه

السلام عليكم مثل ما قالو الاخوان الاعضاء .. ان الله جميل يحب الجمال لكن الجمال زائل ياما ناس وسيمين واشكالهم تاخذ عقلك لكن قلوبهم متحجرة وعديمين احساس ... وياما ناس اشكالهم مقبوله لكن قلوبهم بيضه ونظيفه لكن مثل ما الرجال يختار له البنت الحلوة والجميلة البنت بعد من حقها تختار الشخص اللي ترتاح لشكله ويعجبها في حديث للرسول مااتذكره وقال فيه ( بما معناه) ان المراة الي بتتزوج لازم تجوف شكل اللي متقدم ليها واهم شي انها تكون مرتاحه لشكله المساله مسالة ذوق بغض النظر عن كل شي كل واحد وذوقه مختلف ومثل ما قلت الجمــــــــــال زائل ... هالكلام أقوله للبنات وللشباب

السلام,, اخواني مثل ما قلت ان هالشخص ما جذب انما اخفى جزء من الحقيقه ( حقيقه مؤلمة ما يبيها تأثر عليه ويحاول ينساها عشان يقلل فرص الفشل في التعامل) وهالشخص عنده اسباب مقنعه وكافيه تخليه يسوي هالشي على الرغم من اعتبار الشخص الثاني له كذاب وبعدين مو كل انسان يعيش حياة بيرفكت .. كل واحد يواجه مشكله في يوم ويحاول يستفيد من غلطه حتى لو حاول يصحح غلطه في البدايه بشكل خطأ .. لكنه في النهاية يوصل للشي الصحيح بغض النظر عن شعور الشخص الثاني يعني على سبيل المثال ... لو انت تمشي في ارض قفرة ولاقيت واحد وقال يالله انا بمشي معاك عشان نوصل ثنينا للواحة لآننا عطاشى .. بس اختلفت معاه في نقطة انك ما ذكرت له انك مثلا تعرضت لمشاكل في المشي او انك جربت طريق وعرة وطحت فيها وتألمت من هالطيحه .. لكنك (قلت له الزبدة من البدايه انك متالم) ... وفي خلال مشيك معاه قلت له ان في بعض الطرق لازم ما نمشي فيها بحكم خبرتك وتحاول تفيده وتنصحه وتشجعه وجى يوم وانتون في نص الطريق وحسيت انك لازم تقول له انك طحت طيحة وتشرح له التفاصيل ...لأنك للحين متالم وتبيه يخفف عنك .......... وشنو تكون ردة فعله ؟؟؟ يقول لك ليش ما قلت لي من البدايه ؟ وتالي؟ بيقول لك خلاص ما بواصل وياك ؟ لأنك ما قلت ليي من البدايه وبهدك هني وخلك وانت جذاب وانت وانت وانت ووو !!

السلام ,, الصراحه ... هالحدث هذا كلش مو في وقته ... ورانا دراسه مو كفايه ان الفصل هذا كله اجازات والمقررات كلش طويلة وتحتاج لوقت للشرح وللاختبارات وغير الاختبارات التعويضية وهي صدق يعني اول مرة تصير في البحرين وبمثابة تقدم كبيييير للسياحة البحرينية وووو لكن لو مخلينها في الصيف مو احسن ؟؟ وبعدين ذيك المره يوم على قولتهم بيسوون مجرد عرض لمادري شنو وقامو سدوا الطريق من الظهر الى المغرب وكان صدق صدق مو مناسب خصوصا انه كان يوم خميس وهو يوم الاجازة والطلعه مو الزحمة والفورملا اما بالنسبة للتذاكر ( يعني شنو نقول) احنا مو قاعدين على بنك ويدرون ان الناس على قدهم !!! <<< يازعم سابق ولاحق ؟ >>>

السلام الصراحه هذي ظاهرة منتشرة هالايام بشكل غير معقول ... المصلحجي = يستغلك لآخر درجة احسن شي انه الشخص يدقق ويراعي الحذر عند اختيار الاصدقاء .. أما بالنسبة للزمالة فلا داعي للاقتراب اكثر من اللازم ... ومحاولة الانتباه لكل ما يجري من حولنا... بالنسبه للاصدقاء اللي تختارهم بشكل عشوائي او بما يسمى بالطريقة العمياء ... تالي اذا طاح الفاس في الراس تكتشف انه خدعك وانه كان يستغلك .. فأكيد وشي طبيعي الانسان بيتضايق وبيحس نفسه مو قادر يميز بين اصدقائه واعدائه ... لازم يسمع نصائح غيره عن صداقته مع اي شخص لكن في النهاية الانسان مو معصوم عن الغلط .. والحياة تجارب .. على الاقل نستفيد من هالمواقف والحالات ونحاول نتجنبها او نقلل من احتمالات الوقوع فيها B)

السلام بالنسبة لي اول شي بسكت وثاني شي بسكت وثالث شي بسكت ( في حال تكرر الامر).. واذا طفح الكيل بقول له مصختها وبهزئه باسلوب جارح احنا صدق ما يصير نقابل الاساءة بالاساءة .. لكن للظروف احكام ويعتمد على الموقف نفسه .. بس ارد اعيد ان الشي اذا زاد عن حده ينقلب ضده ويصير بايخ بعد خصوصا اذا حاولت من اول مرة انك تتكلم بهدوء وردت الاساءة اكثر في هالحاله تحس روحك انه من الغباء انك تواصل تجوف الاساءة من شخص مو ما يفهم ( يفهم بس يسوي روحه قوي على غيره او مغرور) يعني احسن حل انك تطنشه تطنشه تطنشه لين هو تنبط جبده وينفجر

السلام شكرا القلب الحزين على المتابعه بس بقول لك هي صدق الصراحه راحه للطرفين ... لكن الطرف الثاني ما يتقبلها لا في البدايه ولا النهايه ... وانت بنفسك قلت على حسب الموقف ... اني اقول لك على حسب الشخص الثاني وبالتحديد المشكله تصير في هالوقت الصراحه ليها ضوابط على فكره ومثل ما ذكرت في بداية الموضوع ان عدم قولها في البدايه ليه اسباب ومقنعه بعد . ابسط شي انه هو من حقه يقول الا بيقوله .. بيعبر عن شعوره بالطريقة الي تريحه ( خصوصا اذا ما خانه التعبير) ما يعتبر كذاب اما بالنسبه للطرف الثاني وبيقعد يقول انه ما كان صريح معاه في البدايه او ما قال كل الصدق هذا شي مو من حقه اولا واخيرا انه يفكر فيه والناس احرار وكان الله غفورا رحيما

السلام ،، PoLice Woman كلامش صحيح اختي .. خصوصا ان هالانسان قريب ... يعني لو يبي يشيل الجدار الحاجز بينه وبين هالشخص لازم يقول له الصراحه عاجلا ام آجلا وفعلا تكون راحه للشخص نفسه .. لكن تاثيرات هذي الصراحه مو دايما مرضية !! القلب الحزين .. انت تقول في النهايه يطلع كذاب ؟ اني اختلف معاك اختلاف كلي ... شلون يكون كذاب وهو قال نص الحقيقه ؟ اهي صدق يسمونها حقيقه ناقصه لكنها ما تعتبر كذب .. ولو كان كذاب ما كان بيقول هالكلام في كل الاحوال ليش يتعب روحه ويحرج نفسه ويقول مادام يدري ان بيقولون عنه كذاب؟

السلام عليكم ورحمة الله .. في كثير من الاحيان اخفاء الحقيقه تكون عبء ثقيل على حمل الانسان .. ولابد ان لديه اسباب كافيه ومقنعه تخليه غصبا عنه يكذب او يخفي الحقيقه ( يخش) يعني مثلا اذا كان طايح في مشكله ويعتقد انه بيطلع منها لو كذب او ما قال كل الحقيقه او كثير من المواقف الي تحصل لينا في الحياة .. لكن... لما يكون الشخص يقول الحقيقه وينتظر الوقت المناسب عشان يقولها وهو مرتاح ويطمئن انه اذا قاله بيرتاح ضميره .. شلون ينظر الناس ليه؟يقولون عنه جذاب ! وبالتالي يتخذون موقف مثلا تسوء معاملتهم ليه او يقل احترامهم ليه لو يحسسونه بأنه - مع كل احترامي - ( حشرة ) .. انزين حتى الحشرة خلقة الله هو وبغض النظر عن كونه انسان .. بغض النظر عن كونه غير معصوم عن الغلط ... عنده احساس وعنده مشاعر .. عنده ظروفه اضطرته انه ما يقول كل الصدق ... اضطرته انه ينتظر ويفكر .. وهذا اكيد من حقه ما دام هو خايف على نفسه من الضياع حتى لو كان قاعد يبني مستقبله او يبني علاقات انسانية كالزمالة والصداقه .. والي ابي اوصل ليه .. هو سؤالين واتمنى الي فهم قصدي يجاوب عليهم ؟!! في هالحاله .. هل الشخص هذا يُعتبر كاذب ؟ والتعليل هل يستحق هذا اللقب ؟