لعبه الاقدار! Posted مارس 30, 2006 Report Share Posted مارس 30, 2006 يسلموووووو عيون المها وننتظر باجي القصه Quote Link to comment Share on other sites More sharing options...
بحرينيه^مزيونة Posted مارس 30, 2006 Report Share Posted مارس 30, 2006 تسلمين حبيبتي ،، بأنتظاار التكمله ،، Quote Link to comment Share on other sites More sharing options...
لعبه الاقدار! Posted ابريل 8, 2006 Report Share Posted ابريل 8, 2006 وين التكمله ..?? Quote Link to comment Share on other sites More sharing options...
لهف الخواطر Posted مايو 8, 2006 Report Share Posted مايو 8, 2006 يالغالين انا بنزل لكم الجزء السابع والاربعين وباقي الاجزاء الحينه عسب اخلص واساعد زميلتنا الجزء السابع والاربعون بدى الكورس الثاني ..وردن نوره وفطوم للدوام وهن لايعه جبودهن من اول يوم... كلهن كانت دواماتهن خايسه.. نوره اخر كورس لها وماخذه خمس مساقات..تاخذ اربعه منهن السبت والاثنين.. ودوامها لين الساعه خمس العصر... ومساق واحد تاخذه الاحد والثلاثاء بعد الغدا يكون موعده... اما فطيم بما انها عدت الانجليزي.. استوى عندها بريك يومين في الاسبوع..وبريك طويل..وهذا اللي كان قاهرنها.... حمدان بعد بدا دوامه في التقنية... وكان كالعاده صباحي... واستمر في الشغل مسائي... واستوى ماعنده وقت وايد يفظى فيه...بالتالي سيراته لبيت عمه قلت.. وشوقه للسوالف مع فطيم يزيد.. عبدالله قدم على وظيفه في مستشفى توام..وطبعا عينوووه..دكتور متخصص في قسم الاشعة... وبدا دوامه وهو وايد مستانس...كان الدوام حلووو..بالنسبه له على الاقل.. وكونه مواطن كان يلفت الانتباه وايد بسبب تمسكه بسفرته وكندورته ..لانهم الكل نصحوه انه يلبس بنطلون وقميص عشان يتاقلم مع الاجواء والدكاتره لكنه رفض.. وتم على سفرته وكندورته...ويلبس فوقها اللاب كوت... ووين مايمشي في المستشفى يحس بنظرات فضوليه تبصبص له.. صغير ودكتور ومواطن.؟؟؟ ما تستوي وايد في العين...!!.. وفوق هذا كان يعيش فتره ترقب حلللوه..بسبب تجهيزات عرسه اللي كانت مثل مايقولون شغااله على قدم وساق... خليفه بعد قدم اوراقه في الاتصالات... وكونه شهادته امتياز في انظمة الكمبيوتر والشبكات وشهاده امريكية بعد..كان مكسب كبير وطبيعي يوظفونه.. واشتغل في قسم الانترنيت...وكانت شغلته حيويه وايد وحلوه.. مب شغله مكاتب... واحلى شي في الموضوع..انه يوميا (تقريبا) يشوف حصه وهي داخله المبنى وطالعه منه... وكم مره سلم عليها ..بس يوم يتاكد انه محد موجود عشان مايبغيلها الرمسه..لانه محد يعرف انه ولد عمها.. وكان يحس بعد انها ترتبك من تشوفه حتى المشي ماتعرف تمشي.. وبما انه شديد الملاحظه..لاحظ بعد انها تتهرب تطالع صوبه..لكن خليفه قرر يغير كل شي في حياته.. علاقاته...تحفظه الزايد...شخصيته..حتى سيارته غيرها وخذ الكوبي الفضية اللي شافها في بوظبي.... وحصه بنت عمه..وهو احق بها من الغير.. وقرر انه ياخذها لو شو ما استوا...غصب طيب..حصه بتكون له... مب على كيفها.. حصه... كانت مب في حاله... عندها تضارب بالمشاعر.. من رد خليفه من السفر وهي تحس انها تخون ذكرى سيف بمشاعرها... اهتمامها بكل تصرفات خليفه يزيد يوم عن يووم...وهي تكره شعورها هذا...ماتبا تحس تجاهه باي شي...ما تبا تتعلق بامل يورطها في النهاية...يكفي انها تاملت فيه من قبل وخذلها... انا شو سويت به خليفه هذا..؟؟ ليش يعاملني بكل اهتمام..نظراته لي تفظح اللي في خاطره ...بس اخر شي يحبطني.. !!!.. ..ليش؟؟.. والقهر انه اشتغل في نفس المكان اللي تشتغل هي فيه...وكل ما تشوف سيارته تحس بريولها بتخذلها..كم مره مسكت نفسها عن تركظ عشان بس تشرد عنه...واللي يزيد الطين بله..راشد هذا.. لمح لها مره انه شافها تسلم على واحد اسمه خليفه... كانه ناقد عليها هالشي... وسالها اذا كانت تعرفه... لكن هي من عصبيتها قالت له مايخصك وراحت عنه..وبالتالي تعمقت شكوكه فيها..لو قالت له ولد عمي وانهت الموضوع كان بيسكت وبينطم... اما الحين كل ماتشوفه يطالعها بنظرات غريبه ... هاللي ناقصني انا ترا...!! مب ساد خليفه ونظراته طالع لي راشد بعد...اففف....!!! كانت حصه توها نازله للصاله يوم شافت خليفه تدخل البوابه..على طول توترت.. ودخلت الصاله.. حصلت هناك عبدالله وام خالد ونوره ومحتشرين.. حصه: السلام عليكم... ردوا عليها السلام في نفس الوقت اللي نش فيه عبدالله يوم سمع صوت سياره ووايج من الدريشه... يلست حصه عدال امها.. وهي تتوقع شو بيقول عبدالله بعد شوي...وفعلا.. عبدالله: تحجبن...خليفه ياي.. ابتسمت حصه يوم صحت توقعاتها وتحجبت.. ونوره فسرت ابتسامتها شي ثاني.. وتحجبت هي الثانيه بعد.. ام خالد: ياااااامرحبابه... خله يقرب عندنا.. عبدالله: بيدش اروحه.. وبعد شوي... خليفه: هووووووووووود.. عبدالله: اقــــــــرب ولد عمي.. يامرحبااا الساع.. دخل خليفه الصاله وهو يدور بعيونه عالموجودين ..ويوم وصلت عينه لعين حصه بسرعه كسر عينه والتفت لعبدالله... خليفه: السلام عليكم... ردوا السلام عليه.. توايهوا الشباب ويلسوا عدال بعض تت عالارض.. وحصه عالكرسي عدال امها اللي يالسها بعد عالارض.. ونوره في كرسي حمدان المفضل قاعده اطالع التلفزيون.. بس لو يا حمدان هالوقت بيجحوتها عن الكرسي وبيقعد مكانه..لكن هوغايب عشان جي متفيزره الحبيبه براحه... خليفه: شحالج عموووه؟ ام خالد: بخييييير ابويه شحالك انته وشحال هلك؟ خليفه: بخير وعافيه... شحااااالكن يابناااااات..؟! سكتت حصه...ونوره تولت الرد... نورة: منييح ابن عمّي....كيفاااك انتاااه وكيف الشغل معاااااااك؟؟؟؟ رفع خليفه حاجب ونزل حاجب ثاني..ويطالعها باستنكار ويبتسم... ومثل ماقلت خليفه متغير ... وقرر انه يتخلى عن هالتحفظ اللي مبعدنه عن معظم الاهل..خصوصا بنات عمه... ونوره كثر السوالف وياها الفتره الاخيره لانه يحس وعرف من ملاحظاتها الفظيعه اللي تعقها بويهه احيانا انها تدري بمشاعره صوب اختها... ويحس انها بتساعده في اللي يبا يوصله... خليفه: مابرد عليج يوم انج حايسه هاللسان الطويل... نورة: ههههههههه كلكم حاطين علساني مادري ليش... ام خالد: اميييه حصه..صبي لولد عمج جاهي... نزلت حصه بتصب له... خليفه: لالالالا عمووه ..مشكوره مابغي... بس حصه لبسته وصبت له كوب جاهي.. وهو يراقب..وعبدالله يراقب بعد.. ونوره لاهيه بالتلفزيون...مدت حصه ايدها بالكوب.. وعلى ويهها نظره هاديه ..وناعمه.. كان خليفه مشغول بويهها يطالعه.. وطولت حصه وهي ماده ايدها بالكوب لخليفه..وهو مب منتبه...لولا انه حس بركبه عبدالله ادز ريله شوي شوي وتنبهه..مسك الكوب عنها.. خليفه: مااابردج بنت حمد.. وابتسم لها... ومره ثانيه كالعاده تحرك الاضطراب المعوي في بطن حصه بسبب هالابتسامه...وردت قعدت مكانها.. وخليفه من طرف عينه انتبه لعبدالله وهو ينزل راسه وكاتم ابتسامه.... كل هالامور تصير في لحظات بسيطه.. لكنها تركز في البال... ردت ام خالد اللي لاهيه عن هالامور كلها للموضوع اللي كانوا يرمسون فيه قبل ما يدخل خليفه عليهم... ام خالد: احين شو قلت ابويه.. نسير وياك والا ويا الدريول..؟! عبدالله: والله مادري امايه.. انا ما اريد ابات وانتوا تبون تباتون... خليفه: وين بتسيرون؟ عبدالله: تطري عرس بنت خالي بعد ثلاث ايام.. بتسير؟ خليفه: تبا الصدق اتصلبي سعيد وعزمني... بس ماظني اسير...شو يسيرني؟؟ عبدالله: وليش ماتسير؟؟ تعال وياي انته وحمدان ... خليفه: حمدان قايلي انه بيسير عشان يجامل سعيد...بس انا مافيني.. عبدالله: افاااااااا..حمدان يطلع احسن عنك؟؟؟ خليفه: حمدان اقرب لسعيد مني انا.... انته ود هلك العرس لا تخليهن يسيرن ويا الدريول...!! عبدالله: بشوف حسب دوامي في المستشفى... ولو اني ماريد ابات الصراحه..ابا احظر العرس وارد العين على طول... ام خالد: بنشوف يمكن نرد وياك بعد.. نطت نووره.. نورة: لاااااااه..شووووووه...؟!.. اسمينا بنبااااااااااات هناك مب راده نص الليل هني العين.. عبدالله: ليش بعد تباتين..؟؟؟ نورة: مافيني اكون تعبانه وحالتي حاله توني طالعه من عرس وامسك خط؟؟؟ خليفه: هههههههه اسمع..امسك خط اون.... !!..اللي يقول انتي اللي بتسوقين بنت عمي.. نورة: المهم اني في الخط في السياره وتعب...لالالالالالالا..تبون تردون ردوا برايكم انا ببات وبرد ويا فطيم ويا سعيد...!! ام خالد: بس بس....بس.... قطعيها الرمسه..!! عبدالله: بترد ويا سعيد اون... اقول نوره...ادلينه درام الهير وين.؟؟ والا ادليج..؟! نورة: عيل ماااااااااشي...نبااااااات..ماتردوني هني نص الليل..مابا...تعب امايه والله... حد يمسك خط نص الليل.؟!! نسير نسويلنا حادث والا شي...لا سمح الله يعني... ام خالد: شوف هالبنت كيف تفاول علينا حسبي الله على بليسج.... بقوم اصلي العشا انا احسلي عن خريطج.. نشت ام خالد ودخلت حجرتها.. ونوره تظحك عليها عقب ماطفرتبها.. خليفه: انزين ليش عمي ما يوديكن..؟؟ عبدالله: ابويه بيكون قبل العرس بيوم في بوظبي.. ومن هناك بيسير الشارجه مابيمر العين.. خليفه: انزين انته ودهن.. ورد عقب العرس العين..وفي الرده هو بيردهن وياه... عبدالله: همممممممم فكره...بقوله بعدني بشوفه اذا بيطيع... حصه: نوره وين فطيم..؟؟؟ التفت لها خليفه اللي ماصدق انها نطقت اخيرا..من الصبح يترياها ترمس وهي ساكته...واخر شي يوم رمست سالت عن حد ثاني..؟!!!.. مب جنه قــــــــــــهـــــــــــــر..!!!!!.... نورة: فطوم فحجرتها تدرس عليها امتحان سعي باجر... ردت حصه تسكت..ورد عبدالله على الموضوع نفسه.. عبدالله: انزين خلوف تعال.. احظر العرس ويانا ياخي والله بنستانس... خليفه: هممممممممم بشوف... عبدالله: لا ما بتشوف...انته يوم تقول جي معناته رافض...خلوف عااد...!! .. خليفه: عبوود والله احس شكلي رزه... تخيل حد يسالني شو تقرب للعروس والا المعرس اقولهم ماشي..انا ولد عم ولد عمة العروس.....!!!!! ظحكت حصه على كلام خليفه غصبن عنها... وخصوصا الطريقه اللي قالها فيها... نورة: واااااااااااال مطولها ههههههههه صدق شكلها مالها خص هالقرابه ههههههههاي.. عبدالله: نوروه انطمي...انا اشجعه وانتي تحبطينه.. خليفه: صدقها ياخي....مالها خص صدق... عبدالله: عيل حمدان تراه نفس الشي.. خليفه: ههههه صح..بس زياده عليه انه ربيع اخو العرووس واااااايد.... تنهدت نوره وابتسمت وهي تقول في خاطرها فديت اخو العروس "الصغير" انا... عبدالله: ياخي جاااااااامله عشان يجاملك فعرسك...بلاك جي بليد...!! خليفه: اجامله فعرسه مب في عرس اخته...!! التفتت نوره يوم طروا عرس سعيد..اللي هو عرسها..وبدون قصد ظحكت وقالت لخليفه... نورة: سعيد وحرمته مابيعرسون الا يوم حظرت جنابك تعرس...يعني سعيد بيجاملك فعرسك قبل ما انته اجامله فعرسه ان شاء الله.... التفتوا كلهم صوبها وهم بعدهم مب مستوعبين الملاحظه المازحه هذي.. خليفه: ليش يعني... نورة: لاني انا ما بعرس الا يوم تعرس انته...وحرمتك... خليفه: الود ودي باجر انا...بس اخاف اتريين وايد يانوره... ظحك عبدالله على التعليق وسكت.. خليفه لا اراديا انتقلت عينه لحصه.. اللي كانت اطالع اختها بنظره غريبه...وحس بخوف..بانها الحين بتعرف انها المقصوده لا محاله...!! وتم يراقبها من طرف عيونه.. حصه شكت بالسالفه...نوره وايد تدخل بعرس خليفه وخصوصا حرمه خليفه...شو خصها؟؟؟...وليش كلهم يتظاحكون يوم يطرونها...؟!...وليش انا بالذات اللي ما افهم النكته وما اعرف على شويظحكون.؟؟؟... والله اني غبيه وعلى نياتي... مافهمت اللي يدور حواليه لاني انا المقصوده...!!!..معقووووله..؟!.. التفتت نظراتها لا اراديه واشتبكت بعيون خليفه.. وتاكدت ان هي المقصوده....نظرته كلها خوف وامل وترقّـب ..!!...شو يتريا يعني؟؟ اقوله هي موافقه..؟!...حست حصه بظيج فصدرها ...وقامت عن الكرسي والكل يطالعها.. نورة: وين بتسيرين؟ حصه: بسير حجرتي ... مشت حصه وطلعت من الصاله وركبت لحجرتها.. واول ماطلعت من الصاله التفت خليفه وهو معقد حياته صوب عبدالله... خليفه: والله انها عرفت.... عبدالله: عرفت شوو؟؟ خليفه: عرفت اني اباها هي تكون حرمتي...انا متاكد... عبدالله: انزين برايها خلها تعرف... هز خليفه راسه... خليفه: انا ماريدها تعرف بهالطريقه...كنت مخطط لشي ثاني لكن انتوا الثنينه ماتحفظون لسانكم عنها شوي.. نورة: احم... انا اعرف اختي.. الحين هي انصدمت.. وبترفض كرد مبدئي بسبب ظروفها والمرحوم سيف..لكن يوم بتفكر اكثر بالسالفه بترد توافق...يعني لين بعد عرس عبدالله بتكون مقتنعه ..وعقب تعال واخطبها..بس.. خليفه: وايد مسهله الامور انتي.... نورة: لا...انته اللي تصعب الامور... لا تحاتي كل اللي قلت لك عليه بيصير ان شاء الله... تم خليفه متوتر.... يخاف الرفض مايكون مبدئي...ويكون قاطع.. خليفه: مابتسيرين تشوفينها..؟؟ نورة: لا..بخليها اجلب الفكره فراسها... عبدالله: انته احين طب هالسالفه عنك خلنا نسير... خليفه: وين نذلف بعد..؟!! عبدالله: قبل ما تي انته متصلبي الرميثي عازمنا عالعشا..امبوني بخطف عليك بس انته يييت قبل.. نسير... خليفه: اوووه..مافيني على مجابلهم... عبدالله: عيل على شوو فيك...؟؟؟ تبا تروح حجرتك وتصك على عمرك شرا البنات... خليفه: احسن لي والله تصدق..؟!.. عبدالله: قم قم....قــــــــــــــــم لا اعطيك بهالكوب...وابوي عليك انا... خليفه: قسم بالله محد متفيج غيرك انته وحمدان في هالدنيا... نش خليفه مع عبدالله وطلعوا بسياره خليفه الكوبي... وفي السياره.. قال عبدالله بعصبيه... عبدالله: شحالها اختك..؟!... التفت خليفه مستغرب.. خليفه: عنود..؟!.. ليش ماتعرف حالها انته؟؟ عبدالله: خيبه شو مستوي عليها..؟!!!!... خليفه: هههههه اقصد ليش ما تتصلبها انته وتسالها عن حالها... عبدالله: ثرها طايعه هي..؟؟؟ من حددنا موعد العرس وهي مانعه عني الشووفه.. ومن اخر الاسبوع اللي طاف وهي مانعه الرمسه عالتيلفون بعد..اون شووو.؟!.. عشان تتوله عليه...عنلاااااااااتها زاد... خليفه: ههههههههههههههههه تستاهل والله....حررررررمه... عبدالله: مالت عليك انته واختك انزين...!!... المهم شحالها..؟! خليفه: هههه تشقح...بخير...ذابحه امي كل اسبوع طايره دبي عسب الفستان والبروفات في الصالون..!!..وهالخرابيط.. عبدالله: ياسلااااااااااااام ياخلوف...باقي اسبوع واربع ايام بالضبط عن عرسي....وناسه..!! خليفه: ههههههه الله يكمل عليك...وين بتسير عقب العرس.؟ والا مابتسير مكان؟ .. عبدالله: بوديها ماليزيا...ان شاء الله.. خليفه: حلوه عاد هالوقت من السنه؟؟.. عبدالله: الله اعلم...لكن بسير هناك في كل الحالاات..خاطري اشوفها..بس لاتخبر عنووودي بهالسالفه... خليفه: انزين يابوك... مابخبر عنوودك. حصه في الغرفه قافله على نفسها...ومنسدحه عالشبريه...تفكر بكل المواقف اللي مرت بها مع خليفه وبين لها انه يباها..ولو بشكل طفيف...بس اللي قهرها ..عبدالله ونوره شو دراهم..؟!.. معقوله يكون مخبرنهم..؟؟..اوكي عبدالله ربيعه وطبيعي يعرف..لكن نورووه شو دراها...؟؟!!.. يوووه..هذي نوره تعرف بالسوالف من كثر ما تراقب ما تحتاي حد يقولها شي...ياربي...شو اسوي..؟!!..بشووو افكر..؟؟؟؟ طول عمري كنت اتوقع خليفه ياخذني...لكن الوضع تغير الحين..لاني تزوجت من شخص ثاني..وترملت...مب المفروض اصوون ذكراه واتم عليها..؟؟؟ مب المفروض اني ما افكر حتى بشخص ثاني؟!... عيل ليش احس اني متقبله الفكره..؟!..نشت ويابت الصندوق الصغير اللي حاطه فيه كل ذكريات سيف... وفتحته..طلعت الصوره منه وحطتها جدامها...وقعدت اطالع في ويهه الحبيب...شوي وعيونها انترست كلها دموع.. حصه: قولي شو اسوي...؟؟ شو اسوي سيف..؟!... تذكرت كلام نوره..بانها مابتعرس الايوم يعرس خليفه وحرمته اللي هي المفروض تكون حصه...!!..يعني نوره بتاجل زواجها من سعيد بسبب حصه...!!..ومابتعرس الايوم تعرس هي قبل...لين متى بتتريا يعني؟.. وانا..؟؟ اخليها تستمر بهالتفكير وهالقرار والا لا..؟!..مايصير تقعد تترياني يمكن انا ما اييني نصيبي او يمكن يطول وايد...مايستوي تخلي سعيد يتريا اكثر...ماله ذنب... ردت انسدحت عالشبريه...وبشكل لا ارادي..تذكرت كلام سيف...بانه لو صارله شي..ما يامن حد عليها غير خليفه.... غمضت عينها قهر...خليفه خليفه خليفه...وين ما اسير احصل خليفه...!!!..يوم هو يباني ليش مااعترض من البدايه على خطبتي....؟!...ليش يا يباركلي وهو يبتسم ولا عليه ...مع انه في هذيج الفتره كان وايد يبين لي...وصار اللي صار وانخطبت...والحين شو ناوي يسوي..؟؟ يلمح لي لين ما انخطب مره ثانيه وعقب ايي يبارك لي..؟؟ احسن لي اسكت عن السالفه لين اشوف شو بيصير..وشو بيسوي حظرة جناب خليفه ولد عمي..!!! حمدان كان في هالوقت في ميلس ربيعه راشد... اللي دخل الحمام من دقايق.... وتم حمدان اروحه يطالع التلفزيون..فجاه رن تيلفون راشد اللي مخلنه عالطاوله.. اطالعه حمدان بدون اهتمام ورد يتابع...بس التيلفون ماوقف من الصياح... زعج حمدان.. حمدان: رشوووووووووود...تيلفووونك...! صرخ هذاك من الحمام.. راشد: شششششله انزييييين شحقه اطالعه....؟!.. حاس حمدان بوزه ومد ايده ياخذ التيلفون..وابتسم يوم شاف "البيت" مكتوب عالشاشه.. لو ارد عليهم بيلعن خيري راشد..بس ماعليه خله يتادب... حمدان: آآلووو.. مريم: رشوووووود...!!.. كتم حمدان ظحكته يوم سمع صوت بنت...لالالا ..اليوم ذابح ومذبوح ويا راشد...الله يستر.. حمدان: هااا شو تبين.؟!.. قالت مريم بلهفه.. مريم: حمدان عندك؟؟ رفع حمدان حواجبه...يعرفووني بعد..!! حمدان: هي نعم عندي... مريم: متى بيسير...؟!.. حمدان: شخصج انتي..؟!... حمدان كان شوي وبينقع من الظحك.... مريم: اسمع... البشكاره مريضه ولا سوت لنا عشا..ونحن ماندريبها انها مريضه..المهم احين نبا عشا... حمدان: يااسلام عليكن...!! مريم: شو ياسلام بتخلينا باليوع..!! حمدان: شو تبن انزين..؟؟ مريم: هممممممم هاتلنا تويستر حااار من كنتاكي بس....يسدنا... حمدان: هممممم ان شاء الله..يوم بنظهر بيبلكم.. مريم: فديتك والله ادري مابتقول لا اممممممممممواح...باي.. بطل حمدان عيونه وهو يسمع السماعه تنرقع من الطرف الثاني.... انحرج من الخاطر من الجمله الاخيره اللي سمعها... فديتك واموااح بعد..؟؟؟؟.... لاااااااااااه احسن لي اروح احفر قبري بروحي ...خيبه كيف احترق ويهي...مسكينه البنت لو تدري بتنتحر....!!!... فر التيلفون عالطاوله ويلس يتظاهر بالهدوووء...منااك هو مرتبش من داخل مب عارف كيف يخبر راشد بالسالفه هذي... ويوم طلع راشد من الحمام فزز حمدان من الزيغه...تم ساكت وهو يشوف راشد ايي ويقعد عنده..شل تيلفونه وقال.. راشد: منو متصل..؟؟ حمدان في خاطره..الله يستر.. الله يستر... الله يستر.... بسم الله الرحمن الرحيم ..اشهد ان لا اله الا الله وان محمد رسول الله....يالله الشهاااااده اذا كان بيذبحني... حمدان: احمم...البيت... تم حمدان يطالع في نقوش السيراميك والزوليه كانه مصمم ديكور داخلي مهتم وايد بالديكور... ومن طرف عينه يشوف راشد يلتفت له بسرعه... راشد: البيت..؟؟؟؟...رديت عليهم؟؟ حمدان: انته قلت لي رد على التيلفون شو اسويبك... راشد: عنلاااااااااتك...رد اذا شفت حد من الربع مب البيت..!!!!... حمدان: مادري عاد مافكرت..رديت وماعرفووني...وسكرت..ماصار شي.. عقد راشد حياته وهو معصب... راشد: منو كان متصل..؟؟؟ حمدان: اظني وحده من خواتك... راشد: شووووووووووو..؟!!... منوو منهن؟؟ حمدان: شو عرفني بعد منو منهن مادقيت وياها سوالف انا....قلت لك ماعرفتني تحسبتني انته قالت اللي فخاطرها ورقعت بالسماعه....اييزيي اييزي..ماصار شي... راشد: اييزي فعينك....تباني اذبحك ويا هالراس....؟!..انته متى بتيوز عن هالحركات..؟!.. حمدان: افاااااااا يارشوود... خواتك خواتي .. واناماغلطت عليها ولا شي...لا تكبر المساله.. سكت راشد وهو يهدي اعصابه شوي....وعقب شوي.. راشد: شو كانت تبا.؟؟ كان عارف راشد فخاطره ان حمدان مايقصد الغلط.. وعرف بعد انها مريوم..دومها تاذييه يوم تشوفه ويا ربعه.. حمدان: ههههههه تبا تويستر من كنتاكي حقها وحق خواتها..اون البشكاره مريضه ولا سوت عشا لهم... راشد: لا والله..؟!... وانته شو قلت؟؟ حمدان: قلت لها ان شاء الله... لاني ماحيدك بخيل على خواتك.... شفت كيف احسن صوورتك جدامهن.. راشد: انته سبال... قم نطلع... نش راشد بعصبيه وطلع من الميلس قبل حمدان..وحمدان من وراه يرفع ايده للسما ويقول الحمد لله بصوت واطي... لانه عمره ماخلص على ايد رشود اليوم.... طلعواتحوطوا في سياره حمدان.. وعقب خطف حمدان على كنتاكي وطلب لعمره وحق راشد وخواته بعد..طبعا بعد ما ساله كم وحده هن.؟؟..وحلف انه هو اللي يدفع...وعقبها خطف راشد بيته وخطف على بيت عمه لانه قريب من طريجه...متوله عليهم...يبا يشوفهم ويسولف وياهم شوي عقب بيسير بيتهم بيدرس وبيرقد...وكل سندويجته وهو في الدرب..اول مادخل بسيارته بيت عمه لاحظ سياره عبدالله هني... وتحسبه في البيت..ماكان يدري انه طلع مع خليفه في سيارته..وقف سيارته ونزل الميلس...ماحصل حد.. قال فخاطره الحمد لله احسن..راح البيت ودق باب الصاله... اللي كان فيها ونوره وفطيم يتعشن رواحهن.. حمدان: هوووووووود... نقزت فطيم وعدلت شيلتها بسرعه...كانت عاطيه باب الصاله ظهرها عشان جي نشت وعدلت قعدتها وجابلت... نورة: هدااااا..اقرب ولد عمي... دخل حمدان الصاله وابتسم... حمدان: السسسسسسسسسلام عليكم.... نورة وفطيم: وعليكم السلام... نورة: تعشيت حمدان..؟؟ حمدان: الحمد لله..توني متعشي في السياره...كملن عشاكن انتن... فطيم: ومنو قالك انه بنودر عشانا عشانك انته شرفتنا بالزياره..!!! فطيم تعودت تغايظ حمدان في الفتره الاخيره وتتنقرشبه...اطالعها بنص عين.. حمدان: زطي زطي انتي... جان تعوضين الوزن المفقوود اللي خسرتيه يوم رديتي بيتكم...!!! فطيم: انا خسرت وزن يوم رديت بيتنا..؟؟ نورة: هي صدقه...ظعفتي زياده يوم سرتي هناك.... فطيم: لا ماظعفت... حمدان: تعرفين ليش ظعفتي..؟... من الوله...من زود الغياااااب... قالها بطريقه ناعمه ماكره ...تكفي الطريقه اللي كان يطالع بها...احترق ويه فطوم..لانه كلامه صحيح.... فطيم:على شو بتوله ياحسره..!!!...ماعندي سالفه... حمدان: هههههههههه ترا هذا الللي قاهرنج انتي... ودج تكرهين..ودج انتي ما تهتمين...لكن كل هذا غصبن عنج...مب قادره تتحكمين... خلاص مشاعرج استوت آوت اوف كونترول... نورة: ههههههههههههههههههههههه يالملعون ماتنغلب في الرمسه انته... بسك خلاص قطعت البنت... سكتت فطيم وهي منحرجه ...ومنقهره في نفس الوقت.. حمدان: افااا.. انا اقطع فطيم برمستي..؟؟ حشىى... بس اقولها ان الاقرار بالواقع..زين بعد.... يعني الشي موجود شحقه تنكر...!!!. رصصت فطيم عيونها.... فطيم: طالع منو يتكلم عن الاقرار بالواقع....ليش ماتقول لنفسك هالكلام...؟؟ ... انته تراك اللي دومك تنكر حتى لو بينك وبين نفسك...ومب طايع تعترف.... عرف حمدان شو تقصد وابتسم... بشكل غريب يحس انه مستعد يقولها هالكلمه الحين... قالها بصوت هادي.. والابتسامه مافارقت ويهه... حمدان: خلاص انا استسلمت.... اقول..؟!.. بطلت فطيم عيونها ونوره تحمست وهي يالسه مكانها وسكتت.. فطوم: شو تقول..؟!!!!.... توسعت ابتسامه حمدان اكثر يوم شاف الخوف على ويه فطيم.... حمدان: .. اعترف بالواقع.... فطوم: لا عين خير....لا تقول شي... ظحكت نوره لانها تذكرت موقفها مع سعيد يوم كانت تقوله لا تقول وهو يبغي يقولها احبج..وهي مب طايعه... حمدان: توج تقولين اني لازم اقر بالواقع....بقول.... فطوم: لالا ماريد...حمدان روح بيتكم... التفتت نوره مستغربه.. نورة: طاااااااااالع..!!!...شياج تروغين الريال...؟ حمدان: ههههههههههههههههههههه... خلاص ارتاحي مب قااااايل... عيل وين الجماعه..؟؟؟ نورة: الشواب ساروا يرقدون..حصه فوق مابغت عشا...وووو عبدالله معزوم عالعشا وطلع مع خليفه ... حمدان:اهاااااااا هي شفت سياره عبدالله في الغراج...ثره طالع مع خليفه...!! نورة: هي...سمعت خليفه يقول انك بتحظر العرس... حمدان: هي عزمني سعيد.. وامايه معزومه بعد بشلها وياي... نورة: حلوو والله... سكتوا وقعدوا يسولفون عن اشياء مختلفه..وخلصن البنات عشاهن ويت البشكاره وشلته..سارت فطوم يابت 3 فيتامين سي اللي ادمنته من يت العين...لانهم هني يحبونه...وعطت واحد نوره والثاني حمدان... ويطالعون التلفزيون... فجاه طلعت دعايا تويستر من كنتاكي...جان ينقع حمدان من الظحك.... والبنات يطالعنه مستغربات... نورة: ليش تظحك؟؟؟؟ حمدان: ههههههههههههه...اما صارت لي سالفه اليوم... زين اني تميت حي والله... نورة: شوووو ؟؟ خبرنا... حمدان: ههههههههههههه..كنت فبيت ربيعي... دخل الحمام هو وخلى تيلفونه عندي..رن التيلفون وقالي رد عليه... وهو كان في الحمام...المهم رديت عليه طلعت اخته عالتيلفون وتحسبتني اخوها... ظحكت نوره ..وفطيم اختفت الظحكه عن ويهها... اخت ربيعه..!!!...لا والله..؟!.. نورة: انزين وبعدييين..؟؟؟ حمدان: اول ماسمعت صوتي قالت لي رشووووووود...قتلها ها شو تبين..؟؟..قالت لي البشكاره مريضه ونبا عشاااا...وطلبت تويستر حار من كنتاكي حقها وحق خواتها....يوم قتلها ان شاء الله...تخيلي شو قالت لي..؟؟ نورة: هههههههههههاي شووووو..؟؟؟ حمدان: قالت لي فديييييييتك ادري انك مابتقول لا اممممممممممممواح..ههههههههههههههههه.... ماتت نوره من الظحك عالسالفه... وفطوم صدت صوب ثاني عن حمدان بعد ماحست ان معدتها تذوب من الحراره... والغيض.. نورة: اسمييييييييييها افتضحت... انزين وبعدين؟؟ حمدان: هههههههه والله اني تميت زايغ يوم طلع رشود وسالني منو عالتيلفون...قتله البيت وانا امممره ميت لا يذبحني... بس مسكين تفهم السالفه اخر شي... فطوم: انزين..!!..وخذيتلها اللي تباه عاد..؟؟ اطالعها حمدان وهو مستغرب شوي من حدة صوتها... ويوم فكر في السالفه ...طلع فعلا هو اللي اشترا السندويشات ودفع عنهن.... حمدان: هي خذت لها وخذت لخواتها...وحق راشد وحقي بعد... فطوم: اهااااا وايد كريم ماشاء الله....ماقلت لي...كيف صوتها..؟؟ ابتسمت نوره وهي تحس بالغييره تشععع من جسم فطيم... وحمدان بعد شاف الغيره فعيونها..وابتسم لها بشكل حلوو.. حمدان: ما انتبهت....ولا اهتميت....كان همي اخلي صوتي نفس صوت راشد ...عشان امنع الاحراج عني وعنها... فطوم: بس اكيد انتبهت اذا هي ياهل والا بنت كبيره والا حرمه...!!! حمدان: لا بنت... من سننا نحن تقريبا... فطوم: اهاااا....حلو... حمدان: فطيـــــــــــــم..!!... فطوم: نعم....!!!!!!!.... مسك المخده اللي وراه وفرها على ويه فطوم... حمدان: مافي داعي لهالغيره يالحماره.... مسكت فطيم المخده وردت فرتها عليه... فطوم: انا ما اغار ويا هالراس.... نورة: هي مبين...!! حمدان+فطيم: جــــب انتي... نورة: خيييييبه ...شياكم عليه.. حمدان: ماشي..خلاص انا بسير عنكن ..سلمن على حصه...بسير ادرس شوي وبرقد...شي فخواطركن... نورة: سلم على يور فاميلي... حمدان: ان شاء الله..فمان الله... طلع حمدان وهو يظحك ويتذكر غيره فطيم... والرمسه اللي دارت بينهم اليوم....وعلى طول دقت في باله اغنية عيضه " يكابر..وانا ادري بس..لكن دوم صابر...ابيه يبوح عن حبه وشوقه...وانا اللي بين خلق الله اهمــــه.." حافظ عليك ياعيظه ...امممره عالعووق...!!..ركب سيارته وروح بيتهم... اما فطيم صدت على نوره.. فطيم: هزرج زعل؟؟؟ نورة: من؟؟؟ فطيم: مادري حسيتبه زعلان يوم طلع... نورة: هههههههههه لالا تلقينه ميت من الفرحه ماعليج... فطوم: على شو يموت من الفرحه بعد... نورة: لانه اكتشف انج تغارين عليه... ردت فطيم تعقد حياتها... فطيم: انا ما اغـــــــــار.... نورة: ههههههههههه انزين انزين...سيري راجعي ورقدي.. وانا بعد بسير ارقد.. بعد ساعتين..وصل خليفه عبدالله البيت وروح هو بيتهم..وكانت الساعه 12 ونص وقتها.. والبيت مظلم والكل راقد... بس يوم ركب فوق ساير صوب حجرته... حصل ليت غرفة حمدان وعنود مفتوحات... دق الباب ودخل على حمدان.. خليفه: شو تسوي..؟؟ قعد يراقب حمدان وهو فارش اوراقه عالشبريه ويكتب بالقلم..يذاكر.. حمدان: ارقص... ظحك خليفه وسكت... وفجاه توله على ايام الدراسه... حمدان: وين سرت انته وعبدالله؟؟ خليفه: شدراك اني طلعت ويا عبدالله..؟؟ حمدان: خطفت على بيت عمي وخبروني...وين سرتوا؟ خليفه: ربيعنا الرميثي عازم عبدالله امبونه عالعشا..وسرت وياه...بس... حمدان: فبيته..؟؟ خليفه: هي.. برايك بسير ارقد... حمدان: تصبح على خير.. خليفه: وانته من اهله.. سكر الباب وماقدر يقاوم انه يفتح باب عنوود بعد....دق الباب ودخل..حصلها فارشه شنطها اللي مجهزه فيها اغراضها هي بعد..وتعدل فيهم..وكشتها ناطره.. خليفه: هااااا العروس..واعيه لين الحين..؟!..بيستوي تحت عينج اسود بعدين.. عنود: هلا خليييفه... خليفه: عبدالله يسلم عليج.. ظحكت عنود ظحكه شريييره متشمته على عبدالله اللي مب قادر يكلمها... عنود: هههههههههاي..الله يسلمك وياه من الشر... خليفه: مستانسه...!!...انتي مانعه عنه الاتصال والشوفه..؟! عنود: هي نعم... خله يتوله عليه شوي... خليفه: احسن...يالله ياعنوود...ماباقي شي وبتظهرين عن بيتنا... عنود: لا تقعد تصيحني احين بروحي من اشوف الشنط تخنقني العبره...ان شاء الله بتيب لك حرمه بعد فتره تنسيك اختك وتونسك... ابتسم خليفه ويلس عالشبريه....يدري انها تعرف بخصوص حصه.ويدري بعد انها قاعده تتكلم عنها الحين... خليفه: والله انا مب واثق مثل ما انتوا واثقين لهالدرجه... يلست عنود عداله... عنود: شو صار..؟؟؟ خليفه: انا متاكد انها عرفت اليوم اني ابغيها...واخطط لخطبتها...واحس من الحين انها رافضه...!! عنود: لا ان شاء الله مابترفض..وين بتحصل احسن منك.؟!.. خليفه: الموضوع مب فيني انا...فيها هي..انا اعرف انها ما بتمسك عليه اي عيب..لكن هي احس انها رافضه فكره الزواج... مادري كيف احس ان ذكرى سيف تهددني... الله يرحمه..كان ربيعي ..لكن سرقها مني... وحتى عقب ما توفى احس انه يمنعني عنها... كان خليفه يتكلم كانه يكلم نفسه ... يتكلم ويفكر في نفس الوقت...وحرقته عيونه لذكرى سيف.. كان عزيز وايد عليه...وايد.... عنود: لا تخاف... اللي مكتوبلك بيصير...وانته لا تستسلم بعد...تحرك من نفسك والله بيوفقك ان شاء الله... خليفه: ان شاء الله.. المهم انتي بسج من السهر... عنود: اوكي احين برقد..تصبح على خير.. خليفه: وانتي من هله... طلع عنها وهو باله شاااااارد... وراح غرفته وقفل على عمره الباب....وقف جدام التواليت وحط التيلفون وخش ايده فمخابيه... طلع المفاتيح.. والبوك... وسار الحمام ..تسبح وطلع بوزار وفانيله...مع انه الجو بارد لكن خليفه كان يحسس بحراره فصدره.. انسدح عالشبريه وهو عيونه في السقف... يتمنى يعرف باللي تفكر فيه حصه الحين...نزل عينه.. وطاحت عينه عالتواليت..بالتحديد البوك...عقد حياته ونش من الشبريه وياب البوك..فتحه..وطلع الظرف اللي متعفص في البوك... اصلا كان الظرف مب مسكر من الاول لانه ماسكره.. فتحه وطلع الرساله..وقعد يقرا فيها... وللتذكير..هذي هي الرساله.. " الى بنت عمي حصه... اكتب لج هالرساله اليوم وانا كللي امل بانج تفهميني صح...وماتفهمين كلامي بفهوم ثاني.. الصراحه ان مب عارف كيف ابدا بالموضوع... وماحبيت اكلمج شخصيا لاني ماريد احرجج وتبين الصدق انا بروحي انحرج من مجرد التفكير باني بكلمج بموضوع مثل هذا..... وانا بدخل بالموضوع بشكل مباشر... انا اباج تكونين حرمتي على سنه الله ورسووله... ادري بتنصدمين من كلامي هذا..لاني ماكد بينت لج اني اباج... او يمكن في الفتره الاخيره حاولت ابين بس انتي مافهمتيني... المهم هذا اللي في خاطري...واللي انا اتمناه..انج تكونين من نصيبي... بس فيه مشكله بسيطه...او يمكن كبيره ماعرف...وهي اني ماريد اخطبج الا يوم اتخرج من امريكا السنه اليايه وارجع هني واشتغل واثبت نفسي وجدارتي... وبعدها بتقدم لج وانا واثق من نفسي ومرتاح ..يمكن ماتفهمين اللي في خاطري احين بسبب هالموضوع..بس انا ابا اثبت نفسي اول قبل مااتقدم لج... وماريد حد يغصبج عشاني انا ولد عمج... بعد كم يوم انا بسافر...وبتغرب سنه...والقرار احين بين ايديج... اذا موافقه عليه..ترييني...وارفضي اللي يتقدمون لج... وانا ادري ان هالشي صعب عليج ..بس تحملي اذا بغيتيني وصدقيني بكون محظوظ واكثر اذا وافقتي عليه...وان شاء الله اول مارجع واشتغل بخطبج...وانا اعرف انهم مابيردوني...عشان جي اعرف ان القرار قرارج انتي... بس اذا قررتي العكس..تراه النصيب..وبتمين تراج بنت عمي وغاليه عليه... بس انا اتمناج لنفسي.... وهالشي افكر فيه طوال هالشهرين اللي رديت فيهم البلاد.... انا مااتريا رد منج....ادري انه شي محرج انج تقوليلي موافقه او لا...عشان جي بصبر وبعرف قرارج بعد مارجع السنه اليايه.... يعني انتي عندج فتره سنه كامله تفكرين فيها... والله يوفقج ان شاء الله ...وادعيلنا....والسموحه عالتقصير... ولد عمج خليفه" رجع خليفه طوا الرساله ورجعها للظرف وهو يبتسم بحسره.... يوم كتب الرساله كان كله امل بان حصه بتترياه..وسبحان الله في ظرف شهوور اشياء وايد صارت وتغيرت في حياتهم...!!!..بس هو مستحيل يخلي الامور على حالها...هو متاكد بان حصه عرفت بالموضوع اليوم...وماحبت تبين لحد انها درت..بس هو عرف بقلبه انها درت به قبل مايعرف بعقله....ودامها درت بالموضوع عيل شو يتريا؟؟ خله يفاتحها الحين احسن... مثل مايقولون دق الحديد وهو حار...صح.؟ نش عالمكتب وطلع ورقه وظرف... وكتب..وبدون مقدمات وكلام منمق...العفويه توصل اسرع..وتاثر اكثر في النفس.. " الغاليه حصه... في هالظرف بتحصلين ظرف ثاني ورساله قديمه... كتبتها قبل ما تنخطبين بايام..وكنت ناوي اعطيج اياها قبل ما اسافر..بس لا الظروف ولا الوقت اسعفني..وصار اللي صار....ورغم عذابي الشديد تقبلت واعتبرته نصيـــب... على العموم...الكلام اللي فيها مازلت اعنيه حرفيا واكثر من قبل... والسؤال الموجود فيها مازال يحتاج لاجابه....اتمنى تفكرين عدل وما تتسرعين قبل ماتردين علي.... وكل اللي اتمناه انه يكون ردج " موافقه"... خليفه" طوى الرساله وحطها في ظرف.. وحط الظرف الجديم فيها بعد.. ولزقها بسرعه قبل ما يتردد وحطها على التواليت عدال تيلفونه عشان ماينساها...باجر..اول مايشوفها في الدوام بيعطيها هالظرف...ويصير اللي يصير.. نشت فطيم الصبح مختبصه بسبب امتحانها.. تتريق بسرعه هي وحصه..وصلوا حصه اول الدوام عقب وصلوا فطيم للجامعه... حصه ارتاحت هالمره لانهاماشافت خليفه جدام المبنى..ماتعرف كيف بتتصرف بعد اللي عرفته.... واللي موترنها اكثر ان مشاعرها تتحرك لا اراديا يوم تشوفه كانها مراهقه...وهي مب عارفه شو تسوي بهالخصوص...مستحيييل اكون احب خليفه مستحييييييييل.... كيف حبيت سيف عيل..؟؟؟؟؟؟ يصير الواحد يحب شخصين في وقت واحد..؟؟؟؟ كانت سرحانه وهي سايره صوب مكتبها وتفكر بكل هالامور..وانتبهت انه ولاوحده من الموظفات داومت لين الحين.....يوم قعدت عالمكتب...انتبهت لظرف ابيض محطوط عالمكتب وفوقه وردة بيظا... استغربت...شلت الوردة وقرت على ظهر الظرف... "يسلم الى يد حصه الكتبي".. قالت حصه فخاطرها.." اووووف...اكيد من عند راشد هذا.."...وترددت قبل ما تفتح الرساله... بس بما انه محد من الموظفات داوم لين الحين بتستغل الفرصه ..لانه مافيها على الاسئله الفضوليه... تحت الظرف وقرت اللي فيه...خذت لها ربع ساعه وهي تستوعب اللي تقراه....طاحت الرساله من ايدها لثبانها....واسندت راسها على يديها... خليفه كان يباني من زمان وكان جاد في الموضوع...!!!..بس سيف اللي قطع عليه..؟!!..معقوووول...؟؟ يعني انا ظلمته...!!..ياربي.ماصدق ماااصدق...سيف ماكان يدري انه خليفه يباني والا مابيخطبني.... عبدالله...يمكن كان يدري..بس ليش ماقالي...؟؟!!...ياربي مب عارفه افكر..... اوووفف بطني يعورني بعد...متفيج هذااحين يعورني... اول مادخلت موظفه للقسم قررت حصه انها تجاهل الموضوع هذا مؤقتا.... لين ماترجع البيت...وتفكر عدل...رجعت الرسايل للظرف.. وحطتهم بالشنطه مع الورده.. وحاولت تركز في شغلها..لولا ان الويع في بطنها كان يزيد شوي شوي...الساعه عشر حست انها ماتقدر تتحمل...راسها قام يدور ومب قادره تصطلب... مسكت التيلفون واتصلت بامها... ام خالد: آآلوو... حصه: هلا امااايه..شحالج... ام خالد: مرحبا فديتج....بخيييير... حصه: امايه وين انتي..؟؟ ام خالد: انا في المزرعه... اظايقت حصه...في المزرعه يعني ماشي سياره.. حصه: متى بتردين..؟؟؟ ام خالد: برد قبل ما يخلص دوامج لا تحاتين... حصه: هيي...خلاص برايج امايه... ام خالد: شوفيج غناتي.؟ حصه: مافيني شي بس اسال... ام خالد: خلاص عيل..فمان الله.. سكرت عن امها اللي تعرفه ان ابوها راح بوظبي...وخالد من امس في بوظبي. وناصر في الدوام الحين... ردت مسكت التيلفون واتصلت بعبدالله... عبدالله: مرحبااا... حصه: هلااا عبدالله... عبدالله: منوو حصيص؟؟ حصه: هييي... عبدالله: بلاه صوتج...؟ حصه: تعبانه شوي...وين انته..؟؟ عبدالله: انا توني واصل دبي... شوفيج تعبانه...؟؟ حصه: شو هذا يوم انا تعبت كلكم محد...!!!.. عبدالله: شو بلاج انزين..؟؟ حصه: بطني يعورني مادري ليش...مب قادره استحمل... عبدالله: شو ماكله..؟؟ حصه: مب ماكله شي... عبدالله: انزين الدريول بييبج... حصه: الدريول شالتنه امايه سايره المزرعه ومابترد احين...وابويه وخالد اصلا محد في بوظبي...وناصر في الشركه ماروم اتصلبه تحيده يعصب يوم حد يقطع عليه شغله... عبدالله: هممممممممم...ما ترومين تتحملين لين يخلص الدوام... حصه: لا...ابا ارد البيت احين... عبدالله: هممممممممممم...اوكي اتصليبي بعد عشر دقايق اوكي... حصه: شو بتسوي...؟؟ عبدالله: انتي اتصليبي بعد عشر دقايق وخلاص... يالله باي.. سكر عبدالله عن حصه واتصل على طول بخليفه... خليفه: مرحباااا... عبدالله: اهلين خلووووف..شحالك؟ خليفه: بخير شحالك انته.؟؟ عبدالله: تمام..اقولك انته في الدوام.. خليفه: هي نعم...بلاك.. عبدالله: حصه تعبانه... خليفه: شووووووووووو..؟؟؟؟ عبدالله: ومب محصله حد يوديها البيت تقول ماتروم تصبر وانا احين في دبي ماروم ارد.... خليفه: شو بلاها عاد..؟؟ خاف خليفه لا يكون هو السبب في تعبها بسبب رسالته... عبدالله: بطنها يعورها...اسمع..تروم توديها البيت..؟؟؟ خليفه: هي نعم ارووم.... عبدالله: تمام...يزاك الله خير...بعد خمس دقايق روح لها المكتب وشلها من هناك وودها اوكي..؟؟ خليفه: ان شاء الله.. عبدالله: مشكوور...فمان الله... سكر عبدالله عن خليفه وهو واثق من اللي سواه...خليفه مب غريب...ويحاتي حصه يمكن اكثر حتى عن عبدالله... وبيحطها في عيونه...وبعدين الظروف حكمتهم شو يسوووون يعني..؟!..محد غير خليفه يوديها... حصه ماقدرت ترجع تتصل...لانه الويع زاد عليها بشكل فظيع والتمن عليها الموظفات يساعدنها ويهدنها شوي... ومن صوب ثاني خليفه كان يتحرقص..وماقدر يصبر خمس دقايق عشان يسير لها..ويشوفها ويطمن... ودر مكتبه وراح صوب القسم اللي تشتغل هي فيه...وشافهن مرتبشات...زقر وحده منهن وقالها تطلب حصه..ويوم قالت له انها تعبانه وايد قالها انا ولد عمها وبشلها المستشفى الحين...وبمساعده كم وحده من الموظفات...مشت حصه لسياره خليفه ..هو مايقدر يساعدها ويمسكها...هي مابترضى وبعدين الكل بيفكر فيه بشكل غلط...خل الموظفات يساعدنها احسن...ركبت حصه السياره وهي مب حاسه باللي حواليها... وركب خليفه جدام وطاااار بالسياره صوب المستشفى... راشد كان يراقب كل اللي يصير... وانتبه لخليفه المرتبش وحصه اللي رفضته من قبل...يوم رجعت وحده من الموظفات اللي تشتغل في نفس القسم وقفها وسالها... راشد: شو بلاها حصه..؟؟ الموظفة: تعبااانه مسكينه..بطنها يعورها...ووداها خليفه المستشفى اظن... راشد: مسكينه...وليش خليتنها تروح مع غريب..؟؟ الموظفة: خليفه مب غريب....هذا ولد عمها... بطل راشد عيونه منصدم.....خليفه ولد عمها..؟؟؟؟؟ يعني حصه..بنت عم حمدان ربيعي..؟؟!!!... يالفظيحه..شو سويت انا..؟؟؟!! آآخ يالدنيا كيف صغيره وتخدعك... خلى الموظفه بعد ماعطاها الملف ورجع لمكتبه وعقله مب عنده.... خليفه في السياره كان قلبه يعوره على الاصوات اللي اطلعن حصه من الألم اللي تحس فيه...مع انها تحاول تكتم صوتها لكن ماقدرت... الكوبي كانت صغيره...ويحس بقربها منه بشكل فظيع...في نفس الوقت خايف عليها... كانت السرعه اللي يسوق فيها مخالفه طبعا للقانون...واول مره هو يسوق بهالسرعه بس عشان حصه كل شي يهون... اول ماوصل المستشفى رن تيلفونه وشاف رقم عبدالله بس طنشه...مب وقته الحين..لازم ينزل حصه ويساعدها عشان يدخلونها المستشفى...وقف سيارته عند باب الطواري... وياب لها كرسي متحرك..مع كم ممرضه ساعدته انه يمسك حصه ويحطها عالكرسي... سكر باب سيارته اي كلام وماخاف عليها من السرقه...نسى السويج بعد داخل السياره وتيلفونه وكل شي... دخل مع حصه المستشفى...وتريا في الممر...يوم دخلوا حصه عشان يفحصونها....وبعد الفحص شافهم مطلعين حصه وطايريبها مكان الله اعلم شو هو...كان بيسير وراها لكن مسكه الدكتور وعلى ويهه ابتسامه بايخه.... الدكتور: انته جوزها..؟؟ توتر خليفه... خليفه: لا انا ولد عمها...شوفيها..؟؟؟ الدكتور: ماتخفش.. لازم نعمل لها استئصال للزايده...هي عمليه بسيطه ماتخفش خالص... خليفه: شوووووووووو..؟؟!!.. خليفه كان خاطره يصفع الدكتور.. عمليه..؟؟؟ بتسووون لحصه عمليه وتقولي ماتخفش..؟!!... خليفه: بتسوون لها عمليه.؟؟؟ كيف؟؟ الدكتور: ما أولتيلاك ان العمليه سهله خالص وبنعملها كل يوم... هومما اهلها فين..؟؟؟ خليفه: مب موجودين الحين...مايدرون... خليفه يتكلم وعقله مب عنده... الدكتور: طب تعالا معاها ..عاوزين شوية معلومات عن المريضه وتوقيع بسيط لاجراء العملية... وتأدر تتصل فيهم بعدين..طيب..؟!! سحب الدكتور خليفه من ايده...وخليفه يشتم ويلعن....الله ياخذك شو شايفني ياهل..؟؟؟... آآآخ ياحصه...عمليه مره وحده..؟؟؟؟؟؟.....ياويلي عليج.. وبعد وقت...كانت حصه في غرفة العمليات.... عطاهم خليفه المعلومات المناسبه..ورجع لغرفة الانتظار...لكن ماقدر يتريا وايد...لازم يسوي شي...بيتخبل ان قعد يتريا جذي..طلع من المستشفى صوب سيارته اللي لحسن الحظ انه تذكرها اصلا... فتح الباب ويلس..مسك تيلفونه وشاف 5 مسد كوول من عبدالله... شل تيلفونه والسويج ويووم ياي بيطلع من السياره طاحت عينه على شنطه حصه الي فرتها وحده من الموظفات في السياره... بشكل لا ارادي..مد ايده ومسك الشنطه وفتحها...اول شي شافه الظرف المفتوح والورده....وتوتر..يعني قرت الرساله..؟!...شو كانت ردة فعلها..؟!..ياربي هذا وقته الحين البنت طايحه في العمليات وانا افكر برده فعلها؟ صدق اني بايخ... شل تيلفونه وشنطه حصه والسويج ..وقفل سيارته ورجع المستشفى يتريا... مسك تيلفونه واتصل بعبدالله.. عبدالله: وييييييييييييييين انته ياريااال... خليفه: اسكت عني عبووود والله اني شوي وبختنق... عبدالله: شوفيك انته بعد..؟؟ شو صااااار..؟؟ خليفه: انته وين احين... عبدالله: انا في دبي قلت لك... خليفه: اذا كنت تسوق وقف السياره... عبدالله: ليش؟ خليفه: انته وقف السياره وبس... بعد شوي.. عبدالله: وقفتها....شو عندك يالله قول... خليفه: اختك الحين في العمليات... يسووولها استئصال زايده.. عبدالله: شووووووووووووو..؟؟؟؟ عمليه..؟؟ خليفه: هي...ترا محد غيرك يدري....الدكتور يقول بسيطه وماتاخذ وقت... عبدالله: ادري انها بسيطه عمليه الزايده لكن عاد حصيييييييص..؟؟؟؟.. قسم بالله ما تستاهل..وشو سويت.؟؟ خليفه: شو سويت بعد..؟؟ اترياهم يظهروونها الحين...بعدها في العمليات... عبدالله: اي مستشفى؟ خليفه: توااام... عبدالله: اسمع...امايه في المزرعه ومافينا نخبرها احين...بس انا احيد نوروه في البيت... عقب ما تتاكد ان حصه بخير روح البيت وهات نوره تقعد وياها...انا بخلص شغلي هني بسرعه وبيييكم... خليفه: اوكي.. عبدالله: ماقصرت ياخلووف مشكور والله.. خليفه: افا عليك ياعبدالله... حصه بنت عمي بعد...وانته تدري بغلاتها... عبدالله: ادري والله...فديتها والله ما تستاهل...كاسره خاطري... خليفه: وانا اكثر والله...المهم انته لا تخبر حد احين اوكي؟ خلهم يظهرونها من العمليات اول..وعقب بنقولهم عبدالله: هي جي احسن... خليفه: خلاص عيل برايك...فمان الله عبدالله: مع السلامه... تم خليفه يالس يتريا ولسانه مايوقف من الدعااء...يارب اشفيها ...يارب... وبعد فتره..طلع الدكتور وقعد يدور خليفه يوم شافه خليفه طااااار صوبه... خليفه: هاااااااا..؟....بشــــــــر..؟!! ابتسم الابتسامه البايخه نفسها... الدكتور: ما اولنالك ماتخفش...هيااا بخير دلوأتي..بس تحت تاثير البنج...انا اولتلهم ينئيلووها للغرفه.. (ومد ايده ويربّـت على كتف خليفه).. ماتخفش...الف حمدلله على سلامتها... وروح عنه وخليفه مستااااانس من الخاطر... شافهم ينقلون حصه ومغطينها بالكامل لانها بلا شيله ..غطوها عشان الرياييل مايشوفونها..وودوها غرفتها...وبعد ماحطوها فغرفتها طلب انه يشوفها...وخلوه شرط مايزعجها... تردد خليفه..بس لازم يشوفها لااازم..مابيرتاح الا يوم يشوفها بخير...دخل الغرفه..وشافها مرقده على الشبريه اليابسه.. ووييها شاحب... انتبه خليفه بان هالسبلان خلوها بلا شيله...وين شيلتها وعباتها..؟؟؟... مشى صوبها ووقف عدال شبريتها..يتامل في ويهها التعبان...وجمالها الناعم وهي نايمه.. كانن الممرضات منعفلات لها شعرها ...ماهان عليه يشوفها جي... وبشكل لا ارادي مد ايده ومسح على شعرها..وبعّد الخصلات الطويله عن ويهها وحطهن ورا اذنها...بس بعدين انتبه عاللي قاعد يسويه...!!.. لو نشت حصه احين وشافته يسوي هالشي مابتسامحه ابد...كيف يستغل فرصه نومها عشان يلمسها؟؟؟...حتى لو كانت لمسه عفويه...هذا يعتبر تصرف مشييييين....بعد ايده عنها وتراجع...وطلع برااا يدور على الممرضه اللي يذكرها ..وزقرها...وسالها عن شيله حصه وعباتها.. هزت راسها الممرضه وركظت تيبهم من غرفة العمليات وين نسووهن...ويوم يابتهن شلهن ورجع يدخل الغرفه... حط العباه على الكرسي..ومسك الشيله وحاول يلبس حصه شيلتها...سبحان الله يدخل الدكتور والا شي وهي بلا شيله..؟!!..مايصير.. حط ايده تحت راسها ورفعه شوي عشان يخش الشيله من تحته.. وعقب عباااله رام يحط الشيله على راسها ويغطي شعرها بشكل مناسب على الاقل...ولو انه مايعرف بهالسوالف بس احسن من ماشي...وبعد ما تاكد بانها بخير اتصل بعبدالله وطمنه عليها.. وطلع من المستشفى ساير صوب بيت عمه عشان اييب نوره تقعد مع اختها.... الجزء الثامن والاربعين طلع خليفه من المستشفى وباله شوي مرتاح لانه حصه بخير الحين... وصار لازم يفكر بطريقه يخبر فيها اهلها... ماعليه كل شي فوقته حلوو..خله احين يسير ايييب نوره عشان تقعد مع اختها..وبعدين يصير خير..وصل بيت عمه ونزل...دخل البيت على على طووول..وحصله مثل ماتوقع..فاظي...راح المطبخ شاف البشكاره هناك... خليفه: ايييه...شو اسمها هذي بعد...هاللوو.. !!..سيري عند نووره فووق..قوليلها بابا خليفه يريد انتي... هزت راسها البشكاره ومشت بهداوه وبروووووووود...وخليفه يراقبها بغيض...مايتحمل هالبرود هذا...زعج عليها .. خليفه: بسسسسسرررررررررعه.....!!!...قاعده تتمشالي... البشكاره اول ماسمعت الزعجه ركظت...مثل مايقولون اطلقت لساقيها العنان.... وظحك عليها خليفه غصبن عنه ورغم الضيج اللي يحس فيه بسبب حال حصه...لانه البشكاره قزمه وقصييره وشكلها ينقع من الظحك وهي تركظ زايغه... دقت البشكاره الباب على نوره اللي كانت راقده...وطولت وهي ادق بشكل متواصل ومززعج... نورة: شووووووووووووووووو..!!!! ...اووففف الواحد مايتهنى برقاد في هالبيت... البشكاره: نوره..بابا كليفا يريد انتي.... نورة: منوووووووو.؟؟؟؟ البشكاره: بتلي بااااااااااب... انقهرت نوره...هاللي قاصرني بشكاره وتتهزبني بعد....نشت وفرت اللحاف عنها وبطلت الباب وشعرها منتشر حوالي ويهها بشكل يظحك..ومرصصه عيونها بظيج... نورة: شوفيج..؟؟ البشكاره: بابا كليفا يريد انتي.. ونوره دهماااااااانه.. نورة: منو بابا كليفا انتي بعد..!! البشكاره: بابا كليييييييفااااا...هادا ساديق مال بابا ابدوللاااه... نورة: خلوووف..؟؟؟؟ يباني انا؟؟ البشكاره: يس... نورة: شو يباني..؟؟ البشكاره: ماااااااااااادري هو قول سيري قول مشان نوره ينزل تاهاااااات... عفست نوره ويهها.. نورة: مالت عليج وياها رمسه ...رمسه انجليزي نفهم لج...خربتي رمستنا الهنود يرمسون احسن عنج...امحق خمس سنيين تعليم فيج عالفاظي.... نورة معصبه لانهم وعووها من رقادها..... البشكاره: شوووووووو انتي شو يقول..؟! نورة: انا قول ثانكيو فيري ماتش ...جلبي ويهج ممكن.؟!.. البشكاره: ينزل تهاااات الهين... نورة: ان شاء الله عمتي... سكرت نوره الباب وراحت للحمام..تغسلت وسحت شعرها وبدلت ثيابها ولبست الشيله ونزلت... خلوف كان واقف في الصاله مجابل الدريشه... نورة: السلام عليكم... صد خليفه صوبها بسرعه... خليفه: وعليكم السلام...صح النوم...سنه لين ماتنزلين؟؟ نورة: اكرهك انزين...قطعت عليه رقدتي... خليفه: هههههههه..وبعفس عليج يومج بعد....سيري لبسي عباتج ونزلي بسسسسسسسرعه.... نورة: لالالا شو هذا عمليه اختطاف...بدلت رايك عن حصيص؟؟...لالا اسفه خليفه ياولد عمي ماقدر انا مخطوووبه...اسمحلي... خليفه: لمي ثمج....بسرعه نوره والله ماعندي وقت... نورة: من صدقك انته؟...وين بتوديني؟؟؟ خليفه: بشرح لج في السياره... ركظي بسرعه.... نورة: اول قول... خليفه: نوروه انا عمري مامديت ايدي عليج بس والله وحلفت اني بصفعج ان ماتحركتي احين....خلصيني...!!! نورة: ويي بسم الله... شياكم اليوم كله تفاتنون اول شي البشكاره والحين انته...دقايق.. ركبت نوره مستغربه وزايغه من خليفه في نفس الوقت ... ولبست عباتها وشيلتها والنعال..وشلت شنطتها وحطت فيها كم غرض احتياط..ماتدري شو يبا خليفه منها ووين مودنها...الله يستر.. نزلت تحت وطلعت معاه وركبت السياره...وطااار خليفه برا البيت... نورة: اييييييييه شوي شوي....شالني تبا تنفدني انته..؟!!!.. حرام عليك وراي اعراس احظرهن ماريد اتكسر.. سكت عنها... وردت تقول... نورة: غلط عبدالله يوم قالي مابتركبين سياره خليفه...!!..ساعتها قلت له بركبها مع حرمه خليفه المستقبليه هههههههاي... عقد حياته وطنشها بعد....برطمت نوره... نورة: بسم الله شوفيك..؟؟؟ خليفه: نوره...حصه في المستشفى... سكتت نوره...دقيقه تستوعب فيها اللي تسمعه...وهي اطالع بويه خليفه المتوتر ..وقالت بصوت هادي..وواطي.. نورة: .........ها..؟!.. خليفه: اللي سمعتيه.... تعبت اليوم في الدوام.. ووديتها المستشفى.. ويوم سوولها فحص قالوا بنسويلها عمليه الحين لاستئصال الزايده..لا تخافين..سوت العمليه والحين هي في غرفتها تحت تاثير البنج... ماحبيت اخبركم عشان ماتستهمون عليها..قلت يوم بتستوي بخير بخبركم...وترامحد يدري لين الحين الا انا وانتي وعبدالله... انصدمت نوره...وياها صداع على طول...حصه ...اختي..في المستشفى وسوولها عمليه..؟!!!...ياويلي عليج ياحصيص...فديتج والله....تمت ساكته ولا قالت شي...شو بتقول..؟؟ ... الحمد لله على سلامتها بس... لين الحين مب مستوعبه ولا مصدقه.... اطالعها خليفه باستغراب.. خليفه: نوره..؟!.. هزت نوره راسها... نورة: مب مصدقه....مب مصدقه ان كل هذا يصير وانا مادري.. خليفه: وان دريتي شو بتسوين يعني..؟؟ وفرت عليج الوقت اللي بتمين فيه مستهمه وهي في العمليات...انتي احين تدرين انها بخير ومافيها شي... نورة: ياوييلي عليج ياحصيص....ماتستاهل والله.... خليفه: هي والله ما تستاهل.... نورة: واحين شوو؟؟؟ خليفه: احين الله يسلمج بوديج لها تقعدين عندها... وعقب بسير الاتصالات وباخذ لها اجازه مرضيه... امج متى بتيي من المزرعه..؟؟ نورة: هي سايره المزرعه؟؟...والله مادري...بس اكيد قبل الغدا..يعني بعد نص ساعه او ساعه جي.. خليفه: متى يطرشون الدريول حق حصه بالعاده..؟؟ نورة: الساعه 2... خليفه: تمام..بعد مااخلص من الاتصالات بسير بيتكم وبخبرها... عقب كيفها هي عاد تنشر الخبر .. سكتت نوره شوي..عقب نطت.. نورة: عندي كلاس الساعه ثلاث.. خليفه: كيفج عاده تحظرين والا اطنشين...بعده وقت لين 3... نورة: اسميني بطنش...بقعد عند حصيص فديتها.... خليفه في خاطره يقول ياحظج...حتى انا فديييتها...وخاطري اقعد عندها بس ماروم.... وصلوا المستشفى ..ونزلوا...مشى خليفه معاها لين غرفه حصه... دخلوا..وحصلوا الممرضه تكشف عليها وعلى المغذي اللي مركبينه.. طارت نوره عند اختها.. ووقفت عدال شبريتها تتاملها..مدت ايدها تمسك ايد اختها شوي شوي..طلعت الممرضه.. ووقف خليفه بعيد يتامل بويه حصه اللي مب قادر يشبع من شوووفته...انتبه على ظحكه نوره...ظحكه غريبه طالعه في غير محلها ووقتها...شو يضحكها هالخبله الحين وهي تشوف اختها جي؟؟؟ اطالعها خليفه باستغراب...!!!..التفتت له نوره... نورة: منو اللي ملعوزنها بالشيله جي..؟!!.. سالت السؤال وهي مب محتاجه اجابه فعلا عليه... اطالعته بمكر... وشافت ابتسامته المكتومه وهو ينزل راسه قافط.. تاملت فيه..ولد عمها هذا انسان مختلف..غير عن الناس... يهتم بالتفاصيل.. ويحاتي حصه بشكل مؤثر...حتى الشيله لبسها اياها عشان محد يشوفها فغيابه..وتخيلت شكله وهو كان يلبسها اياها..مسكين شو عرفك بهالامور انته..؟!.. هزت راسها وقالت بتاثر... نورة: والله انك ريــــــــال شهـــــم ياخليفه... الله يجعلها من نصيبك ان شاء الله... رفع خليفه راسه واطالع نوره باهتمام وامتنان على دعوتها له...وراحت عيونه صوب ويه حصه..ولمعت عيونه...شوي شوي خبر حبه لحصه قام ينتشر...كان همه تعرف حصه بالموضوع..ويوم درت..صار فيها اللي صار... خليفه: آآمين يانوره....الله يسمع منج.. قعد يراقب نوره وهي تعدل لحصه شيلتها بشكل احسن....ويوم خلصت سحبت كرسي ويلست عدال اختها.. وخليفه حس بوقفته هني غلط... خليفه: احمم..نوره.. هذيج اللي عالطاوله شنطة حصه...دخييلج...يوديها عندج ولا تخلين حد يفتشها ابد...حتى انتي لا تفتشينها...فيها شي ماظن حصه تسمح لاي حد يشووفه... والاحسن تشلينها وياج البيت وادسينها...او يوم تنش حصه تشاورينها شو تسوين بشنطتها.. بس محد يشووفها.... نورة: وانته كيف عرفت انه الشنطه فيها شي سرري لهالدرجه..؟!.. توتر خليفه... خليفه: ...لاني انا صاحب هالشي هذا... ولا انا ولا حصه اعتقد نبا حد يدريبه... سالت نوره بفضول..وهي تبتسم بمكر... نورة: شو هو هالشي؟؟....هدية؟؟ خليفه...احم....رساله.... غمزت له نوره.. نورة:..........بس..؟!!!!... ابتسم خليفه ونزل عيونه للارض... خليفه:....وورده.... نورة: هههههههههه ياويلي انا...ياعيني عليك والله انك عجيب... قفط خليفه... خليفه: المهم مثل ماوصيتج لا تخلين حد يفتش اووكي..؟!.. حطي حصه بعيووونج تفهمين..؟! نورة: ان شااااااااء الله.... وهي في عيون ناس قبلي ماظني تبا عيوني الحين.... خليفه: ههههههه يالسباله....ان نشت سلمي عليها...انا بييكم عقب ان شاء الله.. محتايه شي؟؟ نورة: لا سلامتك...ومشكور ياخليفه على اهتمامك بحصيص.... خليفه: انتي تعرفين انه مافي داعي للشكر....يالله فمان الله...ان احتيتي شي دقيلي.. نورة: ان شاء الله....الله وياك... اطالع خليفه حصه نظرة اخيره...وطلع من الغرفه وسكر الباب وراه.... وفي واحد من ممرات المستشفى..شاف هندي يبيع عصير وسندويشات...تذكر انه نوره مسكينه ماكلت شي وعلى لحم بطنها... خذ لها 2 عصير لاكنور وسندويش جبن..ورد للغرفه..دق الباب.. نورة: تفضل......... دخل خليفه... نورة: هلا خليفه..نسيت شي.. خليفه: نسيت انج على لحم بطنج ويبت لج شي تاكلينه.. مافيني ادوخين انتي بعد واطيحين علينا من فقر الدم... عطاها الكيس وشلته عنه وهي تظحك.. نورة: تسسسسسسسسسسلم والله ياولد عمي....ياحنــــــــــــون انته... خليفه: ههههههههههه عنبو هالويه لج يالغلسه....يالله باي.. طلع خليفه وهو يظحك على بنت عمه... مينونه هالبنت...تظحك الواحد غصب..لها اسلوب استفزاز ماشافه عند حد.... ويستغرب كيف تخلي الناس يتكلمون عن خصوصياتهم غصبن عنهم وبدون مايحسون.... سار عند الدكتور المصري اللي معالج حصه..وساله عن حالها واطمن عليها..وخذ من عنده عذر طبي.... طلع من المستشفى وركب سيارته وعلى طول سار الاتصالات..وقدم على اجازه لحصه لين ما تتشافى...ويوم خلص اموره ترخص من الدوام اللي مطنشنه من البدايه وروح بيت عمه.... ولاحظ ان السياره موجوده...زين يعني حرمه عمه موجووده... دخل البيت وهو يعرف من قبل انه محد موجود فيه غير العيوز...ويلس في الصاله يترياها...ويوم دخلت كان مبين عليها انها توها مخلصه سبوح... ام خالد: مرررررحبا ابووويه....ثرك هنييه.؟؟..محد قالي.. نش خليفه وسلم عليها... خليفه: مرحبابج اكثر عموووه..شحااالج؟؟ ام خالد: بخييير يابويه شحالك انته؟ خليفه: الحمد لله...استريحي عموووه.. ام خالد: خير يابووويه ..شوفيك؟؟؟ خليفه: انتي يلسي برمسج... يلست ام خالد وهي زايغه... ام خالد: شو مستوي...؟! خليفه: اطمني...ماصار الا كل خير...وترا الكل بخير وسهاله لاتحاتين...بس حصه... على طول العيوز حطت ايدها على صدرها زايغه... ام خالد: شوفيها حصه..؟!... احتار خليفه كيف يخبرها السالفه...العيوز مصصصررره تسويها مأساااة....مهما خفف الموضوع... خليفه: عموووه..والله حصه بخيييييييييير وحلفت لج...الحين بخير هي بس تعبت شوي اليوم الصبح في الدوام..ووديتها المستشفى... ام خالد: ياويلي...!!!..اتصلت بي هي ماقالت لي شي... خليفه: مابغت تزيغج يمكن... ام خالد: شو يعورها....؟؟؟؟؟؟؟؟!!!! عيز خليفه وهو يقولها البنت بخير....!!... خليفه: عمووه..بطنها كان يعورها ...ويوم فحصوها حصلوا عندها الزايده...وعالجووها والحين احسن...والله.... تحاشى خليفه كلمه "عملية" عن اطيح عليه العيوز ويبتلش فيها بعد...مب ناقص... ام خالد: عالجووها..؟!...كيف عالجوووها خبرني..؟!.. خليفه: سوولها جراحه بسيطه بس... ام خالد: وابووووويييي....طرووولها بطنها..؟؟؟؟؟ تلفت خليفه بغيض....يا الله هالعيوز كيف صورت السالفه كانها مجزره.. جي الدكاتره ذباحين هم يطرولها بطنها مثل ماهي متخيله؟؟.. لا حول ولا قوه... خليفه: بيكون شق بسيط عمووه..والله بخير بخير....احين قومي لبسي عباتج بوديج لها... ماصدقت العيوز تسمع طاري سيييره..طارت غرفتها ويابت عباتها... وركبت السياره قبله...وصلها خليفه المستشفى عند نوره وما دخل..وصلها لين الباب بس وخلاها.. وروح سيده بيتهم...كان حاس نفسه عفففن من كثر مايتحرك ويركظ ..وظروووري يتسبح ويتنعنش...وصل البيت وحصل حمدان توه ياي من الكليه وكتبه في ايده...سلم على اخووه عالطاير وركب حجرته وتسبح وعقب صلى الظهر...وبعد ماخلص سمع عنود تزقره للغدا.. وحس بيوع مفاجئ.. تلبس مره ثانيه ثيابه ونزل..ويلس مع ابوه واخوانه عالغدا في المطعم الصغير...وكانن الحريم في الصاله... وفي نص الغدا.. التفت حمدان صوب خليفه... حمدان: احس ويهك معتفس...شفيك؟؟ سكت خليفه... وحاول يسرط اللقمه اللي فحلجه...ويحس ريجه نشف فجاه... بو سلطان: هي...وياي من وقت اليوم بعد...ليش طالع من دوامك؟؟؟ مد خليفه ايده وخذ كوب ماي .وشرب منه عشان يسيييح الللقمه اللي وقفت فحلجه... اطالعه حميد بفضول... حميد: شو بلاك خلوف...ارمس... خليفه: احم.. حصه بنت عمي حمد.. كلهم عقدوا حياتهم....ليش خليفه يرمس عن بنت عمه..؟؟؟ سلطان: شفيها..؟؟!.. خليفه: في المستشفى... على طول بهت حمدان..ورفع ايده عن الغدا....وبحلق فويه خليفه منصدم....حصه غاليه عليه وايد وايد... بو سلطان: شووووووو؟؟...شفيها؟؟ خليفه: بخير الحين...بس تعبت اليوم في الدوام ووديتها توام...وسوولها عمليه الزايده..واحين هي بخير عندها اختها وامها... كلهم انصدموا....غمض حمدان عيونه ورص على شفايفه ونش عن الغدا وطلع من المطعم للحمام..تغسل وعلى طووووول السياره وطار...في الوقت اللي كانوا اخوان خليفه وابوه ياخذون منه التفاصيل ... بعدها نش خليفه عن الغدا يوم عافه هو بعد... وانتشر الخبر بسرعه في البيت...عنود صاحت...ماتتخيل ربيعتها وحبيبتها سوت عمليه على السريع وهي ماتدري...والكل زعل علشان حصه... حمدان كان من الخاطر قلبه يعوره....حصه مثل اخته واعزز...رقتها ونعومتها تحبب اي شخص فيها...مب كفايه اللي صارلها بسبب وفاة ريلها بعد الحين الزايده..؟!!!!..الله يعينها كم بتتحمل هالبنت..؟!...اللهم لا اعتراض.. مسك تيلفونه يوم نزل من سيارته..ومشى للمبنى ودخل.....واتصل على خليفه....وساله كم رقم الغرفه واي قسم...وسكر عنه ..يوم وصل الغرفه حصل عبدالله واقف مع الدكتور عند الباب ويرمس معاه...سلم عليه وتريا لين ماخلص رمسته مع الدكتور...يوم سار هذاك ساله حمدان.. حمدان: شحالها حصه..؟؟؟ عبدالله: بخير حمدان..حصه بخير..نشت واحين عندها الممرضه تحطلها مسكن...شوي مكان العمليه يعورها.. عض حمدان على شفايفه قبل ماتفلت منه كلمة " فديتها" ويعصب عبدالله بسبتها...وقال بدالها.. حمدان: تستاهل سلامتها عبدالله... ابتسم عبدالله.. عبدالله: الله يسلمك..... ( وحط ايده على كتف حمدان).... ادريبها غاليه عليك وزايغ عليها... تبا تشوفها..؟؟ حمدان: ياريت..اذا يصير.. عبدالله: دقيقه بس.. دخل عبدالله شوي وعقب طلع بعد ماطلعت الممرضه ياشر لحمدان انه يدش...يوم دش حمدان سلم عالكل...بس عيونه كانت متعلقه بحصه...بويهها الشاحب..وعيونها اللي بالكاد تفتحهن..وايدها على بطنها يمكن على مكان العمليه...تاملها لفتره...وابتسمت له حصه كانها تبا اطمنه...وقف حمدان والكل يراقبه في نص الغرفه..مجابل حصه...وقال بانفعال.. حمدان: انتي ماتيوزين عن المصايب..؟!.. نقعوا كلهم من الظحك حتى حصه ظحكت شوي وسكتت يوم عورها بطنها.. حصه: ههههه .. آآآآخ...شو اسوي المصايب هي اللي ماتيوز عني... حط حمدان ايده فمخابيه...مب هاينه عليه... حمدان: سلامات حصه.... ماتشوفين شر...ماتستاهلين والله... حصه: الله يسلمك حمدان... التفت حمدان صوب حرمه عمه... حمدان: تستاهلين سلامتها عمووه..وانتي بعد نوره... يلس وياهم حمدان شوي يخربط عليهم ويرفع معنوياتهم شوي...ويوم وصلت عنود مع امها يايبنهم بو سلطان... طلع حمدان من المستشفى صوب بيتهم...فاجه يت فطيم على باله...ماشافها في المستشفى..وينها؟؟... وااال يمكن بعدها في الجامعه وماتدري...مسك تيلفونه واتصل باخته ميره...اللي كانت تغدي عيالها اللي يردون متاخر من المدرسه....وخبرها بالسالفه كلها...وقالها تخبر ناصر وحرمته..ووصاها ماتنسى فطيم يوم بترد من الجامعه يخبرونها ...لا يخلونها بروحها في البيت....وهي من ربشتها ماافتكرت ليش يدخل ويهتم لهالدرجه بفطيم..!!!.. سكر عنها وراح صلى العصر ..عقب روح الشركه لدوامه...المهم انه اطمن على حصه وارتاح باله.. من جهة ثانيه..عبدالله كان مرتبش...يطالع عنود في الغرفه بنظرات تقولها " اخيرا شفتج..وغصبن عنج بعد..".. وعنود تتبسم وهي قافطه...بس ماكثر يلسه معاهم لانه دوامه يبدا بعد صلاة العصر اليوم...فروح يشوف شغله بعد ما اطمن واتصل بناصر وقاله انه بيي وبييب هل البيت معاه...زين يعني مابيتمون رواحهم...سار لقسم الاشعة يشوف شغله... المغرب ماصدقت حصه تفظى الغرفه شوي..ناصر شل الحريم ميره وحمده وردهن البيت .. والعيوز وفطيم اتصلن بالدريول عشان يردن البيت ويرتبن ثياب لحصه وام خالد عشان ام خالد بتبات عندها طبعا..وعقب العشا بيرجعن.... وقوم محمد الكتبي وحرمته وعنود ردوا من العصر بيتهم..تمت نوره...بعد صلاة المغرب زقرتها حصه ويلست نوره عدالها... حصه: خبريني كل شي بالتفصيل الممل.. نورة: اخبرج شووو؟؟ حصه: كل شي... نورة: هممممممممم اللي عرفته انج تعبتي في الدوام وشلج خليفه ويابج المستشفى.. واهتم بكل شي وتم يترياج لين ماطلعتي من العمليات...وتاكد انج بخير...حتى الشيله لبسج اياها بشكل يفطس من الظحك قبل مايخليج واييني البيت.. حصه: شوو قلتي؟؟...لبسني الشيله؟؟؟ ..خيبه يعني انا كنت بلا شيله... نورة: هممممممممم هي...بس ماظني انه غلط في شي...زين منه انه لبسج الشيله بعد عشان محد يشوفج بلاها... احترق ويه حصه من الاحراج وهي تتخيل شكلها وشكل خليفه وهو واقف هني يطالعها بلا شيله...آآآآآخ يالفظيحه..!! حصه: انزين وبعدين.؟؟ نورة: يا البيت ووعووني من الرقاد وقالي لبسي عباتج وتعالي السياره..المهم في الدرب خبرني..ويابني هني عشان ايلس وياج...وعقب سار الاتتصالات حسب قوله عشان ياخذ لج اجازه ومر بيتنا وخبر امايه ويابها هني.عقب رد بيتهم وانتشر الخبر..بس... التفتت حصه مكان ثاني سرحانه....بس؟؟..كل هذا اللي سواه خليفه وتقولين بس يانوره..؟!!...ياربي شو اسوي بهالانسان...؟!.. تحمل كل شي برووحه ...ويوم اطمن اني بخير خبر الكل؟؟... ضغطت حصه على بطنها متويعه.. وسمعت صوت نوره.. نورة: هي صح...وصاني ايود شنطتج اون فيها شي ماتبين حد يشوفه وانا خشيتها تحت الشبريه لين ماتنشين... تذكرت حصه باندهااااش شنطتها والرساله اللي فيها.... وشكرت في خاطرها خليفه اللي فكر في هذي بعد...حتى هالتفصيل الصغير مانسيته...؟!!!!...والله انك...شو اقول بس....يزاك الله الف خير... حصه: عطيني اياها... سلمتها نوره الشنطه وهي تراقب بفضول حصه وهي تفتح الشنطه واطلع الظرف...وتفتح الرساله الجديمه وتقراها من اول ويديد.... وهالمره قرتها بتامل اكثر...بتفهم اكبر... مسكين خليفه...ظلمته..وتعذب بسبتي... مافهمت ولد عمي....دمعت عينها ومسحت الدمعه على طول ونوره تراقب مستغربه وهي ساكته... رجعت حصه الرساله للظرف وعطته نوره... حصه: يوديه عندج نوره..الشنطه اباها..بس الرساله هذي يوديها بس بليز لا تقرينها.... خذت نوره الظرف.. نورة: ولا يهمج... وحطتها في شنطتها... طلعت حصه الورده اللي ذبلت شوي.. وحطتها داخل كوب ماي كان محطوط عالطاوله ومشروب نصصه... وتاملتها شوي بفرح.. في الوقت اللي دخل فيه عبدالله وهو لابس اللاب كوت ماله وشكله كاشخ.. عبدالله: هااا حصيص...شحالج...؟ حصه: انته دكتور فاشل.... بعده صبعي الصغير لريلي يعورني وانته ماعالجته... عبدالله: ههههههههههههههه..بقص صبع ريلي وبعطيج ايااه .... حصه: ههههههه مابغيه.. مشكور..عالج لي صبعي... لبسها عبدالله في الوقت اللي مسك فيه الملف الخاص فيها اللي معلق جدام الشبريه وقعد يقرا فيه...توه بس بين انه دكتوووور...ويهتم بتفاصيل العلاج...وتطور الحاله...وخواته يراقبنه باندهاش واعجاب وفخر..بعد ماخلص رجع الملف مكانه وسار صوبها...وتساند على الشبريه.. عبدالله: شي يعورج؟؟؟ حطت ايدها على بطنها... حصه: مكان العمليه بس... عبدالله: بيعطونج مسكن ثاني قبل ماترقدين... نطت نوره وهي تمد ايدها لجيب الكووت مال عبدالله.. نورة: وااااااااااااو شكله فنان هالقلم.. ظربها عبدالله على يديها قبل ماتاخذ القلم من الجيب.. عبدالله: هذا هدية الغاليه... حصه: عليا؟؟ عبدالله: هي نعم..موصتني ماستخدم غيره ههههههه.. ابتسمت حصه...واطالعت فويه اخوها... حصه: انته اللي قلت حق خليفه يمر ويشلني المستشفى صح؟؟؟ عبدالله: قتله يوديج البيت..هو طاربج المستشفى.... حصه: همممم..مارمت اتصلبك تعبت زياده عقب والتمن عليه الموظفات...وعقبهاماحسيت بشي غير الويع بس... عبدالله: يالله الأسوأ خطف...وباقي تتشافين بس...مساله وقت.. انا بسير...وين امايه؟ نورة: سارت ترتب ثياب حقها وحق حصه وبترد .. عبدالله: تمام...محتايات شي؟ حصه: لا سلامتك... عبدالله: الله يسلمج...حاولي ترقدين...مب لازم تسولفين اربع وعشرين ساعه.. حصه: هههههه انزين.. طلع عنها عبدالله وخلاها مع اختها.... خليفه بعد المغرب اتصل على عبدالله وقاله انه ياي المستشفى يشوف حصه...وكانت العيوز ساعتها موجوده هناك مع نوره اللي ماتحركت من المستشفى من وصلت.. فقاله عبدالله يروح عادي لانه العيوز هناك...المهم انه يوم بغا يطلع من البيت تشبصت فيه عنود وقالت له انه بتسير وياه تشوفها ماشبعت من شوفتها...ويابها معاه... يوم وصلوا المستشفى..دخلت عنود اول وسلمت وقالت لهم انه خليفه يبا يدخل يسلم..فزت حصه بشكل خلى مكان العمليه يعورها مره ثانيه..كانت تبا تقعد ..تعتدل في يلستها فظيحه يدخل وهي منسدحه... حصه: نورووه يلسيني.. نورة: صبري برفع الشبريه شوي... رفعت الشبريه نوره على اساس تكون شبه يالسه بشكل مناسب...وعدلت شيلتها ...كانت وايد قااااافطه ...شو بسوي يوم بشوفه..؟؟؟..اول شي الرساااله اللي بينت اني ظلمته وكنت سبب في عذابه واليوم يوم طحت عليهم وتعبل فيني ووداني المستشفى...يافظيحتي فيك ياخليفه..!!.. خليفه برااا بروحه كان مرتبش... كيف بسيطر على نظرتي جدامهم...كييف..؟؟؟ اخاف افتضح....انزين وان درووا...؟ شو يعني...؟؟ بنت عمي ..اباها واخاف عليها حد يروم يمنعني؟؟؟؟... بس بعد...اقفط... طلعت له عنود وقالت له يدخل...مشى ببطء ودخل الغرفه... خليفه: السسسسسلام عليكم... ردوا السلام عليه... خليفه: شحالج عمووه..؟ ام خالد: بخييييييير وعافيه ابويه شحالك انته؟ خليفه: الحمد لله بخير... وقف جدام شبريه حصه...وتمسك في حد الشبريه ...حتى وهي تعبانه حلوه...كان يطالعها وهو نفسه مب عارف نظرته شو قاعده تقول لها وشو قاعده تفضح...لانه مب قادر يسيطر..بس زين ان العيوز قاعده من جهة ثانيه ماتشوفني... حصه كانت تحاول انها ماترفع عينها له...تخاف من اللي بتشوفه..بس عيييب...يوم وقف جدام شبريتها رفعت عينها له...توها بس فهمت نظرة خليفه لها كل هالوقت...نظرة مثل العتاب...كانه يقولها كيف سويتي فيني كل هذا ومادريتي اني احبج.؟!...وفي نفس الوقت ..يقولها بعد انه بعده يباها...يالله يا خليفه...آسفه والله آسفه مافهمتك... وابتسمت له.. خليفه يوم شاف ابتسامه حصه ارتاح شوي...يعني مب معصبه بسبب الرساله....تفهمتني...!!..الحمد لله... خليفه: شحالج حصه.؟؟ حصه: احم...الحمد لله خليفه..بخير..شحالك انته.؟ خليفه: مانشكي باس..الحمد لله عالسلامه...يابوج روعتينا عليج.. وظحك.. وابتسمت حصه ونزلت راسها من القفطه.. حصه: الله يسلمك... مشكور خليفه على كل اللي سويته ..اليوم الصبح.. تعبتك وياي وايد... تعمدت حصه تقول " اليوم الصبح...تعبتك وياي وايد.." بلهجة ماكره عشان يفهم انها تقصد الرساله وانها تعبته وعذبته بسبب غبائها...وطبعا خليفه فهم عليها..نزل عيونه وابتسم...ورد رفعهن وقال.. خليفه: تعبج راااحه يابنت عمي... المهم تقومين بالسلامه ان شاء الله.. حصه: الله يسلمك من كل شر... خليفه: اترخص انا عيل.. ام خالد: وين تبا ابوويه ماشربت لا شاهي ولا شي... خليفه: ماعليه عمووه بسير اشوف عبدالله اليوم موووول ماشفته... وعقب برد بشل عنود.. ام خالد: على راحتك الغالي... خليفه: تامرون على شي؟ ام خالد: سلامتك ولد محمد... خليفه: الله يسلمج..فمان الله.. وطلع خليفه من الغرفه واتصل بعبدالله عشان يلاقيه اي مكان لانه مايعرف وين قسم الاشعه...المهم تلاقوا ويلسوا شوي يسولفون..بس خليفه لاحظ انه عبدالله مشغول شوي بشغله..فترخص منه ورجع للغرفه...ودق الباب... خليفه: انا خليييفه ... ام خالد: اقرب ابويه حياك.. دخل خليفه الغرفه.. خليفه: هاا عنود...يالله قومي بنسير البيت.. عنود: خلني يالسه... خليفه: لالا...بسج...بتينها باجر...بعدين امي ماتدريبج ظهرتي.. عنود: همممممممم انزين يالله... سلمت على حصه وعمتها ...ويوم يايين بيطلعون.. نورة: لحظه...ودوووني البيت لو سمحتوا.. ام خالد: ويدي..!!..وين بتسيرين؟..ليش ماقلتي للدريول يوديج.. نورة: اسير ويا ولد عمي وبنت عمي ابرك عن الدريول امايه... يالله محتايين شي من البيت؟؟ ام خالد: بنتصل يوم بنحتاي شي..وانتي ديري بالج عالبيت تراه فاظي وابوج لين الحين مايدري بحصيص يمكن اخبره ويرد..واذا رد لا تهملينه تسمعين... نورة: افا عليج...الشايب فعيوني...يالله فمان الله.. طلعوا ثلاثتهم من الغرفه وركبوا السياره...طبعا نوره ركبت ورا...ووصلوها البيت وردوا هم بيتهم.... الجزء التاسع والاربعون الاربعاء العصر كانوا اغلبهم متيمعين عند حصه في المستشفى..ام خالد ونوره وفطيم..وبو خالد اللي يا من بوظبي وودر شغله مخصوص عشان حصه...خالد ياها الظهر ورجع البيت عند صلاة العصر..وعبدالله اللي يالس على كرسي قريب من شبريه حصه باللاب كوت ماله... حصه: امااايه..والله عادي ماعليكم مني... ام خالد: شقايل يابنتي نسير العرس ونخليج...لالالا انا مب سايره.. حصه: امايه لاتخليني احلف عليج...الا يوم واحد هو شو بيصير فيني يعني؟؟؟ بعدين فظييحه في خالي وحرمته وشيخه... عبدالله: امايه لاتنسين عرسي عقب اسبوع اخافهم يتنيحسون ولا ايوووون... التفتت فطيم على نوره تصاصرها.. فطيم: سمعي..يتنيحسون اون...جي يهال.؟؟ نورة: اشششش سكتي... بو خالد بصوت عالي يكلم ولده... بو خالد: شقايل يعني تباها تخلي البنت بروحها,..؟ . عبدالله: حصه ماعليها شر..يالسه تراها في المستشفى..وبتقعد معاها عنود...وانا اصلا مابروح الشارجه الا الخميس العصر بحضر العرس وبرد في الليل على طول... ماعليها شر ان شاء الله... سكتت الام محتاره..مب هاين عليها تخلي حصه بروحها في المستشفى... ونورة الا بنت ..ماتامن تخلي بناتها رواحهن.. لازم حد مسؤول عليهن.. حصه: امايه لا تفكرين بالسالفه..انتوا طلعوا من العين الخميس الصبح...وردوا الجمعه بعد الغدا..او الصبح..بس لازم تحظرون ماعليكم مني انا... ام خالد: والله مادري يابنتي ... ماتهونين علي اخليج ارووحج هني.. حصه: ماعليج مني انا مب سايره مكان... وبيني وبينكم تيلفون ..وعنود بتيلس وياي... شو بيصيرلي يعني؟!.. ام خالد: انزين حد من حريم العيال بيقعد وياج..!!!!.. نورة: امايه كلهن معزومات وبيسيييرن العرس.... ام خالد: عنبوو ولا وحده منهن بتقعد..؟! حصه: انا ما اباهن يقعدن عندي...برايهن مالنا سلطه عليهن نجبرهن يقعدن وياي يحرسني بلا داعي... بو خالد: خلاص يام خالد البنت ماعليها شر...صدقها هي في المستشفى وعندها بتيلس بنت عمها وعيال عمها هني شو بيصيرلها يعني..؟!.. وكلي الله...انا بقوم اسير عنكم العزبه...يالله تامروني على شي؟؟ الكل: سلامتك.. طلع بو خالد ..وحصه بالها شارد...توترت يوم قال ابوها ان عيال عمها هني...منو يقصد.؟!..منو اللي بيفتكر فيني غير خليفه..؟!..حمدان بيسير العرس... وسلطان وحميد مالهم خص فيها ولا بيحاتون زود يعني....محد غير خليفه ...وهي تدري انه مابيقصر بيسوي اللي عليه وزيااااااااااااااااده....الله يستر بس.. حصه ما تلقت زيارات وايده لانه موصية الكل ماينشرون الخبر هذا...لانها هي اصلا مالها مزاج ومافيها على الزيارات والمجاملات...بس اهلها وقوم عمها هم اللي زاروها...وماشاء الله مب مقصرين الغرفه ماتخلى ..لازم حد يكون معاها...وحست انها محبوبه من اهلها..وهالشي رفع معنوياتها لكثر الاهتمام الي تحصله منهم...وبشكل خاص...اهتمام خليفه الكبير اللي لفت نظرهم كلهم... بعد ماطلع بو خليفه بفتره...طلع عبدالله وراه يكمل شغله... وتمت العيوز والبنات عند حصه..شوي ويسمعون دق عالباب.... تحجبن البنات للحذر بس... ام خالد: اقـــــــــــــــــــرب... يامرحبا... Quote Link to comment Share on other sites More sharing options...
نورالدينهو المحرق Posted يناير 14, 2007 Report Share Posted يناير 14, 2007 وين وين التكمله Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.