بحرينيه^مزيونة Posted يناير 17, 2006 Report Share Posted يناير 17, 2006 تسلمين اختي ،، يعطييج العاافيه،، بانتظار التكمله،، Quote Link to comment Share on other sites More sharing options...
عـــــيــ المها ــــون Posted يناير 20, 2006 Author Report Share Posted يناير 20, 2006 الجزء الثامن والثلاثين تمت نوره قاعده عدال راس فطيم ...بعد مالحفتها وهي تفكر بشكل حمدان يوم كان واقف.....شكله غريب..مقهور..ويفكر بعمق... كانه مستغرب او خايف من شي.... معقوله يكون خايف من مشاعره..؟؟؟؟....لالا..حمدان دايما جريء... بس محد يدري يوم يتعلق الموضوع بالحب...حسب علمها حمدان مب راعي هالسوالف..يحب يغلس ويمزح بس اول مره يهتم بشكل شخصي وايد بوحده من البنات...!!!.. وماتدري كيف ممكن يتصرف او يحس... تحركت فطيم وقاطعت حبل افكارها..واطالعت حواليها وعقب اطالعت نوره باستغراب... فطوم:.......الساعه كم..؟؟ نورة: الساعه تسع ونص.. نشت فطوم ويلست وهي حاطه يديهاعلى ويهها وترتب شعرها.. فطوم: خييبه ليش ماوعيتوني..؟؟؟ نورة: امي قالت خلوها راقده ترتاح... فطوم: مااصلييييييت...(ومسكت رقبتها تهوس عليها)..آآآخ...تكسرت.. نورة: اهمزج..؟؟ فطوم: هي والله دخييلج.. يلست فطوم عالارض جدام نوره اللي قاعده عالكرسي...وقعدت نوره تهمزها وفطوم مدوخه...يت ام خالد ويلست عندهن.... ام خالد: هاا بنتي شو تانسين..؟؟ فطوم: الحمد لله عموه.... نورة: وييين والله انج حاااره... فطوم: بتخف الحراره ان شاء الله.. ام خالد: كلتي دواج.؟؟ فطوم: لا بعدني..بصلي التراويح وبكله... ام خالد: زين.. نوره شفت سياره ظاهره من بيتنا..منو ياكم..؟؟ تكلمت نوره وهي تهمز فطيم.. نورة: هذا حمدان ياي يشل كاتلوجات حق عنود... لاحظت نوره ان فطوم ارتجفت من طاري حمدان.. وبعد شوي نشت وقعدت عدال نوره وهي اطالعها بنظرة فيها سؤال يقول " دخل هني.؟"... نوره ابتسمت وقررت تخلي فطوم على اعصابها ...وصدت عنها تسولف ويا امها...طبعا فطوم ماتقدر تسالها وعمتها موجووده...فياست منها وسارت تصلي وتاكل دواها.... حمدان دخل بيتهم وهو يجلب الكاتلوجات في ايده... دخل الصاله وحصل عنود منسدحه على هالكرسي.. وام سلطان وابو سلطان يالسين يتابعون الاخبار...وسلطان فارش اوراق جدامه وقاعد يشخط عليهن...يصمم.. حمدان: السسسسسسلام عليكم... التفتوا له كلهم وردوا سلامه...اعتدلت عنود في يلستها يوم تقرب حمدان منها ويلس عدالها..عطاها الكاتلوجات حمدان: اندووج...يسلمون عليج... عنود: الله يسلمهم وياك من الشر يارب...مشكوور حمدان.. حمدان: العفوو...سيري هاتيلي عصير عطشان... عنود: من عيووني.. سارت عنود المطبخ التحظيري عشان تيب لاخوها عصير.... التفتت له امه.. ام سلطان: هاااا بويه...شو هباااتك..؟ حمدان: الحمد لله بخير...حد ياكم..؟؟ ام سلطان: اظني ربع اخوك حميد في الميلس... سوا حمدان حركه بويهه تبين انه مب مهتم.. نش ويلس عدال ابوه وسلطان المشغول عنهم.. حمدان: ابووويه...خل عنك هالاخبار اباك فسالفه... بو سلطان: خير..؟ حمدان: خير ان شاء الله....ابا اشتغل.... التفتت ثلاث ازواج من العيون صوبه...مستغربين من هالطلب... سلطان: احين من ثلاث سنين تدرس واحين بتودر دراستك..؟؟؟ حمدان: منو قالك انزين اني بودر دراستي..؟؟ صدق ان هالعاده منتشره فيكم كلكم..ماتخلون الواحد يكمل رمسته... بو سلطان: عيل شووو..؟؟ حمدان: ابويه...مب حلوه اني ريال عود بلحيتي وانته تصرف عليه...الله يطول بعمرك ان شاء الله وانته ماتقصر لكن انا ابا اعتمد على نفسي... بو سلطان: مايخااالف انزين لكن دراستك ...؟؟ حمدان: دراستي بكملها ان شاء الله...بدرس الصبح وبشتغل مسا... سلطان: ماشي دواير بتوظفك دوام مسائي...واي شركه خاصه لها دوام مسائي بتشغلك بشهادة ثانوي..؟؟ حمدان: انته بتشغلني في الشركه.... سلطان: اهااااااااااا ...هات من الآخر... حمدان: هههههههههه... شو بعد آخر...بس خلصت السالفه... بداوم الصبح في الكلية وبعد الغدا بداوم في الشركه لين المغرب... ام سلطان: يابوويه تعب عليك.... حمدان: وشوو عليه عاد انا تعب والا غيره..؟؟ سلطان: مابتروم تيب درجاتك الزينه اللي تيبها الحين تراك...بتاثر على دراستك... حمدان: لا تفاول عليه...ان شاء الله اني بستمر على هالمستوى... وبعدين بيكون عندي وقت ادرس في الليل... هز سلطان راسه وهو فقد الاهتمام بمتابعه النقاش هذا اللي معرووفه نهايته...هذا حمدان...واللي يباه بيحصله...يت عنود وعطت اخوها العصير ويلست مكانها ساكته...ما فيها تدخل بنقاش بينهم..مالها خص.... ام سلطان: عز الله ماعشت يابوويه..جانك الصبح في الكليه والمسا في الشغل وفي الليل مابترقد عشان تدرس.. لالا..انا اقول تريا لين ماتخلص دراستك وعقب اشتغل.... حمدان: امايه انا مب مرتاح جذي.... فظيحه والله اللي يسالني وين تشتغل اقوله ماشتغل تراني ادرس.. وهم يشوفوني اصرف برااحه ويعرفون انه ابويه يصرف علي....جي مب ياهل انا... كل هذا النقاش وبو سلطان يطالع ولده بعين اعجاب وفخر... بو سلطان: والله ياولدي اني اتريا منك هالطلب من زمان... لكن ماحبيت اضغط عليك ... ولازم اني بفرح وبستانس يوم بشوف ولدي صار ريال ويبا يعتمد على نفسه.... واسميني مابخالف شوور انا اترياه من سنين واشوفه انه عين الصواب...بس قولي قبل...انته قدها هالمسؤوليه..؟؟ تروم عليها والا عقب بتقولي بودر الشغل وما اروم...؟!!.. حمدان: افا عليك يابو سلطان....اسميني قدها وقدود والا مابطلبها منك.... بو سلطان: تراني ماحب شغل المحاباة هذا...ولا بسويلك سالفه زياده عشانك ولدي... بشغلك حالك حال الموظفين اللي عندهم ثانويه عامه... ظحك حمدان وسلطان وعنود...وام سلطان تنرفزت لانهم بيقصرون بولدها واطالع ريلها بعين معصبه ... حمدان: وانا ماطلبت انك تسويلي سالفه...ابا اشتغل ويمشي لي معاش حالي حال الموظفين...اهم شي يكون بالي مرتاح..وانا راضي عن نفسي.. بو سلطان: بارك الله فيك..واخوك مابيقصر..بيخلص لك اوراقك وبمشيلك المعاش..وبداوم ان شاء الله... حمدان: مشكووور يابوويه الله يطولي بعمرك....ويخليك لنا... سلطان: متى تبا اداوم..؟؟ حمدان: والله من باجر اذا تبغي.. سلطان: لا..نحن مشغولين بمناقصه الحين مب فاظي... خلها اول الشهر عشان يكون كل شي مظبوط... حمدان: خلاص تمام..يوم تباني اداوم خبرني.. لم سلطان اوراقه وطلع وهو يقول انه بيسير اييب حرمته وعياله من بيت يدهم.....وكمل حمدان سهرته ويا اهله...وعقبها سار يدرس شوي قبل ما يرقد...استوا من يدخل حجرته يذكر وقفة فطوم فيها...ويستانس... بالباجر في امريكا... خليفه كان يالس في حجرته يسوي تجارب على نظام وندوز اليديد...(لا تنسون تخصصه كمبيوتر)..وكانت الاوراق والكتب منتشرات على الشبريه عداله... وهو لابس نظاراته الطبية الصغيره ومركز وايد على شاشه الكمبيوتر وكوب النسكافيه عداله مخلص.... دخل عليه عبدالله ..اللي تعود على حالة خليفه.. عبدالله: اشووووو هذااا اللعوااااااااز... خليفه: اششششششششش...لا تلخبطبي.. عبدالله: بالله عليك شقايل رايم تركز..؟؟.. الا شقايل رايم تعيش انته... خليفه: عقب ماخلص برتب...(ويوم مد ايده عبدالله بيلم الاوراق اللي عالشبريه)..لالالالا..لا تصك شي ... عبدالله: مشكله الهاكرز بعد.... خليفه: لو سمحت انا يسموني خبير انظمة وشبكات...مب هاكرز... عبدالله: جب يالله ..هاكر... خليفه: ما اتوقع انك تفهم...شو خص الاشعه والطب بالكمبيوتر بس...؟؟..احين انته شو تبا.. مب عليك امتحان والمفروض تدرس.. عبدالله: ابن اللذينا قاعد يروغ بعد.... ييت عندي فظووول...ياي اسالك.. خليفه: عـــــــــن..؟؟؟ عبدالله: البنت ماغيرها..اللي كانت متخبله عليك.... خليفه: تخبلت عليك ياعده وترفست فبطنك قول آمين... عبدالله: ههههههههههه خسك الله... من زمان مادعيت علي... خليفه: مستانس اليوم اكتشفت ثلاث عيوب في النظام لين الحين.. ...باختصار يعني اقدر اطور في هالنظام واقترح نسخه يديده...شفت الفن... عبدالله: لا والله...جان فيك خير اخترع نظام يديد بالكامل غير وندووز... خليفه: جب جب....اشوفك اخترع نظام اشعه يديد... عبدالله: المهم خلنا من هالسالفه...البنت شو اسمها.. خليفه: هــنـــــد...!! عبدالله: هي هند...شفتها قبل شوي في الكافتيريا..ريلها مجبسه وعلى عكازات... رفع خليفه نظره عن الشاشه لاول مره من يا عبدالله... خليفه: هيي ..شفتها انا بعد في الرصيف تتريا سياره ربيعتها...كسرت خاطري تصدق...؟ هي اصلا من اسبوع غايبه ... مادريبها بداوم يوم الاثنين او لا... امريكا في هالوقت اجازه عندهم..لا تنسون ان نظام اجازتهم الاسبوعيه تكون بالسبت والاحد..مثل الخميس والجمعه عندنا وبما ان اليوم الاحد فكان اليوم اجازه عندهم.....وهذي النقطه للتوضيح... عبدالله: شوبلاها ؟؟ خليفه: يقولن ربعها يوم الدكتور سال عنها...انها مسويه حادث... عبدالله: مسكينه.. عيل ظاعن عليها محاظرات اسبووع..شحقه ماتنسخ لها محاظراتك..؟؟؟ خليفه: لا والله..؟! احلف.؟ عبدالله: هي والله...البنت ماقصرت وياك يوم سرنا الامارات ثلاث ايام...نسخت لك المحاظرات وعطتك اياهن.. خليفه: والله اني فكرت فيها مب اني معدوم الظمير يعني... لكن خفتها تصدق عمرها..وتبدا الحركات من اول ويديد وانا ماصدقت افتك...بعدين عندها ثلاث ربع في المحاظره مابيقصرن فيها...اكيد يعطنها المحاظرات اول باول... عبدالله: هممممم...بس على الاقل قولها سلامات يوم تشوفها مب اطنش...ترا عيب والله تعتبر زمييله هي وياك في التخصص...على الاقل جامل... خليفه: يووووووه علينا....بشوف بشوف.. ورد مسك اوراقه ويطالع فيهن...وماعرف عبدالله تعقّييد الحيات هذا لانه معصب والا لانه مركز..؟؟؟؟ عبدالله: ماتبانا نسير نتسحر..؟؟ خليفه: الجو برد وانا مافيني اطلع... شو رايك تاخذلنا بيتزا وبيبسي وتيبه هني....؟ عبدالله: عشان يكتمل لوث الحجره هااا... خليفه: برتب عقب يوم بنخلص... عبدالله: اووكي...بسير اييب العشا ... طلع عبدالله عن خليفه وخلاه مع كمبيوتره واوراقه... يوم الاثنين بعد صلاة التراويح...عنود حشرت حمدان في التيلفون عشان يوديها بيت عمها..من زمان ماسارت لهم..لين ماوافق..وشلها وياه وهو ساير لهم...قال في خاطره بالمره فرصه اعرف شو اخبار فطيم ..صحّت والابعدها من المرض.. والحقيقه ان فطيم حالتها تحسنت وايد.. والحمى راحت...بس بعدها شوي تعاطس.... يوم وصلوا البيت كان ام خالد مب موجووده طالعه تسلم على حد من المعارف...وميره وريلها سايرين دبي يتشرون للعيد... اما حمده فكانت عند اهلها ذاك اليوم..وناصر في بيت عمه سلطان مع سلطان وحميد وربعهم.....بس بو خالد اللي كان موجود ويالس ويا بناته في الصاله...حصه اول ماشافت سياره حمدان شردت ودخلت حجرة فطوم..وفطوم طبعا شردت وياها... وتمت نوره ويا ابوها... دخلت العنود وسلمت عليهم هي وحمدان... يلس حمدان مع عمه ونوره وعنود سارت غرفة فطيم... عنود: سلااااااااااااااام... حصه: هلا والله وغلااا.... سلمت عليها حصه وسلمت على فاطمه... عنود: بالمهلي حبيبتي...شخبااارج..؟ حصه: والله لو تبين تعرفين اخباري الشيخه عنوود جان اتصلتي...وسالتي...مب الحين يايه تساليني... فطوم: يالله يالله يالله...العرب شاليين فخواطرهم عليج... عنود: فدييتهاوالله ماتهون علي...ياعمري حقج عليه... حصه: لالالا ماشي.. عنود: وحياتج مابطلع من بيتكم الا وانتي راضيه اليوم... ظربتها نورة على جتفها... نورة: يالسباله ماقلتي انج يايه بنسوي فواااله...اليوم ماسوينا شي... عنود: فديتج والله لا اتعبين عمرج...زااطه عالفطور لين ماقلت بس... نورة: لا تمتنين عاد اخووويه مايحب المتان... عنود: ههههههههههه اطمني انا لو اكل من اليوم لين باجر مابمتن... نورة: ياحيج والله...فطوم تعالي وياي المطبخ بنسوي شي خفيف... عنود: لاااااااااااالالالالا عينن خير اقولج مابا شي... نورة: انتي حد شاورج..؟؟ على الاقل عصير...ابويه بيعصب علينا ..بيقول يايينكم ظيوف ماسويتوا شي...تعرفينه عمج عاد انتي... عنود: ههههههه اذا السالفه فيها عمي بنطب وبسكت... يتبع ظحكن كلهن وطلعت فطوم مع نوره وسكرن الباب وراهن.. وانصدمن بحمدان اللي طالع من الحمام اللي عدال غرفة فطوم وماسك كوب في ايده كان يغسله...وهو بعد يوم شافهن وقف مكانه وهو منصدم...وعيونه طبعا على فطيم...اللي نزلت راسها على طول.. حمدان: اهلاااااااااااا فطيم....شحالج..؟ فطيم: احم....الحمد لله شحالك حمدان...؟ حمدان: بخير والله.... احيدج مريضه..سلامات...اهون الحين....؟ فطيم: الحمد لله والله يسلمك...بخير مانشكي باس... حمدان: ياحيج والله... رمست فطيم وهي ادز نوره عشان تمشي جدامها.... فطيم: الله يحييك..اسمحلنا بنسير المطبخ... راقبهن حمدان وهو مبتسم... كان مستانس انه يشوف فطيم بخير ومب مريضه... رد لعمه وكمل سوالف وياه... حصه وعنود يلسن على شبريه فطيم... عنود: بالله عليج زعلانه علي..؟؟ حصه: هي والله... زعلانه عليج... عنود: انزين لييييييييييش..؟؟ حصه: عنبووو يا عنوود...اول نحن مثل الظفر واللحم...مانتفارق... ونتفق على كل شي ونرمس في كل شي...لكنج امممره مره وحده ابتعدتي عني وماحيدني مسويتبج شي...!!! برطمت عنود..حصه معاها حق...هي مقصره...بس كانت تشوف هالبعد من صالح حصه...ماتبا تذكرها بواقع ان ريلها مات عنها...وبالمقابل عنود بعدها الله يطول بعمر عبدالله... عنود: حرام عليج انتي فاهمتني غلط...والله اني اشتاقلج في كل لحظه ابتعد فيها عنج...وانتي تدرين اني ماصبر بلاج...بس... حصه: بس شووو..؟؟..رمسي قولي اللي في خاطرج...شو اللي خلاج تبتعدين عني...؟ عنود: حصيص...انتي اللي ابتعدتي عنا كلنا...من بعد وفاة المرحوم سيف وانتي ماترمسين حد... فما حبينا انه نزعجج بوجوودنا حواليج...كنا نخليج بروحج لانه حسينا انج انتي تبين تقعدين بروحج وتفكرين وتحزنين على راحتج... ومن بعدها قمت اقلل سوالف وياج لانج تعرفين اني اجهز لعرسي...وطبيعي انه يزل لسااني واتكلم عن التجهيزات والعرس... وانتي تعرفين انه كنا مخططين نجهز مع بعض ونسوي كل شي رباعه....كيف تبيني اكلمج عن شي بيرجعج لحزنج..؟؟؟ وبيذكرج بخسارتج..؟؟ كانت حصه طول الوقت منزله عيونها ....عشان تخفي الحزن اللي فيهن..بس الدمعه الحاره اللي نزلت ماقدرت تمنعها.او تخفيها... لوت عليها عنود وهي شوي وبتصيح هي الثانيه.. عنود: فديتج لاتصيحين... انا آسفه وحقج عليه... ماكنت اقصد اذكرج او ازعلج..بس انتي بغيتي اللي في خاطري ونحن متعودين عالصراحه....وكووني اني اخفيه فقلبي مب معناته انه مب موجود....لا تصيحين حصيص... ابتعدت عنها حصه وهي تمش دموعها وتحاول تبتسم... حصه: عنود...انتوا ابتعدتوا عني في الوقت اللي انا كنت محتاجتنكم فيه اكثر شي....يمكن انا فهمتكم اني ابا اقعد بروحي بس مب هذا اللي انا كنت محتاجتنه....خصوصا انتي...كنتي اكثر وحده انا محتاجتنها...لاني اكثرر شي ارتاح وياج...واقدر اكلمج عن اي شي وتتفهميني.... او اذا ماكلمتج انتي كلميني..ما اطنشج اسمعج ...وافكر بكلامج....وشوفيها يعني اذا انا ريلي توفى..؟؟....الله كاتب له هالشي...وكاتبلي هالشي...مب معناته اني بكره طاري العرس وطاري التجهيزات وبحرم غيري من السعاده اللي اكنت انا اترياها ...!!!... بالعكس..انا فرحانه لج والله يكمل عليج يارب انتي ونوره.... وتراه عرسج عرس اخويه بعد..يعني فرحتي مب فرحه وحده..فرحتين..وويوم اجهز وياج واخطط معاج لعرسج بستانس مابزعل... لانه هالشي اللي نحن تعودنا عليه... من نحن صغار...فهمتي..؟؟ ابتسمت عنود ودموعها فعيونها... عنود: فدييتج والله اني مافهمتج...سمحيلي.... صدق كنت مفتقده التخطيط وياج وترتيباتج وافكارج... والله اني من متى متخربطه مب عارفه شو اسوي... امي ترمس من صوب وامج من صوب وانا مب عارفه شو اسوي بينهن...وشو اجهز في البدايه وشو اخلص...وانتي تدرين الوقت بسرعه يخطف ولازم اخلص تجهيزاتي.. حصه: هههههههه...اههم شي خوزنا سوء التفاهم هذا...لا تخليني بروحي ويا هالويه... عنود: وعد وعد وعد.....خلاص..توووووووووبه...قومي خلينا نسير فوق حجرتج بتعطيني شيله بيظا البسها..وبخبرج بكل اللي سويته... حصه: يالله... سارن حصه وعنود فوق في غرفة حصه ويلسن يسووولفن بطريقه ماسولفن فيها من شهووور... حمدان عند عمه اتصلبه واحد من ربعه وقاله ان كل الشباب هني يتريوونه في العين مووول...ولاازم اييهم الحين...سكر عنه حمدان وترخص من عمه وطلع...يوم طلع من البيت تذكر البنات في المطبخ...سار صوبهن ودخل عليهن المطبخ بدون حس....حصل نوره قاعده تسوي حلاوة بسكوت سهلة وسريعه ..وفطوم ماسكه كوب عصير وفيه ثلج وترتب الكريم كاراميل في صينية .. حمدان: احمممممممم.....شو تسون..؟؟ تناقزن كلهن لانهن ماكانن حاسات بوجووده.. نورة: بسم الله ...روعتنا....شو يالسين نسوي بعد.فواله.. حمدان: لالا مافي داعي اتعبن عماركن عشاني..انا بسير احين... التفتت نوره لفطوم اللي يالسه على كرسي جدام الطاوله .... نورة: ياربي كيف خقاق....!!!...انزين انته بتروح اختك بعدها داخل... حمدان: اهاااااااااااا.... وتقرب حمدان صوب الطاوله اللي قاعده عليها فطوم.. نورة: وين بتسير؟ ايلس بتفاول قربنا نخلص... حمدان: ربيعي يتريووني في العين مول...بس خلولي لاني برد بعدين بشل عنود.. نورة: بتسيرون السينما..؟ حمدان: ليش العين مول مافيها غير سينما..؟؟ سكتت عنه نوره والتفت صوب فطوم... اللي بطلت عيونها يوم شافته يحول اهتمامه لها...مد ايده وخذ كوب العصير عنها..استغربن من هالحركه....واطالع فيه حمدان وعقد حياته.. حمدان: فطيم...!!!..تشربين ثلج وانتي مريضه...؟؟؟ ترددت فطيم .... فطيم: ....عااادي... حمدان: جب يالله.... ( وسار المغسل وجب العصير بالثلج اللي فيه..وحط الكوب في المغسل)... يوم بتشربين شربي جاهي.والا اي شي حار..انتي مريضه بعدج لا تتحسبين الحمى خازت يعني صحيتي....تراها بترد لج نكس.. بربشت فطوم بعيونها مستغربه..ونوره سكتت وكملت حلاوتها... فطوم: ان شاء الله عمي... حمدان: انا مب عمج... فطوم: هههههه عيل شو...؟؟ حمدان: واحد يحاتي صحتج....!! التفتت نوره لحمدان مبتسمه ومندهشه..... وفطوم نزلت عيونها وهي محمره من الاحراج... حمدان انتبه لنفسه وحس انه طلع شي المفروض مايطلع... حمدان: يالله باي.. طلع من المطبخ وركب سيارته وهو يسب نفسه انه بين ولو شوي من مشاعره...المفروض ما يبين لها....مب وقته....لازم احين يوم يرد يشوفها مره ثانيه ينسيها انه قال هالجمله وبين هالاهتمام.... _________________ Quote Link to comment Share on other sites More sharing options...
عـــــيــ المها ــــون Posted يناير 20, 2006 Author Report Share Posted يناير 20, 2006 الجزء التاسع والثلاثون يوم الاثنين الظهر..في امريكا دخل خليفه قاعة المحاظرة من وقت شوي...وكانت القاعه فاظيه الا من كم طالب اخر القاعه قاعدين... حط كتبه ويلس في الكرسي المعتاد... وبعد شوي دخلت هند وهي حاطه كتبها تحت ايدها ومتسانده على العكازين وتحاول تمشي..كانت مشغوله وايد بنفسها وتخاف انها اطيح...عشان جي ما انتبهت لاي حد ثاني....لكنها بعد جهد وصلت قبل الكرسي اللي تقعد عليه هي.... وخليفه يراقب بفضول بطرف عينه... والظاهر انه من عينه طاحن كتب المسكينه على الارض وكانت بطيح هي بعد من الصدمه... قام خليفه بدون حاسيه وشل كتبها من الارض وجمعهم...ووقف...وحطهم لها على الطاوله وهو نفسه منحرج..ويشوفها هي بعد اطالعه وهي منحرجه ومتفشله.. هند: مشكور... خليفه: العفوو...سلامات هند...ماتشوفين شر... رفعت نظرها البنت مستغربه من هالتنازل من قبل خليفه...اللي كان نفسه مب عارف شو قاعد يسوي...!!.. هند: الله يسلمك من كل شر.... خليفه: آآ... سمعتهم يقولون انج سويتي حادث..!!! هزت هند راسها بايجاب وعيونها بالارض... خليف: كيف..؟؟ هند: همم...كنت واقفه اتريا الباص... لف علينا ياهل كان يسوق سياره على الرصيف..ودعمني انا ووحده عيوز.. الحرمه ماتت ...وانا الله سلمني... عقد خليفه حياته متظايق....وهز راسه باسف... خليفه: الحوادث... من ثلاث شهور بس فقدت اعز ربعي..والسبه حادث... رفعت هند نظرها باهتمام... هند: هذا يوم سرت فجاه الامارات..؟؟ خليفه: هي... هند: البقية فحياتك...! خليفه: الدايم ويه الله...المهم انتي ديري بالج على نفسج ..والكتب لو تشلين شنطه صغيره تعلقينها عجتفج احسن عن يطيحن عنج كل ساعه...انا مب متوفر في الخدمه على طول...!!! وابتسم.. هند: هههههههههههه...ان شاء الله..ومشكور ماقصرت... خليفه: العفوو... سار عنها لكرسيه وهو مستغرب من نفسه.... بس كان متاكد 100% انه شعوره مجرد شفقه لا غير...بس الخوف انها تفهم السالفه غلط ونبدا بالحركات من اول ويديد...واول ما دخل البروفسور وبدا محاظرته نسى كل شي ثاني.. مرت ايام شهر رمضان بسرعه على جماعتنا... طول الشهر كانت الايام تمر مثل بعض..سعيد يروح العين كل اسبوع.. ويشوف نوره ويسلم عليها.... وكانت علاقته هو مع نوره مستقره تقريبا... حصه مع رجوع علاقتها بعنود مثل قبل تحسنت حالتها وااايد..وكاانت تبين مرتاحه اكثر عن قبل..كانه حمل كبير من الكلام اختفى...لكن هذا ماينسيها المرحوم...وامه المسكينه اللي دايما كان على اتصال معاها..حتى انها زارتهم مرتين في هالشهر الكريم... حصه قدرت تختم القرآن كامل على روح سيف... يوميا تشوف صورته وتتامله ..والهدايا اللي يابها لها..والوروود وكل شي...وكانت تحس بالم اقل...لكن شو بتسوي..هذا القدر وما كتب.... حمدان قام يتعيوف واايد بفطوم..ودومه يشتربها... ويتعمد انه يوم يكون قاعد وهي تدخل وتيلس وياهم يقوم من مكانه ويطلع...كانه مايبا يقعد عندها... وكان يستمتع يوم يشوف التردد فعيونها... والحيره... والمسكينه قامت تحس على دمها ويوم تشوفه يالس مكان ماتروحلهم...وتقعد بروحها.. صح حمدان كان يمووت فيها بشكل مخوفنه... لكنه مب واثق بان الاعتراف بالمشاعر هو حل مناسب.... بس يوم درى ان فطيم قبل العيد بيومين بتروح الشارجه وبتم هناك اسبوع...تخبل... هالفتره كلها..؟؟؟؟..وااايد...وراحت فطيم الشارجه مع اخوها قبل مايسمحله الوقت انه يروح ويشوفها ويسلم عليها ...وهذا اللي خلاه مظايق ومب على عوايده طول اليومين اللي سبقن العيد... صباح العيد نشت نوره الساعه خمس الصبح..كعادتها في كل عيد عشان تعاون امها على التجهيزات والترتيب... امس كانت راقده متاخر بعد هي وحصه لانهن كانن يرتبن البيت وميلس الرياييل... نزلت نورة المطبخ وحصلت امها مع البشاكير يسوون الفواله ويجهزون سلال الفواكه وغيره...وخذولهم من الوقت بهالشغل ساعه ونص... سارت نورة فوق لغرفتها تسبحت وصلت صلاة العيد وغيرت ثيابها وتعدلت وتكشخت ..عقبها سارت توعي حصه اللي عندها صداع من امس.... ونزلت تحت... تسلم على ابوها واخوانها اللي كلهم متيمعين في الصاله مع ام خالد... نورة: السسسسسسسسسسلام علييييييكم.... يت وايهت ابوها وحبته على راسه.... بو خالد: مباااااركن عييييييييدج يانوره... نورة: عساااك من العايدين والسالمين يابووويه... وسلمت على خالد وناصر وعيالهم وحريمهم... ويوم نزلت حصه نفس الشي سلمت عليهم وبعدها بساعه ساروا الميلس يستقبلون اهلهم وربعهم اللي يايين يسلمون عليهم سلام العيد... طبعا قوم بو سلطان وعياله اول الناس...ماعدا عنود وامها تموا في البيت فظيحه يخلونه فاظي... المهم مر الوقت في هاليوم ببطء شوي...يوم وصلت الساعه 11...ام خالد كانت طلعت تسلم على الاهل والمعارف....كانت نوره وحصه يالسات في الصاله مجابلات ويدققن تيلفونات لربعهن واهلهن وطبعا بما في ذلك هل الشارجه ويسلمون عليهم... سمعن صوت سياره ..وطبعا نوره بفظوولها طارت للدريشه تشوف منو ياي...وشافت الرنج السودا... وحمدان نازل منها ولاول مره في التاريخ كاشخ بسفره وعقال... ولابس نظاره.. نورة: ههههههههههههههههههههههههههههههههههههههاي... اطالعتها حصه باستغراب... حصه: شبلاج تظحكين..؟؟ نورة: هههههههههههه بسسسسسسرعه قبل لا يدش البيت....تعالي شوفي.. يتها حصه اطالع حمدان اللي اشتاقت لشووووفته من زمان ماشافته وابتسمت.... حصه: حرام عليج دومج تظحكين عليه...شو بلاه والله يجنن...!! نورة: ههههههههههه قسم بالله تحفه .... حصه: انا بدش..سلمي عليه وباركيله.... نورة: انزين.... طلعت حصه من الصاله ودخلت حجرة فطيم...ودخل حمدان البيت وهو يعدل السفره... حمدان: احم احممممممممممم هووووووود ياهل البيت.... نورة: اقرب حمدان.... دخل حمدان الصاله وعق نظارته.. حمدان: السسسسسسسسسلام عليج بنت عمي... نورة: وعليكم السلاااااااام ولد العم... حمدان: مباااااركن عييييييييدج... نورة: عساك من العايدين والسااالمييييين...شحالك؟ حمدان: بخيير الحمد لله علومكم..؟؟ وين امج؟ بسلم عليها... نورة: طلعت... حمدان: كل عادها ماشاء الله طلعت...!! نورة: هي تعرفها عاد انته عيوزنا... تسلم عليك حصه وتقولك مباركن عيدك... حمدان: ياحليلها حصيص والله...ردي السلام عليها.... وشل حلاوه باتشي من السله ويلس... حمدان: احححححم...بروحج هني..؟؟ نورة: هممممممممممم هي...ليش..؟؟ حمدان: اباج فسالفه... نورة: خير...؟ حط الحلاوه فحلجه وهو يفكر كيف يبدا.... حمدان: رقمها لو سمحتي... بطلت نوره عيونها....وسكتت... حمدان: لا اطالعيني جي... شفت عندها تيلفون...ابا رقمها.. نورة: ااحم..منو هي... حمدان: فطيم... نورة: آسفه... رصص حمدان عيونه معصب.... نورة: حمدان انته ينيت.؟؟؟ شو تبابه..؟؟ حمدان: بباركلها بالعيد... نورة: باركلها يوم بترد... حمدان: مب حلو جي...ابا الحين اطرش لها مسج... نورة: اسفه جدا...مابعطيك اياه... حمدان: نوروه.... نورة: ماشي نوروه اسفه..شو تبا تسوي للبنت مشاكل...؟؟؟ حمدان: جذي يعني..؟؟ نورة: هي جذي...وازعل جان تبا تزعل..ماقدر اعطيك الرقم هذا امانه ...سبحان الله تصير مشاكل والا سعيد يشوف رقمك في تيلفون اختها بتستوي علوووووم..وكله بكون انا السبب... تململ حمدان في قعدته...يعرف ان كلام نوره صح ...بس لازم يقولها شي لااازم... حمدان: نوروه..والله انا مب هامني الرقم... انا عندي كم كلمه ابا اقولهن لفطيم باي طريقه... نورة: والله من عقب الطريقه الزفته اللي كنت تعامل البنت بها ماظنيتك تهتم زود يعني... حمدان: حرام عليج لا تظلميني ...كل شي كان تمثيل ومتعمد اعاملها جي... نورة: ليش ان شاء الله.؟ حمدان: بس..عشان ماتحس اني اهتم بها....وانتي بعد لا ادخلين هالفكره فبالها... نورة: اجذب يعني.. حمدان: لا اجذبين...بس لا تطريني جدامها بعد.. نورة: انا اول مره فحياتي اشوف واحد يحب وحده لهالدرجه ويبا يبين لها عكس شعوره..!!! هذا بدال ما تتقرب منها....!! حمدان: انتي مابتفهميني..ومايخصج في هالسالفه ...المهم احين شو اسوي...؟ نورة: لازم يوصل هالكلام اللي تبغي تقوله يعني..؟؟ حمدان: هي لازم... نورة: خلاص اكتبلي اياه فورقه وانا بطرشه من تيلفون امايه... حمدان: ياسلااااااااام وانتي بتشوفين الكلام اللي ابا اقوله..!!!. نورة: بعد قصوورك ادس عليه...مافيها شي تراني ادري بكل شي... حمدان: همممممممممم..... سيري انزين هاتي ورقه وقلم... ظحكت نوره وسارت تيب له دفتر وقلم...كتب لها كم كلمه وعطاها الدفتر...وكفخها به بعد من ظيجته ..وطلع عنها وسار يكمل سلاماته .... اول ماطلع حمدان من هني رن التيلفون من هني...ربعت نوره للتيلفون وطلع مكالمه خارجيه.. نورة: آآلووو.. عبدالله: هلاااااااااااا نورووووه السلام عليج.. نورة: هلا والله باخوووووووويه مباركن عييييييييدك.... عبدالله: عساج من العاايدين والسااالميييين...شخباركم ؟ نورة: الحمد لله شحالك انته...؟ شافت نوره حصه داخله الصاله واشرت لها عشان تي تكلم عبدالله... في نفس الوقت عبدالله قال لنوره.. عبدالله: بخير..اندوج خليفه يبا يسلم عليج... بس نوره ماسمعت كانت مشغوله بحصه وعطتها السماعه قبل ماتسمع رمسه عبدالله... وهو مناك عطى التيلفون لخليفه... حصه: آآلووو.... بطل خليفه عيونه واطالع فويه عبدالله مستغرب....معقووله يتراواله...!!! ..شو هالمقلب..؟؟ معقوله صوت نوره يشبه صوت اختها لهالدرجه..؟؟ تم ساكت.. وقلبه يدق بعنف... حصه: آآآلوووو....!!! برطمت حصه...ماحصل التيلفون يخترب الا على حظها يوم بترمس اخوها..؟؟؟ خليفه: آلو... رفعت حصه عيونها لنوره اللي قاعده على كرسي اطالع في دفتر وتبتسم....حصه ماصدقت اذنيها...وبصمت بالعشر بان هالصوت مب صوت عبدالله.... خليفه: نووره..؟! غمضت حصه عيونها على ذكريات وايده...خليفه...!!...اكلمه والا لا ياربي...؟!... حصه: هااا...هلا...لا انا ..حصه... يلس خليفه عالشبريه وريوله مب شالتنه... حصه..؟!...كيف..؟ عبدالله كان يكلم نوره...!!!..يالله ياحصه....!!..اخر مره سمعت صوتها كان يوم باركت لها وسلمت عليها قبل ما اسافر من خمس او ست شهور... رفع عينه لعبدالله الي كان طالع للمرر يسلم على كم واحد... خليفه:آآآآآ ...هلا...هلا والله..احم...شحالج.؟ حصه: .......بــ...بــخير ... خليفه: مباركن عيدج بنت عمي.... قال بنت عمي عشان ماينتبه له عبدالله انه ماقاعد يكلم نوره....مع انه وده ومشتاق يلفظ اسمها....حصــــه...!!... حصة: عساك من العايدين والسالمين خليفه... نقزت نوره من مكانها يوم سمعت اسم خليفه..واستغربت كيف نط على التيلفون..؟؟؟ وفرت الدفتر وهي اطالع حصه اللي متمسكه بقو بسماعة التيلفون واطالع نوره بتوتر... خليفه: ...شو بلاج.؟ حصه: آآآآ... ماشي..اندوك كلم نوره... وفرت السماعه على نوره وطلعت من الصاله وركبت فوق لحجرتها...وسكرت الباب وراها ...صار تنفسها سريع من تذكرت خليفه...يلست على شبريتها ومدت اييدها لتحت المخده..وطلعت صورة المرحوم وضمتها لصدرها...وهي تهمس.. حصه: محد غيرك فقلبي....محد.... ونزلت دموعها وهي تضم الصوره اكثر واكثر...دخلت عليها نوره بعد فتره وهي مستغربه تصرفها...وشافت حالتها...انقبظ قلبها عليها...يت عدالها ولوت عليها ....وقعدت تمسح على شعرها وهي ماتعرف شو تقولها...اكيد اشتاقت للمرحوم.. باركت للكل بالعيد ماعداه....لو كان موجود بيكون اول شخص تبارك له بهاليوم.... هدت حصه ومشت دموعها....ورفعت راسها عن حظن اختها ورجعت صورة سيف تحت المخده... نورة: شو بلاج حصه.؟؟؟ ليش ركظتي جي فجاه... هزت حصه راسها... حصه: ماشي... نورة: فيج شي....شو قالج خليفه....؟ رفعت حصه نظرها لاختها... حصه: خليفه ماقال شي.... ذكرى خليفه هي السبب.... نورة: كيف يعني..؟؟ حصه: ماريد ارمس بالموضوع... نورة: افااا ..انا اختج... حصه: نوره.... اناكبرت وانا مقتنعه بانه خليفه بياخذني انا لا محاله.... ماكنت احبه...ولا هو يحبني...بس مجرد قناعه... وتصور مسبق..عشان جي حصلت صعوبه باني اتقبل سيف الله يرحمه... بس يوم رمسته اليوم..!!. .ماعرف...تذكرته ..وتذكرت سيف...بس...ماعليج مني انا قاعده اخربط... بس نوره فهمت عليها....ابتسمت وسكتت...حصه قاعده تواجه ماضي...وحب جديم..صح تقول ماكانت تحبه... بس هي تقول هالشي لانها ما كانت تدري بشعورها...وكانت ترفض انها تورط نفسها بمشاعرها قبل ماتعرس....وتوفر حبها على قولتها لبعد العرس لريلها وبس.... مثل ماصار مع سيف الله يرحمه... ياترى شو بتسوي حصه يوم بيرجع خليفه من السفر...؟؟؟؟ الظهر ويوم رجعت ام خالد من جولتها...نزلت نوره عند امها وخذت موبايلها...وراحت للصاله وكتبت المسج اللي موصنها حمدان عليها....وكانت تقول... " يافرحتي يا نور لبلاد.....يا انس ممزوج بتغاريد.. يعل الفرح فعيونج اعياد.....عساج من عوادة العيد..." وكتبت تحت ان المسج" مكتوبه بايد نوره مرسله من طرف شخص غلس"... عاد كيفها فطوم تفهم اللي تبغيه منها... فطوم اول ماشافت المسج تخبلت عالابيات...بس يوم فكرت بالكلام اللي مكتوب تحت اعتفس ويهها... ماعندهم شخص غلس غير حمدانووووه الطويل....شو معناة هالكلام..؟؟؟ قامت واتصلت على البيت ...ردت عليها نوره فطوم: نوروووه...؟؟؟ شو هذا..؟؟ نورة: هههههههههههه شو..؟؟ فطوم: فسري المسج الحلوه هذي من عند منو بالضبط وليش وكيف ؟ نورة: والله يالغاليه هذي من ولد العم... روميوو....ياني هني واحتشر عليه الا يوصل لج هالمسج... اون بباركلها بالعيد...قتله باركلها عقب ماتي..قال لا مب حلووو...واصر عليه اني اطرشها لج.. يتبع _______ حست فطوم ان ويهها احترق...كيف حمدان يناقش موضوعها مع نوره...آخ يالفظيحه... فطوم: نورووه..!!...انتي قريتي المسج..؟؟ شو هذا يافرحتي وانا اون نور لبلاد ودنيااا...شو هالغزل عيني عينك ماحيده تطلع هالسوالف من ولد عمج الدفش...ياويلج ان كان مقلب.... نورة: ههههههههه والله انه مب مقلب...وان هالرمسه صدق... وترا ماعليج من دفاشه حمدان وياج عاد اونه هذا تغطيه على شعوووره... فطوم: ماالت عليه ويا شعور جان هذي تغطية...!! نورة: حرام عليج... فطوم كانت من الخاطر منقهره من تصرفات حمدان البايخه في الفتره الاخيره... فطوم: والله صدق...طايحبي يفشلني ويشتربي اخر شي يطرشلي هالمسج...!!!!!... نورة: شدراني بتفكير حمدان المختلف....!!... قررت فطوم اطنش السالفه وتسكت..تخاف حد يخطف عدال غرفتها ويسمعها ترمس عن حمدان...مافيهاعالمشاكل.. فطوم: هممممممم... المهم شخباركم.؟ شو العيد عندكم..؟؟ نورة: شو بعد..؟ متجابلين انا وحصه..حريم اخواني كل وحده سارت عند اهلها...واخواني محد طالعين وابويه وامي رقدوا.....جان ما اقوم انطب وارقد انا بعد... فطوم: مب زين تخلون البيت فاظي.. نورة: ياسلام عليهم عيل بقعد حارسه حقهم انا....ما ارتاح يعني...من اصبحت وانا في المطبخ والله... فطوم: يالعيووز شقايل اتقحطن...سيري سيري رقدي انزين... نورة: انزين..شو اقول حق حمدان.. فطوم: قووليييله... فطوم ماقالت شي.... خليه يحس شوي بالحقران... نورة: مسكييييييين حاله...حتى ما ابارك له..؟؟؟ فطوم: ولا تباركيله...خليه يتادب...متسلط عليه... ونافخ عمره مادري عشوووو..؟؟؟!!! نورة: ههههههههههه انزين خلاص ..برايج عيل.. فطوم: تمام...مع السلامه.. سكرت فطيم عن نوره وهي تظحك... وطبعا خزنت المسج وماحذفتها...فيوم من الايام بتذكره بهالمسج...فطوم غصبن عنها بدت تتعلق بحمدان..وكانت تظايق وايد من تصرفاته الاخيره واقتنعت انه كان يلعب بس...ولين الحين شاكه بهالشي...بس المسج وايد رقيقه...معقووله يلعب ويورط بنت عمه وياه..؟؟؟؟....الله اعلم كل شي يطلع من تحت راسه ...والحمد لله اني ماوصلت لدرجه الحب يعني.... ثالث ايام العيد راحت عنود لبيت عمها ووداها اخوها سلطان..لانه كان متواعد مع ناصر نزلها ودخل الميلس... دخلت عنود وحصلت عمتها يالسه مع حريم عيالها...سلمت عليها ويلست وياهم شوي ويابولها العصير والحلاوه.. يوم سالتهم عن البنات قالولها انهن فوق فحجرهن..وكان الوقت عصر...استسمحت منهم عنود وركبت فوق ودقت الباب على حصه... حصه: مفتووووووووح... دخلت عنود وشافت حصه يالسه على كرسي التواليت... حاطه نص شعرها على جتفها جدام وتفجج فيه وتسحي...هذي هي حصه..نقطة ظعفها شعرها ...دومها مبتلشه فيه... عنود: السسسسسسسسلام عليييج... حصه: هلااااا والله وغلااااا.. هلا بعنوووود.. سلمت على بعض ويلست حصه مكانها وعنود يلست مجابلتنها على الشبريه.. عنود: شخبارج حصيص...؟ حصه: بخيييييير علومج انتي..؟؟ عنوود: منييحا الغاليه.. حصه: منو يايبنج؟ عنود: سلطان اخويه...انتي دومج مبتلشه بهالشعر..؟؟ لميييه برايه... حصه: تبينه يتقطع عليه؟؟... خليني افججه وعقب بعقصه وبرفعه... عنود: عيل فطوم ماردت؟؟.. حصه: لا عند اهلها...بعدها يومين...بالخميس يمكن ترد...والا الجمعه .. عنود: هيي...حليلها...اقول حصيص...كم باقلج عن تخلص العده..؟؟ نزلت حصه عيونها... حصه: شهر... عنود: يعني يوم بيخلص الكورس...!!.. حصه: هي بالضبط...ليش؟ عنود: عشان ياعمري اشلج وياي دبي... حصه: هههههههههههههه خبله... عنود: والله صدق.. حصه: ومنو اللي بيخليني..؟؟؟ عنود: مالي خص...انا مب سايره ارووحي ويا امي...لازم تين وياي... حصه: خييير لين عقب شهر..متى قالج عبدالله بيرجعون..؟؟ عنود: بعدهم شهرين.... حصه: اهاااااا...ماشي وقت لازم اجهزين نفسج...عبدالله مابيصبر متحلف انه اول مايرد البلاد بيعرس... عنود: ههههههههههههههه...برااااااايه ...لو ايي البيت ويقولي لبسي عباتج ويالله...مابقول لا... حصه: هههههههه انتي بعد عنز.... شهقت عنود.. عنود: قصدج يعني اخوج تيس..؟؟؟؟ ماعليه جان ماخبرته... حصه: عنلاااتج كيف تجلبين الرمسات.... عنود: ههههههه..حصوووه...شاغل بالي فستان العرس....!!..كيف اسويه..؟؟ افصل والا اأجر..؟؟ حصه: هممممم.. لا طبعي اجري...بس دوري فستان يديد ومب ملبوس... عنود: اكيييد هالشي.... بس ماريده ابيض احين كله يدخلون الوان فيه... بس اباه ناعم وفي نفس الوقت كاااشخ... حصه: بتحصلين فساتين حلوه... فبوظبي او دبي.. مشاغل عندهم بالهبل... عنود: ياختي احس نفسي ماجهزت شي موليه...صح الثياب وطرشتهن يفصلونهن وافتكيت من سالفتهن..بس باقي وايد اشياء... حصه: كتبي ورقه انزين ..وكل ماتخلصين شغله شطبي عليها... عنود: والله فكره.... وانتي اختي حبيبتي بتساعديني... حصه: من عيوووني... تحمسن للسالفه...سارت عنود قفلت الباب وعقت عباتها وشيلتها وانسدحت عالشبريه... وحصه فرت شعرها ورا ظهرها ويابت دفتر وقلم وانسدحت عدال عنوود..تذكرن ايام قبل دايما يسون هالحركه... حصه: اوكي كتبي...لحظه انتي شو خلصتي لين الحين...؟؟ عنود: همممممممم...شريت قطع...وفصلت جلاليب ومغربي وثلاث فساتين خفيفه... شريت الذهب والعقود وهالسوالف... بس .. وبرطمت.. حصه: ويا ويهج ماسويتي شي... عنود: ترا انا عشان جي مبتلشه... حصه: انزين كتبي... مكياجات...عطورات...دخون وهالسوالف....همممم...ملابس داخليه...قمصان نوم...آآآ...نعلان... وووووووو...شنط ايد لا تنسينهن... و كتبي بعد اكسسوارات وشباصات وهالامور الخفيفه.. وووو... عنود: خيبه شو بعد بتحطيلي...؟!.. حصه: صبري انتي يمكن ناسين شي....تعالي صح سوالف الصالون....انتي متى بتعابلين بعمرج..؟؟ عنود: بسم الله عليه... شعري وسااااايح ومرتب...بشرتي بيظا وصافيه الحمد لله...جسمي زين... شو بعد تبيني اسوي بعمري..؟؟ حصه: لازم تسوين حمامات زيت وتنظيف بشره ..وحمام مغربي وغيره وغيره من السوالف الحريمية.... عنود: يووووووه علينا هذا عقب قراب العرس...وشو بعد... حصه: كفايه عليج جذي...خلصي هذيلا ونحن بنسال خواتنا شو سون فعراساتهن... عنود: حبيبتي... انا باخذ اجازه من عند عموووه...بقولها انا ماصبر عن حصه وما عرف اشتري شي بلاها..بخليج المرافقه الخاصه هههههههه ... حصه: ههههههه يالله على ايدج انا ماعندي مانع.... عنود: تبينا ننزل تحت نقعد عندهم...؟؟ حصه: مافججت شعري بعدني... عنود: لميييييييييه عقب بتفججينه... حصه: امري لله.... نشت حصه عن الشبريه ولمت شعرها اي كلام وطلعت شيلتين بيظ وحده لها والثانيه لعنود...نزلن تحت وقعدوا مع باقي الحريم.... عنود تمت عندهم لين في الليل...سلطان نقع فيها خيانه خلاها وسار عنها مع ناصر... واتصلت بحمدان عشان اييبها ... حمدان: انتي شو مسيرنج...؟؟؟؟ عنود: عندي شغل ويا حصه...شوفيها..؟؟ حمدان: يابنتي عيب عليج كل يوم وطابه عليهم البيت تقولون بتموت وتسكن فيه... عنود: جب جب...من متى انا احاسب على هالسوالف هذا بيت عمي... ومتى ما ابغي ايي....المهم انته بتيني؟ حمدان: مب ياااااااااايينج...باتي عندهم.. عنود:والله..؟؟؟ خلاص خبر امايه... حمدان: عنبوو ذاك الخشم لج....ماتصدق.. عنود: هههههههههه شو اسويبك..مب طايع تيبني... حمدان: والله اني تعبااااااان منكرف كراااف في الشركه وابا ارقد... عنود: الله يعطيك العافيه...يالله عاااد تعال بسرعه عشان ترد بسرعه البيت وترقد... حمدان: ياهل انا تقصين عليه...!!!.. عنود: انته اطولها وهي قصييره...بلاك منقهر ... قمت ما اطيق حد يرمسك مووليه الا وشبيت فويهه...!!! حمدان: يووه سوت لي سالفه بعد... خلاص احين بيييج..باي.. وسكر فويهها.... اطالعت عنود فويه نوره وحصه... عنود: هذا حد سارق عنه شي..؟؟؟ شو مشكلته...؟؟ ظحكت نوره... وحصه رفعت كتوفها كانها تقول مادري... عنود: احيين بيينا مطير بسيارته..وبيشل الدنيا...انا بقوم البس عباتي فوق... نشت عنود وسارت حصه وياها...ماتبا تفوت شوفة حمدان بهالمزاج عشان تتمصخر عليه... من سالها ذاك اليوم عن ردة فعل فطوم وقالت له انها ماقالت شي ولا تاثرت وهو مزاجه متعكر... وصدق من خاطره استوى دفش هالمره... ومحد عارف السبب غير نوره وفطيم اللي يظحكن عليه يوميا في التلفون...يوم وصل حمدان مانزل من السياره وشل الدنيا بالهرنات...نقعت نوره من الظحك... حمدان يوصل لين بيت عمه ولا ينزل...؟؟؟ لا اكيد السالفه جايده عنده ومب طايق حد...طلعت له برا ووصلت لين سيارته جان ينزل لها الجامه... وهو زام بووزه ومظايق.. بس طباعه مايودرها..اطالعها بتكبر وقالها.. حمدان:هااات واحد شاورما..وكوكتيل بثلج..وبطاطس..يالله جلدي.. نورة: خسك الله يالسبال... دامك تطنز عيل مب قايلتلك اللي كنت بقوله لك.. حمدان: درر درر.... الارمسج عاد هي من زينها..!!! نورة: كيييييييفك... وصدت عنه تباتروح... حمدان: تعالي تعالي.....(ورجعت له نورة)....شو عندج...؟ قامت نوره تالف... نورة: عرب عيونهم عسلية يسلمووون عليك...!!.. فز حمدان من كرسيه ... هو صح فطوم لا سلمت عليه ولا شي..بس نوره كسر خاطرهاحمدان بحالته النحيسه هذي..وقررت تخفف عنه شوي...يالله جذبه بيظا... حمدان: حلفي..؟؟ منووو..؟؟ نورة: الشيخه فاطمه اخت الشيخ سعيد بن هلال... حمدان: شو قالت لج..؟؟ وكيف يابت طاريه..؟؟؟ نورة: يوهووووووووو علينا...مب لازم هالتفاصيل.. حمدان: لااااازم.... في هاللحظه يت عنوود ... عنود: يالله نسير... فمان الله نوره.. نورة: مع السلامه عنوووده... وحمدان عيونه متعلقه بويه نوره يبا يطلع اي شي منها....لكن يوم شاف استحاله اكمال النقاش سكت...بعدين بيسوي وياها تحقيق.... _________________ Quote Link to comment Share on other sites More sharing options...
اداري _ العهود Posted يناير 20, 2006 Report Share Posted يناير 20, 2006 الله يعطيج العافية Quote Link to comment Share on other sites More sharing options...
بحرينيه^مزيونة Posted يناير 20, 2006 Report Share Posted يناير 20, 2006 تسلمين حبيبتي ،، بانتظار التكمله ،، Quote Link to comment Share on other sites More sharing options...
عـــــيــ المها ــــون Posted يناير 22, 2006 Author Report Share Posted يناير 22, 2006 مرحبا مشكووووورة بحرينيه^مزيونة و اداري _ العهود على الد الجزء الاربعين الجمعه في الطريج للعين.. سعيد كان متحمس يبا يوصل بسرعه... كان عنده التصاميم النهائية لتصميم بيتهم ويبا يراويه نوره وياخذ رايها فيه..اكيد بيعيبها..التفت صوب فطوم وقال.. سعيد: انتي هذا اخر شهر دراسه..؟؟ فطوم: هي.. سعيد: وعقب اجازه... فطوم: هي اجازه شتويه شهر بس...وبعدين يبدا الكورس الثاني.. سعيد: انا بسافر بعد شهر.. فطوم: وين بتروووووح..؟؟ سعيد: بسافر انا وربعي...عندي اجازه وبخذها.... فطوم: نوره تدري..؟؟ سعيد: لا...توني اتذكرت بس... فطوم: خبرها عاد لا تسويلك سالفه ماخبرتني وماخبرتني... سعيد: هههههههه بقولها اليوم...هزرج بيعيبها التصميم..؟؟ فطوم: انا شفته وايد حلو ومرتب وبسيط ويناسبكم.. سعيد وقف الاستراحه خذلي بيبسي.. سعيد: آآسف..ماااااااااااشي بيبسي.... عندج دبة ماي شربي منها يالله... كملوا اهل الشارجه طريجهم صوب العين ...وطول الدرب سوالف وظرايب... في العين... بيت بو سلطان كلهم كانوامعزومين عالغدا في ذاك اليوم...لكنهم بدوا ينسحبون بعد صلاة العصر..ماعدا عنود وحمدان طبعا... الحبيب من درى ان فطيم بتي هالوقت ما تزحزح...حتى انه طلب فراش وفرشووله برااا عالحشيش ويلس عليه بس عشان ما يدش البيت... عاد اونه الجو حلووو هالوقت .... وشوي شوي اهل البيت عيبتهم هالسالفه...فيت ام خالد مع شيبتها ويابوا القهوه والشاي والتمر ويلسوا هم بعد عند حمدان.... نوره كان خاطرها تقعد وياهم هي بعد....بس لو شافها سعيد بيلعن خيرها... وعنود تمت مع حصه لانه حصه ماتروم تظهر جدام اخوها...عشان جي تمن كلهن يالسات داخل الصالة.. اول مادخلت الاكس فايف فز قلب حمدان ووصل للبلعوم....بس تظاهر بالبروود عشان عمه وحرمته مايلاحظون عليه شي.. وهو من هناك كل السوالف في خاطره ......نشوا كلهم بيسلمون على سعيد وفطيم...اللي ترددت بالنزول يوم شافت حمدان يالس..لكنها قررت تنزل وتخلي غشوتها مثل ما هي...سلمت على عمتها وعلى ريل عمتها من بعيد... ودخلت داخل قافطه من حمدان...من شافته تذكرت كل التطنيزات والظحك اللي ظحكته عليه في التيلفون...لكنها اكتشفت انه مايهون عليها...حليله...متفيزر يتريا...والا ما كان يتريانا؟؟؟...امبونه هو دوم فبيت عمه...!!..دخلت الصاله وعقت غشوتها... فطيم: انا ييييييييييييييييييت....السسسسسسسلام عليكن يابنياااات... ظحكن وردن السلام عليها وتوايهن وخلصن.... فطوم: تصدقون تولهت عليكم... حصه: والله حتى نحن افتقدناج في البيت....خلاص تعودنا عليج.. فطوم: فديييييتج والله ياحصيص...هاا عنووود شو اخبار التجهيزات..؟؟ عنود: آآآآآآخ لاتذكريني دخيلج...من اذكر التجهيزات والعرس بطني يعورني....وايد باقلي.. فطوم: وشو تترييين..؟؟ عنود: انا ما اشتري شي بلا حصه..لازم تكون هي وياي... فطوم: ياعيني عالحب....هههههههه... يابوا لفطيم حلويات وعصير ...بس سارت حجرتها اول عشان تبدل ثيابها وتقعد براحه.. بعدها دخلت ام خالد وقعدت عند بناتها.... نورة: وين ابوويه عيل.؟ ام خالد: ابوج سار العزبه..والشباب ساروا وياه... نورة: اهاااااااا... حصه: والله تولهت على العزبه..... ام خالد: بتسيرن ان شاء الله في الاجازه.... ماحبت ام خالد تذكر العدّه ..لانها تعرف ان العده تخلص اول ماتبدا اجازه قوم نوره... اول ما اذن المغرب في العزبه..صلوا قوم سعيد وردوا البيت... حمدان: احين انته شو تبا في البيت..؟؟ بنسير نحوط شوي... سعيد:لا لا.... ودني البيت.. ابا اراوي نوره شي... حمدان: شو هو الشي...؟؟؟ سعيد: شو خصك..؟؟؟ حمدان: يالله عاد... سعيد: والله يايب تصاميم بيتنا المستقبلي اباها تشوفهن اذاعيبنها بقولهم يبدون بالبنا... حمدان: لاااااااااا والله...؟؟؟؟ ثرك بتبني لك بيت..!!. ماشاء الله عليك تصدق غرت ...!!! سعيد: ههههههههه شحقه تغار...عرس وعقب ابني لك بيت... بعدين حلو الواحد يعتمد على نفسه... حمدان: هي والله....تدري اني بديت اداوم في الشركه مسائي؟ سعيد: شركه ابوك؟ حمدان: فيه غيرها..؟؟؟...بس كارفيني كراااااف... سعيد: ههههههههه احسن لك تتعود على المسؤوليه وتثقل شوي... حمدان: قصدك انا خفيف..؟ سعيد: هههههههههه الصراحه احيانا... حمدان: انزين... خفيف عالقلب بعد....مب ثقيل مثل بعض الناس.. سعيد: منو قصدك.؟؟ حمدان: ناااااااااس...الله يستر عليهم... سعيد: سوق سوق انته ..سوق... اول ماوصل حمدان البيت نزلوا..دخل حمدان الميلس وسار سعيد صوب سيارته وطلع التصاميم ...واتصل بفطيم...وقالها تسويله درب... ويوم دخل الصاله ماحصل غير عمته وفطيم هناك... ام خالد: هلا ابووويه....اقرب... سعيد: جرييييييب.... فطوم صبيلي شاهي.. ويلس عدال عمته... وحط الاوراق جدامه... ام خالد: شو هالاوراق يابويه.. سعيد: هذيلا الله يسلمج ياعموووه تصاميم البيت ...ابا اراويج اياهن انتي ونوره... ترددت العيوز بس فكرت فيها وشافت انه من حق بنتها تشوف تصاميم بيتها.... ام خالد: هيييي ماشاء الله.... فاطمه بنتي زقري نوره خليها تي... حطت فطوم الشاهي جدام سعيد وراحت تزقر نوره....وسعيد مرتاح ان العيوز ما عارضت هالشي...يوم دخلت نوره رفع نظره لها وهو مستانس...اوففف ياحلاة الاحمر عليها.... نورة: السلام عليكم... وابتسمت.... سعيد: وعليكم السلااااااااام والرحمه...شحالج نوره؟ نورة: بخير سعيد شحالج انته..؟؟ سعيد: الحمد لله...استريحي.. قعدت نوره عدال امها من الصوب الثاني وعلى ويهها علامات استفهااااااام.... ام خالد: سعيد يايب تصاميم البيت ماشاء الله ويباج تشوفينهن... استانست نوره وااااااااايد.... نورة: والله..؟؟؟ فرش سعيد الاوراق وقعد يشرح لهم المرافق الاساسيه في الفيلا الصغيره والغرف والحمامات وكل شي .... وكان تصميم البيت مناسب وضعهم وايد كعايله صغيره قابله انها تكبر..!!...ويقدر اذا اضطروا لتوسيع البيت انه يوسعه من الاطراف بكل سهوووله بدون مايخرب تصميم البيت....سعيد كان يشرح على ثلاث اوراق...ثلاث تصاميم مختلفه يعني وحده للطابق الفوقاني ووحده حق الطابق الارضي... والثالثه تصميم مع الحوش وكل شي كامل... ام خالد: ماشاء الله ياولدي...وايد زين التصميم...الله يوفق ان شاء الله.. سعيد: آآمين ان شاء الله....نوره شورايج؟؟؟ نورة: وااااااااايد حلووو...عيبني... يوم اطالع فعيونها فهم انها تعني بان حتى لو كان بيتهم هذا خنخووووش صغير بيعيبها دامه بيتها مع سعيد....!!!.. وابتسم لعيونها... سعيد: ماتبين تزيدين شي عليه..؟؟؟ نورة: هممممم.. بس انا اشوووفه انسب انك تبدل مكان المكتب بغرفة اليهال... احسن تكون غرفة اليهال عدال غرفة النوم الرئيسية....صح امايا..؟؟؟ ام خالد: هي صح... سعيد: مب مشكله....نبدلهن ..غيره..؟ نورة: همممممممم..المطبخ اباله باب خارجي بعد ...مب بس داخلي... يعني يودي على الحوش... سعيد: تصدقين انا بعد فكرت فيها هذي...ويبالج بعد غرفة للغسيل عدال المطبخ... نورة: هي صح...بعد هذي... ولازم تكون من ورا البيت مب مجابله البوابه.. سعيد: اكييييد....خلاص انا بظبط الامور ويا المهندس وبخبرج...آآه...بخبركم... ظحكت نوره على غلطة سعيد...شوي شوي بيفظح عمره وكل الناس بتدري انه يكلمها في النت...بعدها طلع سعيد وسلم على حمدان وروح الشارجه.... واتصل حمدان وهو يالس فسيارته بعنود وقالها تطلع لانه بيسير البيت ... بالباجر بعد الغدا..كانت نوره راده من الجامعه وسارت على غرفتها ورقدت...وهي تقول انها ما تبا غدا..وفطوم كانت بعدها في الجامعه....بعد الغدا قعد ناصر يشرب شاي ويقرا الجريده...يت حصه ويلست عداله... حصه: شو تسوي..؟؟ ناصر: اطالع الاسهم.. حصه: هممممممم..ناصر...بغيتك فسالفه... ناصر: خير؟ حصه: آآآ...مليت من يلسة البيت.. التفت الها ناصر وهو معقد حياته... ناصر: وين تبين تسيرين...؟؟؟ حصه: ابا اشتغل.. شافت فويه ناصر الرفض... حصه: بدال ما انا يالسه في البيت لا شغل ولا مشغله...دخييلك ناصر.. ناصر: ابوج مابيطيع حصووه ولا امج بعد... وبصراحه انا ماشوف لج حايه في الشغل...ناقصنج شي.. حصه: ناصر السالفه مب سالفة مااادة....انا ابا اشغل نفسي بشي...بدال ما انا بطاليه في البيت ما عندي شي غير التفكير والحزن... سكت عنها ناصر وهو متظايق.... بعدهاقال.. ناصر: خلصت عدتج انتي.؟؟ نزلت حصه عيونها... حصه: باقي شهر... ناصر: لين شهر خير... حصه: شهر كفاية عشان تقنع قوم ابويه... ناصر: وين بتشتغلين يابنت الناس....؟! حصه: اناخريجة ادارة....اشتغل في اي بقعه... ناصر: مب اي بقعه على قولتج تناسبنا نحن.... حصه: انزين انته شوفلي المكان المناسب ..وانا مابقول لا...المهم اشغل نفسي.. ناصر: خير ان شاء الله...وانتي تعرفين انه مب بايدي انا... اذا وافق ابوويه زين... حصه: اذا شافك انته موافق ومتشجع بيوافق ان شاء الله... سكتت عنه حصه ماتبا تضغط عليه في هالسالفه وايد..المهم انها بلغته...وان شاء الله بتحصل مرادها... في امريكا .. كانوا عبدالله وخليفه يالسين كلهم في غرفة خليفه..اللي كان قاعد على كمبيوتره يشتغل على مشرووع التخرج....وعبدالله كان يقرا كتاب...سمعوا دق على الباب...نش عبدالله وبطل الباب واستغرب... كان شاب مراهق امريكي شعره احمر ماسك باقه ورد وكيسه صغيره من اكياس الهدايا... الامريكي.: MR. Khalifa? عبدالله: yes….!!! الامريكي: This is for you..please sign here…! عطاه دفتر ووقع عليه عبدالله وروح...... دخّــل عبدالله الباقه والكيسه وحطهم على الطاوله... خليفه: شوو هذا..؟؟؟ عبدالله: تسالني انا..؟؟؟ هدية واصلتنك...!! خليفه: هههههههه هدية..؟؟...واصلتني انا..؟ عبدالله: شو عندك انته اليوم؟؟؟..يوم ميلادك وانا مادري... خليفه: مادري....كم تاريخ اليوم.؟ قاله عبدالله التاريخ...بطل خليفه عيونه... خليفه: هي والله يوم ميلادي..... نش خليفه عن كرسيه ومسك البطاقه اللي كانت داخل الكيس... " Happy Birthday….. Hind" اعتفس ويه خليفه وهو يقرا الكارد...ويلس على الشبريه وهو يتافف... خليفه: لااااااا...اوفففففففففففف ياربي...( ورفع نظرة لعبدالله) ..كله منك... عبدالله: شو مستوي..؟؟؟!!!!. خليفه: انته اللي قلت لي قولها سلامات ومادري اشووو....شوف عاد الحركات..!! يلس عبدالله عداله مستغرب... عبدالله: من هند بالله عليك..؟؟؟ اشوووف... وشل عنه البطاقه وقراها...ورد يطالع فويه خليفه... عبدالله: شدراها بيوم ميلادك..؟؟؟ بهّــت خليفه.... خليفه: هي والله....!!!..شو دراها.؟ عبدالله: خلنا نشوف الهدية.... فتحوا الكيس وحصلوا علبه مربعه داخله..يوم بطلوها حصلوا ساعه رجاليه خطيييييره...تم كل واحد يطالع الثاني مستغرب.. سكر خليفه العلبه وردها في الكيس.. وهو متظايق.. خليفه: مقوى ويهها هالبنت...ماتفهم التلميح... عبدالله: حليلها... خليفه: عبوود..جب لا اظيجبي انته بعد...حليلها اون... سكتوا فتره..كل واحد منهم يفكر....عبدالله الوضع مسلنّــه... اما خليفه كان منحرج ومظيج..ومستغرب.. خليفه: اموت واعرف من وين حصلت تاريخ ميلادي..؟؟؟ عنبوو انا ماكنت اذكر هاليوم...!!!! ولا حد من ربعي يدري... رفع عبدالله كتوفه بعدم اهتمام... عبدالله: يمكن دخلت الشبكه.... خليفه: اي شبكه..؟؟؟؟ عبدالله: فيه شبكه داخليه خاصه للجامعه.. حاطين قسم للطلاب المتوقع تخرجهم هالسنه... ومعلومات عنهم..اسماءهم ومن وين ..وتاريخ الميلاد..وتخصصاتهم..واشياء عامه... خليفه: دخلتها انته..؟؟؟ عبدالله: هي..وشفت اسامينا كلنا...نحن وربعنا اللي بيتخرجون بعد... يتبع ____ فكر خليفه شوي لين ما استوعب الوضع كله.... خليفه: الاثنين برد لها الهدية... عبدالله: افاااا...مايرد الكريم الا اللئيم... خليفه: جب انته بعد....مافيني انا على المصايب...وماريد منها هدية...ماريد منها اي شي اصلا... عبدالله: كيفك...انته حرر... شل خليفه الكيسه وحطها في الكبت مع البطاقه ..بيرجع الهدية لها..اول مايشوفها..وبيطلب منها تخليه في حاله... لانه مستحيل يهتم بها....رجع لكمبيوتره وكمل شغل في مشرووعه.. السبت في الليل... بعد ماطلع حمدان من الشركه منهد حيله...اول شي فكر فيه الشبريه... بس يوم خطرت عيون فطيم في باله طار الرقاد عنه وسار بسيارته صوبهم.. وقف سيارته في الحوش... ونزل..يوم كان توه بيدش البيت..سمع حسوس ظحك وصريخ وسوالف..بس مش من داخل البيت...هذي يايه من مكان في الحوش... وميز بين الاصوات صوت نوره... تلفت للحوش ماحصل حد... اكيد ورا البيت... ورا البيت كانت فيه منطقه خضرا وسيعه شوي يعلقون فيها ثياب الغسيل..بس حلوه حق القعده خصوصا للبنات اذا ماكانن يبن حد يشوفهن... دار حمدان على البيت لين ماوصل ورا... وظحك... فطوم ونوره مشغلات الكشافات و قاعدات يلعبن تنس ريشه... متحجبات عدل عن الدريول لا يشوفهن..ويركظن شرق وغرب وهن يظحكن...هز راسه حمدان وهو يظحك..هالثنتين بالهن مرتاااااااااااااااح ولا شي وراهن.... وقف مكانه يتابع اللعب..وهن مب منتبهات له... لين ماطاحت الريشه عن نوره . وهذا يعني فوز فطيم...صفق حمدان وهو يتجدم ويطلع من مكانه...وهالشي خلا فطيم تتيبس مكانها وتبطل عيونها منصدمه... قال حمدان وهو يثقل لساانه مثل المكسيكااان... حمدان: بررررررافوووو بررررررافوووو.. ظحكت نوره وصدت لفطيم اللي قاعده تعدل حجابها.... نورة: من متى انته هني..؟؟ حمدان: من فتره...ثرج ماتنفعين باللعب بنت عمي... هاتي هاتي... وشل المضرب والريشه عنها.... وسارت نوره تقعد عالكرسي.. وتشرب عصير لومي... حمدان: تباريني فطووم..؟؟ فطوم: لا... حمدان: زايغه... فطوم: لا طبعا... حمدان: عيل لعبي... فر الريشه في الهوا وضربها صوب فطوم.... اللي بدون حاسيه ردت الضربه....شوي شوي ونست عمرها باللعب....وحمدان يلعب ببرود اعصاب ويظحك عليها يوم تركظ....كان يتعمد يظرب الريشه بقو عشان تروح بعيد ويشوفها مبتلشه ... بس البنت عنييده...ما تنغلب...لين ماتعبت حليلها ولبست الريييشه وفرت المضرب وسارت عدال نوره ويلست.. فطوم: اوووف...تعبت... فر حمدان المضرب بعد ويا صوبهن... حمدان: يعني تعترفين بالهزيمه... صبت فطوم لعمرها كوب عصير.. فطوم: لا الشيخ....لا انغلبت ولا شي ... حمدان: بس استسلمتي...!! فطوم: تايم آوت... انا لاعبه لعبتين ورا بعض انته ياي مرتاح... صب حمدان لعمره كوب بعد.... حمدان: وين مرتااااااااح ياي منكرف في الشركه والله ... نورة: والله..؟ بديت اداوم في الشركه..؟ حمدان: هي نعم.... نورة: شقايل رايم توفق بين الدراسه والشغل..؟؟ حمدان: الدراسه الصبح والشغل المسا...شو اسوي بعد.. نورة: ليش بالي عمرك....؟ كنت مرتاح قبل... حمدان: مرتاح جسديا.. بس "ضميريا" لا... نورة: ههههههه ضميريا عاد..؟؟... حمدان: هي...مب حلوه ابويه يصرف عليه وانا شكبري... اعتمد على نفسي احسن... نورة: الله يوفقك.. حمدان: الجمييع بنت عمي.... يالله برايكن انا بسير... خلص عصير وحطه على الطاوله...المهم ارتاح باله وشاف فطيم....والحين يروم يسير يرقد برااحه... نورة: الله وياك..سلم.. حمدان: يوصل..فمان الله.. نورة + فطيم: مع السلامه... راقبته فطيم وهو يمشي ويلف من ورا البيت ويروح.... كبر فعينها الصراحه يوم سمعت انها يعتمد على نفسه... واللعبه وياه كانت فنانه الصراحه.... ___________ Quote Link to comment Share on other sites More sharing options...
بحرينيه^مزيونة Posted يناير 23, 2006 Report Share Posted يناير 23, 2006 تسلمين حبيبتي ،، ننتظر التكمله ،، Quote Link to comment Share on other sites More sharing options...
بنت ديـرتها Posted يناير 25, 2006 Report Share Posted يناير 25, 2006 السلام احيج اختي عيون المها على هذي القصة الرائعة والله يعطيج العافية والصراحة من كثر ما القصة حلوة وعاجبتني انه حفظتها عندي في الكمبيوتر وشكرج وننطر التكملة انشاالله Quote Link to comment Share on other sites More sharing options...
بحرينيه^مزيونة Posted يناير 25, 2006 Report Share Posted يناير 25, 2006 بانتظار التكمله ،، Quote Link to comment Share on other sites More sharing options...
سيهامو Posted يناير 25, 2006 Report Share Posted يناير 25, 2006 القصه حلوه بس الله يخليك لاتتأخرين ترانا ننطر على نار بليس؟؟؟؟؟؟؟؟؟؟ Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.