غريبة بين أهلي

[حفرت اسمك على قلبي]

سحر:" الووو.."

ميثة:" هلااا والله..."

سحر:" شخبارج؟"

ميثه:" انتي اللي وش أخبارج؟"

سحر وهي تتنهد:" حالي انتي عارفته."

ميثة:" هوللحين حالته خطيرة؟"

سحر:" يقول اخوي ان الليلة بطلعه من العنايه."

ميثة:" زييييين الحمدلله.."

سحر وهي تتأفف:" مستمله ومب عارفة وش اسوي، امي راحت تنام وابوي قاعد يقرأ بهالجرايد وعنودوو ماحب اقعد معاها تضيق خلقي."

ميثة:" حاااالي اسوأ، أمي مسافرة وابوي لاهي بربعه وسهراته وتعرفين ماعندي الا منووي وهذيج خليها على صووب لحالها،، تسد النفس."

سحر:" ودي أطلع وأكلم أي احد، ابي اغير جو."

ميثة:"............." ظلت ساكته وتفكر.

سحر:" شفيج سكتي؟!"

ميثة بتردد:" أ.. سحر..أدري، يمكن."

قاطعتها:" شفيج تقولين كلمات متقاطعه."

ميثة:" لاااا، بس مدري أخاف اقول لج وتعصبين."

سحر:" واذا ماقلتي بعصب اكثر."

ميثة والتردد مازال:" أ..أدري هذا مو وقته بس أنا عندي طريقة تغيرين فيها الروتين هذا."

سحر:" شلون؟"

ميثة:" عبدالعزيز عنده..."

سحر:"شنوو تراج رفعتي ضغطي."

ميثة:" عنده رفيج ويبي يتعرف على وحده."

سحروبعصبيه:" وش قاعده تقولين انتي؟"

ميثة:" لااتخافين مايبي غير ان يكلم احد بالتلفون ومجرد صداقة لاأكثر."

سحر:"لاااااا آسفة."

ميثة بدت تتشجع أكثر وتفر دماغ سحر:" مابتخسرين شي كلميه واذا ماعجبج اسلوبه تركيه عادي ماراح يقول شي."

سحر بدت تفكر بكلامها وظلت ساكته فتره، لحد ما انتبهت على سؤال ميثة:" ها وش قلتي؟"

سحربتردد:" لااا..ما اعتقد."

ميثة:" سمعيني انتي فكري، وانتظر منج رد."

سحر:" اوكي بس ما اوعدج بشي."

ميثة:" اووكي، اخليج تفكرين يومين ثلاثة."

سحر:" يالله انا بسكر حاسة اني تعبانه وابي انام."

ميثة:" حاضر ياقمر، تصبحين على خير."

سحر وأخذتها الأفكار بعيد:" وانتي من اهله."

سكرت التلفون وراحت انبطحت على سريرها، كانت قاعده تلعب بشعرها وهي تفكر بكلام ميثة." أكلمه؟ لالالا مستحيل، بس..وش فيها؟؟ ومحمد؟ هي قالت مجرد صداقة لاأكثر، يعني ماراح تتعدى حدود التلفون، لااااااااا ماااقدر،اففففففف..بس انا ماراح اخسر شي، اكلمه مرة واشوف اذا عجبني كلمته واذا لا انهي السالفة.."

كانت الأفكار تسرح براسها، سحر رغم انها ذكيه ومغروره بجمالها، الا ان غرورها هذا راح يدمرها اذا ماتغيرت.

 

^^^^^^^^^^^^^^^^^^^^^^^^

 

بعد ماقعد الصبح طلع من البيت بدون مايفطر، حمد كان رايح المستشفى يشوف محمد، وهو بالسيارة دق على أحمد لكن تلفونه كان مغلق، واتصل لسيف .

حمد:" السلام عليكم."

سيف:" هلا وعليكم السلام."

حمد:" وين انت؟"

سيف وهو قاعد يفطر:" بالبيت افطر،ليش انت وين؟"

حمد:" انا بالسيارة رايح لمحمد."

سيف:" زيييين أخلص واجيك بعد عشر دقايق."

حمد:" اووكي بس روح قعد اخوك، اتصلت على تلفونه بس مغلق."

سيف واللي شاف اخوه نازل من فوق:" مايحتاج كاهو قعد."

حمد:" اووكي اجل انطركم بالمستشفى."

سيف:" اوكي،باااي."

وبعد ماسكر التلفون سأله أحمد:" هذا حمد؟"

سيف:" ايه بسررررعه روح غير هدومك بنروح له المستشفى الحين."

أحمد:" زييييين دقايق، بس انروح بسيارتك والابسيارتي؟"

سيف:" كل واحد بسيارته يمكن أطلع بعدين."

أحمد وهو يركب الدرج:" اوكي."

 

بعد ربع ساعه بالضبط كانوا بالمستشفى..

أحمد وسيف:"السلااااام عليكم."

حمد:" وعليكم السلام، وين فيصل؟"

أحمد:" بالشركة، ابوي يقول مايصير كلنا نطلع ونخلي الشركة بدون مسؤول."

حمد:" زين ماعلينا، توه الدكتور طالع من غرفة محمد."

سيف:" وش قال لك؟"

حمد:" دخل مكتبه وقال لي اصبر شوي."

سيف:" اففففففف."

أحمد:" شفيك تتأفف؟"

سيف:" نسيت تلفوني."

أحمد:" زين مدري منو بيتصل لك."

طالعه سيف:" وانت وش عليك منو بيتصل ومنو مابيتصل."

حمد:" مو وقتكم تتهاوشون."

وبين ماهم واقفين يم مكتب الدكتور طلع من مكتبه..

الدكتور:" تفضلوا جوه."

دخلوا ثلاثتهم المكتب، كانت قلوبهم ادق بقوه كانوا خايفين من اللي راح يقوله لهم..

الدكتور:" طبعاً حالتو الصحيه بتتحسن بس في حاجه لازم تعرفوها."

حمد والخوف بدى ياكل فيه:" وش اهي؟"

الدكتور:" أ... الفحوصات اللي اجريناها تؤكد انو عندو شلل مؤقت برجلو وده طبعاً غير الكسر."

حمد ظل ساكت يطالع الدكتور وهو سرحان باللي يقوله، وسأله أحمد:" يعني دكتور ماراح يمشي؟"

الدكتور:" لأ أنا ماقولتش كدا، أنا بقصد انو محتاج وقت لحد ماتلتأم الكسور اللي برجلو وبعد العلاج الطبيعي ليهم ممكن يرجع طبيعي."

حمد:" ممكن انزوره دكتور؟"

الدكتور:" ايوووة ده ممكن بس بدون اثارة اعصابو."

حمد:" ان شاءالله، يالله قوموا نروح له."

وطلعوا من مكتبه وكل واحد فيهم يفكر في اللي قاله الدكتور وشلون يخبرون أمهم وابوهم بهالخبر.

 

وصلوا غرفة محمد وفتحوا الباب، كان محمد نايم ويهه عليه بعض قطع الشاش مكان الجروح والكدمات اللي صادته، وعليه جهاز التنفس لأن تنفسه كان ضعيف شويه، رغم ان صحته بدت تتحسن.

كانت الغرفة باردة وهادئة واايد الا من صوت الساعه اللي كانت موجودة على الجدار، قعدوا ثلاثهم على الكراسي وظلوا يطالعون محمد وهو نايم..حتى سألهم حمد:" مابتتصلون لعمي؟"

أحمد:" مدري، خايف اقول له الخبر وتدري امي وتسوي وقعة بالبيت."

سيف:" لااطالعني ماعرف اقول لهم."

حمد:" يعني تبوني انا اللي اقوول؟!"

طالعوه اثنينهم بإبتسامة مكر:" ايييييييي."

حمد:" يعني لازم تخلوني براس المدفع."

سيف:" اييييييييييييي انت تقدر تتصرف، احنا لا."

حمد:" بااااااااين."

وظلوا عشر دقايق قاعدين ومافي شي تغير، محمد كان نايم وهم ساكتين ويطالعونه..

أحمد:" يالله انقوم، مدامنا اطمنا عليه الحين لازم نرد البيت وانخبرهم."

سيف:" انا بطلع شوي اسبقوني للبيت."

أحمد:" وين بتروح؟"

سيف:" لواحد من الربع وبرد، يالله عن اذنكم."

وطلع قبلهم وبعدين كل واحد فيهم ركب سيارته ورايحين لبيت ابومحمد.

 

الساعه كانت 12:30 الظهر والبنات للحين بمدارسهم وجامعاتهم،كانت نجود وشيخة قاعدين مع بعض يسولفون بالصالة وأمهم قاعدة بالصالة الثانية تقرأ دعاء علشان الله يفرج عن ولدها..ودخل أحمد وسلم عليهم.

شيخة:" بشر وش قال الدكتور؟"

أحمد مارد عليها وقال:" حمد بيدخل بتتغطون والا اخليه يدخل المجلس؟"

شيخة:" لاعادي خله يدخل."

وطلع بره علشان يناديه ، وهم لبسوا عباياتهم وشيلهم وقعدوا..أمهم انتبهت سمعت صوت أحمد ويات بسرعه.

حمد:" السلام عليكم."

وردوا عليه :" وعليكم السلام."

أم محمد:" شخبارك حمد؟ رحتوا المستشفى؟"

حمد:" ايه."

أحمد:" اقعد شفيك واقف."

حمد:"هاا اي اي."

شيخة:" ماقلتوا لنا وش قال الدكتور؟"

أحمد وحمد ظلوا يطالعون بعض وكل واحد يتأمل من الثاني انه يبدي الكلام.

أم محمد:" شفيكم كل واحد يطالع الثاني؟"

نجود واللي كانت طول الوقت ساكته:" حمد اتكلم أحمد الظاهر ماراح يقول شي."

حمد وهو يعدل بقميصه وخايف من ردة فعل ام محمد:" اي، بصراحة وبدون ما اطول عليكم السالفة، هو محمد صحته الحين احسن بس في شغلة بسيطة."

احمد طالعه وهو يقول في قلبه:" لااااا راحت الأرواح يقول شغلة بسيطة."

أم محمد:" كمل ياولدي كلامك شفيك سكت."

حمد:" أ... محمد صار عنده كسر برجلينه و.."

نجود وشيخة:" وشنووووو...؟!

حمد:" شلل مؤقت."

والمسكين مامداه قال هالكلمتين والا ام محمد طاحت عليهم مرة ثانية.

نجود واللي كانت اقرب وحده لها:" يمــه حبيبتي."

قام احمد بسرعه وشيخة لها، أحمد:" ولييييييييييه وش اللي سويته."

حمد وخايف من ان يصير فيها شي:" ماسويت شي مو انتواللي قلتولي اقول لهم، وانا نفذت المطلوب."

أحمد:" انا لو أدري انك بتقولها وبهالطريقة كأنها قنبلة في الويه ماخليتك تقول شي، يا أخي مهد بالأول."

شيخة والتوتر والخوف واصل حده:" شفيييييييكم الحيييين، حمد اتصل في بيت خالتي وانت أحمد روح نادي الخدامة بسرعه."

وكل واحد راح يسوي اللي عليه، وبعد ربع ساعه كانت أم محمد منبطحة على السرير فتحت عينها وهي تنادي:" وين محمد؟"

نجود وهي تصيح:" سلااااامتج يمه، محمد بالمستشفى وان شاءالله مافيه الا العافيه."

ام محمد تأن وتصيح:" وووولدي شصار فيه؟"

شيخة:" للحين خالتي ماوصلت مدري شفيها."

نجود:" مدري بروح اتصل فيها."

شيخة:" روحي بسرررعه."

وقامت تتصل لخالتها..

نجود:" الوو السلام عليكم خالتي."

ام فيصل:" وعليكم السلام، وش أخبار امج الحين؟"

نجود:" حالتها تبجي ، ليش للحين ماطلعتي من البيت؟"

أم فيصل:"السايق راح للعنود المدرسة، وفيصل بالشركة."

نجود:" زين الحين اخلي السايق يجي لج."

ام فيصل:" زين على ما اوصل، حاولوا تهدون امكم."

نجود:" ان شاءالله، مع السلامه."

وسكرت السماعه وراحت لأختها بغرفة الوالده..

شيخة:" وينها خالتي الحين؟"

نجود:" طرشت لها السايق لأن ماعندها أحد يجيبها."

شيخة:" ياربي ارحمنا برحمتك."

ظلت ام محمد تصيح كلما تذكرت محمد،وحاولوا يهدأونها ماكو فايده.

 

^^^^^^^^^^^^^^^^^^^^^^^^

شمس:" وش فيكم؟"

شوق وهي تعيد الدفتر اللي شقته هدى:" مافينا شي."

شمس:" وش تسوون؟"

بدور:" مانسوي شي."

شمس:" اووووووه كل وحده ماسكه لها دفتر وتكتب وش فيكم الحين فسحة يعني راحة،يعني قوومووا نطلع من الصف."

بدور:" شمسوو اذا ماعندج شي سكتي، او تعالي ساعدينا."

شمس والملل بيقضي عليها:" بشنوووو؟"

بدور:" شوق قاعده تعيد نسخ الدفتر اللي شقته لها هدى إختها، والمواضيع والبحوث اللي كانت فيه لازم تعيدها حتى ماتضيع عليها الدرجات، وانا قاعدة اساعدها تبين تساعدينا اهلا وسهلا، ماتبين اكرمينا بسكوتج."

شمس:" اشلون ما اساعدكم، عطوني شي اسويه."

شوق:" هاج يودي وكتبي لي هذا الموضوع."

شمس:" أمرنااا لله هاتي."

وبعد عشردقايق خلصوا منه..

شوق:" شكرااااا لكم."

بدور:" مايحتاج تشكرينا هذا واجبنا."

شمس:" ابي آآآآآآآآكل جوووعانه."

شوق:" ههههههههههه نسيناها هذي ماأكلت اليوم شي."

بدور:" قووومي نأكلها لاتاكلنا بعدين."

شمس:" هااهااهاا ماضحكين."

بدور:" ههه ومن قال ابي اضحكج."

شمس وهي طالعه من الصف:" يالله بسرعه قبل لايخلص الوقت واحنا ماأكلنا."

شوق:" يالله يايينج."

وبعد ماأكلوا تمشوا بالساحه شوي، وكانت سوالفهم كلها عن الدراسة وش يفكرون يدرسون بعد التخرج.

شمس:" انا مدري يمكن اكمل ويمكن لا."

شوق:" ليش بالله ماتكملين."

شمس وهي اطالع السما:" يمكن انخطب والاشي."

بدور:"هههههههههههههاااي هذا اللي فالحة فيه، دراسة لاااا."

شمس:" ماشاءالله عليج."

بدور:" والله انا ما افكرفي الخطوبة أبدااا، اول انهي دراستي الثانوية وادخل الجامعه وبعدين يمكن افكربهالسالفة."

شوق:" وبس هذا انتوا سوالفكم مااتغير."

بدور:" اتحفينا ياآينشتاين."

شمس وضحكها فزع المكان:" هههههههههههههههههه."

حطت بدور يدها على حلجها:" اششششششششش سكتي فضحتيناااا."

شمس شالت يد بدور من على حلجها:" شيليها فطستيني."

شوق:" هههههههه والله كأنكم نسوان ريل.."

بدور:" اسم الله علي، فال الله ولافالج."

شمس:" ووووووي اللي يشوفني بموووت علشان اقابلج."

شوق اللي ماوقفت عن الضحك طول ماهم يتهاوشون:" بسكم خلاااااص الجرس دق خلونا نرد الفصل لايسونا لنا مشاكل."

بدور:" امشي لاالحين توطيت فبطنها."

شمس وهي تضحك:" اوووريج بدورووو."

وبعد أربع حصص خلص اليوم الدراسي، وطلعوا كلهم مع بعض من المدرسة، وكانت هديل معاهم بعد..

شوق:" بدووور لحظة شخبار خالج الحين؟"

بدور:" والله البارحة قال الدكتور ان بطلعه من العناية، وان شاءالله يكون بخير."

شوق:" ان شاءالله."

شمس:" يالله انا بمشي عنكم السيارة وصلت."

وثلاثهم قالوا لها:" مع السلامة."

شمس:" الله يسلمكم، بدوور سلمي على الوالدة وعلى خالج."

بدور:" اسلم على امي من عيوني ، على خالي ..>> وهي تقلد المصريين << ده بُعدك"

شوق:" هههههههه ماتجوز عن سوالفها."

بدور:"بس تصدقين دايماً تحلي الجو."

شوق:" وانتي الصاجة، تملحة خخ."

بدور:" هههه ، الابسألكم منو برجعكم؟"

شوق:" اليوم.. على الأقدام."

بدور:" امشوا معاي اوصلكم."

شوق:" لااا شكراً، مانبي انكلف عليكم."

بدور:" افاااااااا ترى ازعل، يالله السايق وصل يالله امشوا معاي وبلادلع."

هديل طالعتها:" مشكووورة بس مايحتاج البيت موبعيد وايد."

بدور:" وين موبعيييييييد، امشوووا يالله وخلوا عنكم الدلع."

هديل وهي اطالع شوق وبتردد:" مدري براحتج."

بدور:" راحتي تيووون معااااااااي."

وركبوا السيارة بعد ماترجتهم يركبون ، ويوم وصلتهم قريب البيت كان ابوهم واقف بره ويوم شافوه دق قلبهم، كان يبين عليه تأثير الشرب من مشيته. نزلوا من السيارة بسرعه بعد ماشكروا بدور وسلموا عليها.

بعد مانزلوا وصلوا يم الباب وهم خايفين منه، وبدون اي انتباه وفجأه،، ماشافت شوق الايده حاطنها عليها وساحبنها من شيلتها لداخل البيت بعد ما طاحت شنطتها بره ورمى شوق على الارض.. وهديل مصدومة من جره لها بهالصورة..

ابوعبدالله:" يااااحمــ ,,, راكبه مع منوووووووووو؟"

كانت دايس برجله على ايدها وهي تصيح وتتألم ولدموع تطفر من عينها:" آآآآآآآآآآآآآي، هدييييييييييييل.."

هديل كانت خايفة وهي موعارفة وش تسوي لها، الشي الوحيد انها كانت تصيح وتنادي امها،لكن أمها ماكانت بالبيت وصراخه كان موصل لآخر الشارع..

ابوعبدالله:" ياابنت الــ... ، جااااووبيني منو الللللي وووصللج؟

المسكينة ماكانت قادرة تتكلم من كثر الالم تحسه بيدها، كان صراخها وصياحها يقطع القلب وهو يضرب فيها مومهتم لأحد.. كان دايخ من كثر الشرب وظل يرفسها ويدوس على اياديها بدون رحمه وهديل كلما حاولت اتقرب منه صادها ضرب من ضرباته. كان وهو يضرب شوق يشوف فيها ويه أمها بدريه.. كان يكرهها كره رغم الطيبه اللي كانت تحملها بقلبها..!!

 

جيرانهم طلعوا من بيوتهم على صوت صياح شوق وصراخ ابوها، طلعت هديل من البيت بسرعه تنادي احد منهم. ودخلوا بعض الحريم ودخل جارهم ابوسعيد وابوعمر يحاولون يبعدونه عن شوق. وبعد مابعدوه عنها طلعوه من البيت، المسكينه كانت حالتها حاله والدم كان يطلع من ويهها وايدينها من كثر ماداس عليهم. دخلتها حملتها أم سعيد وام عمر داخل البيت.

وبعد ماساعدوها بتغيير هدوم المدرسة وضمدوا جراحها طلعوا من البيت.

هديل:" شكراً لكم ماقصرتوا."

أم سعيد:" ماسوينا شي، كان واجبنا."

أم عمر:" بس انتبهي لها زين، واذا صار اي شي انتي تعرفين بيتنا."

هديل:" ان شاءالله."

ووصلتهم للباب ورجعت لغرفة شوق، كانت المسكينه تصيح وهي نايمة.. كان شكلها يكسر الخاطر من الضرب اللي صادها. قعدت هديل يمها وهي تمسح على راسها وتحاول تقرأ آيات من القرآن الكريم عسى تهدأ حالها.. وبعد ساعه سمعت صوت بره ، طلعت وشافت عبدالله طالع من غرفته يصيح، تفاجأت وراحت تركض له..

هديل:" حبيبي عبود شفيك تصيح؟ في شي يألمك؟"

عبدالله طالعها ودموعه متكتله تحت عينه:" ليش سوى فيها جذي؟"

هديل مستغربه:" منووو تقصد؟"

عبدالله:" ابووي ليش ضرب شوق؟"

هديل:" وانت كنت هني؟"

عبدالله ومازال يصيح:" انا كنت نايم،وسمعت صراخكم بره وشفت ابوي من الدريشة يضربها، خفت ومانزلت."

هديل حضنته وهي تصيح:" وين أمي وهدى؟"

عبدالله:" راحت السوق بعد مارجعت أنا من المدرسة وقالت لي لاتطلع، وهدى في بيت رفيجتها اليوم."

سكت عبدالله شوي وقال:" ابي اشوفها."

هديل ماكانت تبيه يشوفها بهالحالة لأنها تدري انه مابيسكت من لصياح بعدين، وأخذته لغرفة شوق. وأول ماشافها ركض لها وحضنها، إنتبهت شوق من نومها مخترعة وخايفة ويوم شافت عبدالله يصيح زادت هي بالصياح.

عبدالله وهو يمسح دموعه ودموعها:" أنا شفت ابوي وهو يضربج لكن خفت منه، لو كنت ريال كبير كنت راويته."

كلمات عبدالله العفوية خلتها تتألم وتحس إنها ضايعة بهالدنيا، عبدو كان يحبها وايد ويخاف عليها هي وهديل. بس سوايا امه وابوه وهدى فيها خلته يتعلق فيها أكثر من قبل، وكل ماحاولوا يكرهونه فيها زاد تعلق بها.أما ابوهم واللي طلعوه بره البيت ظل يدور من مكان لمكان، ابوسعيد جارهم كان دائما يتصل للشرطة وياخذون ابوعبدالله بالسجن يومين اوثلاثة ويطلع. ورغم كل اللي يسويه ماكان في حد واقف بويهه.

 

^^^^^^^^^^^^^^^^^^^^^^^^

دخلت بيت يدها وماكان في أحد قاعد تحت بالصالة، وقامت تنادي لحد ماسمعت صوتهم فوق بالطابق الثاني وركبت بسرعه. كان الصوت طالع من غرفة يدتها دقت الباب ودخلت..

بدور:" السلام عليكم.."

ردوا عليها:" وعليكم السلام."

شيخة:" متى يتي؟"

بدور:" الحين توني واصله، شخبارج يدتي؟"

ام محمد:" الحمدلله، ماشفتي أحد من خيلانج تحت؟"

بدور وهي قاعدة على الكنب اللي بالطرف الثاني من الغرفة:" لاااا ناديت بس محد جاوبني."

أم محمد:" شيخة يمه اتصلي فيهم شوفي وش بسوي ابوج!!"

شيخة:" ان شاءالله."

بدور وهي اطالع خالتها نجود:" وش السالفة؟ وش صاير؟"

نجود:" خالج محمد.."

بدور وبخوف:" وش فيه خالي؟"

نجود:" شفيج اخترعتي هو محتاج لعلاج لفترة يمكن تكون طويلة شوي، بسبب اللي صادة برجلينة."

بدور:" خاااااالتي موفاهمه شي، وش صادة فيهم؟"

نجود:" كسر وشلل مؤقت."

بدور فجت عينها وصاحت:" يمــه خااااالي."

بدور مايبيلها شي واطيح دمعتها على خدها ومن سمعت الخبر سوت لهم نواحة،

أم فيصل واللي كانت قاعدة يم أختها:" الله يهديج ماقلتي لها الاهني طلعيها بره لاتفزعنا وامج موناقصتها."

نجود:" بدور حبيبتي سكتي خالج ان شاءالله ماعليه شر، وبصير حاله أحسن من الحين بس يحتاج لعلاج."

وتوها قايلة جذي والاخلود داخله الغرفة، وهي تسأل:" السلام عليكم، وش فيها تصيح."

شيخة:" ولييييييييه، نجود طلعي بره معاهم وتكفلي بكل شي."

نجود:" اوكي يالله قوموا ثنتينكم."

خلود بإستغراب:" لحظة لحظة شنو طرده اهي، وش صاير؟"

نجود:" ماصاير الاالخير انتي طلعي بره بس."

وطلعت خلود وهي مستغربة، وقعدوا بالصالة اللي فوق..

خلود وبقهر:" قولووا وش صاير؟"

بدور وهي تمسح دموعها:" خالي محمد عنده شلل مؤقت وكسر برجايلة الثنتين."

خلود وهي حاطة يدها على قلبها:" أخوووووي..؟!"

نجود:" لاتصارخين ولاتصيحين ترى الوالدة مافيها قوة تسمعكم بعد، وشوي الا هي تسمع صوت ابوها:" وين أختج شيخة؟"

نجود:" داخل وياها خالتي ام فيصل."

ابومحمد:" خلود دخلي ناديها."

خلود:" ان شاءالله يبه."

ودخلت الغرفة ونادتها، ولما طلعت قعدوا كلهم على الكنب..

شيخة:" خير يبه؟"

ابومحمد:" خير ان شاءالله، بومازن بألمانيا للحين والا راح لندن؟"

شيخة:" راح لندن، ليش؟"

ابومحمد:" ابيه يشوف لنا دكتور زين هناك علشان ناخذ محمد يتعالج أحسن من هني."

شيخة:" ان شاءالله اتصل فيه واخبره."

ابومحمد:" على خير، بس ماقلتوا لي شخبار الوالدة؟"

شيخة:" والله هذي اهي ماوقفت صياح من سمعت الخبر."

ابومحمد:" وينهم أخوانج؟"

نجود:"أحمد وحمد طلعوا بس وين راحو مدري."

ابومحمد:" وسيف؟"

نجود:"الصبح طلع وياأحمد، بس يوم ردوا ماشفته."

أبومحمد:" زين اتصلوا فيه خلوه ييب سمر من الجامعه."

نجود:" ان شاءالله.."

وقامت تتصل لسيف..

سيف:" ألوو."

نجود:" هلا سيوف حبيبي ابوي يقول لك رجع سمر من الجامعه."

سيف:"اففففف وانا السايق مالهم، وين السايق اللي بالبيت وش شغلته؟"

نجود:" والله مدري هذا اللي ابوي قاله، ماعندي كلام غير مع السلامه."

وسكر سيوف السماعه، واتصل لأخته..

سمر:" هلاااا سيوف."

سيف وهويقلدها:" هلاااا سيوف، وينج فيه؟"

سمر:" بالجامعه بعد وين، وش تبي؟"

سيف:" اذا خلصتي بمر عليج؟"

سمر بإستغراب:" اووووه وش صاير من وين نازله عليك الطيبة."

سيف:" افففف موأنا ابوي ، السايق مدري وينه فيه وقال لي اوصلج."

سمر:" اووكي يايه بس وياي سحر بنت خالتي."

سيف من سمعها تقول اسمها:" وععععععععع مابركبها سيارتي."

سمر:" اسكت لاتسمعك على السبيكر التلفون."

سيف:" خلها تسمع، تيين انتي بس."

سمر:" سيفوو مو وقته عنادك،"

سيف ومارد عليها:" دقيقه وحده وانتوا بره."

وبعد دقيقة كانوا واقفين بره ينطرونه..

سمر:" اففف ويقول لي دقيقة."

سحر:" انتي تعرفينه اكيد يدور بالأول."

سمر:" كاهو وصل يالله."

وأول ماركبوا السيارة سلموا.

سحر:" شخبارك سيف."

سيف ومن غير نفس:" بخير."

سمر:" شفيك ضايق خلقك وتتكلم من غير نفس."

سيف طالعها بنظرة تهديد:" مافيني شي."

سحر حبت تغير الموضوع:" سيف شخبار محمد الحين."

سيف:" والله بخير يسأل عنج."

سحر حست إنه يستهزأ منها وفصلت السكوت..

سمر:" سيييييييييييييف؟!"

سيف قال لهم وش صاد محمد، سحر لما سمعت كلامه حست ان الدنيا ادور فيها، وان أملها بدأ يتلاشى. كانت تفكر فيه وشلون تشوفه بكرسي متحرك بعد ماكان يمشي ويطلع لكل مكان.

 

^^^^^^^^^^^^^^^^^^^^^^^^

وبعد صلاة المغرب رجع كل واحد لبيته، كانت بدور تفكر بخالها وش راح يكون مصيرة وبين ماهي تفكر تذكرت شوق وقامت تتصل لبيتهم، وحظها إن اللي ردت عليها هديل.

بدور:" السلام عليكم."

هديل:" وعليكم السلام."

بدور:" شخبارج؟"

هديل:" بخير الحمدلله."

بدور:"ممكن أكلم شوق؟"

هديل سرحت وماعرفت شلون ترد عليها:"أ... لحظة بشوفها."

وركبت فوق وكانت شوق منبطحة على السرير ولدموع مغرقة عينها،ولما دخلت هديل الغرفة مسحت دموعها.

هديل:" بدور متصلة تبي تكلمج وش آقول لها."

شوق وبصوت خافت:" تقدرين تيبين لي التلفون اللي بره؟"

هديل:" ان شاءالله."

انتهزت هديل وجود أمها بالغرفة وهدى، ودخلت التلفون لشوق..

بدور:" ألووووووو..مرحبااا ياقمر."

لكن نبرة الصوت اللي سمعتها ماتوقعتها وبصوت واطي:"ألو."

بدور حست من نبرة صوتها ان فيها شي:" شووق شفيج؟"

شوق وهي تحاول تغير من صوتها:"هلا بدور."

بدور:" مارديتي علي، شفيييييييييج؟"

شوق والدمعة نازله على خدها:" ابوي."

بدور وفهمت وش تقصد:" الله ينتقم منه."

حست شوق انها غاصه بالحروف، وماقدرت تكلمها.. كانت السلوى الوحيدة لها دموعها.. ماتحملت بدور تسمعها جذي وسكرت السماعه بعد ماسلمت عليها.

بدور:" الظالم، الله ينتقم منه."

شيخة بإستغراب:" قاعده ادعين على منوو؟"

بدور ودموعها تجمعت بعينها:" المسكينه شوق اليوم كنت موصلتها وإختها هديل، وكان ابوهم واقف على الباب، كنت حاسة ان ماراح يعديها على خير."

شيخة:" وش سوى يعني؟"

بدور:" توني متصلة وسمعتها تصيح، حتى صوتها ماينسمع."

شيخة:" لاحول ولاقوة الابالله، هذا مابيخليها في حالها الا اذا ذبحها."

شيخة كانت تتمنى تاخذ شوق من بين أيادي أبوها لكن خوفها من ابوها يمنعها تسوي جذي.

 

^^^^^^^^^^^^^^^^^^^^^^^^

 

أول مافتح عينه كان أول ويه يشوفه ويه حمد، كان يحس بآلام بكل جسمه ظل يطالع ويحاول يركز، لكن ضوء الغرفة قوي على عيونه.

حمد:" سلاااامات، ماتشوف شر."

محمد بلع ريجه وحاول يتكلم:"الله...يسلمك."

سيف:" سلاااامات ياابوفهد.."

محمد طالعه وابتسم له ابتسامه خفيفة، أمه وأبوه وخواته وباقي العايلة بعدهم ماوصلوا المستشفى واللي كان بالغرفة بس حمد وسيف.

وبين ماهم يسولفون لمحمد وهو يستمع لهم وحاس ان كلامهم صراخ بأذنه، دخلت أم محمد وحضنت ولدها وقامت تصيح..

أبومحمد:" اهدي ياام محمد، اشوي اشوي عليه."

أم محمد:" ياعمري، ياحبيبي شخبارك؟"

محمد هز راسه لها وقال:" الحمدلله."

كانوا خواته واقفين ورى أبوهم وعيونهم مليانه دموع، طالعهم بابتسامه وقال بصوته الواطي:" ماتبون تسلمون علي؟"

وركضوا ثنتينهم له وحضنوه، كانت خلود ميته من الصياح، وسمر حبته فوق راسه وابتعدت. وقعدوا كلهم على الكنب الموجود بالغرفة وراحوا يسولفون ويوصفون له اشكثر وحشهم.

وكانت شيخة وقفت يم أخوها سيف بعدما سلمت عليه، أما بدوروو وبدون منافس لها حضنته وقعدت يمه،ومازن سلم على خاله وباسه بخده وراح قعد يم خاله سيف. وبعد ربع ساعه دخلت خالتهم أم فيصل وسحر واختها، وبعد جم دقيقة أكتمل عددهم كلهم بعد ماوصلوا بيت عمه ابوحمد، وماكان ناقصهم الاابو مازن.

سحرواللي كان ويهها منور لما شافت محمد راحت يم سمر وسلمت عليه:" السلام عليكم، ماتشوف شر ان شاءالله."

أبتسم لها وقال:" الشر ماييج.."

وسلمت عليه خالته أم فيصل:" ماتشوف شر يانظر عيني."

محمد:" الشر ماييكم ان شاءالله."

وأنتبه محمد لنقص واحد منهم:" سيف،وين أحمد؟؟"

ابومحمد:" اي والله وينه؟؟"

سيف:" مدري فيه كان طالع من البيت قبل لا أطلع."

حمد:" لحظة بتصل فيه."

واتصل حمد لكن مارن تلفونه:" غرييييبة التلفون مغلق."

ام محمد وبخوف:" ابومحمد روح دور عليه شوف وينه."

وضحكوا عليها لما سمعوها تقول دور عليه، وقال لها سيف:" يمه شنو يدور عليه ياهل أهو."

أم محمد:" انتو ماتحسون اللي احسه، انا احاتيكم وانتوا تضحكون."

وماخلصت جملتها والاأحمد فاتح الباب:" السلااااااااااام عليكم."

سيف:" وهذا هو تقولين جني."

أم محمد:" ووووووي اسم الله عليه."

أبومحمد:" وينك فيييه؟"

أحمد:" لحظة وحده خلوني أسلم على أخوي."

وراح وسلم على محمد وقبل لايطلع من الغرفة:" لحظة اوكي." وبعد ثواني فتح الباب ودخل منه أحمد ومعاه ابومازن..

بدور والفرحة موواسعتها:" يبببببببببه."

أبومحمد:" متى وصلت؟"

سالم:" اولاً السلام عليكم، وثانياً توني الحين واصل، وعلى طول ييتكم المستشفى."

أبوحمد:" وليش ماقلت لنا حتى نخلي الشباب يستقبلونك؟."

سيف:" حشى رئيس الوزراء."

أبوحمد:" والله يستاهل ابومازن."

سالم:" فيكم الخير والله، ماكان فيه داعي وانا قلت خلها مفاجأه للجماعة."

بدور:" احللللللللى مافجأه."

وقعدوا الحريم بصوب والريال بصوب وأخذتهم السوالف وظلوا فوق الساعتين قاعدين هناك ولاحسوا بالوقت. وما انتبهوا الاعلى صوت محمد:" حمد ماقلت لي وش قال الدكتور عن حالتي؟ ومتى بطلع؟"

حمد طالعة وظل ساكت والكل كان مرتبك وخايف من ردة فعل محمد لما يعرف عن حالته. كان محمد يطالعهم واحد واحد وينتظر الإجابة منهم

 

يتبـــــــــــــــــع

 

 

[حفرت اسمك على قلبي]

و انتظروا الجزء الخامس

 

عاد لا تبخلون علي بآرائكم و ردودكم

 

و انشاء الله نلتقي قريبا

[looleeta]

شكرااااا

[عاشقه احمد صلاح]

يلا عاد ننظتر باقرب وقت..

 

تحياتي..

 

عشووووووووووووووووووقة

[khalijia]

mshkooooooooooora o fe int'9ar il tkmila

[بحرينيه^مزيونة]

مشكوووره حبيبتي

 

ننتظر التكمله

فديتج لاتتاخرين

[زهرة المستقبل]

يسلموو عالقصة الروووعة واحنا في انتظار التكملة في اقرب وقت

[حفرت اسمك على قلبي]

السلام عليكم .. هذا البارت السادس وان شاءالله يكون اوووكي ويعجبكم وانتظر ردووووودكم وتعليقاتكم .. وانتقاداتكم بعد ..

 

 

الجزء السادس

 

 

أول ما سمع محمد كلام حمد حس ان الدنيا ادور فيه، غمض عينه وسند راسه على لمخده. الكل قاعد يطالعه بنظرة عطف وينتظرون ردة فعله، وهو أكره شي عنده ان احد يعطف عليه والا يكسر خاطر حد. المعروف عنه ان شخصيته قويه ويقدر يضبط اعصابه وانفعاله>> الافي حالااااات نادرة. محمد حبوب ومرح يحب الكل مثل ماالكل يحبه، أخوانه وخواته ،عيال عمه وخالته، وربعه كلهم بإختصار مايكنون له اي عداوة.

فتح عينه بعد ماسمع صوت حمد:" محمد، محمد؟!"

محمد وبإبتسامه مجهده:" نعم خير؟"

حمد:" الخير بويهك."

طالعته سحر بنظراتها اللي طول عمره كان مايشوفها الافيها ومتناسية كل الموجودين، نظرت له نظرة الكبرياء والغرور لكن محمد ماكان يشوف هالصفات فيها، لأنه كان يحبها واللي يحب مايشوف عيوب حبيبه حتى لو كان على خطأ.

حمد وهو يأشر بيده قبال ويهه:" هيييي يالحبيب وين سرحت؟"

محمد:" وانت ماتخلي الواحد بحاله؟"

حمد:" افاااااااا يزاة الخير سواد الويه لكن ماعليه خلك تطلع من هني اوريك."

محمد:"على سالفة الطلعة متى بطلع من هني؟"

أبومحمد:" ياولدي انت بعدك تعبان، والدكتور وقت اللي يشوف صحتك صارت احسن بتطلع."

أم محمد:" اي ياحبيبي لاتستعجل على عمرك."

نط سيف من مكانه :" يييييييييمه أنا أغار."

أم محمد:" كلكم حبايبي لاتزعل."

خلود:" بس اكييييييييد أنا غير."

محمد وهو يضحك عليها:" أكييييد إنتي غير دامج آخر العنقود دلووووعة أبوج."

خلود وهي ترف بعينها له وتدلع:" طبعاااااااااً."

وضحكوا عليها وعلى حركاتها، وبعد عشر دقايق إستأذنوا منه وطلعوا حتى يرتاح.. وكانت سحر قبل لاتطلع خلت يم مخدته رسالة حتى يقرأها بدون ماحد يشوفها.

طلعوا وخلوا محمد سرحان بأفكاره والوضع اللي وصل له.. وقطع أول حبل أفكاره الرساله اللي خلتها سحر ومد يده وسحبها. فتحها وقام يقرأها:" السلام عليكم ورحمةالله وبركاته.. الحمدلله على سلامتك حبيبي، مدري وش اقول لك بس وحشتني موووت، كنت افكر فيك دايما وانت مسافر، وتمنيت يكون لقائنا بظرف أحسن من هذا لكن...، كنت خايفة أيي لك المستشفى مااقدر اشوفك وانت بهالحالة، بس غيرت رايي وقلت أكيد انت بحاجه لأنك تشوفني..!! ياترى وحشتك واشتقت لي مثلي؟؟؟ مابي أطول عليك واتمنى تتصل فيني اذا وحشتك، أنتظر اتصالك. أحبك."

 

كانت آخر كلمه بالرسالة، قرأها ثلاث مرات وخلاها مكانها.. ورجع لتفكيره:" ياترى ياسحر بتظلين تحبيني مثل مااحبج؟؟" وطالع رجايلة وصار يتلمسهم وهو يفكر:" وش اللي سويته بنفسك يامحمد؟! مايندرى أرجع أمشي والا لأ؟؟ بس أكييييد في علاج مثل ماقال الدكتور، بس..اكيد بطول العلاج وانا مابي اتأخر أكثر حتى.." وقف عن التفكير لأنه تذكر انه لازم يسأل هالسؤال لسحر.. طالع الطاولة اللي يم السرير وفتح الدرج كان هناك تلفونه الثاني، دق على رقمها وبعد أقل من دقيقة سمع صوت سحر اللي وحشه موت بالطرف الثاني.

سحر وبكل رقة:" ألووو."

محمد:" السلام عليكم."

سحر:" وعليكم السلام."

محمد:" شخبارج سحر؟؟"

سحر:" أنا بخير إنت شخبارك؟؟"

محمد سرح برجايله شوي:"بخير وانا اسمع صوتج."

سحر إبتسمت وبدلع قالت:" بس صوتي؟؟"

محمد:" وأنا راح أرد على سؤالج بالرسالة، وأقول لج كلك على بعضج وحشتيني."

سحر ظلت ساكته وهي مستانسه أنها تسمع هالكلام منه، كانت تحب محمد موووت وتحلم إنها تعيش معاه، من يوم هم صغار كان الكل يقول سحرلمحمد ومحمد لسحر.. بس قطع حبل أفكارها صوت محمد:" سحر.."

سحر:" هلااا.."

محمد:" أبي أسألج سؤال أبيج تجاوبيني عليه بصراحة."

سحركانت تفكر شنو السؤال اللي يبي يقوله:" تفضل."

محمد:" تحبيني؟؟"

سحر وكأنها مرتاحه من السؤال:" وش هالسؤال؟ اكييييييييد احبك."

محمد:" بس موهذا سؤالي؟"

سحر مستغربه:" اجل شنووو؟"

محمد:" يمكن هذا مب وقته بس لازم أسألج اياه،،" وظل ساكت ثواني وكمل:" تقبلين في واحد معاق؟"

سحر كانت خايفه من هالسؤال، ظلت ساكته تفكر في إجابه لسؤاله، وبالرغم انها كانت محتاره الا انها قالت له:" أنا أحبك ومستحيل اتخلى عنك."

محمد حس ان اجابتها ماريحت باله:" أعرف هذا الشي بس ماقلتي لي تقبلين والا لا؟"

سحر ومن غير اقتناع:" اقبل." قالتها بدون ماتحسسه إنها مومقتنعه ولامتردده رغم ان أكثر شي كان تاعبها هالسؤال..

محمد وهو يبتسم في نفسه:" أحبج.."

سحر:" وأنا أكثر."

محمد:" تأخر الوقت وبكره جامعه، تصبحين على خير حبيبتي."

سحر وهي تفكر:" وانت من أهل الخير."

وسكر التلفون ومن كثر تعبه من غمض عيونه ورقد.

 

^^^^^^^^^^^^^^^^^^^^^^^^

كانت منبطحة على سريرها وتقلب بتلفونها وتفكر فيه:" وش اللي جاب هالسؤال على بالك يامحمد بالهوقت!! راسي يألمني من التفكير مدري وش اسوي، حبي له شي واني أعيش مع انسان بحالته شي ثاني. وأنا مدري إذا كانت حالته ترجع طبيعيه والا لا..؟ اففففففففففف بس أنا أحبه كل شي أتمناه فيه. صج محتاره وش اسوي..؟!!!" وظلت تفكر لحد ماطالعت الساعه:" اووه الساعه ثنتين وانا للحين قاعده مدري شلون بقعد لباجر." وقفت أفكارها وراحت بسابع نووومة.

 

&&&&&&&&

 

دخل المكتب وقعد على الكرسي من غير مايسلم، كان باله مشغول بالمشكله اللي هوفيها..

صالح:" ترى السلام على رسول الله."

طارق:" السلام."

وسكت مرة ثانيه وظل يفكر بحل للمشكله

صالح:" ياهوووو ياأخي وش فيك؟؟"

طارق:" مافيني شي، إلا بسألك حمد داوم؟؟"

صالح وهو يقلب بالأوراق اللي بيده:" مدري والله."

قام طارق بسرعه وراح لمكتب طلال..

طلال:" هلا والله وينك ماتبين؟؟"

طارق وبدون مايرد عليه:" داوم حمد؟؟"

طلال بإستغراب:" إيه هو بمكتب عمه."

طارق:" اذا رجع خبره اني سألت عنه."

طلال ومازال بإستغرابه:" اووكي."

^^^^^^^^^^^^^^^^^^^^^^^^

طلع طارق مني وبعد خمس دقايق دخل حمد المكتب..

حمد:" أحم أحم ، أحد سأل عني."

طلال:" مدري منو الوزير بيسأل."

حمد:" والوزير احسن مني بشنووو هااا."

طلال:" واللي يرحم والديك اسكت لاتسوي لنا سوالف."

وقام يخلي بعض الملفات بالمكتبه.. وتذكر طارق:" حمد طارق سأل عنك من شوي، كان شكله غريب."

حمد:" شلووون ؟؟"

طلال:" مدري كان مستعجل وااايد وكأنه يفكر بشي، هو فيه شي؟؟؟"

حمد واللي نسى السالفة وتذكرها الحين:" اييييييييي نسييييييييييت انا، المسكين أكيد طايح بورطة."

طلال:" شفيك اتلكم روحك، وش صاير قول لي؟؟"

حمد:" المسكين المفروض ادور له على بيت يسكن فيه، بس نسيت السالفة بعد اللي صار لمحمد."

طلال:" مافهمت أي بيت وأي سكن؟؟ وش تقول انت؟؟"

حمد:" السالفة طويلة اقوولها لك بعدين.."

طلال:" تعاااال وين رايح؟؟"

حمد وهو طالع:" رايح لطارق وراجع لك، وابيك تتصل بوليد وخبره ايي المكتب هني."

طلال:" مدري شفيهم هذلين اليوم، يالله خلني ادق على وليد."

وبعد ما دق على وليد كانوا كلهم مجتمعين بالمكتب، وطبعاً طارق ماكان معاهم لأنه استأذن من الدوام وأخذ اجازة.

وليد:"المسكين ليش ماقال لنا كنا ساعدناه."

حمد:" مدري فيه، انا من يوم شفته ذاك اليوم حسيت فيه شي، ويوم ياني البيت وقال لي السالفة وعدته اني أحلها له."

طلال:" والحين وش بتسوي؟؟"

حمد:" والله مدري محتار وابيكم تساعدوني، الريال يبي بيته بأسرع وقت. وبعد حادث محمد ماقدرت افتح الموضوع مع عمي، ونسيييييت السالفة أصلا!"

طلال:" فاااالح، والحين وش الحل؟؟"

وليد:" انا عندي اقتراح.. "

طلال:" اتحفنا اشوف."

وليد:" أنا اعرف دَلاّل بيوت وأكييييد يعرف بيوت رخيصة زينة."

حمد:" وبعديييييين؟؟"

وليد:" ولاأبلين ياحبيبي نشتري البيت ويسكن طارق وأهله فيه، طبعاً بمساعدتكم الكريمة نشتري البيت."

حمد:" انا اعرف طارق مستحيل يرضى ان نشتري له بيت."

وليد:" موشرط قول له ان يقدر يسدد مبلغ البيت على اقساط وقت ماحب مولازم كل شهر على إمكانياته ياااشاطر."

طلال:" وانا معااااك بكلامك، ومدامكم مشغولين بمحمد الحين خلنا نحلها احنا."

حمد وبتردد:" مدري أشوفه واقترح عليه هالإقتراح وان شاءالله يوافق."

طلال:" اكيييد بوافق."

وسكتوا شوي وقطع حبل افكارهم سؤال طلال:" حمد وش أخبار محمد الحين؟؟"

حمد:" والله البارحة بس قعد وتكلمنا وياه."

وليد:" يعني عادي انزوره؟؟"

حمد:" ايه عادي، تراه سأل عنكم يوم أتصل له اليوم الصبح."

طلال:" لازم انقووم بالواجب وانزوره."

حمد:" واجب والا هوم وورك."

وليد:" اففففف مايجوز عن حركاته أنا بطلع لايبدي لنا الحين."

حمد وحاب يقهره اكثر:" يجوز والامستحب خخخ."

وليد:" انا ماقلت لك، عن اذنك."

طلال وهو يضحك:" ههههههههه والله بتذبحه انت."

حمد:" خخخ ماحد بيذبحه غيرك انت."

طلال:" انا مالي خص، وثانياً يالله قوووم عن كرسيي خلني اشتغل."

حمد:" خلني جذي مستريح واااايد."

طلال وهو يحاول يقومة:" قوووووووم لاحذفتك الحين."

حمد:"ههههههه انت شيل عمرك بالأول تالي تعال شيلني."

طلال وهو يفلص فيه:" انت ماينفع معاك الاجذي."

حمد:" بسسسس خلااااص بقووووم لاااتفلص."

وقام من على كرسيه وكل واحد فيهم رجع لشغلة..

 

^^^^^^^^^^^^^^^^^^^^^^^^

 

قعدت يمها وهي سرحانه بكلام محمد وبسؤاله..

ميثه:" افففف وانتي بتظلين طول اليوم جذي؟؟؟"

سحر:" مدري مدري."

ميثه:" اي عااااد مايصير تظلين ساكته وانا اطالعج، قولي شي تكلمي."

سحر وهي اطالعها:" البارحة اتصل محمد لي."

ميثه مستانسه وكأنها هي اللي متصل لها:" والله؟؟ وش قال؟؟"

سحر:" وش قال مالج خص، بس اللي متعبني سؤال واحد قاله لي."

ميثه:" وش السؤال؟؟؟"

سحر:" اول قولي لي شفتي سمر اليوم؟؟"

ميثه:" اي بس عندها محاضرات ، وعندها Test."

سحر:" زيييين، مدري وش اسوي محتاره."

ميثه:" محتاره بشنووو؟؟ انتي قووولي السؤال بالأول بعدين نلقى حل لحيرتج."

سحر:" سألني إذا كنت أقبل في واحد معاق والا لا؟!"

ميثه وبلهفه:"وووووش قلتيييي له؟؟ ان شاءالله قلتي اااااااايه؟"

سحر:" ايه."

ميثه:" انتي موصاحيه اكيييييييييييد."

سحر:" عمى في عينج موصاحيه الاانتي."

ميثه:" اجل تقولين اي!!"

سحر:" اي يالغبيه وش تبيني اقول له لا.. إنتي ماتعرفين وش يعني لي محمد."

ميثه وهي تقلدها:" أعرف محمد كل شي حياتي وروحي والشخص اللي أبي أعيش معاه باقي حياتي وهو الوحيد اللي بيحقق أحلامي ويرضيني،، بس ياحبيبتي أصحي محمد الحين صار مقعد."

سحر وهي تتنهد:" وهذا اللي مجنني."

ميثة:" ولاتستخفين ولاشي عيشي حياتج، حبيه وظلي اتكلمينه بس لاتربطين نفسج بإنسان يمكن إنتهى مستقبله."

سحر:" وش قاعده تقولين إنتي أكيد جنيتي."

ميثه:" ياحبيبتي ياسحر، أنا اقول لج بس عيشي حيااااتج، وفكري فيها اي احسن لج تربطين نفسج معاه والا..."

سحر وعلى ويهها ألف علامة إستفهام:" والا شنوووو؟؟"

ميثة وبدون ماتلف وادور:" مارديتي على الموضوع اللي قلت لج عنه، مجرد صداقة لاأكثر."

سحر:" لااااالااااا، مااقدر."

ميثة:" بالأول انتي فكرتي؟؟"

سحر:" ايه فكرت، بس مدري."

ميثه:" انتي شفيج؟؟ لاتخافين؟؟"

سحر وبغضب شوي:" ومن قال انا خايفه، انا اللي ابيه اسويه بكيفي ماحد يجبرني."

ميثه:" اكييييييييد ،، والحين وش قلتي؟؟"

سحر:" بس صداقة."

ميثة وهي شاقه الحلج من الابتسامه:" بس صداقة."

 

^^^^^^^^^^^^^^^^^^^^^^^^

بعد مارجعت من المدرسة دخلت غرفتها بدون ماتمر تسلم حتى على أمها، كانت تفكيرها مشغول بصديقتها شوق، اليوم غيابها شغل بالها أكثر وأكثر. ضاق خلقها وهي قاعده وقررت تتصل لشمس.

بدور:" الو السلام عليكم."

شمس:"هلا وغلا وعليكم السلام، من وين طالع القمر اليوم؟؟"

بدور:" يالله عاااد، مسويتني كلش ما اتصل."

شمس:" لاااا ماتتصلين بصراحة."

بدور كانت ساكته وتفكر، وسمعت صوت شمس وهي تتحجج فيها:" من اللي ماخذ عقلج؟"

بدور:" انتي يابعد عمري خخخخ."

شمس:" ههاااي ماتضحكين، قووولي وش تبين؟"

بدور:" بل بل طرده اهي."

شمس:" لاااا بس.."

وقاطعتها:" لابس ولابسبس، ابيج تتصلين لشوق واذا تقدرين تقنعين أمها، أقصد خالتها انها تيي بيتكم."

شمس:" وليش موبيتكم؟"

بدور:" تغيييييييير ، والا قووولي ماتبينا انيي بيتكم يالبخيلة."

شمس:"لاااااااااا موقصدي جذي، بس مستغربة."

بدور:" شوق تعبانه من بيتهم وابيها تطلع من هناك، وقلت اقرب بيت لها بيتكم وش قلتي؟"

شمس:"تتوقعين تخليها تطلع؟"

بدور:" أكيد بروحها تبي الفكه منها."

شمس:" احاول لكن اوريج اذا حصلت زف من سحيله خالتها."

بدور وهي تضحك:" ههههههههه وانتي من يقدر عليج، انتي لوبتزفج بتعطينها لسان اطول منج."

شمس:" ووووووووول عليج أنا جذي؟!! لكن ماعليه اوريج يابدور."

بدور:" أمززززح معاج لاتزعلين، بس يالله بسرعه اتصلي وخبريني."

شمس:" موعلشانج مابزعل علشان شوق."

بدور:" اوووكي أنتظرج باااي."

 

^^^^^^^^^^^^^^^^^^^^^^^^

كانت قاعده بالصالة تخيط زر قميص هدى، وسمعت التلفون يرن:" مدري منو متصل هالحزة بعد.."

أم عبدالله:" ألو.. وعليكم السلام."

شمس:" شخبارج خالتي؟؟"

أم عبدالله:" بخيرالحمدلله."

شمس وحست إنها ماعرفتها:" خاله أنا شمس بنت أبوراشد."

أم عبدالله:" ايييييييه هلا هلا، شخبار الوالده وينها مانشوفها هالأيام؟؟ عسى خير بس؟"

شمس وتقول بقلبها وش هالوهقه هذي الحين بتقعد تسأل عن العائلة كلها:" لاماشر بس مشغولة بشغل البيت."

أم عبدالله:" اي وش أخبار خالتج أم عيسى؟؟"

شمس:" بخير الحمدلله، العائلة كلها تماااااااااام، خالتي ممكن تخلين شوق اتيي بيتنا؟؟"

أم عبدالله وهي تفكر:" يصير خير ان شاءالله."

شمس:" مشكورة وانا انتظرها، مع السلامه."

أم عبدالله:" سلمي على أمج وقولي لها تزورنا."

شمس:" ايه ماعليه اقول لها."

سكرت السماعة وراحت فوق لشوق وطبعاً كالعادة بدون استأذان:" شوقو.."

شوق أنزهقت من طريقة فتحها للباب وبصوت خافت:" بسم الله."

ام عبود انتبهت لها:" وش فيج اتسمين لايكون شايفة جني."

شوق بلقبها:" الجني ارحم منج."

ام عبدالله:" المهم بنت بوراشد متصله تبيج تروحين بيتهم."

شوق:" اهااا ان شاءالله."

أم عبدالله وهي طالعه:" اخذي عبود معاج، انا بطلع ومابيه يأذي خواته.. وهي تحاول تقهرها: الإمتحانات جريب ومابي أحد يزعجهم."

شوق:" وليش ماتاخذينه معاج؟"

أم عبدالله:" والله شوفي أنا ماكنت بخليج تروحين لها بس قلت لأني بطلع خليتج تروحين موعلشااانج."

طلعت ولاسكرت الباب، وقامت شوق وراها وصكته.. " أففف فكه من هالويه، والله عفيه عيج ياشمسووو، أقوووم ابدل هدومي قبل لاايي ابوي ويسوي لي سالفه."

 

^^^^^^^^^^^^^^^^^^^^^^^^

كانت أم محمد قاعده يم محمد وتسولف معاه، وابوه قاعد يتكلم بالتلفون ويحاول يخلص بعض امور الشركة عن طريق التلفون..

أم محمد:" بسك اتصالات وين ماتروح شغل، مايخلونك ترتاح."

أبومحمد:" الشغل ياام الغالي مافيه راحه، وانا اشتغل لمنو غيرج انتي ولعيالج."

محمد:" افااااا يبه واحنا وين رحنا؟؟؟"

ابومحمد:" انتو على العين والراس بس بعدكم شباب وتنقصكم الخبره."

أم محمد اطالع ولدها بنظرات الفخر:" انا ولدي مايحتاج خبرات، ماشاءالله عليه ماعليه قصور."

أبومحمد:" اييييه اييييه ماعليه قصور، محد يقدر يقول عكس جذي."

سكت شوي وسأل ولده:" وش قررت الحين، تسافر لندن حتى تتعالج ؟؟"

محمد:" إيييه انا افضل هناك."

أم محمد وبنبرة خوف عليه:" ومن بروح معاك؟؟"

محمد:" أكييييد أحد من أخواني وواحد من عيال عمي."

أبومحمد:" زين أنا بسأل الدكتور متى تقدر تطلع حتى خلص إجراءات السفر وقبل إمتحانات لعيال تسافر."

أم محمد:" وليش موبعد الامتحانات."

أبومحمد:" لااااا، اذا بسافر بعد الامتحانات تعرفين عيالج كلهم يبون يروحون معاه، وهو رايح علاج موسياحه."

محمد وهو يتنهد:" صح كلامه يمه، الااذا تبين اتيين معانه هذا شي ثاني."

أم محمد طالعت ابومحمد وكأنها تستشيره وقال لها:" لاااا مايصير تروحين وعيالج تخلينهم بروحهم بالبيت."

أم محمد:" انخلي شيخة معاهم ، ماتقصرابنيتي."

أبومحمد:" أنا أقول لج تقعدين أحسن."

محمد:" أنا بعد أفضل انج تظلين هني يمه، تعرفين خواتي صغار ومايصير تخلينهم بروحهم بالبيت، وابوي على طوول واخواني بالشركة."

أم محمد:" مدري اللي تشوفونه."

 

^^^^^^^^^^^^^^^^^^^^^^^^

من سمعت صوت الجرس ركضت تفتح الباب، ومن شافتها حضنتها:" هلاااا وغلااااا فيج."

شوق:" كأنج أول مرة تشوفيني."

شمس:" لاوانتي الصادقة اول مرة خخ، اقوول دخلي دخلي بدور فوق بالغرفة."

شوق:" لحظة، عبوود حبيبي تعال هني."

شمس:" اووووه وياي معاج."

شوق:" اي البرنس مارضت أيي الا وياه."

شمس:" وععع" وحطت يدها على حلجها:" آسفه ماقصدت."

شوق وهي تضحك عليها:" لاااا عادي ما انتبه لج، لأنه مشغول باللي هناك."

دارت شمس ورى وطالعت أخوها حسام يلعب بالبلي ستيشن:" ايييييييه انا اقول وش فيه سرحان، عبود روح العب معاه."

طالع شوق بنظرة إستأذان:" حبيبي روح ألعب معاه ماعليه، واذا بغيت اي شي تعال لي فوق."

عبدالله وهو مخلنهم:" ان شاءالله."

وبالغرفة فوق كانت بدور قاعده على سرير شمس، وكانت مغمضة عيونها وماشافت الا شوق وشمس بويها.

بدور:" ووووي خوفتوني."

شمس:" ههههههه انتي من متى ماخفتي."

بدور:" ههاههاي ماتضحكين بالمرة."

شوق:" إحم إحم، نحن هنا."

بدور:" شفتي شلون نستني اسلم عليج."

شوق:" مونستج اعترفي من اللي ماخذ عقلج؟"

بدور:" وانتيييييييي بعد وياها، يبناج عون انقلبتي علي فرعون."

شمس:" وتعرف أمثال بعد."

شوق بعد ماقعدت على الكرسي الهزاز:" مابغيت أطلع من هالبيت."

بدور ودارت لها:" شوق وش صار ذاك اليوم؟؟"

شوق وهي تلعب بشعرها:" ملاكمة بس من طرف واحد."

بدور:" هييييي انتي شفيج تطنزين يعني."

شوق وهي تتنهد:" وش تبين أقول لج، مافي شي يديد من شافني نازل طاح فيني ضرب."

شمس:" ليش ماتشتكون عليه؟؟"

شوق:" ابوي كل مرة ينسجن بس بعد يومين او ثلاثه يطلعونه، لأن ماكو فايده كل مايدخلونه يصير اوكي ويرجع أسوأ من قبل."

بدور:" سامحيني على اللي بقوله بس ياليت ابوج يظل على طووول محبوس اريح لج."

شوق تضحك بسخرية:" ومرته وأختي هدى وين بروح منهم."

بدور:" اففففففف وهذلين بعد مدري من وين طالعين لنا."

شمس وبمزح:" طالعين من بطن امهم خخخ."

بدور وهي مقهورة منها:"باااااااااااااااايخة."

شوق:" خلونا من هالسالفة الحين،، الامتحانات بعد اسبوع وابي تعطوني كل شي ناقصني."

شمس:" من عيوووني."

بدور:" انا يبت لج اللي كنتي غايبه فيه، واذا مافهمتي شي بفهمج اياه."

شوق:" مشكووورين وماتقصورن."

بدور:" حاضرين."

شمس:" انتي اتآمر ياجميل."

 

^^^^^^^^^^^^^^^^^^^^^^^^

 

كان قاعد يفكر في سحر، وفي مستقبله اللي كان بانيه عليها.. وقطع حبل أفكاره صوت طق على الباب..

محمد:" تفضل.."

طلال:" السلااااام عليكم."

محمد وبإبتسامه عريضة:" اهلااااااااا وعليكم السلااااام."

ودخل وراه طارق ووليد:" السلاااااااااام عليكم .."

محمد:" ياهلااااااا وعليكم السلام وأخيراً شفناكم.."

طلال:" وش انسوي الشغل وانت ادرى به."

طارق:" شخبارك الحين؟ ان شاءالله احسن؟"

محمد:" والله وش اقول لكم، الحال صعب شوي بس الحمدلله على كل حال."

وليد:" الله يقومك بالسلامة ان شاءالله."

محمد:" ان شاءالله."

وقام يطالع ساعته وسألهم:" الاحمد وينه؟؟ "

طلال:" مدري بس كأني سمعته يقول بمر على فيصل بيتهم وبمر عليك."

محمد:"اهااا، والله تدرون وحشتني القعده معاكم وييييين ايااام قبل."

وليد:" لااااحق على القعدات الأيام جايه، أهم شي صحتك الحين."

طارق:" ماقلت لنا وش راح تسوي الحين؟"

محمد:" والله توني اليوم اسولف ويا الوالد وقلت له بسافر لندن اتعالج."

طارق:" ومن بروح معاك؟"

محمد:" ماحددت منو بالضبط بس الأكيد واحد من أخواني وأحد من أهلي."

طلال:" لاتقول بتاخذ حمد؟"

محمد:" وش معنى حمد لا؟"

طلال:" بشيب راسك، وبيننك."

محمد:" ههههههههه اسكت لاايي ويسمعك."

وتوه قايل جذي والافيصل وحمد فاتحين الباب:" وش اللي لااسمعه اعترفووووا الحين وش كنتوا تعقرون علي؟!!"

وليد:" ابداااااااا ولاشي."

حمد:" انت ولاكلمه، الكلام موجه لمحمدوو وطلولووو."

محمد:" طااالع هذا اصغر عيالك احنا، والله بس لو اقدر ايودك وريتك شغل الله."

حمد:" وش بتسوي يعني."

محمد:" تعال يمي واوريك وش بسوي، هلافيصل شخبارك؟"

فيصل:" والله بخير الحمدلله، يسلمون عليك الأهل."

حمد وهو يضرب على جتفه:" الأهل يسلمووووون علييييييييك."

محمد:" زيييين وبعدين معاك انت."

حمد:" اشهدوا ياشباب سويت شي؟؟"

طلال:" لاوالله ماسويت برئ."

وليد يضحك عليه:" وهذا تبي تاخذه معاك."

حمد:" وش السالفة؟؟"

محمد:" انا قررت اسافر بعد اسبوع الى لندن حق اتعالج، وقلت باخذك معاااي وياواحد من اخواني بس الشباب اشوفهم معارضين جيتك معاي، ويفضلون بقائك هني."

حمد ويطالعهم واحد واحد:"ليييييييييش بالله؟؟"

محمد:" يخافون عليك."

فيصل ويحاول يمسك نفسه عن الضحك:" ولد البارحة."

حمد وهو ضاربه على جتفه:" وانت تضحك هااا."

محمد:" زين ياحمد وش قلت اتيي معاي والاااا لا؟؟"

حمد وهو يفكر:" والله مدري والشغل عني؟؟"

فيصل:" وانت مدري وش مسوي، اقوول سافر احسن."

حمد:"وليش ماتروح انت."

محمد:" والله فكره تعال انت وياه."

فيصل:" وأختك وين اخليها؟"

محمد:" بتضيع اهي؟ خلها هني عند أمي بالبيت."

فيصل:" مدري اشوفها بالأول وبعدين ارد عليك خبر."

محمد:" صاااار."

 

^^^^^^^^^^^^^^^^^^^^^^^^

 

دخل البيت ولأول مرة ماكان شارب شي ومزاجه رايق.. وقعد على الكنب بالصالة وظل يفكر..

ام عبدالله:" خير وش جابك الحين؟؟"

ابوعبدالله:" مافي شي."

ام عبدالله:" تبي أخلي لك العشاء؟"

ابوعبدالله:" لامو يوعان، وينها بنت بدروووه."

ام عبدالله مستغربه:" فوق ليش؟؟"

ابوعبدالله:" متى بتبدأ إمتحاناتها؟؟"

ام عبدالله:" بعد اسبوع بس ليش تسأل؟؟"

ابوعبدالله:" قلت لج ماكو شي."

قربت صوبه وقعدت على الكنبه اللي مجابلته:" ماااايصير ماكو شي وانت قاعد وتسأل، أكيييد يدور براسك شي وماتبي تقوله."

ابوعبدالله:" ياثقل دمج لين تليقفتي، وثانياً كل شي بوقته حلووو."

ام عبدالله:" والله ماني فاهمه ولاشي من اللي تقوله."

ابوعبدالله:" والله عساج مافهمتي."

وقام من مكانه وراح لغرفته، كان ابوعبدالله مشغول باله ويفكر ابلاوي يبي يسويها..!!

طالعته وهو يركب الدرج:" والله هالريال بجنني، مدري وش يدور براسه؟"

فتح باب الغرفة وعلى طول مسك سماعة التلفون ودق على رقم رفيجه:" مرحبااا ابوعمر، ايييه مازلت عند وعدي لك، ومايصير خاطرك الاطيب، شنو؟ لااالااا انا مازلت مُصر على اني اوريه على اللي سواه فيني، وش تقول؟؟ حتى لوكنت أنا الغلطان، ماراح ارتاح الا لما ابرد حرتي فيه. تصدق يوم سمعت عن الحادث اللي صار لولده استانست وااايد. ههههههههههههه شي اكيد انا ماراح اخلف وعدي لك.. مع السلامه."

وبعد ماكلم ابوعمر، خلى راسه على المخده وناااام، والحقد اللي بقلبه كل ماليه يزيد!!

 

 

ياترى منو ابوعمر؟؟ وش سالفته ؟؟ وش اللي كان صاير بين ابومحمد وابوعبدالله ويبي يبرد حرته؟؟؟ وشنو الوعد اللي واعده لأبو عمر؟؟

 

 

[حفرت اسمك على قلبي]

الجزء السابع

 

 

بعد ماتغدو قعد معاها على الكنبه بالصالة وفتح التلفزيون يطالع الأخبار، كانت نجود تفكر وسرحانه بمشكلة أخوها ،، ومشكلتها.. وانتبهت على صوت فيصل اللي كان يتكلم وماكانت تسمعه ولامنتبه له.

فيصل:" هييييييييي ويييين رحتي؟؟ اعترفي كنتي تفكرين في منو؟؟"

نجود وهي مبتسمه:" افكر في حبيبي."

فيصل:" أشكرج من صماصيم قلبي."

نجود وهي تضحك:" ههههههههههه حلووة صماصيم قلبك، بس أنا ماقصدتك انت!"

فيصل وعدل قعدته وطالعها:" نننننننننعم."

نجود اطالعه على صوب:" حبيبي محمد، ماتعرفة؟؟"

فيصل:" لاوالله ماتشرفت بمعرفته للحين وش رايج تعرفيني عليه."

نجود:" من عيوووووووني."

فيصل:" تسللللللللم عيونج يالغاليه."

وسكتو شوي لأنه قعد يطالع مباراه على القناه الثالثه، واندمج فيها واااايد لدرجة ان نجود اتسملت من القعده جذي..وبعد ماخلص الشوط الأول من المباراه طالعها ولقاها سرحت مرة ثانيه..

فيصل:" نجود حبيبتي شفيج؟"

طالعته وحست انها تبي تصيح بس يودت نفسها:" مافيني شي."

فيصل وهو رافع ويهها بويهه:" اشووف طالعيني، وين مافيج شي وانتي الدمعه بعينج؟"

نجود:" مدري مدري."

فيصل:" مايصير ماتدرين؟؟ حبيبتي أشوف الدمعه بعيونج وأسكت؟"

نجود:" فيصل أنا خايفة على أخوي و....."

وقبل لاتكمل قاطعها:" أخوج ان شاءالله ماعليه شر، والحمدلله انه متفهم لوضعه وجريب بسافر علشان يتعالج."

نجود مستغربه:" بســافر؟؟"

فيصل:" ايه بسافر، نسيت أقولج محمد قال بسافر يمكن الاسبوع الياي،، وبروح وياه حمد وقال لي أروح معاهم."

نجود:" شنوووووو،، بتسافر؟؟"

فيصل:" هذا طبعاً بعد إذن القيادة العامه."

نجود:" وانا وين اتخليني ان شاءالله."

فيصل:" في عيوووني ،، اممم شرايج تنامين في بيت خالتي الااهي امج."

نجود:" لاااااااا."

فيصل:" زيييين خلي واحد من اخوانج يرقد هني معاج ووحده من خواتج."

نجود:" لااااااااااا."

فيصل:" وش الحل؟"

نجود وهي اطالعه:" ماتسافر."

فيصل:" لييييييييييش؟؟؟"

نجود (وبرطمت) عليه:" قووول تبي الفكة مني."

فيصل:" افاااااااااا أنا اقووول جذي عنج لااا لااا.." وسكت خمس دقايق وهو يفكر وفجأه قال لها:" وش شرايج تسافرين معانا؟"

نجود:" والله.. اي بيي وياكم."

فيصل:" ووووووول عليج على طووول ماترفض."

نجود:" هااااااا ردييييينا."

فيصل:" لاااالالااااااا." وحط يده على حلجه لايقول شي ويلاقي نفسه بالشارع.

 

^^^^^^^^^^^^^^^^^^^^^^^^

بعد ما أنهت مراجعتها رمت نفسها على سريرها بعد تعب الدراسة، ظلت إطالع سقف الغرفة وتفكر في أخوها محمد، إلتفتت لمكتبتها الصغيرة الموجوده بالركن الثاني من الغرفة قامت وفتحت أحد الأدراج وصارت تتلمس القصص الموجوده داخله..

" والله ومن زمان ماقرأت قصة، بس الدراسة ماخذه وقتي.. وانا مابي مجموع ضعيف، بس وش فيها أنا خلصت الحين يعني عادي." واختارت قصة من القصص اللي مارقرأتهم وراحت على سريرها وانبطحت تقرأ.. وبسرعه راحت في عالم ثاني غير العالم اللي هي كانت فيه!! وأندمجت بأحداث قصتها بسرعه عجيبة ، سمر كانت من النوع الحالم اللي يحب قصص الحب والرومانسية بس ماكان يبين عليها لأنها ماتوضح هالشي لأحد. وقفت عن القراءه وصارت تفكر:" ياترى ليش مايصير عندنا جذي؟؟"

كانت القصص ورسوماتها للشخصيات خلتها تعيش أحلام ورديه.. وأنتبهت لصوت دق على الباب.. وقامت وفتحته وشافت خلود رازه الويه:" للللللللحين راقده؟"

سمر:" راقد في عينج."

خلود:" أجل وش كنتي تسوين؟؟"

سمر:" مالج خص، وش تبين مني الحين؟"

خلود:" والله بنروح لمحمد حبيتي اتيين حياج الله ماتبين قعدي مكانج."

سمر:" دقااااااايق وانا تحت."

خلود:" بسرعه لأن أمي وخالتي بالسيارة."

ماسمعت ردها لأنها من زمان دخلت حجرتها.

 

^^^^^^^^^^^^^^^^^^^^^^^^

كان المستشفى هادئ جداً، الامن أصوات بعض الزوار.. فتحوا الباب وبكل هدوء..

أم محمد:" ياعمري نايم.."

سمر:" اكيييييد يايين الظهر."

أم فيصل:" وين الظهر الحين الساعه أربع."

أم محمد:" خلود قلتي للسايق يعطيج الأغراض؟"

خلود:" قبل لاتقولين."

وكل وحده قعدت على كرسي وقعدوا يسولفون، وبعد ربع ساعه قعد محمد وأول مافتح عيونه شاف خالته وقعد على طول على باله سحر وياهم.

خلود وهي تضحك:" مساء الخير ياقمر، شفيك قاعد مختبل."

محمد وهو يتثاوب:" أبــدااً ولاشي سلامتك."

أم محمد بحنيه:" هلا حبيبي شخبارك الحين؟"

محمد:" هلا بيج يالغاليه، بخير دامج بخير."

أم فيصل:" هلاوغلا بوليدي."

محمد:" أهليييييييييين بالخالة شخبارج؟"

أم فيصل:" والله ننتظر خروجك وسلامتك."

محمد:" ان شاءالله."

سمر:" إحم إحم، نحن هناااا."

محمد:"هههههههههههه لاتخافين مانسيتج، شخبارج انتي وينج ماتتصلين ولاتسألين؟"

سمر:" انا بخير الحمدلله، والله الجامعه ماخذه كل وقتي والامتحانات قربت."

محمد:" على طاري الجامعه وش اخبار دراستك، زيييينة والاااااا؟؟؟؟"

سمرببإتسامه:" عاااااااال العااااااال."

خلود وبضحكة خافته:" طل."

سمر طالعتها بسرعه:" طل في عينج، قولي حق روحج هالحجي."

محمد:" اوووووووووووه وانتووو للحين تتهاوشون؟"

أم محمد:" اسكت مدوخيني اهم واخوانك."

محمد ويبي يحرهم:" وأنا يمه."

أم محمد:"لااااا انت غير، انت تنحط على الجرح يبرا."

أم فيصل:" صااادقة."

خلود وبإنفعال:" لااااااااا واحنا يمه عيال الجيران."

أم محمد:" هههههههه لاتخافين على عمرج."

سمر:" وين ماتخاف وهي آخر العنقود."

خلود:" طالع هذي الثانيه محترة بعد."

سمر:" مابحتر الامنج."

محمد:" ههههههه والله كأنكم نسوان ريل."

سمر:" ووووي اسم الله علي."

وبعد سواف الحريم اللي تعود عليها محمد، سمعوا دق على الباب وقامت خلود تفتحه.

خلود:" هلااااااااا وغلاااا ببيت العم." ودخلت الغرفة:" هذلين بيت عمي."

أم محمد:" حياكم الله، ياهلا وغلا."

أم حمد:" الله يحيج حبيبتي."

أفيصل:" هلا بأم حمد شخبارج؟"

أم حمد:" بخير الله يسلمج انتوا شخباركم؟."

أم فيصل:" والله دامكم بخير حنا بخير."

مريم ونوف:" السلااام عليكم."

وردوا عليهم كلهم..وقعدوا يم سمر وخلود..

محمد:" وين عمي؟"

أم حمد:" راح الشركه، وسلم عليكم كلكم."

محمد:" الله يسلمج."

خلود ونوف اندمجوا بسوالفهم بسرعه.. والباقي ظلوا يسولفون مع بعض.

مريم تسأل سمر:" وين سحر، غريبة مايت معاكم؟"

سمر:" مدري بسأل خالتي..،، خالتي ليس سحر والعنود مايو معاج؟"

أم فيصل:" العنود في بيت فيصل، وسحر مسكينه تقول عندها أختبار وتبي تذاكر."

سمر:" اهاااا."

مريم اطالع سمر:" متى تبدأين إتحانات؟؟"

سمر:" بعد إسبوع تقريباً، وانتي؟"

مريم:" لااااا انا خلصت الحين عندي إجازة اسبوعين."

سمر:" يابختج، حاسة اني بمووووت من هالمقررات كل واحد أصعب من الثاني."

مريم:" اجل لو تيين تدرسين تمريض وش قلتي."

سمر:" لاالالااا ماااحب، خلني بالجامعه أبرك لي."

مريم:" لكن تصدقين الكلية حلوووة رغم التعب اللي نحصلة."

طالعهم محمد وسألهم بصوت خافت:" وش تسولفون فيه؟ والله مليت سوالفهم."

سمر:" نسولف عن الجامعه والكلية."

محمد:" والمعهد وين مكانه من الاعراب؟"

مريم:" ههههههههه ضمير مستتر."

محمد:" هههههه اكيييييد، مريم انتي وين تدرسين؟"

مريم:" بكلية العلوم تمريض."

محمد:" وصار لج جم سنة؟"

مريم:" توني سنة أولى، وباقي سنة ونص وأتخرج."

محمد:" اهااااا يعني اكون من زماااااااااان طلعت من هني."

سمر وهي اطالعه:" شي أكيييييييييد وش ناااوي على عمرك."

مريم:" لاوالله وش تقصدين؟"

سمر:"لابس اقول اذا ناوي على عمره خلج تعالجينه."

محمد:" هههههههههههههههه لامشكورة بعدي شباب."

مريم واطالعهم شلون بيتعاونون عليها:" أشوفكم لاعبين بحسبتي."

سمر:" افااااااا لالالاااا ماعاش اللي يلعب بحسبتج."

محمد:" ماعليه اذا فيه هندي مريض بييبه لج تعالجينه."

سمر:" هههههههه فأر تجارب."

مريم وهي قايمه:" انا بقوم عنكم مابتخلون شي الاوبتقولونه."

سمر وهي تسحبها:" تعاااالي نمزح معاااااج، ماتشدين مزح الظاهر."

مريم:" لا أشده."

وبعد ساعة من سوالف وضحك، سلموا عليه ورجعوا البيت لأن أذان المغرب يأذن.

 

^^^^^^^^^^^^^^^^^^^^^^^^

كانت هي وعبدالله وأختها هديل يطالعون التلفزيون، أبوهم كالمعتاد بره البيت وأمهم في بيت الجيران. كانت شوق حاسة براحة وهي قاعده ويااختها بدون ماحد يخرب عليهم ويزعجهم.

شوق:" عبود حبيبي أبتعد عن التلفزيون، لاتأذي عيونك."

لكن عبدالله مايسمعها لأن مندمج بالفلم اللي قاعد يطالعه..

هديل:" عبووووووووووود ارجع لورى شوي."

طالعها وهو مقهور:" وش تبين ماتخليني أطالع على كيفي."

هديل:" شنوو على كيفك ، عيونك لاتعميها ارجع لورى."

شوق:" حبيبي عبود اسمع الكلام."

عبدالله:" ان شاءالله." ورجع خطوتين وقعد."

هديل وهي تضحك:" ههههههه طالعيه ماسوينا شي."

شوق:" وش انسوي له خليه على كيفه."

هديل:" مدري كيفج."

شوق:" باقي اسبوع قمتي تراجعين المقررات والا؟؟"

هديل وهي ترسم بالدفتر اللي بيدها:" اكيد مابي اراكمهم على بعض، وانتي؟"

شوق:" انا من زمان لاتنسين في أشياء طافتني وقاعده الحق على عمري مابي ينزل مجموعي."

هديل:" ماشاءالله عليج طالعه علي."

شوق تضحك:" ههههههههه يعني مو إنتي اللي طالعه علي."

هديل:" شي أكيد انتي خخخخ."

وطالعت شوق الساعه:" وووي الساعه تسع وللحين ماردوا من بره؟"

هديل:" وش تبين فيهم، من زين القعده الحين وياهم."

شوق:"ههههه بس تصدقين ونااااسة جذي ماخذين راحتنا." وطالعت الدرج:" وينها هدى؟"

هديل:" وش دراني فيها يمكن نايمة."

شوق:" بروح اشوفها."

هديل وهي ساحبتها:" قعدي وووووين خليها تولي."

شوق:" ماعليه برجع لج."

وركبت برشاقة على الدرج، وراحت لغرفة هدى ودقت الباب:" هدى.. هدى؟؟" لكنها ماسمعت رد.. وقالت اكيد نايمة.. ولما دارت بترجع طالعت ضوء غرفتها مبطل. استغربت وراحت وسمعت هدى قاعده تغني.. وفتحت الباب والاهدى مطلعة ثياب شوق وقاعده تجربهم عليها، وزجاجات العطر مبطلتهم وتجربهم.

شوق بإستغراب:" شتسويييييييييين؟؟؟؟؟؟"

هدى وبكل ثقة:" اشوف لي شي حلووو."

شوق:" شنووو، خلي ثيابي وطلعي بره."

هدى طالعتها بإحتقار:" شنو؟؟ سدي حلجج وثانياً كيفي آخذ اللي أبي والا عندج مانع، وحتى لوكان عندج ماتقدرين تسوين شي.." وأخذت تيشرت شوق اليديد وعطر شوق المفضل:" باخذ هذلين واذا موعاجبج دقي راسج بالطوف." وهي طايفة وقفتها شوق:" اوقفي." طالعتها بكل قهر وعطتها اصطار على ويهها.

هدى اتفاجأت من اللي سوته شوق..وبكل غضب:" هييين أراويج." وركضت لغرفتها تصيح."

شوق كانت مستغربه من نفسها وااااااايد، كانت لأول مرة تمد يدها على أحد، بس هدى عصبتها وايد وهي تكلمها بهالطريقة هذي. طالعت شكل غرفتها اللي عفسته هدى وسكرت الباب ونزلت تحت.. وهي قاعده يم هديل تنهدت بصوت مسموع.

هديل:" شفيج تتنهدين جذي؟؟ وثانياً وين هدى؟ليش مهلتي فوق؟"

شوق طالعتها بنظراتها اللي مليانه حزن:" صفعتها."

هديل بإستغراب:"صفعتيها؟؟ ليييييييش وش صار؟؟"

شوق:" مارحت فوق الا وهي داخله غرفتي ومطلعه كل ثيابي وتجيكهم عليها، وعطوراتي.. وقامت تقول لي كلااام حلوو ولأول مرة أمد يدي عليها."

هديل:" الله ياخذها.. ماتيوز عن سوالفها لكن أوريها."

شوق:" لاااا مافي داعي اللي سويته انا يكفي ان بيزيد العداوة بينا."

هديل:" لكـــــــن... أكييييد بتقول لأمي وابتعدي السالفة على خير."

شوق وبضحكة سخرية:" ههه عاااااااادي كل شي صارعادي عندي."

طالعتها هديل وحضنتها، كانت حاسة بالإضطهاد والظلم اللي تعيشة شوق بس مابيدها شي. عبدالله كان مندمج ولاكان يدري وش صاير عندهم. بعد نص ساعه نام عبود مكانه وحملته شوق لغرفته علشان يكمل رقاده هناك. ورجعت كل وحده منهم لغرفتها. وبالصالة اللي تحت دخلت أم عبدالله وهي شاقة الحلج من الوناسة. وركبت الدرج وقبل لاتدخل شافت غرفة هدى مفتوحة وراحت اطل عليها وشافتها تصيح..

أم عبدالله بدهشه:" شفيج حبيبتي تصيحين؟؟"

هدى تمسح دموع التماسيح:" شوووقوو."

أم عبدالله:" وش فيها هذي؟؟"

هدى بكل حيلة ومكر:" صفعتني بدون سبب."

أم عبدالله اللي عصبت من سمعتها تقول جذي:" هي الظاهر محد رباها، وينها فيه؟؟؟؟"

هدى:" بغرفتها."

وقامت أم عبدالله انتاديها:" شوق، شوووقوو.."

وعلى صوتها اللي صدع البيت طلعت هديل وشوق من غرفهم..

هديل:" خير يمة شصاير؟"

ماطالعتها وراحت لشوق وعطتها صفعة على ويهها وكانت تبي تضربها بعد لكن هديل وقفت في ويه أمها:" حرااام عليج وش سوت لج البنيه."

طالعتها:" تباعدي ياهديل احسن لج."

هديل:" ماني متباعده الاتقولين وش صاير؟"

أم عبدالله:" هذي أول مرة وآخر مرة أسمح لج فيها تلمسين فيها بنتي."

شوق كانت ماسكه خدها واطالعها بعيونها اللي صارت جمرة:" بس هي اللي تعدت على اغراضي."

أم عبدالله:" وخيييييييير يعني وأخذت من عندج، نقص منج شي؟؟"

هديل اطالع امها وهي خايفة انها تضرب شوق أكثر.لكن أمها تراجعت وراحت غرفتها.

هديل وهي أطالع هدى بنظرات كره:" بتشوفين ياهدايوو اوريج."

هدى طالعتها بنظرة انتصار ودخلت غرفتها بدون ماتهتم لها ولتهديدها.

شوق:" شفتي انا قلت لج ماله داعي تسوين شي لأني عارفه انها مابتخليني."

هديل:" وانتي الثانية شقاعده تخربطين؟؟ خيووه شوق علشان خاطري امسحيها فيني أدري ماقدرت اسوي شي لج و.."

قاطعتها:" ااششششش قلت لج عااادي تعودت ياهديل، اذا مااستحملتهم وين أروح؟؟؟" طالعتها بإبتسامه:" تصبحين على خير."

هديل طالعتها بإستغراب:" وانتي من أهله." رغم كل اللي يصيدها الا انها تستحملهم ولاتحقد عليهم.

 

^^^^^^^^^^^^^^^^^^^^^^^^

كان يركض على الدرج بسرعه وسلم على أمه وطلع..

أم محمد:" سييييييييف ويييين ماتريقت؟؟"

سيف بعجله:" مااابي مع السلامة."

أم محمد:" الله يسلمك،علاااامة هذاااا مستعجل؟"

نجود:"هذا كله جذي ماعمري شفته يمشي بالعدال."

أم محمد:" الله يهديه ويهدي أخوانه."

نجود:" ان شاءالله."

أم محمد:" جان اتصلتي في خالتج وقلتي لها ان محمد بيطلع اليوم."

نجود:" اتصلت وخبرتها البارحة."

أم محمد:" والله انه معور قلبي اذا اشوفه بالمستشفى."

نجود:" وانا بعد صدقيني يمه احسه متضايق حيل."

أم محمد وهي تمسح دمعه طاحت من عينها:" الله يحفظه ان شاءالله."

نجود:" يارب، يمه انا بقوم اتصل لشيخة اشوفها ليش للحين مايت."

أم محمد:" زين وقولي لها لاتنسى الحلاوة اللي وصيتها اتييبه."

نجود:" ان شاءالله."

وبعد ثواني،، نجود:" مدري الظاهر طلعت محد يرد علي، بشوف بتصل لها على تلفونها."

أم محمد:" شوفيهااا."

نجود:" ألووو هلا شيخة السلام عليكم."

شيخة:" وعليكم السلام."

نجود:" وينج فيه؟؟"

شيخة:" في الطريج يايه."

نجود:" اهااا زين، تعالي اقول لج امي تقول لاتنسين الحلاوة."

شيخة:" مانسيتها لاتحاتي."

نجود:" اوكي انطرج مع السلامه."

شيخة:" الله يسلمج."

وبعد ماسكرت السماعه، طالعتها امها وقالت لها نجود:" لاتحاتين مانست شي وهي بالطريج."

أم محمد:"زين انا بقوم اشوف الخدامة وش سوت."

نجود:" انا بقوم أقعد بالصالة."

وبعد نص ساعه نزل أحمد من فوق..

نجود:" صباح الخير،، توه الناس.."

أحمد يطالع الساعه ويتثاوب:" صباح النور..وين الريوق؟"

نجود:"ههههه دربك يمين.. وين لااضيع."

أحمد:" هاها مايضحك."

وراح المطبخ وأخذ له عصير فرش، وقطعة كيك مسويتها نجود،، وراح يقعد وياها بالصاله

نجود:" ليييش طالع من المطبخ بالأكل؟؟؟"

أحمد:" ماحب أجابل طوفة هناك.."

نجود:" أمي بالمطبخ.."

أحمد يشرب العصير:" لامب هناك يمكن بالمطبخ اللي بره." وقعد ياكل وهو يطالع الأخبار، وبعد ماخلص سألها:" وين فيصل؟؟"

نجود تتصفح المجلة:" بالشركة، ليش انت مابداوم؟؟"

أحمد:" اهااا،، اي بداوم بس لأن ماعندي شغل وايد اليوم قلت أرقد لي شوي،، وتعااالي أنتي يسلم عليج محمد ويقول ليش ماتمرين عليه والا مايستاهل نص ساعه من وقتج."

نجود:" لاااااااا من يقول جذي،،بس انشغلت وايد..تصدق مازرته الامرة اومرتين."

أحمد:"واااايد عليج جان خليتها نص مرة."

نجود:" اتخيفف.. على العموم بجابلني أربع وعشرين ساعه بعدين."

أحمد مستغرب:" شلووون؟؟"

نجود:" خبرك بسافر لندن هو وحمد وفيصل، وقال لي فيصل اروح وياه."

أحمد:" ياسلااااااام قال لج والاانتي لزقتي فيه وحنيتي عليه لين ماخضع للأمر الواقع."

نجود:" لوقت في عينك، والله هو مايقدر يفارجني ولايستغني عني أبداً."

أحمد يمزح معاها:" سكتي لايطيح منج عرج،، قالت مايتسغني."

نجود:" من الحرة..مابتروح."

أحمد:" والله لوأبي أسافر مانطرتج خخخخخ."

وتوها بترد عليه إلا شيخة فاتحة باب الصالة:" السلاااام عليكم."

وردوا عليها اثنينهم:" وعليكم السلام."

شيخة:" أحمد الله يخليك روح لخدامتي بره وخذ الأغراض من السيارة مابتقدر شيلا تشيلهم بروحها."

أحمد:" ان شاااااءالله بس هالله هالله بالطباخ ماوصيكم."

شيخة:" ههههههههههههه مايهمك الاالطباخ وتعيب على سيووف بعد."

سيف واللي دخل بدون ماحد يسمعه:" وش فييه سيوووف تحشون من وراي هااااا."

نجود:" تعااال شوف المحامية شيخة ادافع عنك."

أحمد واللي بيشرد قبل لايتشمت فيه أخوه:"لالاااا أبدااا ماكو شي."

سيف ماكان مهتم وايد:" اهااا زين وين رايح؟؟"

أحمد:" بروح اشيل الاغراض وياشيلوو وراجع."

سيف:" انطرك اهني."

أحمد:" اوكي."

شيخة:" من وين ياي؟؟؟"

سيف وهو ياكل الكاكو اللي كان بيده:" من عند رفيجي."

نجود:" الحين طالع من الصبح بدون ريوق علشان رفيجك ماعندك سالفه."

سيف:" عندي شغل معاه."

ودخل أحمد وهو ينافخ:" حشى مواغراض اثقال هذلين."

شيخة:" هههههههه الله يعطيك العافية."

أحمد:" ويعطيج العافية."

سيف:" ويييين على الله؟؟"

أحمد:" بروح اييب تلفوني من فوق، وانت الحين وين بتروح؟"

سيف:" مدري مالي خلق أداوم، شكلي بقعد بالبيت اليوم."

أحمد:" بدون عياااارة وقوم.. انا بروح بعد ربع ساعه."

سيف:" روح انت انا مب رايح."

نجود:" صج عياااار انت، روح اشتغل وش بتسوي بالبيت؟"

سيف:" مالي خلق.."

شيخة تمزح وياه:" اذا بتقعد تعال ساعدني بالمطبخ."

سيف:" شنووووووو لاوالله هذا اللي ناقص، هذي شغلتكم انتو مب احنا، انا بقوم لاتخلوني اغسل مواعينكم."

شيخة:" هههههههههههه تعااال وين رايح."

سيف:" رايح غرفتي."

شيخة:" ااااااااقعد أمزح."

وقعد مرة ثانيه وأحمد ركب فوق بسرعه لأن تلفونة بينفجر من المكالمات>> وكيل الوزراء

نجود ظلت اطالع مجلتها ولما سمعت سيف يسولف عن محمد تذكرت السفر وقالت لهم:" سمعتوا آخر خبر."

سيف:" لاوش صاير؟"

شيخة:" خير ان شاءالله."

نجود:" بسافر ويامحمد لندن."

شيخة:" والله؟ ومن متى هالقرار؟"

نجود:" من يومين."

سيف:" ومن بروح وياكم؟"

نجود:" انا وفيصل وحمد بس."

سيف:" يابختج.."

شيخة:" نجود حبيبتي ممكن اكلمج بسالفة."

طالعها سيف:" يعني قولي قوم ياسيف بقوم، مافيها شي بضف ويهي."

شيخة:"ههههههههههه لاماقصدت جذي بس تدري قوووم سوالف حريم."

سيف وهو قايم:" انا قايل بروح غرفتي، وانا عارف سوالف الحريم ماتخلص اذلف احسن لي، عن اذنكم."

وبعد ماراح عنهم قعدت شيخة يم نجود وقالت لها:" نجود أدري يمكن تتضايقين من اللي بقوله بس تحمليه."

نجود واللي قلبها يدق بسرعه:" وش صاير؟"

شيخة:" مافيه الاالخيرلاتخافين، انا اقول مدام انتي بتسافرين ليش ماتشوفين علاج لسالفة الحمل؟"

نجود من سمعت كلمتها دمعت عينها:" واحنا ماقصرنا سافرنا اكثر من مكان، صار لناسنتين واحنا على هالحالة وماكو فايده بالرغم ان كل التقارير اتأكد ان اثنينه مافينا شي."

شيخة:" شفتي يعني اكييييد في أمل، خلي ايمانج بالله قوي وتوكلي عليه وان شاءالله بيتحقق اللي تبينه، بس لازم تتحركين على عمرج مرة ثانيه."

نجود ظلت اطالعها ولدموع اتجمعت بعينها، لأن هذا الشي الوحيد اللي معكر حياتها وكانت تتمنى لو انها اتيب حتى لو ولد واحد لفيصل. وتسكت الناس ونظرات خالتها اللي كل مرة تشوفها فيها تحس انها بتقتلها.

 

 

 

 

Edited سبتمبر 7, 2005 by حفرت اسمك على قلبي

[حفرت اسمك على قلبي]

^^^^^^^^^^^^^^^^^^^^^^^^

كان الجو كأيب بالنسبة لها، لأن أفكارها صارت مشوشة بين كلام ميثة واحلامها اللي ماتبي تحققها الا مع محمد.

سحر:" مدري حاسة اني مشوشة ومب عارفة افكر لأول مرة يصيدني جذي."

ميثة:" وش فيش؟؟؟"

سحر:" مافيني شي تدرين برجع البيت..!!

ميثة:" وووووووين تعااالي ليش بتروحين؟؟"

سحر:" مالي خلق قلت لج."

ميثة:"تعاالي قعدي كاهي شذى وسوسن وصلوو."

سحر:" افففف وش يابهم هذلين بعد."

ميثة:" بلييييز قعدي."

سحر طالعتها والقهر ببط بجبدها وقعدت مكانها..

سوسن:" هااااااااي شخباركم؟"

سحر طالعتها بإبتسامه مصطنعه وميثة سلمت عليها...

شذي:" هاااي شفيكم؟؟ سحر خير شكلج تعبانه اومتضايقة؟"

سحر:" لااا سلامتج مافيني شي."

شذى:"اهاا زين، ميثو حبيبتي شخبار عزيز؟"

ميثة:" بخير ليش تسألين؟"

شذى:" لابس اسأل."

ميثة:" مايصير اكيد ورى سؤالج شي، قوليه؟"

سوسن:" قولي لها."

ميثة مستغربة:" وش صاير؟؟؟ وش فيه عزيز؟"

شذى:" شفته وياوحده بالمول."

ميثة واللي مب مصدقة:" شنووو اكيييد مخربطة انتي؟"

شذى:" لاانا متأكده."

ميثة:" وش اللي يأكد لج؟"

شذى:" مشيت جريب منهم وسويت نفسي اتكلم وبالتلفون مع اخوي عزيز وقلت اسمه وعلى طووول فر راسة وطالعني، وقلت علشان اتأكد اكثر لحقته يوم بيطلع وشفت سيارته، مب لونها أحمر؟"

ميثة منصدمة من كلامها:" اي حمرة، بس أكيد انتي غلطانة مستحيل عزيز يطلع وياحد غيري."

سوسن:" هيييي انتي اصحي مثل ماانتي تعرفين غيره هو يعرف غيرج الف."

طالعتها سحر:" انا قلت لج مثلة مثل غيره دامج متعرفه عليه من شات."

ميثة قامت بسرعه تتصل لعزيز لكنها رجعت لأن تلفونه كان مغلق...ظلت ميثة سرحانه وتفكر باللي قالته شذى هل هو صج والاجذب.؟!

 

^^^^^^^^^^^^^^^^^^^^^^^^

 

دخل والابتسامة شاقة الحلج..

حمد:" السلااااام على أهل الدار."

محمد:" وعليكم السلام.. ووووينك مختفي."

حمد:" والله بالشغل والاتبيني اجابلك 24/24 ساعه."

محمد:"هههههه لابس نبيك تسأل، والله اخاف بالقهاوي مب بالشغل يالمكااار."

حمد:" انا مكااار،، لكن شوف من اللي يقعد وياك."

محمد:" اقعد زين مسوي نفسك زعلان."

حمد:" شلون يعني مانزعل والامايحق لي؟"

محمد:" لايحق لك بس موالحين، حمد مريت على الدكتور؟"

حمد يهز راسه لأنه مشغول بأكل الحلويات الموجودة على الطاولة..

محمد:" شوي شوي لاتغص شفيك انت احد لاحقك."

حمد بعد مابلع اللي في حلجة:" شفيك انت ماتخلي الواحد يتنهى بأكله."

محمد:" انت الظاهر ياي تاكل موتقعد وياي."

حمد خلى اللي بيده وجابله:" تفضل آمر قول وش عندك؟"

محمد بإبتسامة عريضة:" أشكر تعاونك، ياولد عمي يالحنون يالطيب وش قال لك الدكتور بطلع اليوم والاباجر؟"

حمد:" هو مامر عليك؟"

محمد:" شفته من يومين ولامر علي بعدها."

حمد يقلد الدكتور:" آه أيوة حيطلع بكره بس ها مايتعرضش لحركة، دي مسؤليتكو فاهم ياابني."

محمد وهويضحك:" ايوووة ياعم."

حمد:"ههههه والله انه يضحك هالدكتور كأن شحات."

محمد:" هههههههههه وش عليك منه."

حمد:" وانت الصادق وش عليه منا، قعدت وياه وعور راسي ،، انت متجوز؟ انت بتشتغل ايه؟ وبتاخذ كام؟ وليه ماتجوزتش لحد دلوأتي؟؟ وانت مالك ومااالي اففف."

محمد مجود بطنة من الضحك:" الله ياخذ ابليسك ذبحتني."

حمد:" والله صدقني."

محمد:"مصدقك، اقوول حمد أبيك في سالفة."

حمد:" سالفة والاسالفتين؟"

محمد واللي يعرف حركاته:" حمد عن الحركات هذي اتكلم وياك جد."

حمد:" جد والاأب."

محمد واللي بسرعه ينقهر منه:" اففففف حمدوو يوز احسن لك لاصفعتك بقلاص الماي."

حمد:" افاااااااااا ماهيقتها منك."

محمد:" ولييييييييه آسف ياأخي بس المزح خله بعدين مووقته."

حمد يهز راسه بعلامة الموافقه،،

محمد:" أول أمس اتصلت لسحر."

حمد من سمع اسمها تغيرت ملامحة، حمد بعد ماكان يحب سحر رغم حب محمد لها الا انه يشوفها انسانه شايفة نفسها ومغتره بشكلها وايد:" شفيها؟"

محمد:" شفيك تسأل كأنك مب طايق تسمع؟"

حمد:" لااااا كمل كلامك."

محمد:" اتصلت لها وسألتها عن رايها بالإرتباط بواحد معاق؟"

حمد:" وش تخربط انت من قال انك معاق؟؟ انت راح تمشي بإذن الله وترجع مثل قبل."

محمد:" انا لازم افترض هالشي يمكن ارادت الله غير، وانا على العموم سألتها."

حمد واللي متحمس يعرف وش ردت عليه:" وش قالت؟؟"

محمد وهوسرحان يفكر فيها:" مدري قالت لي اي عادي وانها مستحيل تبتعد عني، بس أنا حاس انها كانت خايفة من انها تقول لي لا."

حمد:" مافهمت.. وش تقصد بكلامك وضح."

محمد:" يعني احسها قالت اي بس علشان تهدي بالي، واطمني."

حمد:" بصراحة ياولد عمي أنت تعرف رايي بسحر من زمان، بس..."

قاطعة محمد:" وش فيك ياحمد، انت تعرف اني من زمان احبها ومستحيل افكر اني ابتعد عنها."

حمد:" انا ماقلت ابتعد عنها، بس انا اقول سحر انسانه لها طموحاتها الغريبة واللي مااعتقد انها تناسبك."

محمد:" وانت وش دراك انها ماتناسبني؟"

حمد:" سحر تفكيرها اسلوبها في التعامل ونظرتها للحياة غير عنك صدقني."

محمد:" يعني انت ياي الحين تقول لي اتركها، وش هالكلاااام ياحمد."

حمد:" مدري، انت يمكن تعرفها اكثر مني بس انا اللي اشوفه ان سحر غير عنك وماتناسبك."

محمد بعصبيه شوي:" رووح زيييييييين ماتناسبني، ابي اعرف وش اللي مايعجبكم فيها، بالعكس انا اشوفها غييير."

حمد طالعه وسكت كان يقدر يكمل كلامة معاه بس مايبي يعصب محمد اكثر، حمد يعرف ان اللي يحب مايشوف عيوب غيره، ومستحيل يعترف انها موجوده فيه. وفضل انه يسكت ويغير الموضوع أحسن له ولمحمد.

 

^^^^^^^^^^^^^^^^^^^^^^^^

وهي قاعده تسلم على البنات اللي يمكن آخر مرة تشوفهم لأن هذا آخر يوم عندهم بالمدرسة وراح تبدأ إجازة الامتحانات..

بدور:" مع السلامة يابنااات ان شاءالله نلتقي بالجامعه."

شوق:" تعااااااالي انتي وش اتسوين خطبة الجمعة."

شمس:"هههههههههه خليها على كيفها."

شوق:" وووين على كيفها خلونا نخلص هالكتاب بسرعه لأن أيام مراجعتنا قليلة."

بدور:" افففففففففف ماتخلينا نسولف هذا آخر يوم وانتي تبين تراجعين."

شوق:"بدوووور عن النحاسة تعالي راجعي، والله مابتستفيدين من الهذرة."

شمس:" وووين الطموووح من أجل التخرج."

بدور:" طالع ماتكلمت الاهذي،، سكتي سكتي طالع كتابج احسن لج."

شمس:" كل اتجعم فيني مابسكت هااا."

شوق:" نسوان ريل ثنتينكم والله سكتوووو خلوني اركز اذا ماتبون تنجحون قوووموووا."

بدور:"زيييييييييين خلاااااااااص سكتنا."

وكل وحده نزلت راسها بكتابها وقعدت تراجع، شمس كان تفكيرها بالأكل والغدى وكانت تشوف ثلاثة ارباع الصفحات دياي مشوي وسلطة ومحاشي. بدور كانت مستانسة لأن هذي آخر سنة لهم بالمدرسة. الوحيده شوق اللي بالها كان مشغول بدراستها ومفرقة بين حياتها الشخصية والدراسة.

 

وبعد ماخلصوا من المراجعه، سكرت بدور لكتاب وهي اتمغط :" ووووي مابغيت أخلص."

شوق:" حبيبتي توج لاحقة باقي تسع مقررات تراجعينهم."

بدور:" حراااام عليج لاتذكريني."

شمس:" انا يوووووووعااانه ابي آكل."

بدور:" وليييه من وين انيب لج أكل خلصت الفسحة، والحين جريب بنرجع البيت واكلي ثلاجتكم كلها."

شوق:"هههههههههههههههههههه."

شمس:"تضحكين على شنووو هااا، وانتي بدور بوريج."

شوق:" صج شمس تعااالي اقول لج، احسج متنانة عن قبل."

شمس:" هاااا؟؟ لاااا هذا انا ماتغيرت بس يتراوالج."

بدور:" صلي على النبي شنو يتراوالها، الاصج متنانة تعالي بعد نسأل وحده من البنات."

شمس:"لااا واللي يسلمج موناقصة تعليقات."

شوق:" والله وخلصنا المدرسة، بس تصدقوني بتوحشني وااايد."

بدور:" حتى انا بفتقدها والبنات ومدرساتنا."

شمس:" اي وأكل الكافتيريا."

شوق:" هههههههههه طالع هذي مابيوحشها غير الأكل، تدرين انتي مابنخليج تتزوجين الاواحد عنده مطعم خخخ حتى يطبخ وانتي تاكلين."

بدور واللي ماتت عليها من الضحك:"حلوووووووة منج ياشوق."

شمس:" هاهاها بايخة من قال حلووة انتوا قاعدين وتتطنزون علي، الشر موعليكم على اللي يجابلكم."

شوق:" تعاالي والله امزح معاج، زعلتي مني؟"

شمس:"نص ونص أبيج تراضيني الحين."

بدور:" راحت عليج منها."

شوق:" آمري وش تبين؟"

شمس:" مدري كيفج اللي ايي من عندج حياه الله."

وقامت شوق وفتحت شنطتها وطلعت منها جبس وعطتها اياه."

شمس والابتسامة شاقة الحلج:" وااااو مشكوووووووورة ماتقصرين هاتيه بسرعه."

بدور:"ههههههه مفجوعة هالبنيه مدري طالعه على منو؟"

شمس:" سكتي لااوريج."

بدور:" قاعده بوريج وبوريج ماشوف مسوية شي."

شوق:" سكتي لاتنتفج الحين."

لكن شمس كانت مشغولة بأكل الجبس اللي بيدها وظلوا ساكتين عشر دقايق..

بدور:" شوق حبيبتي شخبارج بالبيت؟"

شوق:" والله هذا هو حالي ماتغير."

بدور:" مافي مستجدات؟"

شوق:" بلى صفعة على الويه وسبايب ليل نهار."

بدوربإستغراب:" صفعة؟؟ وش حقة؟"

شوق:" وش تتوقعين؟"

بدور:" مدري مدري بسرعه قولي ابي اعرف."

شوق:" هدى أختي معفسة غرفتي، ومطلعة ثيابي وعطوراتي وتبي تاخذ منهم وعطيتها اصطار على ويهها وبعدين الفك المفترس لازم ادافع عنها."

شمس:" وبعد تسمينها اختج؟ هذي ماتستحق هالكلمة."

بدور:" والله خاطري اذبحهم هالثنتين، مدري شفيهم يرفعون الضغط ويعصبون الواحد."

شمس:" وابووج؟"

شوق:" تصدقون مستغربه منه صار له جم يوم مايقرب يمي ، غير الشتايم اللي يقولها في الطالعه والنازلة."

بدور:" يمكن الله يهديه ويفكج من ضربة."

شوق:" مدري والله، حاسة انه موطبيعي."

شمس:" مااااعليه طبيعي موطبيعي دامة فاكج من الطق خلاااص خلج بعيد عنه."

شوق:" ايه."

 

^^^^^^^^^^^^^^^^^^^^^^^^

 

وبعد صلاة العصر كانت سمر قاعده وياسيف بالصالة الصغيرة يسولفون ، أماخلود راحت بيت عمها..

سمر:" سيف ابي اقول لك شي بس مابيك تعصب."

سيف:" شنوووو؟"

سمر:" انت ليش تعامل سحر بهالطريقة هذي؟ هي وش سوت لك؟"

سيف من سمع اسمها تعكر مزاجه:" افففففففف قلت لج ماحبها هالمغرورة هذي ماطيقهاااااااااااا."

سمر:" زييين بالعدال لاحد يسمعك، بس حرااام عليك لبنيه تشتكي وتقول لي ليش يعاملني جذي."

سيف يضحك بسخرية:" ياحليلها وتشتكي بعد ياسلام مب ناقص الااتيي واطقني."

سمر:" والله تيننون الواحد انتو."

سيف:" سلااامتك ياجميل من الجنان."

سمر:" هههه عن لهبال سيوووف."

وبعد ربع ساعة يات امهم وقعدت وياهم..

سيف:" هلااا بنور العين شخبارج يمه؟"

أم محمد:" بخيرالله يحفظك." وسكتت شوي وقامت اطالعهم:" وش فيكم؟؟ وين أحمد؟"

سمر:" مدري."

سيف:" أنا ادري.. راح لمحمد المستشفى."

أم محمد بحسافة:" ليييييييييش ماقال لي انه بيروح؟ جان رحت وياه."

سيف:" افاااا عليج يمة انا اوديج."

أم محمد:"وش الفايدة جريب اذان المغرب نص ساعه وانا راده مابي خلها بعد الصلاة أحسن."

سيف:" لاااااا بعد الصلاة بطلع ويا الربع يمة خلي السايق يوصلج."

سمر:" توك تقول لها بوصلج يوم صارت بعد الصلاه السايق، وييين بتروح انت؟"

سيف:" مالج خص وين بروح كيفي."

أم محمد:" لاتتهاوشون اعرفكم زين، بس خلاص بروح وياالسايق وباخذ خلود."

سمر:" يمه خلودوو في بيت عمي من بعد ماردت من المدرسة."

أم محمد:" وهذي الثانية ولاكأن عندها امتحانات نهاية السنة."

سيف:" ارووح اييبها؟؟"

أم محمد:" لاااااا اقعد مكانك استاذ حق اتزفها."

سيف طالعها وخش راسه بين الجريده اللي على الطاولة، وسمر تضحك عليه.. وبعد دقايق قامت أم محمد وراحت غرفتها.. وظلوا اثنينهم قاعدين..

سيف:" سمووور حبيبتي.."

طالعته سمر بنظرات شك من هالحبيبتي:" قووول وش تبي بلاحبيبتي بلاخرابيط ادري تبي شي انت."

سيف:" ادري عمري انتي تفهميني على طوول."

سمر:" الحين انا عمرك وافهفك، من شوي مالج خص قووول بسرعه لاقمت الحين."

سيف:" لالالالا أدري ان ركبتي فوق خلاص اغسل يدي منج وياهالقصص، أمممم شخبار اللي خبري خبرج؟"

سمر بإستهبال:" منووو اللي خبري خبرك؟"

سيف:" اووووه سمووور لاتدلعين ادري فيج تستهبلين قولي وش آخر الأخبار؟"

سمر وحبت تلعب بأعصابه شوي:" خطوبتها بعد الامتحانات."

سيف بإنفعال وصوته العالي:" شنوووووووووووووووو،، وش قاعده تقوليييين."

سمر:" ولييييييييييه بس اقعد امزح معاك حشى بتسوي مصيبة انت بصوتك."

سيف قعد ورمى عليها مخده صغيره من اللي على الكنب:" غبييييييية طيحتي قلبي، تعرفيني بعصب ليش تسوين جذي."

سمر تضحك عليه:"هههههههههه حبيت العب بأعصابك شوي بس."

سيف:" ياسلااام وماحبيتي الاعلي انا..حمدي ربج ماذبحتج."

سمر:"ول ول عليك ماصارت ويعني لو بتنخطب شفيها عااادي."

سيف ويقلدها:" ول ول عليك ماصارت...، اذبحج واذبح اللي بياخذها."

سمر:" يممممممممممه خوفتني."

سيف كان يتكلم عن نورة بنت بالثانوية العامة وهذي آخر سنة لها، حباها من يوم شافها بالمدرسة الخاصة اللي درست فيها سمر، ايام ماكان يوصلها للمدرسة لأنها ماكانت تحب تركب مع السايق. وقال بيخطبها بس ابوه ماخلاه لأن هو مازال صغير وهي بالمدرسة وقال له اذا خلصت البنت الثانوية أخطبها لك. وقصة حبهم طاهرة وخاليه من سخافات هالزمن هذا. وكانت سمر الوسيط بينهم اثنينهم وكانت توصل رسائل شفهيه لبعضهم ورسائل مكتوبه.

 

^^^^^^^^^^^^^^^^^^^^^^^^

كانت قاعده تغسل مواعين العشا مالهم وهديل وياها وطبعاً الوحيدة اللي كانت تحب تساعدها. حتى عبود اخوها كان وياهم بالمطبخ يرتب لصحون ويوزعهم بأماكنهم..

شوق:" ياحليلة طالعيه والله ينن.."

هديل:" هههههههه فديته والله.. عبود حبيبي اذا تعبت خلاص روح طالع التلفزيون."

عبدالله:" لااا أبي أكمل وياكم."

شوق:" بس عبود لازم تروح تنام انت اكيد تعبان."

عبدالله:" مب تعبان وماعندي مدرسة وبقعد."

شوق:"ههههه الله يغربل ابليسه لازم يسوي اللي براسه."

ودخلت أم عبدالله وهم جريب بيخلصون:" عبدالله وش تسوي يالله اطلع من المطبخ."

عبدالله وبكل براءة:" اساعد شوق."

ام عبدالله:" حبيبي خلها تولي هي تغسل، يالله تعااال."

هديل:" يمة خليه."

ام عبدالله:" تبين تغسلين انتي كيفج، لكن ولدي لا."

عبدالله:" يمة انا بقعد انتي روحي."

شوق ياتها الضحكة عليه وهو يقول لها روحي.. انقهرت امه وطلعت من المطبخ وهي تلبي عليهم:" هذي مدري متى بفتك منها مأذيتني."

وبعد ماخلصوا راحوا بيقعدون بالصالة كان هناك ابوهم وأم عبدالله وهدى بعد.. قعدت شوق يم هديل بالجهه المقابلة لهم. وظلوا يسولفون ثنتينهم لحد ماقطع سوالفهم صوت ابوهم:" شفيكم ماتسكتون، ازعجتوني."

طالعت شوق هديل وفي ويهها الضحكة، كانت هالأيام فرحانه لأنها جريب بتتخرج من المدرسة.. وبعد دقيقة سمعت صوت ابوها يناديها:" هي انتي شوق."

شوق:" نعم يبه."

هدى اطالع امها:" عشتوا مسوية نفسها مؤدبة مافوقها فوق!!"

أم عبدالله:" زين سكتي خلينا نشوف وش يبي."

أبوعبدالله:" متى تخلصين امتحانات؟"

شوق جاوبته بإستغراب:" بعد اسبوع نخلص."

أبوعبدالله يكلم نفسه:" زيييين زييييين."

شوق كانت مستغربه من سؤاله، وماكانت تجرأ انها تسأله عن السبب لكنها كانت متأكده ان ورى سؤاله هذا شي.

 

^^^^^^^^^^^^^^^^^^^^^^^^

 

كانت متمللة من المراجعه، ورمت كتبها على الطاولة بدون ماتهتم للكتب اللي طاحت على الأرض. كانت تفكر في محمد وبس، وهي منبطحة على سريرها فتحت تلفونها وقعدت تقرأ المسجات اللي يرسلهم لها، وآخر مسج كان المغرب بعد الصلاة. فتحته وقرأته أربع مرات..

( مقدار حبي عالم فيه ربي والاالموازين لغرامي ظلومة.لا لاتقارن حب أمك بحبي أخاف من عينك تطيح الأمومة، أخشى يقولون ماهو متربي مابي أشارك في عقوق الرحومة.ياغايتي ماعاد فيني اخبي حبك تعدى حدود نفس كتومة.) ظلت اطالع المسج وتتأمل وتتذكر كلامة وأحلامها اللي كانت تبي تحققها معاه. وبعد عشر دقايق أرسلت له مسج (صدقني الروح تتمنى تكون قبالك ولأنك بعيد أتمنى بس تخليني على بالك) وبعد ثواني ارسل لها محمد مسج ثاني يقول فيه..( في غيبتك غابت عيوني عن النوم، وين انت ياللي مبتعد عن نظرها.عزالله إني صرت تايه ومجنون ماعاد أميز يومها من شهرها.إن جيت أسلي خاطري عنك وأشوم.. صرت النظر والعين تتبع نظرها.).. وبعد خمس دقايق أتصل محمد لها، وكانت متردده ترد عليه والا لا.. وبعد ماخلته يرن شوي ردت:" ألووو."

محمد:" ألوو السلام على الغالي."

سحر واللي قلبها يدق بسرعه:" وعليكم السلام."

محمد:" شفيج شكلج مشغولة؟"

سحر:" لا بس تعبانه شوي."

محمد:" وبعد ماسمعتي صوتي؟"

سحر بضحكة خفيفة:" صرت احسن." وظلت ساكته وسرحانه فيه..

محمد:" الووو شفيج ساكته؟؟ تبين اخليج ترتاحين؟"

سحر واللي طلعت منها بدون شعور:" اي..أقصد لالا."

محمد مستغرب منها، أول تكلمة بهالبرود:" سحر حبيبتي شفيج؟"

سحر:" مافيني شي."

محمد:" مايصير حاس فيج شي، لاتخشين شي عني."

سحر:" صدقني مافيني شي."

محمد حاول ان مايطول بالسالفة هذي فسألها:" ليييش مايتي وياأمج ذاك اليوم المستشفى؟؟"

سحر:"كان عندي إختبار ماقدرت."

محمد:" وكانت مريم يايه وياأختها ومرة عمي وقعدنا نسولف خسارة ماكنتي..."

وقاطعته قبل لايكمل:" شنووو قلت؟؟ مريم؟؟ وش اللي خلاك تسولف ويااها."

محمد:" بنت عمي شفيها يعني؟؟ عاااادي.. لايكون تغارين منها هالكثر تحبيني؟؟"

سحرواللي توترت من كلمته:" لاا..أنا..انا اصلا ما اغار من وحده مثل هذي."

أستغرب من كلامها وسألها:" وش تقصدين وحده مثل هذي؟؟ سحر شفيج؟"

لكنها عصبت فوق ماهي مقهورة من اللي يصير لها:" مافيني شي أبي انام ووووبس."

تضايق من تصرفها وسكر التلفون حتى بدون مايقول لها كلمة تصبحين على خير، وزاد الطين بله.. وظل يفكر فيها:" وش فيها سحر؟؟ حاس اسلوبها متغير بالكلام، لالا أكييييد انا أتخيل هالشي يمكن هي متوترة من اللي صار، وانا اعرف غيرة البنات..."

أما سحر كانت مقهورة حدها من مريم لأنها استغلت الفرصة وقعدت تتكلم ويامحمد، طبعاً هذا رايها اهي لأن مريم ماكانت تشوف من محمد غير انه اخوها وبس.

^^^^^^^^^^^^^^^^^^^^^^^^

 

طلع أبومحمد من غرفته وويهه يشع فرحة، نزل تحت شافت عياله كلهم ملتمين ويسولفون والفرحة موواسعتهم، محمد بيطلع اليوم من المستشفى وراح يرجع البهجة لهم ان شاءالله.

أم محمد:" طلعتي البخور؟؟"

شيخة:" ايييه، يمه بس حاسبي لايطيح من يدج المبخر."

أم محمد:" مابطيح وش شايفتني عيوز."

شيخة:" هههه لايمه انتي ست الكل."

سيف:" ووووين بدورووو؟؟"

شيخة:" بالصالة اللي هناك، ليييييش؟"

سيف:" لابس جذي اسأل أشوف مالها لويه(ازعاج)."

شيخة:" وش تقصد بالضبط؟"

سيف:" ابد سلامتج."

نجود كانت طالعه من المطبخ وتنادي أمها:" يمة تعالي شوفي أنا ماعرف لطبختج."

أم محمد:" زيييين يايه."

أبومحمد، بعد ماسلم عليهم طلع وياأحمد بروحون يبون محمد من المستشفى.. وحمد كان يحارسهم هناك. أما بيت عمهم وخالتهم فللحين ماوصلوا.. وكان ضحك خلود وسمر واصل لآخر الدنيا.. فرحتهم كانت ماتنوصف ابداً.. وبدور اللي كانت تبي تألف ديباجة تقولها اول مايوصل خالها..وبعد عشر دقايق أجتمع الكل بالبيت.. بيت ابوحمد وأبوفيصل، الكل كان مستانس.. هالمرة أجتمعوا الريايل بالصالة الكبيرة اللي داخل والحريم بالصالة اللي يمهم.

طبعاً البنات كانوا رافضين الفكرة لأنهم مايبون يلبسون شيلهم ويبون ياخذون حريتهم، لكن حكم القوي على الضعيف..!!

 

سحر الوحيده اللي كانت ساكته واطالع مريم ومقهورة منها حيل.. البنات كلهم كانوا عااادي ومستانسين الى لمتهم هذي. كانت اطالعها وودها تهزأها جدامهم بس ماكانت تقدر..

سمر:" سحر شفيج سرحانه؟؟ لاتخافين بتشوفينه؟"

سحر بإبتسامة مصطنعه:" ايه."

بدور:" شفيج سحر ماتشاركينا السوالف."

سحر:" مالي خلق."

خلود اطالع نوف وتقول لها:" وووووووووع هذي مدري على شنو شايفه نفسها علينا، على جمالها يعني؟؟ فيه احلى منها."

نوف:" اشششش سكتي لاتسوين لنا مشكله."

خلود واللي عمرها ماخافت من سحر:" ماخاااااف منها، واللي مااطاله بيده اطاله بريلها."

نوف:" ولييييه بتفضحينا انتي."

خلود:" لايكون خاايفة؟ خخخ صج جبانه."

نوف:" ماخاف بس ماحب اسوي مشاكل."

خلود:" زيييين خلاص."

العنود:" شفيكم اتساسرون عندكم اسرار من وراي؟"

نوف:" لاالاااا بس قاعده تقول لي انها مب قادره تنطر اكثر."

العنود:" ههههههه خلووود مسرع مااتمل."

خلود:" وانتي اللي تصبرين يعني، سكتي واللي يرحم والديج."

مريم كانت تسولف وياسمر وبدور:" يالله بدور شدي حيلج ويبي مجموع يبيض الويه."

بدور:" شي أكيييييد مايحتاج توصين."

مريم:" قولي ان شاءالله."

بدور:" ان شاءالله."

سمر واللي ماتدري ليش يات شوق على بالها:" بدووور حبيبتي بغيت اسألج."

بدور:" سألي."

سمر:" وش اخبار شوق؟"

بدور احترق ويهها يوم سمعت سؤالها، وشيخة سمعتها وعلى طول انتبهت لها لأنها كانت قاعدة جريب منهم.. بدور ظلت اطالع امها واطالع سمر وقالت:" بخير."

سمر انتبهت لها وحست انها غلطت لما سألتها عنها.. شيخة:" بدور، سمر تعالوا هني.."

بدور:" فضحتينا."

سمر:" وانا شقلت؟"

شيخة:" بدور انا ماقلت لج ماتيبين هالسالفة هني؟"

بدور:" بس يمة انا ماقلت شي، وسؤال خالتي عادي ماكان فيه شي."

سمر:" انتوا شفيكم ماخذين حساسية من هالموضوع أبي اعرف."

شيخة وقبل لاتنتبه خالتها لهم:" مافي شي وذلفوا ثنتينكم بسرعه وسدوا هالسالفة."

قاموا ثنتينهم ويفكرون بنفس الفكرة، وش الشي اللي يخليها تزفهم وماتبي احد ينتبه له؟؟!

وبس قعدوا سمعوا صوت حمد يضحك،، وصوت ابوهم..

وسمعوا سيف يناديهم:" وصل محمد ،، يمة تعااالي."

وقامت أم محمد بسرعه عند باب الصالة، وأول مافتح أحمد الباب وشفات محمد على كرسي متحرك طاحت دموعها على خدها. وراحت له وحظنته، كل اللي كان هناك دمعت عينه يوم شافوها تصيح، ومحمد على الكرسي.

محمد ويحاول ويخفي الدمعه اللي طاحت من عينه:" بس يممممه مافيني الاالخير."

أبومحمد:" ياام محمد خلاااص الولد ان شاءالله مافيه الاالعافيه."

شيخة:" وييييين أمي اتخليه وهي تنطر هاليوم من زمااان."

وابتعد عنه ومسحت دموعها، دخلوه الصالة والكل راح يسلم عليه..وطبعاً خالته كانت ثاني وحده سلمت عليه بعد أمه:" هلا بنور البيت، هلابوليدي الحمدلله على السلامة."

محمد:" الله يسلمج يالغاليه." وبعد ماتباعدت عنه راحت نجود تسلم عليه.

نجود:" هلا وغلا بخوي نورت البيت."

محمد:" هلاااابيج يالمختفيه.."

نجود:" ماعليه بجابلك طوووول اليوم."

محمد:"ههههه مشكورة."

خلود وهي تباعد اختها عنه:" قووووومي دووووري الحيين."

محمد يضحك عليها:" هههههههههههههههههههه ماتيوزين عن حركاتج، تعالي هني ."

حظنته وحبته على راسه، سمر سلمت عليه بيدها استحت تحظنة لأن اولاد عمها وريال خواتها قاعدين..

شيخة:" بعدوووا لي شوووي، خلوووني أشوف أخوي."

محمد:" وانا اقوول خلودوو طالعه على منووو."

وضحكوا عليها، شيخه:" بس هونت مابسلم."

محمد:" تعالي امزح مانقدر على زعلج."

وراحت وحبته على بعد على راسة.. وبدور كانت تبي تقول له الكلام اللي حفظته بس كله تبخر يوم شافت خالها:" خااااااااااالي وانا مالي نصيب."

محمد وبإبتسامته اللي تخلي الواحد يحس بالأمان والطيبة:" انا كلي لج."

بدور:" يووووووووه خاااالي استحي."

وضحكوا عليها يوم قالت جذي ، أما سحر كانت واقفة يم أمها ولاتحركت من مكانها وكانت تنتظر عينه تشوفها.. ومريم ونوف والعنود كلهم سلموا عليه الا هي.

ويه دور الريايل يسلمون عليه...

حمد:" وووووي مابغينا ننتهي من مؤتمر الأمة."

أحمد:" ههههههههههه تصدق لونخليهم على كيفهم مايخلصون."

خلود:" وش دعووووه وانتوا مومقصرين."

حمد:" أحمد انت شفيك، لاتقول كلام انت موقده."

أحمد:" هاااااا، شووووف لاتقول حجي وتحطه علي ترى اعرفك زين."

ناصر:" فجوا مناك خلونا نسلم على ولد العم انتوا مابتسكتون."

أحمد:" طالع الأخ.."

حمد:" ماعليك منه، وين سيفووو؟"

أحمد:" وين بعد اكييييييييد بالمطبخ."

ناصربعد ماسلم على محمد:"وانتوا ماعندكم الا الحش."

حمد:" لووووسمحت احنا مانحش."

فيصل:" وش فييييكم واقفين تعالوا قعدوا."

حمد:" يايييييين."

وراحوا قعدوا بعد ماظلوا واقفين يسولفون ربع ساعه، وسيف ماكان موجود وياهم الأخ كان بره يسولف ويارفيجة نواف، وبعد ماخلص دخل لهم..

أحمد:" وين كنت؟"

سيف:" بره ويانواف."

ناصر:" حشو فيك."

حمد:" وانت اشوف صاير من المفتنين."

سيف:" ماعليك منهم قول وش قالوا عني."

ناصر:" يقولون أكيد انت بالمطبخ تبلع."

فيصل:" هههههههههههه المسكين ظلمتوووه."

سيف قعد يمه وهو يقول:" شفت عااااد ياولد خالتي، مظلووم انا."

حمد:" مدري من اللي يقدر يظلمك انت."

سيف:" انت وويهكً خخ."

أحمد:" سيف حبيبي قووووم ييب لي عصير والله عطشان."

سيف:" شايفني الخدامة مالتك، قوم انت."

أحمد:" ول عليك مايرأف بحالي رايح المستشفى وياي."

سيف:" لحظة.".. وقام ضغط على الزر اللي يم ابوه ونادى الخدامة علشان اتييب لهم العصير."

 

^^^^^^^^^^^^^^^^^^^^^^^^

 

كانت شوق تذاكر في غرفتها، وخواتها كل وحده فيهم بغرفتها تذاكر. أم عبدالله كانت قاعده بالصالة اللي فوق.. وتسولف ويا ابوعبدالله..

أم عبدالله:" وأبوعمر هذا منو؟"

أبوعبدالله:" هذا واحد من ربعي اللي اقعد معاهم."

ام عبدالله:" هو ميته زوجته؟؟ والا شنوو؟"

أبوعبدالله:" ايه وماياب منها عيال، وتزوج بعدها ثنتين، والأخيرة يابت له بنت ويبي يتزوج."

أم عبدالله:" وبعدين وش يدخلك انت؟"

أبوعبدالله:" شنو وش يدخلني كل الموضوع بيدي انا."

أم عبدالله وتبي تعرف اكثر عنه:" زيييين اهو غني؟"

أبوعبدالله:" يعني بس عنده فلوووس."

أم عبدالله:" يعني يفيدنا والاااا؟؟"

أبوعبدالله وهو يشرب الشاي:" تطمني مثل الخاتم بيدي بخليه."

أم عبدالله والفرحة مو واسعتها:" يعني خططت لكل شي؟؟"

أبوعبدالله:" اييييييه وبتفتكين منها."

أم عبدالله:"و اخيييييييييراً برتاح."

أبوعبدالله:" سمعي مابيها تعرف الا اذا خلصت المدرسة، وبعد ماتخلص بينتهي كل شي."

أم عبدالله:" بتزوجها على طوول؟"

ابوعبدالله:" اكييييييييد مافيها خطوبة ولاهالخرابيط، زواج على طول."

أم عبدالله:" زين ماتسوي."

أبوعبدالله:" بس ها ماوصيج مابيها تدري الحين."

أم عبدالله:" افااااا عليك كل شي بأمان."

 

كل اللي دار بينهم سمعته هديل لما كانت طالعه من غرفتها، انصدمت لما سمعتهم يخططون لزواج أختها. احتارت بأمرها وماعرفت وش تسوي .وهديل ماكانت تبي تشغل شوق حتى مايأثر عليها بالإمتحانات. وردت غرفتها تفكر في المصيبة اللي تنتظر شوق بعد الامتحانات.

 

ياترى أبوها وش هالزيجة اللي يبي يزوجها لشوق؟؟ وشلون بتتلقى الخبر؟؟؟ وسحر وأفكارها وغيرتها وين راح توصلها؟؟؟