الحلاوة Posted يناير 4, 2006 Author Report Share Posted يناير 4, 2006 حاضريين يالغاليين ..سوري بس الان كنت برع و الحين بانزل لكم Quote Link to comment Share on other sites More sharing options...
الحلاوة Posted يناير 4, 2006 Author Report Share Posted يناير 4, 2006 فالبحرين و بغرفة مريم بالتحديد .. كانت مريم قاعدة عالكرسي و بالها مشغول و ما هو بمعاها .. و مجابلة صورة امها و تصيح صياح مو طبيعي .. فجاة نقزت مريم على صوت هنادي هنادي استغربت صياح مريم .. لانها بالاونة الاخيرة هدت شوي .. بس اليوم تصيح صياح مو طبيعي .. هنادي خافت و راحت ركض لمريم هنادي: بسم الله عليج .. مريم حبيبتي شفيج؟؟ مريم كانت تشهق فالصياح و ما ترد هنادي: مريووم لا تخرعيني شفيج ردي!! مريم حضنت هنادي و زاد صياحها و بدى صوتها يعلى هنادي و هي تمسح على راسها: حبيبتي اهدي شوي و قولي لي شفيج .. حد زعلج .. مريووم شفيج؟؟!! مريم: امي زعلانة عليي هنوود هنادي استغربت: شنو .. مريم شهالكلام امج الله يرحمها .. ادعيلها حبيبتي .. ادعيلها مريم: انا حلمتها امس هنوود .. حلمت بامي زعلانة عليي و ما تبي تحاجيني .. احاجيها و ما ترد عليي .. بحياتها ما زعلت عليي .. شلون احين زعلانة عليي هنادي!! هنادي: حبيبتي تعوذي من الشيطان .. هذا الشيطان يلعب عليج مريم: لا انا حاسة .. من يوم ما رفضت اشوف ابوي و احسها زعلت عليي هنادي: ما ادري شاقولج مريم!! مريم: هنادي قوليلي انا غلطانة و لا لا .. هب عارفة شنو اسوي او اتصرف هنادي: سوات ربج ابرك .. قومي صلي لج ركعتين و ربي بيهديج ان شاءالله .. و عقب فكري عدل .. مريم بصراحة انا ما بيج تروحين عنا .. بس هذي ابوج و له حق عليج .. طول عمرج عقلج كبير و قلبج اكبر .. و هذا ابوج مريم: بس هو ما فكر حتى يسال عنا .. انا و امي الله يرحمها هنادي: ابوي قالج .. مرته اللي هي مرت ابوج كانت قوية و هيه بنت عمه .. و اهله جبروه يعني يدج و يدتج مريم: تصدقين هنادي .. على كل اللي سواه ابوي امي ما كانت تييب سيرته الا بالخير .. احسها كانت تحبه هنادي: مريم امج كانت طيبة وايد .. كفاية انها ما رضت تتزوج عقبه .. صح هي ما كانت تبي لج ريل ام .. بس بعد اكيد كانت تحبه و ما تبي غيره احد مريم: انزين نصحيني هنادي شاسوي؟؟ هنادي: قلت لج قومي صلي .. ربي اخير عني و عنج مريم: هنادي .. رقدي عندي اليوم .. الله يخليج .. محتاجتج و الله هنادي: و لا يهمج .. بروح اتصل فامي و بييب ثيابي و بيي مريم: كا تلفوني اتصلي منه .. و خذي ثياب من عندي هنادي بابتسامة دافية و حنونة: خلاص .. اوكيه ................ بو محمد قاعد بمكتبه و الحزن مغطيه .. من يوم ما رجع من البحرين و هو دايما قاعد زعلان و ماله خلق يكلم احد .. فجاة سمع دق خفيف عالباب بو محمد: ادخل شمسة: السلام عليكم ابوية بومحمد: هلا فيج الغالية .. تعالي ايلسي شمسة: شحالك ابوية؟؟ بومحمد: يسرج حالي .. خير شمسة؟؟ شمسة: بس ييت اسال عنك .. بعدين اماية حطت العشى بو محمد: لا انا ما ابي ااكل .. تعشوا انتوا شمسة: شدعوه ابويا .. شو بلاك ؟؟ من رديت من البحرين و انت حالك هب عايبني بومحمد: ما فيني شي حبيبتي .. روحي انتي تعشي بو محمد كان وده لو مرته الحين يمه .. و تخفف عليه .. لكنها بروحها فرحانه ان بنته ما رضت ترد معاه .. يا ربي شقد هالحرمة انانية و حقودة .. الام ماتت شيخص بنتي .. مو كفاية حرموني من امينة .. ااااه الله يرحمج يا امينة .. سامحيني .. سامحيني يالغالية شمسة: باباتي وينك .. ارمسك انا بو محمد: ها بنتي خير .. شو بغيتي شمسة: بويا شبلاك .. عشان اختي مريم؟؟ بومحمد: السالفة اكبر من اختج مريم .. مريم و امها الله يرحمها شمسة: ابوية .. انا بخاطري اقولك شي .. بس مستحية منك بومحمد: قولي اللي بخاطرج شمسة: اخافك تزعل مني !! بومحمد: هب زعلان يلا ارمسي باللي فخاطرج شمسة: ابوية .. انته يوم دريت ان فهد تزوج .. عصبت و كنت تبي تطرده من البيت .. و انت .. ترددت شمسة و سكتت عقب بو محمد: قصدج عشاني انا بعد تزوجت بدون علم هلي .. و تزوجت على امج؟! شمسة و هي منزله راسها و بصوت واطي: هيه بو محمد و هو ينتهد: شوفي يا بنتي يا شمسة .. انتي تعرفين ان امج هيه بنت عمي .. و تعرفين ان عندنا البنت لولد عمها .. وا نا كان عادي عندي .. لا ابي امج .. و لا انا ما ابيها .. يعني عادي وافقت .. من اول ايام زواجنا لي الحين عمرها ما حسستني انها تحبني .. كل همها انها هي اللي تتحكم بكل شي بحياتنا .. و عقب ما يابت محمد و فهد صارت تهتم فيهم .. و انا ما جني موجود بحياتها .. و لو انها من الاساس ما كانت تهتم فيني شمسة كانت ساكتة و تسمع ابوها باهتمام بو محمد يكمل: عقبها سافرت البحرين .. تراني كنت اشتغل فطيران الخليج .. و كانت عندنا دورة هناك لمدة 6 شهور .. سافرت هناك و اجرت بيت .. و كانوا جيراني اهم اهل امينة الله يرحمها .. و تعرفت على اخوها احمد .. و كنت اشوفها الله يرحمها كل يوم و هي ياية من المدرسة و الصبح و هي رايحة .. كانت في حال سبيلها .. ويها هادي و مريح .. باختصار اعجبت فيها وايد .. هي من بين كل البنات .. و تقدمت لها .. هلها بالبداية رفضوا لاني ييت من غير هلي .. لكني كنت مصر .. و خطبتها اكثر من مرة .. و بالاخير وافقوا .. لانهم كانوا يعرفوني و يحبوني شرات ولدهم احمد .. طبعا انا ما خبرت هلي لانهم اكيد بيرفضون خصوصا ان امج تصير بنت عمي شمسة حست من كلام ابوها شقد اهو يحب امينة الله يرحمها .. و شقد امها مقصرة وياه .. تعاطفت مع ابوها و كملت سماع عقب ما تزوجنا .. امينة طبعا عاشت معاي بالبيت .. و عقب ما خلصت الدورة رديت الامارات .. و وعدتها اني بخبر هلي قريب و اخذها تعيش معاي هنيه .. هيه الله يرحمها كانت وايد صابرة عليي .. و لا عمرها اصرت عليي او ضغطت عليي اني اخبر هلي .. كانت قمة فالهدوء و الطيبة .. لو شفتيها يا شمسووه جان حبيتيها انتي بعد .. ايامي معاها كانت من احلى ايام عمري .. تمنيت لو هالايام ما تنتهي .. لكن للاسف عقب فترة يوم كانت امج توها حامل فيج .. هلي بدوا يشكون بكثرة روحاتي للبحرين .. و عقبها دروا اني متزوج .. اجبروني و حلفوا عليي اني اطلقها .. و حلفوا انهم يتبروون مني لو ما طلقتها .. تنهد و كمل و انا ظلمت هالمسكينة و طلقتها .. و وقتها كانت حامل بمريم .. و انقطعت اخباري عنها و اخبارها عني .. انا قلت دام ما بينا يهال .. خلاص خلني ما ارجع لها .. عشان ترتاح .. لاني ادري لو رديت لها .. هلي و امج ما بيخلونها فحالها .. ساعتها ما كنت ادري بحملها شمسة سكتت و ما عرفت شتقول .. يالله يا ربي .. يعني ابوية متحمل كل هذا بقلبه 20 سنة و ما تكلم .. مسكين حالك يا بويا بو محمد: اما فهد يا شمسة فهو اللي اختار نورة بنت عمه برضاه .. و سافر عساس انه يخلص دراسته و بيرد ياخذ نورة .. حير البنت .. و سافر و خذ وحدة .. لاهي من ثوبة .. و لا هي من دينة .. و ما عليج من تدينها اللي قاصة عليه فيه .. يوم كانوا ساكنين عندنا شهرين و لا مرة شفتها تصلي .. و فوق هذا كله من ورانا .. امينة غير يا شمسة غير .. على الاقل هي خليجية .. من ثوبي و من نفس ديني .. كفاية انه اهلها ناس من خيرة الناس فالبحرين و متدينين و طيبين شمسة: و الله ما عرف شاقولك يا بويا .. بس الله يلم شملك و يا مريم ان شاءالله بومحمد و هو يتنهد و بحزن كبير: ما اظن يا شمسة .. مريم ما تبيني .. و معاها حق شمسة تحاول تخفف عن ابوها: لا ابوية لا تخاف .. الظفر ما يطلع من اللحم .. مصيرها بتهدى و بتسامح بو محمد: الله يسمع منج ان شاءالله شمسة بابتسامة: انا متاكدة .. بعدين هي لو عرفتك اكيد بتحبك بو محمد ارتاح من عقب ما فضفض لشمسة عن اللي فقلبه .. طول عمرها شمسة الوحيدة اللي قريبة منه و فاهمته فالبيت شمسة: يلا باباتي عشاني قوم نتعشى .. تراني ميتة من اليوع .. و لو ما ييت معاي ما بتعشى بومحمد و هو يبتسم: خلاص امري لله .. قومي نتعشى ..................... فاحد الشقق اللي في مملكة البحرين .. كان واقف معاها .. و عينة تطلع شرار .. و قاعد يصارخ طلال: ردي عليي من هذا؟؟ فاطمة بارتباك: محد قلت لك محد طلال: و هالارقام العجيبة اللي فتلفونج .. و الكلام اللي سمعته عنج فاطمة و هي تتخصر و ترد عليه: أي كلام هذا حبيبي اللي سمعته عني ها ؟؟!! طلال: كلام اشرف لي اني ما اقوله فاطمة: و لا انا واثقة من نفسي .. و عارفة اني ما اسوي شي غلط طلال و هي يطلع موبايله و يفتح بلوتوثه: و هذي من ان شاءالله .. لا تجذبين عاد و تقولين هب انتي .. كل شي واضح .. و من ذيه اللي معاج ها .. اذا هب حاشمتني انا حشمي هلج على الاقل .. و لا صح نسيت .. انتي اصلا ما عندج اهل يسالون عنج .. و لا جان ما وصلتي لهالمستوى من هالحقارة و القذارة فاطمة بالفعل انصدمت و غصبا عنها دموعها تجمعت بعينها .. صح هي كانت لعوبة .. و تلعب على طلال بعد .. بس بدت تحبه .. و كانت تبي تغير حياتها عشانه .. بس للاسف تمت تلعب بذيلها و هي معاه .. و الحمدلله انه الله كشفها .. قبل لا يغلط طلال و يتزوجها طلال: ردي و لا ما عندج كلام تقولينه فاطمة قعدت عالكرسي من الصدمة و بصوت متقطع: طلال انا احبك .. و كنت بغير من نفسي عشانك طلال باستهزاء: هه تحبيني .. و تغيرين من نفسج ؟؟ بس انا الغبي اللي صدقتج و ركضت و راج و هديت مرتي الطيبة عشانج .. كنت صج عمي .. بس الحمدلله كل شي انكشف قبل لا اتورط معاج و اتزوجج فاطمة: لا طلال لا تقول جذيه .. انا خلاص ما ابي غيرك طلال: لا و الله لعبيها على غيري احسن .. سمعي يا بنت الناس .. انا بستر عليج و ما بفضحج .. و هالبلوتوث محد بيشوفه و بمسحه .. لكن نصيحة مني .. ردي لعقلج و استري على روحج و حشمي هلج .. ترى الدنيا هب دايمة لج .. ارجعي لربج ابرك لج طلع طلال من الشقة و رقع بالباب من قهره .. و تمت فاطمة قاعدة بالصالة على الكرسي .. و دموعها تنزل رغم لعبها بس هي صج بدت تحبه على ما تقول .. طلع طلال و خلى كلمات تردد في بالها انتي اصلا ما عندج اهل يسالون عنج ............... انتي اصلا ما عندج اهل يسالون عنج ردي لعقلج و استري على روحج و حشمي هلج .. ترى الدنيا هب دايمة لج .. ارجعي لربج ابرك لج .............. في العين فبيت ام سعيد .. نورة كانت نازلة من عالدري و تصيح نورة و هي ماسكة ظهرها من الحمال و تصيح: خالتي ام سعيد .. عمي بو سعيد و هو يطلع من الغرفة: خير نورة شفيج بنتي؟؟ نورة و هي تصيح: مايد يا عمي مايد بو سعيد: خير يا بنتي مايد شفيه؟؟!! نورة: ما ادري يا عمي اتصل واحد يقول مايد سوى حادث و بالمستشفى عقب هالجملة طلع بو سعيد و خذ سعيد .. و نورة اصرت انها تروح وياهم .. اما ام سعيد .. فكانت نايمة و ما تدري بالدنيا .. و هم ما حبوا يصحوونها و يخرعونها بالليل .................. جواهر كانت قاعدة فالصالة اللي فوق .. رايحة و رادة .. و كانت وايد قلقة .. هنادي هب موجودة .. و هي وايد تحاتي .. يا ربي شفيه طلال ما يا للحين .. الساعه صارت ثلاث .. هو تعود يتاخر بالايام الاخيرة .. بس مو لهالدرجة الساعه 3 الحين .. سترك يا رب .. انا بنطر لين ما يطلع النور و اذا ما يا و لا رد على تلفوناتي .. بروح اقعد هنوود ................ على البحر .. طلال كان قاعد .. و هموم الدنيا كلها على راسه .. معقولة فاطمة اللي كان يشوف فيها براءة الدنيا كلها طلعت بهالوساخة و القذارة .. فاطمة اللي هد جواهر الطيبة عشانها .... ااااااااااه يا جواهر .. محد ذابحني غيرج .. على هاللي سويته فيج و للحين تحاتيني و قاعده تتصلين .. ارد عليج شاقوول .. اللي فضلتها عليج طلعت اوسخ وحدة فالبحرين مثل ما قالت هنادي .. ااه و هنادي اللي جذبتها و ضربتها بسبة هالوسخة .. ااه شلون اجابلكم .. شلون اجابلج يا جواهر .. شلون اجابلج يا هنادي .. يا رب ساعدني .. كان طلال يدق يده على الارض بقوة و يحذف الحصى فالبحر .. لين ما سمع اذان الفجر طلال: الله اكبر الله اكبر .. سامحني يا رب قام طلال .. و تعوذ من ابليس و راح المسيد عشان يصلي الصبح جماعه ..................... نهر حبك Quote Link to comment Share on other sites More sharing options...
الحلاوة Posted يناير 4, 2006 Author Report Share Posted يناير 4, 2006 قعدت من النوم من وقت و تحس نفسها احسن بوايد من امس .. قعدت و ببالها قرار لازم تنفذه .. يمكن هو جواب الاستخارة اللي امس صلتها .. تسبحت و نزلت تحت .. ما شافت لا يدها و لا يدتها .. بس راحت على طول بيت خالها تقوله بقرارها مريم و هي تدخل بيت خالها: السلام عليكم جواهر: هلا مريمي .. شلونج حبيبتي؟؟ مريم عورها قلبها لانه امها كانت دايما تقول لها مريمي: انا بخير الحمدلله .. انتي اللي شفيج .. شكلج تعبانة؟! جواهر: لا ما فيني شي .. بس تعب الحمال .. تريقتي؟؟!! مريم: بتريق بعدين .. خالي قعد؟! جواهر: ايه قاعد فمكتبه مريم: خلاص انا بروح له جواهر: اوكيه قعدت جواهر فالصالة تتريا طلال .. اما مريم فكملت دربها حق مكتب خالها و في المكتب سمع بو طلال طق خفيف عالباب بوطلال: من مريم: خالي هذي انا مريم بو طلال قام بنفسه و فتح لمريم الباب بوطلال: هلا و الله .. هلا بالغالية .. تعالي دشي داخل مريم عقب ما دشت و قعدت مجابلة خالها مريم: خالي ابي اقولك شي بو طلال: تفضلي خالي قولي اللي عندج و لا تستحين .. خالج كله تحت امرج مريم عقب ما استحت و ابتسمت: افا خالي ما يامر عليك عدو بوطلال: يلا قولي اسمعج مريم: احم .. خالي انا فكرت وايد و استخرت ربي و صليت .. و .. و قررت اني اروح حق ابوي بوطلال انصدم .. استغرب من رايها المفاجئ .. بس هو اليوم يشوفها احسن من كل يوم .. و هذا شي يبشر .. و اذا رجعتها لابوها بتريحها .. اكيد هو ما بيوقف بطريجها .. صح فراقها صعب .. بس مصلحة مريم فوق كل شي مريم: شقلت خالي؟؟ بوطلال: و الله يا مريم ابوج كاهو كل يوم يتصل يتطمن عليج .. و وده يشوفج و اللي تبينه انا تحت امرج مريم: شكرا خالي .. بس بغيت اطلب منك طلب بوطلال: تفضلي الغالية مريم: ما ابي ابوي يعرف بييتي بوطلال: شلون .. ليش ما تبينه يعرف؟؟ مريم: بس خالي .. انا بروح بدون لا هو يعرف ارجوك خالي بوطلال: خلاص اللي تامرين به يا مريم مريم: خالي .... متى بنروح بو طلال: أي وقت تبين حتى لو باجر مريم: لالا باجر وايد من وقت انا ابي اسبوع على الاقل ارتب نفسي بوطلال بابتسامة: خلاص صار يا مريم طلعت مريم من مكتب خالها .. و ردت البيت و هنادي بعدها نايمة .. نزلت مريم تحت عند يدها و يدتها تخبرهم بقرارها .. و تنطر هنادي تقوم عشان تقولها على شنو اهي قررت ............. جواهر عقب ما ملت من الانتظار فالصالة ردت ركبت فوق .. بتنطر ربع ساعه لو ما عرفت عنه شي خلاص بتخبر امه و ابوه .. بروحها ميتة من الخوف ما كملت عشر دقايق الا و طلال داخل عليها الغرفة جواهر فرحت من داخلها انه بخير و ما فيه شي .. صح شكله شوي تعبان بس هو واقف جدامها بخير .. طبعا جواهر المفروض انها زعلانه من طلال فيات بتطلع من الغرفة .. الا و طلال ماسك ايدها طلال بصوت مبحوح: جواهر جواهر من غير لا تلف عليه: نعم طلال بترجي: جواهر ارجوج ابي اقعد وياج .. ابي اكلمج تنهدت جواهر و ردت تقعد عالكرسي .. هي تحب طلال و ما تقدر ترفض له طلب طلال: اه جواهر انا هب عارف شلون ابتدي بالكلام .. انا قصرت معاج وايد .. وايد جواهر جواهر كانت ساكتة و تسمع طلال طلال و هو هب عارف شلون يرتب الكلام .. كمل و هو يطالع تحت: جواهر انا اسف جواهر: وين اصرفها اسف هذي انا طلال: جواهر انا متاكد انه قلبج كبير جواهر: و شاللي غيرك الحين .. كاني ييتك من قبل و صديتني و لا هي شبعت منك خلاص .. و التفت على غيرك؟! طلال: معاج حق في كل اللي تقولينه جواهر .. انا ادري اني غلطان .. رحت لها و هديتج و احنا فبداية زواجنا .. لكنها ما تسوى ظفرج صدقيني .. و الحمدلله الله كشفها و عرفتها على حقيقتها جواهر و هيه خلاص هب قادرة تتحمل و قامت على طولها: لا و الله و الحين عقب ما هيه هدتك ييت لي .. ايه انا الطوفة الهبيطة .. تيي لي متى ما تبي و تهدني لي شبعت مني .. لا يا طلال انا هب لعبة عندك و عندها .. و انا اللي عفتك الحين طلال خاف من اللي بيسمعه و سكت و تم يطالعها جواهر: طلقني طلال طلال و هو يقوم: لا جواهر انتي شتقولين .. اطلقج .. مستحيل جواهر مستحيل جواهر: طلال انا صبرت عليك وايد .. و كنت اتمنى و احلم باليوم اللي تحس به بغلطك و ترجع لي .. بس انا تمنيت انك ترجع لي من نفسك .. لانك حسيت بغلطك .. هب ترجع لي و انت مهزوم .. لانها هيه باعتك .. لا طلال .. انا لو سامحتك بترد تعيدها مرة و ثنتين و ثلاث لي متى بسامح لي متى ؟؟ طلال: اوعدج اوعدج اني ما بعيدها .. ارجوج جواهر عطيني فرصة ارجوج جواهر فهاللحظة كانت تحس بضغط .. ضغط فضيع اول مرة تحس به .. كرامتها تمنعها ترجع له .. فنفس الوقت هيه تحبه و ما تقدر تشوفه يتذلل لها اكثر من جذيه .. و هالياهل اللي ببطنها .. انهارت جواهر و قعدت على الارض تصيح مثل الياهل .. بالفعل ما كانت عارفة شتسوي ياها طلال: جواهر ارجوج لا تصيحين .. عشاني ارجوج لا تسوين بنفسج جذيه .. خذ طلال جواهر بحضنه و هي استسلمت بحضنه تصيح مثل الياهل اما هو فتم يمسح على شعرها .. يمكن تحن عليه شوي .. طلال و هو يبوس جواهر على راسها: قومي قومي معاي حبيبتي لا تقعدين تصيحين عالارض جذيه قامت جواهر و فجاة حست بدوخة طلال: شفيج؟؟ جواهر: ما اشوف شي .. حاسة بدوخة .. طلال يودني يه طلال و قعدها عالكرسي .. طلال: شفيج حبيبتي؟؟ قومي قومي بوديج المستشفى جواهر: لالا ما في داعي طلال: شلون مافي داعي .. قومي يلا جواهر و هي تاخذ نفس و تتنهد: طلال عادي لا تخاف .. انا حامل و الارهاق هب زين عليي طلال و هو جنه سمع شي بس يبي يتاكد: شقلتي؟؟ جواهر: ايه طلال .. انا حامل و بثلاث شهور بعد طلال بفرح: و الله .. و الله جواهر انتي حامل .. و ليش ما قلتي لي ليش؟؟ جواهر: كنت بقولك بس كان نفس اليوم اللي قلت لي انك بتتزوجها طلال: الله يلعنه من يوم .. لا تذكريني حبيبتي طلال: جواهر .. جواهر التفتت عليه دون لا تتكلم طلال بهمس: احبج جواهرابتسمت و قطت نفسها بحضن طلال جواهر: احبك طلال .. احبك .................... في العين .. و بالتحديد في مستشفى توام .. الكل متجمع بما فيهم شمسة بنت عم نورة اللي يت لها تواسيها .. مايد من أمس طايح في غيبوبة .. و الله العالم يقوم منها او لا .. و متى بيقوم .. هذا اذا قام .. الكل قاعد برع يدعي ربه و يرجيه انه يقومه بالسلامة و يصحى من الغيبوبة .. بسبة الحادث اللي سواه مايد .. صارت عنده تشوهات في فقرات العمود الفقري لازمها عملية .. بس لازم يقوم قبل من الغيبوبة نورة و شمسة كانوا قاعدين بعيد شوي عن الباقيين .. نورة مموتة نفسها من الصياح و شمسة واقفة معاها شمسة: بس خلاص بسج عاد .. خافي ربج انتي حامل نورة: ما باسامح نفسي يا شمسة اذا صار له شي شمسة: استغفري ربج .. انتي شذنبج .. بعدين ما بيدج شي نورة: من يوم خذني و انا معيشته فعذاب و هو يموت عالتراب اللي امشي عليه .. عمره ما زعلني بشي .. و الحين يوم بديت احبه و اتعلق فيه بيروح مني بيروح يا شمسة شمسة: استغفر الله .. استغفري ربج .. ان شاءالله بيقوم .. بعدين انا ياما نصحتج .. بس شيفيد اللوم الحين .. الله بيقومه ان شاءالله و تقولين له هالكلام بنفسج نورة: يا رب ادعي له يا شمسة ادعي له شمسة: مايد طيب و الله بينجيه ان شاءالله .. انتي بس قومي اكلي لج شي و روحي البيت ارتاحي .. انتي حامل و بالشهور الاخيرة بعد نورة: و وين يهنا لي الاكل و مايد بين الحيا و الموت شمسة: نورة حبيبتي على الاقل روحي البيت ارتاحي بغرفتج شوي نورة: حشى عليي ما طبيت الغرفة و مايد مو فيها .. انا ما بروح بتم هنيه شمسة: حرام عليج نورة .. كفاية امه شوفي حالها مسكينة نورة: و انا مو مسكينة .. مو كفاية انه ابو ولدي بين الحيا و الموت شمسة: لا اله الا الله .. قومي قومي حبيبتي .. امج تحاتيج وايد نورة: هب قايمة قبل لا يقوم مايد عيزت شمسة فنورة .. بس نورة بطبعها عنيدة اصرت انها اتم عدال مايد و ما ترجع .. و عقب الحاح من الكل اولهم امها ردت بالليل .. عقب ما اقنعوهم المستشفى ان قعدتهم ما منها فايدة .. و لو صار شي هم بيتصلون لهم ردوا كلهم البيت .. بس و كانت معاهم نورة اللي ما رضت تروح غرفتها .. بسبت حمالها و تعبها .. و لانها حلفت ما تبات فالغرفة ليلة من غير مايد .. سبحان الله نورة تمت تعاند فمايد و تعذبه .. و هو ميت عليها .. و اليوم يوم بعد عنها .. و هو بين الحياة و الموت .. ندمت و اخيرا اعترفت بحبها له سبحان الله الواحد ما يحس بقيمة الشي الا اذا فقده؟! .......... مر شهر عقب هالاحداث مايد بعده راقد فغيبوبة .. و نورة طبعا كل يوم عنده تتم .. ترد اليبت تريح و ترد تييه و تبات عنده ساعات .. و فهالفترة و بسبب خوفها على مايد زاد حبها له!! طلال و جواهر علاقتهم وايد احسن عن الاول .. طلال قام يهتم بجواهر اكثر .. و ابد ما يطلع من البيت بدونها الا للضرورة .. و هي نفس الشي و فهالفترة زادت علاقة طلال باهله خصوصا هنادي !! بو محمد على نفس حاله هالعيوز غاثيته و كل يوم يتصل يتطمن على بنته فهد سافر يلحق مرته ببلادها .. لانه راحت تولد هناك من يوم و هي بالشهر الخامس مريم خلاص باجر بتروح الامارات و قاعده تجهز أغراضها و هنادي وياها .. و كانت وايد حزنانة و طول هالشهر و هيه تحاول تخش زعلها عن مريم عشان لا تضايقها .. و مريم نفس الشي!! مريم و هي تحط اغراضها و هنادي يمها تساعدها .. و بداخلها حزن عميق .. و كانت ساكتة و لا تتحجى مريم: ممم هنادي هنادي بهدوء على غير عادتها: نعم مريم: شفيج؟؟ هنادي: ما فيني شي مريم: لا فيج شي صار لج فترة لا تتحجين و لا شي .. و كله ساكتة .. خصوصا معاي انا هنيه قامت هنادي و طلعت من الغرفة و راحت بيتهم على طول مريم قامت تلحق هنادي . و بنزلتها شافت يدها و يدتها قاعدين تحت .. "طبعا يدها من يوم وفاة ام مريم ما عاد يتكلم ابد و حاله من سيء لأسوء" .. اليدة نادت مريم اليدة: ها يما مريم برزتي اغراضج؟؟ مريم: ايه يما خلصت .. باقي بس شوية اغراض اليدة: و متى طيارتج باجر؟؟ مريم: الصبح يما .. الساعه 9 اتطير ان شاءالله اليدة: و الله ما ادري شلون بيكون البيت من غيرج يا مريم .. و بدت اليدة مناحة و قامت تصيح .. قامت لها مريم .. و حضنتها و تمت تصيح معاها مريم: يما انا ما بهدكم .. انا برجع لكم انا ما بتم هناك و تمت مريم تسكت فيدتها .. اللي بدت مناحة و ما رضت تسكت عقب ما سكتت مريم يدتها .. راحت صوب بيت هنادي و ركبت لها فوق .. شافتها قاعده على السرير و تصيح مريم و هي تقعد يمها: هنادي هنادي كانت ما ترد مريم: هنادي .. ردي عليي .. انا ادري انج متضايقة .. و انا اكثر منج .. بس انا مجبورة .. و انتي اكثر وحدة كنتي تشجعيني و تقنعيني باني اشوف ابوي .. سكتت و تنهدت .. اوهو عاد ردي عليي هنادي و هي تصيح: ادري مريم .. انا ابيج تسوين الصح و تشوفين ابوج .. بس انا بعد ما اقدر على فراقج .. بتم وحيدة مريم: أي فراق .. يالغبية لا تقولين هالحجي .. و لا أي شيء فالدنيا بيفرقنا ان شاءالله .. انا بروح اشوف ابوي و برد ما بتم هناك .. لا تتصورين اني بقدر اهدكم فيوم هنادي و هي تمسح دموعها: يعني ما بتعيشين هناك مريم بابتسامه: لا ما بعيش هناك .. قامت مريم و حضنت هنادي و قالت: انا ما اقدر ابتعد عنكم و تموا يسولفون هنادي: مريوم .. تتوقعين بتشوفين خليفة هناك؟! مريم و هي تبتسم: شدعوه فيلم هندي .. الامارات كبيرة وين بشوفه .. انا الا بشوف ابوي و برجع ان شاءالله هنادي و هي تغمز : بعد ربج .. يمكن قلبه يدله و يشوفج مريم: لا و الله .. تصدقين هنوود لولوة اليوم يوم يت تسلم عليي تقول ان خليفة كان ايي كل يوم عزا امي الله يرحمها مع سلمان هنادي: تدرين ميمي يوم كنتي بالمستشفى انا شفته مرتين موجود قريب من مكان الغرفة مالتج سكتت مريم و تمت تفكر بينها و بين نفسها هنادي: الا على طاري لولوة .. شخبارها و متى بتعرس؟؟ مريم: تقول بنص السنة ان شاءالله و تموا مريم و هنادي يسولفون لين الساعه 1 بالليل عقب قامت مريم .. تكمل ترتيب اغراضها و نامت عندها هنادي ............ فغرفة مايد فالعين .. كانت نورة نايمة عنده اليوم .. عاندت و ما رضت ترد معاهم البيت و تمت وياه نورة كانت قاعده قريب من مايد و تتامل بويهه شقد كان ويهه حلو.. اول مرة تحس بهالاحساس .. شافت اشياء وايدة بويه مايد ما كانت تشوفها فيه من قبل يا ترى هل هيه ما كانت تلاحظ كل هالاشياء بسبب كرهها له ؟! قربت نورة اكثر من مايد و تمت اتكلمه .. متى بتقوم حبيبي .. متى بتقوم و تنور حياتي .. ابي اقولك اشياء وايد .. ابي اقولك اني احبك .. احبك وايد .. و ترى فراقك مو سهل علي .. ااه فيوم من الايام ما كنت ابي منك ولد .. و لا ابي اتم على ذمتك و ابيك تطلقني .. بس اليوم ابيك انت و ما ابي احد غيرك .. و لا ابي عيال من غيرك .. ااه يا مايد متى بتقوم و تاخذني بحضنك و تريحني .. متى بشوف نظرات عيونك اللي كلها حب و حنان .. غصبا عنها نزلت دموعها .. باست مايد على خده و قامت تصلي لها ركعتين .. و تدعي ربها ان يشفي مايد "حبيبها" .................... في اليوم الثاني قامت مريم من وقت و هي بالاصل ما قدرت تنام من كثر ما كانت تحاتي هاليوم .. تسبحت و صلت الصبح و بدلت ملابسها و سلمت على اهلها و طبعا الكل تم يصيح بما فيهم اليدة و جواهر و هنادي اللي ابدا ما سكتت .. حتى مريم تمت تصيح معاهم .. ودعتهم و ركبت الطيارة شايلة معاها احلى ذكريات من دلمون أرض الخير .. و رايحة دار زايد دار الكرم و الجود Quote Link to comment Share on other sites More sharing options...
الحلاوة Posted يناير 4, 2006 Author Report Share Posted يناير 4, 2006 الصراحة انا اليوم وايد تعبانة و باروح ارقد سوري بس باحر بانزل لكم الباقي يالغاليين Quote Link to comment Share on other sites More sharing options...
عابره Posted يناير 5, 2006 Report Share Posted يناير 5, 2006 ننتظر الاجزاء الثانيه باقرب وقت ممكن تحياتي : عابره Quote Link to comment Share on other sites More sharing options...
بحرينيه^مزيونة Posted يناير 5, 2006 Report Share Posted يناير 5, 2006 تسلميين عمررري ،، ووننتظر التكمله ،، Quote Link to comment Share on other sites More sharing options...
الــعـيـون الــفـاتـنـه Posted يناير 6, 2006 Report Share Posted يناير 6, 2006 يسلموو قلبوو ننتظر Quote Link to comment Share on other sites More sharing options...
الــعـيـون الــفـاتـنـه Posted يناير 7, 2006 Report Share Posted يناير 7, 2006 لمتى !! Quote Link to comment Share on other sites More sharing options...
بحرينيه^مزيونة Posted يناير 7, 2006 Report Share Posted يناير 7, 2006 وووووووين التكمله ،، Quote Link to comment Share on other sites More sharing options...
manameya Posted يناير 7, 2006 Report Share Posted يناير 7, 2006 يسلمووووووووو Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.