النملة الشقية Posted سبتمبر 22, 2006 Author Report Share Posted سبتمبر 22, 2006 التباريك والكلام الحلو ..استأذنت ريم منهم وراحت فوق لدار العنود العنود: هاريومه شخبارج بعد العرس ريم ابتسمت ببرود:اوكي العنود: انتي راح تكملين دراستج ذي الكورس ريم: لا ان شاالله الكورس الياي العنود: أي احسن لج بعدها يات الخادمه تخبرهم ان الغدا جاهز .. الكل اجتمع على طاولة الطعام ريم ماكلت الا شوي وقامت ...ولحقتها العنود الأم: والله عيال هالأيام اللقمه بالزور ياكلونها بوفهد مال على ولده بعد ماشاف شكل ريم وطريقة اكلها: فهد ليكون مزعل بنت اخوي في شي فهد استغرب من سأل ابوه: لا والله يبه .. بوفهد: تحمل يابوك تزعلها ترى ذي بنت يتيمه ومالها الا الله واهلها فهد: ان شاالله يبه فوق وفي ذي الوقت رن تلفون العنود العنود:الو وياها صوت رجالي: هلا والله ..شخبارج العنود:من معاي؟؟ الصوت: انا خالد ... انتي شلونج العنود:خالد ..اي خالد..انت تعرفني خالد:أي اعرفج العنود: انا من؟؟؟ خالد:انتي حبي العنود: والله بايخ وسكرت التلفون في ويه... ريم الي كانت تسمع كلام العنود: من ذي العنود بحمق: ناس فرقانه وبهااللحظه رن التلفون مره ثانيه رفعته العنود قبل لا تتأكد من الرقم :والله ان اتصلت مره ثانيه لا تلوم الا نفسك فهد: عندوا شفيج العنود:ها..ولاشي ..انت شتبي فهد: من ذي الي ماتبغينه يتصل مره ثانيه العنود:على بالي علوي أخوي .. فهد: علي أخوي تكلمينه بهالطريقة العنود: أي لأن اذاني (العنود ماكنت تبي تقول لأخواها عن هالمزعج..لأن أخر مره قالت له ..قلب البيت وبغى يمنعها من الجوال) فهد:انتي متأكده انه علوي..مو واحد من هالشباب الفاسدين العنود: فهد اشفيك قلت لك علي اخوي..انت ليش داق فهد: بل بالعدال علي..أنا كنت ابغيكم تجهزون على شان نروح بيت عمي العنود: انزين دقايق وحنا نازلين بعد ماسكرت العنود الجوال .... سألتها ريم بعتب : ليش ماخبرتي فهد العنود: انتي ينيتي ريم:ليش؟؟ العنود:آخر مره خبرته ..عفس البيت علينا ريم:لهالدرجه العنود: واكثر ..فهد وايد غيور..وعصبي... يله ريم نزلي ترى هو ينتظرنا تحت ريم لما نزلت لقته واقف ينتظرهم وهو يشوف التلفون فهد بصوت عالي: وين العنود ريم : تجهز وبتيي فهد: بتأخر ريم سكتت ....شكله وهو معصب يخوف نزلت العنود بسرعة :انا وصلت لاتصارخ وهم طالعين دخل علي علي بعد ما بارك لهم: هلا والله بالمعاريس ريم وفهد: هلا علي: ها على وين فهد: بيت عمي حمد ..الأستقبال عندهم علي : عيل انا باروح معاكم ..ابارك لعمتي وبرجع العنود:عندي فكرة فهد وعلي يرحون بسيارة علي وانا وريم بنروح بسيارة فهد فهد: من راح يسوق سيارتي العنود: انا علي: بل..اقول تشهدي ياريم ...فهد: انت لازم تخليها توقع انها المسؤلة عن السيارة ..لأن ماعتقد بترجع لك السيارة سليمة ريم ضحكت غصبا عنها ....بس عنود عصبت وسحبت ريم وطلعت لسانها لعلي وهي تقول: الحقني اذا انت قادر ... ((حوار ..يدور )) في سيارة علي علي: ابشرك قاطعت ربعي ..وقطعت شرب الي مايتسماش فهد وهو فرحان: احلف علي: يعني باجذب عليك فهد: أي تسويها علي: افا..بس ماتنلام معذور فهد: عيل اكيد مرتاح احين علي: واايد فهد: قايلك انا من زمان وخر عنه علي: بس انا متضايق على مشعل فهد: مشعل خلاص دام انك بعدت ..مشعل بيبعد وانا باكلم ناصر بعد في سيارة فهد .... العنود على المية والستين ريم ماسكة السيت ومغمضه :العنود شوي شوي العنود تضحك على شكل ريم : ها ريومه خايفه ريم فتحت عيونها ولما شافت عداد السرعة والسياير الي تتجاوزها العنود سكرت عينها مرة ثانيه : والله صاج ابوج يوم ماسمح لج تروحين الجامعه بروحج (هني العنود لفت بالسيارة ) صرخت ريم واااااااااااااااي العنود: هههه ريم فتحي البيتي ( درج السيارة) راح تلاقين اشرطة اغاني خل احطها لج ريم: روحي مناك ... تبين خاتمتي وانا اسمع اغاني العنود:ههه ..حرام عليج ..(اهني العنود لفت في واحد من الشوارع الداخليه يعني كان طبيعي ان تخف السرعة) ريم فتحت الدرج في هالوقت وحاولت تطلع شريط ....الدرج كان متروس بأغراض مختلفة فيه Nأوراق وغرشة عطور واشرطة أغاني.... جذبها دفتر أحمر فتحته .... وشافت مكتوب عليه حرف الأن داخل قلب يشتعل .. وقبل لاتفتحه ياها صوت العنود: ريم يله وصلنا يالله هذا جزء بسيط ماادري ليش المنتدى صاير ما يحمل كتابات وايد يالله نينوووو ابي الرد ..وانتي بعد عهدوووووووووو مدامج قاعدة على القصة ردي ها يالله سي يووووو Quote Link to comment Share on other sites More sharing options...
عهد والزمن طويل Posted سبتمبر 22, 2006 Report Share Posted سبتمبر 22, 2006 هااااااي سوري ما رديت عليج بس تعرفين مدارس وحاله بس هم لازم اكمل هالقصه الاكثر من روعه يسلمووووووووووو الغاليه Quote Link to comment Share on other sites More sharing options...
النملة الشقية Posted سبتمبر 22, 2006 Author Report Share Posted سبتمبر 22, 2006 هلا عهودة حبيببتي لا عادي ولا تنشغلين عن الدراسة خيتوو حطي بالج عليها وانا راح انزل القصة كل خميس او جمعة عشان ما اشغلكم ويسلموووو حبيبتي على مرورج واصرارج على اكمال القصة تحيااتي النملة الشقية Quote Link to comment Share on other sites More sharing options...
النملة الشقية Posted سبتمبر 22, 2006 Author Report Share Posted سبتمبر 22, 2006 الأستقبال (اليوم الأول) ريم والعنود .... ادخلو من الباب الخارجي .... لأن الباب الرئيسي يطلع على الصالة الي كانت مليانه ناس الي ياو يباركون لريم وهم محملين بالهدايا طبعا هند كانت تنتظر ريم .... واول مادخلت ريم لمتها بحرارة .... وبجت سعود كان نازل بيروح الميلس مع الشباب .... ولما شاف اخته دفع بكرسيه الي ريم .. ريم انزلت لمستواه ولمته وهني ريم خانتها دموعها ونزلت .... لأنها تعز سعود ..وماتعرف شنو بيصير له لين بتروح عنه العنود: بس ياريم خلي دموع حق السفر اضحكت ريم ....وراحت فوق تجهز فهد وعلي مروا على مشعل وشوق ...شوق كانت ميته من الحيا .. بس محد كان قادر يوصلهم الا علي ..لأن سيارة مشعل خربانه وناصر راح يتأخر في الشغل ..لحضتها شوق قالت في نفسها (ليتني سمعت كلامج يا روان وتعلمت السواقه) علي نظراته كلها مركزة على شووق كانت حلوه والمكياج البسيط زادها حلا ويوم قربو يوصلون بيت عمهم حمد سأل مشعل : ها وين نروح الميلس لو الصالة علي: والله اذا وحشتك سوالف البنات وتبي تيلس معاهم روح الصالة ضحكت شووق غصبا عنها ..علي في خاطره ياحلو هالضحكة ليتها دوم بعد مانزلو من السيارة دخلت شووق طيران الصالة وتنهدت بعد الخنقه .... شوق اكثر وحده خجولة في العيله من بعد ريم بعد وخمس دقايق من دخول شووق انزلت ريم .... للصالة الي كانت مليانه ناس منهم الي تعرفهم ومنهم الي ماقط شافتهم بحياتها ريم كانت مسوية تسريحة رهيبه ومنزلة خصل من شعرها وحاطه عليها لماع خفيف بلون الفستان الي كان وردي فاتح وداخل معاه ابيض وفوقه شال داخل فيه ريش ابيض ناعم..ومحليها طقم الألماس ..شبكتها الثانية ريم اول ماسلمت سلمت على بنت عمها شووق شووق: ماشاء الله عليج صايره قمر جنان العنود: على قولتهم تقولين للقمر قوم وانا ابسط مكانك ريم ابتسمت لتعبير العنود: تسلمون هند يوم شافت اختها ضحكت: ريم الله يهداج أي حمامه ذي الي ذابحتها وحاطتها على جتفج ضحكوا البنات ريم ايلست في المكان المزهب لها وسط الصالة وعن يمينها امها وعلى يسارها شوق والعنود اما هند فكانت و اقفة قريب من الطاولة الي جمعوا عليها الهدايا .... كانت كلما امتلت الطاولة ترفع كمية من الهدايا وتاخذهم لدار ريم علشان يفضى مكان للهدايا القادمه روان وصلت متأخره لكنها عوضت عن التأخير بالميك اب الي ترست به ويها وايلست روان يم اختها شوق بعد ماسلمت على بعض الموجودات شووق: روانو شاحطه في ويهج روان: شنو بعد ميك اب شووق: هلون عاد ترستي ويهج روان:عاد والله انا كيفي..إلى يايه مكان مافيه الا بنات ..وكافي محاضرة نصور لي ومن بعيد كانت عيون تراقب روان وريم .. هاي العينين كانت عيون مشاعل الجزء السابع ((بداية المشوار)) ومن بعيد كانت عيون تراقب روان وريم .. هاي العينين كانت عيون مشاعل كانت تقول بقلبها(عيل هاي زوجتك يافهد والله وتعرف تختار... والله لأنتقم منها وحط راسها بالقاع ..بس مابنتقم منها هي راح ادمر اقرب انسان لقلبها .. سعود ... (ونقلت عيونها لروان الي كانت تسولف مع العنود) ... هاي اهي الي اسره قلبك ياسعود ... لو تدري ان حبيبتك هي سلاحي ..اهي الي تقدر تحطمك ..وتحطم قلب اختك معاك.. بس خل ايي الوقت المناسب وراح تعرفون كلكم من تكون مشاعل ) اهني مشاعل كلمت امها وهي تأشر على روان: يمه هذاهي البنت الي اقولك عنها الأم: والله حلوه مشاعل: يمه مو بس حلوه الا طيبه الأم: باشوف اذا اخوج بيوافق عليها مشاعل تكلم نفسها: لازم اخوي يوافق عليها لازم..والله قدرتي تيبين معلومات يالولوة أي لازم... مو تربيتي.. وضحكت (ومن دون لايدري حد لقطت بموبايلها لروان ثلاث صور وصورتين لهند.. ووحده للريم ) *( يمكن تستغربون من وين اقدرت مشاعل تحصل على هالكم من المعلومات بس كل الي اقدر اقول لكم انها من وحده اسمها لولوه واي لولوه ماقدر اقولها لكم اقرو القصة وراح تعرفون) بعد ماطلعو الناس تمو البنات يسالفون ولا وحده كانت تدري بالي دار بين مشاعل وأمها ورن موبايل العنود كان صاحب الرقم نفسه خالد العنود: اوف هذا مايسكت مثل غيره ..ولا المره الثامنه يتصل لي اليوم شووق : وريه العين الحمره ..لا تسكتين له العنود: يعني ارد عليه ريم: انا اقول لا تردين عليه طنشيه روان : لا ردي عليه.. ولا بيظل يتصل العنود رفعت التلفون بتردد وتكلمت بصوت عالي: الو خالد: هلا والله العنود: انت ماعندك دم ماتفهم..لا تتصل جم مره اقولك خالد: ماقدر ماتصل لازم اقولج الي بقلبي العنود: وانا مابسمع الي بقلبك زين خالد : لازم تسمعين لان هالشي يعنيج ريم : وشدخلني انا بالي بقلبك خالد: حرام عليج يالعنود انصدمت العنود من قال اسمها..منو هذا ؟؟؟و شلون قدر يعرف اسمها ؟؟؟ ..بس خافت ان سألته من وين عرف اسمها ..اهو راح يتأكد ان هذا اسمها الصحيح ..اهني عنود اصرخت: شوف ان اتصلت مره ثانيه لا تلوم الا نفسك .. هالمره ما برد عليك اخوي الي راح يرويك شغلك .. وسكرت الجوال ريم: شيقول العنود كانت متضايقه : يعرف اسمي الكل شهق ....وشوق الي كانت تشرب العصير شرقت به روان: حلفي..ايعرف اسمج و وو رقمج الهنوف دخلت في هالوقت وقامو يسلمون عليها اما شوق فراحت المطبخ تشرب ماي من بعد الشرقه ---- وقبل هذا بشوي في ميلس الشباب كانو حاطين العشا ناصر مع فهد وعلي اما مشعل فكان طالع برع يدخن ناصر : اقول علي ممكن يعني تروح تيب ليSpoan علي: وليش انت ماتروح ناصر: افا ياولد العم علي: اصلا فهمنها طرده ولا شدعوه انت ماتاكل الا بالSpoan راح علي المطبخ وتركهم يضحكون عليه ..ناصر كان بيسأل فهد عن حال علي عشان جذي طرش علي Quote Link to comment Share on other sites More sharing options...
nino Posted سبتمبر 22, 2006 Report Share Posted سبتمبر 22, 2006 ثنكس على التكمله !! يالله ناطرين البقيه Quote Link to comment Share on other sites More sharing options...
النملة الشقية Posted سبتمبر 22, 2006 Author Report Share Posted سبتمبر 22, 2006 (( بارد كالثلج)) في المطبخ شوق كانت تشرب الماي ومانتبهت على علي انه دخل ..وعلي مانتبه لها... لما كحت التفت وشافها ..آيه كانت لافه الشيله بس مو مضبطتها ا .. اهي ماتوقعت ان حد بيدخل المطبخ غير الحريم علي بعد ماتنحنح : شوق شسوين اهني شوق وهي مرتبكة وتعدل شيلتها: أ..أشر ب ماي علي: اقول... وين الملاعق شوق تبتسم بحيا: هناك( اشرت على الرف الي يم المغسلة ) ..راح علي يدور وخذ وحده وغسلها علي كان بيروح لولا ان شوق نادته: علي.. علي التفت صوبها: نعم شوق بقمة ارتباكها : انا اسفه.. عشان ذاك اليوم انا كنت معصبة ومادري شقلت بس سامحني علي:لا تتأسفين ..صدقيني اول مره احد يصارحني جذي...وانت وعيتني على الي اسويه والله اني كنت جسد بلا روح انتي رجعنتي لي روحي .....وانا الي لازم اقولج مشكورة لانج خليتني اترك هالدمار شوق كانت تحس بشعور غريب وكأن جسمها كله يحترق.. وارتفعت حرارة جسمها لكن قبل لاتروح قدرت تقول بخجل:والله انك كبرت بعيني يا..علي وراحت عنه وخلته يتعذب بجمالها وحلاوة صوتها ..آه يا حلاوة اسمي بعد مانطقتيه رجع علي الميلس بعد ماحصل جم زفة من ناصر: انت رحت تيبها ولا تخترعها في الصالة بعد مارجعت شوق هند خذت ريم على صوب هند: ريم انا ودي اقولج شي ريم:شنو هند: انتي طول عمرج تنصيحينا انا وسعود الين سميناج ام النصايح ونصوح..كنتي تنصحينا اكثر من امي ..وانا ولا عمري قلت لج نصيحه وحده ريم اضحكت: يعني تبين تنصحيني هند: كل الي ابيه اقولج عيشي حياتج مع فهد... كثر ماتقدرين تستانسين استانسي .. عبدالعزيز راح وفهد معاج ...حبي فهد وبتشوفين روحج مستانسه ..ترى هاي احلى ايام تعيشها البنت ..ففرحي فيها ريم طبطبت بايدها على ايد هند وابتسمت: بحاول اني استانس ..وبحاول قد ماقدر ان احبه وبنشوف قطعو سوالفهم شووق مع وروان الي كانوا بيرجعون البيت ..وبيودعون ريم لما راحو شووق وروان كانت الهنوف بتروح ... ريم: وين تو الناس الهنوف: لا تأخرت على.... كانت بتقول عبدالعزيز بس مراعاتا لشعور ريم مانطقت..وراحت بعد مئات السلامات على ريم على الساعة عشر دخل علي وفهد وسعود ويلسو في صوب بعيد عن البنات .. وام فهد وام يوسف راحو يسولفون في الصاله الفوقيه بروحهم .. العنود بصوت جهوري: شباب (وهي تحرك يدها وترسم علامة+في الهوا) +صبايا علي : يا شينها يوم نطقتيها ( قلد صوت العنود (صبايا)) هند: عيل هم احسن منا يتكلمون بدلع فهد: أي هم احلى منكم ويطيح عليهم الدلع مو انتو العنود: ريم يودي ريلج ترى متسبب ريم اضحكت بدون لاترد العنود: حلفي عاد.... أحنا نبيج تدافعين عنا تضحكين هند: بعد هذا ريلها ماتقدر تقوله شي ريم هالكلمه ماعادت تحزنها مثل قبل ضحك فهدوهو يقول: بعد مو قاصر الا ترد علي سعود: الا اشوفك استقويت على خواتي فهد ضحك من الخاطر في هاللحظه دخل عمهم عبدالله ومعاه فيصل هند من شافت فيصل اسكتت وحمر ويها عبدالله: السلام عليكم الكل: وعليكم السلام وراح لريم: هلا بالغالية بنت الغالي بالمبارك ريم: الله يبارك فيك عمي فهد: العبد انا مالي شي عبدالله: تقول العبد...وتبيني اسلم عليك روح مناك سعود : ها فيصل وينك ماتبين هالأيام فيصل:دنيا...والله كله من هالخاينين فهود وعلوي راحو وماقالو لي علي: من قالك تقعد على النت فيصل: ان شالله خليتو لي عشا هند: أي بالمطبخ اروح ايبه فيصل حب يلعب عليها: لا انا باروح ايبه هند استحت ورجعت مكانها ..فيصل قام وهو يضحك عليها ...قعدوا الشباب يسولفون وفيصل تأخر ...راحت له هند ظنت انه ماعرف وين رفعته.. لما وصلت المطبخ شافته يدخن زقاير هند بدت تسعل وتمت تحرك ايدها جدام ويها تبعد الدخان : شنو ذي كحححح ضحك فيصل: زقاير هند: أي ادري ، بس ليش تدخن داخل المطبخ فيصل : هذا مو بيت عمي هند:أي فيصل: بس بكيفي هند: من قال فيصل: انتي قلتي فيصل كان يمزح بس برود اعصابه كان يحرق هند من الداخل هند: انزين ممكن تطلع برع تدخن لأني اختنق من الريحه فيصل: اطلع عشانج وحرك ايده بأستهزاء يأشر عليها هند بعصبية: أي مو عاجبك فيصل: صراحة موعاجبني ان اطلع عشانج ..اذا باطلع باطلع بأمر وحده حلوه لاكن انتي مستحيل . . هند عصبت ورمت الماي الي بالكوب عليه وراحت من دون لاتلتفت له فيصل استغرب من الحركة الي سوتها ..لكنه ابتسم ويم تذكر شكلها وهي مقتهره... يعرف ان هند تموت فيه كثر ماهو يموت فيها بس حاب يلعوزها شوي ..عشان اتعرف انه مو سهل رمى الزقا ه من ايده ورجع الصالة هند الي سبقته ايلست يم العنود بعصبيه العنود كانت تجيها مسجات مسج ورى مسج كلها من شخص واحد(العنود بليز ردي..ودي اقول الي بقلبي لج يالعنود) ..وغيرها كثير ..هالمسجات ماكانت تقدر ترويها لفهد لأن اسمها مو جود فيها ..فقررت ان اتسكر الجهاز وطنشه دخل فيصل وهو مبلل سعود اول من شافه : ههههه شنو ذي طايح ببحر..هند اضحكت مع سعود بس انبها ضميرها على الي سوته..كثر ماتحبه يقهرها فيصل يرد على سعود وهو يطالع هند: هاي الله يسلمك مطر نزل بس مادري من وين هند كاتمه ضحكتها ..وفيصل عصب يوم شافها تضحك.. هي كانت تقول بقلبها تستاهل ذوق من الي انا ذقته العنود: اشرايكم نلعب مونوبلي هند: أي يله سعود : انا بلعب معاكم وفيصل: انا بعد هند :NO BOY PLEAS سعود: هند انتي سكتي لا أخذ المونوبلي منج ولاتلعبين هند حرق اعصابها سعود وتضايقت من كلامه فيصل: وعيييي مايخلونها تلعب هند بأبتسامة استهزاء: شكللك تبي ماي مرة ثانية فيصل: ههههههه لا خلاص لعبو ا في هالوقت ريم راحت تاخذ شور بعد الحفلة .....علي وفهد وعبدالله رجعوا الميلس اما الباقي فكانوا منهمكين في اللعب سعود: هندوا ماتعرفين تعدين ..عطيني اعد الفلوس هند مدت ايدها لسعود ..بس فيصل تحرك بسرعة وخذ الفلوس من ايدينها : لا انتي ولاهو .انا مدير البنك (ورفع جتوفه عشان يثبت لهم انه شخصيه) بعد دقايق من اللعب مل سعود ..وتبعته العنود بعد ثواني اما هند وفيصل كان كل واحد منهم اعند من الثاني فيصل: هي وقفتي بأرضي اشوف هاتي الفلوس (ومد ايده لها) هند: انت كل مكان ارضك فيصل وهو يقلد صوتها: أي مو عاجبج هند احذفت الفلوس بعصبيه عليه وراحت ايلست يم العنود فيصل يضحك عليها: خسرتي...تستاهلين انتي ويه تحدي هند ماعلقت على كلامه العنود: عاد كله ولا هنوده لاتزعلها فيصل: يه اهي الي رازه ويها تبي تلعب ..انا قلت لها اني مالاعب بنات ..بس هي راسها يابس العنود: احين شسوت لك فيصل : ثقيلة دم وكله رازه ويها هند : احترم نفسك فيصل : انا محترم نفسي قبل لااشوفج فيصل كان يمزح مع هند ..لكن مزحه كان يعور قلب هند وهاي الي خلاها تصرخ بعصبيه ومن غير وعي وهي الي عمرها ماغلطت على حد : انت ليش شايف نفسك جذي...على شنو من اخلاقك ولا جمالك ..ولو سمحت لا تكلمني بهالأسلوب نزلت دمعتين من عيون هند وركضت لدارها وقفلت على نفسها الباب ...سعود والعنود كانو مذهولين من تصرفها لكن فيصل ماهتم لغضبها الحقيقي وتم يغني بصوت عالي ويطبل...على الطاولة (احسن مادام انك زعلت..احسن احسن ..وعمرك مارضيت ..اصلا... انا حدي وصلت ....وياما من اسبابك بكيت) وهني قاطعته العنود اخته: هي انت ماعندك دم ماتحس البنيه متضايقه منك وانت تغني فيصل: يه اهي تتدلع سعود: ياخي انت الغلطان دام تعرف انها دليعه اسكت عنها فيصل: اووووووووووه انا الغلطان زين ..اروح استسمح منها يعني سعود: لا يبه انت اقعد اهني والعنود تروح لها ... العنود راحت لي عند دارها وتمت تناديها : هنودي فتحي الباب وماكانت تسمع أي اجابه ....هند كانت تبجي من قلب ..موعلى هالكلام ...الي قهرها أكثر شي كلمته وهو بالمطبخ اذا باطلع باطلع بأمر وحده حلوه لاكن انتي مستحيل.. شنو يعني..اهي موحلوه بنظره ولاشنو ...يجرحها..ويضحك..واحين ولاعباله انها زعلانه .....بس من يوم سمعت العنود وعت على الي تسويه انا شقاعده اسوي ليش اصيح.. مشت دموعها وغسلت ويها وفجت الباب..العنود لما شافت اثر دموع على ويها ..اكسرت خاطرها .. اهي اول مره تفارق اختها ومتضايقه ويي فيصل يكمل عليها ويزعلها ..عشان جي العنود لمت هند واستسمحت منها لما رجعت هند الصالة وشافها فيصل ابتسم لها بس هي صدت عنه .. فيصل تضايق بس عذرها توه مزعلها يبيها تسامحه بدقيقه الساعة 11 ونص علي طلع من الميلس .... وراح الصالة عشان ياخذ العنود... ولحقه فهد ...ريم كانت جاهزة ولا بسه عبايتها وحاطة كحل في عيونها من دون اي شي ثاني ...أما العنود فكانت تحترق من الداخل على هالخالد الي ماوقف رنات ولا تطرش مسجات.... وأحسن حل شافته ان تسكر تلقونها ولما دخل علي.... بدت هند تترجاه ..وتترجى فهد ان يخلون العنود تنام عندها وقبل لايرد فهد نقز فيصل: والله احنا ماعندنا بنات ينامون برع البيت هند طالعته بنظرات تحدي وقالت وهي تقلده :موبيت عمها فيصل: أي هند اضحكت : بس كيفها وردت هند تلح على فهد: فهد والي يخليك خذيتوا ريموا لا تاخذون العنود فهد كسرت خاطره هند : اوكي خليها تنام عندكم اليوم بس فيصل طلع وهو مقهور عل اخوه كان ليما الحين مبلل هند فرحت لأنها قدرت تقهر فيصل و في نفس الوقت امنت ان العنود بتاخذها بكره الصبح للجامعه معاها ----------- فهد وريم بعد ما وصلوا جناحهم ..فهد رمى روحه على الكرسي ومسك الرموت وقعد يقلب فى القنوات ريم قعدت معاه في الصاله بس بعيد عنه فهد كسر الصمت: ريم ريم: هلا فهد:انا حجزت على فرنسا وبلجيكيا و هولندا...عاجبينج لو تبين نسافر ماليزيا ريم بصوت هادي: انا سافرت ماليزيا من كم سنة ...والله ودي اروح هولندا واشوفها ريم طر ا ببالها اخوها يوسف الي درس سنه بهولندا وتذكرت انه بيرجع بكرة ريم: فهد... اخوي بيرجع بكرة الصبح من السفر فهد: اوكي خلاص بكره نروح انسلم عليه وانتي تاخذين اغراضك وشنطك ريم بخنوع: اوكي فهد ابتسم ..كان وده يقضي هالأيام مع مشاعل ويعيد ذكرى السنين الي عاشوها باسم الحب مع بعض ..بس خلاص مشاعل حلم ونتهى بواقع ..اخ ياناصر ليتني اقدر انساها بس صعبه والله صعبه ريم قطعت افكاره:انت تعشيت لو أطلب لك عشا فهد: لا تعشيت الحمدالله ريم شلت المجلة الي تتصفحها وراحت غرفتها ((احتراق)) اليوم الثاني) يوم الجمعه في بيت العم خالد (بوفهد) ام فهد وبوفهد كانو يتفطرون بغرفة الطعام ام فهد تباطت فيصل ولدها: علي يمه قوم شووف اخوك وينه بو فهد: اكيد لا هي بالجوال مثل كل مرة ام فهد: معليه ..بس خل يروح يتأكد علي قام رفع الصحن الي قدامه: ان شاالله يمه بوفهد فرح من رده: الحمدالله علي هالأيام مريحنا..انشاالله دوم ام فهد:آمين ... الا اليوم الصبح عيني فهد اتصل قال انه بكره الصبح بيسافر فرنسا وبيمر علينا في الليل يودعنا بوفهد: يروح ويرجع بالسلامه علي ضرب باب دار فيصل اكثر من مره من دون لايرد عليه فيصل فتح علي الباب بضربه من كتفه ..(علي جسمه قوي... عنده عضلات كبيرةبحكم انه بقوة الدفاع الوطني .... وماخذ تدريبات وداخل صاعقه خلته يصير ضابط في القوات الخاصة و من اول ماتخرج من الجامعه) فيصل كان نايم على السرير ويأن من الألم..علي ارتاع من شكل اخوه ..حط ايده على جبين فيصل وحس بحرارته مرتفعه .. علي نادا امه عشان تساعد فيصل وتقومه.. وهو راح يحرك السيارة على اساس ياخذه للمستشفى..وهو بالسياره فكر لو انه كان بحالته القبليه جان مادرى عن اخوه..وتم فيصل مقطوط بهالسرير..بس الحمدالله انه وعى على الغلط الي كان رايح فيه... اهو كان يشرب عشان ينسى ..بس الظاهر انه كان بينسى هالأرتياح الي هو حاس فيه احين ( انـــــــــــــــــــــت) العنود وهند كانو بالسيارة..راجعين من الجامعة..والعنود فاتحه الراديو ..وهند الي كانت متضايقه انهم ماتأخرو بالجامعه كثر كل مره لأن العنود ماكنت عندها الا محاضره وحده... لكنها من سمعت صوت الموسيقا بدت تصفق فجأة العنود قصرت على صوت الراديو هند الي كانت مشتطه : شسويتي العنود مانتبهت لكلام هند واشرت بايدها على شرطي مرور واقف من بعيد:هندو لبسي الحزام هاي كل يوم لازم يوقفني انا من بد الكل هند وهي تلبس الحزام: ليش العنود:مادري ..مره نسيت الليسن (شهادة السواقه) سمح لي امشي..واليوم الثاني وقفني وتأكد من الليسن.. ومره قال اني مسرعه..ومره مولابسه الحزام هند: عاد ليش جذي العنود: والله ما عرف بس هو شكله طيب وفعلا لما قربوا منه وقف السياره العنود نزلت جامة السياره: خير اخوي ..في شي الشرطي: الرخصه لو سمحتي هند نقزت: ليش يعني هي شكلها صغيره ...والله انا شفتك تمشي الي قدمنا بدون لا تتأكد مهم ابتسم الشرطي على لقافة هند: من ذي يالعنود العنود فجت عينها.. ...العنود تعجبت شلون عرف اسمها...الا كل من قام يعرف اسمها .. وقبل لاتسأله جاوب:اكيد استغربتي شلون عرفت اسمج صح...لا تخافين من بطاقة السياقه..أنا اتذكره من ذيك المره...انا خالد يمكن عرفتني من صوتي انتظرونا في الجزء الياي راح نعرف... .عرفنا من يكون صاحب المكالمات ...بس الي مانعرفه شراح تسوي العنود.. تهاوشه بالشارع ..والا تسكت؟ وفهد وعبدالعزيز راح يتلاقون وشراح يقول عبدالعزيز لفهد وبيخليه يتضايق...؟ وريم هل راح تتحمل تعيش باقي حياتها مع أنسان ماتحس بأي شي أتجاهه؟ * حذفت كمية من الأسئلة عشان ماتقولون انها صعبة هههه يالله nino مدامج قاعدة علقي على هذا الجزء الباقي وانشاءالله لقاءنا بيكون الاسبوع الجاي حبووو يسلموووو على المورو Quote Link to comment Share on other sites More sharing options...
nino Posted سبتمبر 23, 2006 Report Share Posted سبتمبر 23, 2006 ثنكس على البارت حبوبه !! ننتظر الاسبوع الياي عاد بليز يوم الخميس سيدة نزلي ابي اعرف شنو بيصير ثنكس مرة ثانيه Quote Link to comment Share on other sites More sharing options...
النملة الشقية Posted سبتمبر 24, 2006 Author Report Share Posted سبتمبر 24, 2006 العفوووو حبيبتي انشاءالله راح تعرفين كل شي الاسبوع الياي وانشاءالله ما راح اتأخر عليكم ويسلمووووووو نينوو لمررورج الحلوو يالله يالله انتظر ردودكم (حبيبة قلبي فطوم ) و (عهد والزمن طويل) انتظروووووووني النملة الشقية Quote Link to comment Share on other sites More sharing options...
النملة الشقية Posted سبتمبر 28, 2006 Author Report Share Posted سبتمبر 28, 2006 الجــــــــــــزء الثــــــــامن (1) انا خالد يمكن عرفتني من صوتي اهني كانت صدمة العنوود ماتصور .. معقوله هذا يكون خالد ..خالد الي زعجها امس بالمسجات والرنات العنود من ذهولها حركت السياره من دون لا تعطيه شهاده السواقه الي طلبها .. هند: عندوا اشفيج حركتي العنود: سكتي ياهند...اتعرفين من ذي هند: من يعني.. العنود: هذا خالد...خالد الي كان يدق علي امس يوم كنت ببيتكم هند أشهقت: هذا هو العنود داست على البترول وزادت من سرعة السياره : أي اهو اهو ...وانا اقول من وين عرف اسمي هند:ههههه ..الولد ميت فيج وانتي ولا داريه.. لا وبعد شكله حلو اهني رن موبايل العنود الي وعاها من الصدمه علي كان متصل: الو عندوا العنود: هلا بالشيخ علي: وينج انتي العنود:انا بالطريج ..ليش في شي علي: لا بس ابيج تين حق امي العنود: امي..امي شفيها علي: مافيها شي..بس فيصل تعبان واايد .... حرارته مرتفعه العنود بقلق: اسم الله على اخوي... كاني بالطريج يايتكم وسكرت التلفون.. مرض فيصل نساها سالفة خالد هند: اش صاير العنود:فيصل تعبان..حرارته عاليه هند اختبصت ..وخمنت ان هي سبب مرضه بالماي الي رمته عليه امس في الجو البارد..بس يمكن تعبان شوي وهم مكبرين الموضوع هند تستفسر: هو تعبان واايد العنود: والله مادري بس صوت علي كنه به شي هند: لا ان شاالله مافيه الا العافيه ..هي كانت تواسي العنود في وقت كانت محتاجه لحد يواسيها العنود نزلت هند بيتها وراحت بسرعة جنونيه للبيت ( ويستمر المسلسل ) في الفندق فهد فتح عينه وهو بغرفته ..كل الي يذكره انه نام امس وهو يالس على القنفه يشوف البرنامج.. شلون وصل غرفته مايدري..ومايدري عن ريم امس الي كانت محتاسه تخليه نايم مثل ماهو ولا تصحيه ....طلع فهد للصاله وشاف ريم مجهزه الفطور وتنتظره فهد بصوت مليان نوم: صباح الخير ريم: صباح الورد فهد بعتاب : ليش ماقعدتيني اتفطر ريم : امس انت كنت سهران ومانمت الا الساعة 3 .. فماحبيت اصحيك بدري فهد:بس مره ثانيه صحيني ريم مافهمت شنو يقصد اهو كان يهددها ولا يعاتبها ولايفهمها ريم: ان شاء الله فهد: انتي مو رايحه اليوم بيت هلج ريم: أي باروح فهد: عيل يله لبس عباتج ريم: احين فهد: لا باجر ريم ضايقتها طريقة كلامه والجفا الي بين حروفها ..بس مابينت شي: لكن انت مافطرت فهد: انتي تجهزي وانا افطر بسرعة ريم رجعت لدارها ...ولبست فستان ذهبي وفبه من تحت قطعه ثانيه لونها افتح بشوي مايل للبيج وتنبان من فتحات صغار ..وحطت شدو ذهبي فاتح طبعا اليوم البست الشبكة الذهب وخذت خاتم ذهب من أم فهد كان من بين الهدايا الي وصلتها امس... يعني بأختصار كانت مسكته...لكن لما طلعت فهد ماعطها اهمية فهد: جهزتي ريم ابتسمت: أي..انت فطرت فهد: اقول لبسي شيلتج وعباتج عدل ليكون اشوف شي طالع.. ريم تقول في خاطرها ..ياربي هاي مايعرف يجمال ابد..لو عبدالعزيز مكانه كان ماسكت من المجاملات ....صج ان فهد مابين بكلامه أي مجامله ..لكنه كان منبهر بالجمال الي يمشي معاه (2) (رحلة أحلاام ) ببيت بو فهد العنود بعد ماتطمنت على اخوها وان مابه الا صخونه عاديه...وعلي مكبر المووضوع ..رجعت لدارها وفصخت عبايتها ويلست على سريرها وقعدت تذكر الي صار اليوم بالتفصيل...معقوله يطلع خالد هو هالشرطي ..بس في فرق كبير الي اتصل بها كان جريء ..اما الشرطي فباين عليه انه خجوول ..مدت ايدها لشنطتها وشلت الجوال الي كان مقفول وفتحته ..اول مانفتح طلع لها مربع يقول ان الذاكرة ممتلئه .والمفروض انها تمحى رساله او رسالتين على شان تتلقى الرساله اليديده..طبعا توقعت ان هالرساله من خالد ومحت أخر رسالتين كانو منه بعد ...وصلتها المسج الجديد((عنود بليزز ردي علي ...ماقدر اصبر اكثر....ردي علي)) ..العنود حست ان ذي اخر نداء لها وقررت ان ترد عليه لما يتصل بها ... ولما رن جوالها بدا التردد واضح عليها ..ترفعه ولا لا ..لكن اخيرا استسلمت لقرار قلبها ورفعته العنوود:الووووو خالد: وأخيرا...واخيرا رفعتيه العنوود: مابيدي حيله انت ماتوقف اتصالات ومسجات خالد: أي عشان تعرفين شكثر قلبي يحبج العنود الكلمه الأخيره قلبت لونها وخلت قلبها يدق لأول مره في حياتها بس مابينت ان هي متأثره من كلامه: ممكن تقولي السبب الي يخليك تتصل فيني؟؟؟ خالد: تدرين انا من شفتج عجبتيني ودي اتعرف عليج اكثر العنوود: اتعرف علي؟؟؟...مو انت عارف اسمي الكامل وعمري وهذا اذا ماكنت عارف عنوان بيتنا خالد:افا ....والله كل هذا عرفته بالصدفه من بطاقة السياقه..وبس وحتى انتي ماتعرفين عني الا اسمي العنوود:ومابعرف اكثر خالد:بل ليش عاد ..ليش انا مو مجرم عشان تكرهيني لهالدرجه العنود بسرعه: انا ماكرهك خالد: عيل كلامج شنو معناه العنود لفت اللساعه وشافتانها صارت 12ونص: اقول خالد انا عازمه بنات عمي اليوم على الغدا ممكن تسكر ..عشان باروح اجهز نفسي خالد ..اوكي هني وعافيه ...باي العنود بعد ماسكر الخط ردت عليه الله يعافيك..وردت انسدحت على السرير ..هي حاسه بشعور غريب ..قلبها يدق.. وايدينها عرقت..مره تحس بفرح ومره بخووف ..يمكن يكون هذا هو الحب ؟..سألت نفسها..بس هي ماشافته الا مرات قليله وماكلمته الا مره ...اذا كانت تعتبر هالمكالمه انها حديث معاه ..وهي وسط هالأفكار تذكرت عزيمتها لبنات عمها بمناسبة زواج ريم واخوها..انقزت من السرير وفتحت الكبت واختارت ملابس بسيطه وناعمه ..وراحت تتسبح ....لما طلعت العنود كانت الساعة وحده ومحد يا لما الحين تذكرت الهديه الي سوتها لريم وحطتها في كيس حلو ..ونزلت بالصاله تنتظرهم ..طبعا بعد ماطلبت من المطعم على الساعه وحدة وربع دخلوا ريم وهند العنود سلمت على هند وريم ريم: شخبارج العنوود:تمام هند الي كانت حاسه بتانيب الضمير طول الوقت نقزت تسأل العنود: شخبار فيصل العنود:الحمدالله ..مافيه شي بس علي مكبر المووضوع الله يهداه ..شكله اول مره يشوف حد يتصخن هند بارتياح:الحمدالله نزل علي في هالوقت...العنود يوم شافته ابتسمت الدنيا مو شايلتها من الفرحة كل يوم تحمد ربها على هالنعمه لأنه قاطع ربعه وخرابهم علي وعينه اداور على شوق :انا باروح للشباب البلاج تبون شي العنوود:لا مشكو ر طلبت من المطعم ريم: علي خبر فهد ان انا هني لأني اتصلت كم مره به بس تلفونه مسكر علي : يوصل ان شاالله بعد ماطلع علي اصطدم ببنت بس ماشافها رجع ورا وشاف ملامحها ..عرفها انها شووق شووق خدودها حمروا: او..سوري ماشفتك علي:لاعادي... شلونج شوق شووق:بخير وانت علي: تمام شووق دخلت داخل الدار بسرعة ..اما علي فركب سيارته وراح للبحر داخل البيت العنوود وشووق وهند وريم كانو يسولفون العنوود خذت الكيس الي فيه هديتها لريم وعطتها اياه.. وقبل لا تفتحه ريم قالت العنوود لها: سمعي ريوومه ان ادري انا هدايا كثيره ياتج ذهب وفضه وعطورات وشناط وملابس وحتى مكياج (طالعت هند)..بس انا حبيت ايب لج هديه غير الكل ..واتمنى من كل قلبي انها تعجبج..انا سويت هالهديه بمساعده هنوده اختج ريم فتحت الكيس وشافت بداخله البوم كبير اسود مقسم ثلاثة ا قسام ..قسم بلون فضي وقسم ابيض وقسم ذهبي..وباول صفحة كانت بطاقة االعرس.... ريم فتحت اول صفحه في الألبوم كانت فيه صوره لها ولفهد يوم كانو صغار يالسين مع بعض هي بملابس العيد وهو بالثوب والغتره والبشت ..وتحت هالصورة كانت صورة لهم وهم بالكوشه مشابهه للصوره الأولى ..اما باقي صفحات القسم الاول(الفضي) فكان فيها صور لفهد وريم في كل مرحله من مراحل عمرهم من وهم على اربع ليما وهم على الكووشه وفي صوره كانت بالصفحه الأخيره ..ضحكوا البنات عليها..كانت صورة ريم وهي تشرب العصير..كان شكلها يضحك عافسه ويها ومغمضه عينها وتحت صورة فهد مستمتع بالي يشربه وتحت مكتوب بخط مرتب((كيف تشرب عصير رمان مع السفن اب )) ريم ضحكت على شكلها : عصير بالسفن اب ها..من مفكر بهالمقلب اكيد انتي عندوا العنود: لا والله مو انا هاي هند والهنووف هم الي راحو يسكبون العصير ريم: هندوا...وانا اقول اشفيه طعم العصير غريب هند: هاي والله فكرت الهنووف .. ريم فتحت القسم الثاني كانت به اشعار فهد مع رسومات ريم ..لكل شعر من اشعار فهد رسمه مناسبه من رسومات ريم .. والتاريخ الي كاتبه فهد على الشعر مو بعيد عن تاريخ الي كاتبته ريم على الرسمه . .يعني لما كتب فهد شعر انه مخنوق ومتألم ..كانت يمه رسمه لريم فيها بنت مشنوقه وحواليها ناس يضحكون ...كانت تقريبا مشاعرهم وحده ..ريم تسآلت بينها وبين نفسها اذا كان فهد نفسها متضايق من هالزواج..طبعا العنود حصلت على هالرسوم من هند وطبعا العنود فتشت ..واخذت اشعار اخوها اما القسم الثالث فكانت فيه اهداءات من الأهل والأصدقاء ويم كل اهداء صوره لصاحب الأهداء مع ريم ريم عجبها الألبووم: ولمت العنوود: مشكووره حياتي الألبوم رووعه العنوود: العفوو ماسوينا شي هند في هالوقت حست بغيبة روان: شوواقه الا وين روان..مابتيي شووق: مادري انا تركتها وهي نايمه هند: انا باروح اتصل فيها باشوفها اذا بتيي هند دقت رقم روان من جوالها بس ماكان فيه ارسال.. طلعت من الباب الوراني للحديقه. الي كان اقرب لها من الباب الرئيسي في هللحظه قرر فيصل ان ينزل يغير جو ويصور له جم صورة على الماشي..مل من الحكره بالدار ..بس قبل لاينزل سمع حس سوالف واتصل بأخته العنود: الوو فيصل: هلا عندوا اقول عندج احد العنود :ايه البنات بالصاله فهد: عيل بس اوكي ..انا باطلع من الباب الوراني عنود: وين بترووح وانت مريض فيصل: اوهووو لا تبتدين انا خلاص الحمدالله العنود: انزين كيفيك بس اذا زاد المرض عليك انا مالي كار فيصل: مالج كار بس لج باص هههههههههههههه العنوود: هه بايخ... كيفك فيصل: اكيد كيفي عيل كيفج العنوود: حتى وانت مريض متسبب فيصل ضحك وسكر التلفوون...لما طلع من الباب الخارجي سمع حس سوالف وضحك ..عرف ان هند هي صاحبة هالصوت ..فيصل كان مقتهر عليها من امس يوم تعانده ..وتكب عليه الماي ..الي تسبب بمرضه هند سكرت الجوال في الوقت الي مر فيصل جدامها هند بارتباك: ف..فيصل فيصل:ها هند خافت من رده ..كان باين عليه انه معصب هند: اشلونك فيصل مشى عنها ومن دون لايلتفت رد: بخير هند: انزين انت ليش طالع مو مريض فيصل: والله من عينج مسؤله عني .. واذا باطلع انا كيفي انتي مالج خص هند تفسر موقفها: أ..انا ..أ..أقص..د.. إذا ..ط..طلعت بيزيد مرضك فيصل: والله انج تمللين ..وطلع عنها هند:أن...آااا ...نااا..آسفه دخلت والدمعه محبوسه بعينها على تصرف فيصل معاها ..هند أي موقف يصيدها لوبسيط ..الحل الوحيد بالنسبه لها دموعها فيصل ركب السياره ..وقعد يفكر هو حس ان تعامله كان جاسي معاها .. وقال بقلبه ..انا بعد آسف ياهند Quote Link to comment Share on other sites More sharing options...
النملة الشقية Posted سبتمبر 28, 2006 Author Report Share Posted سبتمبر 28, 2006 (( أموااج ومشاعر)) على البحر ..كان علي توه واصل لهم علي :هلا شباب الكل: هلا علي اول مره يشووف عبدالعزيز ..وشكله كان منصدم من وجوده فهد الي كان يرسم على شط البحر قلووب ويمحيها بطرف العصا ..لاحظ ارتباك علي لما شاف عبد العزيز فهد: علي هذا رفيجي عزوز ..الي كان يدرس معاي بهولندا تذكره علي تذكر شوي من يكون هالشخص: أي اذكره..شلونك عبد العزيز عبد العزيز: تمام علي يوجه كلامه لأخوه: فهد ..ريم قالت لي اخبرك ان هي في بيتنا .. عبدالعزيز حس بشي ينفجر في قلبه مو قادر يستوعب ..ريم ليش تقول لفهد...اي ريم يمكن يقصد ريم ثانيه مو الي بقلبه....بس لحظه الهنووف قالت لي انها بتاخذ ولد عمها وفهد يكون ولد عم..... صرخ عبدالعزيز في قلبه لدرجة ان يوسف سمعه يوسف:شنو لا عبدالعزيز:ها...لا تذكرت شي يوسف: ههه الظاهر انك استخفيت عبد العزيز يقول بخاطره أي استخفيت وانت بتستخف اكثر لو عرفت الي سويته باختك ..تدري من زوجتها انت ..زوجتها من انسان عاش طول حياته في قلب بنت ثانيه...هذا شلون بيعرف ايحب اختك ويصونها....انت يايوسف وكل الي سعى لهالزواج ..غلطتوا غلطه جبيره ..عبدالعزيز تذكر ايامه في امستردام مع فهد.. تذكر طلعات فهد الشبه دايمه مع مشاعل... تذكر وشلون يتهرب فهد من الدراسه عشان يشوفها ..اهو كان يعتقد ان نهاية حبهم بتكون بالزواج بس الواقع الي شافه بعيونه اصدمه في نفس الوقت كانت صورة مشاعل مسيطره على كيان فهد..فهد يلس على صخره على الشاطئ وتم يطالع البحر بعيون حزينه .... وعد بقلبه هالكلاااام* ألا أيها البحر قالوا ان شيمتك الغدرٍٍٍٍٍ ربما لأنك افنيت حياة شبابا في مقتبل العمر ******** يبدوا انهم لم يعلموا بأمر محبوبتي تللك التي رسمت بيديها فرحتي هي التي كانت بمثابة مقلتي اتعلم أيها البحر مافعلت..لقد قتلت مهجتي نعم..بيديها اقتالت سعادتي ******** أليس من الأفضل ان تتسم هي بالغدر اليس من الأفضل ان انساها مدى الدهر وعدا ايها البحر لن اسأل عنها من امري سأرمي ها هنا ..في جوفك أحلى سنوات عمري وسأترك لك امر دفنها وخلطها بالزبدي قرر فهد بينه وبين نفسهه ان هذي راح تكون أخر ذكرى لمشاعل ..وقطع خيوط تفكيره ... وصول ناصر واول ماوصل ناصر صاح بهم يووسف: يلا شباب الغدا زاهب بعد ا لغدا يووسف : ناصر انا ودي اروح لعمي الشركة ..تعال معاي ناصر:اوكي انا رايح احين علي: انا بعد وياكم..صار لي زمان مارحت للشركه بعد ماراحو الشباب فهد استأذن من عبدالعزيز وقبل لايركب السياره ناداه عبد العزيز:فهد..فهد فهد:هلا عبدالعزيز: ليش ماقلت لي انك تزوجت فهد استغرب: ليش انت ماتدري عبدالعزيز حب يحرق قلب فهد مثل ماحرق قلبه: مبروووك..يعني خذت مشاعل فهد عوره قلبه( ليش ياعبد العزيز ..ليش كلما قلت بانساها تذكروني فيها فهد مالااحظ او تجاهل نظرات عبدالعزيز الي كانت كلها فرح بالأنتصار يوم لمح الألم على فهد فهد:لا اسمها ريم ..اخت يوسف ..واعتقد انت باركت لها .. وسكر الباب بالقو ومشى بسرعه .... فهد مر على ريم مع البنات ووداها بيت بيت بويوسف لأان اليوم هو اليوم الثاني للأستقبال..طبعا مثل أمس قضوا الوقت في لتهاني والتباريك..والهدايا ليما صارت الساعة9 ورجع فهد خذ ريم تموا طول الطريج ساكتين ..فهد كان يطالع ريم بعصبية ريم وايد تختلف عن مشاعل ريم هادئة وغامضة ..أما مشاعل تحب الضحك والحركة صج أن ريم في الملامح اجمل من مشاعل..بس مشاعل في عيون فهد هي الأحلى فاجئته ريم بسؤالها:في أي وقت راح نسافر باجر؟ فهد كان ناسي موضوع السفر بس رد عليها:الساعة 10 ريم:الصبح لو المسا؟ فهد:الصبح ريم: راح نتأخر هناك؟ فهد تملل من الأسئلة بس كان لازم يجاوبها:مو وايد ..أسبوع بفرنسا..وأسبوع ببلجيكا..وأسبوع بهولندا هذا كان الموضوع الوحيد الي تكلموا فيه ورجعوا لسكوتهم أول مادخلوا جناحهم الي بالفندق ريم راحت لغرفتها وجهزت أغراضها بالشنطة ويابت ملابس من بيتها هند كانت مرتبتهم لها...وبعد ماخللصت منهم شافت ورقة وردية صغيرة بقاع الكيس....رفعتها وكان مكتوب فيها أختي الغالية ..ريوووووومة.. لاتنسيني أحبج موووت.. هند صج الكلمات كانت بسيطة بس ريم ماقدرت تمنع دمعتها ...هاذي المرة الأولى الي تودع أختها وليتها بتروح مع أنسان تحبه ...بتروح مع فهد ...فهد الي ما.... مالقت كلمه تحطها في هل الفراغ ....للحين موقادرة تجمع في صفات فه فهد أنسان عصبي ....ومزاجي .... وبعد مغرور..وفي نفس الوقت فيه من الطيبة..بس الصفات السلبية طغت على الطيبة الي فيه ريم ماسمعت صوت التلفزيون بالصالة فتوقعت ان فهد نايم راحت للصالة وخذت معاها دفتررسمها وألوان زيتية كانوا من ظمن الاغراض الي جهزنهم هند لها طلعت برع للبلكونة( الشرفة ) وبدت ترسم ..أرسمت شمس في وقت المغيب وكتبت داخلها بخط رهيب (الوداع) ....وتحتها كان ثلج يذوب وكملت بخطها الرهيب تحت الوداع يذيب الثلوج..وأول مابدت تمزج الوان الشمس الأصفر والأحمر شافت ضل شخص ولما اتفتت... شافت فهد واقف يمها كان يراقب رسمها ريم: من متى انت اهني فهد:من ساعة ماكتبتي الوداع ريم:انا توقعت انك نايم فهد :ماقدرت انام...انا من اكون مستعد للسفر مانام ريم قالت في خاطرها:أي شعليك متعود على السفر ..الله العالم شبيصدني باجر..خوفي لاتشمت فيني.. صج ان ريم كانت تسافر بس بفترات متباعده ..وعندها درجة قليله من فوبيا الطيران..بس بحالة الأقلاع ... وبعدها الوضع يرجع عادي..لما كانت صغيرة ماكانت تخاف ..بس لما صار حادث الطيارة بالبحرين .... بدا يزيزد خوفها ...لكن بس عند الأقلاع ..لما تودع الطيارة الأرض وتمشي بسرعة.ز ريم كانت تبي تسكر الدفتر..بس خافت لين سكرته يختبصون الألوان فكملت اللوحه فهد:انتي تحبين ترسمين فهد:يعني في وقت الفراغ فهد:بس ماشاالله رسمج حلو ريم استانست ..هذي اول مره يمدحها فهد: خطج بعد حلو ريم:مشكوور فهد:هذي مو مجامله ريم اسكتت ..حست ان كلامه ماله داعي..كانت تتمنى ان يظل ساكت ولا يتكلام بهالكلام البارد واول مانتهت ريم من الرسمه ..راحت لغرفتها وتركت فهد لحاله بدارها تمت ريم تبجي ..ماتدري ليش كانت تبجي ..يمكن لأنها خايفه من باجر..اليوم الي راح تكون فيه مع فهد في دنيا غريبه ..يمكن تبجي لأنها بتودع امها وخوانها ...ريم كانت تبجي في اليوم الي يكونون فيه البنات الي مثل سنها في قمة سعادتهم ..ريم بجث في ثالث يوم من شهر العسل ..نامت ووسادتها مبلله من الدمووع (( اثير ...حب)) في بيت بو فهد العنود كانت بدارها تنتظر اول مكالمه حقيقيه من خالد... وطبعا على الساعة عشر رن التلفون راحت قفلت باب الدار وورفعة الجوال العنود ترددها هالمره كان اقل من المره الأولى العنوود:الوو خالد:هلا والله شخبارج العنوود:الحمدالله خالد: العنوود عسى استانستي اليووم مع بنات عمج العنود بخاطرها تقول(هاي شكله ماينسى شي): أي تمام وناسه خالد: العنود ممكن اعرف انتي كم عمرك العنود: ليش انت مو عارفه من البطاقه خالد:هههه لا والله كل الي اعرفه اسمج بس العنود: بين ال19وال23 خالد:لا والله جم عمرج العنود:شتبي في عمري خالد:عشان اعرف اذا عمري مناسب لعمرج لولا العنود بعصبيه:20 زين خالد: زين اشفيج عصبتي العنوود: انت جم عمرك خالد:24 العنوود:ممكن اسألج سؤال خالد: حي الله هالساعه الي بتسأليني فيها العنود:انت ليش توقفني ... كلما مريت بسيارتي قدامك من بد كل السياارات توقفني ..مع انك شايف ليسني اكثر من خمس مراات خالد:ممكن تعفيني من اجابة هالسؤال لين ايي وقته العنوود: انا بسكر الجوال احين خالد: ليش ..بدري وتو الناس العنوود: كلامنا ماله داعي..والا أحنا نتكلم بصفتنا شنو خالد:بيي الوقت الي تعرفين حنا نتكلم بصفتنا منو ..وبهالحضه وعند هالكلام ..ا ندق باب غرفة العنود بالقو .... وصرخ صوت فيصل من ورى الباب :عنـــــــــــــــــــــــــــــودواااااااااا...فت حي الباب بسرعة .... انتظرونا معقوله فيصل سمع كلام العنود..واذا سمع شراح يقول لها...؟ وشنو معقوله يكون السبب الي خلا خالد يطير من الفرح؟ اسف على كل الجروح.......... بودعك وامشي واروح (كلمه وصلت عن طريق مسج بس من من لمن) هذا الي بنعرفه؟ اشخاص جداد بيحلون اضيوف على القصة ؟ من بيشوف فهد بفرنسا؟ Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.