بوعلي00 Posted نوفمبر 22, 2009 Report Share Posted نوفمبر 22, 2009 (edited) السلام عليكم ورحمة الله وبركاته.. تحية حارة لرواد قسم النقاش. موضوعنا اليوم حساس جداً.. يخص الطائفتين السنية والشيعية.. الجناحان اللذين يطير بهما هذا الوطن.. ندخل في الموضوع.. المذهبية: هي أن أقبل وأسمح بتعدد المذاهب والأمور المترتبة عليه. يعني بإختصار مذهبك لك ومذهبي لي.. سو اللي تشوفه صح .. وباسوي اللي أشوفه صح.. مابتشوف مني تشجيع.. ولا بتشوف مني أذية في عمل أي شي يخص مذهبك. أما الطائفية: فهي كره ورفض شخص معين بسبب انتمائه الى مذهب معين يخالف المذهب الذي أنا عليه. يعني.. شخص في المنتدى.. أحبه وأقرأ ردوده وأتمنى أتعرف عليه.. يوم عرفت انه من الطائفة الثانية.. تلقائياً وبدون مقدمات يتحول كل الحب إلى كره وبغض وعداوة.. شالسبب؟؟!! غلط عليك في كلمه؟؟ قل أدبه؟؟ لا. اكتشفت انه سني أو اكشتفت انه شيعي. وبين هؤلاء وهؤلاء .. في ناس مايقبلون المذهبية ولا يقبلون الطائفية.. يرى الشخص ان في مذهب واحد صح.. فيبدأ فيدخل في حوارات المذاهب والنقاشات الدينية واثبات مساوئ المذهب الآخر (من وجهة نظره). السؤال: أين تجد من نفسك من كل هذا الكلام؟؟ هل تقول أنا مالي كار ولا أحد يفتح لي هالموضوع؟؟ أو تشوف ان لازم نتعامل بمدأ المقاطعة والتجاهل التام للمذهب الآخر؟؟ (لا اتزوج منهم ،، لا ارافجهم،، لا اطلع معاهم)؟؟ أو تقول ان لازم اناقش اللي جدامي واقول له انك غلط؟! في انتظار مشاركاتكم وآرائكم. رجاء خاص: الموضوع حساس،، فأتمنى منكم إنتقاء ألطف العبارات في النقاش حتى لا يحملها البعض على سوء نية. Edited نوفمبر 22, 2009 by بوعلي00 Quote Link to comment Share on other sites More sharing options...
6ar6an8yh Posted نوفمبر 22, 2009 Report Share Posted نوفمبر 22, 2009 يعطيك العافيه بو علي خل اسوي لي جاي حليب وايي ارد عليك Quote Link to comment Share on other sites More sharing options...
6ar6an8yh Posted نوفمبر 22, 2009 Report Share Posted نوفمبر 22, 2009 هالاووو باك باك ... هنزين في البدايه بقول لكم قصه عجبتني اكيد معظمكم سمعوها من قبل بس لاني ابي اعلق عليها... كان في مجموعه قرده في قفص وسط القفص في دري لازم يركبون عشان ياخذون الموز فشلي صار؟ اي قرد يركب العلماء يرشون ماي بارد على القرده الموجودين في القفص ..فالقرده صارو اي واحد منهم يبي يركب عشان الموز يمنعونه ويطقونه عشان ما ينرشون بماي بارد بسبته .. لين صارو محد يفكر يركب عشان الموز ... العلماء غيرو احد القرده الموجودين بواحد يديد .. ولما حاول يركب عشان الموز سوو له نفس الشي .. وهكذا استمر الوضع .. لين تغيرو كل القرده وما زال الوضع مثله اي واحد يركب عشان الموز يمنعونه ويطقونه!! مع ان كلهم تغيرو ؟ بس كل واحد يديد دش القفص حاول يركب وانمنع من هالشي ولا يدري شالسبب وقام يقلدهم ويمنع اي قرد يديد ياخذ الموز وبعد مب عارف السبب..! وببساطه لو كانو يتحجون وسألناهم ؟ بيقولون والله مدري شي جفناه وتمينا عليه من غير سبب .. فهذا حال بني البشر " شيئين لا حدود لهما ... العالَم و غباء الأنسان " ( أينشتاين ) الي قاعد يصير من تفرقه وكره من غير سبب من وجهه نظري مثل السالفه .. ان كل جيل يعلم غيره انه لازم يكره اي شخص مايكون من مذهبه ولازم ما يمشي معاهم ولا يحاجيهم والاسباب مجهوله ... بقول لكم ... وحده تصير لي ماخذه " سني " فلين تروح بيت ابوها واايد يهال هناك فولدها يتعلم كلامهم .. ويروح بيتهم يتحجى كلمات بحرانية يعني يقول حق ابوه " ويـــــش بابا " ... وقسم بالله ان ريلها يمنعها تروح بيت ابوها لهالسبب ؟ والله العظيم وقسم بالله .. يقول لها تودين ولدي بيتكم واييني يتحجى بحراني اشهالكره الي حتى في اللغه؟!! اوادم غريبه مدري شلون تفكر والله ... الام تطق ولدها على حلجه لين تحجى بحراني .. تقول خله يتعلم.. يعني تتوقعون اذا هاي اهلها اهيه اهل الياهل ويمنعونه يروح لهالسبب .. هذا اهله هاه .. يعني شتتوقعون يقولون له اذا لعب مع ناس او مشى مع ناس مو اهله من مذاهب ثانية؟؟ والقهر ان اثنينهم دارسين وفاهمين وكباااااار مو صغار عشان نقول تفكيرهم جذي لانهم يهال .. اعمارهم في الثلاثين كلش مو صغار يفكرون هالتفكير..! هاي الي صاير كل جيل يعلم الجيل الكره من غير سبب... بعد بقول لكم شي ثاني .. اختي ادرست فترة بسيطه في احدى " دول الخليج " .. عاد تخبرون الناس في الغربه تكون علاقتهم قويه فالبحرينيين هناك كلهم مع بعض وعلى قلب واحد يزعم ... مره من المرات ياها شخص قال لها هاي الاوراق الي لازم ندرسهم.. اخذي لج وعطي فلانه وفلانه وفلانه وفلانه وفلان ولين تمو اوراق عطي " ذلاك البحارنه " ولين ماتمو خلاص خل يولون خلهم يتصرفون .. اختي عينها جذي@@ تقول والله انصدمت ان هالشخص بالذات يفكر هالتفكير؟؟؟ يقول يعني اكيد لو عرف ان انه بحرانية جان ماعطاني؟؟؟ احنا كلنا على قلب واحد يزعم ومتعاونين في كل شي؟؟ لهدرجه يعني؟؟؟؟ اختي تقول والله صٌعقت اسكت ولا شلون؟؟؟ تقول اختي قلت له بعد فتره بطريقه غير مباشره!! وصار حالي مثل حال الباقي خخخخخخخ حتى لين احتاج لها في شي ما يقول لها يسكت عكس قبل 180 درجه وبدون سبب؟؟!! عن نفسي انه درست في روضه سنه وشيعه وعايشه في فريج فيه سنه وشيعه ومدرستي كانت سنه وشيعه وخلصت مدرسه ودرست بعد في مكان فيه سنه وشيعه واشتغلت في مكان فيه سنه وشيعه وهني في النت جريبه من ناس سنه وشيعه ... ماحصلت سبب يخليني اكره مذهب غير مذهبي؟ ماحصلت سبب مقنع!!! ليش اكرهم؟؟ شسوو لي؟؟!!! لانه في فئه منهم تسوي اشيا محد مقتنع فيها؟ عادي مذهبي بعد يسوي اشيا محد مقتنع فيها كلش مو سبب مقنع يخليني اكره مذهب غير مذهبي .. وخصوصاً انه ماحب اسوي شي مو مقتنعه منه لو في سبب يقنعني ممكن بس بدون اسباب شي مستحيل انه هاي مذهبي شي تربيت عليه واقتنعت فيه ... وكل واحد له مذهبه ولا احب ادش في نقاشاات ولا شي .. بس لين احد سألني مثلا عن شي في مذهبي ارد عليه وابين له واوضح له ولو اهوه مثلا خالفني الراي اقول له اووكي هاي رايك وهاي اسبابك بس الي مقتنعه فيه مقتنعه فيه يعني كلش ما اقتنعت بكلامك... واساساً اتجنب اي نقاشات بين المذاهب " سنه وشيعه " لو دين غير الاسلام ممكن اتناقش.. انه شخص يصير لي متزوج " بريطانية " مسيحيه... ادش في نقاشاات واااااااااااااااااااايد معاهااا ما اخليها في حالها بس مستحيل توصل لدرجه الكره!! اكرها؟ لا بالعكس ما اكرها علاقتي معاها حدها اوكي .. ليش لانها ماتكرهني ولا تكره مذهبي كل مافي الموضوع اهيه مقتنعه بدينها وانه مقتنعه بديني ... اذا استفسرت عن شي في ديني ما اسكت ارد عليها واوضح لها واعطيها ادله .. بس في النهايه مافي شي بالغصب محد يسوي شي بالغصب اهيه مو مقتنعه خلاص ... والله ودي اسوي هالانجاز واخليها تصير " مسلمه "!! بس مثل ما قلت لكم مافي شي بالغصب مو معناتها ان انه ماقدرت اقنعها خلاص اكرها لانها مو على ديني!! انه كلش ما اكره الشخص الي ما يحبني عشان مذهبي بس " اكره تفكيره لانه يكرهني من غير سبب " وما اعتقد انه في يوم بايي وبكره شخص عشان مذهبه يمكن توصل درجه اكره فيها "البعض " بسبب تصرفاتهم اما الكل مستحيل الا اذا اقنعتوني هاي شي ثاني يلا قنعوني تأخرت ع الصلاه بسبت موضوعك توني بقوم اصلي ههههههه انت محاسب هاه كيفك Quote Link to comment Share on other sites More sharing options...
beckham7 Posted نوفمبر 22, 2009 Report Share Posted نوفمبر 22, 2009 سنه شيعه مافي تفرقه لاكن هناك ايدي خفيه اسرائيليه امريكيه لنشر الفتنه بين العرب و المطلوب عدم الوحده بين العرب لكي يسهل اختراقهم من شتى الطرق لو نلاحض ايضا ان هناك في المذهب الواحد عده اختلاافات اما عن الدراسة ففي السكشن كلنا طلااب مذهب معين الى اعداد قليله من المذهب الآخر و من الجنسيات الأخرا ولا فكرت او عطيت المجال حق الي وياي يقولون هاذا يتبع هالمذهب او من هالجنسيه لا تعطيه اسأله حق المراجعه او لاتسوي ليهم كلنا يد واحده ضد العدو اما كرأي شخصي انه يجب على الكل ان يكون يد واحده في السراء والضراء وان نكون متعاونين على الخير Quote Link to comment Share on other sites More sharing options...
ألماس المملكة Posted نوفمبر 22, 2009 Report Share Posted نوفمبر 22, 2009 (edited) شنو اكره عشان شخص بسبب مذهبه و لأنه غير عاادي عمره المذهب ما كان مبرر لكره احد و من زمان احنا في البحرين سنه و شيعه احنا نشتغل مع بعض ندرس مع بعض عايشين في نفس البلد و إلي يصير عليهم يصير علينا و لا شيعي و لا سني بس بحريني Edited نوفمبر 22, 2009 by ألماس المملكة Quote Link to comment Share on other sites More sharing options...
العلياء88 Posted نوفمبر 22, 2009 Report Share Posted نوفمبر 22, 2009 (edited) أين تجد من نفسك من كل هذا الكلام؟؟ أخي الفاضل.. يبدو لي أن من اهم الاسباب التي تحول دون استيعاب الطائفية وتجنب اثارها في المجتمع البحريني هو محدودية ادراك مفهوم الطائفية نفسه.. فالطائفية ليست الانتماء الى طائفة معينه .. فهي طبيعة من طبائع المجتمعات البشرية منذ الازل..بل ان صح التعبير .. "" انها تنتمي إلى ميدان السياسة لا إلى مجال الدين والعقيدة.. بل وتشكل سوقا سوداء للسياسة اكثر مما تعكسه اي إرادة تعميم قيم او مباديء أو مذاهب دينية لجماعة خاصة.."" اي انها قضية سياسية بحتة.. اجتماعية بالدرجة الاولى.. لا تنبني على الاختلاف في الرأي !! بل على التعصب المبتذل في الرأي..<< رفض التعايش مع الطرف الاخر .. الاستحواذ على كل شيء.. تهميشه واقصائه.. يستحال ان يكون الناس امه واحدة..<< حقيقة متفق عليها .. اذا انقسام المجتمع الى طوائف ليس عيبا ولا نقصا في في المجتمع .. انما العيب ان يتصف سلوك هذه الطوائف بالتفرقة على اساس طائفي.. عدا ذلك اخي الفاضل.. إن الحديث عن الطائفية والسلوك الطائفي يجب أن يتحرر من الصعيد الشخصي ويتجه للصعيد العام أو المجال الأوسع الذي توجد فيه الطائفية ويكثر فيه السلوك الطائفي. اذن السلوك الطائفي العدواني ضد الطوائف الاخرى هو ما يطلق عليه بالطائفية... حرمان الطرف الاخر من العيش.. من الحقوق المدنية.. من فرص العمل .. من السلطة.. من حق ممارسة الشعائر الدينية .. عدا ذلك التهميش السياسي والثقافي .. ممارسة اساليب القمع والاستحواذ حين يبدي الطرف الاخر اي ردة فعل تجاه هذا السلوك الاضطهادي..مما يسبب ضغظ يولد انفجار مدمر في المجتمع وخراب تنظيمه المتمثل في الدولة.. لكن اخي العزيز.. صحيح ان الحديث عن الطائفية في البحرين .. يطول وتبقى هذه القضية من القضايا العويصة والمعلقة.. التي تحتاج الى حل جذري.. ولا اقصد هنا تضخيم الامور .. لكن بالمقابل عزيزي.. العلاقات الاجتماعية في البحرين هي علاقات تاريخية لا مجال في الحديث عنها.. صحيح انه لايخلو الموضوع من بعض الحوادث لعلمك بوجود بعض الاشخاص المريضة ان صح التعبير.. لكن لو عدنا للسطور السابقة لادركنا ان الحديث عن الطائفية وسلوكها يجب ان يتحرر من الصعيد الشخصي.. ويتجه للصعيد العام.. لاثبات هذه النقطة .. ببساطة نوجه انظارنا الى عمق الوئام الاجتماعي بين السنه والشيعة.. يتزاورون فيما بينهم.. عدا ذلك كم من البيوت اخي الكريم.. هي بيوت مختلطة.. تداخلت فيما بينها بالمصاهرة والزواج.. وهذا ما يشكل حاليا قلق ومعضلة محيرة بالنسبة للمتعصبين ومؤسسي الطائفية ان صح التعبير.. اذا المشكلة الاساسية للطائفية تكمن وتبقى معلقة على الصعيد السياسي.. الذي ما ان ظل معلقا .. انعكست اثاره على الاصعدة الاخرى.. هل تقول أنا مالي كار ولا أحد يفتح لي هالموضوع؟؟ الاختلاف سمه من سمات البشر اخي الكريم.. << من الناحية الدينية والمذهبية.. لذا جميل ان نتشاطر الافكار.. والاراءباساليب حضارية راقية.. لتعم الفائدة للجميع.. وليس باساليب تعصبية قمعية منفرة للطرف الاخر.. من الناحية السياسة<< لا اعتقد ان استمرار الوضع فيما هو عليه في مصلحة السلم الاهلي في البحرين.. بل في هو مهدد بزعزعة الاسس التي يقوم عليها كيان المجتمع البحريني.. واقصاء حق طائفة على اخرى.. أو تشوف ان لازم نتعامل بمدأ المقاطعة والتجاهل التام للمذهب الآخر؟؟ (لا اتزوج منهم ،، لا ارافجهم،، لا اطلع معاهم)؟؟ اذن السؤال هنا.. كيف يتم التعايش والترابط الاجتماعي بالمقاطعة اخي الكريم..؟! يجب الاخذ بمبدأ.. الكشف عن الاوراق لكل من الاطراف المختلفة.. لبيان نقاط الاختلاف.. في ظل حدود راقية لا قمعية.. لكن بعض الاعتقادات تكون مقدسة جدا وغير قابلة للعرض في طاولة النقاش.. لذا.. انطلاقا من البرهان الالهي " لكم دينكم ولي دين " تختتم الجلسة النقاشية.. على حب ووئام .. عدا ذلك اخي الكريم.. الاختلاف بين السنة والشيعة يكمن في الفروع لا الاركان الاساسية التي لا مجال في الحديث عنها.. سماحة ديننا الكريم تحلل الزواج من الكتابية فكيف بفتاة من نفس الدين.. توحد نفس الاله وتتبع نفس المرسل! ما دامت علاقاتي مع اي طرف اخر بغض النظر عن اعتقاداته.. في ظل الحدود الاسلامية والتي لا تخدش اي من معتقداتي.. فهي مرحب بها.. أو تقول ان لازم اناقش اللي جدامي واقول له انك غلط؟! ممارسة اسلوب المجادلة في النقاش.. في ظل الحدود الراقية الهادفة.. مطلوبة ومرحب بها.. عدا ذلك الحوار الصحيح والهادف يجب ان يدعم بالحجج حتى نتهي بحوار هادف يعم بالفائدة على كل الاطراف.. ولا تكون الحصيلة عداوة بسبب استخدام اساليب متطرفة.. من جهتي لن اوجه لشخص حكم مطلق .. "انته غلط" الا ومن بعده حجج وبراهين قاطعة..<< مع اني من اشد المعارضين للاسلوب الهجومي البحت.. ابرز وجهة نظرك بكل احترام ورقي.. ففي النهاية الاختلاف في الرأي لا يفسد في الود قضية.. عدا ذلك النقاش في المعتقدات والاتجاهات الطائفية يطول ويحتاج لثقافة كبيرة ولباقة في الحديث.. وشخص ملم بكل المستجدات التي تحصل في الشارع العام.. حتى لا يصبح الشخص اضحوكة كونه تكلم فيما لا يعلم!! عذرا على الاطالة.. لاهنت على هذا الطرح المميز وجهة نظر.. العلياء Edited نوفمبر 22, 2009 by العلياء88 Quote Link to comment Share on other sites More sharing options...
بنت الحداده Posted نوفمبر 22, 2009 Report Share Posted نوفمبر 22, 2009 موضوع مهم جداً , وبصراحة القسم يفتقر لهل مواضيع الي ترد له الروح طرطنقية , ردج عجبني قريته للنهاية بالنسبة لي انا شخصياً , أأيد النقاش في المذاهب شريطة " الأحترام , الهدوء , التفهم" للأسف , البعض الكثير من كلا المذهبين يسمعون بعض الأتهامات وبدل التأكد من صحتها يبدأون بترديدها بكل جهالة , جتني فترة ادخل البالتوك عشان الرومات الدينية , وللأمانة كنت الاقي في رومات الطائفتين تارة نقاش عقلاني وتارة زعبرة متخلفين انا احب اقرأ في العقائد وفي الأديان وكثيراً ما اسمع لشيوخ من السنة , مثل العريفي ومتابعة دائمة لبرنامج خواطر , ومعجبة في الشخصية السياسية المحنكة عبدالله النفيسي . وممكن أُعجب بناس مسيحيين ويمكن ناس على الديانة اليهودية بعد , والهندوسية فما بالك بالمسلمين الي الأسلام يحثني على احترامهم والتراص معهم . انا عندي ربع سنة والحمدلله وعلاقاتي بالناس اكبر من التحيز لمذهب معين , بس الزواج ما افكر ارتبط بشخص مو على مذهبي والأطفال هم السبب الأول والأخير . انا اشوف ان الكل لو ثقف نفسه , وقرأ بحيادية بيحصل ألف سبب يخليبه يحب ويحترم الطائفة الأخرى , بس البعض في قلوبهم مرض , في ناس هدفها التفرقة تشوف افترائات وفتن ومحد يصدق الا الي ماعنده دراية ماعنده اطلاع Quote Link to comment Share on other sites More sharing options...
حورية الجنه Posted نوفمبر 22, 2009 Report Share Posted نوفمبر 22, 2009 انه شيعيه وافتخر .. وبما ان احنا كلنا مسلمين مافي فرق بين شيعي ولا سني بالعكس انه انسانه ما عندي عنصرية .. عادي عندي اني ارافج ناس من غير مذهبي ..الخ كل واحد وعنده مذهبه ومقتنع فيه .. ماله داعي الكرهه والبغض الدنا لحظة لا تعيش حياتك في كره الاخرين وللأسف منتدانا هاي وايد فيه طائفيه Quote Link to comment Share on other sites More sharing options...
بوعلي00 Posted نوفمبر 22, 2009 Author Report Share Posted نوفمبر 22, 2009 (edited) مشكورين يا جماعة على تفاعلكم وآرائكم الحلوة. واسمحوا لي ببعض هالتعليقات البسيطه: 1- طرطنقيه: أنا ولد المحرق.. لي ما صار عمري 10 سنوات (والله العظيم) ما أعرف يعني شنو سني ويعني شنو شيعي؟؟؟!!!! ليش؟! لأن المحرق مكس.. بيت سنة وبيت شيعة.. ومتعايشين مع بعض.. وعمرنا ما شفنا أحد ضر الثاني بشي.. كلامج أعتبره (زبدة الكلام) لأنه كلام وحدة مجربة.. يمكن الإخوة اللي عايشين في مناطق كلها سنة أو اللي عايشين في مناطق كلها شيعة (يستغربون) هالكلام أو عندهم نوع من الحساسية في التعامل مع المذهب الآخر.. أكيد خاش في قلبه شي.. هذي يبي مضرتي.. مستحيل سوا لي هالشي لويه الله.. إلا مارحم ربي طبعاً.. لكن احنا العايشين مع بعض.. في بيننا أفضال من المذهب الثاني والله لو أخوي ماسوا لي جذي!!! 2- beckham7: مشكوره على مشاعرج الحلوة أختي وهذي يدل على طيب الأصل اللي ربيتي فيه. 3- ألماس المملكه: والنعم فيج وفي كلامج.. بس بحريني. 4- العلياء: مشكوورة أختي على هالكلام الصريح.. فعلاً أختي.. وايد من الناس يستخدمون حبنا للمذهب إلى سلاح لأغراض سياسية.. خل نكون شوي صرحاء أكثر كون محد غريب بيننا.. الصورة اللي يحاول البعض رسمها للشارع البحريني.. إن في سنة وشيعة.. السنة هم الموالين.. والشيعة هم المعارضين.. (الموالاة والمعارضة) مالها كااااااااااااااااار في المذهب!!!!!!! المذهب شي (ديني) و (الموالاة) أو (المعارضة) شي (سياسي) !!!! ومالهم علاقة مع بعض!!!!!!! بدليل إن في سنة يعتبرون من أشد المعارضين .. وفي شيعة يعتبرون من أشد الموالين.. وموضوعنا مو نقول من موالي ومن معارض.. بس خل نكون حذرين من التقسيمة السياسية على أساس المذهب. 5- بنت الحداده: أول شي يشرفني رؤية قلمج في موضوعي المتواضع.. وردج كما عهدناج.. راقي وواقعي.. وباذكره في التعليق. 6- حورية الجنة: مشكورة أختي عل مشاعرج الأصيلة اللي تحملينها. ------------------------------- باقي نقطة أحب أشير لها من بعد إذنكم.. احنا صح مانرضى بالطائفية ولا بالعنصرية.. بس بعد ما أتمنى نصير (ساذجين) وايد ونقول لاسنة ولاشيعة وكلنا شي واحد!!! خل نكون واقعيين.. كل مذهب له أمور في العبادة خاصة فيه مايصير نلغيها.. يعني.. السنة عندهم في رمضان صلاة التراويح وصلاة القيام.. الشيعة عندهم في محرم مآتم وعزه واحياء لذكرى الحسين عليه السلام.. هل يقبلون السنة ان نلغي صلاة التراويح مقابل ان الشيعة يلغون العزه؟!! وهل بيوافقون الشيعة أصلاً؟؟!! أتوقع مجرد طرح هذا الموضوع يبين على قولت المصريين نوع من (العبط). يعني كلام الأخت بنت الحداده.. قالت صح أنا ماعندي مانع مع المذهب الآخر وماعندي مانع ان أتناقش مع أي شخص (بإحترام).. بس الزواج لا.. هذي تفكير (منطقي) وواقعي.. لأن اللي بيضيعون العيال. وقيسوا على ذلك من الأمور اللي (لازم) يكون فيها فرق بين السنة والشيعة.. ولاحظوا .. هذي مو (طائفية) هذي (مذهبية).. ان كلنا نمارس شعائرنا الدينية بحرية و(بإختلاف) لكن (بإحترام).. القصد يا جماعة مانبي نعيش في الأحلام.. نبي نكون واقعيين.. لأن الطائفية موجودة بيناتنا.. سواء في الشارع أو في مكان العمل أو في الفريج أو المنتدى أو أي مكااان.. واللي يقول الطائفية مو موجودة هذي يالس يغالط نفسه.. بس خلونا نراجع أنفسنا مرة ثانية.. نشوف احنا لي وين رايحين؟؟!! وأكيد مافي أحد يتمنى ان نكون كلنا مذهب واحد.. بس هالشي مالله كاتب يصير في الوقت الحالي .. شنو العمل؟؟ خلونا نتفق على الأمور المشتركة بيننا.. وعجبتني وايد القصة اللي ذكرتها طرطنقيه عن السبلان.. خل نراجع (الأفكار) اللي عندنا .. الدينية والإجتماعية والحياتية وكل شي.. ليش هالشي صح وليش هالشي غلط؟؟ لأنه أبوي قال لي؟؟!!! أو لأن الناس يقولون؟؟!! أو مادري والله؟؟؟!!! وخل نملك الشجاعة ان نقول هذي (صح) وهذي (غلط).. يعني.. لو (مثلاً) سمعت ان مذهبك يسمح بالبوق أو القتل أو شرب الخمر أو الزنا.. شنو بتكون ردة فعلك؟؟!! (بغض النظر اذا كانت هالمعلومه ذكرها المذهب أو لا) دام المذهب قال يعني صح؟؟!! الله سبحانه وتعالى ماعطاك (عقل) تميز فيه ان كرهك لأخوك شي غير مقبول؟؟ وان محبتك له سبب في دخولك الجنة؟؟!! الحديث على قولتهم ذو شجون .. بس كلي أمل في سماع أرائكم وبكل (صراحة). Edited نوفمبر 22, 2009 by بوعلي00 Quote Link to comment Share on other sites More sharing options...
دفا إحساس Posted نوفمبر 22, 2009 Report Share Posted نوفمبر 22, 2009 (edited) و عليكم السلام و رحمة الله و بركاته,, بالفعل موضوووع اكثر من روعة اخوي بو علي. أنا ردي مثل الحدادة بالضبط هاي الي باقوله انا وحدة عايشة من البحارنة من عمري سبع سنين وياهم في المدرسة و كل مكان و اكثرية ربعي بحارنة اصلاً، بالعكس ابداً ما في اي مشاكل بينا و لكن ما انكر هناك بعض التحيز في الصف احيانا و هاي قلة بالنسبة لي لانه انا اهم شي ابين للشخص انت مثلي ما في شي فرق بيني و بينك ، مذهبك غير عنـــي اوكي بس الاحترام اهم شي. الواحد على اهلـــه، اخوي انا الي لاحظت البعض الاهل يرسلون رسالة لعيالهم لا ترافج ذي بحراني او لا ترافج ذي سني و يكبر هالشي معاهم لين يكبرون يعني مثل البذرة و تكبر، انزين ؟ احنا إخوان من ديرة واحدة؟ إحنا خل نتعلم من اخلاق محمد صلى الله عليه وسلم، شلون كان يعامل مختلف الديانات و شلون كانت رسالة دعوته و كان على ايام الرسول عليه الصلاة و السلام يسمحون للكفار يعيشون وسطهم و يسوون جميع امورهم، هذي الناس مريضة يا اخوي، للاسف عقليتهم متخلفة شوي. أنا ارافج البحرانية ، و على عيني و راسي البحرانية و اهي مثل السنية و لا افرق بينهم ، البحرانية ادب و اخلاق و اكثر ناس اخلصو لي في حياتي ربعي، و بعدين احنا ساعات ناس مسيح نكلمهم افضل من اخوانا الشيعة؟ ليش عاد ؟ مو زين هالتحيز! أنا اهم شي في علاقاتي مهما كان الشخص شنهي عقيدته اهوا احترامه لي. بس الامر الوحيد الي ارفضه هو الزواج من شخص غير مذهبي، حتى لو قالو في تفاهم؟ مستحيل آآخذ شريك حياتي غير عني؟ مو الحياة الزوجية شراكة؟ حلو الواحد ياخذ من مذهبه و جميل لين شريك حياتك مثل عقيدتك و احيانا تسووون اموركم الدينية ويا بعض؟ و بعدين لين يبتو عيال تبونهم كلهم على طريج واحد مو متشتت! و مثل ما قلت اخوي، في اختلاف بين المذهب السني و الشيعي في الامور الدينية، احيانا ربعي في رمضان يعزموني و لكن انا ارفض و يتفهمون انه انا وراي صلاة تراويح و هلون و هالشي عارفينه من زمان. يعطيك العافية يا ربي Edited نوفمبر 22, 2009 by دفا إحساس Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.