غـــلا البحرين Posted أكتوبر 26, 2005 Author Report Share Posted أكتوبر 26, 2005 عالمغرب... دخلت خلود حجرتها وغيرت ثيابها و تعدلت.. كانت وااااااااااااايد حلوه.. واحلى شي فيها عيونها السود الوساع... والفرحه كانت واضحه على ويهها و ابتسامتها اللي مافارقت شفاتها.. اول مره تحس بهالسعاده... خلود تحب عبدالعزيز.. بس كانت تخاف يظهر شرات اخوها عمر.. وعشان جيه قررت تكمل دراستها و تشتغل ولا انها ترتبط بانسان وتكون حياتها شرات حياة الهنوف... بس الحينه.. فكرت عدل.. و عرفت انه عبدالعزيز محد شراته.. يحبها و يموت فيها و عمره ما بيعاملها شرات مايعامل عمر الهنوف.. ودخلت عليها الريم.. ريم: خلود خلود: هلا ريم: امايه تبغيج خلود: وصلوا؟؟؟ ريم: لا خلود: عيل .. ريم: مادريبها تبغيج و بس.... وظهرت ريم من الحجره.. خلود استغربت منو موقف ريم.. ونزلت تحت اطالع امها وكانن البنات متيمعات في الصاله مع ابوهن و امهن و حتى فيصل معاهم خلود: بلاكم متيمعين... الحين بيونا العرب ابو عمر: اقعدي خلود.. بغيت اخبرج شي خلود ( وهي مستحيه.. اكيد بيسالها اذا تبغي تاخد عبدالعزيز ولا لا): خير ابويه ابو عمر: ....... خلود ( هي مستغربه.. ليش ساكت.. يلا ابويه اسالني قولي تبينه ولا لا... وشافته طال في السكوت.. صدت صوب امها.. كان خاطرها تقولهم اباه و انها موافقه تااخذه بس خلهم يسالونها) ام عمر: امايه خلود... ترى الاعمار بيد الله.. والموت حق على كل انسان خلود استغربت من هالرمسه ( شو اللي قاعد يقولونه.. عبدالعزيز ياي يخطبني الحينه و هم يطرون الموت) وجان تشوف امها تصيح... صدت صوب خواتها كانها تترجاهم يخبرونها...شافت حمده موخيه.. و ريم واقفه حذال الباب وويهها احمر و عذابه ادمع... ( بلاهم... شو السالفه).. وجان تصد صوب اخوها فيصل اكيد هو بيخبرها.. يوم شافته.. حط عينه في عينها بس بسرعه نزل راسه تحت.. ( مالي غير ابويه اكيد بيخبرني.. يلا بسرعه عبدالعزيز بيوصل الحينه مع هله..) و شافت ابوها.. خلود: ابويه... شو السالفه.. ترى العرب بيوصلون الحينه.. ماشي وقت ابو عمر: ماعرف شو اقولج... هب قادر اظهر الكلام خلود: يا بويه اذا في خاطرك شي قوله... واذا بغيت تسالني عن رايي.. تراني موافقه.. و هالمره بسمع شورك.. وانت كنت تقولي عبدالعزيز ريال و النعم فيه.. وانا فكرت عدل.. وماظن بحصل واحد اخير منه ام عمر: الله يعينج يا بنتي... والله ما تستاهلين خلود: يعيني على شو يا اميه... ابويه فديت روحك خبرني .. والله زيغتوني ابو عمر: عبدالعزيز... خلود: بلاه ابو عمر: سوا حادث خلود: أي حادث.. ابويه الله يهديك عن شو ترمس.. الحينه هو ياي في الدرب مع هله ام عمر: يا اميه لا هو ياي ولا شي.. مسوي حادث و طايح في المستشفى خلود: امايه... شو تقولين... لا لا... انتو اكيد غلطانين.. ابويه.. انت تدري عدل انه ياي في الطريج مع هله.. وانا خلاص وافقت.. وافقت اخذه خلاص... اتصلبه و انشده.. ولا اقولك قوله.. قوله اني وافقت.. فيصل: خــــــــــــــلــــــــــود ... بس يا خلود... ما تسمعين الي قاله ابوج خلود: شو اسمع... أي حادث.. عبدالعزيز ما عليه شر. فيصل: عبدالعزيز مرقد في المستشفى بين الحياة و الموت خلود ماستوعبت اللي سمعته تمت تتلفت ما بين خواتها و امها و ابوها وفيصل... وقفت... و جان اطالع ابوها...كانها تترجاه يخبرها الصدق.. او يقول لها انه عبدالعزيز بخير .. خلود: بس انا وافقت.. والله وافقت و مابغير رايي... ابويه عبدالعزيز ماعليه شر.. وانا وافقت عليه و الحينه هو ياي في الدرب ابو عمر: يا خلود... استهدي بالله... اخوج يقولج الريال مابين الحياة و الموت.. ادعيله الله يشفيه و يرحمه برحمته خلود كانت منصدمه .. ماعرفت شو تسوي.. ولا حتى ذرفت دمعه.. ومشت صوب حجرتها.. دخلت الحجره و صكت الباب على عمرها... و وقفت جدام المنظره.. تمت اطالع عمرها.. كانت متعدله و متزينه.. بس عسب عبدالعزيز.. و عقب انسدحت عالشبريه.. و اتلحفت.. وهي بعدها هب مستوعبه اللي صار.. عذابه: خلود... خلود:.......... ودخلت عذابه الغرفه... و جان تيلس حذال اختها خلود: عذابه عذابه: نعم خلود: عبدالعزيز بخير عذابه: ان شاء الله يكون بخير خلود: شو اللي صار.. عذابه: سوى حادث... يقولون انه كان ساير ييبلج هديه و لفت عليه شاحنه و دعم خلود: هدية.!!!!!!!!!!! عذابه: حليله.. يحبج خلود: اظهري برع عذابه: بس خلود: اظهري برع وظهرت عذابه عن خلود.......... وخلود .. ماقدرت تيود عمرها... ((( ساير ييبلي هديه... ليش يا ربي..... ليش يا عبدالعزيز والله مابغي منك شي... اباك انت وبس... ابـــــــــــاك انت و بس...)))) و كان صوتها عالي.. وخواتها واقفات حذال الباب يتريون عذابه تظهر.. و سمعن صوتها و هي تصيح....... تتوقعون... شو بيكون مصير خلود... عقب عبدالعزيز !!!! عذابه!!!!!! هل ممكن يرد لها خليفة !! حمده!!!!! ممكن تتزوج محمد الرميثي!!! و ريم !!! شو اللي بيسويه سيف عقب ما اهانته ريم !! Quote Link to comment Share on other sites More sharing options...
khalijia Posted أكتوبر 26, 2005 Report Share Posted أكتوبر 26, 2005 mshkooooooooooooooooooooora o inshallah il bagey bil 6reej Quote Link to comment Share on other sites More sharing options...
بحرانية2005 Posted أكتوبر 26, 2005 Report Share Posted أكتوبر 26, 2005 مشكوره على البارات وننتظرج Quote Link to comment Share on other sites More sharing options...
بحرينيه^مزيونة Posted أكتوبر 27, 2005 Report Share Posted أكتوبر 27, 2005 ثااانكس،، ووننتظر التكمله،، Quote Link to comment Share on other sites More sharing options...
غـــلا البحرين Posted أكتوبر 27, 2005 Author Report Share Posted أكتوبر 27, 2005 بعد حادثة عبدالعزيز .. اتغير حال قوم القبيسي... عمر كان اقرب واحد لعبدالعزيز.. و كان دوم يطمن عليه.. اما عبدالعزيز فكانت حالته وايد صعبه.. الحادثة اثرت على العمود الفقري.. و كان لازم يسووله عملية في اقرب وقت.. حتى عينه اليمنى تاثرت... فقد البصر في عينه اليمنى .. لانه القرنيه تاثرت وايد... فقرروا يسفرونه ويسووله عمليه في العمود الفقري و يبدلوله القرنيه في عينه اليمنى ((((((((ترى مهما بعادك عني طول ابا اصبر لاجلك انت واتحمل و ترجعلي حبيبي))))))))) خلود وايد تغيرت عقب الحادثة.. صارت ماترمس حد .. حتى الشغل ودرته و خذتلها اجازه 4 شهور... حست بتانيب الضمير .. حست انها هي السبب في اللي صار في عبدالعزيز.. وفي يوم قررت الهنوف تزور خلود و تطمن عليها... الهنوف: السلام عليكم خلود ( وهي منسدحه): عليكم السلام الهنوف: شو راقده؟؟؟ خلود: هيه الهنوف: شقايل راقده و تردين عليه خلود: ..... الهنوف: عنبوج.. يايه ازورج و اطمن عليج وانتي هب راضيه ترمسيني خلود: اظن امايه خبرتج اني مابغي اشوف حد الهنوف: حتى انا خلود:......... الهنوف: بلاج خلود... ليش جيه تعذبين نفسج خلود:.... الهنوف: انتي مالج خص بللي صار في عبدالعزيز.. هذا قضاء و قدر.. والاعمار بيد الله تعالى خلود: سكتي الله يخليج الهنوف: لا ما بسكت.. كيف تبيني اسكت وانا اشوفج تتعذبين بليا سبب خلود: مالج خص.... محد له خص الهنوف: يا خلود انتي المفروض تكونين اقوى من جيه... واللي سمعته من اخويه خليفة... انه الريال ما بيصيبه الا الخير.. الا عمليه و بيرد بالسلامه خلود: يمكن..... ( و نزلن الدموع على ويهها).. الهنوف: يمكن شو... قصدج يموت!!! خلود ( تمت تصيح يوم سمعت طاري الموت..))) الهنوف: الله يهديج انتي بس... لا تخافين.. ما بيصير الا كل خير... بس انتي ادعيله خلود: والله يا الهنوف لو صار به شي انا ... انا اللي بموت.. انا ادري اني السبب الهنوف: عن شو ترمسين خلود ( نشت و قعدت عالكرسي حذال الهنوف): انا السبب في اللي استوابه الهنوف: انتي مالج خص... قلتلج قضاء و قدر خلود: بس لو وافقت عليه من الاول.. لو ما خليته يتعذب بسبتيه كل هالسنين.. لو اول ما يا خطبني قلتله هيه.. لو ما رديته و طردته من المكتب يوم يي يزورني.. لو ولو و لو .. جان ماصار اللي صار.. جان شفته معايه.. جان قلتله عن شعوري.. جان عبرتله عن حبي.. بس الحينه ماشي فايده.. بيروح عني و بيتركني.. بيتركني دون مايعرف اني احبه.. واموت فيه بعد..( وتمت تصيح) الهنوف (هلت الدمعه من عيونها): اكيد يدري انج تحبينه.. لو مايدري جان ما ركض وراج كل هالسنين.. يا خلود انتي في ايدج تسوين اشياء وايده تثبتيله فيها انج تحبينه.. انتي المفروض تزورينه و تطمنين عليه.. المفروض يحس انج معاه في ازمته و مرضه.. المفروض تدعليه الله يشفيه بدال الصياح اللي تصيحينه خلود: ماعرف .. ماعرف شو اسوي.. احس انه الكل يحط اللوم عليه الهنوف: محد يلومج.. بس انتي اللي تتوهمين... قومي .. قومي عاد وروحي غسلي ويهج وتلبسي .. وروحي زوريه و اطمني عليه... اطمني على هله.. خليهم يحسون انج مهتمه فيه.. حسيسيهم بانه ولدهم غالي عليج.. و صدقيني بترتاحين.. و بتريحين عبدالعزيز معاج.. كم يسوى دخلتج عليه.. كم يسوى شوفتج و انتي حذاله و تبتسميله يوم ينش من مرضه خلود: فديته والله... الهنوف.. اتصدقين لو قلتلج اني احبه... احبه اكثر من أي وقت مضى.. احس اني انا المريضة هب هو.. احس بعوقه في داخلي.. الهنوف: الله يشفيه و يرجعلج ياه بالسلامه... يمكن الحينه تنزلين.. ترا عمتيه موصتني عليج.. وانا يايه بس عسب اشوفج و اطمن عليج.. ولا انتي تدرين انه هالبيت هب مكاني خلود: لا تقولين جيه.. هذا بيتج قبل مايصير بيت عمر الهنوف: ماكنت ادري انه عمر في البيت.. اتحراه بعده في الشقه خلود: وانتي شو عرفج انه يسكن في شقته الهنوف: ها... سمعت.. المهم بروح الحينه.. مابغي اشوف اخوج خلود: يلسي اتغدي معانا.. الهنوف: لا فديتج بسير عند عيالي... يلا فداعة الله ..و ظهرت الهنوف من بيت عبدالله القبيسي.... الهنوف بدت تشتغل في وزارة التريبة و التعليم.. عقب ما ساعدتها خلود... و استانست و ايد بالشغل خاصة انها كانت تحس بالملل في البيت...و لا بعد طلعتلها سياره.. و بدت تسوق .. و قررت تعيش حياتها عقب ماضيعت خمس سنين مع انسان مثل عمر في بيت عبدالله القبيسي ام عمر ( وهي ترمس ام خليفة في التلفون): هيه والله صدقج... ياختي حالها تغير.. خلود ماعادت هي الاول.. بس ادعيلها اللي يهديها و يعينها ام خليفة: الله يهديها.. والله ما تستاهل.. وانتو ما سرتوا تسلمون على هله..؟ ام عمر: اكيد سرنا... ابو عمر عزم علينا نسير..بس خلود ما طاعت تسير ام خليفة: ياحليلها .. ياختي ماتروم تشوفه بهالحاله ام عمر: ادريبها.. بس شو بيقولون عنا العرب... ام خليفة: محد بيقول شي.. الكل يدري انها تبغيه و هي اكثر وحده متاثره بالحادثة ام عمر: هيه والله... ام خليفة: ماخبرتيني..شو ظهرت الهنوف ولا بعدها.. !! ام عمر: لا ظهرت.. ما طاعت تتغدا معانا...الا شو الشغل معاها !!؟ ام خليفة: اسميها مستانسه.. مع اني ماطعت.. بس يوم اشوفها مستانسه و فرحانه اسكت.. ياخويتي شو نسوي... فرحة العيال عندنا فوق كل شي.. ام عمر: خليها على راحتها و البنيه ماتسوي شي غلط... الا سمعت انها تسوق..!! ام خليفة: هيه تسوق... بس سالفة السواقه هاي هب عايبتني وفي هالوقت دخل عمر البيت و راح يسلم على امه عمر: السلام عليكم.. اشحالج امايه ام عمر: يا ام خليفة ترى الكل يسوق الحينه... واظنها تحتاي السياره.. وهي حليلها وين تروح.. الا الشغل ومن ثم البيت ام خليفة: هيه صدقج.. ام عمر: المهم ماطول عليج... عمر توه داخل عليه ام خليفة: خلاص عيل.. فمان الله عمر: من هي اللي تسوق ام عمر: حليلها بنت عمك عمر: وشقايل جيه تسوق... توها مادشت العشرين ام عمر: ويديه انا... عنبوه حرمه وام عيال تقول مادشت العشرين عمر ( وهو مستغرب): منو تطرين... علياء ام عمر: أي علياء انت بعد عمر: عيل ام عمر: الهنوف عمر : شـــــــــــــــــــــــــــــــــــــــــــــــــ ــــــــــــــــــو!!!!!!!!! ام عمر: بلاك فاج ثمك تقول تمساح.. عمر: الهنوف تسوق !!!!؟؟؟؟؟!!!! ام عمر: هيه تسوق.. شو فيها عمر: بعد تقولين شو فيها ام عمر: وانت شو حارنك ها... اللي يسمع يقول تصب بترول سيارتها من فلوسك... روح رب عيالك و اصرف عليهم وعقب ارمس عمر: وليش تخلونها تسوق ام عمر: وليش ما نخليها.. و بعدين احنا مالنا شور عليها دام امها و اخوها موافقين. وبعدين البنيه تحتاي السياره .. منو بيوديها الدوام و بيردها عمر: أي دوام بعد ام عمر: شو أي دوام.. شغلها عمر: تشتغل بعد ام عمر : هيه تشتغل و دش عليهم ابو عمر ابو عمر: بلاك تزاعج . صوتك واصل برع البيت عمر: ابويه .. تدري انه الهنوف تشتغل.. و لا تسو ق بعد ابو عمر: هيه ادريبها عمر: وليش ما خبرتوني ام عمر: ويديه انا.. وانت وشلك بها عمر: شو وشلي...انا مابغيها تشتغل ولا ابغيها تسوق حتى ابو عمر: صدقها امك انت وشلك.. مالك شور عليها.. تراها طليقتك و هب حرمتك عمر: حرمتي غصب عنكم... وانا مابغيها تسوق ولا حتى تشتغل.. ام عمر: انت ينيت عمر: هيه ينيت... عقب ماعرفت سوياتها ما تبيني اتخبل.. انتو شقايل تخلونها تسوي اللي تباه جيه مالها ولي مالها ريال تساله و تشاوره ابو عمر: عندها اخوها... وهو ما رفض.. و بعدين مابتحصل غيرك تشاوره !!! عمر: غصبا عنها تشاورني... وهذا اخوها الا خديه ما يعرف يتصرف ام عمر: عمر بلاك... تخبلت عمر: هيه تخبلت.. قلتلكم حرمتيه تعرفون شو يعني حرمتيه وظهر عمر من البيت وهو معصب.. وقرر انه يروح بيت الهنوف ابو عمر: بلاه الولد اتخبل ام عمر: انا ادريبه ابو عمر: اظن انه يحبها ام عمر: أي حب انت بعد... يحبها و يروح يطلقها و فار عياله بيت الناس لا يصرف عليهم ولا يزورهم وياي تقول يحبها ابو عمر: بس صدقه... المفروض ما تسوق ام عمر: يا بو عمر.. البنيه لازم تشوف حياتها... ابو عمر: بس ام عمر: بس شو... انت ترضاها على بنت بن بناتك.. اكيد لا... ابو عمر: الله يهديهم بس.. وينها خلود.. بعدها في الحجره ام عمر: ليش هيه تظهر اصلا من الحجره... قافله الباب على عمرها لا تاكل و لا تشرب ابو عمر: هب زين عليها ام عمر: انا تعبت من كثر مارمسيتها.. بس ماشي فايده ابو عمر: يعني يوم وافقت البنيه يتعور الريال ام عمر: هالنصيب يا بو عمر.. والاعمار بيدالله ابو عمر: والنعم بالله ام عمر: وماسمعت متى بيسافر ابو عمر: يمكن الاسبوع الياي ام عمر: وين بيودونه ابو عمر: المانيا ام عمر: الله يشفيه ابو عمر: ان شاء الله.. وينها الريم عيل ام عمر: في حجرتها.... اسبوعين و بتخلص امتحاناتها ابو عمر: زين عيل... يعني بنسافر عقب اسبوعين ام عمر: بغيت ارمسك في السالفه... ترى السفر زين النا.. منهابنظهر خلود من حالتها و منها نستانس احنا ابو عمر: خلاص عيل... اسبوعين وبنسير سويسرا..اوه نسيت اخبرج ام عمر: خير ابو عمر: الخير في ويهج.. ترى واحد ياني و يبغي يخطب ام عمر: بس حمده ما خلصت دراستها.. خلها تاخذ الشهاده الجامعيه و عقب يصير خير ابو عمر: هب حمده ام عمر: تدري بعذوب... ماتبغي غير خليفة.. وانا مابغي اكسر بخاطره.. ولد عمها و اولى بها ابو عمر: الله يهديج انتي بعد.. هب عذابه ام عمر: ويديه انا... تبغيه ياخذ خلود.. و خطيبها من اسبوعين متعور و متكسر... شو بيقولون عنا العرب ابو عمر:ولا حتى خلود ام عمر: عيل منو ابو عمر: جيه ماعندج غيرهن و الريم نسيتيها ام عمر: يخطب ريماني!!!!!!!!!!!!!!!!!!!!!!!!!!!! ابو عمر: هيه بلاج مستغربه ام عمر: ماتوقعت الصراحه... ابو عمر: صدقج... حتى انا ماتوقعت.. فديت الصغيرونه ام عمر: أي صغيرونه... الحين عروس.. انزين ومن ها اللي يا يخطبها ابو عمر: واحد من عربان الكعبي.. عمره 23 سنه و يدرس في الجامعه الامريكيه ام عمر: والنعم والله.. بس البنيه بعدها صغيره ابو عمر: توج تقولين عروس ام عمر: هيه بس ابو عمر: بس شو ام عمر: انا ادريبك هب موافق ابو عمر: وانتي شو عرفج ام عمر: ادريبك عدل...هاي ريماني.. ابو عمر: انا خلاص رديت الخبر عالريال ام عمر:وشو قلتله ابو عمر: قلتله انه البنيه صغيره .. و ماعندنا بنات حق العرس ام عمر (وهي تبتسم): اسميك انت ابو عمر: عيل ايوز بنتي الصغيره و خواتها الكبار ما عرسن .. ام عمر: الله يوفقهن ان شاء الله ابو عمر: وينه فيصل عيل؟؟؟ ام عمر: مادريبه... ما يا البيت بعده ابو عمر: ترى عرب من العين بيتغدون عندنا ام عمر: هيه خبرني فيصل البارحه ابو عمر: بيوصلون الحينه.. عطيني التلفون خليني اهزبه الجلب ابو عمر ( يرمس فيصل بالتلفون): الو... وينك ماوصلت البيت لين الحينه ها.. ماتدري بهل الرميثي.. هب روحك قايلي انهم بيتغدون عندنا... و ليش ماشوفك في البيت عيل.. لا بارك الله فيك من ولد.. عنبوك ماتروم تنفعني .. يلا بسرعه.. دقيقتين و اشوفك عندي.. وان تاخرت يا ويلك.. بزوالك ترى فيصل: اب اب اب.. شوي شوي علينا يالشيبه بلاك جيه محتشر... وهذيج الساعه دخل فيصل عليهم ... فيصل: ها شو رايك... اقل عن دقيقتين بعد... شو تبغي اكثر.. ابو عمر: وليش تاخرت ها فيصل: يا بويه وين تاخرت الله يهديك.خلاص كمل حشرتك في الميلس.. تراهم وصلوا ابو عمر: اسبقني عيل لين ماغير ثيابي فيصل: تم ((((((((حبيبي ومهما صاروا الناس ضده تحداهم وحط ايدي بيده ولا همه حبيبي))))))) و دخل محمد الرميثي الميلس مع ابوه و ربيعه عيسى...و رحب بهم فيصل و سلم عليهم.. وعقب شوي دخل عليهم ابو عمر و يلسوا يسولفون لين ما حطوا الغدا و تغدوا رباعه و عينوا خير... ابو محمد: والله يا بوعمر الشغل معاك خير و بركه ابو عمر: الله يسلمك... ابو محمد: والود ودي اللي بينا يكبر و يزيد... والصراحه الود ودي نناسبكم و نكون هل وقرايب.. وتراني الا ياي اليوم اخطب ولديه لبنتكم...و بذمتيه ترانا بنشرف بهالنسب عاد محمد ماصدق... ماتوقع انه ابوه جيه بيرمس... يعني رمسته كانت واااايد حلوه... و استانس على ابوه وايد... ابو عمر ( وهو منصدم): والله يابو محمد.. الشرف النا احنا... و هذيج الساعه المباركه اللي احط ايدي في ايدك وايوز ولدك بنتي... بس تراه الشور هب شوري انا.. شور البنيه و انا الصراحه ماجبرهن على شي.. و ان شاء الله مابيصير الا كل خير ابو محمد: انت شاور و خذ وقتك يا بوعمر.. وتاكد انه اللي بينا مابيتغير... حتى لو رفضتونا محمد انجلب حاله... يرفضونه... معقوله يمكن يرفضونه... ليش يرفضونه.. انا كل بنيه تتمناني.. ريال و النعم فيه و ماعليه قصور.. مال و علم وحتى الجمال فيه..بس تم يفكر... و تذكر يوم خبره ربيعه انه يمكن تكون مخطوبه لولد عمها.. واكيد هذا هو السبب اللي بيرفضونه عشانه وتموا يسولفون و نسوا سالفه العرس و الخطوبه... بس محمد اتغير .. عقب ماسمع رد بو عمر اتحطمت مياديفه .. حس انه يكن يفقد حمده قبل ما يملكها حتى.. معقوله يخسر اعز انسانه في حياته.. يخسر الانسانه الوحيده اللي ملكت قلبه و دخلت حياته...وعقبها اترخص من ابوه و قاله انه بيبات في دبي مع ربيعه... فيصل: ها محمد شو قلت محمد: لا يا ريال مابغي اغثيكم فيصل: شو تقول انت... عيل تبات في فندق ولا شقه و نحنه بيتنا موجود.. لا والله ما تسويها عيسى: مايحتاي يا فيصل... تراكم ماتقصرون .. بس مانبغي نزعجكم فيصل: شو تزعجنا انت بعد... لا لا .. قلتلكم دامكم بتباتون في دبي... تراكم بتباتون في بيتنا... عيل البيت موجود و ترقدون في الفنادق.. والله مايصير هالشي محمد كان مضايج وايد و ماحب يبات في بيتهم... البيت اللي فيه قلبه.. كيف يقدر يرقد في المكان اللي ترقد فيه حبيبته... ويكون منها قريب ومايفرق بينهم غير الجدران.. فقرر محمد يبات في بيتهم مع ربيعه عقب ماتم فيصل يصر عليهم.. وتواعدوا الشباب يظهرون رباعه مع خليفة و يحوطون في المراكز و يتعشون.. في بيت خليفة القبيسي علياء دخلت الحجره على الهنوف.. علياء: الهنــــــــــــــــــــــــــــــــــــــــــــــ و ف الهنوف: بسم الله الرحمن الرحيم.. بلاج داشه جيه علياء: انزلي بسرعه.. ناس يبونج تحت الهنوف: منو علياء: انتي بس قولي الله يستر الهنوف: بلاج.. منو اللي يانا علياء: عـــــــــــــمـــــــــــــــر الهنوف: وشو يبغي بعد علياء: وانا شو عرفني.. امايه محد راحت بيت فطوم يارتنا.. انزلي يالله.. انا مابغي اجابله.. شكله والع ضو.. و مابغي اكون كبش الفداء الهنوف: هزرج.. ليش يا؟؟ علياء: يمكن يشوف عياله.. تعالي.. عيالج راحوا مع امايه الهنوف: يشوف العيال اونه... توه اذكر انه عنده عيال... ما عليج انتي.. تحصلينه ياي يظارب علياء: ماقولج الله يعينج الهنوف: انزليله.. بغير ثيابي و بلحقج علياء: ليش بعد تغيرين ثيابج الهنوف: يعني اظهرله بقميص النوم علياء: انزين.. لا تتاخرين الله يخليج ونزلت علياء و دخلت الميلس عقب ما طلبت من البشكاره تيب القهوة و الشاي علياء (و هي تناول عمر فنيال القهوه): تفضل عمر: زاد فضلج.. وينها ختج... علياء: ها... هني عمر: شو هني بعد علياء: الحينه بتنزل عمر: ما خبرتيها اني ابغيها علياء: هيه عمر: وشو قالتلج علياء: بتغير ثيابها و بتنزل عمر: ليش تغير ثيابها بعد.. جيه قاعده مفصخه علياء: وانت ليش معصب... قالت بتي و خلاص ودشت عليهم الهنوف... علياء: زين يوم انج وصلتي... مليت من القعده... بسير اطالع التلفزيون ابركلي الهنوف: السلام عليك عمر: عليج السلام.. مابغيتي تنزلين الهنوف( وهي مستغربه من رمسته): خير .. ليش ياينا عمر: جيه حرام ازوركم الهنوف: لا هب حرام.. بس هب من عوايدك عمر: عيل اطمني بتشوفيني دوم متفيزر هني الهنوف: ليش عمر: شو ليش بعد... عندج مانع انتي الهنوف : لا هب جيه.. بس عمر : لا بس ولا شياته.. وينهم العيال الهنوف: محد عمر: ما شاء الله .. وين فارتنهم الهنوف: شو فارتنهم بعد.. راحوا مع امايه بيت اليران عمر: لا والله.. وانتي شقايل تخلينهم برع البيت رواحهم ها.. جيه هب امهم.. شقايل تفرينهم بيت اليران وانتي قاعده في حجرتج ولا همج شي.. جيه بيت يرانكم حديقة عامه وانا مادري الهنوف: ماظنك ياي تعلمني شو اللي لازم اسويه.. شوف عمرك اول شي عقب ارمس عمر: بلاني الهنوف: توك اتذكرت انه عندك عيال.. ( وحاولت تمسك عمرها عشان ما تغلط عليه باي كلمه) بتخبرك انت ياي تعلمني شقايل اربي عيالي عمر: هب ياي اعلمج .. ياي اقولج شي واحد و بس الهنوف: نعم وهذيج الساعه رن موبايل الهنوف... عمر ما كان يدري انه عندها موبايل.. و طبعا .. انتفخ ويهه من الغيض الهنوف: الو.... هلا هنادي.. بخير الله يسلمج.. لا والله... انزين شو رايج باجر انسير.. لا عادي برد من الشغل و عقب بمر عليج.. بنسير رباعه.. خلاص عيل... وداعة الله عمر..: ومن متى عندج موبايل الهنوف: ماذكر والله.. من فتره..ليش في شي عمر: اقول.. تراني وايد ساكتلج الهنوف: نعم.. ماسمعت عيد اللي قلته عمر: الهنوف... قررت اردج الهنوف: انت قررت.. بس انا ماقررت شي... و هب ناويه اقرر اني ارجعلك عمر: عكيفج هو الهنوف: هيه عكيفي عمر: عيل بتودرين الشغل.. و السياره من باجر بتبعينها فاهمه الهنوف: لا مافهمت... وبعدين منو انت عسبب تتامر عمر: شو بعد منو انا الهنوف: هيه منو انت.. نسيت يا استاذ عمر انه نحنه مطلقين عمر: لا ما نسيت بس هالشي ما يخليج تسوين الي تبينه الهنوف: انا اسوي اللي اباه... و محد له الحق عليه غير اخويه و امي عمر: قلتلج بتودرين الشغل... و حتى السواقه بتنسينها الهنوف: اتخبلت انت عمر: هيه تخبلت.. اشوف حرمتيه تسوق بسيارتها في الحاره.. و تشتغل بين الرياييل وما تبيني اتخبل.. و بعدين هالموبايل ليش عندج ها.. تحتاجينه يعني... الهنوف: لا تقول حرمتيه... و بعدين انا محترمه نفسي عدل.. و الموبايل الصراحه احتاجه عمر: شو تحتاجينه بعد... وبعدين منو اللي اتصلبج الحينه الهنوف: انت وشلك عمر: الهنوف.. ارمسج عدل .. فردي عليه عدل الهنوف:ربيعتيه عمر: الساعه 9 الفليل ترمسين ربيعتج الهنوف: وشو فيها عمر: وبعد تقولين شو فيها الهنوف: هيه شو فيها.. ماتشوف عمرك ياي بيت ناس الساعه 9 الفليل عمر: ها بيت عمي الهنوف: وهاي ربيعتيه عمر: اشوفج تغيرتي وايد الهنوف: لازم اتغير... تبغيني عيل طول عمري اصيح على فراقك يعني عمر: قصدج نسيتيني الهنوف ( وهي مرتبكه) : خلني اذكرك عسب انساك عمر: ماحيدج جيه الهنوف: انت اصلا ما كنت تعرفني عدل عمر: ............ الهنوف: خلصت ولا بعدك عمر: اباج تودرين الشغل الهنوف: اسفه عمر: ........ الهنوف: برخصتك... ورايه شغل باجر وظهرت الهنوف من الميلس... وتم عمر يطالعها و هو منقهر... توقع انه لو يا و طلب منها شي بتنفذه.. بس مادرى انها تغيرت وايد... و عقب شل عمره و ظهر وراح صوب بيتهم (((((((وجودك عندي بالدنيا يا غالي ورسمك ساكن بقلبي و خيالي ولا غيرك حبيبي)))))))) اما الهنوف فكانت مستانسه و زعلانه في نفس الوقت.. هي بعدها تحب عمر.. بس ماتقدر في يوم تسامحه على استوى بينهم... و كانت مستانسه من ردة فعله.. تدري انها بتقهره و هذا الشي اللي تباه.. تباه ينقهر و يعصب شرات ما كان يقهرها قبل.... دخلت حجرتها... و عقب شوي دخل عليها خليفه خليفه: روح عمر الهنوف: هيه خليفه: وليش ما خبرتوني انه بيي الهنوف: ماندريبه خليفه: وليش يا؟ الهنوف: ها... يبا يشوف عياله؟؟؟ خليفه: وشافهم الهنوف: لا.. ما كانوا هني خليفه: هيه... برايج عيل الهنوف : خليفه خليفه : لبيه الهنوف: بغيتك في سالفه خليفه: هلا الهنوف: لين متى بتم جيه خليفه : شقايل يعني الهنوف: لين متى بتقسى على قلبك و على.. عذابه خليفه : اظن اني رمست معاج قبل عن هالسالفه الهنوف: بس ماقتنعت بردك خليفه: مشكلتج الهنوف: خليفه.. تراها تحبك و حرام تبتعد عنها.. هيه مالها ذنب بللي صار بيني بين عمر خليفه: ادري الهنوف: عيل ليش ماتروح تخطبها من عند عمك خليفه : مادري الهنوف: ترى كثر الجفا هب زين.. فلا تبعد المسافه اللي بينكم.. استانس في حياتك ولا اضيع ايامك بعيد عنها.. البنيه تحبك و زعلانه منك لانها مالها ذنب انك تجافيها... حياتي مع عمر غير عن حياتك مع عذابه كيف قدرت تقسى على عذابه نسيت عذابه.. عذابه ... قلبك و حياتك و روحك.. نسيت حبك لها .. بهالسهوله تودرها و تبتعد عنها خليفه :........ الهنوف: اذا بتم جيه على طول.. فلا تستغرب يوصلك في يوم خبر زواجها خليفه: بتعرس !!!!!؟؟؟؟؟!!!! الهنوف: مادريبها والله.. بس هالشي يمكن في أي يوم يستوي.. و ساعتها انت اللي بتخسر خليفه : هزرج بعدها تباني الهنوف ( وهي تبتسم): الا بتمووووت فيك خليفه : ارمس عمي يعني الهنوف: شو تتريا خليفه: بس اخافها ترفضني الهنوف: لا تخاف خليفه: عيل بالباجر برمس عمي الهنوف: بالتوفيج ان شاء الله...... تعتقدون خلود بتزور عبدالعزيز.. وشو بيكون موقفه يوم بيشوفها!!!! ظنكم خليفة بيغير موقفه و بيسير يخطب عذابه!!!!! وشو بيسوي عمر ... ظنكم حن لحرمته و عياله!!!! ولا تنسون اليوم العالمي ((( يوم حمده و محمد))) Quote Link to comment Share on other sites More sharing options...
khalijia Posted أكتوبر 28, 2005 Report Share Posted أكتوبر 28, 2005 mshkoora o nent'9er il bagey....plzzzzz late25rain 3laina Quote Link to comment Share on other sites More sharing options...
بحرانية2005 Posted أكتوبر 28, 2005 Report Share Posted أكتوبر 28, 2005 واو البارت عجيب وشكله عمر يبي الهنوف ترد له صج مو نفس ذيك المره ننتظر Quote Link to comment Share on other sites More sharing options...
غـــلا البحرين Posted أكتوبر 28, 2005 Author Report Share Posted أكتوبر 28, 2005 ((((من فينا هالليلة ينام و الشوق صاحي ما ينام و كل منا يا حبيبي شايل بقلبه كلام)))) خلود تحسنت حالتها و خاصة عقب رمسة الهنوف.. زيارة الهنوف غيرتها و ظهرتها من ضيجها.. وعلى الساعه11 الفليل غيرت ثيابها و يسلت عالكرسي تقرالها قصه. عذابه: خلود... واعيه ولا راقده خلود: ادخلي عذابه: زين يوم انج بعدج واعيه خلود: ليش عذابه: ماشي... ملانه.. و ماعرف شو اسوي خلود: وينهن عيل خواتج عذابه: ريماني و حمدوه مع امايه و يدوه في الصاله خلود: ابويه وينه.. و خوانج وينهم.. مالهم حس عذابه: ابويه دخل حجرته بيرقد... و عمر شراته.. راقد.. و فيصل اظن ظهر مع ربعه اللي بيباتون عندنا اليوم خلود: عمر راقد...!!!!!!!! غريبه عذابه: هيه والله.. بس سمعت يدوه تقول انه اضايج يوم عرف انه الهنوف تشتغل و تسوق خلود: وليش يضايج يعني... هاي هب حرمته .. اللهم ام عياله و هو اصلا هب مفتكر في عياله عذابه: بس احس به متغير خلود: ما عليج منه.. يمكن ربيعته ودرته و الحين يحس بفراغ عاطفي و جان يقرر يسلي عمره بسالفة الهنوف عذابه: لا ما ظن خلود: ماتدريبه عذابه: انزين .. وشو حالها الهنوف خلود: بخير عذابه: و هلها خلود: يعني ما تشوفين علايه في الجامعه و ماترمسينها دوم عالتلفون.. !! عذابه: هيه.. بس حبيت اتخبر عنهم خلود: عنهم ولا عنه عذابه ( وهي منحرجه): شو حاله؟؟؟ خلود: بخير... عذابه: و ما شي اخبار عنه خلود: لا عذابه: ليش خلود: شو ليش عذابه: ليش ما يسال عنا خلود: تراه يينا كل خميس عذابه: بس ما يدخل داخل شرات قبل خلود: مادريبه.. اساليه.. باجر بيينا و بيتغدى عندنا عذابه: صدق... باجر... يعني باجر بشوفه.... خلود خلود:....... عذابه: خلود خلود: هاااااا عذابه: بلاج ماتردين عليه خلود: شو تبيني اقولج... تراج انتي اللي تلفين و ادورين.. شو تبين عذابه: و بلاج محرجه جيه.. حشا مانروم نرمسكن خلود: عذوب.. فديت روحج مالي بارض اسمع اسالتج السخيفه الحينه عذابه: الحين انا استويت سخيفه ودخلت عليهن حمده و هي تسحب ريماني و راها حمده: يلا خبريني ريم: شو اقولج خلود: بلاكن داخلات الحجره جيه.. ريم: مادري بلاها ختج الخبله هاي حمده: انا خبله ريم: هيه انتي عذابه: شو السالفه حمده: يلا ريمو... ارمسي عاد ريم: شو تبيني اقولج حمده: اوف منج.. منو اللي بيبات عندنا اليوم ريم: شو تشوفيني ناطور.. وانا شو عرفني حمده: ريمو لا تجذبين... توج خبرتيني ريم: يوم اني خبرتج ليش تردين تساليني حمده: ابا اتاكد خلود: خاطري اعرف عن شو ترمسن عذابه: حتى انا... لا يكون تطرون الخطيب المجهول حمده ( وهي منصدمه): أي خطيب عذابه: اللي يدوه ترمس عنه مع امايه خلود: ومن ها !!! و ياي يخطب منو ريم : منو غيري يعني... شيخة الحريم .. الريم عذابه: هيه والله حمده: يخطب ريم... يخطب هاي العيوز.. يخطب هاي الحمسه عذابه: هيه ريم: عذوب.. تراني اتمصخر... عذابه: وانا ماتمصخر ريم: عن شو ترمسين خلود: انا راسي يدور.. خبروني شو سالفتكن ريم: لحظه خلوود.... ايه انتي عذوب... هاي السوالف مافيها مصخره عذابه: ومن قال اني اتمصخر حمده: يعني صدق اللي يونا اليوم يخطبون ريماني عذابه: اظن حمده ( وهي تصد صوب ريم): قوم... الرميثي!!! عذابه: مادري والله... يمكن هاي جبيلتهم ريم ( وهي مستغربه): ماصدق عذابه: بلاج ريم: ماشي.. حمده: عذوب.. انتي متاكده انه عرب الرميثي يايين يخطبون الريم عذابه: الصراحه هب متاكده خلود: لا حووووول.... ابا افهم السالفه حمده: لحظه خلود.... عذوب حبيبتي... انتي شو عرفج عذابه: سمعت يدوه ترمس مع امايه عن ريماني ريم: يمكن ما كانوا يطرون هل الرميثي عذابه: ياربي... قلتلكن ماااااااااااااااااااااادري ريم: حمدوووه... حمده: سكتي الله يخليج... روحه قلبي طار من بين ضلوعي خلود: وليش يطير... وشو فيها لو يخطبون الريم.. المفروض تفرحيلها حمده: تصبحون على خير ( و ظهرت حمده عنهن) خلود: الريم بلاها حمده؟ ريم: ما.... مادري خلود: اقول... شو رايكن باجر تروحن معايه عذابه: وين.. عند قوم عمي خلود: لا هب قوم عمي... بنسير نزور عبدالعزيز ريم: وليش تزورينه عذابه: ليش تزوره بعد... هب جنه متعور و المفروض تطمن عليه خلود: بتن معايه ريم: انا هب اكيد... امتحاناتي عقب اسبوعين.. و ابغي اذاكر خلود: وانتي عذوب عذابه: امايه هب سايره معاج خلود: مادريبها... عذابه: خلاص .. عيل بسير وياج بدال ماقعد روحي في البيت ظهرت ريم من حجرة ختها خلود.. و كانت بتسير صوب حمده... بس ما حبت ترمسها.. كانت زايغه من سالفة الرميثي... يمكن هو ياي يخطبها هي و ختها تحبه و تموت عليه (((بكره يا عيوني بتجيني .. شايل بعينك حنيني... تسهر الليه عشاني و اسهر للشوق اللي فيني))) على الساعه 1 الفليل عقب مارجعوا محمد و عيسى و فيصل... دخل فيصل حجرته و رقد... اما محمد فكان راقد في غرفة الضيوف صوب الميالس مع ربيعه عيسى.. بس ما ياه رقاد.. طول الوقت يفكر في حمده ((( شو اسوي الحينه... لو ظهرت محيرة لولد عمها... لا ماقدر افقدها.. عقب ما حبيتها افقدها.. لا مستحيل..اااااااه يا حمده... ما بينا غير كمن باب.. و احس انه البعد بيننا سنين.. فديت روحج يالغاليه... خاطري اشوفج... خاطري اقولج احبج.. خاطري امسك ايدج و اقولج امووووووووووووووووووووووت فيج يا اغلى انسانه)))) عيسى: بعدك مارقدت محمد: كيف ارقد و القلب سهران... عيسى: يا محمد هذا النصيب محمد: لو ظهرت صدق مخطوبه عيسى: الله بيعوضك ان شاء الله محمد: بيعوضني بحياه ثانيه!! بيعوضني بدنيا ثانيه !! بيعوضني بامل ثاني!!! بس مستحيل يعوضني بقلب .. مستحيل بيعوضني بروح ثانيه.. مستحيل بيعوضني بعيون ثانيه... هاي القلب و الروح و العيون عيسى: الله يعينك على مابتلاك ......... ليش لبست كندورتك.. وين بتروح محمد: بظهر اتمشى برع عيسى: الحينه!!! وظهر محمد قبل ما يرد على عيسى... تم يتمشى في الحوي... و يتامل البيت...(((( فديتج يا حمده,,, انتي داخل هالبيت.. وينها حجرتج!!!... وجان يبتسم.. شفتي يالغاليه شو سويتي فيه... خليتيني استوي شرات روميو... اوقف تحت دريشتج و اتاملج)))) و جان يضحك... ضحك بصوت عالي.. كان ضحكته ممزوجه بالام و الفرح في الوقت نفسه.. و عقب دخل الميلس... وقبل مايدخل الحجره قرر يروح المطبخ لانه قريب عالميلس... واول ما دخل......!!!!!!! شافها... شاف اللي كان يفكر فيها... شاف اللي تم واقف يتامل خيالها... هي ما حست به...تم واقف يتاملها... و هي اظهر الحليب من الثلاجه... ((ماغواها ياربي... كيف اقدر اخسرها... كيف اقدر ابتعد عنها)) محمد: حمده؟؟؟ حمده وقفت مكانها و ماتحركت.. و كانت ماسكه كاس الحليب في ايدها و معطتنه ظهرها... ماقدرت ترد عليه... ((( هو... اكيد هو... ليش عيل قلبي يتنافض و ايدي ترتجف .. ليش ماقدر امشي... ليش ماقدر اتكلم... لحظه لحظه... هذا شوعرفه باسمي..!!! يااااااربي.. ماروم اتنفس حتى شو اسوي .... شو اســــــــوي؟؟؟))) محمد: حمده.... بغيت اقولج شي حمده (((( ارد عليه... كيف ارد عليه و لساني ماروم احركه... الله ياخذ ابليسج يا حمدوه.. يعني هاللسان مايقصر الا الحين.. شو اقوله.. لا لا مابغي اقول شي.. ابغي امشي.. بس ريولي ماروم احركها)))) محمد: حمده... اليوم ياي بيتكم عسب شي في خاطريه.. تراني ياي عشانج يالغاليه .. ييت و طلبتج من ابوج... بس مارد عليه لين الحينه... وتراني سمعت انج مخطوبه... و الصراحه.. بس قطع رمسته صوت الكاس و هو يطيح من ايد حمده...(((( شو يقول هذا... ياي يخطبني... يخطبني انا....))) و عقبها مشت حمده و يت بتظهر من المطبخ محمد: حـــــــــــــــــــــــــــــــــــمـــــــــــــ ـــــــــــــــــده حمده وقفت حذال باب المطبخ محمد: والله اني احبج... احبـــــــــــــــــــــــــــــــــــــــــج ... لا ترديني.. لا تعذبيني... ترى حياتي و موتي بايدج... حمده ابتمست ...((( يحبني.... يـــــــــــــــــــــــــــــحـــــــــــــــــــ ـــــــــبــــــــــــــــــــــنـــــــــــــــــ ــــــــــــي))) وركبت الدري و راحت حجرتها... حست انها ما كانت تمشي... كانها اطير... كلامه فرحها وايد... قاللها انه يحبها... ((( يعني يحبني شرات ماحبه.... يعني يباني... محمد... يا نظر عيني .. ياهوى قلبي... يا بعد روحي... احــــبــــك))) (((مادري شو اسوي يا قلبي لما اشوفك بكره جنبي.. ودي احكيك غرامي خايف عيوني تخبي))) وفي حجرة خلود تمت خلود تفكر في اللي بيستوي باجر... (( ياترى شو بيستوي يوم بيشوفني... بعده يحبني.. بعده يباني ولا .. تناسى حبه لي... .. شو اقوله يوم ادخل عليه... اول شي ابتسم ولا اسلم... لا لا ... شو ابتسم.. دعايا معجون هو... اول شي بسلم عليه... اوه لازم اخذله شي.. شو اشتريله... ورد.. ولا سلة حلويات.. باخذله الاثنينه... اقعد معاه وايد ولا بسرعه اظهر... اصلا حتى لو قعدت معاها شو بقوله .. ياااارب ... يااااارب ساعدني...))) حمده طبعا في عالم ثاني ...((( فديته والله... فديته ماحلاه و ماحلى صوته.... اااااااه ماغواه يوم يقولي احبج.... بس شقايل قدر يقولها... لهالدرجه يحبني... و كيف عرف اسمي.. كيف حبني .. و كيف خطبني... حمدوووه.. صدق انج خبله... هب هذا اللي كنتي طول عمرج تتمنينه.. تتمنين واحد غني و حلو و جذاب و كـــــــــــــــل شي حلو فيه... لا لا ... كنت احبه قبل ماعرف من يكون... احبه حتى لو ماكان عنده شي... يكفي انه يحبني... يكفي اني لا سمعت صوته يفز قلبي و ينبض باسمه .. بس ليش قال اني مخطوبه !!! ))))) عذابه حليلها سرحانه بخليفه.... باجر بيتغدى عندهم (((( باجر بشوفه... من فتره ما شفته.. يا ترى هو متوله عليه.. شرات ما انا متولهه عليه... ياترى يفكر فيه شرات مانا افكر فيه... حن عليه .. افتقدني.. يسال عليه شرات ما انا دووووم اسال عليه... ااااااااااااه يا خليفه... يا من ملك روحي وقلبي... ليش يوم كنت قريب مني ما حسيت بحبك.. ويوم ابتعدت مت بنار فرقاك... )))) و جان تذكر الشريط اللي عطاها خليفه يوم كانوا في ليوا... وحطت الشريط في المسجل... و شغلته... ((((((مغرم بلا احساس.. مجنون بين الناس.. من قال انا بنساك.. و اسمك مع الانفاس.. عمري انا بعطيك و ازعل ترى برضيك.. والروح لك بهديك يا بو عيون نعاس.. من يشبهك يا زين. هم وين و انت وين.. انت نو العين وخل عنك الياس.. ببقى انا عمري حبك وسط صدري... واللي درى يدري.. يا تاج فوق الراس)))))))) ريم كانت يالسه اذاكر... تعودت اذاكر لين الساعه 2 الفليل... وفجاه سرحت (((( معقوله الرميثي ياي يخطبني... اكيد عذابه غلطانه... وحمده... لا لا مستحيل.. اصلا محد بيطيع.. خواتي ما عرسن كيف بيوافقون اعرس قبلهن... بس...بس انا مابغيه... مابغي اعرس... ليش افكر فيه... ليش ماروم اظهره من تفكيري.... راسي يعورني من كثر مافكر فيه... ابغي اذاكر... ركزي يالريم... ركزي.. الاسباب التي تؤدي الى انتشار الثلاسميا سيف.. يااااااااااااااااااااااااااربي... سيف و سيف وسيف... ليش افكر فيه.. الا هو لعاب و مغازلجي و حلو... هيه والله غاوي... بس مغازلجي.. فالح يتفيزر عن باب المدرسه و يرقم البنيات.. بس ليش انا مهتمه فيه... يمكن لاني بديت... لالالالالالالالالالالالالالا مستحــــيـــــــــــــــــــــــــــــــــــل .. مستحيل... مستحيل .. مستحيل .. احبه ))))) و اليوم الثاني.... البنات نشن من وقت... خلود مارامت ترقد لشوقها بشوفة عبدالعزيز.... و حمده تفكيرها و قلبها كان عند محمد طول الوقت... و عذابه سهرانه الليل بطوله تفكر في حياتها... و في خليفه.. وريم اول مره تسهر الليل عسب واحد.. طار النوم من عيونها بسبة سيف... وفي غرفة الطعام.. ام عمر: ماشاء الله عليكن.. اليوم ناشات من وقت خلود: مارمت ارقد حمده ( وهي تاكل) : حتى انا عذابه: شراتكن والله والكل صد صوب ريم... اللي كانت دوووم تنش متاخر ريم: ليش جيه اطالعني... انا مارقدت لاني.. لاني اذاكر حمده: بنشوف هالمذاكره شو اخرتها خلود: امايه ام عمر: نعم خلود: وينه ابويه ام عمر: ابوج نش صل الفير و ظهر صوب العزبه مع خليفة و عمر عذابه: خليفة ام عمر: هيه خليفة عذابه: ليش... يعني .. ( وجان تصد صوب خلود و ترمسها بصوت واطي) هب انتي قايله انه بيتغدا عندنا؟ خلود: احيد يدوه البارحه تخبرني عذابه: وليش ابويه خذ خليفة معاه.. وينه عيل فيصل ام عمر: فيصل مشغول اليوم مع ربعه ... حمده: ربعه اللي يايين من العين ام عمر: وانتي شو عرفج انهم من العين حمده: لا .. بس جيه اسال.. ريمو خبرتني ريم: شو خبرتج بعد ام عمر: خلاص عاد مافيه على حشرتكن من صباح الله خير.. ها خلود بتسيرين صوب عبدالعزيز اليوم خلود: هيه... بس بغيت ابويه يودينا ام عمر: ما عليه... خذي حد من خواتج و سيري سلمي عليه.. وبعدين هله كلهم عنده.. يعني ما بتقعدين روحج خلود: ان شاء الله... عذوب بتسير ويايه ام عمر: على خير... بس ردي قبل اذان الظهر.. سلمي و اظهري.. حمدوه... تعالي بغيتج في سالفه حمده ( وهي تاكل): انا يوعانه... يوم بخلص بييج ام عمر: برايج... الا انتي بتخسرين... ريم: ليش شو السالفه ام عمر: ماشي.. يوم بتخلصين تعالي حجرة يدوتج ( و ظهرت عنهن) حمده: ان شاء الله عذابه: ليش امايه تبغيج.. المفروض تزقر ريماني هب انتي حمده: الصراحه انتي معلوماتج شرات ويهج... عذابه: لا والله حمده: هيه... خلود: شو قصدج... يعني هب يايين يخطبون ريم ريم: ايه انتو... لا تيبولي طاري العرس... والله انه يمبي قشعر عذابه: هههههههههه ليش عاد ريم: مادري... بس ماحب اسمع سوالف العرس حمده: الحمدلله... بسير اطالع الوالده شو تبغي عذابه: يا ويل حالي انا على الادب... سيري و ردي خبرينا حمده: من عيوووووني ( ظهرت عنهم) خلود: عذابه على الساعه 11 اباج تجهزين عذابه: 11 عاد.. ليش ما نزوره العصر ولا المغرب خلود: لا ... سمعت من عمر انه ربعه دوم يوونه المغيربان عذابه: خلاص عيل 11... في غرفة اليده اليده: ادخلي اميه حمده حمده: ها دخلت... شو السالفه ام عمر: سلامتج حمده: شو سلامتج بعد... ابا اعرف شو السالفه اليده: ويديه انا... اصبري على امج حمده: ها صبرنا ام عمر: حمده... فديت روحج.. تراج الحينه كبرتي و غديتي عروس.. اليده: ليش تلفين و ادورين... حمدوه ترى واحد ياي يخطبج... اوص ولا كلمه.. لا تقولين شي.. ابوج و امج و خوانج موافقين.. و نحن ما عندنا بنات يرفضن... و بتاخذينه غصبا عنج.. رضيتي ولا مارضيتي حمده ( ودها تخش راسها من الحيا...)) ام عمر: يا اميه شوي شوي عليها... وبعدين لازم نشاور البنيه .. يمكن ما تبغيه حمده: لا لا .. ابغيه... قصدي... مادري... على كيفكم ( وشلت عمرها و ظهرت من الحجره) اليده: بنات اخر زمن... احيدهن يستحن و مايقولن شي.. بس بناتج انتي مايعرفن الحيا ام عمر: الله يسامج.. جان انها بتموت من المستحى.. اليده: الله يوفجها ان شاء الله.. و اشحقه ما وافقتو على اللي ياي يخطب ريم ام عمر: ابوها ما طاع اليده: واشعنه مايطيع... يوم انه الريال ما عليه قصور ام عمر: يقول البنيه صغيره اليده: شو صغيره بعد... اللي اصغر عنها عرسن ام عمر: بس ما يصير نيوزها و خواتها الكبار بعدهن ماعرسن اليده: والله انتو ما عندكم مذهب... تقطعون نصيبها لانها صغيره اونه ام عمر: الشور عند ابوها... بس اتصدقين انه الولد يبغيها... بو عمر يقولي انه دوم مطيح عنده في المكتب.. و لا مطرش ابوه و عمامه عسب نوافق اليده: و ليش ماتوافقون ها ام عمر: اذا من نصيبها محد بيرده.. في الميلس... محمد: والله يا فيصل ماريد اثقل عليكم اكثر فيصل: شو تثقل علينا يا ريال... محمد: ان شاء الله الاسبوع الياي فيصل: اتغدوا و عقب اسرحوا على راحتكم عيسى: لا ياخويه.. بنظوي صوب العين ورانا درب.. فيصل: عيل نخليها الاسبوع الياي محمد: تم يالغالي.. عيسى: عيل بسير بيت خوالي و بردلكم فيصل: الله يحفظك محمد: بس عاد لا تبطي علينا عيسى : ان شاء الله ( و ظهر عنهم) وتم محمد يسولف مع فيصل... علاقته مع فيصل اطورت و زادت عن قبل بسبب طبيعة فيصل .. لانه انسان مرح و حبوب و اجتماعي محمد: فيصل بغيت انشدك فيصل: خير محمد: بس فيصل: بس شو محمد: لا تفهمني غلط فيصل: افا عليك... شو اللي بغيت تنشد عنه محمد: سمعت انه حد من خواتك محيره لولد عمك.. اظنه خليفه فيصل: هيه.. محمد: هي تباه.. اقصد بياخذها يعني فيصل: ان شاء الله... ابويه هب طايع ايوزها لغيره..تدري انه ولد عمها واولى بها محمد: صدقك... اولى بها في المستشفى عذابه: انتي تدرين وين غرفته خلود: أي غرفه.. يسمونه جناح عذابه: يا حافظ عليه. جناح بعد خلود: شو قصدج عذابه: ماشي .. الله يشفيه خلود: الله يسمع منج عذابه: انزين وينها حجرته خلود: مادري.. خلنا نسال الممرضه خلود: لو سمحتي... وينها غرفة عبدالعزيز المزروعي الممرضه: لحظه... الصراحه انا مش متاكده.. بس على ماظن انها في اخر الممر لاني سمعت انه انتقل لجناح تاني..انتي امشي لاخر الممر و حتلاقي غرفته.. و ان ما كانتش هيه .. اسالي الممرضه اللي هناك خلود: شكرا عذابه: ها وينها حجرته؟ خلود: الممرضه ماتدري.. هب متاكده عذابه: نعم؟؟!! منو اللي يدري عيل... الناطور خلود: بلا استهبال الحين.. انتي روحي اسالي الممرضه اللي هناك و انا بتاكد من الجناح اللي في اخر الممر عذابه: اوكي ومشت خلود صوب الجناح... يمكن ما يكون موجود فيه... ويمكن يكون داخل... و دقت الباب.. بس محد رد عليها.. يعني هب هذا جناحه..و بغت ترد صوب ختها.. بس قررت تدخل الجناح.. وفتحت الباب و مشت ... جان تشوفه... انصدمت يوم شافته... ويهه وايد تاثر بالحادثة و عينه اليمنى مغطينها .. وكان راقد..حطت الورد عالطاوله.. وقفت تتامل ويهه... اول مره تشوف ويهه عدل.. قبل يوم كانت تشوفه ماتجرأت تحط عينها في عينه.. و بغت تحط ايدها على شعره.. بس ماقدرت.. ايدها كانت ترتجف.. و يلست عالكرسي اللي حذاله.. و جان تذكر كلام يدتها يوم وصتها تقرا عليه .. وتمت تقرا عليه آية الكرسي .. تقربت منه عسب تنفخ في ويهه. جان تغمض عيونها.. و نفخت في ويهه .. يوم بطلت عيونها شافته يطالعها.. استحت من اللي سوته.. وندمت يوم سمعت راي يدتها... عبدالعزيز: اشحالج يا اغلى انسانه في حياتي خلود: بخير.. بخير دامك بخير عبدالعزيز: تراني بخير بشوفتج خلود: الحمدلله على سلامتك عبدالعزيز: الله يسلمج و يعافيج خلود: ......... عبدالعزيز:....... خلود:......... عبدالعزيز: ليش ساكته... ماتدرين انه بصوتج ترد الروح فيه خلود: ماعرف شو اقولك عبدالعزيز: قولي اللي في خاطرج.. ولا اقولج.. انا اللي بقولج خلود: شو عبدالعزيز: بسالج و اباج تجاوبيني بصراحه خلود: تفضل عبدالعزيز: اليوم اللي كنت بخطبج فيه... كنت بتوافقين ولا بترديني شرات قبل خلود:..... عبدالعزيز: قولي الصدق الله يخليج.. ولا تجامليني... يكفيني العوق اللي فيه و دخليج لا تزيديني خلود ( وهي مستحيه) : انا قلبي على الفرقا عصاني.. يحبك ما يحب انسان ثاني.. تولع فيك في يومن وليله و ربي بك يا حبيبي بلاني.. ابتسم عبدالعزيز يوم سمع رمست خلود .... ودخلت عليهم عذابه....مع ام عبدالعزيز .. و اخته عذابه: اخيرا حصلتج.. اتحريتج ضعتي.. اصلا انا اللي ضعت.. زين يوم اني شفت عموه و موزه.. جان تقوم خلود وتسلم على ام عبدالعزيز و اخته موزه ام عبدالعزيز: اشحالج يالغاليه خلود: بخير ربي يعافيج... عيل نترخص عنكم موزه: تو الناس خلود: تاخرنا.. المهم اطمنت على عبدالعزيز... ( وجان تصد صوبه) تروح وترد بالسلامه عبدالعزيز ( وهو يبتسم): احبج حب لو يرمى بصحرا.. غدت بنيان و بحور ومواني.. احبج حب لو يرمى بغابه نزل بوحوشها عطف و حناني.. احبج حب ما يخطر في بالج.. و يعجز عن تواصيفه لساني... احبج حب طول العمر كله.. فداج العمر دام العمر فاني... خلود انجرحت وايد.... و ظهرت هي و ختها .. و في السياره عذابه: احبج حب مايخطر في بالج... خلود: جب انزين عذابه: ههههههههه.... حلوه رمسته... الله يهنيج فيه خلود: الله يسمع منج... عذابه: تحبينه خلود: انتي وشلج... عذابه: هههههههههههه... الله عالمستحى خلود: عذوب... بسج عاد عذابه: اوكي... خلنا نوصل البيت.. انا و حمدوه و الريم بنشوف شغلنا معاج... خلود كانت تفكر في عبدالعزيز.... (((( فديته والله... الله لا يحرمني منه ولا من صوته... يالله... يارب... يارب ترجعه بالسلامه )))) في البيت ((((حبيبي.. بعد عرفك مات همي و عاش القلب بافراح و تهاني.. انا لك و انت لي والله يشهد.. اموت ولا عشقت انسان ثاني..))))) عمر تغيرت حياته عقب ماعرف عن الهنوف.. وودر شقته ورد مره ثانيه يسكن في بيت هله.. كان يالس مع امه وابوه واليده في الصاله اليده: يعني خلاص نويتوا تسافرون ام عمر: ان شاء الله اليده: زين عيل... احجزولي معااكم ابو عمر: على خير ان شاء الله اليده: الا بتخبركم عيال بطي بيخاوونا هالسفره ابو عمر: مادريبه خليفه.. مارمسته بعدني.. اليوم بشوفه و بشاوره ام عمر: ماظني الهنوف بتوافق (وعقبها الكل صد صوب عمر) ابو عمر: صدقج.. ماظنها بتوافق... و بعدين حليلها تشتغل عمر: شو حليلها بعد... ابويه المفروض انت توقفها عند حدها اليده: بلاها البنيه.. شوفيه الشغل لا هو عيب ولا هو حرام عمر: بس هيه هب ناقصنها شي... ليش الشغل بعد ام عمر: البنيه تباه الشغل.. وبعدين يا عمر.. الله يهديك مافينا عالمشاكل.. خلها في حالها.. خلها تجابل حياتها اليده: صدقج والله.. عيل اتجابل هاللوتي عمر: انا لوتي اليده: هيه لوتي عمر: ابويه... ابغي ارجعها ابو عمر: ترجع منو عمر: الهنوف... ام عمر: يابويه خلاص البنيه عايفتنك.. ماتبغيك اليده: صدقها امك ما تبغيك.. غصب هو عمر: هيه غصب... و غصبا عنها بترجعلي ابو عمر: هب عكيفك يا عمر.. هب جنك انت اللي مطلقنها عمر:............. ام عمر: يا عمر... البنيه خلاص راحت في حال سبيلها.. وهي الا بنت عمك و ام عيالك.. و مالك شور عليها عمر: اميه.. اليده: شوف يا عمر... البنيه هب طول عمرها بتترياك... لازم تبتعد عن حياتها .. باجر بييها النصيب و بتزوج.. بتملها جيه عظم في البلعوم عمر : شو تزوج... اتخسي والله......والله لأذبحها هي و اللي بتاخذه بعد ابو عمر: شو هالرمسه بعد... عمر: عيل اخليها تزوج.. وعيالي ام عمر: توك تذكرت عمر: مانسيتهم..بس قلت دام انهم عند امهم مابيصيبهم شر ابو عمر: ولو عند امهم انت المفروض تجابلهم.. تدري لو رحتلهم الحينه ما بيعرفونك عمر:........ اليده: و حط في بالك.. البنيه ما بتم تحت يناحك على طول.. خلاص .. الهنوف طارت.. وبعدين توها صغيره.. شو فيها اذا عرست عمر: بعد تقولين تعرس... ودخلن عليهن عذابه و خلود ابو عمر: شو حاله عبدالعزيز خلود: الحمدلله بخير عمر: وانتن قعدتن رواحكن معاه عذابه: ها.. لا لا... يوم وصلنا شفنا امه و اخته معاه في الحجره ابو عمر: عذوب... فديتج يالغاليه ازقري ختج حمده عذابه: ان شاء الله اليده: ترانا رمسناها... و انا فهمتها... والبنيه مالها شور عقب شور ابوها وخوانها عمر: والله يابويه.. انا ماعرف الريال عدل.. بس ماسمعت عنه الا كل خير خلود: شو السالفه ام عمر: ولد الرميثي.. من العين.. ياي يخطب اختج حمده خلود: هيه وصلت حمده.. ابو عمر: حيالله حمده... اشحالج حمده ( وهي منحرجه): بخير ابو عمر: رمستج امج عن اللي ياي يخطبج حمده: هيه عذابه ( وهي تصاصر خلود) : حمدوه مايركب عليها الحيا.. هيه وين و الحيا وين خلود: هههههه صدقج والله ابو عمر: ترى الريال زين و الكل يشهد.. وما سمعنا عليه شي.. و وجان تقاطعه اليده : انتوا بلاكم تلفون و ادورون.. انا شوارت البنيه و ماقالت شي... خلاص.. وافقت.. بسكم عاد.. خلونا نفرح.. عنبوه.. لا استانسنا بعرس عذوب و لا خلود والحينه حمدوه.. بسكم عاد... حمدوه قومي يالله ذلفي حجرتج..(( وانت تاشر على ابو عمر)) شل التلفون اتصل بالريال ورد عليه خبر ه.. وخله يوم الخميس يي مع هله و نملج.. حشا . حتى العرس تكبرونه و الكل ضحك على موقف اليده... واولهم حمده... حمده كانت مستانسه بهالشي... استانست يوم عرفت انها بتزوج من الانسان الوحيد اللي حبته... وفعلا اتصل ابو عمر و رمس ابو محمد... و قاله انهم مستعدين يحددون يوم الملجه في أي وقت... في العين محمد: ها بويه.. بشر .. ردو عليك هل دبي ابو محمد: هيه ردوا محمد: شو قالوا ابو محمد: يا محمد.. ترى الزواج نصيب.. وان شاء الله .. الله بيعوضك بوحده اخير منها محمد: شو تقول ابو محمد: ماتسمعني يعني محمد: بس ابو محمد: لا بس ولا شياته محمد: وليش رفضوني.. لانها مخطوبه.. ابويه فديت روحك... ( ويحب راس ابوه).. الله يخليك يابويه.. لا تحرمني منها... اباها.. والله اباها و ماروم اعيش من دونها.. خبرهم.. قولهم اني موافق على اللي يبونه بس خلهم يوززنها لي.. يا بويه انا عمري ما طلبت منك.. الحينه اطلبك ولا تردني.. ادريبه بو عمر يعزك و يقدرك و ما بيرفض طلبك.. يا بويه انا البنيه ابغيها و مارديها تاخذ غيري... حتى لو كان ولد عمها.. فديتك يا بويه لا تردني... اتصلبه و رمسه.. ابو محمد( وهو مستغرب): قمت تحب يا حمود محمد: الا اموت فيها ابو محمد: وينها العيوز عنك خلها تسمع رمستك محمد: يا بويه تراني روحي منقهر لا تزيد اللي فيه.. اتصلبه و رمسه ابو محمد: انت روح الحين.. و انا ان شاء الله عقب بتفاهم معاه محمد: وين اروح... يا بويه بموت لو ماخذتها... ساعدني.. دخليك ساعدني ابو محمد: بسك عاد... خيست راسي بتفالك... روح يالله خبر امك تجهز الاسبوع الياي بنسير نخطبها رسمي محمد: قول والله ابو محمد: تتحراني اتمصخر معاك محمد: يعني وافقوا ابو محمد: و حد يروم يرد محمد الرميثي محمد: الله لا يحرمني منك... ( وظهر من عند ابوه) طار محمد من الفرحه... اخيرا يتحقق حلمه.. وبياخذ حبيبة قلبه... تواعد مع ربعه عند العين مول... و تيمعوا الشباب عند الباب و يوم وصل محمد كان معلي على صوت المسجل... و ارتبشوا الشباب يوم سمعوا الاغنيه.. ((((والله ما يسوونك يالغالي يالمزيون .. كلهم عسى يفدونك لي بالعدل يسعون ارفجت انا بعيونك رفجة عرب يوفون.. لو كلهم ينسونك ما انساك مهما يكون .. شو هي حياتي دونك ياليتهم يدرونك.. انك نصخ مضنونك و انك نظر العيون .. لو مثلي ينظرونك و بطيبك يحسون.. اكيد بيحبونك يا غايتي بجنـــــــــــــــــــــــــــــون))) و نزل محمد و هو ميودالخيزرانه بايده.. وتم ييول هو وربعه... و ارتبشوا الشباب و استانسوا بفرحة محمد.. و تيمعوا الناس يطالعون الرزف.. و محمد في عالم ثاني... في عالم حــــــــــــمـــــــــــده Quote Link to comment Share on other sites More sharing options...
khalijia Posted أكتوبر 28, 2005 Report Share Posted أكتوبر 28, 2005 mshkoooooooooooooooooooora o fe int'9ar il tkmila....dnt be late Quote Link to comment Share on other sites More sharing options...
بحرانية2005 Posted أكتوبر 30, 2005 Report Share Posted أكتوبر 30, 2005 شكرا على البارت وأكيد ننتظرك وأتمنى اليوم تنزلين جزء Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.