غـــلا البحرين Posted أكتوبر 30, 2005 Author Report Share Posted أكتوبر 30, 2005 بعد اسبوع سافر عبدالعزيز مع هله المانيا للعلاج... و حددوا فترة العلاج لمدة شهر تقريبا .. و قرر بو عمر تكون ملجة بنته حمده يوم الخميس بسبب اصرار محمد على الزواج بسرعه.. يوم الخميس...العين في هاليوم ملجة محمد...و فعلا كان مستانس و طاير من الفرحه.. حس انه زواجه بحمده احل امنية تمناها في حياته... محمد: يالله عاد يا اميه... بنخيس العرب جيه.. بيخيسون وهم يتريونا ابو محمد: تو الناس... نحنه مواعدينهم المغرب.. محمد: لين مانوصل بتغيب الشمس.. وشو فيها لو ظهرنا من وقت.. عاد الحريم محد يعبرهم ام محمد: بلاهن الحريم.. هب جنك ساير تخطب حرمه الحين محمد: هههههههههههه... هاي غير عن باقي الحريم ابو محمد: ودي اعرف.. انت من وين متعلم هالرمسه ام محمد: من وين يعني... دام ابوه موجود ابو محمد: حشا عليه.. انا لساني ينقط عسل شراته محمد:خخخخخخخخ.... هيه ينقط.. بس من ورا العيوز ابو محمد: غربلاتك من ولد... يالله خلنا نظوي محمد: يالله... حبيبي خلني دايم بقربك... أنا محتاج في الدنيا لحنانك... لأني كل ما احبك ... احبك... ولا حد خذ في قلبي مكانك... دبي عذابه: والله تعبت... هلكت اليوم.. حشا هب ملجة .. عرس هذا خلود: عيل في يوم العرس شو بتسوين عذابه: هيه والله.. بس تستاهل حمدوه خلود: الله يوفجها ان شاء الله... انزين بسير اتسبح و اغير ثيابي.. يت راعية الصالون عذابه: هيه.. في حجرة حمدوه خلود: اوكي وظهرت خلود من الصاله و راحت حجرتها... و عذابه تمت في الصاله خليفة: السلام عليكم عذابه: علي.... عليكم السلام خليفة: اشحالج عذابه: بخير خليفة: دقيت باب الصاله بس محد رد عليه.. و سمعت صوت فقلت اكيد انتن هني عذابه: ..... خليفة: وينه فيصل؟ عذابه: في حجرته خليفة: اها عذابه:.... خليفة : يمكن تناوليني كاس ماي عذابه: لحظه... و عقبها عطته كاس الماي خليفة: تسلمين عذابه: يسلم غاليك خليفة: ..... عذابه:...... خليفة: بغيت اقولج شي عذابه: اسمحلي... بييونا العرب الحينه... وظهرت عذابه من الصاله... و خليفة مستغرب من موقفها... ((( الله يعيني عليج يا عذابه... يوم انتي بعيده و اتقرب منج تصديني... ويوم احسبج حنيتي عليه و تبغيني بعد تصديني... وانا اللي ياي اخطبج من عمي... شو اسوي بهالقلب)))) و ظهر من المطبخ و يلس في الميلس يتريا عمه و عيال عمه في حجرة حمده حمده: زين المكياج .. ولا خلها تخفه ريم: خلها تخفه.. بيزيغ الريال جيه... من اول يوم تزيغينه .. بيندم انه فكر يعرس حمده: ريمو.. مالي بارظ اسمع طنازتج ريم: حليلك يا محمد... الله يستر شو بتسويبه حمده: لا حبيبتي بتغير.. عيل ازيغه من اول يوم شرات ما قلتي ريم: هههههههههههههههه... ودخلت خلود عليهن خلود: خلصتي حمده: هيه... وينها ختج.. يلا عاد تلبسن بيون المعازيم و انتن بعدكن.. شو بيقولون عني.. خواتها هب متكشخات و مايعرفن يتعدلن.. و تفضحني عقب و تقاطعها خلود: بس بس يا ام لسان... مادري متى بتعقلين حتى يوم ملجتج وانتي جيه ريم: عيل ما شفتيها قبل شوي ودخلت عذابه عذابه: يا زينج يا حمدوه... حمده: حلوه صح... ادري اني حلوه.. بسكن.. تعبت و انا اسمع هالكلمه.. مليت من جمالي عذابه: ههههههههههههههه... اسميج ملوك حمده: لازم .. انا.. حمده بنت عبدالله القبيسي... حرم محمد الرميثي.. و ما تبيني اغدي ملوك خلود: بسج عاد ... كبر الراس ها هب زين ريم: امبونه راسها عود من زماااااااااااااان... يالله خلود... دورج.. خلها تعدلج حمده صدق كانت حلوه... و فستانها كاان روووووعه .. صح انه جاهز ( من تصميم مصمم لبناني) بس لايق عليها و جنها اميره من اللي نسمع عنهن في القصص و الروايات... و مكياجها كان بسيط لانها اصلا جميله و جمالها الطبيعي احلى بوايد بالمكياج...و كانت فاله شعرها الاسود الطويل.. و هاللي محلنها اكثر و دخلت عليهن امهن ام عمر: ها جهزتن ولا بعدكن ريم: هيه.. بس بعدهن خلود و عذوب ام عمر: بسرعه عاد.. العرب بيوصلون و انتن بعدكن.. عرس هو.. الا هي ملجه.. (وجان تشوف حمده) حمده ( وهي تبتسم لامها): ها ام عمر... شفتي عروس احلى عني ام عمر ( والدمعه في عينها): لا فديتج.. ماشفت و لاظني بشوف ريم: يالله عليج يا امايه .. حتى في الافراح تصيحين ام عمر: يا الريم.. حلم من احلامي تحقق.. بنت من بناتي بتعرس اليوم و ماتبيني اذرف الدمعه عذابه: عقبال الباقيات ام عمر: الله يسمع منج حمده: امايه تراني والله بصيح.. و بيخترب المكياج و بيزيغ المعرس و بتتكنسل الملجه ام عمر: فال لله ولا فالج... يالله انزلن اول ما تخلصن عذابه: ين بنات عمي ام عمر: لا ماظن عذابه: بس خليفة كان هني ام عمر: يمكن الهنوف بتيبهن ( وظهرت عنهن) ريم: وانتي شفتيه خليفه عذابه: هيه ريم: شو قالج و شو قلتيله عذابه: ماشي ريم: شو ماشي عذابه: ماشي يعني ماشي ريم: لا والله.. مادري منو اللي كان بيموت بشوفة خليفة عذابه: هاك اول ريم: شو يعني اول عذابه: والاول تحول ريم: اقول... عذابه: نعم ريم: لو كنت بدال خليفة تعرفين شو بسوي عذابه: شو ريم: بعرس و باخذلي وحده ثانيه ولا بفتكر فيج عذابه: ليش ان شاء الله ريم: شو ليش... ماتشوفين اللي تسوينه فيه عذابه: هو اصلا ما يروم ريم: خليفة لو يبغي شي بيسويه حمده: بسكن الحين... وريم حبيبتي... انزلي شوفي.. اذا وصلوااو لا لا ريم: اوف... انزين و عقب ساعه وصلوا المعازيم... مع انهم ما عزموا حد.. بس ما شاء الله البيت انترس من هل القبيسي و هل الرميثي بعد...و نزلن البنات عند الحريم... و بدت الربشة و الاغاني و الرقص عقب ما ملجوا... و كانت حمده اسعد انسانه في الوجود.. اخيرا عرست و خذت اللي طول عمرها تتمنى تاخذه... و محمد شراتها.. و استانس اكثر عنها بعد... كان يالس بين الشباب و الرياييل بس قلبه و تفكيره و روحه داخل.. عند حمده.. ومحمد كان مقرر يحط خيمه حذال البيت عسب عزيمة الشباب.. كان وده ان كل ربعه يشاركونه فرحته.. و فعلا حط الخيمه و تيمعوا كل شباب دبي و ربعه من العين و بوظبي و حتى الامارت الشماليه.. رميثي ما ينلام....وتعشوا الرياييل و عقب الساعه 11 بدت اليوله و بدا الرزف بين الشباب... و كل واحد رزفه احس عن الثاني و خاصه عيال القبيسي... واولهم فيصل.. اللي بدا الرزف.. و كان ما شاء الله غااااوي و رزفه روعه.. و عقبها نش خليفة و عيسى و محمد معاهم... حتى عمر.. عمر اللي عمره ما تخالط مع حد او حتى يعبر حد.. قام و رزف . على اغنية أهمه لو كذب أنى ما أهمه...غلاي يجول في قلبه و دمه ... يبان الحب في نظرة عيونه...يقول الصدق ولا ولد عمه.... يغار و غيرته تفضح غرامه ...و تكشف غيرته حتى كلامه.... يغار و يقلب الدنيا عليه... يبيني دوم بقربه و يمه... يبيني دايم بجنبه يبيني.....و لو إنه يظاهر ما يبيني... أنا ادري فيه وادري عن طباعه...يخفي الشوق في قلبه و يضمه... يكابر وادري انه هو يكابر..وأنا ادري بس لكن دوم صابر... أبيه يبوح عن حبه وشوقه...وأنا اللي بين خلق الله أهمه... وكان عمر قاصد بهالاغنيه الهنوف.. و قبل مايقوم يرزف طرشلها مسج عسب اطل برع.. و فعلا شافته و سمعت الاغنيه..و رزفه كان اكثر من روعه .. ابتسمت الهنوف من موقفه ومن حركته.. و عمر التفت و شافها و تصنم مكانه.. ماعرفها اول شي لانها كانت بعيد.. بس يوم ركز عرفها.. كانت متعدله و متكشخه... و كمل رزفه و تفكيره عند الهنوف أريدك تسال عيونك وقلبك.... من اللي مرخص عمره عشانك.. بتلقى عاشق هايم بحبك... حفظ عهد الهوى لأجلك وصانك... و صلت الساعه 1 .. روحوا المعازيم... ومحد تم غير قوم خليفة .. و دخل فيصل البيت..وهو ياي يحدر الصاله شاف علياء في دربه واللي كانت واقفه مجابله المنظره و شيلتها طايحه.. فيصل ( وهو منزل عيونه): السلام عليج علياء ( وهي مرتبكه وجان تغطي ويهها): عليك السلام فيصل: اشحالج علايه علياء: بخير ربي يعافيك فيصل: وينها امايه... بغيتج تزقرينها اذا ماعليج اماره علياء: ان شاء الله و دخلت علياء الصاله.. جان تشوف ام عمر.. و خبرتها انه فيصل يبغيها... و عقبها يتها عذابه عذابه: بلاج تتنافضين علياء: شفت اخوج عذابه: منو علياء: فيصل عذابه: اول مره تشوفينه علياء: لا بس.. ما كنت حاطه الشيله.. عذابه: اها... اكيد ما شافج.. فيصل من النوع اللي يستحي علياء: ولو.. فضيحه شو بيقول عني عذابه: وانتي ليش مهتمه علياء: لا بس... مادري.. اقول بسير عند خلود ابركلي عذابه: ههههههههههههه فيصل كان واقف و هو يفكر في بنت عمه... (( اسميها غاويه..حلوه و مزيونه)) و جان تقاطعه امه ام عمر: ها... خير شو اللي بغيته فيصل: ترى الريال حاشرني ام عمر: أي ريال فيصل: شو أي ريال بعد.. المعرس. ام عمر: بلاه فيصل: يبغي يشوف حرمته ام عمر: هيه فيصل: شو هيه... اخليه يدخل ام عمر: وده الصاله الثانيه.. و بخبر حمدوه فيصل: تم و راحت ام عمر صوب حمده ام عمر: يالله حمده حمده: وين ام عمر: ريلج بيشوفج حمده ( وهي مرتبكه): ليش يشوفني بعد... ام عمر: ويديه انا.. تراه ريلج حمده: لا اميه.. ماقدر.. اقعد معاه.. لا لا ماقدر ام عمر: ما بتقعدين روحج.. عمر بيقعد معاكم حمده: عمر بعد... كملت.. لا فديتج.. خله يروح بيتهم ابركله عذابه + خلود+ الهنوف+ ريم+ علياء: ههههههههههههههه الهنوف: شو يروح بيتهم.. حليله متعني و ياي من العين عسبج و انتي تروغينه حمده: عيل اشوفه... مااااقدر خلود: خلاص على راحتج.. بخبر عمر يقوله انج ماتبغين تشوفينه.. وخله يرد العين حمده: ايه انتي.. اتمصخر انزين.. بس ماقدر اقعد روحي معاه عذابه ( وهي تصاصر حمده): يالخبله ها المطلوب.. تقعدين معاه روحج عسب يخبرج اللي في خاطره.. خوانج تراهم دفشين و مايعرفون سوالف الحب و هالخرابيط حمده: اوكي ام عمر: انزين روحي الصاله الثانيه حمده: ان شاء الله أنا من غارس أحلامه في دربك... ومن أشعل شموعه في زمانك... شرات الشمس في شرقك و غربك... بتلقى في دفا قلبي أمانك... و في الصاله الثانيه كان محمد قاعد و يا فيصل محمد: ياخي .. خلنا رواحنا.. تراه حرمتيه عمر: اسمحلي.. هاي قوانين العيله محمد: لا والله... انزين ابغي اقولها شي عمر: ما بسمع محمد: ما يحتاي ما بتسمع عمر: الحينه بلاك محتشر... من الصبح ماذنينا تبغي تشوفها و الحين يوم ياي تشوفها تحتشر بعد محمد: حط نفسك مكاني انزين بذمتك يوم عرسك ماقعدوك روحك مع حرمتك عمر: لا حول.. انزين خمس دقايق و برد محمد: اوكي ودخلت عليهم حمده.... عمر: مثل ماوصيتك محمد: انزين انزين ظهر عنهم عمر.. و يلست حمده بعيد عن محمد.. وعيونها في الارض من المستحى محمد: اشحالج حمده: بخير محمد: دووم هب يوم حمده: معاك ان شاء الله محمد: تدرين اني مستانس.. وانتي حمده: مادري محمد: شقايل يعني ماتدرين حمده: هيه محمد: شو هيه حمده: هيه مستانسه محمد: فديتج والله حمده بغت تموت يوم سمعته يتفداها محمد: انتي كنت تعرفيني حمده: كيف اعرفك محمد: عرفتيني في الماسنجر حمده ( وهي منصدمه): هيه محمد: حتى انا عرفتج حمده: شقايل محمد: ادل بيتك دون وصف ولا عنوان .. كيف اضيع سكته وسط قلبي حمده ابتسمت من رمسته الغاويه محمد: تذكرين ايام الماسنجر حمده : هيه محمد: انا الحين الثور حمده: هههههههههههههههههههههه... والله ما كنت اقصد محمد: اسميج كنتي تسبيني سب.. حمده: حتى انت.. ما كنت تقصر محمد: بس كنت احبج حمده: بهالسرعه محمد: والله يا حمده انتي ماتدرين شو الي سويتيه فيه.. جلبتي حياتي كلها... حمده:........ محمد: حمده حمده: لبيه محمد: احبج حمده استحت و ردت نزلت راسها محمد: اباج تحطين عينج في عيني... و جاوبيني.. تحبيني ؟ حمده: .... محمد: فديتج ردي عليه... و نسيني ولو مره حمده: هيه محمد: شو هيه حمده: اللي سالته.. هيه محمد: شو هيه حمده: احبك محمد: يعلي مانحرم من هالصوت ذبحني الشوق في سلمك وحربك... وأنا صابر لأجل خاطر عيانك... بربك لا تعذبني........ بربك.... تراني بس محتاج لحنانك.... كان عمر واقف صوب الصاله .. و جان تمر الهنوف عمر: اشحالج الهنوف الهنوف: بخير عمر: وينهم العيال عيل الهنوف: رقدوا عمر: هيه الهنوف:........ عمر: الهنوف الهنوف: نعم عمر: تراني بعدني اباج الهنوف: هب وقته هالكلام عمر: متى عيل... كل ماتصلبج ماتردين عليه الهنوف: انت من وين يبت رقميه عمر: هب مهم من وين.. المهم خبريني.. ليش ما تبغيني الهنوف: ماسرع ما نسيت اللي صار بينا... نسيت هاك اليوم... يوم مديت ايدك فيه... عمر انا اتحملت منك كل شي.. المغازل و عدم الاهتمام و المذله.. بس ان تمد ايدك لا... عمر: لحظة ضعف الهنوف: وانا قلتلك قبل.. مافكر ارجعلك عمر: بس... وجان يدخل خليفة معاه فيصل... و من الصوب الثاني يت علياء مع امها و عذابه و ام عمر... خليفة: يالله عيل بنترخص ام خليفة: مبروك عليكم يا ام عمر... عقبال بناتج ان شاء الله ام عمر: الله يسمع منج يالغاليه خليفة كان طول الوقت عينه على عذابه بس هي ماتعبره الهنوف: يالله عيل.. بسير اييب العيال ( وراحت حجرة ريم فوق) فيصل: روح النسيب و لا بعده عمر: مادريبه... فيصل: فيك شي عمر: شو بيكون فيه يعني فيصل: بل بل... شوي شوي علينا ام عمر: فيصل.. طل في الميلس تاخر الوقت فيصل: ان شاءالله ودخل فيصل عليهم فيصل: يابويه تاخر الوقت و نبغي نرقد محمد: ههههههههههههههه... غثيتكم عيل فيصل: هيه والله محمد: خلاص عيل... فيصل: اقول... ليش ما تبات عندنا اليوم محمد: الود ودي... بس لازم اسير العين.. فيصل: خلاص برايك.. محمد: تصبحين على خير حمده حمده: وانت من هله... وظهر عنهم محمد وهو طاير من الفرحه...حاس بفرحه كبيره...اخيرا تحقق حلمه و تزوج اللي يباها و اللي قلبه تمناها (( فديتج يا حمده... يارب لا تحرمني منها... و كمل فرحتيه معاها لاخر يوم في حياتي)) في حجرة ريم الهنوف: فديتج والله..صدق انج طيبه ريم:لا حبيبتي... لاني ابغي ارقد عسب جيه اساعدج تشلين عيالج الهنوف: هههههههههههه... هب هينه والله.. عيل يوم بتعرسين وبتيبين عيال شو بتسوين؟ ريم: ومنو قالج اني بعرس الهنوف: بتخبرج ليش رفضتوا المعرس ريم: أي معرس الهنوف: اللي ياي يخطبج ريم: انتي شو تقولين الهنوف: ماتدرين انه واحد يا يخطبج ريم: لا مادري الهنوف: ابوج رفضه ريم: احسن.. اصلا مابغي اعرس الهنوف: بس سمعت انه يباج ريم: منو قالج...؟ الهنوف: امج خبرت امي... تدرين بالحريم ما يخشن شي ريم: ههههه صدقج والله.. هذا عبود ولدج متن هالايام خله يسوي رجيم.. حشا ماروم اشله الهنوف: شليه وانتي ساكته ريم: هههههههههههههه... ثقيل شو اسوي الهنوف: الله رحمك يا سيف يوم انك ماخذتها ريم: منو سيف الهنوف: اللي يا خطبج... سيف الكعبي ريم: شوووووووووو؟؟؟؟؟؟ Quote Link to comment Share on other sites More sharing options...
بحرانية2005 Posted أكتوبر 31, 2005 Report Share Posted أكتوبر 31, 2005 شكرا حبيبتي على البارت وننظرك على احر من الجمر Quote Link to comment Share on other sites More sharing options...
غـــلا البحرين Posted أكتوبر 31, 2005 Author Report Share Posted أكتوبر 31, 2005 (((من يحبك كثر ماحبك انا و من حبك حاول وياما اجتهد.... و من في عينه شوفتك كل المنا ولا ورب العرش ماغيري احد...))) مر اسبوع على ملجة حمده.. وحال البنات تغير... خلود عقب ما خذتلها اجازه من الشغل حست بالملل و الفراغ.. بس ما حبت تقطع اجازتها عسب السفر.. وكانت تتصل باهل عبدالعزيز و تطمن على حاله.. ترمس اخته او امه .. هو حاول انه يرمسها بس هي ما طاعت ( اونها عاد تستحي).j حمده عاد محد يروملها... تغيرت وايد.. هب هذيج الخبله الملسونه.. بالعكس استوت هادية ومؤدبه..طبعا عسب ترضي ريلها محمد... ومحمد حالته حاله.. جنه محد ملج و عرس غيره... كل يوم مطيح في بيت قوم القبيسي... لدرجة انه عمر اضايج من هالشيي و طبعا لانه دفش و ماهمه حد طلب منه يخفف زياراته عذابه تغيرت بعد... بس كان تغيرها صوب خليفة و بس...حطت في خاطرها موقف خليفة يوم طلاق عمر و الهنوف.. و قررت انها تبتعد عنه ولا انها تفتكر فيه وهو مايبغيها.. بس خليفة بعده يموت فيها و يحبها.. المشكله انه كل واحد فيهم يكابر من صوب.. خليفة يكابر عسب طلاق اخته.. ويوم غير رايه و قرر انه يخطب عذابه .. هيه اللي بدت تكابر و تتغلى عليه..وهذا الي كان معذبنه ومايدري شو اللي لازم يسويه.. يخطبها ولا يبتعد عنها.. احيانا يحس انه عذابه ماتبغيه ولا تواطنه.. و ساعات يحس بحبها وشوقها له.. مع هذا بعده محتار .. محتار في حياته.. يكمل حياته مع حبيبة قلبه اللي معذبتنه ولا يستمر في حياته بدونها!! ريم بدت امتحاناتها.. و كانت صدق اذاكر و تجابل دراستها.. حتى هلها ماقاموا يشوفونها.. بس مع هذا بعدها تفكر في سيف الكعبي.. و خاصة يوم عرفت انه خطبها .. و عرفت عقب انه بعد يزور ابوها في الشغل بس عسب يوافق عليه.. و سمعت من يدتها انه سيف شارنها و يبغيها... و ملزم على ابوه انه ياخذها.. الهنوف.. حياتها تغيرت وايد.. استوت غير عن قبل.. هب هذيج البنيه المستحيه اللي تخاف تواجه الناس و اللي كانت ماتقدر تعبر عن رايها و اللي كانت ضعيفة الشخصيه.. الحينه غير.. استوت اقوى عن قبل و شخصيتها تغيرت بعد.. يمكن بعدها عن عمر و طلاقها اثر فيها وايد.. بس مع هذا المشاكل بعدها تتبعها.. عمر اللي كل يوم والثاني طايح في بيتهم.. اونه يزور عياله و هو اصلا يبغي يعرف اخبار الهنوف اول باول.. و لا بعد دوم يتصلبها بس هي ماترد عليه و هذا اللي كان قاهرنه الوحيد الي تم في حاله هو فيصل.. خواته حسن بحبه و اهتمامه بعلياء.. بالرغم من اهتمامه .. ماتغير ولا حاول يبين لاهله انه يبغي يخطبها.. بعده في سوالف المغازل و البنات و الترقيم و المولات و السهر لين الفير.. سالفة العرس ماطرت في باله ابد.. وهالشي اللي كان معذب علياء.. حست باهتمام فيصل و حبه لها.. بس ما اثبتلها هالشي.. ما بين لها انه يباها او في يوم بيي يخطبها.. و عرفت عن سوالفه من الهنوف.. و قررت انها تشله من تفكيره ولا انها تكرر بتجربة الهنوف... يوم الاثنين .. الساعه 1 الفليل (((انت شوفي و انت عمري والهنا يا جسد بي روح و لروحي جسد و انت عيني و انت روحي و السنا وانت اسبابي اذا حبي خمد))) عمر قاعد في الصاله مع محمد الرميثي و حمده و عذابه عمر: ياخي لعوزتنا... عنبوه الساعه 1الفليل هب ناوي ترد بلادك محمد: بلادي عاد.. جيه ساكن في باكستان و انا مادري عمر: خلاص .. رد بيتكم ابركلك.. ياخي هب كل يوم العيد ودخل عليهم فيصل فيصل: هلا والله بالنسيب محمد: يا مرحبا بك فيصل: اشحالك... وانا اقول بلاه البيت منور محمد: منور بوجود حمده حمده استحت ... و جان تصد عذابه صوبها عذابه: يتغزل بعد جدام خوانج... و انا اقول بلاه عمر دوم متفيزر عندكم حمده: سكتي لا يسمعج فيصل: ها النسيب.. شو قلت.. بتسرح معانا اوز باكستان حمده: ليش؟ فيصل: بنسير ويا الشباب القنص محمد: والله مادري فيصل: شو ماتدري خلنا نسير نتونس كم يوم.. و نكحل عيونا بشوفة المزيونات هناك حمده: لا والله محمد: هههههههه... لا مايحتاي.. عندي وحده فيصل: زيادة الخير خيرين حمده: لا تونسه ولا شياته فيصل: خلنا نسمع رايه انزين.. عنبوج من الحينه تتحكمين فيه.. ها النسيب شو قلت.. محمد ( وهو يطالع حمده): خلاص عيل تم... بخاويك اوز باكستان.. يمكن احصلي وحده تسر الخاطر.. حمده ( وهي منقهره من رمسته): نعم؟ محمد: بلاج.. الشرع محلل اربع عذابه: خيبه... توكم ملجتوا و العرس ماستوى .. ناوي تاخذلك وحده ثانيه فيصل: ما عليك منهن ... تعال معانا و بتستانس عمر: صدقه فيصل.. سير وياهم احسلك من ييتك هني كل يوم محمد: ياخي انت شو حارنك.. ولا عسب ماعندك اللي عندي عمر: لا والله هب جيه.. انا لو ابا جان عرست ... بس ماخفي عليك.. بعزمك على عرسي قريب حمده و هي اطالع عذابه.... مستغربين فيصل: خلاص عيل... بنسير بالاربعاء.. انت تعال بات عنا يوم الثلاث عسب بنظهر الفير ... عمر: لا حول.. يبات عنا يعني حمده: شو فيها لو ( وجان توطي صوتها و تنزل راسها) لو بات عندنا عمر: وانتي حد طلب رايج.. بتخبرج احيدج ترقدين دوم الساعه 9 الفليل.. شو اللي مسهرنج الحينه حمده: كيفي عمر: لا والله محمد: ايه انت.. قم كفخها احسن عمر: عادي.. ليش ماروم محمد: والله ماتروم ... هاي حرمتيه و مارضى عليها عمر: قبل ماتستوي حرمتك تراها ختيه حمده: جرب و بتشوف ( وهي صدق معصبه لانه عمر احرجها جدام محمد) عذابه: اييبلكم سجاجين احسن.. عسب تذابحون مره وحده محمد: عيل اخليه يمد ايده عليها ... لا والله هالشي مايصير وانا حي... بس انا اللي امد ايدي فيصل+ محمد: ههههههههههههههههههههههههههههههههه حمده: احلف انت بس... ( وجان تشل عمرها و تروح حجرتها) محمد: حمده.. والله اني اتمصخر.. بلاج عذابه: حشا .. ها جيه تتمصخر عيل يوم ترمس جد شو تقول محمد: صدق ان البنات مقصه.. ولا بعد جبريت على كل كلمه عصبن عذابه: عنبوك تقول بعرس و باخذ وحده ثانيه و لا بعد بتمد ايدك و تباها تناقز و ترقص من الفرحه فيصل: هههههههههههههه ماتخيل حمدوه تسويها محمد: ههههههههههههههه ولا انا .. المهم بروح عنكم عيل..الظاهر اني ثقلت عليكم عمر: هيه والله محمد: فيصل هذا اخوك دومه جيه دفش و مايستحي فيصل: هيه... محمد: هذا يباله وحده تصلبه عذابه: واشحقه وحده بعد؟؟ فيصل: هاي رمسة شباب انتي مالج خص عمر: ياخي جربت بس ماشي فايده فيصل: عيل مغربية... عمر: اسميهن المغربيات...قامن ما يعبرونا محمد: افا.. اخاف انت الي ماتعرف تقردنهن فيصل: صح لسانك يالنسيب هذا وين و التقردين وين.. ماشفت خليفة عيل. عذابه: بلاه خليفة فيصل: امايه.. ليش ما تلحقين ختج.. شو اللي ميلسنج بين الرياييل عذابه: انتو اللي دخلتوا انا امبوني هني... عمر: انزين تفضلي روحي حجرتج عذابه ( وهي ماطه بوزها شبرين و ظاهره من الصاله): انزين وكملوا الشباب سوالفهم ... و عقب روح محمد عنهم... و دخل عمر حجرته.. و عق ثيابه و انسدح على الشبريه... و جان تتصلبه وحده بدور: السلام عليكم عمر: عليج السلام... بدور: اشحالك عمر: بخير الحمدلله... انتي اشحالج بدور: يسرك حالي.. عمر : دوم ان شاءلله بدور: بلاك اليوم اتصل بك وماترد عليه عمر: مشغول شويه بدور: مشغول ولا تتهرب مني عمر: شو اتهرب الله يهديج بدور: ليش متغير عليه في الفتره الاخيره عمر: لا متغير ولا شياته...انتي اللي تتوهمين بدور: اتوهم!!! عمر: هيه بدور: بعدك تحبني؟ عمر: ليش تسالين بدور: وليش مارديت عليه عمر: لانج تعرفين الجواب بدور: لا ماعرف عمر: كيف عيل ترمسيني دامج ماتعرفين اذا كنت احبج ولا لا بدور: لاني احبك عمر: حتى انا بدور: انت وايد متغير عليه عمر: متغير بشو.. لاني مارمستج اليوم .. قلتلج انشغلت شويه بدور: هب بس اليوم.. البارحه واللي قبله.. من شهر تقريبا عمر: ..... بدور: اسمعني عدل.. انا هب لعبه عندك عمر: وانا ماعتبرتج لعبه بدور: بس تعاملني كاني لعبه.. وهم.. وقت فراغ تضيعه عمر:..... بدور: عمر... اذا انت ما تباني مره ف أنا مابغيك الف مره... ولا تظن انه حبي لك و غلاك في قلبي ما بيمنعني عن فراقك.. انت تدري زين انه عمري ماتعرفت على غيرك.. ولا جد رمست غيرك... و انت تعرف هالشي عدل.. وانا بنت ناس و عرب ما يرضون المذله و لا العيب ..و يوم اني رمستك لاني صدق حبيتك و وثقت فيك.. فلو سمحت لا تجازيني بهالاسلوب.. عطني مثل ما عطيتك عمر: وشو اللي تبغينه بدور: انت تدري عدل شو اللي ابغيه عمر: قصدج اخطبج بدور: ما بجبرك على شي.. و اذا ما كنت تبغيني برايك .. حفظك الرب .. و بتحصل غيري مليون وحده.. و اذا كنت شارني و صدق تحبني بتخطبني ما كنت ترددت كل هالشهور... ( وجان تصك عنه) تم عمر يفكر في رمستها... تعرف عليها تقريبا من سنه في بوظبي... شافها مره في بوظبي مول و عطاها الرقم بس ماتصلتبه لانها كانت متردده... بس عقب رد شافها في نفس المول و عطاها الرقم مره ثانيه.. و عقبها اتصلت به... بدور بنيه عمرها 22 سنه .. في قمة الجمال..تخرجت من التقنيه بس ماشتغلت.. تعلقت في عمر وايد.. وخاصه انه كان الانسان الوحيد الي تعرفت عليه و حبته...وقطع تفكير عمر صوت المسج من بدور.. (((((( انا نفسي عزيزه ما تود اللي ضايع وداده... ولا تهوى عشير كل يوم يغير اطباعه))))) (((انت ميعادي وسهدي و العنا و انت تعذيبي و صبري و الجلد وانت راحاتي و روحي و الضنا وانت الاول مابها قبل و بعد)))) قعد عمر يقرا المسج اكثر من مره.. عمر في يوم قرر يخطب و ياخذ بدور.. بس عقب تردد... و تم يفكر شو اللي خلاه يتردد... و عقب عرف... عرف انه الهنوف هي السبب... قرر يتصلبها.. يمكن لانه خاطره يسمع صوتها... او الشوق اللي اجبره... اتصل... بس حصله مشغول... استغرب... رد اتصل بعد مشغول...شاف الساعه و اللي كانت 1 و نص.. و تم نص ساعه يتصل و يحصل تلفون الهنوف مشغول.. بغا يموت من الغيض... و ما ياه الرقاد و تم يحوط في حجرته... من الغيض قرر يروحلها البيت و يكسر تلفونها.. واتصل عقب الهنوف: الو عمر( وهو يصارخ): تو الناااااس الهنوف( وهي زايغه): منو عمر: منو بعد.. اونج ماتعرفيني..هيه اكيد من كثرهم الهنوف: عمر!!! عمر: هيه عمر الهنوف: وبلاك محتشر جيه عمر: كيف ما تبيني احتشر و انتي شاغله تلفونج من ساعتين الهنوف: ساعتين عاد... يمكن ما كملت ساعه عمر : كملتي ولا ما كملتي... منو ترمسين ها الهنوف: اول شي لا تصارخ.. وثاني شي.. مالك خص عمر: شو مالي خص.. اشوفج وايد زوديتها.. والله لو اتصلبت بج و حصلت التلفون مشغول جان شفتيني في بيتكم الهنوف: شو بتسوي يعني عمر: بلعن الخير فيج الهنوف: بتضربني يعني عمر: والله لا اسويها الهنوف: تحلم عمر: لا تتحديني الهنوف: انت اللي احترم نفسك اول شي.. هب عنزتك كل ما غيضت تصفعني.. وبعدين مالك حق عليه فاهم عمر: لي حق عليج و غصبا عنج.. منو كنتي ترمسين الهنوف: قلتلك مالك خص عمر: الهنوف ردي عليه .. ولا تخليني اييج الحينه الهنوف (وهي ماسكه عمرها): خلود عمر: بتاني جدامج تجذبين عليه الهنوف: صدقت زين وان ما صدقت مشكلتك عمر: هب مصدقنج الهنوف: والله شو اسوي دامك تتعرف على الصايعات و تتحرى كل الناس شراتهن عمر: احلفي الهنوف: ما بحلف.. ولو سمحت لا تتصل مره ثانيه ( وجان تصك التلفون في ويهه) عمر احتر من تصرفاتها وردها.. ولا بعد صكت التلفون في ويهه... ورد اتصلبها بس كان اهدى عن قبل الهنوف: خير عمر: يالهنوف الهنوف: نعم عمر: احبج الهنوف ( اول مره يقولها و كان مستغربه): شو عمر: ما سمعتيني يعني الهنوف:........ عمر: احـــــــــــــــــبــــــــــــــــــــــــــج الهنوف: انزين عمر: شو انزين الهنوف: والمطلوب عمر: اباج الهنوف:... عمر: رديلي... والله اني اباج و ماروم اعيش من دونج الهنوف حالتها حاله..ماتدري اذا كانت مستانسه ولا زعلانه... الابتسامه مرتسمه في شفاتها و الدمعه في عيونها عمر: سامحيني يا غناتي على اللي سويته.. سامحيني ... فديت روحج تسامحيني... خلاص انا ماروم اعيش من دونج... اباج .. والله اني ابــــــــاج الهنوف: ماقدر عمر: ليش تعذبيني اكثر الهنوف: شرات ما انت عذبتني 5 سنين عمر: سامحيني الهنوف: حتى لو سامحتك.. مابقدر انسى عمر: حتى لو قلت اني احبج الهنوف: متاخر.. تاخر وااااااااايد يا عمر عمر: احبج الهنوف: عمر عمر: لبيه الهنوف: انساني ( وصكت التلفون) عمر هذيج الساعه حس انه حد طعنه في صدره.. حس بضيج و حزن و كره... (((كيف جيه ترد عليه عقب ما قلتلها اني احبها... كيف جيه تسويبي...كيف )))) وجان يطرشلها مسج عسب يقهرها شرات ما قهرته عمر (((( قررت اعرس قريب.. ما ينجبر قلب على قلب مادام قلبك ما هواني.. لا حبك اول واخر الحب و لا انت الوحيد اللي في زماني)))) الهنوف حزنت يوم شافت المسج .. ماسرع ماقسى عليها .. توه يقول انه يحبها والحينه قرر انه يعرس..ردت عليه بمسج (((( لك في الدنيا درب و لي درب روح عساك تعيش هاني.. وانا على ذكراك برقب ربي يعوضني بثاني)))) عمر شوي وبيذبح عمره... ((( يعوضها بثاني والله لذبحها هيه و الي بتاخذه)) وجان يطرشلها ((( تراني صدق بعرس... بس انتي لا تفكرين في يوم انج بتعرسين دام اني عايش))) وردت عليه مسج((( مسموح مالك في الهوى ذنب لو شفتني عقبك اعاني .. وما ينجبر قلب على قلب.. ولا يستوي العاشق اناني..))) وعدت هالليله .. و عمر و الهنوف بهالحاله.. هو من صوب مغيض من موقفها و هي من صوب محتره انه قرر يعرس و هو توه معترف انه يحبها.... ومرن الايام... حمده حطت في خاطرها موقف محمد معاها... و ما كانت ترد عليه يوم يتصل بها... حتى يوم بات في بيتهم ظهرت و راحت بيت خليفة تزور عيال اخوها... و محمد احتر من تصرفها . كان وده يسلم عليها قبل ما يسافر بس هي ما عطته المجال.. في بيت خليفة القبيسي عذابه و حمده و خلود يالسات مع الهنوف و علياء... الهنوف: انزين الريال يتمصخر هب قصده حمده: حد يتمصخر جيه... ( وهي تقلد محمد) بعرس باخذ وحده ثانيه .. الشرع حلل اربع الهنوف+ خلود:هههههههههههههههههههههه خلود: والله انتي محد يسولف معاج حمده: هيه اخليه يرمسني جيه قبل العرس .. عسب عقب العرس ما يحترمني ولا يعبرني الهنوف تذكرت موقف حمده مع محمد... نفس الموقف مرت به يوم خطبتها بعمر.. بس هيه هاك الوقت سكتت و ماهتمت في رمسة عمر و هو يطنز.. مادرت انه اللي يقوله في يوم بيتحقق خلود: وين سرحتي.. الهنوف: لا ماشي... خلود: لا تقولين في عمر الهنوف: ماعندي سالفه افكر فيه عذابه: الهنوف.. ليش عمر من كمن يوم يتخبر خلود عنج الهنوف ( وهي تصد صوب خلود): صدق خلود: سالني اذا رمستج هاك اليوم الفليل ولا لا الهنوف: اها حمده: شو السالفه علياء: السالفه انه اخوج حن لحرمته و عياله.. من فتره دومه مطيح في بيتنا... خلود:هههههههههههههههههههه عيل شو بتقولين اللي مطيح عندنا... بس في ناس ما يعبرونهم حمده: انا براويه.. عسب يحترم عمره مره ثانيه ولا يتم يرمس بهالاسلوب الهنوف: اسميج بتغربلينه عذابه: محمد ماله خص.. هذا كله بسبة فيصل علياء: ليش .. بلاه فيصل عذابه: هو اللي يشجع محمد على المغازل و هالخرابيط.. ولا بعد بيسافرون رباعه علياء انقهرت يوم سمعت عن فيصل.. بعده ماتغير... بيتم طول عمره مثل ما هو.. عمره ما بيتغير حتى لو كان يحبها الهنوف: شو حاله الريم.؟ خلود: الحمدلله بخير... مسكينه هالكه عمرها بين الكتب.. الله يوفجها ان شاء الله الهنوف: ان شاء الله.. وبعده هذا .. مممم مادري شو اسمه عذابه: اسمه سيف الهنوف: هيه سيف.. بعده يباها خلود: هيه والله... اسمع ابويه يرمس امي عنه... علياء: وليش ما توافقون عليه حمده: هيه والله ليش.. دام انه يباها الهنوف: بس كيف يباها .. جد شافها في مكان خلود: مادري.. لا لا ماظن حمده: شكله بيموت عليها عذابه: ومن الحب ما قتل علياء: بدت الشاعره عذابه القبيسي.. وجان يدخل عليهم خليفة مع عبدالله و سلامه عيال الهنوف عبدالله وهو يربع صوب خلود.. عبدالله: عموووووه خلووود خلود: هلا والله وباسها على خدها.. ويلس في حضنها عبدالله: شوفي الحلاوه... خالي خليفة اشترالي هااااااااااااااااااااالكثر حمده: فديت روحك والله.. وينك عبود ما تينا عبدالله: ماحبج حمده: طالع والله... ليش عبدالله: ماحبج حمده: افا عبدالله: ماااااااااااااااااااااااااحبج حمده: انا اللي اموت فيك يعني... اصلا انا ماحب غير البنوته الحلوه سلامه.. ( وجان تحضن سلامه) الهنوف: ماعليج منه... ان هو ما يحبج ترى في غيره.. ويترياج في البيت الحينه حمده: خله يخيس ... الهنوف+ خلود+ علياء+ عذابه: ههههههههههههههههههههههههههههههههههههههههههه خليفة: السلام عليكم الكل رد عليه... خليفة: وانا اقول ليش البيت منور... أي بيت الا الفريج كله حمده: منور بوجودك .. اشحالك خليفة ربك بخير خليفة: بخير دامج بخير... هالعروس... علومج حمده ( وهي مستحيه): لازم يعني تحرجنا خليفة: توني ياي من بيتكم... واشوف واحد محتشر هناك... يبغي يشوفج.. وعمر مستانس على حشرته خلود: ههههههههههههههههه ياحليلك يا محمد خليفة: من الحينه تعاقبينه.. اتريي عليه شويه حمده: لا لا.. ماينفع جيه...لازم من الحينه اوريه العين الحمره خليفة: هب هينات...( وجان يصد صوب عذابه) واللي كانت اونها منشغله بعيال اخوها خليفة: عذابه عذابه: نعم خليفة: بغيتج في سالفه والكل افتر صوبها... استغربوا من طلب خليفة... عذابه: خير خليفة: اذا ما عليج اماره... تعالي الميلس عذابه ( وهي اطالع خواتها): ان شاء الله... ( وجان تلحقه صوب الميلس) علياء: ظنج شو يبغيبها الهنوف: شو عرفني انا... خلود: بنعرف خبرها الحينه... ((((لمنا جو المحبه و ضمنا ومن بعدك قربك انا كيف ابتعد))) في الميلس خليفة يالس عالكرسي.. و عذابه واقفه عند الباب خليفة: ادخلي انزين عذابه: لا مايحتاي.. شو اللي بغيته خليفة: انا مضايقنج بشي عذابه: لا ليش خليفة: عيل ليش جيه تعامليني عذابه: كيف يعني اعاملك خليفة: احسبج متغيره عليه وايد عذابه: حتى انت متغير خليفة: انا كانت لي ظروف.. وانتي تدرين عدل شو هي ظروفي عذابه: أي ظروف اللي تخليك تقاطعني.. انا مالي ذنب بللي صار بين الهنوف و عمر خليفة: ادري... بس هالشي هب بايدي.. اشوف اختي مطلقه و السبب ولد عمي والي هو اخوج.. كرهت عمري و حياتي... وماعرفت شو اسوي... اطنش اختيه و افكر في نفسي.. ولا اكابر لجل اختي و افقد حبيبتي عذابه: وشو استفدت يوم كابرت و ابتعدت عني...؟؟؟ خليفة : استفدت شي غير جرح في القلب و عوق في الروح عذابه:........ خليفة: عذابه.. اذا طلبتج من عمي بتوافقين عذابه ( وهي مستغربه):م.. ممم مادري خليفة: مابغي اخطبج وعقب ترفضيني... ابغي رايج من الحينه عذابه:لا خليفة ( وهو منصدم): شو عذابه ( وصوتها واطي): لا خليفة: شو لا..... عذابه: ماقدر ارفضك.. لاني مابغي اخسر حبيبي ( وجان تربع صوب خواتها ) خليفه( وهو يبتسم): احبها... ورب الكعبه احبـــها Quote Link to comment Share on other sites More sharing options...
غـــلا البحرين Posted أكتوبر 31, 2005 Author Report Share Posted أكتوبر 31, 2005 ((((شوف ماكبر يا حبيبي عشقنا فاق كل العشق وحده و انفرد لو يوزع عالبسيطه حبنا مابقى حد بها كره احد))))) في بيت عبدالله القبيسي.... في الصاله.. التلفون يرن اليده: وينكم... حد ينش و يرد عالتلفون... لا بارك الله فيكم.... ريمووووو... ريامي... تعالي ... ردي عالتفون.. حشا نقع من كثر مايصيح ريم: يااااااااااااااربي... ابغي اذاكر.. اليده: ما بيستويبج شي جان شليتي السماعه ريم: انزين ( وجان ترفع السماعه) الو... الو... الووووو اليده: محد يرد عليج ريم: محد رد... زاقريني من فوق عسب التلفون و في الاخير محد يرد عليه اليده: وبلاج محتشره جيه... ريم: ابغي اذاكر اليده: تفضلي روحي حجرتج وجان يرن التلفون مره ثانيه اليده: الريـــــــــــــــــــم ردي ردي... تعالي شوفي التلفون ريم: اوف اوف اوف اليده: بسج من التافيف ريم: الوووو... الوووووو ( و فجاه سكتت) .......: اشحالج ريم ارتبكت حست انه هالصوت هب غريب عليها.... سمعته قبل... ..... ريم؟؟؟ ريم: منو ......: ماعرفتيني ريم ( وهي ماتروم ترمس):هيه اليده: منو عالتلفون ريم:ها.... ربيعتيه....( وجان تشل التلفون و تيلس بعيد عن يدتها) ريم: الو سيف: حاولت في قلبي وانا اقول بنساك.. واعيش دنيا في حياتي جديده.. اثر الغلا ما تعجبه غير دنياك.. و القلب غيرك ما سكن في وريده ريم ارتكبت يوم سمعت كلامه ( هذا هو سيف... متاكده انه سيف... ياربي ماحلى صوته.. ماحلى رمسته... ) سيف: اشحالج ريم: بخير... نعم شو تبغي سيف: حبيت اسلم عليج... و انشدج عن امتحاناتج ريم: انت وشلك سيف: تدرين انج تهميني ريم: وكيف عرفت الرقم سيف: اللي اباه اوصله.. وحطي في بالج اني اباج.. وصدقيني في يوم بوصلج ريم: تنكت حضرتك... لو سمحت لا ترد تتصل سيف: حتى لو ماتصلت لا تظنين اني بنساج.. تراج في خاطري و بتمين في خاطري... ريم صكت التلفون بسرعه... وربعت صوب حجرتها اليده: ويديه انا.... بلاج.. ريم... تعالي... ريموووووووو ريم ماردت على يدتها.. دخلت حجرتها و صكت الباب على عمرها و انسدحت عالشبريه و اتلحفت... وقلبها يدق بسرعه... ((( ليش اتصل.. شو يبغي... ليش مهتم فيه جيه... يمكن يحبني..!!... بلاه قلبي يدق بسرعه.. ليش استانست يوم سمعت صوته.. يمكن لاني... لاني احبه!!؟؟!!)) ظنكم بيصير شي بين خليفة و عذابه... والريم؟؟!!... شو اللي بيتغير في حياتها Quote Link to comment Share on other sites More sharing options...
قمر البنات Posted نوفمبر 1, 2005 Report Share Posted نوفمبر 1, 2005 القصه وايد حلووه ننطرج فى اسرع وقت Quote Link to comment Share on other sites More sharing options...
*Dooset Daaram* Posted نوفمبر 1, 2005 Report Share Posted نوفمبر 1, 2005 كشووووووووووووخي القصةة مشكووورة حبيبتي على القصة الكشووخية عاد لا تتأخرين نبي التكلمة بسرررررررررررررررررررررررررعة Quote Link to comment Share on other sites More sharing options...
بحرانية2005 Posted نوفمبر 1, 2005 Report Share Posted نوفمبر 1, 2005 تطورات وايد في القصه يالله ننتظرك Quote Link to comment Share on other sites More sharing options...
غـــلا البحرين Posted نوفمبر 4, 2005 Author Report Share Posted نوفمبر 4, 2005 (((أنا مالي أحد غيرك ولا لك بالغلا ثاني....دام انك وسط عيني .. دخيلك لا تبكيها...))) سافر محمد دون مايرمس حمده.. هي رفضت انها تسلم عليه اونها تعاقبه.. و هي اصلا بتموت و تسلم عليه لانهم بيغيبون اسبوعين تقريبا.. عمر قرر انه يشل الهنوف من تفكيره.. انقهر من موقفها اخر مره.. اول مره يعترف لها بحبه.. واول مره يقول لها كلمة احبج.. و مع هذا رفضته ولا طاعت ترد له.. فقرر انه ينساها و يتزوج بدور.. اما خليفة سافر ويا عيال عمه القنص.. وكان يتريا ريم تخلص امتحاناتها عسب يخطب عذابه... و كان فعلا مستانس بردة فعل عذابه حس براحه يوم عرف انها مابترده شرات قبل.. باقي على امتحانات ريم يومين.. و حالتها حاله .. تفكيرها دوم منشغل بسيف .. قامت تفكر فيه وايد... دخلت عليها عذابه عذابه: ريماني... قومي نتعشى ريم: هب يوعانه عذابه: المذاكره ما منها فايده اذا ما كلتي شي.. لازم تركزين ريم: والله ماحس بيوع... اذا يعت بنزل باكل عذابه: ريم.. ريم: نعم عذابه: فيج شي ريم: لا عذابه: حد مضايقنج بشي ريم: لا عذابه: زعلانه من حد؟ ريم: لا عذابه: عيل بلاج... ؟؟ ريم: مافيه شي عذابه: لا اكيد فيج شي... خبريني؟ ريم: عذوب... ان خبرتج توعديني ماتخبرين حد عذابه: اوعدج... ريم: قولي والله عذابه: وعدتج تراني ريم: احلفي عذابه: لا حول... والله مابخبر حد ريم: .... عذابه: ليش سكتي ريم: عذوب عذابه: هلا ريم: تذكرين قبل عذابه: لا ماذكر... ريم: صدق ارمسج عذابه: وانا بعد... حددي شو اللي لازم اذكره ريم: تحيدين يوم مره مريتوا عليه المدرسه الظهر... و جان.... (سكتت) عذابه: جان شو...!!؟؟؟ كلمات متقاطعه هيه ريم: تراني احاول اقولج بس انتي ماتساعديني... اذكري عذابه: انزين... مره مرينا عليج في المدرسه... الظهر... كمن مره مارين عليج.. حددي متى ؟ ريم: يوم.... يوم صارخت في ويه هذاك... عذابه: هيه.. يوم تفتنين على الريال ريم: هيه عذابه: وشو اللي ذكرج به ريم: الصراحه عذابه:... ريم: هاك الريال عذابه ( وهي مندمجه):.... ريم: اللي اظاربت معاه عذابه: انزين ريم: ..... عذابه: كملي عاد... بلاه؟؟؟ ريم: اعرفه عذابه: شقايل يعني تعرفينه ريم: يعني اعرفه عذابه: تعرفين شو اسمه؟ ريم: هيه عذابه: وانتي شو عرفج به؟ ريم: عطاني رقمه عذابه:شــــــــــــــــــــــو؟؟!!؟؟ ريم: بس والله ماتصلت به ولا في يوم رمسته .. الاا من كمن يوم عذابه: رمستيه؟؟؟ ريم: هيه عذابه: انتي ما تستحين تتصليبه ريم: انا ماتصلت عذابه: عيل منو .. هو يعني اللي بيتصل؟ ريم: هيه عذابه: شو هيه ريم: هو للي اتصل عذابه: وهو شو عرفه برقم البيت.. اصلا هو يعرفج؟ ريم: مادري والله... عذابه: وشو قالج ريم:...... عذابه: بلاج ساكته... شو قالج؟ ريم: انه يحبني... و اني انا بتم في خاطره.. وهالسوالف عذابه: اونه ريم: والله عذابه: وانتي شو رديتي عليه ريم: صكيت في ويهه عذابه: ورد اتصل ريم: ماعرف.. من هاك اليوم مارد على التلفون عذابه: انزين لو اتصل خبري ابويه.. هو روحه بيتصرف معاه ريم: المشكله عذابه:شو؟ ريم: المشكله انه ابويه يعرفه عذابه: شو يعني يعرفه... ريم: يعرف الريال عدل... عذابه: خبري فيصل ولا عمر ريم: حتى هم يعرفونه عذابه: يعني هو يعرفنا عدل... منو هو ريم: ما بتصدقين عذابه: عادي بصدق.. خبريني الحينه... رفعتي ضغطي ريم: اسمه سيف عذابه: سيف... سيف .. منو سيف .. ماعرف حد ب... لحظه لحظه... سيف.. سيف الكعبي؟ ريم: هيه عذابه: قولي والله ريم: والله عذابه: اللي يا يخطبج ريم: هيه عذابه: والله دنيا... سيف للي بهدلتيه بين البنيات هاك اليوم و خليتيه مايسوى بيزه.. ياي يخطبج ريم: هاللي انا مستغربه منه عذابه: يمكن يحبج ريم: مادري عذابه: وانتي ريم: شو انا؟ عذابه: تحبينه ريم: وليش هالسؤال بعد عذابه: من يومج هاك وانتي متغيره.. واظن حالج انجلب يوم سمعتي صوته ريم: لا انجلب ولا اعتدل عذابه: مارديتي عليه... تحبينه؟ ريم: ماحبه ولا شياته.. يمكن تظهرين... ابغي اذاكر.. عذابه ( وهي تبتسم): ريماني... ماصدق انج تحبين ريم: ماحب انزين........ يلا برع عذابه ( وهي ظاهره تغني): من بين الناس حبيتك من بين الناس و بكل احساس اغليتك. بكل احساس حبك جرى بدمي نسااني كل همي.. خلى حياتي غير.. من بين كل الناس... وجان تفر عليها ريم.. المخده... ظهرت عذابه من عند ريم.. و نزلت الصاله و شافت اليده و حمده.. حمده كانت قاعده و الموبايل في ايدها عذابه: بعدج تحيسين التلفون اليده: ها حالها من سافر الريال... تقولين ترضع التلفون عذابه: هههههههههههههههههه حمده: شو ارضعه ... هذا حمود يطرشلي مسجات اليده: حمود بعد... اخ عليج.. انتي امبونج ماعندج مذهب حمده: طالع والله.. شو قلت الحين.. ريلي و ادلعه حرام هو؟ اليده: شو حمود بعد... قولي محمد حمده: ان شاء الله.. محمد ( بصوت عالي) خاس من كثر مايطرشلي مسجات عذابه: وانتي رديتي عليه حمده: انا ..... تبيني انا حمده بنت عبدالله القبيسي اطرش حق حمود ( وجان تصد صوب يدتها) قصدي محمد مسج وانا زعلانه عليه... اكيد لا اليده: يا اميه الكبر هذا هب زين حمده: هو السبب.. عنبوه يتمصخر عليه و يقول انه بيمد ايده عليه وانا ابويه الي هو ابويه ماجد رفع ايده علينا.. ولا فوق هذا كله يبغي يعرس.. منو هالمنقوده اللي بتاخذه عذابه: ههههههههههههههههههه من غيرج يعني حمده: بس بس انزين.. اليده: تراج ان تميتي جيه بيمل منج و بيهدج... محد يرضى بالذل حمده: انا ما ذليته.. وما عاش من يذله انا بس اعلمه الادب كمن يوم عذابه: 10 ايام و تقولين كمن يوم اليده: اصبري عليه انتي... عقب كمن يوم بيمل و ما بيطرشلج شي حمده: لا لا ماظن... مايروم يصبر عني.. بس صدقج يدوه اليوم ماطرشلي ولا مسج.. ولا حتى اتصلي شرات كل يوم عذابه: رحتي فيها يا حمدووووه حمده: وصل وصل... اليده ( وهو تتلفت حولها و تحاول تعدل برقعها): منو اللي وصل حمده: المسج اليده: لا بارك الله فيج... جانج طيرتي قلبي .. اتحرا حد دخل و البرقع هب عليه عذابه: ياحليلج يا يدوه... انزين حمدوه شو طرشلج حمده: اسمعوا منك العذر لو كنت زعلان آمر وأنا لك قلت لبيك يا كل ناسي و اجمل إنسان كل العمر يا زين يفديك اليده: يا حليلك يا محمد,,, والله انك ماتستاهل هالعقرب وتدخل عليهم ام عمر ام عمر: من هي العقرب اليده: في غيرها ... حمدوه ام عمر: بلاج انتي على يدتج دومج حاشرتنها حمده: ماسويت شي اليده: هاي ماخلت حد في حاله... مغربلتني انا من صوب .. و ولد الرميثي من صوب ام عمر: وانا الي اقول انه الله هداها اليده: ذيل الجلب عمره مابيعتدل حمده ( وهي سايره تقعد حذال يدتها): افا والله... شبهتيني بالجلب.. الله يسامحج يالغاليه.. وانا اللي مسميني عليج.. المفروض تحبيني .. تعامليني جيه... اليده: يا امايه انتي اللي لسانج متبري منج.. ولا تدرين انج غاليه و تسوين الدنيا بكبرها عذابه: اسميج يا حمدوه تعرفين تقردنين بعد حمده ( وهي تغمز لعذابه): هاي الغاليه .. فديتج يا يدوه الله لا يحرمني منج... ام عمر: ودري سوالفج هاي ياللوتيه اليده: انا ادريبها عدل. ادريبها لوتيه. بس شو اسوي.. غناتي ماروم اردها حمده: طاعوا شو طرشلي بعد ام عمر: منو حمده: محمد عذابه: شو؟؟ حمده: اسمعوا تزعل و أنا لك موت ولهان ما كني محبوبك أو أعنيك ترضى أعيش العمر حيران و أنا اللي راحة قلبي في ايديك اليده: اسميه الريال متلعوز و متعوق و السبه انتي حمده: شو اسوي عذابه: ارضي عليه.. حليله ما يستاهل حمده: يعني اطرشله مسج عذابه: تكرمي و اعطفي على العاشق الولهان و طرشيله مسج حمده: اوكي.. بس مسج.. لو اتصل مابرد عليه.. عذابه: ما عليه.. مسج... و عقب شوق... و حنين.. وعقب روحج بتتصلين ام عمر: انتن من وين تيبن هالرمسه حمده: يا امايه هاي الدنيا.. شو اسوي الحين.. اطرشله ولا لا .. شو رايج يدوه.؟؟ اليده: والله مادريبج حمده: مابطرشله.. عذابه: اسميه بيموت قهر حمده: بسم الله عليه.. عدوينه ان شاء الله ام عمر: ويوم انج تخافين عليه ليش ماتحنين و ترمسينه حمده: خله شوي ينقهر... وجان يرن تلفون حمده... حمده ( (وهي تناقز)) : هو ... والله انه هو... امايه .. يدوه... اتصل.. فديته اتصل اليده: ويديه انا.. تتفداه بعد ام عمر: ردي عليه حمده: ارد؟؟ عذابه: توج تخافين عليه.. ردي بعد شو حمده: لا لا .. مابرد اليده: الله يغربل ابليسج... ردي يالله حمده: اوكي.. ( وجان ترد عليه) محمد: الو حمده ( وهي تحاول تعدل صوتها): احم احم... الو محمد: فديت هالصوت و الله.. يعلي مانحرم منه قولي امين حمده ( وهي تبتسم): امين محمد: اشحالج غناتي حمده: بخير محمد: دوم ان شاء الله حمده:..... محمد: سامحيني اذا ضايجتج بشي... والله ماروم على زعلج.. تدرين اني احبج موت وما اقوى على فراقج ولو يوم حمده: ادري محمد: بعدج زعلانه حمده: هيه محمد: لحظه انزين وجان يسير محمد صوب ربعه و عيال عمه... و قف حذال خليفة .. هو كان طالب منه يشل... محمد ( وهو يرمس حمده): اهداء.... حمده اول ماسمعت صوت خليفة حطت تلفونها عالسبيكر... وتموا هلها يسمعون أبيك ... أبيك ... يا عمري أبيك.... أباك .. اباك... يا روحي أباك.... أغار عليك لو من والديك.... و أغار عليك من لمسة يداك... أنا أترجاك..., انا أتوسل اليك... ومن هذا الهدب عندي رضاك... وأنا لك معترف ..مخطي عليك... ولو تطلب رضى عمري فداك... بكت عيني ...من الفرقى عليك... تسهرني ... تبا تسهر وياك... حبيبي... من عذولك ما عليك... مادام القلب يا خلي هواك... احبك موت... احبك موت... احبك موووووووت والله و اهتويك.. سكن في مهجة فؤادي غلاك... أظن ما يخيب الظن فيك... رجاء ...قدر شعوري يا ملاك.... حمده مستانسه من صوب .. وعذابه من صوب... عذابه ابتسمت يوم سمعت صوت خليفه.. وخاصه انه صوته واااااايد حلو وهو يشل... حمده صكت عن محمد بس بعدها كانت جافيه و قاسيه عليه ام عمر: انتي مافيج خير... عنبوج الريال متلوم فيج وانتي ماتعبرينه حمده: شو اسوي يعني.. عذابه: جامليه انزين حمده: يدوه... انتي شو رايج؟؟؟ اليده: يا هيه قلبي من تغليك تعبان و انت المحبه ماتقدر خطرها احبك اكثر من صغير و شفقان لامه اذا غابت وطول سفرها واكثر من اللي ينتجه حقل لفان و اكثر من المخزون باسفل بحرها عليك قلبي يحتدم فيه طوفان من قوته هد الضلوع و عبرها تمرني غيمه و انا دوم عطشان و انتظر متى الغيمه تجود بمطرها ان زان وقتك اعتبر وقتنا زان يا من تزين الارض لا جدب دهرها في عمق اشعاري تفردت عنوان باسمك لقيت الشعر يسقي زهرها انت الجديد اللي قلب كل الاوزان وانت الجديم اللي يجدد جررها عزفت لك شعري على عود فنان قصيده فلت لعينك شعرها عذابه: يا سلااااااااااااااااااااام حمده يلست تكتب كل مقطع و اطرشه لمحمد... ومحمد طار من الفرحه يوم قرا المسجات... و جان يطرشلها (((يا ويل حالي منك يا ويلي الويل... يا سعد من يعشقك وانتي عشقتيه....احبـــــــــج مووووووت )))) ومرن الايام... اخر يوم في امتحانات الثانويه... ريم يوم ظهرت من الامتحان ... طلعت برع تتريا الدريول.. و كالعاده يلست شويه تسولف ويا ربيعاتها و خاصه انه ها اخر يوم تتشاوف وياهن.. حصه: ريم.. ريـــــــــــــــــــــــــــــــم؟؟!! ريم: بلاج تزاعقين؟ حصه: تعالي بسرعه ريم: خير حصه: تعالي يلا ريم ( مشت لين ماوصلت عند باب المدرسه): شو السالفه؟ حصه: شوفي هناك ريم: وين هناك؟ حصه: هاك الصوب ريم: ماشوف غير السيايير حصه: انزين .. ترا هذا هو ريم ( وهي صاده بترد تدخل داخل): ماعندج سالفه حصه( تسحب ريم): يالخبله... شوفي هناك.. السياره اللي ورا.. هذيج المخفيه.. ريم: وينها.. هيه اشوفها .. بلاها؟ حصه ( بمكر): ماعرفتي منو راعيها؟ ريم: لا والله حصه: اتاكدي ريم تمت اطالع السياره لين ما تاكدت انها سيارة سيف الكعبي.. فز قلبها و تمت ترتجف.. ريم: تقصدين سيف؟؟؟ حصه: منو؟ ريم: هاك اللي كان يينا المدرسه حصه: شو يينا بعد.. قصدج اييج انتي ريم: انزين بس بس... شو اسوي يعني... وصل دريولنا... يلا باي ريم ظهرت و مشت صوب سيارتها.. عاد يوم شافها سيف اجدم بسيارته شوي عسب يوصل عندها...و طبعا كالعاده شغل المسجل ((مهما جرى منك و صار انا تراني في انتظار صابر على ما هو جرالي اطريك في ليل و نهار...)) (((حبي لوصلك يا فتون واحد من اسباب الشجون اثر و بين عالعيون و انا وقلبي في شجاك اهواك يا عذب الكلام يا من سلبني بابتسام حرام يا سيدي حرام غيرت عنا في المسار))) سيف تم يتقرب بسيارته لين ماوصل جدام ريم .. و هي طبعا مارامت تمشي لانه وقف جدامها بسيارته.. و جان ينزل الجامه و يعلي على صوت المسجل على هذا المقطع.. عالمقطع (( اهواك يا عذب الكلام...)) رفع سيف ايده و تم ياشر على ريم .. وعالمقطع (((حرام يا سيدي حرام غيرت عنا في المسار))) حط ايده على قلبه و تم يطالعها... و ريم يت عينها في عينه لاول مره... اول مره تشوف عيونه عدل.. (((( ماغواه ياربي ماشاء الله عليه حلو)))) كانت متغشيه.. بس مع هذا حست انه سيف يطالعها عدل .. و جان تبتسم.. ماتدري انه لمح ابتسامتها ولو كانت من تحت الغشوه... ركبت سيارتهم و روحت.. هالمره غير .. حست بفرحه غريبه.. يمكن لانها من زمان ما شافته او لانها تاكدت انه يحبها و شارنها .. او لانها هيه اللي بدت تحبه و تتعلق فيه !!! وصلت ريم البيت.. و دخلت الصاله عند اهلها ريم: السلااااااااااااااام ام عمر: عليكم السلام و الرحمه.. ها بشري شو سويتي في الامتحان اليوم ريم: الحمدلله... سهل.. اليده: الله يوفقج ان شاء الله ريم: ان شااااااااااااااااء الله.. عذابه: اشوفج مستانسه اليوم ام عمر: وليش ما تستانس .. حليلها من شهر حابسه عمرها في الحجره .. خليها تستانس عذابه: اخاف الا في شي ثاني مونسنها ريم ( وهي اطالع عذابه): هيه في شي اليده: خير... ريم: متى بنسافر ام عمر: تو الناس.. اصبري شوي ريم: لا لا مابصبر.. انتو وعدتونا.. لازم نسافر بسرعه.. شو رايكم باجر؟ عذابه: هيه والله... اخاف ابويه يغير رايه ريم: لا مابغير رايه.. فديته اذا قالنا شي بيسويه ام عمر: ابوج الحينه بيرد.. خبريه الي في خاطرج وجان تدخل عليهن حمده و هي ماطه بوزها شبرين حمده: شو هالحاله... هذيله عيالج ما يستحون.. يتحرون كل الشباب شراتهم فاظيين لا شغل و لا مشغله ام عمر: بلاج محتشره؟ حمده: فيصل يقول انهم بيطولون السفره اليده: انزين خليهم على راحتهم و انتي شو حارنج حمده: لا والله... اسبوعين و ماشبعوا ام عمر: شباب و يحبون الوناسه حمده: اسبوووووووووووووووووووعيــــــــــــــــــــــــــ ـــــــــن عذابه: يعني متولهه عليه حمده: لا هب جيه ريم: عيل بلاج محتشره... اخاف الا القلب مشتاق اليده ( وهي ترمس ريم): ويديه انا... و انتي شو عرفج بالشوق بعد ريم: لا .. اسمع في التلفزيون بس حمده: امايه.. اباج ترمسين فيصل و تخلينه يرجع ام عمر: انا مالي خص... تبين رمسيه روحج حمده: شو ها؟؟؟ اوف اليده: بسج من التافيف... هاتي التلفون انا روحي برمسه ريم: الله يعينك يا فيصل راحت حمده عطت التلفون ليدتها اليده: وين قلتيلي مسافرين؟ حمده: اوز باكستان اليده: هيه عرفتها ريم: الله يهديج يدوه .. شو عرفج بها اليده: سكتي انتي... الووو... الوووووو فيصل: يا مرحبا يا ناعم الصوت و العود اليده( وهي مرتبكه): ها... ( وصدت صوب حمده) اخاف الا ضاربه بالغلط... حمده: لا هذا فيصل اليده: الوووو فيصل: فديت هالصوت انا.. عساني مانحرم منه ... اشحالج الغاليه اليده: فصول فيصل: لبيه اليده: غربلاتك.. زيغتني.. فيصل: ههههههههههههههههههه... غايته اليده: غايته بعد... بعدك ماتوب عن هالسوالف.. انت يبالك وحده تصلبك اول ماترد بنخطبلك فيصل: لا تخطبولي و لا شي.. انا هب راعي عرس.. اليده: غصبا عنك بتعرس... حمده: يدوه الله يخليج هب وقت عرس اليده: ها فيصل,,, شو العلوم من صوبكم؟ فيصل: والله وناسه... المره اليايه باخذج ويانا.. مايستوي نستانس رواحنا اليده: وين تبا تويديني بين الرياييل فيصل: افا عليج... بنسافر انا و انتي اليده: يا حافظ عليك فيصل: هيه عيل.. استانس روحي و الغاليه لا... بحوطج البلاد كلها اليده: ههههههههههههههههههه... اسميك لوتي..وشو القنص وياكم حمده: لا حووووووووووووووووووول.. يدوه فديتج.. رمسيه عن اللي قلتلج عنه.. هب وقت سوالف اليده: شو باكستنان وياكم؟ فيصل: هب باكستان... اوز باكستان اليده: انزين .. عنبر اخو بلال حمده: يدوه الله يخليج... مايحتاي تسولفين معاه الحين اليده: انزين... ها فيصل... ومتى الرده ان شاء الله فيصل: والله لين الحينه بعدنا نتشاور... اليده: يابويه لكم وحشه.. البيت بلياكم هب شي.. بسكم طولتوا وايد فيصل: هاي رمستج ولا رمسة حمدوه اليده: رمستنا كلنا فيصل: الصراحه هذا الرميثي اللي ملزم علينا نيلس ولا انا الود ودي ارد اليوم قبل باجر اليده: محمد الرميثي؟؟؟ فيصل: هيه.. حاشرنا مايبغي يرد البلاد ومحمد الرميثي كان حذاله و يسمع رمسته اليده ( وهي ترمس حمده): يقولج ريلج اللي مايبغي يرد حمده: لا والله فيصل: هيه خبريها... عمر محتشر عليه يبغي يرد.. ومحمد اللي هب طايع محمد: ايييييييه انت لا تجذب.. ياللوتي فيصل:ههههههههههههههههههههههههههه وجان يسحب التلفون من عند فيصل محمد: يا مرحبا الساع اليده: بالمهلي محمد: اشحالج امايه اليده: بخير ربي يعافيك... اشحالك انت ربك بخير محمد: بخير بسماع صوتج يالغاليه اليده: الله يخليك محمد: و بيجيج اليده: عنبوكم هب جنكم طولتوا محمد: هيه والله.. بس ولدكم هب طايع يرد.. يبغي ييلس شهر هني اليده: شهر عاد...لا لا .. ماعليك منهم.. متولهين عليكم ردوا عاد بسكم من الهوامه محمد: فالج طيب... باجر بنكون عندكم.. تامرين بشي ثاني اليده: لا فديتك محمد: امايه وصلي السلام اذا ما عليج اماره.. ودخيلج لا تبلغينا بوصولنا باجر اليده: ماطلبت... حمده: ها شو قال؟؟ اليده: ما قال شي حمده: ترمسينه من ساعه و ماقالج شي اليده: راسي يعورني والسبه هالبنيه.. بقوم اصلي الظهر ابركلي حمده: يدوووووه اليده: يسلم عليكم ام عمر: الله يسلمه.. وماقال متى بيرد اليده: لا ما طرى..يالله.. بسير اصلي حمده: شو ها... الحينه كيف اعرف متى بيرد ريم: اذا ماخبرها.. يعني اكيد بيطولون حمده: هذا كله من فيصل... ادريبه لعين ام عمر: بسج من الهذربه.. قومن صلن يالله.. ابوج بيي الحينه وبنتغدا ريم: وينها عيل خلود؟ عذابه: تتغدا عند قوم الهنوف وقامن البنات يصلن عسب يتغدن عقب ويا ابوهن... حمده في دربها سارت صوب حجره يدتها... دقت الباب و دخلت اليده: شو تبين... ماتشوفيني اصلي حمده: فديتج خبريني اليده ( وهي تبتسم): باجر حمده: باجر بيوصل اليده: هيه حمده ( وهي تحب راس يدتها): فديتج والله... احبــــــــــــــــــــــــــــــــــــج ( وظهرت من عند يدتها) الساعه 2 الظهر... الكل متيمع عالغدا ريم: ها ابويه شو قلت؟ ابو عمر: خل اخوانج يردون و يصير خير ريم: فديتك ابويه.. خلنا نسافر بسرعه ابو عمر: ان شاااااء الله... حمدوه بلاج ماتاكلين حمده: ماشي ام عمر: ماعليك منها... بتخبرك... عيال اخوك بيخاونا هالسفره ابو عمر: اوووه نسيت ارمس خليفة.. يوم بيرد بشاوره عذابه: ماظن الهنوف بتسير ... ام عمر: والله انا اقول خلهم يسافرون معانا.. وماظن عمر بيخاوينا ريم: عمر هب ويه سفر.. خلوه قاعد هني ابركله ابو عمر: برمسه... اليده: يعني تحرمون الريال من السفره عذابه: شو نحرمه... اذا يبغي يسافر خله يسافر ويا ربعه.. وبعدين هو دوم يحتشر علينا يوم نسافر ريم: وانتي ليش ماتبينه يسافر معانا... ولا عسب قوم عمج ايون معانا عذابه: ماقلت جيه ام عمر: بسكن عاد.... صدقها عذابه.. عمر مابيسافر معانا... خلنا نسير رواحنا.. وانت تشاور ويا خليفه جان طاع زين ابو عمر: ان شاء الله.. حمده امايه فيج شي حمده: مافيه شي... ابويه شو رايك تتصل بقوم الرميثي و تعزمهم عالعشا باجر؟؟؟ وهذيج الساعه الكل ضحك على حمده... الا ابوها اللي هب عارف شو السالفه؟ Quote Link to comment Share on other sites More sharing options...
*Dooset Daaram* Posted نوفمبر 4, 2005 Report Share Posted نوفمبر 4, 2005 ثااانكس على الجزء وننتظر التكملة Quote Link to comment Share on other sites More sharing options...
بحرانية2005 Posted نوفمبر 5, 2005 Report Share Posted نوفمبر 5, 2005 شكرا على البارت وننتظرك Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.