حلا الكويت Posted سبتمبر 11, 2007 Author Report Share Posted سبتمبر 11, 2007 هذا لاجل عيونكم ..وان شاء الله احاول انزل الجزء الثاني بأقرب وقت الجزء الثامن بيت شذى قاعدين بالصاله ينتظرون قدومهم...شذى كانت بغرفتها تكلم حور مالها خلق تشوف ولد خالتها حور:يا شذى مالج شغل فيه ونزلي هم في بيتكم شذى معصبه:اكرها حور ... من يوم حنا صغار واهو كله يعايرني ما يعجبه لبسي وتفكيري ..دوم يكلم امي عني وحتى يو سافرت بره كان رافض يقول ما يصير بنت تسافر بروحها ..اكرهه كل ذكرياتي معاه تلوع الجبد حور:اكيد اللحين كبر وتغير شذى :لو العالم كلها تتغير ..ما اتوقع أن هذا يتغير..احسه معقد وايد ملتزم كلنا نصلي ونصوم بس مو جذي اهو وايد معقد حور:هههههه لي هالدرجه تكرهينه شذى:واكثر حور:انزين عشان امج غيري لبسج اللحين...ونزلي سلمي عليهم وحاولي تتجاهلين وجوده شذى بتفكير:اممممم تتشوفين جذي حور:هذا احسن شي شذى بتملل:خلاص انا بسكر اللحين بروح اللبس حور:اوكي اكلمج بليل واعرف اخر التطورات يمكن تحبينه شذى تصارخ:حوروووووو حور:اخ بطيتي اذني خلاص اتغشمر يلا باي شذى:باي تمت تفكر شنو تلبس ..اهو دايما يتطنز على لبسها ..كله يقولها قصير ولازم تتستر حتى لو جدامه... ((امم البس تنوره طويله ولا اعانده البس ضيق!!)) نزلت تحت لقت خالتها جالسه ويا امها استغربت لا ابوها ولا ولد خالتها موجود... شذى تسلم على خالتها:شلونج خالتي؟ الخاله:بخير الله يسلمج..تعالي قعدي يمي ولهانه عليج شذى:ولهة عليج العافيه الخاله:ضعفتي يا بنتي خلصتي شذى:ههههه أي خالتي مسويه رجيم ام شذى:ذبحتني وانا اقولها مو زين هالرجيم الي تسوونه ..طالعي صحتها شلون تدهورت الخاله:عاد يا شذى انتي ما شاء الله مو متينه شذى:ايه خالتي بس ابي اضعف زود ام شذى:ما عندج سالفه شذى تغير الموضوع:ماما وين ابوي؟ ام شذى:ولد خالتك راح يوصله الديوانيه وبيرجع شذى والي تنطره يجي عشان تشوف ردة فعله اذا شافها ام شذى كانت وايد فري ومو متحجبه بعكس اختها وايد ملتزمه وريلها دين حيل واهي متحجبه ومتنقبه ..وولدها تربي على هالتربيه قبل لا يصير له الي صار ...فكان دوم ما يعجبه بيت خالته بس كيف بتكون ردة فعله اللحين بتتغير ولا بتم مثل ما اهي؟! رن باب الجرس ام شذى:شذى حبيبتي قومي فتحي الباب لولد خالتج شذى ودها تقول لأ بس خالتها موجوده:أن شاء الله الباب كان معزول عن الصاله ..اول ما فتحت له استغربت الي واقف جدامها معقوله هذا اهو ولد خالتها ....وين راحت اللحيه؟؟؟ وين الدشداشه القصيره؟؟؟ هذا شخص ثاني ..مو ولد خالتي!! شذى من صدمتها تمت ساكته:............ :بتم واقف عند الباب يعني شذى للحين مو مستوعبه أن الي جدامها ولد خالتها...معقوله انسان يتغير 180 درجه...كان لابس لبس شبابي شورت قصير فوق الركب لونه بيج..مع تي شيرت لاكوست اسود..وكاب بيج وحالق مسوي قفل وريحة عطره فايحه المكان تمت تتأمله شذى واهي مو مستوعبه.... قرب منها:ممكن ادخل شذى اخترعت منه ورجعت لي وره وقالت بكل هدوء:تفضل سكر الباب وتم واقف ينطرها تنطق تبدي السلام..شافها للجين مصدومه ومن داخله لام نفسه كيف تغير لي هالدرجه بي بين العكس بكل غرور:الناس يسلمون شذى وعينها بعينه وللحين مو مصدقه:ش شش ..شلونك حمد؟ حمد:بخير انتي شلونج؟ شذى الي مستغربه من اسلوبه:الحمدالله بخير حمد يشوفها من فوق لي تحت:محلوه شذى شذى بطلت عينها عالأخر وخافت من نظراته ورجعت لي وره:عيونك الحلوه...تفضل قاعدين بالصاله مشت عالطول مو مستوعبه الي شافته...كانت تظن انه بيصرخ عليها نفس كل مره خاصه ان لبسها مره ضيج...كانت لابسه تنوره جينز قصيره فوق الركب ضيجه وفيها فتحتين على جنب..مع بلوزه حفر علاق وفاله شعرها وحاطه ميك اب.. سلم على خالته وجلس جنبها وشذى جلست جنب امه فصارت قباله.... حمد طول الوقت يناظرها ..يذكر غرورها عليه وكيف انها دوم تستهزء فيه بشكله وبلبسه... آخر مره شافها قبل لا تسافر للدراسه((اكيد اللحين بيعجبها شكلي اليديد...آآآه يا حمد كيف تشوفها جدامك لابسه جذي وما تتكلم..صارت تعجبك هالاشكال اللحين ...كلا من حلا اهي السبب...طلال بعدها عني ..اكرهم اكرهم)) تقطع عليه خالته تفكيره... ام شذى:ها حمد شلونك اللحين؟ حمد بابتسامه:الحمدالله عايشين ام حمد والي مو عاجبها حال ولدها:اقوله يا ام شذى في الف بنت تستاهلك بس خلاص شال الفكره من راسه ام شذى:أي والله يا ولدي انا مستعده بنفسي ادور لك حمد بعصبيه:لا تعبين نفسج خالتي زواج ماني متزوج شذى طول الوقت ساكته تسمعهم..اهي كل الي تعرفه انه خطب وانفصل حتى ما تعرف مين البنت وليش الانفصال... ام حمد ترفع يدها:حسبي الله عليها من بنت ..ضيعت ولدي حمد ما يبي امه تدعي عليها:مو منها يا يمه ام شذى:وللحين تحبها يا حمد؟ شذى واخيرا تدخلت:انتو ليش انفصلتو؟ حمد وبكل عصبيه:وانتي شكو تسألين؟ شذى عصبت منه وصعدت فوق غرفتها... ام حمد:يا حمد اسويت ؟ حمد مفتشل:ما كنت اقصد بس سؤالها نرفزني ام شذى:اهي ما قالت شي ..كل الي قالته ليش انفصلت؟ حمد متحسف على الي سواه:سامحيني خاالتي مو قصدي ام شذى:وانا ليش تتأسف مني ...تأسف من شذى حمد وقف:عن اذنك خالتي ممكن اروح اتأسف منها ام شذى بفرح:هذا بيتك يا ولدي صعد حمد لشذى غرفتها ...بالاول تردد ((انا شقاعد اسوي ...بروح اعتذر حق هذي!!! انا اعتذر منها... بس محتاج لاحد يسمعني لا اخت ولا اخو اشكيله...يمكن اهي تفهمني...)) طق الباب بعد صراع نفسي ...فتحت شذى تظن الخادمه يايبه العشى شذى واهي حاضنه المخده وتبكي:تعالي فتح حمد الباب وشافها عالسرير منسدحه مثل اليهال قرب منها واهو يحس أن ماله داعي يصرخ عليها حمد:اسف شذى ما كنت اقصد التفتت له أول ما سمعت صوته بالاول انصدمت انه ياي لي عندها ويتأسف!! غير هذا لبسها الي كان مرتفع شوي من سدحتها على السرير وكيف انه ما صرخ عليها !! معقوله حتى مبادئه تغيرت!!!؟ عدلت جلستها وقعدت عالسرير واهي مو مستوعبه الحاله الي حمد فيها ... حمد اخذ كرسي التواليت وحطه جدامها:آسف بس ما كنت ابي اذكر الموضوع وايد يجرحني شذى ساكته..معقوله يكلمني عن مواضيعه الخاصه!!! حمد مل من سكوتها وياي بيطلع:انا كنت متوقع أن السنين الي درستيهم بره غيرتج بس ما في فايده شذى:لا حمد تكفى اقعد حمد ابتسم لها ورد قعد قبالها:سامحتيني شذى تبتسم له:ايه (حمد طبعه طيب ما تغير ما يحب احد يزعل منه كان يصرخ عليها ويهاوشها بس يرد يصالحها) حمد:عيل خل ننزل تحت شذى:لا اقعد ابي اسولف معاك شوي بروحنا حمد:اوكي شذى استغربت:يعني عادي اهني بداري نقعد نسولف حمد فهم عليها:هههههههه أي عادي لا تخافين حمد الاول تغير حمد توقع انها بتستانس انها صار الريال الي كانت دوم تقوله أن اهو الصح..بس لقى ملالمح الحزن بويها عكس الي ظنه... حمد:شذى شفيج؟ شذى بحزن:حمد انت وايد تغيرت ليش؟ حمد يتنهد:آآه حتى انتي هالشي مزعلج وانا الي كنت اعتقد انج بتفرحين شذى واهي تناظره كيف متألم:انا صج يا حمد ما كانت تعجبني تصرفاتك ولا الكلام الي تقوله لي..بس عمري ما تمنيت توصل لي هالمستوى حمد دمعت عينه واهو مو راضي عن نفسه:تدرين يا شذى أن صلاة ما قمت اصلي.؟ شذى مو مصدقه:معقووووله!!!! حمد ودموعه بدت تنزل كأنه ياهل:الخمر صار عندي عادي..التدخين 24 ساعه..اهلي ما قمت اشوفهم كل شي تغير شذى تحس انها بحلم مو معقوله :ليش يا حمد ليش؟ حمد بقهر:كل منها تخلت عني وانا محتاج لها..حبيتها من كل قلبي بس اهي تخلت عني من غير أي سبب شذى تحاول تفهم:منو اهي خطيبتك؟ حمد يرجع راسه لي وره وبحسره يتكلم:كانت خطيبتي كانت شذى دمعت عينها على حاله:ما عليه يا حمد تحب غيرها أن شاء الله حمد يغمض عينه:ما اقدر انساها شذى ..انتي كنتي تعرفيني ما كنت اعرف بنات ولا حتى مجرد اني اشوف ..اهي طلعت بحياتي وحبيتها وخطبتها وحسيت انها اهي الي بتسعدني ..بس الحقير ولد عمها اخذها مني بكل برود اخذها واهي تخلت عني شذى ((معقوله انا وحمد صار لنا نفس الشي!!... انا تخلى عني عشان بنت عمه واهي تخلت عنه عشان ولد عمها ...سبحان الله نفس العذاب)) شذى:بس الي تسويه بنفسك ماراح يرد لك اياها حمد :ادري ادري حاولت والله حاولت ما لقيت الا هالطريقه عشان انساها شذى بفضول:امممممم اهي من اهلنا..اعرفها؟ حمد:لا اهي بنت صديق ابوي ..بيت الغامدي شذى توقف منصدمه:قلت لي بيت الغامدي!!! حمد مستغرب:أي حلا الغامدي شذى :ما يصير؟ حمد:شنو الي ما يصير!!! شذى تحاول تلم افكارها اكثر:اهي خذت ولد عمها صح؟ حمد:ايه شذى بخوف: شش شسمه؟؟ حمد يحاول يذكر:طلال الغامدي شذى تضحك بهستيريا من الصدمه:هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه حمد مستغرب من حالها اللحين احو زعلان واهي تضحك... حمد بعصبيه:ما في شي يضحك شذى شذى:هههههه إلا في هههههههه حمد تنرفز:وبعدين يعني؟ شذى وبدى ضحكها تدريجي يتحول للبجي:تدري أن انا بعد حبيت وتخلى عني؟ حمد لاول مره يعرف بهالشي:ليش؟ شذى دموعها تنزل:عشان بنت عمه حمد منصدم:مثلي يعني!!!! شذى ردت للهستيريا:ههههههههه إلا اهم نفسهم حمد مو مستوعب:قصدك أن طلال الي تحبينه اهو نفسه الي اخذ حلا الي احبها شذى ردت للبجي:أي حمد عوره قلبه على حالهم:اثنينا يا شذى يصير فينا نفس الموضوع ومن نفس الاشخاص شذى تبجي:وعدني بالزواج..بس اهي خذته مني حمد:حلا ما خذته ..حلا كانت مخطوبه لي اهو الي اخذها مني وخلاها تنفصل عني شذى:المهم انهم تخلو عنا حمد يجلس يمها:تصدقين اني للحين مو مصدق الي صار شذى:ولا انا ينطق باب غرفتها ..الخادمه تناديهم للعشى حمد يبتسم لها ويمد يده:اخوان و فريند شذى تصافحه تكرر كلامه وتبتسم:اخوان وفريند ******************** بيت فيصل فيصل بعد الي سمعه من امامه ...نفسيته وايد تعبانه...قليل ما يقعد مع اهله كله بغرفته يفكر شبيسوي اذا ما صارت امامه له.. ((مستحيل انساها..كيف تقول لي خلاص انتهينا؟؟؟..اكيد اهي تحبني اكيد تبادلني نفس الشعور..اكيد كانت معصبه من شي !!! بس ليش متضايقه مني!! ما اذكر ضايقتها بشي)) دخلت عليه انفال واهو بعالم ثاني...منسدح عالسرير ومغمض عينه ومشغل اغنية لعبدالله الرويشد (انتهينا) انفال تحط يدها على جتفه:فيصل شفيك؟ فيصل توه ينتبه لها:انتي متى دخلتي؟ انفال تقعد يمه:من زمان بس كنت بعالم ثاني عالم اموم اكيد فيصل يبتسم لها:جان زين اهي تفكر فيني مثل ما افكر فيها انفال بحزن على حال اخوها:فيصل حبيبي انت مو تقول انك كنت تحس انها تبادلك بنفس الشعور ...عيل ليش قالت لك لأ فيصل :مادري يا نفول حاولت افهم منها بس ما عطتني فرصه...بس حسيت أن الكلام مو من قلبها ودليل انها كانت تقوله واهي متوتره انفال:تبيني اكلمها لك؟ فيصل:هذا الي كنت بطلبه منج ..ابيج تكلمينها وتعرفين منها ليش رافضتني؟ اخاف في احد بحياتها انفال:خلاص فيصل انا انشاء الله اروح لها واكلمها انت لا ضايق نفسك فيصل:الله يعين انفال تفكر:انزين شلون اشوفها؟ فيصل:اممم انا عندي رقم اخوها بس اهو مسافر اللحين انفال:طبعا ما تعرف رقمها فيصل :انا اعرف خالها بعد شوي بروح له الديوانيه اسلم عليه بيسافر الليله يكمل دراسته انفال:انزين اطلب منه رقم بيتهم فيصل:لا نفول فشله..خلاص انا اعرف شلون اييب لج رقم موبايلها انفال بشك:شلون؟ فيصل: دام اعرف اسمها الكامل اييبه لج نطري بس ادق على واحد من ربعي يشتغل بالاتصالات يدق عليه فيصل وياخذ منه الرقم ويسجله بموبايله ويعطيه انفال.... انفال تسجله:خلاص اللحين اطلب منها اني اشوفها واكلمها فيصل:تسلمين انفال:فصول امسح رقمها فيصل:ههههه ما تثقين فيني انفال:اكيد واثقه فيك..بس اخاف يقص عليك الشيطان وتدق عليها فيصل:لو كنت ابي اكلمها جان خذيت رقمها من زمان ومن دون لا اقولج بس ما ارضاها لها انفال تبتسم له:لي هالدرجه تحبها فيصل:إلا اموت فيها فجر كانت قاعده بغرفتها تكلم بدريه....علاقتها وياها تطورت عن المسنجر ...بدت تكلمها بالموبايل وايد تأثرت بشخصيتها ...وهالشي كان واضح بالمدرسه جدام البنات والمدرسات واذا طلعت معاهم...بس بالبيت تلعب شخصيتها الثانيه البنت الهاديه المؤدبه... بدريه:اقول فجورتي فجر:بدور لا تقولين فجورتي استحي بدريه ومستانسه أن خطتها يوم عن يوم تنجح بتدمير فجر بدريه:شتبين اقولج يا حلوه مو هذا اسمج؟ فجر بحيا وكأنها صج تكلم ولد:ايه بدريه:هههههه اوكي يا قلبي لا تنسين عزيمة باجر لان فتكينا من المدرسه فجر: بيكون في بنات بالحفله بدريه:ههههههههههه اكيد حفلة بنات فجر:خلاص انا بقول لاهلي بدريه:اوكي يا حلوه اخليج اللحين...باي يا عمري فجر :باي حياتي ******************** قعدت امامه من نومة الظهر واهي تحس بالوحده...حلا وطلال مسافرين وباقي اسبوع ويرجعون...ومشعل بعد كم ساعه و يسافر...وغنيمه الي سافرت ويا احمد امس ..ما في شي تفكر فيه غير فيصل ...صورته ماراحت عن بالها.... دخلت الحمام غسلت و غيرت ملابسها...نزلت تحت لقت امها وابوها جالسين يشربون جاي ...باست راسهم وسلمت وقعدت نوال: كيفك اللحين عسى خف الصداع؟ امامه:أي يمه احسن شوي جاسم:شالصداع الي صارله اسبوعين ما خف نوال بحنان:طلع عليها اثر السهر والدراسه يا قلبي امامه تغير الموضوع:يمه مشعل ماراح ايي نوال:اكيد بيجي نسلم عليه قبل لا يسافر...اتصلي عليه شوفيه فينه امامه :أن شاء الله يرد مشعل عالموبايل وكان قاعد بالديوانيه مع ربعه..شاف الرقم ظن انها نوال مشعل:هلا بالغاليه امامه تقلد صوت امها:هلا بالغالي فينك يا مشعل؟ مشعل والي عدت السالفه عليه لان امامه ضابطه الصوت واللهجه:بالديوانيه عند الربع امامه:وماراح تجي تسلم على اختك؟ مشعل:افا يالغاليه اكيد بجي وبنتعشى سوى بالمطار فيصل الي كان توه داش والقى السلام وقرب من مشعل يسلم عليه مشعل:لحظه نوال مشعل يسلم:هلا بفيصل فيصل:هلا فيك ..شلونك؟ مشعل:تمام زين انك ييت يا ريال توقعناك نسيتنا فيصل:هههه افا انا انساكم مشعل:قلنا يمكن طلال سافر وفيصل خلاص سافر معه فيصل:هههههه انت الخير والبركه يا مشعل مشعل:تسلم والله على الجيه فيصل:ولو لازم ايي اسلم عليك قبل لا تسافر مشعل :تسلم والله... حياك تفضل اجلس جنبي فيصل يجلس:دام فضلك امامه الي كانت مو مستوعبه الي تسمعه...((معقوله هذا فيصل حبيبي ما غيره..ايه هذا هو صوته ...ياللله يا ربي احمدك شكثر كنت ولهانه على صوته وضحكته الله لا يحرمني منك )) مشعل يرد على التليفون:الو نوال امامه الي نست الدقه الي مسويتها:ها مشعل عرفها:امووم!!! فيصل تلقائيا التفت لمشعل يوم سمع اسمها ((ياللللله شكثر احب هالاسم...جان زين انا الي بدل مشعل واقدر اكلمج....)) امامه الي ودها لو تكون معاهم عشان بس تشوف فيصل:شتبي مشعلوه مشعل مستغرب:وين نوال.؟ امامه استوعبت:هههههههه هذي انا الي كنت اكلمك مشعل يضحك بصوت عالي:هههههههههههههه يحماره وانا الي صدقتج ضابطه الدور بعد امامه:ههههههه ما تستحي على ويهك تسبني جدام ربعك مشعل :ههههه محد جنبي غير فيصل رفيجي يمون امامه بقلبها الله يسلمه يا رب: ولو فشلتني جدامه مشعل :ههههه انزين شتبين داقه؟ امامه منقهره:لا والله هذا اسلوب تكلم فيه عمتك...روح لرفيجك احسن مشعل يقهرها:أي والله استحي على ويهج وخليني اقعد معه امامه بعصبيه:اذلف انت وياه ..باي مشعل يسكره واهو يضحك عليها :باي امامه انقهرت منه ...خاصة أن يكلمها جذي وفيصل جنبه ...اكيد اللحين اهو مستانس... مشعل سده وتم يضحك على خبال بنت اخته...والتفت على فيصل... فيصل يبتسم له:الله يدوم هالضحكه مشعل:الله يسلمك...هذي بنت اختي الي دعمتك والله انها نكته فيصل بقلبه الله يخليها لي وتحن علي شوي:ههه حرام عليك مشعل:والله أن البيت من دونها ما يسوى..اكثر وحده بفقدها اهي فيصل:الله يخليها لكم أن شاء الله (وبقلبه ولي بعد) مشعل:تسلم فيصل:شوف عاد لا تردني طلال موصيني عليك وانا بنفسي بوديك المطار مشعل:لا يا خوي لا تعب حالك ...الاهل بيوصلوني وبنتعشى يميع هناك فيصل:افا يا مشعل وانا مو من الاهل مشعل:لا يا خوي ما ابي اكلف عليك فيصل:لا كلافه و لا شي..لا تردني مشعل يبتسم له:تسلم ما قصرت فيصل خطرت باله فكره:شرايك اخذ اهلي معي يتعرفون على اهلك ونتعشى يميع ومره وحده نودعك مشعل عجبته الفكره:صدق طلول يوم قال عنك بو الافكار فيصل:ههههههههه ******************** بعد ما قررو مشعل وفيصل انهم يطلعون على العشى يميع بعد صلاة العشى لان طيارة مشعل 10 بليل... رجع فيصل البيت وخبر امه واهي ما رفضت خاصة يوم عرفت انهم اهل الي يحبها ولدها ..فقررت تتعرف عليهم وتشوف امامه...اما انفال فستانست على الفكره عشان تتعرف على امامه وباجر تكلمها بالموضوع...فجر الي تعذرت انها مالها خلق تطلع عشان يفضى لها البيت وتكلم بدريه على راحتها.... اما فيصل ما اوصف لكم شعوره يحس انه طاير من الفرحه أن بيشوفها اليوم واااااااايد فاقدها وتمنى من كل قلبه انها تكون حنت عليه شوي وغيرت رايها... مشعل دخل سلم على نوال وجاسم واموم وتمو يسولفون.... مشعل يقرص امامه:تقلدين صوت امج ها؟ امامه :هههههه انت غبي ما عرفت تميز نوال تطقها:عيب يا بنت تقولين عن خالك غبي ..امتى بتكبرين؟ مشعل:ههه نوال عادي شفيج امامه:شفتي اهو يقول عادي معترف انه غبي مشعل يسوي نفسه عصب:يلا عاد لا تطولين لسانج علي لا اقصه لج امامه:وااااااااي يمه خوفتني جاسم:والله انكم جهال متى بتكبرون؟ مشعل تضايق من كلامه بس طوفها:وشنبي بالكبر يا بو طلال جاسم يوقف:الكبر للرجاجيل يا مشعل نوال متنرفزه منه:ومشعل رجال وما عليه كلام جاسم:وشدخل مشعل بالموضوع انا اقول عامة نوال:وانت وين رايح منت جاي معنا المطار؟ جاسم يقرب لمشعل:لا عندي شغل ..تروح وترد بسلامه يا مشعل مشعل يسلم عليه:الله يسلمك جاسم:دير بالك على نفسك...واذا نقصك شي لا تستحي اطلب مشعل:تسلم يا بو طلال بعد ماراح جاسم... امامه:متى بنمشي المطار؟ مشعل:هههههه لي هالدرجه مستعيله على فراقي امامه :افا مشعلوه مو قصدي جذي..بس لاني ولهت على الطلعه من زمان ما طلعت مشعل يبتسم لها:واليوم بعد بيون ناس يتعشون معنا تعرفي عليهم نوال:مين هذول؟ مشعل:الله يعافيج رفيجي اصر إلا يوصلني المطار عاد انا قلت له بروح اتعشى ويا الاهل ..فقال ليه ما اجيب اهلي ونتعشى سوى ويتعرفون على بعض نوال عجبتها الفكره:أي خوش فكره مين بيته؟ مشعل :ما تعرفينهم نوال...اهم اهل الصبي الي دعمته اموم امامه حست بهاللحظه انا بتموت((فيصل!!! اهل فيصل بيجون معنا!!! يعني بشوف فيصل!!! لا ما اقدر ما اقدر اشوفه بعد الي قلته له..اكيد بضعف جدامه ما ابي اشوفه مستحيل اروح)) نوال:خلاص اجل يا امامه تعرفي على خواته دام هم من عمرك مشعل:أي اذكر انه قال لي عنده اخت اكبر منه واخت صغيره حيل ..وعايش مع امه ما عنده خوان وابوه اسير نوال عورها قلبها:الله يعينهم اجل اخته الصغيره ما شافت ابوها؟ مشعل :لا ما لحقت عليه انولدت بعد الغزو نوال:الله يكون بحالهم..ومتى بتروحون مشعل يشوف ساعته:بعد ساعه كذا..اصلي العشى واجيكم نوال:على خير أن شاء الله مشعل استغرب سكوت اموم:اموم ساكته عجيبه؟! امامه توقف:انا ما اقدر اروح معكم مشعل :ليش؟ امامه تدور عذر:امممم فشله اخوهم بيكون موجود وانا استحي مشعل:هههههههههههههههههههه انتي تستحين خبري حلووي الي تستحي مو انتي امامه تضربه بالكوشيه:بايخ نوال بجد:اسمعي عاد اموم لا تفشليني مع اهل الولد أول مره نشوفهم قصب عليك بتجين ..اجل هو ليه جايب اهله عشان نتعرف عليهم امامه شوي وتبجي:يمه تكفين ما ابي اروح مشعل شك بالموضوع:ليه اموم مفتشله يعني من بعد ما دعمتيه؟ امامه ما لقت إلا هالسبب:أي ما اقدر اشوفه فشله مشعل:ههههه لا لا تحاتين فيصل مو نوعه كذا...نسى الموضوع اصلا ودليل صار واحد من ربعنا امامه ما لقت أي مفر:يعني لازم اجي نوال:أي لازم شبتقول امه عيب عليك امامه قعدت :خلاص بجي بعد ما صلى مشعل العشى ...اتصل على نوال يطلعون له بره... امامه كانت ترجف من الخوف بس تحاول ما تبين هالشي جدام امها ومشعل...اهي من داخل مستانسه بتشوفه بس مو عارفه كيف تقدر تقابله بعد الي قالته ((ليش قلت له انتهينا؟؟؟ شلون نهيت حبي له وانا ادري انه ما راح ينتهي؟؟ يا ربي شسوي اخاف اكون ظالمته ؟؟ )) اقطعت عليها افكارها نوال نوال من تحت بالصاله تنادي عليها:اموووم ..امامه امامه تنزل وجنطتها بيدها:خلصت يمه نوال تشوفها وتبتسم:ما شاء الله ايش كل هذا؟ امامه :ههههه بعد أول مره نشوفهم يمه لازم اتعدل نوال تبتسم لها:متى ابلغ فيك واشوفك عروسه امامه رجف جسمها ومر فيصل في بالها وما نطقت بكلمه... نوال:صدق يوم قال مشعل الحيا لحلا مو لك...لو اهي الي قايله لها هالكلام جان اللحين وجهها شاب ضو امامه:ههههههه والله اهي غير وانا غير نوال:امشي لا يذبحنا خالك اللحين وقفت امامه جدام منظره قريبه للباب الخارجي وعدلت نفسها وبعدها طلعت لمشعل..... كانت لابسه نفنوف قصير مخصر على جسمها...طوله تحت الركب بشوي...والجم كان ثلاثة ارباع...كان لونه اسود وفي تطريز الوان صوب الصدر والجم والحاشيه...ومستشوره شعرها الي طال عن عرس حلا ...وحاطه باند اسود ويجي الشعر كله من فوقه...مع جوتي كعب اسود مطولها شوي ومخلي شكلها احلى...مكياجها كان خفيف بس معطيها جمال زياده عن جمالها..راسمه عينها بكحل اسود..وحاطه حمره فاتحه خفيفه وبودره ورديه خفيفه... كيف بتكون مقابلة فيصل بأمامه؟؟!! شنو ردت فعل امامه اذا شافت انفال ؟؟!! مشعل وذكرياته مع حور في بريطانيا بتزيد عليه مواجيعه ؟! فجر بتروح لحفلة بدريه ؟؟!! وشراح يصير هناك؟؟!! Link to comment Share on other sites More sharing options...
الريــم Posted سبتمبر 11, 2007 Report Share Posted سبتمبر 11, 2007 تسلمين حبوبه ننتظر الباقي لا تطولين Link to comment Share on other sites More sharing options...
دلوعة مغرورة Posted سبتمبر 11, 2007 Report Share Posted سبتمبر 11, 2007 ثانكس ع البارت وفي الانتظار لا تظولين Link to comment Share on other sites More sharing options...
marioma Posted سبتمبر 11, 2007 Report Share Posted سبتمبر 11, 2007 يسلموؤوؤ ياالغلا .. في انتظار البارت .. Link to comment Share on other sites More sharing options...
ريم المها Posted سبتمبر 11, 2007 Report Share Posted سبتمبر 11, 2007 يسلمو ننتظر البارت Link to comment Share on other sites More sharing options...
حلا الكويت Posted سبتمبر 11, 2007 Author Report Share Posted سبتمبر 11, 2007 الجزء التاسع وصلو المطار وراحو صوب المطاعم اخذو لهم طاوله ...واتصل على فيصل واهو قاله جايين بطريج.... امامه بخوف:اقول مشعل مشعل:قولي امامه:اممممم انتو بتجلسون معانا؟ مشعل استغرب من سؤالها بس ظن انها مستحيه منه:ايه دام نوال وامه معنا عادي يعني بنكون بطرف الطاوله نوال:وشفيك يا بنتي؟ امامه تبتسم:ابد ما فيني شي بس اسأل يتصل فيصل على مشعل لانهم وصلو...كانت تشوفه من بعيد وعينها بس عليه تحس محد بالمطار غيرها اهي معه ...كل ما قرب دقات قلبها تزيد ونفسها يقل.. تحس اذا وصل بتختنق خلاص.. فيصل كان يدور الطاوله الي وصف له اياه مشعل...وعينه تدور على امامه ..يوم شافها قلبه فز لها ((آآآآآآآآه يا قلبي واخيرا شفتج..يا ربي شالجمال...ولهت عليج )) ابتسم لها واهو يناظرها ..واهي يوم شافته يبتسم نزلت عينها للارض حست أن الدنيا كلها شافتهم... فيصل:السلام عليكم الكل وامامه بصوت واطي:وعليكم السلام فيصل يعرف:هذي امي نهى..وهذي انفال اختي الكبيره نوال:ونعم والله هلا بأم فيصل ام فيصل تسلم:هلا فيج حبيبتي مشعل يعرف:هذي اختي وامي نوال وهذي بنت اختي (ويقولها بغشمر) الي دعمتك يا فيصل امامه تلقائيا التقت عيونهم ابعض بس هالمره ما قدرت تنزل عينها تحس انها ولهانه لشوفته ..قطعت عليها ام فيصل واهي تقرب منها وتبتسم بكل حب وحنيه.. نهى:هلا ببنيتي امامه بحيا تسلم:هلا فيج خالتي وتم الكل يسلم على الثاني....يوم سلمت انفال على امامه تذكرت هالبنت بس ما تدري وين شايفتها !!..بعدها قعدت نهى جنب نوال وجنب نوال مشعل وبعده فيصل وبعده انفال وبعدها امامه بحيت تكون جلستهم بشكل دائري.. من حسن حظ فيصل انه موقعه يقدر يشوف فيه امامه ...تم يناظرها بكل شوق يحس انه هالبنت ساكنه بوجدانه كيف تبغيه ينساها... امامه تحس أن عيونه ما شالها عنها وهالشي مسبب لها ارتباك..عينها بالارض مهي قادره تشاركهم بالسوالف... انفال تساسر فيصل بصوت واطي:خف عالبنت تراها منحرجه ابتسم فيصل لها والتفت لمشعل يسولف معه انفال:شلونج امامه؟ امامه رفعت عينها لها وكانت قريبه منها وايد ((لاااااااااااااا مو معقوله اهي ..اهي نفسها الي بالمكتبه!!! طلعت اخته !! كييييييييييييييييف ليييييييه ما سمعت كلام غنوم...لييييييييه ظنيت فيه ظن السوء.......)) انفال استغربت من سكوتها وملامحها المنصدمه:امامه فيج شي؟؟ عيونها بدت تغورق من الدموع التفتت لفيصل لقته يسولف ويا مشعل ((ظلمته ..ونهيت كل شي بينا واهو ما سوى شي...يا ربي كيف اتسامح منه اللحين)) قامت من مكانها فجأه بدون لا تقول لأحد ...والكل استغرب من ردة فعلها واكثرهم انفال لانها كانت تكلمها.... نوال:ايش فيها؟ انفال مستغربه:والله مادري خالتي مشعل:انا اروح لها نوال توقعت ممكن راحت الحمام:وين تروح..اجلس ما فيها شي اللحين تجي ردو نوال ونهى يسولفون وكل وحده تشكي الحال للثانيه.....وانفال راحت تطلب لها عشى ..اما مشعل وفيصل راحو يسوون اجراءات السفر عشان يتم مشعل معهم واهو مرتاح لين يجي موعد طيارته...فيصل طول الوقت يحاتي امامه يحس فيها شي وده لو يروح لها ..استأذن من مشعل أنه بيروح الحمام... تم يدورها بكل مكان...لقاها واقفه عند محل اكسسوارات وسرحانه..قرب منها واهو يدعي ربه انها ما ترده... فيصل من وراها وبصوت هادي:امامه امامه غمضت عينها تظن انها تتخيل صوته ...رد كرر يناديها يوم شافها ما ردت وقف جدامها لقاها مغمضه عينها وشاده عليهم.... فيصل بحنيه:امامه شفيج؟ امامه فتحت عينها وردت غمضتهم :انت فيصل؟ فيصل خايف عليها:امامه شفيج..انا فيصل امامه تذكرت الي سوته فيه تمت تبجي:ما فيني شي ...ما فيني شي فيصل انصدم يوم شافها تبجي:حبيبتي لا تبجين..اذا وجودي مضايقج اللحين امشي امامه يوم سمعت حبيبتي بجيها يزيد وفيصل مو عارف شيسوي الرايح والي راد يشوفها..اخذ منها الي بيدها ورجع لمكانه...ومسك يدها بحنيه واخذها لزاويه بعيده عن الناس... فيصل يترك يدها :ممكن اعرف شفيج؟ امامه مو مستوعبه الي سواه :كيف تمسكني جدام الكل..لو مشعل شايفك فيصل بشوي عصبيه:انتي هذا الي هامج...ما شفتي حالتج شلون تبجين والكل قاعد يشوفج...ما تحسين فيني بعد الي قلتيه لي بالجامعه..بس تفكرين بهالاشياء امامه تناظره واهي منصدمه من كلامه ودموعها تنزل:.... فيصل بعتاب:ممكن اعرف انا اسويت...كل الي سويته اني حبيتج وعمري ما فكرت اني اضايقج...ويوم اني فكرت اتقدم لج تردين علي انه انتهينا!!! مين عطاج الحق انج تنهين الي بينا امامه تبجي واهي ساكته من دون أي نفس:... فيصل عوره قلبه:ممكن ما تبجين امامه بجيها يزيد وتمت تشاهق:............ فيصل يمسح دموعها بكلنكس:قطعتي قلبي حبيبتي لا تبجين امامه سحبت منه الكلينكس وابتعدت:لو سمحت وخر عني ولا تقول حبيبتي مره ثانيه فيصل :انتي تحبيني لا تنكرين هالشي ما قدرت تستحمل زود...تحس انها ما تستاهله كيف ظنت فيه جذي...تركته وراحت للحمام تمت تبجي من كل قلبها..فيصل مسح دمعه نزلت من عينه واخذ نفس عميق ورجع لهم... ام فيصل:وينك يمه؟ فيصل:ماكو شفت واحد من ربعي وتميت اسولف معه مشعل:نوال امامه ما رجعت للحين؟ نوال خايفه عليها:جوالها هنا ..الله يستر نهى تطمنها:لا تحاتين يوخيتي ما فيها إلا الخير تقطع كلامهم امامه..وشكلها يعكس الي كانت فيه قبل كم دقيقه.... نوال بخوف:يمه اموم فين رحتي؟ امامه تبتسم لهم:سامحوني قمت فجأه بس تذكرت شي وسويته ورديت نهى:خرعتينا عليج يا بنيتي امامه تجلس:سامحوني والله بس الشغله كانت ضروريه مشعل :شتبين اطلب لج؟ كلنا طلبنا امامه:مو مشتهيه مشعل انفال تأشر على صحنها :ذوقي هذا امامه وايد لذيذ امامه :مشكوره حبيبتي بس شبعانه انفال تمد لها بيدها:يلا عاد لا ترديني..منقوله امامه تاخذ منها:مقبوله ... نهى تكلم امامه:تخرجتي يمه؟. امامه:لا خالتي باقي لي صيفي أن شاء الله نهى:مع فيصل ولدي أن شاء الله مشعل:أي تعال فصول انت معاها بالجامعه فيصل منحرج:ايه نوال:أي تخصص يا ولدي فيصل:مدني خالتي مشعل:بنفس التخصص بعد..هلا هلا يا فيصل في بنت اختي امامه رفعت عينها لفيصل شافته يبتسم لها :لا توصي حريص يا مشعل انفال:الحمدالله انا افتكيت من الدراسه..الله يعينكم نوال:وانتي يا بنتي ايش كنتي تدرسين؟ انفال:تجاره واعمال واللحين اخذت الدكتوراه مشعل: هههه فيصل واموم نفس التخصص..وانا معك نفس التخصص انفال مستحيه:ههه انت بتاخذ دكتوراه بهالمجال مشعل:أي انا معي الماجستي وبكمل الدكتوراه انفال:الله يوفقك نهى :امامه وحيدتج يا نوال؟ نوال تبتسم لها:لا عندي طلال الكبير بس مسافر شهر عسل نهى:ما شاء الله الله يسعده نوال:تسلمين حبيبتي نداء الطائره....يعلن عن الرحيل اصعب اللحظات على الاهل والاحباب لما يودعون احبابهم ..وخاصة اذا كانو بيطولون بالغربه مشعل بحزن وعينه على نوال:هذي رحلتي نوال دمعت عينها:خلاص يا مشعل بتسافر مره ثانيه نهى تهديها:افا عليج يا وخيتي شالكلام...ان شاء الله بيرد لج والشهاده معه وماراح يقصر كل يوم بيكلمج نوال تحضنه وتبجي:كل يوم كلمني طمني عليك..مو تتركني احاتيك أول ما توصل تكلمني ..واكل عدل ..واذا جيت بتنام تلحف عدل ..ولا تاكل دسم بليل مشعل يضحك:هههههههههه الله يهديج نوال جني ياهل أول مره اسافر فيصل:هههههه تحاتيك يا مشعل امامه دموعها تنزل وتمسحهم مشعل قريب منها حيل كيف بتقدر على بعاده....الكل تم يسلم عليه باقي امامه جالسه بمكانها تبجي من غير أي صوت.. مشعل بحزن:ماراح تسلمين علي اموم امامه توقف وتحضنه وتم تبجي:لا تروح مشعل اقعد معاي محتاجتلك مشعل :افا اموم ليش تبجين... امامه:لا انت ولا طلال ولا حلا ولا غنوم ..شسوي من دونكم ..مشعل تكفى اقعد لا تروح مشعل يبعدها ويخليها جدامه وبصوت واطي: ابيج اقوى من جذي عشان امج وبعدين تعرفتي على انفال وان شاء الله كل يوم بكلمج امامه تمسح دموعها:كل يوم مشعل تكفى مشعل:أن شاء الله ..مع السلامه راح فيصل يوصله ليه داخل ..ويوم خلاص قربو للبوابه... مشعل:فيصل فيصل:هلا مشعل:ما اوصيك على اهلي هم نفس اهلك... فيصل يبتسم له:لا توصي حريص مشعل يبتسم له:والي مزعلها راضها ..ودير بالك عليها فيصل انصدم من كلامه ((ليكون شافني وانا اكلمها ..لا يظن فيني غلط)): مشعل انا ..انا مشعل يبتسم له:اهم شي يا فيصل انك ما تكون تلعب عليها...لاني شفتك وانت تكلمها ونظراتكم لبعض واضحه ما تطوف علي فيصل مستحي منه:والله يا مشعل الشي مو بيدي ..بس انا نيتي صافيه وبتقدم لها أن شاء الله مشعل :وماراح نلاقي احسن منك ..بس ترا البنت متضايقه يا ويلك أن كنت مزعلها فيصل بخوف:انا ما سويت لها شي يضايقها وربي مشعل :ههههههه اتغشمر معك ليه خفت ...اشوف على خير أن شاء الله وطمني عليك فيصل يحضنه :ترجع بسلامه ودير بالك على نفسك مشعل يودعه:مع السلامه رجع لهم فيصل واهو مرتاح أن مشعل عرف وايده بدل لاا يخانقه..ناظرها واهو يبتسم وغمز لها وامامه استغربت من حركته ونزلت راسها بسرعه.. فيصل:يالله يمه خالتي نمشي نوال توها تستوعب:اموم حنا جينا بسيارة مشعل كيف بنرجع اللحين نهى:افا يا نوال شالكلام ..احنا نوصلكم نوال:تسلمين يا ام فيصل اللحين اتصل على زوجي يجينا ..ما نبي نكلف عليكم بهالليل فيصل:ما في كلافه خالتي ..لا تعنين عمي ..انا اوصلكم وبعدها راحو ويا فيصل ..نهى جلست جنبه جدام ...ونوال وانفال وامامه ورا ...بحيث تكون امامه وره مقعد فيصل...واهو تشقق من داخله وتم يناظرها طول الطريج واهي كل لحظه تسرق لها نظره....وتبادلو امامه وانفال ارقام موبايلاتهم ... بعد مرور يومين من الاحداث علاقة شذى وحمد زادت وايد...تحس شذى انها بدت تميل له..اهو شاب جميل ما ينقصه شي بس كان اسلوبه وطريقة تفكيره ما تحبها...بس اللحين اهو صار الشخص الي تتمناه..خاصة أن طلال حبها له تحول لكره وانتقام.. عزمها حمد على الغدا واهي ما رفضت .... شذى بفرح: صج حمد حمد:أي صج بتعالج شذى مستانسه:ونستني حمد..الله يوفقك حمد:العلاج مو صعب لاني توني بدايه الادمان بس يبيله صبر وثبات شذى:حاول يا حمد لازم تتعالج عشان امك ما تستاهل وعشان نفسك باجر وراك زواج وعيال لازم تكون صاحي لهم حمد بحزن:ما اتوقع بتزوج بعد حلا شذى وكرهها يزيد لهالبنت اكثر:حمد انت لازم تنساها مثل ما انا نسيت طلال حمد بحقد:انا لازم ادمرها مثل ما دمرتني شذى :شلون؟ حمد يبتسم بمكر:تبين تنتقمين من طلال ؟ شذى:ومن حلا بعد حمد :خلاااص عيل سمعي الي بقولج عليه ...وتسوينه بالضبط شذى بكل نشاط:اكيييييد امامه قاعده بالصاله ويا امها الي تتكلم بالتليفون..بالها مع فيصل ..تذكر آخر مره شافته بالمطار ابتسمت يوم تذكرت أن قالها حبيبتي...وكيف انه ما فقد الامل فيها للحين مصر على حبه لها... نوال تسكر التليفون:امومه امامه الي كانت سرحانه:هاا نوال:في احد يقول لامه ها امامه:هههه اسفه يمه مو قصدي نوال:جيل هالوقت ما في احترام امامه:يمه شفيج الله يهديج ما كان قصدي نوال:باجر معزومين بيت ام فيصل امامه:ليش؟ نوال:مسويه عشى عشان بنتها انفال خذت الشهاده وعازمتنا امامه:أي أن شاء الله نوال:اتصلي على الصالون وحجزي لنا موعد باجر امامه:اوكي يمه (يرن موبايلها)...هذي انفال نوال:أي يمكن تعزمج على حفلتها امامه ترد:اهلين انفال:هلا فيج ..شلونج ؟ امامه :تمام وانتي؟ انفال:الحمدالله..امامه باجر أن شاء الله مسويه عزيمه على العشى لا تخلين امامه:أن شاء الله انفال:عندج شي اليوم امامه؟ امامه بخوف:لا ما عندي شي انفال :حبيت اكلمج بموضوع خاص اذا ممكن اشوفج اليوم امامه حست الموضوع فيه فيصل:خير صاير شي؟ انفال:ما فيه شي بس حبيت اكلمج بموضوع على انفراد امامه:خلاص حبيبتي ..شوفي المكان والوقت الي ريحج وانا اجي لج انفال:يناسبج اليوم بعد صلاة المغرب امامه:أي اوكي يناسبني انفال:عاد انتي اختاري المكان امامه:ههه امممممم مارينا على البحر انفال:خوش مكان ..خلاص القاج هناك امامه:أن شاء الله انفال:باي امامه:باي نوال:خير؟ امامه:يمه انفال بغتني بموضوع وتواعدنا بعد صلاة المغرب نوال:الي ريحج حبيبتي وصلت امامه واتصلت على انفال واتفقو انهم يتلاقون ((بكوستا)) انفال تسلم:هلا والله امامه:هلا فيج حبيبتي انفال:ها شلونج مع العطله؟ امامه:والله ماكو ملل ما في شغل الدوام ارحم انفال:ههههههه هذا اهو انا اللحين قاعد ادور لي شغل مليييييت من البيت امامه:أي والله انفال حبت تدش بالموضوع:امامه حبيت اخذ رايج بموضوع..ابي رايج فيه امامه :تفضلي انفال :مثل ما تعرفين اني اخت فيصل الكبيره..وفيصل ما يخش عني شي امامه وبدت ترجف من احد يجيب لها طاريه:أي نعم انفال:اهو الكورس هذا كان كلش مو طبيعي ويوم سألته صارحني انه يحب وحده معه بالجامعه.. امامه تسمعها وتحس الكلام عنها:....... انفال تبتسم لها:طبعا هالبنت دعمته ومن ذاك اليوم واهو مو قادر ينساها...والمشكله أن أول حب له بحياته امامه بحيا:ايه انفال:طبعا تعرف عليها اكثر واكثر بحكم انها معه بنفس المحاظرات...وعرف انها خوش بنت وتأكد من حبه لها..وقرر انه يصارحها بس يوم صارحها البنت رفضته وطلبت منه أن ينسى كل شي بينهم وانهم انتهو...بالرغم من انه متأكد انها تبادله نفس الشعور..ومن ذاك اليوم واخوي ما يعرف طعم النوم وراحه ..حتى الاكل ما قام ياكل عدل ولا قام يقعد ويانا..كله بغرفته بروحهه يقعد يفكر فيها..فانا قلت اخذ رايج بالموضوع امامه تحس بتأنيب الضمير على حالته:بشنو؟ انفال:اخوي يقول انه ما غلط بحقها ولا ضايقها يوم..بس اهي كلامها له يدل على انه جرحها امامه تبلع ريجها:اممم ممكن اهي غلطانه انفال وكأنها وصلت للي تبيه:كيف يعني؟ امامه بتردد:امممممم يمكن اهي ما تستاهله لا يتعلق فيها اكثر يحاول ينساها انفال استغربت من ردها:شلون تبينه ينساها واهو يحبها إلا يموت فيها؟ امامه دمعه نزلت من خدها:بس اهي رفضته ونهت كل الي بينهم قبل لا يبتدي ما تستحقه... انفال حست السالفه فيها شي:ليش تظنين ما تستحقه؟ امامه تلقائيا:لانها ظنت فيه غلط ما تستاهل حبه انفال بحزن:عشان جذي رفضتيه امامه تمسح دمعه ثانيه:ما استاهل حبه انفال انفال:انتي تحبينه صح؟ امامه ساكته:... انفال:صح؟؟!! امامه بصوت واطي:إلا اموت فيه.. انفال :عيل ليش قلتي له جذي؟ امامه ترفع راسها:ما تصدقين اذا قلت لج السبب؟ انفال :لا تخافين بصدقج انتي بس قولي لي...والله يا اموم لو شفتي حاله تحنين له امامه:بقولج تمت تقوله الي الموقف الي شافته فيه وياها بالمكتبه وكيف ظنت فيه..... انفال:هههههههههههههههههههههههه من صجج امامه منحرجه:قهرني حسيت انه جرحني فقلت اجرحه..بس جرحت نفسي قبل لا اجرحه انفال:ما فكرتي أن ممكن تكون اخته او وحده تصير له؟ امامه:مادري الغيره ما عطتني مجال افكر بشي انفال:يعني هالموضوع اهو الي خلاج ترفضينه امامه تهز راسها:ايه انفال:وبعد ما عرفتي اني اخته؟ امامه:تأكدت اني ما استاهله ولا استحق حبه انفال منصدمه:من صجج بدل لا تصلحين الغلط تزيدينه امامه بحزن:انا جرحته انفال انفال تمسك يدها:ما تصدقين اموم اهو شكثر يحبج...اليوم الي شفتينا فيه كان يايبني المكتبه عشان اشوفج...طول ماهو معي واهو بس يكلمني عنج ...تدرين اهو الي طلب مني اكلمج واعرف ليش زعلانه منه...وينتظرني تحت ارد له خبر امامه مخترعه:فيصل تحت!!!!!!!! انفال:يحاتي تكونين رفضتيه لانج تحبين احد ثاني او محيره لاحد امامه:عمري ما بكون لغيره انفال تبتسم لها:يعني تحبينه كثر ما هو يحبج؟ امامه تبتسم:انا اكثر انفال تمسك موبايلها:خل اطمنه تلقينه احترق بمكانه امامه وتحس انها ولهانه لصوته:امممم حطي سبيكر انفال:هههههههه تبين تعرفين ردة فعله امامه بحيا:ايه انفال تركب سماعة الموبايل:اخذي وحده وانا وحده دقت عليه وعلى طول رد... انفال:بسم الله حتى ما رن رنه فيصل بخوف:قولي لي نفول انها مو مخطوبه ولا تحب غيري انفال تغمز لامامه :فيصل مادري شقولك بس.....بس فيصل:بس شنو ليكون محيره؟؟؟ انفال بصوت حزين:ايه يا فيصل اهي .. فيصل بعصبيه يقاطعها:لااااااا مو بكيفها ...ماراح تكون لغيري انا اعرف شلون اتفاهم معاها (سكره) امامه بطلت عينها عالآخر :امبيييييه شبيسوي فيني انفال تحسفت على الي سوته بأخوها :الله يهديه عصب بسرعه ما مداني حتى اكمل كنت بقوله حقك امامه :بس هم ما كان لازم تسوين جذي لان... قطع عليها كلامها فيصل جاي صوبهم وبكل عصبيه يحط يده عالطاوله.... فيصل يشوفها بعصبيه:من قال اني بسمح لج تتزوجين غيري!! امامه بتعاند وترفضه مره ثانيه؟؟!! شذى وحمد بيهدمون حياة حلا وطلال؟؟!! تعلق حمد المفاجأ بشذى للانتقام او ..؟؟ََ!! Link to comment Share on other sites More sharing options...
marioma Posted سبتمبر 12, 2007 Report Share Posted سبتمبر 12, 2007 ثاانكس علىى البارت .. ننتظر بأسرع وقت ..!! Link to comment Share on other sites More sharing options...
ريم المها Posted سبتمبر 12, 2007 Report Share Posted سبتمبر 12, 2007 ننتظر الباارت لا تطولين علينا Link to comment Share on other sites More sharing options...
الريــم Posted سبتمبر 12, 2007 Report Share Posted سبتمبر 12, 2007 تسلمين ننتظر الباقي Link to comment Share on other sites More sharing options...
دلوعة مغرورة Posted سبتمبر 12, 2007 Report Share Posted سبتمبر 12, 2007 تسلمين ويعطيج العافيه وفي الانتظار Link to comment Share on other sites More sharing options...
Recommended Posts