أسيرة الورد Posted أغسطس 5, 2008 Author Report Share Posted أغسطس 5, 2008 الله يسلمج تسلمين فديتج و هاي البااااااااارت في اليوم الثاني الريم يت من السفر وعلى طول راحت بيت اخوها فهد الريم وهي تسلم عليهم الريم وهي تسلم على اخوها : فديتك اخوي والله اشتقتلك فهد : تشتاقلج العافيه .. وانا بعد اشتقتلج والله دوم اقول حق ساره بدون الحشره الريم ملل ساره تضحك : حيليلها لا تقولها حشره الريم مالها اي ازعاج الريم الهنا كله الريم : اصلا محد فاهمني وحاس فيه غير مرت اخويه الريم : فهد يالله اخويه انزل تحت ترى محمد يترياك بالميلس يبى يسلم عليك ساره : هي هي ما ترضى تخليه بروحه الريم استحت : ساارووووه بلا احراج فهد يضحك : لازم حلاته الحرمه تصون ريلها وادافع عنه .. الريم : زين عيل يالله روحله ..لانا بنروح ساره : تو الناس الريم : والله تعبانه ..كرهت الطياره ظهري تكسر ابي ارتاح فهد : زين عيل انا بنزل عنده الريم خذت ساره ع صوب : ها اشحال ولد اخويه ساره : والله بعده صغير الريم : يالله بسرعه متى بيطلع ابي اشوفه ابيي بسرعه يقولي عمو ساره : ان شاء الله جريب ..ها اشحالج ويا محمد الريم اونها تلعب باصابعها : تمام ساره : اونج استحيتي .. الريم : الصراحه ما توقعت ان محمد بهالرومانسيه والطيبه يحليله ضحى ببنت عمه عسبي .. ساره : تستاهلون كل خير ..تعالي عرفتي ان خالد ملج الريم فتحنت عيونها " والله ومتى ساره : البارحه الريم : انا يوم روحت انتي حملتي ويوم روحت خالد ملج شو لهدرجه نحسه ساره تضحك : ههههههههههههه الريم : عاد اكيد فهد استانس ساره : يوم قلته استغرب.. بس هو واثق اني احبه وانه محد يهمني غيره الريم : اكيد استانس وطار من الفرح اخاف من دعاويه ساره : هههههههه يمكن .. بس والله خالد انسان طيب وحبوب وانا اتمنى له كل الخير الريم :وين وشو مرته حلوه ساره : هيه حليوه ماشاء الله الريم : منو احلى خالد ولا هي ساره : يا حبج لهالاسئله الريم : قولي ساره تصد يمين يسار : بخبرج بس لا تقولين حق فهد الصراحه جمال ولد خالتي غير .. صح هي حلوه بس هو ماشاء الله عليه احلى .. الريم تصارخ : هاااااااااااا لا تقولين ما قلتي بخبر عليج فهد ... ساره : سكتي سكتي لا والله بيزعل الريم : لا لا بقول بقول ساره : يالنذله انتي سالتي ..ويوم جاوبت تبين توهقيني الريم تضحك بخبث: ماتعرفيني نذله ساره : والله يوم تزوجتي استويتي نذله والله انا ما احيدج جي .. الريم تشوف الموبايل : وي تاخرت .. محمد يترياني تحت ان شاء الله بييكم مره ثانيه الريم ومحمد علاقتهم من اروع العلاقات اللي بنيت ع الاحترام والحب والتقدير لكل من الطرفين ################################ نوره يالسه تتريه عبدالله على اعصابها ..ويوم عبدالله دخل الغرفه شاف نوره منزله راسها .. عبدالله دخل : هلا نوره هلا والله نوره بابتسامه حلوه : هلا فيك يا احلى واغلى ريل بالدنيا كلها عبدالله مستغرب : يا ويلي شهالكلام الحلو شو طاري عليج نوره والدمعه بعيونها وتاشر على عبدالله : عبدالله تعال شوي عبدالله مستغرب يلس عندها : هلا فديتج نوره بابتسامه تبى ترمس بس ما تقدر تقول .. عبدالله مستغرب يشوف الدموع بعيون نوره ..: بلاج نوره نوره والدموع اربع اربع : عبدالله انا حامل حامل عبدالله استانس حضن نوره بالقو : والله نوره وهي تمسح دموعها : والله اليوم تاكدت من الحمل نوره وهي تصيح من الفرحه .. عبدالله : فديتج يا نوره واخيرا واخيرا تحقق حلمنا نوره : مب مصدقه والله من يوم ماالدكتوره قالتلي وانا ميته من الوناسه يا عبدالله الحمد لله الحمد لله عبدالله : الحمد لله شفتي قلت لج ان الله مع الصبرين .. وليش ما قلتلي لي قبل نوره : خفت احط ف بالك هالشي واخر شي ما اطلع حامل بس يوم شفت الاعراض قلت خلا اتاكد احسن عبدالله : ومنو راح وياج نوره : ساره راحت ويايه ويحليلها ادمعت من الفرحه .. عبدالله : خبرتي اهلج نوره : لا ما حبيت اخبر اي حد قبلك .. عبدالله: تسلمين حبيبتي ويالله نبشر امايه اكيد بطير من الفرحه ..وبعدين نبروح عند اهلج بس هااااا ما اوصيج شوي شوي عالجنين ترى هالغالي ولد الغاليه نوره : من عيوني نوره سعادتها كانت اكبر من سعادة ساره بالطفل يمكن لان نوره تتريه هالشي من زمان ويوم عرفت استانست وايد .. وطبعا فرحة الاهل كلهن مب بس هي ################################## منى يالسه ويا هند طبعا عالمسنجر والخراب قدرت منى تسيطر عليها انه المسنجر مب معناتها انها تخون زوجها وهند بما انها مب محصله الحب والحنان من ريلها اختارت الشات والمسنجر لان منى قالت لها ان بهالطريقه راح تحصل كل حد مهتم فيها ويحبها ويسمعها الكلمات الحلوه .. هند : ويييييييييييي شفو شو كتبلي منى تقرى : وااااو كلماته تينن هند بحزن : ياريت ريلي يقول كلمة احبج او اي شي من زمان ما سمعتها منه منى : يالله شتبين فيه .. خلا يولي هند : كيف وانا ماخذتنه عن حب .. صار عادي ويايه عسب جي اسلي عمري بهالمسنجر والشات مع اني اعرف ان كل واحد يقص ع الثاني بس شو اسوي منى تسمع صوت الهرن : اقول هذا مب جنه هرن سيارة ريلج هند : هيه ( توترت ) وويييييييي خلا ابند الكمبيوتر ما فيه منى : زين انا دقيقه بروح الحمام (( منى راحت الحمام عسب تتمكيج زياده وتتعطر وطبعا الشيله على جتفها )) وسالم دخل الصاله .. وشاف هند . هند : هلا حبيبي شحالك سالم بجديه : بخير .. اقول هند دخيلج بسرعه جهزي العشاء ترى ميت من اليوع هند : قصدك اقول للخدامه تجهز مب انا سالم بعصبيه : المهم اي حد المهم ابي اتعشى ترى صدق يوعان هند : اوكي ثواني سالم : اقول وين امايه واختي هند :ماعرف وينهم . يالله بروح اجهز العشاء منى دخلت بكل دلع : هلا شحالك سالم سالم يدور منو هاي اللي عندها هالصوت ويوم صد شاف منى طبعا بكامل زينتها واتخبل : هلا منى : شخبارك ان شاء الله بخير سالم : الحمد لله انتي شخبارج .. منى : بخير عساك بخير .. سالم : تفضلي ليش واقفه وبعـــــــــــــــــــــد مرورعدة أشهـــــــر: ساره وهي حامل بالشهر 9 ..يعني ع النهايه ساره وهي ماسكه ظهرها : فهد فهد : فهد بالغرفه الثانيه : لبيه يا عيون فهد .. ساره : اقول اليوم بخاطري اتمشى عالبحر فهد : فديتج ما طلبتي شي البحر هو دمي غناتي خلاص الحينه بتلبس وبنروح هناك وبناخذلنا عشاء ساره : اوكي حبيبي عيل بروح البس .. ساره وفهد عالبحر ف مكان هادي مب زحمه .. ساره تشوف البحر : الله شحلات البحر .شوف الجو فهد وهو يالس عندها : تصدقين كل يوم اشوف البحر انسى ضيجي اذكر يوم كنتي تقسين عليه دايما اتردد عالبحر اشكيله محد فاهمني غير البحر ساره معصبه : افا وانا وين روحت فهد : انتي انتي بداخلي وبجوفي وبدمي .. انت الهوى اللي اتنسفه ..يا عساني ما خليت منج ساره : تصدق فهد عمري ما اتوقعت اني احبك بهالطريقه .. ما اقدر اعيش بدونك وبدون كلامك وابتسامتك ..دايما اقول صدق اني غبيه لاني ما حبيتك من قبل فهد وهو ماسك ايدها : مب مهم قبل المهم الحينه انج مستانسه ويايه ساره : قول طايره من الفرح .. حد يعيش وياك وما يستانس .. انته امي وابوي واهلي كلهم .. فهد : لو تعرفين شكثر السعاده تغمرني .. كافي حبج لي ولو اموت الحينه صدقيني بستانس لان عندي زوجه مثلج وياهل .. ساره وهي تدمع : لاتقول جي ..لا تطري الموت يومي قبل يومك فهد : باسم الله عليج حبيبتي انتي تعرفين اذا صار لج انا اللي بموت .. بدونج دنيتي مالها معنى .. انا احبج واموت عليج ساره : وانا اموت ع الهوى اللي اتنفسه فهد يمسك بطن ساره : ها وولدي شو يقول ساره : يقول بسرعه ابي اطلع واشوف ابويه الغاوي ..فهد : ها حبيبتي اخترتي اسم للياهل ساره : شوف اذا ولد بسمي خليفه واذا بنت بسميها الغاليه.... شرايك فهد : لا شرايج باسم حمدان ..ولا سلطان ولا.. ساره : ويييييييييي انت عندك مليون اسم .. خلاص يوم بييه الياهل ان شاء الله بنسوي القرعه فهد : اوكي المهم خلا اييه واكحل عيوني بشوفته .. ساره : فهد توعدني انك ما تتخلىعني فهد : افا عليج يا بعد هلي كيف اتخلى عنج وانتي كل دنيتي اوعدج يا غناتي اكون لج العمر كله وما تخلى عنج .. ساره : فديتك والله هي عرفت ان نوره حامل بتوأم فهد : والله بتوأم ماشاء الله زين ساره : سبحان الله صبرت ونالت فهد : وهي اكيد طايره من الفرح ساره : قول متخبله كل ما تذكر تدمع فهد : يحليلها والله تساتاهل اقول جنه فاتحة خير نحن اول شي انتي حملتي بعدين نوره .. ومنو بعد ساره: والريم بعد شو نسيت اختك .. فهد : هيه والله ..صدق حامل ولا ساره فاتحه عيونها : يعني تتجذب علينا فهد : اشوفها خبله عادي تمشي بسرعه مب مثل باجي الحوامل ساره : الريم عادي عندها تقول انها ما تحس انها حامل لانه مب مبين عليها بما انها حامل من شهرين يعني توه فهد : يالله الله يزيد ويبارك .. ساره : يالله الحمد لله ############################# نوره وهي تجهز اغراض الياهل.. عبدالله وهو بالسوق وياها: اقول نوره انتي ماتعرفين جنس التوام صح نوره : لا عبدالله : عيل اي لون بتاخذين نوره : باخذ الابيض والبيج وهالالوان اللي يستوي حق الولد والبنت عبد الله متحمس : الله بيينا توام الحمد لله الحمد لله نوره هي والله رب عالمين عطانا احلى هديه .. عبدالله : الحمد لله اما منى وهند وسالم زادت علاقة منى وسالم وايد صارو يكلمون بعض بالتلفون ويتغزلون ف بعض طبعا منى حاطه ف بالها انها تكلم سالم عسب تزوجه بما انها تبى تفتك من تسلط اهلها .. اما سالم فقصده اللعب ثم اللعب .. وهند ولا تعرف شو السالفه ... هند اللي لاحظت ان منى ما اتيه بيتهم وايد ولا تتصل فيها .. وتغيرت عليها وايد وسالم ما تحصله ابد ودايما يرمس بصوت واطي ويطلع يوم حد يتصل فيه .. خالد واليـــــــــــازيــه خالد وهويكلم اليازيه اليازيه : خالد خالد : هلا اليازيه : خالد ابي اقولك شي من زمان بخاطري اقوله لك خالد : تفضلي قولي اليازيه : خالد انت تحبني خالد سكت ماعرف شو يقول ..: ليش هالسؤال اليازيه : الصراحه من اول ما ملجنا ما احس انك تحبني كلامك وايد عادي وحتى تصرفاتك يعني ما شي حب يا خالد وانا كل مره اقول بتريه يمكن يحس فيني يمكن بس اشوف كملنا اكثر من 6 اشهر ويا بعض وانت مثل ما انت ..خالد انا انسانه معروفه بصراحتي .. واحب اللي يكون ويايه يكون صريح خالد : صدقيني عادي ما فيه شي اليازيه : خالد اللي عرفت عنك من بداية علاقتنا انك ما تعرف اتجامل وهالشي الحلو فيك .. وابيك تكون صريح ويايه ..قول بلاك انت ماخذني عن غصب قول ترى لين الحينه ما تزوجنا صح عقدنا قرنا بس بعد ما سوينا حفله عرس خالد : انتي يااليازيه مكبره السالفه اليازيه بكل جراه وحزن بنفس الوقت : عيل يمكن تفهمني ليش ما تشتاقلي مثل باجي الرياييل احيانا يمر اكثر من اسبوعين وما تقول ابي اشوفج ليش ما تتغزل فيه .. كلامك وايد عادي ..ليش الحزن دايماتفارقك ليش كون صريح ويايه الله يخليك .. خالد ساكت اليازيه : خالد ابيك تعرف انا صعب عليه اني اعيش ويا انسان بهالبرود وماعرف بلاه كيف بتكون زوجي وانت من الحينه ما تصارحني ونحن مب متفاهمين صارحني يا خالد صارحني خالد بعد تفكير : ماعرف شو اقولج اليازيه : انت يا خالد تحب غيري او عندك حب جديم صح خالد توتر ماعرف شو يقول : انا اليازيه :ما شي الا جي ..قول هيه خالد: شوفي اليازيه بكون صريح وياج مثل ما تبين انا كنت احب قبل ( خذ نفس ) كنت احب بنت خالتي وكنا لبعض من الصغر بس ماصار بينا نصيب اليازيه تضايقت : يعني عندك حب جديم .. وانت ودرتها مب من رضاك صح خالد: كيف عرفتي اليازيه : ما يبالها شي يا خالد التنهد والنفس اللي خذته كشف اللي بداخلك وعرفت انك ودرتها غصبن عنك وانا ما ابي اعرف الاسباب لان هالاشياء خاصه فيك خالد : ما حبيت اقولج بس انتي اصريتي اليازيه : وانت لين الحينه تحبها خالد يحاول ينكر: لا لا ما احبها اليازيه : ترددك ف البدايه مبين انك لين الحينه تباها مع ان اللي اعرفه ان ساره متزوجه .. بس اتوقع حبك كان كبير لدرجه ان مع هالايام والاشهر ما قدريت تنساها وقررت انك تزوج لان بهالطريقه يمكن تنساها صح خالد : ساااااكت اليازيه : خالد حتى لو تزوجت مب دايما الزواج يقدر يخلي الشخص ينسى حبه الجديم وانت جربت فيه للاسف خالد : لا ياليازيه والله مب جي السالفه اليازيه : اللي اعرفه ومتاكده منه انه حتى بعد الزواج بتفكر بساره لاني حاولت اشهر وياك عسب اغيرك بس ما شي فايده .. واسمحلي يا خالد ما اقدر اعيش ويا انسان ما يكن لي اي حب .. انت تحترمني صح بس ما تحبني .. وانا ما ابي اجازف واتزوج بانسان واخر شي اعرف انه مستحيل ينسى حبه الجديم وانا بس كاسم زوجه انا ابي انسان يحبني واحبه ونكون بقلب واحد .. وانا حاولت وياك باكثر من طريقه بس ما شي فايده خالد : شقصدج اليازيه : خالد صدقني انا اتالم واقولك هالكلام يمكن لاني تعودت عليك .. ويمكن لاني عزيتك .. بس ما اقدر اعيش ويا انسان قلبه مب ويايه خالد : سااااكت اليازيه : خلا نورد بعض احسن مدامنا ع البر لين الحينه احسن من انا نتزوج ويصير بينا مشاكل خالد ماقال شي اليازيه بعد سكوت خالد تاكدت ان خالد لين الحينه يحب سار ه .. اليازيه : اوكي خالد بس ابيك تعرف شي انك ما تجرب على بنات الناس يمكن الريال ما يعيبه شي بس البنت مب حلوه تنفصل او تتطلق يوم تتاكد من انك نسيت ساره بعدين فكرباالزواج مب قبل هالشي عسب محد يكون ضحيه . خالد : اليازيه انا ما ابي اجرحج اليازيه : بالعكس زين انك صارحتني بهالشي الحينه ونودر بعض بكل ود احسن بدون مشاكل وعادي انت قول لاهلك انا ما تفقنا ولا نقدر على هالشي وانا بعد .. والله يعوض على كل واحد منا خالد : يعني خلاص اليازيه : هيه خلاص وانا متاكده اني ما بندم باختياري بس اببيك تعرف انك انسان طيب وخلوق ومحترم وهالشي اللي عمري ماراح انساه خالد: تسلمين .. وانتي بعد انسانه خلقوه ومحترمه.. اليازيه : خلاص هاي اخر مكالمه بينا والله يسعدك يا خالد خالد يمكن كان يبى يقول لليازيه ان علاقتهم صعبه ومستحيله بس استحى يقول هالشي وزعل لانه خسر اليازيه لان اليازيه انسانه طيبه وحلوه وزينه بس استانس بنفس الوقت لانه ما كان يبى يخدعها اكثر لان قلبه لين الحينه بحبه الجديم اللي هو حب ســــــــــاره .. وطبعا الاهل كلهم عرفو ان خالد بينفصل عن اليازيه والكل زعل .. واكثر وحده انصدمت ساره ما توقعت هالشي .. وبخاطرها تقول ( معقوله لين الحينه تباني يا خالد عسب جي انفصلت عنها .. )) فهد وهو بغرفته يكلم ساره ومطلع الدفتر ساره : الله شو هالدفتر الغاوي فهد : هالدفتر ذكرياتي وياج حبيبتي من اول ما شفتج وانا اكتب خواطر .. ساره تمد ايدها : عطني اقراه فهد: لا بعدني ما كملته اول ما اييه الياهل بكتب عنه بعدين اقريه ساره : اشوف شو العنوان فهد : لا مب الحينه يوم بقولج بعدين اقريه ساره : يالله عنيد فهد : عنيد بحبج يا بعد هلي ساره تبتسم : .. ################################# الريم وهي تتلبس تبى تطلع محمد يشوف الريم الريم : ها حبيبي شرايك بكشختي محمد : اصلا في حد شراتج انتي يا قمر الريم : ممممممممممممم هي انته شراتي محمد : هههههههههههه اقول الريم الريم : هلا حبيبي محمد : انتي حامل صح الريم مستغربه : هيه ليش محمد : من شهرين واكثر ما شفت بطنج كبر الريم : هههههههههههههه مب من الحينه يبين بعد الشهر 4 بينلاحظ لان الياهل بعده صغير محمد : وانا اقول يالله بسرعه ابي اشوف ولدي الريم : يالله عاد وحشرتكم يالشباب تقولون متى يطلع ولدي ويوم يطلع تقولون حشره وازعاج وديه داخل .. محمد: ههههههههههههه لا ما بقول جي الريم : بس كم يوم يوم بتسمع حشرته بتطردني انا وهو برع الغرفه محمد : افا وانا اقدر ..مستحيل انتي زوجتي وحبيبتي وهذا ولدي الغالي الريم : تسلم حبيبي .. وعسى الله لا يحرمنا من بعض .. هند بعد ما لاحظت تغير منى عليها وايد قررت انها تكلمها هند وهي ترمس منى بالتلفون هند : انتي يا منى من زمان ومب ع بعضج من عدة اشهر بلاج عليه منى بدلع : مافيني شي يعني ما يستوي انشغل هند : انتي من المدرسه ويايه وعمرج ما تخليتي عني والحينه يا دوب مره بالشهر تكلميني شو صارلج منى : مشغوله والله اقول عندي خط اوكي باي هند وهي تكلم عمرها: ماعرف شو استوى فيها .. سالم دخل الغرفه وشاف هند تكلم عمرها . سالم : مرحبا ( وف ايده الجكاره ) هند تكح : اول شي طلع هالجكاره اللي بايديك سالم : بس حلفي...سوري ما اقدر توني مدخن .. هند: سالم من زمان ما طلعت وياك ليش مانطلع والله لاعت جبدي ف البيت سالم : ليش ما تيلسين ويا هلج هند بخاطرها (( من زين هلك الحينه )) لا ابي اطلع وياك مثل ايام الملجه ..الصراحه وايد تغيرت عليه كنت وايد رومانسي سالم : ليش والحينه شو هند : مب مثل قبل استويت عصبي سالم موبايله رن واتوتر : ها زين اكلمج بعدين هند بروح ارد على ربيعي هند تشوفه وبخاطرها : ما اعتقد هذا ربيعك .. سالم وايد طول بالتلفون ويا منى طبعا يعني كمل ساعه وهند كل دقيقه تشوف سالم ولا تشوفه يضحك ويوم يشوف هند يغير مكانه .. هند : الا اكشفك يا سالم واعرف شو بلاك وبعد ساعتين تقريبا دخل سالم يسبح هند استغلت الفرصه راحت على طول تشوف موبايل سالم ويوم تشوف اخر مكالمه رقم رقم منو رقم( منــــــــى ) هند فاتحه عيونها مستغربه قالت لا اكيد مب هي ..تروح تشوف المسجات ولا بنفس الرقم واللفظ بين البنت والريال .. يعني شي واضح هند وهي تدمع وتقول هند : معقوله يا منى يكون ها سبب تغيرج انا اللي اعتبرتج ربيعتي واخر شي تاخذين ريلي مستحيل هند ما قدرت تتريه لليوم الثاني ع طول راحت بيت منى منى وهي متلبسه طبعا لازم دايما تطلع الخدامه قالت ان حد يباها فعرفت انها هند وقالت خلا تدخل الغرفه .. هند وويهامبين انها صايحه والعصبيه مبينه عليها منى : هلا بهند هند : يمكن موبايلج منى : لا سلام ولا كلام شو السالفه هند : عطيني موبايلج منى ماسكه الموبايل : خذي الموبايل هند وهي تشوف الارقام شافت رقم ريلها وهني انفجرت هند راحت عند منى وصفعتها .. منى صارخت : بلاج انتي هند : ايالخاينه ياللي ما صنتي الصداقه اللي بينا تخونيني مع منو مع ريلي هذا بدل ما توقفين ويايه .. ما لقيتي الا ريل ربيعتج تحبينه وتفكرين فيه منى : بلاج شو تخرفين هند وهي تصيح : لا تنكرين شوفي الارقام اللي ف موبايلج .. وانا اقول ليش متغيره عليه انا الغبيه اللي فتحتلج بيتي وعاملتج مثل الاخت بس صدقها نوره الربيعه ما تنصح ربيعتها بالشر منى : والله شو اسوي اذا ماعرفتي تحافظين ع ريلج هند : ماحافظت عليه ع الاقل قوليلي حاولي تنصحين بينا مب تاخذينه منى : هو اللي ميت عليه ووعدني بالزواج هند : لانج مب مقصره دومج طايحه بيتنا وكل يوم لبس ومكياج وحالتج حاله وانا اقول يحليلها يايه عندي صدق اني غبيه يوم قالو لا تثقون بكل الربع ترى البنات مالهم امان حتى ياخذون رياييل رباعتهم بس ما صدقت .ليش يا منى شو ذنبي مالقيتي الا سالم انا ربيعتج من ايام المدرسه جي تسوين فيه منى : قلت لج هو اللي ميت علي .. وانا عرفتج عليه واقدر اخذج منه كيفي يعني واذا هو ما يباني عادي ما ابيه قوليله رمسيه بدل ما تكلميني هند : بعد شووووووووو بعد ما لصقتي فيه ..انتي ربيعه انتي عدو انتي من شياطين الانس منى : احترمي عمرج ولاتقلين ادبج هند : اعرف انج غيرانه لاني اتزوجت قبلج وانتي محد يباج كيف يبونج وانتي سمعتج لاخر الدنيا لا ادب ولا اخلاق ولا احترام اصلا انا الغبيه اللي رابعت وحده ماتعرف الاصل والذوق والادب واغلبية الشباب يعروفنج .. منى عصبت : احترمي عمرج ولاتقلين ادبج يا هند هند: ويوم عرفتي ان مستحيل من هالشباب يرضون ياخذون وحده شراتج .. فكرتي بريلي قلتي مدام هو خذ عن طريق المغازله عادي بياخذج صح كيف جي تفكرين يااللي تعرفين صدق معنى الصداقه منى : والله مب مضطره اقولج تبريراتي .. انا اللي اقرر شو اللي بسوي هند : لازم الوحده اللي مب متربيه تقول هالكلام منى : احترمي عمرج ولا بتشوفين شي عمرج ما شفتيه هند بصريخ : شو بتسوين قولي ها ..شي اكثرمن اللي سويته منى : والله وايد اقدر اسوي اشياء وبعدين شو المانع ريلج يكلم اميه وحده ليش ما تضاربين وياهم يايه عندي هند : لو يكلم غيرج يمكن اهون من اني اشوف ربيعتي تخوني مع ريلي .. \منى : لانج ماتعرفين كيف تصرفين انتي اصلا انسانه غبيه وعلى فكره انا كنت ابي اخربج واخلي سمعتج وصخه عسب جي عرفتج على سالم بس ما توقعت ياخذج وعلى شو ... هند: على الاقل احسن منج يا ام الرياييل منى ومعصبه : والله لا اردلج يا هند وبتشوفين شو بسوي اذا ما خليتج تصيحين دم ما اكون انا منى هند : لا تهدديني اصلا انا لا اخاف منج ولا من اشكالج يالحقيره يالنذله .. ( وتف عليج وعلى ويهج )) منى : ما عليه اذا ما خليتج تندمين على كل كلمه قليتها ما اكون انا منى... هند طلعت وهي تصيح منصدمه من منى ..وتذكرت كلام خالد يوم قال ان سالم راعي بنات وتذكرت نوره يوم قالت ان الربيعه المخلصه ماتنصح ربيعتها ع الخراب وقفت سيارتها بمكان هادي وتمت تصيح .. تصيح لانها وثقت بمنى واعتبرتها كاخت وربيعه .. اما منى فحلفت انها تنتقم من هند طبعا بطريقتها .. منى حفظت اللي دار بين هند ويا شباب المسنجر وعطته لسالم بالسيديه سالم يتريه هند من زمان لانها تاخرت وايد ع البيت وهو خلاص واصل حده من العصبيه .. هند وهي يايه البيت شافت سالم معصب ويترياها سالم بعصبيه : وين كنتي يا مدام هند وهي تصيح : كنت عند منى سالم : جذاااااااااااااااابه منى متصله توها وتقول انج ما ييتيها وين كنتي هند استغربت: والله العظيم كنت عند منى ومنى تتجذب عليك سالم : والله ( ماشر على السيدي)) ..وهالسيديهات هند: مستغربه : شو السالفه سالم : انتي يا مدام كنتي تكملين شباب عن طريق المسنجر صح هند خايفه : انا سالم ماسك ايدها : لا تتجذبين قولي هند : لا لا سالم صفعها باقوى ماعنده : تتجذبين عليه عندي ادله والصوت اكبر دليل كنتي تكلمين الشباب ع المسنجر عن طريق المايك صح هند : لا سالم ضربها مره ثانيه : يالحقيره يالخاينه هند تصيح لانه سالم يضربها : هدني هدني يا سالم سالم : اهدج وانتي تخونيني لا واكيد رايحه ويا الشباب وتقولين بروح عند منى وانتي رايحه وياهم هند : والله العظيم عمري مارحت وياهم سالم : جذابه مدام كلمتيهم بالسمنجر اكيد طلعتي وياهم انا غلطان يوم خذت وحده عن طريق المغازله صح مدام خنتي اهلج وكلمتيني مب بعيده تخونين ريلج وتكلمين غيره هند : عاد انت المخلص تخوني مع ربيعتي سالم : الريال ما يعيبه شي هند : ما يعيبه شي ..منو قال لو صدق مثل ما قلت جان سمعتك ما وصلت لحد بيتنا انك راعي بنات وما جذبو .. سالم : انا اقدر اسوي اللي اباه بس البنت صعب انها تخون هند : اصلا انا الغلطانه لاني اتزوجت واحد مثلك انسان مدخن ما يصلي ما يخلص لمرته وخاين انت ما تسوى شي وهني سالم عصب وصفعها مره ثانيه وتمت هند تصيح سالم : انتي عيل يالخاينه .. اصلا غلطان يوم خذت وحده شراتج غبيه ماتعرف شي والاحلى انها خاينه هند : اضربني اذبحني فكني منك ومن شرك سالم : اصلا مستحيل اعيش وياج لحظه وحده يالخاينه انتي طــــــــــــــالــــق طـــــــــالق طـــــــــــالق وطلعي برع بسرعه ما ابي اشوفج هند انصمت اكثر وهي تصيح : حسبي الله عليك وعلى منى والله ينتقم منكم ومن عمايلكم .. وانا ما اصيح الا على هالسنين اللي قضيتها معاك سالم : ما ابي اسمع شي منج طلعي برع هند وهي تصيح ..راحت بيت اهلها ... ام خالد تسمع صوت الجرس خالد استغرب منو اييه بهالوقت ويوم يفتحون الباب يشوفون هند شعرها مفتوح وشكلها مبين انها انضرت وهي تصيح خالد : بلاج بلاج ام خالد تمسك هند وتحضنها وهند تصيح : بلاج امايه شو فيج هند وهي تصيح : امايه انا وسالم اطلقنا خالد انصدم والام اكثر الام : شووووووووو هند : كشفت انه يخوني مع ربيعتي ويوم واجهته ضربني خالد يبى يروووح . ام خالد : وين بتروح خالد : بروح ادبه الحقييييييييييير ام خالد : حلفتك بالله ما تروح .. خلاص مدام طلقها خلا يولي رب العالمين موجود وهو اللي بياخذ حق اختك خالد معصب: لا شوو يضرب اختي بادبه ام خالد : والله ما تروح يا ولدي خلا يولي هند وهي تصيح ... اااااااااااااااااااه امايه يا حسافه العمر اللي قضيتها معاه خالد وهو معصب: قلت لج قلت لج بتندمين ما صدقتيني ها يالله هذا اخيارج ..تستاهلين هند تصيح : كافي يا خالد كافي خالد طلع وهو معصب ... قلبه متقطع على اخته .. اما هند فتمت تصيح وما قدرت تسكت . وطبعا الكل عرف بطلاق هند وسالم ########################## وبعد مرور كم يوم .. ساره حست بالام الولاده ساره وهي تزقر ( تنادي )فهد : فهد فهد فهد نايم ما يسمع ساره : فهد قوم فهد قام : ها شو مستوي ساره ماسكه بطنها : احس بالام الولاده بسرعه بموووووووت اتصل بامايه بسرعه فهد توتر يحليله مايعرف شو يسوي يروح يمين وعلى طول خذ ساره وداها المستشفى .. ساره وهي بغرفه العمليات فهد ونوره والريم وام ساره يترون فهد وايد متوتر وهو اربع وعشرين ساعه يدعي : يارب يارب سهل ولادتها يارب وبعد مرور الوقت الدكتوره بشرتهم ان ساره ربت ويابت ( ولـــــــــــــــد)) فهد : مب المهم شو يابت المهم ساره شحالها ما فيها شي الدكتوره : لا الحمد لله بس هي الحينه نايمه فهد بروح اطمن عليها فهد دخل وشاف ساره نايمه والتعب واضح عليها فهد يحب راس ساره .. ساره فتحت عيونها فهد : مبروووووك يبتي ولد يا احلى ساره ساره ابتسمت : ومبروك عليك حبيبي فهد يمسح على شعرها : يالله ارتاحي ساره : ابي اشوف ولدي.. فهد : الحينه بييبونه الدكتوره يت ويابت الولد والولد كانه ملاك يشبه فهد نفس لونه بس شكل العيون على ساره وكان صدق غاوي ساره وهي مساكه ولدها بحضنها : فديته ولدي شحلاته فهد يمسح على شعره: الله هذا ولدي ماشاء الله .. سار ه: هذا ثمر حبنا يافهد فهد : الله يجمعنا دوووووووم ساره ردت من المستشفى والكل فرحان بهاليوم .. وقررو يسمون الولد باسم خليفه وسعاده فهد ما توصف ..كل دقيقه يلعبه ويكلمه وبعد مرور اسبوعين من ولادة ساره ساره تكلم فهد : حبيبي اليوم بروح ويا امايه والريم عسب نتشرى شوي حق ولدي خليفه فديته فهد : ما خلصتي ساره : لا والله ابي اخذله شوي اغراض فهد : وانا بروح ويا ربيعي عيل ساره : زين يالله عن اذنك فهد : ساره ساره تصد : عيون ساره فهد تقرب منها وحبها على خدها : احبج يا ساره انتي كل دنيتي وعمري ما شفت السعاده الا معاج ساره : وانا بعد احبك وعمري ما شفت الهنا والحب الا وياك ساره طلعت ويا امها والريم امافهد طلع ويا ربعه .. وبعد ما تشرو .. اغراض الياهل .. ساره وهي تكلم فهد وهم بالسوق : زين حبيبي نحن رادين البيت الحينه فهد : اوكي حبيبتي اترياج .. ساره : انت بعدك ما وصلت فهد : لا ان شاء الله بعد شويه ساره : اترياك حبيبي فهد : ساره ساره بقولج شي ساره : خير فهد بصوت واطي : ا ح ب ج ( احبج ) ساره بصوت واطي : وانا بعد احبك فهد : يالله حبيبتي اترياج اليوم اما هند فمن بعد طلاقها ويا سالم تغيرت وايد استوت اعقل عن قبل وتفكر بمنطق بس الحزن ما يفارقها كل ماتذكرت انها ضيعت عمرها ويا سالم تتحسر زياده واللي يعذبها زياده ثقتها في ربيعتها ..ودايما تردد حسبي الله عليهم دمرو حياتي.. وساره ونوره والريم وام ساره وهم رادين البيت ساره شافت حادث بالقو مستوي عند جسر ا لقرهود ساره مسكت قلبها : يمه شو مستوي الريم : حادث بليغ اللهم اجعله خير ساره وهي متوتره : اقول شوفي اي سياره الريم : السياره مب واضحه بس اعتقد سيارة **** ساره : الحمد لله يعني مب سيارة بورش الريم : : وي باسم الله على اخويه لا الحمد لله يالله الله يقومهم بالسلامه .. ساره : الله يعين اهاليهم .. وهم رادين البيت ..ساره طلبت منهم انهم يتعشون وياها طبعا بوجود فهد .... ساره يوم وصلت شافت سيارته عند باب بيتهم ساره : وي فديييت ريلي ف البيت الريم : عاد ما صدقت ساره : يعلني فداااااااااااااااه ساره دخلت طبعا مع نوره والريم وامها .ساره راحت المطبخ تجهز العشاء .. الريم : ساره وين فهد ساره : اكيد يتسبح بغرفته وهني تلفون البيت رن .. الريم راحت ترد ...ولا فجأأأأأأأأه الريم تصارخ باعلى صوته ساره فرت اللي عندها وراحت بسرعه عند الريم الريم وهي تصارخ وتصيح ما ينفهم شي منها ساره وقلبها يدق والقشعريره بجسمها : بلاج بلاج والكل متيمع عندها الريم وهي ميته صياااح : فهد فهد ساره فاتحه عيونها: فهد بلاه شو فيه الريم : فهد سوى حادث من شويه ومودينه المستشفى كان ويا ربعه ساره من الصدمه ماتعرف شو تسوي كل اللي سوته ان دموعها اربع اربع : فهد ريلي يعني الحادث اللي شفته كان فهد لا لااااااااااااااااااااااااا ساره وهي تصيح : ودوني المستشفى بسرعه الله يخليكم بسرعه ام ساره اتصلت بالدريول .. والكل كان موجود هناك حتى هند وساره والريم اكثرو اثنين صاحو الريم تصيح وهي بالسياره اما ساره فمثل الصدمه والحلم كل اللي تسويه انها تصيح بهدوء وايدها ع قلبها وصلو المستشــــــــفى ساره تركض عند الدكتور : دكتور انا مرت فهد **** طمني بلاه وينه الدكتور : والله فهد يا مدام تعرض لحادث بليغ وضربه بالمخ . ساره وهي تصيح : وشو حالته الدكتور : الصراحه حالته صعبه الله يستر الريم وهي تصيح ومحمد ماسكنها : اخويه اخويه بلاه الله يخليكم قولولي ام ساره ماسكه ساره .. الدكتوره طلعت مره ثانيه : منو ساره منو ساره ساره وهي تصيح : انا انا ساره الدكتوره : فهد يباج الدكتور : لا ممنوع الدخول الكدكتوره تكلم الدكتور : يناديها بكل وقت يقول بس دقايق الدكتور: مدام ساره لاتاخذين وتعطين وياه بس دقايق ساره : ان شاء الله الريم : انا بعد بييه الدكتور : اول شي خلا ساره ما يستوي كلكم ساره دخلت وشافت حالت فهد اللي تقطع القلب الربطه ع راسه والاكسجين عليه .. ساره قربت وهي ميته صياح بس بصوت واطي فهد يفتح عيونه وصوت متقطع : ساره ساره ساره راحت عنده وهي تصيح :لا ترمس يا فهد ان شاء الله ما بيستويلك شي فهد: ساره انا احس اني ما بعيش خلاص احس بالموت ساره : لا يا فهد لا تقول جي .. انت بتم ويايه مثل ما وعدتني بتم للابد ويا ولدنا خليفه فهد : صدقيني اذا مت ما بزعل لاني شفت السعاده و حسيت بالابوه بمده قصيره وحياتي كانت من اروع اللحظات ويمكن الله يعاقبني لاني حرمت انسان من السعاده ساره وهي ماسكه ايده : حبيبي فهد الله يخليك لا تقول جي موتك هو موتي فهد : ساره انا احبج وبحبج حتى بمماتي .. ساره : فهد فهد : خليني اكمل ساره شي دفتر ذكرياتي كل اشعاري كتبتها لج .. ما وصيج يا ساره على خليفه ولدي .. لاتحرميه من الابوه .. اطلب منج يا ساره اذا خالد تقدم لج ما ترفضينه عسب ولدي ما يتم بروحه ويكون عنده اب وما يعيش المر اللي عشته وانا متاكد محد بيحبه كثر خالد ساره : انت شو تقول ..فهد انت زوجي وانت حببيبي محد بياخذ مكانك الريم دخلت وهي تصيح : فهد اخويه اخويه فهد : لا يالريم لا تصيحين .. ما وصيج على ريلج وعلى الياهل اللي ف بطنج .. والله عوض علينا السعاده وانا لو مت صدقوني بستانس .. الريم نادي خالد بسرعه ساره وهي تصيح : فهد لا ترمس فهد ياخذ نفس بصعوبه : ساره ما وصيج لبي الامانه ما ابيج اتمين بروحج بهالدنيا الغداره واعرفي اني بغار حتى ف قبري بس ان شاء الله نكون من اهل الجنه واكيد وياج بالاخره .. خذت شوي من الدنيا وكنت وياج والاخره ان شاء الله كلها وياج ..ساره احبج ساره تصيح .. خالد دخل ومستحي .. ساره ابتعدت شوي عسب خالد يكلم فهد فهد وهو يبلع ريجه : خالد اسمحلي اخوي اعرف اني خذت حلم حياتك وصدقني فكرت اخليها لك بس شفت ان حياتي ما بتستمر بدونها.. واقولك اذاتحب ساره لين الحينه تزوجها بعد موتي .. لاني اعرف محد بيصونها غيرك .واسمحلي يا خالد اسمحلي خالد : مسموح اخويه وان شاء الله بترد بالسلامه فهد : رايتك بيضه والله .. خالد طلع .. ساره : فهد .. فهد مغمض عيونه وياخذ نفس : ساره اودعج لبي الامانه الريم تصارخ : اخويه شو تقول انت بتم ويانا فهد : الريم اختي الغاليه احبج يا اختي ..ساره انتي كل اهلي يا ساره احبج واحب ولدنا خليفه .. وهني حالة فهد ساءت اكثر ساره تشوف الموت بعيون فهد تصارخ تنادي الدكاتره ساره والريم يطلعونهم برع ساره امها ماسكتنها محمد ماسك الريم والكل على اعصابه الدكتور يطلع بعد فتره .. ساره : ها دكتور شو الدكتور منزل راسه وبحزن : البقــــــــاء لله ساره والريم : لااااااااااااااااااااااااااااااااااااااااا الريم يغمى عليها ..وع طول محمد شلها .. ساره طاحت من الصدمه وع الارض تصيح : لا مستحيل فهد يموت فهد وعدني يتم وياايه فهد ما بيخليني لااااااااااااااالا ااااااااااا ام ساره تحاول تشل ساره : بس يا امايه ساره تصارخ والشيله طاحت من راسها : ما ابي ..ابي فهد امايه الله يخليج قولي اني احلم نوره تمسك ساره ..بس ساره ما تقدر توقف .. ساره قامت وبسرعه تبى تدخل غرفة فهد بس الدكاتره يمنعونها .. ساره : امايه ابي فهد ..فهد ماماااااااااااااااات لا لا مستحيل فهد زوجي فهد كل دنيتي ..فهد ما مات لا مستحيل مستحيل وهني ساره اغمى عليها ساره وهي بالغرفه حاطين عليها الاوكسجين .. خالد طلع برع المستشفى وهو بغترته يمسح دموعه هند : خالد تصيح خالد : قطع قلبي فهد ..وساره شفتي حالتها اول مره اشوفها بهالحاله هند : يعني زعلان خالد : صح اني كنت ضد فهد وما كنت احبه بس عمري ما تمنيت الموت له .. يعلم الله اني يوم عرفت ان ساره مستانسه تمنيت السعاده لها وخليتها تعيش حياتها ..يحليلها ... ساره بعد ما قامت من الطيحه ساره تشوف امها عندها : امايه امايه ام ساره : ارتاحي يا ساره ساره اول ما نشت ( قامت ) حست كانها تحلم ساره مسكت ايد امها : امايه ابوس ايدج قولي اني كنت احلم صح انا احلم فهد فهد موجود صح الام تصيح : .. ساره : قولي امايه فهد موجود صح يترياني و قال بيترياني في البيت وينه ابي اشوفه اشتقتله ابيه وينه الام : بس يا بنتي اطلبيله الرحمه مب زين تعذبين روحج ساره : لا لا فهد مامات فهد بس طاح ف المستشفى ساره قامت بسرعه ع الغرفه اللي فهد مرقد الام تلحقها ساره يوم وصلت شافت من المنظره الصغيره اللي بالغرفه شافت دكاتره داخل وغطاء مغطي ويه فهد ساره تحرك راسها : فهد فهااااااااااااااااااد الام تمسكها : بس بس يا ياساره رحمي حالج ساره : فهد ما ماااااااااااات فهد موجود ..فهد ..اااااااااااااه يا امايه راح عني حبيبي ام ساره تمسكها يالله يابنتي خلانرد البيت ساره : لا ابي اروح بيتي هو بيت فهد .. ام ساره : مب زين اتمين بروحج ساره : ما ابي ما ابي ام سراه : خلاص بييه وياج الريم ويا محمد .. والريم كل دقيقه تصيح تذكر ايام طفولتهم ساره يوم دخلت غرفتهم شافت صورة فهد مع صورتها ..ادمعت ودخلت شافت الشموع .. ساره وهي تصيح : فهد فهد مكانك خالي ساره تشوف غرفتهم تذكرت ايامهم تذكرت كلام فهد الحلو وتذكرت كل لحظه وياه .. ساره تذكرت دفتر الذكريات .. تذكرت ان فهد قالها خلا تقرى تمت تقرى اول خاطره بعنوان ((مجنون ساره)) وطبعا دموعها اربع اربع واخر كلام كتبه احبج يا ساره وبحبج حتى بعد موتي ساره ما نامت واربع وعشرين ساعه تصيح مب مصدقه عمرها .. ساره مسكت ولدها تمت تصيح ساره وهي حاضنه ولدها : ااااااااااااه يا ولدي ما شفت ابوك .. الا ايام .. ما بتتهنى بعطفه وبقلبه الكبير .. بس الحمد لله ان عندي ثمره منك يا فهد عندي ذكرى منك عندي ولدنا الوحيد ...والله أشم ريحة ابوك .. وف اليوم الثاني الصبح ام ساره راحت غرفة ساره شافت ساره نايمه عند ولدها وشكلها مبين عليها التعب تحت عيونها شي انتفاخ ..ساره وهي نايمه تناديه فهد فهد ام ساره تمت تصيح وتقول : فديتج يا بنتي استويتي ارمله بصغرج ..الله يرحمك يا فهد ..الله يرحمك ساره حالتها مب مثل قبل دايما يوم تضايج تروح صوب البحر وتصيح على فهد .. وقررت ان تغير اسم ولدها من خليفه الا اسم (( فــــــــهــــــــد))) وهي تشوف ولدها تذكر فهد الريم بعد دايما تصيح يوم تذكره ..فهد غالي ع الكل هند مع نوره وام خالد خالد دخل عليهم وهو متوتر : السلام عليكم الكل : وعليكم السلام خالد : هند ما عرفتي شو مستوي هند : لا خير خالد : سالم ومنى مسوين حادث وحالتهم صعبه هند فتحت عيونها : شوووووووو خالد : هيه والله سالم اللي اعرف عنه ان صار له شلل نصفي بس بيتعافى بالتمارين الطبيعيه ..يعني يباله اقل شي 6 اشهر ومنى سفروها برع .. ويقولون نص ويها اتشوه لان جامة السياره يت على ويها ام خالد : لا حول ولا قوة الا بالله هند : رب العالمين ما يودر الظالم خالد : لا يا هند لا تشمتين ..حرام هند : ما تشمت .. بس هو نسى ان الله يشوفه خاني وضريني واهاني وظلمني وماكان ويا ربه ..اما منى تفتخر بجمالها شوف شوصار .. ام خالد : الله يعافيهم ..روح يا ولدي زور سالم مهما كان هذا كان نسيبك ف يوم من الايام .. خالد : قلت بروح قالو حالته النفسيه صعبه ام خالد : سبحان الله يمكن يتوب بعد هالحادث .. خالد : وعسى ان تكرهو شيئا وهو خيرا لكم وبعد مرور عدة اشهر من موت فهد ... فهد الصغير كبر واستوى عمره 6 اشهر تقريبا وملامحه على ملامح فهد ساره تغيرت وايد اكثر من الريم لا تضحك ولا تبتسم استوت اكثر جديه وهدوووووء وكل يوم تصيح على ريلها .. خالد يكلم امه : امايه ساره خلصت العده من زمان ابي اتزوجها ام خالد : استخفيت ريلها من شويه مات خالد : وصية فهد .. بعدين لين متى بتم بهالحاله والله شكلها يقطع القلب .. ام خالد : اخاف افاتحها بهالسالفه اخاف تعصب ترى ساره استوت عصبيه وايد خالد : كلميهم وشوفي ام ساره تكلم ساره ام ساره : يمه ساره بقولج شي بس لا تعصبين ساره بهدوء وهي ماسكه فهد الصغير ولدها : خير ام ساره خايفه من ردت فعل ساره " ساره خالد متقدم لج ساره قامت وعصبت : شوووووووو هذيله شو يتحرون اللي مات مب زوجي اللي مات قلبي ..قلبي يا امايه وقلبي ما ت من بعد موووووووووت فهد ساره تمت تصيح : لالا فهد مامات فهد بقلبي واحساسي وكياني اااااااااااه يا فهد احبك واحب كل اللي يذكرني فيك ام ساره : بس ساره : امايه خليني جي احسن ما ابي حد يكلمني ساره طلعت من الغرفه وهي معصبه ساره بخاطرها (( ااااااااه يا فهد لو تعرف كيف دنيتي بدونك تذكرت ساره كلمة يا بعد هلي .. محد يسواك يا فهد لو الف الدنيا كلها محد يسواك )) وبعد مرور سنه ونص على موت فهد ... اللي صار ان نوره ربت ويابت احلى توام (( سيف , وغيث)) وهم اصغر من ولد ساره ب3 اشهر والريم ربت ويابت بنت اسمها العنـــود وكانت تشبه الريم بحلاتها ... وبنتها صغيره يعني بعدها ما تمشي .. سالم تعافى من بعد الحادث بس اللي تعلم من بعد الحادث شي واحد حديث الني كما تدين تدان ).. لانه ماطاع ربه وخان زوجته والله انتقم منه بخيانة زوجته ..وهالشي خلاه يتوب ويطلع انسان صالح وتايب وندم ع كل شي سواه مــــــــــنى: من بعد الحادث ماتغيرت وايد .. بس منقهره ان نص جمالها راح .. واللي ماعرفته ان الجمال جمال الروح مب بالشكل .. وطبعا عمها يوم عرف عنها انها طالعه ويا واحد غريب طلب من امها ان منى اتم عنده عسب يادبها ويمنعها من اي ظهره .. اشواق : عرفت بموت فهد وصاحت عليه ودايما تدعيله .. وهي بعد تزوجت من كم شهر وعرفت انها كانت معجبه بفهد لا اكثر.. اما ســـــــــــاره فحياتها كله مع ولدها فهد كل ما يكبر تذكر فهد .. فهد يمشي الحينه ويقول ماما .. ساره بعدها تعاني ..ببعد فهد خالد مصر على ساره وكل مره يتقدم وهي ترفضه وقرر هالمره ايييه عندها ويكلمها ساره : ما ابي اشوفه يا امايه ام ساره : خلا يكلمج دقايق .. يالله الريال يترياج عيب يالله تعالي الميلس ساره : ما ابي ما بي ام ساره : والله لو ما رحتي عنده ما اعرفج ولا تعرفيني ساره يلست ويا خالد .. خالد لين الحينه يحب ساره ويموت عليها خالد : شحالج بنت خالتي ساره مطنشته وبجديه : بخير خالد : ساره انا اتقدمت اكثر من مره لاني اباج وتعرفين اني ضحيت بهالسنوات كلها عسبج يا ساره وعمري ما فكرت بغيرج .. وانا لين الحينه شارنج ساره بجديه : نسيت اني لين الحينه احب زوجي خالد : اعرف هالشي .. كافي حالتج كيف استوت من بعد موت فهد الله يرحمه ساره ادمعت خالد : بس لا تنسين فهد وصاني عليج ووصاج انتي بعد هاي امانه والامانه برقبتنا نحن الاثنين .. ساره تذكرت ان فهد طلب منها اذا خالد تقدم لها ما ترفضه عسب ولدها ما يتم بروحه بدون ابو خالد : ساره انا اعرف انج تحبين ريلج ..ومب يعني اذا تزوجتي غيره انج ما تحبينه ..فهد مات الله يرحمه يعني لو تزوجتي غيره ما بيحس لانه بينه وبين ربه الحينه ماعنده غير الحساب .. ساره تدمع ... خالد : وهو طلب هالشي لا تنسين وانا اعرف انج تحبينه وما بعارض ع هالشي ومتاكد مثل ما اخلصتي لريلج فهد ..اكيد بتكونين زوجه مخلصه لي وما اطلب انج تنسين فهد .. لان عندج ذكرى فهد بوجود ولدج الصغير والله اني اعتبر ولدج مثل ولدي والحقد مب بقلبي واوعدج اني اعاملج بكل طيبه وحب وما بمنعج من ذكرى ريلج .. بس ع الاقل لا تحرمين عمرج من الفرصه ترى انتي بعدج صغيره يا ساره .. ما تبين ولدج يكون عنده اخوان ولا تبينه بروحه مثلج .. ساره سكتت خالد : وانا قلت لج ما بمنعج من فهد .. اعرف غلاته عندج .. خالد وقف : بعطيج فكره تفكرين .. واللي تبينه راح اسويه ساره بعد تفكير اتذكرت وصية فهد بان ساره تزوج خالد .. واتذكرت ان ولدها بيكون وحيد .وان محد بيستحملها وبيستحمل ولدها غير خالد لان خالد قبل كل شي ولد خالتها يعني اكيد بيصونها .. وبعد اصرار امها وافقت ساره ع الزواج من خالد بس بشرط ما شي عرس وحفله بس كتب كتاب وخالد هاليوم عنده من احلى ايام عمره يتريه من سنين ووافق وتزوجت ســــــــاره خالد . . بس ذكرى فهد لين الحينه موجوده بقلبها بالذات بولدها فهد الصغير بس خالد متفهم وايد وعمره ما حسسها بالضيق .. ساره غصبن عنها تذكر فهد وهي تعرف ان مستحيل تحب اي حد شرات فهد ..بس هالشي ما يمنعها انها تحترم خالد وتعزه وما تبين انها لين الحينه تذكر فهد .. وهند ....... تقدم لها واحد اسمه سلطان ..من عايله معروفه مدين وخلوق وهو مطلق بعد والسبب زوجته الاولى وتسلطها وافقت هند لان الريال سمعته زينه .. وبعد مرور سنتين الكل طلعو الرياييل صوب والحريم صوب صوب البحر بمكان هادي الحريم هند ونوره والريم وام ساره وام خالد وساره ساره و هي ماسكه فهد ولدها : تعال حبيبي لا تروح هناك فهد الصغير : ابي بهر بهر ( بحر )) الريم : فديته يحب البحر شرات ..( سكتت)) تذكرت اخوها ساره : ها وين بنتج الريم : هذي ويا البشكاره تلعب نوره : ماشاء االله تشبهج حلوه مثلج ساره : ها نوره وين التوام نوره : ويا ابوهم ساره : كيف تفرقين بينهم نفس الشكل نوره : من الشامه اللي بويهم .. هند : سبحان الله دنيا ..تذكرون يوم كنا صغار نوره : الحمد لله ريلج ما لحق على خبالج هند : هههههههههههه هي والله استغرب يوم اتذكر صدق كنت خبله ساره : زين تذكر بعد ساره : وشو ريلج وياج هند : يحليله سلطان طيب وخلوق نوره : يالله الحمد لله كل حد عنده ياهل ومستانس ساره تمسك فهد: فديت هالولد ..اللي بدنيتي كل شي الريم : ماشاء الله غاوي غاوي ( تمسك عمرها تذكر اخوها )) نوره : هيه ساره تعالي انتي اي شهر حامل ساره : توني بالرابع الريم : وشو ببطنج ساره : ما ادري يوم جيكت قالو احتمال بنت الريم : الله بتاخذ حلاج زين شو حاطه ف بالج تسمينها ساره : الغاليـــــــه نوره : حلو الشباب الكل وبا بعض محمد وسلطان ( ريل هند ) وخالد ويا بعض يسولفون ويضحكون خالد يصد من بعيد يشوف ساره طرش لها مسج ساره شافت المسج مكتوب : احبج يا ساره اعشقج ساره ابتسمت .. نوره : منو ساره : خالد مطرش مسج نوره : يا عيني عالحب ساره قامت .. الريم : وين ساره : يباني اروح عنده يبى يقولي شي..نوره مسكي فهودي نوره : من عيوني ساره ويا خالد .. خالد : هلا بساره هلا بعمري كله ساره : هلا فيك خالد : تصدقين اشتقتلج ساره : والله دقايق ابتعدت عنك خالد : كل ثانيه اشتاقلج ساره ابتسمت خالد : شرايج اتفقت ويا الشباب كل واحد ومرته يطلعون ع العشاء بروحهم ويا عيالهم طبعا ساره : فكره حلوه خالد : يالله حبيبتي خبريهم ساره خبرتهم وكل واحد ويا مرته ############################### هند ويا سلطان ف بداية حياتهم ..يتعشون برع بروحهم سلطان ريل هند : ها هند ان شاء الله استانستي هند : هي اكيد مدامك معايه سلطان : الصراحه احس بالسعاده وياج .. يقول خالد انج فوضويه يوم كنتي ف المدرسه وعنيده هند تضحك : فضحني اخويه هيه ما لحقت عليه كنت عنيده وايد وشوي خبله سلطان : زين عيل ما لحقت .. الحمد لله خذتج الحينه هند : ههههههههههه لا شو قصدك سلطان : مب قصدي شي حبيبتي..اسولف وياج .. يالله نطلب لنا عشاء ############################# نوره وعبدالله ومعاهم توام سيف وغيث نوره وهي تطلب عشاء نوره : شو تبى حبيبي عبدالله : على هواج .. نوره : وي امسك غيث بيطيح عبدالله : غيث اشطن من سيف ماشاء الله يبالهم بشكارتين نوره : ههههههههه فديتهم والله عبدالله : وانا نوره : اكيد انت ابوهم ..انت الغالي انت حبيبي عبدالله : يا عساني ما انحرم منج نوره : ولا منك ومن عيالي الريم ويا محمد وبنوتتهم الصغيره العنود محمد ماسك العنود محمد معصب: اقول العنود خيستني الريم : هههههههههههه قلت لك بشيلها قلت لا انا باخذها باحضاني محمد : فضيحه خيستني الريم : وي فديت بنتي لا تعصب عليها محمد: الحينه انا الضحيه وتتفدين بنتج الريم تضحك : وفديييت ريلي ولا تزعل .. محمد : اذا جي اوكي .. بروح اغسل كندورتي اوكي حبيبتي الريم : اوكي حبيبي..اترياك .. واخيرا ســـــــــــــــــاره ويا خــــــــالد ويا فهد الصغير ساره تاكل فهد ولدها .. خالد يشوف ساره بتامل ساره تشوفه : بلاك حبيبي ليش ماتاكل خالد : مب مصدق انج واخيرا زوجتي ساره : يحليلك يا خالد ضحيت عسبي خالد : هي والله ما فكرت الا فيج .. بعد تعرفين حب الاول هو الحب الحقيقي والدايم ساره : مستحيل انسى وقفتك ويايه بالذات بداية زواجي منك احترمتني وصبرت عليه مشكور مشكور ياخالد خالد: افا عليج يا نور عيوني .. تشكريني يعلم الله اني سويت هالشي من خاطري بعدج ماعرفتي غلاج عندي .. انتي النور اللي اشوفه بحياتي انتي حلم طفولتي انتي حبي الاول والاخير ساره تبتسم : تسلم حبيبي الله يخلينا لبعض خالد :امين يارب ساره تحب خالد ..لان خالد ما قصر وياها وهي بعد ما تقصر وياه ... بس ساره لين الحينه تدعي لفهد بالخير وتشوف فهد بولدها الصغير .. ودايما تذكره ..لان فهد هو اللي علمها الحب المخلص ...بس هي اكيد مخلصه لخالد لانه ريلها ساره وخالد قصتهم من اروع القصص وساره ربت ويابت بنت وسمتها الغاليه يعني خالد وساره عندهم (( فـــهد والغاليه*)) وعاشو حياتهم باروع اللحظات .. وذكرى فهد موجوووووده مع الكل ... النهـــــــــــــــــــــــــــــايه و في النهاية اطلب منكم السموحة على القصووور و اذا ما عليكم امر بس شنو موقفكم من فهد؟ من سارة خالد هند ؟؟؟ منى اشوق نورة الكل باختصار سلام Quote Link to comment Share on other sites More sharing options...
منقهرهـ Posted أغسطس 7, 2008 Report Share Posted أغسطس 7, 2008 وآآآآآآآآآي صج صج صج صج قصهـ روعـــه ومؤثرهـ :'( ما توقعت انه خالد وسآره بيزوجون تسلميـــــــــــــــــــــن آسيروـو الله لا يحرمنهـ منج ولا من مواضيعج الروعــــهـ Quote Link to comment Share on other sites More sharing options...
أسيرة الورد Posted أغسطس 7, 2008 Author Report Share Posted أغسطس 7, 2008 تسلمييين منقهرووووو حبيبتي منورتنننننننننا فديتج يلا وين الردووووووود القصة و خلصت يلاااااااااااااااا Quote Link to comment Share on other sites More sharing options...
ولد البحرين 1990 Posted أغسطس 7, 2008 Report Share Posted أغسطس 7, 2008 مشكووووووووورة أسيرة الورد على القصة الروعة والمؤثرة وننتظر مواضيعج الحلوة والمشوقة Quote Link to comment Share on other sites More sharing options...
أسيرة الورد Posted أغسطس 7, 2008 Author Report Share Posted أغسطس 7, 2008 تسلم اخوي ع التواصل الحلووو:$ Quote Link to comment Share on other sites More sharing options...
ولد البحرين 1990 Posted أغسطس 8, 2008 Report Share Posted أغسطس 8, 2008 لا شكر على واجد يالقمر الصراحة هذي من ذووقج الحلو وانتين احلى Quote Link to comment Share on other sites More sharing options...
أسيرة الورد Posted أغسطس 8, 2008 Author Report Share Posted أغسطس 8, 2008 :$ Quote Link to comment Share on other sites More sharing options...
بنت الحداده Posted أغسطس 18, 2008 Report Share Posted أغسطس 18, 2008 يعطييج العافية اسيرو Quote Link to comment Share on other sites More sharing options...
مينونة ومخرفة ومخرخشة Posted أغسطس 18, 2008 Report Share Posted أغسطس 18, 2008 القصة وايد وايد روعة .. يعطيج العافية .. Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.