Jump to content
منتدى البحرين اليوم

أحبك .. لو بغيت انساك ما اقدر


Recommended Posts

القصه هاي قريتها وعجبتني واااااااااااايد.. ومتأكده انها راح تعيبكم..

وهي للكاتبه.. شامسيه_عسل

اتمنى انكم اتابعونها ويانا

 

 

 

الجزء الاول:

الإمارات____ دبي

نشت أم عمر على صلاة الفجر.. وكالعاده نش معاها أبو عمر... ظهرت لحجر عيالها تواعيهم للصلاه.. وفي طريجها شافت حرمة ولدها العود عمر....(الهنوف)).. .

الأم: هلا و الله بالغالية حرمت الغالي

الهنوف: صباح الخير عموه كيف اصبحتي اليوم؟؟

الام: بخير الله يسلمج .. ها قام عمر ولا بعده..؟

الهنوف: أكيد نش، دام اللي موعتنه سلامه بنته

الام: فديتها والله الله لا يحرمني منها

الهنوف: وهي تبتسم بس سلامه ؟؟

الام: سلامه و أم سلامه وأبوها بعد.. يعلي فداكم

الهنوف و هي تحب راس أم زوجها: الله يخليج لنا يا أم عمر

 

الهنوف تكون ابنة عم عمر .. يتيمة الأب ، توفى والدها وهي صغيرة.. قامت والدتها بتربيتها هي وأخيها الذي يكبرها بسنتين (خليفة) .. ,وأختها علياء (19 سنة).. تزوجت الهنوف بابن عمها عمر بسبب قرابته بالرغم إنها لم تكن تعرف عنه شي سوى انه ابن عمها.. كان عمر معروفا بغروره و كبريائه و جماله و وسامته.. كانت تعرف بمغامرات زوجها و علاقاته.. ولكن الهنوف أحبته بعد زواجها منه و قررت إنها تستحمله بالرغم من آرائه وأفكاره الرجعية.. كانت فتاة جميلة وحنونة وطيبة القلب... احبها أهل زوجها وارتبطت بهم بسرعة كبيره... كانت تحترم زوجها و لا تعصي له أمرا بالرغم من بروده الشديد معها وقلة اهتمامه بها... تزوجته منذ خمس سنين وهي في سن 19 . و لها من الأبناء عبدالله 5 سنوات و سلامة وعمرها 3 سنوات.

 

أما عمر .. فهو اكبر اخوته .. عمره 28 سنة... يعمل في شركة والده منذ أن أنهى دراسته... بالرغم من علاقاته الغرامية ألا انه لم يفكر يوما في الزواج بأي فتاة تعرف عليها.. ولهذا عندما قرر والداه أن يتزوج بابنة عمه وافق بسرعة ولم يعترض... ومع هذا استمر في علاقاته دون الاهتمام بمشاعر زوجته. . او حتى مراعاة ابنائه..

 

أكملت أم عمر طريقها إلى غرف أبنائها و دخلت على ابنها فيصل

الام: فيصل والصمخ نش يالله

فيصل: بسم الله أصبحنا واصبح الملك لله.. خير اماايه شو بلاج؟

الام: أي خير .. عنبوه ماجد ييتك الصبح واشوفك ناش و متزهب حق الصلاة.. لازم يعني اركب الدري واييك لين حجرتك عسب اوعيك قم يالله أبوك واخوك يتريونك..

فيصل: بعده يا امايه توه ماذن اتريي لين ما يقيم الصلاة

الام: لا بارك الله فيك .. قوم يالله أنا ادري شو اللي بخليك تصطلب . ماشي غير العرس

فيصل نقز من على الشبريه : لا فديتج يالغاليه ها نشيت الحينه بسير اصلي و بتشوفيني أول واحد ناش حق الصلاة من اليوم وساير . بس فديت روحج لا تيبيلي طاري العرس .. كل ماسمع كلمة عرس بطني يعورني

الام: بتعرس وريولك فوق رأسك... عنبوه اللي اصغر عنك عرسوا وأنت بعدك .. قوم الحينه وبعدين بنتفاهم

فيصل: إن شاء الله .. في الأحلام

الام: شو قلت ما سمعتك

فيصل : ها لا فديتج ما قلت شي.. يالله الحينه بنزل

الام وهي ظاهره : حشا مب ولد ما قول غير الله يهديك

.. ظهرت الام وعلامات الحزن على وجهها.. كانت تتمنى أن ترى أبناء فيصل .. كانت تحبه كثيرا اكثر عن أبنائها الآخرين و لكنها لم تبين يوما ذلك حتى لا تولد بذرة الغيرة في نفوسهم

 

فيصل الابن المدلل في العائلة طبعا بعد ريم...يتجاوز من العمر 25 سنة.. انتهى من دراسته في المعهد البريطاني بالرغم من رغبته في إكمال دراسته في الخارج .. إلا أن والديه رفضا الأمر و بشدة.. ولم يشأ عصيان رغبتهما.. وقام بالعمل مع أخيه عمر و والده وابن عمه خليفة... فيصل لم يكن اقل شانا من أخيه عمر.. فهو معروف بشقاوته و علاقاته والتي لا تنتهي أبدا..

 

ذهبت أم فيصل إلى غرفة بناتها.. أولا بدأت بغرفة خلود وحمده.. دخلت الغرفة فرأت خلود تصلي صلاة الفجر.. واما حمده فما زالت نائمة.. كالعاده تحلم بأنها جالسه في وسط القاعة الكبيرة ومن حولها الفتيات اللواتي يتأملن جمالها ثم يدخل عليها أمير أحلامها الغني ومعه العقد الماسي الرائع ثم اقترب منها وقال...

حمدووووووووووووووووووووووه .. نشي يا مسودة الويه

حمده نهضت بسرعة و علامات الخوف على وجهها: وين راح خله ييب الألماس ويروح .. وينه..؟؟

الام: أي الماس ؟؟ لا حول ولا قوة إلا بالله منج .. أنتي بتذبحيني أنتي واخوج فصول بتذبحوني يا ربي شو أسوي أنا فيكم... نشي لا بارك الله فيج .. عنبوه ما تشوفين اختج تصلي وأنتي تفكرين في الألماس قومي يالله..

حمده: امايه أنتي؟. ... والله حرام عليج ... جان اتريتي 5 دقايق ..توه بيعطيني الألماس .. ليش يا امايه ليش ...خاطري اتهنى في حلم من أحلامي ... يا ربي ليــــــــــــــــــــــــــــــــــــــــــــــــ

 

ــش

الام: بتنشين ولا أحط هالفرد بين عيونج...يالله قومي

حمده: إن شاء الله الحينه بقوم .. بس برد ارقد .. يوم بيعطيني الألماس بنش اوكي..

الام: اوكي في خشمج... قومي يالله وراج الجامعة.. يالله بسرعة نشي

في هذا الوقت انتهت خلود من أداء صلاتها.. و كانت تبستم على موقف أختها حمده ... ذهبت لتقبل راس والدتها

خلود: صباح الخير يا أحلى أم في هالدنيا

الام: فديت روحج والله محد مصبرني في هالبيت غيرج أنتي.. والله مادري شقايل بعيش في هالبيت بوجود فيصل و حمدوه بدونج.. يعلي ما خلى منج يا رب

خلود: الله لا يحرمني منج يا امايه... ترى هذيله عيالج.. يعني تتحريني مادري بغلاة فيصل... ادريبه يسوانا كلنا.. ولا ريماني ... وتراها روحج و غناتج.. وحمدوه هاي تراها امج .. نسيتي يدوه حمده ....

الام: ما نسيتها بس مادري بلاها ختج ما ظهرت على امايه .. عنبوه ما تفكر إلا في الريل و الفلوس و الألماس ... اللي يشوفها يقول عايشه في فقر

خلود: خليها يا امايه تحلم دام الحلم ما بيظر

اللام: بنشوف أخرتها وياها .. بسير أوعي خواتج.. إن شاء الله قامن ولا بعد هن يتريني شرات خوانج

خلود: لا .. واعيتهن و نشن ...

الام: خلاص عيل اترياكن تحت يالله قومن.. وكانت توجه كلامها إلى حمده

الام: حمدوه والصمخ كمن مره وعيتج بتقومين والله بخلي ابوج ييج الحينه

حمده : والله والله والله بنش ها شوفي... وكانت طبعا مغمضة عيونها والحزن مغطي ويهها

 

خلود اكبر أخواتها عمرها 22 سنه .. تخرجت من الثانوية و اكملت دراستها الجامعية في كلية التقنيه

( محاسبة) .. قررت أن تعمل و فعلا وجدت وظيفة راقيه في بنك محترم... كانت فتاة طيبه جمالها رائع.. تتميز بشعرها الطويل الكستنائي... خلود فتاة متزنة و لكنها عصبية بصوره كبيرة ... انخطبت اكثر من مره ولكنها لم توافق.. لانه في نظرها لم تجد الانسان المناسب...او لانها لم تكن تفكر في الزواج كثيرا..

 

حمدة فتاة رائعة الجمال عمرها 21 سنه... مغرورة متسلطة تحب نفسها كثيرا... اكثر أخواتها اهتماما بالمنظر و الشكل الخارجي... تدرس في جامعة زايد ( إدارة أعمال)..حلمها الوحيد هو الزواج برجل غني لديه من المال الكثير ..يحب السفر مثلها وكانت تتمنى انه يكون جذاب رائع وسيم ... تحلم بفارس أحلام ولكن ليس على جواد وانما بسياره بأحدث موديل..شعارها ( تزوجي من يحبك ولا تتزوجي بمن تحبينه)

في غرفة عذابه و ريم..

عذابه و هي تمشط شعرها الطويل الناعم...: تدرين ريماني حلمت بني تزوجت واحد حلو... كان يحبني ويموت فيه .. ياربي مت بيتحقق هالحلم.. متى

ريم: أف منج ومن خواتج.. عنبوكم ما تفكرن إلا بالعرس... يا حبيبتي في شي اسمه المستقبل .. يعني انج تعيشين حياتج وتكونين نفسج و تبنين احلامج ...

عذابه: أخاف انج ولد وأنا مادري... شو أكون حياتي .. شو تشوفيني فيصل...أمايه الولد اللي يكون مستقبله و البنت بتكون مستقبلها مع ريلها ..

ريم: انزين ولو اللي بتاخذينه ماله مستقبل.. شو بتسوين؟

عذابه: بساعده وبوقف معاه لين ما يوقف على ريله..

ريم: هيه صح بدت الأفلام الهندية تشتغل و بعدين بيخونج وبياخذ غيرج...

عذابه: بسم الله عليه .. ليش أنتي جيه تفاولين.... تتحرين كل الشباب نفس الشي

ريم: هيه نفس الشي.. طاعي خوج فيصل.. ما شاء الله عليه كل شي عنده مال وجمال واخلاق... بس مع هذا مغازلجي ...

عذابه: اللي بآخذه بيكون غير... غرقت عذابه بأحلامها الوردية الرومانسية

ريم: إيه أنتي ... وين وصلتي ... أي جزء من احلامج... إن شاء الله الحلقة الاخيره..

عذابه لم تأبه لحديث ريم ... كانت على أمل و يقين إنها سوف تجد من يحبها ويحترمها ولم يكن يهمها المال وانما تهتم بالشخص نفسه..

 

عذابه فتاة هادئة الطباع .. جمالها بسيط ولكنه ملفت بشكل كبير... شعرها الأسود كسواد الليل هو الذي منحها الجمال العربي الأصيل.... تحب الحب و الرومانسية ...عمرها 19 سنه وتدرس مع شقيقتها في جامعة زايد (art designer)..تحب الفنون و بشكل خاص الرسم...

 

ريم...اصغر أخواتها مرحه وشقيه.. معروفه بشقاوتها و طيبتها ومرحها وجمالها أيضا... تحب الفرح وتحاول دائما الابتعاد عن الحزن... تحب مساعدة أخواتها .. لم يكن الحزن يظهر على وجهها الطفولي ... لذا كان الجميع يحبها و يلاطفها... الحب والزواج مشروعان بعيدا الأمل عن حياة ريم... كانت تحب الدراسة وشغلها الشاغل حياتها المستقبلية تطمح للحصول على نسبة عاليه في دراستها الثانوية و بذلك تصبح قادرة على دراسة الهندسة... حلم حياتها..

 

 

نزل الجميع ما عدا ريم... وقاموا بتناول الطعام...

عمر: أبويه تراني اليوم بسير شركة منصور بن ضاحي... بيراويني المشروع اللي بيسويه .. و إذا عيبني تراني بشترك معاه..

الأب: يا بويه شو تبا بعوار الرأس .. تدري إذا خسر المشروع كم بنخسر....

عمر: ليش تفاول أنت .. ما بيصير إلا الخير.. بنتوكل على الله شو رأيك فيصل؟؟

فيصل و هو منشغل في الأكل: والله على راحتك ... اللي تشوفه سوه وأنا موافق

الام: مادري متى هالولد بيتغير و بيحس شويه... يابويه ها حلالك لازم تساند أبوك واخوك...

فيصل: إن شاء الله .. يالله بترخص عنكم ... مع السلامة.. وخرج فيصل دون أن يهتم بحديث والدته..

الأب: ماعليج منه يا أم عمر.. دامه ما يفتكر خليه.. روحه بيرد و بيحس فيني..

عمر: اللي يسمعكم يقول ما عندكم غيره.. وأنا وين سرت.. اظني إلا ولد البطة السوده

وريم وهي نازله : يا ويلي أنا ... منو اللي أمه البطة السوده؟

عمر: أنتي وشلج... احيدج صاخه ما تتدخلين في رمسة غيرج... ولا حمدوه عادتج و استويتي شراتها رزه

الام: محد أمه البطة السوده... عمر تراك تاج رأسي .. ومحد يسواك يا وليدي... بس تدري بحسرتيه على خوك.. مادري متى بيتغير...

الأب: يا عمر أنا بدونك مادري شو بيستويبي... بس تدري منيتي أشوف أيد خوك على أيدك وتشوفون الحلال مع بعض قبل لا موت

خلود: الله لا يحرمني منك يا بوعمر...ان شاء الله ما بيستويبك شي...نسيتنا احنه.. عنبوه بناتك بعدنا ..

الأب: فديتكن والله .. انتن هواي اللي اتنفسه.. وخاصة ريماني .. وردة حياتي..

ريم: فديت الغالي والله....وتقوم تبوس راس ابوها و تلوي عليه...

حمده: يا ويل حالي أنا .. عيل حرمتك شو... سمعتي يا أم عمر...

الأب : هاي حياتي كلها ... يعلني ما خلى منها

عذابه: يا سلام يا سلام ... من صباح الله خير جيه... خلاص خلوني اليوم أتم معاكم في البيت عسب أشوف هالفلم الرومانسي...

خلود: يا حبها عسوالف الرومانسية..

عذابه: يالله طاعو من يرمس مب جنج تصبحين و تمسين على اغاني الرويشد

الام: انجبي يالله وقومي روحي جامعتج... بنات آخر زمن

خلود: يالله عيل بسير أنا بعد... أبويه يمكن أتأخر اليوم لانه عندي شغل

عمر: أنا مادري ليش تشتغلين.. كل اللي تبينه عندج .. شو حاية الشغل عيل..ولا بعد بتتاخرين . أبويه أنا من أول قايل ما يحتاي تشتغل بس أنت الله يهديك.. ما تشوف نص اللي يشتغلن رايحات فيها

خلود: شو يعني رايحات فيها... شو تشوفني ... الحمد لله أنا متربية و أخاف ربي.. ويوم انك بتشك في تربيتك هييج الساعة ارمس..

عمر انزعج من كلام أخته... وحاول ان يرد عليها بس زوجته الهنوف حاولت تهديه

الأب: شوف يا عمر صح انك خوها العود بس الشور شوري دام أنى عايش... وختك ما تسوي شي غلط...ولازم تحط في بالك أنها مب شرات اللي تعرفهن فاهم

عمر وهو منزل رأسه: الله يعطيك طولت العمر يابويه... واسمحلي بس أنا مب عابني هالوضع

الأب: قوم خلنا نروح الحينه بنتاخر عالشركه

وخرج عمر مع والده ...

الهنوف: ليش يا خلود تردين عليه جيه..

خلود: ما تشوفينه ريلج.. كل يوم فاتحلي هالموضوع .. والله مليت ..شو أسوي يعني اقعد في البيت...دام أني محصله وظيفة غيري يتمنن ياخذنها ليش ماشتغل

الهنوف: والله حاسة فيج .. بس أنتي تدريبه وتدرين حركاته.. خليه يرمس ولا تردين عليه

الام: صدقج يالهنوف... امايه خلود خليه يرمس على راحته دام أني وابوج موافقين ماعليج منه

ريم: عيل جهزوا عماركم من الحينه... تراني بشتغل مب تسوولي شرات خلدو

الهنوف: أنتي خلصي دراستج و تخرجي من الجامعة أول شي هذيج الساعة يصير خير

حمده: الحمد لله .. أنا بعرس و بفتك من سوالف الشغل والدراسة بعد... ريلي فديته مابيقصر عليه في شي.. كل شي أباه بيعطيني إياه... فديته والله

الام: صدق انج فاصخة الحيا .. عنبوج بعده مايا و يالسه تتفدينه جيه.. قومي ذلفي يالله روحي جامعتج... صدق ما تستحين

حمده وهي تحب راس أمها: فديت روحج يالغاليه... لا تغيظين.... امووووواح على راسج شو تبين اكثر.. بس لا تزعلين.. كله ولا زعلج

عذابه: يالله خلنا نروح.. تأخرنا.... عندي كلاس الساعة 8,, مابغي أتأخر.. ما عندنا غير دريول واحد حليله تاج...(تاج السائق)

حمده: اونج تحاتين تاج....

خلود: يوم أقولكم خلوني أسوق ما طعتوا

الهنوف: أنتي تشتغلين وشوفي خوج شو مسويبج .. لو سقتي شو بيستوي عيل...؟

الام: صدقتي يا أم عبدالله... بخلي ابوج ييبلنا سواق ثاني .. واحد ما يكفي

حمده: فديت ريلي اللي بيخليني أعيش في عز.. ما بييبلي سواق... إلا قولوا عشره

ريم: خيبه .. أخاف إلا بتركبين كل قطعة من جسمج في سيارة.. .. وين قاعدة أنتي..حووه... بسج لا أتطيرين فوق .. تراج بطيحين و بينكسر راسج

الام: بسم الله عليها شو هالرمسه ريماني...

ريم: صدقي يا أمي ما تشوفين بناتج وأحلامهن...

عذابه: وأنتي يعني ما تحلمين..؟

ريم: أنا احلم بشي واحد وبس... كيف اسعد أغلى إنسان في حياتي .. امايه وأبويه...

وقامت ريم تلوي على أمها وتحضنها...

 

 

 

وخرجت الفتيات .. ليعيشوا يومهم .... وحياتهن... دون أن يعلمن ماذا سيكون مصيرهن في المستقبل..

هل يا ترى سوف تجد خلود شاب مناسب يحبها وتتزوج به؟؟؟

وهل سوف تحقق حمده أحلامها وطموحاتها بالزواج من رجل غني ووسيم...؟؟؟

وماذا سيكون مصير عذابه إذا وجدت الحب ولم تجد السعادة؟؟؟

أما ريم... فهل سيظل الحب والزواج آخر اهتماماتها..؟؟؟

 

 

 

Link to comment
Share on other sites

  • Replies 128
  • Created
  • Last Reply

Top Posters In This Topic

الجزء الثاني:

((((قالت وش اكثر يعجبك فيني ... قلت كل مافيك جذاب))))

كتبت حمدة هالكلمات على كتاب صديقتها مهرة.... وتمت أطالعها و تبستم .. وردت عليها مهرة و كتبت.. (((( كلك على بعضك كذا تعجبيني و في كل يوم لك يزداد الإعجاب.....بس الله يخليج خليني انتبه للأستاذ ما فيني ارسب هالكورس,, أبا افتك ..يالله اجلبي ويهج و انتبهي))))))

ضحكت حمدة على كلام مهرة ... و بعد انتهاء الكلاس .. ظهرن و راحن الكافتريا .. وطبعا اول ما وصلت حمدة فتحت اللاب توب و اول شي شغلته هو المـــــاسنجر...

مهرة: اصبري انزين خلينا نشرب شي ... عقب اشتغلي ..

حمدة : لا حبيبتي ... لازم ادخل الحينه .. مابغي اضيع وقتي ... يمكن اشوف امير احلامي ...

مهرة: مادري والله متى بتعقلين... انتي تصدقين هالخرابيط .. الله يهديج بس...

طبعا حمده كانت منشغله بسوالفها على الماسنجر و ماهتمت بحديث مهره...

 

و في زاوية الكافتريا .. كانت عذابة قاعده مع صديقاتها ... ليلى و منى وعلياء بنت عمها...

ليلى: ياربي من هالاستاذ .. ما يرتاح الا اذا ذبحنا بهالواجبات... خاطري اذبحه

منى: سويها و فكينا....

ليلى: هيه عسب انا اروح فيها وانتن تستانسن...

علياء: غدن شراتي اخلص الواجبات في وقتها ... هب شراتكن انتن تكودنهن على روسكن

ليلى: يا ماما شو تتحرين الحياة بس دراسة..؟!!.. في شي اسمه راحة .. طلعة .. سناتر

علياء: اوكي ماعليه.. بس هب كل يوم ..ولا انتي شو رايج عذوبه!!؟

التفتت منى الى عذابة الي كانت سرحانه..

منى: هيه انتي ... وينج... عذابة..؟؟.. عذااااااااااااااااااااااااااابه... بلاج

عذابة: ها.. بلاكم... شو السالفه..

ليلى: حريجه في الكافتريا يالله قومي بسرعه

عذابة: صدق .. قومن عيل .. يالله بسرعه... نشت وهيه ميتة من الزياغ

منى+ ليلى: ههههههههههههههههههههههاااااي

عذابة: تتمصخرن حضرتكن... شو هالحركات...

علياء: طاعي حركاتج انتي ... من الصبح نرمس عمارنا و انتي في عالم ثاني... مادري متى بتودرين هالاحلام التافهه..

عذابة: أي تافهه.. هاي حياتي وتقولين تافهه

ليلى: الله يهديج يا عذابة... بلاج أنتي غاديه شرات العيوز.... فكري في حياتج بعدين يوم بييج الريل ..

عذابة: متى ...؟؟!!

علياء: صدقج تبين تعرسين؟!!.. خلاص عيل انا عندي الحل..

عذابة: والله .. شو؟؟؟

علياء: بنحط اعلان في الجريدة... فتاة جميله ذات شعر طويل .. تريد الزواج بشاب يحب الافلام الهندية.. شو رايج؟؟

ليلى +منى:: هههههههههههههههههه

عذابة: احلفي انتي بس... بسير عنكن الحينه ابركلي.... عندي كلاس... ونشت عذابة و هي معصبة

علياء: اترييني .. بسير وياج.. يالله بنات .. سي يو ليتر.. ببباي

ليلى+منى: باي... الله يحفظج

 

مشت عذابة بسرعه عن علياء من دون ماتعبرها...بس علياء قدرت تلحقها

علياء: هيه انتي بلاج جيه.. مشتركه في المارثون وانا مادري؟؟؟

عذابة: .....

علياء: عذوبة حبيبتي .. بلاج.. لا تزعلين من رمستيه تراني والله اتمصخر...

عذابة: جيه عاده.. ولا جدام منو .. ليلى ومنى...

علياء: تراج انتي مادريبج غادية جولييت من دون روميو.... ولا اقولج روميو موجود

عذابة: بس خلاص مابغي اسمعج( لانها حست انه بترمس عن اخوها خليفة)

علياء: بس عاده لا تزعلين... كم عذابه عندنا

عذابة و هي تبتسم: تدرين اني لو ازعل من الدنيا كلها مابزعل منج... تدرين انج اغلى عن خواتي

علياء: فديت روحج والله... ايه تعالي.. اليوم بنخلص من وقت... ما بتردين البيبت...؟

عذابة: ماظن .. تدرين ماعندنا غير دريول واحد ... وامي تحتاجه اليوم .. لانها بتسير ويا الهنوف العين تيب يدوه... تولهنا عليها والله..

علياء: خلاص عيل .. تعالي معايه... انا خويه خليفة بيمر عليه .. و بنوصلج في دربنا

عذابة: ما يحتاي.. ها اخوج.. مركبله كشافات في عيونه... استحي اركب معاه

علياء: يعني ماتدرين انه يموت عليج و عالتراب اللي تمشين عليه.. تراج تتمنين تاخذين واحد يحبج وتحبينه..

عذابة: اولا انا مامشي على تراب... و ثانيا.. باخذ واحد يحبني واحبه .. مب بس يحبني

علياء : والله مادريبج... على راحتج.. بس ما بتحصلين واحد يحبج شرات خليفة

عذابة: اوكي اوكي غيري السالفة مليت من كثر ماسمع عن خليفة

علياء: عالعموم انا عقب الكلاس برد البيت .. اذا حبيتي تعالي .. واذا ما تبين خيسي في الجامعه ويا اختج

عذابة: اوكي ما فيها شي...

ودخلن الكلاس ... و طبعا عذابة قعدت تفكر في كلام علياء... صح كلامها .. خليفة يحب عذابه ومن هم صغار... بس المشكله انه عذابه ماتريده .. ولا تحبه.. ما تتخيل حياتها مع واحد مثل خليفة

وبعد الكلاس...

علياء: يالله عذابه .. بروح عنج..مع السلامه

عذابة : الله يحفظج...علايه حبيبتي ...غيرت رايي بسير وياج ..

علياء وهي تبستم: غيرتي رايج اشوفج

عذابة: شو اسوي اقعد في الجامعه روحي... بس بتغشى يوم بركب مع اخوج..

علياء: سوي اللي يريحج .. يالله عاده خليفة يتريانا برع

برع الجامعه...

ركبت علياء عند اخوها جدام... بس لاحظ خليفة انه باب السياره تبطل من ورا.. وابتسم لانه قلبه ارتعش و عرف انها حبيبة قلبه عذابه....

عذابه: السلام عليكم

خليفة: عليج السلام والرحمه.. حيالله بنت العم

علياء: من اولها جيه .. انزين تراني موجوده عبرني

خليفة: هلا علايه.. اشحالج عذوبه

عذابة: عذابة لو سمحت.. الحمدلله بخير ( هب من خاطر)

حس خليفة ببرود عذابة معاه... وقرر ان يسكت بدال ما يعور قلبه...وطول الدرب وهو يفكر ببنت عمه.. يا ترى ليش مادانيه.. ليش ماتحبه... او يمكن ما حست بانه يحبها.. بس لا.. اكيد عرفت.. كل الناس تدري بحب خليفة لعذابة حتى اخوانها وابوها... معقوله عذابة ما حست بهالحب الكبير.. او يمكن حست به و تجاهلته..

 

وصلت عذابه لبيتهم... و بسرعة نزلت من دون ماتعبر خليفة...

عذابه: مع السلامة علايه..

خليفة: الله يحفظج عذابه.. بس كان صوت الباب هو رده... زعل خليفة من موقف بنت عمه معاه...

علياء: يلا خليفة خلنا نروح.. يوعانه ابغي اتغدا..... خليفة.. خلوف ... بلاك ماترد .. اقول يلا.. خليـــــــــــــــــــــــــــــــــــــــفه..؟؟!!

خليفة: .....

علياء: بلاك خليفه شو فيك...؟؟

خليفه: ماشي .. و راح خليفة و هو متغصص من حركة بنت عمه معاه.. ويقول في خاطره... ليش يا عذابه ليـــــــــــــــــــــــش؟؟!!. والله اني احبها ..

وصل خليفة البيت مع اخته...و طبعا طول الدرب هو سرحان بعذابه

نزل ... و دخل قبل اخته...

ام خليفه: هلا والله بضناي .. اشحالك بويه..؟؟ يالله فديتك عق ثيابك و اتغدا.. ختك الهنوف وعيالها عندنا اليوم..

خليفة: هلا الغاليه... مالي بارظ اتغدا... بسلم على ختيه يوم بنش .. الحين بروح انسدح شويه.. تعبان.. ويدخل حجرته ويصك الباب على عمره.. اول مادخل .. شغل المسجل .. ويوم ياي يدخل الحمام.. سمع (((( يا بعد هالدنيا ليه صاحبك تقسى عليه... اللي اهدالك حياته و انت مستكثر تجيه.. ارخص الدنيا لغلاتك... و اشترى فرحة حياتك لو طلبت عيونك جاتك وانت تتغلى عليه)))))

وتذكر .. عذابه... عذاب حياته.... اتغسل و انسدح .. وحاول يرقد.. بس طيفها مافارق عيونه...

 

في هذه اللحظات... دخلت علياء.. و شافت اختها الهنوف ... وعيالها.. وطبعا عبدالله يحب خالته بس مب مثل خاله خليفه اللي يموت عليه...

عبدالله: خالو ايا (عليا) .. وين خالي؟؟؟

علياء: هلا حبيبي عبادي... وراحت تحب اختها ...اشحالج الهنوف .. وينج يالقاطعه... احيدج كل يومين عندنا .. الحينه اسبوعين و ماشفناج...

الهنوف : تدرين والله انشغلت .. ومحد ييبني عندكم ... وبعدين الناس يسلمون اول شي

علياء: السلام عليكم.. نسيت انزين من فرحتيه بشوفت الصغاريه... وراحت تحب راس امها... اشحالج امايه..؟؟ شو غداكم اليوم... تراني راده اليوم عسب اتغدا من غداج الغاوي ..

الام: فالج طيب ... روحي غيري ثيابج و بتشوفين الغدا زاهب...وطاعي اخوج مره وحده مادري بلاه.. حتى سلام ما سلم على اخته الهنوف..

الهنوف: انا الصراحه حاسه انه السالفه في عذابه..

الام: وشو دخل عذابه..؟؟..

الهنوف: ادريبه خليفه... ما يضايج الا بسبة وحده... عذابه

علياء: صدقج والله... اليوم ركبت معانا عسب نوصلها.. وطبعا تدريبها كيف ترمس خليفة

ألام: مادري بلاها عذوب... المفروض تحمد ربها و تشكره انه في واحد شرات اخوج يحبها و يموت فيها..بس أخرتها بتحس .. بتحس عاده عقب ما تندم.. وبتشوفن بعد

علياء: يا أمي عذابه مالها خص... الحب مب غصب.. وهي ما تحبه...

الهنوف: غيروا السالفة احسن.. أنا بسير أوعي سلامة تتغدا معانا... طول الدرب و إحنا رادين من العين و هي راقدة...

ألام: حمده أم سلامه في بيتكم الحينه؟؟

الهنوف: هي عندنا.. تراها من أسبوعين في العين .. بيت بنتها فاطمة...واليوم ردت البيت..

ألام: زين عيل.. عقب صلاة المغرب بنسير نسلم عليها...

علياء: ومنو بودينا إن شاء الله... مابغي أسير مع عمر .. الصراحة مادانيه

الهنوف: ليش .. شو سوالج...

علياء: مادري والله.. بس جيه ماحبه ولا اواطنه

ألام: قطعيها رمستج هاي الخايسه.. عيب عليج ترمسين جيه عن ريل اختج

الهنوف: خليها يا امايه تراها هب اول مره ترمس جيه...

علياء: لا تزعلين من رمستيه,,بس هالصراحه وتدريبي ماحب أجامل

ألام: بخلي اخوج خليفة يودينا..

علياء: خليفة اونه .. مايحتاي يودينا

ألام: بودينا ما عليج منه..

نش خليفة و صل العصر في البيت.. و ماظهر من حجرته لانه يدري انه هله بيحسون بضيجه و حزنه... رد انسدح عالشبريه و تم يذكر سوالفه مع عيال عمه يوم كانوا صغار... تذكر يوم كان يلعب مع عذابه و ييبلها كل اللي تباه و تطلبه... حط ايده على عينه اليسرى و تم يلمس طرف عينه.. تذكر الجرح اللي كان قريب من عينه.. كان الجرح بسبة عذابة.. اللي كانت تلعب الكره و فرتها فوق النخله في بيتهم الجديم في العين... تمت تصيح عسب يردولها الكره... طبعا خليفه ماقدر يقاوم دموع اغلى انسان في حياته.. و تسلق النخلة بس ما قدر يثبت عمره و طاح على الحديدة الموجوده تحت النخله.. بس الظربة يت عند طرف عينه... ابتسم خليفة يوم تذكر السالفة.. فرح من قلبه .. فرح لان عنده ذكرى و احلى ذكرى من نبض قلبه.. عذابـــــــــــــــــــــه...

دخلت عليه أخته الهنوف.. و معاها عيالها سلامه و عبدالله

عبدالله اول ما شاف خاله استانس و ركض يلوي عليه ويبوسه...خليفة كان وايد متعلق بعيال أخته.. كأنه هو اللي مربيهم مب ابوهم.. ابوهم عمر كان بعيد عن حرمته و عياله... ولهالسبب تعلق عبدالله في خاله اكثر من ابوه...

عبدالله: خالي خليفة.. أنا احبك... هااااااااااااااااااااااااااااااالكثر .. و يفتح أيده الهنتين

خليفة: فديتك والله يا عبود.. وينك ما تينا الحينه

عبدالله وهو يالس في حضن خاله: ابويه يقولي لا تروح مكان.. حتى ..حتى الدكان ما يودينا...

خليفة: خله يولي أبوك هذا.. أنا اللي بوديك ...اوه منو هالصغيرونه الحلوه اللي منخشه

عبدالله: هاي العنزه سلامه

سلامه: أنا مش عنزه انزين...

ويلوي عليها خليفة و يحبها.. قعدت الهنوف تشوف اخوها مع عيالها ودمعت... تقول في خاطرها ليش.. ليش يا ربي ماعندهم أبو يحن عليهم.. ليش الغريب اقرب لهم و ابوهم بعيد عنهم..

خليفة: حيالله الهنوف... أم عبدالله ..

سلامة: أم سلامي بعد..

خليفة: ولا تزعلين أم سلامي و عبدالله... اشحالج؟؟

الهنوف: بخير ربي يعافيك... علومك انت.. وينك مختفي .. عنبوه ماييت تسلم

خليفة : تعبان والله راد من الدوام هلكان وييت رقدت شوي... قلت بسلم عليج عقب

الهنوف: شو الشغل معاك.؟؟..

خليفة: والله اوكي.. تدرين عمي عبدالله معتمد عليه وعلى عمر...ولا فيصل .. ماهمه شي .. مايي المكتب إلا إذا في ورقه يوقعها أو يقعد عند أبوه نص ساعة ويروح

الهنوف: الله يعينك...ويعني التعب ها بس عسب الشغل.. ولا في سبب ثاني؟؟!!

خليفة: أي سبب بعد.. إلا هو الشغل...

الهنوف: متأكد؟؟؟ يعني اسم عذابه ماله خص في زعلك؟!

خليفة: ها عبود وين تبانا انروح اليوم... بوديك انت وسلامي الدكان شو رايك..؟؟ (( يحاول يغير الموضوع)))

الهنوف: استريح ما شي دكان.. نباك تودينا اليوم بيت عمي..

خليفة: عنبوج توج يايه وين بتردين بعد...

الهنوف: امايه تبغي تسير تسلم على يدوه حمده ... من زمان ما شافتها وقلت برد البيت مره وحده

خليفة: انزين خله الدرويل يوديها.. لازم أنا يعني.. ولا بيت منو .. بيت عمي عبدالله

الهنوف: قصدك بيت عذابه بنت عبدالله ... وبعدين الدرويل محد ... ودنا أنت ما بيستويبك شي.. وإذا ما بغيت تنزل لا تنزل ..

خليفة: هيه صح عسب عمي يزعل شرات هذيج المرة... خلاص بوديكن بس نص ساعة و بنظهر.. مب تقولولي عشا ما عشا

الهنوف: إن شاء الله ما طلبت.. بس أنت نش و بسك رقاد...

ظهرت الهنوف مع عيالها.. ونزلت عند أمها و أختها علياء

علياء: ها الهنوف,, شو قالج بيودينا....؟

الهنوف: اكيد دام الهنوف اللي طلبت

الام: فديتج والله ... الله يحفظج و يخليج و يسعدج إن شاء الله...

الهنوف ابتسمت لكلام أمها.. يسعدني... ااااااااااااااه يا أم خليفة ما تدرين شو يستويبي .. السعادة مادل دربها من يوم ما عرست و خذت عمر ولد عمي...

علياء: يالله عيل بروح أتلبس.. فديتج عذوبة متولهة عليج..

الام: مب جنج الظهر شايفتنها

علياء: هيه و بهد أتوله عليها,,, شو فيها يعني

الام: ما حصلتي غير عذوب... قولي خلود و لا ريماني

الهنوف: وحمده بلاها؟؟؟

الام: والله هاي البنيه ما ابلعها... مادري شو فيها .. بس مول ما تعيبني

الهنوف: ما شاء الله عليهن .. كل وحده احلى عن الثانيه ... وحمده احلاهن

الام: يا امايه زينه البنيه هب في حلاها... زينتها في اخلاقها و تربيتها...

الهنوف: لا عاده امايه .. كلهن متربيات و محترمات... يمكن حمده لسانها طويل شوي .. بس بعد غاويه

الام: ماقلنا شي انزين.. بس عاده الشباب محد مثلهم.. جمال واخلاق وعلم وماعليهم قصور

الهنوف: صدقج ماعليهم قصور..((( تقول هالجمله و حاسه بغصه في حلجها))))

الام: كله ولا فيصل .. غلاته من غلاة خليفة اخوج..

علياء يوم سمعت اسم فيصل طارت من الفرحه وتقول في خاطرها((( فديته والله ما شفته من فتره..))))

الام: نشي امايه علياء... اخوج بينزل الحينه و بيودينا ..

علياء: ثواني و بكون جاهزه.. راحت علياء تتلبس و تتعدل .. اكيد من قدها دام بتشوف قلبها اليوم.

الام: الهنوف شو فيج امي... بلاج مويمه و زعلانه.. عمر مضايجنج... ؟

الهنوف: ها ...((ارتبكت))).. لا لا .. شو يضايجني... مافي شي.. بس تعبانه شوي

الام: انزين روحي جهزي عيالج ...

الهنوف: يالله الحينه بلبسهم... وظهرت عن أمها... وفي خاطرها تقوللها ((( ساعديني يا امايه.. والله اني أموت كل يوم ومحد حاس فيه))))

 

 

 

Link to comment
Share on other sites

الجزء الثالث:

 

((((( حد منكم شاف في الدنيا بدر...مقبل يمشي و من حوله بشر.. )))))))

دخلت حمده البيت وهي تردد هالكلمات بصوت عالي....

عذابه: لا الــــــــــــــــــــــه إلا الله... عالنبي محمد ويالله صلوا عليــــــــــــــــــــــــــه...

ريم: كلللللللللللللـــــــــــــــــــووووووووووووووووو

 

ووش

حمده وهي اونها مستحية: (((((هذا ماهو بدر ليل يختفي مع طلوع الصبح و بزوغ الفجر.. أو.. أو بدر يصبح بعد مده هلال.... هذا بدر مكتمل .. مكتمل... أوه يا ربي.. نسيت .. هيه هي...مكتمل طول الشهر))))

حمده: لا حول .. نسيت المقطع... يا بنات خلنا نعيد المشهد.. يالله .. جاهزين

ريم: اسمحيلنا ... خيرها في غيرها...

الام: وابويه عليج انتي.... يايه من الجامعه ولا اونها عروس... انقلعي و روحي حجرتج يالله بييون قوم عمج اليوم..

حمده: شو فيها يعني .. خليني استوي عروس .. حرام يعني احلم...

الام: الحلم إن شاءالله بيتحقق ... اصبري انتي بس... اللي يسمعج يقول فارينج في الشارع..

ريم: صدقج امايه... فضحتنا بين الناس ... أبا اعرس و أبا اعرس

حمده: يالنونو انتي سكتي الله يخليج... ولا ما شي حليبه اليوم

ريم: احلفي انتي بس... نونو ريلج اللي بتاخذينه.. يعله يا حمده يا بنت ابويه وامايه ييج واحد اول ما يشوفج يقولج .. انتي شرات امايه.. واباج تستوين امايه..حمووده روحي سويلي سيرلاك.. بس بالموز.ههههههه

حمده: لا والله.. براويج يالذيبه انتي.. انا ريلي ريال والنعم فيه... منبت رياييل .. مب نونو شراتج

الام: حمدوه ذلفي حجرتج .. روحي يالله.. وانزلي عسب بتي حرمة عمج و عيالها

عذابه: ليش بعد تيب عيالها.. قصددي يعني بس علياء لازم يعني ولدها ايي..؟؟

الام: هب انتن ميتات عالعرس... ترا هاذو ها ولد عمج خليفه و من سنه يباج.. وانتي مادري بلاج عليه

عذابه: الله يسامحج يا حمده لازم تفتحين سالفة العرس الحينه.. جان اترييتي لين ماتوصلين حجرتج. منو بيسكت امي الحينه

ريم: صدقها امي يا عذوبه.. حليله خليفه ماعليه قصور .. ريال و النعم فيه... ليش ماتاخذينه

حمده: هيه والله عرسي و خليني افرح شوي و اعيش لحظه العرس .. صح أني مابكون العروس .. بس يالله ماشي الحال...

عذابه: حمدوه شو رايج انتي تستوين العروس

حمده: مايحتاي اخذ فضلة اختي.... انا اللي بياخذني مابيكون ماخذ غيري حتى لو كانت ختيه ..

الام: حمدوه تراج بتيبيلي الضغط و السكري ... روحي حجرتج ولا تنزلين دام رمستج بتم جيه

حمده: خلاص خلاص يالغاليه بسكت... زين جيه

ريم: فديتج يا امي.. لا تزعلين ترانا بس نتمصخر

الام: والله خاطري افرح فيكن بس انتن مادريبكن شقايل... اختكن العوده خلود.. كم واحد ياها و خطبها بس ماطيع و مادري ليش... مره هب زين .. ومره هله مب زينين... ومره ما يناسبني.. وحمدوه,, يوم ياها ولد يرانا بدر.. ماطاعت.. اونه فقير... يا امايه الفقر مب عيب... وبعدين هم فقرا ما شاء الله الخير عندهم بس انتي اللي ما تبين ... و عذابه.. نصيبها بين ايدها . ريال من هلنا و دمنا.. يحبها يموت فيها... وشرات خواتها راكبه راسها و ماتبغيه... ودمعت ام عمر من القهر اللي فيها بشوفة بناتها بهالحاله.... وفوق هذا كله فيصل و سواته... ياربي متى بيعرس .. متى بتعرسن كلكن واشوف عيالكم متى ... يوم اموت يعني.؟؟ و تمت ام عمر تصيح ...وتمسح دموعها بشيلتها..

حمده: دخليج يا امايه لا تصيحين... يا امي هذا النصيب .. وصدقيني لو ياني واحد زين مابرفضه.. وبعدين مالقيتي غير بدر... اللي كفخني لين ماقلت بس و انا صغيره.

ريم: شو فيها يعني.. بالعكس لازم تستانسين... ضرب الحبيب زي اكل الزبيب..

حمده عصيت و تمت تشوف ريم بنص عين..: لمي ثمج انتي.

عذابه وهي تلوي على امها: فديتج والله يالغاليه... صدقيني بتفرحين فينا كلنا واولهم فيصل... ودخيلج يا ام عمر .. لا تيبيلي طاري خليفه... هذا شرات اخويه فيصل مب اكثر

ريم: حبيبتي ... يالغاليه يا ام ريماني....لا تصيحين... وان شاء الله بتفرحين يعيالج كلهم... واولهم ريماني( في الاحلام)...

الام: والله يا بنتي انا مب شايله همج شرات اخوانج... انتي البذره اللي سكنت قلبي من يوم مانولدتي.. انتي الغلا كله.. فديتج والله وتلوي على بنتها..

حمده+ عذابه: احم احم.. نحن هنا..

الام: فديتكن كلكن ..بس بعد ريماني غير ...

ريم: فديتج والله يا امايه.. بس الحمدلله اني ماشتركت في مشروع العرس...

 

دخل عليهم فيصل....

فيصل: وينها ام فيصل ...متوله عليها .. وينها

الام: هلا والله بالغالي..

ويحب فيصل راس امه ويقعد حذالها...: مادري والله بلاني .. اول ماظهرت من الشغل .. اتولهت عليج.. قلت لازم ارد واشوف اغلى انسانه عندي في هالدنيا.

الام: الله يحفظك يا وليدي...

ريم: زين يالابن البار .. ليش ماتفرح قلب اغلى انسانة في حياتك وتعرس..؟؟

فيصل وهو منزعج من كلام اخته: انتي مالج خص... امايه فرحانه بعرسي ولا بدونه...

الام: خليه برايه.. خله يسوي اللي يبغيه...

فيصل: افا والله يا ام عمر... اللي تبينه بسويه.. بس لا تقوليلي اعرس... تدرين احس بغصة في حلجي .. و بطني بيتم يعورني...

عذابه: حشا مب عرس هذا .. تقول مرض...

فيصل: واخس عن المرض بعد... نسيت اخبركم.. ترى خليفة اتصلبي ويقول بيي اليوم مع هله..

عذابه بصوت واطي: ردينا لطاري خليفه

فيصل: بلاه خليفه.. مب عايبنج يعني

عذابه: ماقلت شي ...ارمس ريماني

فيصل: تتحريني ماسمعج يعني... ابويه خليفه يسواج ويسوى طوايفج بعد... والله لو اني بداله .. جان بعتج شرات ما بعتيني ... مب هو يا حليله ميت فيج .. مادري على شو... يمكن لسانج الطويل ها.. يا حليلك خليفة.. يشوف الغزلان اللي برع .. و مع هذا يقول بنت عمي واباها.. على فكره.. ترى الف بنيه تتمنى كلمة من خليفة او حتى نظره..مب انتي .. بتخبرج اخاف الا تتحرين عمرج الليدي ديانا وانا مادري؟؟

عذابه: امايه شوفي ولدج.. وبعدين لو سمحت فيصل.. لا تنزل مستواي اكثر عن جيه... اذا فيصل ولد عمك و حسبة اخوك.. تراني بعدني ختك من لحمك ودمك.. ومايحتاي تغلط عليه اكثر عن جيه... وبعدين كمن مره لازم اقولكم يعني.. مابغيه .. ياناس ولا مابغيه.. مادانيه ..وقامت عذابه وهيه تصيح من رمسة اخوها ودخلت حجرتها ....

حمده: ليش جيه ترمسها .. والله حرام عليك.. بسير اطالعها... وراحت حمده لغرفة اختها

فيصل: وانتي ريماني ماعندج شي تقولينه؟؟

ريم: ماعندي شي.. لاني ادريبك حاس بالذنب على اللي قلته...

الام: ليش يا فيصل جيه ترمسها و تكسر خاطرها

فيصل: انا قاصد هالشي .. اباها تحس شويه.. عنبوه الريال انذل لين ما قال بس .. وهي بعدها ما تفتكر و لا تحس...يا امايه الريال مب لعبه.. والله لو ماكان زين و ولد اصل جان ما فضلته على اختي... يا امايه انتي ماتدرين بحالته... والله انه حالته تعور القلب.. اساليني انا اللي دوم معاه... اول ما يشوفني يقولي اشحال الاهل.. ما يسلم عليه ولا ينشد عن حالي .. اول شي يخطر في باله عذابه... دوم يوصيني عليها.. يقولي حطها في عيونك تراها الهوا اللي اتنفسه... والله يا امي انه مايهون عليه.. حالته وايد صعبه..

الام: شو نسوي يعني... نغصبها ... ابوك اللي هو ابوك .. ماطاع يرمسها مره ثانيه... شو بايدنا نحنه..

ريم: خلاص عاده .. لا تجلبون البيت مناحه.. الحينه بيونا ضيوف و بيشوفونكم على هالحاله بيزيغون و بيشردون .. مافينا...

الام: صدقج والله... ريماني امايه..روحي وعي يدوتج .. بييونا العرب الحينه..

ريم: ماطلبتي... الحينه بتنش...

فيصل: بسير عيل اغير ثيابي...

 

في غرفة عذابه:

حمده دخلت على عذابه و شافتها تصيح..

حمده: بعدج تصيحين.. اتحراج تمثلين اتصدقين.. قلتي اكيد تسوي جيه عسبب تتهرب..واثريها صدق البنيه تصيح..عذوبه.. حبيبتي ... بسج عاده غرقتينا بدموعج..

عذابه: ااااه يا حمدوه ما تحسين بللي احسبه... شو بيكون شعورج شو بتعرفين انه احلامج ورغباتج و حياتج منحصره بانسان واحد بس... وياريت لو انه قلبي اختاره.. بس هليه اللي يبونه... يا حمده ماتصور كيف اعيش طول حياتي مع خليفة.. انا ماكرهه .. ((وتشهق من كثر الصياح)).. صدقوني ماكرهه.. انتو اللي كرهتوني فيه... كل يوم والثاني قلتوا خليفه.. خلدو ماتبغي تعرس لانها ماحصلت الانسان المناسب ... وانتي تبين واحد على مزاجج.. حتى ريمو.. ريماني خليتوها على راحتها.. الا انا... انا الوحيده اللي لازم اخذ ولد عمي رضيت ولا ما رضيت... غصبا عني لازم اعيش مع انسان ماعندي شعور او حتى ذرة احساس صوبه... انتو اللي كرهتوني فيه.. انتو.. وتمت تصيح بصوت عالي...

حمده (( دمعت من رمسة اختها))... معقوله عذابه كل هذا فيها ونحنه ما حسينا فيها.. معقوله .. يا حليلها من حقها تحلم مثلي و مثل خلود و ريماني... من حقها تفكر بسعادتها شراتنا... حضنت حمده اختها و تمت تواسيها لين ماهدت و ظهرت عنها..

بعد ما ظهرت حمده من غرفة عذابه.. راحت غرفتها .. قعدت تفكر .. تفكر في حياتها و حياة خواتها و اخوانها.. محد مرتاح في حياته .. محد فيهم حصل الراحه او السعاده.. اخوها العود عمر شكله هب مستانس بزواجه.. بالرغم من انه زوجته انسانه طيبه و حلوه وجميله.. بس طبعا الرياييل ما يعيبهم شي.. حتى بنت عمها الهنوف زوجته.. شكلها تعبانه و حزينه بزواجها من عمر مع انهم كملوا خمس سنين .. مع هذا واضح انه الحب ما جمعهم لين الحين..

وصلت لاخوها فيصل... فيصل ضايع في حياته ما يعرف شو يبغي... فيصل ما عليه قصور... الف بنيه تتمناه .. بس المشكله انه هو اللي ما يتمنى حد.. يظن انه مافي وحده تناسبه.. تناسب فيصل بن عبدالله..

خلود... ااااااااااه يا خلدو... كل شي عندج .. مال وجمال وعلم... بس ناقصنها العقل... حتى هي ما تعرف شو تبغي.. اذكر يوم يا ولد المزروعي خطبها... اسمـيــــــــــــــــــه غاوي ولا بعد غني.. ياريتني لو كنت بدالها.. بس اختها ما وافقت.. اونه متشدد و يحب يتأمر... رفض انها تكمل دراستها في ذاك الوقت... و طبعا خلود من الله تباها... لقتها السبب المناسب انه تنفصل عنه... يا حليله والله.. لين الحينه متمسك فيها...

عذابة... عاده هاي حاله خاصة.. ما يعيبها شي... تبا تزوج واحد يحبها و تحبه.. انزين خليفة يباها.. بس هي الله يهديها .. بقره.. هي والله بقره... واحد يموت فيها و ما تباه... يمكن صح كلامها.. هي رفضته لانه حست انها مغصوبه تاخذه...

الحينه ريماني... هاي غير.. ماظن عندها مشاكل... ريماني لها عالم خاص فيها... صدق انها الوحيده اللي مرتاحه فينا..

اوه... فكرت فيهم كلهم و نسيت عمري... حتى انا ضايعه شراتهم... لا لا لا ..شو ضايعه... انا وصلت للي ابغيه.. حددت حلمي و لازم احققه.. مب جني مستويه شرات عذوبه .. مسويه فلم هندي.. بسير اتلبس ابركلي...

 

في الصاله:

يلست ام عمر ..مع اليده حمده.. ومعاهم ريم ..

اليده: امي ريم.. شو هالصبغ اللي حاطتنه على راسج؟

ريم: أي صبغ يدووه.. هذا يسمونه ميش... حلو صح... و تهز راسها يمين و يسار

اليده: شو من حلاة فيه.. الحينه شو الفرق بينج وبين السلانيه ها.. خبريني.؟

ريم: أي سيلانيه...هاي الموضه...

اليده: خاطري اشوفها والله دوم اسمع عنها

ريم: منو هي؟؟

اليده: الموضه اللي ترمسون عنها

ريم: ههههههههااااااااااي.... بخليها تي بيتنا... شو رايج يدوه

اليده: تسوين خير... الا بتخبرج.. هذا الدهان كيف حطيتيه .. ما يحرق..

ريم: أي دهان.. ميش.. ميــــــــــــــــــــــــــــش

اليده: ميش مادري تيس..

ريم: يدوه شو رايج تجربين... حطيه و طاعي كيف بيغدي شكلج... ولا كلوديا شيفر

اليده:أي سفر .. منو بيسافر؟

ريم: شيفر .. هب سفر... المهم تبين تجربينه..

اليده: والله مادري... شو رايج يا ام عمر... مب احسن اجربه..

ام عمر: بسج ريم.. شو هالخرابيط بعد.. اخ عليج.. حشمي يدتج

اليده: بلاج عليها... حليلها تساعدني ...تباني احلو.. حرام يعني.. صدق ما فيكن خير

ام عمر: اميه فديتج ها كله خرابيط... توج تعيبين و تقولين انها شرات السيلانيه

ريم: شو فيها يعني.. يدوه حبت تستوي سيلانيه حرام هو.؟.

اليده: حرمت عليج عيشتج يا مسوده الويه.. سيلانيه اللي يابتج

ريم: افا... سبوج يا ام عمر..هههههههه

ام عمر: ريم .. فكينا من حشرتج.. و روحي زقري خواتج... طاعي عذابه بعدها زعلانه

ريم: اوكيك يا كيك...

اليده: منو الكيك بعد...

ريم: من غيرج يالحلو.. وتحب راس يدتها

اليده: فديتج والله... (ترمس بصوت واطي) بعدين بنكمل سوالفنا .. رواحنا بدون امج..

ريم: فالج طيب.... ثواني و برجع

ام عمر: خذي راحتج .. لا تردين بسرعه

ريم: قولي من الصبح انج تبيني اروح.. اكيد في شي بتقولينه حق يدوه

ام عمر: مالج خص انتي.. روحي يلا

وراحت ريم اطالع خواتها

ام عمر: اميه بغيت اطلب منج طلب

اليده: خير

ام عمر: بغيتج ترمسين عمر... انا حاسه انه مضايج الهنوف.. بس هي ما تخبر حد.. حليلها يوم تيلس معانا تضحك وتسولف.. واول ما يدخل عمر .. تتغير... حاسه انه هالولد ملعوزنها.. بس لو تخبرني ... المشكله كتومه.. وما تخبر حد.. ادريبه عمر.. اكيد ما يعاملها عدل اكيد مسويبها شي

اليده: انتي وشلج تدخلين بينهم... خلج مع ريلج ابركلج

ام عمر: اميه .. البنيه حسبة بنتي... ومارضى عليها.. ولو اني ماشفت الغلط بعيني من عمر جان ماقلتج جيه.. عمر ما يعبر حد.. ما يفكر في حرمته وعياله.. مايفكر في حد. انتي رمسيه انصحيه.. و اظن بيسمع رمستج

اليده: ان شاء الله برمسه اليوم ولا باجر... بس عاده ولدج ما يستحي.. ما يقول بنت عمي . بداري عليها بحترمها .. فاصخ الحيا شرات..

ام عمر: شرات منو؟؟

اليده: سكتت... شرات منو يعني .. ابوه

ام عمر: مادري متى بتحبينه .. والله انه عبدالله( ابو عمر).. ريال و النعم فيه.. ماذكر في يوم غلط عليه.. بس انتي مادري ليش مادانينه...

اليده: مادري والله.. بس مادانيه.. كيفي..

ام عمر: على راحتج.. بس لا تنسين الطلبه

اليده: أي طلبه بعد...هيه... ولدج مسود الويه.. لا تخافين برمسه و بهزبه لج بعد

 

نزلت ريم و هي تركض بسرعه... وصلوا وصلوا... فديت سلامي والله تولهت عليها

ام عمر: البارحه تراج شايفتنها.

ريم: انزين .. شو فيها.. البيت من غيرهم ما يسوى

ام عمر: صدقتي والله

 

دخلت الهنوف مع امها و اختها علياء و عيالها..ركض عبدالله عند يدته ام عمر و تم قاعد في حضنها

عبدالله: يدووه ..شوفي عمي شو شرالي.. علوج و حلاوه

ام عمر: تستاهل ... فديت روحك والله

سلامه: حتى انا... عندي العاب هااااااااااالكثر..

ام عمر: فديتكم والله صدقج يا ريماني.. حياتنا بدونهم ما تسوى..

وتقوم ام عمر تسلم على الضيوف

ام عمر: حيالله ام خليفه.. اشحالج الغاليه

ام خليفة: يسرج الحال والله... اشحالج انتي و عيالج

ام عمر: الحمدلله بخير و سهاله

وتروح ام خليفه تسلم على اليده..

ام خليفة: هلا والله بام عبيد... اشحالج .. عساج بخير وبعافيه

اليده: بخير الله يسلمج و يعافيج.. وينكم ما تبينون

ام خليفه: والله في هالدنيا... اشحالهم هل العين

اليده: بخير ربي يعافيج... يسلمون عليكم

ام خليفه: الله يسلمهم من كل شر..

سلمن الهنوف و علياء على اليده.. و قعدت علياء حذال ريم

علياء: ها اشحالج يالريم

ريم: بخير ..وانتي

علياء: والله بخير... علومج

ريم: ما من علوم... كلها جديمه..

علياء: وين عيل خواتج...

ريم: بينزلن الحينه

وتكمل سوالفها مع علياء

الهنوف: عمووه اخويه خليفه يبغي يدخل يسلم على يدوه..

ام عمر: خليه يقرب.. البيت بيته

دخل خليفه بس كان معاه عمر اللي رجع في نفس الوقت

خليفه+عمر: السلام عليكم

اليده: عليكم السلام و الرحمه.. هلا والله بالشباب.. وينه خليفه..أي واحد فيكم

خليفه: ههههههه... ياينج يدوه

ويسلم على ام عمر... و يروح يبوس راس اليده

خليفة: اشحالج الغاليه...عساج بخير

اليده: بخير الله يسلمك و يحفظك.. انت اشحالك.. ها بعدك ما عرست. ولا بتستوي شرات فصول ولد عمك

خليفه: ماعرف شو يرد عليها..

ام عمر وهي تحاول تغير السالفه قامت ترمس عمر: زين يوم انك ييت...

عمر: فيصل خبرني انهم بيونا.. ييت اسلم على عمتيه..

ام خليفة: الله يسلمك...اشحالك وشو الشغل معاك...

عمر: الحمدلله...ويطالع حرمته الهنوف.. بس هي ما كانت تعبره

ريم: احم احم...

خليفة: اوه ريماني.. والله ما شفتج

ريم: عنبوه انا اللي منوره البيت و ماشفتني

خليفة: صدقج والله... اسمحيلي.. شو حالج

ريم: والله عايشين

في هالوقت نزلن حمده و عذابه.. راحن يسلمن على الضيوف.. عذابه وهيه تسلم عل ام خليفه.. لفت و جان اطالع .. خليفه

طبعا خليفة تغير لونه... قبل ساعه بالضبط حس بضيج و قهر بسبة بنت عمه.. والحينه اول ما شافها... تم يقول في خاطره.. والله احبــــــــــــــــها.. نسى كل همومه بس يوم شافها..

خليفة: اشحالكن بنات عمي؟

حمده: بخير .. ربي يعافيك.. وينك ما تنشاف..

خليفة: هني والله.. سكت.. ارتبك.. ما يعرف شو يقول... اقول اني احب اختج وهي ما تباني... اقول اني كل ماشوفها احبها اكثر و احزن اكثر... اقول ان عذابي و سعادتي نفس الوقت في هالبيت..

اليده: عذوبه ما سلمتي على ولد عمج

عذابه: وهي موخيه راسها.. اشحالك ؟ ( طبعا مب من خاطر)

خليفة(حس باسلوبها الجاف): بخير... اترخص الحينه..

عمر: وين وين.... اقعد... مابتظهر اليوم .. عشاكم عندنا

خليفة: المره اليايه ان شاء الله

فيصل وهو نازل: تحلم تظهر من هالبيت ...دام اني هني يالله اقعد

خليفه: ههههههه هلا والله

فيصل: هلا وغلا بولد العم ويروح يسلم على ام خليفه ..: عنبوك ما قمت تينا شرات قبل.. ويوم تدخل البيت دقيقة و تشرد... شو سالفتك..؟

خليفة: ها .. لا ما شي.. اشغال اشغال.. وتم يتامل بنت عمه..

فيصل شاف بنيه حذال اخته ريم... تم يطالع ... و يطالع... هاي شكلها هب غريب ..اووه علياء..

فيصل: مب جنها علايه

علياءوهي مستحيه: هلا فيصل اشحالك

فيصل: تصدقين ما عرفتج.. اقول في خاطري .. منو هالملاك

خليفة: ايه انت.. شو ملاك بعد..

فيصل: بلاك عصبت جيه ... تراها بنت عمي

ام عمر: فيصل.. ( تحاول تسكته )

فيصل: هلا والله بالهنوف... اشحالج..؟

الهنوف: بخير الله يسلمك...(كانت تحاول تختصر كلامها قد ماتقدر)

فيصل: وينهم عيل الصغاريه...

الهنوف: يلعبون في الصاله الثانيه...

ام خليفة: ما شاء الله على عبدالله .. شرات ابوه ..تقولين عمر وهو صغير

عمر ابتسم لكلام عمته.. بس بعده كان يطالع الهنوف.. وهي حست بنظراته... ما قدرت تيلس اكثر ... قامت بتروح حجرتها..

اليده: الهنوف.. بلاج وقفتي...وين بتسيرين..

الهنوف: بسير حجرتيه..ما بتاخر

ام عمر هذيج الساعه تاكدت من احساسها... اكيد عمر مسوي شي...مب معقوله الهنوف تتغير جيه مره وحده.. تمت اطالع ولدها عمر...وهو حس بنظرات امه.. شل عمره و لحق الهنوف

 

وطبعا اللي كان عايش عالم ثاني هو خليفة.. صح انه كان يرمس و يسولف مع ولد عمه.. بس عقله و قلبه و روحه معاها .. مع عذابه.. يطالعها من بعيد... ليش جيه تعاملني.. هي مب حقوده... بالعكس طيبه.. محلاتها و هي تضحك.. خاطري تضحكلي ولو مب من قلبها .. المهم اشوف ابتسامتها... اااااااااااه يا عذابه .. متى بتحسين فيه .. متى بتحنين عليه متى...

فيصل: خليفة... خليـــــــــــفه... خليـــــــــــــــــــــــــــــــــــــــــــــــ

ـــــــــــــــــــــــــــــــــــــــــفة

عاده هاك الساعه الكل صد صوبهم يطالعون خليفه

فيصل: بلاك ماترد عليه.. قاعد ارمس اليدار و انا مادري

خليفة: اسكت فضحتنا... تراني اسمعك

فيصل: وين تسمعني... ماتقول غير هيه وبعدين.. كمل... اها..

خليفة: شو اقول يعني...

فيصل:لا تقول شي... انا اللي بقول.. ان شفتك صاد هاك الصوب(عند البنات) بجلع عيونك

خليفة: ما يحتاي اصد واطالعها... حافظنها و حافظ صورتها... تراها القلب

فيصل: أيــــــــــــــــــهي... ردينا.. يابويه انساها.. ولو دقيقه .. خلنا نستانس اليوم

خليفة: لو طلبت روحي ما بتغلى عليك... بس اني انسى اسمحلي ماقدر..

فيصل: اقول.. روح .. يلا قوم.. قوم اقولك........ وياويهك نش يالله...

 

خليفة: ليش وين بنروح

فيصل: قصدك وين بتروح انت... ماشي بس بروغك من بيتنا

خليفة: والله اني اللي كنت بظهر .. بس مادري منو اللي ماطاع

فيصل: غلطت... اتحريتني بستانس وياك...

خليفة: عاده عنادا فيك هب ظاهر

فيصل: والله انك هب هين...

 

Link to comment
Share on other sites

وفي الصوب الثاني وين البنات متيمعات..

حمده: ما تلاحظون ان الانظار كلها علينا

علياء: حتى انا احس بهالشعور.. تقولين البقعه السوده

ريم: بس انا احس انه الانظار بس على وحده فينا

حمده: صح لسانج .. وحده فينا.. وتمت اطالع عذابه

عذابه: حمدو... الله يخليج سكتي...

ريم: حمده خلنا نسكت احسن.. مافينا على المناحه شرات العصر

علياء: صدق .. ومنو اللي مسوي المناحه..

حمده: منو غيرها يعني... عذابه

علياء: ليش.. شو السالفه

ريم: والله امي كانت ترمسها عن..بس عذابه ما خلتها تكمل

عذابه: ترمس عن فيصل ... صح ريمو.. (مغيظه)

ريم: هي هي .. صح.. منو غير فيصل يعني

علياء: بلاه فيصل

حمده: يفضل العنوسه

ريم: هيه والله ما يبغي يعرس

علياء: ليش يعني ... ليش كلكم جيه... رافضين تعرسون

حمده: لا تجمعين لو سمحتي.... انا هب رافضة.. انا اتريا الوقت و الشخص المناسب

علياء: لا يكون اللي دوم تحلمينه

حمده: في غيره يعني... ماخبرتج.. حلمت انه يايبلي عقد الماس.. بس الله يسامح اللي كان السبب...

علياء: شو استوى... مات

حمده: مات اونه... خله يعطيني اول شي العقد عسب يموت.. هاي امي الله يسامحها .. ماخلتني اكمل..

ريم: هههههههههههه... حلاته يا غبيه.. عسب المره اليايه يوم يعطيج... ترومين تردين عليه.. يعني الحينه جهزيله الرد المناسب

علياء: وشو عرفج انها بتحلم نفس هاك الحلم

ريم: والله يا حبيبتي .. هاي احلامها شرات المسلسل المكسيكي

حمده: وانتي شو عرفج

ريم: شو عرفني بعد... تراج ماتخلين حد ما تخبرينه...

حمده: ياربي متى بيي الجزء الاخير... ابغي اعرس... واشوفه عدالي يضحكلي و يقولي حبيبتي.. شريتلج الفندق الفلاني.. والعماره الفلانيه.. و كتبت حتى الشارع باسمج

علياء: الشارع بعد

حمده: لازم... وعقب بتشوفين هاي المدينه بكبرها لي انا

ريم: احلام الفقارى

حمده: محد فقير غير ريلج

علياء: عذابه بلاج ساكته

ريم: يالسه ادور الانظار اللي تطالعنا

حمده: مايحتاي لانه مافي غيره...

عذابه: بسير فوق ابركلي

علياء: عذوبه.. بلاج.. نتمصخر انزين

عذابه: مب عايبتني هالمصخره.. تمت عذابه تفكر... متى يا خليفة بتطلع من حياتي.. صدق انك كابوس...

 

في غرفة عمر:

الهنوف كانت تظهر لبس عيالها عسب يرقدون..دخل عليها عمر...

عمر: اشحالج؟

الهنوف (بدون ماطالعه): بخير

عمر: قعد عالشبريه...تم يلعب بايده...: اظن امايه حست انه فيج شي...

الهنوف:..........

عمر: ليش انتي معصبه.. انسي السالفه.. تراج تنعرفين يوم تضايجين

الهنوف: ان شاء الله.. بضحك.. وبسولف في شي ثاني

عمر: لا تزعلين ... ماباج تزعلين مني.. صدقيني هاي وحده ماعرفها... ضاربه بالغلط.. اكيد كانت مغلطه في الرقم

 

الهنوف: ليش ما تشجع وتقولي الصدق؟؟؟.. خايف... تخاف مني... احيد الريال ما يخاف من شي

عمر وهو حس انها جرحته بكلامها: وليش اخاف منج... وبعدين انا ماغلط بشي... اقولج... بتزعلين ازعلي... ما يهمني الصراحه... بس مابغيج تبينين .. مابغيهم يضايجون و اكون انا السبب..(ظهر من الحجره وهو معصب)

الهنوف قعدت تصيح.. ماقدرت تيود عمرها اكثر عن جيه... ما يهتم.. ما يعبر.. ما يجابل عياله... مايهتم بشعوري... فوق كل هذا يغازل.. ولا جدامي بعد.. هذا ما يحس... ياربي شو هالحظ اللي طيحني بانسان شراته... تعبت والله تعبت... دراستي ما كملتها والسبه هو.. حياتي كلها حطيتها بين ايديه.. اتحملته هالسنين.. ومع هذا ما حس ... و لا بعد يباني مازعل... كيف مازعل... كيف.. ضقت منه ومن تصرفاته.. واهماله.. وربيعاته.. حست الهنوف انه خلاص... ما بتروم تستحمل اكثر عن جيه...لازم تسوي شي..

 

دخلت خلود البيت مع ابوها ...

ابو عمر+خلود: السلام عليكم

اليده: عليكم السلام والرحمه اشحالج خلود.. وينج امايه ماشفتج ولا سلمت عليج

خلود عقب ما سلمت على ام خليفة و خليفة... : هلا يدوه اشحالج .. وينج ولهنا عليج

عمر: تو الناس... توج راده من الشغل

خلود حست باحراج من رمسةاخوها.. بس ابوها رد عليه

ابو عمر: هيه حليلها تشتغل و اجابل شغلها... و توني رادنها

ام عمر: زين عيل يوم انكم وصلتوا.. دقايق والعشا بيزهب

ابوعمر: اشحالج ام خليفة... ان شاء الله بخير

ام خليفه: بخير و بعافيه... علومك

ابو عمر: والله علوم الخير... ها خليفة اشوفك عندنا اليوم...

خليفة: ييت اسلم عليكم

ابو عمر: زين يوم تذكرتنا... عنبوه ماشوفك الا في الشغل

فيصل: ماعليك منه ابويه.. كل يوم بيينا ...

عذابه: الله لا يقول

حمده: لمي ثمج... صدق ماتستحين

عذابه: انزين محد سمعني... وبعدين كيفي.. هاي يسمونها حرية شخصيه

حمده: سكتي احسن

خلود: اشحالكن يالبنات... هلا علايه... اشحالج وشو الدراسه معاج

علياء: الحمدلله.. ماشي الحال.. وانتي .. شكلج تعبانه من الشغل

خلود: يعني... بس وناسه... احسن من قعدة البيت

ريم: عقبالي يارب

علياء: الوحده تدعي انها تعرس اول شي عقب تفكر في الشغل

حمده: هاي حاله شاذه في العايله.

بعد ما تعشوا يلس بو عمر يسولف مع عياله و ولد اخوه عن الشغل.. اما فيصل فكان طول الوقت يفكر في علياء.. ما شاء الله عليها كبرت و غدت حرمه... حلوه..و احلى شي فيها عيونها.. انتبه للي قاعد يفكر فيه.. هاي بنت عمه و المفروض ما يفكر فيها بهالطريقه...وتم يقول في خاطره (بلاك يا فيصل اخترشت مره وحده... وتم يضحك على عمره)

ام خليفة: يالله الحينه نترخص عنكم

ام عمر: تو الناس... يالسين

ام خليفة: طولنا عليكم.. المره الثانيه ان شاء الله

ابو عمر: خلاص عيل.. يوم الخميس اذا الله احيانا غداكم و عشاكم عندنا

خليفة: غدا و عشا عاده.. ما يحتاي

عذابه بصوت واطي: اول مره يقول شي زين

خلود: سكتي احسن

ام عمر: لازم .. من زمان ما قعدنا رباعه...

ريم: ليش ما نسير ليوا.. من زمان ما ظهرنا

ابو عمر: خلاص ليوا ليوا.. مثل ماقالت الريم

حمده: اشمعنى ريم..

ام عمر: ترى هي اللي طلبت

حمده وقفت حذال ابوها: بنتفاهم بعدين يا بو عمر.. هالتفرقه العنصريه تراها هب عايبتني

ابو عمر: ههههههههه..

خليفة: يالله امي... ويروح يسلم على اليده و ام عمر.. و يا بيسلم على بنات عمه..

خليفة: اشوفكم ان شاء الله بالخميس

عذابه: ليش انت بتروح بعد

خلود قرصتها: السيره بدونه ما تسوى.. لازم بيسير

فيصل: بسير .. غصبا عنه وعن اللي ما يستحون(قصد اخته عذابه).. يالله مع السلامه علايه.. اتحملي على عمرج

ريم وهي فاجه ثمها واطالع اخوها.. بلاه هذا اليوم.. بس علياء ماردت عليه من الحيا

خليفة: مع السلامه عذابه..

عذابه سوت عمرها ما تسمع: علياء لا تنسين اللي قلتلج عليه.. باجر بشوفج

خليفة هذيج الساعه حس بضيج الدنيا كلها...

علياء( بصوت واطي): ماحيد اتفقنا على شي

عذابه: باجر بخبرج

 

ظهر خليفة مع امه و اخته... وطول الدرب وهو يفكر في موقف بنت عمه... حس انه مل من تصرفاتها ..

ام خليفة: خليفة.. شي فيك؟

خليفة: مافي شي...

ام خليفة: تراني رمست اليوم ام عمر.. عن عذابه

خليفة ( وهو مستغرب): ليش يا امي ترمسينها... البنيه ما تبغيني ..

ام خليفة: ماعندنا بنات جيه.. في زمانا الوحده يوم تعرس ما يشاورونها...

خليفة: اباها توافق من خاطرها هب غصبا عنها... والله يخليج انسي السالفه..

ام خليفة: كيف انساها وانا اشوفك بهالحاله

سكت خليفة وماعرف شو يرد على امه... صدقها.. حالته وايد صعبه.. الله يعينه

اما علياء فتفكيرها طار و شلاها عند فيصل.. ما شاء الله عليه حلو... بس اكيد مغازلجي شرات اخوه... ليش انا افكر فيه... مادري والله...

 

 

ابو عمر راح حجرته مع ام عمر.. . واليده بعد دخلت غرفتها .. وظهر عمر روحه وطبعا مايرد الا نصاص الليالي... دخلت خلود حجرتها ترقد... حمده كالعاده مجابله الماسنجر.. عذابه قعدت روحها في الصاله اطالع التلفزيون.. وراحت ريم حجره الهنوف..

ريم: تك تك... يمكن ادخل.. خلاص دخلت

الهنوف: هههههههه... مايحتاي تستاذنين

ريم: ادري .. بتوقليلي الحجره حجرتج..

الهنوف: لا والله .. لانج جيه ولا جيه بتدخلين

ريم: بلاج اليوم .. ماده برطمج شبرين... زين ماتخرطفنا وطحنا عليهن

الهنوف: ما بلايه شي

ريم: على منو

الهنوف: صدقيني مافي شي .. وينها خلود..

ريم: ما تنفع ريماني يعني.. لازم خلود

الهنوف: هيه لازم خلود

ريم: راحت حجرتها تقول بترقد

الهنوف: اها.. تمت ساكته فتره.. عقب.. رمست..ريم.. وينه اخوج ..؟

ريم: أي واحد فيهم..حددي.

الهنوف: لا تستهبلين..عمر وينه؟..

ريم: قولي وينه ريلي .. لازم يعني اخوج. ظهر توه..ليش ماخبرج

الهنوف: خبرني.. اكيد خبرني.. انا اللي نسيت

 

حمده كانت يالسه على الكمبيوتر و تسولف عالماسنجر...

الغزال الشمالي (حمده): يالله عاده مهره .. استقبلي الفايل

وردة دبي( مهره): اصبري شو ي مادري بلاه

الغزال الشمالي(حمده): قولي انج انتي اللي ماتعرفيله

وردة دبي(مهره): لا والله... اصبري اصبري الحينه بيستوي.. حمدو... واحد مسولي اد وماعرفه..

الغزال الشمالي: احلفي... شو يقول

ورده دبي: مارمسته... سويتله بلوك..

الغزال الشمالي: يالخديه بلاج جيه... طاعي انزين منو

وردة دبي: تدرين اني ماحب ارمس شباب..

الغزال الشمالي: يالغبيه... عطيني الايميل و انا بشوفه

ورده دبي: شو تبيبه؟

الغزال الشمالي: والله ملانه.. خليني اطالع منو هذا

ورده دبي: والله كيفج.. وعطتها الايميل..

الغزال الشمالي: ماسرع ما دخل

ورده دبي: اتحملي حمدو... تراهم ملعن

الغزال الشمالي: لا توصين حريص... يالله انقلعي.. بباي

____________

 

ملك العين: مرحبــــــــــــــــــــــــــــا الســــــــــــــــــــــاع

الغزال الشمالي: يا مرحبا بك

ملك العين: هلا والله بالغزال... بس عاده ان شاء الله اسم على مسمى

الغزال الشمالي( مب هين الملعون): اكيد...

ملك العين: اشحالج الغاليه..ربج بخير

الغزال الشمالي: بخير دامك بخير... منو انت؟

ملك العين: المفروض انا اللي اسالج ... انتي اللي منو

الغزال الشمالي: مالك خص...

ملك العين: على راحتج... في أي جامعه تدرسين

الغزال الشمالي: انت وشلك...

ملك العين: على راحتج بعد.. انزين ما خبرتيني كم عمرج

الغزال الشمالي: اقول شو رايك ادليك بيتنا مره وحده

ملك العين: ليش لا

الغزال الشمالي: تعرف تجلب ويهك... ولا امبونه مجلوب

ملك العين: بتخبرج انتي داخله تسبين خلق الله

الغزال الشمالي : مالك خص

ملك العين: انزين تدرين.... مليت من الرمسه معاج... يالله باي

الغزال الشمالي: بايات...

 

ظهرت حمده من الماسنجر... تمت تفكر في هالولد... ملك العين اونه... اقص ايدي اذا ما كان فراش العين... مالت عليه... ولا يقول انه مل من الرمسه معايه.. شكله شايف عمره وايد.. مادري على شو..

 

وفي الجانب الاخر.... قعد محمد يفكر في البنت اللي رمسها في الماسنجر... هاي شكلها مغروره.. بس والله لا اراويها.. محمد شاب عمره 24 سنه.. درس برع في لندن والحينه يشتغل مع ابوه.. مغرور بصوره كبيره... وطبعا يحب سوالف المغازل ... ما خلى بنيه ماجذب عليها برمسته و كلامه المعسول..

عيسى: محمد قوم خلنا نظهر من الكوفي والله مليت

محمد: يالله ياينك الحينه.. دقيقه

عيسى: انت ما تشبع من مجابله النت 24 ساعه

محمد: شو اسوي .. اشغال

عيسى: أي اشغال.. تجذب على منو

محمد: والله اذا مادخلت يوم واحد... كل البنات اللي عندي في اللسته يتخبلون

عيسى: احلف انت بس

محمد: صدقني ماجذب عليك... وهني يرن تلفونه

محمد: هلا والله بالقلب

......: اهلين.. وينك حبيبي اتصلبك من الصبح وانت ماترد عليه

محمد: اسمحيلي حبيبتي انشغلت شويه

...........: انا حاسه انك تتهرب مني هالايام

محمد: انا اتهرب منج.. حد يشرد من روحه..( يغمز حق ربيعه)

....: يعني صدق تحبني

محمد: الا اموت فيج... اقول برد اتصلبج بعد شوي... ابويه عالخط الثاني.. اوكي حياتي.. باي

ويرد على الخط الثاني..

محمد: مرحبا الســــــــــــــــــــاع

....: زعلانه عليك

محمد: افا والله.. ليش عاده.. تدرين ماروم اتحمل زعلج ولو ثانيه

....: حمود حبيبي... ماقلت ابا اقولك شي مهم

محمد: خير حياتي .. ناقصنج شي... تبين فلوس

......: لا هب جيه... واحد يا يخطبني... وهليه موافقين

محمد: ..........

........: وينك بلاك ماترد عليه.. اقولك بعرس

محمد: شو تبين اقولج يعني.. الله يوفقج

....: بهالسهوله... واللي بينا

محمد: انا الصراحه هب راعي عرس... مب ناوي اعرس الحينه

.....: يعني كنت تجذب عليه كل هالوقت

محمد: انتي تدريبي عدل.. انا قايلج من قبل اني مابخذج... ولا تتعشمين فيه

......: ما كنت اتوقع منك.. اتحريتك تحبني

محمد: الحب غير و العرس غير... وانا يوم بعرس ماباخذلي وحده رمسيتها... طال عمرج هليه اللي بيخطبولي.. ومن الحينه اخبرج.. لا تتريني وعرسي احسلج..ويالله مع السلامه

عيسى: صدق انك ما تستحي... ليش جيه تعامل البنات

محمد: شو اقوللها يعني.. الحين بسير اخطبج.. تخسي الا هي .. هذا اللي ناقص

عيسى: وليش عيل تجذب عليهن و توهمهن بالحب

محمد: والله يا عيسى هن اللي يتحروني احبهن... وانت تتحراهن صدق يحبوني..

عيسى: عيل

محمد: هذيله ما يبن غير الفلوس ... الحب ما يعرفنه.. الحينه بذمتك تباني اخذ وحده فارطه خانت ثقة هلها و اتزوجها.. مب بعيده تخوني انا عقب.. ما عاشت اللي تخون محمد الرميثي...

عيسى: ما قول غير الله يهديك...

محمد: انسى السالفه الله يخليك...ماخبرتك.. اليوم شفت وحده عالماسنجر.... اسميها فنانه.. شكلها شايفة عمرها.. وهذا اللي عيبني فيها...

عيسى: الله يعينها والله...خلنا نظوي عند الشباب ابركلنا ..

محمد: تم.

بيت بو عمر:

رجع عمر البيت الساعه 3... ودخل غرفته .. لقا الهنوف واعيه

عمر: ليش مارقدتي... قلتلج الف مره لا تتريني

الهنوف: عمر خلنا نرمس... خلنا نتفاهم شوي

عمر: نتفاهم الساعه 3

الهنوف: شو اسويلك يعني... انا ماشوفك طول اليوم..

عمر: خير شو تبين...( وهو يغير ثيابه)

الهنوف: عمر .. ليش جيه تعاملني.. انا جد قصرت في حقك

عمر: شو سويت يعني..

الهنوف: انا حرمتك.. وقبل لا كون حرمتك , انا بنت عمك المفروض تحترمني مب تعاملني جيه

عمر: حرمتيه على عيني وراسي... شو تبيني اسويلج يعني

الهنوف: اتحملت منك وايد... ليش ماترحم حالي

عمر:.......

الهنوف: عمر تعبت... والله تعبت.. انا انسانه وعندي احاسيس..

عمر: بتمين طول الليل ترمسين جيه

الهنوف: ليش ما تحس.. ياخي احترمني شوي.. اهمال قلنا ما عليه... ماجابل عيالك .. سكت وماقلت شي.. بذمتك تذكر يوم وديت في عيالك مكان... تذكر يوم قعدت تسولف معاهم وتلعب معاهم... وفوق هذا كله ترمس وتغازل.. ولا بعد جدامي... انت ماتخاف ربك

عمر: برقد الحينه لا تعوريلي راسي

الهنوف ( وهي تصيح): عمر .. اخاف بيي يوم و صدقني .. ما بستحملك اكثر عن جيه

عمر مارد عليها .. كان واثق انه الهنوف تحبه ومستحيل في يوم تتركه... يمكن كان هالسبب اللي خلاه يسوي اللي يبغيه لانه يدري ان حرمته مستحيل تتركه في يوم...الهنوف بس ترمس .. عمرها ما نفذت اللي تقوله.. غمض عيونه ورقد... وماهتم لشعور انسانه تحبه و تموت كل يوم عشانه..

 

Link to comment
Share on other sites

ثاني يوم الصبح في الجامعه:

قعدت حمده مع ربيعتها مهرة في الكافتريا .. دخلت الماسنجر..

مهرة: بلاج تتحرقصين .. تترين حد انتي

حمده: ها.. لا .. بتريا منو يعني.. الصراحه ماروم اجذب عليج.. البارحه رمسته

مهرة: رمستي منو

حمده: اللي عطيتيني ايميله

مهرة: اها... وشو قالج

حمده: ماشي... اتصدقين انه قال اونه مل مني و ما يبغي يرمسني

مهرة: خيبه من اولها جيه

حمده: شفتي عاد.. بس والله لا اراويه.. مادري يتحرى عمره منو

مهرة: وانتي ماعرفتي شي عنه

حمده: هالثور عطاني فرصة ارمس..

مهره: هههههههههااااااي.. يا حليلج

حمده: بشوف شغلي معاه اليوم

مهرة: اتحملي .. وياويهج اذا حد ما هلج عرف انج ترمسين واحد في الماسنجر يا ويلج

حمده: قلتلج لاتوصين حريص.. وبعدين بلاج غاديه شرات الديايه

مهرة : بنشوف منو اللي بيستوي شرات الديايه يوم هلج بيعرفون

حمده: خلاص عاد غيري السالفه..ها يت عذابة مع علياء... بعرفج على بنت عمي

عذابه+ علياء: السلام عليكم

حمده+ مهرة: عليكم السلام

حمده: هلا والله علياء اشحالج

علياء: عنبوه مب جني شايفتنج البارحه

حمده: شوفيها يعني.. احمدي ربج اني اتوله عليج

علياء: تولهت عليج الجنة

عذابة: اشحالج مهره....؟

مهره: هلا والله .. بخير دامج بخير

عذابة: عساج دوم ان شاء الله

حمده: مهره .. اعرفج ببنت عمي علياء

مهره: هلا علياء..

علياء: هلا وغلا... اشحالج

مهره: بخير الله يسلمج

عذابه: عاده انا اليوم متولهه على اختي و حابه اقعد معاكم

حمده: ليش ان شاء الله.. اكيد وراج شي

عذابه: لا والله .. بس حبيت اقعد معاج

مهرة: حمدو تتحرين كل الناس شراتج مصلحجيين

حمده: انا المصلحجيه الحين.. عذابه مب وقته نقعد مع بعض.. بعدين بعدين( كانت تحاول تبعدها لانها شافت راعي العين داخل الماسنجر، وعذابه ما كان يعيبها سوالف الماسنجر)

عذابة: عنادا فيج بقعد...

علياء: خليهن على راحتهن .. خلينا نسير المكتبه احسن

حمده: صدقها بنت عمج.. يالله باي

عذابه+ علياء: باي

مهره: انتي ما تستحين تروغينهن

حمده: لا والله.. و اخليها تشوفني وانا ارمس واحد عالماسنجر.. عذوب لازم بتخبر خلود.. و طبعا خلود ماتقصر... بتنشر الخبر

مهرة: يوم تعرفين انه غلط ليش تسوينه

حمده: مادري .. خليني الحين ارمسه.. قبل ما يذلف

________

 

الغزال الشمالي ( حمده): هلا والله

ملك العين( محمد): هلا وغلا.. شوفي اذا بترمسين شرات البارحه .. خبريني .. عسب اسويلج بلوك

الغزال الشمالي( مالت عليك): ليش عاد... شو سويت

ملك العين: كل ما قلت شي قلتيلي .. كيفي .. مالك خص.. انت وشلك

الغزال الشمالي: يا غبي يالسه اتغلى

ملك العين( بنات اخر زمن): يحق لج تتغلين.. دامج الغزال

الغزال الشمالي: اكيد يحق لي

ملك العين: بس عاد ما يحتاي تكونين جافه. يعني ارمسي و سولفي..

الغزال الشمالي: فالك طيب.. ما خبرتني .. شو اسمك؟

ملك العين: محمد.. وانتي

الغزال الشمالي: مالك خص

ملك العين: رديــــــــــــــــنا

 

الغزال الشمالي: عيل اقولك اسمي بعد .. هاللي ناقص

ملك العين: انزين اجذبي ... قولي أي اسم هب شرط اسمج..

الغزال الشمالي: ماشي احلى عن اسمي... عسب جيه ماروم اجذب

ملك العين: مادري والله على شو شايفه عمرج..

الغزال الشمالي: على كـــــــــــــــــــــــــــــــــــــــــل شي

ملك العين: مثل...

الغزال الشمالي: مممممم... مال وعز و جمال ودلال شو ابغي اكثر..

ملك العين: اخاف الا اارمسها الاميره ديانا

الغزال الشمالي: ماتنزل اكون شراتها...

ملك العين ( صدق انها هب هينه): اكيد .. وين ديانا .. و وين الغزال .. ماخبرتيني انتي من وين.. تعالي من وين خذتي ايميلي

حمده: مهرو... يقولي من وين خذت ايميله.. شو اقوله.. بسرعه فكري

مهرة: مادري والله... مممممممم... قولي بالغلط

الغزال الشمالي: بالغلط

ملك العين: متاكده

الغزال الشمالي: هيه متاكده..

ملك العين: انزين انتي من وين

الغزال الشمالي: من هني .. من وين يعني

ملك العين( بدا الاستعباط): من هني .. صدق .. لا لا ماصدق... اتحراج من هناك اتصدقين

الغزال الشمالي: هههههه.. عادي الكل يتحراني من هناك

ملك العين: كم عمرج

الغزال الشمالي: مالك خص.. المهم.. مليت من الرمسه معاك... يلا باي

ظهرت بسرعه من غير ما تقرا رده.. بس كانت متاكده من ردة فعله..

مهرة: ها شو استوى.؟

حمده: رديتله الصاع صاعين

مهرة: وين قاعده.. في الصعيد

حمده: لا قاعده هني

مهرة: شو هني بعد

حمده: ما بتفهمين .. قومي ورانا كلاس

في البنك:

خلود قاعده في مكتبها في قسم العلاقات العامه...ودخل عليها واحد..

عبدالعزيز: السلام عليج

خلود وهي منشغله في الكتابة: عليكم السلام

عبدالعزيز: اشحالج الغاليه.. ان شاء الله بخير و بعافية

خلود ( وهي مستغربه منو هذا اللي يرمس بهالاسلوب.. رفعت راسها بطالعه.. وطبعا انصدمت.. ): ب.. ب بخير

عبدالعزيز: يا عساج دوم ان شاء الله.. شحال هلج؟

خلود: بخير

عبدالعزيز: واشحاله ابوج ؟

خلود: بخير

عبدالعزيز ( ساكت ما يعرف شو يقول): الحمدلله.. و.. و اشحاله اخوج عمر؟

خلود ( وهي خلاص شويه وبتكفخه): بتخبرك بتم جيه بتسالني عن هليه كلهم.. قلتلك بخير يعني بخير

عبدالعزيز( وهو حاس باحراج): زين زين.. دوم ان شاء الله

خلود: خير .. بغيت شي

عبدالعزيز: الخير في ويهج

خلود( تسوي عمرها منشغله ): اذا ما كان عندك شي تقوله .. اسمحلي تراني مشغوله

عبدالعزيز: عندي سؤال..

خلود: خير

عبدالعزيز: ليش ما تبغيني.. شو سويتلج؟

خلود: ..........

عبدالعزيز: خلود تدريبي عدل... والله اني اباج.. حرام تسوين فيه جيه

خلود: ........

عبدالعزيز: ليش رفضتيني بهالسرعه... مع انج تدرين اني بموت من دونج

خلود:.......

عبدالعزيز: انزين عطيني فرصه ثانيه... !!

خلود رفعت سماعة التلفون: الو فرح.. لو سمحتي اذا ما عليج اماره هاتيلي كـــــــــــــــــــــــــــــل الملفات االلي عندج .. بخلصهن اليوم.. ابا اشتغل.. ولو سمحتي لا تدخلين حد مره ثانيه

عبدالعزيز تم يطالعها.. : تراني هب ظاهر.. لين ما تردين عليه يالس ارمسج

خلود: نعم .. ما سمعت.. شو كنت تقول..

عبدالعزيز: سلامتج.. كنت يالس ارمس عمري

خلود: لو سمحت انت يوم دخلت شفت اللافته المحطوطه عالباب؟

عبدالعزيز: اللي مكتوب عليها قسم العلاقات العامه.. هي شفتها بلاها...اتصدقين انها حلوه و اللي محلنها اكثر انتي

خلود: اولا .. شفتني ملصقه على اللافته...و ثانيا.. انت قلتها علاقات عامه.. مب عيادة نفسيه

عبدالعزيز: والله انتي السبب... انتي اللي خبلتيني

خلود: امبونك خبل( بصوت واطي)

عبدالعزيز: شو

خلود: ماشي.. انا الحينه مشغوله.. اذا ما عندك شي تقوله .. تفضل مع السلامه

عبدالعزيز: بس بتم وراج وبتشوفين..

وهو ظاهر شاف ريال دخل المكتب .. وقف عبدالعزيز عند باب المكتب و صد يطالع الريال

عارف: اشحالج خلود...

خلود و هي تبتسم: بخير ربي يعافيك .. علومك انت..

عارف: علوم الخير والله.. وينج ما تبينين

خلود( وهي مرتبكه بسبة نظرات عبدالعزيز): مشغوله شوي

عبدالعزيز: لو سمحت يالاخ... خير بغيت شي..

خلود(انصدمت من موقف عبدالعزيز)

عارف: نعم... انت اللي بغيت شي

عبدالعزيز: هي بغيت اعرف شو تبا ترمس البنيه

خلود( خاطرها تفر عليه نعالها)

عارف: حتى انا بغيت شي منها... وبعدين تعال .. منو انت اصلا عسب تسالني.. ولف يطالع خلود

خلود( خاطرها تنخش تحت الطاوله): هذا... هذا ..

عبدالعزيز: ايه انت البنيه مشغوله... تفضل برع

عارف استغرب من هالموقف

خلود: لا هب مشغوله... خلاص اخ عبدالعزيز.... نتفاهم بعدين( ويهها محمر تقول اشاره مرور)

عبدالعزيز: توج تقوليلي مشغوله

عارف (حس انه الموقف محرج): بترخص الحينه... برد بعدين ارمسج خلود.. مع السلامه..

خلود: الله يحفظك

عارف وهو ظاهر مر حذال عبدالعزيز اللي كان خاطره يخش صبوعه في عيونه

خلود: بتخبرك انت ما تستحي

عبدالعزيز: مادري من اللي ما يستحي فينا.. كيف جيه ترمسين ريال غريب ها

خلود: ماغلط الريال سلم و سال عن حالي.. وهذا زميل عمل وبس

عبدالعزيز: زميل عمل او زميل مدرسه... انا ما يهمني .. بس ها ما يحق لج ترمسينه بهالطريقه.. وانا اللي من الصبح ارمسج ما عبرتيني..

خلود: اتشطر وافهمها.. مابغي ارمسك غصب يعني.. وبعدين يوم انك زعلان اني ارمس ريال غريب ما تشوف عمرك .. تراك غريب حالك حاله

عبدالعزيز: انا تشبهيني بهالحمسه

خلود( ابتسمت من رمسته.. بس حاولت ما تبين): وبعدين ما يحتاي تغلط عليه

عبدالعزيز: انتي شو حايتج للشغل.. كل شي عندج لازم يعني تعورين راسج وراس غيرج

خلود: عايبني عوار الراس.... و عايبني اكثر انه اعور راس غيري( طبعا تقصد عبدالعزيز)

عبدالعزيز( يحاول يتمالك نفسه): برايج

خلود: اقول

كان ظاهر بس يوم سمعها رد...

عبدالعزيز: لبيه

خلود: صك الباب لو سمحت

انقهر عبدالعزيز من حركتها... بس طبعا شو يقدر يسوي.. ماله حق عليها

اما خلود فكانت اطير من الفرحه.. يستاهل خله يغيظ... يتحكم بعد... غبي.. غبي و حلو.. هههههه... وتمت تضحك

 

عبدالعزيز عمره 26 سنة، ماشاء الله عليه غاوي ، ربيع عمر من ايام الدراسه.. بس ما كان على علاقة معاه لذاك الزود.. شاف خلود مره في بيتهم يو م عزم عمر ربعه من تقريبا اربع سنين... وطبعا عيبته... كان دوم يشوفها وهي راده من المدرسه ايام الثانويه... بعد فتره قرر يخطبها عقب ما خلصت الثانويه.. هاك الوقت كان عبدالعزيز بطالي لا شغل ولا مشغله... طبعا خلود كانت تدري انه يحبها بس كانت تتمنى في نفس الوقت شخص احسن منه.. وفي فترة الخطوبه رفض انها تكمل دراستها.. بس هي ما طاعت.. ما عيبتها تصرفاته.. كان يحب يتحكم فيها بصوره كبيره.. طبعا من ربع اخوها عمر.. ولين هاليوم وهو يلحقها... خطبها المره الثانيه بس هي ماعطته فرصه و رفضت.. قعدت تذكر يوم يا واحد يخطبها..يوم عرف عبدالعزيز .. بغى يموت.. راح عند ابوها و قاله ان خذت غيره بيذبحها.. خيبه صدق انه دفش... وبعد يباني اخذه.. يحلم.

 

 

العين:

 

محمد يالس في مكتب ابوه و طبعا النت..

محمد: الله ياخذ ابليسج يالغزال... ملت مني اونها.. خلها تدخل والله لا اراويها

ودخل عليه ابوه: ها محمد شو حالك؟

محمد: يسرك الحال. اشحالك ابويه

ابو محمد: بخير الله يسلمك.. بعدك تجابل هالمكينه

محمد: أي مكينه يابويه .. يسمونه كمبيوتر

ابو محمد: مادري شو اسمه.. انا اباك تجابل الشغل.. مب البنيات و المغازل

محمد: وانت شو عرفك انه هالمكينه فيه بنيات

ابو محمد: عنبوك دامك متفيزر تجابله طول اليوم شو بيكون فيه يعني.. انت ما تجابل شغلك شكل ما تجابل البنيات

محمد: ههههههههه.. ما تبغي تتعلم؟!

ابو محمد: لا يابويه ما فينا على حشرة العيوز..

محمد: ههههههههه.. و تبغيني اعرس بعد عسب حرمتيه تتحكم فيه..

ابو محمد: شو احلى عن العرس.. يوم تصبح الصبح تشوف ريوقك زاهب.. ترد من الشغل غداك زاهب... ماترقد الا وانت متعشي هاك العشا الغاوي شو تبغي اكثر

محمد: يعني العرس ما ينفع الا حق الاكل و بس

ابو محمد: ليش شو تبغي اكثر... المهم انك ترتاح

محمد: انزين تراني مرتاح جيه

ابو محمد: الحينه انا مخلنك على راحتك... بس عقب ما بسكتلك

محمد: هههههههه بتيوزني غصب شرات الحريم

ابو محمد: هيه دام هاي رمستك عن العرس ما ينفع معاك الا العين الحمرا

محمد: هههههههههههههاااااي صدق انك سوالف يا بو محمد

ابومحمد: شفت محلاتها الكلمه

محمد: أي كلمة.؟؟ بو محمد يعني.. ليش بلاها

ابو محمد: تحس براحه يوم تعرف انه حد بيجابلك و بيعابلك يوم بتكبر..

محمد: اها .. انا ماحسيت بشي الصراحه

ابو محمد: لانك غبي ..

محمد سرح بتفكيره .. هالكلمة ثاني مره يسمعها.. من وين سمعها قبل.. هيه.. من راعية الماسنجر... الغزال الشمالي.. وهو سرحان يفكر فيها.. انتبه لشاشة الكمبيوتر.. اوه .. حد يرمسه.. ماصدق... الغزال.. عمرها طويل

 

الغزال الشمالي( حمده): السلام عليك

الغزال الشمالي: رد السلام انزين

الغزال الشمالي: اخاف الا ارمس يهودي وانا مادري

الغزال الشمالي: حووووووووووووووووووووووه... وينك

ملك العين: حووه في عينج...

الغزال الشمالي: جيه انتو يالشباب ما ينفع معاكم الا السب

ملك العين: ما عاش اللي يسب ولد الرميثي.. وبعدين بتخبرج شو شايفتني تيش جدامج تقوليلي حووه

الغزال الشمالي: شو اقولك يعني .. تراني يوم قلتلك حووه رديت عليه.. ومن الصبح ارمسك عاطني بولباس

ملك العين: كيفي .. ماكنت متفيجلج..

الغزال الشمالي( شابه ضو): الشعور متبادل اتصدق.. بس عاده كسرت خاطري و قلت اشل عنك البلوك

ملك العين( وعيونه لابقة): صدق.. شليتي البلوك... زين زين... لاني انا رديتج عقب ماسويتلج دليت

الغزال الشمالي: سبحان الله... الحال من بعضه... نسيت اسالك عن حالك

ملك العين: قبل ماتدخلين كنت بخير و بعافيه..بس يوم شفتج انجلب حالي.. استويت هب بخير

الغزال الشمالي: يعلك دوووووووووووووووووووووووم ان شاء الله.. قول امين happy.gif

ملك العين: في اللي يكرهني ان شاء الله

الغزال الشمالي: وايد عيل يكرهونك

ملك العين: جيه تتحرين كل الناس شراتج

الغزال الشمالي: انا الحمدلله محد يكرهني

ملك العين: اشك الصراحه.. شكلج غلسة و محد يحبج

الغزال الشمالي: محد غلس غير حرمتك

ملك العين: ههههههههههه فديتها والله

الغزال الشمالي( متزوج بعد): الله يعينها والله

ملك العين: صدقج... ماتروم تتحمل واحد شراتي... الف بنيه تتمناني اتصدقين

الغزال الشمالي: انزين يا اخ... شو اسمك انت حمود صح

ملك العين: محمد لو سمحتي.. وبعدين شو حمود.. اصغر عيالج

الغزال الشمالي: لو عندي ولد شراتك جان ذبحته

ملك العين: الحمدلله هب ولدج

الغزال الشمالي: ماخبرتني منو هالبقرة الي وافقت و خذتك

محمد مانتبه للجمله الاخيره لانه دخل موقع اغاني يبغي يطرشلها اغنيه... و حصل اغنيه الغزال الشمالي...وطرشلها ..

(((((فيك ظني اظني جيتني مهتوني... متعب اللي تولع في الهوى صرت فني..جيتني باختيارك و الحب مابه تشارك... مبعد عن ديارك و قلتلي اسرني... الخجل في سلامك و الغزل في كلامك و الدلع في ابتسامك وطرف عينك فتني))))))))

 

رد يقرا اللي كتبته... فتح عيونه...

ملك العين: محد غيرج بقره ... صدق انج ماتستحين.. وانا الي مسوي عمري جنتل مان ومطرشلج الاغنيه..

الغزال الشمالي: ههههههههههاااااااااااااااي

ملك العين: ضحكتي من سرج

الغزال الشمالي: انزين انت ليش مغيظ... انا ماقلت شي غلط

ملك العين: لا والله

الغزال الشمالي: بذمتك يعني االثور بياخذ منو غير البقره...هههههههه

ملك العين:ثور ينطحج... انتي متاكده انج بنيه تراني والله بديت اشك

الغزال الشمالي: هيه متاكده...

ملك العين: اونه الغزال الشمالي.. امي روحي غيري النيك و حطيلج بقرة الفريج

الغزال الشمالي: حقوق الطبع محفوظه.. حرمتك هي بقره الفريج هب انا

ملك العين( شوي و بيمط شعره): تعرفين.. انجلعي يلا..

وظهر عنها... كان صدق معصب.. هاي اول مره بنيه تغلط عليه.. ولا بعد هو يرمسها عدل وهي اللي تراد عليه.. ماعرف شو يقوللها.. مب متعود يسب...

ابو محمد: محمد.. قم نش يالله بنسير دبي..

محمد: .........

ابو محمد: بلاك جيه اعتفست مره وحده ,, توك تضحك

محمد: ما بلاني شي ...

ابو محمد: انزين قوم نسير

محمد: وين بنسير

ابو محمد: شو فيك... صدق انك ثور .. اقولك من الصبح بنظوي دبي.. بنسير عند منصور بن ضاحي

محمد عاد يوم سمع كلمة ثور ماستحمل .. صدق عصب ...و قام بيظهر من المكتب

ابو محمد: وين بتروح

محمد: عند ربعي..

ابو محمد: والشغل.. اعطيك معاش عالفاظي انا

محمد ما سمع رمسة ابوه.. ركب سيارته و راح عند ربعه

الجامعه:

 

حمده: ههههههههههههههااااااااااااااااااي

مهرة: بلاج تضحكين من الصبح... خيريني انزين

حمده: الحقيني بطني يعورني بنفجر من الضحك

مهرة: انزين ضحكيني وياج

حمده: حليله والله.. شو سويتبه

مهرة: راعي العين؟!

حمده: منو غيره يعني...ههههههههههه

مهرة: الله يعينه والله... بيكره حياته و السبه انتي

حمده: احسن يستاهل...

مهرة: انزين ما خبرتيني بتين بيتنا يوم الخميس

حمده: هيه... اوووووووه نسيت... ما اقدر

مهرة: افا والله... ترانا متفقين من اسبوع

حمده: ابويه عازم قوم خليفه و هله .. بنسير رباعه ليوا

مهرة: يا حظكم والله.. بتظهرون.. هب شراتي انا

حمده: تعالي معانا انزين..

مهرة: يا حسرة منو بيخليني... خلاص عيل خليها الاسبوع الياي

حمده: تم.

 

 

Link to comment
Share on other sites

يوم الخميس--- المزرعة (ليوا)

 

يلس بو عمر مع عمر و فيصل و خليفة في الميلس.. يلسوا يسولفون و يتضاحكون على سوالف فيصل و طنازته...

فيصل: ابويه بخبرك سالفة ربيعي سعيد

ابو عمر: عنبوك ما خليت حد مارمست عنه

فيصل: الا هي سوالف وبعدين انا ماذمه ولا افتري عليه

خليفة: واضح

فيصل: شو اللي واضح بعد.. هب جنك من الصبح مستانس على اللي اقوله... اسمع انزين

عمر: هات اللي عندك

فيصل: مره كنا يالسين في ميلس حمد... عاده وصلوا الشباب و يلسنا نسولف .. بغينا نتعشا.. قال سعيد خلنا نطلب لانه الوقت متاخر

ابو عمر: انزين

فيصل: قام الحبيب بيسير ييبلنا عشا من برع... لا وبعد بيتزا

عمر: ويه فقر ما تنلامون

ابو عمر: خله يكمل... كمل كمل

فيصل: ظهر سعيد وركب سيارته وشل طلبية البيتزا... وصل سيارته .. مارام يفتحها لانه ماسك البيتزا.. حطها فوق السياره وركب سيارته ونسى البيتزا المحطوطه فوق

ابو عمر: صدق انه خديه

فيصل: المهم وصل الميلس ودخل علينا... سالناه وين الاكل جان يقول اوه نسيته والله

خليفة: هههههههههههاااااااااي... بغل

فيصل: ورجع تذكر وين حطها .. ظهر برع وانه يشوف البيتزا بعدها موجوده فوق... و رد الميلس.. واحنا ناقعين عليه من الضحك

عمر: ها دومه جيه خبل...ههههههههه

فيصل: صدقك والله خبل... حليله بس.. فنان وراعي سوالف

خليفة: توه يذمه والحينه يمدحه..!

وتدخل عليهم عذابه...

عذابة: ابويه ترا الغدا زاهب... ويايه تظهر من الميلس..

فيصل: عذوب ... منو اللي طابخ اليوم؟

عذابه( سؤال سخيف شراتك): منو يعني... اكيد امايه؟

فيصل: وانتي ما طبختي؟

عذابة: وليش اطبخ... لا طبعا ما طبخت

فيصل: ها جيه انتو يالبنات... حتى الطبخ هب فالحات فيه

عذابه: انته هب يوعان... خلاص عيل قم تغدا وما يحتاي تتفلسف

فيصل: انزين .. تعالي... متاكده انج ما زخيتي شي في المطبخ

عذابه: هيه متاكده

فيصل: الحمدلله

عذابه: ليش ان شاء الله

فيصل: لانج لو طبختي... عزالله تغدينا اليوم

ابو عمر+عمر: ههههههههههههههههه

عذابه: ابويه.. طالع فصول...( انحرجت وايد من رمسة اخوها... وخاصة انه خليفه معاهم)

خليفة: غلطت يا فيصل... الغدا بيحلو لو عذابة هي اللي طابختنه

عذابه: الغدا جاهز .. ( ظهرت بسرعه قبل ماتسمع شي ثاني يحرجها...)

 

تغدوا .. يلسوا يسولفون شويه.. و عقبها دخل ابو عمر الحجره يستريح... ودخلت اليده بعد حجرتها.. وقعدت ام عمر مع ام خليفه في الحجره يسولفن... اما الشباب فراحوا صوب الحوض... فيصل و خليفه تسبحوا.. اما عمر فكان قاعد في الزاويه يرمس بالتلفون..

يلسن البنات رباعه... الهنوف يلست معاهم عقب مارقدت عيالها ..

حمده: وناسه والله اليوم.. لو كل اسبوع نأجز في ليوا جان زين

عذابه: احمدي ربج انه ابويه فكر ييبنا اليوم

ريم: اذا تبن كل يوم ني هني عادي... بخبر ابويه و اكيــــــــــــــــــــــــد ما بيرفضلي طلب

حمده: اكيد.. تراج دلوعة ابوج.. بنت ابوج ما تنلامين

ريم: والنعم بعد.. عندج مانع اخت حمده

حمده: لا ما عندي مانع بيبي ريم.. لازم ندلع اليهال ..

ريم: ياهل ريلج

حمده: بلاج انتي على ريلي.. كل ماقلتلج شي .. سبيتي ريلي

عذابه: لانه اغلى واحد عندج

علياء: هههههههههههه... هيه والله

الهنوف: خلاص بسكن من سوالف اليهال... ماخبرتيني خلود شو الشغل معاج

خلود: الحمدلله.... ( وجان تسرح في سالفة عبدالعزيز) و ابتسمت

الهنوف: بلاج تبتسمين خير..!!

خلود : بخبركم بس مابغي حد يعرف

ريم: سرج في بير

عذابه: طاعوا منو يرمس..

علياء: خلونا نسمعها الحينه عقب اظاربن

خلود: من يومين وانا قاعده في المكتب

حمده: اكيد بتقعدين في المكتب .. وين عيل في الشارع مثلا

خلود( تمت اطالع اختها)

الهنوف: كملي ماعليج منها

خلود: كنت مشغوله يالسه اقرا اوراق عندي في المكتب

حمده: ياربي ردينا.. والله ندري انج تشتغلين في المكتب...

عذابه: حمدو بسج عاد.. خلها تكمل

حمده: ها سكتنا

خلود: المهم دخل واحد وسلم... تتوقعون منو كان

حمده: منو يعني اكيد الفراش.. تراج في المكتب ولا نسيتي

علياء + ريم: ههههههههههه

الهنوف: ما شاء الله عليج انتي ذكيه... يمكن تسكتين شوي خلها تكمل

خلود: لا فديتج هب الفراش.... واحد ثاني ما تتوقعنه

عذابه: منو غيره يعني... روميو المتعذب... عبدالعزيز المزروعي

حمده+ علياء+ريم+الهنوف: قولي والله

خلود ( وهي تضحك على اشكالهم): والله

الهنوف: انزين بلاه بعد.. ليش ياينج المكتب

خلود: مادري والله... ماعطيته فرصه يرمس

حمده: والله انج خديه

علياء: صدقها حمده.. سوري خلود بس صدقها... عنبوكن كل ما يكن حد ما طعتن مادري ليش( وين عيونها في عيون عذابه)

الهنوف: ما قالج شي

خلود: يقولي ليش ما طعتي تاخذيني.. وهالموال الجديم

عذابه: صح كلامه.. ليش ماطعتي تاخذينه

خلود: يوم يا يخطبني اول مره ما كان يشتغل ولا يدرس.. بطالي لا شغل ولا مشغله... وبعدين انا ابغي ادرس واخلص دراستي و اشتغل.. ابركلي من اني اخذ واحد مايفكر في حياته.. وبعدين الصراحه طبعه مايعبني.. يكفيني انه من ربع عمر

الهنوف: فاهمتنج

ريم: انا مافهمت

خلود: مايحتاي تفهمين... ولا ماتدرن شو الي استوى

حمده: شو

خلود: دخل عارف.. اللي يشتغل في القسم الثاني... كان ياي يسلم و يسال عن ملف... المهم شافه عبدالعزيز... واتخيلوا عاده شو سوا الحبيب

عذابه: اكيد حفله

خلود: هيه والله... فشلني جدام عارف...

حمده: يا ويل حاااااااااااااااااالي انا على اللي يحب.. عاشق عاشق ما ينلام

علياء: يا حليله

خلود: ايه انتن بلاكن تمدحونه.. اقولكم فشلني جدام الريال

حمده: حلاته يالخديه.. ها دليل انه يحبج و يغار عليج

خلود: الغيره شي... والشك شي ثاني... وانا قايلتله مايدخل في حياتي دام انه ما يعنيلي بشي

الهنوف: الريال شارنج.... ليش ماتوافقين عليه

خلود: هذا يحب يتملك الناس... وانا الصراحه ماظن برتاح مع انسان مثله..

علياء: شو سويتيبه

خلود: ماشي رغته من المكتب

عذابه: حرام كسر الخواطر... ترى كثر الجفا ما يفيد

ريم: رمست حرمة اينشتاين... ارمسي عن عمرج اول شي... البقره ماطالع ذيلها اطالع ذيل ربيعتها

عذابه: مالج خص... و بعدين مارمسج انتي...انزين خلود.. تعتقدين انه رمس اخويه عمر

خلود: لا ماظن.. ولا جان شفتي عمر مسوي حفله في البيت.. هو من الله يباني اودر الشغل

الهنوف: اظن انه عبدالعزيز اتغير.. هب شرات قبل

خلود: يمكن... مادري والله

حمده: يعني في امل انج توافقين

خلود:.........

ريم: السكوت علامة الرضا

علياء: لا هالايام اللي تسكت يعني لا... ترى البنات هب شرات قبل يستحن... الحينه هن اللي يختارن و مايشاورن حد بعد

عذابه: هب كلهن... المهم خلود... اذا ياج بتوافقين...

خلود: مادري... غيروا السالفه احسن

ريم: بتخبرج الهنوف بلاه هذا ريلج 24 ساعه ماسك التلفون.. يرمس منو

الهنوف: ها...( ارتبكت)... اكيد عنده اشغال

علياء: عنبوه 24 ساعه.. من يينا ليوا وهو يرمس و يسولف... ماودر التلفون الا يوم يلس يتغدا

الهنوف: يمكن يرمس حد ... او عنده شي مهم يعني.. وبعدين انتن مالكن خص...

خلود: ماعليج منهن... دومهن جيه..

العشا...

عقب صلاة العشا قامت عذابه بتفرش حصير على الارض لانهم قرروا يتعشون برع... وفجاه سمعت صوته...

خليفة: اشحالج عذابه؟

عذابه: بخير

خليفة: تبين اساعدج بشي

عذابه: الا هو حصير شو بتساعدني فيه يعني

خليفة: ليش جيه تعامليني؟

عذابه: شو سويت يعني.. سالتني ورديت على سؤالك

خليفة: الرد مايكون جيه.. ترى كثر التغلي والله يذبح.. و البعاد والله يجرح

عذابه: .........

خليفة: والله ما خطيت يوم اني اخترتك حبيب... خطاي اني عجزت بالطيب كيف اجاريك

عذابه: خل نفسك عزيزه.. حرام تذلها

مشت عنه و خلته في احزانه وهمومه.... لف صد وراه... عذااااااااااااااااااااااااااابه..!!

عذابه وقفت بس ماصدت اطالعه

خليفة: ترخص لج انفاسي يا بعد ناسي

عذابه ماقدرت ترد عليه... وروحت عنه

 

اتعشوا و استانسوا بالجو اللي كان اكثر من رائع..

فيصل: خليفة .. سمعت هزاع المنهالي

خليفه: هيه سمعته

عمر: منو هذا بعد

علياء ( وهي تصاصر اختها الهنوف): حتى مايعرف المغنيين .. الحمدلله والشكر... ها كله من زود مايرمس بالتلفون.. تقول يالس يرضعه..

الهنوف: لمي ثمج..

فيصل: هذا واحد يغني... اغانيه عجيبه

خليفة: مب لذاك الزود

فيصل: اكيد.. من قدك..ابويه ترى عندنا مطرب في العيله.. خليفة القبيسي

ابو عمر: صدق .. ماسمعتنا عيل

فيصل: بيزنل شريط بعد

اليده: هاللي ناقص...

خليفة: ليش شو فيها.. عادي يدوه

ام خليفة: والله ما بيستوي هالشي دام اني عايشه.. بتفشلنا انت بين العرب

ام عمر: صدقها امك يا خليفه...

خليفة: ترانا نسولف..

ابو عمر: ماعليك انت من الحريم.. مايصدقن شي

اليده: بلاهن الحريم.. ها ماسمعتك.. عيد اللي قلته

ابو عمر: ماشي ماشي... ارمس فصول

اليده: وابويه عليك ... الحريم هن تاج راسك انت وغيرك... امك حرمة و زوجتك حرمة و بنتك حرمه.. و بعدين انتو يا الرياييل ماترومون تعيشون بليانا..

ريم: عاشت اليده

علياء+حمده+خلود+ عذابه: عاشت عااااااشت عااااااشت

فيصل: الله يهديك يا بو عمر لازم ترمس عن الحريم وانت يالس وسطهن

خليفة : صدقه فيصل.. اذا غيظن مادري شو بيسون فينا

عمر: والله الحريم لو بغمنا عليهم بغمه وحده شفتهم تحت ريلك

الهنوف: طال عمرك الحريم يوم يقعدن تحت ريولكم مب ذل.. تراه يسمونه الاحترام و التقدير اذا ماكنت تعرفه

عمر: غصبا عنهن لازم يقعدن عند ريلنا

اليده: ويديه انا ..وليش ان شاء الله غصبا عنهن... تتحرى الحرمه يوم تشتغل حق ريلها وتعابله غصبا عنها.. لا والله.. الحرمه يوم كانت تشتغل .. تشتغل و هي مستانسه.. لانه تحب تفرح بعلها ... عاده وينه البعل... غادي شرات التيس

ام خليفة: ماعليج من رمستهم... والله مايعيشون بليانا يوم واحد

ام عمر: صدقتي والله .. ولا اذكرك يا بو عمر يوم رحنا العمره و قعدت روحك في البلاد

ريم: هيه اذكر... تقول الشيبه اللي مضيع ناقته

حمده: تشبهين امايه بالناقه...صدق ماعندج سالفه

ريم: الا هو تشبيه بلاج انتي

علياء: وبعدين لا تنسون .. الام مدرسة اذا اعددتها اعددت شعبا طيب الاعراق

فيصل: بتخبرج بنت عمي شو يخص هالبيت في الي نقوله

علياء: ترا الام حرمه...ويقولك الحرمه شرات المدرسه

اليده: ويديه عليج... بلاكن يالبنيات اخترشتن مره وحده.. اللي تقول ناقه واللي تقول مدرسه

فيصل: عيل احنا شو .. النواطير

عذابه: اتخيل فيصل ناطور في مدرسة حرمته..ههههههههههههههههااااي

فيصل: احلفي انتي بس

الهنوف: وفي مثل ثاني يقول وراء كل رجل عظيم امرأه

خليفة: وانا اشهد

عمر: خليك خليفه عن سوالفهن البطالبه هاي ... و سمعنا صوتك

حمده: صدقه عمر.. اطربنا يالعندليب

عذابه: أي عندليب انتي بعد.. صدقتي اشوفج

خليفة: وليش ماتصدق... !!

عذابه: مادري.. بس ماظن انه صوتك حلو

فيصل: انتي شو دراج.. ليش سمعتيه وهو يشل

عذابه: لا... ماحصلي الشرف

خليفة: عيل اسمعي و تراه اهداء...

 

ظلمني صاحبي اكبر ظليمه ... ظلمني دون قدر و دون شيمة..

ظلمني و صرت انا بالظلم راضي... ولو هو مرتكب اعظم جريمة...

بعد ما كنت له بالحب وافي... حبيبي راعي النفس الحشيمه ..

جفاني وليته الا ما جفاني.. ولا سبب لي جروح عظيمه...

وليته حس بقلبي المعذب.. و نفس من عنا الدنيا سقيمة ...

سهير الليل و السبه همومي... و تشهد لي دموعي اليتيمه..

بعيد عن ديار اهلي وناسي.. و لا لي غير ذكراهم لزيمه..

وانا يا ناس مالي غير رجواه.. رجا قلبي يناظرله نديمه..

غناتي روف بي تكفى تراني.. اشوف العمر ماله أي قيمة..

ظلمني صاحبي اكبر ظليمه.. ظلمني دون قدر و دون شيمه..

 

كان صوته اكثر من روعه.... والكل انبهر بصوته حتى عذابه,,, تمت اطالعه وهي مستغربه.. معقوله هذا هو خليفة.. كان تدري انه الكلام موجه لها.. والكل كان يدري بهالشي

 

ابوعمر: صح لسانك

خليفة: صح بدنك

عمر: ما شاء الله عليك يا خليفة..

اليده: شو هالصوت الغاوي يالقبيسي .. تقول بروغه

خلود: ماحصلتي غير بروغه.. وبعدين هب شراته... احلى والله

الهنوف: ابدعت والله... دومك جيه اصلا

علياء: اكيد تراه اخويه .. بيظهر على منو يعني ( استحت عقب ما رمست.. حست بنظرات فيصل)

فيصل: في هاي صدقتي يا بنت عمي

ريم: صوتك روعه يا خليفه... ليش ماتغني

ام عمر: يوم ماعندج شي زين تقولينه سكتي احسن...

ريم: هههههههههههه.. ان شاء الله

حمده: اقول خليفة.. ليش ما تسجل صوتك في شريط وتعطيني اياه...

علياء: انا عندي...

حمده: تو الناس.. توج تخبرينا..

علياء: هاي اسرار العايله

حمده: بدت الحينه... عطيني اياه

علياء: ممممممممم بفكر

ريم: حبيبتي علايه... حتى انا اباه

علياء: بعد بفكر...

ام خليفه: عطيهن اياه.. الشرايط مكوده عندج

ريم: وااااابويه عليج.. هب شريط ولا اثنينه.. ظهرن شرايط

علياء: يا امي لازم شويه اذلهن.. لانه مابحصل هالفرصه عقب

وضحك الكل على رمستها الا عذابه اللي تمت اطالع خليفة... وهو حتى تم يطالعها..

خليفة: ها عذابه.. ما خبرتيني .. شو رايج.

اليده: ما يحتاي تسالها... اكيد حلو

خليفة: ابغي اسمعها هي..

عذابه: زين

خلود: هذا كله و تقولين زين بس

عذابه: حلو وزين

علياء: ترمسين بالقطاره انتي

عذابه: بقول بس اذا عطيتيني الشريط..

خليفة ابتسم من ردة فعلها... وقف وراح عند سيارته.. ورد وفي ايده شريط

خليفة: ماطلبتي يالغاليه... ( وعطاها الشريط)

عذابه: صح لسانك يا خليفه.. ابدعت والله...(((( صغت المعاني من بحور الهواجيس و اخترت منهن من صفالك من الماس بيوت شعري يسبقني مراميس وقمت احرك نبض قلبي و الاحساس)))))))

علياء: يا سلاااااااااااام ها كله عسب الشريط

حمده: يا ويل حااااالي انا... خليفة بقولك قصيده كامله بس تعطيني الشريط

خليفة: ماظن

ريم: اكيد لا ... هب شراتنا احنه ننذل عسب شريط

حس خليفة بانه هاي اسعد لحظات حياته... عذابه تحن عليه و ترمسه... اكيد هو في حلم.. بس تمنى انه هالحلم يستمر طوووووول حياته

 

وفجاة رن تلفون عمر... ارتبك شوي .. نش يرمس بعيد عن هله

علياء: بدا ... الله يعينج عليه

الهنوف: اخاف الا انتي حرمته هب انا

علياء: هاي يزاتي اني احاول انصحج

الهنوف: صدق والله.. نصحتيني.. بس اتصدقين ماذكر شو كانت النصيحه

علياء: بعلمج كيف تعاملين ريلج..

الهنوف: اخاف الا ارمس امايه وانا مادري... وبعدين انتي شو عرفج بسوالف العرس

علياء: الله يخلي المسلسلات المصريه..ههههههههه

خلود: ماتعبتي وانتي تتفلسفين على اختج

علياء: تعبت.. بس ماشي فايده

خلود: الهنوف خلنا نسير نتمشى شوي..

الهنوف: زين يوم قلتيلي لاني شوي و بنتحر من رمست عليو

علياء: بلاها رمستيه بعد؟؟

خلود: ما بلاها شي... سرنا الهنوف .. يلا باي

يلس ابو عمر يسولف مع فيصل... واللي تفكيره كله عند بنت عمه علياء ( فديتها والله حلوه و مزيونه ...)) ابو عمر: هيه انت وين سرحت؟

فيصل: ويا ك وياك

ابو عمر: ارمسك من الصبح عن الشغل و انت ماترد عليه.. شو الي تفكر فيه...

فيصل: ماشي .. مافكر بشي

ابو عمر: انزين ماخبرتني شو استوى بمشروع منصور بن ضاحي..

فيصل: مادري والله.. العلوم عند عمر...

ابو عمر: وانت عيل شو خانتك دام اخوك اللي شال الاشغال على راسه

فيصل: ها... اوكي.. زين (سرحان)

ابو عمر: فصول و الصمخ.. ارمسك تراني

هييج الساعه الكل ضحك على فيصل واولهم علياء... كانت تحس انه تفكير و عقل فيصل عندها بس يا ترى حتى قلبه عنها ..!!!!

 

ام خليفة: شوفي خليفه ؟!!!... الله يهديه بس

اليده: بلاه... تراه يحبها شو بنقوله الحب حرام

ام خليفة: زين يوم انج تدريبه.. بس غيرج مايدري

ام عمر: ياخويتي والله لو بايدي جان غصبتها وخليتها توافق وتاخذه... بس ماظنج ترضينها على بنت من بناتج..!!

ام خليفه: اكيد مارضاها... بس ودي اعرف بلاها البنيه عايفتنه

ام عمر: علمي علمج... بس تدرين وها الكلام بيني و بينج.. ترى عذابه تحبه

اليده: أي حب هذا.. واللي تحب تتمنى تزوج اللي تحبه انا هذا اللي احيده و هذا هو الحب..

ام عمر: مادريبها والله.. بس ساعات احس انها تحبه وساعات ينجلب حالها

اليده: يمكن فيها مضره

ام عمر: أي مضره اللي يهديج

اليده: ارضيه دخلت فيها .. انتي شو عرفج

ام خليفة: ارضيه عاد..هههههههه

اليده: هيه ارضيه... انتن شو تعرفن عن هالسوالف.. ها بنت المناصير اللي في العين خطبولها واحد من هلها تحبه وتموت فيه... وقبل العرس بيومين مابغته.. عافته.. احتاروا هلها مايدرون شو السبب.. ودوها عند المطوع و قال انه مسويلها سوا....

ام خليفة: السوا غير المضره

اليده: ادري.. عسب جيه اقولكم انها ارضيه.. محد يبغي بنتج ليش بيسوبها سوا.. الكل يدري انه ولد عمها يبغيها

ام عمر: يا امايه... أي سوا اللي يهديج واي مضره.. بسير اييب الجاهي احسن..

قامت الهنوف تتمشى مع خلود..

خلود: والله استانسنا اليوم.. غيرنا جو .مب شرات كل بيت وشغل بيت وشغل.. ما تحسين براحه نفسيه وانتي تمشين بهالمكان الهادي تحسين انه الهموم بعيده عنج.. وما تحسين باي ظغط..

الهنوف:...........

خلود: هنوف تسمعيني ولا لا...؟

الهنوف: هاااااااااااااااا..هي هي وياج..

خلود:بصراحه ما اظن انج معايه..هنوف بشو تفكرين..شو اللي ماخذ عقلج؟

الهنوف: سمعتي كيف اخوج يرمس..

خلود: قصدج عمر...؟

الهنوف: هيه عمر..سمعتي كيف يرمس عن الحريم. ما اصدق انه يعتبرني ولا شي بالنسبه له..يعني كل اللي اسوي له يعتبر مذله.صراحه هذا اخوج انسان متخلف وعديم الاحساس...

خلود:من جهة متخلف..فهو متخلف.وبعدين ما اظنه يقصدج بكلامه..؟

الهنوف: صدقيني كل كلمه يقولها عني انا.. بس ما يبين..

خلود:والله ما عرف شو اقولج...ماقدر ادافع عنه لاني ادريبه غلطان

الهنوف: شوفي شو يسوي الحين.. من الصبح وهو ماسك هالتلفون.. اختي علياء من الصبح تشوفه وهو على هالحال..الصراحه والله انحرجت ما عرفت كيف ارد عليها.. كل ما احاول اخفي اللي يصير بيني وبينه هو روحه يفضح عمره..انا ادريبه انه يرمس بنات ويغازل وكل هذاهب شغل..

خلود:الحين بثبت لج انه ما يغازل .. تعالي معايه

مسكت ايدها ويرتها صوب عمر اللي كان معطيهم ظهره وفجأه وقفن على كلام عمر..

 

عمر: فديتج والله حتى انا متوله عليج.. وباجر انشاءالله اول ما اوصل دبي بتلبس وبصلي وسيده بطير بوظبي..

الهنوف انصدمت من رمسة عمر لهالدرجه ما يحس ولا يحترم شعورها.. اما خلود فانحرجت من حرمت اخوها.. وكانت تقول في خاطرها(يا ربي شو سويت انا الغلطانه ليش يبتها هني) وصدت اطالع الهنوف واللي كانت منزله راسها وكان ويهها احـــمــــــــــــــــــــــــــــــــــر..

خلود:ال... الهنوف اكيد ما كان يقصد يمكن حنا سمعناه بالغلط..

بس الهنوف ما ردت عليهاوتمت موخيه راسها عسب ما تبين الدموع متجمعه في عينها...

عمر: شو تسون هني... ما حصلتوا مكان تتمشن في الا هني..(تم يطالع الهنوف)..اكيد انتي اللي يايبه خلود. طبعا لازم تتجسسين عليه..

والهموف بعدها ساكته ما عرفت كيف ترد عليه..يغلط في حقها جدام هله ومع هذا يحط الغلط عليها.. ورفعت راسها ويت عينها في عين عمر..وعمر اول ما شاف عيونها والدموع المتجمعه في عيونها.. ارتبك شويه ونزل راسه..وجان يقولها..

عمر: هذا انتن يا الحريم كل ما قلنا لكن كلمه فتحتن البيبات ونزلتن الدموع.

خلود: صدق ما تستحي.. شوف سوادت ويهك عقب تعال ارمس

عقبها صدت خلود عن الهنوف بس شافتها مروحه عنهم

خلود: والله انك فاصخ الحيا.. هاي بنت عمك خاف ربك

عمر: وانتن ليش تسمعن اصلا

خلود: ايا يايبتنها عسب اثبتلها انك ترمس حد من ربعك او عن الشغل ... مب يالس تغازل

عمر: ثمني رمستج.. تراني عاطينج ويه اكثر عن اللازم

خلود: بنشوف منو بيثمن رمسته عند ابويه يا.. يا راعي بوظبي

عمر: تهدديني حضرتج... خبريه... لاني اصلا كنت بخبره باجر...

خلود: عنبوك ما تستحي.. تبدي الخايسات على حرمتك

عمر: لا تغلطين عليها.... هالخايسه اللي تطرينها بتغدي حرمتيه جريب ان شاء الله

انصدمت خلود.... ماقدرت تستوعب كلام اخوها ....

خلود: والهنوف... وعيالك!!!

عمر: اذا تباني يا مرحبا بها واذا هب عايبنها الوضع ... كيفها .. عادي عندي

خلود تمت اطالع اخوها بنظره حقد و كره... و جان تسير تلحق الهنوف

اما الهنوف شلت عمرها وراحت داخل البيت وهي ماشيه مرت حذال امها وعمتها ويدتها

اليده: امي الهنوف وين بتروحين. تونا يالسين..

الهنوف( وهي لافه ويهها عنهم): تعبت بسير ارقد..؟

ام خليفه: ما ادري بلاها هالبنيه.. هالايام هب عايبتني موليه

 

بس ام عمر كانت حاسه ان عمر هو السبب في اللي يستوي بالهنوف..

دخلت الهنوف حجرتها وهي مضايجه من موقف عمر ...وقفت ورا الباب عقب ماصكته... كانت موخيه راسها...

الهنوف: يااا ربي ليش يستويلي كل هذا ليــــــــــــــــــــــش..!!.. شو سويتله انا .. ليش يغلط في حقي و يهيني و يذلني ليـــــــــــــــش.. ( وفجأه سمحت لدموعها المتجمعه في عينها انها تنزل.. ماقدرت تستحمل اكثر عن جيه... )حطت راسها عالباب .. و تمت تصيح بصوت عالي.. اكرهه والله اكرهه... مابغيـــــــــــــــــه خلاااااص مابغــيـــــــــــــــــــه... (وهي تشهق من كثر الصياح) نزلت راسها و جان تشوف عيالها.. سلامة وعبدالله... اذا تركته شو بيستوي بعيالها... شو ذنبهم انهم ينحرمون من ابوهم وهو عايش حذالهم... ااااااااااااااااااااااااه ليش يا عمر ليــــــــــــــش تسوي فيه جيه... ليـــــــش .. يلست الهنوف عالارض ورا الباب .. وحطت ويهها بين ايديها .. ساعدنــــــي يا رب...

 

خلود: الهنوف... افتحي الباب انا خلود

الهنوف: .........

خلود: الهنوف فديتج افتحي الباب.. لا تسوين في عمرج جيه والله ما يستاهل منج عمر كل هذا

الهنوف: الله يخليج خليني روحي...

خلود: وغلاة والديج يا الهنوف تفتحين الباب.. وغلاة عيالج...

الهنوف قامت و مسحت دموعها بشيلتها .. وفتحت الباب.. خلود ماقدرت تمسك عمرها دمعت يوم شافت الهنوف بهالحاله.. كانن عيونها حمر ويهها منتفخ من كثر الصياح..

خلود( وهي تحضن الهنوف): فديت روحج يا بنت عمي... والله ماتهونين عليه

الهنوف: ليش يسوي فيه جيه .. ليـــــــــــــــــــــش يا ربي ليش

خلود: تراه نذل و مايستحي..لو يعرف الحيا ماسوى سواته... الله يخليج .. وغلاة عيالج لا تصيحين ولا تسوين في عمرج جيه.. تراه ما يستاهل حتى دمعة من دموعج

الهنوف : خبريني شو اسويله... ماقدر استحمل اكثر عن جيه والله ماقدر... انا بشر يا خلود ولي احساس و مشاعر واللي يسويه عمر فوق طاقتي وماقدر استحمل ( وتمت تصيح اكثر)

خلود: لا تصيحين يالغاليه.. لو تبين من باجر بخبر ابويه و طاعي شو بيسويبه

الهنوف: ورفجة والديج ما تخبرين حد.. اعرفه عمي و اعرف غلاتي عنده.. بس مابغي اخرب علاقته مع عمر

خلود: تفكرين في مصلحته بالرغم من اللي سواه فيج

الهنوف: افكر في عمي قبل مافكر فيه

خلود: ماعرف شو اقولج .. والله مستحيه منج

الهنوف: انتي مالج خص... بروح اغسل ويهي قبل محد يشوفني.. ماوصيج مابغي حد يعرف

خلود: ماطلبتي

ظهرت خلود وصكت الباب وراها وهي ظاهره شافت عمر في طريجها بس مارمسته و كملت طريجها..دخل عمر الغرفه و يلس عالكرسي يتريا الهنوف.. اما الهنوف دخلت الحمام و غسلت ويهها .. وغيرت ثيابها ظهرت و جان تشوفه

عمر: بترقدين!

الهنوف: شو تباني اسوي يعني... ولا ناوي تكمل سوالفك البطاليه في الحجره

عمر: مايحتاي ترمسين هالرمسه (وقف عسب يغير ثيابه)

الهنوف: عيل شو اقولك... (حاولت تيود عمرها عسب ماتغلط عليه باي كلمه بس ماقدرت).. ماسالتك.. منو هاي راعيه بوظبي بعد... وحده يديده من مطارزياتك

عمر: مالج خص

الهنوف: اوه ... نسيت انه لازم مادخل في علاقاتك الغراميه.. اسمحلي يا عنتر زمانك

عمر: الهنوف لمي ثمج وسكتي .. مابغي ارمس اكثر .. لاني لو رمست يمكن اجرحج

الهنوف: ليش عاد... فديت روحك ازعجتك برمستيه... اتحريتني بونسك لو رمستك عن ربيعاتك

عمر:........

الهنوف: ماتروم ترد عليه؟!!!! .. غريبه.. احيدك ما تستحي ... ترى النذاله يوم تسري في دم واحد تخليه يفصخ الحيا.. صح يا.. يا عمر

عمر اول ما سمع رمسة الهنوف مشى لعندها ومسك ايدها و جان يعطيها طراااااق علىويهها.. انا نذل يالخايسه

الهنوف طاحت عاطرف الكرسي و ظرب في خشمها .. مسكت طرف الكرسي و يلست عالارض وتمت تصيح بصوت واطي... بس مليان حزن وقهر و ضيج والم.. حست بالدنيا ادور حولها بس حاولت تمسك عمرها.. غطت عيونها بايدها.. واليد الثانيه حوالت تمسح الدم اللي نزل من خشمها.. بس ماقدرت لانه كان وايد.. تم الدم ينصب من خشمها لانه الضربه كانت قويه على طرف الكرسي .. توقعت كـــــــــــــــــــــــــل شي من عمر.. الخيانه.. اللامبالاه.. عدم الاهتمام.. حتى الكره توقعته... بس هب لدرجة انه يضربها. اول مره يضربها ... الهنوف هذيج الساعه حست انه كل اللي سواه عمر في حقها قبل قدرت تستحمله.. بس الحينه خلاص.. طاح عمر من عينها و ظهر من قلبها الصغير.. و طار من دنيتها اللي ماكان حد فيه غير عمر

عمر: ....انا اسف.. وقف يطالع الهنوف وخ راسه .. معقوله يسويها.. معقوله يمد ايده عليها ويضربها.. مهما اللي قالته المفروض يسكت لانه هو السبب.. هو الغلط في حقها.. هي عمرها مازعلته اوحتى حسسته بانه غلطان.. ااااااه يا بنت عمي .. ظلمتج وظلمت عيالي وظلمت نفسي معاج

عمر: الهنوف سامحيني... (يلس عالارض حذالها مسك ايدها وباسها ) الهنوف.. يالغاليه... سامحيني ..سامحيني والله ماكنت اقصد . بس انتي..

الهنوف تمت تشهق بصوت عالي .. ماكانت تقدر ترمس .. حست انها مخنوقه .. حست انها بتموووت

عمر: (تقرب من الهنوف اكثر وحط ايده الثنتين على راسها و حضنها.. حط راسها على صدره و حضنها) سامحيني يالغاليه... فديت قلبج سامحيني والله واللــــــــــــــــه ماقصد اجرحج.. ليتني مت قبل ماسويها ورحمة ابوج تسامحيني.

الهنوف صياحها زاد اكثر عن قبل .. حست بقلبها يتقطع.. حست بحياتها انتهت.. سمعته يقول الغاليه.. اول مره يقولها ... الغاليه.. اااااااه يا عمر .. توك تذكرت اني غاليه عليك... توك تذكرتني.. عقب ماذبحتني تذكرتني.. حاولت تبتعد عن عمر حست انه ما يعنيلها بشي... ضربته هدمت كــــــــــــــل شي بينهم.. حطت عينها في عين عمر...

عمر اول ماشوف عيونها نزل راسه.. يالله يا الزمن... لهالدرجه انا حقير و ماحس باقرب الناس لي...بنت عمي و وزجتي وام عيالي... يوم شاف عيونها و الدموع اللي فيها.. اول مره يشوفها بهالحاله... عرف انه دموعها كانت تتكلم وتقوله شي ... شي ما كان في يوم يتوقعه

الهنوف وهي اطالعه: ما... مابغــيـــــــــــــــــــــــــــــــــــــــــــ

ــك

عمر: قلتلج انا اسف .. سامحيني فديتج يالغاليه تسامحيني

الهنوف: ال... الله يخليك... لو كنت صدق.... صدق غاليه ( وهي تمسح الدم اللي ينزل من خشمها).. اذا كنت غاليه عندك.. طلقني... مابغيك ياعمر .. خلاااااااااص عفتك ... عفتك يا ولد عمي.. عفتك... و كرهتك بعد... هيه نعم كرهتك...

عمر: لا تقولين جيه يالهنوف والله انج تذبحيني

الهنوف: وانت خلاص دفنتني عقب ما كنت تذبحتني في هالخمس سنين... (رفعت ايده و باسته) وغلاة والديك تطلقني ... لو كنت تحب عيالك...طلقني... ارحمني .. ارحمني .. ورفجة بو خليفة ترحمني... لا تذلني اكثر عن جيه.. لا تحطني تحت ريلك يابو عبدالله... وصدقني محد بيعرف بللي صار.. ارفج بي .. ارحم حالي... ورحمة ابويه ارفج بي... ولا تعذبني ... لا تخليني انذل اكثر عن جيه.. ارفج بحالي وروف بي.. وغلاة والديك.. طلقني.. ترى والله العوق اللي فيني زاد.. زاااااااااااااد زاااد وماقدر اتحمله.. تراني انسانه حالي حالك يا ولد عمي.. روف بي و ارحمني .. (تمت تبوس ايده) ارحمني اذا كنت غاليه صدق... طلقني .. طلقني ... عفتك يابن الناس عفتك . وظهرت من خاطري... استحملت منك كـــــــــــــــــــل شي... الا الضرب... تراني عزيزة نفس.. بنت ناس ياعمر... ناس عمرهم ما مدوا ايدهم عليه.. بنت عرب مايرضون بالمذله.. عمري ماعرفت المذله الا معاك .. عمري ماطعمت كاس الحزن و الكره و الذل الا معاك.. عمري ما ترجيت حد يا عمر... لا تذلني اكثر .. بنات الناس تراهن وايدات.. وانت ادرى لا تلوي راسي اكثر لا تعذبني اكثر .. طلقني مابغيك خلااااص والله مابغيك... عفتـــــــــــــــك تدري شو يعني عفتك...حياتي ضاعت معاك.. عمري ضاع مع واحد ما يستاهل مثلك ..طلقني و تاكد اللي حصل محد بيعرفه تراك بتم ولد عمي ومارضاها عليك.. حن عليه و ارفج بحالي ... روف بحال يتيمه خذتك و هي تتمنى تحصل ريال يسندها و يراعيها.. ..( تمت تصيح).... طــــــــــــلقـــــــــــنـــــــــي

عمر: (والدمعه في عيونه).. الهنوف .. انتي ... انتي ... طـــــــــــــــــــــالــــــــــــــــــــــــــ ــــق

 

Link to comment
Share on other sites

الهنوف اول ما سمعت هالكلمة غمضت عيونها .. والدموع بعدها تنزل من عيونها.. بس هالمرة كانت دموع الفرح.. فرحتها انها حست بالافراج.. حست انها تخلصت من السجن اللي كانت عايشه فيه سجن عمر اللي طعمت فيه كل انواع الذل و المهانه.. و يمكن بعد كانت دموع الحزن حزنها على ضياع عمرها مع انسان ما يستاهل الصبر اللي صبرته و الاهانه اللي استحملته عشانه حست انه قلبها ماااات و اندفن بضربة عمر دفنها وهي حية ..

عمر: الهنوف..

الهنوف: اطلع برع.. اطلـــــــــع بـــــــــــــــــــرع..

عمر حس انه الضربة اللي ضربها الهنوف يت في ويهه هو ... هذيج اللحظه حس بحياته ضاعت و نفسه تاهت و كــــــل شي انهار، كيف قدر يمد ايده... و الحينه طلقها.. ماتوقع انه هاليوم بيي في يوم من الايام.. تحرى ان الهنوف بتستحمل كل شي منه و عمرها ما بتتركه.. خااب ظنه... تراها انسانه شراته تحس و تتالم و اكيد ما بتقدر تستحمل اكثر عن جيه.. وخاصة انه يمد ايده عليها .. وقف و تم يطالع الهنوف ..ويوم يا يظهر قاللها.

عمر: سامحيني يالهنوف

الهنوف (ضحكت والدموع في عينها رفعت شعرها عن ويهها وصدت صوب عمر):تشوف كــــــــــل هذا ولا شي بالنسبه للجرح اللي في قلبي...الجرح في ويههي يا عمر بيشفيه الزمن.. بس شو اسوي بالجرح و العوق اللي في القلب .. منو اللي بيشفيه ..!!!! اسمعني عدل لا تظن انه في يوم برجعلك ، انت انتهيت من حياتي مستحيل انسى اللي سويته فيني مستحيل.. اطلع برع و لا تفكر في يوم اني برجعلك .. انت خلاص .. انت امل مقتول ..

عمر ماقدر يستحمل رمستها ،خذ مفتاح سيارته عالطاوله و ظهر من الحجره

الهنوف اول ما سمعت صوت الباب عقب ما ظهرعمر وقفت و مشت لين المنظره.. رفعت راسها ..وشلت شعرها عن ويهها ،شافت عيونها اللي انتفخن من كثر الصياح و وييهها المحمر.. و خشمها اللي بعده يصب دم.. دخلت الحمام و غسلت ويهها و ردت انسدحت حذال عيالها.. وتمت تفكر في حياتها.. شو بيكون حالها بدون عمر بس الشي اللي كانت واثقه منه انه اكيد بتستمر في حياتها بدونه لانه اصلا وجوده وعدمه واحد.. والحينه هو بالنسبه لها مـــــــيــــــــت

 

ظهر عمر من الغرفه .. مر الصاله و جان يشوف خواته مع فيصل و خليفة اللي كانوا يسولفون و يتضاحكون.. وتم يقول في خاطره (حليلج يالهنوف بدال ما تقعدين تسولفين معاهم يالسه اتصحين وانا السبب)

خليفة: هلا والله بعمر.. وينك من الصبح نسال عنك وعن حرمتك.. !!

حمده: انت وشلك حب يقعد مع حرمته لازم يعني ترز ويهك

فيصل: انتي وشلج دام الريال يرمس ولد عمه

عذابه: يعني ماتعرفها .. رزه ما تنلام

حمده: شو رزه بعد.. تراني اقول الصدق.. ابركله يسولف ويا حرمته في الحجره بدال ما يجابلنا احنه

خليفة: صدقتي والله.. اول مره اسمعج تقولين شي مفيد

علياء+ريم+عذابه+فيصل: هههههههههههاااااااي

عمر مارد عليهم تم يطالع خلود .. وعقب ظهر من البيت.. ركب سيارته وماعرف وين يسير حس بانه تايه.. ضايع مايدري شو يسوي .. ماتوقع انه بيي يوم و يفترق عن الهنوف .. طبعا ليس كل ما يتمناه المرء يدركه

 

فيصل: بلاه عمر احسبه تعبان ومتضايق..؟

خلود: يتعب العالم كله ولا بيتعب

علياء: حتى انا حسيت انه فيه شي.. عمر ماحيده يسكت

خليفة: انزين وين راح.. سمعت صوت سيارته.. وين بيروح في نصاص الليالي

حمده: يا ويلي انا .. حليله اخويه يمكن فيه شي ونحنه ماندري

ريم: صدقها حمده .. عمر هب طبيعي .. اكيد استوابه شي

عذابه: فيصل بعدك يالس فز يالله واتصل بخوك طالع شو فيه

فيصل وهو يتصل باخوه.. بس التلفون كان مغلق

فيصل: غالق التلفون

ريم: الحينه عاد انا متاكده انه فيه شي... عمر في حياته ما غلق تلفونه

عذابه: والله قلبي نقز.. حاسه انه بيستويبه شي

خليفة: سلامت قلبج يالغاليه

فيصل: ايه انت يا مسود الويه... ماتستحي والله.. سلامت قلبج اونه... اخويه مستويبه شي و انت يالس تتغزل

خليفة: ماقلت شي انزين

ريم: هب وقته تظاربون.. بسير اسال الهنوف

خلود: استريحي.. مايحتاي تسالينها.. وبعدين انتو وشلكم ...

عذابه: اخونا هب طبيعي و تقولين وشلنا

علياء: صدقها عذابه يا خلود.. لازم نسير نسال الهنوف.. حتى قلبي والله هب مطمن

فيصل: سلااااااااااااااامت قلبج

خليفة( فر عليه قوطي البيبسي): مااالت عليك .. انا اللي ماستحي هاااه

فيصل: اسف انزين .. ما كنت اقصد.. ( وتم يطالع علياء اللي كانت ميته من الحيا)

حمده (وهي تصاصر ريم): شو هالافلام الهنديه اللي تستوي اليوم.. خليفة و عذوب .. وفصول وعلايه... يا سلاااام ..

ريم: صدقج والله.. فيصل هب طبيعي هالايام

حمده: انتي الناس كلهم بالنسبالج هب طبيعيين

ريم: والله صدق... اشوفه هالايام وايد يتخبر عن علايه.. السالفه فيها ان

حمده: مابغيتي غير فيصل.. تدريبه زين انه مايفكر بسوالف العرس

ريم: ادري انزين و انا اصلا ماطريت سالف العرس

حمده: شو قصدج عيل.. يقص عيلها يعني.. يا خبيله هاي بنت عمه هب شرات اللي يتعرف عليهن برع

ريم: والله ادري.. بس ها فيصل .. وما تقدرين تثقين فيه وفي سوالفه

حمده: زيغتيني والله... حليلج يا علايه.. تراني اشوفها هي بعد جنها متعلقه فيه

ريم: هاللي يخوفني... تتعلق فيه و هو يقص عليها

حمده: شو نسوي الحينه

ريم: شو بنسوي يعني.. خلنا نحل سالفه عمر اول شي

عذابه: بلاكن تتصاصرن شوالسالفه

ريم: ايوه يا عم من ادك.... المغازل اليوم ببيزه

عذابه: شو مغازل بعد

ريم: مادري اسالي عمرج

عذابه: الحينه نطري عمر و تقولين مغازل

ريم: ااااااااااه قلبي...

حمده: سلااااامت قلبج يالغاليه

عذابه: صدق انكن ماصخات... انا البقره لاني ارمسكن.. علايه قومي نشوف الهنوف و نتخبرها عن عمر.. بتخاوينا خلود .!!؟؟

خلود: لا هب سايره.. و افضل انكن ما تسيرن..

علياء: انا بسير ماقدر اتريا لين باجر لازم اعرف شو السالفه

فيصل( وهو يصاصر خليفه): ختك دومها جيه فضوليه ولا هاي حالات بس و بتمر؟؟

خليفة: تتخبر عن ختها انزين.. وبعدين انت وشلك ...

فيصل: مجرد سؤال

خليفة: لا تسال مره ثانيه..

فيصل: ان شاء الله... وان شفتك ترمس ولا تشوف عذوب يا ويلك

خليفة: ليش ان شاء الله .. بنت عمي حرام يعني ارمسها

فيصل: هيه حرام

خليفة: انا ماصدقت انها حنت عليه و عبرتني اليوم.. تباني مارمسها بعد... والله ماسمع كلامك.. ولو بتقص رقبتيه برمسها..

فيصل:: خيبه... اقص رقبتك اونه... لا لا ماتهون عليه

خليفة: بدال ما تهذرب روح انشد عن اخوك.. اتصلبه

فيصل: عيزت وانا اتصل كله مغلق شو اسوي يعني .. اتصدق هذا اخويه يباله رادار صغير نركبه في راسه عسب نعرف وين يسير ووين يي

خليفة: والله انك متفيج..

فيصل: شو اسوي.. ماعندي شغله.. تعال نسيت اخبرك.. ترى باجر غداك عندنا.. ابويه عازم منصور بن ضاحي وهو واحد من هل العين.. والله نسيت شو اسمه.. هذا اللي بيشاركنا في المشروع

خليفة: انت شو تعرف اصلا عن سوالف الشغل.. يابويه اسمه علي الرميثي... واظن ولده بيظوي معاه.. اسمه حمد.. لا لا .. اسمه محمد.. محمد الرميثي

حمده: خلود .. سمعتي خليفة شو قال..

خلود: شو عرفني .. يالس يرمس عن الشغل

حمده: يا غبيه... طرى اسم واحد.. ما سمعتيه

خلود: اسمحيلي اخت حمده.. ما فتحت راداراتي اليوم

حمده: مااااالت.. محد غير ريماني بتنفعني.. ريم.. سمعتي خليفة يطري منو توه

ريم( وهي تاكل ): لا.. مادري,,, هيه

حمده: هيه ولا لا

ريم: جنه.. طرى واحد رميثي على ماظن.

حمده: انزين شو اسمه

ريم: وانا شو عرفني

حمده: ماسمعتيه

ريم: اظن .. محمد

حمده: قولي والله

ريم: وليش احلف بعد.. شو السالفه.. بلاج تتخبرين عنه.. لايكون حلمتيه

حمده: ماالت عليج .. بس جيه اسال.. اسمه هب غريب.. جني اعرفه.. انزين ريماني.. ماقال من وين

ريم: مادري والله..

حمده: مامنج فايده

ريم: وياويهج الحينه ما مني فايده صدق انج مصلحجيه... موتي عيل ولاني مخبرتنج شو عرفت عنه بعد

حمده: فديتج والله.. كم ريم عندنا اللي هيه وحده.. شيخة الحريم بعد

ريم: ها كله عسب الرميثي والله اقطع ايدي لو ما كانت السالفة فيها ان

حمده: بعدين بخبرج

ريم: هب قايله شي لين ما تخبريني

حمده: بخبرج بس عقب هب الحينه

ريم: خلاص عيل حتى انا بخبرج عقب

حمده: لا حوول.. ويا ويهج والله بخبرج يوم بنرد باجر... خبريني يالله

ريم: سمعت خليفة يقول انه هالرميثي.. حمود الرميثي باجر بيتغدى عندنا

حمده: شو بعد حمود... اخاف الا اصغر عيالج

ريم: لا تنسين باجر بتخبريني

حمده: يصير خير.. يوم بتعرفيلي من وين هذا حمود على قولتج هذيج الساعه بخبرج

ريم: اوكيك.... بس باجر..

حمده: خلاص باجر

 

في هالوقت... راحن علياء و عذابه حجرة الهنوف عسب يسالونها عن عمر...

علياء: الهنوف ... راقده ولا بعدج

عذابه: منو يرقد في هالوقت انتي بعد.. ها سؤال الحينه

علياء: يمكن الحرمه راقده... شو عرفج انتي

عذابه: اعرفها عدل... الهنوف بطلي الباب بغينا نيلس وياج

علياء: صدق انج رزه

عذابه: سكتي انتي

علياء: بلاها ماترد.. اخاف الا راقده

عذابه: الصراحه انا حاسه انه شي صاير بينهم...

علياء: حتى انا.. الهنوف ما كانت طبيعيه اليوم..

عذابه: حتى عمر.. شو اللي صار بينهم

علياء: شو عرفني انا.. بس صدقيني ها اخوج السبب... حليلها الهنوف دومها ساكته وما تخبرنا بس انا ادريبها و ادري بسوالف عمر

عذابه: كلنا ندري و كلنا حاسين بهالشي..

علياء: الهنووف .. بطلي الباب اذا كنتي واعيه

عذابه: خليها يمكن راقده.. باجر بنتخبرها

علياء: ماروم اتريا لين باجر

عذابه: عيل بترقدين عند الباب.. قومي نروح .. باجر يصير خير

علياء: الله يستر.

 

الهنوف كانت تسمع علياء و عذابه.. بس ماردت عليهن لانها ما تباهن يشوفنها وهي على هالحاله... تمت تتامل عيالها... وعقب غمضت عيونها.. ورقدت

 

اما عمر فقرر يرد دبي لانه ماله مكان يروحله... تفكيره كله كان عند الهنوف.. تم يفكر يللي سواه وكل اللي حصل بينهم في هالخمس سنين.. هو قرر يتزوج بنت عمه لانه ابوه فرض عليه هالشي.. هو طبعا ما رفض لانه ما بيحصل احسن عنها بس مع هذا ما قدر يحبها .. يمكن حبها بس ماقدر يبين هالشي، تذكر الهنوف و تصرفاتها معاه عمرها ما زعلته او حتى عاتبته باي كلمة مع انه دووم يغلط في حقها حتى عياله كان بعيد عنهم، قرر يوم تزوجها انه يعيش حياته بدون ما يشرك زوجته و عياله عمره ما حط في باله انه يمكن يطلقها صح انه فكر يعرس عليها بس ما توقع انه بتتركه، الهنوف شخصيتها ضعيفه و ما تقدر تتركه، بس تغير الوضع الهنوف ضاعت من ايده وهو السبب ، وعياله بعد ضاعوا و حياته ضاعت، بس رد يفكر مره ثانيه، شو فيها يعني، انا بعرس و باخذلي وحده احبها واكيد بتسعدني و اكيد بنسى الهنوف، حتى عيالي ما بقصر عليهم بشي، وان شاء الله يوم بتزوج الله بيرزقني بعيال غيرهم، بعيش حياتي بدونج يالهنوف ، وفجاه وقف سيارته و حط راسه عالكرسي ، وقال في خاطره( شو اللي يالس اقوله، حتى لو غيرت حياتي، ما بغير الواقع اللي اعيشه، الهنوف كانت جزء من حياتي حتى عيالي احبهم و ماتخيل حياتي بدونهم ، ماعرف شو اسوي خلااااص تعبت وماعرف شو اسوي) .. فتح عيونه على اغنية عبدالمجيد في ال fm

 

 

 

ما بين بعينك على كثر ما جاك لا وحسافة ليتني ما عطيتك

تخطي و اعذرك و اتحمل خطاياك هويت غلطاتك كثر ما هويتك

ضحيت بالدنيا على شان دنياك خليت كل اللي يبيني و جيتك

كنت بعيوني وين ما طالع القاك حتى ولو غمضت عيني لقيتك

من كثر ماحبك واقدرك واهواك ماذكر اني في حياتي عصيتك

ولا فاد كلي اللي اسويه وياك اتعبت قلبي ليتك تحس ليتك

والحين روح ارجوك ساعدني انساك ولا تجي حتى لو اني بغيتك

وان مر في بالي بقايا لذكرياك بحاول انساها مثل ما نسيتك

 

عمر اول ما سمع الاغنيه دمعت عينه.. حس انه هالكلام موجه له هو.. تذكر يوم الهنوف تترجاه وتطلب منه الطلاق.. تذكر يوم قالتله انه امل مقتول ،لهالدرجه كرهته و عافته.. حس انه مستحيل ترجعله.. وان اللي بينهم انتهى و انكسر و عمره ما بيرد شرات قبل...

 

 

شو تتوقعون بيكون موقف الهنوف.. كيف بتخبر هلها عن طلاقها!!!!

وعمر شو بيسوي في حياته،،، !!!!

وعذابه... هل يمكن بتوافق على خليفة و بتتزوجه!!!

ولا تنسون حمده... وشو بيستوي يوم بتعرف عن محمد الرميثي!!!

 

 

 

Link to comment
Share on other sites

يوم الجمعة الصبح

نشت علياء من وقت... و راحت لحجرة اختها الهنوف.. ماقدرت ترقد الليل كان تفكيرها كله عند الهنوف.. دقت باب الحجره

الهنوف: منو!!

علياء: انا علاااااااايه

الهنوف: ادخلي

علياء: صباح الخير... تو الناس .. توج تفتحين الباب

الهنوف: ههههههه... و بلاج جيه مغيظه.. شو السالفه

علياء: المفروض انا اللي اسألج هالسؤال هب انتي

الهنوف: ليش.. خير .. شو مستوي

علياء (وهي معصبة): الهنوف.. بسج عاد.. خبريني شو السالفه

الهنوف: هههههههههههه شو تبيني اخبرج

علياء: الهنوف تراني هب راقده و تعبانه و السبه انتي.. شو اللي صار بينج وبين عمر

الهنوف: اها... قولي جيه من الصبح

علياء: زين يوم انج فهمتي.. يالله تراني اسمعج

الهنوف: ماستوى شي بينا

علياء: الهنووووووووووووووووف... تراج ماصخه

الهنوف: ههههااااااي.. ادري ماقلتي شي يديد

علياء: بتخبريني ولا لا

 

هذيج الساعه نش عبدالله..

عبدالله: مـــــــــــــامـــــــــــــــا

الهنوف: حسبي الله عليج... وعيتي الصغاريه

علياء: الحينه الثانيه بتقوم اذا ماخبرتيني

الهنوف: اونج تهددين الحينه.. اصلا زين يوم انج وعتيه..

عبدالله: ماما.. شو تسوي هاي الجنيه هني

علياء:: الجنيه حرمتك قول امين.. قول خالو وياويهك

عبدالله: مابقول

الهنوف: لا تقول حبيبي.. صدقك هاي جنيه.. قم يالله فديتك ماتبغي تسبح ويا خالك خليفه

عبدالله( وهو يناقز عالكرفايه): هياهاههاهاهاهاهاهااهاهاهاها... بتسبـــــــــــــــــــــــــــــــح

علياء: بلاه هذا ... جنه اول مره يتسبح في حياته

عبدالله: امااااااايه.. سلاااامي بعد بتسبح؟

الهنوف: هيه

عبدالله: ليـــــــــــــــــش .. انا بتسبح مع الرياييل.. ليش سلااامي تسبح معانا...عيب

علياء: جااب انت.. خلها تسبح انت وشلك

الهنوف: حبيبي .. خلها تسبح معاكم... حليلها بتصيح..

عبدالله: انزيـــــــــــن ( وهو يحيس ثمه)

علياء: انزين يا ام عبووود.. ما خبرتيني شو السالفه

الهنوف: ماعندي شي اقولج ياه.. وبسج هذربه... قومي نظهر برع

علياء: هب ظاهره.. و بعدين انتي تجذبين على منو... ها تشوفين بتانيه جدامج ما تفهم.. البارحه دخلتي حجرتج وانتي مويمه و زعلانه و عقب ظهر عمر من عندج وهو ماط بوزه شبرين و مضايق و بعدها دقيت باب حجرتج وما فتحتيلنا مع انج ماترقدين من وقت.. ولا فوق هذا كله عمر ظهر من البارحه و غالق تلفونه ومحد يدري عنه.. وها كله تقولين ما استوى شي

الهنوف: ما شاء الله عليج... وكالة اخبار... عنبوج تراقبينا انتي

علياء: هيه اراقبكم .. شو اسوي دامج ما تخبرينا بشي

الهنوف: و ليش اخبركم هاي حياتي انا..

علياء: صح انها حياتج... بس انا ماشوفج مستانسه.. واكيد هذا عمووور مسوي شي

الهنوف: عمر هب عموور... وبعدين ما سوى شي...( وسكتت).. ماعندي سالفه ارمسج... قومي نظهر

علياء: كيفج والله.. بس صدقيني بعرف.. و بتشوفين

 

ظهرت الهنوف وعيالها مع علياء... وراحن الصاله.. ولقن امها و ام عمر و اليده...اما فيصل و خليفة راحو يتسبحون مع عيال عمر( سلامه و عبدالله)

وعلى الساعه 10 الصبح تجهز الكل عسب يردون دبي...

ابو عمر: فيصل... وينه اخوك .. ماشوفه

فيصل: مادريبه والله...

ابو عمر: الهنوف.. وينه ريلج

الهنوف (وهي مرتبكه): م ..م... رد البيت

ام عمر: ويديه انا.. ليش يرد بعد ترانا قلنا بنرد رباعه..

اليده: ليش بعد.. اسميج انتي ... هذا ولدج هب طبيعي.. يباله علاج... يباله مطوع

خلود: الله يهديج يدوه.. كل ما شفتي واحد قلتي يباله مطوع

اليده: عيل شو... شو تشوفين واحد هب طبيعي .. شرات الخبل... شو بيكون فيه غير المضره... تراني من زماااان اقولكم.. هاي عذوووب و عمر يبالهم حد يقرا عليهم

عذابه: نــــــــــــــعـــــــــــم... بسم الله عليه... جيه خبله تشوفيني... الحمدلله صاحيه و ماشكي باس

خليفة: دوووم ان شاء الله.... ترى اليده الا تتمصخر

اليده: ومن قال اني اتمصخر... وبعدين يا مسود الويه تشوفني اصغر عيالك اتمصخر معاك.. احمد ربك اني افكر بعذوب... ترا اللي اقوله لمصلحة منو يعني ها.. من غيرك بيستفيد اذا تعالجت.. صدق ماتستحي

خليفة: ههههههههههه... اسمحيلي يالغاليه... وبعدين تراها بنت عمي.. وابغيها لو هي صاحيه او تشكي من عوق..

عذابه: شو قصدك يعني... الحمدلله .. قلتلكم اني بخير

خليفة: والله ماقصدت الا الخير...

ابو عمر: خلكم من هالسوالف اللي مانتفع.. وقوموا يلا ,,, ترى ضيوف بيتغدون عندنا اليوم

ام عمر: زين يوم انك ذكرتني.. عيل يالله.. عسب نجهز الغدا..

حمده: ابوووويه منو بيينا اليوم

فيصل: انتي وشلج..

ابو عمر: رياييل

ريم: الله يهديه ابويه.. اكيد رياييل عيل ثيران يعني..

حمده: وهذا فيصل مادري ليش دومه يرز ويهه.. بس هالريم لا تنسين.. لازم تسالين عن اللي بيونا اليوم

ريم: اوكيك.. و انتي لا تنسين تراج بتخبريني السالفه كـــــــــــلها

خلود: قومن يالله

 

ركبت ام عمر مع ريلها و اليده وخلود في سياره ابو عمر... اما ريم و عذابه و حمده ركبن مع اخوهم فيصل:: و الهنوف قررت تروح بيت هلها... فركبت سياره خليفه مع امها و اختها وعيالها

ام خليفة: اميه الهنوف.. هب زين جيه تودرين ريلج و بيتج اليوم

علياء: عيل زين هو يودرها

الهنوف ( وهي تقرص علياء): لا امايه... عمر عنده اشغال هاليومين.. وانا مابغي اقعد روحي

خليفة: عمر دومه جيه.. وانتي يعني متعوده تيلسين عند البنات.. شو سالفتكم اليوم

الهنوف: ما من سالفه.. بس حبيت يعني ازوركم كمن يوم.. ولا حرام

ام خليفة: البيت بيتج يا اميه.. وانتي هب ضيفة.. انتي راعية البيت.. بس اللي اطريه انه ضيوف يايينكم اليوم وعيب تخلين حرمة عمج روحها

الهنوف: انا ترخصت منها... وهي ما قالتلي شي... وبعدين ما شاء الله على بناتها ما بيقصرن بشي.. ( وجان تلف ويهها .. شو بقوللهم الحينه... عمر طلقني... ياااربي .. اخاف يستوي شي.. لا عادي... اظن ان الكل كان حاس بللي يستوي بيني و بين عمر.. و الطلاق ما بيكون صدمه لهم.. وابتسمت.. حااااسه بهم انزاح على قلبها.. حست براحه كبيرة.. )

في بيت عبدالله القبيسي

اول ما وصلن البنات.. دخلن مع امهن المطبخ يساعدنها... طبعا الا حمده.. اللي سيده راحت تشغل النت

 

الغزال الشمالي (حمده): والله وناسه.. استانسنا في الذيد

العيون السود (مهرة): يا حيكم... هب انا محبوسه في البيت..

الغزال الشمالي: ماخبرتج مهروووووووووووووووو.... عندي لج خبر بمليون

العيون السود: خير.. شو السالفه

الغزال الشمالي: اصبري .. خليني اغير النيك.. طاح سوقه..برب

العيون السود: تيت

احبك لو بغيت انساك.. ماقدر: باااااااك

العيون السود: احلــــــــــــــــــى باااااااااااااك والله... ياااويييل حالي انا .. شو هالنيك بعد

احبك لو بغيت انساك ..ماقدر: شفتي عاد...

العيون السود: انزين يلا خبريني شو السالفه

احبك لو بغيت انساك.. ماقدر: تذكرين الرميثي

العيون السود: وشقايل تبيني انساه دامج ترمسين عنه 24 ساعه

احبك لو بغيت انساك.. ماقدر: هاههههههههههههههههااااااااااي يا حليلج والله

العيون السود: حليلي انا.. لا حبيبتي ... انتي اللي الظاهر طحتي في الحفره

احبك لو بغيت انساك ..ماقدر: أي حفرة بعد

العيون السود: الحفرة اللي يسمونها... الحب

احبك لو بغيت انساك ..ماقدر: لا فديتج.. أي حب و أي خرابيط

العيون السود: هب مصدقتنج.. المهم شو سالفته

احبك لو بغيت انساك ..ماقدر: اليوم ابويه عازم واحد من ربعه. اظن يشتغل معاه في مشروع ..

العيون السود: وشو يخصه ها بالرميثي

احبك لو بغيت انساك ..ماقدر: ابويه عازم واحد رميثي.. ولا بعد من العين

العيون السود: جيه محد رميثي غيره هو...ماقلتلج انج تحبينه عسب جيه هالافكار العبيطه ادور في مخج

احبك لو بغيت انساك ..ماقدر: محد عبيط غيرج.. المهم خليني اكمل انزين.. هذا الله يسلمج رميثي اسمه محمد من العين... شرات ماقالي راعي الماسنجر

العيون السود: يمكن هاي الصدفه.. انتي شو عرفج

احبك لو بغيت انساك ..ماقدر: بس انا لازم اتاكد

العيون السود: شقايل؟

احبك لو بغيت انساك ..ماقدر: مادري... فكري معايه...لازم نعرف شو اسم ابوه.. ولا بعد امه

العيون السود: جيه بتسويله سوا انتي

احبك لو بغيت انساك ..ماقدر: عادتج يدوه بسوالفها عن السويات و المطاوعه هههههههههاااااي

العيون السود: هههههههههههههه يمكن

احبك لو بغيت انساك ..ماقدر: المهم بتاكد و بخبرج.. يلا بظهر امايه بتذبحني اذا شافتني متفيزره عالنت.. تباني ادخل المطبخ.. ههههه... قلتلها عليه واجب و لازم احله

العيون السود: وياويهج... صدق انج هب ويه عرس

احبك لو بغيت انساك ..ماقدر: وليش ان شاء الله.. لازم يعني اطبخ عسب اعرس.. غناتي ريلي بييبلي بدال الطباخ الف

العيون السود: ردت ديما لعادتها الأديمه... اقول بااااااااي

احبك لو بغيت انساك ..ماقدر: ههههههههههه باياااااات

 

وتوها كانت بتظهر... بس وقف قلبها يوم شافت ملك العين

ملك العين: احبك لا تسال القلب اصبر... احبك من زمن يوم الطفوله .. ويوم الوقت احلام وتصور

احبك لو بغيت انساك ..ماقدر: رسمتك في خيالي في ضميري جميل ما على وصفك نقدر... اشوفك كالسما الصافي في ليله.. قمرها نص شهر ويوم يظهر

ملك العين: يا ويل حالي انا... وينها الغزال الشمالي عيل

احبك لو بغيت انساك ..ماقدر: صادوها

ملك العين: افا والله...ومنو هاللي بايع عمره و صادها

احبك لو بغيت انساك ..ماقدر: نااس

ملك العين: ما عاش اللي ياخذها مني و انا عايش.. اخاف الا قلب عيناوي صايدنها

احبك لو بغيت انساك ..ماقدر ( وهي مستغربه من رمسته): ليش ان شاء الله,,, انت منو عسب تملكها

ملك العين: القلب

احبك لو بغيت انساك ..ماقدر: أيــــــــــــــه انت.. بلاك .. ينيت... ثيران اخر زمن

ملك العين( وهو معصب): الله يعين اللي صادها... والله بيندم عاليوم اللي شافها فيه.. بيتمنى لو صادله ذبابه و لا يصيدها هي..

احبك لو بغيت انساك ..ماقدر: هه هه هه ... تنكت حضرتك.. وياويهك

ملك العين: احلى عنج.. انزين وياراسج وينج مختفيه من يومين

احبك لو بغيت انساك ..ماقدر: بس جيه ماحبيت اجابل ويهك...

ملك العين: زين عيل يوم انج مادخلتي... حتى انا مادخلت.. ما كنت ابغي ارمسج..

احبك لو بغيت انساك ..ماقدر: القلوب عند بعضها..

ملك العين: هيه والله.. انزين يا... يالبومه... اشوفج على خير... باااااي

احبك لو بغيت انساك ..ماقدر: بوووووومه حرمتك ... اقول.. شو اسم ابوك

ملك العين: ** وهو فاج عينه...: انتي وشلج... اقول بعدين بنتفاهم.. بااي

 

 

 

Link to comment
Share on other sites

في الكوفي شوب

بس ظهر محمد قبل مايشوف ردها.. لانه ابوه اتصلبه

ابو محمد: وينك يالخديه...؟؟

محمد: لاحول.. بلايه اليوم مصطبح عالسب ... هني تراني قايلك اني ببات عند ربيعي في دبي

ابومحمد: والعزيمه

محمد: أي عزيمه بعد

ابومحمد: لا بارك الله فيك من ولد.. عزيمة القبيسي.. عبدالله القبيسي

محمد: هيــــــــــــــه .. تذكرت... انزين .. ما عليه

ابومحمد: يوم انك تذكرت يالثور قم فز يالله.. بوافيك الحينه..

محمد: ابويه لو سمحت لا تقول ثور.. تراني متعقد من هالكلمه

ابومحمد: شو اسويلك يعني..

محمد: ماشي... اشوفك عيل في المسيد.. وعقب بنظوي رباعه بيتهم

ابومحمد: تم... مع السلامه

محمد: باااي

ابومحمد: اقولك مع السلامة تقولي باي

محمد: انزين انزين... وداااعة الله

 

محمد: ابويه هذا ملعوزني... هب عايبنه شي من اللي اسويه

عيسى: بلاك جيه معصب...

محمد: هاي العيوز اللي ارمسها في الماسنجر .. ياخي والله ملعوزتني.. انا ياي الكوفي الحين بس عسبها

عيسى: اخاف الا تحب وانا مادري

محمد: أي حب انت بعد.. بس مادري بلاني افكر فيها .. والله هاليومين قاعد على الماسنجر اترياهاو مادخلت... واول مادخلت انا .. وشفتها و الله استانست و تمينا نرمس عدل.. لين ماحضرت جنابها طولت لسانها.. قاهرتني والله

عيسى: لا بالله ... الريال يحب.. ولا وبعد غارق لين اذنه

محمد: مادري والله... المشكله لسانها... وايد طويل... ولا اونها تسالني عن اسم ابويه.. عقب ما سبتني

عيسى: ههههههههههههههههههه قواة ويه ... تناسبك الصراحه

محمد: صدق انك متفيج.. اقول بسير اتلبس .. بسير ويا ابويه بيت عبدالله القبيسي

عيسى: هيه... عرفته

محمد: تعرفه

عيسى: اعرف ولده... فيصل القبيسي... واعرف ولد اخوه بعد.. اظن اسمه خليفة..

محمد: زين عيل.. بتخاوينا

عيسى: لا يا ريال .. شو اسوي هناك هب عازميني و لا شي... ارز بويهي ليش

محمد: تراك بتكون معانا.. مافيها شي

عيسى: لا ابويه.. روح روحك... ترا ابوك معاك

محمد: لا تذكرني الله يخليك... يلا بترخص عيل.. باي..

عيسى: حفظك الرب

 

 

في بيت عبدالله القبيسي

 

ام عمر وهي ظاهره من المطبخ مع خلود شافت عمر وهو توه داش البيت

عمر( وشكله تعبان): السلام عليكم

ام عمر+ خلود: عليكم السلام و الرحمه

ام عمر: تو الناس.. عنبوك تظهر دون ماتخبرنا.. انزين اتصل و طمنا

عمر:......

ونزل ابو عمر .. وشاف ولده

ابوعمر: زين يوم انك تذكرت انه عندك بيت و اهل وينك من البارحه ها

عمر: هني

ابو عمر: وين هني بعد... انتي تستحي ولا لا... هاد بيتك و حرمتك عيالك و رايح تهيت في الشوارع انت ما تفتكر في حد وليش بعد غالق تلفونك.. يوم انك ما تستخدمه ليش شارنه .. عمر تراني وايد ساكت عن سوالفك اترياك تصطلب و تغدي ريال.. بس مامنك فايده .. عنبوك كبير و عاقل و متزوج و عند عيالك تغدي شرات اليهال .. والحينه وينها حرمتك عنك؟؟ اكيد ماتعرف .. راحت بيت هلها .. وادريبها زعلانه منك بس حليلها ما تبين ولا تقول شي لانها بنت عرب و ناس تحفظ ريلها وتصونه و انت مضيع المذهب لا بارك الله فيك من ولد .. فاضحني فيها وفي خوانها .. يا فضيحتيه لو اخويه عايش و شاف ولد اخوه شو يسوي في بنته.. لا بارك الله فيك.. قم يالله ... روح صل وعقب تعال الميلس .. و العصر عقب الصلاه بتظوي بيت عمك وترد حرمتك وعيالك

 

عمر: هب راده...

ام عمر: يابويه البنيه طيبه و ماتستاهل واذا كنت غالط عليها بشي تراها بتسامحك.. الهنوف ما تحط في قلبها و هي تحبك و اكيد بتردلك ..

عمر( وهو موخي راسه): ابويه تراني نويت اعرس...

ام عمر: شو تقول انت .. ينيت... و الهنوف...

ابو عمر ( وهو معصب): اقولك روح راض حرمتك و ردها تقول تبغي تعرس ..

عمر: قلتلك .. ماتبغي ترد

ابوعمر: بترد.. تتحرها شراتك بدون قلب... بتراضيها وبتردها غصب عنك.. والعرس ان طريته ما تلوم الا نفسك

عمر: طلقيتها البارحه

ابوعمر اول ما سمع هالكلمه رفع ايده و صفع عمر على ويهه

ابوعمر: الله ياخذك يوم هاي سوالفك يالنذل... طلقت بنت عمك يالخايس.. ما تستحي انت.. فاضحنا بين العرب بسواد ويهك و سوالفك ويا البنيات و الحينه اطلق حرمتك... والله والله يا عمر... ماتدخل هالبيت .. ( وهو رافع ايده) و رب السما لا انت ولديه ولا انا ابوك ان مارديت حرمتك.. واظهر يلا.. اطلع بـــــــــــــــــــــرع ( وهو يدز عمر) اطـــــــــــــــــــلع برع.. لا بارك الله فيك

اما ام عمر فكانت تحاول تبعد ابو عمر عن عمر.. وخلود تحاول تهدي ابوها و تمسكه... راحت خلود و مسكت ايد عمر و ظهرته برع البيت

خلود: ليش يا عمر.. ليش تسوي جيه

عمر: اسكتي الله يخليج مالي بارض اسمه مواعظج الحين.. روحي حطي ثيابي في الشنطه و عطيها البشكاره توصلها السياره

خلود: عمــــــــــر الهنوف ما تستاهل

عمر: حتى انا ماستاهل...

وظهر عمر من البيت عقب ما شل الشنطه و راح الشقه اللي ماجرنها... كان يبات فيها في الاجازات

 

خلود ردت عند ابوها و حاولت تهديه..

خلود: ابويه والله مايسوى عليك كل هذا

ابو عمر: شو اللي يسوى عيل.. دام بنتي يستويبها جيه.. الهنوف بنتي يا خلود.. حالها حالج وانا مارضاها عليج كيف تبيني ارضاها على الغاليه الهنوف

خلود: كلنا ندري انك تحبها و تعزها بس بعد عمر ولدك والمفروض ما تعامله جيه

ابو عمر: لا تذكرينه جدامي.. لا هو ولديه ولا شي... دام هاي سواته مايشرفني اكون ابوه.. فاضحني بين خلق الله

ونزل فيصل.. ودخل الصاله و جان يشوف ابوه مع خلود

فيصل: خير يالغالي... بلاك عسى ماشر

خلود: تواجع مع عمر

فيصل: عمر هني... ماشوفه

ابو عمر: قلتلكم محد يذكره .. انسوا انه عندكم اخو اسمه عمر

فيصل( وهو يصاصر خلود): بلاه الوالد معصب..؟

خلود: عمر .. طلق الهنوف.. اقول بسير اطالع امايه.. خلك مع ابويه حاول تهديه

فيصل: ان شاء الله.. ابويه فديت روحك ترى كل شي بيتصلح ما عليك من عمر.. ما بيصير الا الخير

ابو عمر: أي خير.. لا حول ولا قوة الا بالله.. خلنا نظوي عالصلاه.. بيونا العرب الحينه

وظهر ابوعمر مع فيصل ...

 

راحت خلود غرفة امها .. دقت الباب بس امها ماردت عليها .. و راحت حجرتها تغير ثيابها

حمده: ها خلصتوا.... طاعي شكلج والله .. تقولين سيلانيه

خلود: اسكتي الله يخليج مالي بارض ارمسج

حمده: بلاج شو السالفه.. تعالي سمعت حشره في الصاله... ( في نفس اللحظه دخلن عذابه و ريم)

عذابه: خلدوووو ... شو الحشره اللي تحت

ريم: سمعت صوت عمر ... وينه

حمده: عمر هني...

عذابه: ظهر اظن... طليت من الدريشة و شفته ظاهر

ريم: خلووود .. بلاج ساكته شو السالفه... امايه دخلت حجرتها وهي تصيح

حمده: شووووو.... ليش تصيح

عذابه: خلدوووووووو ارمسي عاد شو الي مستوي

خلود: عمر...

ريم: بلاه

خلود: طلق الهنوف

عذابه اول ما سمعت الخبر .. قعدت عالشبريه و هي حاطه ايدها على ثمها

اما حمده فكانت تنشف شعرها ... ويوم سمعت الخبر صدت اطالع ختها

حمده: انتي شو تقولين

ريم: يا حليلج يالهنوف والله ما تستاهلين

حمده: صدق طلقها.. يمكن بس متزاعلين

خلود: لا ... طلقها.. ولا بعد ياي يقول حق ابويه انه يبغي يعرس

حمده: صدق ما يستحي

ريم: ياويل حالي عليج يا امايه.. بسير اطالعها

خلود: سيري...حاسه اني بطيح من كثر التعب

ريم: بسير عيل ( وظهرت عنهم)

حمده: شو بيستويبها الهنوف... اول شي طلقها و الحينه يبغي يعرس ... الله يستر.. بسير اطالع اميه.. ماروم ايلس اكثر... ( وظهرت تشوف امها)

اما خلود فكانت بتدخل تغير ثيابها وجان تصد واطالع عذابه قاعده عالشبريه و حاطه ايدها ثمها و تصيح

خلود: عذوبه بلاج حبيبتي

عذابه:....

خلود: شو فيج خبريني

عذابه: خ... خليفة

خلود: بلاه خليفة

عذابه: شو بيستوي الحين... اكيد.. ( وتمت تصيح)

خلود: مادري والله... تذكرين قبل يوم كان بيموت عسب توافقين عليه وانتي ما كنتي تعبرينه.. والحينه انتي تبينه .. والظروف هي اللي بتفرقكم

عذابه: لا تقولين جيه... تدرين اني كنت.... كنت احبه

خلود: توج اتذكرتي انج تحبينه.. صح انه يحبج.. بس اخته ما تهون عليه

عذابه ماقدرت تسمع اكثر.. شلت عمرها وراحت حجرتها....

عقب الصلاة ..

دخل ابو عمر مع فيصل و خليفة الميلس ...

خليفة( وهو يصاصر فيصل): بلاه عمي .. يشكي من شي؟

فيصل: بخبرك عقب...

وهني دخل منصور بن ضاحي الميلس... وهو الشريك اللي بيشاركهم في المشروع

وعقب فتره دخل محمد الرميثي و ابوه... وسلموا عالموجودين... و قعد محمد حذال فيصل

فيصل: حيالله هل العين... نورتوا دبي

محمد: دار الحي منوره بوجود هلها يالغالي...

خليفة: اشحالك... وعلوكم هناك في العين

محمد: ما نشكي باس ...نسال عنكم

فيصل: تسال عليك العافيه

محمد: الله يعافيك

خليفة: اظني شايفنك مكان.. هب غريب عليه

محمد: يمكن شايفني عند عيسى بن سعيد

خليفة: هيه... اعرفه... توني تذكرت...

فيصل: زين عيل... ظهرنا ربع عيل

خليفة: هيه والله... لنا الشرف والله

محمد: الله يخليك...

 

وبسرعه اندمج محمد مع فيصل و خليفة... كانهم يعرفون بعض من سنين... اما ابو عمر فكان يسولف مع الشواب... وكان امبين عليه التعب و الضيج... و اتغدوا الشباب...

حمده: ريماني... شو اللي اتفقنا عليه..

ريم: أي اتفاق الله يخليج.. راسي يعورني من سالفه عمر ماقدر افكر

حمده: يااااااربي .. محد يعتمد عليج

ريم: سوووري

حمده: ريموووه... سوي شي

ريم: شو اسوي يعني

حمده: عذوب في حجرتها مويمه مادري ليش... وخلود اكيد ما بتساعدني

ريم: والمطلوب؟

حمده: خاطري اشوفه

ريم: منو

حمده: منو يعني.. الطباخ... الرميثي منو غيره

ريم: شووووووو... خبله انتي

حمده: هيه

ريم: و شقايل بتشوفينه...

حمده: تعالي و بخبرج

وراحت حمده ويا ريم حذال الميلس... و كان الحمام هو اللي الممر بين الميلس و الصاله الخارجيه.. و حمده وقفت عند الباب .. اما ريم فكانت واقفه بعيد عسب تراقب

وفجأه... سمعت حمده صوت خلود..

خلود: حمدوووووووووووووووووووه

حمده من الزياغ فتحت الباب لانها كانت ماسكه مقبض الباب... و شافته... شافت محمد الرميثي و هو توه ياي بيدخل يتغسل

حمده: ...... اول شي حطت عينها في عينه...( ماحلااااااااه يا ربي... غاوي والله.. ما ينلام رميثي... بس هو محمد ولا غيره...) بس عقب وخت راسها .. و سمعت صوت ريم

ريم: حمــــــــــــــــــــــــــــــــــــــــــــــــ

ـــــــــــــــــــــــــــده

وبسرعه صكت الباب و راحت عند ختها.. بس عقب تذكرت انها بدون شيله

ريم: ماااالت عليج وعلى اللي يفكر يساعدج...

حمده ( وهي تمط ريم من ايدها): تعااااااااااااااااااااالي و بخبرج.. وينها خلود هب جني سمعت صوتها

ريم: هيه... جذبت عليها وقلتلها انج في المطبخ... اكيد ماصدقت انتي من متى تدخلين المطبخ

حمده: زين زين... تعالي

وفي الحجره

ريم: ها شو السالفه؟؟

حمده: ماشي

ريم: نعم يا روح امج.. ماسمعت عيدي اللي قلتيه

حمده: قلتلج ماشي

ريم: اوكي.. اوكي.. اوكي... خلوووووووووووووووووووود

حمده: سكتي الله ياخذ ابليسج

ريم: عقب ها كله تقولين ماشي

حمده: انزين بخبرج... ( وخبرتها سالفه الماسنجر)

ريم: وانتي شو عرفج انه هذا هو نفس الشخص

حمده: بس جيه تخمين

ريم: يمكن ما يكون هو

حمده: ابا اتاكد.. مادري كيف

ريم: حتى انا... ماروم ارمس ابويه واساله روحه مضايج وهب متفيجلنا... وفصووول... هذا اكيد بيذبحنا

حمده: مالنا غير خليفة

ريم: شو بتقوليله

حمده: بس ابغي اعرف اسم ابوه... ابو محمد

ريم: وليش يعني يوم طريتي اسمه استحيتي.. حمدووووه شو السالفه

حمده: اقوووول... اطلعي برع يالله..........

ريم: ههههههههههههههههههه.... بحبك انــــا .. هههههههههههههههههه

حمده: مااالت عليج...

 

في الميلس

كان محمد طوول الوقت يفكر يالغزال اللي شافها .. (ما شاء الله عليها حلوه وغاويه... اكيد اختهم.. اسمها حمده... سمعت حد يناديها... )

ابو محمد: ايه... محمد.. وين سرحت

محمد: ها بويه..

ابو محمد: قم خلنا نترخص... الريال شكله تعبان

محمد: هيه والله

ابو محمد: انزين يا بو عمر... نترخص الحينه

ابو عمر: تو الناس

ابو محمد: لا ياخويه... نشوفك ان شاء الله قريب

فيصل: نشوفكم عيل على خير... خلاص عيل محمد... نتلاقي الخميس الياي

محمد: فاالك طيب ...

ابو محمد: مع السلامه

وظهروا الضيوف عنهم

 

خليفة: عمي .. خير شو السالفه.. وبعدين وينه عمر

ابو عمر: خليفة يا بويه تراك حسبة ولديه واعز بعد و خواتك تراهن بناتي... وصدقني شو ما بيستوي تراني بتم حسبة ابوك

خليفة: وليش هالكلام يا عمي... تدري انك شرات ابويه ... وعمرنا ما حسينا بشي ولا شفنا عليك شي

ابو عمر: يابويه .. عمر... عمر تراه طلق ختك

خليفة( وهو واقف): شو

ابو عمر: طلقها البارحه... والله ياالغالي مادريت به الا اليوم...وسامحني على خطاه... و تراني رغته من البيت و لا اريد اشوفه لين ما يصلح غلطته..

خليفة: اسمحلي يا عمي...( كان خليفة مستغرب من اللي صار و هب قادر يستوعب فظهر خليفة من البيت)

 

ركب خليفة السياره .. وتم يفكر بللي صار... كان يحب خواته اكثر من أي شي في هالدنيا.. حس بضيج... وقهر كيف عمر يسوي هالشي.. كان يدري بحركات عمر و سوالفه بس عمره مادخل بينه و بين الهنوف .. وطول الطريج وهو يفكر بالسالفه.. واول ماوصل بيته.. وقبل ما ينزل من سيارته.. تذكر عذابه.. وشو اللي بيصير بينهم الحينه... ماعرف شو بيسوي... بس اللي كان واثق منه انه اخته اهم من أي شي يحبه.. اهم من عذابه...

الجزء التاسع

 

دخل خليفة البيت.. و شاف الهنوف مع امها قاعدات في الصاله

خليفة: السلام عليكم

ام خليفة: عليك السلام و الرحمه.. ها شو سويتوا اليوم في ميلس عمك

خليفة: شو بنسوي يعني...

ام خليفة: بلاك جيه مويم و زعلان.. خير شو اللي مستويبك.. الظهر طلعت من البيت و انت مستانس و الحين راد مضايج.. شو السالفه

الهنوف: اكيد السالفه فيها عذابه.. صح خليفة؟

ام خليفة: وانا اقول بلاه ... ابشر عيل الخميس الياي بنسير نخطبها

خليفة: ارتاحي اميه... مابغيها خلاص

ام خليفة: ويديه انا.. ليش عاد.. احيدك تموت عليها.. والبنيه بعد شكلها تباك.. خليفة بلاك ابويه شو اللي مغيرنك

خليفة: اسالي بنتج( وتم يطالع الهنوف)

ام خليفة (وهي اطالع خليفة و الهنوف): بلاكم ... شو اللي مستوي

خليفة: بنتج اطلقت

ام خليفة: خليفة قص رمستك دامها جيه.. شو اللي قاعد تقوله .. ينيت انت

خليفة: لا يا اماايه ما ينيت.. بس هالواقع

ام خليفة: أي واقع واي خرابيط... الهنوف اميه .. شو السالفه.. صدق اللي يقوله خليفة؟

الهنوف (وهي موخيه و بصوت واطي): هيه

ام خليفة: شو هيه (وهي تصارخ)... ردي علي شرات الاوادم... شو اللي مستوي؟

وهييج الساعه نزلت علياء على زعيج امها وقفت عند الدري...

خليفة: مالها ويه ترمس .. ماتعرف شو بترد عليج...

الهنوف: خليفة لو سمحت... مايحتاي تقول هالرمسه

خليفة: عيل شو اللي تبيني اقوله...

الهنوف: لا تقول شي

ام خليفة: كيف ما تبغينه يقول شي و انتي.... (حاولت تمسك عمرها) الهنوف فديتج يا اميه خبريني شو سالفتج لا تعورين قلبي اكثر عن جيه

الهنوف (وهي موخيه راسها): امايه.. مثل ما قالج خليفة... اطلقت .. ( شلت عمرها و راحت حجرتها و في دربها شافت اختها علياء واقفه و تصيح... حطت عينها في عين ختها ... و راحا حجرتها)

 

ام خليفة: خليفة... سمعت اطلقت... ( وتمت تصيح)

خليفة: هيه سمعت... ( وهو بعد شل عمره وراح حجرته)

ام خليفة: لا حوول ولا قوة الا بالله... يا ويل حالي عليج يا بنتي... شو اللي استوابها...

علياء: امي .. لا تسوين في عمرج جيه... هالنصيب

ام خليفة: أي نصيب انتي بعد... هذا ولد عمها و زوجهاو ابو عيالها..

علياء: يمكن ماقدروا يعيشون مع بعض

ام خليفة: شو تقولين انتي.... انا عمري ما سمعتها تشكى من شي... كيف جيه تطلق كيف

علياء: يمكن كانت تشكي و تتالم دون مانعرف... انتي اكثر وحده تعرف الهنوف و تعرفين انها ماتبين اللي فيها

ام خليفة: خلاص ماعدت اعرف شي... قومي عني بسير اطالعها

علياء: هب الحينه.. خليها روحها بتي تخبرج

ام خليفة: شو بتخبرني... لا بارك الله فيك يا عمر..

علياء: يا امي هب زين تدعين عليه

ام خليفة: لاحول ولا قوة الا بالله..بسير اطالعها

 

وراحت ام خليفة حجره الهنوف و دخلت عليها

كانت الهنوف قاعده عالكرسي و عيالها عالارض يرسمون...

الهنوف اول ما شافت امها وخت... ما كانت تبغي تحط عينها في عين امها

ام خليفة قعدت عالشبريه... و تمت اطالع عيال الهنوف

ام خليفة: مافكرتي شو اللي بيستويبهم

الهنوف:......

ام خليفة: يا اميه خبريني شو اللي صار.. لا تسوين فيه جيه.

الهنوف: ماصار شي... اطلقت و بس

ام خليفة: ( وهي تصيح) و تتحرين هالكلمه سهله.. الطلاق هب هين يالهنوف... بلاج شو اللي مستوي فيج خبريني ولا تعورين قلبي.. تراج بنتي و ماروم اشوفج بهالحاله

الهنوف كانت تصيح بهدوء و هي موخيه راسها

ام خليفة: خبريني انزين ليش اطلقتي .. شو سوابج عمر.. قوليلي و ريحيني.. انت شو تتحرين الطلاق لعبه.. هاي حياتج... والطلاق للحرمه عيب .. تعرفين شو يعني عيب

الهنوف: يا امي الطلاق اهون من اني انذل

ام خليفة: ما عاش من يذلج يا بنت بطي القبيسي... يا اميه اذا ابوج ميت .. ترانا عايشين و انا عمري ما قصرت عليج بشي..

الهنوف: ادري يا امي و الله ادري.. بس خلاص ماقدر اعيش معاه... لا هو يفهمني ولا انا افهمه

ام خليفة: شو تقولين انتي... عقب خمس سنين تذكرتي انج ما تفهمينه

الهنوف: حاولت افهمه .. حاولت اخليه يحبني بس ماقدرت.. وانا ماقدر اعيش مع واحد مايحبني.. واذا رضيت هالشي تراني ارضى بالمذله...

ام خليفة: الله لا يوفقك يا عمر... حسبي الله عليك ونعم الوكيل... اللي كسرت قلب اليتيمه وهدمت حياتها.. يعلي اشوف فيك يوم( وتمت تصيح بصوت عالي)

الهنوف نشت وراحت قعدت عند امها

الهنوف: لا يا اميه... لا يالغاليه.. لا تدعين عليه... فديت روحج لا تسوين في عمرج جيه.. صدقيني اني مرتاحه.. والله مرتاحه الحين اكثر عن قبل... تعرفين ليش؟؟ لانه ادري انه عندي اهل يسوون عمر و طوايفه.. ادري انه عيالي بيعيشون احسن عيشة دامهم معاج.. بس لا تدعين عليه.. مهما يكون تراه ولد عمي و ابو عيالي

ام خليفة: ماعرف شو اقولج... الله يهديج بس..

الهنوف: ويهديه بعد

ام خليفة: فديتج يالغاليه... (وجان تحضن الهنوف)

اما خليفة فكان في دنيته روحه... يفكر بللي بيسويه في حياته

(((شو اسوي الحين... ليش يا عمر.. ليش يالهنوف..عقب ما حنت عليه بنت عمي بتفرقونا... ))

ودخلت عليه الهنوف

الهنوف: خليفة بغيت ارمسك

خليفة: هب الحينه تعبان و برقد

الهنوف: ما بطول عليك بس حبيت اقولك شي

خليفة: خير

الهنوف: خليفة.. اللي استوى بيني و بين عمر ما بياثر بينك و بين عذابه

خليفه : ( وهو يضحك) ما بياثر اونه

الهنوف: خليفة... انت اخويه و اتمنالك السعاده.. و عذابه تراها تحبك و اكيد تبغيك

خليفة: سكتي الله يخليج

الهنوف: روح عند عمي و صدقني ما بيردك

خليفة: اذا ماهو ماردني ... ترى كرامتي هي اللي بتردني قبل مادخل بيتهم

الهنوف: انت مالك خص بللي يستوي بيني وبين عمر

خليفة (صد يطالع خته): الهنوف انتي غاليه علي... اذا انا ماوقفت معاج من اللي بيوقف... اللي صار فيج بسبتيه انا.. انا المفروض من البدايه اوقف في ويه عمر .. لا تتحرين مادري عن سوالفه.. بس سكت لانه ولد عمي ولانج انتي ما تبيني ادخل... و الحينه استقوى عليج و طلقج... مارضاها يا الهنوف.. وعذابه خلاص.. حلم و انتهى.. وماظن اقدر اخطبها عقب اللي صار

الهنوف: بس

خليفة: الله يخليج لا تذكرينها مره ثانيه.. اللي بيني وبينها مستحيل يستمر.. حتى لو كانت تبغيني.. تراج اهم منها.. وقبل ما تكون هي بنت عمي تراج اختي.. ( وحبها على راسها)

الهنوف: يعلي ما خلى منك...

خليفة: انزين .. ممكن تظهرين الحينه...

الهنوف: هههههههه.... ان شاء الله

الهنوف عقب ماظهرت من عند خليفة... دمعت عينها .. يا حليله يحب عذابه و يموت فيها و الحينه بيضحي بسعادته على شان كرامة اخته..

 

 

 

مر اسبوع و الوضع في عايلة القبيسي مثل ماهو.. ماتغير شي في حياتهم

الهنوف.. عايشة في بيت هلها.. كانت مستانسه .. عاشت حياتها بصوره طبيعيه... حتى عيالها ما افتقدوا ابوهم لانه اصلا ما كان يهتم فيهم

 

خليفة.. حاله تغير ... كان دومه حزين و مويم.. هب شرات قبل .. نادر ما يضحك او يسولف..حلم حياته ضاع من ايده.. و ضحكة حياته استوت بعيده عنه بالرغم انه المسافه بينهم صغيره.. و زياراته لبيت عمه قلت.. حتى علاقته مع فيصل .. تغيرت وااااااايد

 

علياء.. علاقتها مع عذابه ما تغيرت.. كانت صداقتهم اكبر بوايد من ان أي شي يفرقهم

 

عمر.. عايش حياته ولا كان شي مستوي... كان يتصل بهله و يسلم عليهم .. بس ما كان يقدر يرد البيت.. اما الشغل .. فتم يشتغل مع ابوه و يشوفه كل يوم.. بس ما كان يتكلم معاه الا عن سوالف الشغل.. عمر تفكيره كان عند العروس اليديده.. كان يتريا فتره حتى ينسون هله سالفه طلاقه. عسب يعرس مرة ثانيه

 

خلود..تأثرت واااايد بطلاق اخوها... كانت تحب الهنوف و تعزها .. اما سالفة عبدالعزيز المزروعي فبعدها مستمره... كان كل يوم و الثاني مطيح عندها في الشغل.. و طبعا كالعاده هي مطنشتنه.. و زاد رفضها له عقب طلاق اخوها.. كانت تعتبر عبدالعزيز نسخه طبق الاصل من اخوها...

 

حمده... علاقتها مع الرميثي زادت عن قبل.. صح انه الكلام اللي بينه نصه سب و ظرابه.. بس كان واضح انها تعلقت فيه..حتى هو.. دوووووم يدخل الماسنجر بس عسب يرمسها.. لدرجة انه ظارب بلوك لكــــــــــل البنات اللي عنده في اللسته...

 

عذابة.. تغيرت وااااايد عن قبل... والكل لاحظ تغيرها .. وخاصة معاملة خليفة لها.. زياراته قلت حتى السلام ماقام يسلم عليها... كانت تحب تعرف اخباره.. وطبعا علياء الوحيده اللي تييبلها الاخبار

 

ريم.. سالفتها سالفه.... وخاصة عقب اللي صار لها...

 

في المدرسة..

كانت ريم تتريا الدرويل يمر عليها عقب ماخلص دوام المدرسه

ريم: لا حووول... والله لا راويها حمدووو الملعونه

حصة: ليش .. شو يخصها حمده

ريم: محد غيرها اللي ماخرة الدريول... عذابه قالت انهن بيخلصن من وقت.. وطبعا الحبيبه قاعده عالماسنجر..

حصة: يا سلاااااام وناسه والله هالماسنجر... انا خاطري ادش الجامعه بس عسب ادخله.. تدرين البيت عندنا فيه كل شي ممنوع

ريم: ماعندج سالفه.. بسير اطل برع يمكن مسود الويه شرف

وهي ظاهره اطالع الدرويل... لمحت واحد عنده كروزر اسود... ريم ما كانت تتغشى .. الا يوم تظهر و تسير السناتر و هالاماكن

 

ريم: هب جنه هذا دوووووم يتفيزر عند باب المدرسه.. خاطري اعرف يتريا منو

حصة: اونج ماتدرين

ريم: لا والله مادري

حصة: يترياج يا حبيبتي

ريم(بسرعه صدت صوب ربيعتها): خبله انتي شو يالسه تقولين.. وبعدين هذا شو عرفني فيه

حصه: انزين و ليش انتي جيه معصبه... والله هاللي سمعته...

ريم: سكتي انزين ... يا الدرويل ..باااي

حصة: ريم لا تزعلين من رمستيه

بس ريم ماردت عليها... شلت شنطتها و راحت صوب السياره... بس يوم ظهرت تغشت.. حست بنظرات الولد اللي في السياره

 

في السيارة

ريم: تو الناس... يايين من وقت... اليوم جان رقدتوني في المدرسه.. عشان اصبح و انظف المدرسه

عذابه: بس بس.. اسمحيلنا.. وبعدين لا ترمسيني انا.. رمسي هاي...(تاشر على حمده)

ريم: ادريبها.. محد غيرها سبب المشاكل

حمده: بلاكن انتن.. ريم... منو هذا اللي ورانا

ريم: منو

حمده: هذا اللي عنده كروزر اسود.. لمحته عند باب مدرستكم

ريم (وهي مرتبكه.. يعني صدقها حصه): ماعرفه

حمده: ريم... عليــــــــــــنا

عذابه: حمده.. شو هالرمسه بعد...

حمده: يالسه اتمصخر انزين.. تراني اشوفه يلحقنا

ريم: ماعرفه.. والله ماعرفه

عذابه: بلاج انزين زايغه...

ريم: مادري (ويهها محمر)

حمده تمت اطالع ريم.. كانت حاسه انه ريم تعرف هالولد ولا ما ارتبكت جيه

 

وثاني يوم في المدرسه

حصة كانت تلحق ريم...

حصه: ريــــــــــــــــــــــــــــــــــــــــــــــــ

ـــــــــــــــــــــــم..

بس ريم ما كانت ترد عليها

حصة: ريـــــــــــــــــــــــــــم القبيسي

ريم عاد صدت صوبها

ريم: خير بلاج

حصة: انتي اللي بلاج ماتردين عليه

ريم: بسير الصف... مابغي اتاخر

حصة: وانتي من متى تهتمين

ريم: من اليوم

حصة: ريماني لا تزعلين مني عسب رمسة البارحه.. والله اتمصخر

ريم: هب زعلانه.. يمكن مضايجه شوي

حصة: من شو

ريم: اخاف اللي تقولينه صدق... البارحه تم يلحقنا و خواتي شكن الصراحه

حصة: انزين ها شي طبيعي.. بس انتي ليش زايغه

ريم: مادري... بس عمري مامريت بهالموقف... وخاصه انج تقولين ان الكل يعرف

حصة: انا الصراحه سمعت هالرمسه من كمن بنيه...

ريم: منو

حصة: شلة هيفاء

ريم: يااااااويلي انا .. رحت فيها عيل

حصة: بلاج

ريم: شو بعد بلاني... تدريبهن عدل انتي .. يحبن يشوهن سمعة البنيات

حصة: انزين انتي ما سويتي شي

ريم: ادري... بس ماحب حد يرمس عني..

حصة:....

ريم: بيسر الصف

 

وعقب ما خلص الدوام.. برع المدرسه

ريم: يلا بنات .. بروح... مع السلامه

وهي تمشي شافت شلة هيفاء

هيفاء: الله يحفظج الريم... بس شوي شوي عالريال

ريم عصبت يوم سمعت رمستها بس ماردت عليها... ومشت..السياره كانت موقفه بعيد.. يعني لو بتوصلها المفروض تمر حذال سياره الولد راعي الكروزر..

وهي تمشي كانت ترتجف... البنات كلهن يالسات يطالعنها... اما الولد اول ما طافت الريم.. نزل الجامه

و كان معلي على صوت المسجل...

حبيت غرشوب ولعني و لوعني و اسقاني الحب في كاسه و اشقاني

دلوع مادري وش اللي فيه ولعني كل ماتركته اعود لدنيته ثاني

ان قال احبك يحاول ما يسمعني يلعب باعصاب قلبي بس يهواني

لكن ساعة يدلعني يدلعني و يقول احبك و ميت فيك يا فلاني

 

عاد ريم اول ما سمعت الاغنيه بغت تموت.. كأن حد صب ماي بااارد على راسها.. وخاصه ان الصوت كان عالي يعني اكيد الكــــــــــــــــــــــــــــــــــــــل سمع...

 

 

 

 

ظنكم شو بيصير بين ريم وبين هالريال....!!!

وشو بيكون مصير عذابه... و الهنوف... و خلود..!!؟؟.. ولا تنسون.... حمده و الرميثي..

 

 

Link to comment
Share on other sites

الجزء العاشر

مرن يومين وريم ما راحت المدرسه... كانت وايد مفتشله من الموقف اللي مرت فيه هاك اليوم .. شو بيكون شكلها جدام البنات... و الكل يعرف انه الريال يقصدها هي... و هي سرحانه بافكارها دخلت عليها عذابه

 

عذابه: ريماني...!!!

ريم:......

عذابه: ريم... ريـــــــــــــــــــــــــــــــــــــــم!!

ريم: خير .. بلاج تصارخين.. تتحريني عيوز شراتج ماسمع

عذابه: يوم انج هب عيوز عيل بلاج ماتردين علي ها

ريم: يالسه افكر

عذابه: بشو

ريم : كنت افكر في.... انتي وشلج

عذابه: مااااااالت هاي يزاتي اني اعبرج

ريم: لا تعبريني انزين

عذابه: والله ملل.. باجر الخميس .. والله الاجازات ما قمنا نحس بها.. يا حليلج يا علاااااايه ... كانت دومها في بيتنا

ريم: عذووووب ... يمكن تظهرين.. راسي يعورني و مابغي اسمع معاناتج الحين

عذابه: ريماني بلاج هاليومين متغيره... و لا بعد غبتي يومين عن المدرسه

ريم: بس جيه... حبيت اخذلي فتره نقاهه

عذابه: وابويه عليج... جيه شو تسووين في المدرسه... تخمينها

ريم: تنكتين حضرتج

عذابه: احاااولJ

وهييج الساعه دخلت عليهم حمده

اعطني الناي و غني ... فالغنا سر الوجود... و انين الناي يبقى.. بعد ان يفنى الوجود

 

عذابه: عدال يا فيروز... لا يطيحين ظروسج

حمده: احلفي انتي بس

عذابه: والله

حمده: تدرون بشو افكر

ريم: اقول اقول... خذي ختج وروحن فكرن برع احسن

حمده: والله يالسه افكر بالاجازه... ليش ما نسير لبنان

عذابه: هههههههههههههه... لالا فديتج خاطري اسير هاواي

حمده: وياويهج ارمس جد

عذابه: اتخبلتي انتي .. اصلا هاي السنه لازم نغسل ايدنا من السفر

ريم: ليش ؟!!

عذابه: ليش بعد... محد بيسافر ويانا.. عمر اكيد لا... ابويه مايرمسه...والشغل على راس ابويه.. وفيصل ما بيسافر دون.... دون خليفة

حمده: ياااااالله عالمستحى.. ماروم انا

عذابه: جب انتي

ريم: صدقج عذوب... محد بيطيع يسافر.. شو بنسوي.. اففففف انا لازم اخذلي فتره نقاهه.. وخاصة عقب امتحانات الثانويه..

حمده: عندي الحل

عذابه: شو

حمده: ريم.... ريماني... ريمو الغاليه...

ريم: خير يالمصلحجيه.. شو تبيني اسوي

حمده: روحي اقنعي ابويه...تراه يسمع شورج...

ريم: ماظن بيسمعني هالمره

عذابه: ما عليج انتي... انتي بس اطلبي و كل اللي تبينه بيتحقق

ريم: بجرب.... وينه الحينه

حمده: في الصاله ويا امايه و يدوه

عذابه: وفيصل معاهم.. ترى اذا معاهم الخطه بتفشل

حمده: ابشري ابشري يا عذابه بنت عبدالله... الطريق خالٍ من الاعداء.. وانت يا الريم انطلقي ..

ريم: انطلقن ورائي....

عذابه: 1 2 3 .... اكشن

ريم: شو اكشن بعد... وين تبين انتي

عذابه ( وهي ادز ريم): طوفيها انتي عاد

حمده: يلا بســــــــــــــــــــــــــرعه قبل ما تخترب الخطه

 

ونزلن البنات الصاله... عذابه و حمده كانن يدزن ريم...

ريم: شوي شوي عليه.. كسرتولي ظهري

حمده: اففففف منج... بسرعه عاد

ريم: انزين L

 

ابو عمر: والله ماعرف شو اقولج يا ام عمر

ام عمر: هب لازم تقول شي... انت بس وافق

اليده: شو بيستويبك يعني اذا سرتلهم ها... بيطيح نصك يعني... و بعدين بخبركم بلاكم تعيدون السالفه و اتجلبونها الف مره.. البنيه ما تبغي ولدكم .. غصب هو..

ام عمر: انزين .. بس اللي اقوله.. خلنا نزورهم

ابو عمر: الصراحه مفتشل منهم.. مالي ويه اطالع الهنوف

ام عمر: انت ما غلطت بشي.. و اللي بيتحمل الغلط فهو عمر.. هب احنه.. ومهما يكون تراها بنت اخوك قبل ما تغدي حرمة ولدك... و عيالها عيالنا المفروض نسال عنهم و نطمن عليهم

اليده: صدقتي... مع اني اقول انه مالكم ويه تسيرون.. بس شو نسوي.. كله بسبة ولدج الملعون هذا.. عموووور... مسود ويووهنا بين العرب.. مادري طالع على منو ( ونظراتها كلها على ابو عمر)

ابو عمر: حتى انا مستغرب.. مادري ظاهر على منو

اليده: على منو يعني غيرك ها.. هب انت ابوه.. اكيد بيغدي شراتك

ابو عمر: انا ...!!!... جيه شو سويت

اليده: اصلا انت لو قدرت جااان من زماااااان عرست و خذتلك بدال الهنتين اربع.. بس انا اللي مانعتنك.. وبتم جيه .. شرات العظم في بلعومك

ابو عمر ( وبصوت واطي): صدقتي

ام عمر: صدقت بشو ان شاء الله

ابو عمر: ها... لا لا ماشي

ريم: ابــــــــــــــــــــــــــــــــــــــــــــــــ

ــــــــــــويه

ابو عمر: عيوووووووونه

راحت ريم و قعدت في حضن ابوها و باسته على راسه

ريم: الله لا يحرمني منك يالغالي.. امووووووووواه

اليده: هي انتي.. ما تشوفين بنيتج... تقولين ياهل .. هب حرمه.. و بعد تلومينهم يوم يغلطون.. تراج انتي و ريلج السبب.

ريم: شو فيها يعني لو دلعني.. تراني الصغيرونه في البيت

اليده: ويديه انا... شو صغيرونه بعد... عنبوج قد البعير و تقولين صغيرونه

حمده: خليها يدوووووه... حليلها دلعوتنا

ام عمر: حمدوو... ماحيدج ادافعين عنها.. اللي احيده انتي و هي شرات القطو و الفار

اليده: ما تدرين انتي.. هذيله وراهن شي ... اصبري و بتشوفين

ابو عمر: ها ريماني شو الدراسه وياج

ريم: زوين.. ترى الامتحانات بتخلص عقب شهرين.. يعني بفتك جريب ان شاء الله

ابو عمر: يالله عاد شدي حيلج و هاتيلنا نسبة ترفع الراس.. و هييج الساعه اللي تامرين فيه انا حاضر

ريم: فديت روحك والله.. انزين ترا طلبيه من الحينه جاهز

اليده: ما قلتلج .. وراهن شي

ابو عمر: وشو اللي تبينه... وانا حاضر..

ام عمر: لا ادلعها.. ما تستاهل تراها يومين ماراحت المدرسه

ابو عمر: افا والله... ليش غناتي

ريم: كنت تعبانه.. وحبيت ارتاحلي يومين.. و الصراحه كنت ابغي اشوفك واقعد معاك.. بس انت دوومك برع البيت

 

حمده( تصاصر عذابه): هب هينه اختج... ظهرت داهيه

عذابه: كل شي يهون في سبيل السفر

 

ريم: ابووويه

ابو عمر: لبيه

ريم: شو رايك نسافر في الاجازه

حمده: شو هالفكره الحلوه... اتصدقون ما فكرت فيها

اليده: اونج عاد ماتدرين.. اقص ايدي لو مانتي اللي طريتي سالفه السفره هاي

ام عمر: ارتاحن ماشي سفر هاي السنه

عذابه: ليش عاد

ريم: ابويه والله حراااام... الحينه يوم بفتك من الدراسه و الامتحانات ما تبون تريحوني يعني..

ابو عمر: بس يابويه

ريم: لا بس ولا شي... بنسير اسبوعين زمان و بنرد.. مافيها شي

اليده: صدقها ريم,,, حتى انا خاطري اغير الجو.. حشا ذبحنا الحر في البلاد

عذابه: صدق يدوووه

حمده: ياسلاااااااام طاعو منو يرمس

اليده: شو فيها يعني... جيه مالي رب.. ترى من الحينه اقولكم.. اذا بنسافر بنسير العمره ولا بنسير عمان

عذابه+ ريم+ حمده: شووووووووو!!!!!

اليده: شو بعد

ام عمر+ ابو عمر: هههههههههههههههههههه

عذابه: لا ... شو عمان... و بعدين العمره سرنالها العام

حمده: اذا جيه خلاص غيرت رايي.. مابغي اسافر

اليده: ويديه انا.. وليش غيرتن رايكن.. وين عيل تبغن تسيرن

ريم: ابووووويه... شو رايك نسير لبنان

ام عمر: لبنان في عينج يالحماره... شو بعد لبنان

ريم: انزين انزين الا هو اقتراح

عذابه: ادريبها امي ليش ماتبغي تسير لبنان

ام عمر : ليش ان شاءالله

عذابه: عسب ابويه.. مايتبع المزيونات هناك

ابو عمر: خخخخخخخخخ

اليده: ماعليج... دام انا معاكم.. لا تخافين

حمده+ عذابه+ ريم: ههههههههههههههههههههه

ريم: ها ابويه.. شو قلت... وين نسير

عذابه: شو رايكم نسير استراليا

حمده: لالالا... شو نسوي عند البقر... وبعدين سرنالها مرتين.. انا اقول خلنا نسير الصين

ابو عمر: الصين مره وحده.... وبعدين مافينا عالامراض

ام عمر: انا اقول كنسلوها السفره ابرك

ريم+ حمده+ عذابه: لالالالالالالالالالالالالالالالالالالا

دخلت عليهم خلود

 

خلود: السلام عليكم

الكـــــــــــــــــــل: عليكم السلام

خلود: ما شاء الله العايله الكريمه متيمعه اليوم... اكيد ناويين على شي

اليده: اكيد... دام خواتج متفقات...

خلود: خير... متفقات على شو..

ريم: ابويه وافق نسافر هالسنه

خلود: والله!!! زين زين.. تراني مليت من الشغل.. و ماخذتلي اجازه هالسنه..

ابو عمر: اذا جيه خلاص عيل.. بنسافر على خير.. بس انتو حددوا وين ..

خلود: يمدحونها سويسرا

عذابه: هيه والله.. سويسرا غاويه

حمده: انتي شو عرفج

عذابه: الله يخلي التلفزيون

ابو عمر: هالريم.. شو رايج بسويسرا

حمده: لازم شور ريم يعني

ابو عمر: هيه لازم

ريم: خلاص سويسرا سويسرا.... المهم نظهر برع البلاد

اليده: وين هاي سويسرا بعد... جريبه على عمان.!!..

خلود: ويــــــــــــــــــــــن سويسرا و ويـــــــــــــــــــن عمان

اليده: تراني قلت لو جريبه.. بنخطف عمان مره وحده..

ابو عمر: جيه حديقه هي

اليده: هيه حديقة.. وبعدين شو فيها عمان .. غاويه و الكل يتمنى يسيرلها.. بنسير صلاله

ام عمر: خلاص اميه.. بنسير صلاله.. ولا تزعلين... الحينه خلونا في سالفه الهنوف

خلود: بلاها

ام عمر: انا رايي نسيرلهم باجر الخميس ..من اسبوع ما شفنا اليهال .. ها شو قلت يا بوعمر

ابو عمر: الراي رايج.. مع اني مفتضح فيهم.. بس يالله .. بنسير شو بنسوي عيل

ام عمر: تجهزن عيل... كلنا بنسير باجر

حمده: شو كلنا بعد... لا لا.. ربيعتيه مهرة عزامتني باجر.. ومن اسبوعين مخبرتنج

ام عمر: فديتج خليها الخميس الياي.. تراهم عيال اخوج ولا زم تسالين عنهم

حمده: انا كل يومين ارمسهم بالتلفون ..مايحتاي اسير... و اذا بسير .. بسير الاسبوع الياي

ابو عمر: ومع منو بتسيرين عند ربيعتج.. اذا روحج.. كنسليها السيره

حمده: عذابه بتسير معايه.. صح عذوب؟!!

عذابه: لا فديتج.. بسير ويا امايه وابويه بيت عمي.. تولهت على الهنوف

حمده: الهنوف و لا ...

ام عمر: حمدووو... شرات ماقالج ابوج .. ماشي سيره روحج

حمده: انزين انزين... ريماني بتخاويني

ريم: انا

حمده: هي انتي

ريم: بس..

حمده: شفتوا بتسير ويايه.. خلاص عيل .. J

ابو عمر: خلاص اللي تبينه سويه

حمده (وهي تلوي على ابوها): فديتك يالغالي.. مع اني ادري لو ما الريم معايه جان ماخليتني اسير.. بس يالله شو بنسوي ..

 

خلود: ابويه بغيتك في سالفه

ام عمر: خلوه يرتاح.. من تغدا و انتن على راسه

ابو عمر: خليهن يا ام عمر.. ها خلود.. شو اللي بغيتيه!!

خلود (وهي مرتبكه): خلنا نروح غرفتك احسن

حمده: خير شو السالفه... اسرار من ورانا بعد

خلود: ما من اسرار.. بس حبيت اقوله شي

ابو عمر: انزين تعالي الحجره...

 

ودخل ابو عمر الحجره مع خلود..

ابو عمر : ها بويه.. بلاج..!!

خلود (وهي معصبه): ابويه لو سمحت تراني والله مليت من هالسالفه

ابو عمر: خير..

خلود: الصراحه خلاص.. ماروم اسكتله اكثر عن جيه... عنبوه كل يوم و الثاني اتفيزرلي في الشغل.. فاضحني بين الموظفين.. ولا بعد يتواجع مع اللي اشتغل معاهم شو هالحاله والله مليت.. وابغيك تشوفلي حل... ولا انا روحي بتصرف معاه..

ابو عمر: هههههههههههههههههه....

خلود (وهي مستغربه): ليش تضحك

ابو عمر: عليج.. عنبوج داخله علي بشراع و ميداف.. انزين خبريني شو السالفه ومنواللي تطرينه!؟!

خلود: منو غيره يعني.... هذا الغبي... عبدالعزيز المزروعي

ابو عمر: هيـــــــه

خلود: شو هيه.. بس هذا اللي قدرت تقوله.. اقولك ملعوزني و مظيجبي تقول هيه

ابو عمر: والله ماعرف شو اقولج يا خلود.. انتي ادرى.. بايدج ترومين تنهين السالفه

خلود: وانا نهيتها من زمااان

ابو عمر: بس هو يبغيج

خلود: وانا مابغيه

ابو عمر: انزين تعالي اقعدي حذالي.. تعالي

قعدت خلود حذال ابوها...

ابو عمر: خلود.. انتي كبيره و عاقل.. يعني هالسوالف مالها معنى...

خلود:..............

ابو عمر: وبعدين الريال شارنج.. و يبغيج.. اول ما يا يخطبج ما وافقنا عليه لانه ماكان يشتغل.. وكان لج الحق انج ترفضينه.. و يا مره ثانيه يخطبج عقب ماشتغل وكون نفسه عشانج انتي.. و ماطعتي تاخذينه لانج تبغين تشتغلين... قلنا ما عليه .. سوي اللي يريحج... والصراحه البارحه ياني الشغل و خطبج.. وانا الصراحه ماعندي سبب ارفضه.. وابغي اسالج هالسؤال.. ليش ما تبغينه.. يشهد الله اني ما شفت عليه شي ينعاب.. ليش ما تبينه... الريال هب ناقصنه شي... وفوق ها كله يحبج.. يعني لو مايبغيج جان ماركض وراج كل هالفتره.. انا ماقدر ارفضه.. بس بعد الشور شورج.. انتي عطيني سبب يخليج ترفضينه

خلود: ماعرف

ابو عمر: شو ماتعرفين.. ها عرس هب لعبه

خلود: ماعرف.. اللي اعرفه اني مابغي هالانسان.. كفايه انه شرات عمر.. وانا مابغي حياتي تنتهي شرات الهنوف

ابو عمر: انتي شو تقولين.. تخبلتي... وبعدين عبدالعزيز هب شرات اخوج.. صح انه ربيعه.. بس عمري ما شفت عليه الغلط.. خلود غناتي انا ابوج و يهمني مصلحتج تتحريني لو شفت عليه شي بخليه يقرب صوبج ... هب زين الي تسوينه .. انتي كبرتي و ماعدتي ياهل.. و الريال شارنج و يبغيج.. انا ما شوف سبب يمنعج

خلود: ماعرف شو اقولك

ابو عمر: اباج تقوليلي بفكر... مابغيج توافقين بس عالاقل فكري..

خلود: بفكر..

ابو عمر : بشو تفكرين

خلود: بفكر اني افكر في السالفه

ابو عمر: وابويه عليج انتي.... يلا عاد.. ابغي انسدح شوي..

خلود: ان شاء الله..

وهي ظاهره من الحجره...

خلود: ابويه

ابو عمر: لبيـــــــــــــــــه

خلود: ممكن طلب

ابو عمر: عيوني

خلود: رمسه وقوله لا ييني الشغل.. مابغي افتضح ااكثر عن جيه

ابو عمر: فالج طيب... اصلا امبوني بهزبه على سوياته

خلود (وهي تبتسم): الله لا يحرمني منك .. ( وظهرت عن ابوها)

 

 

ان شاء الله الجزء الياي...

تظنون خلود بتوافق و بتاخذ عبدالعزيز !!!

شو بيكون موقف الهنوف يوم بتشوف عمها و حرمته... وظنكم بتغير رايها و بترجع لعمر!!!

شو بيسوي خليفة يوم بيشوف عذابه... بيحن لحبه او بيكابر لجل اخته!!!!

و ريم....!!!... مفاجاة بتغير حياتها,,,,!!

ولا تنسون حمده....و محمد

 

 

Link to comment
Share on other sites

الجزء الحادي عشر

 

يوم الخميس الصبح

 

قررت حمده تروح بيت ربيعتها مهره مع ريم... اما عذابه و خلود فبيزورون الهنوف واهلها مع ابوهم و امهم..

في غرفة حمده:

ريم: حمدوووه شو البس اليوم؟؟

حمده ( كانت يالسه عالكمبيوتر و داخله الماسنجر): ماعرف

ريم: عطيني رايج انزين

حمده: ماعرف ماعرف...

ريم: وياويهج .. تراني بسير بيت ربيعتج والمفروض اتكشخ...

حمده: ريموووووه... جلبي ويهج .. هب متفيجتلج

ريم: ليش ان شاء الله.... هيه اكيــــــــــــد تتريا حبيب القلب.. القلب العيناوي

حمده: مااااااااااااااااااالت عليج.. سكتي لحد يسمعج و بعدين منو قالج اني اترياه.. اصلا اتريا ربيعتيه..

ريم: مايحتاي .. اتريا ربيعتيه( وهي تقلد حمده)

حمده: اقول... اذا ماعندج شي تقولينه... شلي عمرج و اظهري من الحجره...

ريم: بظهر انزين.... باي

حمده: فــــــــــــــكــــــــــــــــه

ريم ( وهي تطل من الباب): شو .. ماسمعت... شو قلتي؟؟

حمده: ماقلت شي ... ذلفي يالله

ريم: انزين ( وهي تحيس ثمها)

 

ريم و هي ظاهره من الحجره... شافت عذابه

ريم: هي انتي... وين بتسيرين؟؟

عذابه: بسير ارمس حمدووه.. وبعدين شو هي انتي بعد... بلاج مستخفه هاليومين

ريم: نسيت اسمج انزين

عذابه: المره الثانيه اذكري... ترى رمستج موووول هب عايبتني هاليومين

ريم: كيفي انزين

عذابه: ذلفي ..

ريم: بلاكن تروغني اليوم.. مره حمدووه و الحينه انتي... الظاهر الكل متوتر اليوم.. انصحج لا تدخلين عند حمدووه.. تراها بتذبحج..

عذابه: ليش

ريم: مادري... بس انصحج..و انتي كيفج.. اذا متبريه من عمرج ادخلي

عذابه: بدخل..

ريم: ها... كيفج والله.. بسير اطالع فيصل... من كمن يوم مارمسته

 

عذابه دخلت على حمده

حمده: يااااااااااااااااااااااااااااااااااااااربي... محد يروم يقعد روحه في هالبيت

عذابه: خيبه.. بلاج

حمده: مابلاني شي .. بس مالي بارض اجابلكم اليوم.. حرام

عذابه: لا هب حرام... بس بغيت اقولج شي

حمده: خير.. قولي بسرعه و اظهري

عذابه: عفانيه الله...اميه تقولج الساعه كم بتسيرين عند ربيعتج

حمده: الساعه 12 الفليل.. متى بسير يعني.. اكيد العصر

عذابه: بلاكن جيه اليوم.. كل وحده اخس عن الثانيه... عيل ردي بسرعه.. لان ما بنتاخر اليوم عند قوم عمي

حمده: انزين.. في شي ثاني

عذابه: لا ماشي...

حمده: الحمدلله.... يمكن تظهرين الحينه.. اقول.. خبري خلود و كــــــــــــل اللي في البيت اني مشغوله و مابغي حد يدخل عليه

عذابه: ان شاء الله عموه حمده,,, في أي اوامر ثانيه

حمده: هيه.. اظهري

عذابه: صدق انكن فاصخات الحيا...

وظهرت عذابه عن حمده... اما حمده فكانت يالسه على اعصابها... تتريا محمد يدخل الماسنجر.. وعقب دقيقتين دخل

 

ملك العين: هلا و الله بالغلا.. اقصد البقره...

احبك لو بغيت انساك ماقدر: ليش ان شاء الله بقره

ملك العين: تراني كل مارمستج شرات الاوادم .. اطولين لسانج... فقلت ما ينفع معاج الا السب

احبك لو بغيت انساك ماقدر: محد بقره غير حرمتك

ملك العين: فديــــــــــــــــــــــتها و الله.. اقول بتسبيني برايج.. بس تسبين حرمتيه لا.. تراها تاج راسي و راسج

احبك لو بغيت انساك ماقدر: اتهبي والله.. هاللي ناقص..

ملك العين: بتمين جيه تسبين .. تراني بظهر

احبك لو بغيت انساك ماقدر: خلاص خلاص.. لا تظهر.. تراني اتمصخر وياويهك

ملك العين..: احلى عن ويهج... اقول.. اخر مره سالتيني عن اسم ابويه.. ليش تتخبرين عنه

احبك لو بغيت انساك ماقدر: بس جيه... احب اعرف انا يالسه ارمس منو

ملك العين: ترمسين ملك العين

احبك لو بغيت انساك ماقدر: ادري.. بس ماعرف شي عنك غير اسمك.. اظن حموود J

ملك العين: شو حمود بعد.. جيه طباخكم و انا مادري.. محمد

احبك لو بغيت انساك ماقدر: محمد شو عاد

ملك العين: لازم يعني.. بخبرج اذا انتي قلتيلي شو اسمج

احبك لو بغيت انساك ماقدر: وليش اقولك اسمي بعد

ملك العين: خلاص عيل حتى انا هب قايلج اسمي

احبك لو بغيت انساك ماقدر: برايك.. انزين كم عمرك

ملك العين: 23... وانتي

احبك لو بغيت انساك ماقدر: العمر كله (هب من خاطر ترى) ..

ملك العين: اسميج بلوه... انزين ماخبرتيني كم عمرج

احبك لو بغيت انساك ماقدر: الصدق ولا الجذب

ملك العين: انتي شو رايج.. اكيد الصدق

احبك لو بغيت انساك ماقدر: 20

ملك العين: العمر كله ان شاء الله

احبك لو بغيت انساك ماقدر: تسلم الغالي

ملك العين: لحظه لحظه... شو هاللي قريته.." الغالي".. يا وييييل حاااااالي انا.. اول مره تقولين كلمه محترمه

احبك لو بغيت انساك ماقدر: هه هه هه ..... اسحبها انزين.. بالغلط ظهرت

ملك العين: لا لا لا تسحبينها.. ماصدقت رمستي عدل..انتي ليش جيه ترمسيني.. يعني ليش اطولين لسانج.. اللي يشوفج يقول اني مسوبج شي

احبك لو بغيت انساك ماقدر: مادري,, كيف يعني تباني ارمسك... وبعدين اللسته عندك متروسه بنات.. و اظن كلهن يتفدنك و يغازلنك.. فحبيت اكون غير عنهن.. يعني ماظن حد سبك غيري

ملك العين: ماعاش من يسب محمد الرميثي.. تراني ساكتلج بس لانج غاليه

 

حمده اتفاجأت يوم عرفت انه رميثي... يعني اكيد هو اللي شافته هاك اليوم...فديـــــــــــــــــــــته والله

ملك العين: وينج.. مشغوله

احبك لو بغيت انساك ماقدر: لا لا.. هب مشغوله.. و بعدين ليش تقول اني غاليه

ملك العين: ليش بعد.. لانج غاليه..

احبك لو بغيت انساك ماقدر: هاي رمسه بس... يعني بذمتك كمن وحده قلتلها هالكلمه

ملك العين: وغلاتج .. محد غيرج

احبك لو بغيت انساك ماقدر: تبغني اصدقك يعني

ملك العين: ما طلبت منج انج تصدقيني.. بس اللي اطلبه انج تخليني اعبرلج عن شعوري.. يعني ما يحتاي نسب بعض و نغايض بعض

احبك لو بغيت انساك ماقدر: تراني من الحينه اخبرك.. انا ماصدقك فلا اتعب عمرك و تعبرلي عن شعورك

ملك العين: بس ماقدر اخفي شعوري اكثر عن جيه

احبك لو بغيت انساك ماقدر: عبر شعورك عند حرمتك

ملك العين: تراني يالس اعبرلها الحين...

حمده استحت من رمسته.. يعني هب متزوج... ياااااربي ماغواه و ماحلى رمسته

 

ملك العين: ممكن اعبر !!!

احبك لو بغيت انساك ماقدر: مع اني مابصدقك بس يالله... عبر عن شعورك ..

ملك العين: اهــــــــــــــداء

اخذت قلبي و روحي وشلك بعيني ماتدري انك عيوني اللي اشوف بها..

امشي مع الوقت و طيوفك تخاويني نشوة غرام المحبه من سابيبها..

من سلم الاحباب تامرني و تنهيني و لي عاد بيدك حياتي لا تعذبها..

ذكرك على بالي تطمن لا توصيني النفس وش عذرها فكرك واجبها..

ازعل لزعلك و مايرضيك يرضيني يا بسمة كل حين القلب راغبها..

لي صرت مصدر هنايا و بهجة سنيني كل الصعايب على شانك امر بها...

 

حمده اول ما سمعت الاغنيه استااااااااااانست وااااااايد... فديته والله ... احبه... والله اني احبه..

 

ملك العين: صدقيني انج غاليه عليه... والله اني مادخل الماسنجر الا عشانج انتي..

احبك لو بغيت انساك ماقدر: ..............

ملك العين: صح اني ماعرف شي عنج.. لا اسمج ولا شكلج .. بس مع هذا...

احبك لو بغيت انساك ماقدر:مع هذا شو... !!!!

ملك العين: ارتحتلج ...

احبك لو بغيت انساك ماقدر: هاي الا رمسه... وصدقني عقب بتضحك على اللي يالس تقوله

ملك العين: ماظن

احبك لو بغيت انساك ماقدر: انا متاكده من هالشي

ملك العين: مشكلتج والله

احبك لو بغيت انساك ماقدر: اسمحلي.. انا المفروض من البدايه اسويلك بلوك و دليت بعد

ملك العين: ليش عاد... حرام اعبرلج عن شعوري

احبك لو بغيت انساك ماقدر: لانه شعورك كله خريط.. جذب في جذب

ملك العين: وغلاتج عندي .. والله ماجذب عليج

احبك لو بغيت انساك ماقدر: الظاهر صدق يباللك بلوك محترم

ملك العين: فديتج... و غلاتي عندج.. لا تبتعدين عني

احبك لو بغيت انساك ماقدر: ومن قالك ان لك غلا في قلبي

ملك العين: مادري.. بس حاس انج تغليني.. و ..

احبك لو بغيت انساك ماقدر: و شو بعد

ملك العين: تحبيني!!!

حمده ارتكبت شو شافت الكلمه... هيه والله احبه... هب بس احبه الا اموت فيه...شو اسوي ...

 

ملك العين: السكوت علامة الرضا

احبك لو بغيت انساك ماقدر: حباك الفيل ان شاء الله

ملك العين: مقبوله منج

احبك لو بغيت انساك ماقدر: اسمحلي الصراحه ماظن عقب هالرمسه اروم ارمسك مره ثانيه

ملك العين: ورفجة بو خليفة لا تتركيني... انتي صرتي نص حياتي..

احبك لو بغيت انساك ماقدر: و انت حياتي كلها....

 

وظهرت حمده من الماسنجر .. ماقدرت تكلمه اكثر عن جيه

 

حمده: عنلاتج يا حمدووه... شو سويت انا.. صدق اني خديه... يااااربي .. شو اسوي الحينه...

ودخلت عليها خلود..

خلود: حمدووووه... . وين الشيله اللي خذتيها هاك اليوم عني... حمده شو بلاج.. فيج شي

حمده: ها... مادري.. لا لا ماشي

خلود: بلاج جيه متوتره... جنج مسويه شي

حمده: والله ماسويت شي...وبعدين شو تبين.. ليش يايه.. ماخبرتكم عذوب اني مشغوله

خلود: انزين ما يحتاي تحلفين.. وانا ماشوفج مشغوله..

حمده: لا مشغوله...

خلود: خلا ص انزين... عنبوووج.. جبريت

وظهرت خلود من عند اختها... اما حمده فكانت مرتبكه و تتنافض على اللي استوى بينها و بين الرميثي

 

محمد الرميثي

اما محمد فكان في عالم ثانــــــــــــــــــــــــي

محمد: فديتها والله...

عيسى(ربيع محمد): ايه انت.. وين تتحرى عمرك قاعد.. لا تنسى انه يالسين في الكوفي شوب

محمد: ااااااه يا عيسى

عيسى: انا مادري شو خلاني اقنعك تظهر من حجرتك و تي معايه... جان خليتك تخيس عالكمبيوتر روحك هناك

محمد: عيسى.... احبــــــــــــــــــــــــــها و غلاة والديه احبــــــــــــــــــــها

عيسى: بسك فضحتنا... ادري انك تحبها خلاص

محمد: فديـــــــــــــــــــــــــــــــــــــــــــتها والله

عيسى (وهو يمط محمد برع الكوفي): قم خلنا نظهر.. مافينا عالفضايح

 

ظهر محمد مع عيسى من الكوفي شوب.. و راحوا يتمشون في المول

 

عيسى: بلاك تخبلت وياويهك .. يمعت خلق الله علينا

محمد: شو اسوي.. احبها و ماقدر اخفي حبها في قلبي اكثر عن جيه

عيسى: صدقك ولا تتمصخر

محمد: شو اتمصخر.. اقولك احبــــــــــــــها

عيسى: بس انزين.. محمد طالع .. طالع الغزال اللي واقفه هناك...

محمد: روح لا أي غزال انت بعد...

عيسى: اشهد انك هب صاحي... اقولك طالع الغزال و تقولي روح لا... اثريك تحب صدق

محمد: هب بس احب... الا ميت فيها

عيسى: يا ويلي حالي انا... ميت فيها بعد.. رحت فيها يا بو جاسم

محمد: شفت عاد

عيسى: وهي تحبك

محمد: هيه

عيسى: متاكد

محمد: مادري والله... بس واثق من انها تفكر فيه شرات مافكر فيها

عيسى: صدق انه الحب اعمى.. انزين و انت تعرف منو هاي و بنت منو

محمد: لا والله

عيسى: واونك تحبها

محمد: انا ما يهمني شي.. المهم اني احبها و هي تحبني.. بس تدري اتمنى تظهر شرات اللي شفتها

عيسى: منو تقصد..

محمد: محد....انسى السالفه

عيسى: انزين هب ناوي تعرف عنها شي

محمد: هيه.. بس مادري شقايل.. هب طايعه تخبرني بشي

عيسى: انزين ليش ما تسال عنها

محمد: اسال عنها منو

عيسى: انت خبرتني انها تدرس في الجامعه... وما شاء الله عليك اللسته متروسه عندك بنات الجامعه... اسال أي وحده

محمد: هيه والله فكره...

عيسى: بس عاد هب تفضحها

محمد: شو تقول انت.. اقولك احبـــــــــها

عيسى: بس انزين... لميت الناس علينا

محمد.: هههههههههههههههههههه

عيسى: خلنا نظوي دبي عيل... بات عندي في الشقه و باجر رد العين

محمد: تم

وفي هالوقت كانت ريم عند اخوها فيصل في حجرته

 

فيصل (وهو يالس يعدل غترته): انزين .. متى يعني بتسيرون عند الهنوف و هلها

ريم: كمن مره سالتني هالسؤال.. قلتلك المغيربان..

فيصل: ومنو بيسير..

ريم: لا حووول.... اميه و ابويه و يمكن يدوه و عذووب و خلود

فيصل: وانتي و ختج حمده ليش ما بتسيرن

ريم: بنسير عند ربيعة حمده...

فيصل: منو ربيعتها بعد...

ريم: مهره

فيصل: منو مهره

ريم: تحقيق هو...من قوم السويدي

فيصل: و ليش تسيرن بعد

ريم: شو فيها يعني... ربيعتها و حبت تزورها حرام هو

فيصل: لا هب حرام... انزين خبري ابويه.. تراني بظوي معاهم بيت عمي.. اوكي

ريم: و ليش تسير معاهم

فيصل: انتي وشلج.. خبريه و بس

ريم: انا وشلي بعد... اخاف السالفه فيها إن

فيصل: لا إن و لا لكن... بس جيه كيفي.. حبيت اسلم على حرمة عمي و بناتها

ريم: هذا هو بيت القصيد... بناتها..

فيصل: ريموه.. مالي بارض اسمع سوالفج التافهه هاي.. خبري ابويه و بس...

 

وظهر فيصل من الغرفه... و ركب سيارته.. وجان يرن تلفونه

فيصل: هلا و الله بللي فاضحنا و مسود ويوهنا

عمر: عنلاتك... ماتعرف تسلم

فيصل: ههههههههههههههههههه السلام عليك

عمر: عليك السلام... اشحالك

فيصل: يسرك الحال

عمر: و ابويه و اميه... ربك بخير

فيصل: بخير... بس اميه.. حليلها تصبح و تمسي تتخبر عنك

عمر: فديتها والله.. بعده ابويه مغيظ

فيصل: الا مغيظ... لو يشوفك جان صب البترول عليك و حرقك.. هههههههههه

عمر: محد بينحرق غيرك وياويهك

فيصل: ليش ماتي تتعذر منه

عمر: ياخي عيزت وانا ارمسه.. بو لابس.. مايعبرني

فيصل: والله يا عمر مادري شو اقولك.. محد غلطان غيرك.. عنبوك ماتستحي .. اطلق بنت عمك

عمر: هي اللي طلبت الطلاق

فيصل: وانت هب ريال... من متى الحريم يمشن شورهن عليك

عمر: الطلاق ابركلنا...

فيصل: عيل اكيد انت مسوي شي.. الهنوف.. ما بتطلب الطلاق الا جان انت مسوي شي

عمر: ماسويت شي... وبعدين خلاص اطلقنا و انتهت السالفه

فيصل: وعيالك...

عمر: عيالي بخير و سهاله عند امهم و اكيد بتجابلهم.. و هليه بعد ما بيقصرون فيهم

فيصل: عنبوك.. هذيله عيالك هب عيال اليران... وبعدين لو الكل جابلهم محد بيعوضهم عنك

عمر: فيصل.. الله يخليك غير السالفه

فيصل: انا ماعندي شي اقوله الصراحه.. الكلام معاك ما منه فايده

عمر: انزين .. اميه اليوم في البيت.. بغيتها في سالفه

فيصل: أي سالفه بعد

عمر: بعرس

فيصل: شو

عمر: اقولك بعرس

فيصل: انت بتعرس

عمر: لا خيالي... اكيد انا

فيصل: صدق ما تستحي... اونه ابويه ساير يراضي الهنوف اليوم.. وانت ولا على بالك.. بعرس اونه (وهو يقلد عمر)

عمر: شو اسوي يعني... وبعدين تعال ليش بيراضيها بعد

فيصل: مادريبه.. الاهل بيسيرولها اليوم

عمر: اها...

فيصل: عمر اذا تبغي ابويه يسامحك... روح وياهم اليوم.. روح راضها.. تراها بنت عمك .. من لحمك و دمك وحرام اللي تسويه فيها و في عيالها

عمر: والعرس

فيصل: أي عرس انت بعد... اقولك صالحها تقول بعرس

عمر: حط في بالك.. ان ردت الهنوف او ماردت تراني بعرس

فيصل: ماالت عليك... اتصل في ابويه الحينه... و سو اللي قلتلك عليه

عمر: بفكر...

فيصل: رضا والديك اهم من العرس

عمر: ان شاء الله..بخليك عيل

فيصل: وداعة الله

وقعد فيصل يفكر في اخوه... وفي نفسه.. هو شرات اخوه.. ونفس سوالفه.. بس اذا كان في موقف عمر.. عمره ما بيتخلى عن بنت عمه و عياله... و طار تفكيره عند علياء بنت عمه...وجان يتصل بخليفه

 

فيصل: مرحبااااا ملااااييين ولا يسدن في ذمتيه

خليفة: يا مرحبا بك

فيصل: اشحالك

خليفة: بخير ربي يعافيك

فيصل: بلاك جيه ترمسني .. شويه و بتعفدلي من التلفون

خليفه: هههههههههههههه... لو اروم جان سويتها

فيصل: وينك يالقاطع لا تتصل و لا تنشد عنا. حتى بيتنا ما تقرب صوبه

خليفة: والله اشغال

فيصل/: أي اشغال بعد.. تراني اشتغل معاك .. وادريبك تتهرب

خليفة: لا اتهرب ولا شياته

فيصل: عنبوك متغير من سالفة عمر و الهنوف

خليفة: ....

فيصل: اسمع يا خليفة.. صح انه عمر اخويه بس الهنوف بنت عمي و اعزها شرات خواتي.. ولا تظن انه نحنه راضيين بللي يسويه عمر... بس ها مايمنعك تقطعنا

خليفة: انا ماقطعتكم ولا شي

فيصل: لا والله... من اسبوع ماشفتك ولا رمستك.. حتى في الشغل تتهرب مني..

خليفة: ههههههههه.. تراقبني انت

فيصل: هيه اراقبك... خليفة تراك ولد عمي و اخويه... فلا تخلي شي يخرب علاقتنا.. حتى و لو اخويه

خليفة: فيصل.. ماحيدك تنصح.. احيدك راعي مشاكل

فيصل: ههههههههههه... شفت عاد... خلاص عيل برد شرات قبل بس بشرط

خليفة: أي شرط.. انت تامر امر

فيصل: عشانا عندكم اليوم

خليفة: ليش منو بيخاويك

فيصل: هليه...

خليفة: حتى...

فيصل: هيه حتى عذابه... ياخي مادري على شو تحبها.. ملسونه و ترفع الضغط

خليفة:ههههههههههههههه.. انزين بس انا ماقصدت عذابه.. و بعدين لا تغلط عليها تراها القلب

فيصل: بعدك ماتغيرت

خليفة: لا تخاف.. وعمري ما بتغير

فيصل: يعني .. خلاص... العشا عندكم

خليفة: افا عليك... اكيد عندنا..

فيصل: اشوفك على خير عيل..

خليفة: في امان الله

العصر... ظهرت حمده مع اختها بيت ربيعتها مهره السويدي... اما عذابه و خلود فكانن يتجهزن للروحه بيت عمهن

 

عذابه كانت تعدل شيلتها في الصاله .. وكانت يدتها قاعده عالكرسي اطالعها

اليده: يا حافظ عليج يا بنت عبدالله.. وين سايره انتي عرس..!!

عذابه: لازم اتعدل ..

اليده: هيه لازم... تراه هناك يترياج

عذابه (وهي مستحيه): منو

اليده: منو بعد.. في حد غيره.. خليفه

عذابه سرحت في خليفه.. اخيرا بتشوفه.. من فتره ما شافته.. ولا رمسته.. وهذيج الساعه دخل عليهم عمر

 

عذابه: عمر.......... هلا والله ( وراحت لوت عليه)

عمر: اشحالج عذوب

عذابه: بخير الله يسلمك

عمر: وينه ابويه

اليده: اسمع صوت عمر.!!!!!

عمر: هيه عمر... و راح حب راس اليده .. وقعد حذالها

اليده: فديتك والله.. عنبوك قطعتنا مره وحده.. جنه مالك اهل تنشد عنهم

عمر: تدريبه ابويه

اليده: ابوك هذا طيب... بس انت لو ترمسه بيسمعك..

عمر: تراني ياي ارمسه

عذابه: صــــــــــــــــدق.. يعني بتخاوينا .. يعني بترد الهنوف

عمر: هيه

عذابه: ابووووووووووووووووووووويه...

ام عمر: بلاج تباغمين جيه... وجان تشوف عمر .. عمر نش صوب امه و حضنها

ام عمر: يعلي مانحرم منك يا عمر... جيه يا عمر.. لا تتصل ولا تنشد عنا

عمر: سامحيني يالغاليه... وينه ابويه

ام عمر: الحينه بيظهر...بس عاد لا تم تعانده.. تراه مهما يكون ابوك.. بس حليله قلبه يعوره على بنت اخوه

عمر: ان شاء الله

 

دخل عليهم ابو عمر

ابو عمر: شو اللي يايبنك هنيه..

ام عمر: يا بو عمر.. مهما يكون.. هذا ضناك...

اليده: صدقها سلامه... ابشر عاد.. تراه بيخاويك يراضي حرمته

ابو عمر ( وهو يطالع عمر): تصدقونه انتو.. تراه لوتي

عمر: افا والله يا بو عمر... ( وراح يحب راس ابوه).. براضيها بس عشانك انت

ابو عمر: يابويه تراني ماتمنى غير الخير لك و لخوانك... وهاي بنت عمك و بنت اخويه.. ومارضى عليها حتى لو كان ولديه الغلطان

عمر: سامحني يابويه... بسير اراضيها معاك.. بس اذا ما طاعت لا تلومني..

ابو عمر: شقايل ما بطيع... الهنوف اذا زعلت هذا لانك غالط بحقها

عمر: قلتلك براضيها و بعتذر بعد.. بس لا تزعل مني.. كله ولا زعلك

اليده: بس عاد... خلنا نظوي.. تاخرنا عالعرب...

ام عمر: يالله عيل... عذوب... طاعي اخوج فيصل.. و ازقري خلود

عذابه: ان شاء الله

 

عذابه كانت الوحيده اللي حاسه بفرحه كبيره.. اذا ردت الهنوف كل شي بيرد مثل ما كان.. بس بفرق واحد... انه بتغير معاملتها لخليفه.. وقررت انها توافق عليه اذا رد يخطبها.....

 

وظهرت عايلة عبدالله القبيسي صوب بيت خليفه... ويوم وصلوا كان خليفة يترياهم... واول ما شافه عمر .. سلم عليه و حضنه

عمر: اشحالك خليفه

خليفة: بخير ربي يعافيك

عمر: دووم ان شاء الله هب يووم

فيصل: بنتم برع.. دخلنا البيت انزين

خليفة: ههههههههههههههه... افا عليك بس...

ودخلوا الرياييل الميلس... اما الحريم فراحن الصاله

 

دخلن الحريم الصاله.. و سلمت ام خليفة عليهن

ام خليفة: حيالله بام سلامه... اشحالج الغاليه ربج بخير

اليده: بخير ربي يعافيج... بس عوار الركب اللي ما طاع يفارجني... الحمدلله على كل حال

ام خليفة: الحمدلله... ماتشوفين شر.. هلا والله بام عمر.!

ام عمر: بالمهلي يا ام خليفة.. اشحالج و شو علومكم

ام خليفة (وهي تلوي على ام عمر): بخير و سهاله... علومنا طيبه... العلوم من صوبكم انتو

ام عمر: والله ما من علوم . حيالله علايه.. اشحالج اميه

علياء: بخير الله يسلمج عمووه

خلود: هلا والله بعلياء... اشحالج يالقاطعه

علياء: بخير دامج بخير... انا القاطعه الحينه.. الله يسامحج

خلود:هههههههه... مادري ان الفراق يحلي جيه... محلوه اشوفج

عذابه: يا حافظ عليج يا علايه... قاموا يمدحونج

ام عمر: امبونها علياء يمدحونها... والحلاة الا هو مخلوق فيها

عذابه: يا ويل حالي انا... بس بس... وانا وين رحت

ام خليفة: انتي عاد غير... انتي الحلا كله

علياء+عذابه:ههههههههههههههههههه

اليده: وينها الهنوف عيل..!!

و هذيج الساعه نزلت الهنوف مع عيالها

عبدالله: امي سلاااااااااااااااااااااااااااااااااااااااااااااااا

اااامه..

ام عمر: لبيه يالغالي ( وتقوم تحضنه و تبوسه)... هلا والله بعبدالله... اشحالك حبيبي ..

عبدالله: انا بخير... شوفي امايه (يقصد ام عمر) خالي خليفه شرالي جوتي يديد

ام عمر: حلو... ما شاء الله عليك انت اللي محلنه.. ومنو هاي المستحيه

عبدالله: هاي سلوووووومه

ام عمر: ويديه انا .. سلامه اميه.. بلاج مستحيه

سلامه انخشت ورا امها

الهنوف: اشحالج عموه

ام عمر ( وهي تحضن الهنوف): بخير و سهاله... اشحالج امايه الهنوف.. ربج بخير

الهنوف: بخير و بعافيه...( الهنوف حست بحزن كبير يوم حضنتها ام عمر.. كانت تحبها و تعزها وااايد)

الهنوف: اشحالج يدوه

اليده: بخير ... دامج و عيالج بخير

الهنوف: الله يسلمج و يعافيج

وقامت الهنوف تسلم على بنات عمهاو يلست حذال عمتها ام عمر

ام عمر: ها سلامه... ما بتين تسلمين على يدوه

سلامه كانت من النوع اللي وايد يستحي... والكل يقول انها تشبه عذابه

عذابه: ها عبود... شو حالك؟؟؟

عبدالله: انا عبدالله... انا استويت كبير و رياااااال مثل خالي خليفه

عذابه يوم سمعت طاري خليفة سكتت و ابتسمت

ام خليفة: وينهن عيل ريماني و حمده

ام عمر: راحن يزورن بيت ربيعتهن... ويتعذرن منكم

الهنوف: افا عليج عموه... وبعدين حمدوه وريم دوم يرمسوني...

 

وتمن الحريم يسولفن و يتضاحكن ... عقب راحن الهنوف مع خلود فوق في حجرة الهنوف يسولفن راوحهن...

 

خلود: غاويه والله حجرتج.. الديكور وااااااااااايد حلو

الهنوف: عيونج الحلوه..

خلود: الهنوف... طلبتج... قولي تم

الهنوف: شو هي الطلبه عاد

خلود: انتي بس قولي

الهنوف: خلود.. اذا السالفه فيها عمر.. اسمحيلي

خلود: السالفه كلها اصلا عن عمر

الهنوف: عرفت...

خلود: و كيف عرفتي

الهنوف: واضح اصلا..عيل ييتكم كلكم اليوم اكيد عسب طلاقي من عمر

خلود: انزين مابغي منج شي غير انج تفكرين..

الهنوف: افكر بشو

خلود: تردين لعمر

الهنوف:.............

خلود: شو قلتي

الهنوف: تبين الصراحه... ماقدر اوعدج اني بفكر اردله...

خلود: حاولي تصلحين اللي صار بينكم

الهنوف: اللي ينكسر عمره ما بيتصلح

خلود: يا الهنوف .. ما تتخيلين فراقج عن عمر كيف مأثر علينا...واولهم اخوج خليفه

الهنوف: قصدج خليفة و عذابه... انا رمست خليفة و قلتله اللي استوى بيني و بين عمر ما بياثر عليه

خلود: تراها الا رمسه... بس ما تشوفين خليفه كيف متغير

الهنوف: خلود... اتحملت اخوج 5 سنين... اول شي لانه ولد عمي... وعقب قلت ابو عيالي... وعقب عسب ابوج و امج و هليه... بس الحينه ماقدر اتنازل اكثر... والله ماقدر

خلود: والله فاهمتنج.. بس يمكن اللي بينكم بيتصلح و بيرد احسن عن قبل

الهنوف: قلتلج اللي انكسر عمره ما يتصلح.. و عمر جرحني جرح اندفن في قلبي .. وصدقيني عمره ما بيطيب

خلود: عمر اتغير

الهنوف: اتغير عليكم انتو و بس.. لكن انا .. شعوره تجاهي ما بيتغير

خلود: تراه اليوم ياي يراضيج

الهنوف: هههه يراضيني... صدقيني يسوي هالشي لانه ابوج او امج غاصبينه

خلود: مادري شو اقولج

الهنوف: مابغيج تقولين شي

خلود: والله تهمني مصلحتج... وانا اشوف احسن لو تعطينه فرصه

الهنوف: يا ما عطيته فرص.. مع هذا مافتكر ولا حس ولا اهتم.. انتي ما تعرفين شو اللي بينا.. انا عمري ما شكيت لحد او حتى ظهرت همومي لاي حد فيكم.. حتى اختي

خلود: انزين فكري في عيالج

الهنوف: والله فكرت فيهم... و اظن ان ابوهم وجوده او عدمه واحد... شو اللي يجبرني اعيش مع انسان مثله وانا في ايدي الحل اني اعيش حياة ثانيه

خلود: شو يعني.. ما تبغينه

الهنوف: اخوج ما بيتاثر بغيابي او بغياب عياله.. تراه عايش حياته.. محد قاله شي... وليش انا ماختار الحياه اللي ابغي اعيشها..

خلود: ..........

الهنوف: خلاص يا خلود.. انا تغيرت .. هب شرات قبل ارضى و اسكت... لانه كل اللي اسويه ما منه فايده.. والله لو احس انه عمر بيتغير صوبي هب بس برجعله.. الا اعتذر منه مع انه هو اللي غالط علي

خلود: انزين شو اللي صار بينكم هاك اليوم

الهنوف: ما صار شي

خلود: ممممممم يعني هذا اخر قرار لج...

الهنوف: هيه... عمر مستحيل ارجعله في يوم... خلاص يا خلود.. ماروم اتخيل حياتي مع هذا الانسان.. والله ساعات اقعد روحي و اتم افكر.. كيف قدرت استمر معاه 5سنين كيف ضيعت حياتي و دراستي علشان واحد مثله.. استحملت منه كــــــــــل شي... ما اتذكر يوم يا وقالي اتولهت عليج... ماذكر يوم قالي ناقصنج شي او تبين اييبلج شي.. حتى عياله مايهتم فيهم او حتى يلاعبهم .. تراه جدام عيونكم .. جد شفتوه في يوم ظهر عياله او حتى لاعبهم.. ( سكتت يوم غمرها الحزن لانها اذكرت كل اللي مرت به)

خلود:.............

الهنوف: هههههههههه تصدقين اذكرت سالفه... مره يوم مرض عبدالله .. وحالته وايد كانت صعبه.. المهم اتصلت بعمر عالساعه 10 الفليل...قلتله الولد تعبان و خبرته اني بروح مع الدريول المستشفى.. عصب و قالي ماظهر معاه روحي الفليل.. ما كان عندي حد اروح معاه... قلتله انكن راقدات و محد بيروح معايه و الولد تعبان... قالي هو روحه بييني... تعرفين الساعه كم وصل البيت ...!!! الساعه 1 الفليل.. مع انه كان قريب من البيت... المهم ظهرت معاه.. ورحنا المستشفى ويوم وصلنا .. قلت له بتشله ولا انا اشله .. لانه ما بيروم يمشي.. تتوقعين شو قالي..!!!

خلود:.........

الهنوف: قالي انزلي روحج... اتخيلي .. حطي نفسج مكاني... استغربت.. حتى ولده هب قادر يشله و يدخل معايه المستشفى و ينشد عن حاله او يتخبر عن صحته... نزلت روحي و شليت عبدالله و دخلت به عالدكتور و قالي المفروض يرقدونه .. قعدت اتريا برع .. وانا اشوف كل وحده تمشي مع ريلها و عيالهم في ايدهم.. حتى الهندي... الهندي يمشي حذال حرمته و شال بنته الصغيرونه و يتخبر الدكتور عن حالها... وانا ريلي قاعد في السياره يتسمعله اغاني.. و انا هلكانه داخل المستشفى مع ولديه.. شو تتوقعين من واحد مثله.. هاي تصرفات اب.. الصراحه عيشتي بدونه احسن بوايد من اني اعيش معاه

خلود: الهنوف.. عمر تغير

الهنوف: حتى لو تغير مابغيه.. يا ناس انا عفته خلاص... استحملت منه كل شي... ما يهتم فيه قلت ما عليه.. ما يجابل عياله برايه... يغازل جدامي .. قلت خله على راحته يمكن عقب يحس.. كل يوم و الثاني اشوف صوره بنيه في شنطتة.. سكت ولا قلتله شي... بس انه يمد ايده.. ماقدر ماقدر اسكتله او حتى ارضى بهالشي

خلود: عمر ضربج !!!!!!!!!!!!!!!

الهنوف: هيه.. هاك اليوم مد ايده عليه ولا عشان منو... عشان الخايسات اللي يرمسهن... خلود رضيت بكل انواع المهانه و الذل بس انه يمد ايده عليه... لا و الف لا...انا هليه عمرهم ما مدوا ايدهم عليه.. في الاخير انضرب من واحد ما يستاهل كل اللي سويته له..ولا وانضرب لسبب تافه..((( سكتت و حاولت تمسك الدموع اللي في عينها)))

خلود: سامحيني يالهنوف... سامحيني على خطا اخويه... ومعاج الحق في اللي بتسوينه.. وصدقيني محد بيلومج.. وهاي حياتج و انتي حره فيها

 

Link to comment
Share on other sites

الهنوف: هاللي بغيته اسمعه منج....

 

دخلت عليهم علياء...

علياء: ها خلصتوا ولا بعدكم

الهنوف: هيه خلصنا... في شي...

علياء: بيحطون العشا الحينه

الهنوف: يالله نازلين الحينه

علياء: خلود فيج شي

خلود: لا فديتج... بنيكم الحينه

 

 

في بيت مهره السويدي...

مهره : ما شاء الله عليج يا ريم... اسميج سوالف

ريم: بعدج ما شفتي شي

مهره: بلاها اختج... حمده فيج شي

حمده: لا ما شي( وهي اصلا تفكيرها عند محمد.... ))

ريم: هاي اختي جيه... تيها ساعات حلات مستعصيه

مهره: هيه والله لاحظت هالشي

 

وسمعوا صوت هرن السياره

حمده: ريماني بدال هالطنازه روحي طاعي اذا الدريول وصل ولا لا

مهره: بعدكم... تو الناس

حمده: لا فديتج... ابويه بيسكت.. بس اميه شو اللي بيسكتها

ريم: ليش انا

حمده: بس جيه.. لانه محد غيرج هنيه

ريم: اوووف.... انزين مادل

مهره: لفي على ايدج اليمين و بتشوفين البلكونه... طلي و طاعي اذا ووصل ولا لا

ريم: يالله امري لله... حكم القوي عالضعيف

وظهرت ريم عنهن...

حمده: بغيت اخبرج شي

مهره: خير

حمده: تذكرين محمد

مهره: اللي في الماسنجر

حمده: في غيره يعني

مهره: لا محد.. بلاه انزين

حمده: ظهر هو اللي شفته هاك اليوم في بيتنا

مهره: صدق

حمده: هيه... قالي انه اسمه محمد الرميثي و من العين

مهره: اها.. وانتي ليش تتخبرين عنه

حمده: بس جيه

مهره: يعني مافي شي بينكم

حمده: مادري

مهره: مادري بعد...الله يستر عيل

 

ريم عقب ما ظهرت من الصاله..

و هي تمشي كانت تغني لين ماوصت صوب البلكونه...

كل ما نادى فؤادي قال له لبيك..تامر عيونك حبيبي خادمك في ايديك

لو بغيت العمر خله العمر يفديك.. ما سمعت عذال حبك وش قالوا فيك

 

و جان تسمع صوت من وراها....

ويوم لفت شافت واحد.. انصدمت .. وخت راسها .... (( ما شاء الله عليه غاوي)).. وبسرعه شلت عمرها و سارت الصاله

 

حمده: ها الريم... وصل ولا بعده

ريم: ها.... مادري

حمده: شو ما تدرين..

ريم: مهره... ش .. ش شفت واحد برع... مادري منو

مهره: لحظه بسير اطالع

وردت مهره وهي تضحك...

مهره: هذا اخويه سهيل.... حمده ترى دريولكم وصل

ريم:وصل... زين عيل... يلا حمدوووه خلنا نظوي بسرعه

حمده: بلاها هاي ينت.... الله يهديج بس

 

وظهرن البنيات من بيت ربيعتهن... وريم اتغير حالها...

وفي السياره

حمده: ريماني بلاج... شو فيج؟؟

ريم: والله بموت... شو هاللي يستويلي .

حمده: انزين هذا موقف عادي.. شو فيها يعني اذا شافج.. وبعدين بالصدفة هب متعمد

ريم: ولا كنت يالسه اغني بعد

حمده: تغنين !!!!... جيه بيت ريلج هو تغنين فيه

ريم: بس عاد لا تذكريني... قلبي شوي و بيظهر من صدري...

ريم تمت تفكر بالريال اللي شافته.... اسمه سهيل السويدي... اخو مهره... وسيم و جذاب و ما عليه كلام... بس شو بيكون موقفه من ريم...!!!

وحمده طبعا سرحانه بمحمد... يا ترى يحبني شرات ما احبه.. او بس يلعب مثل غيره من الشباب!!!

 

 

في بيت خليفه القبيسي

تعشوا الحريم في الصاله و الرياييل في الميلس و عقب العشا....

 

ام خليفة: الهنوف تعالي بغيتج في سالفه

الهنوف ان شاء الله..

وراحت الهنوف عند امها صوب الممر...

ام خليفة: ترى عمر يبغي يرمسج

الهنوف: ليش

ام خليفة: مادريبه... روحي طاعي شو يبغي منج

الهنوف: اميه الله يخليج لا تفتحيلي السالفه مره ثانيه... وبعدين هو هب ريلي عسب ارد ارمسه... واللي بينا انتهي و مستحيل....

بس ام خليفه ما عطتها الفرصة تكمل

ام خليفة: فديتج امايه... عشان خاطري... روحي شوفيه و اقعدي معاه يمكن الله يهديكم و يتصلح اللي بينكم

الهنوف: ماقدر...

ام خليفه: انزين عشان خاطر عمج...لا تكسرين بخاطره.. حليله متلوم فيج.. وانتي ما بتخسرين شي.. الا هن خمس دقايق

الهنوف: ان شاء الله

ام خليفة: تراه يترياج في الميلس الثاني

الهنوف هزت راسها ...وراحت عنها امها... وجان تمشي صوب الميلس اللي قاعد فيه عمر.. و وقفت عند الباب... الحينه بتفتح الباب و بتشوفه.. بتشوف اللي كسرها و ذلها و اهانها.. ((ااااااااه كيف اقدر اشوفه ))

وفتحت الباب و شافته يطالع اللوحه و عاطنها ظهره اتحرت انه ماحس بها.. و جان تغير رايها ويت بتظهر من الميلس

عمر: اشحالج الهنوف

الهنوف: بخير..( وردت دخلت و لايمت الباب.. ماحبت تصكه)

عمر: دوم هب يوم ان شاء الله

الهنوف: .....

عمر: اظنج تدرين ليش ياي ارمسج اليوم

الهنوف: ....

عمر: الهنوف ..انا اسف على اللي صار بينا... وصدقيني هاك اليوم ماكان قصدي امد ايدي.. بس انتي اللي استفزيتيني... عالعموم اعتذرلج مره ثانيه.. واتمنى انج تنسين اللي استوى و ترجعين...

الهنوف: ارجع!!! بكل سهوله تباني ارجع

عمر: شو تبيني اسوي

الهنوف: مابغيك تسوي شي... لانك اصلا حتى لو سويت انا اللي ماافكر في يوم ارجعلك

عمر: انزين تراني اعتذرت لج.. شو اسوي اكثر عن جيه

الهنوف: قلتلك لا تسوي شي... وبعدين احيدك تذكر اللي قلتلك ياه اخر مره..

عمر: اباج تنسين اللي استوى اخر مره.. خلنا نرجع... وبحاول اتغير

الهنوف: بتحاول.. يعني هب اكيد

عمر: الهنوف .. انا ياي اعتذر لج و اصالحج... فما يحتاي ترمسيني بهالاسلوب

الهنوف: عمر.. اسمعني عدل.. حط في بالك شي واحد... انا مستحيل في يوم ارجعلك.. خلاص عفتك.. وماتخيل في يوم اقعد معاك في الحجره رواحنا.. تصدق الحينه وانا يالسه ارمسك احس بعمري مختنقه.. هب قادره ارمسك او اقعد معاك .. خلاص ماروم استحملك.. وماظنك ترضى تعيش مع وحده ما تعتبرك شي في حياتها..

عمر: كيفج.. انا هب ياي اغصبج على شي... وانتي حطي في بالج انا ياي اراضيج بس عسب خاطر ابويه.. مابغيه يزعل مني... انا سويت الا عليه.. بس الظاهر انتي اللي ماتبين تصلحين اللي بينا

الهنوف: صدقك.. مابغي اصلح الي بينا... لاني مابغيك اصلا...

ودخل عليهم ابو عمر

ابو عمر: حيالله الهنوف.. الغاليه بنت الغالي

الهنوف( وهي تحب راس عمها): الله يحييك عمي.. اشحالك؟؟

ابو عمر: يسرج حالي...ها عمر رمست بنت عمك

عمر: هيه

ابو عمر: شو قلتي الهنوف؟؟ تراه عمر مايسوى شي بلياج... و البيت بدونج وبدون العيال ما يسوى

الهنوف:......

عمر: بلاج ساكته ارمسي... ماترومين تعيدين الكلام اللي قلتلي اياه

ابو عمر: خير بلاكم

عمر: ابويه... انا سويت اللي طلبته مني... بس بنت اخوك هي الي رافضة... وانا اللي ما يباني مره.. مابغيه الف مره

ابو عمر: صدق اللي يقوله عمر يالهنوف!!!! بلاج ساكته... ردي عليه

الهنوف: هيه...

ابو عمر: ليش عاد... تراه اذا غلطان بيعتذرلج... و ان شاء الله اللي تبينه بيسويه... بس رديلنا يا بنيتي.. عشان خاطري .. عشان خاطر عيالج

الهنوف: عمي... تراك حسبة ابويه... واظن تتمنالي الخير و السعاده

ابو عمر: اكيد

الهنوف: ولدك مابغيه... و ماظن اروم ارجعله مره ثانيه... وانا مستانسه على هالوضع... واذا تهمك سعادتي حتى انت بتتقبل هالشي... عمي فديت روحك... لا تزعل من رمستيه... بس ابغي اعيش حياتي بعيد عن عمر... وعيالي تراهم عيالك.. وما بيصيبهم شي دامك معانا .. صح ولا لا

ابو عمر : صح... برايج... سوي اللي يريحج.. ماقدر اغصبج على شي... بس بتم حسبة ابوج.. واللي بينقص عليج خبريني

الهنوف ( وهي تحبه على راسه): فديت روحك والله... يعلي مانحرم منك يالغالي

 

ونشت الهنوف و ظهرت من الميلس و هي حاسه بفرحه كبيره... كانها انتصرت على عمر..

اما عمر فاستغرب من موقف الهنوف.. ماتوقع في يوم انه بتكون جريئه لهالدرجه.. ماتوقع منها هالرد..

دخلت الهنوف الصاله وشافت الكل متيمع.. حتى فيصل و خليفة

ام خليفة: وينه عيل عمج و عمر

الهنوف: يايين

ودخل ابو عمر وهو زعلان و مضايج ..

عبدالله( ولد عمر): يدي... متى بتودينا الدكان؟؟

ابو عمر (وهو يبتسم): قلتلك باجر يابويه... ما شاء الله عليك ما نسيت سالفه الدكان

خليفة: وين ينسى الدكان هذا... غربلني والله كل يوم و الثاني مطيح عند الدكان... حتى راعي الدكان مل من شوفتيه

 

علياء( وهي تصاصر عذابه): وابويه عليه... الدكان مل من شوفته... وفي ناس يتمنون نظره منه

عذابه: لا والله

علياء: هيه والله

عذابه: سكتي انزين فضحتينا

 

ابو عمر: انزين عيل نترخص الحين

خليفة: تو الناس عمي... قاعدين

ابو عمر: لا يا بويه.. باجر ورايه درب صوب العين...

فيصل: هيه .. صح والله.. نسيت السالفه... ها خليفة ترى باجر بنسير صوب علي الرميثي.. بتخاوينا؟

خليفة: تم يا ولد العم

 

وهم ظاهرين من البيت....

كانت عذابه تسلم على ام خليفه.. والهنوف و علياء... ووصلت عند خليفه

عذابه: مع السلامه....

خليفة ماصد صوبها كان يرمس خلود... وعقب انتبه..:مع السلامه

عذابه حطت في خاطرها من موقف خليفة... طول اليلسه ما رمسها او حتى صد صوبها ويايه بتقوله شي ..بس سكتت..

خليفه: عذابه شي في خاطرج

عذابه: من تغلى يا حبيبي ما ترجيناه... و من تعدانا ترانا قبل صده راحلين... ( روحت عنه عقب ما خلته متفاجا من رمستها)

 

اما فيصل فكان يسولف مع بنت عمه علياء.. وطول الوقت يضحك معاها ...

فيصل: خلاص عيل...اشوفج على خير

علياء: فيصل

فيصل: عيونه

علياء (وهي مستحيه): اتحمل على عمرك

فيصل: قصدج اتحمل عليج

علياء: لا على عمرك

فيصل: تراج عمري

علياء بغت تموت يوم سمعت رده... و بسرعه دخلت داخل و تمت ورا الباب.. وفيصل ضحك عليها...

 

سلمت الهنوف على عمها و حرمته.... و البنات و اليده.. وفيصل... بس عمر ماسلمت عليه او حتى شافته.. وهو طول الوقت كان يطالعها.. ماتوقع انها بتتغير بسرعه....!!!

 

Link to comment
Share on other sites

الجزء الثاني عشر

ومرت الايام و حالة عمر و الهنوف مثل ما هي... عمر حاول كمن مره يرمس الهنوف بس هي هب طايعه ترد عليه.. و عقب فتره قرر عمر يشغل تفكيره بالعرس و العروس اليديده

اما خليفة .. اضايج وايد من رمسة عذابه اخر مره.. كان وده يصرخ باعلى صوته و يقوللها احبـــــج بس حس انه بيذل اخته قبل ما يذل نفسه... و علاقته بفيصل مثل ما هي .. ماتغيرت ابد.. بالعكس.. فيصل قام يزورهم دوم .. بس عسب يشوف علياء...

حمده... ما دخلت الماسنجر من اخر مره.. كانت تستحي ترمسه عقب الكلام اللي صار بينهم.. بس محمد عكسها تماما.. زادت ساعات قعدته عالنت بس عسب يرمس حمده.. استغرب من جفاها.. بس قرر يسوي أي شي عسب يعرف منو هي...

 

عيسى: ياخي ذليتنا تراك.. احبها و احبها.. جنه محد حب و عشق غيرك

محمد: يا عيسى انت ماتدري بللي فيني.. اتخيل اسبوع ما رمستها ولا عرفت عن حالها والله انشغلت عليها.. اخاف انها تندمت يوم اعترفت لي بحبها..

عيسى: وانت عاد ماسرع ماصدقتها.. يا بويه هاي لعبة يهال.. شرات ما انت عندك مليون بنيه في اللسته .. تراها شراتك.. جيه ماعندها غيرك انت يعني..

محمد: شو قاعد تقول..!! تخبلت.. هاي شكلها بنت ناس و ماظنها شرات ماتقول.. وبعدين هي من اول مارمستني و اسلوبها زفت.. يعني هب راعية شباب و مغازل

عيسى: والله مادريبك.. ترى يقولون الحب اعمى

محمد: روح لا... برد البيت ابركلي

عيسى: ليش عاد.. بلاك انت غادي جبريت.. الا هي رمسه

محمد: امحق رمسه.. يلا فداعة الله

 

رد محمد البيت.. وجان يشوف ابوه

ابو محمد: محمد.. وينك اليوم عن الشغل

محمد: انشغلت شوي

ابو محمد: شو انشغلت بعد.. انت ماتدري انه الشغل في المصنع زاد..

محمد: ادري

ابو محمد: يوم انك تدري ليش ما تجابله

محمد: بجابله

ابو محمد: حوووه.. بلاك مستخف جيه.. رد عليه عدل

محمد: شو اقول يعني..

ابو محمد: غربلك الله من ولد.. ماجد انتفعت منك

محمد: في شي ثاني ولا لا...

ابو محمد: ليش .. بتسير تجابل الكمبوتر

محمد: هيه

ابو محمد: لازم هيه.. شو وراك انت غير المغازل و الصياعه

محمد: أي مغازل بعد

ابو محمد: هب في المكينه.. اللي يسمونها الكمبوتر بنيات

محمد:هههههههههههههههه هيه

ابو محمد: تضحك بعد يا مسود الويه

محمد: شو اقولك عيل.. ابويه فديت راسك.. مالي بارض اتواجع اليوم

ابو محمد: انزين لا تنسى.. بنظوي يوم الخميس دبي

محمد: ليش

ابو محمد: اغازل معاك.. ليش بعد.. بنسير عند عبدالله القبيسي.. بنشوف الخارطه اللي يابها .. مالت الشغل

محمد سرح بالبنيه اللي شافها في بيت القبيسي.. و بسرعه اذكر راعية الماسنجر..

محمد: خلاص.. انت تامر وبس.. برخصتك

ابو محمد: الله يهديك بس.. مادري بلاك متغير هالايام..

 

دخل محمد حجرته و شغل النت و دخل الماسنجر..بس طبعا ما حصلها اون لاين.. دخل الحمام و تسبح و تلبس.. و جان يسمع صوت الماسنجر.. نقز و ربع صوب الكمبيوتر .. بس هب هي اللي كانت داخله.. شاف وحده كان يرمسها من فتره.. تعرف عليها في الماسنجر و اطورت علاقتهم لين التلفون.. العلاقة بينهم عاديه.. بس من جهة البنيه كانت تفكر في الماديات اكثر...

 

ملك العين: هلا والله

البدر: هلا و غلا

ملك العين: اشحالج الغاليه؟

البدر: الحينه عاد غاليه... وينك من فتره .. اتصلبك و تلفونك مقطوع

ملك العين: اسمحيلي كنت مسافر..( يجذب عليها طبعا)

البدر: اها

ملك العين: انتي شو اخبارج.. بعدج تدرسين

البدر: هيه بعدني...

ملك العين: زين والله... في جامعة زايد صح

البدر: الظاهر نسيتني .. اشوفك ماتذكر شي عني

ملك العين: افا عليج.. حد ينسى .. ( يحاول يذكر اسمها بس ماقدر.. من كثر البنات طبعا) حد ينسى البدر.. اقولج الغاليه .. بغيت اطلب منج طلبه..وان شاء الله ماترديني

البدر: شو

ملك العين: بغيت اسال عن وحده تدرس في جامعتكم

البدر: شو شايفني بداله.. وانا شو عرفني في بنات الجامعه

ملك العين: سبحان الله يمكن تعرفينها

البدر: ليش تتخبر عنها ..!!شو اللي بينك و بينها

ملك العين: ماشي. بس حبيت اعرف شي عنها

البدر: اها... عاد انا ماسوي شي مجانا

ملك العين: ادريبج.. لا تخافين انا كريم مع اللي يستاهل

البدر: وانا استاهل.. انزين من هي البنيه

ملك العين: ماعرف شي عنها .. غير ايميلها

البدر: ايميلها عاد.. يلا بنحاول

ملك العين: هذا ايميلها ***********

البدر: خلاص عيل .. بنسال عنها

ملك العين: بترياج عيل اون لاين

البدر: الحين!!!!!!!!!!!!!

ملك العين: هيه

البدر: هيه بعد... ايه انت اصبر عليه عالاقل اسبوع

ملك العين: واااااااااااااااااال اسبوع عاد.. قولي يومين

البدر: شو يومين... قلتلك اسبوع.. واذا ماتبغي برايك..

ملك العين: خلاص خلاص.. اسبوع

 

وظهر محمد من الماسنجر.. و جان ينسدح عالشبريه.. وتم يفكر بحبيبته... اسبوع.. اسبوع بس و بيعرف من هي اللي ذبحته بحبها و بكلامها...!!!!!!!!!

في البنك

خلود قاعده في مكتبها و جان يرن تلفونها

خلود: مرحبااا الساااااع

الهنوف: هلا و الله

خلود: هلا و غلا.. شو هالمفاجاه الحلوه

الهنوف: الله يحلي ايامج ... اشحالج؟؟

خلود: بخير وسهاله... العلوم من صوبكم

الهنوف: والله ما من علوم.. اشحال هلج..!!

خلود: بخير ربي يعافيج... الكل مرتبش .. يتريون تخلص امتحانات ريم عسب نسافر..وينهم الصغاريه عيل.. ماسمع لهم حس

الهنوف: امايه راحت بيت خالتيه.. فشلتهم معاها..

خلود: هيه زين عيل... خلهم يتكشتون شويه

الهنوف: المهم خلود.. بغيتج في سالفه

خلود: خير

الهنوف: الخير في ويهج.. شو رايج تتغدين عندنا اليوم؟؟

خلود: تم.. بترخص من هليه و بييكم..

الهنوف: خلاص عيل... اشوفج على خير

خلود: وداعة الله

 

شويه و جان يدخل عليها...(( عبدالعزيز))

عبدالعزيز: السلام عليكم

خلود: عليك السلام و الرحمه..

عبدالعزيز: اشحالج

خلود: الحمدلله

عبدالعزيز:......

خلود ( وهي اطالعه تترياه يقول شي):.......

عبدالعزيز:.........

خلود: خير .. في شي... ابويه مارمسك وقالك لا تي الشغل مره ثانيه؟؟

عبدالعزيز: هيه رمسني

خلود ( وهي موخيه راسها): عيل ليش ياي اليوم...

عبدالعزيز:........

خلود: بتم جيه ساكت يعني...

عبدالعزيز: بغيت اقولج شي

خلود: خير

عبدالعزيز: خلود... انتي تدرين اني من زمان احبج..

خلود انحرجت من هالكلمه اول مره يقوللها..

عبدالعزيز: و خاطري اقضي عمري كله معاج.. ويوم ييت خطبتج اول مره ما وافقتي لاني هب مكمل دراستيه و ماشتغل.. كملت دراستي و اشتغلت بس عشانج انتي.. ورديت خطبتج بس رفضتيني لانج تبغين تشتغلين.. اول شي رفضت.. بس عقب اقتعنت بس لاني مابغي اخسرج... و اشتغلتي.. و بعد ييت خطبتج .. بس ماو افقتي.. ولين يومج ها ماعرف شو هو السبب

خلود: ماعرف شو اقولك

عبدالعزيز: مابغيج تقوليلي شي.. قولي حق ابوج.. خلود. صح اني حبيتج و طول حياتي بتم احبج.. بس كل شي له حدود.. و كرامتي نزلتها لين ريلج بس مع هذا مارتفعت في عينج...وانا .. انا ما ظن اقدر اسويلج اكثر عن جيه

خلود: شو قصدك

عبدالعزيز: ان شاء الله الاسبوع الياي برد اخطبج.. و مابغي اعرف ردج الحينه.. بتريا ردج عند ابوج.. و صدقيني ان ما حصل بينا نصيب ما بتسمعين اسمي طول حياتج و بظهر من حياتج شرات ما دخلتها

خلود:......

عبدالعزيز: ترى القرار بايدج انتي... و اسمحيلي يالغاليه اذا في يوم ازعجتج.. ولا تلوميني على اللي سويته و اللي ضايقج مني... لا تلومين اللي يحبج.. باع عمره و حياته و اشتراج انتي... ولا تلومين هالقلب ( وحط ايده على قلبه) ترى الذنب الوحيد اللي ارتكبه انه يحبج...

خلود (( هب مستوعبه اللي يالس يقوله عبدالعزيز)))

عبدالعزيز: مع السلامه

خلود: الله يحفظك ((( قالتها يوم ظهر عنها عبدالعزيز ...)))

ارتكبت خلود .. ماعرفت ترد عليه يمكن لانه اللي قاله صح... خلود وايد اهانته ... تتحراه شرات اخوها.. بس عبدالعزيز عمره ما بين لها انه يكرهها او حتى في يوم غايظها... بالعكس كان يسوي كل اللي تبغيه و تطلبه منه.. وقعدت تفكر في كلامه... الاسبوع الياي بيي يخطبها و لاخر مره... يعني الاسبوع الياي لازم تحدد مصيرها مع عبدالعزيز..

عقبها اتصلت بامها تترخص منها عسب تتغدا عند قوم خليفه...

 

في المدرسه.. الظهر

 

حصة: الحمدلله بنفتك... عقب اسبوع اجازة الامتحانات

ريم: يتفتكين من شو... اتخيلي انج شهر بتدرسين و بتحفظين الكتاب

حصة: هيه والله صدقج.. اقول .. هب جنها هيفاء اللي يايه صوبنا

ريم: سكتي انزين و سوي عمرج ما شفتيها

هيفاء: مرحبا

ريم: مراحب

هيفاء: اشحالكن

ريم: عنبوج الدوام خلص و توج تسالينا عن حالنا

هيفاء: لا فديتج... هب انا اللي انشد عن حالكم.. بس شو بنسوي بللي يتعذبون برع

ريم:.......... ( وتمت اطالع هيفاء بنظرات كلها حقد و كره)

هيفاء: ريم.. هب حرام عليج تعذبينه جيه... حرام تكسرين بخاطره

ريم: هوايتي كسر الخواطر... و انتي عاد شو خانتج.. داويهم بمعرفتج

هيفاء: ومن قالج اني ماحاولت.. بس شو نسوي بالقلب.. تراه ما يهوى غير وحده

ريم: احيدج حرامية قلوب.. ولا غيرتي مهنتج

هيفاء( وهي معصبه): الله يسامحج.. هب راده عليج.. هاي يزاتي اني حبيت اساعدج

ريم: لا الغاليه ساعدي عمرج اول شي

هيفاء: والله مادري على شو حابنج...

ريم: منو هو

هيفاء: اونج ماتدرين

ريم: ياختي من كثرهم... شو اسوي.. اقول حصة.. اظن الا درويلنا برع... بترخص عنكم.. يالله في امان الله...

 

وظهرت عنهم ريم... و كانت متغشيه.. وطبعا مثل كل يوم شافت الريال متفيزر عند باب المدرسه.. واول ما ظهرت ريم شغل المسجل...

 

شفت غر مكتسي سحر و دلال ما خلق مثله شبيه في الورى

من حسن يوسف خذ اوصاف الجمال و العجب شفته و عيني ما ترى

ما رات عيني مثل هذا الغزال و لا سمعت بوصف مثله ينطرى

يمشي و مشيه بخفه و اعتدال مانكبر لو هو مشى فوق الثرى

 

 

و هي تمشي صوب السياره حست بانه حد وراها و فجاه وقفت يوم شافته وقف جدامها... من الزياغ طاح الملف اللي في ايدها و يت بتشله طاحت الغشوه... و يت عينها في عينه..

 

.....: اشحالج

ريم:........

.......: ممكن تاخذين هالورقه

ريم: وانت ممكن تذلف

.......: هب ساير لين ما تاخذين الورقه

ريم: لو سمحت ما يحتاي تفضحني

.....: والله كيفج.. انا هب متحرك لين ما تاخذين الورقه ( وجان يمد ايده),, و اسمحيلي.. كنت ناوي اييبلج قلبي بدال الورقه.. بس ما دريت انه حبي بيشدني صوبج اليوم

ريم ( وهي مستغربه من رمسته).. جان تشل الورقه و تمشي صوب سيارتهم و ركبت السياره و قلبها يدق بسرعه من الزياااغ.. اكيد البنات كلهن شافنها... شو بيكون موقفها عقب هاليوم .. حطت ايدها صوب ثمها وكانت تقرض ظفورها.. وجان تشم الريحه.. ريحه حلوه.. و اذكرت الورقه اللي في ايدها.. فتحتها

 

للباب عيني و قلبي للقا حارس

ارقب متى النور في لحظه يوافيني

يكفيه وجه المسا في مقلتي عابس

و النور بعضه تكسٌر في سما عيني

ودي من النور يحيي غصني اليابس

ويوقظ الشوق و يصحي محبيني

 

سيف الكعبي (******** -050 )

ريم تمت تتنافض يوم قرت الرساله... اسمه سيف... حلو و حتى اسمه حلو شراته.. وجان تبتسم عاللي صار بينهم.. و فجأه رجع الخوف لقلبها... ((( شو اللي يالسه افكر فيه.. لا لا هب حلو ولا شي.. شكله مغازلجي شو ابا فيه... بس ليش يلحقني.. اكيد يحبني... أي حب و أي خرابيط.. ريموووو نشي وبسج من هالاحلام.. تعيبين على عذابه و غديتي شراتها.. بس يمكن يحبني !!!!)))))

 

وصلت ريم البيت و جان تشوف ابوها و امها في الصاله

ريم: السلام عليكم

ابو عمر+ ام عمر: عليكم السلام و الرحمه

ابو عمر: ها ريماني.. شو الدراسه معاج اليوم

ريم: اوكي

ابو عمر: شو يعني اوكي.

ريم: يعني اوكي

ام عمر: فيج شي اميه..تشكين من شي

ريم: ها... لا لا مافيني شي.. بس ميته من اليوع

ابو عمر: عساه الموت بعيد عنج... تعالي اقعدي حذالي تعالي

((ابو عمر كان يحب ريم وااااااايد و اكثر عن عياله الباقيين... و هالحب كان واضح بس محد من اخوانها او خواتها اضايج .. لانها كانت اصغر اخوانها و احلاهم...))

حطت ريم شنطتها عالكرسي و راحت قعدت حذال ابوها

ابو عمر: فديتج والله... شوفتج انتي تغنيني عن الدنيا كلها..

ريم: ابويه

ابو عمر: لبيه

ريم: الله لا يحرمني منك.. ولا من امايه

ابو عمر: يعني ماعندج شي ثاني تقولينه.. ماعندج أي طلب.. تراهن عيوني لج

ريم: فديت عيونك يابويه.. لا الغالي.. ما عندي أي طلب.. ولا اقولك خلني افكر يمكن عقب تيني فكره و خاطري انفذها

ابو عمر: ههههههههههههههه.... انتي بس تطلبين و نحنه نقول لبيه

ام عمر: بسك عاد لا ادلعها ترى الدلع هالايام ماينفع

ريم: وليش مايدلعني... هب ضناه.. وبعدين قولي انج تغارين لانه يدلعني و مايدلعج

ابو عمر: ههههههههههههههههههههههههههه

ام عمر: حسبي الله عليج ... قومي روحي حجرتج وغيري ثيابج.. وتعالي تغدي.. وبسج من هالرمسه الماصخه

ابو عمر: يلا ريماني... خلنا نتغدا.. و ترى السفره قريب ان شاء الله

ريم: واللــــــــــــــــــــــــــه يعني بنسافر

ابو عمر: اذا الله راد

ريم (وهي تبوس راس ابوها): فديتك والله

ابو عمر: بس ها... لا تنسين النسبه العاليه

ريم: ان شــــــــــــــــــــــــــــــــــــاء الله.. امايه وينها يدوه عيل

ام عمر: في حجرتها.. تجهز عسب تسير العين.. عند خالتج

 

 

دخلت ريم حجرتها و قعدت تفكر ... ابوها وامها يحبونها اكثر عن اخوانها... و جان تسرح بسيف الكعبي ظهرت الورقه من الملف.. ((( ماقدر افكر فيه... هليه يحبوني و يثقون فيه و ماقدر اخون ثقتهم.. واكيد هذا لعاب حاله حال غيره من الشباب))).. و جان تمسك الورقه وبغت تقطعها.. بس عقب غيرت رايها و خشت الورقه في دفتر و حطته في السده.. وقررت انها توقف الريال (سيف الكعبي) عند حده.

 

بيت خليفة القبيسي

 

ام خليفة: يا مرحبا بج والله... شو حالج؟

خلود: والله الحمدلله يسرج الحال...

ام خليفة:وشو الشغل معاج ان شاء الله مرتاحه

خلود: هيه مرتاحه.. ولو انه ساعات تعب.. بس احسن من قعدة البيت

الهنوف: صدقج والله... قعدة البيت ارف.. مليت الصراحه

ام خليفة: ويديه انا.. ترى الحريم من استون و مكانهن البيت..لكن بنات هالايام هب عايبنهن شي

الهنوف: يا امي.. الزمن تغير... و بعدين هب عيب الوحده تشتغل

ام خليفة: قولي جيه من الصبح... خلود تراها بنت عمج انعفس حالها .. مادري بلاها ينت تخبلت مادري..

خلود: ههههههههههههههه تخبلت .. ليش عاد

ام خليفة: اونها من يومين تطري سالفة الشغل

خلود ( وهي تصد صوب الهنوف): تبين تشتغلين

الهنوف: هيه

ام خليفة: هيه بعد... يا انج مستخفه او فاصخه الحيا.. عنبوج ما مدالج من فتره مطلقة و الحينه تبين تشتغلين.. شو بيقولون الناس عنج.. فارطه!!

الهنوف: شو فارطه عاد.. و الزواج قسمه و نصيب.. وما حصل بيني و بين عمر النصيب و اطلقنا.. و الشغل قلتلج هب عيب

ام خليفة: لا حول ولا قوة الا بالله... خلود رمسيها انا راسي بينفجر و السبه سوياتها.. لا تبغي تعقل ولا تبغي ترجع لريلها و الحينه تبغي تشتغل... بسير حجرتيه ابركلي

 

وتنش ام خليفة عنهن

خلود: صدق بتشتغلين

الهنوف: هيه.. ليش انتي هب مقتنعه بهالشي

خلود: لا بالعكس.. بس عيالج منو بيجابلهم

الهنوف: عيالي عند امي.. وانا اذا بشتغل بسرح الصبح و برد الظهر... وبعدين عبدالله بيكون في هالوقت في الروضه.. و سلامه بتم عند امايه

خلود: انتي مقتنعه بسالفة الشغل

الهنوف: هيه مقتنعه.. واظنج اول وحده بتشجعيني لانج روحج تدرين بالملل اللي احسبه في البيت.. ولو اني هب مقتنعه جان ما رمستج

خلود: ليش يعني

الهنوف: ابغيج تساعديني

خلود: شقايل

الهنوف: دوريلي شغل بمعرفتج

خلود: بس..

الهنوف: بس شو... قصدج عمر!!

خلود: هيه عمر.. تدرين يوم اني اشتغلت مارضى و لين الحينه هب راضي بس ابويه اللي مساندني.. ولو يعرف انج بتشتغلين...

الهنوف ( تقاطعها): عمر ماله خص فيه.. هب زوجي .. فماله الحق يدخل في حياتي.. واذا كان قصدج انه حد مساندنج.. ترى اخويه خليفة ما بيقصر.. صح انه ابويه متوفي.. بس اخويه بعده عايش.

خلود: لا تفهميني غلط.

الهنوف: فاهمتنج عدل... و مثل ما قلتلج عمر ماله خص و ان ادخل في حياتي انا اللي بوقف في ويهه و بمنعه.. عيل لو عرف اني اتعلم السواقه شو بيسوي

خلود: تسوقين

الهنوف: هيه

خلود: ههههههههههههههه

الهنوف: ليش تضحكين

خلود: اتخيل شكل عمر لو عرف

الهنوف: ههههههههههههه والله انج متفيجه.. المهم اباج تساعديني..

خلود: بحاول ان شاء الله.. بس بشرط.. ماتخبرين حد اني انا مدورتلج الشغل

الهنوف: ان شاء اللــــــــه من عيوني.. خلود.. فيج شي.. اشوفج سرحانه .. شو اللي شاغلنج.. لا تقولين عبدالعزيز

خلود: انتي شو عرفج

الهنوف: والله انه تخمين... يعني صدق عبدالعزيز شاغلنج.. في تقدم عيل

خلود: أي تقدم واي خرابيط انتي بعد

الهنوف: عيل ليش تفكرين به

خلود: اليوم ياني الشغل

الهنوف: شي عادي هب اول مره و اكيد انتي كالعاده رغتيه

خلود: لا والله.. صح اني مارمسته عدل بس مارغته

الهنوف: وليش جيه مرتبكه..

خلود: ها

الهنوف: شو اللي صار بينكم و جلب حالج

خلود: قالي...

الهنوف : شو قالج كملي

خلود ( وهي تصيح): صدقيني انا ماكرهه... بس اخاف اخاف يصير حالي شرات حالج بس مابغي اخسره ادري انه يحبني و متعلق في.. حتى انا تعلقت فيه.. تعودت اشوفه عندي في المكتب .. والله استانس بس ماقدر ابين له شعوري .. اخاف يقص عليه او حبه لي ينتهي في يوم.. بس اليوم تاكدت اني ابغيه و اريد اتزوجه.. و اح..

الهنوف: و ...!!!

خلود: احبه

الهنوف: هههههههههههههههههههههه

خلود: ليش تضحكين

الهنوف: يا ويل حالي على اللي يحبون من ورانا

خلود (وهي مستحيه): بسج عاد

الهنوف: يوم انج تحبينه ليش تكابرين بعد... انزين شو قالج اليوم

خلود: قال انه بيخطبني

الهنوف: والحين الدموع هاي لانها بيخطبج.. هب جنج قبل شوي قلتي احــــــــــــــــبــــــــــه

خلود: وطي صوتج انزين

الهنوف: ابا اعرف شو المشكله الحين

خلود: قالي ان رفضته هالمره .. بيبتعد

الهنوف: شو يعني بيبتعد

خلود: بيظهر من حياتي شرات ما دخلها

الهنوف: المفروض هالشي يستوي من زمان

خلود: لا والله

الهنوف: هيه والله.. عيل ذليتيه لين ما قال بس و ما تبينه يبتعد

خلود: انزين شو اسوي الحين

الهنوف: بعدج تسالين.. انتي تبينه ولا لا

خلود:....

الهنوف: ياربي.. هب وقت مستحا... يا هيه يا لا

خلود( بصوت واطي): هيه

الهنوف: انزين خلاص عيل.. يوم بييج ابوج ويسالج عن رايج قولي هيه

 

ويدخل عليهم خليفة ومعاه فيصل

خليفة: السلا م عليكم... اوه.. القمر هني و انا مادري

خلود: عليك السلام........ شفت عاد.. حبيت انورلكم البيت اليوم

فيصل: بيتهم امبونه منور بوجود ( وجان يذكر علياء).. هله.. شو تسوين هني

خلود: حبيت اسلم عليك.. من يومين وانت مختفي عن البيت و متفيزر هني

فيصل: اوه اتولهتوا عليه

خلود: واااااايد

الهنوف: ههههههههههههههه... تراه هو اللي مونسنا هاليومين

خليفة: اشحال هلج؟؟

خلود: بخير... ينشدون عنك

فيصل: حووه.. هب توك تسالني عن هليه.. و ليش ترد تسالها

خليفة: كيفي.. حرام هو

 

وجان يرن تلفون فيصل..

فيصل: ها... تنشد عن.... (قصده عذابه) و هااتصلت.. الو

عذابه: هلا فيصل

فيصل: هلا عذوب.. خير

((خليفة اول ما سمع اسمها فز قلبه.. تذكر حب حياته.. تذكر كم يسوى اسمها))

عذابه: ترى الدرويل هب في البيت.. راح العين يودي يدوه

فيصل: والمطلوب

عذابه: شو المطلوب بعد... مر علينا

فيصل: مافيه الصراحه

عذابه: لا والله.. عيل نخيس في الجامعه..ماقلتلج علياء هذا فصول ما منه فايده

فيصل: لحظه لحظه... منو معاج انتي

عذابه: حمده و علياء بنت عمي

فيصل: اها.. عيل دقايق و بكون عندكن.. يلا بااااي

 

فيصل: يالله بترخص عنكم.. بسير اييبهم من الجامعه..

الهنوف: تعال... ترى عليا بتي معاكم

فيصل: مادري (اونه يسوي عمره مايدري)

خلود: وانا اقول ليش

فيصل: (وهو يطالعها بنص عين) خلود... ما تبين تسيرين البيت

خلود: برد البيت المغرب

فيصل: برايج عيل.. ها خليفة بتخاويني

خليفة: مادري والله

فيصل: صدق ماعندي سالفه اسالك... يلا اترياك في السياره

 

وهذيج الساعه ظهروا عيال الهنوف عبدالله و سلامه.... سلامه كانت تلحق عبدالله لانه ماخذ لعبتها

سلامه: مامــــــــــــــــــــــــــــــــــــــــــــا .. ابا ثوره( الصوره)

الهنوف: عبود.. ليش ماخذ لعبتها

عبدالله: كيــــــــــــــــــــــــــــفي

فيصل ( وهو يمسكه من رقبته): عبود... شو هذا عيب عليك هاي ختك

عبدالله( وهو يضحك و مستانس من الحركه): الله انــــــــــــــــــــــــــا اطــــــــــــــــــــــــــــــــير... انا سوبـــــــــــــــــر مـــــــــــــــــــــــــان

فيصل: صدق ماعندك سالفه.. شرات خالك الخديه

خليفة: محد خديه غيرك

عبدالله: عمي خديه

خلود: هههههههههههههههههههههههه.. حلوه

فيصل: لا تقول عمي خديه... ولا بصفعك

عبدالله: عمـــــــــــــــــــــــــــــــــــــي خديـــــــــــــــــــــــــــــــه

الهنوف+ خلود+ خليفة: ههههههههههههههههههههههههههه

الهنوف: تستاهل ما ياك..هههههههههه

فيصل خذ اللعبه من عند عبدالله و عطاها سلامه

فيصل: فديت اللي يستحي انا.. خذي الثوره( يقلدها)

سلامه: وهي تستحي... ثكرا( شكرا)

فيصل: ثكرا عاد.... تعالي انزين عطيني بوسه

سلامه باست عمها.. جان يربع عبدالله و عض فيصل على خده

فيصل: ااااااااااااااااااااااااااخ... قم عني يالسبال

خليفة:ههههههههههههههه... تستاهل والله

فيصل: حشا هب ولد...من وين يايبينه هذا..?

وظهر فيصل مع خليفه بيسرون الجامعه علشان ياخذون عذابه وحمده وبنت عمهم علياء..وكان فيصل واااااااااااايد مستانس لانه بيسير بيشوف بنت عمه علياء. اما خليفه فكان مستانس بس ما حب يبين هالشي..ويوم وصلوا الجامعه... ركبن حمده و عذابه و علياء

حمده+ عذابه+ علياء: السلام عليكم

خليفة+ فيصل: عليكم السلام

حمده: اوه.. وانا اقول بلاها السياره منوره.. اثري خليفة فيها

علياء: جيه حد قص عليج وقالج انه اخويه مولد كهرباء

فيصل: ههههههههههههه لا بجلي

خليفة: لا والله...

فيصل: اتمصخر انزين ... انت سوق و طالع جدام وانا بسولف اوكي.. اشحالج علياء.. ربج بخير

علياء: بخير الله يسلمك..

فيصل: دوووووم هب يووووم

حمده( وهي تصاصر عذابه): طاعي اخوج اللوتي.. هب هين والله

 

وعذابه ماردت عليها.. كانت في عالمها الخاص.. تمت تفكر في خليفه و كانت يالسه ورا فيصل.. و علياء ورا اخوها.. وحمده في النص بينهن.. تمت عذابه تفكر في موقف خليفه معاها.. ماسالها عن حالها شرات قبل ولا حتى رمس معاها بكلمه.. ((ااااااه يا خليفة.. هنت عليك كيف قدرت تقسى علي .. كيف قدر قلبك يقسى على حبيبه... المسافه بينا قليله و انت كانك بعيد عني اميال..عقلك بعيد عني و قلبك ماعاد يباني..)).

 

وخليفة.. كان يحس باحساس عذابه.. وكان عايش في عالمها.. بس محد يدري عن الثاني.. كان طول الوقت يتامل وييها من المنظره.. (((( فديتج يالغاليه.. فديت عيونج.. ابيع عمري وحياتي واكون لحظه.. بس لحظه معاج.. اتامل فيها ويهج واصرخ باعلى صوتي و اقول احبج يا اغلى ناسي... )) وتذكر حال اخته و عيالها و السبب عمر.. مايقدر يسامحه على سواه في اخته.. حتى لو كانت الهنوف راضيه بهالوضع. هو هب راضي .. هب راضي تكون اخته مطلقه)))

 

فيصل: خليفة...حووووووووووووووووه .. حط شي.. خلنا نسمعلنا شي

خليفة: الشرايط جدام حط اللي تبغيه

حمده: خلنا نسمع شله من شلات خليفة

علياء: هيه والله فكره

حمده: حط هاك الشريط اللي هناك

فيصل: عكيفج هو

حمده (وهي تحيس ثمها): شو فيها يعني

علياء: هيه فيصل حط الشريط اللي اشرت عليه حمده.. فيه اغنيه ميحد و خليفة يشلها

فيصل: من عيوني

حمده تمت اطالع علياء بنظره و صدت ترمس عذابه بس شافتها سرحانه و حالتها حاله... ابتسمت حمده من هالموقف.. علياء ترمس فيصل و مستانسه عليه... و عذابه تفكر في خليفه و متعذبه عشانه.. و جان تبتسم يوم اذكرت محمد... (( فديته والله تولهت عليه واااااااااااااااايد))

 

لا تذكرني بحبك يا غناتي.... و لا تذكرني بماضيك الجميل

في صدا ذكراك بجزر حياتي... مستحيل احب غيرك مستحيل

أنت عمري و أنت أغلى ذكرياتي... و أنت في قلبي ولا غيرك خليل

أنت عيني اللي بها شفت البهاتي و أنت لي في مقلة عيوني نزيل

لو تقضى عمرنا الوردي و فاتي و انقضى وانزاح شرواح المليل

تصبح الأطلال في فكري و ذاتي والضمير تعيش لا يمكن تحيل

 

 

عذابه يوم سمعت الشريط.. حست انه الكلام لها هي.. و جان تتغشى عسب محد يحس بدموعها.. و خليفة نظراته كلها عند عذابه و شاف الدمعه الي نزلت من عيونها.. بس نزل راسه.. اول مره يشوفها تصيح.. والسبه منو.. منه هو.. ((( اجتل عمري و لا اشوف الدمعه في عينج يا عذابه)))

 

شو تتوقعون بيصير بين عذابه و خليفة؟؟؟

ومحمد الرميثي بيعرف عن حمده؟؟؟ وشو بتسوي حمده في علاقتها مع محمد؟؟؟

و ريم... شو بتسوي مع سيف؟؟؟

 

 

 

 

Link to comment
Share on other sites

الجزء الثالث عشر

 

بعد اسبوع...

في العين

 

كان محمد الرميثي كالعاده قاعد عالكمبيوتر و فاتح الماسنجر على امل انه يشوف (حمده) و جان يرن تلفونه

محمد: مرحبا ملاااااااااايين و لا يسدن في ذمتيه

......: هلا والله

محمد: هلا و غلا

.......: هاالملايين اكيد وراهن شي.. هب بلاش

محمد: افا عليج... لا الغاليه تراهن ببلاش.. المهم شو الاخبار من صوبج.. بشري .. عساج سويتي اللي طلبته منج

.....: اكيد... انت تامر و بس... بس عاد لا تنسانا

محمد: خليني احصل اللي ابغيه و صدقنيني مابقصر فيج

.......: وشو للي تبغيه

محمد: اسمها

.......: خمن

محمد: لا حول... هب وقته عاد..خبريني شو اللي عرفتيه عنها... شو اسمها و كم عمرها..

......: ماتبغي تعرف اذا كانت حلوه ولا لا

محمد: مايهمني الحلا... بس ابغي اعرف شو اسمها

........: الحبيب غارق و ذايب فيها... والصراحه البنيه تستاهل

محمد: اسمها؟؟؟؟؟؟؟؟؟؟؟

.......: حمده

محمد: فديتها والله

......: تتفداها بعد تراني من الحينه اخبرك.. هاي بنت عرب .. وماسمعت عنها الشين..و لا تحاول تلعب معاها لانها هب من النوع اللي انت متعود عليه... وماظن بتعبرك بعد

محمد: اكيد اتفداها... هاي القلب الله يسلمج. و انا اظن اعرفها عدل و اكثر منج... انزين كم عمرها... 20 !!!

.....: هيه عشرين

محمد: الله يخليها لاهلها.. انزين وانتي شو عرفج بها

........: بعد ربك... من كبرها الجامعه

محمد: وشو عرفتي بعد... ماعرفتي جبيلتها

........: ليش ان شاء الله... ناوي تخطبها...

محمد: هيه بخطبها

.......: صدق

محمد: صدق... وانت تحيديني اجذب... تراني احبها و اموت عالتراب اللي تمشي عليه و انا يوم نشدتج عنها بس عسب اعرف هيه بنت منو.. و باجر بيوصلج خبر خطوبتنا

..........: يا حافظ عليك يا ولد الرميثي... ثرك هب هين.. تعرف تحب بعد

محمد: شو نسوي عاد... قلتلج ملكتني و صرت في هواها سجين...احبها ايه والله اني احبها .. و حبها انغرس في قلبي و جرى في دمي.. وصارت في حياتي كلها...

.......: اوف اوف... الله عليك يا محمد... الله يهنيك .. عاد لا تنسانا

محمد: ربع ساعه و جيكي على رصيدج.. بس خبريني هيه بنت منو؟؟؟

....... بنت عبدالله القبيسي

محمد ( وهو منصدم): اللي ساكن في ..*****...

........: هيه

محمد: متاكده

.......: اكيد

محمد........

..........: وينك... شو استوابك

محمد: لا ماشي... يالله فداعة الله

 

وصك محمد عنها و تم منصدم يوم عرف عن حمده........ سبحان الله يالدنيا... ظهرت حمده هذيج اللي شافها هاك اليوم في بيت القبيسي... و دخل عليه ربيعه عيسى

 

عيسى: ايه انت بلاك ماترد يوم اتصل بك... اكيد ترمس في الخط الثاني.. اكيد ما بتودر سوالف المغازل حتى وانت عاشق

محمد: عيسى

عيسى: خير

محمد: اباها

عيسي: منو اللي هي تباها...( وجان يتلفت حوله)

محمد: بنت القبيسي

عيسى: هاي ضحيه يديده بعد

محمد: لا ... اللي ذبحتني بغلاها

عيسى: يا ويل حالي انا ... يابويه ما تركب عليك سوالف الحب و العشق

محمد: اقولك خلاص... ابغيها و الحينه بظوي صوب ابويه و بقوله ابغي اعرس

عيسى: ههههههههههههه اشهد انك ينيت

محمد: اذا ما خذتها بين و بتخبل... بسير عند ابويه و برجع... اترياني هني في المكتب

عيسى: اصبر انزين... لا تتسرع... خلنا نتفاهم

محمد: بعدين بعدين...

وظهر محمد و راح صوب ابوه... و هو حاط في باله انه يتزوج وياخذ حبيبة قلبه.. ((( حمده)))

ودخل على ابوه.....

محمد: ابويه

ابو محمد ( وهو منشغل بالاوارق اللي جدامه): ....

محمد: ابويه بغيتك في سالفه

ابو محمد: خير

محمد: الخير في ويهك ان شاء الله

ابو محمد ( رفع راسه): اول مره اشوفك ترمس وانت متادب و صووتك واطي .. تقول ساير تخطب

محمد: هيه

ابو محمد: شو هيه

محمد: نويت اخطب

ابو محمد ( نزل راسه و يقرا الاوراق): زين

محمد: شو زين

ابو محمد: زين اللي قلته

محمد: ابويه تراني ارمسك جد... ابغي اعرس

ابو محمد (رد رفع راسه): عرس انزين حد ميودنك...

محمد: ماشوفك مستانس

ابو محمد: ادريبك... ساعه و بتغير رايك

محمد: لا والله... مابغير رايي... خلاص نويت اعرس و اكمل نص ديني

ابو محمد: شو تشوفني خطابه... عندك العيوز روح خبرها و هي بتخطبلك احلى بنيه في العين

محمد: ابغيك انت تخطبلي...ومابغي وحده من العين

ابو محمد: عيل.. من وين..من حيدرباد

محمد: أي حيدرباد الله يهديك... من دبي

ابو محمد: وانت شو عرفك بها

محمد: ها... لا ماعرفها .. بس اعرف هلها.. تراهم ناس طيببين و عيال عرب

ابو محمد: منو..؟؟

محمد: قوم القبيسي...

ابو محمد: أي قبيسي... اللي بيشاركونا في المشروع

محمد: هيه...

ابو محمد: ناس و النعم فيهم... بس عاد

محمد: لا بس و لا شياته.. وانت روحك قايل انك بتظوي صوبهم بالخميس.. خلاص عيل.. بتروح تخطبها

ابو محمد: ومن هي...تعرفها

محمد: وانا شو عرفني... انت بس قول تم

ابو محمد: ( وهو يبتسم): تــــــــــــــــــــم

محمد ( وهو يحب راس ابوه): يعلي مانحرم منك يابويه...

وظهر من عند ابوه و راح مكتبه...

عيسى: مابغيت تظهر... بشر... صفعك ولا داس على راسك.. ولا رفسك في بطنك...لا لا اكيد خش الخيزرانه في عيونك و ظهرها من خشمك

محمد ( وهو ساير صوب الكمبيوتر): صدق انك متفيج

عيسى: لا تقول وافق

محمد: اكيد بيوافق... حد بيرد محمد الرميثي

عيسى: محمد.. من صدقك انت.. ها عرس هب لعبه

محمد: ادري

عيسى : وانت شو عرفك عن البنيه.. اللهم عمرها حتى اسمها ماتعرفه

محمد: ابشر... خبرها وصلني اليوم

عيسى: ما شاء الله عليك يوم تبغي شي توصله

محمد: عيل

عيسى: وهيه بنت منو

محمد: مابتصدق

عيسى: عادي... بصدق أي شي..

محمد: بنت عبدالله القبيسي

عيسى: لا لا.. اخت خليفة

محمد:لا ... بنت عمه على ماظن...

عيسى: اب اب... مين قدك يا عم... الله يهنيك عيل

محمد: ان شاء الله.. اتصدق يا عيسى.. عمري ماتمنيت شي في حياتي شرات ماتمنى اخذها و اقضي عمري كله معاها

عيسى: يا سلاااام عليك... وانت شو عرفك انها بتوافق عليك... تعال تراني جد سمعت انه خليفة خاطب بنت عمه... و محيرنها من فتره

محمد ( وهو صاد صوب عيسى): قول والله

عيسى: والله

محمد: لا تقول

عيسى: مادري... هاللي سمعته

محمد: يمكن حد من خواتها

عيسى: ويمكن تكون هيه

محمد سرح بتفكيره... يمكن تكون حمده مخطوبه.. وعقب ما حصلتها و لقيت وحده سكنت في قلبي و بدلت حياتي .. تروح عني و افقدها..لا .. لا مستحيل... حتى لو خاطبنها باخذها... حمده لي انا .. انا وبس... و فتح الماسنجر.. و انتفض قلبه يوم شافها اون لاين

 

ملك العين (محمد): هلا يالغلا كله.. هلا بللي له الروح ترخص.. هلا بللي على بالي.. هلا بللي احبه مووووووت

حمده يوم قرت الكلام ابتسمت... و حطت ايدها على قلبها حست بدقات قلبها اللي تزيد... و كانت ايدها تتنافض و مارامت تكتب شي

ملك العين: وينج يالغاليه... تعبت و انا اطرشلج ايميلات وانتي لا رد ولا خبر...فديت روحج طمنيني عليج.. خذتي روحي و قلبي و تركتيني بليا قلب و بليا روح.. بربج كيف اعيش دونج

احبك لو بغيت انساك ماقدر ( حمده):.........

ملك العين: خلاص .. لا تردين عليه... خليني اكتب و اظهر اللي خاطري ..اباج تعرفين اني احبج... والله احـــــــــــــــــــــــــــبــــــــــــــــــــ

ج.. اهداء لج...

انا بالحب خصيته و جرحي من سبب ذاته بديع الشان من بيته و يسكن في اماراته

ولو يحصلك منيته ولو لحظه ملاقاته اخذ قلبي ولا ريته خطير زاد خفقاته

على دقات تصويته خفو من مناداته رماني يوم لاجيته نهار من ملاقاته

عيانه نجل جسيته كمال و ورد وجناته برمش العين اخزيته بوسط الروح ملياته

لجل عيناه داريته شرات الشوق مدراته والهوى من تعنيته يفرض كل اراداته

 

حمده كانت منصدمه من موقف محمد... مادرت الشوق بيضنيه و يتعبه.. مادرت احساسه شرات احساسها صوبه.. مادرت انها ملكت قلبه مثل ما هو ملك قلبها

 

احبك لو بغيت انساك ماقدر: اشحالك

ملك العين: حالي؟؟؟ لا تسالين عن حال واحد يبات ليله وهو متعني... يفكر في محبوبه اللي جفاه.. مادري هذا دلع ولا هجر

احبك لو بغيت انساك ماقدر: يمكن دلع

ملك العين: واهون عليج... بس ما عليه... برضى منج أي شي... ان شكيتج على قلبي اشتكى قلبي غلاج.. و ان شكيتج على عيني.. هلت الدمعة تبيج

حمده عاد محد قدها... شوي و بطير.... حست انها خلاص.. هذا الانسان هو اللي دخل قلبها.. هذا اللي تحبه مووووووووووت

احبك لو بغيت انساك ماقدر: لا تظن ان طال غيابي نسيتك.. لا والله مانسى من توده عيوني

ملك العين: طلبتج قولي تم

احبك لو بغيت انساك ماقدر: تم

ملك العين: قلبج هذا اصبح لي انا... تراني ملكته شرات ما ملكتي انتي قلبي... و طلبتج.. لا تعطينه لحد غيري... طلبتج يالغاليه... ارفقي بحال مضنونج... لا تبيعيني.. تراني شارنج

 

حمده مافهمت شو الي كان يقصده...

احبك لو بغيت انساك ماقدر : (((((( احبك لو بغيت انساك ماقدر)))))))

 

و ظهرت حمده من الماسنجر لانها بتروح البيت... اما محمد.. فكان مقرر انه يوم الخميس بيظوي صوب قلبه و بيخطبها... بس اللي كان مخوفنه انها تكون محيرة لولد عمها....

 

في المدرسه...

 

حصة: ريـــــــــــــــــم دريولكم وصل... يالله

ريم ( وهي تسلم على ربيعاتها): يالله بنات... اشوفكن على خير ان شاء الله... ذاكرن عدل.. تراها ثانويه عامه..

حصة: ريم اتصدقين بتوله عليج

ريم: طاعي اللواته... هب جنه متفقين انذاكر رباعه

حصه: هههههههههههههه

ريم: يالله بظهر... حصة... ممكن طلب

حصه: ادري,,, تبيني اظهر و اطالع اذا كان العاشق موجود

ريم: شو عاشق بعد.. بس تدرين مابغي انحرج اكثر عن جيه.. والله ادري انه البنات يرمسن عني..

حصه: ماعليج منهن... بسير اطل و بييج........

 

حصة: الله يعينج... تراه متفيزر برع

ريم: اوف اوف اوف اوف...

حصه: ههههههههههه بلاج...

ريم: بموت قهر منه

حصه.: خله يولي.. اتغشي و اركبي سيارتكم بسرعه.. والمشكله دريولكم يوقف السياره بعيد.. مادري ليش

ريم: انا ادري

حصه: ليش

ريم: لانه ثور.. يالله برخصتج

 

وظهرت ريم من باب المدرسه و طبعا كالعاده سمعت تعليقات البنات عليها... عصبت من هالموقف المحرج اللي دوم يستويلها.. و هي ماشيه كانت موخيه راسها.. و نزل سيف من السياره.. و يا صوبها.. ريم وقفت يوم حست انه ياي صوبها... كان واقف جدامها

سيف: سهير الليل و السبه القمر... مارضى ينور ليلي ...

ريم ( كانت معصبه و ييها منتقخ من الغيض)

سيف: ليش يالغلا ... ليش ما تحنين على واحد يموت فيج

ريم ماقدرت تستحمل رمسته اكثر... وخاصه انه البنات يسمعن اللي يقوله

سيف: معقوله ماحسيتي فيني... ولا مافمهتي شعوري .. اسمحيلي اذا خانتني الحروف.. ترا كلامي يضيع بشوفتج

ريم: كلامك اللي يضيع ... والا انت امبونك ضايع ..

سيف اول مره يسمع ريم ترد بهالطريقه

سيف: ضايع بحبج

ريم: يعلك طول عمرك ضايع .... بتخبرك شو تشوفني جدامك بتانيه مافهم...

سيف: متى بتحسين فيني.... اذا تبين بييبلج قلبي و بحطه ين ايدج

ريم: اذا يبت قلبك تعرف وين بحطه

سيف: وين.... حذال قلبج

ريم: لا طبعا.... بجطه تحت نعالي.. و تصدق حتى ماتنزل اخيس نعالي بقلب واحد مثلك.. صايع و لا بعد ضايع.. اقول... اجلب ويهك احسن... ولا اظن امبونه مجلوب... من كثر ماصدنك البنات... تتحراني ميته عليك... لا والله... ماتشرف ابد ارمس واحد مثلك.. ماتشرف اخيس سمعتيه مع انسان تافه شراتك... ولو سمحت شل قلبك... تراني دسسته لــــــــــــــــــــــــين ما قلت بس

 

ومشت ريم صوب سيارتهم و كانن عذابه وحمده في السياره و سمعن اللي صار بينها و بين سيف لانه صوتها كان عالي... كانت تقصد تعلي صوتها عسب يسمعونها.. وتحطله حد...

اما سيف كان الود وده الارض تنشق و تبلعه... حس بغصه و ماعرف ينطق بكلمه... اول مره في حياته تحرجه بنيه ولا جدام الخلق كله.... ورفع راسه و جان يشوف البنيات في المدرسه يتضاحكن عليه... و شل عمره و ركب سيارته وروح

 

في سياره ريم...

عذابه: ريم... انتي ما تستحين .. شو ها اللي سويتيه

ريم:..........

عذابه: لو درا حد من هلج تعرفين شو بيستويبج..!!! والله ليذبحج عمر

ريم:.............

حمده: صدقها عذابه يا ريم... عيب اللي سويتيه... هزأتي الريال...خليتيه مايسوى شي..

ريم:.........

عذابه: بلاج ساكته

وفجاة انفجرت ريم من الصياح.... كانت طول الوقت ماسكه عمرها

عذابه وهي تحضن ريم: بلاج تصيحين

حمده: ريم فديتج... لا تصيحين.. بس اللي سويتيه غلط

ريم: شو غلط... تدرين انه هذا من شهر و هو يلاحقني.. فاضحني في المدرسه و بين البنات.. كل يوم والثاني حاطلي اغنيه و .. ويفر عليه رقمه... ذلني.. تعرفون شو يعني ذلني... فاضحني ( وتمت تصيح)

عذابه: شو تقولين انتي... جان خبرتي ابويه

حمده: خبله انتي...شو تخبر ابويه... خلاص ريم ما حصل الا الخير

ريم: ادري اللي سويته غلط.. بس ماقدرت استحمل رمسته.. حبيت اهينه و اخليه يحس بالاهانه شوي..

عذابه: خلاص... انسي السالفه...و شرات ماقالت حمده.. ماحصل الا الخير

 

 

وصلن البنات البيت... و دخلت ريم حجرتها... و عذابه وحمده سارن الصاله و شافن ابوهن وامهن

عذابه+ حمده: السلام عليكم

ابو عمر + ام عمر: عليكم السلام والرحمه

ابو عمر: وينها غناتي.. وينها ريماني عنكن

حمده: راحت حجرتها

ابو عمر: شقايل جيه... هيه ماتدخل حجرتها قبل ماتسلم عليه

عذابه: تعبانه شوي

ام عمر: بلاها

عذابه: راسها يعورها

ابو عمر: فديتها والله.. ام عمر قومي طاعي بنتج... خلنانوديها المستشفى

حمده: يا حافظ عليج يا الريم.. عوار الراس يباله مستشفى بعد.. نحنه يا ما هلكنا من الحمه و الكحه و الزجام وما تودونا المستشفى الا عقب اسبوع

ابو عمر: ههههههههههههههه... فديتج يا حمدوه... بس ريماني ماتتحمل

حمده: يعني نحنه اللي قابلين للصدمات...

عذابه: امايه وينها خلود

ام عمر: في المطبخ

حمده: غريبه.. احيدها ترد من الدوام وسيده ترقد

ام عمر: ماراحت الدوام اليوم

عذابه: ليش

ابو عمر: بيونا عرب

عذابه: منو... قوم عمي

حمده: محد عرب الا قوم عمي...

عذابه: جاب انتي... منو بيينا

ابو عمر: هل عبدالعزيز المزروعي

حمده: لا حوووول... ردينا... لازم يتقفط يعني.. مايفهم انه البنيه ماتبغيه

ام عمر: شو هالرمسه بعد...ادعن انتن الله يهديها بس

ابو عمر: انا حاس انه هالمره بتوافق

حمده: تحلمون انتو... خلود توافق !!! مستحيل

عذابه: لا ماظن... صدقه ابويه... عيل ليش اليوم داخله المطبخ

حمده: هيه والله... احيد اخر مره يانا ... شردت من البيت وراحت السوق

عذابه: ههههههههههههههه... تذكرين... احيد يوم نحوط وياها في السيتي هاك اليوم... تقولين عيوز مضيعة ناقتها

ام عمر: صدق انكن متفيجات... عذوب.. سيري ساعدي اختج في المطبخ

عذابه: ليش عذوب... و حمدوه ... بلاها ناقصنها ريل ولا ايد

حمده: حمدوووه شيخةالحريم.. تروح حجرتها و ترقد.. صح ابويه

ابو عمر: محد غير ريم شيخة الحريم.. ويلا ساعدي خواتج بدال الرقاد,,, باجر بتعرسين.. بتسيرين بيت ريلج دون ما تتعلمين الطبخ... انف عليج..

عذابه: لا يابويه... هاي عندها 10طبابيخ... صح حمدوه

حمده: لا غلط... ان شاء الله ابويه... بغير ثيابي و بدخل المطبخ

ام عمر: الله راضي علينا اليوم... حمده بتطبخ و خلود عقلت...

 

عقب ماغيرت حمده ثيابها.. دخلت المطبخ تساعد اختها خلود...

حمده: يا سلااااااام... شو هالريحه الغاويه

خلود: ماطعمتي عيل

حمده: ناوليني انزين قطعة الكيكة

خلود: هب الحينه

حمده: الا قطعة صغيرونه

خلود: قلتلج هب الحينه

حمده: هيه اكيد... الاكل ها كله حق عزوز

خلود: شو عزوز بعد

حمده: اقصد عبدالعزيز

خلود: هيه حق عبدالعزيز

حمده: يا حليله ما بيتهنى بالاكل

خلود: ليش

حمده: شو ليش بعد... لانه بينراغ قبل مايذوق

خلود: ومنو بيروغه

حمده: منو غيرج يعني

خلود: لا حبيبتي .. من قالج اني بروغه

حمده: لانه هاللي يستوي دوم

خلود: مابيتسوي هالمره

حمده: يعني صدقه ابويه

خلود: ليش شو قال ابويه

حمده: قال انج بتغيرين رايج و يمكن توافقين

خلود: هب يمكن

حمده: عيل

خلود: اكيد

حمده: يا ويلي انا عالمستحى... اكيد بعد

خلود: بسج عاد.. و يلا اشتغلي بدال الهذربه

حمده: بتخبرج يوم انج بتوافقين ليش اتخيسين الريال سنين

خلود: مادري.. غيري الموضوع احسن.. وينهن خواتج عيل

حمده: عذوب في حجرتها عليها بروجكت تبغي تخلصه.. وريماني في حجرتها بعد

خلود: ما تلاحظين انه الريم متغيره هاليومين

حمده: الصراحه الكل في البيت متغير

خلود: شو قصدج

حمده: اول شي انتي... متغيره 180 درجه.. وافقتي على عبدالعزيز... وعذوب اللي من طلاق عمر و هي جالبه حياتها فوق تحت.. طبعا عسب الغالي خليفة.. و عمر..ولا جنه عنده عيال المفروض يسال عنهم و يطالعهم.. اللهم يفكر في عمره و بس.. و لا بعد ما قال برجع البيت بعده عايش في شقة الحريه.. و فيصل.. عاد هذا غير عنكم.. مادري بلاه .. يوم يشوف علياء بن عمي ينعفس و يتغير حاله تقول ياهل عاطينه مصاصه.. و الحينه ريماني.. عاد هاي ماعرف شو اقولج عنها

خلود: بلاها الريم

حمده: ان خبرتج بتقولين لحد

خلود: هيه .. بنشر الخبر في الfm ولا الجزيره

حمده: ارمس جد انزين

خلود: بذمتج يعني بخبر منو

حمده: انزين.. اليوم ريم

خلود: بلاها

حمده: ولا اقول... خلاص ماشي

خلود: بتقولين ولا لا

حمده: لا

خلود: انجلعي انزين

حمده: اصلا روحي كنت بظهر لاني هب ويه طباخ.. فديت اللي في بالي.. بييبلي بدال الطباخ

خلود: 10 ادري.. حفظناها القصيده

حمده: خلود.. ليش ما تفكرين تساعدينا

خلود: شقايل يعني اساعدج

حمده: يعني مثلا ساعدي عذوبه

خلود: اساعدها بشو

حمده: يعني مثلا ليش ماترمسين الهنوف عن عذابه

خلود: وشو اقول حق الهنوف

حمده: انشديها بلاه اخوها متغير

خلود: يعني ماتدرين ليش متغير.. اخوج مطلق اخته وفار نها هيه وعيالها في بيتهم لا ينشد عن عياله ولا يزورهم حتى فلوس مايعطيهم.. ابويه حليله اللي دوم يصرف عليهم.. يعني بذ متج في واحد يرضى على اخته هالشي.. ولا بعد من منو .. من اقرب الناس من ولد عمه حسبة اخوه

حمده: بس عذابه مالها ذنب

خلود: حتى خليفة ماله ذنب... بس محد يقدر يستحمل الذل يا حمده.. انا والله مالي ويه اسير بيتهم...

حمده: انتي رمسي الهنوف وما بتخسرين شي

خلود: يعني نبيع اختنا

حمده: شو نبيعها انتي بعد

خلود: تراج توج تقولين عذابه مالها ذنب.. وخليفة لو يبغيها بياخذها.. يعني هالفتره اللي ماطاعت عذابه تاخذ خليفة صبر عليها و اتحملها.. خلاص عيل .. خلها عذوب تصبر عليه و تتحمله بعد...خلها تحس كيف يكون شعوره يوم اللي يحبها يقطعها و يجافيها

حمده: بس والله حرام.. اخاف اللي بينهم ينهدم

خلود: لا تخافين.. خليفة يحب عذابه و اللي يمر فيه الحينه مابيستمر و صدقيني بيردلها مره ثانيه

حمده: بيرد لو عمر صلح كل شي

خلود: عمر ما منه فايده.. مايفكر يصلح أي شي.. عمر يفكر يعرس و ياخذله وحده ثانيه

حمده : صـــــــــــــــــــــــد ق!!!!!!!

خلود: هيه...

حمده: منو قالج

خلود: محد... المهم شوفي شغلج احسلج من الهذربه

Link to comment
Share on other sites

Join the conversation

You can post now and register later. If you have an account, sign in now to post with your account.

Guest
الرد على هذا الموضوع...

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.

Loading...

×
×
  • Create New...