Emeeez Posted سبتمبر 7, 2005 Report Share Posted سبتمبر 7, 2005 قصة لم اطرح افكارها في بالي بعد..... لكن سأجعل اناملي هي التي تكتب الافكار....ونرى ماتخطه يداي..... ستكون مختلفه قليلا عن شمعة حياتي.... اتمنى ان تنال اعجابكم...... طبعا ارائكم تهمني لكي اواصل الكتابه.... ( قصتي الثانيه....) لولا الأمـــل... الجزء الأول.... في غرفه باااااااارده...بس الظلام والصمت اللي يسودون الغرفه....ومحد يقدر يغير هالاجواء الا هي.... بوعبدالله وبوخالد..واقفين عند الباب يطلون على اللي حابسه روحها بالغرفه... بوعبدالله: صار لها ثلاث سنين وهي على هالحال.... موب راضيه تتقبل الواقع واللي صار بوخالد والذهول على ويهه: ثلاث سنين؟؟؟؟ معقوله؟؟؟ ولااحد قدر يطلعها من اللي هي فيه الحين؟؟؟ انت ابوها ماقدرت تطلعها من هالشي وهي اللي تضحي بروحها عشان بس تسعدك و لاتكدرك بيوم من الايام... بوعبدالله وهو يتنهد من الالم والحسره على بنته الوحيده: هذا اللي حصل بوخالد: الله يشفيها ان شاء الله وترد لك مثل الاول....بس انت لا تخليها جذي ...حاول تغيرها...خل صديقاتها يزورونها...بنات خالتها...بناتت عماتها...اي احد...عالاقل تطلع من الحاله اللي هي فيها الحين بوعبدالله: مافاد هالشي معاها..كلهم حاولوا يتقربون منها بس هي ماتعطيهم فرصه....من احد يجرب يمها على طول تصارخ...ماتسكت الا اذا طلعوا من غرفتها...زين بعد تسمح للخدامه تنظف غرفتها وتجهز لها الاكل.....حتى الاكل تاكله بروحها...ماترضى تشاركني .... بوخالد: لا حول ولاقوة الا بالله....خل نروح نقعد بالصاله...قلبي مايطاوعني اجوفها وهي بهالحاله.....غبت عنها هالثلاث سنين كانت ورده متفتحه....مليانه البيت بضحكها وغشمرتها....الحين ايي وكل شي متغير...البيت حده كئيب....اه يالقهر.... بوعبدالله: بوخالد...ادخل لها..يمكن لي جافتك تتغير نفسيتها شوي...اتعرف اشكثر متعلقه فيك هي...واشكثر تحبك...اكبر دليل انها تناديك بابا مثل ماتناديني... بوخالد: خوفي تتضايق اكثر لما تجوفني.... لاني ماكنت معاها يوم صار اللي صار...ماكنت موجود عشان اخفف عنها ضيقها وحزنها... بوعبدالله: ادخل عليها...يمكن تنطق بشي ...واللي يسلمك ياخوي...حاول معاها... بوخالد وقلبه حده يعوره على حالة اخوه وحالة بنت اخوه: ان شاء الله ان شاء الله...بس انت لا تدخل معاي بوعبدالله: لا ماراح ادخل...باوقف هني يم الباب... فتح بوخالد الباب اكثر عشان يدخل الغرفه...بوعبدالله كان واقف عند الباب يطل عليهم.... عبير كانت قاعده عالكرسي الهزاز يم الدريشه....الستاره مغطيه على نور الشمس....وهالشي مخلي الغرفه كئيبه وايد...تهزالكرسي على ورا وجدام....وبالها سرحان بعيد.......حتى ماحست لدخول عمها الغرفه.... بوخالد شوي شوي قاعد يجرب منها...وقلبه ينقبض زود بكل خطوه يخطيها......لما جرب منها حس انها موب حاسه لوجود احد بالغرفه.... حط يده على شعرها الاسود الطويل.. باس راسها وقعد عالارض يمها وهو ميود يدها البارده مثل الثلج.... بوخالد: شلون عصفورتي اليوم؟؟؟ عبير تفاجئت من وجود عمها....مو مصدقه ان ابوها الثاني واقف يمها...طالعته بنظره بارده ...كلها الم وحزن ولوم... بوخالد...حس من نظراتها انها قاعده تلومه على بعاده عنها طول هالفتره....بس هالشي غصبا عنه...وماكان يدري بحالتها...والا جان رجع من قبل ولا خلاها تصير جذي... بوخالد بصوت واطي: ماقالت لي عصفورتي...ِشلونها الحين؟؟؟ تحس روحها تبي تصارخ..تبي تطلع الحزن اللي بقلبها كله على عمها الحين... عبير وهي رافعه ظهرها عن الكرسي: وينك من زمان؟؟؟ وين كنت عني؟؟ ليش خليتني اعاني بروحي....ليش خليتني وانت اكثر واحد جريب مني؟؟؟ معقوله طول هالفتره مافكرت تسأل عني؟؟ محد قال لك شنو صار لي؟؟؟ مافكرت تيي تزورني ولا يوم واحد عالاقل؟؟؟ صرت مااهمك خلاص؟؟؟ ليش عاد؟؟؟ ليش؟؟ ليش؟؟؟!! بوخالد ماقدر ايود روحه...على طول لمها بين ايدينه..وقعد يصيح بقوه معاها.... بوعبدالله حط يده على الطوف اللي بره ....وقعد يصيح هو الثاني بعد.. مااستحمل الموقف اللي قاعد يصير جدامه....ولا يستحمل جوفة بنته جذي....كل مني انا..انا السبب...انا اللي خليتها تصير جذي...ياريتني ارجع ثلاث سنين واغير اللي صار..ياريت ياريت....اااااااااااااااه.... بوخالد: سامحيني....والله ماكنت ادري....ولما دريت على طول ييت لج.... عبير وهي للحين تصيح: ثلاث سنين؟؟؟ ثلاث سنين حرمتني من جوفتك؟؟؟ قلبك طاوعك تخليني وتروح؟؟؟طاوعك تنسى كل لحظة عشناها في هالبيت انا وانت وابوي؟؟؟ طاوعك تنسى عصفورتك عبير؟؟ بوخالد..والحسره تعصر قلبه...يكلم روحه...( لوتدرين شنو اللي خلاني اقطعكم كلكم جان عذرتيني..بس مشكلتي ماقدر ابوح حق احد هالشي...قلت البعاد عنكم احسن..بس مادريت من بعد بعادي راح تنقلب حياتكم جذي....) عبير نظراتها تلاحق عمها اللي قاعد يصيح بقوه ...مستغربه من صياحه هالكثر..تتساءل بينها وبين نفسها..لهالدرجه حالتي مأساه اللي تخليك تصيح بقوه علي جذي...والا شي ثاني؟؟؟ بوخالد: سامحيني...سامحيني..... عبير بس لامته وتصيح....ماتقدر تنطق بشي ثاني اكثر...... بوخالد لما جاف لمتها له بكل شوق وحنان..لا شعوريا قعد يغني لها اغنيتها المفضله لما كانت صغيره....حس وهي قاعده على حضنه عبير بعمر الست سنوات.... بوخالد: ماما...زمنها جايه....جايه بعد شوي....جايبه لعاب وحاجات..جايبه معاها شنطه فيها وزه وبطه..بتقول واك واك.... تم يردد الاغنيه فوق الاربع مرات..بصوت كله حب ودفا.... انتبه لعبير وجافها غاطه بنومه عميقه...حسها مارقدت ثلاث سنين...والحين بس ذاقت طعم النوم.... باسها عل جبينها...وباس ايدينها...شالها من عالارض....حطاها على سريرها....غطاها عن البرد...طلع من الغرفه وصك الباب من وراه.... جاف بوعبدالله وعينه حمره من الصياح... بوخالد: لا تسوي بروحك جذي يابو عبدالله...كلها جم يوم بس وترد لك مثل الاول بوعبدالله: شلون ترد لي مثل الاول وهي موب طايقه تجوف رقعة ويهي... بوخالد: ماعلي ياخوي..لازم تعذرها...اللي مرت فيه موب سهل....ومردها بتسامحك يوم من الايام..روح غسل ويهك...تيدد..صل لك ركعتين ...وارتاح شوي..دامها تحجت معاي شوي يعني راح تتحسن حالتها يوعبدالله: الله يسمع منك ادري تبون تعرفون شالسالفه؟؟؟ ليش عبير جذي؟؟؟ بوخالد وين كان طول هالفتره وليش كان بعيد عنهم؟؟ بوعبدالله شنو سوى لبنته وخلاها تصير بهالحاله؟؟؟ انتظروا علي شوي شوي .. عشان تعرفون كل شي بالتفصيل.... عبير بنت حبوبه عمرها 22 سنه.....شعرها طويل اسود مثل ماقلت لكم... لونها مايل للبرونز....بشرتها صاااااااافيه...عينها عسليه.....وعندها خفسه صغيره على حنجها محليه ويهها كله... كانت بثاني سنه جامعه لما صار اللي صار... بوعبدالله..ابو عبير.... كان عنده ولد اسمه عبدالله... بس توفى مع زوجته اللي هي ام عبير قبل 16 سنه بحادث سياره....وبقت له بس بنته عبير اللي ملت عليه حياته كلها.... بوخالد...يصير عم عبير... عمره الحين 36 سنه....وهو اقرب واحد لعبير ...من كان عمره 20 سنه هو متعلق فيها...محد يقدر يصارخ او يطقها بوجودها معاه....اصلا ماكان يفارقها الا لما كان يروح الشغل.....حتى تنادي بابا....وهالشي حرم بوخالد من الزواج.... تتساءلون بعد شلون اسمه بوخالد وهو مو متزوج؟؟؟ اسمه وليد...عشان جذي الناس تنادي بوخالد ...ومشى عليه هالاسم .... يعني حصلت بدال ابو واحد اثنين....وهالشي عوضها عن غياب امها و اخوها اللي كان دوم يلعب معاها..... بمنطقة المحرق....بالبيت العود.....اللي هو يصير بيت يدة عبير ( ام امها ) هاله: ايديده...ايديده... اليده: عيون ايديده.... هاله: خل نروح اليوم بيت خالتي سناء ( ام عبير)...ابي اجوف عبير اليده: مافي فايده من روحتنا....ماراح تسمح لاحد يدخل عليها هاله: لو من بعيد بس ...والله قلبي يعورني عليها...مااقدر ماجوفها..ابي اتطمن عليها ام هاله كانت طالعه من المطبخ ويايه الصاله: بعدين بنروح لها ... هاله بوناسه: صج يمه؟؟ متى بعدين؟؟؟ ام هاله: بعد صلاة المغرب هاله باحباط وحزن: بعيييييييييد الوقت يمه...لالا خل نروح الحين اليده: الحين من بيوديكم؟؟؟مافي سياره؟؟ابوج واخوانج بالشغل.... هاله: اووووووووووف...قلت لكم اخذوا لي سياره..جان الحين ماننتظر احد يودينا مكان ام هاله: موب كفايه السياره اللي كنسلتيها...تبين ناخذ لج سياره ثانيه وتنكسلينها بعد هاله: لا ماباكنسلها....بامشي بحذر ام هاله: يصير خير.... هاله وهي تقوم من عالكرسي: خل اتصل في علووووي اجوف متى بيردون ام هاله: يعني متى يردون.. اكيد الساعه 5 والا تستهبلين بس هاله: علوي قال لي يمكن يرد البيت من وقت اليوم...لان عنده جم شغله بيسويها فبيطلع من وقت من الشركه اليده: خبر ابوج عن هالشي.؟؟ ام هاله: اكيد خبره يمه...والا مابخليه يطلع بدون استئذان راحت هاله اتصلت فيه علوي اخوها اللي قال ل ها ان بيرد متأخر ...وتضايقت زود... هاله بعمر عبير....وتوها السنه خلصت البكالوريوس.... درست على حساب الوزاره علوم كمبيوتر....وراح تشتغل مدرسه كمبيوتر بمدرسة ثانوي مع بداية السنه.... علي اخوها عمره 25 سنه واخوها الثاني عامر عمره 24 سنه....يشتغلون بشركة ابوهم... علي اجرب واحد لهاله....اسرارهم كلها عند بعض..... بيتهم لاصق ببيت يدتهم..فكل يوم بعد مايروحون اخوانها وابوها الشغل..يقعدون مع يدتهم في بيتها... في شركة ابو هاله ( ابو علي) بمكتب عامر... عامر: ياحياتي...ابي بس اجوفج..لو من بعيد بس عامر: ليش عاد؟؟؟ لهالدرجه مااستاهل؟؟ عامر: فديت الضحكه انا... عامر: لالالا...جذي انا ازعل...انتي لازم تحسين فيني...لازم تعرفين اشكثر جمالج اسر قلبي... عامر: حبيبتي...ليش اقص عليج...اصلا انا اموت فيج..... وهو يسولف دخل عليه ابوه المكتب....عامر كان حاط ريل ريل عالمكتب...ويلعب بواير التلفون...ومتسمت عالاخر...من جاف ابوه على طول صك التلفون وتعدل بقعدته..... بوعلي: انت يعني ماعندك شغل؟؟؟ من ادخل اجوفك ترضع بهالتلفون... عامر: لا يبا خلصت شغلي بوعلي: خلصت طل بويهك.... والله من الشهر الياي كل واحد يدفع بيل تلفون مكتبه...موب حاله هذي...كل شهر البيل اشطول ... عامر: يبا..... بوعلي: وحطبه...يالله يالله خل نمشي.... امك من مساعه تتصل فينا.. عامر: ان شاء الله يبا... خذ الجاكيت من عالكرسي..ولحق ابوه... نهاية الجزء الاول.... انتظر ردودكم....اذا حسيت القصه تستاهل التكمله من خلال ردودكم راح اكملها..... تسلمون وتحياتي.... ســـمــــره Quote Link to comment Share on other sites More sharing options...
يارا Posted سبتمبر 7, 2005 Report Share Posted سبتمبر 7, 2005 في البداية حبيت اهنئج على قصة شمعة حياتي اللي كانت ولا اروع واللحين اقولج كملي القصة اللي امبين عليها حلوة ومشكووورة على البارت القصير ويعطيج الف عافية يسلمواااا بلييييز لا تتاخرييييين Quote Link to comment Share on other sites More sharing options...
Emeeez Posted سبتمبر 8, 2005 Author Report Share Posted سبتمبر 8, 2005 تسلمين يارا حبيبتي عالمرور... ان شاء الله ماتأخر... Quote Link to comment Share on other sites More sharing options...
Emeeez Posted سبتمبر 8, 2005 Author Report Share Posted سبتمبر 8, 2005 قولوا رايكم بالقصه عشان اقدر انزل الباقي... انتظر ردودكم... Quote Link to comment Share on other sites More sharing options...
شهد Posted سبتمبر 9, 2005 Report Share Posted سبتمبر 9, 2005 (edited) القصة واااايد حلللوة ومشوقة ابي اعرف شلي صار لعبييير بسسسسرعة (فضولية) وننتظر التكملة باسرع وقت تحياتي : شهد Edited سبتمبر 9, 2005 by شهد Quote Link to comment Share on other sites More sharing options...
Emeeez Posted سبتمبر 9, 2005 Author Report Share Posted سبتمبر 9, 2005 يسلموووو شهد عالمشاركه.... الكاتبه قالت اذا في اقبال وايد عالقصه راح تنزل البارت الثاني. تحياتي Quote Link to comment Share on other sites More sharing options...
شهد Posted سبتمبر 10, 2005 Report Share Posted سبتمبر 10, 2005 يلا انة متشوقة اعرف الاحداث الجاية Quote Link to comment Share on other sites More sharing options...
Emeeez Posted سبتمبر 11, 2005 Author Report Share Posted سبتمبر 11, 2005 لولا الأمـــل الجزء الثاني.... في بيت صغير وقديم...يدل على حالة الفقر اللي هم عايشين فيها....... كانت قاعده بغرفة ولدها الصغير....ميوده صورته تطالع فيها....والدموع ماوقفت ولادقيقه من عينها....تصيح بحسره على ولدها اللي ضاع....تكلم صورته اللي كانت تتمنى تكلمه هو...تتخيل ان قاعد يسمعها..... ام ابراهيم: ياليتك سمعت كلامي ..جان ماصار اللي صار....قلت لك ذلين ناس انت موب من قدهم...لكن ماطعتني...عبالك ماابي مصلحتك...شنو استفدت من عنادك؟؟ ولاشي ..غير انك ضيعت عمرك وحسرتني عليك.....وقفت كلامها وخلت صياحها يكمل عنها الكلام اللي تبي تقوله..... من وراها كان ولدها المتوسط عيسى....يطالعها بكل حزن ...وتكدر عالحاله اللي هي فيها.... تحرك يمها...حط ايده على ظهرها...وقعد يكلمها بهدووووء مراعاة لحالتها بهالوقت... عيسى: يالغاليه...لي متى بتمين جذي؟؟؟ والله قلبي يتقطع وانا اجوفج جذي مسحت ام ابراهيم دموعها بشيلتها...ورفعت راسها عشان تكلم ولدها: مااقدر ياعيسى....اللي صار حق اخوك اياد موب شي سهل....حاولت انسى اللي صار...بس ماقدرت... الحادث كل يوم يمر ببالي...مااقدر ابعد الصوره البشعه بذاك اليوم عني..... عيسى: حاولي تنسين اللي صار....احنا محتاجينج الحين....ردي ام ابراهيم الاوليه...ام ابراهيم اللي كانت تداري عيالها بكل وقت....انتي عبالج احنا موب متضايقين مثلج؟؟؟ اياد اخونا...واللي صار له اثر فينا كلنا...ولليوم قاعد يأثر فينا...بس ماخلينا اللي صار يكون عائق بحياتنا.... ام ابراهيم: اعرف اني اهملتكم طول هالفتره بس هالشي غصبا عني...مو بارادتي عيسى: يايمه ..ياحبيبتي....حاولي ...انتي ماحاولتي تطلعين روحج من العزله اللي انتي فيها...ابوي محتاج لج ..اختي نهاد وايد متضايقه عليج...حتى ماتحب تجوف احد ولا احد ايي ازورها بسبب الوضع اللي انتي فيه... ام ابراهيم...تعرف اشكثر هي مقصره على اعيالها وريلها....بس هالشي غصبا عنها..لليوم موب قادره تتقبل اللي صار باياد.... ابتسمت ابتسامه بارده لعيسى وسألته: عيسى عيسى: عيون عيسى...روح عيسى ام ابراهيم: ابراهيم مااتصل اليوم؟؟ عيسى بايتسامه: بس ابراهيم اللي تسألين عنه...واحنا يعني مانستاهل ؟؟ ام ابراهيم: كلكم تستاهلون يمه...بس تعرف لازم اعرف اخبار ابراهيم يوم بيوم عيسى: وابوي؟؟ ترى بحالتج هذي بيفكر يعرس عليج بعدين ..لانج ماقاعده تهتمين فيه ام ابراهيم: ههه..الله يغربل ابليسك...تبي ابوك يعرس علي ها؟؟ عيسى مستانس ان قدر يضحك امه شوي: اي ضحكي شوي...خلينا نحس ان الدنيا للحين بخير.. ام ابراهيم ردت عليه بابتسامه منها بس عيسى: يعني من اليوم تيين تقعدين معانا...ونحاول نرجع جو البيت مثل قبل.... ام ابراهيم: اقعد معاكم اليوم....بس مااعتقد جو البيت راح يرجع مثل قبل عيسى: يــــمــــه....لاتحبطيني جذي...خلي هالشي يتغير مع الايام ...انزين يالغاليه؟؟ ام ابراهيم: انزين عيسى: بعد عمري....الله لا يحرمنا منج...ويطول بعمرج وبعمر ابوي ان شاء الله طلع من غرفة اياد وهو حده مستانس....ام ابراهيم تمت قاعده بالغرفه... اكلمكم شوي عن بيت ام ابراهيم.... ام ا براهيم ام لثلاث صبيان وبنت وحده... ابراهيم 28 سنه...عيسى 26 سنه وهو أوسم واحد في اخوانه....هم كلهم حلوين بس هو احلى...اياد 24 سنه...واخر العنقود نهاد 20 سنه ابراهيم حاليا بره البحرين...بالتحديد هو ببريطانيا..ماراح اقول لكم ليش..بعدين بتعرفون... عيسى يشتغل بالقياده العامه (جندي)... اياد كان يدرس بالجامعه ويشتغل بنفس الوقت في بنك...بس شنو صار له؟؟ وشنو سالفته؟؟ راح تعرفونها بعدين اما نهاد..فهي بسنة ثالثه بجامعة البحرين.... ابوابراهيم...متقاعد يشغل روحه بجم شغله مع اصدقائه المتقاعدين...وعلاقته وايد قويه مع عياله...بس اللي صار خلاه هو ومرته لاهيين عن عيالهم.... حالتهم انقلبت فوق تحت بسبة ولدهم اياد....بس هم مايقدرون يلومونه على هالشي...لان يمكن يصير حق اي واحد بسنه وبوضعه... نهاد هالحزه بغرفتها....هالحزه قصدت فيها العصر... قاعده تقرا كتاب قصص الانبياء.....اليوم ابتدت تقرا قصة سيدنا يوسف عليها السلام.....كانت وايد منمدجه بقراءتها...العلامه اللي مرتسمه على ويهها توضح هالشي.... عيسى كان ياي لها الغرفه...طق عليها الباب عشان يدخل نهاد: تفضل عيسى: قوه نهوووود نهاد: هلا هلا عيسى عيسى: شتسوين؟؟ نهاد: اقرا قصة سيدنا يوسف عليه السلام عيسى: عليه السلام نهاد: صج تغربل بحياته...شلون اخوانه حاقدين عليه هالكثر...وشلون لهم قلب يقطونه في البئر ويمشون عنه عيسى: للحين ماقريتي شي...مع قرايتج بتعرفين احداث وايد صارت له..حتى ماتبين توقفين ولا دقيقه..بيصير عندج فضول غير طبيبعي...تبين تعرفين كل شي عن حياته.... نهاد: صج؟؟ عيسى: اي...تعرفين انا اشكثر قريتها؟؟ فوق العشر مرات...وبعد ابي اقراها نهاد: والله زين.... حطت يدها داخل الكتاب وصكت عليها....تعدلت شوي بقعدتها... نهاد: انزين قول لي اشعندك؟؟ عيسى وهو يضحك: ههه..تعرفين ياييب لج اخبار ها نهاد: اكيد..انت ماتيي لي الا بالاخبار عيسى: ههه...امي من اليوم بتقعد معانا..لا وبتتعشى معانا بعد نهاد فزت من مكانها بسرعه: صج؟؟؟ من متى هالحجي؟؟؟ عيسى: من خمس دقايق بس نهاد: من اقنعها؟؟ عيسى: انا؟؟؟ نهاد: اخيرا..مابغت تطلع روحها من العزله اللي فيها عيسى: اي والله...اخيرا نهاد: الفال حق ابوي بعد عيسى: ابوي لا تحاتينه..دام امي تغيرت..يعني ابوي بيتغير بعد نهاد: الله يسمع منك في مجمع الدانه...عند السينما.. افنان: خل ندخل هالفيلم..وايد حلويقولون سعاد: لا دخلت انا هالفيلم .. سهام: كل الافلام داخلتها انتي...جذي ولا فيلم بنقدر نجوف افنان: سعادووو...بندخل هالفيلم خلاص..مافي افلام ثانيه...واذا ماتبين تدخلين قعدي بروحج في اي كوفي شوب لي مانطلع سعاد: اشفيكم كليتوني....بس بادخل معاكم شاسوي اقعد بروحي افنان: اي عبالي بعد... بعد ماشروا التذاكر راحوا يشترون بوب كورن مع كولا سهام بحزن: مسكينه عبير...يبين مكانها...لو هي الحين معانا جان بنستانس وايد سعاد بحزن: اي..كانت تسوي لنا برنامج داخل السينما... افنان تبي تغير الجو: انزين لا تقلبونها حزن الحين... خذي بوب كورنج انتي بسرعه افنان اجرب وحده لعبير...تتضايق وايد لما احد يتكلم عن حالة رفيجتها..عشان جذي من تسمع سالفة عبير على طول تغير الموضوع.... عبير من الحادث ماعطت افنان فرصه ان توقف يمها...كانت مبتعده عن الكل...ماتبي تجوف اي احد..وأولهم ابوها....بس افنان كل يوم تمر بيت عبير تسأل عليه....ا وحاولت اكثر من مره ان تكلمها بس مافي امل..... افنان بينها وبين نفسها: ماادري لي متى بتمين جذي يا عبير....ثلاث سنين الحين ماسمحتي لي اكلمج وانا اجرب وحده لج....انا عاذره تصرفج ... بس هالشي موب لصالحج...راح يضرج اكثر... الله يهديج وترجعين مثل اول ....والله واحشتني قعداتنا وسوالفنا مع بعض....متى ترد هالايام مره ثانيه..متى بس... كملت مشيها هي والبنات لصالة السينما .. يناقش روحه بروحه....والحزن طاغي عليه بالكامل.... بوخالد: وصلتي لهالحاله مره وحده؟؟ وانا اللي اعرف ان قلبج قوي وتقدرين تواجهين اي صدمه تتعرضين لها....بس للاسف هالمره الصدمه كانت اكبر من ان تتحملينها....ياليتني كنت موجود وقتها ولا خليتج توصلين للي وصلتي له الحين....جذي بيكون صعب علينا وايد ان نخليج ترجعين مثل ماكنتي...الله يقدرنا على هالشي..... بوعبدالله كان نازل من فوق ..جاف بوخالد قاعد بالصاله بروحه ... بوعبدالله: انت هني؟؟؟ انا عبالي رحت غرفتك ترتاح بوخالد وين ارتاح وعبير بهالحاله بوعبدالله: عيل شتقول عن حالتي..وانا اللي صار لي ثلاث سنين اجوفها بهالحاله بوخالد: اسمح لي ياخوي من الكلام اللي باقوله لك....ومابيك تزعل مني بوعبدالله: انا مازعل منك ...واي شي ايي منك اقدر اتقبله بوخالد: اللي صار لعبير منك انت....اي منك انت... قلت لك وافق على اللي هي تبيه..بس انت كنت تعاند...المظاهر وايد كانت تغرك... شنو فادتك المظاهر الحين؟؟؟ غير ان بنتك صارت تعاني بحاله نفسيه بسببك.... والصبي مات من تخطيطاتك اللي سويتها عليه... بوعبدالله ماكان ينطق بأي شي... بس يسمع بوخالد يتحجى... بوخالد وهو يكمل كلامه: تسوى عليك هالعيشه اللي عايشها انت الحين؟؟؟ بنتك ماراح تسامحك خلاص...لان اللي سويته فيها موب شوي.... واهل الصبي ماراح يسامحونك ولا يحللونك طول عمرهم....حرمتهم من ولدهم وهو توه بعز شبابه..حرام اللي سويته ياخوي ياحرام....مايسوي جذي غير اللي ماعنده ضمير ...وانت واحد ماعندك قلب ولارحمه ....حط روحك بمكانه... هه طبعا ماتقدر تحط روحك...لانك واحد مغرور وماتتخيل مستواك يكون مثل مستوى الصبي المسكين... بوعبدالله ماقدر يستحمل كلام اكثر من اخوه...على طول قام مكانه وصرخ بويهه بوعبدالله: بس...من مساعه وانت تذبحني بكلامك هذا....ماعطيتني فرصه حتى ارد عليك... سكت شوي وواصل كلامه مره ثانيه: انا اعرف اني كنت غلطان باللي سويته كله...ونادم عليه بعيد...ليومك هذا مااقدر اسامح نفسي على هالشي...بس انا ماقلت لهم يذبحونه...قلت لهم يأدبونه بوخالد قطع عليه: تأديبك هذا ادى ا لى موته بوعبدالله حده معصب: الصبي يا بوخالد ما مااااات...للحين عايش بوخالد وقف مذهول: شنو؟؟؟ بوعبدالله: اي ما مات.... الصبي انا طرشته بره عشان يتعالج... بوخالد: وليش ماقلت لعبير؟؟ بوعبدالله: ماعطتني هالفرصه عشان اقول لها... بوعبدالله تم يقول لأخوه شنو صار بالضبط ...وشلون عبالهم الصبي مات وهو للحين عايش... على جسر المحرق اليديد... واقف يطالع البحر....والحزن كله شايله بقلبه على حالة عبير.... علي: لواقدر اطلعج من هالحاله بس.....والله قلبي يتقطع عليج....خمس سنين وانا احاول ابوح لج بمشاعري بس ماقدرت....اخرتها اكتشف ان قلبج لواحد ثاني....ياحظه هالشخص اللي قدر يبادلج مشاعره وتبادلينه مشاعرج.....يمكن هذي فرصتي الحين اني اصارحج بحبي....دام قلبج خالي...بس شلون اكلمج؟؟ شلون اطلعج من العزله اللي انتي فيها...سويت كل شي عشان اتقرب منج بس مافي فايده..... تم واقف جذي...والافكار تودي وتييب فيه عشان يحصل طريقه وحده بس تقربه من عبير.... اتصلت فيه بهالوقت اخته هاله.... هاله: الووو علي: هلا هالواا هاله: وينك انت؟؟؟ صارت الساعه 7 وانت للحين ماييت علي: ليش؟؟ في شي؟؟ هاله: اي نبي نروح بيت خالتي سناء...ونبيك توصلنا علي اقشعر جسمه من سمع ان بيروحون بيت خالته: صج!! هاله وقلبها يعورها على اخوها ...تعرف اشكثر هو يحب عبير: اي صج!! علي: ليش ابوي مايوديكم او عامر؟؟ هاله: ابوي عنده شغل وايد..وعامر تلاقيه يفتر بالمجمعات ورا البنات علي: ههه..انزين...خمس دقايق وانا عندكم هاله: ليش وين انت الحين؟؟ علي: هني...عند جسر المحرق هاله: اوكي...ننتظرك..باي علي: باي نهاية الجزء الثاني... تحياتي... Quote Link to comment Share on other sites More sharing options...
شهد Posted سبتمبر 11, 2005 Report Share Posted سبتمبر 11, 2005 ثاااااانكس في انتظار الجزء الجديد ونبي نعرف اشصار لعبير بالضبط بااااااااااااااااي Quote Link to comment Share on other sites More sharing options...
Emeeez Posted سبتمبر 12, 2005 Author Report Share Posted سبتمبر 12, 2005 يسلموووو شهد عالمرور... Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.